📜
၁။ ပဌမော သညာဒိကဏ္ဍော
သိဒ္ဓမိဒ္ဓဂုဏံ သာဓု၊ နမဿိတွာ တထာဂတံ၊
သဓမ္မသင်္ဃံ ဘာသိဿံ၊ မာဂဓံ သဒ္ဒလက္ခဏံ။
၁။ အအာဒယော ¶ တိတာလီသ ဝဏ္ဏာ။
အကာရာဒယော နိဂ္ဂဟီတန္တာ တေစတ္တာလီသ-က္ခရာ ဝဏ္ဏာ နာမ ဟောန္တိ။ အ အာ ဣ ဤ ဥ ဦ ဧ ဧ ဩ ဩ၊ က ခ ဂ ဃ င စ ဆ ဇ ဈ ည၊ ဋ ဌ ဍ ဎ ဏ၊ တ ထ ဒ ဓ န၊ ပ ဖ ဗ ဘ မ၊ ယ ရ လ ဝ သ ဟ ဠ အံ။ တေန ကွတ္ထော? ‘‘ဧ ဩ န မဝဏ္ဏေ’’ ၁။ ၃၇။ တိတာလီသာဘိ ဝစနံ ကတ္ထစိ ဝဏ္ဏလောပံ ဉာပေတိ။ တေန ‘ပဋိသင်္ခါ ယောနိသော’တိအာဒိ သိဒ္ဓံ။
တတ္ထာဒိမှိ ဒသ ဝဏ္ဏာ သရာ နာမ ဟောန္တိ။ တေန ကွတ္ထော? ‘‘သရော လောပေါ သရေ’’ ၁၊ ၂၆ ဣစ္စာဒိ။
၃။ ဒွေဒွေ သဝဏ္ဏာ။ တေသု ဒွေဒွေ သရာ သဝဏ္ဏာ နာမ ဟောန္တိ။ တေန ကွတ္ထော? ‘‘ဝဏ္ဏပရေန သဝဏ္ဏောပိ’’ ၁၊ ၂၄။
တေသု ¶ ဒွီသု ယော ယော ပုဗ္ဗော၊ သော သော ရဿသညော ဟောတိ။ တေသု ဧ။ဩ။သံယောဂတော ပုဗ္ဗာဝ ဒိဿန္တိ။ တေန ကွတ္ထော? ‘‘ရဿော ဝါ’’ ၂၊၆၂ ဣစ္စာဒိ။
တေ သွေဝ ဒွီသုယော ယော ပရော၊ သော သော ဒီဃသညော ဟောတိ။ တေန ကွတ္ထော? ‘‘ယော လော ပနိသု ဒီဃော’’ ၂၊၈၈ ဣစ္စာဒိ။
ကကာရာဒယော ဝဏ္ဏာ နိဂ္ဂဟီတပရိယန္တာ ဗျဉ္ဇနသညာဟောန္တိ။ တေန ကွတ္ထော? ‘‘ဗျဉ္ဇနေ ဒီဃရဿာ’’ ၁၊၃၃ ဣစ္စာဒိ။
ကာဒယော ပဉ္စ ပဉ္စကာ ဝဂ္ဂ၊ နာမ ဟောန္တိ။ တေန ကွတ္ထော? ‘‘ဝဂ္ဂေ ဝဂ္ဂန္တော’’ ၁၊၄၁ ဣစ္စာဒိ။
ယွာယံ ဝဏ္ဏော ဗိန္ဒုမတ္တော၊ သော နိဂ္ဂဟီတသညော ဟောတိ။ တေန ကွတ္ထော? ‘‘နိဂ္ဂဟီတံ’’ ၁၊၃၈ ဣစာဒိ။ ဂရုသညာကရဏံ အနွတ္ထသညတ္ထံ။
၉။ ဣယုဝဏ္ဏာ ¶ ဈလာ နာမဿန္တေ။
နာမံ ပါဋိပဒိကံ၊ တဿအန္တေ ဝတ္တမာနာ ဣဝဏ္ဏုဝဏ္ဏာ ဈလသညာ ဟောန္တိ ယထာက္ကမံ။ တေန ကွတ္ထော? ‘‘ဈလာ ဝါ’’ ၂၊၁၁၁ ဣစ္စာဒိ။
ဣတ္ထိယံ ဝတ္တမာနဿ နာမဿ-န္တေ ဝတ္တမာနာ ဣဝဏ္ဏုဝဏ္ဏာ ပသညာ ဟောန္တိ။ တေန ကွတ္ထော? ယေ ပဿိဝဏ္ဏဿ’’ ၂၊၁၁၆ ဣစ္စာဒိ။
ဣတ္ထိယံ ဝတ္တမာနဿ နာမဿ-န္တေ ဝတ္ထမာနော အာကာရော ဃသညော ဟောတိ။ တေန ကွတ္ထော? ‘‘ဃဗြဟ္မာဒိတေ’’ ၂၊၆၀ ဣစ္စာဒိ။
အာလပနေ သိ ဂသညော ဟောတိ။
တေန ကွတ္ထော? ‘‘ဂေဝါ’’ ၂၊၆၅ ဣစ္စာဒိ။
(သညာ)
ယံ ဝိသေသနံ၊ တဒန္တဿ ဝိဓိ ဉာတဗ္ဗော ‘‘အတော ယောနံ ဋာဋေ’’ ၂၊၄၁ နရာနရေ။
သတ္တမီနိဒ္ဒေသေ ¶ ပုဗ္ဗဿေဝ ကာရိယံ ဉာတဗ္ဗံ ‘‘သရော လောပေါ သရေ’’ ၁၊၂၆ ဝေဠဂ္ဂံ။ ‘တမဟ’န္တီဓ ကသ္မာ န ဟောတိ?၊ သရေတောပသိလေသိကာဓာရော တတ္ထေတာဝ ဝုစ္စတေ ‘ပုဗ္ဗဿေဝ ဟောတိ န ပရဿာ’တိ။
ပဉ္စမီနိဒ္ဒေသေ ပရဿ ကာရိယံ ဉာတဗ္ဗံ ‘‘အတောယောနံ ဋာဋေ’’ ၂၊၄၁ နရာနရေ။ ဣဓ န ဟောတံ ‘ဇန္တုဟော အနတ္တာ’။ ဣဓ ကသ္မာ န ဟောတိ? ဩသချော၊ အနန္တရေ ကတတ္ထတာယ န ဗျဝဟိတဿ ကာရိယံ။
ပရဿ ဿိဿမာနံ ကာရိယမာဒိဝဏ္ဏဿ ဉာတဗ္ဗံ ‘‘ရ သင်္ချာတော ဝါ’’ ၃၊၁၀၃ တေရသ။
ဆဋ္ဌီနိဒ္ဒိဋ္ဌဿ ယံ ကာရိယံ၊ တဒန္တဿ ဝဏ္ဏဿ ဝိညေယျံ ‘‘ရာဇဿိ နာမှိ’’ ၂၊၂၃ ရာဇိနာ။
ငကာရော အနုဗန္ဓော ယဿ၊ သော အန္တဿ ဟောတိ ‘‘ဂေါဿာ ဝင’’ ၁၊၃၂ ဂဝါဿံ။
ဋကာရော-နုဗန္ဓော ¶ ယဿ၊ သော-နေကက္ခရော စာဒေသော သဗ္ဗဿ ဟောတိ ‘‘ဣမဿာနိတ္ထိယံ ဋေ’’ ၂၊၁၂၈ ဧသု၊ ‘‘နာမှ-နိမိ’’ ၂၊၁၂၆ အနေန။
ဆဋ္ဌီနိဒ္ဒိဋ္ဌဿ ဉာနုဗန္ဓကာနုဗန္ဓာ အာဒျန္တာ ဟောန္တိ ‘‘ဗြူတော တိဿီဉ’’ ၆၊၃၆ ဗြဝီတိ၊ ‘‘ဘူဿ ဝုက’’ ၆၊၁၇ ဗဘူဝ။
၂၁။ မာနုဗန္ဓော သရာနမန္တာ ပရော။
မကာရော-နုဗန္ဓော ယဿ၊ သော သရာ နမန္တာ သရာ ပရော ဟောတိ ‘‘မဉ္စ ရုဓာဒီနံ’’ ၅-၁၉ ရုန္ဓတိ။
ဒွိန္နံ သာဝကာသာနမေကတ္ထပ္ပသင်္ဂေ ပရော ဟောတိ။ ယထာ ဒွိန္နံ တိဏ္ဏံ ဝါပုရိသာနံ သဟပ္ပတ္တိယံ ပရော၊ သော စ (ဂစ္ဆတိ) တွံ စ (ဂစ္ဆသိ၊ တုမှေ) ဂစ္ဆထ။ သော စ (ဂစ္ဆတိ၊) တွံ စ (ဂစ္ဆသိ၊) အဟံ စ (ဂစ္ဆာမိ၊ မယံ) ဂစ္ဆာမ။
၂၃။ သင်္ကေတော-နဝယဝေါ-နုဗန္ဓော။
ယော နဝယဝဘူတောသင်္ကေတော၊ သော-နုဗန္ဓောတိ ဉာတဗ္ဗော၊ ‘‘လုပိတာဒီနမာသိမှိ’’ ၂-၅၇ ကတ္တာ။
သင်္ကေတဂ္ဂဟဏံ ကိံ? ပကတိယာဒိသမုဒါယဿာနုဗန္ဓတာ မာ ဟောတူတိ၊ အနဝယဝေါဟိ သမုဒါယော… သမုဒါယရူပတ္တာယေဝ။
အနဝယဝဂ္ဂဟဏံ ကိံ? ‘‘အတေန’’ ၂-၁၀၈ ဇနေန။ ဣမိနာဝ လောပဿာဝဂတတ္တာ နာနုဗန္ဓလောပါယ ဝစနမာရဒ္ဓံ။
ဝဏ္ဏသဒ္ဒေါ ¶ ပရော ယသ္မာ တေန သဝဏ္ဏောပိ ဂယှတိ သံစ ရူပံ ‘‘ယုဝဏ္ဏာနမေဩ လုတ္တာ’’ ၁-၂၉ ဝါကေရိတံ၊ သမောနာ။
၂၅။ န္တု ဝန္တုမန္တွာဝန္တုတဝန္တုသမ္ဗန္ဓီ။
ဝန္တွာဒိသမ္ဗန္ဓီယေဝန္တု ဂယှတိ၊ ‘‘န္တန္တူနံ န္တော ယောမှိ ပဌမေ’’ ၂-၂၁၅ ဂုဏဝန္တော။
ဝန္တွာဒိသမ္ဗန္ဓီတိ ကိံ? ဇန္တူ တန္တူ။
(ပရိဘာသာယော။)
သရေ သရော လောပနီယော ဟောတိ။ တတြိ-မေ၊ သဒ္ဓိ-န္ဒြိယံ၊ နောဟေ-တံ၊ ဘိက္ခုနော-ဝါဒေါ၊ သမေတာ-ယသ္မာ၊ အဘိဘာ-ယတနံ၊ ပုတ္တာမ-တ္ထိ၊ အသန္တေ-တ္ထ။
သရမှာ ပရော သရော ကွစိ လောပနီယော ဟောတိ။ သော-ပိ၊ သာဝ၊ ယတော-ဒကံ၊ တတော-ဝ။ ကွစီတိကိံ? သဒ္ဓိ-န္ဒြိယံ၊ အယမဓိကာရော အာပရိစ္ဆေဒါဝသာနာ၊ တေန နာတိပ္ပသင်္ဂေါ။
ပုဗ္ဗပရသရာ ဒွေပိ ဝါ ကွစိ န လုပျန္တေ၊ လတာ ဣဝ၊ လတေ-ဝ၊ လတာ-ဝ။
လုတ္တာ ¶ သရာ ပရေသံ ဣဝဏ္ဏုဝဏ္ဏာနံ ဧဩ ဟောန္တိ ဝါ ယထာက္ကမံ။
တဿေ-ဒံ၊ ဝါတေ-ရိတံ၊ နော-ပေတိ၊ ဝါမော-ရူ၊ အတေ-ဝညေဟိ၊ ဝေါ-ဒကံ။ ကထံ ‘‘ပစ္စောရသ္မိ’’န္တိ? ယောဂဝိဘာဂါ။ ဝါတွေဝ? တဿိဒံ။
လုတ္တေတိ ကိံ? လတာ ဣဝ။
သရေ ပရေ ဣဝဏ္ဏုဝဏ္ဏာနံ ယကာရဝကာရာ ဟောန္တိ ဝါ ယထာက္ကမံ။ ဗျာကတော၊ ဣစ္စဿ၊ အဇ္ဈိဏမုတ္တော၊ သွာဂတံ၊ သွာပနလာနိလံ၊ ဝါတွေဝ? ဣတိ-ဿ။ ကွစိတွေဝ? ယာနီ-ဓ၊ သူ-ပဋ္ဌိတံ။
ဧဩနံယဝါယောန္တိ ဝါ သရေ ယထာက္ကမံ။ တျဇ္ဇ တေ-ဇ္ဇ၊ သွာဟံ သော-ဟံ။ ကွစိတွေဝ? ပုတ္တာမ-တ္ထိ၊ အသန္တေ-တ္ထ။
သရေ ဂေါဿ အဝင ဟောတိ။ ဂဝါ-ဿံ။ ‘ယထရီဝ၊ တထရိဝေ’တိ နိပါတာဝ၊ ‘ဘုသာမိဝေ’တိ ဣဝသဒ္ဒေါ ဧဝတ္ထော။
ရဿဒီဃာနံ ¶ ကွစိ ဒီဃရဿာ ဟောန္တိ ဗျဉ္ဇနေ။ တတြာ-ယံ၊ မုနီစရေ၊ သမ္မဒေဝ၊ မာလဘာရီ။
သရမှာ ပရဿ ဗျဉ္ဇနဿ ကွစိ ဒွေ ရူပါနိ ဟောန္တိ။ ပဂ္ဂဟော။ သရမှာတိ ကိံ? တံ ခဏံ။
၃၅။ စတုတ္ထဒုတိယေသွေသံ တတိယပဌမာ။
စတုတ္ထဒုတိယေသု ပရေသွေသံ စတုတ္ထဒုတိယာနံ တဗ္ဗဂ္ဂေ တတိယ ပဌမာ ဟောန္တိ။ ပစ္စာသတ္ထျာ၊ နိဂ္ဃောသော၊ အက္ခန္တိ၊ ဗောဇ္ဈင်္ဂါ၊ သေတစ္ဆတ္တံ၊ ဒဍ္ဎော၊ နိဋ္ဌာနံ၊ မဟဒ္ဓနော၊ ယသတ္ထေရော၊ အပ္ဖုဋံ၊ အဗ္ဘုဂ္ဂတော။ ဧသွီတိ ကိံ? ထေရော။ ဧသန္တိ ကိံ? ပတ္ထော။
ဧဝသဒ္ဒေ ပရေ ဣတိဿ ဝေါ ဟောတိ ဝါ။ ဣတွေဝ၊ ဣစ္စေဝ။ ဧဝေတိ ကိံ? ဣစ္စာဟ။
ဧဩနံ ဝဏ္ဏေ ကွစိ အ ဟောတိ ဝါ။ ဒိသွာ ယာစက မာဂတေ၊ အကရမှသ တေ၊ ဧသ အတ္ထော၊ ဧသ ဓမ္မော၊ အဂ္ဂမက္ခာယတိ၊ သွာတနံ ¶ ၊ ဟိယျတ္တနံ၊ ကရဿု။ ဝါတွေဝ? ယာစကေ အာဂတေ ဧသော ဓမ္မော။ ဝဏ္ဏေတိ ကိံ? သော။
နိဂ္ဂဟီတမာဂမော ဟောတိ ဝါ ကွစိ။ စက္ခုံ ဥဒပါဒိ စက္ခုဥဒပါဒိ၊ ပုရိမံ ဇာတိံ ပုရိမဇာတိံ၊ ကတ္တဗ္ဗံ ကုသလံ ဗဟုံ။ အဝံသိရောတိအာဒီသု နိစ္စံ… ဝဝတ္ထိတဝိဘာသတ္တာ ဝါဓိကာရဿ၊ သာမတ္တိယေနာဂမောဝ၊ သ စ ရဿ သရဿေဝ ဟောတိ… တဿ ရဿာနုဂတတ္တာ။
နိဂ္ဂဟီတဿ လောပေါ ဟောတိ ဝါ ကွစိ။ ကျာဟံ ကိမဟံသာရတ္တော သံရတ္တော။ သလ္လေ ခေါ-ဂန္တုကာမော ဂန္တုမနောတိ၊ အာဒီသု နိစ္စံ။
နိဂ္ဂဟီတမှာ ပရဿ သရဿ လောပေါ ဟောတိ ဝါ ကွစိ။ တွံ-သိ တွမသိ။
နိဂ္ဂဟီတဿ ခေါ ဝဂ္ဂေ ဝဂ္ဂန္တော ဝါ ဟောတိ ပစ္စာသတ္တျာ။ တင်္ကရောတိ တံ ကရောတိ၊ တဉ္စရတိ တံ စရတိ၊ တဏ္ဌာနံ တံ ဌာနံ၊ တန္ဓနံ တံ ဓနံ၊ တမ္ပာတိ တံ ပါတိ။ နိစ္စံ ပဒမဇ္ဈေ ဂန္တွာ၊ ကွစညာတြပိ သန္တိဋ္ဌတိ။
ယ ¶ ဧဝ ဟိ သဒ္ဒေသု နိဂ္ဂဟီတဿ ဝါ ဉော ဟောတိ။ ယညဒေဝ၊ တညေဝ၊ တဉှိ၊ ဝါတွေဝ? ယံ ယဒေဝ။
သံသဒ္ဒဿ ယံ နိဂ္ဂဟီတံ တဿ ဝါ ဉော ဟောတိ ယကာရေ။ သညမော သံယမော။
နိဂ္ဂဟီတဿ မယဒါ ဟောန္တိ ဝါ သရေ ကွစိ။ တမဟံ၊ တယိဒံ၊ တဒလံ။ ဝါ တွေဝ? တံ အဟံ။
ဧတေ မယဒါ စ အာဂမာ ဟောန္တိ သရေ ဝါ ကွစိ။ တိဝင်္ဂိကံ၊ ဣတော နာယတိ၊ စိနိတွာ၊ တသ္မာတိဟ၊ နိရောဇံ၊ ပုထဂေဝ၊ ဣဓမာဟု၊ ယထယိဒံ၊ အတ္တဒတ္ထံ။ ဝါ တွေဝ? အတ္တတ္ထံ။ ‘အတိပ္ပဂေါ ခေါ တာဝါ’တိ-ပဌမန္တော ပဂသဒ္ဒေါဝ။
ဆသဒ္ဒါ ပရဿ သရဿ ဠကာရော အာဂမော ဟောတိ ဝါ။ ဆဠင်္ဂံ၊ ဆဠာယတနံ။ ဝါတွေဝ? ဆအဘိညာ။
တဒမိနာဒီနိ ¶ သာဓူနိ ဘဝန္တိ။ တံ ဣမိနာ တဒမိနာ၊ သကိံ အာဂါမီ သကဒါဂါမီ၊ ဧကံ ဣဓ အဟံ ဧကမိဒါဟံ၊ သံဝိဓာယ အဝဟာရော သံဝိဒါဝဟာရော၊ ဝါရိနော ဝါဟကော ဝလာဟကော၊ ဇီဝနဿ မူတော ဇီမူတော၊ ဆဝဿ သယနံ သုသာနံ၊ ဥဒ္ဓံ ခမဿ ဥဒုက္ခလံ၊ ပိသိတာသော ပိသာစော၊ မဟိယံ ရဝတီတိ မယူရော၊ ဧဝမညေပိ ပယောဂတော-နုဂန္တဗ္ဗာ၊ ပရေသံ ပိသောဒရာဒိမိဝေဒံ ဒဋ္ဌဗ္ဗံ။
တဝဂ္ဂဝရဏာနံ ကွစိ စဝဂ္ဂဗယဉာ ဟောန္တိ ယထာက္ကမံ ယကာရေ။ အပုစ္စဏ္ဍတာယ၊ တစ္ဆံ၊ ယဇ္ဇေဝံ၊ အဇ္ဈတ္တံ၊ ထညံ၊ ဒိဗ္ဗံ၊ ပယျောသနာ၊ ပေါက္ခရညော။ ကွစိတွေဝ? ရတ္တျာ
ဝဂ္ဂလသေဟိ ပရဿ ယကာရဿ ကွစိ တေ ဝဂ္ဂလသာ ဟောန္တိ။
သက္ကတေ၊ ပစ္စတေ၊ အဋ္ဋတေ၊ ကုပ္ပတေ၊ ဖလ္လတေ၊ အဿတေ။ ကွစိတွေဝ? ကျာဟံ။
ဟဿ ဝိပလ္လာသော ဟောတိ ယကာရေ။ ဂုယှံ။
ဟဿ ဝိပလ္လာသော ဟောတိ ဝါ ဝကာရေ။ ဗဝှာဗာဓော ဗဝှာဗာဓော။
တထနရာနံ ¶ ဋဌဏလာ ဟောန္တိ ဝါ။ ဒုက္ကဋံ၊ အဋ္ဌကထာ၊ ဂဟဏံ၊ ပလိဃော၊ ပလာယတိ။ ဝါတွေဝ? ဒုက္ကတံ။ ကွစိတွေဝ? သုဂတော။
သံယောဂဿ ယော အာဒီဘူတော-ဝယဝေါ တဿ ဝါ ကွစိ လောပေါ ဟောတိ။ ပုပ္ဖံ-သာ ဇာယတေ-ဂိနိ။
ဝိစ္ဆာယမာဘိက္ခညေ စ ယံ ဝတ္တတေ၊ တဿ ဒွေ ရူပါနိ ဟောန္တိ။ ကြိယာယ ဂုဏေန ဒဗ္ဗေန ဝါ ဘိန္နေ အတ္ထေ ဗျာပိတုမိစ္ဆာ ဝိစ္ဆာ။ ရုက္ခံ ရုက္ခံ သိဉ္စတိ၊ ဂါမော ဂါမော ရမဏီယော၊ ဂါမေ ဂါမေ ပါနီယံ၊ ဂေဟေ ဂေဟေ ဣဿရော၊ ရသံ ရသံ ဘက္ခယတိ၊ ကိရိယံ ကိရိယမာရဘတေ။
အတ္ထိယေဝါ-နုပုဗ္ဗိယေပိ ဝိစ္ဆာ မူလေ မူလေ ထူလာ၊ အဂ္ဂေ အဂ္ဂေ သုခုမာ၊ ယဒိ ဟိ ဧတ္ထ မူလဂ္ဂဘေဒေါ န သိယာ၊ အာနုပုဗ္ဗိယမ္ပိ န ဘဝေယျ။ မာသကံ မာသကံ ဣမမှာ ကဟာပဏာ ဘဝန္ထာနံ ဒွိန္နံ ဒေဟီတိ မာသကံ မာသကမိစ္စေတသ္မာ ဝိစ္ဆာဂမျတေ၊ သဒ္ဒန္တရတော ပန ဣမမှာ ကဟာပဏာတိ အဝဓာရဏံ။ ပုဗ္ဗံ ပုဗ္ဗံ ပုပ္ဖန္တိ၊ ပဌမံ ပဌမံ ပစ္စန္တီတျတြာပိ ဝိစ္ဆာဝ။ ဣမေ ဥဘော အဍ္ဎာ ကတရာ ကတရာ ဧသံ ဒွိန္နမဍ္ဎတာ၊ သဗ္ဗေ ဣမေ အဍ္ဎာ ကတမာ ကတမာ ဣမေသံ အဍ္ဎုတာ ဣဟာပိ ¶ ဝိစ္ဆာဝ။ အာဘိက္ခညံ ပေါနောပုညံ ပစတိ ပစတိ၊ ပပစတိ ပပစတိ၊ လုနာဟိ လုနာဟိတွေဝါယံ လုနာတိ၊ ဘုတွာ ဘုတွာ ဂစ္ဆတိ၊ ပဋပဋာ ကရောတိ၊ ပဋပဋာယတိ။
ဝိစ္ဆာယမေကဿ ဒွိတ္တေ ပုဗ္ဗဿ သျာဒိလောပေါ ဟောတိ။ ဧကေကဿ။ ကထံ မတ္ထကမတ္ထကေနာတိ? ‘သျာဒိလောပေါ ပုဗ္ဗဿာ’တိ ယောဂဝိဘာဂါ၊ နာစာတိပ္ပသင်္ဂေါ ယောဂဝိဘာဂါ ဣဋ္ဌပ္ပသိဒ္ဓီတိ။
သဗ္ဗာဒီနံ ဝီတိဟာရေ ဒွေ ဘဝန္တိ ပုဗ္ဗဿ သျာဒိလောပေါ စ။ အညမညဿ ဘောဇကာ၊ ဣတရီတရဿ ဘောဇကာ။
တုရိတေနာပါယဟေတုပဒဿနံ သမ္ဘမော၊ တသ္မိံသတိ ဝတ္ထု ယာဝန္တေဟိ သဒ္ဒေဟိ သော-တ္ထော ဝိညာယတေ၊ တာဝန္တော သဒ္ဒါ ပယုဇ္ဇန္တေ။ သပ္ပော သပ္ပော သပ္ပော၊ ဗုဇ္ဈဿု ဗုဇ္ဈဿု ဗုဇ္ဈဿု၊ ဘိန္နော ဘိက္ခုသင်္ဃော ဘိန္နော ဘိက္ခုသင်္ဃော။
အယမဓိကာရော အာသတ္ထပရိသမတ္တိယာ။ တေန နာတိပ္ပသင်္ဂေါ ဣဋ္ဌပ္ပသိဒ္ဓိ စ။
ဣတိ မောဂ္ဂလ္လာနေ ဗျာကရဏေ ဝုတ္တိယံ
ပဌမော ကဏ္ဍော။