📜
ဒွိသဋ္ဌိမပရိစ္ဆေဒ
ပရမဏ္ဍလာဘိဂမနော
အတ္တနာဘိမတဿာ’သု၊ ဇာတဒေသဿ ပတ္တိယာ၊
သမ္ပုဏ္ဏမနသင်္ကပ္ပော၊ ဒုဿင်္ကပဝိဝဇ္ဇိတော။
ဝဇိရူပမောရုပညာ၊ ဗလေန ဂုရုသန္တိကေ၊
လဟုံ ဗဟုဉ္စ ဂဏှန္တော၊ သိပ္ပဇာတမနေက ကံ။
ဇိနာဂမေသု နေကေသု၊ ကောဋိလ္လာ ဒီသု နီတိသု၊
သဒ္ဒသတ္ထေ စ ကာဝေယျေ၊ သနိဃဏ္ဍုက ကေဋုဘေ။
နစ္စဂီတေသု သတ္ထေသု၊ ဟတ္ထိသိပ္ပာဒိကေသု စ၊
ဓနု ခဂ္ဂါဒိနေကေသု၊ သတ္ထေသု စ ဝိသေသတော။
ပါရပ္ပတ္တော ဝိနီတတ္တော၊ ပိတု ရညော သမာစရိ၊
အဓိပ္ပာယာနုကုလံ’ဝ၊ သဒါ ဘတ္တိပုရဿရော။
တဒါ သဒါ ဒရာစာရ-ဂုဏာရာဓိတမာနသော၊
ပိယေန ဝိယ မိတ္တေန၊ တေန သဒ္ဓိံ မဟီပတိ။
ဥယျာနဇလကီဠာဒိ-သုခံ နာနပ္ပကာရကံ၊
အနုဘောတွာ သဒေသသ္မိံ၊ သဉ္စရန္တော တဟိံ တဟိံ။
ဧကဒါသင်္ခသေနာဓိ-ပတိနာ ဒဠှဘတ္တိနာ၊
သရဋ္ဌသီမာ ရက္ခာယ၊ ယော ဇိတေန ဗလီယသာ။
အဇ္ဈာဝုတ္ထဿ ¶ စ ဗလတ္ထ-လိနမဿ စ သန္တိကံ၊
ဂါမသာ’ဂဉ္ဆိ သုတွာန၊ တမတ္ထံ ဓဇိနီပတိ။
ဂါမံ တံ သာဓုကံ သဇ္ဇု၊ သဇ္ဇာပေတွာ သပုတ္တကံ၊
ပစ္စုဂ္ဂန္တွာ မဟီပါလံ၊ ပဏမိတွာ ဌိတော တဒါ။
ပိတာ ပုတ္တော ဥဘော တဿ၊ သမ္ဘာသိယ ပိယံ ဝစော၊
နေကဓာ’ရာဓိတာ တေန၊ တံ ဂါမံ သမုပါဂဂုံ။
တဟိံ ကတိစိ ဘူပါလော၊ ဝါသရေ ဝီတိနာမိယ၊
သေနာပတိံ သမာဟူယ၊ ဣဒံ ဝစနံ မဗြဝိ။
ပုတ္တော မေ ဒါနိဝယသိ၊ ဌိတော’ ပနယနာရဟေ၊
တဿောပနယနံ ကာတုံ၊ မဟောပကရဏံ လဟုံ။
သဇ္ဇေတဗ္ဗန္တိ တံ သုတွာ၊ သောပိ သေနာဓိနာယကော၊
သဗ္ဗုပကရဏံ ခိပ္ပံ၊ မင်္ဂလတ္ထံ သုသဇ္ဇယိ။
သုဂန္ဓ ဒီပပုပ္ဖာဒိ-ဝတ္ထူဟိ ဒိဝသတ္တယံ၊
ပုဗ္ဗကာရံ ကရိတွာန၊ မဟန္တံ ရတနတ္တယေ။
ဝေဒိကာစာရဒက္ခေဟိ၊ ဒွိဇေဟိ ပုထုဝီပတိ၊
သမ္ပဘာဝါနု ရူပံဝ၊ မင်္ဂလံ တံ သမာပိယ။
ပရက္ကမကုမာရေန၊ တေန သဒ္ဓိံ သမာရဘိ၊
ဝသန္တကီဠံ မဟတိံ၊ သာမစ္စော ကီဠိတုံ တဒါ။
ရာဇာ ကိတ္တိ သိရီမေဃော-ရောဟဏေ ဝသတော တဒါ၊
သိရီဝလ္လဘနာမဿ၊ သဘာတု မရဏမ္ပိ စ။
မာဏဘရဏနာမဿ၊ ရဇ္ဇလာဘဉ္စ ဒေဝိယာ၊
မိတ္တာယ ပဋိလာဘဉ္စ၊ သိရီဝလ္လဘသူနု နော။
ရောဟဏာဂတဒူတေဟိ၊ သုဏိတွာ သကဘာတုနော၊
ကာလကြိယာယ သဉ္ဇာတ-သောကဝေဂံ သုဒုဿဟံ။
မိတ္တာယတနယုပ္ပတ္တိ ပဝတ္တိံ သဝဏေန တံ၊
ဝိနေယျ ဝိရတော တမှာ၊ ဝသန္တသမယုဿဝါ။
နိဝတ္တေတွာန တတ္ထေဝ၊ သေနာနိံ သင်္ခနာမကံ၊
ပုတ္တေန သဟ သော သင်္ခ-တ္ထလိ နာမံ ပုရံ ဂမိ။
ပရက္ကမကုမာရေန၊ တေန သဒ္ဓိံ တဟိံ သုခံ၊
ဝသတော တဿ ဘူပဿ၊ ဝဿမေကမတိက္ကမိ။
မာဏာဘရဏဘူပဿ ¶ ၊ ဒေဝီ စာပိ ပဘာဝတီ၊
လဘိတ္ထ ဒုတိယာ ကိတ္တိ-သိရီ မေဃဝှယံ သုတံ။
သုဏိတွာ တဉ္စ သော အမှံ၊ ဝံသော ဇာတော မဟာ’’ဣတိ၊
အဟု ကိတ္တိသိရီမေဃော၊ တဒါ အတ္တမနော ဘုသံ။
လံကာဒီပေါပဘောဂေက-ဟေတုနာ မဟတာ သတာ၊
အသာဓာရဏဘူဘေန၊ စောဒိတော ပုညကမ္မုနာ။
ကုမာရော သော’ထ ပိတရာ၊ ပိယမိတ္တေ ဝိယတ္တနိ၊
ကရိယမာနံ သသ္နေဟံ၊ မဟန္တံ စော’ပလာလနံ။
သစိဝါနမနေကေသံ၊ ဘယဘတ္တီ ပုရဿရံ၊
ကြိယမာနမုပဋ္ဌာနံ၊ န မညန္တော တိဏာယပိ။
လံကာဒီပမိမံ သဗ္ဗ မေကစ္ဆတ္တော ပသောဘိတံ၊
ခိပ္ပံ ကာရေတုကာမော သော၊ သယံ ဣတိ ဝိစိန္တယိ။
ကေသ အက္ခက ဂီဝဋ္ဌိ-ဒါဌာ ပတ္တာန မေဝ စ၊
ပဒစေတျ မဟာဗောဓိ-သာခါနဉ္စာပိ သတ္ထုနော။
စတုရာသီတိသဟဿာနံ၊ ဓမ္မက္ခန္ဓာန မေဝ စ၊
သမ္မာသမ္ဗုဒ္ဓကပ္ပာနံ၊ အာဓာရတ္တာ စ နိစ္စသော။
အာကရတ္တာ စ နေကေသံ၊ မဏိမုတ္တာဒိဝတ္ထူနံ၊
သမ္မတောပိ ဝိသိဋ္ဌောတိ၊ ဒီပေါနာတိ မဟာ အယံ။
တယော မေ ပိတရော ဘူပါ၊ မာတုလောပိ စ သဗ္ဗထာ၊
ဧကစ္ဆတ္တေန ဝတ္တေတု၊ မသမတ္ထာ ဝိဘဇ္ဇိ’မံ။
ဘုဉ္ဇန္တာ ဧတ္တကေနေဝ၊ ကတကိစ္စာ မယံ ဣတိ၊
မညန္တာ ဝိဂတစ္ဆန္ဒာ’ဘိသေကမှိ ကုလောစိတေ။
ရဋ္ဌေသကေ သကေယေဝ၊ ဣဿေရံ သမ္ပဝတ္တယုံ၊
ကသိကမ္မာဒိကံ ဂါမ-ဘောဇကာ ဝိယ နိဿိတာ။
တေသု ကိတ္တိသိရိ မေဃံ၊ ပေတ္တေယျံ မေ ဌပေတွ တေ၊
အဂမံသု ယထာကမ္မံ၊ သေသာ ဘူပတယော တယော။
မစ္စာနံ ပရမံ အာယု၊ ဝတေ’ဒါနိ ပရိတ္တကံ၊
ဗာလာယုဝါနော ဝုဒ္ဓါ စ၊ ဣမေ သတ္တာ’နုပုဗ္ဗသော။
ပါပုဏိဿန္တိ မရဏ-မီတိ’ယံ နိယမောပိ စ၊
န ဟေဝ အသ္မိံ လောကသ္မိံ၊ သံဝိဇ္ဇတိ ကဒါစိပိ။
တသ္မာ ¶ သရီရကေ အသ္မိံ၊ ဘင်္ဂုရေ သာရဝဇ္ဇိတေ၊
ဟီဠိတေ သာရဒဿီဟိ၊ အပေက္ခံ ဟိတွာ သဗ္ဗထာ။
ပိဟနိယေ ယသောဒေဟေ၊ စိရဋ္ဌာယိမှိ သဗ္ဗဒါ၊
အမှာဒိသေဟိ ကတ္တဗ္ဗော၊ ရာဇပုတ္တေဟိ အာဒရော။
ဥမ္မဂ္ဂဇာတကာဒီသု၊ စာရိတ္တဉ္စာပိ ဘူမိသု၊
ဝိဟိတံ ဗောဓိသတ္တေန၊ ဝီရဘာဝါဒိနိဿိတံ။
ရာမာယဏဘာရတာဒိ-လောကိယာသု ကထာသုပိ၊
ရာမဿ ဝိက္ကမဉ္စေဝ၊ တဿ ရာဝဏဃာတိနော။
ဒုယောဓနာဒိရာဇာနော၊ ဟန္တွာယုဒ္ဓေ ပဝတ္တိတံ၊
ဝိက္ကမာတိ သယဉ္စေဝ၊ ပဉ္စန္နံ ပဏ္ဍုသူနူနံ။
ဣတိဟာသကထာယဉ္စ၊ ဒေဝါသုရရဏေ ပုရာ၊
ဒုဿန္တာဒိမဟီပေဟိ၊ ကတဉ္စ စရိတဗ္ဘူတံ။
ဥမ္မူလိတဝတော တဿ၊ နန္ဒဝံသနရိဿရေ၊
စာရက္ကဒွိဇသေဋ္ဌဿ၊ သုတွာ ဗုဒ္ဓိဗလမ္ပိ စ။
သဗ္ဗာ နေတာနိ လောကမှိ၊ ယာဝဇ္ဇဒိဝသာ ဘုဝိ၊
တေသံ အသန္နိဓာနေပိ၊ သုပ္ပသိဒ္ဓိံ ဂတာနိ ဟိ။
သုလဒ္ဓံ ဇီဝိတံ တေသံ၊ အသာဓာရဏမီဒိသံ၊
စရိတာတိသယံ ကတ္တုံ၊ သမတ္ထာ ဟောန္တိ ယေ ဘုဝိ။
ဇာယိတွာ ခတ္တဝံသမှိ၊ ခတ္တဝီရဝရောဓိတံ၊
ယဒိဟံ န ကရိဿာမိ၊ မောဃာ မေ ဇာတိ ဟေဿတိ။
တေသမဗ္ဘဓိကာ ကာလ-သမ္ပဒါယေဝ ကေဝလံ၊
မယာ တေ အဓိကာ ကိန္တု၊ ပညာဒီဟီတိ စိန္တိယ။
ပိတုရာဇာ စ မေ’ဒါနိ၊ ပစ္ဆိမေ ဝယသိဋ္ဌိတော၊
ယဒိဒံ ပေတ္တိကံ ရဇ္ဇံ၊ မမ ဟတ္ထဂတဗ္ဘဝေ။
ရာဇလက္ခိဝ သော ပေတ-စေတသော မေ ပမာဒတော၊
ယထိစ္ဆိတဉ္စေ န ဘဝေ၊ မဟတီ ဇာနိ မေ ဘုသံ။
ဧတ္ထေဝ နိဝသန္တော’ဟံ၊ စရာပိယ သကေ ဝရေ၊
ပရမဏ္ဍလဝုတ္တန္တံ၊ ဇာနေယျံ ယဒိ တတ္တနော။
ရန္ဓံ ပစ္စတ္ထိကာနန္တု၊ ပကာသေတုံ ရထာတထံ၊
အဓိပ္ပာယာနုရူပံ မေ၊ သမတ္ထာ ဝါ န ဝါစရာ။
ယေ ¶ ကေစိ’ဓ ဇနာ သန္တိ၊ သဗ္ဗေ တေ မမ သမ္မုခါ၊
ဗလီယတ္တံ’ဝ သတ္တူနံ၊ ကထယန္တိ အနေကသော။
ပစ္စေကရဋ္ဌသာမီဟိ၊ ပိတုဘူပေဟိ တိဟိပိ၊
ဧကီဘူယ ကရိတွာန၊ သတ္တက္ခတ္တုံ မဟာဟဝံ။
သာဓေတုံ ဒုက္ကရံ ရဋ္ဌံ၊ ဘဝတေ ကာကိနာ ကထံ၊
သိသုနာ ဂဏှိတုံ သက္ကာ၊ ခုဒ္ဒရဇ္ဇော ပဘောဂိနာ။
သုကရံ မူလဘူတဿ၊ တဿ ရဇ္ဇဿ သာဓနံ၊
ဣတိ ဒုစ္စိန္တံတံ တုယှံ၊ ဒူရေ တဗ္ဗမိဒံ’’ဣတိ။
ကဏ္ဏေ တတ္ထသလာကာယော၊ ပဝေသေန္တာ’ဝ နေကသော၊
မဟန္တတ္တံ ကထေန္တေ’ဝံ၊ ဗဟုဓာ ပရမဏ္ဍလေ။
အဇာနနံ ယထာဘူတံ၊ ဝဒန္တာနံ ကုဗုဒ္ဓိနံ၊
သဗ္ဗမေတံ ဝစော ဇာတု၊ သဒ္ဓါတဗ္ဗံ သိယာ န ဟိ။
လေသေနေကေန ဂန္တွာန၊ ခိပ္ပံ’ဝ ပရမဏ္ဍလံ၊
သရူပံ တတ္ထ ဥဿာမိ၊ အဟမေဝေတိ စိန္တယိ။
ယဒိ မေ ပီတုဘူပါလော၊ ဝိညာယေတံ ဝိတက္ကိတံ၊
အဘိဇာတဿ ပုတ္တဿ၊ ဝံသဇောတိကရဿ မေ။
ဂတဿ သတ္ထု ဝိသယ-မနတ္ထောပိ သိယာ ဣတိ၊
အနုကမ္ပာဓိယာ မယှံ၊ ဂမနံ ဝါရယိဿတိ။
မနောရထဿ သံသိဒ္ဓိ၊ သဗ္ဗထာ မေန ဟေဿတိ၊
တသ္မာ နိဂုဠရူပေန၊ ဂမနံ ဘဒ္ဒကံ ဣတိ။
လဒ္ဓါန ရတ္တိယမ ထေကဒိနံ ခဏညူ၊
သော တာဒိသံ ခဏမခီဏတရောရူပါယော၊
ဇာနာတိ နော သကပိတာဂမနံ တထာတံ၊
ဂေဟာ’ဘိနိက္ခမိတထာ စတုရော ကုမာရော။
သုဇနပ္ပသာဒသံဝေဂတ္ထာယ ကတေ မဟာဝံသေ
ပရမဏ္ဍလာဘိဂမနော နာမ
ဒွိသဋ္ဌိမော ပရိစ္ဆေဒေါ။