📜
ဧကူနစတ္တာလီသတိမ ပရိစ္ဆေဒ
ရာဇဒွယဒီပနော
တတော ကဿပနာမော သော၊ ပါပကော နရပါလကော၊
အဿ ဂေါ ပဉ္စသူဒဉ္စ၊ ပေသယိတွာန ဘာတိကံ။
မာရာပေတုံ အသက္ကောန္တော၊ ဘီတော သီဟဂိရိံ ဂတော၊
ဒုရာရောဟံ မနုဿေဟိ၊ သောဓာပေတွာ သမန္တတော။
ပါကာရေန ပရိက္ခိပ္ပ၊ သီဟာကာရေန ကာရယိ၊
တတ္ထ နိဿေဏိ ဂေဟာနိ၊ တေန တံ နာမကော အဟူ။
သံဟရိတွာ ဓနံ တတ္ထ၊ နိဒဟိတွာ သုဂေါပိတံ၊
အတ္တနော နိဟိတာနံ သော၊ ရက္ခံ ဒတွာ တဟိံ တဟိံ။
ကတွာ ရာဇဃရံ တတ္ထ၊ ဒဿနေယျံ မနောရမံ၊
ဒုတိယာလကမန္ဒံဝ၊ ကုဝေရောဝ တဟိံ ဝသိ။
မိဂါရော နာမ ကာရေသိ၊ သေနာပတိ သနာမကံ၊
ပရိဝေဏံ တထာဂေဟ-မဘိသေကဇိနိဿ စ။
တဿာဘိသေကံ ယာစိတွာ၊ သိလာသမ္ဗုဒ္ဓတော’ဓိရံ၊
အလဒ္ဓါသာမိ နော ရဇ္ဇေ၊ ဇာနိဿာမီတိ သဏ္ဌဟိ။
ဟုတွာ ဝိပ္ပဋိသာရီ သော၊ အတ္တနာ ကတကမ္မနာ၊
မုစ္စိဿာမိ ကတံ နု’တိ၊ ပုညံ ကာသိ အနပ္ပကံ။
မဟာ ¶ ဝတ္ထုနိ ကာရေသိ၊ ဒွါရေသု နဂရဿ သော၊
အမ္ဗုယျာနေ စ ကာရေသိ၊ ဒီပေ ယောဇန ယောဇနေ။
ဣဿရသမဏာရာမံ၊ ကာရေတွာ ပုဗ္ဗဝတ္ထုတော၊
အဓိကံ ဘောဂဂါမေ စ၊ အဓိကံ တဿ ဒါပယိ။
ဗောဓိ ဥပ္ပလဝဏ္ဏာ စ၊ တဿာသုံ ဓီတရော ဒုဝေ၊
ဝိဟာရဿ’ဿ ကာရေသိ၊ နာမံ တာသဉ္စ အတ္တနော။
ဒေန္တေ တသ္မိံ န ဣစ္ဆိံသု၊ သမဏာ ထေရဝါဒိနော၊
‘‘ပိတုဃာတိဿ ကမ္မ’’န္တိ၊ လောကဂါရယှ ဘီရုနော။
ဒါတုကာမောသ တေသံ’ဝ၊ သမ္ဗုဒ္ဓ ပဋိမာယ’ဒါ၊
ဘိက္ခဝေ အဓိဝါသေသုံ၊ ဘောဂေါ နော သတ္ထုနော ဣတိ။
ကထာ နိယျန္တိ ဥယျာနေ၊ သမီပေ ပဗ္ဗတဿ သော၊
ကာရာပေသိ ဝိဟာရံ သော၊ တေသံ နာမော တတော အဟု။
အဒါ ဓမ္မရုစိနံ တံ၊ သမ္ပတ္တ စတုပစ္စယံ၊
ဝိဟာရဉ္စေဝ ဥယျာနံ၊ ဒိသာဘာဂမှိ ဥတ္တရေ။
ဘတ္တံ သနီရပက္ကံ သော၊ ဘုဉ္ဇိတွာ ဒိန္နမိတ္ထိယာ၊
သပ္ပိယုတ္တံ မနုညေဟိ၊ သူပေဟိ အဘိသင်္ခတံ။
မနုညမိဒမယျာနံ၊ ဒဿမေဝန္တိ တာဒိသံ၊
ဘတ္တံ ပါဒါသိ ဘိက္ခူနံ၊ သဗ္ဗေသဉ္စ သစီဝရံ။
ဥပေါသထမဓိဋ္ဌာသိ၊ အပ္ပမညဉ္စ ဘာဝယိ၊
သမာဒိယိ ဓုတင်္ဂေ စ၊ လိခါပေသိ စ ပေါတ္ထကေ။
ပဋိမာဒါန သာလာဒိံ၊ ကာရာပေသိ အနပ္ပကံ၊
ဘိတော သော ပရလောကမှာ၊ မောဂ္ဂလ္လာနာ စ ဝတ္တတိ။
တတော အဋ္ဌာရသေ ဝဿေ၊ မောဂ္ဂလ္လာနော မဟာဘဋော၊
အာဒေသေန နိဂဏ္ဌာနံ၊ ဒွါဒသဂ္ဂသဟာယ ဝါ။
ဇမ္ဗုဒီပါ ဣဓာဂမ္မ၊ ဒေသေ အမ္ဗဋ္ဌကောလကေ၊
ကုဠာရီ နာမေ ဗန္ဓိတ္ထ၊ ဝိဟာရေ ဗလသဉ္စယံ။
ရာဇာ သုတွာ ဂဟေတွာ တံ၊ ဘဉ္ဇိဿာမိတိ နိက္ခမိ၊
နေမိတ္တေဟိ န သက္ကာတိ၊ ဝဒန္တေပိ မဟာဗလော။
မောဂ္ဂလ္လာနောပိ သန္နဒ္ဓ ဗလော သူရသဟာယ ဝါ၊
ဂစ္ဆန္တော သုရသင်္ဂါမံ၊ ဒေဝေါ ဝိယ သုဇမ္ပတိ။
အညမညံ ¶ ဥပါဂမ္မ၊ ဘိန္နဝေလာဝ သာဂရာ၊
အာရဘိံသု မဟာယုဒ္ဓံ၊ ဗလကာယာ ဥဘောပိ တေ။
ကဿပေါ ပုရတော ဒိသွာ၊ မဟန္တံ ကဒ္ဒမာသယံ၊
ဂန္တုမညေန မဂ္ဂေန၊ ပရိဝတ္တေသိ ဒန္တိနံ။
ဒိသွာ တံ သာမိကောနော’ယံ၊ ပလာယတိ ဘဏေ ဣတိ၊
ဗလကာယော ပဘိဇ္ဇိတ္ထ၊ ‘‘ဒိဋ္ဌံ ပိဌ’’န္တိ ဃောသယုံ။
မောဂ္ဂလာန ဗလာရာဇာ၊ ဆေတွာ နိကရဏေန သော၊
သီသံ ဥက္ခိပိယာ’ကာသံ၊ ဆုရိကံ ကောသိယံ ခိပိ။
ကတွာ’ဠာဟန ကိစ္စံ သော၊ တဿ ကမ္မေ ပသီဒိယ၊
သဗ္ဗံသော ဓနမာဒါယ၊ အာဂဉ္ဆိ နဂရံ ဝရံ။
ဘိက္ခူ သုတွာ ပဝတ္တိံ တံ၊ သုနိဝတ္ထာ သုပါရုတာ၊
သမ္မဇ္ဇိတွာ ဝိဟာရဉ္စ၊ အဋ္ဌံသု ပဋိပါဋိယာ။
မဟာမေဃဝနံ ပတွာ၊ ဒေဝရာဇာဝ နန္ဒနံ၊
မဟာသေန နိဝတ္တေတွာ၊ ဟတ္ထိပါကာရတော ဗဟိ။
ဥပသင်္ကမ္မ ဝန္ဒိတွာ၊ သင်္ဃေ တသ္မိံ ပသီဒိယ၊
ဆတ္တတ္တေန သင်္ဃံ ပူဇေသိ၊ သင်္ဃော တဿေဝ တံ အဒါ။
တံ ဌာနံ ဆတ္တဝဍ္ဎီတိ၊ ဝေါဟရိံသု တဟိံ ကတံ၊
ပရိဝေဏမ္ပိ တံ နာမံ၊ အဟောသိ ပုရမာဂတော။
ဝိဟာရေ ဒွေပိ ဂန္တွာန၊ သင်္ဃံ တတ္ထာ’ဘိဝန္ဒိယ၊
ပါပုဏိတွာ မဟာရဇ္ဇံ၊ လောကံ ဓမ္မေန ပါလယိ။
ကုဒ္ဓါ နီဟရိ ဒါဌံသော၊ ဃာတကံ ပိတုနော မမ၊
အနုဝတ္တိတွာ မစ္စာတိ၊ တေန ရက္ခသ နာမ ဝါ။
အတိရေကသဟဿံ သော၊ အမစ္စာနံ ဝိနာသယိ၊
ကဏ္ဏနာသာဒိ ဆေဒေသိ၊ ပဗ္ဗာဇေသိ တထာ ဗဟူ။
တတော သုတွာန သဒ္ဓမ္မ-မုပသန္နော သုမာနသော၊
မဟာဒါနံ ပဝတ္တေသိ၊ မေဃော ဝိယ မဟီတလေ။
ဖုဿပုဏ္ဏမီယံ ဒါန-မနုဝဿံ ပဝတ္တယိ၊
တတော ပဋ္ဌာယ တံ ဒါနံ၊ ဒီပေ အဇ္ဇာပိ ဝတ္တတိ။
သောပိ သာရထိကော လာဇ-ဒါယကော ပိတုရာဇိနော၊
အာနေတွာ ပိတုသန္ဒေ သံ၊ မောဂ္ဂလ္လာနဿ ဒဿယိ။
တံ ¶ ဒိသွာ ပရိဒေဝိတွာ၊ ပိတုနော ပေမ မတ္တနီ၊
ဝဏ္ဏေတွာ တဿ ပါဒါသိ၊ ဒွါရနာယကတံ ဝိဘူ။
သေနာပတိ မိဂါရောဟိ၊ နိဝေဒေတွာ ယထာ ဝိဓိံ၊
အဘိသေက ဇိနဿာ’ကာ၊ အဘိသေကံ ယထာရုစိံ။
သီဟာ’စလေ ဒဠှနာမံ၊ ဒါဌာ ကောဏ္ဍညကမ္ပိ စ၊
ဝိဟာရံ ဓမ္မရုစိနံ၊ သာဂလိနဉ္စ ဒါပယိ။
ပဗ္ဗတန္တု ဝိဟာရံသော၊ ကတွာ ထေရဿ ဒါပယိ၊
မဟာနာမသနာမဿ၊ ဒီဃသဏ္ဍ ဝိဟာရကေ။
ရာဇိနိနာမကဉ္စေဝ၊ ကတွာ ဘိက္ခုနုပဿယံ၊
အဒါ သာဂလိကာနံ သော၊ ဘိက္ခုနီနံ မဟာမတိ။
လမ္ဗကဏ္ဏကဂေါတ္တောပိ၊ ဒါဌာ ပဘုတိ နာမကော၊
ကဿပဿ ဥပဌာနေ၊ ကောစိ နိဗ္ဗိန္န မာနသော။
ဂန္တာ မေ ရေလိယံ ဝဂ္ဂံ၊
ဝါသံ တတ္ထေဝ ကပ္ပယိ၊
အဟောသိ ပုတ္တော တဿေကော၊
သိလာကာ လောတိ ပိဿုတော။
သောပိ ကဿပတော ဘီတော၊ ဉာတကေန သဟ’တ္တနော၊
မောဂ္ဂလ္လာနေန ဂန္တွာန၊ ဇမ္ဗုဒီပတလံ ဣတော။
ဗောဓိပဏ္ဍဝိဟာရမ္ပိ၊ ပဗ္ဗဇ္ဇံ သမုပါဂတော၊
ကရောန္တော သင်္ဃကိစ္စာနိ၊ သာဒရော သော သုပေသလော။
အမ္မံ သင်္ဃဿ ပါဒါသိ၊ သင်္ဃော တသ္မိံ ပသီဒိယ၊
အာဟ’မ္ဗ သာမဏေရော’တိ၊ တေန တံ နာမကော အဟု။
သော ကေသဓာတုဝံသမှိ၊ ဝုတ္တေန ဝိဓိနာ တတော၊
ကေသဓာတုံ လဘိတွာန၊ တဿ ရဇ္ဇေ ဣဓာ’နယိ။
တဿ ကတွာန သက္ကာရံ၊ ဂဟေတွာ ကေသ ဓာတုယော၊
မဟဂ္ဃေ နိဒဟိတွာန၊ ကရဏ္ဍေ ဖလိကုမ္ဘဝှေ။
ဒီပင်္ကရဿ နာထဿ၊ ပဋိမာယ ဃရေ ဝရေ၊
ဝဍ္ဎေတွာ ပရိဟာရေန၊ မဟာပူဇံ ပဝတ္တယိ။
မာတုလံ ဘရိယဉ္စ’ဿ၊ ကတွာ သောဝဏ္ဏယံ တဟိံ၊
ဌပေသိ ပဋိမာယော စ၊ အဿ ဗိမ္ဗဉ္စ စာရုကံ။
ကေသဓာတုကရဏ္ဍဉ္စ ¶ ၊ ဆတ္တံ ရတနမဏ္ဍပံ၊
သာဝကဂ္ဂယုံဂံ ဝါဠ-ဗီဇနိဉ္စ သကာရယိ။
ပရိဟာရဉ္စ တဿ’ဒါ၊ ရာဇာ အဓိကမတ္တနော၊
သိလာကာဠ မသိဂ္ဂါဟံ၊ ကတွာ ရက္ခာယ ယောဇယိ။
အသိဂ္ဂါဟသိလာကာဠော၊ ဣတိ တေနာ’သိ ဝိဿုတော၊
ဘဂိနိဉ္စ’ဿ ပါဒါသိ၊ သဒ္ဓိံ ဘောဂေန ဘူမိပေါ။
ဝုတ္တော’ယမတိ သင်္ခေပေါ၊ ဝိတ္ထာရော ပန သဗ္ဗသော၊
ကေသဓာတုကဝံသမှာ၊ ဂဟေတဗ္ဗော ဝိဘာဝိနာ။
ဗန္ဓိတွာ သာဂရာ ရက္ခံ၊ ဒီပဉ္စ ကာသိနိဗ္ဘယံ၊
ဓမ္မကမ္မန သောဓေသိ၊ သဓမ္မံ ဇိနသာသနံ။
သေနာပတိသ နာမံ’ကာ၊ ပဓာနဃရ မုတ္တရော၊
ကတွာ’ဋ္ဌာရသမေ ဝဿေ၊ သော ပုညာနိ ခယံ ဂတော။
ကဿပတော ဇိတော အတိဗလိ ပုညက္ခယေ သင်္ခတေ၊
ဇေတုံ နော ဝိသဟိတ္ထ မစ္စုမုပဂံ သော ယေဝဒါသောဝိယ၊
တသ္မာ မစ္စုဗလံ နိဟစ္စ သုခိနော ဟေဿန္တိ မေဓာဝိနော၊
နိဗ္ဗာနံ ပရမစ္စုတံ သိဝပဒံ ပတ္တဗ္ဗမတ္တညုနာ။
သုဇနပ္ပသာဒ သံဝေဂတ္ထာယ ကတေ မဟာဝံသေ
ရာဇဒွယဒီပနော နာမ
ဧကူနစတ္တာလီသတိမော ပရိစ္ဆေဒေါ။