📜
ဒွိစတ္တာလီသတိမ ပရိစ္ဆေဒ
ဆ ရာဇကော
သင်္ဃတိဿော ¶ တတော အာသိ၊ အသိဂ္ဂါဟော မဟီပတိ၊
သာသနဿ စ ရဋ္ဌဿ၊ ဝုဒ္ဓိကာမော နယေ ရတော။
ဌာနန္တရံ ယထာရဟံ၊ ဒတွာ သင်္ဂဏှိသော ဇနံ၊
တဒါ ခုဒ္ဒကရာဇဿ၊ မောဂ္ဂလ္လာနော စမူပတိ။
ဝသန္တော ရောဟဏေ သုတွာ၊ သင်္ဃတိဿဿ ရာဇတံ၊
ခန္ဓဝါရံ သယုဒ္ဓတ္ထံ၊ မဟာဂလ္လေ နိဝေသယိ။
သင်္ဃတိဿော စ သုတွာ တံ၊ ဗလကာယမပေသယိ၊
ယုဇ္ဈိတုံ တေန တဇ္ဇေသိ၊ မောဂ္ဂလ္လာနော မဟဗ္ဗလော။
တတော ဟတ္ထဿမာဒါယ၊ ဂန္တွာ ရတ္တိဝိဟာရကံ၊
ဗလံ သော သန္နိပါတေန္တော၊ ဝါသံ တတ္ထေဝ ကပ္ပယိ။
ရာဇာ သုတွာ ပုနာ’ဂန္တွာ၊ ကဒလ္လာဒီနိဝါတကေ၊
ယုဇ္ဈိတွာ တံ ပလာပေတွာ၊ ပေသေတွာ ဗလမတ္တနော။
သယံ ပုရမုပါဂဉ္ဆိ၊ သောပိ နဋ္ဌံ သဝါဟိနိံ၊
ပုန ပါကတိကံ ကတွာ၊ ကရေဟေရမုပါဂမိ။
ရညော သေနာပတိ ပုတ္တံ၊ ပေသေတွာ စောရသန္တိကံ၊
ယေန ကေနစိ လေသေန၊ သယံ ဒုက္ခိဝ ဒုမ္မနော။
အာတုရော ဝိယ ဗာဠှံ သော၊ ဟောသိ မဉ္စပရာယနော၊
ရာဇာ သုတွာ ပဝတ္တိတံ၊ ဥပသင်္ကမ္မ တင်္ခဏေ။
မာ တွံ သောစိ ကုမာရဿ၊ သမ္မာနေတွာနုသာသိယ၊
ဟန္ဒ တွံ နဂရံ ရက္ခ၊ နတေ သက္ကာ မယာ သဟ။
ယုဒ္ဓမဏ္ဍလမာဂန္တုံ၊ ဂိလာနတ္တာတိ ယောဇယိ၊
ဥဗ္ဗာသိတေ ဇနေ သဗ္ဗေ၊ ဝိစ္ဆိန္နေ ရာဇဘောဇနေ။
မဟာပါဠိမှိ သမ္ပက္ကံ၊ ရညော ဘောဇနမာဟရုံ၊
ရာဇာ ဒွိသွာ’တိ နိဗိန္နော၊ ယာဝ မန္ဒော န ဟေဿတိ။
ဧက္ကော ¶ ပီတိ ဝိစိန္တေတွာ၊ ယုဒ္ဓါယ သမာသာ’ဂမာ၊
သဒ္ဓိံ ပုတ္တေန အာရုယှ၊ ဟတ္ထိံသန္နဒ္ဓဝါဟနော။
ထောကေနေဝ ဗလေနာဂါ၊ ပါစိနတိဿပဗ္ဗတံ၊
ဧဝံ ဥဘယတော စူဠ-သင်္ဂါမေ ပစ္စုပဋ္ဌိတေ။
သေနာပတိသမိတ္တဒ္ဒု၊ ယုဒ္ဓမာရဘိ ပစ္ဆတော၊
ပုတ္တော ဒိသွာ နရိန္ဒဿ၊ ဃာတေဿာမိ ဣမံ ဣတိ။
အာဟ ရာဇာ နိဝါရေသိ၊ မာ တေ ရုစ္စိ ဗလံ ဣဒံ၊
နေဝ သက္ကာ’ဓိဝါသေတုံ၊ အတိမန္ဒံ ဟနိဿတိ။
ဒုဝိန္နံ ဗလကာယာနံ၊ ရာဇာမဇ္ဈဂတော အဟု၊
တတော သေနာ ဒွိဓာ’ဟောသိ၊ စောရသေနာပတီပတိ။
ရညော နာဂေါ မဓုကဝှ ရုက္ခစ္ဆာယံ သမာဝိသိ၊
တဒါ ဆတ္တံ ပတိတဿ၊ သာခမာဟစ္စ ဘူမိယံ။
စောရဿ သေနာ တံ ဒိတွာ၊ ဟရိတွာ သာမိနော အဒါ၊
သော တံ ဥဿာပယိဆတ္တံ၊ ဌတွာပဗ္ဗတမုဒ္ဓနိ။
တဒါ ရာဇဗလံ ရာဇာ၊ နုနမေသောတိ စိန္တိယ၊
ဂန္တွာ တံ ပရိဝါရေသိ၊ ရာဇာ အာသိ တဒေကကော။
ဟတ္ထိက္ခန္ဓာ တဒေါရုယှ-ပုတ္တံ’မစ္စဉ္စ သောဟဒံ၊
ဥပါဝိသိ သမီပမှိ၊ မေရုမဇ္ဇရကာနနံ။
မောဂ္ဂလ္လာနော တတော လဒ္ဓ-ဇယော ဝါဟနမာဒိယ၊
သေနာပတိံစ မိတ္တဒ္ဒုံ၊ တဿ ပုတ္တဉ္စ ပါပိနံ။
ဥပါဂမ္မ ပုရံ ရာဇာ၊ အာသီ လင်္ကာ တလာဓိပေါ၊
တတော စိန္တေသိ ဇီဝန္တေ၊ သတ္တုမှိ န သုခံ ဣတိ။
သော သုတွာ ပုဗ္ဗရာဇဿ၊ ပုတ္တော ဧတ္ထာတိ ကုဇ္ဈိယ၊
အာဏာပေသိ စ တဿာ’သု၊ ဟတ္ထပါဒါနိ ဆိန္ဒိတုံ။
ဥပက္ကမိ တဒါ ရညာ၊ အာဏတ္တော ပုရိသော ခဏေ၊
ဆိန္ဒိတုံ ဟတ္ထပါဒံ သော၊ ကုမာရော ရောဒိ ဒုမ္မနော။
ပူဝခါဒကဟတ္ထံ မေ၊ ဆိန္ဒေယျံ စေ တဒါ အဟံ၊
ခါဒိသံ တေန ပူဝေတိ၊ ဟံ သုတွာ ရာဇကမ္မိကော။
ရောဒိတွာ ပရိဒေဝိတွာ၊ ရာဇာဏာယ ဒုခဒ္ဒိတော၊
ဝါမံ ဟတ္ထဉ္စ ပါဒဉ္စ၊ တဿ ဆိန္ဒိ နရာဓမော။
ဇေဋ္ဌတိဿော ¶ ပလာယိတွာ၊ ရညော ပုတ္တော’ပရော အဂါ၊
အညတော မလယံ ဒေသံ၊ မေရုကန္ဒရနာမကံ။
ရာဇာ’ထ သသုတာ’မစ္စော၊ ဂန္တွာ ဝေဠုဝနံ ရဟော၊
စောဒိတော တတ္ထ ဘိက္ခူဟိ၊ ကာသာဝါနိ သမာဒိယိ။
ဘိက္ခုဝေသံ ဂဟေတွာန၊ ရောဟဏံ ဂန္တုမာနသော၊
မဏိဟီရံ သမာဂဉ္ဆိ၊ တတြဌာ ရာဇသေဝကာ။
သဉ္ဇာနိတွာ တယောပေတေ၊ တေသံ ပါဒေဝရုဇ္ဈိယ၊
သာသနံ တဿ ပေသေသုံ၊ ရာဇာ သုတွာ ဝိသေသတော။
တုဋ္ဌော အာဏာပယိ ဂန္တွာ၊ သီဃမာဒါယ တေဇနေ၊
တတော သီဟဂိရိံနေတွာ၊ တိဿင်္ကံ နိရုပဒ္ဒဝံ။
သီသံ ဂဏှထ တတ္ထေဝ၊ ရညော စ တနယဿ စ၊
အမစ္စံ ပန ဇီဝန္တ-မာနေယျာထ မမ’န္တိကံ။
မနုဿာ ဧဝမာဏတ္တာ၊ တေ ဂဟေတွာ တယောဇနေ၊
နေတွာ သီဟဂိရိံကာတုံ၊ ယထာဝုတ္တမုပက္ကမုံ။
တတော ရာဇသုတော အာဟ၊ ပုရိသေ ကမ္မကာရကေ၊
သီသံ မေ ပဌမံ ဆေတွာ၊ ဒေထ မယှံ သုခံ ဣတိ။
ရာဇပေါသာ တထာ’ကာသုံ၊ ပစ္ဆာဆိန္ဒိံသု ရာဇိနော၊
သီသံ ပဿထ ဗာလာနံ၊ ကမ္မံ ကမ္မဝိဒူဇနာ။
ဧဝံ အနိစ္စာ ဘောဂါဟိ၊ အဓုဝါ အသယံဝသီ၊
တတ္ထ လဂ္ဂါ ကထံ နိစ္စံ၊ သုခံ ဘော န ဂဝေသထ။
ရညော သာသနမာဟံသု၊ အမစ္စဿ ဟိတေသိနော၊
တံ သုတွာန ဟသိတွာန၊ ဣဒံ ဝစနမဗြဝိ။
ဆိန္နသီသော မယာ ဒိဋ္ဌော၊ မယိ ဇီဝတိ သာမိကော၊
ဌပေတွာ ဟမ္ပိ သေဝါမိ၊ အဟော အညဉှိ သာမိကံ။
ဣဓ တံ မာရယိတွာန၊ ဆာယံ တဿ ဟရိဿထ၊
အဟော အညာဏကာ တုမှေ၊ မညေ ဥမ္မတ္တကာ ဣတိ။
ဣတိ ဝတွာန သော ပါဒေ၊ ဂဟေတွာ သာမိနော သယိ၊
တဿ တေ ဟရဏောပါယံ၊ အပဿန္တာ ယထာ တထာ။
တဿာပိ သီသံ ဆေတွာန၊ မစ္စာ အာဒါယ တီဏိ’ပိ၊
ရညော ဒဿေတုမာဟစ္စ၊ ရာဇာ တုသိတ္ထ နိဗ္ဘယော။
ဒုဋ္ဌသေနာ ¶ ပတိဿာ’ဒါ၊ တတော မလယရာဇတံ၊
အသိဂ္ဂါဟကဌာနမှိ၊ တဿ ပုတ္တံ ဌပေသိ စ။
ထူပတ္တယမ္ပိ ဆာဒေသိ၊ ဝတ္ထေဟိ အဟတေဟိ သော၊
တထာ လင်္ကာတလေ သဗ္ဗေ၊ ထူပေကာသိ မဟုဿဝံ။
ကေသဓာတုဉ္စ နာထဿ၊ ဒါဌာဓာတုံ တထေဝ စ၊
မဟာဗောဓိံ သသက္ကစ္စံ၊ မဟာပူဇာယ သက္ကရိ။
သဗ္ဗံ ဝေသာခပူဇာဒိံ၊ စာရိတ္တံနုဂတံ အကာ၊
ဓမ္မကမ္မေန သောဓေသိ၊ သဗ္ဗံ သုဂတသာသနံ။
ပိဋကာနဉ္စ သဇ္ဈာယံ၊ မဟာပူဇာယ ကာရယိ၊
လာဘံ ဒတွာ တိရေကေန၊ ပူဇယိတ္ထ ဗဟုဿုတေ။
ဘိက္ခူနံ ဒီပဝါသီနံ၊ သဗ္ဗေသံ စီဝရံ အဂါ၊
အာဝါသေသု စ သဗ္ဗေသု၊ ကထိနံ အတ္ထရာပယိ။
ပဋိမာယော စ ကာရေသိ၊ ဇိဏ္ဏဉ္စ ပဋိသင်္ခရိ၊
လောဏက္ခေတ္တဉ္စ ပါဒါသိ၊ သင်္ဃဿ တိသတာဓိကံ။
ကာရပိဋ္ဌိမှိ ကာရေသိ၊ မောဂ္ဂလ္လာန ဝိဟာရကံ၊
ဝိဟာရာ ပိဋ္ဌိဂါမဉ္စ၊ သဂါမံ ဝဋဂါမကံ။
တထာ စေတိယဂေဟဉ္စ’-ကာသိ ရက္ခဝိဟာရကေ၊
ဝိဟာရံ နံ ဗဟုန္နံ သော၊ ဘောဂဂါမေ ဗဟူ အဒါ။
ဧဝံ ပုညာနီ သော’ကာသိ၊ အပ္ပမေယျာနိ ဘူမိပေါ၊
သမ္ပတ္တီနမနိစတ္တံ၊ သရန္တော ပုဗ္ဗရာဇိနော။
တဒါ ကေနစိ ဒေါသေန၊ ကုဒ္ဓါမလယရာဇိနော၊
သရိတွာ ပုဗ္ဗရာဇဿ၊ ကတံ တေန ဝိရူပကံ။
ဥပါယေန ဂဟေတွာန၊ ဟတ္ထပါဒဉ္စ ဆေဒယိ၊
တံ သုတွာ သော အသိဂ္ဂါဟော၊ သပုတ္တော ရောဟဏံဂတော။
ဝသန္တော တတ္ထ သော ကတွာ၊ ဟတ္ထေ ဇနပဒံ လဟုံ၊
ဇေဋ္ဌသိဿမုပဂဉ္ဆိ၊ နိလီနံ မလယေ ဌိတံ။
သဒ္ဓိံ တေနသဃာတေန္တော၊ ရဋ္ဌံ ဇနပဒံ ခဏေ၊
ဒေါဠပဗ္ဗတမာဂမ္မ၊ ခန္ဓာဝါရံ နိဝေသယိ။
ရာဇာ သုတွာန တံ သဗ္ဗံ၊ သန္နဒ္ဓဗလဝါဟနော၊
ခန္ဓာဝါရံ နိဝေသေသိ၊ ဂန္တွာ တဿေဝ သန္တိကံ။
တဒါ ¶ ပဇ္ဇရရောဂေန၊ မနုဿာရာဇိနော ဗဟူ၊
ဥပဒ္ဒုတာ မတာ အာသုံ၊ တံ သုတွာ သော အသိဂ္ဂဟော။
ယုဒ္ဓမာရဘိဝေဂေန၊ ရညော သေနာတိဒုဗ္ဗလာ၊
ပဘိဇ္ဇိတွာ ပလာယိတ္ထ၊ ရာဇာပစ္ဆာ ပလာယိ သော။
ဒိသွာ ဧကာကိနံ ယန္တံ၊ သီဟပဗ္ဗတသန္တိကေ၊
အသိဂ္ဂါဟော မဟာရာဇံ၊ မာရယိတ္ထ သပရိသံ။
ဩဟီနံ ပစ္ဆတော ဇေဋ္ဌ-တိဿမ္ပိ ပန မာရိတုံ၊
သာသနံ တဿ ပေသေသိ၊ ဧဟိ ရာဇာ ဘဝါဟီတိ။
သော တညတွာ ပလာယိတွာ၊ နိဝတ္တော မလယံ အဂါ၊
ကထဉှိ လဒ္ဓံ ကိစ္ဆေန၊ ရဇ္ဇံသော ဒေတိ မေ ဣတိ။
ဧဝံ ခေါ ဒလ္လနာမံ သော၊ မောဂ္ဂလ္လာနံ နရိဿရံ၊
မာရေတွာ ဆဟိ ဝဿေဟိ၊ သမ္ပတ္တဗလဝါဟနော။
အထာ’ဂန္တွာ အသိဂ္ဂါဟော၊ အနုရာဓပုရံ ဝရံ၊
ရာဇာ ဟုတွာ ပဝတ္တေသိ၊ အာဏာစက္ကံ မဟီတလေ။
သ သိလာမေဃဝဏ္ဏဝှော၊ သင်္ဃံ ဗောဓိဉ္စ ဝန္ဒိယ၊
ထူပတ္တယဉ္စ သက္ကာသိ၊ မဟာပါဠိဉ္စ ဝဍ္ဎယိ။
ပါယာသံ’ဒါသိ သင်္ဃဿ၊ သပ္ပိဖာဏိတသင်္ခတံ၊
ဆာတကေ အတိကိစ္ဆမှိ၊ ပရိဿာဝနမေဝ စ။
သဗ္ဗဒါနေန သင်္ဂဏှီ၊ ကပဏဒ္ဓိဝဏိဗ္ဗကေ၊
ပူဝမူလဓနံစာ’ဒါ၊ ကုမာရာနံ မဟာဒယော။
ဝိဟာရေ အဘယေ ဗုဒ္ဓံ၊ ပူဇယိတ္ထ သီလာမယံ၊
ဇိဏ္ဏဉ္စ ဂေဟံ တဿာ’ကာ၊ နာနာရတနစိတ္တိကံ။
ကောလဝါပိဉ္စ ဒတွာန၊ အာရက္ခတ္ထံ ဇိနဿ သော၊
ပူဇံ သဗ္ဗောပဟာရေဟိ၊ သဗ္ဗကာလံ ပဝတ္တယိ။
ဧဝံ တသ္မိံ မဟီပါလေ၊ ဝသန္တေ ပုညဘာဇနေ၊
နာယကော သိရိနာဂဝှော၊ ဇေဋ္ဌတိဿဿ မာတုလော။
ဂန္တွာန ပရတီရံ သော၊ အာဒါယ ဒမိဠေ ဗဟူ၊
အာဂန္တွာ ဥတ္တရံ ဒေသံ၊ ဂဏှိတုံ တမုပက္ကမိ။
ရာဇာပိ သုတွာ တံ ဂန္တွာ၊ ယုဇ္ဈိတွာ ရာဇမိတ္တကေ၊
ဂါမေ ဟန္တွာန တံ တေန၊ ဒမိဠေ သဒ္ဓိမာဂတေ။
ဟတသေသေ ¶ ဂဟေတွာန၊ ကတွာ ပရိဘဝံ ဗဟုံ၊
အဒါသိ ဒါသေ ကတွာန၊ ဝိဟာရေသု တဟိံ တဟိံ။
ဧဝံသမ္ပတ္တဝိဇယေ၊ ပုရမာဂမ္မဘူမိပေ၊
သဗ္ဗံ ရဋ္ဌံ ဝိသောဓေတွာ၊ ဝသန္တေ အကုတော ဘယေ။
ဘိက္ခုဗောဓီ သနာမော’ထ၊ ဝိဟာရေ အဘယုတ္တရေ၊
ဒုဿီလေ ဗဟုလေ ဒိသွာ၊ ပဗ္ဗဇ္ဇာယ နဝေါပိ သော။
ရာဇာနမုပသင်္ကမ္မ၊ ဓမ္မကမ္မမယာစထ၊
ရာဇာ တေ နေဝ ကာရေသိ၊ ဓမ္မကမ္မံ ဝိဟာရကေ။
ဒုဿီလာ နိဟဋာ တေန၊ သဗ္ဗေ မန္တိယ ဧကတော၊
ရဟော တံ မာရယိတွာန၊ တံ ကမ္မံ ပဋိဗာဟယျုံ။
ရာဇာ သုတွာ တဒါ ကုဒ္ဓါ၊ သဗ္ဗေဂဏှိယ ဧကတော၊
အကာ ပေါက္ခရဏီ ပါလေ၊ ဆိန္နဟတ္ထေ သဗန္ဓနေ။
အညေ တတ္ထ သတံ ဘိက္ခူ၊ ဇမ္ဗုဒီပေ ခိပါပယိ၊
သရန္တော တဿ ဥဿာဟံ၊ ပရိသောဓေသိ သာသနံ။
ဘိက္ခူ ထေရိယဝါဒေ သော၊ ကာတုံ တေဟိ ဥပေါသထံ၊
အာရာဓေတွာ ပဋိက္ခိတ္တော၊ ပကုပ္ပိတွာ အနာဒရော။
အက္ကောသိတွာ စ ဘာသိတွာ၊ ဝါစာဟိ ဖရုသာဟိ သော၊
ဘိက္ခူ တေ အက္ခမာပေတွာ၊ ဒက္ခိဏံ ဒေသမဇ္ဈဂါ။
တဿ သော မဟတာ ဖုဋ္ဌော၊ ရောဂေန မရိသဇ္ဇုကံ၊
ဧဝံ နဝဟိ ဝဿေဟိ၊ ပရိစ္စဇိ မဟီတလံ။
တဿ ပုတ္တော တတော အဂ္ဂ-ဗောဓိ နာမော ကုမာရကော၊
အာသိ ရာဇာသိရိသင်္ဃ-ဗောဓိနာမေန ဝိသုတော။
ကဏိဋ္ဌံ ဘာတရံ မာဏံ၊ ဩပရဇ္ဇေ’ဘိသဉ္စိယ၊
တဿာ’ဒါ ဒက္ခိဏံ ဒေသံ၊ သယောဂ္ဂဗလဝါဟနံ။
ရာဇာ သော ပုဗ္ဗရာဇူနံ၊ ပဝတ္တံ န ဝိနာသိယ၊
ရဋ္ဌံ ဓမ္မေန ပါလေသိ၊ သင်္ဃဉ္စ ဗဟုမာနယိ။
ဇေဋ္ဌတိဿော’ထ တံ သဗ္ဗံ၊ သုဏိတွာ မလယေ ဌိတော၊
အရိဋ္ဌံ ဂိရိမာဂမ္မ၊ သင်္ဂဟေသိ မဟာဇနံ။
ကတွာ ဟတ္ထဂတေ ပုဗ္ဗ-ဒက္ခိဏေ သုသမာနသေ၊
ကမေန ပုရမာဂန္တု-မာရဘိတ္ထ မဟာဗလော။
ဒါဌာသိဝ ¶ မမစ္စဉ္စ၊ ဂဟေတုံ ပစ္ဆိမံ ဒိသံ၊
ပေသယိတွာ သယံ ဂါမေ၊ ဝသိတ္ထ သိရိပိဋ္ဌိကေ။
ရာဇာ နိသမ္မ တံသဗ္ဗံ၊ ဥပရာဇံ ဝိသဇ္ဇယိ၊
သဗလံ ပစ္ဆိမံ ဒေသံ၊ သော ဂန္တွာ တံ ပလာပယိ။
ပေါတကံဝ ကုလာဝမှိ၊ သက္ကာ ဟန္တုန္တိ ဒါရကံ၊
မာယေတ္တံ အာဂတံ ရာဇာ၊ ကုမာရာ’မစ္စ မဂ္ဂဟီ။
ဇေဋ္ဌတိဿံပိ ဧတံဝ၊ ဂဏှိဿာမီတိ စိန္တိယ၊
ထောကေနေဝ ဗလေနာဂါ၊ နိရာသင်္ကောတိဝိက္ကမော။
ဇေဋ္ဌသိဿောပိ တံ သုတွာ၊ သန္နဒ္ဓဗလဝါဟနော၊
သာဂရော ဘိန္နဝေလောဝ၊ ရာဇသေနံ သမောတ္ထရိ။
ရာဇသေနာ ပဘိဇ္ဇိတ္ထ၊ ရာဇာ အာရုယှ ကုဉ္ဇရံ၊
ဧကော အညာတဝေသေန၊ ပလာယိတွာ ခဏေန သော။
ဆဋ္ဌေ မာသမှိ ရဇ္ဇမှာ၊ နာဝမာရုယှ သဇ္ဇုကံ၊
ဇမ္ဗုဒီပမဂါဟိတွာ၊ ဓနံ ဒေသဉ္စ ဉာတကေ။
ဇေဋ္ဌတိဿော တတော ဟုတွာ၊ ပုရေ ရာဇာယထာ ပုရေ၊
သဗ္ဗံ ကိစ္စံ ပဝတ္တေသိ၊ ပရိပါလေသိ သာသနံ။
မဟာဒါရဂိရိံ သော’ဒါ၊ ဝိဟာရေ အဘယုတ္တရေ၊
မဟာဝိဟာရဿာ’ဒါသိ၊ မဟာမေတ္တဝှဗောဓိကံ။
ဂေါဏ္ဍိဂါမဉ္စ ပါဒါသိ၊ ရာဇာ ဇေတဝနဿ သော၊
မာတုလင်္ဂဏကဉ္စေဝ၊ ဂါမဉ္စော ဒုမ္ဗရင်္ဂဏံ။
မဟာနာဂဿ ပါဒါသိ၊ ပဓာနဃရကဿ သော၊
ကဿပဿ ဂိရိဿာပိ၊ အာဟာရံ အမ္ဗိလာပိကံ။
ဂါမံ ကက္ခလဝိတ္ထိဉ္စ၊ အဒါဝေဠုဝနဿ သော၊
ဂင်္ဂါမာတိ ဝိဟာရဿ၊ ကေဟေတံ ဂါမကံ အဒါ။
အန္တရာဂင်္ဂသဝှဿ၊ စုလ္လမာတိကဂါမကံ၊
မယေတ္တိကဿပါဝါသေ၊ သဟန္န နဂရံ အဒါ။
ကာဠဝါပိ ဝိဟာရဿ၊ ဥဒဝှံ ဂါမမာဒိသိ၊
ဧတေ စညေစ သော ဘောဂ-ဂါမေဟိ ပရိပူရယိ။
ဇိဏ္ဏံ သတသဟဿေဟိ၊ တီဟိ သော ပဋိသင်္ခရိ၊
ဘိက္ခူနံ ဒီပဝါသီနံ၊ တိစီဝရမဒါသိ စ။
ဇမ္ဗုဒီပဂတဿာ’သုံ ¶ ၊ ရညော သောဒရိယာ နရာ၊
တတ္ထ တတ္ထ နိလီနာ တေ၊ ဒေသံ ဟန္တုမုပက္ကမုံ။
သုတွာ တံ ဇေဋ္ဌတိဿော’ထ၊ ကာဠဝါပိံဥပစ္စ သော၊
ယုဇ္ဈန္တော တေဟိ တတ္ထေဝ၊ ဝါသံ’ကာသိ သဝါဟနော။
ပရတီရံ ဂတော ရာဇာ၊ ဂဟေတွာ ဒမိဠံ ဗလံ၊
ကာဠဝါပိမုပါဂမ္မ၊ ကာတုံ ယုဒ္ဓမုပက္ကမိ။
ဇေဋ္ဌတိဿောပိ သန္နဒ္ဓ ဗလကာယော ဓနာယုဓော၊
ဇမ္ဗုဒီပံ ဂမာပေတွာ၊ အမစ္စံ ဒါဌသိဝကံ။
ဝမ္မိတံ ဂဇမာရုယှ၊ ယုဇ္ဈန္တော အတ္တနော ဗလံ၊
ဩဟီယမာနံ ဒိသွာန၊ အာရုဠှံ အတ္တနာ သဟ။
မဟာမစ္စဝစော ဝေဒံ၊ သန္ဒေသံ မေ မဟေသိယာ၊
အာရောစေဟိ ယထာကာမံ၊ ပစ္ဆာ တဝ ကရိဿတိ။
ပဗ္ဗဇိတွာ မဟာဒေဝီ၊ သဇ္ဈာယိတွာ စ အာဂမံ၊
အဘိဓမ္မံ ကထေတွာန၊ ပတ္တိံ ဒေဟီတိ ရာဇိနော။
ဣစ္စေတံ သာသနံ ဒတွာ၊ ဒမိဠေ အာဂတာဂတေ၊
ယာဝ ယုဒ္ဓံ နိဟန္တွာန၊ အာယုမှိ ခယမာဂတေ။
ဝေဠုပ္ပဒမိဠံ နာမ၊ ဒိသွာ ယုဇ္ဈိတုမာဂတံ၊
တမ္ဗုလတ္ထဝိယံ ဟတ္ထေ၊ ရက္ခန္တော ဆုရိကံ တဒါ။
တတော နိက္ကရဏိံ သမ္မာ၊ ဂဟေတွာ သီသမတ္တနော၊
ဆေတွာ ဟတ္ထိမှိ အပ္ပေတွာ၊ ဆုရိကံ ကောသိယံ ခိပိ။
ဥဂ္ဃောသယိ မဟာသေနာ၊ မဟာမစ္စောပိ သော တဒါ၊
ဂန္တွာ’ဘိယောဂံ ဝတွာန၊ သီသစ္ဆေဒမှိ ရာဇိနော။
သန္ဒေသံ ဒေဝိယာ ဝတွာ၊ တာယ ပဗ္ဗဇ္ဇသာသနေ၊
သမာပိတော ဘိဓမ္မမှိ၊ သဒ္ဓိမဋ္ဌကထာယ ဟိ။
ဓမ္မာသနာ သမောရုယှ၊ နိသီဒိယ မဟီတလေ၊
ဧဟိ ရညော မဟာကာရံ၊ ဒဿေဟီ’တိ နိယောဇိတော။
နိသဇ္ဇ ပုရတော တဿာ၊ ဆိန္ဒိတွာ သီသမတ္တနော၊
ခိပိတွာ ဆုရိကံ အာဟ၊ ဧဝံ ဒေဝေါ မတော ဣတိ။
သာ တံ ဒိသွာ-တိသောကေန၊ ဖာလေတွာ ဟဒယံ မတာ၊
ဧဝံ ပဉ္စဟိ မာသေဟိ၊ ရာဇာ သော တိဒိဝံ ဂတော။
ဧဝံ ¶ ဝိဇိတသင်္ဂါမော၊ သတ္တဝေါ အဘိမဒ္ဒိယ၊
ရဇ္ဇံ ပါကတိကံ ကတွာ၊ ဝိဟရန္တော ပုရေ ဝရေ။
ဥပရာဇဿ နာမေန၊ ကာရိတဿ ပန’တ္တနာ၊
မဟလ္လရာဇာ သဝှဿ၊ ပဓာနဃရကဿ သော။
အဒ္ဓါ ဂါမဒွယံ ရာဇာ၊ ဟင်္ကာရံ သာမုဂါမကံ၊
ကေဟေလ္လရာဇဘာဂဉ္စ၊ သဗ္ဗေပိ ပရိစာရကေ။
တထာ ဇေတဝနဿ’ဒါ၊ မဟာမဏိကဂါမကံ၊
မယေတ္တိကဿပါဝါသံ၊ သာလဂါမေန ပူဇယိ။
အမ္ဗိလ္လပဒရံ စာ’ဒါ၊ စေတိယဿ ဂိရိဿ သော၊
ပုလတ္ထိနဂရေ ကာသိ၊ မဟာပါနာဒိ ဒီပကံ။
အမစ္စာ တဿ မာရေသုံ၊ မာဏဝှံ ယုဝရာဇကံ၊
အန္တောပုရေ’ပရဇ္ဈိတွာ၊ ဒတွာပိ သမမေတ္တိကံ။
တတော ကဿပနာမံ သော၊ ကဏိဋ္ဌံ သကဘာတရံ၊
ပါလေန္တော သန္တတိံ ရာဇာ၊ ဩပရဇ္ဇေ’ဘိသေစယိ။
မာဏဿ မရဏံ သုတွာ၊ ဂဟေတွာ ဒမိဠေ လဟုံ၊
ဒါဌာသိဝေါ သမာဂဉ္ဆိ၊ ဂါမံ တိန္တိဏီ နာမကံ။
တဿာဂမနမညာမ၊ နိက္ခမိတွာ သဝါဟနော၊
ယုဇ္ဈန္တော ဒွါရသေ ဝဿေ၊ ဇမ္ဗုဒီပံ ပလာတဝါ။
ပဟာယ သဗ္ဗံ ဂစ္ဆန္တော၊ သညာဏတ္ထာယ အတ္တနော၊
ဧကာဝလိံ ဂဟေတွာဝ၊ ဧကာကီ သော ဟိ နိက္ခမိ။
ဧကာဝလိံ ဝိနာစေဝ၊ ရာဇာ ဟုတွာ ယထာဝိဓိံ၊
အဟု ဒါဌောပတိဿောတိ၊ ဝိသုတော ဓရဏီ တလေ။
ဣတရော လဒ္ဓဩကာသော၊ ရဇ္ဇမဂ္ဂဟိ ယုဇ္ဈိယ၊
အညမညံ ပလာပေသုံ၊ ဧဝံ တေ အန္တရန္တရာ။
ဧဝံ ဥဘိန္နံ ရာဇူနံ၊ သင်္ဂါမေနာ’ဘိပီဠိတော၊
လောကော ဥပဒ္ဒုတော-သဗ္ဗော ဝိဟီနဓနဓညဝါ။
ဒါဌောပတိဿော နာသေသိ၊ သဗ္ဗံ ပုဗ္ဗကရာဇူနံ၊
ဂဏှီ တီသု နိကာယေသု၊ သာရံ ဓာတုဃရေသု စ။
သုဝဏ္ဏပဋိမာယော သော၊ သုဝဏ္ဏံ ဂဏှိ ဘိန္ဒိယ၊
သောဏ္ဏမာလာဒိကံ သဗ္ဗံ၊ ပူဇာဘဏ္ဍံ နိရာကရိ။
ထူပါရာမေ ¶ တထာဂဏှိ၊ သောဝဏ္ဏံ ထုပိကံ ဃရေ၊
မဟဂ္ဃရတနာကိဏ္ဏံ၊ ဆတ္တံ ဘိန္ဒိတ္ထ စေတိယေ။
မဟာပါဠိမှိ နာဝါယော၊ ဒမိဠာနံ သဒါပယိ၊
ရာဇဂေဟာ နိဈာပေသုံ၊ သဒ္ဓိံ ဓာတုဃရေန တေ။
ပစ္ဆာ ဝိပ္ပဋိသာရီ သော၊ ဒေသေတုံ၊ ပါပမတ္တနော၊
ကာရေသိ သဟ ဘောဂေန၊ သာကဝတ္ထုဝိဟာရကံ။
ဘာဂိနေယျောပိ ရတန-ဒါဌော ဣတိ ဇနေ သုတော၊
မဟာဒီပါဒေါ ဟုတွာန၊ သဘောဂေါ တမုပဋ္ဌဟိ။
အဂ္ဂဗောဓိမှိ သမ္ပတ္တေ၊ ရဇ္ဇံ ယုဒ္ဓဗလေန စ၊
ကဿပေါ ယုဝရာဇာ သော၊ သေနံ ရက္ခိတုမတ္တနော။
ဒုပ္ပညော သဟသာ ဘေတွာ၊ ထူပါရာမမှိ စေတိယံ၊
ဒေဝါနံပိယတိဿေန၊ ခုဒ္ဒရာဇေန စေဝ ဟိ။
ပုဗ္ဗကေဟိစ ရာဇူဟိ၊ ပူဇိတံဓနသာရကံ၊
အဂ္ဂဟေသိ ဒုန္နိတီဟိ၊ ပါပကေဟိ ပုရက္ခတော။
ဒက္ခိဏဿ ဝိဟာရဿ၊ စေတိယံ ပရိဘိန္ဒိယ၊
အဂ္ဂဟေသိ ဓနံ သာရံ၊ ဧဝမညေပိ ဘိန္ဒယိ။
ဧဝံ ကရောန္တံ တံ ရာဇာ၊ ဒုန္နိတိကပုရက္ခတံ၊
နာသက္ခိ ကိရ ဝါရေတုံ၊ အဟော ပါပါ နိဝါရိယာ။
တံ ဝါရေတု မသက္ကောန္တော၊ ထူပါရာမမှိ စေတိယံ၊
ဘိန္နံ တေန သကာရေသိ၊ သဟဿေန သမင်္ဂလံ။
တဒါ ဒါဌောပတိဿေန၊ အဂ္ဂဗောဓိ နရိဿရော၊
ဇိတော ရောဟဏမေဝါ’ဂါ၊ သဇ္ဇေတုံ ဗလဝါဟနံ။
တတြ ဌိတော သောဠသမေ၊ ဝဿေ ဗျာဓိဟတော မတော၊
တဒါ တဿ ကဏိဋ္ဌော သော၊ ယုဝရာဇာပိ ကဿပေါ။
ဒါဌောပတိဿ ရာဇာနံ၊ ဇမ္ဗုဒီပံ ပလာပိယ၊
ဧကရဇ္ဇမကာဒေသံ၊ မကုဋန္တု န ဓာရယိ။
သာဓူနံ သင်္ဂမေနေ’သ၊ ဟုတွာ ဝိပ္ပဋိသာရကော၊
နာသံ ပါပဿ ကမ္မဿ၊ ကရိဿာမီတိ စိန္တိယ။
ပုပ္ဖာရာမေ ဖလာရာမေ၊ ဝါပိယော’ပိ စ ကာရယိ၊
မဟာစေတိတ္တယဉ္စာပိ၊ မဟာပူဇာဟိ သက္ကရိ။
ထူပါရာမဉ္စ ¶ ပူဇေတွာ၊ ဧကံဂါမဉ္စ တဿဒါ၊
သဗ္ဗာဂမိယဘိက္ခူဟိ၊ ဓမ္မံဒေသာပယိတ္ထ စ။
ကတွာ မရိစဝဋ္ဋိမှိ၊ ပါသာဒံ သုတ္ထိရံ တဟိံ၊
ဝါသယိတ္ထ မဟာထေရံ၊ နာဂသာလ နိဝါသိတံ။
တတြဋ္ဌံ တမုပဋ္ဌာယ၊ ပစ္စယေတိ စတူဟိ’ပိ၊
အဘိဓမ္မံ ကထာပေသိ၊ သဒ္ဓိမဋ္ဌကထာယ သော။
နာဂသာလကမာဝါသံ၊ ကတွာ တဿေဝ’ဒါသိ သော၊
မဟာနိဋ္ဌိလဂါမဉ္စ၊ ပစ္စယတ္ထာယ တဿ’ဒါ။
အထ ဒါထောပတိဿော သော၊ ဇမ္ဗုဒီပါ ဣဓာဂတော၊
မဟန္တံ ဗလမာဒါယ၊ ကရောန္တော တေန အာဟဝံ။
ကဿပေန သုသန္နဒ္ဓ-ဝါဟနေန တတော မရိ၊
ဒွါဒသာသုံ ကိရေတဿ၊ ရာဇဘူတဿ ဟာယနာ။
တဿ ဒါဌောပတိဿဿ၊ ဘာဂိနေယျော သနာမကော၊
ဇမ္ဗုဒီပံ ပလာယိတ္ထ၊ ဘီတော တမှာ မဟာရဏေ။
ဧဝံ အနိစ္စာ ဝတ သဗ္ဗဘောဂါ၊
သုဒုလ္လဘာ စေဝ ခဏေဝ သောဘာ၊
တသ္မာဟိ ဧတေသု ရတိံ ဝိဟာယ၊
ဘဝေယျ ဓမ္မာဘိမုခေါ ဟိတေသီ။
သုဇနပ္ပသာဒသံဝေဂတ္ထာယ ကတေ မဟာဝံသေ
ဆ ရာဇကော နာမ
ဒွိစတ္တာလီသတိမော ပရိစ္ဆေဒေါ။