📜
အဋ္ဌတိံသတိမ ပရိစ္ဆေဒ
ဒသရာဇကော
မဟာနာမ ¶ သုတော အာသိ၊ ဒမိဠီ ကုစ္ဆိသမ္ဘဝေါ၊
သောတ္ထိသေနော၊ တထာသင်္ဃော-ဓီတာ စာ’သိ မဟေသိယာ။
သောတ္ထိသေနော တဒါ ရဇ္ဇံ၊ ပတွာ သင်္ဃယနာသိတော၊
တသ္မိံယေဝ ဒိနေ ဘေရိံ၊ စရာပေတွာ တဒါ တု သာ။
အတ္တနော သာမိကဿဒါ၊ ဆတ္တဂ္ဂါဟကဇန္တုနော၊
ဆတ္တဂ္ဂါဟကဝါပိံ သော၊ ကတွာ သံဝစ္ဆရေ မတော။
အထ မစ္စော မဟာပညော၊ သဟာယော တဿ တံ မတံ၊
အန္တောဝတ္ထုမှိ ဈာပေတွာ၊ ဝီဟိစောရံ မဟာဗလံ။
ရဇ္ဇယောဂ္ဂေါတိ စိန္တေတွာ၊ ကတွာ တံ ဘူပတိံ ရဟော၊
အန္တောယေဝ နိဝါသေတွာ၊ ရာဇာ ရောဂါတုရော ဣတိ။
ယသံ ရဇ္ဇံ ဝိစာရေသိ၊ ဆဏေ ပတ္တေ မဟာဇနာ၊
ရာဇာ စေ အတ္ထိ အမှေဟိ၊ သဒ္ဓိံ မေတူတိ ဃောသယုံ။
တံ သုတွာ နရပါလော သော၊ သဗ္ဗလင်္ကာရမဏ္ဍိတော၊
သမာနံတေ မဟာနာဂေ၊ နေသယောဂ္ဂါ မမာ’တိသော။
ဒါဋ္ဌာဓာတုဃရဌာနေ၊ သုဝါ နာဂံ သမာဒိသိ၊
ရညော အာဏာတိ ဝုတ္တေ သော၊ အဂါ အာရုယှ တံ ပုရံ။
ကတွာ ပဒက္ခိဏံ ဂန္တွာ၊ ပါစိနဒွါရတော ဗဟိ၊
ပဌမေ စေတိယဌာနေ၊ ဓာတုနာဂံ သမပ္ပယိ။
မဟာစေတိတ္တယေ ဟတ္ထိ-ပါကာရေ’ကာသိ တောရဏံ၊
မိတ္တသေနော ဗဟုံ ပုညံ၊ ကတွာ ဝဿေန သော စုတော။
မိတ္တသေနံ ရဏေ ဟန္တွာ၊ ဒမိဠော ပဏ္ဍုနာမကော၊
အာဂတော ပရတီရမှာ၊ လင်္ကာရဇ္ဇမကာရယိ။
ဇနာ ကုလီနာ သဗ္ဗေပိ၊ ရောဟဏံ သမုပါဂတာ၊
ဩရဂင်္ဂါယ ဣဿေရံ၊ ဒမိဠာ ဧဝ ကပ္ပယုံ။
ယေ ¶ သုဘဿ ဗလဋ္ဌဿ၊ ဘီတာမောရိယဝံသဇာ၊
ဗလာယိတွာ နရာဝါသံ၊ ကပ္ပယိံသု တဟိံ တဟိံ။
တေသမညတမော နန္ဒိ-ဝါပိ ဂါမေ ကုဋိမ္ဗကော၊
ဓာတုသေနဝှယော အာသိ၊ ဒါဌာနာမော စ တံ သုတော။
ဂါမေ အမ္ဗိလယာဂုမှိ၊ ဝသံ ပုတ္တေ ဒုဝေ လဘိ၊
ဓာတုသေနံ သိလာတိဿ-ဗောဓိံစ သမ္ပဇာတိကေ။
မာတုသော ဒရိယော တေသံ၊ သဒ္ဓါ ပဗ္ဗဇ္ဇ ဝတ္တတိ၊
ဒီဃသန္ဒကတာဝါသေ၊ ဓာတုသေနာပိ မာဏဝေါ။
သန္တိကေ တဿ ပဗ္ဗဇ္ဇ-ရုက္ခမူလမှိ ဧကဒါ၊
သဇ္ဈာယတိ ပဝိဿိတ္ထ၊ မေဃော နာဂေါတုပဿိယ။
ပရိက္ခိပိတွာ ဘောဂေဟိ၊ ဆာဒယိတွာ ဖဏေန စ၊
ပေါတ္ထကဉ္စ ကုမာရဉ္စ၊ ရက္ခိတံ ပဿိ မာတုလော။
သီသေ အာကိရိ သင်္ကာရံ၊ တဿ ရုဋ္ဌော ပရောယတိ၊
တသ္မိံ စိတ္တံ န ဒူသေသိ၊ တမ္ပိ ဒိသွာန မာတုလော။
ဥတ္တမော ဝတ’ယံ သတ္တော၊ ရာဇာ ဟေဿတိ နိစ္ဆယံ၊
ရက္ခိတဗ္ဗော’တိ အာဒါယ၊ တံ ဝိဟာရမုပါဂတော။
ဂေါဏိသာဒိ ဝိဟာရေ’ယံ၊ ကတ္တဗ္ဗော နီတိမာ ဣတိ၊
သိက္ခာပေသိ ကုမာရံ တံ၊ ပဏ္ဍုကော တံ ဝိဇာနိယ။
ဂဏှထေတန္တိပေသေသိ၊ သေဝကေ တဿာရတ္တိယံ၊
ဒိသွာန သုပိနံ ထေရော၊ နီဟရိတ္ထ ကုမာရကံ။
တသ္မိံ နိက္ခန္တမတ္တမှိ၊ သေဝကံ ပရိဝါရိယ၊
ပရိဝေဏေ န ပဿိံသု၊ တတော နိက္ခမ္မ တေ ဥဘော။
ဒက္ခိဏသ္မိံ ဒိသာဘာဂေ၊ ဂေါဏ နာမံ မဟာနဒိံ၊
ပတွာ သမ္ပုဏ္ဏမဋ္ဌံသု၊ ဂန္တုကာမာပိ ဝေဂသာ။
ယထာ နဒိယံ ဝါရေတိ၊ အမှေ တံ တွမ္ပိ ဝါရယ၊
ဝါပိံဂဟေတွာ ဧတ္ထေ’တိ၊ ဝတွာ ထေရော တဒါ နဒိံ။
ဩတရိတ္ထကုမာရေန၊ သဒ္ဓိံ ဒိသွာန တေ ဥဘော၊
နာဂရာဇာ တဒါ ဧကော၊ ပိဋ္ဌိံ ပါဒါသိ တေန သော။
ဥတ္တရိတွာ ကုမာရံ တံ၊ နေတွာ ပစ္စန္တမာဝသံ၊
လဒ္ဓါ ခီရောဒနံ သုတွာ၊ သေသံ ပတ္တေန တဿ’ဒါ။
စိတ္တကာရေန ¶ ထေရမှိ၊ ဘတ္တံ ပက္ခိပ္ပ ဘူမိယံ၊
ဘုဉ္ဇိ ထေရောပိ တံ ဇာနိ၊ ဘုဉ္ဇ တေ ယံ မဟိံ ဣတိ။
ပဏ္ဍုရာဇာပိ ကတွာန၊ ရဇ္ဇံ ဝဿမှိ ပဉ္စမေ၊
စုတော ပုတ္တော ပိပါရိန္ဒော၊ တတိယော တဿ ဘာတုကော။
ကဏိဋ္ဌော ခုဒ္ဒပါရိန္ဒော၊ ကုဗ္ဗံ ရဇ္ဇံ မဟာမဟိံ၊
ဓာတုသေနာနုဂေ သဗ္ဗေ၊ ဝိဟေဌေသိ မဟာဇနေ။
သင်္ဂဟေတွာ ဇနေ သာဓု-သေနော ယုဇ္ဇိတ္ထ ရာဇိနာ၊
သော သောဠသဟိ ဝဿေဟိ၊ ပုညပါပကရောမတော။
နိရိတရော တတော အာသိ၊ ရာဇာမာသဒွယေန တံ၊
ဓာတုသေနော ဝိနာသေသိ၊ တေန ကတွာ မဟာဟဝံ။
ဟတေ တသ္မိံ မဟီပါလေ၊ ဒါဌိယော ဒမိဠော တတော၊
ရာဇာ ဝဿတ္ထ ယေ ဟုတွာ၊ ဓာတုသေနဟတောတတော။
ပိဋ္ဌိယော ဒမိဠော သတ္တ-မာသေန နိဓနံ ဂတော၊
ဓာတုသေနေန ယုဇ္ဈိတွာ၊ ဝံသော ပစ္ဆိဇ္ဇိ ဒါမိဠော။
အထာ’သိ ရာဇာလင်္ကာယံ၊ ဓာတုသေနော ဣရာဓိပေါ၊
ဘာတရာ သဟ ဒီပမှိ၊ ဒမိဠေ ဒီပဃာတကေ။
ဥပါယေဟိ အနေကေယိ၊ ဧကဝီသပ္ပမာဏကေ၊
ခန္ဓဝါရေ နိဝေသေတွာ၊ ကတွာ ယုဒ္ဓမသေသတော။
သောဓေတွာ မေဒိနိံ သာဓု၊ ကတွာ စ သုခိတံဇနံ၊
သာသနဉ္စ ယထာဌာနေ၊ ဌပေသိ ပရနာသိတံ။
ဒမိဠေ ယေ’နုဝတ္တိံသု၊ ကုလီနာ ကုလဂါမဝါ၊
တေ မံ ဝါ သာသနံ ဝါ နော၊ ရက္ခိံသူ’တိ ပကုပ္ပိယ။
တေသံ ဂါမေ ဂဟေတွာန၊ ဂါမေ သွာကာသိရက္ခကေ၊
ရောဟဏာ’ဂမ္မ တေ သဗ္ဗေ၊ ကုလီနာ တမုပဋ္ဌဟုံ။
တေသံ သက္ကာရသမ္မာနံ၊ ယထာယောဂမကာသိ သော၊
အမစ္စေ အတ္တနော ဒုက္ခ-သဟာယေစာ’ဘိ တောသယိ။
ဗန္ဓာပေတွာ မဟာဂင်္ဂံ၊ ကေဒါရေ’ကာ ထိရောဒကေ၊
မဟာပါဠမှိ ဘိက္ခူနံ၊ သာလိဘတ္တဉ္စ ဒါပယိ။
ပင်္ဂုရောဂါ တုရဋ္ဋာနံ၊ သာလာယောကာသိ ဗုဒ္ဓိမာ၊
ကာဠဝါပိံစ ဂဏှိတွာ၊ ဗန္ဓိ ဂေါဏံ မဟာနဒိံ။
မဟာဝိဟာရံ ¶ ကတွာန၊ ပန္တိယုတ္တမနာကုလံ၊
တထာ ဗောဓိဃရဉ္စေဝ၊ ဒဿနေယျ မကာရယိ။
ဘိက္ခဝေါ ပရိတောသေတွာ၊ ပစ္စယေဟိ စတူဟိပိ၊
ဓမ္မာသောကော’ဝ သောကာသိ၊ သင်္ဂဟံ ပိဋကတ္တယေ။
အဋ္ဌာရသဝိဟာရေ စ၊ ထေရိယာန မကာရယိ၊
သမ္ပန္နဘောဂေ ဒီပမှိ၊ အဋ္ဌာရသ စ ဝါပိယော။
ကာဠဝါပီ ဝိဟာရော စ၊ ကောဋိပဿာဝနာမကော၊
ဒက္ခိဏ ဂိရိနာမော စ၊ ဝိဟာရော ဝဍ္ဎမာနကော။
ပဏ္ဏဝလ္လကဘူတော စ၊ ဘလ္လာတကသနာမကော၊
ပါသာဏသိန္နေ ဒေသမှိ၊ ဓာတုသေနော စ ပဗ္ဗတော။
မံ ဂနော ထူပဝိဋ္ဌိ စ၊ ဓာတုသေနောပိ ဥတ္တရေ၊
ပါစိန ကမ္ဗဝိဋ္ဌိ စ၊ တထာ အန္တရမေ ဂိရိ။
အန္တာဠိ ဓာတုသေနော စ၊ ကဿပိဋ္ဌိက ပုဗ္ဗကော၊
ရောဟဏေဒါယဂါမော စ၊ သာလဝါဏော ဝိဘီသနော။
ဝိဟာရော ဘလ္လိဝါဏော စ၊ အဋ္ဌာရသနရုတ္တမော၊
ပါဒူလကံ ဟမ္ဗလဋ္ဌိ၊ မဟာဒတ္ထာဒိဝါပိ ယော။
ခုဒ္ဒကေ စ ဝိဟာရေသော၊ အဋ္ဌာရသနရုတ္တမော၊
ဝါပီယော စ တထာကတွာ၊ တေသမေဝ တု ဒါပယိ။
ပဉ္စဝီသတိ ဟတ္ထဉ္စ၊ မယူရပရိဝေဏကံ၊
ဟရိတွာ’ကာသိပါသာဒ-မေကဝီသတိ ဟတ္ထကံ။
ကုမာရသေနဿ’ပေတွာ၊ ပုဗ္ဗဘောဂံ ဝိသောဓယိ၊
ကာဠဝါပိမ္မိဘာဂဒ္ဓံ၊ ခေတ္တာနဉ္စ သတဒွယံ။
လောဟ ပါသဒကေ ဇိဏ္ဏေ၊ နဝကမ္မမကာရယိ၊
မဟာထူပေသု ဆတ္တာနိ၊ တီသု ဇိဏ္ဏာနိ ကာရယိ။
ဒေဝါနံပိယတိဿေန၊ ကတံ ဗောဓိမဟံ ဝိယ၊
သိနှာနပူဇံ ဗောဓိဿ၊ ဝရဗောဓိဿ ကာရယိ။
ဓာဝနာ လောဘနာဝါယော၊ တတ္ထ ပူဇေသိ သောဠသ၊
အလင်္ကာရံ မုနိန္ဒဿ၊ အဘိသေကဉ္စ ကာရယိ။
မဟာဗောဓိ ပတိဋ္ဌာနာ၊ ဩရံ လင်္ကာယ ဘူမိပါ၊
ယာဝ ဒွါဒသမံ ဝဿံ၊ ဗောဓိပူဇမကာရယုံ။
မဟာမဟိန္ဒတ္ထေရဿ ¶ ၊ ကာရေတွာ ပဋိဗိမ္ဗကံ၊
ထေရဿာ’လာဟနံ နေတွာ၊ ကာတုံ ပူဇံ မဟာရဟံ။
ဒတွာ သဟဿံ ဒီပေတုံ၊ ဒီပဝံသံ သမာဒိသိ၊
ဌိတာနံ တတ္ထ ဘိက္ခူနံ၊ ဒါတုဉ္စာဏာပယိဂုဠံ။
ဘိက္ခုဿ အတ္တနော သီသေ၊ သင်္ကာရောကိရဏံ သရံ၊
လာဘံ နာဒါသိ ဝုတ္ထဿ၊ ပရိဝေဏဿ အတ္တနော။
ဖာတိကမ္မံ ဗဟုံ’ကာသိ၊ ဝိဟာရေ အဘယုတ္တရေ၊
သိလာသတ္ထုဿ ကာရေသိ၊ မန္ဒိရဉ္စ သမဏ္ဍပံ။
ဗုဒ္ဓ ဒါသကတေနေတ္တေ၊ နဋ္ဌေ’နဂ္ဃမဏိ ဒွယံ၊
အကာသိ နေတ္တံ သတ္ထုဿ၊ ရံသိ စူဠာမဏိံတထာ။
မဏိဟိ ဃနနီလေဟိ၊ ကေသာ ဝတ္တံ သုမုတ္တမံ၊
ဟေမပဋ္ဋံ တထေဝုဏ္ဏ-လောမံ သောဝဏ္ဏ စီဝရံ။
ပါဒဇာလံ သုဝဏ္ဏဿ၊ ပဒုမံ ဒီပမုတ္တမံ၊
နာနာရာဂမ္ဗရံ တတ္ထ၊ ပူဇယိတ္ထ အသံခိယံ။
အကာသိ ပဋိမာ ဂေဟေ၊ ဗဟုမင်္ဂလစေတိယေ၊
ဗောဓိသတ္တေ တထာ’ကာသိ၊ ကာဠသေလဿ သတ္ထုနော။
ဥပသုမ္ဘဝှယဿာပိ၊ လောကနာထဿ ကာရယိ၊
ရံသီစူဠာမဏိဉ္စေဝ၊ အဘိသေကဝှယဿ စ။
ဗုဒ္ဓဗိမ္ဗဿ ကာရေသိ၊ ပုဗ္ဗေ ဝုတ္တံ ပိဠန္ဓနံ၊
ဝါမပဿမှိ ဗောဓိဿ၊ ဗောဓိသတ္တဃရံ တထာ။
မေတ္တေယျဿ စ ကာရေသိ၊ သဗ္ဗံ ရာဇပိဠန္ဓနံ၊
သမန္တာ ယောဇနေ တဿ၊ တဒါ ရက္ခဉ္စ ယောဇယိ။
ကာရာပေသိ ဝိဟာရေသု၊ ဓာတုရာဇဝှပန္တိယော၊
တထာ သတသဟဿေန၊ မဟာဗောဓိဃရံ ဝရံ။
ထူပါရမမှိ ထူပဿ၊ ပူဇံ ဇိဏ္ဏဝိသောဓနံ၊
ဒါဌာ ဓာတုဃရေစာပိ၊ ဇိဏ္ဏဿ ပဋိသင်္ခရံ။
ဒါဌာဓာတုကရုဏ္ဍဉ္စ၊ ရံသိဉ္စ ဃနကောဋ္ဋိမံ၊
မဟဂ္ဃမနိသံကိဏ္ဏံ၊ သုဝဏ္ဏ ပဒုမာနိ စ။
ဒါဌာဓာတုမှိ ပူဇေသိ၊ ပူဇာစာကာ အသင်္ခိယာ၊
စီဝရာဒီနိ ဒါပေသိ၊ ဘိက္ခူနံ ဒီပဝါသိနံ။
ကာရာပေတွာ ¶ ဝိဟာရေသု၊ နဝကမ္မံ တဟိံ တဟိံ၊
ပါကာရေ စ ဃရေတွာ’ကာ၊ သုဓာကမ္မံ မနောဟရံ။
မဟာစေတိတ္တယေ ကတွာ၊ သုဓာကမ္မံ မဟာရဟံ၊
သုဝဏ္ဏဆတ္တံ ကာရေသိ၊ တထာ ဝဇိရစုမ္ဗဋံ။
မဟာဝိဟာရေ ပါပေန၊ မဟာသေနေန နာသိတေ၊
ဝသိသုံ ဓမ္မရုစိကာ၊ ဘိက္ခူ စေတိယပဗ္ဗတေ။
ကတွာ အမ္ဗတ္ထလံ ထေရ-ဝါဒါနံ ဒါတု ကာမကော၊
ယာစိတော တေဟိ တေသံ’ဝ၊ အဒါသိ ဓရဏီ ပတိ။
ဒါတု ပဌာနနာဝဉ္စ၊ ကာရေတွာ ကံသလောဟဇံ၊
ဒါနဝဋ္ဋံ ပဝတ္တေသိ၊ အမ္ဗဏေဘိ ဒွိပဉ္စဟိ။
အန္တော ဗဟိ စ ကာရေတွာ၊ နဂရဿ ဇိနာလယေ၊
ပဋိမာယော စ ပူဇေသိ၊ ဓမ္မာသောကသမော’သမော။
တဿ ပုညာနိ သဗ္ဗာနိ၊ ဝတ္ထု ပဋိပဒံ နရော၊
ကော ဟိ နာမ သမတ္ထောတိ၊ မုခမတ္တံ နိဒဿိတံ။
တဿ ပုတ္တဒုဝေ အာသုံ၊ ကဿပေါ ဘိန္နမာတိကော၊
သမာနမာတိကော စေဝ၊ မောဂ္ဂလ္လာနော မဟဗ္ဗလော။
တထာ ပါဏသမာ ဧကာ၊ ဒုဟိတာ စ မနောရမာ၊
ဘာဂိနေယျဿ ပါဒါသိ၊ သေနာပစ္စဉ္စ တဉ္စ သော။
ဝိနာ ဒေါသေန တာဠေသိ၊ ကသာယူရုသု သော’ပိတံ၊
ရာဇာ ဒိသွာန ဒုဟိတု-ဝတ္ထံ လောဟိတမက္ခိတံ။
ဉတွာ တံ မာတရံ တဿ၊ နဂ္ဂံ ဈပေသိ ကုဇ္ဈိယ၊
တတောပ္ပဘုတိသော ဗဒ္ဓ-ဝေရော သင်္ဂမ္မ ကဿပံ။
ရဇ္ဇေ နေတံ ပလောဘေတွာ၊ ဘိန္ဒိတွာ ပိတုအန္တရေ၊
သင်္ဂဟေတွာ ဇနံ ဇဝ-ဂါဟံ ဂါဟာပယီ ပတိံ။
ဥဿာပေသိ တတော ဆတ္တံ၊ ကဿပေါ ပိတုပက္ခိယေ၊
ဝိနာသေတွာ ဇနေ လဒ္ဓ-သဗ္ဗပါပသဟာယကော။
မောဂ္ဂလ္လာနော တတော တေန၊
ကာတုကာမော မဟာဟဝံ၊
အလဒ္ဓ ဗလတာယ’ဂါ၊
ဇမ္ဗုဒီပ ဗလတ္ထိကော။
မဟာရဇ္ဇ ¶ ဝိနာသေန၊ ဝိယောဂေန စ သူနုနော၊
ဗဒ္ဓနာဂါရဝါသေန၊ ဒုက္ခိတမ္ပိ ဒုရာဓိပံ။
ဒုက္ခာပေတုမပညောသော၊ အာဟ ကဿပရာဇကံ၊
နိဓိ ရာဇကုလေရာဇ-ဂုတ္တ တေ ပိတရာ ဣတိ။
နေ’တိ ဂုတ္တေ န ဇာနာသိ၊ စိတ္တမေတဿ ဘူမိပ၊
မောဂ္ဂလ္လာနဿ ကာပေတိ၊ နိဓိံသောတိ တဒဗြူဝိ။
သုတွာ တံ ကုပိတော ဒူတေ၊ ပါဟေသီ ပိတုသန္တိကံ၊
အာစိက္ခတု နိဓိဌာန-မိတိ ဝတွာ နရာဓမော။
မာရေတု အမှေ ပါပဿ၊ တဿုပါယော’တိ စိန္တိယ၊
တုဏှီ အဟောသိ တေ ဂန္တွာ၊ ရာဇကဿ နိဝေဒယုံ။
တတော’တီဝ ပကုပ္ပိတွာ၊ ပေသယိတ္ထ ပုနပ္ပုနံ၊
သာဓု ဒိသွာ သဟာယမ္မေ၊ နှတွာန ကာဠဝါပိယံ။
ပရိဿာမီတိ စိန္တေတွာ၊ အာဟ ဒူတေ သစေ မမံ၊
ကာဠဝါပိံသမာပေတိ၊ သက္ကာ ဉာတုန္တိ တေ ဂတာ။
ရညော အာဟံသု ရာဇာပိ၊ တုဋ္ဌဟဋ္ဌော ဓနတ္ထိကော၊
ပေသေသိ ဒူတေ ဒတွာန၊ ရထံ ဇိဏ္ဏေန ဝါဇိနာ။
ဧဝံ ဂစ္ဆတိ ဘူပါလေ၊ ပါဇေန္တော ရထိကော ရထံ၊
ခါဒန္တော လာဇမဿာပိ၊ ကိဉ္စိ မတ္တံ အဒါသိ သော။
တံ ခါဒိတွာ ပသီဒိတွာ၊ တသ္မိံ ပါဏမဒါ တဒါ၊
မောဂ္ဂလ္လာနဿ တံ ကာတုံ၊ သင်္ဂဟံ ဒွါရနာယကံ။
ဧဝံ သမ္ပတ္တိယော နာမ၊ စလာ ဝိဇ္ဇုလ္လတောပမာ၊
တသ္မာ တာသု ပမဇ္ဇေယျ၊ ကော ဟိ နာမ သစေတနော။
ရာဇာ ဧတီတိသုတွာန၊ ထေရော သော တဿ သောဟ ဒေါ၊
လဒ္ဓါ မာသောဒနံ မံသံ၊ သာဏုဏဉ္စ ဝရံ သရံ။
ရာဇာ ရောစေတိ ဧတန္တိ၊ ဂေါပယိတွာ ဥပါဝိသိ၊
ဂန္တွာ ရာဇာပိ ဝန္ဒိတွာ၊ ဧကမန္တမုပါဝိသီ။
ဧဝံ နိသိန္နာ သမ္ပတ္တ-ရဇ္ဇာ ဝိယ ဥဘောပိ တေ၊
အညမညာ’ဘိလာပေန၊ နိဗ္ဗာပေသုံ မဟာဒရံ။
ဘောဇယိတွာန တံ ထေရော၊ ဩဝဒိတွာ အနေကဓာ၊
အပ္ပမာဒေ နိယောဇေသိ၊ ဒဿေတွာ လောကဓမ္မတံ။
တတော ¶ ဝါပီ မုပဂမ္မ၊ ဩဂ္ဂယှိတွာ ယထာ သုခံ၊
နှယိတွာ ပိဝိတွာ စ၊ အာဟေဝံ ရာဇသေဝကေ။
ဧတ္တကံ မေ ဓနံ ဘော’တိ၊ သုတွာ တံ ရာဇသေဝကာ၊
အာပရိတွာ ပုရံရညော၊ နိဝေဒေသုံ နိရိဿရော။
ဓနံ ရက္ခတိ ပုတ္တဿ၊ ဒီပေ ဘိန္ဒတိ မာနုသေ၊
ဇီဝန္တော’ယံတီ ကုဇ္ဈိတွာ၊ အာဏာပေသိ စမူပတိံ။
မာရေဟိ ပိတရံ မေတိ၊ ဒိဋ္ဌာ ပိဋ္ဌီတိ ဝေရိနော၊
ဟဋ္ဌတုဋ္ဌော တိရုဋ္ဌောသော၊ သဗ္ဗာလင်္ကရမဏ္ဍိတော။
ရာဇာနမုပသင်္ကမ္မ၊ ပုရတော စ’ဿ စင်္ကမိ၊
ရာဇာဒိသွာ စ စိန္တေသိ၊ ပါပိယော’ယံ မတံ မမ။
ကာယံ ဝိယ ဒုက္ခာပေတွာ၊ နရကံ ဟေတု မိစ္ဆတိ၊
ရောသုပ္ပာဒေန တဿေဝ၊ ကိံပုရေမိ မနောရထံ။
ဣတိ မေတ္တာယမာနော တံ၊ အာဟ သေနာပတိံ ပတိ၊
မောဂ္ဂလ္လာနေ တွယိစေဝ၊ ဧကစိတ္တော အဟံ ဣတိ။
ဟသံစာလေသိ သီသံသော၊ ဒိသွာ တံ ဇာနိဘူပတိ၊
‘‘နူန မာရေတိ အဇ္ဇာ’’တိ၊ တဒါ သာဟသိကောပိ သော။
နဂ္ဂံ ကတွာန ရာဇာနံ၊ သသင်္ခလိက ဗန္ဓနံ၊
ပုရတ္ထာဘိမုခံ ကတွာ၊ အန္တောဗန္ဓိယ ဘိတ္တိယံ။
မတ္တိကာယ ဝိလိမ္ပေသိ၊ ဧဝံ ဒိသွာပိ ပဏ္ဍိတော၊
ကော ဟိ ရဇ္ဇေယျ ဘောဂေသု၊ ဇီဝိတေပိ ယသေပိ ဝါ။
ဓာတုသေနော နရိန္ဒော သော၊ ဧဝံ ပုတ္တဟတော ဂတော၊
အဋ္ဌာရသဟိ ဝဿေဟိ၊ ဒေဝရာဇဿ သန္တိကံ။
ကာဠဝါပီ မယံ ရာဇာ၊ ကာရာပေန္တော သမာဟိတံ၊
ပဿိတွာ ဘိက္ခုမေတန္တု၊ ဝုဋ္ဌာပေတုံ သမာဓိတော။
အသက္ကောန္တော ခိပါပေသိ၊ ပံသုံ ဘိက္ခုဿ မတ္ထကေ၊
သန္ဓိဋ္ဌိကော ဝိပါကောယံ၊ တဿ ကမ္မဿ ဒီပိတော။
ဒသာပိတေ ¶ ရာဇဝရာ သဘောဂါ၊
ဥပါဂမုံ မစ္စုမုခံ သဘောဝါ၊
အနိစ္စတံ ဘောဂဝတော ဓနေ စ၊
ဒိသွာ သပညော ဝိဘဝံ ဣစ္ဆေ။
သုဇနပ္ပသာဒသံဝေဂတ္ထာယ ကတေ မဟာဝံသေ
ဒသရာဇကော နာမ
အဋ္ဌတိံသတိဧမာ ပရိစ္ဆေဒေါ။