📜
ဧကူနပညာသတိမ ပရိစ္ဆေဒ
ရာဇဒွယဒီပနော
ဧဝံ တသ္မိံ မတေ တဿ၊ ကာတဗ္ဗံ သာဓုကာရိယ၊
မဟာဒီပါဒေါ သေနဝှော၊ အာဒါယ ဗလဝါဟနံ။
အာဂမ္မ နဂရံ ရာဇာ၊ အဟောသိ ဓရဏီ တလေ၊
အာဒိကပ္ပမှိ ရာဇူနံ၊ ဒဿန္တော စရိယံ ပိယ။
သဒ္ဓါ မဟာဓနော သူရော၊ မုတ္တစာဂီ နိရာလယော၊
ယာစယောဂေါ မဟာဘောဂေါ၊ သမ္ပန္နဗလဝါဟနော။
ကိတ္တိယာ’မလဘူတာယ၊ တထာ တေဇော ဂုဏေန စ၊
သန္နိပါတံဝ သော စန္ဒ-သူရိယာနံ နိဒဿယိ။
အသင်္ကိဏ္ဏ ဂုဏာကိဏ္ဏော၊ သုဝိစိဏ္ဏ ဂုဏာဂုဏော၊
နိတ္ထိဏ္ဏပါပေါ နိဗ္ဗိဏ္ဏ-သံသာရော သာရဒဿနော။
ဘရိယာ တဿ ယာ အာသိ၊ သင်္ဃာတံ သော ဘိသေစယိ၊
မဟေသီဘာဝေ ဒတွာန၊ ပရိဟာရံ ယထာဘတံ။
မဟိန္ဒံ နာမ သပ္ပညံ၊ ကဏိဋ္ဌံ ဘာတရံ သကံ၊
ဒတွာ ဒက္ခိဏဘာဂံ သော၊ ဩပရဇ္ဇေ’ဘိသေစယိ။
အန္တေပုရေ’ပရဇ္ဈိတွာ၊ သော ရညာ အဝဓာရိတေ၊
သပုတ္တဒါရော ဝုဋ္ဌာယ၊ အညာတော မလယံ အဂါ။
ဥပ္ပဇ္ဇိတ္ထ ¶ တဒါ ပုတ္တော၊ ရညော သင်္ဃာယ ဒေဝိယာ၊
ဒဿေန္တော’ဝ ပနာဒဿ၊ ကုမာရ ရူပမတ္တနော။
ရာဇာ တံ ဇာတမတ္တံ’ဝ၊ ဒိသွာ သန္ထုဋ္ဌမာနုသော၊
သိဒ္ဓတ္ထံ လုမ္ဗိနီဇာတံ၊ ရာဇာ သုဒ္ဓါဒနော ဝိယ။
ဓညပုညဂုဏူပေတော၊ ဌပေတွာ ဒီပမေကကံ၊
ဇမ္ဗုဒီပေ’ပိ ကသိဏေ၊ ရဇ္ဇယောဂ္ဂေါတိ မေ သုတော။
နာမဒါန ဒိနေယေဝ၊ ပရိဟာရေန သဗ္ဗသော၊
ဩပရဇ္ဇေ ဘိသိဉ္စိတွာ၊ ဒက္ခိဏံ ဒေသမဿ’ဒါ။
ယုဝရာဇာပိ မလယေ၊ ဝသန္တော’ဝ မဟီပတိံ၊
အာရာဓေတွာ ဥပါယေန၊ အနုညတော သဘာတရာ။
နိကာယတ္တယ ဝါ သီဟိ၊ သဒ္ဓိံ ဘိက္ခူဟိ အာဂတော၊
ဒိသွာ ရာဇာနမေတ္ထေဝ၊ သန္ဓီံ’ကာသိ အကုပ္ပိယံ။
ယာ တဿ ယုဝရာဇဿ၊ ဘရိယာ တိဿာ နာမိကာ၊
ရာဇိနီ သာ ဝိဇာယိတ္ထ၊ ဓီတရံ သင်္ဃနာမိကံ။
ကိတ္တိနာမာ’ပရာယာ စ၊ ဘရိယာ သာပိ ခေါ ပန၊
ဝိဇာယိ ပုတ္တေ စတ္တာရော၊ တထာ ဧကဉ္စ ဓီတရံ။
တဒါ ရာဇာပိ စိန္တေတွာ၊ ဧဝံ သတိ ကဏိဋ္ဌကော၊
နိဿင်္ကော မယိ ဟောတီတိ၊ သမ္မာ မန္တီဟိ မန္တိယ။
ဓီတရံ ယုဝရာဇဿ၊ သုရူပိံ ရူပနာမိကံ၊
ကဿပဿ’တ္တ ပုတ္တဿ၊ ဝိဝါဟံ ကာရယိ ဗုဓော။
ဒက္ခိဏံ ဒေသမဿေဝ၊ ကဏိဋ္ဌဿ သဒါပယိ၊
ရာဇပုတ္တဿ ပါဒါပိ၊ ပစ္စေကံ ဘောဂမတ္တနော။
ရဇ္ဇမှိ သဗ္ဗံ တဿေဝ၊ ပရိဘောဂါယ ဒါပယိ၊
ကေဝလန္တု ဝိစာရေသိ၊ ဒီပံ ဒီပ ဟိတာဝဟော။
တေသံ သံဝါသမနွာယ၊ ဥဘိန္နံ ပုညကမ္မိနံ၊
ဓညပုညဂုဏူပေတာ၊ ဝိဇာတာ ပုတ္တဓီတရော။
ကတွာ သဗ္ဗောပဟာရေန၊ ဒါဌာဓာတု မဟာမဟံ၊
အာရုယှ ဝရပါသာဒံ၊ ရတနဝှံ မဟီပတိ။
တဒါ သောဝဏ္ဏယဿာပိ၊ သမ္ဗုဒ္ဓဿ ပုရာ ဌိတံ၊
သုညံ ပိဋ္ဌံ သယံ ဒိသွာ၊ ကသ္မာ ဧဝန္တိ သံဝဒိ။
တတော ¶ အမစ္စာ အာဟံသု၊ နာဇာနာသိ မဟီပတိ၊
မဟာပိတုနရိန္ဒဿ၊ ကာလေ တဝ နရိဿရံ။
ပဏ္ဍုရာဇာ ဣဓာဂမ္မ၊ ဒီပမေတံ ဝိနာသိယ၊
သဗ္ဗံ သာရဂတံ ဒီပေ၊ သမာဒါယ ဂတော ဣတိ။
တံ သုတွာ လဇ္ဇိတော ရာဇာ၊ သယံ ဝိယ ပရာဇိတော၊
တဒဟေဝ နိယောဇေသိ၊ အမစ္စေ ဗလသင်္ဂဟေ။
တဒါ’ဝ ကိရ အာဂဉ္ဆိ၊ ပဏ္ဍုရာဇကုမာရကော၊
ပရိဘူတော သရာဇေန၊ ရဇ္ဇတ္ထံ ကတ နိစ္ဆယော။
ရာဇာ ဒိသွာ’တိ သန္တုဋ္ဌော၊ ကတ္တဗ္ဗံ တဿ ကာရိယ၊
မဟာတိတ္ထ မုပါဂမ္မ၊ ပဋ္ဋနံ သေမတြသော။
မဟန္တံ ဗလကာယဉ္စ၊ တဿောပကရဏာနိ စ၊
အနုနံ ပဋိယာဒေတွာ၊ ဒေဝသေနံဝ သဇ္ဇိတံ။
ပဏ္ဍုရာဇကုမာရေန၊ သဒ္ဓိံ သေနာပတိ သကံ၊
ဂန္တွာ တံ ပဏ္ဍုရာဇာနံ၊ ဟန္တွာနိကမိတော ပုရာ။
ရတနံ သဗ္ဗမာဒါယ၊ ဒတွာ ရဇ္ဇံ ဣမဿ စ၊
န စိရေနေဝ ဧဟီတီ၊ ဥယျောဇေသိ မဟာယသော။
သောပိ ဧဝံ ကရောမီတိ၊ ပဋိဿုတွာ မဟီပတိံ၊
ဝိန္ဒိတွာ ဗလမာဒါယ၊ နာမမာရုယှ တံ ခဏေ။
ပရတီရံ တတော ဂန္တွာ၊ သံဝုဠဟ ဗလဝါဟနော၊
ဝိနာသယန္တော ပစ္စန္တံ၊ ဝါရေသိ မဓုရံ ပုရံ။
ဒွါရာနိ ပိဒဟိတွာန၊ ပစ္ဆိန္ဒိတ္ထ ဂတာဂတံ၊
တတော အဂ္ဂိံ ခိပါပေသိ၊ ဂေါပုရဋ္ဋာလ ကောဋ္ဌကေ။
ဧဝံ သီဟဠသေနာယ၊ ပဝိဋ္ဌာယ သကံ ပုရံ၊
သဗ္ဗံ ဝိလုမ္ပမာနာယ၊ သေနင်္ဂံ ဃာတယန္တိယာ။
ပဏ္ဍုရာဇာ နိသမ္မေတံ၊ သမာဒါယ သကံ ဗလံ၊
ဝေဂသာ တံ သမာဂမ္မ၊ ယုဒ္ဓံ ကာတုံ သမာရဘိ။
အသမ္ပုဏ္ဏ ဗလတ္တာ သော၊ ဝိဒ္ဓါ သလ္လေန ဘူပတိ၊
ဟတ္ထိက္ခန္ဓဂတောယေဝ၊ ဝိဟာယ ပုရမတ္တနော။
ပလာယိတွာ ဂတဌာနေ၊ ဇီဝိတံ နိဇမေဿဇိ၊
ဘရိယာဝ’ဿ တေနာသိ၊ သမ္ပတ္တာ ဇီဝိတက္ခယံ။
တတော ¶ သီဟဠသေနာသာ၊ ပဝိဋ္ဌာ နိဗ္ဘယာ ပုရံ၊
တတ္ထ သဗ္ဗံ ဝိလုမ္ပိတ္ထ၊ ဒေဝါ’သိရပုရံ ယထာ။
သေနာပတိ တတော ရာဇ-ဂေဟေ ဘတ္တံ သမေက္ခိယ၊
ဒီပါနိတမိမမှာ စ၊ တတြဋ္ဌဉ္စ မဟာရဟံ။
သာရံ သဗ္ဗံသမာဒါယ၊ ဒေသေ စ နဂရေ ဌိတံ၊
ကတွာ ဣဿရိယံ တတ္ထ၊ ဝသေဝတ္တိယ အတ္တနော။
ပဏ္ဍုရာဇ ကုမာရံ တု၊ တတ္ထ ရဇ္ဇေ’ဘိ သိဉ္စိယ၊
ကာရေတွာ ပရိဟာရဉ္စ၊ ဒေသံ တဿ သမပ္ပိယ။
ယထာရုစိံ ဂဟေတွာန၊ ဟတ္ထိအဿေ နရေ’ပိ စ၊
တတ္ထ တတ္ထ ယထာ ကာမံ၊ ဝသန္တော အကုတော ဘယော။
သမုဒ္ဒ တဋမာဂမ္မ၊ ဌတွာ တတ္ထ ယထာသုခံ၊
ကီဠန္တော ဝိယ နာဝံ သော၊ သမာရုယှ ဝိသာရဒေါ။
မဟာတိတ္ထ မုပါဂမ္မ၊ ဝန္ဒိတွာ ဓရဏီ ပတိံ၊
တံ သာသနံ နိဝေဒေတွာ၊ သာရံ ဒဿေသိ အာဟဋံ။
ရာဇာ သာဓူတိ ဝတွာန၊ ကာရေတွာ တဿ သင်္ဂဟံ၊
သဒ္ဓိံ သေနာယ အာဂန္တွာ၊ ပကဋ္ဌာယ သကံ ပုရံ။
ဇယပါနံ ပိဝိတွာန၊ ကတွာ ဝိဇယမင်္ဂလံ၊
မဟာဓာဂံ ပဝတ္တေတွာ၊ ယာစကာနံ ယထာ ရုစိံ။
သဗ္ဗံ ပါကတိကံ ကာသိ၊ သာရံ ဒီပေ နိရာလယော၊
သောဝဏ္ဏ ပဋိမာယော စ၊ ယထာဌာနေ ဌပါပယိ။
သုညံ ရတနပါသာဒေ၊ ပိဋ္ဌံ ပူရေသိ သတ္ထုနော၊
ကာသိ ရက္ခပိဓာနေန၊ နိဗ္ဘယံ ဓရဏီတလံ။
တတော ပဋ္ဌာယ ဒီပံသော၊ အရီနံ ဒုပ္ပဓံသိယံ၊
ကတွာ ဝဍ္ဎေသိ ဘောဂေဟိ၊ ဥတ္တရာဒိကုရုံ ပိယ။
ခိန္နာ ပုဗ္ဗဿ ရာဇဿ၊ ကာလေ ဒီပမှိ ပါဏိနော၊
နိဗ္ဗုတာ တံ သမာဂမ္မ၊ ဃမ္မာ ဝိယ ဝလာဟကာ။
တဿ ဝီသတိမေ ဝဿေ၊ ဝိဟာရေ အဘယုတ္တရေ၊
နိက္ခမိတွာ ဂတာ ဟေသုံ၊ ပံသုကူလိက ဘိက္ခဝေါ။
ယုဝရာဇာ မဟိန္ဒော သော၊ ဓုမရာဇဿ သတ္ထုနော၊
ကာရာပယိ ဃရံ ရမ္မံ၊ ဒဿနေယျံ မနောရမံ။
ဗောဓိဂေဟံ ¶ ကရောန္တော တံ၊ ဒိသွာ ဝဍ္ဎကီနော တဒါ၊
ဝံသေန သာခံ အာဟစ္စ၊ ဘိဇ္ဇန္တံ ဝရဗောဓိယာ။
ကိန္တု ကာတဗ္ဗမေတ္ထာတိ၊ ယုဝရာဇံ နိဝေဒယုံ၊
သော တံ တံ မုပသံကမ္မ၊ မဟာပူဇာယ ပူဇိယ။
သစေ သတ္ထာ၊ ဟိတတ္ထာယ၊ သမ္ဘူတော သဗ္ဗပါဏိနံ၊
လဒ္ဓုံ ပုညဿ’နဂ္ဃဿ၊ ဃရဿ ကရဏေတိ’ဓ။
သာခါ ဂစ္ဆံ တု ဥဒ္ဓံဝ၊ ကာတုံ သက္ကာ ယထာဃရံ၊
ဧဝမာရာဓယိတွာန၊ ဝန္ဒိတွာ သင်္ဃရံ ဂတော။
တဒါ သာခါ ဒုမိန္ဒဿ၊ ရတ္တိယံ ဥဒ္ဓမုဂ္ဂမိ၊
တတော ကမ္မကရာ သဗ္ဗံ၊ အာရောစေသုံ သသာမိနော။
ယုဝရာဇာ’တိ သန္တုဋ္ဌော၊ ဘာတုရညော နိဝေဒိယ၊
မဟာပူဇာယ ပူဇေသိ၊ ဝိဿဇ္ဇိယ ဗဟုဓနံ။
တထာ မဟိန္ဒသေနဝှံ၊ ပရိဝေဏဉ္စ ကာရိယ၊
သင်္ဃဿာ’ဒါ သဘောဂံ သော၊ ပုညာ ပုညာနိစာစီနိ။
အဒါ သပရိသံ ဘတ္တံ၊ ဝတ္ထံ ဆတ္တမုပါဟနံ၊
တထာ ဂမိယဘတ္တဉ္စ၊ နဟာနဉ္စ သဘတ္တကံ။
ဧဝံ ခုဒ္ဒါနု ခုဒ္ဒါနိ၊ ကတွာ ပုညာနိ သော ဝိဘူ၊
ရညော တေတ္တိံသဝဿမှိ၊ ယထာကမ္မမုပါဂမိ။
အထ ရာဇာ မတေတသ္မိံ၊ ကဏိဋ္ဌမုဒယံ သကံ၊
တဿ ဌာနေ ဌပေတွာန၊ သဗ္ဗံ တဿေဝ တဿဒါ။
တုလာဘာရဿ ဒါနေန၊ ဒီနာနာထေ သတပ္ပယိ၊
ဓမ္မကမ္မေန သောဓေသိ၊ နိကာယတ္တယမေကတော။
သောဏ္ဏထာလီသဟဿံ သော၊ မုတ္တာဟိ ပရိပူရိယ၊
ဌပေတွာ မဏိမေကေကံ၊ တဿောပရိ မဟာရဟံ။
ဗြာဟ္မဏာနံ သဟဿဿ၊ သုဒ္ဓေ ရတနဘာဇနေ၊
ဘောဇေတွာ ခီရပါယာသံ၊ ဒါပေတွာ ဟေမသုတ္တကံ။
တထာ နဝေဟိ ဝတ္ထေဟိ၊ အစ္ဆာဒေတွာ ယထာရုစိံ၊
သန္တပ္ပေသိ မဟန္တေန၊ ပရိဟာရေန ပုညဝါ။
ဘိက္ခူနံ ဒီပဝါသီနံ၊ အဒါသိ စ တိစီဝရံ၊
အဒါ သဗ္ဗာသမိတ္ထီနံ၊ ဝတ္ထဉ္စ သုမနောဟရံ။
ကာရေတွာ ¶ လောဟပါသာဒံ၊ ဝေဇယန္တသရိက္ခကံ၊
ဝဍ္ဎေသိ ပဋိမံ တတ္ထ၊ သုဝဏ္ဏဃဋကောဋ္ဋိမံ။
သုတွာ ဥပေါသထာဂါရ-ဘာဝံ သဗ္ဗ မဟေသီနံ၊
တုစ္ဆော ယံ နေဝ ဟောတူတိ၊ ဝါသံ သင်္ဃဿ တံ အကာ။
ဘောဂဂါမေ စ တဿဒါ၊ ရက္ခကေ စ နိယောဇယိ၊
ဘိက္ခူ ဒွတ္တိံသမတ္တာဟိ၊ ဝသန္တူတိ နိယာမယိ။
ဂင်္ဂါယ မရိယာဒံ သော၊ ကာရေသိ မဏိမေခလံ၊
တောယနိဒ္ဓမနဉ္စာကာ၊ မဏိဟီရကဝါပိယာ။
ကဋ္ဌုန္တနဂရေ စေဝ၊ ကာဏဝါပိံစ ဗန္ဓယိ၊
ဝေဇ္ဇသာလဉ္စ ကာရေသိ၊ စေတိယမှိ ဂိရိမှိ သော။
ဗုဒ္ဓဂါမဝိဟာရဉ္စ၊ ဝိဟာရံ မဟိယင်္ဂဏံ၊
ကူဋတိဿ ဝိဟာရဉ္စ၊ ဘောဂဂါမေ န ဝဍ္ဎယိ။
မဏ္ဍလဿ ဂိရိဿာ’ဒါ၊ ဝိဟာရဿ သဂါမကေ၊
ဥတ္တရာဠှေ စ ကာရေသိ၊ ပါသာဒံ ပရိဝေဏကေ။
မဟာသေနဿ ဗုဒ္ဓဿ၊ ဂါမံ ဒတွာန ရက္ခကေ၊
ဒါသိ သောဗ္ဘဝိဟာရေ စ၊ ကာရေသိ ပဋိမာဃရံ။
ဗောဓိသတ္တေ စ ဝဍ္ဎေသိ၊ ပါသာဒေ မဏိမေခလေ၊
သီလာမယမုနိန္ဒဿ၊ ဇိဏ္ဏဂေဟမ္ပိ ကာရယိ။
ရာဇ တံ ဗောဓိသတ္တဉ္စ၊ သဃရံ တတ္ထ သန္နဟိ၊
အာလဝါလံ ဒုမိန္ဒဿ၊ ဂန္ဓိတွာ ကာ မဟာမဟံ။
လိခိတွာ ဟေမပဋ္ဋမှိ၊ သဗ္ဗရတနသုတ္တကံ၊
မဟာပူဇမကာ တဿ၊ အဘိဓမ္မံ ကထာပယိ။
အာနန္ဒပဋိမံ နေတွာ၊ ပုရံ ကတွာ ပဒက္ခိဏံ၊
ပရိတ္တံ ဘိက္ခုသင်္ဃေန၊ ဘဏာပေတွာ ယထာဝိဓိံ။
ပရိတ္တောဒကသေကေန၊ ဇနံ ကတွာ နိရာတုရံ၊
ရာဇာ ရောဂဘယံ ပေဝံ၊ နီဟရိတ္ထ သဒေသတော။
အဘိသေကံ ဂဟေတွာန၊ ဟေမဝါလုက စေတိယေ၊
အနုသံဝစ္ဆရံ ကာတုံ၊ တံ စာရိတ္တံ လိခါပယိ။
အဒါ မာသဿ စတူသု၊ ဥပေါသထဒိနေသု သော၊
စတုန္နဉ္စ သဟဿာနံ၊ ဝတ္ထဒါနံ သဘတ္တကံ။
ဝေသာခကီဠံ ¶ ကီဠိတ္ထ၊ သဒ္ဓိံ ဒုဂ္ဂတကေဟိ သော၊
အန္နံ ပါနဉ္စ ဝတ္ထဉ္စ၊ တေသံ ဒတွာ ယထာရုစိံ။
ဘိက္ခုသင်္ဃဿ ဒီပမှိ၊ နိစ္စဒါနံ ပဝတ္တယိ၊
သန္တပ္ပေသိ စ ဒါနေန၊ ကပဏဒ္ဓိကဝဏိဗ္ဗကေ။
တဿ ရညော မဟေသီ စ၊ သင်္ဃနာမာ အကာရယိ၊
ပဗ္ဗတံ သင်္ဃသေနဝှံ၊ သဘောဂမဘယုတ္တရေ။
နီလစူဠာမဏိဉ္စာကာ၊ သိလာမယ မဟေသိနော၊
ပူဇံ သဗ္ဗောပဟာရေဟိ၊ ကာသိ သတ္ထုဿ သဗ္ဗဒါ။
တဿ သေနာပတိစာ’ကာ၊ သေနသေနာပတိဝှယံ၊
ပရိဝေဏံ မဟာဘောဂံ၊ သူရော တုဋ္ဌကနာမကော။
ဧဝံ သပရိသော ကတွာ၊ သပုညာနိ မဟာယသော၊
ပဉ္စတိံသတိမေ ဝဿေ၊ ဒေဝလောကမုပါဂမိ။
တတော တဿာ’နုဇော အာသိ၊ ဥဒယော နာမ ခတ္တိယော၊
ရာဇာ သဗ္ဗပ္ပယောဂေဟိ၊ ဟိတေသီ ဒီပဝါသီနံ။
ဟုတွာ သော သယံ ရာဇာ၊ ကဏိဋ္ဌံ သကဘာတရံ၊
မဟာဒီပါဒဌာနမှိ၊ ဌပိ ကဿပနာမကံ။
ရာဇာ စိန္တိယ ဉာတီနံ၊ ကာတဗ္ဗော သင်္ဂဟော ဣတိ၊
ဧဝံ ကဿပနာမဿ၊ ဘာတုပုတ္တဿ ဓီတရံ။
ယုဝရာဇဿ တဿာ’ကာ၊ ဘရိယံ သေနနာမိကံ၊
ဓာရေသိစ သယံ ရာဇာ၊ အပရံ တိဿသဝှယံ။
မဟိန္ဒဿုပရာဇဿ၊ ရာဇဓီတာယ ကိတ္တိယာ၊
ပုတ္တော ကိတ္တဂ္ဂဗောဓီတိ၊ အာဒိပါဒေါ ဝိဗုဒ္ဓိကော။
စောရော ဟုတွာ မဟာရညော၊ နိက္ခမိတွာန ရတ္တိယံ၊
ဧကော အညာတဝေသေန၊ သမုပါဂမ္မရောဟဏံ။
ဇနံ ဟတ္တဂတံ ကတွာ၊ ဒေသံ သဗ္ဗံ ဝိနာသိယ၊
ဃာတာပယိတ္ထ တတြဋ္ဌံ၊ သော တံ မာတုလမတ္တနော။
တံ သုတွာ ဓရဏီပါလော၊ တသ္မိံ’တီဝ ပကုပ္ပိယ၊
အာနေတုံ တမုပါယံ သော၊ ဂဝေသန္တော တထာ တထာ။
ဘာတုပုတ္တံ တမာဟုယ၊ ယုဝရာဇံ သကဿပံ၊
အာမန္တေသိ မဟာပုည၊ သဟာယော ဟောတိ မေ ဣတိ။
ကိံ ¶ မေ ကတ္တဗ္ဗ’မိစ္စာဟ၊ ပစ္စာဟ ဓရဏီပတိ၊
ပုတ္တော တဝ မဟိန္ဒော သော၊ ဝုဒ္ဓိပ္ပတ္တော မဟာဗလော။
လာဘီ ရောဟဏဒေသဿ၊ မာတိတော ပိတိတော’ပိ စ၊
သူရော သဗ္ဗသဟော ဝီရော၊ ကုသလော ကတူပါသနော။
သင်္ဂါမယောဂ္ဂေါ မတိမာ၊ နိပုဏော နယကောဝိဒေါ၊
တံ ပေသေတွာ နယိဿာမ၊ ပါပံ မာတုလဃာတကံ။
တံ သုတွာ ဝစနံ ရညော၊ ကဿပေါ ဘာသိ သာဒရော၊
ဒေဝ ဒေဝေန ဝုတ္တော’ဟံ၊ ဂစ္ဆေယျံ ကိန္တု မေ သုတော။
ဝံသော မေ ပါလိတော ဟောတိ၊ ပသာဒေါ စ တဝါဓိပ၊
တသ္မာ ကာလမဟာပေတွာ၊ ယံ ဣစ္ဆသိ တထာ ကုရု။
သုတွာ အတီဝသန္တုဋ္ဌော၊ နရိန္ဒော တဿ တံ ဝစော၊
မဟန္ထံ ဗလကာယံ သော၊ သဗ္ဗသော ပဋိယာဒိယ။
မဟတာ ပရိဟာရေန၊ မဟိန္ဒံ ရာဇပေါတကံ၊
ရက္ခိတုံ တံ နိယောဇေတွာ၊ ဝဇိရဂ္ဂဉ္စ နာယကံ။
တုစ္ဆံ ဝိယ ပုရံ ကတွာ၊ သဗ္ဗဉ္စ ဗလဝါဟနံ၊
သဗ္ဗောပကရဏဉ္စေဝ၊ အနူနံ တဿ ဒါပိယ။
သယံ တမနုဂစ္ဆန္တော၊ ပဒသာ’ဝ နရိဿရော၊
ဥယျောဇေသိ မဟာပုည၊ ဂစ္ဆ ရုက္ခာတိ မေဒိနိံ။
မဟိန္ဒော သော မဟိန္ဒော’ဝ၊ ဒေဝသေနာ ပုရက္ခတော၊
ဂစ္ဆန္တော သုဝီရောစိတ္ထ၊ ဒေဝါသုရမဟာဟဝံ။
တတော ဂန္တွာ န စိရေန၊ ဂုတ္တသာလမုပါဂမိ၊
တတော ဇာနပဒါ သဗ္ဗေ၊ မဏ္ဍလိကာ စ ရဋ္ဌိယာ။
တေန မာတုလဃာတေန၊ ပါပကေန ဥပဒ္ဒုတာ၊
ဂန္တွာ တံ ပရိဝါရေသုံ၊ လဒ္ဓါ နော သာမိကော ဣတိ။
ပတန္တော သောပိ ခေါ စောရော၊ ဌိတောဝ ဂိရိမဏ္ဍလေ၊
သဗ္ဗံ ဟတ္ထဂတံ ကတွာ၊ ရာဇဘဏ္ဍံ မဟဂ္ဃိယံ။
ဟတ္ထီ အဿေစ အာဒါယ၊ ဂန္တွာ မလယမာရုဟိ၊
မဟိန္ဒသေနာ ဃာတေန္တီ၊ တဿ သေနံ တဟိံ တဟိံ။
ပဒါနုပဒမဿေ’ဝ၊ ဂစ္ဆန္တိ ဟတ္ထိအဿကေ၊
ဒိသွာ မလယပါဒမှိ၊ ဂဟေတွာ ဧတ္ထ သော ဣတိ။
တတ္ထ ¶ ပါဝိသိမဒ္ဒန္တီ၊ သဗ္ဗံ မလယကာနနံ၊
နဒီယော ပလ္လလေ စေဝ၊ ကရောန္တိ မဂ္ဂသာဒိသေ။
ဗာလကောဝ ဇနံ ဒိသွာ၊ သဗ္ဗံ ရတနမတ္တနော၊
ကောဓာဘိဘူတော ဆဍ္ဍေသိ၊ နဒီ သောဗ္ဘတဋာဒီသု။
ဧကကောဝ နိလီယိတ္ထ၊ ဝနေ ပဗ္ဗတကန္ဒရေ၊
ဂဝေသန္တော ဇနော ဒိသွာ၊ တမဂ္ဂဟိ နရာဓမ္မံ။
တမာဒါယ’တိ တုဋ္ဌော သော၊ ဇနော အာဂမ္မ သဇ္ဇုကံ၊
မဟိန္ဒမုပဒဿေသိ၊ နိသိန္နံ ဂုတ္တသာလကေ။
သော တံ ဒိသွာ ဟသိတွာန၊
ဘုတ္တော ကိံ ရောဟဏော’’ဣတိ၊
နာယကဿ နိယျာတေတွာ၊
ဝဇိရဂ္ဂဿ ရာဇိနော။
သယံ သေနံ သမာဒါယ၊ မဟာဂါမမုပါဂတော၊
ရောဟဏာ ဓိပတိ ဟုတွာ၊ ကရောန္တော လောကသင်္ဂဟံ။
ဇနံ ပါကတိကံ ကတွာ၊ ဗာလကေန ဝိဗာဓိတံ၊
သာသနဉ္စ ယထာဌာနေ၊ ဌပေတွာ တေန နာသိတံ။
ပုပ္ဖာရာမေ ဖလာရာမေ၊ ကာရယိတွာ တဟိံ တဟိံ၊
ဝါပိယော’ပိ စ ဂဏှိတွာ၊ ဗန္ဓာပေတွာ မဟာနဒိံ။
သဗ္ဗတ္ထ သုလဘံ ကတွာ၊ သင်္ဃဿ စတုပစ္စယံ၊
ဒုဋ္ဌေ စ ပဋိဗာဟေတွာ၊ မဏ္ဍလီကေ စ ရဋ္ဌိယေ။
စောရေ စ ပရိသောဓေတွာ၊ ကတွာ ဝိဂတကဏ္ဋကံ၊
တောသယန္တော’ခိလံ လောကံ၊ စာဂဘောဂသမပ္ပိတော။
ဥပါသနိယော ဝိညူဟိ၊ သေဝနီယော ဓနတ္ထီဟိ၊
ကပ္ပရုက္ခူပမော သဗ္ဗ-ယာစကာနံ ဟိတာဝဟော။
ဟိတွာ ဒုဗ္ဗိနယံ ဒေသေ၊ ပုဗ္ဗကေဟိ ပဝတ္တိတံ၊
သမာစရန္တော ဓမ္မဉ္စ၊ ဝါသံ တတ္ထေဝ ကပ္ပယိ။
အာဒိပါဒံ ဂဟေတွာန၊ ဝဇိရဂ္ဂေါ ဝိနာယကော၊
အနုရာဓမုပါဂမ္မ၊ ရာဇာနမဘိဒဿယိ။
ရာဇာပိ ဒိသွာ တံ ကုဒ္ဓါ၊ ခိပ္ပံ ပက္ခိပ္ပ စာရကေ၊
ရက္ခာဝရဏမဿာဒါ၊ ဝိဟေဌေသိ စ သဗ္ဗာသော။
အဒါသိ ¶ စ တုလာဘာရံ၊ တိက္ခတ္တုံ သော မဟာယသော၊
ထူပါရာမမှိ ထူပဉ္စ၊ ဟေမပဋ္ဋေန ဆာဒယိ။
ကတွာ တတ္ထေဝ ပါသာဒံ၊ ဘိက္ခုသင်္ဃံ နိဝါသိယ၊
ဝိဟာရေ နဂရေ စေဝ၊ ပဋိသင်္ခါသိ ဇိဏ္ဏကံ။
ကဒမ္ဗနဒီယာ’ကာသိ၊ နိဇ္ဈရံ ထိရဗန္ဓနံ၊
မရိယာဒံ ပဝဍ္ဎေသိ၊ ဝါပိယံ သော မယေတ္တိယံ။
တတ္ထ နိဒ္ဓမနံစာ’ကာ၊ အနုဝဿမ္ပိ ဘူမိပေါ၊
စီဝရတ္ထံ သုဝတ္ထာနိ၊ သုသဏှာနိ စ ဒါပယိ။
ဒုဗ္ဘိက္ခေ ဒါနသာလာယော၊ ကာရေတွာ သဗ္ဗပါဏိနံ၊
မဟာဒါနံ ပဝတ္တေသိ၊ မဟာပါဠိဉ္စ ဝဍ္ဎယိ။
ဒဓိဘတ္တဉ္စ ဒါပေသိ၊ နိကာယတ္တယဝါသိနံ၊
နိစ္စံ ဒုဂ္ဂတဘတ္တဉ္စ၊ ယာဂုဉ္စေဝ သခဇ္ဇကံ။
ဧဝမာဒီနိ ပုညာနိ၊ ကတွာ သောဝဂ္ဂိယာနိ သော၊
ဧကာဒသဟိ ဝဿေဟိ၊ ဂတော ဒေဝသဟဗျတံ။
တဿေကာဒသဝဿေသု၊ ဝိဿဋ္ဌံ သောဏ္ဏမေဝ တု၊
အဟု သတသဟဿာနံ၊ တယော ဒသဟိ သမ္မိတံ။
သုဒုဇ္ဇယံ ပဏ္ဍုနရာဓိရာဇ၊
မေကောပရော ရောဟဏမုဂ္ဂဒုဂ္ဂံ၊
ကတွာ’ပိ ဧတေ သဝသေ နရိန္ဒာ၊
သယံ ဝသံ မစ္စုမုပါဂမိံသု။
သုဇနပ္ပသာဒ သံဝေဂတ္ထာယ ကတေ မဟာဝံသေ
ရာဇဒွယဒီပနော နာမ
ဧကူနပညာသတိမော ပရိစ္ဆေဒေါ။