📜
အဋ္ဌပညာသတိမ ပရိစ္ဆေဒ
လောကသာသန သံဂဟကရဏော
ဝိစိနိတွာ ကုလီနေ သော၊ ဇနေ သဗ္ဗေ သမာဒိယ၊
သကာရက္ခာယ ယောဇေသိ၊ ယထာစာရံ မဟီပတိ။
ဥစ္စံ ပုလတ္ထိနဂရေ၊ ပါကာရံ ကာရယီ ထိရံ၊
နေကဂေါပုရသံယုတ္တံ၊ ယုဓာကမ္မသုရဉ္ဇိတံ။
သမန္တာယတဝိတ္ထိဏ္ဏ-ဂမ္ဘီရပရိခါယုတံ၊
ဥစ္စပတ္ထဏ္ဍိလောပေတံ၊ ဒုပ္ပဓံသမရာတိဟိ။
ဥပသမ္ပဒကမ္မဿ၊ ဂဏပူရကဘိက္ခူနံ၊
အပ္ပဟောနေကဘာဝေန၊ သာသနဌိတိမာနသော။
အနုရုဒ္ဓနရိန္ဒဿ၊ သဟာယဿာထ သန္တိကံ၊
ရာမညဝိသယံ ဒူတေ၊ ပေသေတွာ သဟပါဘတေ။
တတော အာဏာပယိတွာန၊ ပိဋကတ္တယပါရဂေ၊
သော သီလာဒိဂုဏာဝါသေ၊ ဘိက္ခဝေါ ထေရသမ္မတေ။
တေ ဥဠာရာဟိ ပူဇာဟိ၊ ပူဇယိတွာ နရိဿရော၊
ပဗ္ဗဇ္ဇာ ဥပသမ္ပတ္တိ၊ ကာရယိတွာ အနေကသော။
ပိဋကတ္တယဉ္စ ဗဟုသော၊ ကထာပေတွာ သဝဏ္ဏနံ၊
လင်္ကာယော’သက္ကမာနံ သော၊ ဇောတယီ ဇိနသာသနံ။
ပုတတ္ထိနဂရဿန္တော ¶ ၊ ပဒေသသ္မိံ တဟိံ တဟိံ၊
ဝိဟာရေ ကာရယိတွာန၊ ဗဟုကေ သုမနောဟရေ။
ဘိက္ခဝေါ တတ္ထ ဝါသေတွာ၊ နိကာယတ္တယဝါသိနော၊
ပစ္စယေဟိ ဥဠာရေဟိ၊ သန္တပ္ပေသိ စတူဟိပိ။
ဖလိကတ္ထမ္ဘကစာရု-ပါကာရပရိခါယုတံ၊
ပဉ္စဘူမကပါသာဒ-ပဝရေ နော’ပသောဘိတံ။
သမသန္တာ ဝါသပန္တီဟိ၊ သုဘာဟိ သုဝိရာဇိတံ၊
နိရကိဏ္ဏမသမ္ဗာဓ ဝရဘာသုရ ဂေါပုရံ။
ဝိဟာရံ ကာရယိတွာန၊ ဝတ္ထုတ္တယပရာယနော၊
နိကာယတ္တယဝါသိဿ၊ ဘိက္ခုသင်္ဃဿ’ဒါသိသော။
သင်္ဃဿ ပါကဝဋ္ဋတ္ထံ၊ ရဋ္ဌံ ဒတွာ’ဠိသာရကံ၊
သကလံ သန္နိဝါသီဟိ၊ နေတ္တိကေဟိ သဟေဝ သော။
နေကသတာနိဘိက္ခူနံ၊ ဝါသယိတွာန တတ္ထ သော၊
သတတံ သမ္ပဝတ္တေသိ၊ ဥဠာရံ စတုပစ္စယံ။
ဒါဋ္ဌာဓာတုဃရံစာရု၊ ကာရယိတွာ မဟာရဟံ၊
ဒါဌာဓာတုဿ နိစ္စံ သော၊ မဟာမဟမကာရယိ။
ဂဏသင်္ဂဏိကာ’ပေတော၊ ပေါတ္ထကံ ဓမ္မသင်္ဂဏိံ၊
ပရိဝတ္တေသိ သောပါတော၊ သုန္ဒရေ ဓမ္မမန္ဒိရေ။
နစ္စာဒိဂန္ဓမာလာဒိ-နေကပူဇမ္ပဝတ္တိယ၊
သီရေန သဒ္ဓါသမ္ဗန္ဓော၊ သမ္ဗုဒ္ဓမဘိဝန္ဒတိ။
ဇမ္ဗုဒီပါဂတေ စာဂ၊ သူရော သော ဘုဝိရိသူရယော၊
တပ္ပေသိ ဓနဒါနေန၊ ဒါနိယေနေက သော ဝိဘူ။
သဒ္ဓမ္မကထိကာနံ သော၊ ပူဇာ ကတွာန နေကသော၊
ဒေသာပေသိစ သဒ္ဓမ္မံ၊ သဒါဓမ္မဂုဏေ ရတော။
တိက္ခတ္တုံ သော တုလာဘာရ-ဒါနံ ဒိနေသု ဒါပယိ၊
ဥပေါသထံ ဝေါပဝသိ၊ သုဝိသုဒ္ဓမုပေါသထေ။
အဒါ ဒဏ္ဍိဿရံ ဒါန-မနုသံဝစ္ဆရံ ဝိဘူ၊
ပိဋကတ္တယံ လိခါပေတွာ၊ ဘိက္ခုသင်္ဃဿ ဒါပယိ။
မဟဂ္ဃမဏိမုတ္တာဒိ-ရတနာနိ ¶ သပေသိယ၊
ဇမ္ဗုဒီပေ မဟာဗောဓိံ-နေကက္ခတ္တုမ ပူဇယိ။
ကဏ္ဏာဋဘူမိပါလေန၊ စောဠရညာ စ ပေသိတာ၊
ဒူတာမဟန္တမာဒါယ၊ ပဏ္ဏာကာရမိဓာဂတာ။
အဒ္ဒသံသု မဟီပါလံ၊ တတော သော တုဋ္ဌမာနသော၊
တေသံ ဥဘိန္နံ ဒူတာနံ၊ ကတ္တဗ္ဗံ သာဓုကာရိယ။
တေသု အာဒေါ’ဝ ကဏ္ဏာဋ-ဒူတေဟိ သဟ ပေသိယ၊
ဒူတေ သကီယေ ကဏ္ဏာဋ-နိကဋံ သာရပါဘတေ။
အတ္တနော ဝိသယံ ပတ္တေ၊ စောဠော သီဟဠ ဒူတကေ၊
သဟသာ ကဏ္ဏနာသာသု၊ ပါပယိံသု ဝိရူပတံ။
သမ္ပတ္တဝိပ္ပကာရာကေ၊ ဣဓာဂန္တွာန ရာဇိနော၊
ကထယိံသု တဒါ သဗ္ဗံ၊ စောဠေန ကတမတ္တနိ။
ဥဒ္ဒိပိတာဘိမာနော သော၊ သကလာမစ္စမဇ္ဈဂေါ၊
အဝှာယ ဒမိဠေ ဒူတေ၊ ဣတိ စောဠဿ သန္ဒိသိ။
သေနံ ဝိနာ’ဝ ဧကသ္မိံ၊ ဒီပေ မဇ္ဈေ မဟဏ္ဏဝေ၊
ဗာဟာဗလပရိက္ခာဝါ၊ ဟောတုနော ဒွန္ဒယုဒ္ဓတော။
ဗလံ သန္နယှ သကလံ၊ ရဇ္ဇေ တုယှံ မမာ’ထ ဝါ၊
တဝါ’ဘိမတ ဒေါသမှိ၊ သင်္ဂါမော ဝါ ကရီယတံ။
မယာ ဝုတ္တက္ကမေနေဝ၊ ဝတ္တဗ္ဗော ဝေါ ဇနာဓိပေါ၊
ဣတိ ဝတွာန တေ ဒူတေ၊ ဣတ္ထလင်္ကာရ မဏ္ဍိတေ။
ဝိဿဇ္ဇိယ လဟုံစောဠ-မဟီပါလဿ သန္တိကံ၊
တတော သေနင်္ဂမာဒါယ၊ အနုရာဓ ပုရံ ဂမိ။
မတ္တိကာဝါဋတိတ္ထေ စ၊ မဟာတိတ္ထေ စ ပေသယီ၊
စောဠရဋ္ဌံ’ဝ ဂန္တွာန၊ ယုဇ္ဈိတုံ ဒွေ စမူပတိ။
သဇ္ဇန္တေသု စမူပေသု၊ နာဝါပါထေယျကာနိ စ၊
ယုဒ္ဓတ္ထာယ ဗလံ စောဠ-ရဋ္ဌပေသနကာရဏာ။
တဒါ တိံသတိမေ ဝဿေ၊ ဝေဠက္ကာရသနာမကာ၊
ဗလကာယာ တဟိံဂန္တု-မနိစ္ဆန္တာ ဝိရောဓိနော။
မာရေတွာန ဥဘော သေနာ-နာထေ မတ္တဂဇာဝိယ၊
သမန္တတော ဝိလုမ္ပိံသု၊ ပုလတ္ထိပုရမုဒ္ဓတာ။
ပုတ္တေဟိ ¶ တီဟိ သဟိတံ၊ ရာဇိနော စ ကဏီယသိံ၊
ဂဏိတွာ သဟသာ ရာဇ-ပါသာဒံ စာပိ ဈာပယုံ။
ရာဇာ နိက္ခမ္မ ခိပ္ပံ သော၊ ဂန္တွာ ဒက္ခိဏပဿကံ၊
သေလေ ဝါတဂိရိဝှသ္မိံ၊ သာရံ ဘဏ္ဍံ ဌပါပိယ။
ဝီရဗာဟုပရာဇေန၊ သီဟဝိက္ကမသာလိနာ၊
မဟတာ စ ဗလောဃေန၊ သမန္တာ ပရိဝါရိတော။
ပုလတ္ထိပုရမာဂမ္မ၊ ဝတ္တေန္တော ဒါရုဏံ ရဏံ၊
ပလာပေသိ ခဏေနေဝ၊ ဗလကာယေ သမာဂတေ။
မာရိတာန စမူပါန-မဋ္ဌိသင်္ဃာဋဓိဋ္ဌိတံ၊
ပရိက္ခိပိတွာ စိတကံ၊ ဝေရိဘူတေ ဗလာဓိပေ။
ဗန္ဓယိတွာန ခါဏုမှိ၊ ပစ္ဆာ ဗာဟံ သုဗန္ဓနံ၊
ပရိတော ဝိပ္ဖုရန္တီဟိ၊ အဂ္ဂိဇာလာဟိ ဈာပယိ။
ဃာတေတွာ တတ္ထ မာနီတံ၊ ဂါမာနိ ဓရဏီပတိ၊
အကာသိ လင်္ကာဝသုဓံ၊ သဗ္ဗထာ ဝီတကဏ္ဋကံ။
ယုဇ္ဈိတုံ သဟ စောဠေန၊ ရာဇာ အတ္တကတာဝဓိံ၊
အနတိက္ကမ္မ သော ပဉ္စ-စတ္တာလီသမှိ ဝစ္ဆရေ။
သန္နဒ္ဓံ ဗလမာဒါယ၊ ဂန္တွာ သာဂရပဋ္ဋနံ၊
တဿာဘိဂမနံ ပဿံ၊ ကဉ္စိကာလံ တဟိံ ဝသံ။
အနာဂတတ္တာ စောဠဿ၊ တဿ ဒူတေ ဝိဿဇ္ဇိယ၊
ပုနာဂန္တွာ ဝသီရာဇာ၊ ပုလတ္ထိနဂရေ စိရံ။
မဟာဟေဠိ သရေဟရု၊ မဟာဒတ္တိကနာမိကာ၊
ကဋုန္နရူပဏ္ဍဝါပီ၊ ကလ္လဂလ္လိက နာမိကာ။
ဧရဏ္ဍေဂလ္လဝါပီ စ၊ ဒီဃဝတ္ထုကဝါပိကာ၊
မဏ္ဍဝါဋကဝါပီ၊ စ၊ ကိတ္တဂ္ဂဗောဓိပဗ္ဗတာ။
ဝလာဟဿ မဟာဒါရု၊ ဂလ္လကုမ္ဘီလသောဗ္ဘကာ၊
ပတ္တပါသာဏဝါပီ စ၊ ဝါပီ စ ကာဏနာမိကာ။
ဧတာ စညာ စ သော ဆိန္န-မရိယာဒါ ဝါပိယော ဗဟူ၊
ဗန္ဓာပေသိ သဒါဒီန-သတ္တေ ဗဒ္ဓ ဟိတာသယော။
ဘူမိန္ဒော ¶ ကန္ဒရာ-ဂင်္ဂါ-နဒီသု စ တဟိံ တဟိံ၊
သုဘိက္ခံ ကာရယီ ရဋ္ဌံ၊ ဗန္ဓေတွာ’ဝရဏာနိ သော။
ဝိဟာရာ’ဘယစာရိတ္တ-ဘေဒိနိံ မဟိသံသက၊
ပရိဟာရေ သဗ္ဗသောစ္ဆိဇ္ဇ-ဂါဟယိတွာ ဂလမှိ တံ။
ပုရမ္ဘာ ဗဟိ ကာရေတွာ၊ မဟာသင်္ဃံ ခမာပိယ၊
ပကာသေသိ စ လောကဿ၊ သင်္ဃဂါရဝမတ္တနော။
မဟာဂါမေ နိကာယာနံ၊ တိတယေ စောဠနာသိတေ၊
ဓာတုဂဗ္ဘေ စ ဗန္ဓေသိ၊ ထူပါရာမဒွယေ’ပိ စ။
မာတုယာ’ဠာဟဏဌာနေ၊ တထေဝ ပိတုနောပိ စ၊
အကာ ပဉ္စ မဟာဝါသေ၊ တထာ ဗုဒလဝိဋ္ဌိယံ။
ပဏ္ဍဝါပီ စ ပါဌီနော၊ ရက္ခစေတိယပဗ္ဗတော၊
တထေဝ မဏ္ဍလဂိရိ-မဓုတ္ထလဝိဟာရကော။
ဥရုဝေလဝှယော ဒေဝ-နဂရေ စ ဝိဟာရကော၊
မဟိယင်္ဂဏဝိဟာရော စ၊ သီတလဂ္ဂါမလေဏကံ။
ဇမ္ဗုကောလဝိဟာရော စ၊ တထေဝ ဂိရိကဏ္ဍကော၊
ကုရုန္ဒိယဝိဟာရော စ၊ ဇမ္ဗုကောလကလေဏကံ။
ဘလ္လာတကဝိဟာရော စ၊ တထေဝ ပရဂါမကော၊
ကာသဂလ္လဝှယော စန္ဒ-ဂိရိဝှယ ဝိဟာရကော။
ဝေလဂါမဝိဟာရော စ၊ မဟာသေနဝှဂါမကော၊
ဝိဟာရော စာ’နုရာဓမှိ၊ ပုရေ ဗောဓိဃရံ တထာ။
ဣစ္စေဝမာဒယောနေကေ၊ ဝိဟာရေ စ ဗဟူ ဝိဘူ၊
ပဋိသင်္ခရိဇိဏ္ဏေ သော၊ ဂါမေ စာ’ဒါ ဝိသုံ ဝိသုံ။
သမန္တကူဋ သေလတ္ထံ၊ မုနိန္ဒပဒလဉ္ဇနံ၊
ပဏမတ္ထာယ ဂစ္ဆန္တာ၊ မနုဿာ ဒုဂ္ဂမဉ္ဇသေ။
သဗ္ဗေ မာ ကိလမန္တူ’တိ၊ ဒါနဝဋ္ဋာယ ဒါပယိ၊
သာလိက္ခေတ္တာဒိသမ္ပန္နံ၊ ဂိလီမလယနာမကံ။
ကဒလီဂါမမဂ္ဂေ စ၊ ဟူဝရဠဉ္ဇသေ တထာ၊
ဂါမေ ဒတွာန ပစ္စေကံ၊ သာလာယော စာပိ ကာရယိ။
အနာဂတေ တံ ဘူပါလာ၊ မာ ဂဏှန္တူ’တိ လေခိယ၊
အက္ခရာနိ သိလာထမ္ဘေ၊ ပတိဋ္ဌာပေသိ ဘူမိပေါ။
ဂါမံ ¶ အန္တရဝိဋ္ဌိဉ္စ၊ တထာ သင်္ဃာဋဂါမကံ၊
သိရိမဏ္ဍဂလာရာမဉ္စ၊ အဒါသော လာဘဝါသိနံ။
ဝနဇီဝကဘိက္ခူန-မဒါ သော စတုပစ္စယေ၊
ဗန္ဓူနမ္ပိ စ သော တေသံ၊ ဘောဂဂါမေ ပဒါပယိ။
ပါဝါရဂ္ဂိကပလ္လာနိ၊ ဝိဝိဓေ ဩသဓေပိ စ၊
သီတေ ဥတုမှိ ဗဟုသော၊ ဘိက္ခုသင်္ဃဿ ဒါပယိ။
အဒါ သဗ္ဗပရိက္ခာရေ၊ ပရိက္ခာရေ တထာတ္ထ သော၊
နေကဝါရေသု သက္ကစ္စံ၊ ဘိက္ခုသင်္ဃဿ ဗုဒ္ဓိမာ။
သင်္ဃဿ ပါကဝဋ္ဋတ္ထံ၊ ဘိက္ခူနံ လာဘဝါသိနံ၊
ဝေယျာဝစ္စကရာနဉ္စ၊ ပူဇေတုံ စေတိယာဒိကံ။
ပဒိန္နာ ပုဗ္ဗရာဇူဟိ၊ ယေ ဂါမာ ရောဟဏေ ဗဟူ၊
တေပိ သဗ္ဗေ အနူနေ သော၊ ယထာပုဗ္ဗံ ဌပေသိ စ။
အဒါသိ ပိဌသပ္ပီန-မုသဘေ ဗလိနော ဗဟိ၊
ဘတ္တံ စာ’ဒါသိ သော ကာက သောဏာဒီနံ ဒယာပရော။
အဒါသိနေကတာ ဝေယျ-ကာရကာနံ မဟာကဝီ၊
သဒ္ဓိံ ပဝေဏိဂါမေဟိ၊ ဝိတ္တဇာတမနပ္ပကံ။
ရာဇာမစ္စာဒိပုတ္တာနံ၊ သိလောကေ ရစိတေ သုဏံ၊
ယထာနုရူပံ ပါဒါသိ၊ ဓနံ တေသံ ကဝိဿရော။
အန္ဓာနံ ပင်္ဂုလာနဉ္စ၊ ဂါမေ စာ’ဒါ ဝိသုံ ဝိသုံ၊
နာနာဒေဝကုလာနဉ္စ၊ ဒိန္နံ ပုဗ္ဗံ န ဟာပယိ။
ပတ္တိ ဝေါ သော ကုလိတ္ထီန-မနာထာနံ ယထာရဟံ၊
ဝိဓဝါနမဒါဂါမေ၊ ဘတ္တအစ္ဆာဒနာနိ စ။
ရာဇာ သီဟဠကာ ဝေယျ-ကရဏေ သော မဟာပတိ၊
အဂ္ဂေါ သီဟဠကာဝေယျ-ကာရကာနမဟောသိ စ။
သုဘေ ဗဒ္ဓါဒရော ဗဒ္ဓ ဂုဏဝှယ ဝိဟာရကေ၊
ဗန္ဓေသိ ဥပရာဇာ သော၊ စေတိယံ စောဠနာသိတံ။
မုတ္တစာဂီ တတော တဿ၊ ဝိဟာရပဝရဿ သော၊
ဒတွာ ဂါမဝရေ နိစ္စံ၊ ပူဇာယော သမ္ပဝတ္တယိ။
သောဝ တဿ ဝိဟာရဿ၊ ဥပစာရဝနန္တိကေ၊
ဗန္ဓာပေသိ မဟာဝါပိံ၊ ထီရီဘူတမဟောဒကံ။
ကပ္ပူရမူလာယတနေ ¶ ၊ ရညော ဓီတာ ယသောဓရာ၊
အကာရေသိ ထိရံ ရမ္မံ၊ မဟန္တံ ပဋိမာဃရံ။
သေလန္တရသမူဟသ္မိံ၊ ရာဇိနော ရာဇိနော သကာ၊
ကာရေသိ စာရုပါသာဒံ၊ ပသာဒါဝဟမုဂ္ဂတံ။
တဒါ နေကေ စ သစိဝါ၊ တဿော ရောဓဇနာပိ စ၊
သမာစိနိံသု ပုညာနိ၊ အနေကာနိ အနေကသော။
ဧဝံ သမနုသာသန္တေ၊ လံကံ လံကာ နရိဿရေ၊
ဥပရာဇာ ဝသံနီတော၊ ဝိနီတော ဃေရမစ္စုနာ။
တဿ ကတ္တဗ္ဗကိစ္စာနိ၊ သကလာနိ သမာပိယ၊
ဇယဗာဟုဿောပရဇ္ဇံ၊ ဘိက္ခူနံ မတိယာ အဒါ။
အထာဒိပါဒပဒဝိံ၊ ဒတွာ ဝိက္ကမဗာဟုနော၊
ဂဇဗာဟူ’တိ ဝိဒိတေ၊ တဿ ဇာတေ သုတေ တတော။
မဟာမစ္စေဟိ မန္တေတွာ၊ ရာဇာပုတ္တဟိတတ္ထိကော၊
ရောဟဏံ ကသိဏံ ဒတွာ၊ တဟိံ ဝါသာယ ပေသယိ။
တတော သော တတ္ထ ဂန္တွာန၊ မဟာနာဂဟုလံ ပုရံ၊
ရာဇဓာနိံ ကရိတွာန၊ တတ္ထ ဝါသမကပ္ပယီ။
ဧဝံ ပညာသဝဿာနိ’ဟ ဝိဇယဘုဇော ဝတ္တယိတွာန သမ္မာ၊
အာဏာစက္ကံ ဇနိန္ဒော ပျပဂတခလနံ ဧသ ပဉ္စာဓိကာနိ၊
ဝဍ္ဎေတွာ သာသနံ တံ ခလဒမိဠဘယော ပဒ္ဒုတဉ္စာပိလောကံ၊
သဂ္ဂံ လောကံ သပုညပ္ပဘဝမုရုဖလံ ပဿိတုံ စာ’ရု ရောဟ။
သုဇနပ္ပသာဒ သံဝေဂတ္ထာယ ကတေ မဟာဝံသေ
လောကသာသနသံဂဟကရဏော နာမ
အဋ္ဌပညာသတိမော ပရိစ္ဆေဒေါ