📜
စတ္တာလီသတိမ ပရိစ္ဆေဒ
အဋ္ဌရာဇကော
တဿစ္စယေ ကုမာရာဒိ-ဓာတုသေနောတိ ဝိဿုတော၊
အဟု တဿ သုတော ရာဇာ၊ ဒေဝရူပေါ မဟာဗလော။
ကာရိတေ ပိတရာ’ကာသိ၊ ဝိဟာရေ နဝကမ္မကံ၊
ကာရေတွာ ဓမ္မသင်္ဂီတိံ ပရိသောဓေတိ သာသနံ။
သန္တပ္ပေသိ ¶ မဟာသင်္ဃံ၊ ပစ္စယေဟိ စတူဟိပိ၊
ကတွာ ပုညာနိ’နေကာနိ၊ နဝမေ ဟာယနေ’တိဂါ။
တိတ္တိသေနော သုတော တဿ၊ ရာဇာ ဟုတွာ အနေကဓာ၊
ကတွာ ပုညာနိ ရဇ္ဇံ တံ၊ မာသမ္ပိ နဝမေ ဇဟိ။
သိဝေါ တံ မာတုလော ဟန္တွာ၊ ဟုတွာ ရာဇာ အနပ္ပကံ၊
ပုညံ ကတွော’ပတိဿေန၊ ပဉ္စဝီသ ဒိနေ ဟတော။
ဥပတိဿော တတော အာသိ၊ ရာဇာ ဟန္တွာန သီဝကံ၊
မောဂ္ဂလ္လာနဿ ဘဂိနီ၊ သာမိကော ဓဇိနီပတိ။
ရာဇာ ဌာနန္တရာဒီဟိ၊ ကတွာန ဇနသင်္ဂဟံ၊
သီလာကာဠဿ ပါဒါသိ၊ သဟ ဘော ကနဓီဝရံ။
ဧကော ပုတ္တော အဟု ရညော၊ ဥပတိဿဿ ကဿပေါ၊
သသောဠသ သဟာယေဟိ၊ သူရော သူပေဟိ သညုတော။
ဧက ဝုတ္တိသဟာယေဟိ၊ ဒါနမာန မဟာဓနော၊
ဓမ္မဋ္ဌော ဝီရိယာဇီဝိ၊ သာဓု ဇေဋ္ဌပစာယကော။
သိလာ ကာဠောတတော ရဇ္ဇ-လောဘဝဉ္စိတ မာနသော၊
ဒက္ခိဏံ မလယံ ဂန္တွာ၊ သင်္ဂဏှိတွာ မဟာ ဗလံ။
ဝိလုမ္ပမာနော ပစ္စန္တိ၊ သမ္ပတ္တော နဂရန္တိကံ၊
တံ သုတွာ ကဿပေါ ဇေဋ္ဌော၊ ဝရမာရုယှ ကုဉ္ဇရံ။
အဿာ သေတွာန ပိတရံ၊ သမာဒါယ သဟာယကေ၊
နိက္ခမ္မ နဂရာ ဂစ္ဆိ၊ သိလာကာလဿ ဒဿနံ။
ဧဝံ သတ္တ’ဋ္ဌ ဝါရေသု၊ ပလာတော လီနဝုတ္တိကော၊
ဟတ္ထေ ကတွာ ဥပါယေန၊ ဒေသေ ပါစိန ပစ္ဆိမေ။
ယုဇ္ဈိတုံ ပုန ပါစိန-တိဿ ပဗ္ဗတမာဂမိ၊
ကဿပေါပိ သဟာယေဟိ၊ သဒ္ဓိမာရုယှ ဒန္တိနံ။
တတ္ထ ဂန္တွာ ပလာပေတွာ၊ စောရံ ပဗ္ဗတမတ္ထကံ၊
အာရောပေသိ မဟာနာဂံ၊ တေနာ’သိ ဂိရိကဿပေါ။
မာနတ္ထဒ္ဓါ သိလာကာဠော၊ ဘိယျော ရဋ္ဌံ ပဘိန္ဒိယ၊
သဗ္ဗံ ဟတ္ထဂတံ ကတွာ၊ အဇေယျ ဗလဝါဟနော။
အာဂမ္မ နဂရံ ရုန္ဓိ၊ သတ္ထာဟံ ရာဇသေဝကာ၊
ယုဇ္ဈိတွာ ဝိရလာ အာသုံ၊ တတော စိန္တေသိ ကဿပေါ။
ဧတေ ¶ နဂရရောဓေန၊ သဗ္ဗေ ဘိဇ္ဇန္တိ ပါဏိနော၊
ပရိဟီနံ ဗလံ ရာဇာ၊ အန္ဓကော စ မဟလ္လကော။
မေရုကန္ဒရကေ ကတွာ၊ မာတရံ ပိတရဉ္စ မေ၊
အင်္ဂဟေတွာ ဗလံ ပစ္ဆာ၊ စောရော နိဂ္ဂဏှိ ယော ဣတိ။
ရတ္တိယံ သော သဟာယေ စ၊ ရာဇသာဓနမေဝစ၊
အာဒါယ ပိတရော စေဝ၊ မလယံ ဂန္တုမာရဘိ။
တဒါ မဂ္ဂမဇာနန္တာ၊ သမ္မူဠာ မဂ္ဂဒေသကာ၊
နဂရဿ သမီပေဝ၊ သမ္ဘမိံသု ဣတော တတော။
သိလာကာဠော ပဝတ္တိံ တံ၊ သုတွာ သင်္ဂမ္မ ဝေဂသာ၊
ပရိဝါရေသိ သင်္ဂါမော၊ တတ္ထ ဘိံသနကော အဟု။
ဒေဝါသုရရဏာကာရေ၊ ဝတ္တမာနေ မဟာဟဝေ၊
ပတိတေသု သဟာယေသု၊ သီဒမာနေ မဟာဂဇေ။
ဟတ္ထာရောဟဿ ဒတွာ၊ ဆိန္ဒိတွာ သီသမတ္တနော၊
ပုဉ္ဆိတွာ လောဟိတံ ကတွာ၊ ကောသိယံ အသိ ပုတ္တိကံ။
ဟတ္ထိကုမ္ဘေ ဥဘော ဟတ္ထေ၊ ဌပေတွာန အဝတ္ထရိ၊
ဥပတိဿောပိ တံ သုတွာ၊ သောကသလ္လာဟတော မရိ။
ဧဝံ ဒိယဍ္ဎဝဿေန၊ ဥပတိဿေ ဒိဝံဂတေ၊
ရာဇာ’ဟောသိ သိလာကာဠော၊ ပုဗ္ဗနာမေန ဧကတော။
တံ အမ္ဗသာမဏေရာဒိ-သိလာကာဠောတိ ဝေါဟရုံ၊
တိတ္ထံ တေရသဝဿာနိ၊ ဒိပံ ဓမ္မေန ပါလယိ။
မဟာပါဠိမှိ ဒါပေသိ၊ ပစ္စဂ္ဃံ ရာဇဘောဇနံ၊
ဝေဇ္ဇသာလာသု ဘောဂေ စ၊ ဝဍ္ဎေသိ ဇနတာဟိတော။
အနွဟံ ပူဇယိ ဗောဓိံ၊ ပဋိမာယော စ ကာရယိ၊
သဗ္ဗေသံ ဒီပဝါသီနံ၊ ဘိက္ခူနံ’ဒါ တိစီဝရံ။
မာဃာတံ ကာရယိဒီပေ၊ သဗ္ဗေသံယေဝ ပါဏိနံ၊
အာနိတံ အတ္တနာ ကေသ-ဓာတုံ သမ္မာ အပူဇယိ။
ရဟေရဒကဝါရဉ္စ၊ အဒါသိ အဘယုတ္တရေ၊
ပုရတ္ထိမာ ထေရီယာနံ၊ ဝိဟာရကုန္ထနာမ သော။
အာနေတွာ အာသနံ တတ္ထ၊ ဌပေသိ ဒုမရာဇကေ၊
ယာဝဇီဝံ ပဝတ္တေသိ၊ ပုညကမ္မမသင်္ခိယံ။
မောဂ္ဂလ္လာနော ¶ တထာ ဒါဌာ၊ ပဘုတိ စော’ပတိဿကော၊
ပုတ္တော တဿာ’သုမဂ္ဂဿ၊ ဒေသံ ဒတွာ ပုရတ္ထိမံ။
ဒတွာ ဌာနန္တရဉ္စာဒိ-ပါဒသညံ ဝိသဇ္ဇယိ၊
ဂန္တွာ တတ္ထ ဝသာဟီတိ၊ သောပိ ဂန္တွာ တဟိံ ဝသိ။
ဌာနံ မလယရာဇဂ္ဂံ၊ ဒေသံ ဒတွာန ဒက္ခိဏံ၊
ရက္ခဏတ္ထံ သမုဒ္ဒဿ၊ မဇ္ဈိမံ တု နိယောဇယိ။
ဥပတိဿံ တု ဝါသေသိ၊ သန္တိကေယေဝ အတ္တနော၊
ဝိသေသေန မမာယန္တော၊ ယူနံ ကလျာနဒဿနံ။
တဿ ဒွါဒသမေ ဝဿေ၊ ဣတော ကာသိ ပုရံ ဂတော၊
ဓမ္မာတု မိဓာ’နေသိ၊ တတော ဝါဏိဇ မာဏဝေါ။
ရာဇာ ဒိသွာ’သမတ္ထော သော၊ ဓမ္မာဓမ္မဝိစာရဏေ၊
ဟေမသညာယ ဒီပမှိ၊ ပတန္တော သလဘော ဝိယ။
ဗုဒ္ဓဓမ္မောတိ သညာယ၊ တံ ဂဟေတွာန သာဓုကံ၊
ကတွာ သက္ကာရသမ္မာနံ၊ ဂေဟေ ရာဇဃရန္တိကေ။
ဌပေတွာ အနုဝဿံ တု၊ နေတွာ ဇေတဝနံ မဟံ၊
ကာတုံ ကာရေသိ စာရိတ္တံ၊ ဟိတံ မန္တွာန ပါဏိနံ။
ဧဝံ ကတွာ သိလာကာဠော၊ ပုညကမ္မမနပ္ပကံ၊
ပတ္တေ တေရသမေ ဝဿေ၊ ယထာကမ္မမုပါဂမိ။
ဒါဌပ္ပဘုတိကော ရဇ္ဇံ၊ ဂဟေတွာ ဘာတရံသကံ၊
အက္ကမောတိ နိဝါရေန္တံ၊ မာရာပေသိ ဝိဗုဒ္ဓိကော။
မောဂ္ဂလ္လာနော’ထ တံ သုတွာ၊ အပ္ပတ္တံ ရဇ္ဇမဂ္ဂဟိ၊
အကာရဏေ မေ မာရေသိ၊ ကဏိဋ္ဌံ ဓမ္မဝါဒီနံ။
ကာရာပေဿာမဟမ္ပဇ္ဇ၊ ရဇ္ဇန္တိ ပရိကုပ္ပိယ၊
သမာဒါယ မဟာသေနံ၊ အဂါရာဟေရ ပဗ္ဗတံ။
ရာဇာပိ သုတွာ သန္နဒ္ဓ-ဗလကာယော ကရိန္ဒကေ၊
ပဗ္ဗတေ သိဝိရံ ဗန္ဓိ၊ မောဂ္ဂလ္လာနော နိသမ္မတံ။
သာပရာဓာန တေ မေ ဝါ၊ မနုဿာ ဒီပဝါသိနော၊
ဧကသ္မိဉ္စ မတေ ရဇ္ဇ-မုဘိန္နံယေဝ နောသိယာ။
တသ္မာ အညေန ယုဇ္ဈန္တု၊ ဥဘောယေဝ မယံ ဣဓ၊
ဟတ္ထိယုဒ္ဓံ ကရောမာတိ၊ ရညော ပေသေသိ သာသနံ။
သောပိ ¶ သာဓူတိ ဝတွာန၊ ဗဒ္ဓပဉ္စာယုဓော ဂဇံ၊
အာရုယှ မုနိနော မာရော ဝိယ ဩတ္ထရိ တာဝဒေ။
မောဂ္ဂလ္လာနောပိ သန္နဒ္ဓါ၊ အာရုယှ ကရီနံ ဝရံ၊
တတ္ထာ’ဂေါ အညမညံ တေ၊ ပါပုဏိံသု မဟာဂဇာ။
သဒ္ဒေါ သူယိတ္ထ သင်္ဃဋ္ဋေ၊ အသနိရာဝ သန္နိဘော၊
ဒန္တဃာတေန ဥဋ္ဌာသိ၊ ဇာလာ ဝိဇ္ဇုလ္လတာ ဝိယ။
သဉ္ဈာဃနသဘာဂါ’သုံ၊ ဂဇာ လောဟိတမက္ခိတာ၊
မောဂ္ဂလ္လာနဂဇာဝိဒ္ဓါ၊ ရညောဩသက္ကိ ကုဉ္ဇရော။
ရာဇာ အာရဘိ တံ ဒိသွာ၊ ဆိန္ဒိတုံ သီသမတ္တနော၊
မောဂ္ဂလ္လာနော’ထ ဝန္ဒန္တော၊ ယာစိ’မေ’ဝံ ကိရီဣတိ။
ယာစမာနေပိ သောမာနံ၊ မာနေန္တော ဆိန္ဒိကန္ဓရံ၊
ဆဍ္ဍေသိ ဆဟိ သော ရဇ္ဇံ၊ မာသေဟိ ဒိဝသေဟိ စ။
မောဂ္ဂလ္လာနော တတော ရာဇာ၊ အာသိ ဒီပေ မဟာဗလော၊
မာတုလဉ္စ ပဋိစ္စေမံ၊ စူလနာမေန ဝေါဟရုံ။
အာသာဓာရဏကာဝေယျော၊ ဝတ္ထုတ္တယ ပရာယဏော၊
ဒါနသံယမ သောစေယျော၊ သောရစ္စာဒိဂုဏာလယော။
ဒါနေန ပိယဝါစာယ၊ အတ္ထဿ စရိယာယ စ၊
သမာနတ္တဿဘာဝေန၊ သင်္ဂဟေသိ မဟာဇနံ။
ပိဏ္ဍပါတဝိဟာရေဟိ၊ ဘေသဇ္ဇစ္ဆာဒနေဟိ စ၊
ဘိက္ခုသင်္ဃဉှိ သင်္ဂဏှိ၊ ဓမ္မိကာယ စ ဂုတ္တိယာ။
အတိရေကာယ ပူဇာယ၊ ပူဇေတွာ ဓမ္မဘာဏကေ၊
ပိဋကေ တီဏိ ဝါစေသိ၊ သဒ္ဓိမဋ္ဌကထာယ သော။
ကုမာရေ ဥပလာလေတွာ၊ နိဝါပေန ယထာရုစိံ၊
သဇ္ဈာပေသိ သဒါ ဓမ္မံ၊ ဓမ္မဒီပေါ မဟာမတိ။
ဓမ္မဒီပဉ္စ သော ကတွာ၊ ကုဉ္ဇရသေခရေနိ သာ၊
ဓမ္မာဝါသာနေ ဝါစေသိ၊ ပုရမှိ ပုရိသုတ္တမော။
ဗန္ဓာပေသိ ကဒမ္ဗဉ္စ၊ နဒိံပဗ္ဗတမဇ္ဈတော၊
ပတ္တပသာဏဝါပိဉ္စ၊ ဓနဝါပိံ ဂရိတရံ။
ဂဏှာပေသိ သဒီဃာယု-ဟေတု ကမ္မန္တိ သာဒရော၊
လိခါပေသိ စ သဒ္ဓမ္မံ၊ ဝတ္ထုပူဇဉ္စ ကာရယိ။
လောကံ ¶ သော အနုကမ္ပိတွာ၊ မာတာပုတ္တံဝ ဩရသံ၊
ဒတွာ ဘုတွာ ယထာကာမံ၊ ဝဿေ ဝီသတိမေ မရိ။
မဟေသီ တဿ ဃာတေတွာ၊ ဝိသယောဂေန ဉာတကေ၊
ပုတ္တံ ရဇ္ဇေ’ဘိသိဉ္စိတွာ၊ သယံ ရဇ္ဇံ ဝိစာရယိ။
တထာဘိသိတ္တော သော ကိတ္တိ-သိရိမေဃော နရာဓိပေါ၊
တိပုပတ္တေဟိ ဆာဒေသိ၊ ဒုမိန္ဒဓရမာဒိတော။
ကပဏဒ္ဓိဝဏိဗ္ဗာနံ၊ မဟာဒါနံ ပဝတ္တယိ၊
မဂ္ဂပါလော တထာကာရော၊ အဟု သဗ္ဗောပဘောဂိယော။
မဟေသီ သာ သဒါ အာသိ၊ ပဓာနာ သဗ္ဗကမ္မသု၊
ရဇ္ဇံ တဿာ’သိ တေနေဝ၊ ဟေဋ္ဌုပရိယဝတ္တိကံ။
ရာဇာပါဒါ မဟာမစ္စာ’-ဟေသုံ လဉ္စပရာယနာ၊
ဒုဗ္ဗလေ စ ဝိဟေဌေသုံ၊ ဗလီ ဇာနပဒါ နရာ။
သိလာကာဠဿ ကာလမှိ၊ ဂါမေ သင်္ဂိလ္လနာမကေ၊
ဘယဝသီဝှယော ပေါသော၊ အဟု မောရိယဝံသဇော။
အဟောသိ ပုတ္တော သီဝဿ၊ အဂ္ဂဗောဓိ သနာမကော၊
ဘာဂိနေယျောပိ တဿာသိ၊ မဟာနာဂေါတိ ဝိဿုတော။
ဘာဂိနေယော မဟာနာဂေါ၊ အဂ္ဂဗောဓိ စ သုန္ဒရော၊
ဥဠာရဇ္ဈာသယတ္တာ သော၊ မဟာနာဂေါ မဟဗ္ဗလော။
ဟိတွာ ကဿကကမ္မာနိ၊ စောရကမ္မမကာ ဝနေ၊
ဂေါဓံ လဒ္ဓါန ပေသေသိ၊ မာတုလာနိယ သန္တိကံ။
ဂေါဓံ ဒိသွာ’ဝသာ ဉတွာ၊ ဓညပစ္ဆိမပေသယိ၊
ကမ္မာရဿာ’ပိ ပေသေသိ၊ သသံ သောပိ တထေဝကာ။
ဗီဇံ ဘဂိနီ မာယာစိ၊ ဗီဇဂါဟဉ္စ တဿ သာ၊
ဒါသဉ္စ ဉတွာ ပေသေသိ၊ အန္နပါနာဒိနာ ရဟော။
တဒါ ဒုဗ္ဘိက္ခကာလမှိ၊ ဧကော မန္တဓရော နရော၊
ဘိက္ခာလာဘာယ သဒ္ဓေဟိ၊ ဘိက္ခုဝေသေန ဘိက္ခတိ။
တံ ဂါမံ ပဝိသိတွာ သော၊ အလဒ္ဓါ ကိဉ္စိ ဘောဇနံ၊
အဘိဘူတော ဇိဃစ္ဆာယ၊ ကမ္ပမာနော နိဂစ္ဆတိ။
တံ ဒိသွာ ကရုဏာယန္တော၊ မဟာနာဂေါ မဟာဒယော၊
ပတ္တမာဒါယ ဂါမန္တ-မာဟိဏ္ဍိတွာပိ သဗ္ဗသော။
ယာဂုမတ္တမ္ပိ ¶ နာလတ္ထ၊ တတော ဥတ္တရသာဋကံ၊
ဒတွာ အာဟရိ အာဟာရံ၊ သော တံ ဘုတွာ ပသီဒိယ။
ရဇ္ဇာရဟမိမံ ဒီပေ၊ ကရိဿာမီတိ စိန္တိယ၊
တမာဒါယ ခဏေနာ’ဂါ၊ ဂေါကဏ္ဏကမဟဏ္ဏဝံ။
အထ တတ္ထ နိသီဒိတွာ၊ သဉ္ဇပန္တော ယထာဝိဓိံမ၊
မန္တောနာ’နေသိ နာဂိန္ဒံ၊ ဖုဿပုဏ္ဏမရတ္တိယံ။
မဟာနာဂံ ဖုသာဟီတိ၊ မဟာနာဂံ နိယောဇယိ၊
သော ဘီတော ပုရိမေ ယာမေ၊ အာဂတံ တံ န သမ္ဘုသီ။
တထာ မဇ္ဈိမယာမေပိ၊ ပစ္ဆိမေ ပန နင်္ဂလေ၊
ဂဟေတွာ ခိပိ တီဟေဝ၊ အင်္ဂုလီဟိ သတံ ဆုပိ။
သော တံ ဗျာကာသိ တံ ဒိတွာ၊ သဗလံ မေ ပရိဿမံ၊
တီဟိ ရာဇူဟိ ယုဇ္ဈိတွာ၊ စတုတ္ထံ တွံ နိဃာတိယ။
ဝုဍ္ဎော တီဏေဝ ဝဿာနိ၊ ရာဇာ ဟုတွာ န ဇီဝသိ၊
တထာ ဟေဿန္တိ ရာဇာနော၊ တယော တေ ဝံသဇာ နရာ။
ဂန္တွာ သေဝဿု ရာဇာနံ၊ ပစ္ဆာ ပဿသိ မေခလံ၊
ဣတိ ဝတွာန ပေသေသိ၊ သောပိ ဂန္တွာ နရိဿရံ။
ပဿိတွာ တမုပဋ္ဌာသိ၊ ရာဇာ ရောဟဏကမ္မိကံ၊
တံ အကာသိ တဒုဋ္ဌာနံ၊ ဘဏ္ဍမာဟရိ သော ဗဟုံ။
ရာဇာ တသ္မိံ ပသီဒိတွာ၊ အန္ဓသေနာပတိဝှယံ၊
ဒတွာ ဌာနန္တရံ တဿ၊ ဂန္တုံ တတ္ထေဝ ယောဇယိ။
ဘယသီဝဿ ပုတ္တဉ္စ၊ ဘာဂိနေယျဉ္စ အတ္တနော၊
အာဒါယ ဂန္တွာ တံ ဒေသံ၊ ပရိဝတ္တေသိ သဗ္ဗသော။
ပစ္စေကဘောဂံ ကတွာန၊ ရောဟဏံ တတ္ထ သော ဝသံ၊
ဒါဌပ္ပဘူတိနာ ကာတုံ၊ ယုဒ္ဓံဂန္တွာ မဟဗ္ဗလော။
မောဂ္ဂလ္လာနဘယာ ဂန္တွာ၊ ရောဟဏဉ္စ တဟိံ ဝသီ၊
သုတွာ ကိတ္တိသိရီမေဃဝဏ္ဏ-ရညော ရဇ္ဇေ သမဉ္ဇသံ။
ရဇ္ဇံ ဂဟေတုံ ကာလောတိ၊ သီဃံ အာဂမ္မ ရောဟဏာ၊
ဧကူနဝိသေ ဒိဝသေ၊ မာရယိတွာ မဟီပတိံ။
သယံ ဟုတွာ မဟီပါလော၊ ဒေသံ ကတွာ ယထာ ပုရေ၊
ဘာဂိနေယျဿ ပါဟေသိ၊ ပဏ္ဏမာဂစ္ဆတူတိ သော။
အာဂစ္ဆန္တော ¶ နိမိတ္တေန၊ နိဝတ္တိတွာ မရိတ္ထ သော၊
တတော မာတုလပုတ္တံ’ကာ၊ ဥပရဇ္ဇံ ကတညုကော။
အာလဝါလံ ဒုမိန္ဒဿ၊ ကတွာ ဟေမမယံ ဃရံ၊
ဆာဒါပေသိ မုနိန္ဒဿ၊ ပဋိမာယော စ သန္ဒဟိ။
မဟာစေတိတ္တယေ ကာသိ၊ သုဓာကမ္မဉ္စ စုမ္ဗဋံ၊
ဟတ္ထိဝေဒိဉ္စ ကာရေတွာ၊ စိတ္တကမ္မမကာရယိ။
ပေသကာရကဂါမံ သော၊ ဇမ္ဗေလဝှယမုတ္တရေ၊
မဟာဝိဟာရေစာဗန္ဓိ၊ ဂါမံ တိန္တိဏိကဝှယံ။
ဥဒ္ဓဂါမမှိ ဝသဘ-ဂါမံ ဇေတဝနဿ’ဒါ၊
ဝတ္ထဒါနံ နိကာယေသု၊ တီသု စေဝ ပဝတ္တယိ။
ခေတ္တာနံ ဟိသတံ ဒတွာ၊ ဝိဟာရေ ဇေတနာမကေ၊
ယာဂုံ တတ္ထ ပဝတ္တေသိ၊ ဘိက္ခူနံ သဗ္ဗကာလိကံ။
သဟဿ ဒူရတိဿဝှာ၊ ခေတ္တံ ဒတွာ တပဿိနံ၊
မဟာဝိဟာရဝါသီနံ၊ ယာဂုံ နိစ္စံ ပဝတ္တယိ။
စိရမာတိကဝါရဉ္စ၊ တတ္ထေဝ’ဒါ ဂုဏေ ရတော၊
မယူရပရိဝေဏေ စ၊ နဝကမ္မမကာရယိ။
ကာသိခဏ္ဍေ မဟာဒေဝ-ရတ္တကုရဝနာမကေ၊
ဝိဟာရေ အနုရာရာမံ၊ ဇိဏ္ဏဉ္စ ပဋိသင်္ခရီ။
ကမံ သောဝဂ္ဂိကံ ကတွာ၊ ဧဝမာဒိံ နရိဿရော၊
အဂမာ တီဟိ ဝဿေဟိ၊ ဒေဝရာဇသဟဗျတံ။
အဋ္ဌေတေ ကုဋ္ဌစိတ္တာ’ပရိမိတဝိဘဝါ ရာဇရာဇေနရူပါ၊
ရာဇာနော ရာဇမာနာ နရကရိတုရဂါသူရသေနာရထေဟိ၊
အန္တေ ဟိတွာ’ခိလံ တံ ဝိဂတပရိဇနာ’ဠာဟနံ သင်္ခတာသုံ၊
သပ္ပညော တံ သရန္တော ဘဝတု ဘဝသုခံ ဝန္တုကာမော ဟိတေသီ။
သုဇနပ္ပသာဒသံဝေဂတ္ထာယ ကတေ မဟာဝံသေ
အဋ္ဌရာဇကော နာမ
စတ္တာလီသတိမော ပရိစ္ဆေဒေါ။