📜
၂။ ဒုတိယော ကဏ္ဍော (သျာဒိ)
၁။ ဒွေ ¶ ဒွေ-ကာနေကေသု နာမသ္မာ သိ ယော၊ အံ ယော၊ နာ ဟိ၊ သ နံ၊ သ္မာ ဟိ၊ သ နံ၊ သ္မိံ သု။
ဧတေသံ ဒွေ ဒွေ ဟောန္တိ ဧကာနေကတ္ထေသု ဝတ္တမာနတော နာမသ္မာ။ မုနိ မုနယော၊ မုနိံ မုနယော၊ မုနိနာ မုနီဟိ၊ မုနိဿ မုနီနံ၊ မုနိသ္မာ မုနီဟိ၊ မုနိဿ မုနီနံ၊ မုနိသ္မိံ မုနီသု၊ ဧဝံ ကုမာရီ ကုမာရိယော၊ ကညာ ကညာယောတိ။ ဧတာနိ သတ္တ ဒုကာနိ သတ္တ ဝိဘတ္တိယော ဝိဘာဂေါ ဝိဘတီတိ ကတွာ၊ ဧတ္ထ သိအမိတီ-ကာရာ-ကာရာ ‘‘ကိမံ သိသု’’ ၂၊၂၀၀ တိ သံကေတတ္ထာ။
ကရီယတိ ကတ္တု ကိရိယာယာ-ဘိသမ္ဗန္ဓီယတီတိ ကမ္မံ၊ တသ္မိံ ဒုတိယာဝိဘတ္တိ ဟောတံ။ ကဋံ ကရောတိ၊ ဩဒနံ ပစတိ၊ အာဒိစ္စံ ပဿတိ။
‘ဩဒနော ပစ္စတီ’တိ ဩဒနသဒ္ဒတော ကမ္မတာ နပ္ပတီယတေ၊ ကိဉ္စရဟိ? အာချာတတော။ ‘ကဋံ ကရောတိ ဝိပုလံ ဒဿနီယ’န္တိ အတ္ထေဝ ဂုဏယုတ္တဿ ကမ္မတာ၊ ဣစ္ဆိတေပိ ကမ္မတ္တာဝ ဒုတိယာ သိဒ္ဓါ ဂါဝုံ ပယော ဒေါဟတိ၊ ဂေါမန္တံ ဂါဝံ ယာစတိ၊ ဂါဝမဝရုန္ဓတိ ဝဇံ၊ မာဏဝကံ မဂ္ဂံ ပုစ္ဆတိ၊ ဂေါမန္တံ ဂါဝံ ဘိက္ခတေ၊ ရုက္ခမဝစိနာတိ ဖလာနိ၊ သိဿံ ဓမ္မံ ဗြူတေ၊ သိဿံ ဓမ္မမနုသာသတီတိ။ ဧဝံ အနိစ္ဆိတေပိ အဟိံ လင်္ဃယတိ၊ ဝိသံ ဘက္ခေတိ။ ယံနေဝိစ္ဆိတံ နာပိ ¶ အနိစ္ဆိတံ၊ တတ္ထာပိ ဒုတိယာ သိဒ္ဓါ။ ဂါမံ ဂစ္ဆန္တော ရုက္ခမူလမုပသပ္ပတိ။
ပထဝိံ အဓိသေဿတိ၊ ဂါမမဓိတိဋ္ဌတိ၊ ရုက္ခမဇ္ဈာသတေတိအဓိသီဌာသာနံပယောဂေ-ဓိကရဏေ ကမ္မဝစနိစ္ဆာ၊ ဝတ္တိစ္ဆာတော ဟိ ကာရကာနိ ဟောန္တိ။ တံ ယထာ-ဝလာဟကာ ဝိဇ္ဇောတတေ၊ ဝလာဟကဿ ဝိဇ္ဇောတတေ၊ ဝလာဟကော ဝိဇ္ဇောတတေ၊ ဝလာဟကေ ဝိဇ္ဇောတတေ၊ ဝလာဟကေန ဝိဇ္ဇောတတေတိ။ ဧဝမဘိနိဝိသဿ ဝါ ဓမ္မမဘိနိဝိသတေ ဓမ္မေ ဝါ။
တထာ ဥပနွဇ္ဈာဝသဿာဘောဇန နိဝုတ္တိဝစနဿ ဂါမမုပဝသတိ၊ ဂ၊ မမနုဝသတိ၊ ပဗ္ဗတမဓိဝသတိ၊ ဃရမာဝသတိ။ အဘောဇနနိဝုတ္တိ ဝစနဿာတိ ကိံ? ဂါမေ ဥပဝသတိ၊ ဘောဇနနိဝုတ္တိံ ကရောတီတိ အတ္ထော။ တပ္ပာနာစာရေပိ ကမ္မတ္တာဝ ဒုတိယာ သိယာ နဒိမ္ပိဝတိ၊ ဂါမံ စရတိ၊ ဧဝံ ‘သစေ မံ အာလပိဿတီ’တိအာဒီသုပိ။ ဝိဟိတာဝ ပတိဓယောဂေ ဒုတိယာ – ‘ပဋိဘန္တု တံ စုန္ဒ ဗောဇ္ဈင်္ဂါ’တိ။ တံ ပတိ ဗောဇ္ဈင်္ဂါ ဘာသန္တူတိ အတ္ထော၊ ယဒါတု ဓာတုနာယုတ္တော ပတိ၊ တဒါ တေနာ-ယောဂါ သမ္ဗန္ဓေ ဆဋ္ဌီဝ ‘တဿ နပ္ပဋိဘာတီ’တိ။ အက္ခေ ဒိဗ္ဗတိ၊ အက္ခေဟိ ဒိဗ္ဗတိ၊ အက္ခေသု ဒိဗ္ဗတီတိ ကမ္မကရဏာဓိကရဏဝစနိစ္ဆာ။
ကိရိယာ၊ ဂုဏ၊ ဒဗ္ဗေဟိ သာကလ္လေန ကာလဒ္ဓါနံ သမ္ဗန္ဓော အစ္စန္တသံယောဂေါ။ တသ္မိံ ဝိညာယမာနေ ကာလသဒ္ဒေဟိ အဒ္ဓအဒ္ဒေဟိ စ ဒုတိယာ ဟောတိ။ မာသမဓီတေ၊ မာသံ ကလျာဏိ၊ မာသံ ¶ ဂုဠဓာနာ၊ ကောသမဓီတေ၊ ကောသံ ကုဋိလာ နဒီ၊ ကောသံ ပဗ္ဗတော။ အစန္တသံယောဂေတိ ကိံ? မာသဿ ဒွီဟမဓီတေ၊ ကောသဿေကဒေသေ ပဗ္ဗတော။
ပုဗ္ဗဏှသမယံ နိဝါသေတွာ၊ ဧကံ သမယံ ဘဂဝါ၊ ဣမံ ရတ္တိံ စတ္တာရော မဟာရာဇာတိ ဧဝမာဒီသု ကာလဝါစီ ဟိ အစ္စန္တသံယောဂတ္တာဝ ဒုတိယာ သိဒ္ဓါ။ ဝိဘတ္တိဝိပလ္လာသေနပိ ဝါ ဗဟုလံဝိဓာနာ။
ဖလပ္ပတ္တိယံ ကိရိယာပရိသမတ္တျပဝဂ္ဂေါ၊ တသ္မိံ ဝိညာယမာနေ ကာလဒ္ဓါနံ ကိရိယာယာစ္စန္တသံယောဂေ တတိယာဘိမတာ၊ သာပိ ကရဏတ္တာဝ သိဒ္ဓါ ‘မာသေနာနုဝါကော-ဓီတော၊ ကောသေနာနုဝါကော-ဓီတော’တိ။ အနပဝဂ္ဂေတု အသာဓကတမတ္တာကရဏတ္တာဘာဝေ ဒုတိယာဝ ‘မာသမဓီတော-နုဝါကော၊ န စာနေ န ဂဟိတော’တိ။
ကာရကမဇ္ဈေ ယေ ကာလဒ္ဓါနဝါစိနော၊ တတော သတ္တမီပဉ္စမိယော အဘိမတာ ‘အဇ္ဇ ဘုတွာ ဒေဝဒတ္တော ဒွိဟေ ဘုဉ္ဇိဿတိ၊ ဒွီဟာ ဘုဉ္ဇိဿတိ၊ အတြဋ္ဌော-ယမိဿာသော ကောသေ လက္ခံ ဝိဇ္ဈတိ၊ ကောသာ လက္ခံ ဝိဇ္ဈတီ’တိ၊ တာပီဟ သကသကကာရကဝစနိစ္ဆာယေဝ သိဒ္ဓါ။
၄။ ဂတိ ဗောဓာဟာရ သဒ္ဒတ္ထာကမ္မက ဘဇ္ဇာဒီနံ ပယောဇ္ဇေ။
ဂမနတ္ထာနံ ဗောဓတ္ထာနံ အာဟာရတ္ထာနံ သဒ္ဒတ္ထာနမကမ္မကာနံ ဘဇ္ဇာဒီနဉ္စ ပယောဇ္ဇေ ကတ္တရိ ဒုတိယာ ဟောတိ။ သာမတ္ထိယာ စ ပယောဇကဗျာပါရေန ကမ္မတာဝဿ ဟောတီတိ ပတီယတေ။ ဂမယတိ မာဏဝကံ ဂါမံ၊ ယာပယတိ မာဏဝကံ ဂါမံ၊ ဗောဓယတိ မာဏဝကံ ဓမ္မံ၊ ဝေဒယတိ မာဏဝကံ ဓမ္မံ၊ ဘောဇယတိ မာဏ-ဝကံ ¶ မောဒကံ၊ အာသယတိ မာဏဝကံ မောဒကံ၊ အဇ္ဈာပယတိ မာဏဝကံ ဝေဒံ၊ ပါဌယတိ မာဏဝကံ ဝေဒံ၊ အာသယတိ ဒေဝဒတ္တံ၊ သာယယတိ ဒေဝဒတ္တံ၊ အညံ ဘဇ္ဇာပေတိ၊ အညံ ကောဋ္ဋာပေတိ၊ အညံ သန္ထရာပေတိ။ ဧတေသမေဝါတိ ကိံ? ပါစေတိ ဩဒနံ ဒေဝဒတ္တေန ယညဒတ္တော။ ပယောဇ္ဇေတိ ကိံ? ဂစ္ဆတိ ဒေဝဒတ္တော။ ယဒါ စရဟိ ဂမယတိ ဒေဝဒတ္တံ ယညဒတ္တော၊ တမပရော ပယောဇေတိ၊ တဒါ ဂမယတိ ဒေဝဒတ္တံ ယညဒတ္တေနေတိ ဘဝိတဗ္ဗံ … ဂမယတိဿာ-ဂမနတ္ထတ္တာ။
ဟရာဒီနံ ပယောဇ္ဇေ ကတ္တရိ ဒုတိယာ ဟောတိ ဝါ။ ဟာရေတိ ဘာရံ ဒေဝဒတ္တံ ဒေဝဒတ္တေနေတိ ဝါ၊ အဇ္ဈောဟာရေတိ သတ္တုံ ဒေဝဒတ္တံ ဒေဝဒတ္တေနေတိ ဝါ၊ ကာရေတိ ကဋံ ဒေဝဒတ္တံ ဒေဝဒတ္တေနေတိ ဝါ ဒဿယတေ ဇနံ ရာဇံ ဇနေနေတိ ဝါ၊ အဘိဝါဒယတေ ဂုရုံ ဒေဝဒတ္တံ ဒေဝဒတ္တေနေတိ ဝါ။
ခါဒါဒီနံ ပယောဇ္ဇေ ကတ္တရိ ဒုတိယာ န ဟောတိ။ ခါဒယတိ ဒေဝဒတ္တေန၊ အာဒယတိ ဒေဝဒတ္တေန၊ အဝှ၊ ပယတိ ဒေဝဒတ္တေန၊ သဒ္ဒါယယတိ ဒေဝဒတ္တေန၊ ကန္ဒယတိ ဒေဝဒတ္တေန၊ နာယယတိ ဒေဝဒတ္တေန။
(၁) ဝဟိဿာနိယန္တုကေ။ ဝါဟယတိ ဘာရံ ဒေဝဒတ္တေန အနိယန္တုကေတိ ကိံ? ဝါဟ-ယတိ ဘာရံ ဗလီဗဒ္ဒေ။
(၂) ဘက္ခိဿာဟိံ ¶ သာယံ။ ဘက္ခယတိ မောဒကေ ဒေဝဒတ္တေန။ အဟိံသာယန္တိ ကိံ? ဘက္ခယတိ ဗလီဗဒ္ဒေ သဿံ။
ဓီအာဒီဟိ ယုတ္တတော ဒုတိယာ ဟောတိ။ ဓိရတ္ထု မံ ပူတိကာယံ၊ အန္တရာ စ ရာဇဂဟံ အန္တရာ စ နာလန္ဒံ၊ သမာဓာနမန္တရေန၊ မုစလိန္ဒမဘိတော သရမိစ္စာဒိ၊ ဆဋ္ဌိယာပဝါဒေါ-ယံ။
၈။ လက္ခဏိတ္ထမ္ဘူတဝိစ္ဆာသွဘိနာ။
လက္ခဏာဒီသွတ္ထေသွဘိနာ ယုတ္တမှာ ဒုတိယာ မဟာတိ။ ရုက္ခမဘိ ဝိဇ္ဇောတတေ ဝိဇ္ဇု၊ သာဓု ဒေဝဒတ္တော မာတရမဘိ၊ ရုက္ခံ ရုက္ခမဘိတိဋ္ဌတိ။
ပတိပရီဟိ ယုတ္တမှာ လက္ခဏာဒီသု ဘာဂေ စတ္ထေ ဒုတိယာ ဟောတိ။ ရုက္ခံ ပတိ ဝိဇ္ဇောတတေ ဝိဇ္ဇု၊ သာဓု ဒေဝဒတ္တော မာတရံ ပတိ၊ ရုက္ခံ ရုက္ခံ ပတိ တိဋ္ဌတိ၊ ယဒေတ္ထ မံ ပတိ သိယာ။ ရုက္ခံ ပရိ ဝိဇ္ဇောတတေ ဝိဇ္ဇု၊ သာဓု ဒေဝဒတ္တော မာတရံ ပရိ၊ ရုက္ခံ ရုက္ခံ ပရိ တိဋ္ဌတိ၊ ယဒေတ္ထ မံ ပရိ သိယာ။
လက္ခဏာဒီသွတ္ထေသွနုနာ ယုတ္တမှာ ဒုတိယာ ဟောတိ။ ရုက္ခမနု ဝိဇ္ဇောတတေ ဝိဇ္ဇု၊ သစ္စကိရိယမနု ဝုဋ္ဌိ ပါဝဿိ၊ ဟေတု စ လက္ခဏံ ဘဝတိ၊ သာဓု ဒေဝဒတ္တော မာတရမနု၊ ရုက္ခံ ရုက္ခမနု တိဋ္ဌတိ၊ ယဒေတ္ထ မံ အနု သိယာ။
သဟတ္ထေ-နုနာ ¶ ယုတ္တမှာ ဒုတိယာ ဟောတိ။ ပဗ္ဗတမနု သေနာ တိဋ္ဌတိ။
ဟီနတ္ထေ-နုနာ ယုတ္တမှာ ဒုတိယာ ဟောတိ။ အနု သာရိပုတ္တံ ပညဝန္တော။
ဟီနတ္ထေ ဥပေန ယုတ္တမှာ ဒုတိယာ ဟောတိ။ ဥပ သာရိပုတ္တံ ပညဝန္ထော။
အာဓိကျတ္ထေ ဥပေန ယုတ္တမှာ သတ္တမီ ဟောတိ။ ဥပ ခါရိယံ ဒေါဏော။
သာမိဘာဝတ္ထေ-ဓိနာ ယုတ္တမှာ သတ္တမီ ဟောတိ။ အဓိ ဗြဟ္မဒတ္တေ ပဉ္စာလာ၊ အဓိ ပဉ္စာလေသု ဗြဟ္မဒတ္တော။
ကတ္တရိ ကရဏေ စ ကာရကေ တတိယာ ဟောတိ။ ပုရိသေန ကတံ၊ အသိနာ ဆိန္ဒတိ။ ပကတိယာ-ဘိရူပေါ၊ ဂေါတ္ထေန ဂေါတမော၊ သုမေဓော နာမ နာမေန၊ ဇာတိယာ သတ္တဝဿိကောတိ ဘူဓာတုဿ သမ္ဘဝါ ကရဏေ ဧဝ တတိယာ။ ဧဝံ သမေန ဓာဝတိ ဝိသမေန ¶ ဓာဝတိ၊ ဒွိဒေါဏေန ဓညံ ကိဏာတိ၊ ပဉ္စကေန ပသဝေါ ကိဏာတီတိ။
သဟတ္ထေန ယောဂေ တတိယာ သိယာ။ ပုတ္တေန သဟ ဂတော၊ ပုတ္တေန သဒ္ဓိံ အာဂတော၊ တတိယာပိ ဆဋ္ဌီဝ အပ္ပဓာနေ ဧဝ ဘဝတိ။
လက္ခဏေ ဝတ္တမာနတော တတိယာ သိယာ။ တိဒဏ္ဍကေန ပရိဗ္ဗာဇကမဒ္ဒက္ခီ၊ အက္ခိနာ ကာဏော၊ တေန ဟိ အင်္ဂေန အင်္ဂိနော ဝိကာရော လက္ခီယတေ။
တက္ကိရိယာ ယောဂ္ဂေ တတိယာ သိယာ။ အန္နေန ဝသတိ၊ ဝိဇ္ဇာယ ယသော။
ဣဏေ ဟေတုမှိ ပဉ္စမီ ဟောတိ ဝါ။ သတသ္မာ ဗဒ္ဓါ၊ သတေန ဝါ။
ပရင်္ဂဘူတေ ဟေတုမှိ ပဉ္စမီ ဟောတိ ဝါ။ ဇဠတ္တာ ဗဒ္ဓါ ဇဠတ္တေန ဝါ၊ ပညာယ မုတ္တော၊ ဟုတွာ အဘာဝတောအနိစ္စာ၊ သင်္ခါရနိရောဓာ ဝိညာဏနိရောဓော။
၂၂။ ဆဋ္ဌီ ¶ ဟေတွတ္ထေဟိ။
ဟေတွတ္ထဝါစီဟိ ယောဂေ ဟေတုမှိ ဆဋ္ဌီ သိယာ။ ဥဒရဿ ဟေတု၊ ဥဒရဿ ကာရဏာ။
ဟေတွတ္ထေဟိ ယောဂေ သဗ္ဗာဒီဟိ သဗ္ဗာ ဝိဘတ္တိယော ဟောန္တိ။ ကော ဟေတု၊ ကံ ဟေတုံ၊ ကေန ဟေတုနာ၊ ကဿ ဟေတုဿ၊ ကသ္မာ ဟေတုသ္မာ၊ ကဿ ဟေတုဿ၊ ကသ္မိံ ဟေတုသ္မိံ၊ ကိံ ကာရဏံ၊ ကေန ကာရဏေန၊ ကိံ နိမိတ္တံ၊ ကေန နိမိတ္တေန၊ ကိံ ပယောဇနံ၊ ကေန ပယောဇနေန ဣစ္စေဝမာဒိ။ ဟေတွတ္ထေဟီတွေဝ? ကေန ကတံ။
ယဿ သမ္မာ ပဒီယတေ တသ္မိံ စတုတ္ထီ သိယာ။ သင်္ဃဿ ဒဒါတိ။ အာဓာရဝိဝက္ခာယံ သတ္တမီပိ သိယာ သင်္ဃေ ဒေဟိ။
တဿေ-ဒံ တဒတ္ထံ၊ တဒတ္ထဘာဝေ ဇောတနီယေ နာမသ္မာ စတုတ္ထီ သိယာ။ သီတဿ ပဋိဃာတာယ၊ အတ္ထာယ ဟိတာယ (သုခါယ) ဒေဝမနုဿာနံ၊ နာလံ ဒါရဘရဏာယ၊ ယူပါယ ဒါရု၊ ပါကာယ ဝဇတီတွေဝမာဒိ။
ကဿ သာဒုံ န ရုစ္စဘိ၊ မာ-ယသ္မန္တာနမ္ပိ သင်္ဃဘေဒေါ ရုစ္စိတ္ထ၊ ခမတိ သင်္ဃဿ၊ ဘတ္တမဿ နစ္ဆာဒေသီတိ ဆဋ္ဌီ သမ္ဗန္ဓဝစနိစ္ဆာယံ၊ န စေဝံ ဝိရောဓော သိယာ သဒိသရူပတ္တာ၊ ဧဝံဝိဓေသု စ သမ္ဗန္ဓဿ သဒ္ဒိကာနုမတတ္တာ ¶ ၊ ကဿ ဝါ တွံ ဓမ္မံ ရောစေသီတိ အတ္ထမတ္တေ ပဌမာ။
ဧဝမညာပိ ဝိဓညယျာ၊ ပရတောပိ ယထာဂမံ။
ရညော သတံ ဓာရေတိ၊ ရညော ဆတ္တံ ဓာရေတီတိ သမ္ဗန္ဓေ ဆဋ္ဌီ၊ ဧဝံ ရညော သိလာဃတေ၊ ရညော ဟနုတေ၊ ရညော ဥပတိဋ္ဌတေ၊ ရညော သပတေ၊ ဒေဝါပိ တဿ ပိဟယန္တိ တာဒိနော၊ တဿ ကုဇ္ဈ မဟာဝီရ၊ ယဒိဟံ တဿ ပကုပ္ပေယျံ၊ ဒုဟယတိ ဒိသာနံ မေဃော၊ ယော မိတ္တာနံ န ဒူဘတိ၊ ယော အပ္ပဒုဋ္ဌဿ နရဿ ဒုဿတိ၊ ကျာဟံ အယျာနံ အပရဇ္ဈာမိ၊ ဣဿယန္တိ သမဏာနံ တိတ္ထိယာ၊ ဓမ္မေန နယမာနာနံ ကာ ဥသူယာ ရညော ဘာဂျမာရဇ္ဈတိ၊ ရညော ဘာဂျမိက္ခတေ၊ တေန ယာစိတော အယာစိတော ဝါ တဿ ဂါဝေါ ပဋိသုဏာတိ၊ ဂါဝေါ အာသုဏာတိ၊ ဘဂဝတော ပစ္စဿောသုံ၊ ဟောတု ပတိဂိဏာတိ၊ ဟောတွနုဂိဏာတိ၊ အာရောစယာမိ ဝေါ ပတိဝေဒယာမိ ဝေါ၊ ဓမ္မံ တေ ဒေသေဿာမိ၊ ယထာ ဝေါ ဘဂဝါ ဗျာကရေယျ၊ အလံ တေ ဣဓ ဝါသေန၊ ကိံ တေ ဇဋာဟိ ဒုမ္မေဓ၊ အရဟတိ မလ္လော မလ္လဿာတိ။
ဇီဝိတံ တိဏာယပိ န မညမာနောတိ တာဒတ္ထျ စတုတ္ထီ၊ တိဏေန ယော အတ္ထော တဒတ္ထာယပီတိ အတ္ထော၊ ‘‘ယော စ သီတဉ္စ ဥဏှဉ္စ၊ တိဏာ ဘိယျော န မညတိ’’ တိဏမိဝ ဇီဝိတံ မညမာနောတိ သဝိသယာဝ ဝိဘတ္တိယော။ သဂ္ဂါယ ဂစ္ဆတီတိ တာဒတ္ထျေ စတုတ္ထီ၊ ယော ဟိ သဂ္ဂံ ဂစ္ဆတိ တဒတ္ထံ တဿ ဂမနန္တိ၊ ကမ္မဝစနိစ္ဆာယန္တု ဒုတိယာဝ သဂ္ဂံ ဂစ္ဆတီတိ။
အာယု ¶ ဘောတော ဟောတု၊ စိရံ ဇီဝိတံ၊ ဘဒ္ဒံ ကလျာဏံ အတ္ထံ ပယောဇနံ၊ ကုသလံ အနာမယံ၊ ဟိတံ ပထျံ သုခံ သာတံ ဘောတော ဟောတု၊ သာဓု သမ္မုတိ မေတဿ၊ ပုတ္တဿာဝိကရေယျ ဂုယှမတ္ထံ၊ တဿ မေ သက္ကော ပါတုရဟောသိ၊ တဿ ပဟိဏေယျ၊ ဘိက္ခူနံ ဒုတံ ပါဟေသိ၊ ကပ္ပတိ သမဏာနံ အာယောဂေါ၊ ဧကဿ ဒွိန္နံ တိဏ္ဏံ ဝါ ပဟောတိ၊ ဥပမံ တေ ကရိဿာမိ၊ အဉ္ဇလိံ တေ ပဂ္ဂဏှာမိ၊ တဿ ဖာသု၊ လောကဿတ္ထော၊ နမော တေ ပုရိသာဇည၊ သောတ္ထိ တဿ၊ အလံ မလ္လော မလ္လဿ၊ သမတ္ထော မလ္လော မလ္လဿ၊ တဿ ဟိတံ၊ တဿ သုခံ၊ သွာဂတံ တေ မဟာရာဇာတိ သဗ္ဗတ္ထ ဆဋ္ဌီ သမ္ဗန္ဓေ၊ ဧဝံဝိဓမညမ္ပေဝ ဝိညေယျံ ယထာဂမံ။
ပဒတ္ထာဝဓိသ္မာ ပဉ္စမီဝိဘတ္တိ ဟောတိ။ ဂါမသ္မာ အာဂစ္ဆတု၊ ဧဝံ စောရသ္မာ ဘာယတိ၊ စောရသ္မာ ဥတ္တသတိ၊ ဩရသ္မာ တာယတိ၊ စောရသ္မာ ရက္ခတီတိ၊ သစေ ဘာယထ ဒုက္ခဿ၊ ပမာဒေ ဘယဒဿိဝါ၊ တသန္တိ ဒဏ္ဍဿာတိ ဆဋ္ဌီ သတ္တမိယောပိ ဟောန္တေဝ သမ္ဗန္ဓာဓာရဝစနိစ္ဆာယံ။
အဇ္ဈေနာ ပရာဇေတိ၊ ပဋိပက္ခေ ပရာဇေတီတိ သဝိသယာဝ ဝိဘတ္တိယော။ သစေ ကေဝဋ္ဋဿ ပရဇ္ဇိဿာမီတိ ဆဋ္ဌီပိ ဟောတိ သမ္ဗန္ဓဝစနိစ္ဆာယံ။ ယဝေဟိ ဂါဝေါ ဝါရေတိ၊ ပါပါ စိတ္တံ နိဝါရယေ၊ ကာကေ ရက္ခတိ တဏ္ဍုလာတိ သဝိသယေဝ ပဉ္စမီ။ စိတ္တံ ရက္ခေထ မေဓာဝီတိ ဒုတိယာဝ ဒိဿတိ ကမ္မတ္ထေ။ ဥပဇ္ဈာယာ အန္တရဓာယတိ ¶ ၊ ဥပဇ္ဈာယာ အဓိတေ၊ ကာမတော ဇာယတေ သောကောတိ သဝိသယေ ပဉ္စမီ။
တတ္ထေဝ-န္တရဓာယိ သု၊ နဋဿ သုဏောတိ၊ ပဒုမံ တတ္ထ ဇာယေထာတိ သတ္တမီဆဋ္ဌိယောပိ ဟောန္တေဝ သဝိသယေ။ ဟိမဝန္တာ ပဘဝတိ ဂင်္ဂါ၊ ပါဏာတိပါတာ ဝိရမဿု ခိပ္ပံ၊ အညော ဒေဝဒတ္တာ၊ ဘိန္နော ဒေဝဒတ္တာတိ သဝိသယေဝ ပဉ္စမီ။ ဧဝံ အာရာ သော အာသဝက္ခယာ၊ ဣတရော ဒေဝဒတ္တာ၊ ဥဒ္ဓံ ပါဒတလာ အဓော ကေသမတ္ထကာ၊ ပုဗ္ဗော ဂါမာ၊ ပုဗ္ဗေဝ သမ္ဗောဓာ၊ တတော ပရံ၊ တတော အပရေန သမယေန၊ တတုတ္တရိန္တိ။ သမ္ဗန္ဓဝစနိစ္ဆာယံ ဆဋ္ဌီပိ ပုရတော ဂါမဿ၊ ဒက္ခိဏတော ဂါမဿ၊ ဥပရိ ပဗ္ဗတဿ၊ ဟေဋ္ဌာ ပါသာဒဿာတိ။ ပါသာဒမာရုယှ ပေက္ခတိ ပါသာဒါ ပေက္ခတိ၊ အာသနေ ဥပဝိသိတွာ ပေက္ခတိ အာသနာ ပေက္ခတီတိ အဝဓိဝစနိစ္ဆာယံ ပဉ္စမီ။
ပုစ္ဆာနာချာနေသု ကုတော ဘဝံ? ပါတဋလိပုတ္တသ္မာတိ။ တထာ ဒေသကာလမာနေပိ ပါဋလိပုတ္တသ္မာ ရာဇဂဟံ သတ္တ ယောဇနာနိ၊ သတ္တသု ယောဇနေသူတိ ဝါ။ ဧဝံ ဣတော တိဏ္ဏံ မာသာန-မစ္စယေနာတိ၊ ကိစ္ဆာလဒ္ဓန္တိ ဂုဏေ ပဉ္စမီ။ ကိစ္ဆေန မေ အဓိဂတန္တိ ဟေတုမှိ ကရဏေ ဝါ တတိယာ။ ဧဝံ ထောကာ မုတ္တော၊ ထောကေန မုတ္တောတိ။ ထောကံ စလတီတိ ကိရိယာဝိသေသနေ ကမ္မနိ ဒုတိယာ။
ဒူရန္တိ ကတ္ထယောဂေပိ သဝိသယေဝ ပဉ္စမီဆဋ္ဌိယော သိယုံ၊ ဒူရံ ဂါမသ္မာ၊ အန္တိကံ ဂါမသ္မာ၊ ဒူရံ ဂါမဿ၊ အန္တိကံ ဂါမဿာတိ၊ ဒူရန္တိ ကတ္ထေဟိ တု သဗ္ဗာဝ သဝိသယေ သိယုံ ဗာဓကာဘာဝါ ဒူရော ဂါမော၊ အန္တိကော ဂါမောတွေဝမာဒိ။
ကေစိ ¶ ပနာဟု ‘အသတ္တဝစနဟေတေဟိ ပါဋိပဒိကတ္ထေ ဒုတိယာတတိယာပဉ္စမီသတ္တမိယော၊ သတ္တဝစနေဟိ တု သဗ္ဗာဝ သဝိသယေ’တိ၊ တေ ပနညေဟေဝ ပဋိက္ခိတ္တာ။ ဒူရံ မဂ္ဂေါ၊ အန္တိကံ မဂ္ဂေါတိ ကိရိယာဝိသေသနံ… ဘူဓာတုဿ ဂမ္မမာနတ္တာ။ ဝိသုဒ္ဓါ လောဘနီယေဟိ ဓမ္မေဟိ၊ ပရိမုတ္တော သော ဒုက္ခသ္မာ ဝိဝိစ္စေဝ ကာမေဟိ၊ ဂမ္ဘီရတော စ ပုထုလတော စ ယောဇနံ၊ အာယာမေန ယောဇနံ၊ တတော ပဘုတိ၊ ယတော သရာမိ အတ္တာနန္တိ သဝိသယေဝ ဝိဘတ္တိယော။
ဝဇ္ဇနေ ဝတ္တမာနေဟိ အပပရီဟိ ယောဂေ ပဉ္စမီ ဟောတိ။ အပ သာလာယ အာယန္တိ ဝါဏိဇာ၊ ပရိ သာလာယ အာယန္တိ ဝါဏိဇာ၊ သာလံ ဝဇ္ဇေတွာတိ အတ္ထော။ ဝဇ္ဇနေတိ ကိံ? ရုက္ခံ ပရိဝိဇ္ဇောတတေ ဝိဇ္ဇု။ အာပါဋလိပုတ္တသ္မာ ဝဿိ ဒေဝေါတိ မရိယာဒါ-ဘိဝိဓီသွဝဓိ ဝိသယေဝ ပဉ္စမီ၊ ဝိနာ ပါဋလိပုတ္တေန သဟ ဝေတိ ဝိသေသော၊ ဧဝံ ယာဝ ပါဋလိပုတ္တသ္မာ ဝဿိ ဒေဝေါတိ။
ပဋိနိဓိမှိ ပဋိဒါနေ စ ဝတ္တမာနေန ပတိနာ ယောဂေ နာမသ္မာ ပဉ္စမီ ဝိဘတ္တိ ဟောတိ။ ဗုဒ္ဓသ္မာ ပတိ သာရိပုတ္တော၊ ဃတမဿ တေသသ္မာ ပတိ ဒဒါတိ၊ ပဋိနိဓိပဋိဒါနေသူတိ ကိံ? ရုက္ခံ ပတိ ဝိဇ္ဇောတတေ။
ရိတေသဒ္ဒေန ¶ ယောဂေ နာမသ္မာ ဒုတိယာ ဟောတိ ပဉ္စမီ စ။ ရိတေ သဒ္ဓမ္မံ၊ ရိတေ သဒ္ဓမ္မာ။
ဝိနာ-ညတြသဒ္ဒေဟိ ယောဂေ နာမသ္မာ တတိယာ စ ဟောတိ ဒုတိယာ ပဉ္စမိယော စ။ ဝိနာ ဝါတေန၊ ဝိနာ ဝါတံ၊ ဝိနာ ဝါတသ္မာ၊ အညတြ ဧကေန ပိဏ္ဍပါတနီဟာရကေန၊ အညတြ ဓမ္မံ၊ အညတြ ဓမ္မာ။
ဧတေဟိ ယောဂေ တတိယာ ဟောတိ ပဉ္စမီ စ။ ပုထဂေဝ ဇနေန၊ ပုထဂေဝ ဇနသ္မာ၊ ဇနေန နာနာ၊ ဇနသ္မာ နာနာ။
ကိရိယာဓာရ ဘူတ ကတ္တု ကမ္မာနံ ဓာရဏေန ယော ကိရိယာယာဓာရော တသ္မိံ ကာရကေ နာမသ္မာ သတ္တမီ ဟောတိ။ ကဋေ နိသီဒတိ (ဒေဝဒတ္တော)၊ ထာလိယံ ဩဒနံ ပစတိ၊ အာကာသေ သကုနာ၊ ဘိလေသု တေလံ၊ ဂင်္ဂါယံ ဝဇော။
နိမိတ္တတ္ထေ သတ္တမီ ဟောတိ။ အဇိနမှိ ဟညတေ ဒီပိ၊ မုသာဝါဒေ ပါစိတ္ထိယံ။
ယဿ ¶ ဘာဝေါ ဘာဝန္တရဿ လက္ခဏံ ဘဝတိ၊ တတော သတ္တမီ ဟောတိ။ ဂါဝီသု ဒုယှမာနာသု ဂတော၊ ဒုဒ္ဓါသု အာဂတော။ ဘာဝေါတိ ကိံ? ယော ဇဋာဟိ သော ဘုဉ္ဇတိ။ ဘာဝလက္ခဏန္တိ ကိံ? ယော ဘုဉ္ဇတိ သော ဒေဝဒတ္တော၊ ‘‘အကာလေ ဝဿတိ တဿ၊ တာလေ တဿ န ဝဿတီ’’တိ ဝိသယသတ္တမီ။
ယဿ ဘာဝေါ ဘာဝန္တရဿ လက္ခဏံ ဘဝတိ၊ တတော ဆဋ္ဌီ ဘဝတိ သတ္တမီ စ အနာဒရေ ဂမျမာနေ။ ‘‘အာကောဋယန္တော သော နေတိ၊ သိဝိရာဇဿ ပေက္ခတော’’၊ ‘‘မစ္စု ဂစ္ဆတိ အာဒါယ၊ ပေက္ခမာနေ မဟာဇနေ’’။
ဂုန္နံ သာမီတိ သမ္ဗန္ဓေ ဆဋ္ဌီ၊ ဂေါသု သာမီတိ ဝိသယသတ္တမီ၊ ဧဝံ ဂုန္နမိဿရော၊ ဂေါသွိဿရော၊ ဂုန္နံ အဓိပတိ၊ ဂေါသု အဓိပတိ၊ ဂုန္နံ ဒါယာဒေါ၊ ဂေါသု ဒါဟာဒေါ၊ ဒုန္နံ သက္ခိ၊ ဂေါသု သက္ခိ၊ ဂုန္နံ ပတိဘူ၊ ဂေါသု ပတိဘူ၊ ဂုန္နံ ပသူတော၊ ဂေါသု ပသူတော၊ ကုသလာ နစ္စဂီတဿ၊ ကုသလာ နစ္စဂီတေ၊ အာယုတ္တော ကဋကရဏဿ၊ အာယုတ္တော ကဋကရဏေတိ။
တထာဓာရဝစနိစ္ဆာယံ သတ္တမီ၊ ဘိက္ခူသု အဘိဝါဒေန္တိ၊ မုဒ္ဓနိ ဓုမ္ဗိတွာ၊ ဗာဟာသု ဂဟေတွာ၊ ဟတ္ထေသု ပိဏ္ဍာယ စရန္တိ၊ ပထေသု ဂစ္ဆန္တိ၊ ကဒလီသု ဂဇေ ရက္ခန္တီတိ။ ဉာဏသ္မိံ ပသန္နောတိ ဝိသယသတ္တမီ၊ ဉာဏေန ပသန္နောတိ ကရဏေ တတိယာ၊ ဧဝံ ဉာဏသ္မိံ ဥဿုက္ကော ဉာဏေန ဥဿုက္ကောတိ။
ဇာတိဂုဏကိရိယာဟိ ¶ သမုဒါယတေကဒေသဿ ပုထက္ကရဏံ နိဒ္ဓါရဏံ။ ယတော တံ ကရီယတိ၊ တတော ဆဋ္ဌီသတ္တမိယော ဟောန္တိ။ သာလယော သူကဓညာနံ ပထျတမာ၊ သာလယော သူကဓညေသု ပထျတမာ၊ ကဏှာ ဂါဝီနံ သမ္ပန္နခီရတမာ၊ ကဏှာ ဂါဝီသု သမ္ပန္နခီရတမာ၊ ဂစ္ဆတံ ဓာဝန္တော သီဃတမော၊ ဂစ္ဆန္တေသု ဓာဝန္တော သီဃတမော။ သီလမေဝ သုတာ သေယျောတိ အဝဓိမှိယေဝ ပဉ္စမီ။
နာမဿာဘိဓေယျမတ္တေ ပဌမာဝိဘတ္တိ ဟောတိ။ ရုက္ခော။ ဣတ္ထိ ပုမာ နပုံသကန္တိ လိင်္ဂမ္ပိ သဒ္ဒတ္ထောဝ၊ တထာ ဒေါဏော ခါရီ အာဠှကန္တိ ပရိမာဏမ္ပိ သဒ္ဒတ္ထောဝ၊ ဧကော ဒွေ ဗဟဝေါတိ သင်္ချာပိ သဒ္ဒတ္ထောဝ။
သတော သဒ္ဒေနာဘိမုခီကရဏမာမန္တဏံ။ တသ္မိံ ဝိသယေ ပဌမာ ဝိဘတ္တိ ဟောတိ။ ဘောပုရိသ၊ ဘောက္ကတ္ထိ၊ ဘော နပုံသက။
ကိရိယာကာရကသဉ္ဇာတော အဿေဒမ္ဘာဝဟေတုကော သမ္ဗန္ဓော နာမ။ တသ္မိံ ဆဋ္ဌီ ဝိဘတ္တိ ဟောတိ။ ရညော ပုရိသော၊ သရတိ ရဇ္ဇဿာတိ သမ္ဗန္ဓေ ဆဋ္ဌီ၊ ရဇ္ဇသမ္ဗန္ဓိနိံ သတိံ ကရောတီတိ အတ္ထော၊ ကမ္မဝစနိစ္ဆာရန္တု ဒုတိယာဝ သရတိ ရဇ္ဇံ။ တထာ ရဇကဿ ဝတ္ထံ ¶ ဒဒါတိ၊ ပဟရတော ပိဋ္ဌိံ ဒဒါတိ၊ ဗာလော ပူရတိ ပါပဿ၊ အမစ္စေ တာတ ဇာနာဟိ၊ ဓီရေ အတ္ထဿ ကောဝိဒေ၊ ဒိဝသဿ တိက္ခတ္တုံ၊ သကိံ ပက္ခဿ၊ ပူရံ ဟိရညသုဝဏ္ဏဿ ကုမ္ဘန္တွေဝမာဒိ။
ကိတကပ္ပယောဂေ ကက္တုကမ္မေသု ဗဟုလံ သမ္ဗန္ဓဝစနိစ္ဆာယံ ဆဋ္ဌီ၊ သာဓု သမ္မတော ဗဟုဇနဿ၊ သုပ္ပဋိဝိဒ္ဓါ ဗုဒ္ဓါနံ ဓမ္မဓာတု၊ ဓမ္မဿ ဂုတ္တော မေဓာဝီ၊ အမတံ တေသံ ပရိဘုတ္တံ၊ တဿ ဘဝန္တိ ဝတ္တာရော၊ အဝိသံဝါဒကော လောကဿ၊ အလဇ္ဇီနံ နိဿာယ၊ စတုန္နံ မဟာဘူတာနံ ဥပါဒါယ ပသာဒေါတွေဝမာဒိ။
ကတ္တုကမ္မဝစနိစ္ဆာယန္တု တတိယာ ဒုတိယာယော စ၊ သဉ္စတ္တော ပိတရာ အဟံ၊ သရသိ တွံ ဧဝရူပိံ ဝါစံ ဘာသိတာ၊ ဘဂဝန္တံ ဒဿနာယတွေဝမာဒိ။
တုလျတ္ထေန ယောဂေ ဆဋ္ဌီ ဟောတိ တတိယာ ဝါ၊ တုလျော ပိတု၊ တုလျော ပိတရာ၊ သဒိသော ပိတု၊ သဒိသော ပိတရာ၊ ဣဟ ကထံ တတိယာ န ဟောတိ? အဇ္ဇုနဿ တုလာ နတ္ထိ၊ ကေသဝဿုပမာ န စေတိ၊ နေတေ တုလျတ္ထာ၊ ကိဉ္ဇရဟိ တုလျာနမောပမ္မတ္ထာ။
အကာရန္ထတော နာမသ္မာ ယောနံ ဋာဋေ ဟောန္တိ ယထာက္ကမံ၊ ဋကာရာ သဗ္ဗဒေသတ္ထာ၊ ဗုဒ္ဓါ ဗုဒ္ဓေ၊ အတောတိ ကိံ? ကညာယော၊ ဣတ္ထိယော၊ ဝဓုယော၊ ဣဓ ကသ္မာ န ဘဝတိ အဂ္ဂယော။ အဝိဓာနသာမတ္ထိယာ။
အကာရန္တတော ¶ နာမသ္မာ နိနံ ဋာဋေ ဝါ ဟောန္တိ ယထာက္ကမံ။ ရူပါ၊ ရူပေ၊ ရူပါနိ၊ အတောတွေဝ အဋ္ဌီနိ။
အကာရန္တတော နာမသ္မာ သ္မာသ္မိန္နံ ဋာဋေ ဝါ ဟောန္တိ ယထာက္ကမံ။ ဗုဒ္ဓါ ဗုဒ္ဓသ္မာ၊ ဗုဒ္ဓေ ဗုဒ္ဓသ္မိံ၊ အတောတွေဝ အဂ္ဂိသ္မာ အဂ္ဂိသ္မိံ။
အကာရန္တတော ပရဿ သဿ စတုတ္ထိယာ အာယော ဟောတိ ဝါ။ ဗုဒ္ဓါယ ဗုဒ္ဓဿ၊ ဘိယျော တာဒတ္ထျေယေဝါယမာယော ဒိဿတေ၊ ကွစိဒေဝညတ္ထ၊ အတောတွေဝ ဣသိဿ၊ စတုတ္ထိယာတိ ကိံ? ဗုဒ္ဓဿ မုခံ၊ အတ္တတ္ထန္တိ အတ္ထသဒ္ဒေန သမာသော။
သဗ္ဗာဒိတောပိ သ္မာသ္မိံသာနံ ဋာဋေအာယာ ဟောန္တေဝ… နိရုတ္တိကာရာနုမတတ္တာ ဗုဒ္ဓဝစနေ သန္ဒဿနဝတော စ၊ တတြောဒမုဒါဟရဏံ ‘အသ္မာ လောကာ ပရမှာ စ၊ ဥဘယာ ဓံသတေ နရော’၊ ‘တျာဟံ မန္တေ ပရတ္ထဒ္ဓါ’၊ ‘ယာယေဝ ခေါ ပနတ္ထာယ အာဂစ္ဆေယျာထော တမေဝတ္ထံ သာဓုကံ မနသိကရေယျာထော’တိ။
ဃပတော နာဒီနမေကသ္မိံ ယယာ ဟောနိ ယထာက္ကမံ။ ကညာယ၊ ရတ္တိယာ၊ ဣတ္ထိယာ၊ ဓေနုယာ၊ ဝဓုယာ၊ ဧကသ္မိန္တိ ကိံ? ကညာဟိ၊ ရတ္တီဟိ။
ဃပသညေဟိ ¶ တေတိမာမူဟိ နာဒီနမေကသ္မိံဿာ ဝါ ဟောတိ၊ တဿာ ကတံ၊ တဿာ ဒီယတေ၊ တဿာ နိဿဋံ၊ တဿာ ပရိဂ္ဂဟော၊ တဿာ ပတိဋ္ဌိတံ၊ တာယ ဝါ၊ ဧဝံ ဧတိဿာ ဧတာယ၊ ဣမိဿာ ဣမာယ၊ အမုဿာ အမုယာ၊ ဧတေဟီတိ ကိံ? သဗ္ဗာယ၊ နာဒီနံ တွေဝ? သာ၊ ဃပတောတွေဝ? တာဟိ အမူဟိ။
၄၇။ နံမှိ နုက ဒွါဒီနံ သတ္တရသန္နံ။
ဒွါဒီနံ သတ္တရသန္နံ သင်္ချာနံ နုက ဟောတိ နံမှိ ဝိဘတ္တမှိ၊ ဒွိန္နံ စတုန္နံ၊ ပဉ္စန္နံ၊ ဧဝံ ယာဝ အဋ္ဌာရသန္နံ၊ ဥကာရော ဥစ္စာရဏတ္ထော၊ ကကာရော အန္တာဝယဝတ္ထော၊ တေန နံမှိ န ဒီဃော။
နံမှိ ဗဟုနော ကတိဿ စ နုက ဟောတိ၊ ဗဟုန္နံ၊ ကတိန္နံ။
ဈသညာ တိတော နံဝစနဿ ဏ္ဏံဏ္ဏန္နံ ဟောတိ၊ တိဏ္ဏံ၊ တိဏ္ဏန္နံ၊ ဈာတိ ကိံ တိဿန္နံ။
ဥဘာ နံဝစနဿ ဣန္နံ ဟောတိ၊ ဥဘိန္နံ။
နာမသ္မာ သဿ သုဉ ဟောတိ၊ ဗုဒ္ဓဿ၊ ဒွိသကာရပါဌေန သိဒ္ဓေ လာဃဝတ္ထမိဒံ။
၅၂။ ဿံဿာဿာယေသွိတရေ ကညေဘိမာနမိ။
ဿမာဒီသွိတရာဒီနမိ ¶ ဟောတိ၊ ဣတရိဿံ၊ ဣတရိဿာ၊ ဧကိဿံ၊ ဧကိဿာ၊ အညိဿံ၊ အညိဿာ၊ ဧတိဿံ၊ ဧတိဿာ၊ ဧတိဿာယ၊ ဣမိဿံ၊ ဣမိဿာ၊ ဣမိဿာယ၊ ဧသွိတိ ကိံ? ဣတရာယ၊ ဧသန္တိ ကိံ? သဗ္ဗဿံ၊ သဗ္ဗဿာ။
ဿမာဒီသု တဿာ ဝါ ဣ ဟောတိ၊ တိဿံ တဿံ၊ တိဿာ တဿာ၊ တိဿာယ တဿာယ၊ ဿံဿာဿာယေသွိတွေဝ? တာယ။
တာဧတာဣမာတော သဿ ဿာယော ဟောတိ ဝါ။ တဿာယ တာယ၊ ဧတိဿာယ ဧတာယ၊ ဣမိဿာယ ဣမာယ။
ရတျာဒီဟိ သ္မိနော ဋော ဟောတိ ဝါ၊ ရတ္တော ရတ္တိယံ၊ အာဒေါ အာဒိသ္မိံ။
ဥဘဿ သုဟိသွော ဟောတိ။ ဥဘောသု၊ ဥဘောဟိ။
လ္တုပ္ပစ္စယန္တာနံ ပိတာဒီနံ စ အာ ဟောတိ သိမှိ။ ကတ္တာ၊ ပိတာ။ ပိတု၊ မာတု၊ ဘာဝု၊ မီတု၊ ဒုဟိတု၊ ဇာမာတု၊ နတ္တု၊ ဟောတု၊ ပေါတု။
လ္တုပိတာဒီနံ ¶ အ ဟောတိ ဂေ အာ စ၊ ဘော ကတ္တ၊ ဘော ကတ္တာ၊ ဘော ပိတ၊ ဘော ပိတာ။
အ ဣ ဥ ဣစ္စေသံ ဝါ ဒီဃော ဟောတိ ဂေ ပရေ တိလိင်္ဂေ။ ဘော ပုရိသာ၊ ဘော ပုရိသ၊ ဘော အဂ္ဂီ၊ ဘော အဂ္ဂိ၊ ဘော ဘိက္ခူ၊ ဘော ဘိက္ခူ။
ဃတော ဗြဟ္မာဒိတော စ ဂဿေ ဝါ ဟောတိ။ ဘောတိ ကညေ၊ ဘောတိ ကညာ၊ ဘော ဗြဟ္မေ၊ ဘော ဗြဟ္မ၊ ဘော ခတ္တေ၊ ဘော ခတ္တ၊ ဘော ဣသေ၊ ဘော ဣသိ၊ ဘော သခေ၊ ဘော သခ။ သခိ သခီတိ ဣတ္ထိယံ သိဒ္ဓမေဝ။ အာကတိဂဏော-ယံ၊ ဧဝမညတြာပိ။
အမ္မာဒီဟိ ဂဿေ န ဟောတိ။ ဘောတိ အမ္မာ၊ ဘောတိ အန္နာ၊ ဘောတိ အမ္ဗာ။
အမ္မာဒီနံ ဂေ ရဿော ဟောတိ ဝါ။ ဘောတိ အမ္မ၊ ဘောတိ အမ္မာ။
ဿမာဒီသု ဃော ရဿော ဟောတိ။ တဿံ၊ တဿာ၊ တဿာယ၊ တံ၊ သဘတိံ၊ ဧသွိတိ ကိံ? တာယ၊ သဘာယ။
ဧကဝစနေ ¶ ယောသု စ ဃဩကာရန္တဝဇ္ဇိတာ နံ နာမာနံ ရဿော ဟောတိ တိလိင်္ဂေ။ ဣတ္ထိံ၊ ဣတ္ထိယာ၊ ဣတ္ထိယော၊ ဝဓုံ ဝဓုယာ၊ ဝဓုယော၊ ဒဏ္ဍိံ၊ ဒဏ္ဍိနာ၊ ဒဏ္ဍိနော၊ သယမ္ဘုံ၊ သယမ္ဘုနာ၊ သယမ္ဘုဝေါ၊ အဃော နန္တိ ကိံ? ကညာယ၊ ကညာယော၊ ဩဂ္ဂဟဏမုတ္တရတ္ထံ။
အဃောနံ ဂေ ဝါ ရဿော ဟောတိ တိလိင်္ဂေ၊ ဣတ္ထိ၊ ဣတ္ထီ၊ ဝဓု၊ ဝဓူ၊ ဒဏ္ဍိ၊ ဒဏ္ဍီ၊ သယမ္ဘု၊ သယမ္ဘူ။ အဃောနံတွေဝ? ဘောတိ ကညာ၊ ဘော ဂေါ။
နပုံသကဝဇ္ဇိတဿ နာမဿ သိသ္မိံ ရဿော န ဟောတိ။ ဣတ္ထီ၊ ဒဏ္ဍီ၊ ဝဓူ၊ သယမ္ဘူ။ သိသ္မိန္တိ ကိံ? ဣတ္ထိံ၊ အနပုံသကဿာတိ ကိံ? ဒဏ္ဍိ ကုလံ။
ဂသိဟိနံဝဇ္ဇိတာသု ဝိဘတ္တီသု ဂေါသဒ္ဒဿ ဂါဝဂဝါ ဟောန္တိ။ (ဂါဝံ၊ ဂဝံ)၊ ဂါဝေါ၊ ဂဝေါ၊ ဂါဝေန၊ ဂဝေန၊ ဂါဝဿ၊ ဂဝဿ၊ ဂါဝသ္မာ၊ ဂဝသ္မာ၊ ဂါဝေ၊ ဂဝေ။ အဂသိဟိနံသူတိ ကိံ? ဘော ဂေါ၊ ဂေါ တိဋ္ဌတိ၊ ဂေါဟိ၊ ဂေါနံ။
ဂေါဿ သုမှိ ဂါဝဂဝါ ဟောန္တိ ဝါ။ ဂါဝေသု၊ ဂဝေသု၊ ဂေါသု။
ဂေါဿ ¶ သေ ဝါ ဂဝံ ဟောတိ သဟ သေန။ ဂဝံ၊ ဂါဝဿ၊ ဂဝဿ။
နံဝစနေန သဟ ဂေါဿ ဂုန္နံ ဟောတိ ဂဝံစ ဝါ။ ဂုန္နံ၊ ဂဝံ၊ ဂေါနံ။
ဂေါတော နာဿ အာ ဟောတိ ဝါ။ ဂါဝါ၊ ဂဝါ၊ ဂါဝေန၊ ဂဝေန။
အံဝစနေ ဂေါဿ ဂါဝှ ဝါ ဟောတိ။ ဝါဝှံ၊ ဂါဝံ၊ ဂဝံ။ ဂေါဿ ဂေါဏာဒေသော န ကတော… သဒ္ဒန္တရတ္တာ။
ပသညီတော အံဝစနဿ ယံ ဝါ ဟောတိ။ ဣတ္ထိယံ၊ ဣတ္ထိံ။ ပီတောတိ ကိံ? ဒဏ္ဍိံ၊ ရတ္တိံ။
ဈသညီတော အံဝစနဿ နံ ဝါ ဟောတိ။ ဒဏ္ဍိနံ၊ ဒဏ္ဍိံ။ ကထံ ‘ဗုဒ္ဓံ အာဒိစ္စဗန္ဓုန’န္တိ? ယောဂဝိဘာဝါ။ ဈာတိ ကိံ? ဣတ္ထိံ။ ဤတိ ကိံ? အဂ္ဂိံ။
ဈီတော ¶ ယောနံ နောနေ ဝါ ဟောန္တိ ယထာက္ကမံ ပုလ္လိင်္ဂေ။ ဒဏ္ဍီနော၊ ဒဏ္ဍိနေ၊ ဒဏ္ဍီ၊ ဈီတော တွေဝ? ဣတ္ထိယော၊ ပုမေတိ ကိံ? ဒဏ္ဍီနိ ကုလာနိ။
ဈီတော ယောနံ နော ဝါ ဟောတိ ပုလ္လိင်္ဂေ။ ဒဏ္ဍိနော တိဋ္ဌန္တိ၊ ဒဏ္ဍိနော ပဿ၊ ဒဏ္ဍီ ဝါ။
ဈီတော သ္မိံဝစနဿ နိ ဟောတိ ဝါ၊ ဒဏ္ဍိနိ၊ ဒဏ္ဍိသ္မိံ၊ ဈီတော တွေဝ? အဂ္ဂိသ္မိံ။
အမ္ဗုအာဒီဟိ သ္မိနောနိ ဟောတိ ဝါ၊ ဖလံ ပတတိ အမ္ဗုနိ၊ ပုပ္ဖံ ယထာ ပံသုနိ အာတပေ ကတံ၊ ဝါတွေဝ? အမ္ဗုမှိ၊ ပံသုမှိ။
ကမ္မာဒိတော သ္မိနော နိ ဟောတိ ဝါ။ ကမ္မနိ ကမ္မေ။ ကမ္မ၊ စမ္မ၊ ဝေသ္မ၊ ဘသ္မ (အသ္မ)၊ ဗြဟ္မ၊ အတ္တ၊ အာတုမ၊ ဃမ္မ၊ မုဒ္ဓ။ ကမ္မာဒိတောတိ ကိံ? ဗုဒ္ဓေ။
ကမ္မာဒိတော နာဝစနဿ ဧနော ဝါ ဟောတိ။ ကမ္မေန၊ ကမ္မနာ၊ စမ္မေန၊ စမ္မနာ၊ ကမ္မာဒိတောတွေဝ? ဗုဒ္ဓေန။
ဈလတော ¶ သဿ နော ဝါ ဟောတိ။ အဂ္ဂိနော အဂ္ဂိဿ၊ ဒဏ္ဍိနော ဒဏ္ဍိဿ၊ ဘိက္ခုနော ဘိက္ခုဿ၊ သယမ္ဘုနော သယမ္ဘုဿ၊
ကထံ ‘ယော စ သိဿော မဟာမုနေ’ တိ? (၃) ‘‘ဣတော ကွစိ သဿ ဋာနုဗန္ဓော’’တိ ဗြဟ္မာဒီသု ပါဌာ သဿ ဧ ဋာနုဗန္ဓော။
ဈလတော သ္မာဿ နာ ဟောတိ ဝါ။ အဂ္ဂိနာ အဂ္ဂိသ္မာ၊ ဒဏ္ဍိနာ ဒဏ္ဍိသ္မာ၊ ဘိက္ခုနာ ဘိက္ခုသ္မာ၊ သယမ္ဘုနာ သယမ္ဘုသ္မာ။
လတော ယောနံ ဝေါ ဟောတိ ဝါ ပုလ္လိင်္ဂေ။ ဘိက္ခဝေါ ဘိက္ခူ၊ သယမ္ဘုဝေါ သယမ္ဘူပုမေတိ ကိံ? အာယူနိ။
ဇန္တွာဒိတော ယောနံ နော ဟောတိ ဝေါ စ ဝါ ပုလ္လိင်္ဂေ။ ဇန္တုနော၊ ဇန္တဝေါ ဇန္တုယော၊ ဂေါတြဘုနော၊ ဂေါတြဘုဝေါ ဂေါတြဘူ။ သဟဘုနော၊ သဟဘုဝေါ သဟဘူ။
ကူပစ္စယန္တတော ယောနံ နော ဝါ ဟောတိ ပုလ္လိင်္ဂေ၊ ဝိဒုနော ဝိဒူ၊ ဝိညုနော ဝိညူ၊ သဗ္ဗညုနော သဗ္ဗညူ။
အမုသဒ္ဒတော ယောနံ လောပေါဝ ဟောတိ ပုလ္လိင်္ဂေ၊ အမူ၊ ပုမေတွေဝ? အမုယော အမူနိ။ ဝေါပဝါဒေါယံ။
အမုသ္မာ ¶ သဿ နော န ဟောတိ၊ အမုဿ၊ နောတိ ကိံ? အမုယာ။
ယောနံ လောပေ နိသု စ ဒီဃော ဟောတိ၊ အဋ္ဌီ အဋ္ဌီနိ၊ ယောလောပနိသူတိ ကိံ? ရတ္တိယော။
ဧသု နာမဿ ဒီဃော ဟောတိ။ အဂ္ဂီသု၊ အဂ္ဂီနံ၊ အဂ္ဂီဟိ။
ပဉ္စာဒီနံ စုဒ္ဒသန္နံ သုနံဟိသွ ဟောတိ။ ပဉ္စသု၊ ပဉ္စန္နံ၊ ပဉ္စဟိ၊ ဆသု၊ ဆန္နံ၊ ဆဟိ၊ ဧဝံ ယာဝ အဋ္ဌရသာ။
ယွာဒီသု န္တုဿ အ ဟောတိ။ ဂုဏဝန္တာ၊ ဂုဏဝန္တံ၊ ဂုဏဝန္တေ၊ ဂုဏဝန္တေန ဣစ္စာဒိ၊ ယွာ-ဒေါတိ ကိံ? ဂုဏဝါ တိဋ္ဌတိ။
အံသေသု န္တပ္ပစ္စယဿ ဋ ဟောတိ ဝါ န္တုဿ စ။ ယံ ယံ ဟိ ရာဇ ဘဇတိ သန္တံဝါယဒိ ဝါ အသံ၊ ကိစ္စာ-နကုဗ္ဗဿ ကရေယျ ကိစ္စံ၊ ဟိမဝံဝ ပဗ္ဗတံ၊ သုဇာတိမန္တောပိ အဇာတိမဿ။ ယောဂဝိဘာဂေနာညတြာပိ။ စက္ခုမာ အန္ဓိတာ ဟောန္တိ၊ ဝဂ္ဂုမုဒါတီရိယာ ပန ဘိက္ခူ ဝဏ္ဏဝါ ဟောန္တိ။
ဈသညဿ ¶ ဣဿ ယောသု ဝါ ဋ ဟောတိ ပုလ္လိင်္ဂေ။ အဂ္ဂယော အဂ္ဂီ၊ ဈဂ္ဂဟဏံ ကိံ? ဣကာရန္တသမုဒါယဿ ဋ မာ သိယာဘိ၊ ရတ္တိယော၊ ဣဂ္ဂဟဏံ ကိံ? ဒဏ္ဍိနော၊ ပုမေတိ ကိံ? အဋ္ဌီနိ။
လသညဿ ဥဿ ဝေဝေါသု ဋ ဟောတိ။ ဘိက္ခဝေ၊ ဘိက္ခဝေါ၊ ဝေဝေါသူတိ ကိံ? ဇန္တုယော၊ ဥဂ္ဂဟဏံ ကိံ? သယမ္ဘုဝေါ။
ယောမှိ ကွစိ လသညဿ ဥဿ ဝါ ဋ ဟောတိ။ ဟေတယော၊ နန္ဒန္တိ တံ ကုရယော ဒဿနေန၊ အဇ္ဇေဝ တံ ကုရယော ပါပယတု။ ဝါတိ ကိံ? ဟေတုယော။
လသညတော ဥတော ယောဿာလပနေ ဝေဝေါ ဟောန္တိ ဝါ ပုလ္လိင်္ဂေ။ ဘိက္ခဝေ၊ ဘိက္ခဝေါ ဘိက္ခူ၊ ပုမေတိ ကိံ အာယူနိ၊ အာလပနေတိ ကိံ? ဇန္တုယော တိဋ္ဌန္တိ၊ လုတောတွေဝ? ဓေနုယော၊ သယမ္ဘုဝေါ။
နာမသ္မာ ပရေသံ သ္မာဟိသ္မိန္နံ မှာ ဘိမှိ ဝါ ဟောန္တိ ယထာက္ကမံ။ ဗုဒ္ဓမှာ ဗုဒ္ဓသ္မာ၊ ဗုဒ္ဓေဘိ ဗုဒ္ဓေဟိ၊ ဗုဒ္ဓမှိ ဗုဒ္ဓသ္မိံ၊ ဗဟုလာဓိကာရာအပဝါဒဝိသယေပိ၊ ဒသသဟဿိမှိ ဓာတုယာ။
အကာရန္တဿ ¶ သုဟိသွေ ဟောတိ။ ဗုဒ္ဓေသု ဗုဒ္ဓေဟိ။
အကာရန္တာနံ သဗ္ဗာဒီနံ ဧ ဟောတိ နံမှိ သုဟိသု စ။ သဗ္ဗေသံ၊ သဗ္ဗေသု၊ သဗ္ဗေဟိ၊ သဗ္ဗာဒီနန္တိ ကိံ? ဗုဒ္ဓါနံ၊ အဿေတွေဝ? အမူသံ။ သဗ္ဗ ကတရ ကတမ ဥဘယ ဣတရ အည အညတရ အညတမ (၄) ‘‘ပုဗ္ဗပရာ-ဝရဒက္ခိဏုတ္တရာ-ဓရာနိ ဝဝတ္ထာယမသညာယံ’’ (ပါ၊၁၊၁၊၃၄) ယ တျ တ ဧတ ဣမ အမု ကိံ ဧက တုမှ အမှ။
သဗ္ဗာဒိတော နံဝစနဿ သံသာနံ ဟောန္တိ။ သဗ္ဗေသံ၊ သဗ္ဗေသာနံ။
သဗ္ဗာဒီနံ ဃပတော သဿ ဿာ ဝါ ဟောတိ၊ သဗ္ဗဿာ သဗ္ဗာယ၊ ပဂ္ဂဟဏမုတ္တရတ္ထံ။
သဗ္ဗာဒီနံ ဃပတော သ္မိနော ဿံ ဝါ ဟောတိ၊ သဗ္ဗဿံ သဗ္ဗာယ၊ အမုဿံ အမုယာ။
ဃပတော သ္မိနော ယံ ဝါ ဟောတိ၊ ကညာယံ ကညာယ၊ ရတ္တိယံ ရတ္တိယာ၊ ဝဓုယံ ဝဓုယာ၊ သဗ္ဗာယံ သဗ္ဗာယ၊ အမုယံ အမုယာ။
သဘာပရိသာဟိ ¶ သ္မိနော တိံ ဝါ ဟောတိ၊ သဘတိံ သဘာယ၊ ပရိသတိံ ပရိသာယ။
ဧဟိ သ္မိနော သိ ဟောတိ ဝါ၊ ပဒသိ ပဒသ္မိံ၊ ဗိလသိ ဗိလသ္မိံ။
ပဒါဒီဟိ နာဿ သာ ဟောတိ ဝါ၊ ပဒသာ ပဒေန၊ ဗိလသာ ဗိလေန။
ဧဟိ နာဿ သာ ဟောတိ ဝါ၊ ကောဓသာ ကောဓေန၊ အတ္ထသာ အတ္ထေန။
အကာရန္တတော ပရဿ နာဝစနဿ ဧနာဒေသော ဟောတိ၊ ဗုဒ္ဓေန၊ အတောတိ ကိံ? အဂ္ဂိနာ။
အကာရန္တတော နာမသ္မာ သိဿ ဩ ဟောတိ၊ ဗုဒ္ဓါ၊ အတောတွေဝ? အဂ္ဂိ။
အကာရန္တတော နာမသ္မာ သိဿ ဧ ဟောတိ ဝါ ကွစိ၊ ဝနပ္ပဂုမ္ဗေ ယထာ ဖုဿိတဂ္ဂေ။ အပဝါဒဝိသယေပိ ဗဟုလံဝီဓာနာ-သုခေ ဒုက္ခေ ¶ ။ ဝါတိ ကိံ? ဝနပ္ပဂုမ္ဗော ကွစီတိ ကိံ? ပက္ခေ သဗ္ဗတ္ထ မာ ဟောတု။
အကာရန္တတော နာမသ္မာ သိဿ အံ ဟောတိ နပုံသကလိင်္ဂေ။ ရူပံ။
အကာရန္တတော နာမသ္မာ ယောနံ နိ ဟောတိ နပုံသကေ။ သဗ္ဗာနိ ရူပါနိ၊ နိစ္စဝိဓာနေ ဖလံ ဧကစ္စာဒိသဗ္ဗာဒီနံ ပဌမာယံ။
ဈလတော ယောနံ နိ ဟောတိ ဝါ နပုံသကေ၊ အဋ္ဌီနိ အဋ္ဌီ၊ အာယူနိ အာယူ။
ဈလတော ယောနံ လောပေါ ဟောတိ၊ အဋ္ဌီ၊ အာယူ၊ အဂ္ဂီ၊ ဘိက္ခူ၊ ဈလာတွေဝ? အဂ္ဂယော။ ပဂေဝ ကသ္မာ န ဟောတိ? အန္တရင်္ဂတ္တာ အကာရဿ။
ဇန္တုဟေတူဟိ ဤကာရန္တေဟိ ဃပ သညေဟိ စ ပရေသံ ယောနံ ဝါ လောပေါ ဟောတိ၊ ဇန္တူ ဇန္တုယော၊ ဟေတူ ဟေတုယော၊ ဒဏ္ဍီ ဒဏ္ဍိယော၊ ကညာ ကညာယော၊ ရတ္တီ ရတ္တိယော၊ ဣတ္ထီ ဣတ္ထိယော၊ ဓေနူ ဓေနုယော၊ ဝဓူ ဝဓုယော။
ပသညဿ ¶ ဣဝဏ္ဏဿ လောပေါ ဟောတိ ဝါ ယကာရေ၊ ရတျော ရတျာ၊ ရတျံ၊ ပေါက္ခရညော၊ ပေါက္ခရညာ၊ ပေါက္ခရညံ၊ ဝါ တွေဝ? ရတ္တိယော၊ ပဿာတိ ကိံ? ဒဏ္ဍိယော၊ ဣဝဏ္ဏဿာတိ ကိံ? ဓေနုယော ဝဓုယော။ ကထံ ‘အနုညာတော အဟံ မတျာ’တိ? ‘ယေ ပဿာ’တိ ယောဂဝိဘာဂါ။
နာမသ္မာ ဂသီနံ လောပေါ ဟောတိ ဝိဇ္ဈန္တရာဘာဝေ၊ ဘော ပုရိသ၊ အယံ၊ ဒဏ္ဍီ။
အဝိဇ္ဇမာနသင်္ချေဟိ ပရာသံ သဗ္ဗာသံ ဝိဘတ္တီနံ လောပေါ ဟောတိ၊ စ ဝါ ဧဝ ဧဝံ၊ ဧတသ္မာယေဝ လိင်္ဂါ အသင်္ချေဟိ သျာဒျုပ္ပတ္တိ အနုမီယတေ။
ဧကတ္ထီဘာဝေ သဗ္ဗာသံ ဝိဘတ္တီနံ လောပေါ ဟောတိ ဗဟုလံ၊ ပုတ္တီယတိ၊ ရာဇပုရိသော၊ ဝါသိဋ္ဌော၊ ကွစိ န ဟောတိ ဗဟုလံ ဝိဓာနာ-ပရန္တပေါ၊ ဘဂန္ဒရော၊ ပရဿပဒံ၊ အတ္တနောပဒံ၊ ဂဝမ္ပတိ၊ ဒေဝါနံပိယတိဿော၊ အန္တေဝါသီ၊ ဇနေသုတော မမတ္တံ မာမကော။
အမာဒေကတ္ထာ ပုဗ္ဗံ ယဒေကတ္ထံ တတော ပရာသံ သဗ္ဗာသံ ဝိဘတ္တီနံ လောပေါ ဟောတိ။ အဓိတ္ထိ။ ဣဓ န ဟောတိ ဗဟုလံ
ဝိဓာနာ ¶ ယထာပတ္ထီယာ၊ ယထာပရိသာယ၊ ပုဗ္ဗသ္မာတိ ကိံ? ဂါမဂတော။
အမာဒေကတ္ထာ ပုဗ္ဗံ ယဒေကတ္ထမကာရန္တံ၊ တတော ပရာသံ သဗ္ဗာသံ ဝိဘတ္တီနံ လောပေါ န ဟောတိ၊ အန္တု၊ ဘဝတျပဉ္စမျာ၊ ဥပကုမ္ဘံ၊ အပဉ္စမိယာတိ ကိံ? ဥပကုမ္ဘာ အာနယ။
အမာဒေကတ္ထာ ပုဗ္ဗံ ယဒေကတ္ထမကာရန္တံ၊ တတော ပရာသံ တတိယာသတ္ထမီနံ ဝါ အံ ဟောတိ၊ ဥပကုမ္ဘေန ကတံ၊ ဥပကုမ္ဘံ ကတံ၊ ဥပကုမ္တေ နိဓေဟိ၊ ဥပကုမ္ဘံ နိဓေဟိ။
နာမှိ ရာဇဿိ ဝါ ဟောတိ၊ သဗ္ဗဒတ္တေန ရာဇိနာ၊ ဝါတွေဝ? ရညာ။
ရာဇဿ ဦ ဟောတိ ဝါ သုနံဟိသု၊ ရာဇူသု ရာဇေသု၊ ရာဇူနံ ရညံ၊ ရာဇူဟိ ရာဇေဟိ။
ဣမသဒ္ဒဿာနိတ္ထိယံ ဋေ ဟောတိ ဝါ သုနံဟိသု၊ ဧသု ဣမေသု၊ ဧသံ ဣမေသံ၊ ဧသိ ဣမေဟိ၊ အနိတ္ထိယန္တိ ကိံ? ဣမာသု၊ ဣမာသံ၊ ဣမာဟိ။
ဣမသဒ္ဒဿာနိတ္ထိယံ ¶ နာမှိ အနဣမိဣစ္စာဒေသာ ဟောန္တိ၊ အနေန ဣမီနာ၊ အနိတ္ထိယံတွေဝ? ဣမာယ။
ဣမသဒ္ဒဿာနပုံသကဿ အယံ ဟောတိ သိမှိ၊ အယံ ပုရိသော၊ အယံ ဣတ္ထီ၊ အနပုံသကဿာတိ ကိံ? ဣမံ။
တျတေတာနမနပုံသကာနံ တဿ သော ဟောတိ သိမှိ၊ သျော ပုရိသော၊ သျာ ဣတ္ထီ၊ ဧဝံ သော၊ သာ၊ ဧသော၊ ဧသာ၊ အနပုံသကဿေတွေဝ? တျံ၊ တံ၊ ဧတံ။
အနပုံသကဿာမုဿ မကာရဿ သော ဟောတိ သိမှိ၊ အသု ပုရိသော၊ အသု ဣတ္ထီ။
အမုဿ မဿ ကေ ဝါ သော ဟောတိ၊ အသုကော အမုကော၊ အသုကာ အမုကာ၊ အသုကံ အမုကံ၊ အသုကာနိ အမုကာနိ။
တသဒ္ဒဿ တဿ နော ဝါ ဟောတိ သဗ္ဗာသု ဝိဘတ္တီသု၊ နေ တေ နာယော တာယော၊ နံ တံ၊ နာနိ တာနိ ဣစ္စာဒိ။
၁၃၂။ ဋ သသ္မာသ္မိံဿာယဿံဿာသံမှာမှိသွိ မဿ စ။
သာဒီသွိမဿ ¶ တတဿ စ ဋော ဝါ ဟောတိ၊ အဿ ဣမဿ၊ အသ္မာ ဣမသ္မာ၊ အသ္မိံ ဣမသ္မိံ၊ အဿာယ ဣမိဿာယ၊ အဿံ ဣမိဿံ၊ အဿာ ဣမိဿာ၊ အာသံ ဣမာသံ၊ အမှာ ဣမမှာ၊ အမှိ ဣမမှိ၊ အဿ တဿ၊ အသ္မာ တသ္မာ၊ အသ္မိံ တသ္မိံ၊ အဿာယ တဿာယ၊ အဿံ တဿံ၊ အဿာ တဿာ၊ အာသံ တာသံ၊ အမှာ တမှာ၊ အမှိ တမှိ၊ ဿာယာဒိဂ္ဂဟဏမာဒေသန္တရေ မာ ဟောတူတိ။
ဣသိသ္မာ သိဿ ဋေ ဝါ ဟောတိ၊ ‘ယော နွဇ္ဇ ဝိနယေ ကင်္ခံ၊ အတ္ထဓမ္မဝိဒူ ဣသေ’၊ ဝါတွေဝ? ဣသိ။
ဣသိသ္မာ ပရဿ ဒုတိယာယောဿ ဋေ ဝါ ဟောတိ၊ ‘သမဏေ ဗြာဟ္မဏေ ဝန္ဒေ၊ သမ္ပန္နစရဏေ ဣသေ’၊ ဝါတွေဝ? ဣသယော ပဿ၊ ဒုတိယဿာတိ ကိံ? ဣသယော တိဋ္ဌန္တိ။
အကာရန္တေဟိ ဧကစ္စာဒီဟိ ယောနံ ဋေ ဟောတိ၊ ဧကစ္စေ တိဋ္ဌန္တိ၊ ဧကစေ ပဿ၊ အတောတိ ကိံ? ဧကစ္စာယော၊ ဧဝံ ဧသ သ ပဌမ။
ဧကစ္စာဒီဟိ ပရဿ နိဿ ဋာ န ဟောတိ၊ ဧကစ္စာနိ။
၁၃၇။ သဗ္ဗာဒီဟီ ¶ ။
သဗ္ဗာဒီဟိ ပရဿ နိဿ ဋာ န ဟောတိ၊ သဗ္ဗာနိ။
အကာရန္တေဟိ သဗ္ဗာဒီဟိ ယောနမေဋ ဟောတိ၊ သဗ္ဗေ တိဋ္ဌန္တိ၊ သဗ္ဗေ ပဿ၊ အတောတွေဝ? သဗ္ဗာယော။
နာမဘူတေဟီ အပ္ပဓာနေဟိ စ သဗ္ဗာဒီဟိ ယံ ဝုတ္တံ၊ ယဉ္စာညံ သဗ္ဗာဒိကာရိယံ၊ တံ န ဟောတိ၊ တေ သဗ္ဗာ၊ တေ ပိယသဗ္ဗာ၊ တေ အတိသဗ္ဗာ။
တတိယတ္ထေန ယောဂေ သဗ္ဗာဒီဟိ ယံ ဝုတ္တံ၊ ယဉ္စာညံ သဗ္ဗာဒိ ကာရိယံ၊ တံ န ဟောတိ၊ မာသေန ပုဗ္ဗာနံ မာသပုဗ္ဗာနံ။
စတ္ထသမာသဝိသယေ သဗ္ဗာဒီဟိ ယံ ဝုတ္တံ၊ ယဉ္စာညံ သဗ္ဗာဒိကာရိယံ၊ တံ န ဟောတိ၊ ဣက္ခိဏုတ္တရပုဗ္ဗာနံ၊ သမာသေတိ ကိံ? အမုသဉ္စ တေသဉ္စ ဒေဟိ။
ဧတ္ထသမာသဝိသဓယ သဗ္ဗာဒီဟိ ယဓဿဋ ဝုတ္တော၊ တဿ ဝါ ဟောတိ၊ ပုဂ္ဂုတ္တရေ၊ ပုဗ္ဗုတ္တရာ။
ဧတေဟိ ¶ ပုဗ္ဗာဒီဟိ ဆဟိ သဝိသယေ ဧဋ ဝါ ဟောတိ၊ ပုဗ္ဗေ ပုဗ္ဗာ၊ ပရေ ပရာ၊ အပရေ အပရာ၊ ဒက္ခိဏေ ဒက္ခိဏာ၊ ဥတ္တရေ ဥတ္တရာ၊ အဓရေ အဓရာ၊ ဆဟိတိကိံ? ယေ။
၁၄၄။ မနာဒီဟိ သ္မိံသံနာသ္မာနံ သိသောဩသာသာ။
မနာဒီဟိ သ္မိမာဒီနံ သိသောဩသာသာ ဝါ ဟောန္တိ ယထာက္ကမံ၊ မနသိ မနသ္မိံ၊ မနသော မနဿ၊ မနော မနံ၊ မနသာ မနေန၊ မနသာ မနသ္မာ၊ ကထံ ‘ပုတ္တော ဇာတော အစေတသော၊ ဟိတွာ ယာတိ သုမေဓသော၊ သုဒ္ဓုတ္တရဝါသသာ၊ ဟေမကပ္ပနဝါသသေ’တိ? သကတ္ထေဏတ္ထာ။ မနတမ တပ တေဇ သိရ ဥရ ဝစ ဩဇ ရဇယသ ပယ (၆) ‘‘သရဝယာ-ယဝါသစေတာ ဇလာသယာက္ခယလောဟပဋမနေသု’’။
သန္ထသဒ္ဒဿ သဗ ဘဝတိ ဘကာရေ၊ သဗ္ဘိ။
၁၄၆။ ဘဝတော ဝါ ဘောန္တော ဂယောနာသေ။
ဘဝန္တသဒ္ဒဿ ဘောန္တာဒေသော ဝါ ဟောတိ ဂယောနာသေ၊ ဘောန္တ ဘဝံ၊ ဘောန္တော ဘဝန္တော၊ ဘောတာ ဘဝတာ၊ ဘောတော ဘဝတော၊ ဘော ဣတိ အာမန္တဏေ နိပါတော ‘ကုတော နု အာဂစ္ဆထ ဘော တယော ဇနာ’၊ ဧဝံ ဘဝန္တတိ၊ ဘဒ္ဒေတိ သဒ္ဒန္ထရေန သိဒ္ဓံ၊ သဒ္ဓန္ထဣတိ ဒဿ ဒွိဘာဝေန။
အဂ္ဂိသ္မာ သိဿ နိ ယောတိ ဝါ၊ အဂ္ဂိနိ အဂ္ဂိ။
သိမှိ ¶ န္တပ္ပစ္စယဿ အံ ဟောတိ ဝါ၊ ဂစ္ဆံ ဂစ္ဆန္တော။
ဘူဓာတုတော န္တဿ အံ ဟောတိ သိမှိ နိစ္စံ ပုနဗ္ဗိဓာနာ၊ ဘဝံ။
သိမှိ မဟန္တာရဟန္တာနံ န္တဿ ဋာ ဝါ ဟောတိ၊ မဟာ မဟံ၊ အရဟာ အရဟံ။
သိမှိ န္တုဿ ဋာ ဟောတိ၊ ဂုဏဝါ။
န္တုဿ အံငံ ဟောန္တိ သိမှိ နပုံသကေ၊ ဂုဏဝံ ကုလံ၊ ဂုဏဝန္တံ ကုလံ၊ နပုံသကေတိံ ကိံ? သီလဝါ ဘိက္ခု။
ဟိမဝတော သိမှီ န္တုဿ ဩ ဝါ ဟောတိ၊ ဟိမဝန္တော ဟိမဝါ။
ရာဇာဒီဟိယုဝါဒီဟိ စ သိဿ အာ ဟောတိ၊ ရာဇာ၊ ယုဝါ။ ရာဇ ဗြဟ္မ သခ အတ္တ အာတုမ (၇) ‘‘ဓမ္မော ဝါညတ္ထေ’’ ဒဠှဓမ္မာ၊ အသ္မ၊ (၈) ‘‘ဣမော ဘာဝေ’’ အဏိမာ၊ (မဟိမာ၊ ဂရိမာ) လဃိမာ၊ ယုဝ သာ သုဝါ မဃဝ ပုမ ဝတ္တဟ။
ရာဇာဒီနံ ¶ ယုဝါဒီနံ စ အာနင ဟောတိ ဝါ အံမှိ၊ ရာဇာနံ ရာဇံ၊ ယုဝါနံ ယုဝံ။
ရာဇာဒီဟိ ယုဝါဒီဟိ စ ယောနံ အာနော ဝါ ဟောတိ၊ ရာဇာနော ယုဝါနော၊ ဝါ တွေဝ? ရာဇာ ရာဇေ၊ ယုဝါ ယုဝေ။
သခတော ယောန မာယော နော ဟောန္တိ ဝါ အာနော စ၊ သခါယော၊ သခိနော၊ သခါနော၊ ဝါ တွေဝ? သခါ၊ သခေ။
သခတော သ္မိနော ဋေ ဟောတိ၊ သခေ၊ နိစ္စတ္ထော-ယမာရမ္ဘော။
သခဿ ဣ ဟောတိ နောနာသေသု၊ သခိနော၊ သခိနာ၊ သခိဿ။
သခဿ ဣ ဝါ ဟောတိ သ္မာနံသု၊ သခိသ္မာ သခသ္မာ၊ သခီနံ သခါနံ။
သခဿ အာရင ဝါ ဟောတိ ယောသွံဟိသု သ္မာနံသု စ၊ သခါရော သခါယော၊ သခါရေသု သခေသု၊ သခါရံ သခံ၊ သခါရေဟိ သခေဟိ၊ သခါရာ သခါ၊ သခသ္မာ၊ သခါရာနံ သခါနံ။
လ္တုပ္ပစ္စယန္တာနံ ¶ ပိတာဒီနံ စ အာရင ဟောတီ သတော-ညတြ၊ ကတ္တာရော၊ ပိတရော၊ ကတ္တာရံ၊ ပိတရံ၊ ကတ္တာရာ၊ ပိတရာ၊ ကတ္တရိ၊ ပိတရိ၊ အသေတိ ကိံ? ကတ္တုနော၊ ပိတုနော။
နမှိ လ္တုပိတာဒီနုမာနင ဝါ ဟောတိ၊ ကတ္တာရာနံ ကတ္တူနံ၊ ဒိတရာနံ ပိတုန္နံ။
နမှိ လ္တုပိတာဒီနမာ ဝါ ဟောတီ၊ ကတ္တာနံ ကတ္တူနံ၊ ပီတာနံ ပိတုန္နံ။
လ္တုပိတာဒိဟိ သဿ လောပေါ ဝါ ဟောတိ၊ ကတ္ထု ကတ္ထုနော၊ သကမန္တာတု သကမန္ဓာတုနော၊ ပီတု ပိတုနော။
သုဟိသု လ္တုပိတာဒီနမာရင ဝါ ဟောတိ၊ ကတ္တာရေသု ကတ္တူသု၊ ပိတရေသု ပိတူသု၊ ကတ္တာရေဟိ ကတ္တူဟိ၊ ပိတရေဟိ ပီတူဟီ။
ယောသု နဒိသဒ္ဒဿ အာမ ဝါ ဟောတိ၊ နဇ္ဇာယော နဒိယော။
ကတိမှာ ဓယာနံ ဋိ ဟောတိ၊ ကတိ တိဋ္ဌန္တိ၊ ကတိ ပဿ။
ပဉ္စာဒီဟိ ¶ စုဒ္ဒသဟိ သံချာဟိ ယောနံ ဋော ဟောတိ ပဉ္စ၊ ပဉ္စ၊ ဧဝံ ယာဝ အဋ္ဌာရသာ။ ပဉ္စာဒီဟီတိ ကိံ? ဒွေ၊ တယော၊ စတ္တာရော၊ စုဒ္ဓသဟီတိ ကိံ? ဒွေ ဝိသတိယော။
ဥဘဂေါဟိ ယောနံ ဋော ဟောတိ၊ ဥဘော၊ ဥဘော၊ ဂါဝေါ၊ ဂါဝေါ၊ ကထံ ‘ဣမေကရတ္ထိံ ဥဘယော ဝသာမာ’တိ? ဋောမှိ ယကာရာဂမော။
အာရဝါဒေသတော ယောနံ ဋော ဟောတိ၊ သခါရော၊ ကတ္တာရော၊ ပိတရော။
အာရဝါဒေသမှာ ယောနံ ဋောဋေ ဝါ ဟောန္တိ ယထာက္ကမံ၊ သခါရော၊ သခါရေ သခါယော၊ ဋောဂ္ဂဟဏံ လာဃဝတ္ထံ။
အာရဝါဒေသမှာ နာသ္မာနံ ဋာ ဟောတိ၊ ကတ္တာရာ၊ ကတ္တရာ။ ကူစိ ဝါ ဟောတိ ဗယုလာဓိကာရာ၊ ဧတာဒိသာ သခါရမှာ။
အာရဝါဒေသမှာ သ္မိနော ဋိ ဟောတိ၊ ကတ္တရိ၊ ဝိတရိ။
ဒိဝါဒီဟိ ¶ နာမေဟိ သ္မိနော ဋိ ဟောတိ၊ ဒိဝိ၊ ဘုဝိ။ နိစ္စံ ဝကာရာဂမော။
သ္မိမှိ အာရော ရဿော ဟောတိ၊ ကတ္တရိ၊ နတ္တရိ။
နတွာဒိဝဇ္ဇိတာနံ ပိတာဒီနမာရော ရဿော ဟောတိ သဗ္ဗာသု ဝိဘတ္တီသု၊ ပိတရော၊ ပိတရံ၊ အနုတွာဒီနန္တိ ကိံ? နတ္တာရော။
သုဟိသု ယုဝါဒီနံ အာနင ဟောတိ၊ ယုဝါနေသု၊ ယုဝါနေဟိ။
ဧသု ယုဝါဒီနမာ ဟောတိ၊ ယုဝါနော၊ ယုဝါနာ၊ ယုဝါနေ။
ယုဝါဒီဟိ သ္မာသ္မိန္နံ နာနေ ဟောန္တိ ယထာက္ကမံ၊ ယုဝါနာ၊ ယုဝါနေ။
ယုဝါဒီဟိ ယောနံ နောနေ ဝါ ဟောန္တိ ယထာက္ကမံ၊ ယုဝါနော၊ ယုဝါနေ၊ ဝါတိ ကိံ? ယုဝေ ပဿ၊ နောဂ္ဂဟဏံ လာဃဝတ္ထံ။
အညပဒတ္ထေ ¶ ဝတ္တမာနာ ဣကာရန္တတော နာမသ္မာ ယောနံ နောနေ ဝါ ဟောန္တိ ယထာက္ကမံ ပုလ္လိင်္ဂေ၊ တောမရင်္ကုသပါဏိနော၊ တောမရင်္ကုသပါဏိနေ၊ ဝါတွေဝ? တောမရင်္ကုသပါဏယော၊ အညတ္ထေတိ ကိံ? ပါဏယော။
အညပဒတ္ထေ ဝတ္ထမာနာ ဣကာရန္တတော နာမသ္မာ သ္မိနော နေ ဟောတိ ဝါ ကွစိ ပုလ္လိင်္ဂေ၊ ကတညုမှိ စ ပေါသမှိ၊ သီလဝန္တေ အရိယ ဝုတ္တိနေ၊ ဝါတွေဝ? အရိယဝုတ္တိမှိ၊ ပုမေတွေဝ? အရိယဝုတ္တိယာ။
ပုမသဒ္ဒတော သ္မိနော ယံ ဝုတ္တံ၊ တံ ဝါ ဟောတိ၊ ပုမာနေ ပုမေ။
ပုမဿ နာမှိ ယံ ဝုတ္တံ၊ တံ ဝါ ဟောတိ၊ ပုမာနာ ပုမေန။
ပုမဿ သုမှိ ယံ ဝုတ္တံ၊ တံ အာ စ ဝါ ဟောတိ၊ ပုမာနေသု၊ ပုမာသု ပုမေသုံ။
ပုမသဒ္ဒတော ဂဿ အံ ဝါ ဟောတိ၊ ဘော ပုမံ ဘော ပုမ၊ ဘော ဣတ္တိပုမံ ဘော ဣတ္ထိပုမ။
သာသဒ္ဒဿ ¶ အာနင ဟောတိ အံသေ ဂေ စ၊ သာနံ၊ သာနဿ၊ စဘာ သာန။
ဝတ္တဟာ သနံနံ နောနာနံ ဟောန္တိ ယထာက္ကမံ၊ ဝတ္တဟာနော၊ ဝတ္တဟာနာနံ။
ဗြဟ္မဿ ဥ ဝါ ဟောတိ သနံသု၊ ဗြဟ္မုနော ဗြဟ္မဿ၊ ဗြဟ္မူနံ ဗြဟ္မာနံ။
ဗြဟ္မဿ ဥ ဟောတိ နာမှိ၊ ဗြဟ္မုနာ။
၁၉၂။ ပုမကမ္မထာမဒ္ဓါနံ ဝါ သသ္မာသု စ။
ပုမာဒိနမု ဟောတိ ဝါ သသ္မာသု နာမှိ စ၊ ပုမုနော ပုမဿ၊ ပုမုနာ ပုမာနာ၊ ပုမုနာ ပုမာနာ၊ ကမ္မုနော ကမ္မဿ၊ ကမ္မုနာ ကမ္မသ္မာ၊ ကမ္မုနာ ကမ္မနာ၊ ထာမုနော ထာမဿ၊ ထာမုနာ ထာမသ္မာ၊ ထာမုနာ ထာမေန၊ အဒ္ဓုနော အဒ္ဓဿ၊ အဒ္ဓုနာ အဒ္ဓသ္မာ၊ အဒ္ဓုနာ အဒ္ဓနာ။
ယုဝါ သဿ ဝါ ဣနော ဟောတိ၊ ယုဝိနော ယုဝဿ။
အတ္တာတုမေဟိ ¶ သဿ နော ဟောတိ ဝါ၊ အတ္တနော အတ္တဿ၊ အာတုမနော အာတုမဿ။
အတ္တအာတုမာနံ သုဟိသု ဝါ နက ဟောတိ၊ အတ္တနေသု အတ္တေသု အာတုမနေသု အာတုမေသု၊ အတ္တနေဟိ အတ္တေဟိ အာတုမနေဟိ အာတုမေဟိ၊ ကထံ ‘ဝေရိနေသု’တိ? ‘နက’ ဣတိ ယောဂဝိဘာဂါ။
ဗြဟ္မာ အတ္တအာတုမေဟိ စ သွာဿ နာ ဟောတိ၊ ဗြဟ္မုနာ၊ အတ္တနာ၊ အာတုမနာ။
၁၉၇။ ဣမေတာနမေနာနွာဒေသေ ဒုတိယာယံ။
ဣမဧတသဒ္ဒါနံ ကထိတာနုကထနဝိသယေ ဒုတိယာယမေနာဒေသော ဟောတိ၊ ဣမံ ဘိက္ခုံ ဝိနယမဇ္ဈာပယ၊ အထော ဧနံ ဓမ္မမဇ္ဈာပယ၊ ဣမေ ဘိက္ခူ ဝိနယမဇ္ဈာပယ၊ အထော ဧနေ ဓမ္မမဇ္ဈာပယ၊ ဧဝမေတဿ စ ယောဇနိယံ။
သဗ္ဗာသု ဝိဘတ္တိသု ကိဿ ကော ဟောတိ၊ ကော၊ ဧက၊ ကာ၊ ကာယော၊ ကံ၊ ကာနိ၊ ကေနေစ္စာမိ။
အနိတ္ထိယံ ¶ ကိဿ ကိ ဝါ ဟောတိ သသ္မိံသု၊ ကိဿ ကဿ၊ ကိသ္မိံ ကသ္မိံ၊ အနိတ္ထိယန္တိ ကိံ? ကဿာ၊ ကဿံ။
အံသိသု သဟ တေဟိ ကိံသဒ္ဒဿ ကိံ ဟောတိ နပုံသကေ။ ကိံ၊ ကိံ၊ နပုံသကေတိ ကိံ? ကော၊ ကံ။
အံသိသု သဟ တေတိ ဣမဿ ဣဒံ ဟောတိ ဝါ နပုံသကေ၊ ဣဒံ ဣမံ၊ ဣဒံ ဣမံ။
အံသိသု သဟ တေဟိ အမုဿ အဒုံ ဟောတိ ဝါ နပုံသကေ၊ အဒုံ အမုံ၊ အဒုံ အမုံ။
အမှဿ အသ္မာ ဟောတိ ဝါ သုမှိ၊ ဘတ္တိရသ္မာသု ယာ တဝ၊ ဝါ တွေဝ? အမှေသု။
၂၀၄။ နံမှိ တိစတုန္နမိတ္ထိယံ တိဿစတဿာ။
နံမှိ တိစတုန္နံ တိဿစတဿာ ဟောန္တိ ဣတ္ထိယံ ယထာက္ကမံ၊ တိဿန္နံ စတဿန္နံ၊ ဣတ္ထိယန္တိ ကိံ? တိဏ္ဏံ စတုန္နံ။
၂၀၅။ တိဿောစတဿော ယောမှိ သဝိဘတ္တီနံ။
ဝိဘတ္တိသဟိတာနံ တိစတုန္နံ ယောမှိ တိဿော စတဿော ဟောန္တိ ဣတ္ထိယံ ယထာက္ကမံ၊ တိဿော စတဿော။
ယောမှိ ¶ သဝိဘတ္တီနံ တိစတုန္နံ ယထာက္ကမံ တီဏိစတ္တာရိ ဟောန္တိ နပုံသကေ၊ တီဏိ။ စတ္တာရိ။
ယောမှိ သဝိဘတ္တီနံ တိစတုန္နံ တယောစတ္တာရော ဟောန္တိ ယထာက္ကမံ ပုလ္လိင်္ဂေ၊ တယော၊ စတ္တာရော။
စတုသဒ္ဒဿ သဝိဘတ္တိဿ ယောမှိ စတုရော ဝါ ဟောတိ ပုလ္လိင်္ဂေ၊ စတုရော ဇနာ သံဝိဓာယ၊ ကထံ ‘စတုရော နိမိတ္တေ နာဒ္ဒဿာသိ’န္တိ? လိင်္ဂဝိပလ္လာသာ။
ယောသွမှဿ သဝိဘတ္တိဿ မယမသ္မာ ဝါ ဟောန္တိ ယထာက္ကမံ၊ မယံ၊ အသ္မာ၊ အမှေ။
နံသေသွမုဿ သဝိဘတ္တိဿ အသ္မာကံ မမံ ဟောန္တိ ဝါ ယထာက္ကမံ၊ အသ္မာကံ၊ အမှာကံ၊ မမံ မမ။
သိမှိ အမှဿ သဝိဘတ္တိဿ အဟံ ဟောတိ၊ အဟံ။
အံမှိ သိမှိ စ တုမှဿ သဝိဘတ္တိဿ တုဝံတွံ ဟောန္တိ ယထာက္ကမံ၊ တုဝံ၊ တွံ။
တုမှဿ ¶ တယာတယီနံ တကာရဿ တွ ဟောတိ ဝါ၊ တွယာ တယာ၊ တွယိ တယိ။
သွာမှိ တုမှဿ သဝိဘတ္တိဿ တွမှာ ဟောတိ ဝါ၊ ပတ္တာ နိဿံ သယံ တွမှာ၊ ဝါ တွေဝ? တွယာ။
၂၁၅။ န္တန္တူနံန္တောယောမှီ ပဌမေ။
ပဌမေ ယောမှိ န္တန္တူနံ သဝိဘတ္တီနံ န္တောဣစ္စာဒေသော ဝါ ဟောတိ၊ ဂစ္ဆန္တော၊ ဂစ္ဆန္တာ၊ ဂုဏဝန္တော ဂုဏဝန္တာ။
နံမှိ န္တန္တူနံ သဝိဘတ္ထီနံ တံ ဝါ ဟောတိ၊ ဂစ္ဆတံ ဂစ္ဆန္တာနံ၊ ဂုဏဝတံ ဂုဏဝန္တာနံ။
၂၁၇။ တောတာတိတာ သသ္မာသ္မိံနာသု။
သာဒီသု န္တန္တူနံ သဝိဘတ္တီနံ တောတာတိတာ ဟောန္တိ ဝါ ယထာက္ကမံ၊ ဂစ္ဆတော ဂစ္ဆန္တဿ၊ ဂုဏဝတော ဂုဏဝန္တဿ၊ ဂစ္ဆတာ ဂစ္ဆန္တမှာ၊ ဂုဏဝတာ ဂုဏဝန္ထမှာ၊ ဂစ္ဆတိ ဂစ္ဆန္တေ၊ ဂုဏဝတိ ဂုဏဝန္တေ၊ ဂစ္ဆတာ ဂစ္ဆန္တေန၊ ဂုဏဝတာ ဂုဏဝန္တေန။
ဂေ ပရေ န္တန္တူနံ သဝိဘတ္တီနံ ဋဋာအံ ဣစ္စာဒေသာ ဟောန္တိ၊ ဘော ဂစ္ဆ၊ ဘော ဂစ္ဆာ၊ ဘော ဂစ္ဆံ၊ တော ဂုဏဝ၊ ဘော ဂုဏဝါ၊ ဘော ဂုဏဝံ။
ယောမှီ ¶ ဒွီဿ သဝိဘတ္တိဿ ဒုဝေဒွေ ဟောန္တိ ပစ္စေကံ၊ ဒုဝေ၊ ဒွေ။
၂၂၀။ ဒုဝိန္နံ နံမှိ ဝါ။ နံမှိ ဒွိဿ သဝိဘတ္တိဿ ဒုဝိန္နံ ဟောတိ ဝါ၊ ဒုဝိန္နံ၊ ဒွိန္နံ။
၂၂၁။ ရာဇဿ ရညံ။ နံမှိ ရာဇဿ သဝိဘတ္တိဿ ရညံ ဟောတိ ဝါ၊ ရညံ ရာဇာနံ။
၂၂၂။ နာသ္မာသု ရညာ။ နာသ္မာသု ရာဇဿ သဝိဘတ္တိဿ ရညာ ဟောတိ၊ ရညာ ကတံ၊ ရညာ နိဿဋံ။
၂၂၃။ ရညော ရညဿ ရာဇိနော သေ။ သေ ရာဇဿ သဝိဘတ္တိဿ ရညော ရညဿ ရာဇိနော ဟောန္တိ၊ ရညော၊ ရညဿ၊ ရာဇိနော။
၂၂၄။ သ္မိမှိ ရညေရာဇိနိ။ သ္မိမှိ ရာဇဿ သဝိဘတ္တိဿ ရညေ ရာဇိနိ ဟောန္တိ၊ ရညေ၊ ရာဇိနိ။
၂၂၅။ သမာသေ ဝါ။ သမာသဝိသယေ ဧတေ အာဒေသာ ရာဇဿ ဝါ ဟောန္တိ၊ ကာသိရညာ ကာသိရာဇေန၊ ကာသိရညာ ကာသိရာဇသ္မာ၊ ကာသိရညော ကာသိရာဇဿ၊ ကာသိရညေ ကာသိရာဇေ။
၂၂၆။ သ္မိမှိ တုမှာမှာနံ တယိမယိ။ သ္မိမှိ တုမှအမုသဒ္ဒါနံ သဝိဘတ္တီနံ တယိမယိ ဟောန္တိ ယထာက္ကမံ၊ တယိ၊ မယိ။
အံမှိ ¶ တုမှအမှသဒ္ဒါနံ သဝိဘတ္တီနံ တံ မံ တဝံ မမံ ဟောန္တိ ယထာက္ကမံ၊ တံ၊ မံ၊ တဝံ၊ မမံ၊
နာသ္မာသု တုမှအမှသဒ္ဒါနံ သဝိဘတ္တီနံ တယာမယာ ဟောန္တိ ယထာက္ကမံ၊ တယာ ကတံ၊ မယာ ကတံ၊ တယာ နိဿဋံ၊ မယာ နိဿဋံ။
သေ တုမှအမှသဒ္ဒါနံ သဝိဘတ္တီနံ တဝ မမ တုယှံ မယှံ ဟောန္တိ ယထာက္ကမံ၊ တဝ၊ တုယှံ၊ မမ၊ မယှံ။
နံမှိ တုမှအမှသဒ္ဒါနံ သဝိဘတ္တီနံ ငံငါကံ ဟောန္တိ ပစ္စေကံ၊ တုမှံ၊ တုမှာကံ၊ အမှံ၊ အမှာကံ၊ ယထာသင်္ချမတြ န ဝိဝစ္ဆတေ။
တုမှအမှသဒ္ဒါနံ သဝိဘတ္တီနံ ပစ္စေကံ ငံငါကံ ဝါ ဟောန္တိ ယောမှိ ဒုတိယေ၊ တုမှံ၊ တုမှာကံ၊ တုမှေ၊ အမှံ၊ အမှာကံ၊ အမှေ။
ဣဒမဓိကတံ ဝေဒိတဗ္ဗံ။ ပဇ္ဇတေ-နေနတ္ထောတိ ပဒံ-သျာဒျန္တံ တျာဒျန္တံ စ၊ ပဒသမူဟော ဝါကျံ။
အပဉ္စမိယာ ¶ ယောနံဟိသွပါဒါဒေါ ဝတ္တမာနာနံ ပဒသ္မာ ပရေသံ ဧကဝါကျေ ဌိတာနံ တုမှာမှသဒ္ဒါနံ သဝိဘတ္တီနံ ဝေါနော ဟောန္တိ ဝါ ယထာက္ကမံ၊ တိဋ္ဌထ ဝေါ၊ တိဋ္ဌထ တုမှေ၊ တိဋ္ဌာမ နော၊ တိဋ္ဌာမ မယံ၊ ပဿတိ ဝေါ၊ ပဿတိ တုမှေ၊ ပဿတိ နော၊ ပဿတိ အမှေ၊ ဒီယတေ ဝေါ၊ ဒီယတေ တုမှံ၊ ဒီယတေ နော၊ ဒီယတေ အမှံ၊ ဓနံ ဝေါ၊ ဓနံ တုမှံ၊ ဓနံ နော ဓနံ အမှံ၊ ကတံ ဝေါ၊ ကတံ တုမှေဟိ၊ ကတံ နော၊ ကတံ အမှေဟိ၊ အပဉ္စမျာတိ ကိံ? နိဿဋံ တုမှေဟိ၊ နိဿဋံ အမှေဟိ၊ အပါဒါဒေါတွေဝ? ‘ဗလဉ္စ ဘိက္ခူနမနုပ္ပဒိန္နံ၊ တုမှေဟိ ပုညံ ပသုတံ အနပ္ပကံ’၊ ပဒတောတွေဝ? တုမှေ တိဋ္ဌထ၊ ဧကဝါကျေတွေဝ? ဒေဝဒတ္တော တိဋ္ဌတိ ဂါမေ၊ တုမှေ တိဋ္ဌထ နဂရေ၊ သဝိဘတ္တီနံတွေဝ? အရဟတိ ဓမ္မော တုမှာဒိသာနံ၊ အရဟတိ ဓမ္မော အမှာဒိသာနံ။
နာမှိ သေ စ အပါဒါဒေါ ဝတ္တမာနာနံ ပဒသ္မာ ပရေသံ ဧကဝါကျေ ဌိတာနံ တုမှာမှသဒ္ဒါနံ သဝိဘတ္တီနံ တေမေ ဝါ ဟောန္တိ ယထာက္ကမံ၊ ကတံ တေ၊ ကတံ တယာ၊ ကတံ မေ၊ ကတံ မယာ၊ ဒီယတေ တေ၊ ဒီယတေ တဝ ဒီယတေ မေ၊ ဒီယတေ မမ၊ ဓနံ တေ၊ ဓနံ တဝ၊ ဓနံ မေ၊ ဓနံ မမ။
ကထိတာနုကထနဝိသယေ တုမှအမှ-သဒ္ဒါနမာဒေသာ နိစ္စံ ဘဝန္တိ ပုနဗ္ဗိဓာနာ၊ ဂါမော တုမှံ ပရိဂ္ဂဟော၊ အထော ဇနပဒေါ ဝေါ ပရိဂ္ဂဟော။
ဝိဇ္ဇမာနပုဗ္ဗသ္မာ ¶ ပဌမန္တာ ပရေသံ တုမှအမှသဒ္ဒါနမာဒေသာ ဝါ ဟောန္တိ အနွာဒေသေပိ၊ ဂါမေ ပဋော တုမှာကံ၊ အထော နဂရေ ကမ္ဗလော ဝေါ၊ အထော နဂရေ ကမ္ဗလော တုမှာကံ၊ သပုဗ္ဗာတိ ကိံ? ပဋော တုမှာကံ၊ အထော ကမ္ဗလော ဝေါ၊ ပဌမန္တာတိ ကိ? ပဋော နာဂရေ တုမှာကံ၊ အထော ကမ္ဗလော ဂါမေ ဝေါ။
စာဒီဟိ ယောဂေ တုမှအမှသဒ္ဒါနမာဒေသာ န ဟောန္တိ၊ ဂါမော တဝ စ ပရိဂ္ဂဟော၊ မမ စ ပရိဂ္ဂဟော၊ ဂါမော တဝ ဝါ ပရိဂ္ဂဟော၊ မမ ဝါ ပရိဂ္ဂဟော၊ ဂါမော တဝ ဟ ပရိဂ္ဂဟော၊ မမ ဟ ပရိဂ္ဂဟော၊ ဂါမော တဝါဟ ပရိဂ္ဂဟော၊ မမာဟ ပရိဂ္ဂဟော၊ ဂါမော တဝေဝ ပရိဂ္ဂဟော၊ မမေဝ ပရိဂ္ဂဟော၊ ဧဝံ သဗ္ဗတ္ထ ဥဒါဟရိတဗ္ဗံ၊ ယောဂေတိ ကိံ? ဂါမော စ တေ ပရိဂ္ဂဟော၊ နဂရဉ္စ မေ ပရိဂ္ဂဟော။
ဒဿနတ္ထေသု အာလောစနဝဇ္ဇိတေသု ပယုဇ္ဇမာနေသု တုမှအမှသဒ္ဒါနမာဒေသာ န ဟောန္တိ၊ ဂါမော တုမှေ ဥဒ္ဒိဿာဂတော၊ ဂါမော အမှေ ဥဒ္ဒိဿာဂတော၊ အနာလောစနေတိ ကိံ? ဂါမော ဝေါ အာလောစေတိ၊ ဂါမော နော အာလောစေတိ။
၂၉၃။ အာမန္တဏံ ပုဗ္ဗမသန္တံဝ။ အာမန္တဏံ ပုဗ္ဗမဝိဇ္ဇမာနံ ဝိယ ဟောတိ တုမှာမှသဒ္ဒါနမာဒေသဝိသယေ၊ ဒေဝဒတ္တ တဝ ပရိဂ္ဂဟော၊ အာမန္တဏန္တိ ကိံ? ကမ္ဗလော တေ ပရိဂ္ဂဟော၊ ပုဗ္ဗမိတိ ကိံ? ‘မယေတံ သဗ္ဗမက္ခာတံ၊ တုမှာကံ ဒွိဇပုင်္ဂဝါ ¶ ၊ ပရဿ ဟိ အဝိဇ္ဇမာနတ္တေ ‘အပါဒါဒေါ’တိ ပဋိသေဓော န သိယာ။ ဣဝါတိ ကိံ? သဝနံ ယထာ သိယာ။
သမာနာဓိကရဏေ ပရတော သာမညဝစနမာမန္တဏမသန္တံ ဝိယ န ဟောတိ၊ မာဏဝက ဇဋိလက တေ ပရိဂ္ဂဟော။ ပရဿာဝိဇ္ဇမာနတ္တေပိ ပုဗ္ဗရူပမုပါဒါယာဒေသော ဟောတိ၊ သာမညဝစနန္တိ ကိံ? ဒေဝဒတ္တ မာဏဝက တဝ ပရိဂ္ဂဟော၊ ဧကတ္ထေတိ ကိံ? ဒေဝဒတ္တ ယညဒတ္တ တုမှံ ပရိဂ္ဂဟော။
ဗဟူသု ဝတ္တမာနမာမန္တဏံ သာမညဝစနမေကတ္ထေ အဝိဇ္ဇမာနံ ဝိယ ဝါ န ဟောတိ၊ ဗြာဟ္မဏာ ဂုဏဝန္တော တုမှာကံ ပရိဂ္ဂဟော၊ ဗြာဟ္မဏာ ဂုဏဝန္တော ဝေါ ပရိဂ္ဂဟော။
ဣတိ မောဂ္ဂလ္လာနေ ဗျာကရဏေ ဝုတ္တိယံ
သျာဒိကဏ္ဍော ဒုတိယော။