📜
ဒွိပညာသတိမ ပရိစ္ဆေဒ
တိရာဇကောနာမ
တတော ¶ လင်္ကာဘိသေကံ သော၊ ပတွာ သေနော ကမာဂတံ၊
မဟိန္ဒဿာဒိပါဒဿ၊ ယုဝရာဇပဒံ အဒါ။
ပညော မဟာကဝီ ဗျတ္တော၊ မဇ္ဈတ္တော မိတ္တသတ္တုသု၊
ယုတ္တော ဒယာယ မေတ္တာယ၊ ရာဇာ သော သဗ္ဗဒါ အဟု။
ကာလံ ဒေဝေါ’နတိက္ကမ္မ၊ သမ္မာ ဓာရာဘိဝဿတိ၊
ရဋ္ဌေ တသ္မိံ ဝသန္တာ’သုံ၊ သုခိတာ နိဗ္ဘယာ သဒါ။
သုတ္တန္တံ လောဟပါသာဒေ၊ နိသိန္နော ဝဏ္ဏယီ တဒါ၊
နိကာယတ္တယဝါသီဟိ၊ ရာဇာ သော ပရိဝါရိတော။
ဒါဌဓာတုကရဏ္ဍံ သော၊ နာနာရတနဘူသိတံ၊
အကာ စတုဝိဟာရေသု၊ ဓာတုပူဇာ စ’နေကဓာ။
ပရိဝေဏံ သိတ္ထဂါမံ၊ ကာရေတွာ ဝုတ္ထမတ္တနာ၊
လောကံ ပုတ္တံဝ ပါလေတွာ၊ တိဝဿေန ဒိဝင်္ဂတော။
ယုဝရာဇာ မဟိန္ဒော သော၊ ရာဇာသိ တဒနန္တရံ၊
မဟာပုညော မဟာတေဇော၊ မဟာသေနော မဟာယသော။
ဧကစ္ဆတ္တံ အကာ လင်္ကံ၊ ဃာတေတွာ စောရုပဒ္ဒဝံ၊
အကံသု တမုပဋ္ဌာနံ၊ နိစ္စမဏ္ဍလနာယကံ။
ဝိဇ္ဇမာနေပိ လင်္ကာယံ၊ ခတ္တိယာနံ နရာဓိပေါ၊
ကာလိင်္ဂစက္ကဝတ္တိဿ၊ ဝံသေ ဇာတံ ကုမာရိကံ။
အာဏာပေတွာန တံ အဂ္ဂ-မဟေသိံ အတ္တနော အကာ၊
တဿာ ပုတ္တာ ဒုဝေ ဇာတာ၊ ဓီတာ ဧကာ မနောရမာ။
အာဒိပါဒေ အကာ ပုတ္တေ၊ ဓီတရံ စောပရာဇိနိံ၊
ဣတိ သီဟဠဝံသဉ္စ၊ ပဋ္ဌပေသိ သဘူပတိ။
ဗလကာယံ ဣမံ ဒေသံ၊ မဒ္ဒနတ္ထာယ ဝလ္လဘော၊
ပေသေသိ နာဂဒီပံ သော၊ သုတွာ တံ ဘူပတိ ဣဓ။
ဗလံ ¶ ဒတွာန သေနဝှ-ရာဇသေနာပတိံ တဒါ၊
ဝလ္လဘဿ ဗလေနေ’သ၊ ယုဇ္ဈိတုံ တတ္ထ ပေသယိ။
ဂန္တွာ သေနာပတီ တတ္ထ၊ ဗလေနေ’တဿ ရာဇိနော၊
ယုဇ္ဈိတွာ တံ ဝိနာသေတွာ၊ ဂဏှိ သော ယုဒ္ဓမဏ္ဍလေ။
အသက္ကေန္တော ဣမံ ဇေတုံ၊ ရာဇာ နံ ဝလ္လဘာဒယော၊
ရာဇာနော မိတ္တသမ္ဗန္ဓံ၊ လံကိန္ဒေန အကံသု တေ။
ဣစ္ဆေဝံ ရာဇိနော တေဇော၊ ဇမ္ဗုဒီပမဝတ္ထရိ၊
ပတ္ထရိတွာန လံကာယံ၊ ဥလ္လင်္ဃိတွာန သာဂရံ။
သဒ္ဓမ္မံ ကထာယန္တာနံ၊ ကတွာ သမ္မာ န မုတ္တမံ၊
ဓမ္မံ သုတွာန သော ရာဇာ၊ ပသန္နော ဗုဒ္ဓသာသနေ။
ရာဇာ သော သန္နိပါတေတွာ၊ ပံသုကူလိကဘိက္ခဝေါ၊
ယာစိတွာ အတ္တနော ဂေဟံ၊ အာဏာပေတွာန သာဓုကံ။
အာသနံ ပညပေတွာန၊ နိသီဒါပိယ ဘောဇနံ၊
ဒါပေသိ ဝိပုလံ သုဒ္ဓံ၊ သဒါ ဧကဒိနေ ဝိယ။
အနေကဗျဉ္ဇနံ ရာဇာ-ရညကာနံ တပဿိနံ၊
ပေသေသိ ဘောဇနံ သုဒ္ဓံ၊ မဟဂ္ဃံ ဝိပုလံ သဒါ။
ဝေဇ္ဇေဝ ပေသယိတွာန၊ ဝိလာနာနံ တပဿိနံ၊
သန္တိကံ သော ဒယာဝါသော၊ တိကိစ္ဆာပေသိ နိစ္စသော။
ဂုဠာနိ ဃနပါကာနိ၊ လသုဏာနံ ရသာနိ စ၊
တမ္ဗုလမုခဝါသဉ္စ၊ ပစ္ဆဘတ္တေ အဒါ သဒါ။
ပတ္တေသု ပူရယိတွာန၊ လသုဏံ မရိစမ္ပိ စ၊
ပိပ္ဖလိသင်္ဂီဝေရာနိ၊ ဂုဠာနိ တိဖလာနိ စ။
ဃတံ တေလံ မဓုဉ္စာယ၊ ပါပုရတ္ထရဏာနိ စ၊
ပံသုကူလိကဘိက္ခူနံ၊ ပစ္စေကံ သဗ္ဗဒါ အဒါ။
စီဝရာဒီနိ သဗ္ဗာနိ၊ ပရိက္ခာရာနိ ဘူပတိ၊
ကာရာပေတွာန ဒါပေသိ၊ ဘိက္ခူနံ ပံသုကုလိနံ။
ရာဇာ မဟာဝိဟာရသ္မိံ၊ ဧကေကဿ ဟိ ဘိက္ခုနော၊
ပစ္စေကံ နဝဝတ္ထာနိ၊ စီဝရတ္ထာယ ဒါပယိ။
နိကာယတ္တယဝါသီနံ၊ ဘိက္ခူနံ လာဘဝါသိနံ၊
တုလာဘာရမဒါ ဒွီသု၊ ဝါရေသု သမဟီပတိ။
ရာဇာ ¶ သော နာဂတေဘောဂံ၊
ရာဇာနော သင်္ဃဘောဂတော၊
န ဂဏှန္တူနိ ပါသာဏေ၊
လိခါပေတွာ နိဓာပယိ။
ကထာပေတွာန ဗုဒ္ဓဿ၊ သရဏာနိ ဂုဏေနဝ၊
အနာထေဟိ စ တေသဉ္စ၊ ဘတ္တဝတ္ထာနိ ဒါပယိ။
ဒါနသာလံ ကရိတွာန၊ ဟတ္ထိသာလကဘူမိယံ၊
ယာစကာနံ အဒါ ဒါနံ၊ တေသဉ္စ သယနာသနံ။
ဝေဇ္ဇသာလာသု သဗ္ဗာသု၊ ဘေသဇ္ဇံ မဉ္စကဉ္စ သော၊
စောရာနံ ဗန္ဓနာဂါရေ၊ နိစ္စံ ဘတ္တာနိ ဒါပယိ။
ဝါနရာနံ ဝရဟာနံ၊ မိဂါနံ သုနခါန စ၊
ဘတ္တံ ပူဝဉ္စ ဒါပေသိ၊ ဒယာဝါသော ယထိစ္ဆကံ။
ရာဇာ စတုဝိဟာရေသု၊ ကတွာ သော ဝီဟိရာသယော၊
ယထိစ္ဆိတေန ဂဏှန္တု၊ အနာထာ ဣတိ ဒါပယိ။
နာနာပူဇာဟိ ပူဇေတွာ၊ ကတွာ မင်္ဂလမုတ္တမံ၊
ကထာပေသိ စ ဘိက္ခူဟိ၊ ဗျတ္တေဟိ ဝိနယံ တဒါ။
ထေရေန ဓမ္မမိတ္တေန-သိတ္ထဂါမကဝါသိနာ၊
ပူဇယိတွာန ကာရေသိ၊ အဘိဓမ္မဿ ဝဏ္ဏနံ။
ဒါဌာနာဂါ’ဘိဓာနေန၊ ထေရေနာ’ရညဝါသိနာ၊
လံကာလံကာရဘူတေန၊ အဘိဓမ္မံ ကထာပယိ။
ပဋ္ဋကဉ္စုကပူဇာဟိ၊ ဟေမမာလိကစေတိယံ၊
နစ္စဂီတေဟိ ဂန္ဓေဟိ၊ ပုပ္ဖေဟိ ဝိဝိဓေဟိ စ။
ဒီပမာလာဟိ ဓူပေဟိ၊ ပူဇယိတွာန’နေကဓာ၊
တဿ ဝတ္ထာနိ ဘာဇေတွာ၊ ဘိက္ခူနံ ဒါပယီ သယံ။
သဒါ သော အတ္တနော ရဇ္ဇေ၊ ဥယျာနေသု တဟိံတဟိံ၊
အာဏာပေတွာန ပုပ္ဖာနိ၊ ပူဇေသိ ရတနတ္တယံ။
ပါသာဒံ စန္ဒနံ နာမ၊ ကာတုံ မရိစဝဋ္ဋိယံ၊
အကာရမ္ဘဉ္စ ဘိက္ခူနံ ဘောဂဂါမေ စ ဒါပယိ။
ကေသဓာတုံ နိဓာပေတွာ၊ ကရဏ္ဍံ ရတနေဟိ သော၊
ကာရယိတွာန ပူဇေသိ၊ ဌပေတွာ တတ္ထ ဘူပတိ။
သောဏ္ဏရဇတပဋ္ဋေဟိ ¶ ၊ ထူပါရာမမှိ စေတိယံ၊
ဆာဒါပေတွာ ယထာရဇ္ဇံ၊ ပူဇံ ကာရေသိ ဘူပတိ။
တသ္မိံ ဓာတုဃရေ ရာဇာ၊ သောဏ္ဏဒွါရမကာရယိ၊
ပဇ္ဇလန္တံ သိနေရုံဝ၊ ရံသီဟိ သူရိယဿ သော။
ဈာပိတံ စောဠရာဇဿ၊ ဗလေန ပဒလဉ္ဆနေ၊
စတုန္နံ စေတိယာနံ သော၊ ရမနီယံ ဃရံ အကာ။
ဈာတံ နဂရမဇ္ဈမှိ၊ ဒါဌာဓာတုဃရံ အကာ၊
ဓမ္မသင်္ဂဏီဂေဟဉ္စ၊ မဟာပါဠိဉ္စ ဘူပတိ။
တမ္ဗူလမဏ္ဍပံ ကတွာ၊ တတ္ထ သုင်္ကံ မဟီပတိ၊
ဘိက္ခူနံ ထေရဝံသေ သော၊ ဘေသဇ္ဇတ္ထာယ ဒါပယိ။
ဥပဿယံ ကရိတွာန၊ မဟာမင်္ဂလနာမကံ၊
ထေရဝံသမှိ ဇာတာနံ၊ ဘိက္ခုနီနံ အဒါပယိ။
မာတုလောဒယရာဇေန၊ အာရဒ္ဓံ သာဓုနာ တဒါ၊
နိဋ္ဌာပေသိ မဟီပါလော၊ ပါသာဒံ မဏိနာမကံ။
ပရိဝေဏာနိ စတ္တာရိ၊ တသ္မိံ ဇေတဝနေ တဒါ၊
ကာရာပယိံသု စတ္တာရော၊ အမစ္စာ တဿ ရာဇိနော။
ရညော ကိတ္တိသမာဒေဝီ၊ ကိတ္တိနာမာ မနောရမာ၊
ပရိဝေဏံ အကာရာမံ၊ ထူပါရာမဿ ပစ္ဆတော။
သာ တသ္မိံ ပရိဝေဏေ စ၊ အကာ ကပ္ပာသဂါမကေ၊
စီဝရစေတိယေ စေဝ၊ တိဿော ပေါက္ခရဏီ သုစိ။
ဒွါဒသရတနာယာမံ၊ ဓဇံ သောဏ္ဏမယဉ္စ သာ၊
ပူဇေသိ ပုညသမ္ဘာရံ၊ ဟေမမာလိက စေတိယေ။
ဂိဟီနံ ဝဇ္ဇသာလဉ္စ၊ ပုတ္တော တဿာ ပုရေအကာ၊
ဂုဏဝါသက္ကသေနာနီ၊ ဘိက္ခူနဉ္စ ပုရာဗဟိ။
ရာဇာ စတုဝိဟာရေသု၊ ဒိဗ္ဗပါသာဒသန္နိဘေ၊
မဏ္ဍပေ ကာရယိတွာန၊ ဓာတုပူဇာ အနေကဓာ။
ဝဿမေကမတိက္ကမ္မ၊ ကာရာပေတွာ မဟီပတိ၊
စာရိတ္တံ ပုဗ္ဗရာဇူနံ၊ ပရိပါလေသိ သာဓုကံ။
ဧဝမာဒီနိ ပုညာနိ၊ ဥဠာရာနိ အနေကဓာ၊
ကတွာ သောဠသမေ ဝဿေ၊ ရာဇာ သော တိဒိဝံ ဂတော။
ဇာတော ¶ ပဋိစ္စ တံ ရာဇံ၊ သေနာ ဒွါဒသဝဿိကော၊
ကာလိင်္ဂဒေဝိယာ ပုတ္တော၊ ပတ္တရဇ္ဇော တဒါ အဟု။
ဥဒယဿ ကနိဋ္ဌဿ၊ ယုဝရာဇပဒံ အဒါ၊
ပိတု သေနာပတိ သေနော၊ တဿ သေနာပတိ အဟု။
ပစ္စန္တံ ဗလမာဒါယ၊ ဂတေ သေနာပတိမှိ သော၊
မာတရာ သဟ ဝတ္တန္တံ၊ ကဏိဋ္ဌံ တဿ ဘာတရံ။
မာရာပေတွာ မဟာမလ္လံ၊ အကာ သေနာပတိံ တဒါ၊
အမစ္စံ ဥဒယံ နာမ၊ သကံ ဝစနကာရကံ။
တံ သုတွာ ကုပိတော ဟုတွာ၊ သေနော သေနာပတိ တဒါ၊
ဗလမာဒါယ အာဂဉ္ဆိ၊ ဂဏှိဿာမီတိ သတ္တဝေါ။
သုတွာန တံ မဟီပါလော၊ ကတဝန္တံ ဝါစမတ္တနော၊
ရက္ခာမိ တံ အမစ္စန္တိ၊ ဂတော နိက္ခမ္မ ရောဟဏံ။
တဿ မာယာ နိဝတ္တိတွာ၊ ယုဝရာဇဉ္စ ရာဇိနိံ၊
အာဒါယ ကုပိတာ တေန အာဏာပေသိ စမူပတိံ။
တာယ သော သင်္ဂဟီတောဝ၊ ဒမိဠေ သန္နိပါတိယ၊
ဒတွာ ဇနပဒံ တေသံ၊ ပုဋတ္ထိနဂရေ ဝသီ။
ယုဇ္ဈိတုံ တေန သော ရာဇာ၊ ဗလံ ပေသေသိ ရောဟဏာ၊
သေနာပတိ ဝိနာသေသိ၊ သဗ္ဗံ တံ ရာဇိနော ဗလံ။
ဒမိဠာ တေ ဇနပဒံ၊ ပီဠေတွာ ရက္ခသာ ဝိယ၊
ဝိလုမ္ပိတွာန ဂဏှန္တိ၊ နရာနံ သန္တကံ တဒါ။
ခိတ္တာ မနုဿာ ဂန္တွာန၊ ရောဟဏံ ရာဇသန္တိကံ၊
နိဝေဒေသုံ ပဝတ္တိံ တံ၊ မန္တေတွာ သစီဝေဟိ သော။
ရက္ခိတုံ သာသနံ ရဋ္ဌံ၊ တမ္ပဟာယ စမူပတိံ၊
သန္ဓိံ ကတွာန သေနေန၊ ပုဠတ္ထိနဂရံ အဂါ။
မဟေသိံ အတ္တဇံ ကတွာ၊ ပါလေတုံ ဝံသမတ္တနော၊
ပုတ္တံ ဥပ္ပာဒယိတွာန၊ ကဿပံ နာမ ဥတ္တမံ။
ဝသန္တေ တတ္ထ လံကိန္ဒေ၊ အဟိတာ ဝလ္လဘာ ဇနာ၊
အလဘန္တာ သုရံ ပါတု-မာရိယာ တဿ သန္တိကေ။
မဇ္ဇပါနေ ဂုဏံ ဝတွာ၊ ပါယေသုံ တံ မဟီပတိံ၊
ပိဝိတွာ မဇ္ဇပါနံ သော၊ မတ္တဗျာဠော အဟု တဒါ။
အာဟာရာနံ ¶ ခယံ ပတွာ၊ စဇိတွာ ဒုလ္လဘံ ပဒံ၊
မတော သော ဒသမေ ဝဿေ၊ တရုဏောယေဝ ဘူပတိ။
ဣတော ဝိဒိတွာ ခလုပါပမိတ္တ-
ဝိဓေယျဘာဝံ ပရိဟာနိ ဟေတုံ၊
သုခတ္တိတောယေဝ ဣဒ ဝါ ဟုရံ ဝါ၊
ဇဟန္တု တေ ဃောရဝိသံ’ဝ ဗာလံ။
သုဇနပ္ပသာဒသံဝေဂတ္ထာယ ကတေ မဟာဝံသေတိ ရာဇကော နာမ
ဒွိပညာသတိမော ပရိစ္ဆေဒေါ။