📜
၁။ သန္ဓိကပ္ပ
ပဌမကဏ္ဍ
(က)
သေဋ္ဌံ ¶ တိလောကမဟိတံ အဘိဝန္ဒိယဂ္ဂံ၊
ဗုဒ္ဓဉ္စ ဓမ္မမမလံ ဂဏမုတ္တမဉ္စ၊
သတ္ထုဿ တဿ ဝစနတ္ထဝရံ သုဗုဒ္ဓုံ၊
ဝက္ခာမိ သုတ္တဟိတမေတ္ထ သုသန္ဓိကပ္ပံ။
(ခ)
သေယျံ ဇိနေရိတနယေန ဗုဓာ လဘန္တိ၊
တဉ္စာပိ တဿ ဝစနတ္ထသုဗောဓနေန၊
အတ္ထဉ္စ အက္ခရပဒေသု အမောဟဘာဝါ၊
သေယျတ္ထိကော ပဒမတော ဝိဝိဓံ သုဏေယျံ။
သဗ္ဗဝစနာနမတ္ထော အက္ခရေဟေဝ သညာယတေ။ အက္ခရဝိပတ္တိယံ ဟိ အတ္ထဿ ဒုန္နယထာ ဟောတိ၊ တသ္မာ အက္ခရကောသလ္လံ ဗဟူပကာရံ သုတ္တန္တေသု။
၂၊ ၂။ အက္ခရာပါဒယော ¶ ဧကစတ္တာလီသံ။
တေ စ ခေါ အက္ခရာ အပိ အကာရာဒယော ဧကစတ္တာ လီသ သုတ္တန္တေသု သောပကာရာ။
တံ ယထာ? အ အာ ဣ ဤ ဥ ဦ ဧ ဩ၊ က ခ ဂ ဃ င၊ စ ဆ ဇ ဈ ဉ၊ ဋ ဌ ဍ ဎ ဏ၊ တ ထ ဒ ဓ န၊ ပ ဖ ဗ ဘ မ၊ ယ ရ လ ဝ သ ဟ ဠ အံ၊ ဣတိ အက္ခရာ နာမ။
တေန ကွတ္ထော? အတ္ထော အက္ခရသညာတော။
တတ္ထ အက္ခရေသု အကာရာဒီသု ဩဒန္တာ အဋ္ဌ အက္ခရာ သရာ နာမ ဟောန္တိ။
တံ ယထာ? အ အာ ဣ ဤ ဥ ဦ ဧ ဩ၊ ဣတိ သရာ နာမ။
တေန ကွတ္ထော? သရာ သရေ လောပံ။
တတ္ထ အဋ္ဌသု သရေသု လဟုမတ္တာ တယော သရာ ရဿာ နာမ ဟောန္တိ။
တံ ယထာ? အ ဣ ဥ၊ ဣတိ ရဿာ နာမ။
တေန ကွတ္ထော? ရဿံ။
၅၊ ၅။ အညေ ¶ ဒီဃာ။
တတ္ထ အဋ္ဌသု သရေသု ရဿေဟိ အညေ ပဉ္စ သရာ ဒီဃာ နာမ ဟောန္တိ။
တံ ယထာ? အာ ဤ ဦ ဧ ဩ၊ ဣတိ ဒီဃာ နာမ။
တေန ကွတ္ထော? ဒီဃံ။
ဌပေတွာ အဋ္ဌ သရေ သေသာ အက္ခရာ ကကာရာဒယော နိဂ္ဂဟိတန္တာ ဗျဉ္ဇနာ နာမ ဟောန္တိ။
တံ ယထာ? က ခ ဂ ဃ င၊ စ ဆ ဇ ဈ ဉ၊ ဋ ဌ ဍ ဎ ဏ၊ တ ထ ဒ ဓ န၊ ပ ဖ ဗ ဘ မ၊ ယ ရ လ ဝ သ ဟ ဠ အံ၊ ဣတိ ဗျဉ္ဇနာ နာမ။
တေန ကွတ္ထော? သရာ ပကတိ ဗျဉ္ဇနေ။
၇၊ ၉။ ဝဂ္ဂါ ပဉ္စပဉ္စသော မန္တာ။
တေသံ ခေါ ဗျဉ္ဇနာနံ ကကာရာဒယော မကာရန္တာ ပဉ္စပဉ္စသော အက္ခရဝန္တော ဝဂ္ဂါ နာမ ဟောန္တိ။
တံ ယထာ? က ခ ဂ ဃ င၊ စ ဆ ဇ ဈ ဉ၊ ဋ ဌ ဍ ဎ ဏ၊ တ ထ ဒ ဓ န၊ ပ ဖ ဗ ဘ မ၊ ဣတိ ဝဂ္ဂါ နာမ။
တေန ကွတ္ထော? ဝဂ္ဂန္တံ ဝါ ဝဂ္ဂေ။
၈၊ ၁၀။ အံ ¶ ဣတိ နိဂ္ဂဟိတံ။
အံ ဣတိ နိဂ္ဂဟိတံ နာမ ဟောတိ။
တေန ကွတ္ထော? အံ ဗျဉ္ဇနေ နိဂ္ဂဟိတံ။
ယာ စ ပန ပရေသု သက္ကတဂန္ထေသု သမညာ ဃောသာတိ ဝါ အဃောသာတိ ဝါ၊ တာ ပယောဂေ သတိ ဧတ္ထာပိ ယုဇ္ဇန္တေ။
တတ္ထ ဃောသာ နာမ-ဂ ဃ င၊ ဇ ဈ ဉ၊ ဍ ဎ ဏ၊ ဒ ဓ န၊ ဗ ဘ မ၊ ယ ရ လ ဝ ဟ ဠ၊ ဣတိ ဃောသာ နာမ။ အဃောသာ နာမ-က ခ၊ စ ဆ၊ ဋ ဌ၊ တ ထ၊ ပ ဖ၊ သ၊ ဣတိ အဃောသာ နာမ။
တေန ကွတ္ထော? ဝဂ္ဂေ ဃောသာဃောသာနံ တတိယပဌမာ။
၁၀၊ ၁၂။ ပုဗ္ဗမဓောဌိတ မဿရံ သရေန ဝိယောဇယေ။
တတ္ထ သန္ဓိံ ကတ္တုကာမော ပုဗ္ဗဗျဉ္ဇနံ အဓောဌိတံ အဿရံ ကတွာ သရဉ္စ ဥပရိ ကတွာ သရေန ဝိယောဇယေ။
တတြာယမာဒိ။
၁၁၊ ၁၄။ နယေ ¶ ပရံ ယုတ္တေ။
အဿရံ ခေါ ဗျဉ္ဇနံ အဓောဌတံ ပရက္ခရံ နယေ ယုတ္တေ။ တတြာဘိရတိမိစ္ဆေယျ။
ယုတ္တေတိကသ္မာ? အက္ကောစ္ဆိ မံ အဝဓိ မံ၊ အဇိနိ မံ အဟာသိ မေ။ ဧတ္ထ ပန ယုတ္တံ န ဟောတိ။
ဣတိ သန္ဓိကပ္ပေ ပဌမော ကဏ္ဍော။
ဒုတိယကဏ္ဍ
သရာ ခေါ သရေ ပရေ လောပံ ပပ္ပောန္တိ။
ယဿိန္ဒြိယာနိ သမထင်္ဂတာနိ။ နော ဟေတံ ဘန္တေ သမေတာယသ္မာ သင်္ဃေန။
သရမှာ အသရူပါ ပရော သရော လောပံ ပပ္ပောတိ ဝါ။
စတ္တာရော’မေ ဘိက္ခဝေ ဓမ္မာ၊ ကိန္နု’ မာဝသမဏိယော။ ဝါတိ ကသ္မာ? ပဉ္စိန္ဒြိယာနိ၊ တယဿု ဓမ္မာ ဇဟိတာ ဘဝန္တိ။
၁၄၊ ၁၆။ ကွစာသစဏ္ဏံ ¶ လုတ္တေ။
သရော ခေါ ပရော ပုဗ္ဗသရေ လုတ္တေ ကွစိ အသဝဏ္ဏံ ပပ္ပောတိ။
သင်္ချံ နောပေတိ ဝေဒဂူ၊ ဗန္ဓုဿေဝ သမာဂမော။
ကွစီတိ ကသ္မာ? ယဿိန္ဒြိယာနိ၊ တထူပမံ ဓမ္မဝရံ အဒေသယိ။
သရော ခေါ ပရော ပုဗ္ဗသရေ လုတ္တေ ကွစိ ဒီဃံ ပပ္ပောတိ။ သဒ္ဓီဓ ဝိတ္တံ ပုရိသဿ သေဋ္ဌံ၊ အနာဂါရေဟိ စူဘယံ။
ကွစီတိ ကသ္မာ? ပဉ္စဟုပါလိ အင်္ဂေဟိ သမန္နာဂတော။ နတ္ထညံ ကိဉ္စိ။
ပုဗ္ဗော စ သရော ပရသရလောပေ ကတေ ကွစိ ဒီဃံ ပပ္ပောတိ။
ကိံသူဓ ဝိတ္တံ ပုရိသဿ သေဋ္ဌံ၊ သာဓူတိ ပဋိဿုဏိတွာ၊ ကွစီတိ ကသ္မာ? ဣတိဿ မုဟုတ္တမ္ပိ။
၁၇၊ ၁၉။ ယမေဒန္တဿာဒေသော ¶ ။
ဧကာရဿ အန္တဘူတဿ သရေ ပရေ ကွစိ ယကာရာဒေသော ဟောတိ။
အဓိဂတော ခေါ မျာယံ ဓမ္မော၊ တျာဟံ ဧဝံ ဝဒေယျံ၊ တျာဿ ပဟီနာ ဟောန္တိ။
ကွစီတိ ကသ္မာ? နေ’နာဂတာ၊ ဣတိ နေတ္ထ။
ဩကာရုကာရာနံ အန္တဘူတာနံ သရေ ပရေ ကွစိ ဝကာရာဒေသော ဟောတိ။
အထ ခွဿ၊ သွဿ ဟောတိ၊ ဗဟွာဗာဓော၊ ဝတ္ထွေတ္ထ ဝိဟိတံ နိစ္စံ စက္ခာပါထမာဂစ္ဆတိ။
ကွစီတိကသ္မာ? စတ္တာရော’မေ ဘိက္ခဝေ ဓမ္မာ၊ ကိန္နုမာဝ သမဏိယော။
သဗ္ဗော ဣစ္စေသော တိသဒ္ဒေါ ဗျဉ္ဇနော သရေ ပရေ ကွစိ စကာရံ ပပ္ပောတိ။
ဣစ္စေတံ ¶ ကုသလံ၊ ဣစ္စဿ ဝစနီယံ၊ ပစ္စုတ္တရိတွာ၊ ပစ္စာဟရတိ။
ကွစီတိ ကသ္မာ? ဣတိဿ မုဟုတ္တမ္ပိ။
ဓဣစ္စေတဿ သရေ ပရေ ကွစိ ဒကာရာဒေသော ဟောတိ။
ဧကမိဒါဟံ ဘိက္ခဝေ သမယံ။
ကွစီတိ ကသ္မာ? ဣဓေဝ မရဏံ ဘဝိဿတိ။
ဝဂ္ဂဟဏေန ဓကာရဿ ဟကာရာဒေသော ဟောတိ သာဟု ဒဿန မရိယာနံ။
သုတ္တဝိဘာဂေန ဗဟုဓာ သိယာ-
တော ဒဿ၊ ယထာ? သုဂတော။
ဋော တဿ၊ ယထာ? ဒုက္ကဋံ။
ဓော တဿ၊ ယထာ? ဂန္ဓဗ္ဗော။
တြော တ္တဿ၊ ယထာ? အတြဇော။
ကော ဂဿ၊ ယထာ? ကုလူပကော။
လော ¶ ရဿ၊ ယထာ? မဟာသာလော။
ဇော ယဿ၊ ယထာ? ဂဝဇော။
ဗ္ဗော ဝဿ၊ ယထာ? ကုဗ္ဗတော။
ကော ယဿ၊ ယထာ? သကေ။
ယော ဇဿ၊ ယထာ? နိယံပုတ္တံ။
ကော တဿ၊ ယထာ? နိယကော။
စ္စော တ္တဿ၊ ယထာ ဘစ္စော။
ဖော ပဿ၊ ယထာ? နိပ္ဖတ္တိ။
ခေါ ကဿ၊ ယထာ? နိက္ခမတိ။ ဣစ္စေဝမာဒီ ယောဇေတဗ္ဗာ။
ပုဗ္ဗော ဣဝဏ္ဏော သရေ ပရေ ယကာရံ ပပ္ပောတိ နဝါ။ ပဋိသုန္ထာရဝုတျဿ၊ သဗ္ဗာ ဝိတျာနုဘူယတေ။
နဝါတိ ကသ္မာ? ပဉ္စဟင်္ဂေဟိ သမန္နာဂတော၊ မုတ္တစာဂီ အနုဒ္ဓတော။
၂၂၊ ၂၈။ ဧဝါဒိဿ ရိ ပုဗ္ဗော စ ရဿော။
သရမှာ ပရဿ ဧဝဿ ဧကာရဿ အာဒိဿ ရိကာရော ဟောတိ၊ ပုဗ္ဗော စ သရော ရဿော ဟောတိ နဝါ။
ယထရိဝ ¶ ဝသုဓာတလဉ္စ သဗ္ဗံ၊ တထရိဝ ဂုဏဝါ သုပူဇနိယော။
နဝါတိ ကသ္မာ? ယထာ ဧဝ၊ တထာ ဧဝ။
ဣတိ သန္ဓိကပ္ပေ ဒုတိယော ကဏ္ဍော။
တတိယကဏ္ဍ
သရာ ခေါ ဗျဉ္ဇနေ ပရေ ပကတိရူပါနိ ဟောန္တိ။
မနောပုဗ္ဗင်္ဂမာ ဓမ္မာ၊ ပမာဒေါ မစ္စုနော ပဒံ၊ တိဏ္ဏော ပါရင်္ဂတော အဟု။
သရာ ခေါ သရေ ပရေ ကွစိ ပကတိရူပါနိ ဟောန္တိ။
ကော ဣမံ ပထဝိံ ဝိစေဿတိ။
ကွစီတိ ကသ္မာ? အပ္ပဿုတာယံ ပုရိသော။
သရာ ခေါ ဗျဉ္ဇနေ ပရေ ကွစိ ဒီဃံ ပပ္ပောန္တိ။
သမ္မာ ¶ ဓမ္မံ ဝိပဿတော၊ ဧဝံ ဂါမေ မုနီ စရေ၊ ခန္တီ ပရမံ တပေါ တိတိက္ခာ။
ကွစီတိ ကသ္မာ? ဣဓ မောဒတိ ပေစ္စ မောဒတိ၊ ပတိလီယတိ၊ ပဋိဟညတိ။
သရာ ခေါ ဗျဉ္ဇနေ ပရေ ကွစိ ရဿံ ပပ္ပောန္တိ။
ဘောဝါဒိနာမ သော ဟောတိ၊ ယထာဘာဝိ ဂုဏေန သော။
ကွစီတိ ကသ္မာ? သမ္မာသမာဓိ၊ သာဝိတ္တီ ဆန္ဒသော မုခံ၊ ဥပနီယတိ ဇီဝိတမပ္ပမာယု။
သရာ ခေါ ဗျဉ္ဇနေ ပရေ ကွစိ လောပံ ပပ္ပောန္တိ။ တတြ စ လောပေ ကတေ အကာရာဂမော ဟောတိ။
သ သီလဝါ။ သ ပညဝါ ဧသ ဓမ္မော သနန္တနော၊ သ ဝေ ကသာဝမရဟတိ၊ သ မာနကာမောပိ ဘဝေယျ၊ သ ဝေ မုနိ ဇာတိဘယံ အဒဿိ။
ကွစီတိ ¶ ကသ္မာ? သော မုနိ၊ ဧသော ဓမ္မော ပဒိဿတိ၊ န သော ကာသာဝမရဟတိ။
သရမှာ ပရဿ ဗျဉ္ဇနဿ ဒွေဘာဝေါ ဟောတိ ဌာနေ။
ဣဓပ္ပမာဒေါ၊ ပုရိသဿ ဇန္တုနော၊ ပဗ္ဗဇ္ဇံ ကိတ္တယိဿာမိ၊ စာတုဒ္ဒသိ၊ ပဉ္စဒ္ဒသိ၊ အဘိက္ကန္တတရော စန္ဒော။
ဌာနေတိ ကသ္မာ? ဣဓ မောဒတိ ပေစ္စ မောဒတိ။
၂၉၊ ၄၂။ ဝဂ္ဂေ ဃောသာဃောသာနံ တတိယပဌမာ။
ဝဂ္ဂေ ခေါ ပုဗ္ဗေသံ ဗျဉ္ဇနာနံ ဃောသာဃောသဘူတာနံ သရမှာ ယထာသင်္ချံ တတိယပဌမက္ခရာ ဒွေဘာဝံ ဂစ္ဆန္တိ ဌာနေ။
ဧသေဝ စဇ္ဈာနပ္ဖလော၊ ယတြဋ္ဌိတံ နပ္ပသဟေယျ မစ္စု၊ သေလေ ယထာ ပဗ္ဗတမုဒ္ဓနိဋ္ဌိတော၊ စတ္တာရိဋ္ဌာနာနိ နရော ပမတ္တော။
ဌာနေတိ ကသ္မာ? ဣဓ စေတသော ဒဠှံ ဂဏှာတိ ထာမသာ။
ဣတိ သန္ဓိကပ္ပေ တတိယော ကဏ္ဍော။
စတုတ္ထကဏ္ဍ
၃၀၊ ၅၈။ အံ ¶ ဗျဉ္ဇနေ နိဂ္ဂဟိတံ။
နိဂ္ဂဟိတံ ခေါ ဗျဉ္ဇနေ ပရေ အံ ဣတိ ဟောတိ။
ဧဝံ ဝုတ္တေ၊ တံ သာဓူတိ ပဋိဿုဏိတွာ။
ဝဂ္ဂဘူတေ ဗျဉ္ဇနေ ပရေ နိဂ္ဂဟိတံ ခေါ ဝဂ္ဂန္တံ ဝါ ပပ္ပောတိ။
တန္နိစ္စုတံ၊ ဓမ္မဉ္စရေ သုစရိတံ၊ စိရပ္ပဝါသိံ ပုရိသံ။ သန္တန္တဿ မနံ ဟောတိ၊ တင်္ကာရုဏိကံ၊ ဧဝင်္ခေါ ဘိက္ခဝေ သိက္ခိတဗ္ဗံ။
ဝါဂ္ဂဟဏေနနိဂ္ဂဟိတံ ခေါ လကာရာဒေသော ဟောတိ။ ပုဂ္ဂလံ။
ဝါတိ ကသ္မာ? န တံ ကမ္မံ ကတံ သာဓု။
ဧကာရဟကာရေ ပရေ နိဂ္ဂဟိတံ ခေါ ဉကာရံ ပပ္ပောတိ ဝါ။
ပစ္စတ္တညေဝ ပရိနိဗ္ဗာယိဿာမိ၊ တညေဝေတ္ထ ပဋိပုစ္ဆိဿာမိ၊ ဧဝဉှိ ဝေါ ဘိက္ခဝေ သိက္ခိတဗ္ဗံ။ တဉှိ တဿ မုသာ ဟောတိ။
ဝါတိ ¶ ကသ္မာ? ဧဝမေတံ အဘိညာယ၊ ဧဝံ ဟောတိ သုဘာသိတံ။
နိဂ္ဂဟိတံ ခေါ ယကာရေ ပရေ သဟ ယကာရေန ဉကာရံ ပပ္ပောတိ ဝါ။
သညောဂေါ၊ သညုတ္တံ။
ဝါတိ ကသ္မာ? သံယောဂေါ၊ သံယုတ္တံ။
နိဂ္ဂဟိတဿ ခေါ သရေ ပရေ မကာရဒကာရာဒေသာ ဟောန္တိ ဝါ။
တမဟံ ဗြူမိ ဗြာဟ္မဏံ၊ ဧတဒဝေါစ သတ္ထာ။
ဝါတိ ကသ္မာ? အက္ကောစ္ဆိ မံ အဝဓိ မံ၊ အဇိနိ မံ အဟာသိ မေ။
၃၅၊ ၃၄။ ယ ဝ မ ဒ န တ ရ လာ စာဂမာ။
သရေ ပရေ ယကာရော ဝကာရော မကာရော ဒကာရော နကာရော တကာရော ရကာရော လကာရော ဣမေ အာဂမာ ဟောန္တိ ဝါ။
နယိမဿ ဝိဇ္ဇာ၊ ယထယိဒံ စိတ္တံ။ မိဂီ ဘန္တာ ဝုဒိက္ခတိ၊ သိတ္တာ တေ လဟု မေဿတိ၊ အသိတ္တာ တေ ဂရု မေဿတိ။ အဿော ¶ ဘဒြော ကသာမိဝ၊ သမ္မဒညာ ဝိမုတ္တာနံ။ မနသာဒညာ ဝိမုတ္တာနံ၊ အတ္တဒတ္ထမဘိညာယ။ စိရံနာယတိ၊ ဣတော နာယတိ။ ယသ္မာတိဟ ဘိက္ခဝေ၊ တသ္မာတိဟ ဘိက္ခဝေ၊ အဇ္ဇတဂ္ဂေ ပါဏုပေတံ။ သဗ္ဘိရေဝ သမာသေထ၊ အာရဂ္ဂေရိဝ သာသပေါ၊ သာသပေါရိဝ အာရဂ္ဂါ။ ဆဠဘိညာ၊ သဠာယတနံ။
ဝါတိ ကသ္မာ? ဧဝံ မဟိဒ္ဓိယာ ဧသာ၊ အက္ကောစ္ဆိ မံ အဝဓိ မံ၊ အဇိနိ မံ အဟာသိ မေ၊ အဇေယျော အနုဂါမိကော။
စဂ္ဂဟဏေန ဣဓေဝ မကာရဿ ပကာရော ဟောတိ။ စိရပ္ပဝါသိံ ပုရိသံ။
ကကာရဿ စ ဒကာရော ဟောတိ။ သဒတ္ထပသုတော သိယာ။
ဒကာရဿ စ တကာရော ဟောတိ၊ သုဂတော။
ဗျဉ္ဇနေ ပရေ ကွစိ ဩကာရာဂမော ဟောတိ။
အတိပ္ပဂေါ ခေါ တာဝ သာဝတ္ထိယံ ပိဏ္ဍာယ စရိတုံ။ ပရောသဟဿံ။
ကွစီကိ ¶ ကသ္မာ? ဧထ ပဿထိမံ လောကံ၊ အန္ဓီဘူတော အယံ လောကော။
နိဂ္ဂဟိတဉ္စာဂမော ဟောတိ သရေ ဝါ ဗျဉ္ဇနေ ဝါ ပရေ ကွစိ။
စက္ခုံဥဒပါဒိ၊ အဝံသိရော၊ ယာဝဉ္စိဓ ဘိက္ခဝေ ပုရိမံ ဇာတိံ သရာမိ၊ အဏုံထူလာနိ သဗ္ဗသော၊ မနောပုဗ္ဗင်္ဂမာ ဓမ္မာ။
ကွစီတိ ကသ္မာ? ဣဓေဝ နံ ပသံသန္တိ၊ ပေစ္စ သဂ္ဂေ ပမောဒတိ၊ န ဟိ ဧတေဟိ ယာနေဟိ၊ ဂစ္ဆေယျ အဂတံ ဒိသံ။
စဂ္ဂဟဏေန ဝိသဒ္ဒဿ စ ပကာရော ဟောတိ။ ပစေဿတိ၊ ဝိစေဿတိ ဝါ။
နိဂ္ဂဟိတံ ခေါ သရေ ပရေ ကွစိ လောပံ ပပ္ပောတိ။
တာသာဟံ သန္တိကေ၊ ဝိဒူနဂ္ဂမိတိ။
ကွစီတိ ကသ္မာ? အဟမေဝ နူန ဗာလော ဧတမတ္ထံ ဝိဒိတွာန။
၃၉၊ ၅၄။ ဗျဉ္ဇနေ ¶ စ။
နိဂ္ဂဟိတံ ခေါ ဗျဉ္ဇနေ ပရေ ကွစိ လောပံ ပပ္ပောတိ။
အရိယသစ္စာနဒဿနံ၊ ဧတံ ဗုဒ္ဓါနသာသနံ။
ကွစီတိ ကသ္မာ? ဧတံ မင်္ဂလမုတ္တမံ၊ တံ ဝေါ ဝဒါမိ ဘဒ္ဒန္တေ။
နိဂ္ဂဟိတမှာ ပရော သရော လောပံ ပပ္ပောတိ ဝါ။
ဘာသိတံ အဘိနန္ဒုန္တိ၊ ဥတ္တတ္တံဝ၊ ယထာဗီဇံဝ၊ ယထာဓညံဝ။
ဝါတိ ကသ္မာ? အဟမေဝ နူန ဗာလော၊ ဧတဒဟောသိ။
နိဂ္ဂဟိတမှာ ပရသ္မိံ သရေ လုတ္တေ ယဒိ ဗျဉ္ဇနော သသညောဂေါ ဝိသညောဂေါ ဟောတိ။
ဧဝံသ တေ အာသဝေါ၊ ပုပ္ဖံသာ ဥပ္ပဇ္ဇိ။
လုတ္တေတိ ကသ္မာ? ဧဝမဿ ဝိဒူနဂ္ဂမိတိ။
စဂ္ဂဟဏေန ¶ တိဏ္ဏံ ဗျဉ္ဇနာနမန္တရေ ယေ သရူပါ၊ တေသမ္ပိ လောပေါ ဟောတိ။ အဂျာဂါရံ၊ ပဋိသန္ထာရဝုတျဿ။
ဣတိ သန္ဓိကပ္ပေ စတုတ္ထော ကဏ္ဍော။
ပဉ္စမကဏ္ဍ
၄၂၊ ၃၂။ ဂေါသရေ ပုထဿာဂမော ကွစိ။
ပုထဣစ္စေတဿ အန္တေ သရေ ပရေ ကွစိ ဂကာရာဂမော ဟောတိ။
ပုထဂေ ဝ။
ပါဣစ္စေတဿ အန္တေ သရေ ပရေ ကွစိ ဂကာရာဂမော ဟောတိ၊ အန္တော စ သရော ရဿော ဟောတိ။
ပဂေဝ ဝုတျဿ။
ကွစီတိ ကသ္မာ? ပါ ဧဝ ဝုတျဿ။
အဘိဣစ္စေတဿ သရေ ပရေ အဗ္ဘာဒေသော ဟောတိ။ အဗ္ဘုဒီရိတံ၊ အဗ္ဘုဂ္ဂစ္ဆတိ။
၄၅၊ ၂၅။ အဇ္ဈော ¶ အဓိ။
အဓိဣစ္စေတဿ သရေ ပရေ အဇ္ဈာဒေသော ဟောတိ။
အဇ္ဈောကာသေ၊ အဇ္ဈာဂမာ။
တေ စ ခေါ အဘိအဓိဣစ္စေတေ ဣဝဏ္ဏေ ပရေ အဗ္ဘော အဇ္ဈောဣတိဝုတ္တရူပါ နံ ဟောန္တိ ဝါ။
အဘိစ္ဆိတံ၊ အဓီရိတံ။
ဝါတိ ကသ္မာ? အဗ္ဘီရိတံ၊ အဇ္ဈိဏမုတ္တော။
အတိဣစ္စေတဿ အန္တဘူတဿ တိသဒ္ဒဿ ဣဝဏ္ဏေ ပရေ ‘‘သဗ္ဗော စံ တီ’’တိ ဝုတ္တရူပံ န ဟောတိ။
အတီသိဂဏော၊ အတီရိတံ။
ဣဝဏ္ဏေတိ ကသ္မာ? အစ္စန္တံ။
ပတိဣစ္စေတဿ သရေ ဝါ ဗျဉ္ဇနေ ဝါ ပရေ ကွစိ ပဋိအာဒေသော ဟောတိ။
ပဋဂ္ဂိ ဒါတဗ္ဗော၊ ပဋိဟညတိ။
ကွစီတိ ¶ ကသ္မာ? ပစ္စန္တိမေသု ဇနပဒေသု၊ ပတိလီယတိ၊ ပတိရူပဒေသဝါသော စ။
ပုထဣစ္စေတဿ အန္တော သရော ဗျဉ္ဇနေ ပရေ ဥကာရော ဟောတိ။
ပုထုဇ္ဇနော၊ ပုထုဘူတံ။
အန္တဂ္ဂဟဏေန အပုထဿာပိ သရေ ပရေ အန္တဿ ဥကာရော ဟောတိ၊ မနုညံ။
အဝဣစ္စေတဿ ဗျဉ္ဇနေ ပရေ ကွစိ ဩကာရော ဟောတိ။
အန္ဓကာရေန ဩနဒ္ဓါ။
ကွစီတိ ကသ္မာ? အဝသုဿတု မေ သရီရေ မံသလောဟိတံ။
၅၁၊ ၅၉။ အနုပဒိဋ္ဌာနံ ဝုတ္တယောဂတော။
အနုပဒိဋ္ဌာနံ ဥပသဂ္ဂနိပါတာနံ သရသန္ဓီဟိ ဗျဉ္ဇနသန္ဓီဟိ ဝုတ္တသန္ဓီဟိ စ ယထာယောဂံ ယောဇေတဗ္ဗံ။
ပါပနံ ¶ ၊ ပရာယဏံ၊ ဥပါယနံ၊ ဥပါဟနံ၊ နျာယောဂေါ၊ နိဂုပဓိ၊ အနုဗောဓော၊ ဒုဝူပသန္တံ၊ သုဝူပသန္တံ၊ ဒွါလယော၊ သွာလယော၊ ဒုရာချာတံ၊ သွာချာတော၊ ဥဒီရိတံ၊ သမုဒ္ဒိဋ္ဌံ၊ ဝိယဂ္ဂံ၊ ဝိဇ္ဈဂ္ဂံ၊ ဗျဂ္ဂံ၊ အဝယာဂမနံ၊ အနွေတိ၊ အနုပဃာတော၊ အနစ္ဆရိယံ၊ ပရိယေသနာ၊ ပရာမာသော၊ ဧဝံ သရေ စ ဟောန္တိ။
ပရိဂ္ဂဟော၊ ပဂ္ဂဟော၊ ပက္ကမော၊ ပရက္ကမော၊ နိက္ကမော၊ နိက္ကသာဝေါ၊ နိလ္လယနံ၊ ဒုလ္လယနံ၊ ဒုမ္ဘိက္ခံ၊ ဒုဗ္ဗုတ္တံ၊ သန္ဒိဋ္ဌံ၊ ဒုဂ္ဂဟော၊ ဝိဂ္ဂဟော၊ နိဂ္ဂတော၊ အဘိက္ကမော၊ ပဋိက္ကမော၊ ဧဝံ ဗျဉ္ဇနေ စ။ သေသာ သဗ္ဗေ ယောဇေတဗ္ဗာ။
ဣတိ သန္ဓိကပ္ပေ ပဉ္စမော ကဏ္ဍော။
သန္ဓိကပ္ပော နိဋ္ဌိတော။