📜
သတ္တမ ပရိစ္ဆေဒ
ဝိဇယာဘိသေကော
သဗ္ဗလောကဟီတံ ¶ ကတွာ၊ ပတွာ သန္တိကရံ ပဒံ၊
ပရိနိဗ္ဗာနမဉ္စမှိ၊ နိပန္နော လောကနာယကော။
ဒေဝတာသန္နိပါတမှိ၊ မဟန္တမှိ မဟာမုနိ၊
သက္က တတြသမီပဋ္ဌံ၊ အဝေါစ ဝဒတံ ဝရော။
ဝိဇယော လာဠာဝိသယာ၊ သီဟဗာဟုနရိန္ဒဇော၊
ဧသလင်္ကာဓနုပတ္တော၊ သတ္တဘစ္စသတာနုဂေါ။
ပတိဋ္ဌဟိဿတိ ဒေဝိန္ဒံ၊ လံကာယံ မမ သာသနံ၊
တသ္မာ သပရိဝါရံ တံ၊ ရက္ခလံကဉ္စ သာဓုကံ။
တထာဂတဿ ဒေဝိန္ဒော၊ ဝစော သုတွာဝ သာဒရော၊
ဒေဝဿုပ္ပလဝဏ္ဏဿ၊ လံကာရက္ခံ သမပ္ပယိ။
သက္ကေန ဝုတ္တမတ္တောသော၊ လင်္ကာမာဂမ္မသဇ္ဇုကံ၊
ပရိဗ္ဗာဇက ဝေသေန၊ ရုက္ခမူလ မူပဝိသိံ။
ဝိဇယသမ္မုခါ သဗ္ဗေ၊
တံ ဥပစ္စ အပုစ္ဆိသုံ၊
အယံ ဘော ကောနု ဒီပေါတီ၊
လံကာဒီပေါတိ သော ဗြဝိ။
န သန္တိ မနုဇာ ဟေတ္ထ၊ န စ ဟေဿတိ ဝေါ ဘယံ၊
ဣတိ ဝတွာ ကုဏ္ဍီကာယ၊ တေ ဇလေန နိသိဉ္စိယ။
သုတ္တဉ္စ တေသံ ဟတ္ထေသု၊ လဂေတွာနဘသာ’ဂမာ၊
ဒဿေသိ သောဏိရူပေန၊ ပရိဝါရိကယက္ခိနီ။
ဧကော တံ ဝါရိယန္တောပိ၊ ရာဇပုတ္တေန အနွဂါ၊
ဂါမမှိ ဝိဇ္ဇမာနမှိ၊ ဘဝန္တိ သုနခါ ဣတိ။
တဿာ စ သာမီနီ တတ္ထ၊ ကုဝေဏီနာမ ယက္ခိနီ၊
နိသီဒိ ရုက္ခမူလမှိ၊ ကန္တန္တိ တာပသီ ဝိယ။
ဒိသွာန ¶ သော ပေါက္ခရဏီ၊ နိသိန္နံ တဉ္စ တာပသိံ၊
တတ္ထ နှာတွာ ပိဝိတွာ စ၊ အာဒါယ စ မုလာလိယော။
ဝါရိဉ္စ ပေါက္ခရေဟေဝ၊ ဝုဋ္ဌာသိ သာတမဗြဝိ၊
ဘက္ခော’သိ မမ တိဋ္ဌာတိ၊ အဋ္ဌာ ဗဒ္ဓါ ဝသော နရော။
ပရိတ္တသုတ္တ တေဇေန၊ ဘက္ခိတုံ သာ န သက္ကုဏီ၊
ယာစိယန္တောပိ တံ သုတ္တံ၊ နာ’ဒါယက္ခိနိယာ နရော။
တံ ဂဟေတွာ သုရုင်္ဂါယံ၊ ရုဒန္တံ ယက္ခိနီ ခိပိ၊
ဧဝံ ဧကေကသော တတ္ထ၊ ခိပီ သတ္တသတာနိပိ။
အနာယန္တေသု သဗ္ဗေသု၊ ဝိဇယော ဘယသံကိတော၊
နန္တပဉ္စာယုဓော ဂန္တွာ၊ ဒိသွာ ပေါက္ခရဏိံ သုဘံ။
အပဿ မုတ္တိဏ္ဏပဒံ၊ ပဿံ တဉ္စေဝ တာပသိံ၊
‘‘ဣမာယ ခလု ဘစ္စာ မေ၊ ဂဟိတာနု’’တိ စိန္တိယ။
ကိံ န ပဿသိ ဘစ္စေ မေ၊
ဟောတိ တွံ ဣတိ အာဟတံ၊
‘‘ကိံ ရာဇပုတ္တ ဘစ္စေဟိ၊
ပိဝ နဟာယာ’’တိ အာဟသာ။
ယက္ခိနီ တာဝ ဇာနာတိ၊ မမ ဇာတိန္တိ နိစ္ဆိတော၊
သင်္ဃံ သနာမံ သာဝေတွာ၊ ဓနုံ သန္ဓာယု’ ပါဂတော။
ယက္ခိံ အာဒါယ ဂီဝါယ၊ နာရာ စ ဝလယေန သော၊
ဝါမဟတ္ထေန ကေသေသု၊ ဂဟေတွာ ဒက္ခိဏေ န တု။
ဥက္ခိပိတွာ အသိံအာဟ၊ ‘‘ဘစ္စေ မေ ဒေဟိ ဒါသိတံ၊
မာရေမီ’’တိ ဘယဋ္ဋာသာ၊ ဇီဝိတံ ယာစိ ယက္ခိနီ။
ဇီဝိတံ ဒေဟိ မေ သာမိ၊ ရဇ္ဇံ ဒဇ္ဇာမိ တေ အဟံ၊
ကရိဿမိ’တ္တိ ကိစ္စဉ္စ၊ ကိစ္စံ အညံ ယထိစ္ဆိတံ။
အဒုဗ္ဘာတ္ထာယ သပထံ၊ သော တံ ယက္ခိံ အကာရယိ၊
‘‘အာနေဟိ ဘစ္စေ သီဃ’’န္တိ၊ ဝုတ္တမတ္တာဝ သာ’နယိ။
‘‘ဣမေ ဇာတာ’’တိ ဝုတ္တာသာ၊
တဏ္ဍုလာဒိံ ဝိနိဒ္ဒိသိ၊
ဘက္ခိတာနံ ဝါဏိဇာနံ၊
နာဝဋ္ဌံ ဝိဝိခံ ဗဟုံ။
ဘစ္စာ ¶ တေ သာဓယိတွာန၊ ဘတ္တာနိ ဗျဉ္ဇနာနိစ၊
ရာဇာ ပုတ္တံ ဘောဇယိတွာ၊ သဗ္ဗေစာပိ အဘုဉ္ဇိသုံ။
ဒါပိတံ ဝိဇယေန’ဂ္ဂံ၊ ယက္ခီ ဘုဉ္ဇိယ ပီဏိတာ၊
သောဠသဝဿိကံ ရူပံ၊ မာပယိတွာ မနောဟရံ။
ရာဇပုတ္တ မုပဂဉ္ဆိ၊ သဗ္ဗာဘရဏဘူသိတာ၊
မာပေသိ ရုက္ခမူလသ္မိံ၊ သယနဉ္စ မဟာရဟံ။
သာဏိယာ သုပရိက္ခိတ္တံ၊ ဝိတာနသမလင်္ကတံ၊
တံ ဒိသွာ ရာဇတနယော၊ ပေက္ခံ အတ္ထမနာဂတံ။
ကတွာန တာယနာဝါယံ၊ နိပဇ္ဇ သယနေ သုခံ၊
သာဏီ ပရိက္ခိပိတွာန၊ သဗ္ဗေ ဘစ္စာ နိပဇ္ဇိသုံ။
ရတ္တိံ တူရိယသဒ္ဒဉ္စ၊ သုတွာ ဂီတရဝဉ္စ သော၊
အပုစ္ဆိ သဟသေမာနံ၊ ကိံ သဒ္ဒေါ ဣတိ ယက္ခိနိံ။
ရဇ္ဇဉ္စ သာမိနော ဒေယျံ၊ သဗ္ဗေ ယက္ခေ စ ဃာတိယ၊
မနုဿာ ဝါသကရဏာ၊ ယက္ခာ မံ ဃာတယန္တိဟိ။
ဣတိ စိန္တိယ ယက္ခီ သာ၊ အဗြဝိ ရာဇနန္ဒနံ၊
သီရီသဝတ္ထုနာ မေတံ၊ သာမိ ယက္ခပုရံ ဣဓ။
တတ္ထ ဇေဋ္ဌဿ ယက္ခဿ၊ လံကာနဂရဝါသိနီ၊
ကုမာရိကာ ဣဓာ’နီတာ၊ တဿာ မာတာ စ အာဂတာ။
အာဝါဟ မင်္ဂလေ တတ္ထ၊ ဣဓာပိ ဥဿဝေ မဟာ၊
ဝတ္တတေ တတ္ထ သဒ္ဒေါယံ၊ မဟာဟေသ သမာဂမော။
အဇ္ဇေဝ ယက္ခေ ဃာတေဟိ၊
န ဟိ သက္ခာ ဣတော ပရံ၊
သော အာဟာ’ဒိဿ မာနေတေ၊
ဃာတေဿာမိ ကထံ အဟံ။
ယတ္ထ သဒ္ဒံ ကရိဿာမ၊ တေန သဒ္ဒေန ဃာတယ၊
အာယုဓံ မေ’နုဘာဝေန၊ တေသံ ကာယေ ပတိဿတိ။
တဿာ သုတွာ တထာ ကတွာ၊ သဗ္ဗေ ယက္ခေ အဃာတယိ၊
သယမ္ပိ လဒ္ဓဝိဇယော၊ ယက္ခရာဇ ပသာဓနံ။
ပသာဓနေဟိ သေသေဟိ၊ တံတံ ဘစ္စံ ပသာဓယိ၊
ကတိပဟံ ဝသိတွေ’တ္ထ၊ တမ္ဗပဏ္ဏိမုပါဂမိ။
မာပယိတွာ ¶ တမ္ပပဏ္ဏိ-နဂရံ ဝိဇယော တဟိံ၊
ဝသီ ယက္ခိနိယာ သဒ္ဓိံ၊ အမစ္စ ပရိဝါရိတော။
နာဝါယ ဘူမိမောတိဏ္ဏာ၊ ဝိဇယပမုခါ တဒါ၊
ကိလန္တာ ပါဏိနာဘူမိံ၊ အာလမ္ဗိယ နိသီဒိသုံ။
တမ္ဗဘူမိရဇောဖုဋ္ဌော၊ တမ္ဗောပါဏိ ယတော အဟုံ၊
သော ဒေသောစေဝ ဒီပေါ စ၊ တေန တန္နာမကော အဟု။
သီဟဗာဟု နရိန္ဒော သော၊ သီဟမာဒိန္နဝါ ဣတိ၊
သီဟဠော တေန သမ္ဗန္ဓာ၊ ဧတေ သဗ္ဗေပိ သီဟဠာ။
တတ္ထ တတ္ထ စ ဂါမေ တေ၊ တဿာ’မစ္စာ နိဝေသယုံ၊
အနုရာဓဂါမံ တန္နာမော၊ ကဒမ္ဗ နဒီယန္တိကေ။
ဂမ္ဘီရနဒီယာ တီရေ၊ ဥပတိဿော ပုရောဟိတော၊
ဥပတိဿဂါမံ မာပေသိ၊ အနုရာဓဿ ဥတ္တရေ။
အညေ တယော အမစ္စာ တေ၊ မာပယိံသု ဝိသုံ ဝိသုံ၊
ဥဇ္ဇေနိံ ဥရုဝေလဉ္စ၊ ဝိဇိတံ နဂရံ တထာ။
နိဝါသေတွာ ဇနပဒံ၊ သဗ္ဗေ’မစ္စာ သမစ္စတံ၊
အဝေါစုံ ရာဇတနယာ၊ သာမိ ရဇ္ဇေဘိသေစယ။
ဣတိ ဝုတ္တော ရာဇပုတ္တော၊ န ဣစ္ဆိ အဘိသေစနံ၊
ဝိနာ ခတ္တိယကညာယ၊ အဘိသေကံ မဟေသိယာ။
အထာမစ္စာ သာမိနော ဟေ၊ အဘိသေက ကတာ ဒရာ၊
ဒုက္ကရေသုပိ ကိစ္စေသု၊ တဒတ္ထဘိရုတာ တိဂါ။
ပဏ္ဏာကာရေ မဟာသာရေ၊ မဏိမုတ္တာဒိကေ ဗဟူ၊
ဂါဟာပယိတွာ ပါဟေသုံ၊ ဒက္ခိဏံ မဓုရံ ပုရံ။
ပဏ္ဍုရာဇဿ ဓီတတ္ထံ၊ သာမိနော သာမိဘတ္တိနော၊
အညေသံ စာပိ ဓီတတ္ထံ၊ အမစ္စာနံ ဇနဿ စ။
သီဃံ နာဝါယ ဂန္တွာန၊ ဒူတာ တေ မဓုရံ ပုရံ၊
ပဏ္ဏာကာရေ စ လေခဉ္စ၊ တဿ ရညော အဒဿယုံ။
တတော ရာဇာအမစ္စေဟိ၊ မန္တယိတွာ သဓီတရံ၊
ပါဟေတုကာမော’မစ္စာနံ၊ အညေသံ စာပိ ဓီတရော။
လဒ္ဓါ ဦနသတံ ကညာ၊ အထဘေရိံ စရာပယိ၊
လံကာယ ဓီတုဂမနံ၊ ဣစ္ဆမာနာ နရာ ဣဓ။
နိဝါသယိတွာ ¶ ဒိဂုဏံ၊ ဃရဒွါရေသု ဓီတရော၊
ဌပေန္တု တေန လိင်္ဂေန၊ အာဒီယိဿာမိတာ ဣတိ။
ဧဝံ လဒ္ဓါ ဗဟူကညာ၊ တပ္ပယိတွာန တံ ကုလံ၊
သမ္ပန္နသဗ္ဗာလင်္ကာရံ၊ ဓီတရံ သမ္ပဋိစ္ဆဒံ။
သဗ္ဗာ တာ လဒ္ဓသက္ကာရာ၊ ကညာယော စ ယထာရဟံ၊
ရာဇာရဟေ စ ဟတ္ထဿ-ရထပေဿိယ ကာရကေ။
အဋ္ဌာရသန္နံ သေဏီနံ၊ သဟဿဉ္စ ကုလာနိ သော၊
လေခံ ဒတွာန ပေသေသိ၊ ဝိဇယဿ ဇိတာ’ရိနော။
သဗ္ဗောသော’တရီ နာဝါဟိ၊ မဟာတိတ္ထေ မဟာဇနော၊
တေနေဝ ပဋ္ဋနံ တဉှိ၊ မဟာတိတ္ထံတိ ဝုစ္စတိ။
ဝိဇယဿ သုတောဓီတာ၊ တဿာ ယက္ခိနိယာ အဟု၊
ရာဇကညာဂမံ သုတွာ၊ ဝိဇယော အာဟ ယက္ခိနိံ။
‘‘ဂစ္ဆ ဒါနိ တုဝံ ဘောတိ၊ ဌပေတွာ ပုတ္တကေ ဒုဝေ၊
မနုဿာ အမနုဿေဟိ၊ ဘာယိန္တီဟိ သဒါ’’ ဣတိ။
သုတွာ တံ ယက္ခဘယတော၊ ဘီတံ တံ အာဟ ယက္ခိနိံ၊
မာ စိန္တယိ သာဟဿေန၊ ဒါပယိဿာမိ တေ ဗလိံ။
ပုနပ္ပုနံ တံ ယာစိတွာ၊ ဥဘော အာဒါယ ပုတ္တကေ၊
ဘီတာပိ သာ အဂတိယာ၊ လံကာပုရမုပါဂမိ။
ပုတ္တေ ဗိဟိ နိသီဒေတွာ၊ သယံ ပါဝိသိ တံ ပုရံ၊
သဉ္ဇာနိတွာန တံ ယက္ခိံ၊ ဘီတာ စောရီတိ သညိတော။
သံခုဘိံသု ပုရေ ယက္ခာ၊ ဧကော သာဟသိကော ပန၊
ဧကပါဏိပ္ပဟာရေန၊ ဝိလယံ နယိ ယက္ခိနိံ။
တဿာတု မာတုလော ယက္ခော၊ နိက္ခမ္မ နဂရာ ဗဟိ၊
ဒိသွာ တေ ဒါရကေ ပုစ္ဆိ၊ တုမှေ ကဿ သုတာ ဣတိ။
ကုဝေဏိယာ’တိ သုတွာ’ဟ၊ မာတာ ဝေါ မာရိတာ ဣဓ၊
တုမှေပိ ဒိသွာ မာရေယျုံ၊ ပလာယထ လဟုံ ဣတိ။
အာဂုံ သုမနကူဋံ တေ၊ ပလာယိတွာ တတော လဟုံ၊
ဝါသံ ကပ္ပေသိ ဇေဋ္ဌော သော၊ ဝုဒ္ဓါ တာယ ကဏိဋ္ဌိယာ။
ပုတ္တဓီတာဟိ ¶ ဝဍ္ဎိတွာ၊ ရာဇာနုညာယ တေ ဝသုံ၊
တတ္ထေဝ မလယေ ဧသော၊ ပုလိန္ဒာနဉှိ သမ္ဘဝေါ။
ပဏ္ဍုရာဇဿ ဒူတာ တေ၊ ပဏ္ဏာကာရံ သမပ္ပယုံ၊
ဝိဇယဿ ကုမာရဿ၊ ရာဇာဓိကာရိကာ စ တာ။
ကတွာ သက္ကာရသမ္မာနံ၊ ဒူတာနံ ဝိဇယော ပန၊
အဒါ ယာထာရဟံ ကညာ၊ အမစ္စာနံ ဇနဿ စ။
ယထာ ဝိဓိ စ ဝိဇယံ၊ သဗ္ဗေ မစ္စာသမာဂတာ၊
ရဇ္ဇေသမဘိသိဉ္စိံသု၊ ကရိံသုစ မဟာဆဏံ။
တတော သော ဝိဇယော ရာဇာ၊ ပဏ္ဍုရာဇဿ ဓီတရံ၊
မဟတာ ပရိဟာရေန၊ မဟေသိတ္တေ’ဘိသေစယိ။
ဓနာန’ဒါ အမစ္စာနံ၊ အဒါသိ သသုရဿတု၊
အနုဝဿံ သင်္ခမုတ္တံ၊ သတသဟဿ ဒွယာရဟံ။
ဟိတွာ ပုဗ္ဗာစရိတံ ဝိသမံ သမေန၊
ဓမ္မေန လံကမခိလံ အနုသာသမာနော၊
သော တမပဏ္ဏိနဂရေ ဝိဇယော နရိန္ဒော၊
ရဇ္ဇံ အကာရယိ သမာ ခလု အဋ္ဌတိံသာ’တိ။
သုဇနပသာဒသံဝေ ဂတ္ထာယ ကတေ မဟာဝံသေ
ဝိဇယာဘိသေကော နာမ
သတ္တမော ပရိစ္ဆေဒေါ။