📜
ဧကူနသဋ္ဌိမ ပရိစ္ဆေဒ
စတုရာဇစရိယ နိဒ္ဒေသော
တဒါရညော ¶ နုဇာမိတ္တာ၊ တဿ ပုတ္တာ တယော’ပိ စ၊
မဟာမစ္စာ စယတယော၊ တထာ ယတနဝါသိနော။
တဗ္ဗေတေ အာဒိပါဒဿ၊ ရောဟဏေ ဝသတော သတော၊
အနာရောစာပယိတွာန၊ ဘူပါလမတသာသနံ။
သမ္ဘူယမန္တယိတွာန၊ သမာနစ္ဆန္ဒတံ ဂတာ၊
အဒံသု ယုဝရာဇဿ၊ လင်္ကာရဇ္ဇာဘိသေစနံ။
ဩပရဇ္ဇေ နိဝေသေသုံ၊ မာနဘရဏနာမကံ၊
ကုမာရံ ပုဗ္ဗစာရိတ္တ-မဂ္ဂံ လင်္ဃိတ္ထ တေ’ခိလာ။
တယော’ထ ဘာတရော သဗ္ဗေ၊ တေ မာဏဘရဏာဒယော၊
ဇယဗာဟုမဟီပါလ-သဟိတာ သဟသာ တဒါ။
မုတ္တာမဏိပ္ပဘူတိကံ၊ ရတနံ သာရသမ္မတံ၊
သဗ္ဗံ ဟတ္ထဂတံ ကတွာ၊ ဝါဟနဉ္စ ဂဇာဒိကံ။
သကလံ ဗလမာဒါယ၊ ပုလတ္ထိနဂရာ တဒါ၊
ခိပ္ပံ တံ ဝိက္ကမဘုဇံ၊ ဂဏှိသာမာ’တိ နိက္ခမုံ။
သုတွာ ပဝတ္တိံ သကလံ၊ ဣမံ ဝိက္ကမဗာဟုသော၊
တာ တဿန္တိမသက္ကာရံ၊ ဝိဓာတုံ ဟန္ဒနော လဘိံ။
ဣဒါနိ ခိပ္ပံ ဂန္တွာန၊ ပုလတ္ထိနဂရံ တဟိံ၊
တာ တဿာဠာဟနဋ္ဌာန ဒဿနေ နေဝ သော အဟံ။
သောကဘာရံ ဝိနောဒေဿံ၊ မမ စေတော ဂတံ ဣတိ၊
ကတဒဠှ ဝဝတ္ထာနော၊ ဝိနိဂ္ဂမ္မ တတော ပုရာ။
ပုလတ္ထိပုရမာဂစ္ဆံ၊ အာဒိပါဒေါ’တိ သာသသော၊
သတ္တဋ္ဌသတသင်္ခေန၊ ဗလေန ပရိဝါရိတော။
အန္တရာလပထေယေဝ၊ ဂုတ္တဟာလကမဏ္ဍလေ၊
ဂါမေ ပန သမုက္ကဝှေ၊ ဒိသွာ သေနင်္ဂမာဂတံ။
မဟန္တံ ¶ ယုဒ္ဓသန္နဒ္ဓံ၊ ဧကဝီရော ဘယာတိကော၊
ယုဇ္ဈိတွာ တေ ပလာပေသိ၊ ခဏေနေဝ ဒိသောဒိသံ။
တယော တေ ဘာတရော တတ္ထ၊ သမ္ပတ္တာဝ ဇယာ တတော၊
အဘိမာနုဒ္ဓတာ ခိပ္ပံ၊ အန္နယှ ဗလဝါဟနံ။
အာဒိပါဒကဇမ္ဗူတိ၊ ဝိဿုတမှိ ပဒေသကေ၊
သင်္ဂါမေသုံ ပရာဇေသိ၊ ဘိယျော ယုဇ္ဈိတ္ထ သော တယော။
တတိယံ ကဋဂါမသ္မိံ၊ ကာဠဝါပျံ စတုတ္ထကံ၊
ပဉ္စမံ ဥဒ္ဓဋဒွါရေ၊ ဆဋ္ဌံသော ပင်္ကဝေလကေ။
တေဟိ ယုဒ္ဓံ ကရိတွာန၊ ဂဟီတဝိဇယော သဒါ၊
ပုလတ္ထိပုရမာဂဉ္စိ၊ သဟာမစ္စ ပရိဇ္ဇနော။
သစိန္တိတက္ကမေနေဝ၊ ပဿိတွာဠာဟနံ ပိတု၊
ဝိဒူရိတမဟာသေကော၊ လဒ္ဓဿာသော ပုရေဝသံ။
ဒုက္ခေ သဟာယ ဘူတာန-မတ္တနော သော ယထာရဟံ၊
အမစ္စာနမဒါ သဗ္ဗ-ဘောဂေ ဌာနန္တရေ ဟိ သော။
ဘဋာနဉ္စာပိ သဗ္ဗေသံ၊ သဟာယာတာနမတ္တနော၊
အနုရူပမဒါ ဝုတ္တိံ၊ သရံ ဒုက္ခသဟာယတံ။
မာဏာဘရဏဘူပေါပိ၊ သဒ္ဓိံ သေသေဟိ ဘာတူဟိ၊
ကရိတွာ ရောဟဏံ ပဿံ၊ ရောဟဏဉ္စ သဟတ္ထဂံ။
တတော ကိတ္တိသိရီမေဃေ၊ သဒွါဒသသဟဿကံ၊
ရဋ္ဌံ ဒတွာန ဝသိတုံ၊ တဟိံယေဝ သမာဒိသိ။
အာဏတ္တော ဘာတရာကိတ္တိ-သိရီမေဃော ဇနာဓိပေါ၊
ဂန္တွာ ဝသိ ပုရေတတ္ထ၊ မဟာနာဂဟုလဝှယေ။
သိရီဝလ္လဘနာမဿ၊ ကုမာရဿာပိ စာဒိသိ၊
ဒေသမဋ္ဌသဟဿဝှံ၊ ဒတွာန ဝသိတုံ တဟိံ။
တထေဝ သောပိ ဂန္တွာန၊ ဥဒ္ဓနဒွါရနာမကံ၊
ဂါမံ ကတွာ ရာဇဒါနိံ၊ ဝသန္တော အနုသာသိတံ။
သယဉ္စ သဟသေနာယ၊ ဂန္တွာ ဒက္ခိဏပဿကံ၊
ဝီရဗာဟူတိ ပညာတော၊ ပုင်္ခဂါမံ သမာဝသိ။
မာတာ စ တိဏ္ဏံ ဘာတူနံ၊ ဇယဗာဟု စ ဘူမိပေါ၊
နိဝသိံသု တဒါ ကိတ္တိ-သိရိမေဃဿ သန္တိကေ။
တတော ¶ သံဝစ္ဆရေ’တီတေ၊ တေ မာဏဘရဏာဒယော၊
တေနတ္တနိ ကတံ ယုဒ္ဓေ၊ သဗ္ဗံ ဝိက္ကမဗာဟုနာ။
ဒုရာရောဟံ မဟန္တံ တံ၊ ပရာဇယတရာဘဝံ၊
အနုဿရန္တဗဟုသော၊ အဘိမာနသမုန္နတာ။
မုဒ္ဓါဘိသိတ္တရာဇူန-မေကာကီရာဇရဋ္ဌကံ၊
ဝိနာယမဘိသေကေန၊ ကထံ နာမာနုဘောဿတိ။
ဣတိ ဣဿာ ပရတ္တဉ္စ၊ ယာတာ သင်္ဂယှသာဝကေ၊
ဘိယျော သမ္ဘူယသင်္ဂါမ-ကရဏတ္ထာယ နိက္ခမုံ။
သုတွာ တမတ္ထံ ဒူတေဟိ၊ သော ဝိက္ကမဘုဇောပိ စ၊
အဂါ တေသံဝ ဝိသယံ၊ မဟာသေနာပုရက္ခတော။
ဒေသေ ဒက္ခိဏကေ ဗောဓိ-သေနပဗ္ဗတဂါမကေ၊
ယုဇ္ဈိတွာ တေ ပရာဇေသိ၊ တယော ဝိက္ကမဗာဟုသော။
ရိပဝေါ ဒါနိ မေ သဗ္ဗေ၊ ဥမ္မူလေဿာမဟံ ဣတိ၊
ပလာယန္တေ နုဗန္ဓိတ္ထ၊ ပဒါနုပဒိကံ’ဝ တေ။
တေ စ ဒုဂ္ဂံ ပလာယိံသု၊ ပဉ္စယောဇနရဋ္ဌကေ၊
ခိပ္ပံ ပါဝေက္ခိ ကလျာဏိံ၊ သော’ပိ တေ ဂဟဏတ္ထိကော။
ဝီရော အရိယဒေသိယော၊ ဝီရဒေဝေါတိ ပါကဋော၊
ပဠန္ဒီပိဿရော ဧကော၊ ဘူသံ သဟသိကော တဒါ။
သဒ္ဓိံ သူရေဟိ ယောဓေဟိ၊ မဟာတိတ္ထမှိ ဩတရိ၊
ကာတုံ ဟတ္ထဂဟံ သက္ကာ၊ လံကာဒီပန္တိ စိန္တိယ။
သော ဝိက္ကမဘုဇော သုတွာ၊ ပဝတ္တိံ ဘူဘုဇော တဒါ၊
ယာဝတာ နာတြ လံကာယံ၊ လဒ္ဓါဂါဟော ဘဝိဿတိ။
တာဝ ဥမ္မူလနီယောတိ၊ ကလျာဏိမှာ ဝိနိဂ္ဂတော၊
မဟာတိတ္ထမှိ မန္နာရ-နာမကံ ဂါမကံ ဂတော။
ကတွာန ဝီရဒေဝေါ’ပိ၊ သင်္ဂါမံ တေန ရာဇိနာ၊
အနီကင်္ဂါဒယော ရာဇ-ပုတ္တေ ဒွေ ဘာတရောပိ စ။
သေနာဓိနာယကဉ္စေဝ၊ ကိတ္တိနာမပ္ပကာသိတံ၊
ဃာတေတွာ သဟသာ ဝီရ-သမ္မတေ စ ဗဟူဇနေ။
ဂါဟေတွာ ဇီဝဂ္ဂါဟံသော၊ ရက္ခကဉ္စ စမူပတိံ၊
သဗလံ တံ ပရာဇေတွာ၊ အနုဗန္ဓိ ပဒါပဒံ။
ပလာယမာနော ¶ သော ဘီတော၊ အာဂန္တွာန နိဇံ ပုရံ၊
ဟတ္ထသာရံ သမာဒါယ၊ ကောဋ္ဌသာရံ ဂတော လဟုံ။
ပစ္ဆတော ပစ္ဆတော ဝီရ-ဒေဝေါ တမနုဗန္ဓိယ၊
အာဂန္တွာန ပုရေဝါသံ၊ ကတိပါဟံ ဝိဓာယသော။
ဂဏှိတုံ ဝိက္ကမဘုဇံ၊ တတ္ထေဝ တုရိတံ အဂါ၊
ပေသယိတွာ သကံ သောပိ၊ မဟန္တံ သကလံ ဗလံ။
ယုဇ္ဈာပေတွာန ဃာတေတွာ၊ ဂါမေ အန္တရဝိဋ္ဌိကေ၊
မဟာကဒ္ဒမဒုဂ္ဂမှိ၊ ဝီရဒေဝံ မဟဗ္ဗလော။
အဘိသေကံ ဝိနာယေဝ၊ ပုလတ္ထိ နဂရေ ဝသံ၊
အကာသိ ရာဇရဋ္ဌဿ၊ ပသာသနဝိဓိံ ဝိဘူ။
အပနီယရဏေ ဆန္ဒံ၊ ဘာတရောပိ တယော တတော၊
အာဝသိံသု ယထာပုဗ္ဗံ၊ ဂန္တွာ ရဋ္ဌံ သကံ သကံ။
စတုရောပိ မဟီပါလာ၊ ယတမာနာ စိရံ တဟိံ၊
ဧကစ္ဆတ္တင်္ကိတံ ကာတုံ၊ နေဝ သက္ခိံသု သဗ္ဗသော။
အနိသမ္မကာရိဘာဝေန၊ ကုလီနေ ပရိဟာပယုံ၊
ဌပေသုဉ္စ မဟန္တတ္တေ၊ ဟီနေ သာဘိမတေ ဇနေ။
ဝဍ္ဎိတံနေကဓာ သမ္မာ၊ ရညာ ဝိဇယဗာဟုနာ၊
သာသနဉ္စ တထာလောကံ၊ ဟာပယိံသု သုဗုဒ္ဓိနော။
ကုလီနာနံ မနုဿာန-မဘာဝေပိ စ တာဒိသေ၊
ဒေါသေ ဝိတ္တံ တဒါယတ္တံ၊ ပသယှာဝဟရိံသု စ။
ပီဠေတုံ သကလံ လောက-မုဒ္ဓရန္တာဓိကံ ဗလိံ၊
ဥစ္ဆူဝ ဥစ္ဆုယန္တေတေ၊ ခီဏကော သာဓနေသိနော။
ဥဒ္ဓရိတွာန ဗုဒ္ဓါဒိ-သန္တကေ ဘောဂဂါမကေ၊
သော ဝိက္ကမဘုဇော ရာဇာ၊ သေဝကေသု သမပ္ပယီ။
ပုလတ္ထိနဂရေ နေက-ဝိဟာရေ ဓာတုမဏ္ဍိတေ၊
သောဝ ဒေသန္တရီယာနံ၊ ဘဋာနံ ဝသိတုံ အဒါ။
သဒ္ဓေဟိ ပတ္တဓာတုဿ၊ ဒါဌာဓာတုဝရဿ စ၊
ပူဇနတ္ထာယ ဒိန္နာနိ၊ မဏိမုတ္တာဒိကာနိ စ။
စန္ဒနာဂရုကပ္ပုရံ၊ သုဝဏ္ဏာဒိမယာ ဗဟူ၊
ပဋိမာယော စ အစ္ဆိဇ္ဇ၊ ယထာကာမံ ဝယံ နယီ။
သာသနဿ ¶ စ လောကဿ၊ ကြိယမာနမုပဒ္ဒဝံ၊
ပဿန္တာ ဗဟုသော တသ္မိံ၊ တဒါ နိဗ္ဗန္နမာနသာ။
အဋ္ဌမူလဝိဟာရေသု၊ ယတယော ဂရုသမ္မတာ၊
ပံသုကူလိကဘိက္ခူ စ၊ ကောဋ္ဌာသဒွယနိဿိတာ။
ဧဝံ တိတ္ထိယတုလျာနံ၊ သာသနောပဒ္ဒဝံ ဗဟုံ၊
ကရောန္တာနံ သကာ သမ္ဘာ-ပယာတံ ပဝရံ ဣတိ။
ဒါဌာဓာတုဝရံ ပတ္တ-ဓာတုမာဒါယ ရောဟဏံ၊
ဂန္တွာ ဝါသမကပ္ပေသုံ၊ ဖာသုဌာနေ တဟိံ တဟိံ။
တထေဝ ဖာသုဌာနေသု၊ ဝိပ္ပကိဏ္ဏာ တဟိံ တဟိံ၊
တေ ကုလီနာ နိလီနာ’ဝ၊ ဟုတွာ ဝါသမကပ္ပယုံ။
ပက္ခဒွယမဟီပါလ-ဂယှာသီမာ သုဌာပိတာ၊
သာမန္တာ အညမညေဟိ၊ ကရောန္တော ဗဟုသော ရဏံ။
သုသမိဒ္ဓေသု နေကေသု၊ ဂါမေသု နိဂမေသု စ၊
အဂ္ဂိံ ဒေန္တာ တဠာကေ စ၊ ဆိန္ဒန္တာ ဇလပူရိတေ။
နာသေန္တာ သဗ္ဗထာ သဗ္ဗ-မာတိကာဝရဏာနိ စ၊
ဆိန္ဒန္တာ နာဠိကေရာဒိ၊ သော ပကာရေ စ ဘူရုဟေ။
ယထာ ပေါရာဏကဂ္ဂါမ-ဌာနန္တိပိ န ဉာယတေ၊
ဝိနာသေသုံ တထာ ရဋ္ဌံ၊ အညမညဝိရောဓိနော။
တေ စ ဘူမိ ပတီဂါမ-ဝိလောပံ ပတ္ထမောသနံ၊
ကာရေန္တာ နိဇစာရေဟိ၊ အာစရုံ လောကုပဒ္ဒဝံ။
ကုလီနာနံ မနုဿာနံ၊ ဒါသကမ္မကရာပိ စ၊
သသာမိနော’တိ ဝတ္တန္တာ၊ နိဿင်္ကာ ဝီတဘီတိကာ။
ဟုတွာ ယုဓီယာ ရာဇူနံ၊ အဗ္ဘန္တရပဝတ္တိနော၊
ဗလဝန္တတရာ ဇာတာ၊ လဒ္ဓဌာနန္တရာ တဒါ။
ဇနာ သမန္တကူဋာဒိ-နေကဒုဂ္ဂနိဝါသိနော၊
အဒေန္တာ ဘူမိပါလာနံ၊ ပုဗ္ဗပဋ္ဌပိတံ ကရံ။
ရာဇာဏမဂဏေန္တာ တေ၊ ဂတာ ဒါမရိကတ္တနံ၊
သကံ သကံ’ဝ ဝိသယ-မာဝသိံသု သမုဒ္ဓတာ။
အနတ္ထေ နိစိတာ နာမ၊ ပရိဝတ္တန္တိ သဗ္ဗတာ၊
ဣတိ ဝတ္တဗ္ဗ တံယေဝ၊ ယာတံ လင်္ကာတလံ တဒါ။
ဧဝံ ¶ ဂါမကဘောဇကာ ဝိယ ဘုသံတေဇော ဝိဟီနာ သဒါ၊
အစ္စန္တံ ဗျသနာတိ သတ္တဟဒယာ ရာဇာဘိမာနုဇ္ဈိတာ။
နိစ္စံ အတ္တပရတ္ထသိဒ္ဓိဝိဓုရာသင်္ဂါ ဝိဟီနာသယာ၊
သဗ္ဗေ တေ ဝိဟရိံသု ဘူမိပတယော စာရိတ္တမဂ္ဂါတိဂါ။
သုဇနပ္ပသာဒသံဝေဂတ္ထာယ ကတေ မဟာဝံသေ
စတုရာဇစရိယနိဒ္ဒေသော နာမ
ဧကူနသဋ္ဌိမော ပရိစ္ဆေဒေါ။