📜
ဆစတ္တာလီသတိမ ပရိစ္ဆေဒ
။ ။ ။ ဝါသံ-ကတွာ သုလဘပစ္စယံ၊
ဒါသိ ဓမ္မရုစိနံ သော၊ ရာဇိနီ ဒီပကမ္ပိ စ။
ကာရေတွာန ပရိစ္ဆေဒံ၊ မဟာနေတ္တာဒိ ပါဒိကံ၊
တေသမေဝ အဒါ ကောဠု-ဝါတေ သော ဒေဝတိဿကံ။
ဝဟတ္ထလေ စ သော ကတွာ၊ ကဒမ္ဗဂေါနနာမကံ၊
ဒေဝပါဠိမှိ ကတွာန၊ ဂီရိဝှနဂရံ တထာ။
ကတွာ အန္တရသောဗ္ဘမှိ၊ ဒေဝနာမံ ဝိဟာရကံ၊
ရာဇမာတိကမာရာမံ၊ ကတွာ’ဒါ ပံသုကူလိနံ။
ဂေါကဏ္ဏကဝိဟာရေ’ကာ၊ ပဓာနဃရမေဝ စ၊
ဇိဏ္ဏဂေဟဉ္စ ကာရေသိ၊ ဝဍ္ဎမာနကဗောဓိယာ။
သင်္ဃမိတ္တဝှယေ စေဝ၊ အညတ္ထ စ မဟာယသော၊
တတ္ထ တတ္ထ ဝိဟာရေသု၊ နဝကမ္မမကာရယိ။
ဆဗ္ဗီသတိ သဟဿာနိ၊ သုဝဏ္ဏာနံ သမပ္ပိယ၊
ဇိဏ္ဏာနိ ပဋိသင်္ခါသိ၊ ရာဇာ စေတိယပဗ္ဗတေ။
တာလဝတ္ထုဝိဟာရဉ္စ၊ ကာရေတွာ ပဏ္ဏဘတ္တကံ၊
ဝိဟာရဿ မဟာသေန-နရိန္ဒဝှဿ ဒါပယိ။
ဂေါဏ္ဍိဂါမိကဝါပိဉ္စ၊ ဆိန္နံ ဗန္ဓိ ယထာ ပုရာ၊
ဒါနဘဏ္ဍဉ္စ သော သဗ္ဗံ၊ သဗ္ဗေသံ ဒါသိ ပါဏိနံ။
ဥပေါသထံ ¶ ဥပဝသတိ၊ သဒ္ဓိံ ဒီပဇနေဟိ သော၊
ဓမ္မဉ္စ တေသံ ဒေသေတိ၊ ဒါတုံ လောကုတ္တရံ သုခံ။
ကမ္မံ သောဝဂ္ဂိယံ တဿ၊ ရဇ္ဇေ သဗ္ဗော သမာစရိ၊
ယံ ကရောတိ မဟီပါလော၊ တံ တဿ ကုရုတေ ဇနော။
တသ္မာ ရာဇာ မဟာပညော၊ ဓမ္မမေဝ သမာစရေ၊
သော နိဝုတ္ထနိဝုတ္ထမှိ၊ ဌာနေ ဟောတိ မဟာယသော။
သမ္ပတ္တပရိဝါရော စ၊ အန္တေ ဂစ္ဆတိ နိဗ္ဗုတိံ၊
အတ္တတ္ထဉ္စ ပရတ္ထဉ္စ၊ တသ္မာ ပဿေယျ ဗုဒ္ဓိမာ။
အတ္တနာ ယဒိ ဧကေန၊ ဝိနိတေန မဟာဇနာ၊
ဝိနယံ ယန္တိ သဗ္ဗေပိ၊ ကောတံ နာသေယျ ပဏ္ဍိတော။
ပယောဂေါ ယော ဟိ သတ္တာနံ၊ လောဟဒွယ ဟိတာဝဟော၊
သော တေန အကတော နတ္ထိ၊ ရတ္တန္ဒိဝမတန္ဒိနာ။
အတ္တနော သော နိဝတ္ထာနိ၊ ဝတ္ထာနိ သုခုမာနိ စ၊
ပံသူကူလိကဘိက္ခူနံ၊ စီဝရတ္ထာယ ဒါပယိ။
အဋ္ဌာနဝိနိယောဂေါပိ၊ သင်္ဂဟော ဝါ ဝိရူပကော၊
သာဝဇ္ဇော ပရိဘောဂေါ ဝါ၊ တဿ နာဟောသိ သဗ္ဗသော။
ယေ ယေ သတ္တာ ယဒါ ဟာရာ၊ တေသံ တံ တံ သဒါပယိ၊
ယေ ယေန သုခီ ဟောန္တိ၊ တေ တေ တေန သုခါပယီ။
ဧဝံ ပုညာနိ ကတွာန၊ ဆဗ္ဗဿာနိ နရာဓိပေါ၊
အဂမာ ဒေဝရာဇဿ၊ သန္တိကံ သန္တိယာဝဟော။
အထ တဿ နုဇော ရာဇာ၊ ကဿပေါ ဟောတိ ခတ္တိယော၊
သမတ္ထော ရဇ္ဇဘာရဿ၊ ဝဟိတုံ ပုဗ္ဗဝုတ္တိနော။
ပိတာ ဝိယ နိယံ ပုတ္တံ၊ သော သင်္ဂဏှိ မဟာဇနံ၊
ဒါနေန ပေယျဝဇ္ဇေန၊ အတ္ထဿ စရိယာယ စ။
ဌာနန္တရဉ္စ ဒါပေသိ၊ တဿ တဿ ယထာရဟံ၊
သယံ ဘုဉ္ဇိတ္ထ ဘောဂေပိ၊ သဗ္ဗဒုက္ခဝိဝဇ္ဇိတော။
ဂီဟိနဉ္စေဝ ဘိက္ခူနံ၊ ဗြဟ္မဏာနဉ္စ ခတ္တိယော၊
ဝတ္တာပယိ သကာဝါရေ၊ မာဃာတဉ္စေဝ ကာရယိ။
မစ္ဆတိတ္ထေ ဒုဝေ စေဝ၊ အာဝါသံ ဟေဠိဂါမကံ၊
ဝဏိဇ္ဇဂါမမာရာမံ၊ ကဿပါဒီဂိရိံ တထာ။
တထာ ¶ အမ္ဗတနဝှဉ္စ၊ ပဓာနဃရ မုတ္တမံ၊ ဘောဂဂါမဉ္စ။ ။ ။
[ဧတ္ထကဿပဿ ရဇ္ဇပဋိဗဒ္ဓါယ ကထာယ ဦနတာ ဒိဿတိ။]
တေသံ သဗ္ဗကနိဋ္ဌောပိ၊ မဟိန္ဒော နာမ ခတ္တိယော၊
သမ္ပတ္တရဇ္ဇော နာဟောသိ၊ ရာဇာ ရဇ္ဇ ဓုရန္ဓရော။
တဿပိ ကိရ နိလဝှော၊ သဟာယော စီရသတ္ထုတော၊
မတော ပုဗ္ဗေဝ တသ္မာ၊ သော သရန္တော တံ န ဣစ္ဆိတံ။
အဟောရဇ္ဇမ္ပိ ဒီပမှိ၊ န မညိတ္ထ သုခါဝဟံ၊
အဘာဝေန သဟာယဿ၊ သဟာယာ’တီဝ ဒုလ္လဘာ။
တေနေဝ ဝုတ္တံ မုနိနာ၊ ဓမ္မာ ယေကေစိ လောကိယာ၊
တထာ လောကုတ္တရာ စေဝ၊ ဓမ္မာ နိဗ္ဗာနဂါမိနော။
ကလျာဏမိတ္တံ အာဂမ္မ၊ သဗ္ဗေ တေ ဟောန္တိ ပါဏိနံ၊
တသ္မာ ကလျာဏမိတ္တေသု၊ ကတ္တဗ္ဗော’တိ သဒါ ဒရော။
အာဒိပါဒေါဝ သော တသ္မာ၊ ဟုတွာ ရဇ္ဇံ ဝိစာရယိ၊
ပါလေတုံယေဝ ဒီပမှိ၊ ဇိဝန္တော ဝိယ ပါဏိနော။
ကဿပဿ သဘာတုဿ၊ ပုတ္တံ သော အဂ္ဂဗောဓိကံ၊
ဌပေတွာ ဩပရဇ္ဇမှိ၊ ဒတွာ ဘောဂမနပ္ပကံ။
ဒေသံ ဒတွာန ပါစိနံ၊ ဝသိတုံ တတ္ထ ပေသိယ၊
ဒေသံ ဒက္ခိဏမာဒါသိ၊ ရာဇ ပုတ္တဿ အတ္တနော။
မဟာပါဠိမှိ ဒါနဉ္စ၊ ဒါပေသိ ဒသဝါဟဏံ၊
သဗ္ဗေ ဘောဂေ သမေ’ကာသိ၊ ယာစနာနံ သဟ’တ္တနာ။
အဒတွာ ယာစကာနံ သော၊ နု ကိဉ္စိ ပရိဘုဉ္ဇတိ၊
ဘုတ္တံ ဝါ သတိယာ ဒေတိ၊ ဒွိ ဂုဏံ အတ္တဘုတ္တတော။
သကနာမံ သကာရေသိ၊ ဘိက္ခုနီ န မုပဿယံ၊
ပါဒါနဂရဂလ္လဉ္စ၊ အာရာမ မရိယာဒကံ။
မဟိန္ဒတဋမာရာမံ၊ သမ္ပတ္တ စတုပစ္စယံ၊
အညမ္ပိ ဗဟုဓာ ကာသိ၊ ပုညံ ပုညဂုဏေရတော။
တိဏီ ဝဿာနိ ကာရေတွာ၊ ရဇ္ဇမေဝ မဟာမတိ၊
ဂဝေသန္တော သဟာယံ’ဝ၊ ဒေဝလောကမုပါဂမိ။
ဝသန္တော ¶ ဒက္ခိဏေ ဒေသေ၊ အဂ္ဂဗောဓိ ကုမာရကော၊
ကေနာပိ ကရဏီယေန၊ နဂရံ အာဂတော အဟု။
တသ္မိံ တတ္ထ ဝသန္တမှိ၊ အာဒိပါဒေါ မဟိန္ဒကော၊
မတော အာသိ တတော တဿ၊ ရဇ္ဇံ ဟတ္ထဂတံ အဟု။
သော တံ ဟတ္ထဂတံ ကတွာ၊ သဏ္ဌပေတွာန သာသနံ၊
ပါစိန ဒေသပတိနော၊ အဂ္ဂဗောဓိဿ ပေသယိ။
သ အာဂန္တွာ အဟု ရာဇာ၊ သိလာမေဃောတိ သညိတော၊
ဩပရဇ္ဇေ ကုမာရဉ္စ၊ အဘိသိဉ္စိတ္ထ ဘူပတိ။
သော ရာဇာ နံ နိယောဇေတွာ၊ စိန္တာ ဘာရံ ဝိမုဉ္စိယ၊
ဘောဂေ ဘုဉ္ဇထ တုမှေတိ၊ သယံ ရဇ္ဇံ ဝိစာရယိ။
ယထာယောဂံ ဇနဿေသ-ကာသိ နိဂ္ဂဟသံဂဟေ၊
ဒေသေ ဥဗ္ဗိနယံ သဗ္ဗံ၊ မဂ္ဂံ ပါပေသိ စက္ခုမာ။
ဧဝံ တေသု ဝသန္တေသု၊ ဩတာရံ ပါပကမ္မိနော၊
န လဘန္တာ ဝိစိန္တေသုံ၊ ဘိန္ဒိတဗ္ဗာ ဣမေ ဣတိ။
ရာဇာနမုပသင်္ကမ္မ၊ အဝေါစုံ ပိသုနံ ရဟော၊
တုဝံ ရာဇာသိ နာမေန၊ ရာဇာ အညော သဘာဝဟော။
ဥပရာဇာ အယံ ရဇ္ဇံ၊ ဂဏှိဿတိ မဟာဇနံ၊
သင်္ဂယှ န စိရေနေဝ၊ ဟောတိ ရာဇာ န သံသယော။
တံ သုတွာန မဟီပါလော၊ ပရိဘိဇ္ဇိ ကုမာရကေ၊
ကုမာရောပိ ဝိဓိတွာ တံ၊ စောရော ဟုတွာန ရာဇိန္ဒော။
ပလာယိတွာ သကံ ဒေသံ၊ သင်္ဂဏှိတွာ တဟိံ ဇနေ၊
မဟန္တံ ဗလမာဒါယ၊ ကာတုံ သင်္ဂါမ မာရဘိ။
ကဒလျာဒိနိဝါတမှိ၊ သင်္ဂါမော ဘိံသနော အဟု၊
ဂတော တတ္ထ ပရာဇိတွာ၊ ကုမာရော မလယံ ဝသော။
တတော ရာဇာ ကတညူ သော၊ ဥပကာရံ သဘာတုနော၊
စိန္တေတွာ ရဇ္ဇဒါနာဒိံ၊ ပရိဒေဝိတ္ထ ပါကဋံ။
ကုမာရောပိ စ တံ သုတွာ၊ အဟောသိ မုဒုစိတ္တကော၊
ဧဝံ တေ အညမညဿ၊ သိနိဒ္ဓန္တံ ပကာသယုံ။
ရာဇာ ဂန္တွာ သယံယေဝ၊ မလယံ ဧကကော ဝံသော၊
ကုမာရံ တံ သမာဒါယ၊ အာဂမိတ္ထ သကံ ပုရံ။
ဟောတိ ¶ နိဿံသယံ [ဧဝံပိ စိတ္တော] အတီဝ သော၊
ဝိဝါဟံ တေန ကာရေသိ၊ ဓီတရံ သင်္ဃနာမိကံ။
တာယ သဒ္ဓိံ ဝသန္တော သော၊ ဝိဿတ္ထော တေန ရာဇိနာ၊
ပဟာရံ တာယ ပါဒါသိ၊ ဒုဋ္ဌော ဒေါသမှိ ကိသ္မိံစိ။
ပိတရံ သာ ဥပါဂမ္မ၊ ကရုဏံ ရောဒိတမ္ပတိ၊
အကာရဏေ မံ မာရေတိ၊ ဒိန္နော ဝေါ သာမိကော ဣတိ။
သောပိ တံ သုတမတ္တေဝ၊ ဒုက္ကတံ ဝတ မေ ဣတိ၊
ပဗ္ဗာဇေသိ လဟုံ ဂန္တွာ၊ ဘိက္ခူနီ န မုပဿယံ။
အဂ္ဂဗောဓိသနာမောထ၊ တဿာ မာတုလ ပုတ္တကော၊
သုစိရေနေဝ ကာလေန၊ တဿံ သာ ရတ္တမာနသော။
ကာလော’ယန္တိ ဝိဒိတွာန၊ တမာဒါယ ပလာယိတုံ၊
အညတော တံ ဂဟေတွာန၊ ဂတော ဧကောဝ ရောဟဏံ။
အဂ္ဂဗောဓိံ နရိန္ဒော သော၊ အဂ္ဂဗောဓိ နမာဒိယ၊
အဂ္ဂဗောဓိံ နိဟန္တုံ တံ၊ ရောဟဏံ တမုပါဝီသိ။
အဂ္ဂဗောဓိ နိသေဓေတွာ၊ အဂ္ဂဗောဓိံ သဘာတရံ၊
အပရေ ပဗ္ဗတေ ဟန္တု-မဂ္ဂဗောဓိံ သယံ ဂတော။
ကသိဏံ ရောဟဏံ ဟတ္ထ-ဂတံ ကတွာ မဟာ ဗလော၊
ယုဇ္ဈိတွာ တေန တံ ဂဏှိ၊ ဘရိယံ သင်္ဃမတ္တနော။
တတော ပဋ္ဌာယ သုခိတာ၊ သမဂ္ဂါ တေ တယော ဇနာ၊
ဝိဿဋ္ဌာ အညမညေသု၊ ဝိဟရိံသု ယထာရုစိံ။
ဝါပါရနိံ အကာရာမံ၊ တထာ မာဏဂ္ဂဗောဓိကံ၊
သဘတ္တုဒ္ဒေသဘောဂဉ္စ၊ ဝိဟာရေ အတိယုတ္တရေ။
ဟတ္ထိ ကုစ္ဆိဝိဟာရေ စ၊ ဝိဟာရေ ပုန ပိဋ္ဌိကေ၊
မဟာဒီပရိဝေဏေ စ၊ ပါသာဒေ ဝါဟဒီပကေ။
ထူပါရာမမှိ ဂေဟဿ၊ ဒွါရေ စ ပရိဇိဏ္ဏကေ၊
ကာသိ ပါကတိကံ တတ္ထ၊ ထမ္ဘေ စ ပရိဝတ္တယိ။
ဧဝံ ကတွာန ပုညာနိ၊ ပုညာနိ စ ယထာဗလံ၊
စတ္တာလီသတိမေ ဝဿေ၊ ယထာကမ္မ မုပါဂမိ။
အထောပရာဇာ ရာဇာ’သိ၊ အဂ္ဂဗောဓိ သိရီဓရော၊
တနယော သော မဟိန္ဒဿ၊ အာဒိပါဒဿ ဓီမတော။
သာသနမ္ပိ ¶ စ လောကဉ္စ၊ သင်္ဂဏိတ္ထ ယထာရဟံ၊
ဩပရဇ္ဇေ’ဘိသိဉ္စတ္ထ၊ မဟိန္ဒံ ပုတ္တမတ္တနော။
မဟာဗောဓိဿ ကာရေသိ၊ ဃရံ ဇိဏ္ဏံ နဝံ ထိရံ၊
အာရာမေ ဒွေ စ ကာရေသိ၊ ကဠန္ဒံ မလ္လဝါတကံ။
ဓမ္မကမ္မေဟိ သက္ကစ္စံ၊ သောဓေသိ ဇိနသာသနံ၊
ဝိနိစ္ဆနန္တော ဓမ္မေန၊ ဆိန္ဒိ ကူဋဋ္ဋကာရကေ။
ဘေသဇ္ဇဉ္စ ဂိလာနာနံ၊ မင်္ဂလံ စာဝမင်္ဂလံ၊
လင်္ကာဒီပမှိ သကလေ၊ သယမေဝ ဝိစာရယီ။
သလာကဘတ္တံ ဒါပေသိ၊ နိကာယတ္တယ ဝါသိနံ၊
ဘောဇနံ ပံသုကူလီနံ၊ အတ္တယောဂ္ဂံ မဟာရဟံ။
ဧဝမာဒီနိ ကတွာန၊ ပုညာနိ သသယံ ဝသီ၊
စုတော’သိ ဆဟိ ဝဿေဟိ၊ ပုလတ္ထိနဂရေ ဝသံ။
တတော ပုဗ္ဗေဝ တဿာသိ၊ ပုတ္တော သော ယုဝရာဇကော၊
မတော ကိရ တတော ရဇ္ဇံ၊ အပုတ္တံ တံ တဒါ အဟု။
ပုတ္တော မဟိန္ဒော နာမာ’သိ၊ သိလာ မေဃဿ ရာဇိနော၊
ရဇ္ဇယောဂ္ဂေါ မဟာပုညော၊ လောကသင်္ဂဏှ နက္ခမော။
တဿ ဇာတဒိနေယေဝ၊ ရာဇာ နက္ခတ္တပါဌကေ၊
ပုစ္ဆိတွာ ရဇ္ဇယောဂ္ဂေါတိ၊ သုတွာ တေဟိ ဝိယာကတံ။
ဒတွာ တေသံ ဓနံ သာဓု၊ ပဝတ္တိံ တံ နိဂူဟယိ၊
အထ နံ သော ဝယပ္ပတ္တံ၊ ကတွာ သေနာပတိံသကံ။
ရဇ္ဇံ ဝဿေဝ ကတွာန၊ သဗ္ဗံ ဟတ္ထေ သယံဝသီ၊
သော ဓမ္မေန ဝိစာရေသိ၊ ရာဇ ကိစ္စံ မဟာမတိ။
မတေပိ တသ္မိံ တသ္မာ သော၊ အဂ္ဂဗောဓာဘိဓာနိနော၊
သေနာပစ္စံ န ဂဏှိတ္ထ၊ နယညူ တဿ ဟတ္ထကော။
တဒါ ကေနစိ ဂန္တွာ သော၊ ကရဏီယေန ရာဇိနော၊
သမုဒ္ဒတီရေ ဝသတိ၊ မဟာတိတ္ထမှိ ပဋ္ဋနေ။
သုတွာ သော စူဠပိတုနော၊ မရဏံ ဝေဂသာ’ဂမာ၊
စောရာ ရဇ္ဇံ ဂဟေတွာန၊ နာသေယျုံ နဂရံ ဣတိ။
တတော ဥတ္တရဒေသမှိ၊ မဏ္ဍလီကာ သရဋ္ဌိယာ၊
အစ္ဆိန္ဒိတွာန တံ ဒေသံ၊ ဆိန္နရာဇကရံ ကရုံ။
သော ¶ တံ သုတွာ မဟာသေနော၊ ဂန္တွာ ဥတ္တရဒေသကံ၊
သဗ္ဗေ နိမ္မထယိတွာန၊ မဏ္ဍလီ ကေသရဋ္ဌိယေ။
ဂန္တွာ ရညော မတဌာနံ၊ ဒိသွာ ဒေဝိံ ပရောဒိယ၊
အဿာသေတွာ ယထာကာလံ၊ ဣဒံ ဝစနမဗြဝိ။
မာစိန္တေသိ မဟာဒေဝီ၊ မတော မေ သာမိကော ဣတိ၊
ရက္ခိဿာမိ အဟံ ဒီပံ၊ တုမှေ ရဇ္ဇံ ကရိဿထ။
တုဏှိဘူတာ’ဓိဝါသေတွာ၊ ပိယသာ ပါပဗုဒ္ဓိကာ၊
ရဟော ယောဇယီ တံ ဟန္တုံ၊ ဝတ္ထုကာမာ ယထာရုစိံ။
သေနာပတိ တံ ဉတွာန၊ တဿာ’ရက္ခံ ဝိဓာယ သော၊
တံ ပက္ခိယေဟိ ယုဇ္ဈိတွာ၊ ပလာပေသိ မဟာဇနံ။
တတော ဒေဝိံ သဗန္ဓေတွာ၊ ပက္ခိပိတွာန ယာနကေ၊
အာဒါယ တံ ပုရံ ဂန္တွာ၊ ရဇ္ဇံ ဂဏှိ သသာဓနံ။
အတ္ထိ ဒပ္ပုဠ နာမော’ပိ၊
သိလာ မေဃဿ ရာဇိနော၊
ဘာဂိနေယျော မဟာသေနော၊
အာဒိပါဒေါ မဟာ ဓနော။
သော သေနံ သန္နိပါတေတွာ၊ ဝသန္တော ကာဠဝါပိယံ၊
ကာတုံ သင်္ဂါမ မာဂဉ္ဆိ၊ သင်္ဂဂါမပ္ပဒေသကံ။
သေနာပတိ ပဝတ္တိံ တံ၊ သုတွာ သမ္ပန္နဝါဟနော၊
ဒေဝိဉ္စ တံ သမာဒါယ၊ အဂမာ တတ္ထ သဇ္ဇုကံ။
တေသံ တတ္ထသိ သင်္ဂါမော၊ ဥဘိန္နံ လောမဟံသနော၊
အာဒိပါဒေါ တဒါသေနံ၊ ဩဟီယန္တံ သမေက္ခိယ။
ပလာယိတွာ အာရုဟိတ္ထ၊ အစ္ဆသေလံ သဝါဟနော၊
ပလာပေတွာန တံ တတ္ထ၊ သေနာပတိ သုခံ ဝသိ။
သုညံတိ နဂရံ သုတွာ၊ မဏ္ဍလီကာပိ ဥတ္တရေ၊
ဒေသေ သဗ္ဗေ သမာဂမ္မ၊ အဂ္ဂဟေသုံ ပုရံ တဒါ။
သော ဟိ တေ ပဋိဗာဟေသိ၊ သူရော ဓီရပရက္ကမော၊
အထာဂမ္မ ပုရံ ရဇ္ဇံ၊ ဝိစာရေသိ ယထာနယံ။
ဘိက္ခုသင်္ဃဿ လောကဿ၊ မစ္ဆာနံ မိဂပက္ခိနံ၊
ဉာတီနံ ဗလကာယဿ၊ ကတ္တဗ္ဗံ သဗ္ဗမာစရိ။
ပစ္ဆာ ¶ အနု ဗလပ္ပတ္တော၊ ဒပ္ပုလော မလယံ ဂတော၊
ဘာဂိနေယျော ဒုဝေ စေဝ၊ ပက္ကောသိတွာန ရောဟဏာ။
ရဋ္ဌေ ဇနပဒေ သဗ္ဗေ၊ အာဒါယ ဗဟုဝါဟနော၊
ရတ္တိယံ ပုရမာဂမ္မ၊ သမုဒ္ဒေါ ဝိယ ဩတ္ထရိ။
ဗလကာယော ပုရံ ရုန္ဓိ၊ ဥဂ္ဃောသေန္တော သမန္တတော၊
ဟေသိတေန တုရင်္ဂါနံ၊ ကောဉ္စနာဒေ နဒန္တိနံ။
တာဠာဝစရ သဒ္ဒါနံ၊ ကာဟဠာနံ ရဝေန စ၊
ဂဇ္ဇိတေန ဘဋာနဉ္စ၊ အာကာသံ န တဒါ ဖလိ။
တဒါ သေနာပတိ ဒိသွာ၊ မဟာသေနံ ပမောဒိယ၊
အာရောစေသိ အဝတ္တိံ တံ၊ ဗလကာယဿ အတ္တနော။
ရာဇပုတ္တာ တယော ဧတေ၊ မဟန္တံ ဗလမာဒိယ၊
နဂရံ နော’ပရုန္ဓိံသု၊ ကိန္တု ကတ္တဗ္ဗ မေတ္ထ ဝေါ။
ဧဝံ ဝုတ္တာ တမာဟံသု၊ သူရာ တဿ ရဏတ္ထိနော၊
ဒေဝါသေဝါ ဒိနေယေဝ၊ သေဝကာနံ န ဇီဝိတံ။
ဧဝံ ဘူတေ သစေ ကာလေ၊ ဩဟီနာ ဇီဝိဘတ္ထိနော၊
ပေါသေသိ သာမိ ကိံ ကာလ-မေတ္တကံ နော ယထာ သုခံ။
ဝုတ္တေ ဧဝံ သဥဿာဟော၊ ဗလံ သဇ္ဇိယ ရတ္တိယံ၊
ဥဂ္ဂတေ အရုဏေ ဟတ္ထိ-မာရုယှ ကတကမ္မကံ။
ဒွါရေနေ’ကေန နိက္ခမ္မ၊ ပတန္တော အသနီ ဝိယ၊
သဒ္ဓိံ ယော ဓသဟဿေဟိ၊ သင်္ဂါမံ ကာသိ ဒုဿဟံ။
ဗလံ တံ အာဒိပါဒဿ၊ နိပ္ဖောဋေတွာ တတော တတော၊
သန္နိပါတိယ ဧကဇ္ဈံ၊ နိယတ္တိံ သမ္ပဝေဒယိ။
ဟတာဝသေသေ အာဒါယ၊ အာဒိပါဒေါပိ ဒပ္ပုဠော၊
ပုဗ္ဗဏှေဝ ပရာဇိတွာ၊ ပလာယိတွာ’ဂ ရောဟဏံ။
ရာဇပုတ္တေ ဒုဝေ စေဝ၊ ရောဟဏမှာ တဒါ ဂတေ၊
ဇီဝဂ္ဂါဟံ သဂါဟေတွာ၊ တေ အာဒါယ ပုရံ ဂတော။
ဧဝံ ပတ္တဇယော သူရော၊ ဒီပေ ဇာတေ နိရာကုလေ၊
ပါစိနဒေသံ သာဓေတုံ၊ ပေသယိတ္ထ သဝါဟနေ။
တေပိ ဂန္တွာန ဒေသံ တံ၊ ဥတ္တရံ ဒေသမေဝ စ၊
သာဓယိတွာ’စိရေနေဝ၊ သင်္ဂဟေသုံ မဟာဗလံ။
ရာဇာပိ ¶ တံ မဟာဒေဝိံ၊ ဘရိယံ ကာသိ အတ္တနော၊
ပရိစ္စတ္တုဉ္စ မာရေတုံ၊ န သက္ကာယန္တိ စိန္တိယ။
တေသံ သံဝါသမနွာယ၊ ဂဗ္ဘော အာသိ ပတိဋ္ဌိတော၊
ပုတ္တံ ဝိဇာယိ သာဓည-ပုညလက္ခဏသညုတ္တံ။
ရညော သာ’တိပိယာ အာသိ၊ တတော ပဋ္ဌာယ သောပိ ခေါ၊
ပုတ္တဿ တဿ ပါဒါသိ၊ ဩပရဇ္ဇံ သဘောဂိယံ။
ဌိတာ ပါစိနဒေသမှိ၊ အာဒိပါဒါ နိသမ္မတံ၊
ဝိနာ သော’ယန္တိ အမှာကံ၊ ဥဘော ဟုတွာန ဧကတော။
ဒွီသု ပဿေသု သေနဉ္စ၊ သမာဒါယ မဟာဓနံ၊
သန္ဓိံဘာတရမာဟူယ၊ ကတွာရောဟဏ ဒေသတော။
ဂင်္ဂါတီရမှိ ဝါသံ တေ၊ ကပ္ပယိံသု မဟဗ္ဗလာ၊
ရာဇာ သဗ္ဗံ နိသမ္မေ’တံ၊ မဏ္ဍလီကေ တဟိံ တဟိံ။
အာရာဓေတွာ ဂဟေတွာန၊ ဒုဋ္ဌေ မာရိယ ကေစန၊
ရက္ခံ ဒတွာန နဂရေ၊ ကတ္တဗ္ဗံ သာဓုယောဇိယ။
မဟာသေနင်္ဂမာဒါယ၊ မဟေသိဉ္စ တမာဒိယ၊
ခန္ဓာဝါရံ နိဝေသေတိ၊ မဟုမ္မာရမှိ ဂါမကေ။
တဿာဂမနမညာယ၊ အာဒိပါဒါပိ တေ တယော၊
ကောဝိဠာရဝှယေ ဂါမေ၊ မဟာယုဒ္ဓံ ပဝတ္တယုံ။
အထ ရာဇာ မဟာသေနော၊ သမုဂ္ဃာတေသိ တံ ဗလံ၊
ဒပ္ပုဠော သော ပလာယိတ္ထ၊ အာဒိ ပါဒါ ဒုဝေ ဟတာ။
တတ္ထာပိ လဒ္ဓဝိဇယော၊ ပုရမာဂမ္မဘူမိပေါ၊
ရာဇကိစ္စံ ဝိစာရေသိ၊ မဟာဒါနံ ပဝတ္တယိ။
မဟာဗောဓိ ဒုမိန္ဒဿ၊ မဟာစေတိတ္တယဿ စ၊
ဓာတူနမ္ပိ စ သက္ကစ္စံ၊ မဟာပူဇာမကာရယီ။
ရောဟဏံ သမုပါဂမ္မ၊ ဒပ္ပုဠော သော တမာဂတော၊
ဗလံ သမ္ပဋိပါဒေသိ၊ ယုဇ္ဈိတုံ ပုန ရာဇိနာ။
ရာဇာ သော ပုတ္တနတ္တာနံ၊ ဒေသံ ကာတုံ နိရာကုလံ၊
ထူပါရာမမှိ သဗ္ဗေပိ၊ သန္နိပါတိယ ဘိက္ခဝေါ။
အညေပိ စ မဟာပညေ၊ ယုတ္တာ ယုတ္တိဝိသာရဒေ၊
ရာဇဓမ္မေသု သဗ္ဗေသု၊ နိပုဏော နယကောဝိဒေါ။
အာရောစေတွာ ¶ ပဝတ္တိံ တံ၊ တေဟိ သမ္မာ ပကာသိတော၊
စတုရင်္ဂမဟာသေနော၊ သဗ္ဗူပကရဏာနုဂေါ။
ဒီပေ သဗ္ဗတ္ထ ယောဇေတွာ၊ ကတ္တဗ္ဗံ နဂရေပိ စ၊
နိက္ခန္တော န စိရေနေဝ၊ အဂမာ မာရပဗ္ဗတံ။
သမ္မဒ္ဒိတွာန တံ ဒေသံ၊ ခိပ္ပံ ပဗ္ဗတမာရုဟီ၊
တံ ဒိသွာ ရောဟဏေ သဗ္ဗေ၊ ဘီတာ တံ ဝသမာဂမုံ။
တတော သန္ဓိံ ကရိတွာန၊ ဒပ္ပုဠေန သဒပ္ပကော၊
ဟတ္ထီ အဿေ စ မဏယော၊ ဂဟေတွာ တဿ ဟတ္ထတော။
ဂါဠှဂင်္ဂဉ္စ ကတွာန၊ သီမံ ရောဟဏဘောဂိနံ၊
ဩရဂင်္ဂံ သမာဒါယ၊ ရာဇဘောဂမကာရယိ။
ဒီပမေဝံ မဟာတေဇော၊ ကတွာ ဝိဂတကဏ္ဋကံ၊
ဧကာတပတ္တော အာဂမ္မ၊ ပုရံ ဝသိ ယထာသုခံ။
ပရိဝေဏံ သကာရေသိ၊ ရာဇာ ဒါမဝိဟာရကံ၊
တထာ သန္နိရတိတ္ထဉ္စ၊ ပုလတ္ထိနဂရေ ဝိဘူ။
မဟာလေခဉ္စ ကာရေသိ၊ ပရိဝေဏမဘယာ စလေ၊
တထာ ရတနပါသာဒံ၊ တထေဝ သုမနောဟရံ။
အနေကဘူမံ ကာရေတွာ၊ ဝေဇယန္တမိဝါပရံ၊
တထာ သတသဟဿေဟိ၊ တီဟိ စေဝ မဟာဓနော။
ဇမ္ဗောနဒတုဝဏ္ဏဿ၊ သဟဿေဟိ စ သဋ္ဌိဟိ၊
ဗိမ္ဗံ သတ္ထုဿ ကာရေတွာ၊ နဂ္ဃံ စူဠာမဏိယုတံ။
ပူဇံ သဗ္ဗောပဟာရေန၊ ကာရေတွာန မဟာရဟံ၊
ပါသာဒမဟနေ သဗ္ဗံ၊ ရဇ္ဇံ ဩဿဇ္ဇိ အတ္တနော။
ဗောဓိသတ္တဉ္စ ကာရေတွာ၊ ရာဇာနံ သုမနောဟရံ၊
သဏ္ဌပိတ္ထသိလာ မေဃေ၊ စာရုံ ဘိက္ခူနုပဿယေ။
ထူပါရာမမှိ ထုပဿ၊ ကာသိ သောဝဏ္ဏကဉ္စုကံ၊
ပဋ္ဋံ ကတွာ ဝိစိတတ္ထံ၊ ရဇတံ အန္တရန္တရာ။
တသ္မိံယေဝ စ ပါသာဒံ၊ ပရိဇိဏ္ဏံ သကာရယိ၊
အဘိဓမ္မံ ကထာပေသိ၊ ကာရာပေတွာ မဟာမဟံ။
မဟာထေရေန သတိမာ၊ ဟေမသာလိနိဝါသိနာ၊
တတ္ထ ပေါက္ခရဏိဉ္စဿ၊ ပရိဘောဂါယ ကာရယိ။
ဇိဏ္ဏေ ¶ ဒေဝကူလေ ကတွာ၊ ဗဟုကေ တတ္ထ တတ္ထ သော၊
ဒေဝါနံ ပဋိမာယော စ၊ ကာရယိတ္ထ မဟာရဟာ။
ဗြာဟ္မဏာနဉ္စ ဒတွာန၊ ပစ္စဂ္ဃံ ရာဇဘောဇနံ၊
ပါယေသိ ခီရံ သောဝဏ္ဏ-တဋ္ဋကေဟိ သသက္ခရံ။
ဥသဘေ ပင်္ဂုလာနဉ္စ၊ ဇီဝိကဉ္စ သဒါပယီ၊
ဒမိဠာနန္တု ပါဒါသိ၊ အဿေ ဂေါဏေ အဂဏှတံ။
အနာထာ ယေ သလဇ္ဇာ စ၊ တေ စ သင်္ဂဏှိ သော ရဟော၊
အသံဂဟိတော ဒီပမှိ၊ နတ္ထိ တေန ယထာရဟံ။
ဒါတဗ္ဗောတိ ကထံ ဂုန္န-မဟာရော သော ဝိစိန္တိယ၊
သဿေ ခီရဂတေ’ဒါသိ၊ တေသံ ခေတ္တသဟဿကေ။
ကာဠဝါပိမှိ သော ဝါရိ-သမ္ပာတံ ကာရယိ ထိရံ၊
ပုညမေဝံ ဝိဓံ တဿ၊ အပ္ပမေယျံ ဗဟုံ ကိရ။
တဿ ပုတ္တော တဒါ အာသိ၊ ယုဝရာဇာ ဒိဝင်္ဂတော၊
ဇာတော သေနာပတိ ကာလေ၊ အပရော အတ္ထိ ဒါရကော။
တံ ရာဇာ ရာဇပုတ္တေဟိ၊ ဘီတော ရာဇာရဟော ဣတိ၊
မာရေတုံ တံ န သက္ကောန္တိ၊ ဝဍ္ဎပေသိ ယထာ တထာ။
အရီဟိ နဂရေ ရုဒ္ဓေ၊ ပိတရံ သော ကိရေကဒါ၊
ဥပသင်္ကမ္မ ယာစိတ္ထ၊ သင်္ဂမာဝစရံ ဂဇံ။
သော ဒါပေသိ မဟာနာဂံ၊ ဃောရံ မာရကရူပမံ၊
ကတဟတ္ထံ ဗလဉ္စေဝ၊ သဗ္ဗာယုဓ ဝိသာရဒံ။
ကာလောယမီတိ မန္တွာ သော၊ ဗန္ဓိတွာ ဆုရိကံ တဒါ၊
ကုဉ္ဇရံ ဝရမာရုယှ၊ နိက္ခမ္မ နဂရာ ဗဟိ။
ဝိဒ္ဓံသေတွာ ဗလံ သဗ္ဗံ၊ ဒုဇ္ဇယံ ဇယမဂ္ဂဟီ၊
ရာဇာ ဒိသွာ ပသန္နော တံ၊ သေနာပစ္စဉ္စ တဿ’ဒါ။
ဧသောဝ ကိရ ဂန္တွာန၊ သဗလော ဒေသမုတ္တရံ၊
ပလာပေသိ သသေနံ တံ၊ အာဒိပါဒဉ္စ ဒပ္ပုလံ။
ဗဒ္ဓဝေရော တတော’ဟောသိ၊ ဒပ္ပုဠော တမှိ သာဓုကံ၊
မဟာဥမ္မာရယုဒ္ဓမှိ၊ ဒိသွာ တမတီကောဓဝါ။
သီဃံ ပေသေသိ တံ ဟန္တုံ၊ ဟတ္ထိမာရုဠှမတ္တနာ၊
ဩဝိဇ္ဈိယ ပလာပေသိ၊ တမေသ သကဒန္တီနာ။
ဒိသွာ ¶ တမတိသန္တုဋ္ဌော၊ အညေသဉ္စ အဘာဝတော၊
ရဇ္ဇယောဂေ အဒါ တဿ၊ ဥပရာဇတ္တမတ္တနော။
ဧဝံ ဝီသတိ ဝဿာနိ၊ ဒီပမေတံ သုဘုဉ္ဇိယ၊
ဝိပါကံ ပုညကမ္မဿ၊ ဘုဉ္ဇိတုဉ္စ ဒိဝင်္ဂတော။
ဧဝံ အနေကေဟိ နယေဟိ ထဒ္ဓါ၊
ဇနဿ ဒုက္ခေဟိ ဝိရူပကေဟိ၊
ဘောဂါ ဝိနဿန္တိ ခဏေ န သဗ္ဗေ၊
အဟော တဟိံယေဝ ရမန္တိ ဗာလာ။
သုဇနပ္ပသာဒသံဝေဂတ္ထာယ ကတေ မဟာဝံသေ
ဆ ရာဇကော နာမ
ဆစတ္တာလီသတိမော ပရိစ္ဆေဒေါ။