📜
ပဉ္စမ ပရိစ္ဆေဒ
တတိယဓမ္မသံဂီတိ
ယာ မဟာကဿပါဒီဟိ ¶ ၊ မဟာထေရေဟိ အာဒိတော၊
ကတာ သဒ္ဓမ္မ သံဂီတိ၊ ထေရိယာ’တိ ပဝုစ္စတိ။
ဧကော’ဝ ထေရဝါဒေါ သော၊ အာဒိဝဿသတေ အဟု၊
အညာစရိယဝါဒါတု၊ တတော ဩရံ အဇာယိသုံ။
တေဟိ သံဂီတိကာရေဟိ၊ ထေရေဟိ ဒုတိယေဟိ တေ၊
နိဂ္ဂဟိတာ ပါပဘိက္ခူ၊ သဗ္ဗေ ဒသသဟဿကာ။
အကံသာ’စရိယဝါဒံ တေ၊ မဟာသံဂီတိနာမကာ၊
တတော ဂေါကုလိကာ ဇာတာ၊ ဧကဗ္ဗောဟာရိကာပိ စ။
ဂေါကုလိကေဟိ ပဏ္ဏတ္တိ-ဝါဒါ ဗာဟုလိကာပိ စ၊
စေတိယဝါဒါ တေသွေဝ၊ သမတာသင်္ဃိကာ ဆ တေ။
ပုနာပိ ထေရဝါဒေဟိ၊ မဟိံသာသကဘိက္ခဝေါ၊
ဝဇ္ဇီပုတ္တကဘိက္ခူ စ၊ ဒုဝေ ဇာတာ ဣမေ ခလု။
ဇာတာ’ထ ဓမ္မုတ္တရိယာ၊ ဘဒြယာနိကဘိက္ခဝေါ၊
ဆန္နာဂါရာ သမ္မိတိယာ၊ ဝဇ္ဇီပုတ္တိယဘိက္ခူတိ။
မဟိံသာသကဘိက္ခူဟိ၊ ဘိက္ခူ သဗ္ဗတ္ထ ဝါဒိနော၊
ဓမ္မဂုတ္တိယဘိက္ခူ စ၊ ဇာတာ ခလု ဣမေ ဒုဝေ။
ဇာတာ သဗ္ဗတ္ထိဝါဒီဟိ၊ ကဿပိယာ တတော ပန၊
ဇာတာ သင်္ကန္တိကာ ဘိက္ခူ၊ သုတ္တဝါဒါ တတော ပန။
ထေရဝါဒေန သဟ တေ၊ ဟောန္တိ ဒွါဒသိ’မေပိ စ၊
ပုဗ္ဗေ ဝုတ္တဆဝါဒါ စ၊ ဣတိ အဋ္ဌာရသာ ခိလာ။
သတ္တရသာပိ ဒုတိယေ၊ ဇာတာ ဝသဿတေ ဣတိ၊
အညာစရိယဝါဒါ တု၊ တတော ဩရမဇာယိသုံ။
ဟေမတာ ¶ ရာဇဂိရိယာ၊ တထာ သိဒ္ဓတ္ထိကာပိ စ၊
ပုဗ္ဗသေလိယဘိက္ခူ စ၊ တထာ အပရသေလိယာ။
ဝါဇိရိယာ ဆ ဧတေဟိ၊ ဇမ္ဗုဒီပမှိ ဘိန္နကာ၊
ဓမ္မရုစိ စ သာဂလိယာ၊ လံကာဒီပမှိ ဘိန္နကာ။
အာစရိယကုလဝါဒကထာ နိဋ္ဌိတာ။
ဓမ္မာသောကာဘိသေက
ကာဠာသောကဿ ပုတ္တာ တု၊ အဟေသုံ ဒသဘာတိကာ၊
ဗာဝီသတိံ တေ ဝဿာနိ၊ ရဇ္ဇံ သမနုသာသိသုံ။
နဝ နန္ဒာ တတော အာသုံ၊ ကမေနေဝ နရာဓိပါ၊
တေ’ပိ ဗာဝီသဝဿာနိ၊ ရဇ္ဇံ သမနုသာသိသုံ။
မောရိယာနံ ခတ္တိယာနံ၊ ဝံသေ ဇာတံ သိရိဓရံ၊
စန္ဒဂုတ္တောတိ ပညာတံ၊ စာဏက္ကော ဗြာဟ္မဏော တတော။
နဝမံ ဓနနန္ဒံ တံ၊ ဃာတေတွာ စဏ္ဍကောဓသာ၊
သကလေ ဇမ္ဗုဒီပသ္မိံ၊ ရဇ္ဇေ သမဘိသိဉ္စီ သော။
သော စတုဝီသဝဿာနိံ၊ ရာဇာ ရဇ္ဇမကာရယိ၊
တဿ ပုတ္တော ဗိန္ဒုသာရော၊ အဋ္ဌဝီသတိ ကာရယိ။
ဗိန္ဒုသာရသုတာ အာသုံ၊ သတံ ဧကော စ ဝိဿုတာ၊
အသောကော အာသိ တေသံ တု၊ ပုညတေဇောဗလိဒ္ဓိကော။
ဝေမာတိကေ ဘာတရော သော၊ ဟန္တွာ ဧကူနကံ သတံ၊
သကလေ ဇမ္ဗုဒီပသ္မိံ၊ ဧကရဇ္ဇမပါပုဏိ။
ဇိနနိဗ္ဗာနတော ပစ္ဆာ၊ ပုရေ တဿာဘိသေကတော၊
သာဋ္ဌာရသံ ဝဿသတ-ဒွယမေဝံ ဝိဇာနိယ။
ပတွာ စတူဟိ ဝဿေဟိ၊ ဧကရဇ္ဇံ မဟာယသော၊
ပုရေ ပါဋလိပုတ္တသ္မိံ၊ အတ္တာနမဘိသေစယိ။
တဿာ’ဘိသေကေန ¶ သမံ၊ အာကာသေ ဘူမိယံ တထာ၊
ယောဇနေ ယောဇနေ အာဏာ၊ နိစ္စံ ပဝတ္တိတာ အဟု။
အနောတတ္တော ဒကာကာဇေ၊ အဋ္ဌနေသုံ ဒိနေ ဒိနေ၊
ဒေဝါ ဒေဝေါ အကာ တေဟိ၊ သံဝိဘာဂံ ဇနဿစ။
နာဂလတာဒန္တကဋ္ဌံ၊ အာနေသုံ ဟိမဝန္တတော၊
အနေကေသံ သဟဿာနံ၊ ဒေဝါ ဧဝ ပဟောနကံ။
အဂဒါ’မလကဉ္စေဝ၊ တထာဂဒ ဟရိတကံ၊
တတော’ဝ အမပက္ကဉ္စ၊ ဝဏ္ဏဂန္ဓရသုတ္တမံ။
ပဉ္စဝဏ္ဏာနိ ဝတ္ထာနိ၊ တတ္ထပုဉ္ဇနပဋ္ဋကံ၊
ပီတဉ္စ ဒိဗ္ဗပါနဉ္စ၊ ဆဒ္ဒန္တဒဟတော မရု။
မရန္တာ နဂရေ တသ္မိံ၊ မိဂသူကရပက္ခိနော၊
အာဂန္တွာန မဟာနသံ၊ သယမေဝ မရန္တိ စ။
ဂါဝေါ တတ္ထ စရာပေတွာ၊ ဝဇမာနေန္တိ ဒီပိနော၊
ခေတ္တ ဝတ္ထုတဠာကာဒိံ၊ ပါလေန္တိ မိဂသူကရာ။
သုမနံ ပုပ္ဖပဋကံ၊ အဘုတ္တံ ဒိဗ္ဗမုပ္ပလံ၊
ဝိလေပနံ အဉ္ဇနဉ္စ၊ နာဂါနာဂါဝိမာနတော။
သာလိဝါဟသဟဿာနိ၊ နဝုတိံ တု သုဝါ ပန၊
ဆဒ္ဒန္တဒဟတောယေဝ၊ အာဟရိံသု ဒိနေ ဒိနေ။
တေ သာလိနိတ္ထုသကဏေ၊ အခဏ္ဍေတွာန တဏ္ဍုလေ၊
အကံသု မူသိကာ တေဟိ၊ ဘတ္တံ ရာဇကုလေ အဟု။
အကံသု သဿတံ တဿ၊ မဓူနိ မဓုမက္ခိကာ၊
တထာ ကမ္မာရသာလာသု၊ အစ္ဆာကူဋာနိ ပါတယုံ။
ကရဝိကာ သကုဏိကာ၊ မနုညမဓုရဿရာ၊
အကံသု တဿာ’ဂန္တွာန၊ ရညော မဓုရဝဿိတံ။
ရာဇာ’ဘိသိတ္တော သော’သောကော၊
ကုမာရံ တိဿသဝှယံ၊
ကဏိဋ္ဌံ သံသောဒရိယံ၊ ဥပရဇ္ဇေ’ဘိသေစယိ။
ဓမ္မာသောကာဘိသေကော နိဋ္ဌိတော
နိဂြောဓသာမဏေရ ဒဿန
ပိတာ ¶ သဋ္ဌိသဟဿာနိ၊ ဗြာဟ္မဏေ ဗြဟ္မပက္ခိကေ၊
ဘောဇေသိ သောပိ တေယေဝ၊ တီဏိ ဝဿာနိ ဘောဇယိ။
ဒိသွာ’နုပသမံ တေသံ၊ အသောကော ပရိဝေသနေ၊
ဝိစေယျ ဒါနံ ဒဿန္တိ၊ အမစ္စေ သန္နိယောဇိယ။
အာဏာပယိတွာ မတိမာ၊ နာနာပါသဏ္ဍိကေ ဝိသုံ၊
ဝီမံသိတွာ နိသဇ္ဇာယ၊ ဘောဇာပေတွာ ဝိသဇ္ဇယိ။
ကာလေ ဝါတာယနဂတော၊ သန္တံ ရစ္ဆာဂတံ ယတိံ၊
နိဂြောဓသာမဏေရံ သော၊ ဒိသွာ စိတ္တံ ပသာဒယိ။
ဗိန္ဒုသာရဿ ပုတ္တာနံ၊ သဗ္ဗေသံ ဇေဋ္ဌဘာတုနော၊
သုမနဿ ကုမာရဿ၊ ပုတ္တော သော ဟိ ကုမာရကော။
အသောကော ပိတရာ ဒိန္နံ၊ ရဇ္ဇမုဇ္ဇေနိယဉှိ သော၊
ဟိတွာ’ဂတော ပုပ္ဖပုရံ၊ ဗိန္ဒုသာရေ ဂိလာနကေ။
ကတွာ ပုရံ သကာယတ္တံ၊ မတေ ပိတရိ ဘာတရံ၊
ဃာတေတွာ ဇေဋ္ဌကံ ရဇ္ဇံ၊ အဂ္ဂဟေသိ ပုရေ ဝရေ။
သုမနဿ ကုမာရဿ၊ ဒေဝီ တန္နာမိကာ တတော၊
ဂဗ္ဘိနီ နိက္ခမိတွာန၊ ပါစိနဒွါရတော ဗဟိ။
စဏ္ဍာလဂါမ မဂမာ၊ တတ္ထ နိဂြောဓဒေဝတာ၊
တမာလပိယနာမေန၊ မာ ပတွာ ဃရကံ အဒါ။
တဒဟေ’ဝ ဝရံ ပုတ္တံ၊ ဝိဇာယိတွာ သုတဿ သာ၊
နိဂြောဓောတိ အကာ နာမံ၊ ဒေဝတာ နုဂ္ဂဟာနုဂါ။
ဒိသွာ တံ ဇေဋ္ဌစဏ္ဍာလော၊ အတ္တနော သာမိနိံ ဝိယ၊
မညန္တော တံ ဥပဋ္ဌာသိ၊ သတ္တဝဿာနိ သာဓုကံ။
တံ မဟာဝရုဏော ထေရော၊ တဒါ ဒိသွာ ကုမာရကံ၊
ဥပနိဿယ သမ္ပန္နံ၊ အရဟာ ပုစ္ဆိ မာတရံ။
ပဗ္ဗာဇေသိ ခုရဂ္ဂေ သော၊ အရဟတ္တမပါပုဏိ၊
ဒဿနာယော’ပ ဂစ္ဆန္တော၊ သော တတော မာတုဒေဝိယာ။
ဒက္ခိဏေန စ ဒွါရေန၊ ပဝိသိတွာ ပုရုတ္တမံ၊
တံ ဂါမဂါမိမဂ္ဂေန၊ ယာတိ ရာဇင်္ဂဏေ တဒါ။
သန္တာယ ¶ ဣရိယာ ယသ္မိံ၊ ပသီဒိ သမဟီပတိ၊
ပုဗ္ဗေ’ဝ သန္နိဝါသေန၊ ပေမံ တသ္မိံ အဇာယထ။
ပုဗ္ဗေ ကိရ တယော အာသုံ၊ ဘာတရော မဓု ဝါဏိဇာ၊
ဧကော မဓုံ ဝိက္ကိဏာတိ၊ အာဟရန္တိ မဓုံ ဒုဝေ။
ဧကော ပစ္စေကသမ္ဗုဒ္ဓါ၊ ဝဏရောဂါတုရော အဟု၊
အညော ပစ္စေကသမ္ဗုဒ္ဓါ၊ တဒတ္ထံ မဓုဝတ္ထိကော။
ပိဏ္ဍစာရိကဝတ္တေန၊ နဂရံ ပါဝိသီ တဒါ၊
တိတ္ထံ ဇလတ္ထံ ဂစ္ဆန္တိ၊ ဧကာ စေဋီ တမဒ္ဒသ။
ပုစ္ဆိတွာ မဓုကာမတ္တံ၊ ဉတွာ ဟတ္ထေန အာဒိသိ၊
ဧသော မဓွာပဏော ဘန္တေ၊ တတ္ထ ဂစ္ဆာ’တိ အဗြဝိ။
တတ္ထ ပတ္တဿ ဗုဒ္ဓဿ၊ ဝါဏိဇော သော ပသာဒဝါ၊
ဝိဿန္ဒယန္တော မုခတော၊ ပတ္တပုရံ မဓုံ အဒါ။
ပုဏ္ဏဉ္စ ဥပ္ပတန္တဉ္စ၊ ပတိတဉ္စ မဟီတလေ၊
ဒိသွာ မဓုံ ပသန္နော သော၊ ဧဝံ ပဏိဒဟီ တဒါ။
ဇမ္ဗုဒီပေ ဧကရဇ္ဇံ၊ ဒါနေနာ’နေန ဟောတု မေ၊
အာကာသေ ယောဇနေ အာဏာ၊ ဘူမိယံ ယောဇနေတိ စ။
ဘာတရေ အာဂတေ အာဟ၊ ဧဒိသဿ မဓုံ အဒံ၊
အနုမောဒထ တုမှေ တံ၊ တုမှာကဉ္စ ယတော မဓု။
ဇေဋ္ဌော အာဟ အတုဋ္ဌော သော၊
စဏ္ဍာလော နူန သောသိယံ၊
နိဝါသေန္တီတိ စဏ္ဍာလာ၊
ကာသာယာနိ သဒါ ဣတိ။
မဇ္ဈော ပစ္စေကဗုဒ္ဓံ တံ၊ ခိပပါရဏ္ဏဝေ ဣတိ၊
ပတ္တိဒါနဝစော တဿ၊ သုတွာ တေ စာနုမောဒိသုံ။
အာပဏာ ဒေသိကံ ယာတု၊ ဒေဝိတ္တံ တဿ ပတ္ထယိ၊
အာဒိဿမာနသန္ဓိ စ၊ ရူပံ အတိမနောရမံ။
အသောကော မဓုဒေါ’သန္ဓိ-မိတ္တာဒေဝီ တု စေဋိကာ၊
စဏ္ဍာလဝါဒီ နိဂြောဓော၊ တိဿော သော ပါရဝါဒိကော။
စဏ္ဍာလဝါဒီ စဏ္ဍာလ-ဂါမေ အာသိ ယတော တု သော၊
ပတ္ထေသိ မောက္ခံ မောက္ခဉ္စ၊ သတ္တ ဝဿောဝ ပါပုဏိ။
နိဝိဋ္ဌပေမော ¶ တသ္မိံ သော၊ ရာဇာ’တိ တုရိတော တတော၊
ပက္ကောသာပေသိ တံ သော တု၊ သန္တဝုတ္တီ ဥပါဂမိ။
နိသိဒ တာတာ’နုရူပေ၊ အာသနေ တာ’ဟ ဘူပတိ၊
အဒိသွာ ဘိက္ခုမညံ သော၊ သီဟာသနမုပါဂမိ။
တသ္မိံ ပလ္လင်္ကမာယာတေ၊ ရာဇာဣတိ ဝိစိန္တယိ၊
အဇ္ဇာ’ယံ သာမဏေရော မေ၊ ဃရေ ဟေဿတိ သာမိကော။
အာလမ္ဗိတွာ ကရံ ရညော၊ သော ပလ္လင်္ကေ သမာရုဟိ၊
နိသီဒိ ရာဇပလ္လင်္ကေ၊ သေတစ္ဆတ္တဿ ဟေဋ္ဌတော။
ဒိသွာ တထာ နိသိန္နံ တံ၊ အသောကော သော မဟီပတိ၊
သမ္ဘာဝေတွာန ဂုဏတော၊ တုဋ္ဌော’တီဝ တဒါ အဟု။
အတ္တနော ပဋိယတ္တေန၊ ခဇ္ဇဘောဇ္ဇေန တပ္ပိယ၊
သမ္ဗုဒ္ဓဒေသိတံ ဓမ္မံ၊ သာမဏေရမပုစ္ဆိတံ။
တဿ’ပ္ပမာဒဝဂ္ဂံ သော၊ သာမဏေရော အဘာသထ၊
တံ သုတွာ ဘူမိပါလော သော၊ ပသန္နော ဇိနသာသနေ။
အဋ္ဌ တေ နိစ္စဘတ္တာနိ၊ ဒမ္မိ တာတာ’တိ အာဟ တံ၊
ဥပဇ္ဈာယဿ မေ ရာဇ၊ တာနိ ဒမ္မီတိ အာဟ သော။
ပုန အဋ္ဌသု ဒိန္နေသု၊ တာန’ဒါ စရိယဿ သော၊
ပုန အဋ္ဌသု ဒိန္နေသု၊ ဘိက္ခုသင်္ဃဿ တာန’ဒါ။
ပုန အဋ္ဌသု ဒိန္နေသု၊ အဓိဝါသေသိ ဗုဒ္ဓိမာ၊
ဒွတ္တိံသဘိက္ခူ အာဒါယ၊ ဒုတိယဒိဝသေ ဂတော။
သဟတ္ထာ တပ္ပိတော ရညာ၊ ဓမ္မံ ဒေသိယ ဘူပတိံ၊
သရဏေသု စ သီလေသု၊ ဌပေသိ သမဟာဇနံ။
နိဂြောဓသာမဏေရဒဿနံ
သာသနပ္ပဝေသ
တတော ရာဇာ ပသန္နော သော၊ ဒိဂုဏေန ဒိနေ ဒိနေ၊
ဘိက္ခူ သဋ္ဌိသဟဿာနိ၊ အနုပုဗ္ဗေနု’ပဌဟိ။
တတ္ထိယာနံ သဟဿာနိ၊ နိကဍ္ဎိတွာန သဋ္ဌိသော၊
သဋ္ဌိဘိက္ခုသဟဿာနိ၊ ဃရေ နိစ္စမဘောဇယိ။
သဋ္ဌိဘိက္ခုသဟဿာနိ ¶ ၊ ဘောဇေတုံ တုရိတော ဟိ သော၊
ပဋိယာဒါပယိတွာန၊ ခဇ္ဇဘောဇ္ဇံ မဟာရဟံ။
ဘူသာပေတွာန နဂရံ၊ ဂန္တွာ သင်္ဃံ နိမန္တိယ၊
ဃရံ နေတွာန ဘောဇေတွာ၊ ဒတွာ သာမဏကံ ဗဟုံ။
သတ္ထာရာ ဒေသိတော ဓမ္မော၊ ကိတ္တကောတိ အပုစ္ဆထ၊
ဗျာကာသိ မောဂ္ဂလိပုတ္တော၊ တိဿတ္ထေရော တဒဿတံ။
သုတွာန စတုရာသီတိ၊ ဓမ္မက္ခန္ဓာ’တိ သော’ဗြဝိ၊
ပူဇေမိ တေ’ဟံ ပစ္စေကံ၊ ဝိဟာရေနာ’တိ ဘူပတိ။
ဒတွာ တဒါ ဆန္နဝုတိ-ဓနကောဋိံ မဟီပတိ၊
ပုရေသု စတုရာသီတိ-သဟဿေသု မဟီတလေ။
တတ္ထ တတ္ထေ’ဝ ရာဇူဟိ၊ ဝိဟာရေ အာရဘာပယိ၊
သယံ အသောကာရာမံ တု၊ ကာရာပေတုံ သမာရဘိ။
ရတနတ္တယနိဂြောဓ-ဂိလာနာနန္တိ သာသနေ၊
ပစ္စေကံ သတသဟဿံ၊ သော ဒါပေသိ ဒိနေ ဒိနေ။
ဓနေန ဗုဒ္ဓဒိန္နေန၊ ထူပပူဇာ အနေကဓာ၊
အနေကေသု ဝိဟာရေသု၊ အနေကေ အကရုံ သဒါ။
ဓနေန ဓမ္မဒိန္နေန၊ ပစ္စယေ စတုရော ဝရေ၊
ဓမ္မဓရာနံ ဘိက္ခူနံ၊ ဥပနေတုံ သဒါ နရာ။
အနောတတ္တောဒကာဇေသု၊ သင်္ဃဿ စတုရော အဒါ၊
တေ ပိဋကာနံ ထေရာနံ၊ သဋ္ဌိယေ’ကံ ဒိနေ ဒိနေ။
ဧကံ အသန္ဓိမိတ္တာယ၊ ဒေဝိယာ တု အဒါပယိ၊
သယံ ပန ဒုဝေယေဝ၊ ပရိဘုဉ္ဇိ မဟီပတိ။
သဋ္ဌိဘိက္ခုသဟဿာနံ၊ ဒန္တကဋ္ဌံ ဒိနေ ဒိနေ၊
သောဠသိတ္ထိသဟဿာနံ၊ အဒါ နာဂလတာဝှယံ။
အထေကဒိဝသံ ရာဇာ၊ စတုသမ္ဗုဒ္ဓဒဿိနံ၊
ကပ္ပာယုကံ မဟာကာဠံ၊ နာဂရာဇံ မဟိဒ္ဓိကံ။
သုဏိတွာ တမာနေတုံ၊ သောဏ္ဍသင်္ခလိဗန္ဓနံ၊
ပေသယိတွာ တမာနေတွာ၊ သေတစ္ဆတ္တဿ ဟေဋ္ဌတော။
ပလ္လင်္ကမှိ နိသီဒေတွာ၊ နာနာပုပ္ဖေဟိ ပူဇိယ၊
သောဠသိတ္ထိသဟဿေဟိ၊ ပရိဝါရိယ အဗြဝိ။
သဒ္ဓမ္မစက္ကဝတ္တိဿ ¶ ၊ သမ္ဗုဒ္ဓဿ မဟေသိနော၊
ရူပံ အနန္တဉာဏဿ၊ ဒဿေဟိ မမ ဘော ဣတိ။
ဒွတ္တိံသလက္ခဏူပေတံ၊ အသီတိဗျဉ္ဇနုဇ္ဇလံ၊
ဗျာမပ္ပဘာပရိက္ခိတ္တံ၊ ကေတုမာလာဟိ သောဘိတံ။
နိမ္မာသိ နာဂရာဇာ သော၊ ဗုဒ္ဓရူပံ မနောဟရံ၊
တံ ဒိသွာ’တိ ပသာဒဿ၊ ဝိမှယဿ စ ပူရိတော။
ဧတေန နိမ္မိတံ ရူပံ၊ ဤဒိသံ ကီဒိသံ နုခေါ၊
တထာဂတဿ ရူပန္တိ၊ အာသိ ပိတုန္နတုန္နတော။
အက္ခိပူဇန္တိ သညာတံ၊ တံ သတ္တာဟံ နိရန္တရံ၊
မဟာမဟံ မဟာရာဇ၊ ကာရာပေသိ မဟိဒ္ဓိကော။
ဧဝံ မဟာနုဘာဝေါ စ၊ သဒ္ဓါ စာပိ မဟီပတိ၊
ထေရော စ မောဂ္ဂလိပုတ္တော၊ ဒိဋ္ဌာ ပုဗ္ဗေ ဝသီဟိ တေ။
သာသနပ္ပဝေသော နိဋ္ဌိတော။
မောဂ္ဂလိပုတ္တတိဿထေရာဒယော
ဒုတိယေ သင်္ဂဟေ ထေရာ၊ ပေက္ခန္တာ’နာဂတေဟိ တေ၊
သာသနောပဒ္ဒဝံ တဿ၊ ရညော ကာလမှိ အဒ္ဒသုံ။
ပေက္ခာန္တာ သကလေ လောကေ၊ တဒုပဒ္ဒဝဃာတကံ၊
တိဿဗြဟ္မာနမဒ္ဒက္ခုံ၊ အစိရဋ္ဌာယိ ဇီဝိတံ။
တေသံ သမုပသင်္ကမ္မ၊ အာယာစိံသု မဟာပတိံ၊
မနုဿေသု’ပပဇ္ဇိတွာ၊ တဒုပဒ္ဒဝဃာတနံ။
အဒါ ပဋိညံ တေသံ သော၊ သာသနုဇ္ဇောတနတ္ထိကော၊
သိဂ္ဂဝံ စဏ္ဍဝဇ္ဇိဉ္စ အဝေါစုံ ဒဟရေ ယတိ။
အဋ္ဌာရသာဒိကာ ဝဿ-သတာ ဥပရိ ဟေဿတိ၊
ဥပဒ္ဒဝေါ သာသနဿ၊ န သမ္ဘောဿာမ တံ မယံ။
ဣမံ တုမှာ’ဓိကရဏံ၊ နောပဂဉ္ဆိတ္ထ ဘိက္ခဝေါ၊
ဒဏ္ဍကမ္မာရဟာ တသ္မာ၊ ဒဏ္ဍကမ္မပဒဉှိ ဝေါ။
သာသနုဇ္ဇောတနတ္ထာယ၊ တိဿဗြဟ္မာ မဟာပတိ၊
မောဂ္ဂလိဗြာဟ္မဏဃရေ၊ ပဋိသန္ဓိံ ဂဟေဿတိ။
ကာလေ ¶ တုမှေသု ဧကော တံ၊ ပဗ္ဗာဇေတု ကုမာရကံ၊
ဧကော တံ ဗုဒ္ဓဝစနံ၊ ဥဂ္ဂဏှာပေတု သာဓုကံ။
အဟု ဥပါလိထေရဿ၊
ထေရော သဒ္ဓိဝိဟာရိကော၊
ဒါသကော သောဏကော တဿ၊
ဒွေ ထေရာ သောဏကဿိမေ။
အဟု ဝေသာလိယံ ပုဗ္ဗေ-ဒါသကော နာမ သောတ္ထိယော၊
တိသိဿသတဇေဋ္ဌော သော၊ ဝသံ အာစရိယန္တိကေ။
ဒွါဒသဝဿိကောယေဝ၊ ဝေဒပါရဂတော စရံ၊
သသိဿော ဝါလိကာရာမေ၊ ဝသန္တံ ကတသင်္ဂဟံ။
ဥပါလိထေရံ ပဿိတွာ၊ နိသီဒိတွာ တဒန္တိကေ၊
ဝေဒေသု ဂဏ္ဌိဌာနာနိ၊ ပုစ္ဆိ သော တာနိ ဗျာကရိ။
သဗ္ဗဓမ္မာနုပတိတော၊ ဧကဓမ္မော ဟိ မာဏဝ၊
သဗ္ဗေ ဓမ္မာ ဩသရန္တိ၊ ဧကဓမ္မော ဟိ ကော နု သော။
ဣစ္စာဟ နာမံ သန္ဓာယ၊ ထေရော မာဏဝကော တု သော၊
နာ’ညာသိ ပုစ္ဆိတော မန္တော၊ ဗုဒ္ဓမန္တောတိ ဘာသိတော။
ဒေဟီတိ အာဟ သော အာဟ၊ ဒေမ နော ဝေသဓာရိနော၊
ဂုရုံ အာပုစ္ဆိ မန္တတ္ထံ၊ မာတရံ ပိတရံ တထာ။
မာဏဝါနံ သတေဟေ’သ၊ တီဟိ ထေရဿ သန္တိကေ၊
ပဗ္ဗဇိတွာန ကာလေန၊ ဥပသမ္ပဇ္ဇိ မာဏဝေါ။
ခီဏာသဝသဟဿံ သော၊ ဒါသကတ္ထေရဇေဋ္ဌကံ၊
ဥပါလိထေရော ဝါစေသိ၊ သကလံ ပိဋကတ္တယံ။
ဂဏနာ ဝီတိဝတ္တာ တေ၊ သေသာ’ရိယ ပုထုဇ္ဇနာ၊
ပိဋကာနုဂ္ဂဟိတာနိ၊ ယေဟိ ထေရဿ သန္တိကေ။
ကာသီသု ကောသလော နာမ၊ သတ္ထဝါဟသုတော အဟု၊
ဂိရိဗ္ဗဇံ ဝဏိဇ္ဇာယ၊ ဂတော မာတာပိတူဟိ သော။
အဂါ ဝေဠုဝနံ ပဉ္စ-ဒသဝသော ကုမာရကော၊
မာဏဝံ ပဉ္စပညာသ၊ ပရိဝါရိယ တံ ဂတာ။
သဂဏံ ဒါသကံ ထေရံ၊ တတ္ထ ဒိသွာ ပသီဒိယ၊
ပဗ္ဗဇ္ဇံ ယာစိ သော အာဟ၊ တဝါ’ပုစ္ဆ ဂုရုံ ဣတိ။
ဘတ္တတ္တယမဘုဉ္ဇိတွာ ¶ ၊ သောဏကော သော ကုမာရကော၊
မာတာပိတူဟိ ကာရေတွာ၊ ပဗ္ဗဇ္ဇာနုညမာဂတော။
သဒ္ဓိံ တေဟိ ကုမာရေဟိ၊ ဒါသကတ္ထေရသန္တိကေ၊
ပဗ္ဗဇ္ဇံ ဥပသမ္ပဇ္ဇ၊ ဥဂ္ဂဏှိ ပိဋကတ္တယံ။
ခီဏာသဝသဟဿဿ၊ ထေရသိဿ ဂဏဿ သော၊
အဟောသိ ပိဋကညုဿ၊ ဇေဋ္ဌကော သောဏကော ယတိ။
အဟောသိ သိဂ္ဂဝေါ နာမ၊ ပုရေ ပါဋလိနာမကော၊
ပညဝါ’မစ္စတနယော၊ အဋ္ဌာရသသမော တု သော။
ပါသာဒေသု ဝသံ တီသု၊ ဆဠဍ္ဎဥတုသာဓုသု၊
အမစ္စပုတ္တံ အာဒါယ၊ စဏ္ဍဝဇ္ဇိံ သဟာယကံ။
ပုရိသာနံ ဒသဒ္ဓေဟိ၊ သတေဟိ ပရိဝါရိတော၊
ဂန္တွာန ကုက္ကုဋာရာမံ၊ သောဏကတ္ထေရမဒ္ဒသ။
သမာပတ္တိသမာပန္နံ၊ နိသိန္နံ သံဝုတိန္ဒြိယံ၊
ဝန္ဒိ တေနာလပန္တံ တံ၊ ဉတွာ သင်္ဃမပုစ္ဆိတံ။
သမာပတ္တိသမာပန္နာ၊ နာလပန္တီ’တိ အာဟု တေ၊
ကထန္နု ဝုဋ္ဌဟန္တီတိ၊ ဝုတ္တာ အာဟံသု ဘိက္ခဝေါ။
ပက္ကောသနာယ သတ္ထုဿ၊ သင်္ဃပက္ကောသနာယ စ၊
ယထာ ကာလပရိစ္ဆေဒါ၊ အာယုက္ခယဝသေန စ။
ဝုဋ္ဌဟန္တီတိ ဝတွာန၊ တေသံ ဒိသွော’ပနိဿယံ၊
ပါဟေသုံ သင်္ဃဝစနံ၊ ဝုဋ္ဌာယ သ တဟိံ အဂါ။
ကုမာရော ပုစ္ဆိ ကိံ ဘန္တေ၊ နာလပိတ္ထာတိ အာဟ သော၊
ဘုဉ္ဇိမှ ဘုဉ္ဇိတဗ္ဗန္တိ၊ အာဟ ဘောဇေထ နော အပိ။
အာဟ အမှာဒိသေ ဇာဟေ၊ သက္ကာ ဘောဇယိတုံ ဣတိ၊
မာတာပိတု အနုညာယ၊ သော ကုမာရောထ သိဂ္ဂဝေါ။
စဏ္ဍဝဇ္ဇီ စ တေပဉ္စ-သတာနိ ပုရိသာပိ စ၊
ပဗ္ဗဇ္ဇိတွော’ပသမ္ပဇ္ဇုံ၊ သောဏတ္ထေရဿ သန္တိကေ။
ဥပဇ္ဈာယန္တိကေယေဝ၊ တေ ဒုဝေ ပိဋကတ္တယံ၊
ဥဂ္ဂဟေသုဉ္စ ကာလေန၊ ဆဠဘိညံ လဘိံသု စ။
ဉတွာ ¶ တိဿ ပဋိသန္ဓိံ၊ တတော ပဘုတိ သိဂ္ဂဝေါ၊
ထေရော သော သတ္တဝဿာနိ၊ တံ ဃရံ ဥပသင်္ကမိ။
ဂစ္ဆာတိ ဝါစာမတ္တမ္ပိ၊ သတ္တဝဿာနိ နာလဘိ၊
အလတ္ထ အဋ္ဌမေ ဝဿေ၊ ဂစ္ဆာတိ ဝစနံ တဟိံ။
တံ နိက္ခမန္တံ ပဝိသန္တော၊ ဒိသွာ မောဂ္ဂလိဗြာဟ္မဏော၊
ကိဉ္စိ လဒ္ဓံ ဃရေ နောတိ၊ ပုစ္ဆိ အာမာတိ သော’ဗြဝိ။
ဃရံ ဂန္တွာန ပုစ္ဆိတွာ၊ ဒုတိယေ ဒိဝသေ တတော၊
မုသာဝါဒေန နိဂ္ဂဏှိ၊ ထေရံ ဃရမုပါဂတံ။
ထေရဿ ဝစနံ သုတွာ၊ သော ပသန္နမနော ဒွိဇော၊
အတ္တနော ပကတေန’ဿ၊ နိစ္စံ ဘိက္ခံ ပဝတ္တယိ။
ကမေန’ဿ ပသီဒိံသု၊ သဗ္ဗေ’ပိ ဃရမာနုသာ၊
ဘောဇာပေသိ ဒိဇော နိစ္စံ၊ နိသီဒါပိယ တံ ဃရေ။
ဧဝံ ကမေန ဂစ္ဆန္တော၊ ကာလေ သောဠသဝဿိကော၊
အဟု တိဿကုမာရော သော၊ တိဝေဒေါဒဓိပါရဂေါ။
ထေရော ကထာသမုဋ္ဌာနံ၊ ဟေဿတေ’ဝ ဃရေ ဣတိ၊
အာသနာနိ န ဒဿေသိ၊ ဌပေတွာ မာဏဝါသနံ။
ဗြဟ္မလောကဂတတ္တာဝ၊ သုစိကာမော အဟောသိ သော၊
တသ္မာ သော တဿ ပလ္လင်္ကော၊ ဝါသယိတွာ လဂီယတိ။
အညာသနံ အပဿန္တော၊ ဌိတေ ထေရေ သသမ္ဘမော၊
တဿ တံ အာသနံ တဿ၊ ပညပေသိ ဃရေ ဇနော။
ဒိသွာ တတ္ထ နိသိန္နံ တံ၊ အာဂမ္မာ’စရိယန္တိကာ၊
ကုဇ္ဈိတွာ မာဏဝေါ ဝါစံ၊ အမနာပံ ဥဒီရယိ။
ထေရော မာဏဝ ကိံ မန္တံ၊ ဇာနာသီတိ တမဗြဝိ၊
တမေဝ ပုစ္ဆံ ထေရဿ၊ ပစ္ဆာ ရောစေသိ မာဏဝေါ။
ဇာနာမီတိ ပဋိညာယ၊ ထေရေ ထေရံ အပုစ္ဆိသော၊
ဂဏ္ဌိဌာနာနိ ဝေဒေသု၊ တဿ ထေရော’ထ ဗျာကရိ။
ဂဟဋ္ဌောယေဝ ¶ ထေရော သော၊
ဝေဒပါရဂတော အဟု၊
န ဗျာကရေယျ ကိံ တဿ၊
ပဘိန္နပဋိသမ္ဘိဒေါ။
ယဿ စိတ္တံ ဥပ္ပဇ္ဇတိ န နိရုဇ္ဈတိ၊
တဿ စိတ္တံ နိရုဇ္ဈိဿတိ၊ န ဥပ္ပဇ္ဇိဿတိ၊
ယဿ ဝါ ပန စိတ္တံ နိရုဇ္ဈိသတိ န ဥပ္ပဇ္ဇိဿတိ၊
တဿ စိတ္တံ ဥပ္ပဇ္ဇတိ၊ န နိရုဇ္ဈတီတိ။
တံ စိတ္တယမကေ ပဉှံ၊ ပုစ္ဆိ ထေရော ဝိသာရဒေါ၊
အန္ဓကာရော ဝိယ အဟု၊ တဿ သော တမဝေါစ သော။
ဘိက္ခုကော နာမ မန္တောတိ၊ ဗုဒ္ဓ မန္တောတိ သော ဗြဝိ၊
ဒေဟီတိ ဝုတ္တေ နောဝေသ-ဓာရိနော ဒမ္မိ တံ ဣတိ။
မာတာပိတူဟိ’နုညာတော၊ မန္တတ္ထာယ သ ပဗ္ဗဇ္ဇိ၊
ကမ္မဋ္ဌာနမဒါ ထေရော၊ ပဗ္ဗာဇေတွာ ယထာရဟံ။
ဘာဝနံ အနုယုဉ္ဇန္တော၊ အစိရေန မဟာမတီ၊
သောတာဖတ္တိဖလံ ပတ္တော၊ ထေရော ဉတွာန တံ တထာ။
ပေသေသိ စဏ္ဍဝဇ္ဇိဿ၊ ထေရဿန္တိကမုဂ္ဂဟံ၊
ကာတုံ သုတ္တာဘိဓမ္မာနံ၊ သောတတ္ထာ’ကာတဒုဂ္ဂဟံ။
တတော သော တိဿဒဟရော၊ အာရဘိတွာ ဝိပဿနံ၊
ဆဠဘိညော အဟု ကာလေ၊ ထေရဘာဝဉ္စ ပါပုဏိ။
အတီဝ ပါကဋော အာသိ၊ စန္ဒော’ဝ သူရိယော’ဝသော၊
လောကော တဿ ဝစော’မညီ၊ သမ္ဗုဒ္ဓဿ ဝစောပိယ။
မောဂ္ဂလိပုတ္တတိဿထေရောဒယော နိဋ္ဌီတော။
ဧကာဟံ ¶ ဥပရာဇာ သော၊ အဒက္ခိ မိဂဝံ ဂတော၊
ကီဠမာနေ မိဂေ’ရညေ၊ ဒိသွာ ဧတံ ဝိစိန္တယိ။
မိဂါပိ ဧဝံ ကိဠန္တိ၊ အရညေ တိဏဂေါစရာ၊
န ကိဠိဿန္တိ ကိံ ဘိက္ခူ၊ သုခါဟာရဝိဟာရိနော။
အတ္တနော စိန္တိတံ ရညော၊ အာရောစေသိ ဃရံ ဂတော၊
သညာပေတုံ တု သတ္တာဟံ၊ ရဇ္ဇံ တဿ အဒါသိ သော။
အနုဘောဟိ ဣမေ ရဇ္ဇံ၊ သတ္တာဟံ တွံ ကုမာရက၊
တတော တံ ဃာတယိဿာမိ၊ ဣစ္စ’ဝေါစ မဟီပတိ။
အာဟာ’တိ တမှိ သတ္တာဟေ၊
တွံ ကေနာ’သိ ကိသော ဣတိ၊
မရဏဿ ဘယေနာတိ၊
ဝုတ္တေ ရာဇာ’ဟ တံ ပုန။
သတ္တာဟာ’ဟံ မရိဿံတိ၊ တွံ န ကီဠိ ဣမေ ကထံ၊
ကီဠိဿန္တိ ယတိ တာတ၊ သဒါ မရဏသညိနော။
ဣစ္စေဝံ ဘာကရာ ဝုတ္တော၊ သာသနသ္မိံ ပသီဒိ သော၊
ကာလေန မိဂဝံ ဂန္တွာ၊ ထေရမဒက္ခိ သညတံ။
နိသိန္နံ ရုက္ခမူလသ္မိံ၊ သော မဟာဓမ္မရက္ခိတံ၊
သာလသာခါယ နာဂေန၊ ဗီဇယန္တ မနာသဝံ။
အယံ ထေရော ဝိယာ’ဟမ္ပိ၊ ပဗ္ဗဇ္ဇ ဇိန သာသနေ၊
ဝိဟရိဿံ ကဒါ ရညေ၊ ဣတိ စိန္တယိ ပညဝါ။
ထေရော တဿ ပသာဒတ္ထံ၊
ဥပတိတွာ ဝိဟာယသာ၊
ဂန္တွာ အသောကာရာမဿ၊
ပေါက္ခရညော ဇလေ ဌိတော။
အာကာသေ ဌပယိတွာန၊ စီဝရာနိ ဝရာနိ သော၊
ဩဂါဟိတွာ ပေါက္ခရဏီ၊ ဂတ္တာနိ ပရိသိဉ္စထ။
တံ ¶ ဣဒ္ဓိံ ဥပရာဇာ သော၊ ဒိသွာ’တီဝ ပသီဒိယ၊
အဇ္ဇေဝ ပဗ္ဗဇိဿံတိ၊ ဗုဒ္ဓိံစာ’ကာသိ ဗုဒ္ဓိမာ။
ဥပသင်္ကမ္မ ရာဇာနံ၊ ပဗ္ဗဇ္ဇံ ယာစိ သာဒရော၊
နိဝါရေတုမသက္ကောန္တော၊ တမာဒါယ မဟီပတိ။
မဟတာ ပရိဝါရေန၊ ဝိဟာရမဂမာ သယံ၊
ပဗ္ဗဇိ သော မဟာဓမ္မ-ရက္ခိတတ္ထေရသန္တိကေ။
သဒ္ဓိံ တေန စတုသတ-သဟဿာနိ နရာပိ စ၊
အနုပဗ္ဗဇိတာနန္တု၊ ဂဏနာ စ န ဝဇ္ဇတိ။
ဘာဂိနေယျော နရိန္ဒဿ၊ အဂ္ဂိ ဗြဟ္မာတိ ဝိဿုတော၊
အဟောသိ ရညော ဓီတာယ၊ သင်္ဃမိတ္တာယ သာမိကော။
တဿာ တဿ သုတော စာပိ၊
သုမနော နာမ နာမသော၊
ယာစိတွာ သော’ပိ ရာဇာနံ၊
ဥပရာဇေန ပဗ္ဗဇိ။
ဥပရာဇဿ ပဗ္ဗဇ္ဇာ၊ တဿာ’သောကဿ ရာဇိနော၊
စတုတ္ထေ အာသိဝဿေသာ၊ မဟာဇနဟိတောဒယာ။
တတ္ထေဝ ဥပသမ္ပန္နော၊ သမ္ပန္နဥပနိဿယော၊
ဃဋေန္တော ဥပရာဇာ သော၊ ဆဠ’ဘိညော’ရဟာ အဟု။
ဝိဟာရေ တေသမာရဒ္ဓေ၊ သဗ္ဗေ သဗ္ဗပုရေသုပိ၊
သာဓုကံ တီဟိ ဝဿေဟိ၊ နိဋ္ဌာပေသုံ မနောရမေ။
ထေရဿ ဣန္ဒဂုတ္တဿ၊ ကမ္မာဒိဋ္ဌာယကဿ တု၊
ဣဒ္ဓိယာ စာ’သု နိဋ္ဌာသိ၊ အသောကာရာမသဝှယော။
ဇနေန ပရိဘုတ္တေသု၊ ဌာနေသု စ တဟိံ တဟိံ၊
စေတိယာနိ အကာရေသိ၊ ရမဏီယာနိ ဘူပတိ။
ပုရေဟိ စတုရာသီတိ-သဟဿေဟိ သမန္တတော၊
လေခေ ဧကာဟမာနေသုံ၊ ဝိဟာရာ နိဋ္ဌိတာ ဣတိ။
လေခေ သုတွာ မဟာရာဇာ၊ မဟာတေဇိဒ္ဓိ ဝိက္ကမော၊
ကာတုကာမော သကိံယေဝ၊ သဗ္ဗာရာမ မဟာမဟံ။
ပုရေ ဘေရိံ စရာပေသိ၊ သတ္တမေ ဒိဝသေ ဣတော၊
သဗ္ဗာရာမမဟော ဟောတု၊ သဗ္ဗဒေသေသု ဧကဒါ။
ယောဇနေ ¶ ယောဇနေ ဒေန္တု၊ မဟာဒါနံ မဟီတလေ၊
ကရောန္တု ဂါမာရာမာနံ၊ မဂ္ဂါနဉ္စ ဝိဘူသနံ။
ဝိဟာရေသု စ သဗ္ဗေသု၊ ဘိက္ခုသင်္ဃဿ သဗ္ဗထာ၊
မဟာဒါနာနိ ဝတ္တေန္တု၊ ယထာကာလံ ယထာဗလံ။
ဒီပမာလာ ပုမ္ဖမာလာ-လင်္ကာရေဟိ တဟိံ တဟိံ၊
တူရိယေဟိ စ သဗ္ဗေဟိ၊ ဥပဟာရံ အနေကဓာ။
ဥပေါသထင်္ဂါနာ’ဒါယ၊ သဗ္ဗေ ဓမ္မံ သုဏန္တု စ၊
ပူဇာဝိသေသေန’နေကေ စ၊ ကရောန္တု တဒဟေပိ စ။
သဗ္ဗေ သဗ္ဗတ္ထ သဗ္ဗထာ၊ ယထာဏတ္တာဓိကာပိ စ၊
ပူဇာ သမ္ပဋိယာဒေသုံ၊ ဒေဝလောကမနောရမာ။
တသ္မိံ ဒိနေ မဟာရာဇာ၊ သဗ္ဗာလင်္ကာရ ဘူသိတော၊
သဟောရောဓော သဟာမစ္စော၊ ဗလောဃ ပရိဝါရိတော။
အဂမာသိ သကာရာမံ၊ ဘိန္ဒန္တော ဝိယ မေဒိနိံ၊
သင်္ဃမဇ္ဈမှိ အဋ္ဌာသိ၊ ဝန္ဒိတွာ သင်္ဃမုတ္တမံ။
တသ္မိံ သမာဂမေ အာသုံ၊ အသီတိ ဘိက္ခုကောဋိ ယော၊
အဟေသုံ သတသဟဿံ၊ တေသု ခီဏာသဝါ ယတိ။
နဝုတိ ဘိက္ခုသဟဿာနိ၊ အဟူ ဘိက္ခုနိယော တဟိံ၊
ခိဏာသဝါ ဘိက္ခုနိယော၊ သဟဿံ အာသု တာသု တု။
လောကဝိဝရဏံ နာမ၊ ပါဋိဟီရံ အကံသု တေ၊
ခီဏာသဝါ ပသာဒတ္ထံ၊ ဓမ္မာသောကဿ ရာဇိနော။
စဏ္ဍာသောကောတိ ဉာယိတ္ထ၊ ပုဗ္ဗေ ပါပေန ကမ္မုနာ၊
ဓမ္မာသောကောတိ ဉာယိတ္ထ၊ ပစ္ဆာ ပုညေန ကမ္မုနာ။
သမုဒ္ဒပရိယန္တံ သော၊ ဇမ္ဗုဒီပံ သမန္တတော၊
ပဿိ သဗ္ဗေ ဝိဟာရေ စ၊ နာနာပူဇာ ဝိဘူသိတေ။
အတီဝ တုဋ္ဌော တေ ဒိသွာ၊ သင်္ဃံ ပုစ္ဆိ နိသီဒိယ၊
ကဿ ဘန္တေ ပရိစ္စာဂေါ၊ မဟာသုဂတ သာသနေ။
ထေရော သော မောဂ္ဂလိပုတ္တော၊ ရညော ပဉှံ ဝိယာကရိ၊
ဓရမာနေ’ပိ သုဂတေ၊ နတ္ထိ စာဂီ တယာသမော။
တံ သုတွာ ဝစနံ ဘိယျော၊ တုဋ္ဌော ရာဇာ အပုစ္ဆိ တံ၊
ဗုဒ္ဓသာသန ဒါယာဒေါ၊ ဟောတိ ခေါ မာဒိသော ဣတိ။
ထေရော ¶ တု ရာဇပုတ္တဿ၊ မဟိန္ဒဿူ’ပနိဿယံ၊
တထေဝ ရာဇဓီတာယ၊ သင်္ဃမိတ္တာယ ပေက္ခိယ။
သာသနဿာ’ဘိ ဝုဒ္ဓိဉ္စ၊ တံ ဟေတုကမ ဝေက္ခိယ၊
ပစ္စာဘာသထ ရာဇာနံ၊ သော သာသနဓုရန္ဓရော။
တာဒိသော’ပိ မဟာစာဂီ၊ ဒါယာဒေါ သာသနဿ န၊
ပစ္စယဒါယကော’စ္စေဝ၊ ဝုစ္စတေ မနုဇာဓီပ။
ယော တု ပုတ္တံ ဓီတရံ ဝါ၊
ပဗ္ဗဇ္ဇာပေတိ သာသနေ၊
သော သာသနဿ ဒါယာဒေါ၊
ဟောတိ နော ဒါယကော အပိ။
အထ သာသန ဒါယာဒ-ဘာဝမိစ္ဆံ မဟီပတိ၊
မဟိန္ဒံ သင်္ဃမိတ္တဉ္စ၊ ဌိတေ တတြ အပုစ္ဆထ။
ပဗ္ဗဇိဿထ ကိံ တာတာ၊ ပဗ္ဗဇ္ဇာ မဟတီ မတာ၊
ပိတုနော ဝစနံ သုတွာ၊ ပိတရံ တေ အဘာသိသုံ။
အဇ္ဇေဝ ပဗ္ဗဇိဿာမ၊ သစေ တွံ ဒေဝ ဣစ္ဆသိ၊
အမှဉ္စ လာဘော တုမှဉ္စ၊ ပဗ္ဗဇ္ဇာယ ဘဝိဿတိ။
ဥပရာဇဿ ပဗ္ဗဇ္ဇ-ကာလဘော ပဘုတီဟိ သော၊
သာ စာပိ အဂ္ဂိဗြဟ္မဿ၊ ပဗ္ဗဇ္ဇာ ကတနိစ္ဆယာ။
ဥပရဇ္ဇံ မဟီန္ဒဿ၊ ဒါတုကာမော’ပိ ဘူပတိ၊
တတော’ပိ အဓိကာသာ’တိ၊ ပဗ္ဗဇ္ဇံယေဝ ရောစယိ။
ပိယံ ပုတ္တံ မဟိန္ဒဉ္စ၊ ဗုဒ္ဓိရူပဗလောဒိတံ၊
ပဗ္ဗဇ္ဇာ ပေသိ သမဟံ၊ သင်္ဃ မိတ္တဉ္စ ဓီတရံ။
တဒါ ဝီသတိဝဿော သော၊ မဟိန္ဒော ရာဇနန္ဒနော၊
သင်္ဃမိတ္တာ ရာဇဓီတာ၊ အဋ္ဌာရသသမာ တဒါ။
တဒဟေဝ အဟု တဿ၊ ပဗ္ဗဇ္ဇာ ဥပသမ္ပဒါ၊
ပဗ္ဗဇ္ဇာ သိက္ခာဒါနဉ္စ၊ တဿာ စ တဒဟု အဟု။
ဥပဇ္ဈာယော ကုမာရဿ၊ အဟု မောဂ္ဂလိသဝှယော၊
ပဗ္ဗာဇေသိ မဟာဒေဝ-တ္ထေရော မဇ္ဈန္တိကော ပန။
ကမ္မဝါစံ အကာ တသ္မိံ၊ သော’ပသမ္ပဒမဏ္ဍလေ၊
အရဟတ္တံ မဟိန္ဒော သော၊ ပတ္တော သပဋိသမ္ဘိဒံ။
သင်္ဃမိတ္တာ’ဟု’ပဇ္ဈာယာ ¶ ၊ ဓမ္မပါလာတိ ဝိဿုတာ၊
အာစရိယာ အာယုပါလိ၊ ကာလေ သာ’သိ အနာသဝါ။
ဥဘော သာသနပဇ္ဇောတာ၊ လံကာဒီပေါပကာရိနော၊
ဆဋ္ဌေ ဝဿေ ပဗ္ဗဇိံသု၊ ဓမ္မာသောကဿ ရာဇိနော။
မဟာမဟိန္ဒော ဝဿေဟိ၊ တီဟိ ဒီပပ္ပသာဒကော၊
ပိဋကတ္တယံ မုဂ္ဂဏှိ၊ ဥပဇ္ဈာယဿ သန္တိကေ။
သာ ဘိက္ခုနီ စန္ဒလေခါ၊ မဟိန္ဒော ဘိက္ခူ သူရိယော၊
သမ္ဗုဒ္ဓ သာသနာကာသံ၊ တေ သဒါ သောဘယုံ တဒါ။
ဝနေ ပါဋလိပုတ္တမှာ၊ ဝနေ ဝနစရော စရံ၊
ကုန္တကိန္နရိယာ သဒ္ဓိံ၊ သံဝါသံ ကပ္ပယီ ကိရ။
တေန သံဝါသမနွာယ၊
သာ ပုတ္တေ ဇနယီ ဒုဝေ၊
တိဿော ဇေဋ္ဌော ကဏိဋ္ဌော တု၊
သုမိတ္တော နာမ နာမတော။
မဟာဝရုဏတ္ထေရဿ၊ ကာလေ ပဗ္ဗဇ္ဇ သန္တိကေ၊
အရဟတ္တံ ပါပုဏိံသု၊ ဆဠဘိညံ ဂုဏံ ဥဘော။
ပါဒေ ကီဋဝိသေနာ’သိ၊ ဖုဋ္ဌော ဇေဋ္ဌော သဝေဒနော၊
အာဟ ပုဋ္ဌော ကဏိဋ္ဌေန၊ ဘေသဇ္ဇံ ပသတံ ဃဋံ။
ရညော နိဝေဒနံ ထေရော၊ ဂိလာနဝတ္တတော’ပိ သော၊
သပ္ပိသတ္ထဉ္စ စရဏံ၊ ပစ္ဆာဘတ္တံ ပဋိက္ခိပိ။
ပိဏ္ဍာယ စေ စရံ သပ္ပိံ၊ လဘသေ တွံ တမာဟရ၊
ဣစ္ဆာဟ တိဿထေရော သော၊ သုမိတ္တံ ထေရမုတ္တမံ။
ပိဏ္ဍာယ စရတာ တေန၊ န လဒ္ဓံ ပသတံ ဃတံ၊
သပ္ပိကုမ္ဘသတေနာပိ၊ ဗျာဓိဇာတော အသာဓိယော။
တေနေဝ ဗျာဓိနာ ထေရော၊ ပတ္တော အာယုက္ခယန္တိကံ၊
ဩဝဒိတွာပ္ပမာဒေန၊ နိဗ္ဗာတုံ မာနသံ အကာ။
အာကာသမှိ နိသီဒိတွာ၊ တေဇောဓာတုဝသေန သော၊
ယထာရုစိ အဓိဋ္ဌာယ၊ သရီရံ ပရိနိဗ္ဗုတော။
ဇာလာသရီရာ နိက္ခမ္မ၊ နိမ္မံသဆာရိကံ ဍဟိ၊
ထေရဿ သကလံ ကာယံ၊ အဋ္ဌိကာနိတုနော ဍဟိ။
သုတွာ ¶ နိဗ္ဗူတိမေတဿ၊ တိဿထေရဿ ဘူပတိ၊
အဂမာသိ သကာရာမံ၊ ဇနောဃ ပရိဝါရိတော။
ဟတ္တိက္ခန္ဓဂတော ရာဇာ၊ တာနဋ္ဌိန’ဝရောပိယ၊
ကာရေတွာ ဓာတုသက္ကာရံ၊ သင်္ဃံ ဗျာဓိမပုစ္ဆိတံ။
တံ သုတွာ ဇာတသံဝေဂေါ၊ ပုရဒွါရေသု ကာရိယ၊
သုဓာစိတာ ပေါက္ခရဏီ၊ ဘေသဇ္ဇာနဉ္စ ပူရိယ။
ပါပေသိ ဘိက္ခုသင်္ဃဿ၊ ဘေသဇ္ဇာနိ ဒိနေ ဒိနေ၊
မာ ဟောတု ဘိက္ခုသင်္ဃဿ၊ ဘေသဇ္ဇံ ဒုလ္လဘံ ဣတိ။
သုမိတ္တထေရော နိဗ္ဗာယိ၊ စင်္ကမန္တော’ဝ စင်္ကမေ၊
ပသီဒိ သာသနေ’တီဝ၊ တေနာပိ စ မဟာဇနော။
ကုန္တိပုတ္တာ ဒုဝေ ထေရာ၊
တေ လောကဟိတကာရိနော၊
နိဗ္ဗာယိံသု အသောကဿ၊
ရညော ဝဿမှိ အဋ္ဌမေ။
တတော ပဘုတိ သင်္ဃဿ၊ လာဘော’တီဝ မဟာ အဟု၊
ပစ္ဆာ ပသန္နာ စ ဇနာ၊ ယသ္မာ လာဘံ ပဝတ္တယုံ။
ပဟီနလာဘသက္ကာရာ၊ တိတ္ထိယာ လာဘကာရဏာ၊
သယံ ကာသာယမာဒါယ၊ ဝသိံသု သဟ ဘိက္ခူဟိ။
ယထာသကဉ္စ တေ ဝါဒံ၊ ဗုဒ္ဓဝါဒေါ’တိ ဒီပယုံ၊
ယထာသကဉ္စ ကိရိယာ၊ အကရိံသု ယထာရုစိ။
တတော မောဂ္ဂလိပုတ္တော သော၊
ထေရော ထိရ ဂုဏောဒယော၊
သာသနဗ္ဗုဒမုပ္ပန္နံ၊
ဒိသွာ တမတိကက္ခလံ။
တဿော’ပသမနေ ကာလံ၊ ဒီဃဒဿီ အဝေက္ခိယ၊
ဒတွာ မဟိန္ဒထေရဿ၊ မဟာဘိက္ခုဂဏံ သကံ။
ဥဒ္ဓံ ဂင်္ဂါယ ဧကော’ဝ၊ အဟောဂင်္ဂမှိ ပဗ္ဗတေ၊
ဝိဟာသိ သတ္တဝဿာနိ၊ ဝိဝေက မနုဗြူဟယံ။
တိတ္ထိယာနံ ဗဟုစတ္တာ စ၊ ဒုဗ္ဗစ္စတ္တာ စ ဘိက္ခဝေါ၊
တေသံ ကာတုံ န သက္ခိံသု၊ ဓမ္မေန ပဋိသေဓနံ။
တေနေဝ ¶ ဇမ္ဗုဒီပမှိ၊ သဗ္ဗာရာမေသု ဘိက္ခဝေါ၊
သတ္တဝဿာနိ နာကံသု၊ ဥပေါသထ ပဝါရဏံ။
တံ သုတွာ မဟာရာဇာ၊ ဓမ္မာသောကော မဟာယသော၊
ဧကံ အမစ္စံ ပေသေသိ၊ အသောကာရာမ မုတ္တမံ။
ဂန္တွာ’ဓိကရဏံ ဧတံ၊ ဝုပသမ္မ ဥပေါသထံ၊
ကာရေဟိ ဘိက္ခုသင်္ဃေန၊ ပမာ’ရာမေ တုဝံ ဣတိ။
ဂန္တွာန သန္နိပါတေတွာ၊ ဘိက္ခုသင်္ဃံ သဒုမ္မတိ၊
ဥပေါသထံ ကရောထာတိ၊ သာဝေသိ ရာဇသာသနံ။
ဥပေါသထံ တိတ္တိယေဟိ၊ န ကရောမ မယံ ဣတိ၊
အဝေါ စ ဘိက္ခုသင်္ဃော တံ၊ အမစ္စံ မူဠှမာနသံ။
သော’မစ္စော ကတိပယာနံ၊ ထေရာနံ ပဋိပါဋိယာ၊
အစ္ဆိန္ဒိ အသိနာ သီသံ၊ ကာရေမီတိ ဥပေါသထံ။
ရာဇဘာတာ တိဿတ္ထေရော၊ တံ ဒိသွာ ကိရိယံ လဟုံ၊
ဂန္တွာန တဿ အာသန္နေ၊ သာသနမှိ နိသိဒိ သော။
ထေရံ ဒိသွာ အမစ္စော သော၊ ဂန္တွာ ရညော နိဝေဒယိ၊
သဗ္ဗံ ပဝတ္တိံ တံ သုတွာ၊ ဇာတဒါဟော မဟီပတိ။
သီဃံ ဂန္တွာ ဘိက္ခုသင်္ဃံ၊ ပုစ္ဆိ ဥဗ္ဗိဂ္ဂမာနသော၊
ဧဝံ ကတေန ကမ္မေန၊ ကဿ ပါပံ သိယာ ဣတိ။
တေသံ အပဏ္ဍိတာ ကေစိ၊ ပါပံ တုယှန္တိ ကေစိ တု၊
ဥဘိန္နံစာ’တိ အာဟံသု၊ နတ္ထိ တုယှန္တိ ပဏ္ဍိတာ။
တံ သုတွာ’ဟ မဟာရာဇာ၊ သမတ္ထော အတ္ထိ ဘိက္ခုန၊
ဝိမတိံ မေ ဝိနောဒေတွာ၊ ကာတုံ သာသနပဂ္ဂဟံ။
အတ္ထိ မောဂ္ဂလိပုတ္တော သော၊
တိဿတ္ထေရော ရထေသဘ၊
ဣစ္ဆာဟ သင်္ဃော ရာဇာနံ၊
ရာဇ တတ္ထာ’သိ သာဒရော။
ဝိသုံ ဘိက္ခုသဟဿေန၊ စတုရော ပရိဝါရိတေ၊
ထေရော နရသဟဿေန၊ အမစ္စေ စတုရော တထာ။
တဒဟေယေဝ ပေသေသိ၊ အတ္တနော ဝစနေန သော၊
ထေရံ အာနေတု မေ တေဟိ၊ တထာ ဝုတ္တေ သနာဂမိ။
တံ ¶ သုတွာ ပုန အဋ္ဌ’တ္ထ၊ ထေရေ’မစ္စေ စ ပေသယိ၊
ဝိသုံ သဟဿပုရိသေ၊ ပုဗ္ဗေ ဝိယ သနာဂမိ။
ရာဇာ ပုစ္ဆိ ကထံ ထေရော၊ အာဂစ္ဆေယျ နု ခေါ ဣတိ၊
ဘိက္ခူ အာဟံသု ထေရဿ၊ တဿ’ဂမနကာရဏံ။
ဟောတိ ဘန္တေ ဥပတ္ထမ္ဘော၊ ကာတုံ သာသနပဂ္ဂဟံ၊
ဣတိ ဝုတ္တေ မဟာရာဇ၊ ထေရော ဧဿတိ သော ဣတိ။
ပုနာပိ ထေရော’မစ္စေ စ၊ ရာဇာ သောဠသ သောဠသ၊
ဝိသုံ သဟဿ ပုရိသေ၊ တထာ ဝတွာန ပေသယိ။
ထေရော မဟလ္လတ္တေ’ပိ၊ နာရောဟိဿတိ ယာနကံ၊
ထေရံ ဂင်္ဂါယ နာဝါယ၊ အာနေထာ’တိ စ အဗြဝိ။
ဂန္တွာ တေ တံ တထာ’ဝေါစုံ၊
သော တံ သုတွာ’ဝ ဥဋ္ဌဟိ၊
နာဝါယ ထေရံ အာနေသုံ၊
ရာဇာ ပစ္စုဂ္ဂမီ တဟိံ။
ဇာဏုမတ္တံ ဇလံ ရာဇော’ဂဟေတွာ ဒက္ခိဏံ ကရံ၊
နာဝါယ ဩတရန္တဿ၊ ထေရဿာ’ဒါသိ ဂါရဝေါ။
ဒက္ခိဏံ ဒက္ခိဏေယျော သော၊ ကရံ ရညော’နုကမ္ပကော၊
အာလမ္ဗိတွာ’နုကမ္ပာယ၊ ထေရော နာဝါယ ဩတရိ။
ရာဇာ ထေရံ နယိတွာန၊ ဥယျာနံ ရတိဝဍ္ဎနံ၊
ထေရဿ ပါဒေ ဓောဝိတွာ၊ မက္ခေတွာ စ နိသီဒိယ။
သမတ္ထဘာဝံ ထေရဿ၊ ဝီမံသန္တော မဟီပတိ၊
ဒဋ္ဌုကာမော အဟံ ဘန္တေ၊ ပါဋိဟီရန္တိ အဗြဝိ။
ကန္တိ ဝုတ္တေ မဟီကမ္ပံ၊ အာဟ တံ ပုန ရာဟသော၊
သကလာယေ’က ဒေသာယ၊ ကတရံ ဒဋ္ဌုမိစ္ဆသိ။
ကော ဒုက္ကရောတိ ပုစ္ဆိတွာ၊ ဧက ဒေသာယ ကမ္ပနံ၊
ဒုက္ကရန္တိ သုဏိတွာန၊ တံ ဒုဋ္ဌုကာမတံ ဗြဝီ။
ရထံ အဿံ မနုဿဉ္စ၊ ပါတိဉ္စောဒက ပူရိတံ၊
ထေရော ယောဇန သီမာယ၊ အန္တရမှိ စတုဒ္ဒိသေ။
ဌပါပေတွာ ¶ တဒဍ္ဎေဟိ၊ သဟ တံ ယောဇနံ မဟိံ၊
စာလေသိ ဣဒ္ဓိယာ တတြ၊ နိသိန္နဿ စ ဒဿယိ။
တေနာ’မစ္စေန ဘိက္ခူနံ၊ မရဏေန’တ္တနောပိ စ၊
ပါပဿ’တ္ထိတ္တ နတ္ထိတ္တံ၊ ထေရံ ပုစ္ဆိ မဟီပတိ။
ပဋိစ္စ ကမ္မံ နတ္ထီတိ၊ ကိလိဋ္ဌံ စေတနံ ဝိနာ၊
ထေရော ဗောဓေသိ ရာဇာနံ၊ ဝတွာ တိတ္တိရဇာတကံ။
ဝသန္တော တတ္ထ သတ္တာဟံ၊ ရာဇုယျာနေ မနောရမေ၊
သိက္ခာပေသိ မဟီပါလံ၊ သမ္ဗုဒ္ဓသမယံ သုဘံ။
တသ္မိံယေဝ စ သတ္တာ ဟေ၊ ဒုဝေ ယက္ခေ မဟီပတိ၊
ပေသေတွာ မဟိယံ ဘိက္ခူ၊ အသေသေ သန္နိပါတယိ။
သတ္တမေ ဒိဝသေ ဂန္တွာ၊ သကာရာမံ မနောရမံ၊
ကာရေသိ ဘိက္ခုသင်္ဃဿ၊ သန္နိပါတမသေသတော။
ထေရေန သဟ ဧကန္တေ၊ နိသိန္နော သာဏိအန္တရေ၊
ဧကေကလဒ္ဓိကေ ဘိက္ခု၊ ပက္ကောသိတွာန သန္တိကံ။
ကိံဝါဒီ သုဂတော ဘန္တေ၊ ဣတိ ပုစ္ဆိ မဟီပတိ၊
တေ သဿတာဒိကံ ဒိဋ္ဌိံ၊ ဗျာကရိံသု ယထာသကံ။
တေ မိစ္ဆာဒိဋ္ဌိကေ သဗ္ဗေ၊ ရာဇာ ဥပ္ပဗ္ဗာဇာပယီ၊
သဗ္ဗေ သဋ္ဌိသဟဿာနိ၊ အာသုံ ဥပ္ပဗ္ဗဇာပိတာ။
အပုစ္ဆိ ဓမ္မိကေ ဘိက္ခူ၊ ကိံဝါဒီ သုဂတော ဣတိ၊
ဝိဘဇ္ဇဝါဒီ တာဟံသု၊ တံ ထေရံ ပုစ္ဆိ ဘူပတိ။
ဝိဘဇ္ဇဝါဒီ သမ္ဗုဒ္ဓါ၊
ဟောတိ ဘန္တေ’တိ အာဟ သော၊
ထေရော’ အာမာ’တိ တံ သုတွာ၊
ရာဇာ တုဋ္ဌမနော တဒါ။
သင်္ဃော ပိသောဓိတော ယသ္မာ၊
တသ္မာ သင်္ဃော ဥပေါသထံ၊
ကရောတု ဘန္တေ ဣစ္စေဝံ၊
ဝတွာ ထေရဿ ဘူပတိ။
သင်္ဃဿ ရက္ခံ ဒတွာန၊ နဂရံ ပါဝိသီ သုဘံ၊
သင်္ဃော သမဂ္ဂေါ ဟုတွာန၊ တဒါ’ကာသိ ဥပေါသထံ။
ထေရော ¶ အနေက သင်္ခမှာ၊ ဘိက္ခုသင်္ဃာ ဝိသာရဒေ၊
ဆဠဘိညေ တေပိဋကေ၊ ပဘိန္နပဋိသမ္ဘိဒေ။
ဘိက္ခုသဟဿံ ဥစ္စိနိ၊ ကာတုံ သဒ္ဓမ္မံ သင်္ဂဟံ၊
တေဟိ အသောကာရာမမှိ၊ အကာ သဒ္ဓမ္မ သင်္ဂဟံ။
မဟာကဿပတ္ထေရော စ၊ ယသတ္ထေရော စ ကာရယုံ၊
ယထာ တေ ဓမ္မ သံဂီတိံ၊ တိဿတ္ထေရောပိ တံ တထာ။
တထာဝတ္ထုပ္ပကရဏံ၊ ပရဝါဒပ္ပမဒ္ဒနံ၊
အဘာသိ တိဿတ္ထေရော စ၊ တသ္မိံ သံဂီတိ မဏ္ဍလေ။
ဧဝံ ဘိက္ခုသဟဿေန၊ ရက္ခာယ’သောက ရာဇိနော၊
အယံ နဝဟိ မာသေဟိ၊ ဓမ္မ သံဂီတိ နိဋ္ဌိတာ။
ရညော သတ္တရသေ ဝဿေ၊ ဒွါသတ္တတိသမော ဣသိ၊
မဟာပဝါရဏာယ’သော၊ သံဂီတိ တံ သမာပယိ။
သာဓုကာရံ ဒဒန္တီဝ၊ သာသနဋ္ဌိတိ ကာရဏံ၊
သံဂီတိ ပရိယောသာနေ၊ အကမ္မိတ္ထ မဟာမဟီ။
ဟိတွာ သေဋ္ဌံ ဗြဟ္မဝိမာနမ္ပိ မနုညံ၊
ဇေဂုစ္ဆံ သော သာသနဟေတုနရလောကံ၊
အာဂမ္မာ’ကာ သာသနကိစ္စံ ကတကိစ္စော၊
ကောနာမ’ညော သာသနကိစ္စမှိ ပမဇ္ဇေတိ။
သုဇနပ္ပသာဒသံဝေဂတ္ထာယ ကတေ မဟာဝံသေ
တတိယဓမ္မသံဂီတိ နာမ
ပဉ္စမော ပရိစ္ဆေဒေါ။