📜
ပညာသတိမ ပရိစ္ဆေဒ
ဒွိရာဇကောနာမ
တတော ¶ ရဇ္ဇေ ပတိဋ္ဌာယ၊ ကဿပေါ ဒက္ခိဏံ ဒိသံ၊
အဒါ ကဿပနာမဿ၊ ယုဝရာဇဿ ဓီမတော။
အဂ္ဂါဘိသေကံ ဒါပေသိ၊ ယုဝရာဇဿ ဓီတုယာ၊
ရာဇကညာယ တိဿာယ၊ ဘရိယာယေ’ဝ အတ္တနော။
ယာစကာနဉ္စ သိပ္ပီနံ၊ အာဂတာနံ တတော တတော၊
ဒါနံ ဒဏ္ဍိဿရံ နာမ၊ သဒါ ဒါပေသိ ဘူပတိ။
အာဒိပါဒေါ မဟိန္ဒော သော၊
ဝသန္တော ရောဟဏေ တဒါ၊
ဂဟေတုံ ရာဇိနောရဋ္ဌ-
မာဒါယ ဗလမာဂတော။
တံ သုတွာ ကုပိတော ရာဇာ၊ ဗလံ ပေသေသိ အတ္တနော၊
ယုဇ္ဈိတွာ တံ ပရာဇေသိ၊ မဟိန္ဒော သော မဟာဘဋော။
တတော ရာဇာ နိဝတ္တေတုံ၊ ပိတရံ တဿ ပေသယိ၊
ကဿပံ ယုဝရာဇံ တံ၊ သော ဂန္တွာ ပုတ္တသန္တိကံ။
နာနာဓမ္မကထောပေတံ၊ ဝတွာ ယုတ္တိမနေကဓာ၊
သင်္ဃာမတော နိဝတ္တေတွာ၊ ပုတ္တံ သော ပုနရာဂမိ။
အာဒိပါဒေါ တု သော ပစ္ဆာ၊ ဃာတေတွာ မဏ္ဍလာဓိပေ၊
ကုဒ္ဓေဇနပဒေ ဒိသွာ၊ အဂမာသိ ပုရန္တိကံ။
ဘိက္ခုသင်္ဃော တမာနေတွာ၊ ဒဿေသိ ဝသုဓာဓိပံ၊
ဒတွာ သော ဓီတရံ တဿာ၊ ပေသေသိ ပုန ရောဟဏံ။
နီဟရိတွာန ဒုဿီလေ၊ နိကာယတ္တယဝါသီသု၊
ဂါဟာပေသိ နဝေ ဘိက္ခူ၊ အာဝါသေ တတ္ထ တတ္ထ သော။
ဒွယာဘိသေကဇာတေန၊ အာဒိပါဒေန သုနုနာ၊
မဟာဝိဟာရေ ဗောဓိမှိ၊ ပံသုံ ဝဍ္ဎေသိ ပူဇယံ။
အကာသိ ¶ စ နိကာယေသု၊ တီသု ဗိမ္ဗေ သိလာမယေ၊
သောဝဏ္ဏယေ ရံသိဇာလေ၊ ဆတ္တံ စူဠာမဏိံ တထာ။
အဘယဂိရိဝိဟာရမှိ၊ ပါသာဒံ သကနာမကံ၊
ကတွာ တတ္ထ နိဝါသေတွာ၊ ဘိက္ခု ဂါမမဒါပယိ။
မဟိယင်္ဂဏဝိဟာရသ္မိံ၊ ဂါမံ သော စေတိယဿ’ဒါ၊
သဝတ္ထံ ပဋိမာဘတ္တံ၊ သဗ္ဗဘိက္ခူန ဒါပယိ။
ထလေ ဇလေ စ သတ္တာနံ၊ အဒါသိ အဘယံ တဒါ၊
စာရိတ္တပုဗ္ဗရာဇူနံ၊ ပရိပါလေသိ သဗ္ဗဒါ။
တဿ သေနာပတိ သေနော၊ ဣလင်္ဂေါရာဇဝံသဇော၊
ထေရိယာနံ အကာ’ဝါသံ၊ ထူပါရာမဿ ပစ္ဆတော။
ဓမ္မာရုစိကဘိက္ခူနံ၊ ဓမ္မာရာမမကာရယိ၊
တထာ သာဂလိကာနဉ္စ၊ ကဿပသေနနာမကံ။
ဟဒယုဏှာဘိဓာနံ သော၊ ကတွာ စေတိယပဗ္ဗတေ၊
ပရိဝေဏံ အဒါဓမ္မ-ရုစိကာနဉ္စ ဘိက္ခူနံ။
အာရာမိကာနံ ဘိက္ခူနံ၊ အာရာမေသု တဟိံ တဟိံ၊
ဧကမေကံ ကုဋိံ ကတွာ၊ ဒါပေသိ စ စမူပတိ။
ရတ္တမာလဂိရိသ္မိံ သော၊ ကတွာ ရမ္မံ တရံ သုဘံ၊
ကုစိံ အဒါ သာသနဿ၊ သာမိကာနံ တပဿိနံ။
မဟာဝိဟာရေ ကာရေတွာ၊ ပဝိဝေဏံ ဝရံ အဒါ၊
ပံသုကူလိကဘိက္ခူနံ၊ သမုဒ္ဒဂိရိနာမကံ။
ဝါသံ အရညေ ကာရေတွာ၊ အတ္တနော ဝံသနာမကံ၊
မဟာဝိဟာရေ ဘိက္ခူနံ၊ ဝနေ နိဝါသတံ အဒါ။
ဝိဟာရေသူ စ ဇိဏ္ဏေသု၊ နဝကမ္မမကာရယိ၊
ဒါပေသိ အဂ္ဂလံ သဗ္ဗ-ဘိက္ခူနံ ဇိဏ္ဏစီဝရေ။
တိဿာရာမံ ကရိတွာန၊ ဘိက္ခူနီနမုပဿယံ၊
မရိစဝဋ္ဋိမဟာဗောဓိ၊ ပရိဟာရေ နိဝေသယိ။
အနုရာဓပုရေ စေဝ၊ ပုလတ္ထိနဂရေပိ စ၊
ဥပသဂ္ဂရောဂနာသာယ၊ ဝေဇ္ဇသာလာပိ ကာရယိ။
အတ္တနာ ကတဝါသနံ၊ ဘောဂဂါမေ စ ဒါပယိ၊
တထာရာမိကဂါမေ စ၊ ပဋိမာဘရဏဉ္စ သော။
ဘေသဇ္ဇဂေဟံ ¶ ကာရေသိ၊ နဂရေ တတ္ထ တတ္ထ သော၊
ပံသုကူလိကဘိက္ခူနံ၊ ဘတ္တံ ဝတ္ထဉ္စ ဒါပယိ။
ခန္ဓီကတေ အမောစေသိ၊ တိရစ္ဆာနဂတေ ဗဟူ၊
ကပဏာနဉ္စ ဒါပေသိ၊ မဟာဒါနံ စမူပတိ။
ဝိစိတ္တံ ဗျဉ္ဇနံ ဘတ္တံ၊ ယာဂုံ ဝိဝိဓခဇ္ဇကံ၊
ကတွာ သူကရရူပဉ္စ၊ ဂုဠံ ဘိက္ခူနံ ဒါပယိ။
ဧဝါမာဒီနိ ပုညာနိ၊ ကတွာ သေနာယ နာယကော၊
သေနော ကိတ္တိန္ဒုပါဒေဟိ၊ သဗ္ဗာ ဩဘာသယီ ဒိသာ။
တဿေဝ ဉာတကော ကတွာ၊ နာယကော ရက္ခသဝှယော၊
သဝါရကမှိ ဂါမမှိ၊ ဝိဟာရံ သုမနောဟရံ။
မဟာဝိဟာရဝါသီနံ၊ သာရာနံ ပဋိပတ္တိယာ၊
ဘိက္ခူနံ သော အဒါ သာဓု၊ ဌပေတွာ ဝတ္တမုတ္တမံ။
သေနော နာမ မဟာလေခေါ၊ မဟာလေခကပဗ္ဗတံ၊
မဟာဝိဟာရေ ကာရေသိ၊ ဘိက္ခူနံ ဝါသမုတ္တမံ။
စောဠရာဇာဘိဓာနော၊ စ၊ အမစ္စော တဿ ရာဇိနော၊
ပရိဝေဏံ အကာရမ္မံ၊ နဋ္ဌံ တံ သုပ္ပတိဋ္ဌိတံ။
ရာဇာ တီသု နိကာယေသု၊ ရူပကမ္မမနောရမံ၊
မဏ္ဍပါနိ ဝိစိတ္တာနိ၊ ဝေဇယန္တော ပမာနိ စ။
ကာရေတွာ ဓာတုပူဇာယော၊ ကတွာ ဇနမနောဟရာ၊
ယထာ ကမ္မံ ဂတော ဌတွာ၊ ဝဿာနိ ဒသသတ္တ စ။
ဒွယာဘိသေကသဉ္ဇာတော၊ ယုဝရာဇာထ ကဿပေါ၊
အာသိ လဒ္ဓါဘိသေကော သော၊ လံကာရဇ္ဇေကမာဂတေ။
သဒ္ဓါ အာဂတမဂ္ဂေါဝ၊ သာဘိညော ဝိယ ပညဝါ၊
ဝတ္တာ သော မရမန္တိဝ၊ စာဂဝါ ဓနဒေါ ဝိယ။
ဗဟုဿုတော ဓမ္မကထီ၊ သဗ္ဗသိပ္ပဝိသာရဒေါ၊
ယုတ္တာယုတ္တဝိစာရာယ၊ နိပုဏော နယကောဝိဒေါ။
အစလော ဣန္ဒလီလော’ဝ၊ ဌိတော သုဂတသာသနေ၊
ပရပ္ပဝါဒိဝါတေဟိ၊ သဗ္ဗေဟိ’ပိ အကမ္ပိယော။
မာယာသာဌေယျမာနာဒိ၊ ပါပါနဉ္စ အဂေါစရော၊
ဂုဏာနံ အာကရော သဗ္ဗ-ရတနာနံ ဝသာဂရော။
ဘူမိစန္ဒော ¶ နရိန္ဒော သော၊ ဝံသေ ဇာတဿ အတ္တနော၊
ဒပ္ပုဠဿာဒီပါဒဿ၊ ယုဝရာဇပဒံ အဒါ။
ရဇ္ဇံ ဒသဟိ ဓမ္မေဟိ၊ စတုသင်္ဂဟဝတ္ထူဟိ၊
ကရောန္တော ပရိပါလေသိ၊ လောကံ နေတ္တံဝ အတ္တနော။
သော ဓေတွာ သာသနံ သဗ္ဗံ၊ ဓမ္မကမ္မေန သတ္ထုနော၊
ဂဟေတွာ နဝကေ ဘိက္ခူ၊ အကာသာ’ဝါသပူရဏံ။
ဒုဋ္ဌဂါမဏိရာဇေန၊ ကတံ မရိစဝဋ္ဋိကံ၊
နဋ္ဌံ ဝိဟာရံ ကာရေတွာ၊ နာနာအာဝါသ ဘူသိတံ။
ထေရဝံသဇဘိက္ခူနံ၊ အဒါ ကတွာ မဟာမဟံ၊
တေသံ ပဉ္စသတာနဉ္စ၊ ဘောဂဂါမေ စ ဒါပယိ။
တတ္ထ သော တုသိတေ ရမ္မေ၊ ဒေဝသင်္ဃပုရက္ခတံ၊
မေတ္တေယျံ လောကနာထံ တံ၊ ဒေသေန္တံ ဓမ္မမုတ္တမံ။
ဒဿေန္တော ဝိယ လောကဿ၊ ဝိဟာရေ သဗ္ဗသဇ္ဇိတေ၊
နိသိန္နော မဏ္ဍပေ ရမ္မေ၊ နာနာရတနဘူသိတေ။
နဂရေဟိ စ သဗ္ဗေဟိ၊ ဘိက္ခူဟိ ပရိဝါရိတော၊
ဗုဒ္ဓလိလာယ လံကိန္ဒော၊ အဘိဓမ္မ မဘာသယိ။
သောဏ္ဏပဋ္ဋေ လိခါပေတွာ-ဘိဓမ္မပိဋကံ တဒါ၊
ဓမ္မသင်္ဂဏိကံ ပေါတ္ထံ၊ နာနာရတန ဘူသိတံ။
ကတွာ နဂရမဇ္ဈမှိ၊ ကာရေတွာ ဟေမမုတ္တမံ၊
တံ တတ္ထ ဌပယိတွာန၊ ပရိဟာရမဒါပယိ။
သက္ကသေနာပတိဋ္ဌာနံ၊ ဒတွာ ပုတ္တဿ အတ္တနော၊
ပရိဟာရေ နိယောဇေသိ၊ တတ္ထ တံ ဓမ္မပေါတ္ထကေ။
အနုသံဝစ္ဆရံ ရာဇာ၊ ပုရံ ဒေဝပုရီ ဝိယ၊
ဝိဘူသိတာယ သေနာယ၊ သဇ္ဇေတွာ ပရိဝါရိတော။
ဒေဝရာဇာဝ သောဘန္တော၊ သဗ္ဗာဘရဏဘူသိတော၊
ဟတ္ထိခဏ္ဍေ နိသီဒိတွာ၊ စရန္တော ပုရဝီထိယံ။
မဟတာ ပရိဟာရေန၊ နေတွာ တံ ဓမ္မသင်္ဂဟံ၊
အတ္တနာ ကာရိတံ ရမ္မံ၊ ဝိဟာရံ သဗ္ဗသဇ္ဇိတံ။
တတ္ထ ဓာတုဂတေ ရမ္မေ၊ နာနာရတနဘူသိတေ၊
မဏ္ဍပေ ဓာတုပိဌသ္မိံ၊ ပတိဋ္ဌာပိယ ပူဇယိ။
ဂန္ထာကရပရိဝေဏံ ¶ ၊ မဟာမေဃဝနေ အကာ၊
နဂရေ ဝဇ္ဇသာလာ စ၊ တေသံ ဂါမေ စ ဒါပယိ။
ဘဏ္ဍိကပရိဝေဏဉ္စ၊ သိလာမေဃဉ္စ ပဗ္ဗတံ၊
ကတွာ’ဘယဂိရိသ္မိံ သော၊ တေသံ ဂါမမဒါပယိ။
ဇောတိဝနဝိဟာရသ္မိံ၊ ရာဇာ လင်္ကာယ နာယကော၊
ဘတ္တဂ္ဂဿ အဒါ ဂါမံ၊ တထာ’ဘယဂိရိမှိ စ။
ဒက္ခိဏဂိရိနာမဿ၊ ဝိဟာရဿ စ ဒါပယိ၊
ဂါမံ ကတညုဘာဝေန၊ ရာဇာ ပရမဓမ္မိကော။
သက္ကသေနာပတိ ရမ္မံ၊ ပရိဝေဏံ သုမာပိယ၊
အဒါသိ သဟဂါမေဟိ၊ ထေရိယာနံ သနာမိကံ။
ဘရိယာ ဝဇိရာ တဿ၊ တေသံယေဝ အဒါပယိ၊
ပရိဝေဏံ ကရိတွာန၊ သဂါမံ သကနာမကံ။
ဥပဿယံ ကရိတွာန၊ သာ ဧဝ ပဒလဉ္ဆနေ၊
ဘိက္ခူနီနံ အဒါ ထေရ-ဝံသေ သဗ္ဗတ္ထ ပူဇိတေ။
သက္ကသေနာပတိ မာတာ၊ ဒေဝါ’ရညက ဘိက္ခူနံ၊
ထေရဝံသပ္ပဒီပါနံ၊ အကာ’ဝါသံ သနာမကံ။
သာ ဧဝ ပဋိဗိမ္ဗဿ၊ သတ္ထု မရိစဝဋ္ဋိယံ၊
စူဠာမဏိံ ပါဒဇလံ၊ အကာ ဆတ္တဉ္စ စီဝရံ။
ရာဇာ ရာဇာလယေယေဝ၊ ရာဇဝံသံ သနာမကံ၊
အကာသိ ပါဠိကံ နာမ၊ ပါသာဒံ သုမနော ဟရံ။
ပူဇေသိ ရာဇိနီ နာမ၊ ရာဇိနော ဘရိယာ’ပရာ၊
ပဋ္ဋကဉ္စုကပူဇာယ၊ ဟေမမာလိက စေတိယံ။
တဿာ ပုတ္တောသိ သိဒ္ဓတ္ထော၊ နာမ ဣဿရိယေ ဌိတော၊
သုတော မလယရာဇာတိ၊ ရူပေန မကရဒ္ဓဇော။
ရာဇာ တသ္မိံ မတေ ကတွာ၊ သာလံ ဘိက္ခုနမုတ္တမံ၊
ဒါနဝဋ္ဋံ ပဋ္ဌပေတွာ၊ တဿ ပတ္တိမဒါ တဒါ။
ဧဝံ ဓမ္မေန ကာရေန္တေ၊ ရဇ္ဇံ လင်္ကာဒီပေ တဒါ၊
စောဠရာဇေန ယုဇ္ဈိတွာ၊ ပဏ္ဍုရာဇာ ပရာဇိတော။
ပဏ္ဏာကာရာနိ နေကာနိ၊ ဗလံ သန္ဓာယ ပေသယိ၊
ရာဇာလံကိဿရော သဒ္ဓိံ၊ မန္တေတွာ သစိဝေဟိ သော။
သန္နယှ ¶ ဗလကာယံ သော၊ သက္ကသေနာပတိံ သကံ၊
ဗလဿ နာယကံ ကတွာ၊ မဟာယိတ္ထမုပါဂမိ။
ဝိဇယံ ပုဗ္ဗရာဇူနံ၊ ဝတွာ ဝေလာတဋေ ဌိတော၊
ဥဿာဟံ ဇနယိတွာန၊ နာဝံ အာရောပယီ ဗလံ။
ဗလကာယံ သမာဒါယ၊ သက္ကသေနာပတိံ တဒါ၊
သုခေန သာဂရံ တိဏ္ဏော၊ ပဏ္ဍုဒေသမုပါဂမိ။
ဒိသွာ ဗလဉ္စ တဉ္စေဝ၊ ပဏ္ဍုရာဇာ သုမာနသော၊
ဧကစ္ဆတ္တံ ကရိဿာမိ၊ ဇမ္ဗုဒီပန္တိ အဗြဝိ။
ဗလဒွယံ ဂဟေတွာန၊ ရာဇာ သော စောဠဝံသဇံ၊
ဇေတုံ အသက္ကုဏိတွာန ယုဒ္ဓမုဇ္ဈိယ နိက္ခမိ။
ယုဇ္ဈိဿာမီတိ ဂန္တာန၊ သက္ကသေနာပတီ ပုန၊
နိသိန္နော ဥပသဂ္ဂေန၊ မတော ပါပေန ပဏ္ဍုတော။
လံကိဿရော ဗလဿာပိ၊ တေန ရောဂေန နာနသံ၊
သုတွာ ဒယာလုဘာဝေန၊ သေနံ အာဏာပယီ တတော။
သက္က သေနာပတိဋ္ဌာနံ၊ တဿ ပုတ္တဿ’ဒါ တဒါ၊
ဝဍ္ဎေသိ တေန တံ ပုတ္တံ၊ ကတွာ သေနာယ နာယကံ။
နိကာယတ္တယဝါသီဟိ၊ ပရိတ္တံ နဂရေ တဒါ၊
ကာရေတွာ ရောဂဒုဗ္ဗုဋ္ဌိ-ဘယံ နာသေသိ ဇန္တုနံ။
သာသနဿ စ လောကဿ၊ သန္တိံ ကတွာ အနေကဓာ၊
ရာဇာ သော ဒသမေ ဝဿေ၊ သုခေန တိဒိဝံ ဂတော။
လံကာရဇ္ဇေပိ ဌတွာ ကထိတတိပိဋကော သဗ္ဗဝိဇ္ဇာပဒီပေါ၊
ဝတ္တာဝါဒီ ကဝီ သော သတိဓီတိဝိသဒေါ ဒေသကော ဘာဝကော စ၊
ပညာသဒ္ဓါဒယာ ဝါ ပရဟိတနိရတော လောကဝေဒီဝဒညူ၊
ရာဇိန္ဒော ကဿပေါ’ယံ ဝိယ ဝိမလဂုဏော ဟောတုလောကောပိ သဗ္ဗော။
သုဇနပ္ပသာဒသံဝေဂတ္ထာယ ကတေ မဟာဝံသေ
ဒွိရာဇကော နာမ
ပညာသတိမော ပရိစ္ဆေဒေါ။