📜
အဋ္ဌစတ္တာလီသတိမ ပရိစ္ဆေဒ
ဧကရာဇကော
တတော ¶ တဿာ’နုဇော သေနော၊ ဆတ္တံ ဥဿာပယီ ပုရေ၊
ပိယံ’ဝ ပုတ္တံ ပဿန္တော၊ သတ္တေ သဗ္ဗေ မဟာဓနော။
စရိယံ ပုဗ္ဗရာဇူနံ၊ သမာစရိ ယထာဘတံ၊
အပုဗ္ဗမ္ပိ စ ဝတ္တေသိ၊ စရိယံ ဓမ္မသံဟိတံ။
ဘိက္ခူနံ ဘိက္ခူနီနဉ္စ၊ ဉာတီနံ ဒီပဝါသိနံ၊
မစ္ဆာနံ မိဂပက္ခီနံ၊ ကတ္တဗ္ဗံ သ သမာစရိ။
မဟိန္ဒံ ပရတီရံ သော၊ ဂတံ ယောဇိယမာရယိ၊
ဧဝံ သော သုဝိသောဓေသိ၊ ရဇ္ဇပစ္စတ္ထိကေ’ခိလေ။
မဟာဒါနံ ပဝတ္တေသိ၊ ယာစကာနံ ဓနေသိနံ၊
ဘိက္ခူနံ ဗြာဟ္မဏာနဉ္စ၊ မနုညံ ရာဇဘောဇနံ။
အဟေသုံ အနုဇာတဿ၊ မဟိန္ဒော ကဿပေါ တထာ၊
ဥဒယောတိ တယော တေသု၊ မဟိန္ဒော ယုဝရာဇကော။
ဟုတွာ တဿာနုဝတ္တန္တော၊ သက္ကစ္စံ တမုပဋ္ဌဟိ၊
သင်္ဃာနာမာသိ ရာဇဿ၊ ဘရိယာ တဿ ရာဇိနီ။
ကီဠနတ္ထံ သမုဒ္ဒဿ၊ ဂတေ ရာဇိနိ ပဋ္ဋနံ၊
ဥဒယော အာဒိပါဒေါသော၊ ဩဟီနော နဂရေ တဒါ။
နာလနာမံ ဂဟေတွာန၊ ဓီတရံ မာဏိလာနိယာ၊
ရက္ခိတံ ရာဇရက္ခာယ၊ ပုဠတ္ထိနဂရံ အဂါ။
ရာဇာ တသ္မိံ အကုဇ္ဈိတွာ၊ သန္ဓိံ ကတွာ အကုပ္ပိယံ၊
မဟာဒီပါဒံ ပေသေတွာ၊ တောသတွာ တံ ဣဓာနယိ။
ဧဝံ သမဂ္ဂါ တေ အာသုံ၊ တတော ပဋ္ဌာယ ခတ္တိယာ၊
ရက္ခန္တာ သာသနံ လောကံ၊ ဝသိံသု သုသမာဟိတာ။
တတော ကေနစိ ကာလေန၊ ပဏ္ဍုရာဇာ မဟာဗလော၊
ဇမ္ဗုဒီပါ ဣဓာ’ဂမ္မ၊ ဒီပ ဂဏှိတုမာရဘိ။
ရာဇာ ¶ သုတွာ မဟာသေနံ၊ ပေသုယိတ္ထ တဒန္တိကံ၊
အမစ္စာနံ ဝိဝါဒေန၊ ထဒ္ဓါတာရော နာရာဓိပေါ။
ပဏ္ဍုရာဇာ ဝိနာသေန္တော၊ သဗ္ဗံ တံ ဒေသမုတ္တရံ၊
ခန္ဓာဝါရံ နိဝေသေသိ၊ မဟာတာလိတဂါမကေ။
ဝသန္တာ ဒမိဠာ ဧတ္ထ၊ ဗဟဝေါ ယေ တဟိံ တဟိံ၊
သဗ္ဗေ တံ ပက္ခိယာဟေသုံ၊ တတော သော ဗလဝါ အဟု။
တတ္ထ ဂန္တာ မဟာသေနာ၊ ရညော ယုဇ္ဈိတုမာရဘိ၊
ဟတ္ထိက္ခန္ဓဂတော ပဏ္ဍု-ရာဇာပိ သမုပါဝိသိ။
အဟု ဒမိဠသေနာသာ၊ ပဿန္တိ သာမိနော မုခံ၊
သမ္ပတ္တဗလဟုဿာဟာ၊ တဒတ္ထေ စတ္တဇီဝိတာ။
ဒီပသေနာ တု သာမိန-မဘာဝေန နိရုဿုက္ကာ၊
ယုဇ္ဈန္တိ ပရိဘိန္ဒိတွာ၊ ပလာယိတ္ထ တတော တတော။
ဩတရိတ္ထမဟာသေနာ၊ ပဏ္ဍုရာဇာဿ တင်္ခဏေ၊
မာရသေနာဝ ဂစ္ဆန္တိ၊ ဝိစုဏ္ဏေန္တိ မဟာဇနံ။
ရာဇာ သေနာယ ဘိန္နတ္တံ၊ သုက္ကာ သဗ္ဗံ သမာဒိယ၊
ဟတ္ထသာရံ ပုရံ ဟိတွာ၊ မလယာဘိမုခေါ ဂတော။
တတော ဟတ္ထိံ သမာရုယှ၊ ယုဝရာဇာ မဟိန္ဒကော၊
ယုဇ္ဈန္တော သကသေနာယ၊ ပလာတတ္တံ သမေက္ခိယ။
ဧကေနမေ န သက္ကာ ဝေ၊ သဗ္ဗေ ဧတေဟိ မာရိတုံ၊
ဧတေသံ န စ နီစာနံ၊ ဟတ္ထေသု မရဏံ သုခံ။
တသ္မာ ဝရံ မေ မရဏံ၊ မယာ ဧဝေတိ စိန္တိယ၊
ဟတ္ထိက္ခန္ဓဂတောယေဝ၊ ဆိန္ဒိ သော သီသမတ္တနော။
တံ ဒိသွာ ဗဟဝေါ သီသေ၊ တတ္ထ ဆိန္ဒိံသု သေဝကာ၊
တံ ဒိသွာ ဒမိဠီ သေနာ၊ ဟဋ္ဌတုဋ္ဌာ ပမောဒိသာ။
ဧတံ သဗ္ဗံ သမေက္ခိတွာ၊ အာဒါပါဒေါ သကဿပေါ၊
တုရင်္ဂဝရမာရုယှ၊ သုသန္နဒ္ဓါ မဟာယုဓော။
ဝိဟာရမုပသင်္ကမ္မ၊ အဘယံ ဧကကောဝ သော၊
တာဒိသမ္ပိ မဟာသေနံ၊ ဩဂါဟေတွာ ဝိဒါရယိ။
သုပဏ္ဏော ဝိယ ဂဏှန္တော၊ ဘူဇဂေန သလိလာလ ယေ၊
သော တံ သဗ္ဗံ နိဝတ္တေသိ၊ အတ္တာနဉ္စ သုဂေါပယိ။
အဿော ¶ ဧကောဝ ဒိဿိတ္ထ၊ တုရင်္ဂါဝလိသန္နိဘော၊
အတ္တနော သော ဇနံ ကဉ္စိ၊ အပဿန္တော’နုဂါမိနံ။
ကိံ မေ ဧကေန ဝေရိနံ၊ ပူရိတေန မနောရထံ၊
ကာလန္တရေဟံ ဇီဝန္တော၊ ပူရေဿံ မေ မနောရထံ။
တသ္မာ ဂန္တုံဝ ယုတ္တန္တိ၊ နိမ္ဖောဋေတွာ မဟာဗလံ၊
နိဗ္ဘယောဝ မဟာယောဓော၊ ကောဏ္ဍိဝါတမုပါဂမိ။
ပဏ္ဍုရာဇာ မဟာသေနာ၊ အဂ္ဂဟေသိ တတော ပုရံ၊
သီသံ တံ ယုဝရာဇဿ၊ ပဏ္ဍုရာဇဿ ဒဿယုံ။
သော တံ ဒိသွာ စ ဈာပေတွာ၊ ရာဇူနံ ပဏ္ဍုဒေသိနံ၊
သဗ္ဗမာဠာဟနေ ကိစ္စံ၊ တဿ ကာတုံ နိယောဇယိ။
သဗ္ဗံ သာရံ ဟရာပေသိ၊ ဘဏ္ဍာဂါရမှိ ရာဇိနော၊
အဂ္ဂဏှိတ္ထ ဂဟေတဗ္ဗံ၊ ဝိဟာရေ နဂရေပိ စ။
ပါသာဒေ ရတနေ သဗ္ဗေ၊ သောဝဏ္ဏံသတ္ထုဗိမ္ဗကံ၊
သိလာမယ မုနိန္ဒဿ၊ စက္ခုဘူက မဏိဒွယံ။
တထာ သောဝဏ္ဏပဋ္ဋေ စ၊ ထူပါရာမမှိ စေတိယေ၊
သုဝဏ္ဏ ပဋိမာယော စ၊ ဝိဟာရေသု တဟိံ တဟိံ။
သဗ္ဗံ ဂဟေတွာ နိဿာရံ၊ လင်္ကာဒီပ မကာသိ သော၊
ဆဍ္ဍယိတ္ထ ပုရံ ရမ္မ၊ ယက္ခဘက္ခိတ ရူပကံ။
ရာဇာ’ပိ ရက္ခံ ဒတွာန၊ မဟာမဂ္ဂေ တဟိံ တဟိံ၊
ဂင်္ဂါဒွယ မုခေ ဝါသံ၊ ကပ္ပေသိ ပရိသင်္ကိတော။
ပဏ္ဍုရာဇာ တတော သဒ္ဓိံ၊ ကာတုံ သီဟဠသာမိနာ၊
အမစ္စေ တတ္ထ ပေသေသိ၊ ဒိသွာ တေ သီဟလာဓိပေါ။
သုဏိတွာ သာသနံ တေသံ၊ သဗ္ဗံ တံ သမ္ပဋိစ္ဆိယ၊
ဒူတာနံ ကာရယိတွာန၊ ယထာကာမေန သင်္ဂဟံ။
ဟတ္ထိဒွယံ သဒတွာန၊ သဗ္ဗမာဘရဏမ္ပိ စ၊
တဿ ပေသေသိ ဒူတေသော၊ အတ္တနောပိ ဟိတာဝဟေ။
ပဏ္ဍုရာဇာ သိတံ သဗ္ဗံ၊ ဒိသွာ သန္တုဋ္ဌမာနသော၊
နိယျာတေတွာန ဒူတာနံ၊ တဒဟေဝ မဟာပုရံ။
နိက္ခမိတွာ ပုရာ ဂန္တွာ၊ န စိရေနေဝ ပဋ္ဋနံ၊
တတ္ထ အာရုယှ နာဝံ သော၊ သက ဒေသ မုပါဂမိ။
တတော ¶ အာဂမ္မ နဂရံ၊ သီလာမေဃော မဟီပတိ၊
ယထာဌာနေ ဌပေတွာန၊ ဒီပံ ဝသိ သမာဟိတော။
ဘာတရံ ဒုတိယံ ကတွာ၊ ဥဒယံ နာမ ခတ္တိယံ၊
မဟာဒီပါဒံ တဿာ’ဒါ၊ သောဂတ္ထံ ဒက္ခိဏံ ဒိသံ။
သောပိ ခေါ န စိရေနေဝ၊ ကတွာ ပုညံ ယထာရဟံ၊
ရောဂေနေကေန သမ္ဖုဋ္ဌော၊ ပဝိဋ္ဌော မစ္စုနော မုခံ။
ကဿပေါ အာဒိပါဒေါပိ၊ ပုလတ္ထိနဂရေ ဝသံ၊
ယောဇေတွာ ပဏ္ဍုရာဇေန၊ အဟောသိ ကိရ မာရိတော။
တဒါ ကဿပနာမဿ၊ ပုတ္တာ အာသုံ မဟာရဟာ၊
အာဒိပါဒဿ စတ္တာရော၊ ဓညလက္ခဏ သညုတာ။
ယော သေနံ သဗ္ဗပဌမော၊ သေနော နာမ ကုမာရကော၊
သူရော ဝီရော မဟုဿာဟော၊ ရာဇဘာရက္ခမော သမော။
ရာဇာ မဟာဒီပါဒတ္တံ၊ တဿ ဒတွာ ယထာဝိဓိံ၊
ဘောဂတ္ထံ ဒက္ခိဏံ ဒေသံ၊ သဝါဟန မုပါဒိသိ။
ရောဟဏာဓိပတိဿာ’သုံ၊ ပုတ္တာ ကိတ္တဂ္ဂဗောဓိတော၊
စတ္တာရော ဓီတရော တိဿော၊ ဒဿနေယျာ မနောရမာ။
တဒါ ဇေဋ္ဌသုတံ တဿ၊ မဟိန္ဒံ နာမ ခတ္တိယံ၊
ပိတုစ္ဆာ မာရယိတွာန၊ ဒေသံ ဂဏှိ သသာဓနံ။
ဘာတရော တေ တယော တသ္မိံ၊
သံရုဋ္ဌာ ဘာတု ဃာတနေ၊
အာဒါယ ဘဂီနီ တိဿော၊
ရညော သန္တိကမာဂမုံ။
ရာဇာပိ ဒိသွာ တေတီဝ၊ မမာယန္တော ဒယာလုကော၊
သဗ္ဗေ ဒေဝကုမာရေဝ၊ သုခံ ဝဍ္ဎေသိ ပေမဝါ။
တတော ကဿပနာမံ သော၊ တေသံ ဇေဋ္ဌံ နရိဿရော၊
ဒေသံ တံ ဂဏှ ယာဟီတိ၊ ဒတွာ ဗလမပေသယိ။
သော’ပိ ဂန္တွာန တံ ဟန္တွာ၊ ရောဟဏံ ကသိဏမ္ပိ တံ၊
ကတွာ ဟတ္ထဂတံ တတ္ထ၊ ဝသိတ္ထ နိရုပဒ္ဒဝေါ။
အထ သော ဘာတရော ဒွေ’ပိ၊ သေနဉ္စ ဥဒယံ တထာ၊
ပက္ကောသိတွာန၊ ဘာဇေတွာ၊ ဒေသံ တေဟိ သဟာဝသိ။
ရာဇာ ¶ တာ သာဓု ဝဍ္ဎေတွာ၊ ဝယပတ္တာသု တီသု သော၊
ရာဇကညာသု ဓညာသု၊ ဒေဝစ္ဆရသူ ရူပိသု။
ဌပေတွာ ရာဇိနိ ဌာနေ၊ ဥပရာဇဿ ဒါပယိ၊
သင်္ဃနာမံ မဟာဘောဂံ၊ ဒတွာ ရဇ္ဇသရိက္ခကံ။
ကဏိဋ္ဌော ဥပရာဇဿ၊ မဟိန္ဒော နာမ ဘာတုကော၊
အတ္ထိ သဗ္ဗဂုဏောပေတော၊ သဗ္ဗသတ္ထဝိသာရဒေါ။
တဿာ’ဒါသိ ဒုဝေ ရာဇာ၊ ရာဇကညာ မနောဟရာ၊
တိဿဝှကိတ္တ နာမဉ္စ၊ ဒတွာ ဘောဂံ ယထာရုစိံ။
ဧဝံ ကရောန္တော ဉာတီနံ၊ သံဂဟံ သော ယထာရဟံ၊
အာရာဓေန္တော စ ဒါနာဒိ-သင်္ဂဟေဟိ မဟာဇနံ။
ရာဇာ ဒသယိ ရာဇူနံ၊ ဓမ္မေဟိ သမုပါဂတော၊
သမာစရန္တော ပုညာနိ၊ ပရိဘုဉ္ဇိတ္ထ မေဒိနိံ။
ပံသုကူလိက ဘိက္ခူနံ၊ ကတွာ’ရိဋ္ဌမှိ ပဗ္ဗတေ၊
မဟာဘောဂံ အဒါရာမံ၊ နိမ္မိတံ ဝိယ ဣဒ္ဓိယာ။
ပရိဟာရဉ္စ တဿဒါ၊ ရာဇာရဟမသေသတော၊
အာရာမိကေ စ ဗဟဝေါ၊ ဒါသေ ကမ္မကရေပိ စ။
ပါသာဒံ သောဝ ကာရေသိ၊ ဝိဟာရေ ဇေတနာမကေ၊
အနေကဘူမိံ ဘူမိန္ဒော၊ ဗုဒ္ဓဘူမိဂတာသယော။
ဝဍ္ဎေတွာ တတ္ထ ကာရေတွာ၊ သဗ္ဗ သောဝဏ္ဏယံ ဇိနံ၊
သဏ္ဌပေတွာ မဟာဘောဂံ၊ ဝသာပေသိ စ ဘိက္ခဝေါ။
မဟာဒိ ပရိဝေဏမှိ၊ ကာရေသိ သုမနောဟရံ၊
ပါသာဒ မဂ္ဂိသန္ဒံဍ္ဎံ၊ တသ္မိံယေဝ ဝိဟာရကေ။
ကတွာ ဝီရင်္ကုရာရာမံ၊ ဝိဟာရေ အဘယုတ္တရေ၊
မဟာသင်္ဃိက ဘိက္ခူနံ၊ ထေရိယာနဉ္စ ဒါပယိ။
ပုဗ္ဗာရာမဉ္စ ကာရေသိ၊ သမ္ပန္န စတုပစ္စယံ၊
သဒ္ဓိံ သော သင်္ဃနာမာယ၊ ဒေဝိယာပိ စ အတ္တနော။
မဟာဝိဟာရေတာယေဝ၊ သဒ္ဓိံ ကာရေသိ ဘူမိပေါ၊
အာဝါသံ သင်္ဃသေနဝှံ၊ မဟာဘောဂံ မဟာမတိ။
ကာရေတွာ သဗ္ဗသောဝဏ္ဏံ၊ ကေသဓာတု ကရဏ္ဍကံ၊
မဟာပူဇံ ပဝတ္တေသိ၊ ရဇ္ဇံ ဝိဿဇ္ဇိ ဥတ္တမော။
စေတိယဿ ¶ ဂီရိဿာဒါ၊ ကာဏဝါပိံ ဗဟုဒယံ၊
ဘိက္ခူနံ ဒိပဝါသီနံ၊ ဒါပေသိ စ တိစီဝရံ။
ပုလတ္ထိ နဂရေ ကာသိ၊ ဝါပိယော ထုသဝါပိယာ၊
သေနဂ္ဂဗောဓိမာဝါသံ၊ ဂါမာရာမိက သညုတံ။
တသ္မိံယေဝ စ ကာရေသိ၊ မဟာပါဠိံ သုဘောဇနံ၊
မဟာပါဠိဉ္စ သဗ္ဗေသံ၊ မဟာနေတ္တမ္ပိ ပဗ္ဗတေ။
ဝေဇ္ဇသာလမ္ပိ ကာရေသိ၊ နဂရဿ စ ပစ္ဆိမေ၊
အနာထာနံ ပဝတ္တေသိ၊ ယာဂုဒါနံ သခဇ္ဇကံ။
ပံသုကူလိက ဘိက္ခူနံ၊ ပစ္စေကဉ္စ မဟာနသံ၊
ကတွာ ဒါပေသိ သက္ကစ္စံ၊ နိစ္စံ ဘောဇနမုတ္တမော။
ဟုတွာ မဟာဒိပါဒေါ’ယံ၊ ကပ္ပူရ ပရိဝေဏကေ၊
ဥတ္တရာဠှေ စ ကာရေသိ၊ ပရိစ္ဆေဒေ သနာမကေ။
တုလာဘာရဉ္စ ပါဒါသီ၊ တိက္ခတ္တုံ သော မဟာဓနေ၊
ပုညမညမ္ပိ သော’ကာသိ၊ ရာဇာ နာနပ္ပကာရကံ။
သင်္ဃနာမာပိ သာ ဒေဝီ၊ ဥတ္တရမှိ ဝိဟာရကေ၊
ကတွာ မဟိန္ဒသေနဝှာ-ဝါသံ ဝါသေသိ ဘိက္ခဝေါ။
အာရဒ္ဓါ ဒပ္ပုလဝှဿ၊ ကာလေ ရာဇဿ ဓီမဘော၊
မဟာဒေဝေန သော အာသိ၊ ရမ္မော ဒပ္ပုလ ပဗ္ဗတော။
ဒါရုကဿပနာမေန၊ တထာ ကဿပရာဇိကံ၊
ဥဘောပိ တေ ဝိပ္ပကတေ၊ ရာဇာ သော ဝသမာပယိ။
ဘဒ္ဒေါ သေနာပတိ တဿ၊ ဘဒ္ဒသေနာပတိ’ဝှယံ၊
ပရိဝေဏမ္ပိ ကာရေသိ၊ ဒါသဘောဂသမာယုတံ။
ဥတ္တရော စ အမစ္စော’ကာ၊ ဝိဟာရေ အဘယုတ္တရေ၊
ဝါသမုတ္တရသေနဝှံ၊ ရမ္မ မုတ္တရပစ္စယံ။
ဝဇိရော နာမ တတ္ထေဝါ-ဝါသံ ဝဇိရသေနကံ၊
ကာသိ ရက္ခသနာမောစာ-ဝါသံ ရက္ခသနာမကံ။
တတော ဝီသတိ ဝဿေသု၊ ပုလတ္ထိ နဂရေ ဝသံ၊
ပဏ္ဍုရာဇကတံ ကာရံ၊ သရန္တော သရဒဿနော။
ဒဒန္တော ဝိယ သေနဿ၊ သူရဿာဝသရဉ္စသော၊
ပဟာယ ဒီပံ ဒီပေါ’ဝ၊ မဟာဝါတ ဟတော ဂတော။
ဘောဂေါ ¶ အနိစ္စာ သဟ ဇီဝိတေန၊
ပဂေဝ တေ ဗန္ဓုဇနာ သဟာယာ၊
နရာဓီပံ ပဿထ ဧကမေဝ၊
သမာဂတံ မစ္စုမုခံ သုဃောရံ။
သုဇနပ္ပသာဒသံဝေဂတ္ထာယ ကတေ မဟာဝံသေ
ဧက ရာဇကော နာမ
အဋ္ဌစတ္တာလီသတိမော ပရိစ္ဆေဒေါ။