📜
သတ္တစတ္တာလီသတိမ ပရိစ္ဆေဒ
ပဉ္စရာဇကော
အစ္စယေ ¶ ပိတုနော ရာဇာ၊ ဥပရာဇာ အဟောသိ သော၊
သမတ္ထော သက္ကုမိတ္တာနံ၊ ကာတုံ နိဂ္ဂဟ သံဂဟေ။
သေနာ နာမသိ သပ္ပညာ၊ မဟေသီ တဿ ရာဇိနော၊
ခုဒ္ဒပုတ္တာ ပီယာ’တီဝ၊ ရညော ကလျာဏဒဿနာ။
အဒါသိ ယုဝရာဇတ္တံ၊ ဇေဋ္ဌပုတ္တဿ အတ္တနော၊
အာဒိပါဒေ’ပရေကာသိ၊ ရာဇိနီပိ စ ဓီတရော။
ဒတွာ ဌာနန္တရံ ရာဇာ၊ တေသံ တေသံ ယထာရဟံ၊
ဇနံ သင်္ဂဟဝတ္ထူဟိ၊ သင်္ဂဟေသိ စတူဟိပိ။
အထ ကေနာပိ သော ဂန္တွာ၊ ဟေတုနာ မဏိဟီရကံ၊
ဝသန္တော ကိရ အဿောသိ၊ ပစ္စန္တော ကုပိတော ဣတိ။
တတော သေနာပတိဉ္စေဝ၊ ဇေဋ္ဌပုတ္တဉ္စ အတ္တနော၊
ဂန္တွာ သာဓေထ တံ ဒေသ-မီတိ ပေသေသိ သဇ္ဇုကံ။
တေသု တတ္ထောပယာတေသု၊ ပိသုနာ ဘေဒစိန္တကာ၊
ဝတွာ ယံကိဉ္စိ ဘိန္ဒိံသု၊ တေ ဥဘောပိ နရာဓိပေ။
တတော ¶ ဒွေ ဝေရိနော ဟုတွာ၊ ဒေသံ ဂဏှိတုမာရဘုံ၊
ရာဇာ သုတွာ ခဏေနေဝ၊ ဒုရတိဿ မုပါဂမိ။
တေ ဥဘော တတ္ထ ဃာတေတွာ၊ တေသံ သဗ္ဗံ သမာဒိယ၊
ဟန္တွာ တံ ပက္ခိယေ သဗ္ဗေ၊ ပုဠတ္ထိနဂရံ ဂမိ။
တဒါ ရောဟဏဒေသမှိ၊ ဘောဂါဓိပတိနော သုတော၊
ဒါဌာသိဝါဒိပါဒဿ၊ မဟိန္ဒော နာမ ခတ္တိယော။
ပိတုနော သော’ပရိဇ္ဈိတွာ၊ ရညော သန္တိကမာဂမာ၊
ဒိသွာ ရာဇာပိ သန္တုဋ္ဌော၊ တံ သင်္ဂဏှိ ယထာရဟံ။
တေန မေတ္တိံ ထိရံ ကာတုံ၊ ဓီတရံ ဒေဝ နာမိကံ၊
တဿ ဒတွာန ပါဟေသိ၊ ဗလံ ရောဟဏမေဝသော။
သော ဂန္တွာ ရာဇသေနာယ၊ မဒ္ဒါပေတွာန ရောဟဏံ၊
ဇမ္ဗုဒီပံ ပလာပေတွာ၊ ပိတရံ ရောဟဏံ လဘိ။
မဟာဝိဟာရေ ကာရေသိ၊ သလာကဂ္ဂံ ထိရံ သုဘံ၊
ခေါလက္ခိယမုနိန္ဒဿ၊ ပရိဟာရာယ ဒါပယိ။
မဟာနာမဝှယံ ဂါမံ၊ ပူဇယိတွာ ယထာဗလံ၊
ဝဍ္ဎမာနဒုမိန္ဒဿ၊ ဇိဏ္ဏံ ဂေဟဉ္စ ကာရိယ။
ရုက္ခဏတ္ထာယ တဿာ၊ဒါ၊ ကောဋ္ဌာဂါမံ ဗဟုဒယံ၊
နီလာရာမဿ ပါဒါသိ၊ ကာဠုဿံ နာမ ဂါမကံ။
လောဟရူပဿ ပါဒါသိ၊ အာရာမဿ စ ဂါမကံ၊
ဇိဏ္ဏဉ္စ ပဋိသင်္ခါသိ၊ ပဋိမာယော စ ကာရယိ။
ပါသာဒေ စေတိယော စေဝ၊ ဝိဟာရေ စ အနပ္ပကေ၊
ပုဠတ္ထိနဂရေ’ကာသိ၊ ဝေဇ္ဇသာလံ မဟာဒယော။
တထာ ပဏ္ဍာ ဝိယဉ္စေဝ၊ ဘောဂဂါမသမာယုတံ၊
ပိဋ္ဌသပ္ပိနမန္ဓာနံ၊ သာလာယော စ တဟိံ တဟိံ။
ပေါတ္ထကေသု လိခါပေတွာ၊ အဋ္ဋေ သမ္မာ ဝိနိစ္ဆိတေ၊
ရာဇဂေဟေ ဌပါပေသိ၊ ဥက္ကောဋနဘယေန သော။
နာဂဝဍ္ဎနနာမဿ၊ ဘောဂဂါမေ ဗဟူ အဒါ၊
လေခေ’ပုဗ္ဗေ န ဝါရေတွာ၊ ပါလေတွာ ပုဗ္ဗသာသနံ။
ပိတရာ ¶ စ မဟာဒါနံ၊ ပုညမညမ္ပိ ဝါ ကတံ၊
သဗ္ဗံ တမဝိနာသေတွာ၊ နိစ္စံ သော ရက္ခိ သာဒရော။
မဟေသီ စ မဟာရညော၊ ပုညာနိ ဗဟုကာရယိ၊
ကဏ္ဋကံ စေတိယံ ကာသိ၊ ဒေဝီ စေတိယပဗ္ဗတေ။
ကာရေတွာ ဇယသေနဉ္စ၊ ပဗ္ဗတံ ဂါမိကဿဒါ၊
ဘိက္ခုသင်္ဃဿ သာ ဂါမံ၊ မဟုမ္မာရဉ္စ တဿ ဒါ။
သိလာမေဃဝှယံ ကတွာ၊ ဘိက္ခုနီနမုပဿယံ၊
သိလာမေဃဝှယေ ဒါသိ၊ ဘိက္ခုနီနဉ္စ ပစ္စယေ။
ဂါမာယေ’သုံ ပုရာကီတာ၊ ဝိဟာရော တတ္ထ သာဓနံ၊
ဒတွာ တေ မေ စယိတွာန၊ ဝိဟာရဿေဝ ဒါပယိ။
ဆာဒယိတွာ မဟာရုက္ခေ၊ သဗ္ဗေ စေတိယပဗ္ဗတေ၊
နာနာရာဂေ ဓဇေ စေဝ၊ ပဋာကာယော စ ပူဇယိ။
ပုဗ္ဗာရာမကဘာဂမ္ပိ၊ ပါသာဒံ ပဋိသင်္ခရိ၊
ဥဿာနဝိဋ္ဌိံ ဒုဗ္ဘောဂံ၊ သုဘောဂံ တဿ ကာရယိ။
ဝိဟာရံ ဂိရိဘဏ္ဍဉ္စ၊ နဋ္ဌံ ပါကတိကံ ကရိ၊
ဘောဂဂါမေ စ ဒါပေသိ၊ ဘိက္ခူနံ တန္နိဝါသိနံ။
အမ္ဗုယျာနမှိ အာဝါသံ၊ ကတွာ ဒပ္ပုဠပဗ္ဗတံ၊
ဘိက္ခူနံ တိသတဿာ’ဒါ၊ သမ္ပန္နစတုပစ္စယံ။
ကာရေတွာ နီလဂလ္လဉ္စ၊ အာရာမံ သော မနောရမံ၊
ဒကဝါရံ ဗဟုပ္ပာဒံ၊ တဿ ဒါပေသိ ကာရိယ။
အရိကာရိ ဝိဟာရေ စ၊ ပဋိသင်္ခါသိ ဇိဏ္ဏကံ၊
သလာကဂ္ဂဉ္စ ပါသာဒံ၊ အပုဗ္ဗံယေဝ ကာရယိ။
ဝါဟဒီပေ သကာရေသိ၊ သေနဂ္ဂဗောဓိပဗ္ဗတံ၊
ဓမ္မံ တီသု နိကာယေသု၊ ဝါစယိတ္ထ ဗဟုဿုတေ။
ဂဏှာပေသိ စ ဘိက္ခူနံ၊ အယောပတ္တေသု ဂဏ္ဌိကေ၊
ပုညန္တိ ဝုတ္တံ သဗ္ဗံ သော၊ န ကိဉ္စိ ပရိဝဇ္ဇယိ။
ကုလီနာနမနာထာနံ၊ ဣတ္ထီနံ’ဒါ ပိဠန္ဓနံ၊
ဘောဇနံ ဘောဇနတ္ထီနံ၊ ဗဟု သော ဒါသိ ရတ္တိယံ။
ဂုန္နံ သဿာနိ ပါဒါသိ၊ ကာကာဒီနဉ္စ ဘတ္တကံ၊
တဏ္ဍုလဉ္စ ကုမာရာနံ၊ မဓုဖာဏိတသံယုတ္တံ။
ဧဝံ ¶ ပုညာနိ ကတွာန၊ နရိန္ဒော သော သပါရိသော၊
ဘုတွာ ပဉ္စသု ဝဿေသု၊ မေဒိနိံ သမ္ပရိစ္စဇိ။
တတော တဿ သုတော အာသိ၊ သီဟဠာနံ ရထေသတော၊
သဗ္ဗရူပဂုဏောပေတော၊ မဟိန္ဒော နာမ ခတ္တိယော။
သော ဓမ္မိကသီလာမေဃော၊ ဣစ္စာသိ ဓရဏီတလေ၊
ဓမ္မဒီပေါ ဓမ္မဓဇော၊ သုဒ္ဓဓမ္မပရာယနော။
ပုဗ္ဗကေဟိ နရိန္ဒေဟိ၊ ကတံ ဓမ္မပထာနုဂံ၊
သဗ္ဗံ ကာသိ အဟာပေတွာ၊ အဓမ္မံ တု ဝိဝဇ္ဇယိ။
ရာဇာရတနပါသာဒေ၊ ကာတုံ သော နဝကမ္မကံ၊
သဗ္ဗကာလေသု ဒါပေသိ၊ ဂေဋ္ဌုမ္ဗဒကဝါရကံ။
ဇိဏ္ဏဉ္စ ပဋိသင်္ခါသိ၊ ပုညကမ္မမကာသိ စ၊
ရဇ္ဇံ ကတွာန စတူသု၊ ဝဿေသု နိဓနံ ဂတော။
အဂ္ဂဗောဓိ တတော ရာဇာ၊ ဆတ္တံ ဥဿာပယိ ပုရေ၊
ကာရေန္တော သဗ္ဗသတ္တာနံ၊ ဟိတံ သုခမသေသတော။
ဓာတုပူဇံ သကာရေသိ၊ သတ္ထုသဗ္ဗဂုဏာရဟံ၊
ပိတာမဟကတဿာ’ပိ၊ သမ္ဗုဒ္ဓဿ မဟာမဟံ။
ဥဒယဂ္ဂါဒိဗောဓိဉ္စ၊ ပရိဝေဏံ သကာရယိ၊
နာမံ ဂဟေတွာ ပိတုနော၊ အတ္တနော စ နရာဓိပေါ။
သဘောဂံ ပရိဝေဏဉ္စ၊ ကတွာ တံ ဘူတနာမကံ၊
သကာစရိယကဿာ’ဒါ၊ ဘိက္ခူနံ တိသတဿ စ။
ရာဇသာလာယ ဒါပေသိ၊ စူဠဝါပိယဂါမကံ၊
ဂါမဒွယဉ္စ ဒါပေသိ၊ ကာဠူလမလ္လဝါတကေ။
ပဝေသံ ဝိနိဝါရေသိ၊ ဥပေါသထဒိနေသု သော၊
မစ္ဆမံသသုရာဒီနံ၊ အန္တောနဂရမတ္တနော။
ဘိက္ခူ ဝါ စေတိယေ ဝါ သော၊ ဝန္ဒိတွာ နိက္ခမံ တတော၊
ဝါလုကာ ဟာ ဝိနဿန္တု၊ ဣတိ ပါဒေသု ဝေါဓယီ။
ယံ ယံ သောဝဂ္ဂိယံ ကမ္မံ၊ ကမ္မံ နိဿရဏဝဟံ၊
ဝတ္ထုတ္တယေ ပသန္နော သော၊ ကမ္မံ တံ သဗ္ဗမာစရိ။
မာတုပဋ္ဌာနနိရတော၊ ရတ္တိန္ဒိဝမဟောသိသော၊
ဂန္တွာ တဿာ ဥပဋ္ဌာနံ၊ ပါတောဝ ကိရ ဘူပတိ။
သီသံ ¶ တေလေန မက္ခေတွာ၊ ဥဗ္ဗဋ္ဋေတွာန ဇလ္လိကံ၊
နခေ ဝိသုဒ္ဓေ ကတွာန၊ နဟာပေတွာန သာဒရံ။
အစ္ဆာဒေတွာ နဝံ ဝတ္ထံ၊ သုခသမ္ဖဿမတ္တနော၊
ဝတ္ထံ ဆဍ္ဍိတမာဒါယ၊ ပေလ္လေတွာ သယမေဝ တံ။
တဿ တောယေန သိဉ္စိတွာ၊ သီသံ သမကုဋံ သကံ၊
ဂန္ဓမာလာဟိ တံ သမ္မာ၊ စေတိယံ ဝိဟ ပူဇိယ။
နမဿိတွာန တိက္ခတ္တုံ၊ ကတွာ တံ သော ပဒက္ခိဏံ၊
ဒါပေတွာ ပရိသာယ’ဿာ၊ ဝတ္ထာဒီနိ ယထာရုစိံ။
သဟတ္ထေနေဝ ဘောဇေတွာ၊ ဘောဇနံ တံ မဟာရဟံ၊
ဘုတ္ထာဝသေသံ ဘုဉ္ဇိတွာ၊ သမာကိရိယမတ္ထကေ။
ဘောဇေတွာ ပရိသံ တဿာ၊ ရာဇဘောဇနမုတ္တမံ၊
သဇ္ဇေတွာ ဝါသဂေဟဉ္စ၊ သုဂန္ဓပရိဝါသိတံ။
သဟတ္ထာ ပညပေတွာန၊ သယနံ တတ္ထ သာဓုကံ၊
ပါဒေ ဓောဝိယ မက္ခေတွာ၊ ဂန္ဓတေလေန သဏှကံ။
သမ္ဗာဟေန္တော နိသီဒိတွာ၊ ကတွာ နိဒ္ဒမုပေတကံ၊
ကတွာ ပဒက္ခိဏံ မဉ္စံ၊ တိက္ခတ္တုံ သာဓုဝန္ဒိယ။
အာရက္ခကေ နိယောဇေတွာ၊ ဒါသေကမ္မကရေပိ စ၊
တဿာ ပိဋ္ဌိမကတွာန၊ အပက္ကမေဝ ပိဋ္ဌိတော။
ဌတွာ အဒဿနေ ဌာနေ၊ တိက္ခတ္တုံ ပုန ဝန္ဒိယ၊
သန္တုဋ္ဌော တေန ကမ္မေန၊ သရန္တော တံ ပုနပ္ပုနံ။
ဂေဟံ ယာတိ သဇီဝန္တံ၊ ဧဝမေဝ ဥပဋ္ဌဟိ၊
ဧကဒါ ဒါသဝါဒေန၊ ဝန္ဒိတွာ ဒါသမတ္တနော။
တေနတ္တနော ကထာပေသိ၊ ခမာပေတုံ သယံ ဝစော၊
အတ္တာနံ ဘိက္ခုသင်္ဃဿ၊ ဒါပယိတွာန မာတရာ။
ဓနမတ္ထဂ္ဃနံ ဉတွာ၊ ဘုဇိဿော အာသိ ဗုဒ္ဓိမာ၊
ဧဝံ ပုညပရော ဟုတွာ၊ ကတွာ ဒီပဿ သင်္ဂဟံ။
ဧကာဒသဟိ ဝဿေဟိ၊ ဒေဝလောကမုပါဂမိ၊
တဿာနုဇော ဒပ္ပုဠော’ထ၊ ရာဇာ ဟောသိ တဒစ္စယေ။
သဗ္ဗံ ပုဗ္ဗကရာဇူနံ၊ စရိယံ သော သမာစရိ၊
တဒါ မဟိန္ဒနာမဿ၊ ပုတ္တာရောဟဏသာမိနော။
ပိတရာ ¶ နိဟဋာ’ဂဉ္ဆုံ၊ ရာဇာနံ မာတုလံ သကံ၊
သော တေ ဒိသွာ ပဝတ္တိံ တံ၊ သုတွာ ဒတွာ မဟာဗလံ။
ပါဟေသိ ပိတရာ ယုဒ္ဓံ၊ ကာတုံ ဗန္ဓု ဟိတေ ရတေ၊
မဟိန္ဒောပိ တထာဘာဝံ၊ ဝိဒိတွာ ရောဟဏာဓိပေါ။
ယုဒ္ဓံ ပဋိပဒေယေဝ၊ တေသံ’ကာသိ မဟာဗလော၊
တေ ဥဘောပိ ပလာယိံသု၊ ဒတွာ သေနာယ နာယကံ။
ပုနာဂန္တွာ မဟီပါလံ၊ သေဝမာနာ ဣဓာ’ဝသုံ၊
ပိတာပိ တေန သန္တုဋ္ဌော၊ အညေန သကဗန္ဓုနာ။
ယုဇ္ဈန္တော မရဏံ ဂဉ္ဆိ၊ ဉာတိသောပိ မတော ကိရ၊
တဒါ’ဒါ ဘာဂိနေယျဿ၊ ရာဇာ ကိတ္တဂ္ဂဗောဓိနော။
သဗ္ဗရူပဂုဏောပေတံ၊ ဓိတရံ ဒေဝ နာမိကံ၊
သော ဒပ္ပုဠံ ဌပေတွာန၊ သေဝတ္ထံ တဿ ရာဇိနော။
သယံ သေနင်္ဂမာဒါယ၊ ရောဟဏံ သမုပါဂမိ၊
ရောဟဏာဓိပတိ ဟုတွာ၊ သဗ္ဗာကာရသမပ္ပိတော။
ပုတ္တဓီတာဟိ ဝဍ္ဎေန္တော၊ ဝါသံ တတ္ထေဝ ကပ္ပယိ၊
ရာဇာကာသိ ဒုမိန္ဒဿ၊ ဃရံ ဇိဏ္ဏံ နဝံ ထိရံ။
သောဝဏ္ဏခစိတံ ကမ္မံ၊ မင်္ဂလေန စ တဿ သော၊
အတ္တနော ရာဇဘာဝဿ၊ သတ္ထုပါရမိတာယ စ။
သမ္မာနုစ္ဆဝိကံ ကတွာ၊ မဟာပူဇံ ပဝတ္တယိ၊
ဇိဏ္ဏံ ကာရေသိ ပါသာဒံ၊ ဟတ္ထိကုစ္ဆိဝိဟာရကေ။
ဝါဟဒီပဿ အာရာမံ၊ လာဝရာဝဉ္စ ပဗ္ဗတံ၊
ဝိဟာရေ ဇေတနာမေ စ၊ ကတွာ သောဝဏ္ဏယံ မုနိံ။
ဝဍ္ဎေတွာ ဗောဓိဂေဟမှိ၊ ပူဇံကာသိ အစိန္တိယံ၊
အနုသံဝစ္ဆရံ ဒီပေ၊ ဝတ္ထဒါနံ ပဝတ္တယိ။
မဟာပါဠိဉ္စ ဝဍ္ဎေသိ၊ ဘတ္တဂ္ဂမဝလောကယီ၊
တုလာဘာရဉ္စ ဒါပေသိ၊ ဇိဏ္ဏဉ္စ ပဋိသင်္ခရိ။
စာရိတ္တံ ပုဗ္ဗရာဇူနံ၊ ပါလေသိ မနဝဇ္ဇိယံ၊
တဿာ’သိ ဝဇိရော နာမ၊ သေနာပတိ မဟာပတိ။
ကစ္ဆဝါလံ သကာရေသိ၊ အာရာမံ ပံသုကူလိနံ၊
ထူပါရာမမှိ ထူပဿ၊ ဃရံ ဆာဒေသိ သာဓုကံ။
ဣဋ္ဌကာဟိ ¶ သုဝဏ္ဏာဟိ၊ ဟေမဒွါရေ စ ကာရယိ၊
ဧဝံ သောဠသဝဿာနိ၊ ကတွာ ရဇ္ဇံ နရာဓိပေါ။
အဂမာ သဗ္ဗသတ္တာနံ၊ ဂန္တဗ္ဗံ ဒေသမေဝ သော၊
တသ္မိံ ရာဇိနိ သမ္ပတ္တေ၊ ဒေဝလောကံ တဒါ အဟု။
အဂ္ဂဗောဓိသနာမော’ထ၊ အာဏာဘေရိံ စရာပယိ၊
ပိတာ တဿ သဘာတုဿ၊ ပုတ္တံ မဟိန္ဒနာမကံ။
ရဇ္ဇတ္ထံ သကပုတ္တာနံ၊ အာဒိပါဒံ န ကာရယီ၊
အာဒရံ သော သဗန္ဓူနံ၊ ကနိဋ္ဌာနမ္ပိ ကာတဝေ။
အသဟန္တော ပလာယိတ္ထ၊ ပရတီရံ သမာကုလော၊
တေ သမာဂမနံ သုတွာ၊ ပေသယိတွာ မဟာဗလံ။
ကာရေတွာ ယုဒ္ဓမေတေဟိ၊ သီသံ တေသံ သဂဏှယိ၊
နိကာယေသု ဝိစာရေတွာ၊ ကတ္တဗ္ဗံ သဗ္ဗမေဝ သော။
ဒီပေ’ပိ သကလေ ကာသိ၊ ပါပါစာရနိဝါရဏံ၊
ဘိက္ခူ စူဠဝိဟာရေသု၊ ယာဂုံ ဂဏှန္တိ သဗ္ဗဒါ။
မဟာဝိဟာရေ တံ သုတွာ၊ ရာဇာ နိဗ္ဗိန္နမာနသော၊
ကဏ္ဌပိဋ္ဌိမဟာဂါမံ တထာ ယာဗာလဂါမကံ။
တေလဂါမံ ဗဟုဒဉ္စ၊ ဒကဝါရံ ပဒါပိယ၊
ယာဂုံ ဂဟေတုံ ယောဇေသိ၊ ဝိဟာရေသု’ပိ ဘိက္ခဝေါ။
တတော ပဋ္ဌာယ တံ ယာဂုံ၊ သဗ္ဗေ ဂဏှိံသု သာဒရာ၊
ဒီပေ ဘေရိံစ ရာပေတွာ၊ သန္နိပါတိယ ယာစကေ။
သုဝဏ္ဏံ သောပဒါပေသိ၊ ယထိစ္ဆံ ဒိဝသတ္တယံ၊
ဧဝမာဒိံ သ ကတွာန၊ ပုညဝံ ဝဿေဟိ တီဟိ စ။
ဝတ္ထုတ္တယပသာဒဿ၊ ဖလံ ပဿိတုမတ္တနော၊
ရာဇာ ဒိဗ္ဗေန ယာနေန၊ ဂစ္ဆန္တော ဝိယ သော မရိ။
ဧဝံ အနိစ္စာ ဝတ သဗ္ဗဒေဟိနော၊
သဗ္ဗညူနောပေဝ မုပေတိ မစ္စုံ၊
ပဟာယ တသ္မာ ဘဝရာဂဇာတံ၊
ဗုဓော သုဗုဒ္ဓိဝိဘဝေ ဘဝေယျ။
သုဇနပ္ပသာဒသံဝေဂတ္ထာယ ကတေ မဟာဝံသေ
ပဉ္စရာဇကော နာမ
သတ္တစတ္တာလီသတိမော ပရိစ္ဆေဒေါ။