📜
၂။ နာမကပ္ပ
ပဌမကဏ္ဍ
၅၂၊ ၆၀။ ဇိနဝစနယုတ္တံ ¶ ဟိ။
‘‘ဇိနဝစနယုတ္တံ ဟိ’’ ဣစ္စေတံ အဓိကာရတ္ထံ ဝေဒိတဗ္ဗံ။
ယထာ ယထာ ဇိနဝစနယုတ္တံ ဟိ လိင်္ဂံ၊ တထာ တထာ ဣဓ လိင်္ဂဉ္စ နိပ္ပဇ္ဇတေ။
တံ ယထာ? ဧသော နော သတ္ထာ၊ ဗြဟ္မာ အတ္တာ၊ သခါ၊ ရာဇာ။
တတော ဇိနဝစနယုတ္တေဟိ လိင်္ဂေဟိ ဝိဘတ္တိယော ပရာ ဟောန္တိ။
၅၅၊ ၆၃။ သိ ယော၊ အံ ယော၊ နာ ဟိ၊ သ နံ၊ သ္မာ ဟိ၊ သ နံ၊ သ္မိံ သု။
ကာ စ ပန တာယော ဝိဘတ္တိယော? သိ၊ ယော ဣတိ ပဌမာ၊ အံ၊ ယောဣတိ ဒုတိယာ၊ နာ ဟိ ဣတိ တတိယာ၊ သ၊ နံဣတိ စတုတ္ထီ၊ သ္မာ၊ ဟိ ဣတိ ပဉ္စမီ၊ သ၊ နံ ဣတိ ဆဋ္ဌီ၊ သ္မိံ၊ သု ဣတိ သတ္တမီ။
ဝိဘတ္တိဣစ္စနေန ¶ ကွတ္ထော? အမှဿ မမံ သဝိဘတ္တိဿ သေ။
ယထာ ယထာ တေသံ ဇိနဝစနာနံ အနုပရောဓော။ တထာ တထာ ဣဓ လိင်္ဂဉ္စ နိပ္ပဇ္ဇတေ။
အာလပနတ္ထေ သိ ဂသညော ဟောတိ။
ဘောတိ အယျေ၊ ဘောတိ ကညေ၊ ဘောတိ ခရာဒိယေ။
အာလပနေတိ ကိမတ္ထံ? သာ အယျာ။
သီတိ ကိမတ္ထံ? ဘောတိယော အယျာယော။
ဂဣစ္စနေန ကွတ္ထော? ဃတေ စ။
ဣဝဏ္ဏုဝဏ္ဏာဣစ္စေတေ ဈလသညာ ဟောန္တိ ယထာသင်္ချံ။
ဣသိနော ¶ ၊ အဂ္ဂိနော၊ ဂဟပတိနော၊ ဒဏ္ဍိနော။ သေတုနော၊ ကေတုနော၊ ဘိက္ခုနော။ သယမ္ဘုနော၊ အဘိဘုနော။
ဈလဣစ္စနေန ကွတ္ထော? ဈလတော သဿ နော ဝါ။
တေ ဣဝဏ္ဏုဝဏ္ဏာ ယဒါ ဣတ္ထိချာ၊ တဒါ ပသညာ ဟောန္တိ။
ရတ္တိယာ၊ ဣတ္ထိယာ၊ ဓေနုယာ၊ ဝဓုယာ။
ဣတ္ထိချာတိ ကိမတ္ထံ? ဣသိနာ၊ ဘိက္ခုနာ။
သဣစ္စနေန ¶ ကွတ္ထော? ပတော ယာ။
အာကာရော ယဒါ ဣတ္ထိချော၊ တဒါ ဃသညော ဟောတိ။
သဒ္ဓါယ၊ ကညာယ၊ ဝီဏာယ၊ ဂင်္ဂါယ၊ ဒိသာယ သာလာယ၊ မာလာယ၊ တုလာယ၊ ဒေါလာယ၊ ပဘာယ၊ သောဘာယ၊ ပညာယ၊ ကရုဏာယ နာဝါယ၊ ကပါလိကာယ။
အာတိ ကိမတ္ထံ? ရတ္တိယာ၊ ဣတ္ထိယာ။
ဣတ္ထိချောတိ ကိမတ္ထံ? သတ္ထာရာ ဒေသိတော အယံ ဓမ္မော။
ဃဣစ္စနေန ကွတ္ထော? ဃတော နာဒီနံ။
သကာရာဂမော ဟောတိ သေ ဝိဘတ္တိမှိ။
ပုရိသဿ၊ အဂ္ဂိဿ၊ ဣသိဿ၊ ဒဏ္ဍိဿ၊ ဘိက္ခုဿ၊ သယမ္ဘုဿ၊ အဘိဘုဿ။
သေတိ ကိမတ္တံ? ပုရိသသ္မိံ။
သံသာသု ဧကဝစနေသု ဝိဘတ္တာဒေသေသု သကာရာဂမော ဟောတိ။
ဧတိဿံ၊ ဧတိဿာ ဣမိဿံ၊ ဣမိဿာ၊ တိဿံ၊ တိဿာ၊
တဿံ တဿာ၊ ယဿံ၊ ယဿာ၊ အမုဿံ၊ အမုဿာ။
သံသာသွီတိ ကိမတ္ထံ? အဂ္ဂိနာ၊ ပါဏိနာ။
ဧကဝစနေသွီတိ ကိမတ္ထံ? တာသံ၊ သဗ္ဗာသံ။
ဝိဘတ္တာဒေသေသွီတိ ကိမတ္ထံ? မနသာ၊ ဝစသာ၊ ထာမသာ။
ဧတာဣမာဣစ္စေတေသမန္တော သရော ဣကာရော ဟောတိ သံသာသု ဧကဝစနေသု ဝိဘတ္တာဒေသေသု။
ဧတိဿံ၊ ဧတိဿာ၊ ဣမိဿံ၊ ဣမိဿာ။
သံသာသွီတိ ¶ ကိမတ္ထံ? ဧတာယ၊ ဣမာယ။
ဧကဝစနေသွီတိ ကိမတ္ထံ? ဧတာသံ၊ ဣမာသံ။
တဿာ ဣတ္ထိယံ ဝတ္တမာနဿ အန္တဿ အာကာရဿ ဣကာရော ဟောတိ ဝါ သံသာသု ဧကဝစနေသု ဝိဘတ္တာဒေသေသု။
တိဿံ၊ တိဿာ၊ တဿံ၊ တဿာ။
တတော တာ ဧတာ ဣမာတော သဿ ဝိဘတ္တိဿ ဿာယာဒေသော ဟောတိ ဝါ။
တိဿာယ၊ ဧတိဿာယ၊ ဣမိဿာယ။
ဝါတိ ကိမတ္ထံ? တိဿာ၊ ဧတိဿာ၊ ဣမိဿာ။
ဃော ရဿမာပဇ္ဇတေ သံသာသု ဧကဝစနေသု ဝိဘတ္တာဒေသေသု။
တဿံ၊ တဿာ၊ ယဿံ၊ ယဿာ၊ သဗ္ဗဿံ၊ သဗ္ဗဿာ။
သံသာသွီတိ ကိမတ္ထံ? တာယ၊ သဗ္ဗာယ။
ဧကဝစနေသွီတိ ကိမတ္ထံ? တာသံ၊ သဗ္ဗာသံ။
၆၇၊ ၂၂၉။ နော ¶ စ ဒွါဒိတော နံမှိ။
ဒွိဣစ္စေဝမာဒိတော သင်္ချာတော နကာရာဂမော ဟောတိ နံမှိ ဝိဘတ္တိမှိ။
ဒွိန္နံ၊ တိန္နံ၊ စတုန္နံ၊ ပဉ္စန္နံ၊ ဆန္နံ၊ သတ္တန္နံ၊ အဋ္ဌန္နံ၊ နဝန္နံ၊ ဒသန္နံ။
ဒွါဒိတောတိ ကိမတ္ထံ? သဟဿာနံ။
နံမှီတိ ကိမတ္ထံ? ဒွီသု၊ တီသု။
စဂ္ဂဟဏေနဿဉ္စာဂမော ဟောတိ။ စတဿန္နံ ဣတ္ထီနံ တိဿန္နံ ဝေဒနာနံ။
၆၈၊ ၁၈၄။ အမာ ပတော သ္မိံသ္မာနံ ဝါ။
ပဣစ္စေတသ္မာ သ္မိံသ္မာဣစ္စေတေသံ အံအာအာဒေသာ ဟောန္တိ ဝါ ယထာသင်္ချံ။
မတျံ၊ မတိယံ၊ မတျာ၊ မတိယာ၊ နိကတျံ။ နိကတိယံ၊ နိကတျာ၊ နိကတိယာ၊ ဝိကတျံ၊ ဝိကတိယံ၊ ဝိကတျာ၊ ဝိကတိယာ၊ ဝိရတျံ၊ ဝိရတိယံ၊ ဝိရတျာ၊ ဝိရတိယာ၊ ရတျံ၊ ရတိယံ၊ ရတျာ၊ ရတိယာ၊ ပုထဗျံ၊ ပုထဝိယံ၊ ပုထဗျာ၊ ပုထဝိယာ၊ ပဝတျံ၊ ပဝတျာ၊ ပဝတ္တိယံ၊ ပဝတ္တိယာ။
အာဒိဣစ္စေတသ္မာ သ္မိံဝစနဿ အံဩအာဒေသာ ဟောန္တိ ဝါ။
အာဒီံ ¶ ၊ အာဒေါ။
ဝါတိ ကိမတ္ထံ? အာဒိသ္မိံ၊ အာဒိမှိ နာထံ နမဿိတွာန၊
စဂ္ဂဟဏေန အညသ္မာပိ သ္မိံ ဝစနဿ အာ ဩ အံအာဒေသာ ဟောန္တိ။ ဒိဝါ စ ရတ္တော စ ဟရန္တိ ယေ ဗလိ။ ဗာရာဏသိံ အဟု ရာဇာ။
ဈလဣစ္စေတေသံ ဣယ ဥဝဣစ္စေတေ အာဒေသာ ဟောန္တိ ဝါ သရေ ပရေ ယထာသင်္ချံ။
တိယန္တံ ပစ္ဆိယာဂါရေ၊ အဂ္ဂိယာဂါရေ၊ ဘိက္ခုဝါသနေ နိသီဒတိ၊ ဝုထုဝါသနေ နိသီဒတိ။
သရေတိ ကိမတ္ထံ? တိမလံ၊ တိဖလံ၊ တိစတုက္ကံ၊ တိဒဏ္ဍံ၊ တိလောကံ၊ တိနယနံ၊ တိပါသံ၊ တိဟံသံ၊ တိဘဝံ၊ တိခန္ဓံ၊ တိပိဋကံ၊ တိဝေဒနံ၊ စတုဒ္ဒိသံ၊ ပုထုဘူတံ။
ဝါတိ ကိမတ္ထံ? ပဉ္စဟင်္ဂေဟိ တီဟာကာရေဟိ။ စက္ခာယတနံ။
ဝါတိ ဝိကပ္ပနတ္ထံ၊ ဣကာရဿ အယာဒေသော ဟောတိ၊ ဝတ္ထုတ္တယံ။
ဈလာနံ ယကာရ ဝကာရာဒေသာ ဟောန္တိ သရေ ပရေ ယထာသင်္ချံ။
အဂျာဂါရံ ¶ ၊ ပက္ခာယတနံ၊ သွာဂတံ၊ တေ မဟာဝီရ။
စဂ္ဂဟဏံ သမ္ပိဏ္ဍနတ္ထံ။
ပသညဿ စ ဣဝဏ္ဏဿ ဝိဘတ္တာဒေသေ သရေ ပရေ ယကာရာဒေသော ဟောတိ။
ပုထဗျာ၊ ရတျာ၊ မတျာ။
သရေတိ ကိမတ္ထံ? ပုထဝိယံ။
ဂေါဣစ္စေတဿ ဩကာရဿ အာဝါဒေသော ဟောတိ သေ ဝိဘတ္တိမှိ။
ဂါဝဿ။
ဂေါဣစ္စေတဿ ဩကာရဿ အာဝါဒေသော ဟောတိ ယောဣစ္စေတေသု ပရေသု။
ဂါဝေါ ဂစ္ဆန္တိ၊ ဂါဝေါ ပဿန္တိ၊ ဂါဝီ ဂစ္ဆန္တိ၊ ဂါဝီ ပဿန္တိ။
စဂ္ဂဟဏံ ကိမတ္ထံ? နာသ္မာသ္မိံသု ဝစနေသု အာဝါ ဒေသော ဟောတိ။
ဂါဝေန၊ ဂါဝါ၊ ဂါဝေ၊ ဂါဝေသု။
၇၅၊ ၁၇၀။ အဝမှိ ¶ စ။
ဂေါဣစ္စေတဿ ဩကာရဿ အာဝအဝဣစ္စေတေ အာဒေသာ ဟောန္တိ အံမှိ ဝိဘတ္တိမှိ။
ဂါဝံ၊ ဂဝံ။
စဂ္ဂဟဏေန သာဒိသေသေသု ပုဗ္ဗုတ္တဝစနေသု ဂေါဣစ္စေတဿ ဩကာရဿ အဝါဒေသော ဟောတိ။
ဂဝဿ၊ ဂဝေါ၊ ဂဝေန၊ ဂဝါ၊ ဂဝေ၊ ဂဝေသု။
အာဝဣစ္စေတဿ ဂါဝါဒေသဿ အန္တ သရဿ ဥကာရာဒေသော ဟောတိ ဝါ အံမှိ ဝိဘတ္တိမှိ။
ဂါဝုံ၊ ဂါဝံ။
အာဝဿေတိ ကိမတ္ထံ? ဂါဝေါ တိဋ္ဌန္တိ။
၇၇၊ ၁၇၅။ တတော နမံ ပတိမှာ လုတ္တေ စ သမာသေ။
တတော ဂေါသဒ္ဒတော နံဝစနဿ အံအာဒေသော ဟောတိ၊ ဂေါဣစ္စေတဿ ဩကာရဿ အဝါဒေသော ဟောတိ ပတိမှိ ပရေ အလုတ္တေ စ သမာသေ။
ဂဝပတိ။
အလုတ္တေတိ ¶ ကိမတ္ထံ? ဂေါပတိ။
စဂ္ဂဟဏေန အသမာသေပိ နံဝစနဿ အံအာဒေသော ဟောတိ၊ ဂေါဣစ္စေတဿ ဩကာရဿ အဝါဒေသော ဟောတိ။
ဂဝံ။
ဂေါဣစ္စေတဿ ဩကာရဿ အဝါဒေသော ဟောတိ သမာသေ စ သရေ ပရေ။
ဂဝဿကံ၊ ဂဝေဠကံ၊ ဂဝါဇိနံ။
စဂ္ဂဟဏေန ဥဝဏ္ဏဣစ္စေဝမန္တာနံ လိင်္ဂါနံ ဥဝအဝဥရာဒေသာ ဟောန္တိ သ္မိံယောဣစ္စေတေသု ကွစိ။
ဘုဝိ၊ ပသဝေါ၊ ဂုရဝေါ၊ စတုရော။
သရေတိ ကိမတ္ထံ? ဂေါဓနော၊ ဂေါဝိန္ဒော။
၇၉၊ ၄၆။ တဗ္ဗိပရီတူပပဒေ ဗျဉ္ဇနေ စ။
တဿ အဝသဒ္ဒဿ ယဒါ ဥပပဒေ တိဋ္ဌမာနဿ တဿ ဩကာရဿ ဝိပရီတော ဟောတိ ဗျဉ္ဇနေ ပရေ။
ဥဂ္ဂတေ သူရိယေ၊ ဥဂ္ဂစ္ဆတိ၊ ဥဂ္ဂဟေတွာ။
စဂ္ဂဟဏမဝဓာရဏတ္ထံ။ အဝသာနေ၊ အဝကိရဏေ၊ အဝကိရတိ။
၈၀၊ ၁၇၃။ ဂေါဏ ¶ နံမှိ ဝါ။
သဗ္ဗဿေဝ ဂေါသဒ္ဒဿ ဂေါဏာဒေသော ဟောတိ ဝါ နံမှိ ဝိဘတ္တိမှိ။
ဂေါဏာနံ သတ္တန္နံ။
ဝါတိ ကိမတ္ထံ?
ဂေါနဉ္စေ တရမာနာနံ၊ ဥဇုံ ဂစ္ဆတိ ပုင်္ဂဝေါ။
သဗ္ဗာ ဂါဝီ ဥဇုံ ယန္တိ၊ နေတ္တေ ဥဇုံ ဂတေ သတိ။
ယောဂဝိဘာဂေန အညတြာပိ ဂေါဏာဒေသော ဟောတိ။ ဂေါဏဘူတာနံ။
သုဟိနာဣစ္စေတေသု သဗ္ဗဿ ဂေါသဒ္ဒဿ ဂေါဏာဒေသော ဟောတိ ဝါ။
ဂေါဏေသု၊ ဂေါဏေဟိ၊ ဂေါဏေဘိ၊ ဂေါဏေန။
ဝါတိ ကိမတ္ထံ? ဂေါသု၊ ဂေါဟိ၊ ဂေါဘိ၊ ဂဝေန။
စဂ္ဂဟဏေန သျာဒိသေသေသု ပုဗ္ဗုတ္တရဝစနေသုပိ ဂေါဏ ဂု ဂဝယာဒေသာ ဟောန္တိ။ ဂေါဏော၊ ဂေါဏာ၊ ဂေါဏံ၊ ဂေါဏေ၊ ဂေါဏဿ၊ ဂေါဏမှာ။ ဂေါဏမှိ၊ ဂုန္နံ၊ ဂဝယေဟိ၊ ဂဝယေဘိ။
၈၂၊ ၁၄၉။ အံမော ¶ နိဂ္ဂဟိတံ ဈလပေဟိ။
အံဝစနဿ မကာရဿ စ ဈလပဣစ္စေတေဟိ နိဂ္ဂဟိတံ ဟောတိ
အဂ္ဂိံ၊ ဣသိံ၊ ဂဟပတိံ၊ ဒဏ္ဍိံ၊ မဟေသိံ၊ ဘိက္ခုံ၊ ပဋုံ၊ သယမ္ဘုံ၊ အဘိဘုံ၊ ရတ္တိံ၊ ဣတ္ထိံ၊ ဝဓုံ၊ ပုလ္လိင်္ဂံ၊ ပုမ္ဘာဝေါ၊ ပုင်္ကောကိလော။
အံမောတိ ကိမတ္ထံ? အဂ္ဂိနာ၊ ပါဏိနာ၊ ဘိက္ခုနာ၊ ရတ္တိယာ၊ ဣတ္ထိယာ၊ ဝဓုယာ။
ဈလပေဟီတိ ကိမတ္ထံ? သုခံ၊ ဒုက္ခံ။
ပုနာရမ္ဘ ဟဏံ ဝိဘာသာနိဝတ္တနတ္ထံ။ အဂ္ဂိံ၊ ပဋုံ၊ ဗုဒ္ဓိံ၊ ဝဓုံ။
၈၃၊ ၆၇။ သရလောပေါ’ မာဒေသ ပစ္စယာဒိမှိ သရလောပေ တု ပကတိ။
သရလောပေါ ဟောတိ အမာဒေသပစ္စယာဒိမှိ သရ လောပေ တု ပကတိ ဟောတိ။
ပုရိသံ၊ ပုရိသေ၊ ပါပံ၊ ပါပေ၊ ပါပိယော၊ ပါပိဋ္ဌော။
အမာဒေသပစ္စယာဒိမှီတိ ကိ တ္ထံ? အပ္ပမာဒေါ အမတံ ပဒံ။
သရလောပေတိ ကိမတ္ထံ? ပုရိသဿ၊ ဒဏ္ဍိနံ။
တုဂ္ဂဟဏမဝဓာရဏတ္ထံ။ ဘိက္ခုနီ၊ ဂဟပတာနီ။
ပကတိဂ္ဂဟဏသာမတ္ထေန ¶ ပုန သန္ဓိဘာဝေါ စ ဟောတိ။ သေယျော၊ သေဋ္ဌော၊ ဇေယျော၊ ဇေဋ္ဌော။
၈၄၊ ၁၄၄။ အဃောရဿမေကဝစနယောသွပိ စ။
အဃော သရော ရဿမာပဇ္ဇတေ ဧကဝစနယောဣစ္စေတေသု။
ဣတ္ထိံ၊ ဣတ္ထိယော၊ ဣတ္ထိယာ။ ဝဓုံ၊ ဝဓုယော၊ ဝဓုယာ။ ဒဏ္ဍိံ၊ ဒဏ္ဍိနော၊ ဒဏ္ဍိနာ။ သယမ္ဘုံ၊ သယမ္ဘုဝေါ၊ သယမ္ဘုနာ။
အဃောတိ ကိမတ္ထံ? ကညံ၊ ကညာယော၊ ကညာယ။
ဧကဝစနယောသွီတိ ကိမတ္ထံ? ဣတ္ထီဟိ၊ သယမ္ဘူဟိ။
စဂ္ဂဟဏမဝဓာရဏတ္ထံ။ နဒိံ၊ နဒိယော၊ နဒိယာ။
အပိဂ္ဂဟဏေန န ရဿမာပဇ္ဇတေ။ ဣတ္ထီ၊ ဘိက္ခုနီ။
သိသ္မိံ အနပုံသကာနိ လိင်္ဂါနိ န ရဿမာပဇ္ဇန္တေ။ ဣတ္ထီ၊ ဘိက္ခုနီ၊ ဝဓူ၊ ဒဏ္ဍီ၊ သယမ္ဘူ။
သိသ္မိံန္တိ ကိမတ္ထံ? ဘောတိ ဣတ္ထိ၊ ဘောတိ ဝဓု၊ ဘော ဒဏ္ဍိ၊ ဘော သယမ္ဘု။
အနပုံသကာနီတိ ¶ ကိမတ္ထံ? သုခကာရိ ဒါနံ၊ သုခကာရိ သီလံ၊ သီဃယာယိ စိတ္တံ။
ဥဘဣစ္စေဝမာဒိတော သင်္ချာတော နံဝစနဿ ဣန္နံ ဟောတိ။
ဥဘိန္နံ၊ ဒုဝိန္နံ။
ဥဘာဒိတောတိ ကိမတ္ထံ? ဥဘယေသံ။
၈၇၊ ၂၃၁။ ဣဏ္ဏမိဏ္ဏန္နံ တီဟိ သင်္ချာဟိ။
နံဝစနဿ ဣဏ္ဏံ ဣဏ္ဏန္နံ ဣစ္စေတေ အာဒေသာ ဟောန္တိ တီဟိ သင်္ချာဟိ။
တိဏ္ဏံ၊ တိဏ္ဏန္နံ။
တီဟီတိ ကိမတ္ထံ? ဒွိန္နံ။
၈၈၊ ၁၄၇။ ယောသု ကတနိကာရလောပေသု ဒီဃံ။
သဗ္ဗေ သရာ ယောသု ကတနိကာရလောပေသု ဒီဃမာပဇ္ဇန္တေ။
အဂ္ဂီ၊ ဘိက္ခူ၊ ရတ္တီ၊ ယာဂူ၊ အဋ္ဌီ၊ အဋ္ဌီနိ၊ အာယူ၊ အာယူနိ၊ သဗ္ဗာနိ၊ ယာနိ၊ တာနိ၊ ကာနိ၊ ကတမာနိ၊ ဧတာနိ၊ အပူနိ၊ ဣမာနိ။
ယောသွီတိ ¶ ကိမတ္ထံ? အဂ္ဂိ၊ ဘိက္ခု၊ ရတ္တိ၊ ယာဂု၊ သဗ္ဗော၊ ယော၊ သော၊ ကော၊ အမုကော။
ကတနိကာရလောပေသွီတိ ကိမတ္ထံ? ဣတ္ထိယော၊ ဝဓုယော၊ သယမ္ဘုဝေါ။
ပုနာရမ္ဘဂ္ဂဟဏံ ကိမတ္ထံ? နိစ္စဒီပနတ္ထံ။ အဂ္ဂီ၊ ဘိက္ခူ၊ ရတ္တီ၊ ယာနိ၊ တာနိ၊ ကတမာနိ။
သုနံဟိဣစ္စေတေသု သဗ္ဗေ သရာ ဒီဃမာပဇ္ဇန္တေ။
အဂ္ဂီသု၊ အဂ္ဂီနံ၊ အဂ္ဂီဟိ၊ ရတ္တီသု၊ ရတ္တီနံ၊ ရတ္တီဟိ။ ဘိက္ခူသု၊ ဘိက္ခူနံ၊ ဘိက္ခူဟိ။ ပုရိသာနံ။
ဧတေသွီတီ ကိမတ္ထံ? အဂ္ဂိနာ၊ ပါဏိနာ၊ ဒဏ္ဍိနာ။
စဂ္ဂဟဏမဝဓာရဏတ္ထံ။ သုခေတ္တေသု ဗြဟ္မစာရိသု၊ ဓမ္မမက္ခာသိ ဘဂဝါ ဘိက္ခုနံ ဒတွာ သကေဟိ ပါဏိဘိ။
ပဉ္စာဒီနံ သင်္ချာနံ အန္တော အတ္တမာပဇ္ဇတေ သုနံဟိဣစ္စေတေသု။
ပဉ္စသု၊ ပဉ္စန္နံ၊ ပဉ္စဟိ၊ ဆသု၊ ဆန္နံ၊ ဆဟိ၊ သတ္တသု၊ သတ္တန္နံ၊ သတ္တဟိ၊ အဋ္ဌသု၊ အဋ္ဌန္နံ၊ အဋ္ဌဟိ၊ နဝသု၊ နဝန္နံ၊ နဝဟိ၊ ဒသသု၊ ဒသန္နံ၊ ဒသဟိ။
ပဉ္စာဒီနမီတိ ကိမတ္ထံ? ဒွီသု၊ ဒွိန္နံ၊ ဒွီဟိ။
အတ္တမိတိဘာဝနိဒ္ဒေသော ¶ ဥဘယဿာဂမနတ္ထံ၊ အန္တော ဥကာရော အတ္တမာပဇ္ဇတေ။ စတဿန္နံ ဣတ္ထီနံ။ တိဿန္နံ ဝေဒနာနံ။
ပတိဿန္တော အတ္တမာပဇ္ဇတေ ဣနီမှိ ပစ္စယေ ပရေ။
ဂဟပတာနီ။
ဣနီမှီတိ ကိမတ္ထံ? ဂဟပတိ။
န္တုပစ္စယဿ အန္တော အတ္တမာပဇ္ဇတေ သုနံဟိယောဣစ္စေတေသု ပရေသု။
ဂုဏဝန္တေသု၊ ဂုဏဝန္တာနံ၊ ဂုဏဝန္တေဟိ၊ ဂုဏဝန္တာ၊ ဂုဏဝန္တေ။
န္တုဿေတိ ကိမတ္ထံ? ဣသီနံ။
ဧတေသွီတိ ကိမတ္ထံ? ဂုဏဝါ။
စဂ္ဂဟဏေန အညေသု ဝစနေသု အတ္တဉ္စ ဟောတိ။ ဂုဏဝန္တသ္မိံ၊ ဂုဏဝန္တေန။
အန္တဂ္ဂဟဏေန န္တုပစ္စယဿ အန္တော အတ္တမာပဇ္ဇတေ၊ ယောနဉ္စ ဣကာရော ဟောတိ။ ဂုဏဝန္တိ။
၉၃၊ ၁၀၆။ သဗ္ဗဿ ¶ ဝါ အံသေသု။
သဗ္ဗဿေဝ န္တုပစ္စယဿ အတ္တံ ဟောတိ ဝါ အံသဣစ္စေတေသု။
သတိမံ ဘိက္ခု၊ သတိမန္တံ ဘိက္ခုံ ဝါ၊ ဗန္ဓုမံ ရာဇာနံ၊ ဗန္ဓုမန္တံ ရာဇာနံ ဝါ၊ သတိမဿ ဘိက္ခုနော၊ သတိမတော ဘိက္ခုနော ဝါ၊ ဗန္ဓုမဿ ရညော သုင်္ကံ၊ ဗန္ဓုမတော ရညော ဝါ သုင်္ကံ ဒေတိ။
ဧတေသွီတိ ကိမတ္ထံ? သတိမာ ဘိက္ခု၊ ဗန္ဓုမာ ရာဇာ။
န္တုပစ္စယဿ အန္တဿ အတ္တံ ဟောတိ ဝါ သိမှိ ဝိဘတ္တိမှိ။
ဟိမဝန္တော ပဗ္ဗတော။
ဝါတိ ကိမတ္ထံ? ဟိမဝါ ပဗ္ဗတော။
၉၅၊ ၁၄၅။ အဂ္ဂိဿိနိ ¶ ။
အဂ္ဂိဿန္တဿ ဣနိ ဟောတိ ဝါ သိမှိ ဝိဘတ္တိမှိ။
ပုရတော အဂ္ဂိနိ၊ ပစ္ဆတော အဂ္ဂိနိ၊ ဒက္ခိဏတော အဂ္ဂိနိ၊ ဝါမတော အဂ္ဂိနိ။
ဝါတိ ကိမတ္ထံ? အဂ္ဂိ။
ယောသု အကတရဿော ဈော အတ္တမာပဇ္ဇတေ။
အဂ္ဂယော မုနယော၊ ဣသယော၊ ဂဟပတယော။
ယောသွီတိ ကိမတ္ထံ? အဂ္ဂီသု။
အကတရဿောတိ ကိမတ္ထံ? ဒဏ္ဍိနော။
ဈောတိ ကိမတ္ထံ? ရတ္တိယော။
ဝေဝေါဣစ္စေတေသု အကတရဿော လော အတ္တမာပဇ္ဇတေ။
ဘိက္ခဝေ၊ ဘိက္ခဝေါ၊ ဟေတဝေ၊ ဟေတဝေါ။
အကတရဿောတိ ကိမတ္ထံ? သယမ္ဘုဝေါ၊ ဝေဿဘုဝေါ၊ ပရာဘိဘုဝေါ။
ဝေဝေါသွီတိ ကိမတ္ထံ? ဟေတုနာ၊ ကေတုနာ၊ သေတုနာ။
စဂ္ဂဟဏမနုကဍ္ဎနတ္ထံ။
၉၈၊ ၁၈၆။ မာတုလာဒီနမာနတ္တမီကာရေ။
မာတုလဣစ္စေဝမာဒီနံ အန္တော အာနတ္တမာပဇ္ဇတေ ဤကာရေ ပစ္စယေ ပရေ။
မာတုလာနီ ¶ ၊ အယျကာနီ၊ ဝရုဏာနီ။
ဤကာရေတိ ကိမတ္ထံ? ဘိက္ခုနီ၊ ရာဇိနီ၊ ဇာလိနီ၊ ဂဟပတာနီ။
အာနတ္တဂ္ဂဟဏေန နဒီဣစ္စေတဿ ဒီသဒ္ဒဿ ဇ္ဇောဇ္ဇာ အာဒေသာ ဟောန္တိ သဟ ဝိဘတ္တိယာ ယောနာသဣစ္စေတေသု။ နဇ္ဇော သန္ဒန္တိ၊ နဇ္ဇာ ကတံ တရင်္ဂံ၊ နဇ္ဇာ နေရဉ္ဇရာယ တီရေ။
၉၉၊ ၈၁။ သ္မာဟိသ္မိံနံမှာဘိမှိဝါ။
သဗ္ဗတော လိင်္ဂတော သ္မာဟိသ္မိံ ဣစ္စေတေသံ မှာဘိမှိဣစ္စေတေ အာဒေသာ ဟောန္တိ ဝါ ယထာသင်္ချံ။
ပုရိသမှာ၊ ပုရိသသ္မာ၊ ပုရိသေဘိ၊ ပုရိသေဟိ၊ ပုရိသမှိ၊ ပုရိသသ္မိံ။
သ္မာဟိသ္မိံနမိတိ ကိမတ္ထံ? ဝဏ္ဏဝန္တံ အဂန္ဓကံ ဝိရုဠှပုပ္ဖံ၊ မဟန္တံ ဆတ္တံ မဟာဆတ္တံ၊ မဟန္တံ ဓဇံ မဟာဓဇံ။
တ ဣမဣစ္စေတေဟိ ကတာကာရေဟိ သ္မာသ္မိံ နံမှာမှိဣစ္စေတေ အာဒေသာ နေဝ ဟောန္တိ။
အသ္မာ ဌာနာ ဘယံ ဥပ္ပဇ္ဇတိ၊ အသ္မိံ ဌာနေ ဘယံ တိဋ္ဌတိ၊ အသ္မာ၊ အသ္မိံ။
ကတာကာရေဟီတိ ¶ ကိမတ္ထံ? တမှာ၊ တမှိ၊ ဣမမှာ၊ ဣမမှိ။
သုဟိဣစ္စေတေသု အကာရော ဧတ္တမာပဇ္ဇတေ။
သဗ္ဗေသု၊ ယေသု၊ တေသု၊ ကေသု၊ ပုရိသေသု၊ ဣမေသု၊ ကုသလေသု၊ တုမှေသု၊ အမှေသု၊ သဗ္ဗေဟိ၊ ယေဟိ၊ တေဟိ၊ ကေဟိ၊ ပုရိသေဟိ၊ ဣမေဟိ၊ ကုသလေဟိ၊ တုမှေဟိ၊ အမှေဟိ။
သဗ္ဗေသံ သဗ္ဗနာမာနံ အန္တော အကာရော ဧတ္တမာပဇ္ဇတေ နံမှိ ဝိဘတ္တိမှိ။
သဗ္ဗေသံ၊ သဗ္ဗေသာနံ၊ ယေသံ၊ ယေသာနံ၊ တေသံ၊ တေသာနံ၊ ဣမေသံ၊ ဣမေသာနံ၊ ကေသံ၊ ကေသာနံ၊ ဣတရေသံ၊ ဣတရေသာနံ၊ ကတမေသံ၊ ကတမေသာနံ။ သဗ္ဗနာမာနမိတိ ကိမတ္ထံ? ဗုဒ္ဓါနံ ဘဂဝန္တာနံ အာစိဏ္ဏသမာစိဏ္ဏော။
အကာရောတိ ကိမတ္ထံ? အမူသံ၊ အမူသာနံ။
နံမှီတိ ကိမတ္ထံ? သဗ္ဗေ၊ ဣမေ။
စဂ္ဂဟဏ မနုကဍ္ဎနတ္ထံ။
၁၀၃၊ ၇၉။ အတော ¶ နေန။
တသ္မာ အကာရတော နာဝစနဿ ဧနာဒေသော ဟောတိ။
သဗ္ဗေန၊ ယေန၊ တေန၊ ကေန၊ အနေန၊ ပုရိသေန၊ ရူပေန။
အတောတိ ကိမတ္ထံ? မုနိနာ၊ အမုနာ၊ ဘိက္ခုနာ။
နာတိ ကိမတ္ထံ? တသ္မာ။
တသ္မာ အကာရတော သိဝစနဿ ဩကာရာဒေသော ဟောတိ။
သဗ္ဗော၊ ယော၊ သော၊ ကော၊ အမုကော၊ ပုရိသော။
သီတိ ကိမတ္ထံ? ပုရိသာနံ။
အတောတိ ကိမတ္ထံ? သယမ္ဘူ။
တသ္မာ အကာရတော နာဝစနဿ သောအာဒေသော ဟောတိ ဝါ။
အတ္ထသော ဓမ္မံ ဇာနာတိ၊ ဗျဉ္ဇနသော အတ္ထံ ဇာနာတိ၊ အက္ခရသော၊ သုတ္တသော၊ ပဒသော၊ ယသသော။ ဥပါယသော၊ သဗ္ဗသော၊ ထာမသော၊ ဌာနသော။
ဝါတိ ¶ ကိမတ္ထံ? ပါဒေန ဝါ ပါဒါရဟေန ဝါ အတိရေကပါဒေန ဝါ ယော ဘိက္ခု ထေယျစိတ္တေန ပရဿ ဘဏ္ဍံ ဂဏှာတိ၊ သော ဘိက္ခု ပါရာဇိကော ဟောတိ အသံဝါသော။
ဒီဃဩရဣစ္စေတေဟိ သ္မာဝစနဿ သောအာဒေသော ဟောတိ ဝါ။
ဒီဃသော၊ ဩရသော၊ ဒီဃမှာ၊ ဩရမှာ။
ဒီဃောရေဟိတိ ကိမတ္ထံ? သရမှာ၊ ဝစနမှာ။
တသ္မာ အကာရတော သဗ္ဗေသံ ယောနီနံအာဧ အာဒေသာ ဟောန္တိ ဝါ ယထာသင်္ချံ။
ပုရိသာ၊ ပုရိသေ၊ ရူပါ၊ ရူပေ။
ဝါတိ ကိမတ္ထံ? အဂ္ဂယော၊ မုနယော၊ ဣသယော။
ယောနီနန္တိ ကိမတ္ထံ? ပုရိသဿ၊ ရူပဿ။
အကာရတောတိ ကိမတ္ထံ? ဒဏ္ဍိနော၊ အဋ္ဌီနိ၊ အဂ္ဂီ ပဇ္ဇလန္တိ၊ မုနီ စရန္တိ။
တသ္မာ အကာရတော သဗ္ဗေသံ သ္မာသ္မိံဣစ္စေတေသံ အာ ဧ အာဒေသာ ဟောန္တိ ဝါ ယထာသင်္ချံ။
ပုရိသာ ¶ ၊ ပုရိသသ္မာ၊ ပုရိသေ၊ ပုရိသသ္မိံ။
အကာရတောတိ ကိမတ္ထံ? ဒဏ္ဍိနာ၊ ဒဏ္ဍိသ္မိံ၊ ဘိက္ခုနာ၊ ဘိက္ခုသ္မိံ။
တသ္မာ အကာရတော စတုတ္ထေကဝစနဿ အာယာဒေသော ဟောတိ ဝါ။
အတ္ထာယ ဟိတာယ သုခါယ ဒေဝမနုဿာနံ ဗုဒ္ဓါ လောကေ ဥပ္ပဇ္ဇတိ။
အတောတိ ကိမတ္ထံ? ဣသိဿ။
စတုတ္ထီတိ ကိမတ္ထံ? ပုရိသဿ မုခံ။
ဧကဝစနဿေတိ ကိမတ္ထံ? ပုရိသာနံ ဒဒါတိ။
ဝါတိ ကိမတ္ထံ? ဒါတာ ဟောတိ သမဏဿ ဝါ ဗြာဟ္မဏဿ ဝါ။
တုဂ္ဂဟဏေနတ္ထဉ္စ ဟောတိ။ အတ္ထတ္ထံ၊ ဟိတတ္ထံ၊ သုခတ္ထံ။
၁၁၀၊ ၂၀၁။ တယော နေဝ စ သဗ္ဗနာမေဟိ။
တေဟိ သဗ္ဗနာမေဟိ အကာရန္တေဟိ သ္မာသ္မိံ သဣစ္စေတေသံ တယော အာ ဧ အာယာဒေသာ နေဝ ဟောန္တိ။
သဗ္ဗသ္မာ ¶ ၊ သဗ္ဗသ္မိံ၊ သဗ္ဗဿ။ ယသ္မာ၊ ယသ္မိံ၊ ယဿ။ တသ္မာ၊ တသ္မိံ၊ တဿ။ ကသ္မာ၊ ကသ္မိံ၊ ကဿ။ ဣမသ္မာ၊ ဣမသ္မိံ၊ ဣမဿ။
သဗ္ဗနာမေဟီတိ ကိမတ္ထံ? ပါပါ၊ ပါပေ၊ ပါပါယ။
စဂ္ဂဟဏမနုကဍ္ဎနတ္ထံ။
တသ္မာ ဃတော နာဒီနမေကဝစနာနံ ဝိဘတ္တိဂဏာနံ အာယာဒေသော ဟောတိ။
ကညာယ ကတံ ကမ္မံ၊ ကညာယ ဒီယတေ၊ ကညာယ နိဿဋံ ဝတ္ထံ။ ကညာယ ပရိဂ္ဂဟော၊ ကညာယ ပတိဋ္ဌိတံ သီလံ။
ဃတောတိ ကိမတ္ထံ? ရတ္တိယာ၊ ဣတ္ထိယာ၊ ဓေနုယာ၊ ဝဓုယာ။
နာဒီနမိတိ ကိမတ္ထံ? ကညံ ပဿတိ၊ ဝိဇ္ဇံ၊ ဝီဏံ၊ ဂင်္ဂံ။
ဧကဝစနာနမိတိ ကိမတ္ထံ? သဗ္ဗာသု၊ ယာသု၊ တာသု၊ ကာသု၊ ဣမာသု၊ ပဘာသု။
တသ္မာ ပတော နာဒီနမေကဝစနာနံ ဝိဘတ္တိဂဏာနံ ယာအာဒေသော ဟောတိ။
ရတ္တိယာ ¶ ၊ ဣတ္ထိယာ၊ ဒေဝိယာ၊ ဓေနုယာ၊ ယာဂုယာ၊ ဝဓုယာ။
နာဒီနမိတိ ကိမတ္ထံ? ရတ္တီ၊ ရတ္တိံ၊ ဣတ္ထီ၊ ဣတ္ထိံ။
ပတောတိ ကိမတ္ထံ? ကညာယ၊ ဝီဏာယ၊ ဂင်္ဂါယ၊ ပဘာယ၊ သောဘာယ။
ဧကဝစနာနမိတိ ကိမတ္ထံ? ရတ္တီနံ၊ ဣတ္ထီနံ။
တသ္မာ သခတော ဂဿ အကာရ အာကာရ ဣကာရ ဤကာရ ဧကာရာဒေသာ ဟောန္တိ ဝါ။
ဘော သခ၊ ဘော သခါ၊ ဘော သခိ၊ ဘော သခီ၊ ဘော သခေ။
တသ္မာ ဃတော ဂဿ ဧကာရာဒေသော ဟောတိ။
ဘောတိ အယျေ၊ ဘောတိ ကညေ၊ ဘောတိ ခရာဒိယေ။
စဂ္ဂဟဏမဝဓာရဏတ္ထံ၊ သန္နိဋ္ဌာနံ။
တတော အမ္မာဒိတော ဂဿ ဧကာရတ္တံ န ဟောတိ။
ဘောတိ ¶ အမ္မာ၊ ဘောတိ အန္နာ၊ ဘောတိ အမ္ဗာ၊ ဘောတိ တာတာ။
အမ္မာဒိတောတိ ကိမတ္ထံ? ဘောတိ ကညေ။
၁၁၆၊ ၁၅၇။ အကတရဿာ လတော ယွာလပနဿ ဝေဝေါ။
တသ္မာ အကတရဿာ လတော ယွာလပနဿ ဝေဝေါအာဒေသာ ဟောန္တိ။
ဘိက္ခဝေ၊ ဘိက္ခဝေါ၊ ဟေတဝေ၊ ဟေတဝေါ။
အကတရဿာတိ ကိမတ္ထံ? သယမ္ဘုဝေါ။
လတောတိ ကိမတ္ထံ? နာဂိယော၊ ဓေနုယော၊ ယာဂုယော။
အာလပနဿေတိ ကိမတ္ထံ? တေ ဟေတဝေါ၊ တေ ဘိက္ခဝေါ။
တသ္မာ ဈလတော သဿ ဝိဘတ္တိဿ နော အာဒေသော ဟောတိ ဝါ။
အဂ္ဂိနော၊ အဂ္ဂိဿ၊ သခိနော၊ သခိဿ၊ ဒဏ္ဍိနော၊ ဒဏ္ဍိဿ၊ ဘိက္ခုနော၊ ဘိက္ခုဿ၊ သယမ္ဘုနော၊ သယမ္ဘုဿ။
သဿေတိ ကိမတ္ထံ? ဣသိနာ၊ ဘိက္ခုနာ။
ဈလတောတိ ကိမတ္ထံ? ပုရိသဿ။
၁၁၈၊ ၁၄၆။ ဃပတော ¶ စ ယောနံ လောပေါ။
တေဟိ ဃပဈလဣစ္စေတေဟိ ယောနံ လောပေါ ဟောတိ ဝါ။
ကညာ၊ ကညာယော။ ရတ္တီ၊ ရတ္တိယော၊ ဣတ္ထီ၊ ဣတ္ထိယော၊ ယာဂူ၊ ယာဂုယော၊ ဝဓူ၊ ဝဓုယော။ အဂ္ဂီ၊ အဂ္ဂယော။ ဘိက္ခူ၊ ဘိက္ခဝေါ။ သယမ္ဘူ၊ သယမ္ဘုဝေါ။ အဋ္ဌီ၊ အဋ္ဌီနိ၊ အာယူ၊ အာယူနိ။
စဂ္ဂဟဏမနုကဍ္ဎနတ္ထံ။
တသ္မာ လတော ယောနံ ဝေါကာရော ဟောတိ ဝါ။
ဘိက္ခဝေါ၊ ဘိက္ခူ၊ သယမ္ဘုဝေါ၊ သယမ္ဘူ။
ကာရဂ္ဂဟဏံ ကိမတ္ထံ? ယောနံ နော စ ဟောတိ။ ဇန္တုနော။
စဂ္ဂဟဏမဝဓာရဏတ္ထံ၊ အမူ ပုရိသာ တိဋ္ဌန္တိ၊ အမူ ပုရိသေ ပဿထ။
ဣတိ နာမကပ္ပေ ပဌမော ကဏ္ဍော။
ဒုတိယကဏ္ဍ
၁၂၀၊ ၂၄၃။ အမှဿ မမံ သပိဘတ္တိဿ သေ။
သဗ္ဗဿေဝ အမှသဒ္ဒဿ သဝိဘတ္တိဿ မမံ အာဒေသော ဟောတိ သေ ဝိဘတ္တိမှိ။
မမံ ¶ ဒီယတေ ပုရိသေန၊ မမံ ပရိဂ္ဂဟော။
သဗ္ဗဿေဝ အမှသဒ္ဒဿ သဝိဘတ္တိဿ မယံအာဒေသော ဟောတိ ယောမှိ ပဌမေ။
မယံ ဂစ္ဆာမ၊ မယံ ဒေမ။
အမှဿေတိ ကိမတ္ထံ? ပုရိသာ တိဋ္ဌန္တိ။
ယောမှီတိ ကိမတ္ထံ? အဟံ ဂစ္ဆာမိ။
ပဌမေတိ ကိမတ္ထံ? အမှာကံ ပဿသိ တွံ။
သဗ္ဗဿေဝ န္တုပစ္စယဿ သဝိဘတ္တိဿ န္တောအာဒေသော ဟောတိ ယောမှိ ပဌမေ။
ဂုဏဝန္တော တိဋ္ဌန္တိ။
န္တုဿေတိ ကိမတ္ထံ? သဗ္ဗေ သတ္တာ ဂစ္ဆန္တိ။
ပဌမေတိ ကိမတ္ထံ? ဂုဏဝန္တေ ပဿန္တိ ဇနာ။
သဗ္ဗဿေဝ န္တုပစ္စယဿ သဝိဘတ္တိဿ န္တဿာဒေသော ဟောတိ ဝါ သေ ဝိဘတ္တိမှိ။
သီလဝန္တဿ ဈာယိနော၊ သီလဝတော ဈာယိနော ဝါ။
သေတိ ကိမတ္ထံ? သီလဝါ တိဋ္ဌတိ။
၁၂၄၊ ၉၈။ အာ ¶ သိမှိ။
သဗ္ဗဿေဝန္တုပစ္စယဿ သဝိဘတ္တိဿ အာအာဒေသော ဟောတိ သိမှိ ဝိဘတ္တိမှိ။
ဂုဏဝါ၊ ပညဝါ၊ သီလဝါ၊ ဗလဝါ၊ ဓနဝါ၊ မတိမာ၊ သတိမာ၊ ဓိတိမာ။
န္တုဿေတိ ကိမတ္ထံ? ပုရိသော တိဋ္ဌတိ။
သိမှီတိ ကိမတ္ထံ? သီလဝန္တော တိဋ္ဌန္တိ။
သဗ္ဗဿေဝ န္တုပစ္စယဿ သဝိဘတ္တိဿ အံအာဒေသော ဟောတိ သိမှိ ဝိဘတ္တိမှိ နပုံသကေ ဝတ္တမာနဿ။
ဂုဏဝံ စိတ္တံ တိဋ္ဌတိ၊ ရုစိမံ ပုပ္ဖံ ဝိရောစတိ။
သိမှိတိ ကိမတ္ထံ? ဝဏ္ဏဝန္တံ အဂန္ဓကံ ဝိရူဠှပုပ္ဖံ ပဿသိ တွံ။
သဗ္ဗဿေဝ န္တုပစ္စယဿ သဝိဘတ္တိဿ အံ အဝဏ္ဏာ စ ဟောန္တိ ဂေ ပရေ။
ဘော ဂုဏဝံ၊ ဘော ဂုဏဝ၊ ဘော ဂုဏဝါ။
စဂ္ဂဟဏမနုကဍ္ဎနတ္ထံ။
၁၂၇၊ ၁၀၂။ တော ¶ တိ တာ သ သ္မိံ နာသု။
သဗ္ဗဿေဝ န္တုပစ္စယဿ သဝိဘတ္တိဿ တောတိတာအာဒေသာ ဟောန္တိ ဝါ သသ္မိံ နာဣစ္စေတေသု ယထာသင်္ချံ။
ဂုဏဝတော၊ ဂုဏဝန္တဿ၊ ဂုဏဝတိ၊ ဂုဏဝန္တသ္မိံ၊ ဂုဏဝတာ၊ ဂုဏဝန္တေန၊ သတိမတော၊ သတိမန္တဿ၊ သတိမတိ၊ သတိမန္တသ္မိံ၊ သတိမတာ၊ သတိမန္တေန။
ဧတေသွီတိ ကိမတ္ထံ? ဂုဏဝါ။ သတိမာ။
သဗ္ဗဿေဝ န္တုပစ္စယဿ သဝိဘတ္တိဿ တံအာဒေသော ဟောတိ ဝါ နံမှိ ဝိဘတ္တိမှိ။
ဂုဏဝတံ၊ ဂုဏဝန္တာနံ၊ သတိမတံ၊ သတိမန္တာနံ။
နံမှီတိ ကိမတ္ထံ? ဂုဏဝန္တော တိဋ္ဌန္တိ၊ သတိမန္တော တိဋ္ဌန္တိ။
၁၂၉၊ ၂၂၂။ ဣမဿိဒမံသိသု နပုံသကေ။
သဗ္ဗဿေဝ ဣမသဒ္ဒဿ သဝိဘတ္တိဿ ဣဒံအာဒေသော ဟောတိ ဝါ အံသိသု နပုံသကေ ဝတ္တမာနဿ။
ဣဒံ စိတ္တံ ပဿသိ၊ ဣဒံ စိတ္တံ တိဋ္ဌတိ၊ ဣမံ စိတ္တံ ပဿသိ။ ဣမံ စိတ္တံ တိဋ္ဌတိ။
နထုံသကေတိ ¶ ကိမတ္ထံ? ဣမံ ပုရိသံ ပဿသိ။ အယံ ပုရိသော တိဋ္ဌတိ။
သဗ္ဗဿေဝ အမုသဒ္ဒဿ သဝိဘတ္တိဿ အဒုံအာဒေသော ဟောတိ အံသိသု နပုံသကေ ဝတ္တမာနဿ။
အဒုံ ပုပ္ဖံ ပဿသိ၊ အဒုံ ပုပ္ဖံ ဝိရောစတိ။
နပုံသကေတိ ကိမတ္ထံ? အမုံ ရာဇာနံ ပဿသိ၊ အသု ရာဇာ တိဋ္ဌတိ။
၁၃၁၊ ၀။ ဣတ္ထိပုမနပုံသကသင်္ချံ။
‘‘ဣတ္ထိပုမနပုံသကသင်္ချံ’’ ဣစ္စေတံ အဓိကာရတ္ထံ ဝေဒိတဗ္ဗံ။
၁၃၂၊ ၂၂၈။ ယောသု ဒွိန္နံ ဒွေ စ။
ဒွိန္နံ သင်္ချာနံ ဣတ္ထိပုမနပုံသကေ ဝတ္တမာနာနံ သဝိဘတ္တီနံ ဒွေ ဟောတိ ယောဣစ္စေတေသု။
ဒွေ ဣတ္ထိယော၊ ဒွေ ဓမ္မာ။ ဒွေ ရူပါနိ။
ယောသွီတိ ကိမတ္ထံ? ဒွီသု။
စဂ္ဂဟဏေန ဒုဝေ ဒွယ ဥဘ ဥဘယ ဒုဝိ စ ဟောန္တိ ယောနာအနမိစ္စေတေသု။ ဒုဝေ သမဏာ။ ဒုဝေ ဗြာဟ္မဏာ ¶ ၊ ဒုဝေ ဇနာ၊ ဒွယေန၊ ဒွယံ၊ ဥဘိန္နံ၊ ဥဘယေသံ ဒုဝိန္နံ။
၁၃၃၊ ၂၃၀။ တိ စတုန္နံ တိဿော စတဿော တယော စတ္တာရော တီဏိ စတ္တာရိ။
တိစတုန္နံ သင်္ချာနံ ဣတ္ထိပုမနပုံသကေ ဝတ္တမာနာနံ သဝိဘတ္တီနံ တိဿော စတဿော တယော စတ္တာရော တီဏိ စတ္တာရိဣစ္စေတေ အာဒေသာ ဟောန္တိ ယထာသင်္ချံ ယောဣစ္စေတေသု။
တိဿော ဝေဒနာ စတဿော ဒိသာ၊ တယော ဇနာ၊ ဇနေ၊ စတ္တာရော ပုရိသာ၊ ပုရိသေ၊ တီဏိ အာယတနာနိ၊ စတ္တာရိ အရိယသစ္စာနိ။
ယောသွီတိ ကိမတ္ထံ? တီသု၊ စတူသု။
ပဉ္စာဒီနံ သင်္ချာနံ ဣတ္ထိပုမနပုံသကေ ဝတ္တမာနာနံ သဝိဘတ္တိဿ အန္တဿ သရဿ အကာရော ဟောတိ ယောဣစ္စေတေသု။
ပဉ္စ၊ ပဉ္စ၊ ဆ၊ ဆ၊ သတ္တ၊ သတ္တ၊ အဋ္ဌ၊ အဋ္ဌ၊ နဝ၊ နဝ၊ ဒသ၊ ဒသ။
ပဉ္စာဒီနမိတိ ကိမတ္ထံ? ဒွေ၊ တယော။
၁၃၅၊ ၁၁၈။ ရာဇဿ ¶ ရညော ရာဇိနော သေ။
သဗ္ဗဿေဝ ရာဇသဒ္ဒဿ သဝိဘတ္တိဿ ရညော ရာဇိနောဣစ္စေတေ အာဒေသာ ဟောန္တိ သေ ဝိဘတ္တိမှိ။
ရညော၊ ရာဇိနော။
သေတိ ကိမတ္ထံ? ရညာ။
သဗ္ဗဿေဝ ရာဇသဒ္ဒဿ သဝိဘတ္တိဿ ရညံအာဒေသော ဟောတိ ဝါ နံမှိ ဝိဘတ္တိမှိ။
ရညံ၊ ရာဇူနံ ဣဒံ ရဋ္ဌံ။
သဗ္ဗဿေဝ ရာဇသဒ္ဒဿ သဝိဘတ္တိဿ ရညာအာဒေသော ဟောတိ ဝါ နာမှိ ဝိဘတ္တိမှိ။
တေန ရညာ ကတံ။ ရာဇေန ဝါ ကတံ။
နာမှီတိ ကိမတ္ထံ? ရညော သန္တကံ။
၁၃၈၊ ၁၂၁။ သ္မိံမှိ ရညေ ရာဇိနိ။
သဗ္ဗဿေဝ ရာဇသဒ္ဒဿ သဝိဘတ္တိဿ ရညေရာဇိနိဣစ္စေတေ အာဒေသာ ဟောန္တိ သ္မိံမှိဝိဘတ္တိမှိ။
ရညေ၊ ရာဇိနိ သီလံ တိဋ္ဌတိ။
၁၃၉၊ ၂၄၅။ တုမှာကံ ¶ တယိမယိ။
သဗ္ဗေသံ တုမှ အမှ သဒ္ဒါနံ သဝိဘတ္တီနံ တယိ မယိဣစ္စေတေ အာဒေသော ဟောန္တိ ယထာသင်္ချံ သ္မိံမှိ ဝိဘတ္တိမှိ။
တယိ၊ မယိ။
သ္မိံမှီတိ ကိမတ္ထံ? တွံ ဘဝသိ၊ အဟံ ဘဝါမိ။
သဗ္ဗေသံ တုမှ အမှသဒ္ဒါနံ သဝိဘတ္တီနံ တွံ အဟံဣစ္စေတေ အာဒေသာ ဟောန္တိ ယထာသင်္ချံ သိမှိ ဝိဘတ္တိမှိ။
တွံ၊ အဟံ။
သိမှိတိ ကိမတ္ထံ? တယိ၊ မယိ။
စဂ္ဂဟဏေန တုဝံ စ ဟောတိ။ တုဝံ သတ္ထာ။
သဗ္ဗေသံ တုမှ အမှသဒ္ဒါနံ သဝိဘတ္တီနံ တဝမမဣစ္စေတေ အာဒေသာ ဟောန္တိ ယထာသင်္ချံ သေ ဝိဘတ္တိမှိ။
တဝ၊ မမ။
သေတိ ကိမတ္ထံ? တယိ၊ မယိ။
၁၄၂၊ ၂၄၂။ တုယှံ ¶ မယှဉ္စ။
သဗ္ဗေသံ တုမှ အမှသဒ္ဒါနံ သဝိဘတ္တီနံ တုယှံ မယှံဣစ္စေတေ အာဒေသာ ဟောန္တိ ယထာသင်္ချံ သေ ဝိဘတ္တိမှိ။
တုယှံ၊ မယှံ ဓနံ ဒီယတေ။
သေတိ ကိမတ္ထံ? တယာ၊ မယာ။
သဗ္ဗေသံ တုမှ အမှသဒ္ဒါနံ သဝိဘတ္တီနံ တံ မဣစ္စေတေ အာဒေသာ ဟောန္တိ ယထာသင်္ချံ အံမှိ ဝိဘတ္တိမှိ။
တံ၊ မံ။
အံမှီတိ ကိမတ္ထံ? တယာ မယာ။
သဗ္ဗေသံ တုမှ အမှသဒ္ဒါနံ သဝိဘတ္တီနံ တဝံ မမံဣစ္စေတေ အာဒေသာ ဟောန္တိ နဝါ ယထာသင်္ချံ အံမှိ ဝိဘတ္တိမှိ။
တဝံ၊ မမံ ပဿတိ။
နဝါတိ ကိမတ္ထံ? တံ၊ မံ ပဿတိ။
စဂ္ဂဟဏမနုကဍ္ဎနတ္ထံ။
သဗ္ဗေသံ တုမှ အမှသဒ္ဒါနံ သဝိဘတ္တီနံ တယာ မယာဣစ္စေတေ အာဒေသာ ဟောန္တိ ယထာသင်္ချံ နာမှိ ဝိဘတ္တိမှိ။
တယာ ¶ ၊ မယာ ကတံ။
နာမှိတိ ကိမတ္ထံ? တုမှေဟိ၊ အမှေဟိ။
သဗ္ဗဿ တုမှသဒ္ဒဿ သဝိဘတ္တိဿ တုဝံ တွံ ဣစ္စေတေ အာဒေသာ ဟောန္တိ အံမှိ ဝိဘတ္တိမှိ။
ကလိင်္ဂရဿ တုဝံ မညေ၊ ကဋ္ဌဿ တွံ မညေ။
၁၄၇၊ ၂၄၆။ ပဒတော ဒုတိယာ စတုတ္ထီ ဆဋ္ဌီသု ဝေါနော။
သဗ္ဗေသံ တုမှအမှသဒ္ဒါနံ သဝိဘတ္တီနံ ယဒါ ပဒသ္မာ ပရေသံ ဝေါ နောအာဒေသာ ဟောန္တိ နဝါ ယထာသင်္ချံ ဒုတိယာ စတုတ္ထီဆဋ္ဌီဣစ္စေတေသု ဗဟုဝစနေသု။
ပဟာယ ဝေါ ဘိက္ခဝေ ဂမိဿာမိ၊ မာ နော အဇ္ဇ ဝိကန္တိံသု၊ ရညော သူဒါ မဟာနသေ၊ ဧဝံ ဒုတိယတ္ထေ။
ဓမ္မံ ဝေါ ဘိက္ခဝေ ဒေသေဿာမိ၊ သံဝိဘဇေထ နော ရဇ္ဇေန၊ ဧဝံ စတုတ္ထျတ္ထေ။
တုဋ္ဌောသ္မိ ဝေါ ဘိက္ခဝေ ပကတိယာ၊ သတ္ထာ နော ဘဂဝါ အနုပ္ပတ္တော၊ ဧဝံ ဆဋ္ဌျတ္ထေ။
နဝါတိ ¶ ကိမတ္ထံ? ဧသော အမှာကံ သတ္ထာ။
တုမှမှာကမိတိ ကိမတ္ထံ? ဧတေ ဣသယော ပဿသိ။
ပဒတောတိ ကိမတ္ထံ? တုမှာကံ သတ္ထာ။
ဧတေသွီတိ ကိမတ္ထံ? ဂစ္ဆထ တုမှေ။
သဗ္ဗေသံ တုမှ အမှသဒ္ဒါနံ သဝိဘတ္တီနံ ယဒါ ပဒသ္မာ ပရေသံ တေ မေ အာဒေသာ ဟောန္တိ ယထာသင်္ချံ စတုတ္ထီဆဋ္ဌီဣစ္စေတေသု ဧကဝစနေသု။
ဒဒါမိ တေ ဂါမဝရာနိ ပဉ္စ၊ ဒဒါဟိ မေ ဂါမဝရံ၊ ဣဒံ တေ ရဋ္ဌံ၊ အယံ မေ ပုတ္တော။
ပဒတောတိ ကိမတ္ထံ? တဝ ဉာတိ၊ မမ ဉာတိ။
သဗ္ဗေသံ တုမှ အမှသဒ္ဒါနံ သဝိဘတ္တီနံ ယဒါ ပဒသ္မာ ပရေသံ တေ မေအာဒေသာ န ဟောန္တိ အံမှိ ဝိဘတ္တိမှိ။
ပဿေယျ တံ ဝဿသတံ အရောဂံ၊ သော မံ ဗြဝီတိ။
၁၅၀၊ ၂၄၉။ ဝါ ¶ တတိယေ စ။
သဗ္ဗေသံ တုမှအမှသဒ္ဒါနံ သဝိဘတ္တီနံ ယဒါ ပဒသ္မာ ပရေသံ တေမေအာဒေသာ ဟောန္တိ ဝါ ယထာသင်္ချံ တတိယေကဝစနေ ပရေ။
ကတံ တေ ပါပံ၊ ကတံ မေ ပါပံ၊ ကတံ တယာ ပါပံ၊ ကတံ မယာ ပါပံ။
ပဒတောတိ ကိမတ္ထံ? တယာ ကတံ၊ မယာ ကတံ။
သဗ္ဗေသံ တုမှအမှသဒ္ဒါနံ သဝိဘတ္တီနံ ယဒါ ပဒသ္မာ ပရေသံ ဝေါနောအာဒေသာ ဟောန္တိ ယထာသင်္ချံ တတိယာဗဟုဝစနေသု ပရေသု။
ကတံ ဝေါ ကမ္မံ၊ ကတံ နော ကမ္မံ။
ပဒတောတိ ကိမတ္ထံ? တုမှေဟိ ကတံ၊ အမှေဟိ ကတံ။
ဗဟုဝစနဂ္ဂဟဏေန ယောမှိ ပဌမေ ဝေါ နောအာဒေသာ ဟောန္တိ။ ဂါမံ ဝေါ ဂစ္ဆေယျာထ၊ ဂါမံ နော ဂစ္ဆေယျာမ။
ပုမဣစ္စေဝမန္တဿ သဝိဘတ္တိဿ အာအာဒေသော ဟောတိ သိမှိ ဝိဘတ္တိမှိ။
ပုမာ ¶ တိဋ္ဌတိ။
သိမှီတိ ကိမတ္ထံ? ပုမာနော တိဋ္ဌန္တိ။
အန္တဂ္ဂဟဏေန မဃဝ ယုဝဣစ္စေဝမာဒီနမန္တဿသဝိဘတ္တိဿ အာအာဒေသော ဟောတိ။ မဃဝါ၊ ယုဝါ။
ပုမဣစ္စေဝမန္တဿ သဝိဘတ္တိဿ အံအာဒေသော ဟောတိ အာလပနေကဝစနေ ပရေ။
ဟေ ပုမံ။
အာလပနေတိ ကိမတ္ထံ? ပုမာ။
ဧကဝစနေတိ ကိမတ္ထံ? ဟေ ပုမာနော။
ပုမဣစ္စေဝမန္တဿ သမာသေ စ အံအာဒေသော ဟောတိ ဝိဘာသာ သမာသေ ကတေ။
ဣတ္ထီ စ ပုမာ စ နပုံသကံ စ ဣတ္ထိပုမနပုံသကာနိ။ ဣတ္ထိပုမနပုံသကာနံ သမူဟော ဣတ္ထိပုမနပုံသကသမူဟော။
ဝိဘာသာတိ ကိမတ္ထံ? ဣတ္ထိပုမနပုံသကာနိ။
၁၅၅၊ ၁၃၇။ ယောသွာနော ¶ ။
ပုမဣစ္စေဝမန္တဿ သဝိဘတ္တိဿ အာနောအာဒေသော ဟောတိ ယောသု ဝိဘတ္တီသု။
ပုမာနော၊ ဟေ ပုမာနော။
ယောသွီတိ ကိမတ္ထံ? ပုမာ။
ပုမဣစ္စေဝမန္တဿ သဝိဘတ္တိဿ အာနေ အာဒေသော ဟောတိ ဝါ သ္မိံမှိ ဝိဘတ္တိမှိ။
ပုမာနေ၊ ပုမေ ဝါ။
ပုမဣစ္စေဝမန္တဿ ဟိဝိဘတ္တိမှိ စ အာနေအာဒေသော ဟောတိ။
ပုမာနေဟိ၊ ပုမာနေဘိ။
ပုန ဝိဘတ္တိဂ္ဂဟဏံ ကိမတ္ထံ? သဝိဘတ္တိဂ္ဂဟဏနိဝတ္တနတ္ထံ။ ပုမာနေဟိ။
စဂ္ဂဟဏေန မဃဝ ယုဝဣစ္စေဝမာဒီနမန္တဿ အာနအာဒေသော ဟောတိ သိ ယော အံယော ဣစ္စေတေသု ဝိဘတ္တီသု၊ ပုမကမ္မထာမန္တဿ စုကာရော ဟောတိ သသ္မာ သု ဝိဘတ္တီသု။ မဃဝါနော၊ မဃဝါနာ။ မဃဝါနံ၊ မဃဝါနေ ¶ ။ ယုဝါနော၊ ယုဝါနာ၊ ယုဝါနံ၊ ယုဝါနေ၊ ပုမုနော၊ ပုမုနာ။ ကမ္မုနော၊ ကမ္မုနာ၊ ထာမုနော၊ ထာမုနာ။
ပုမဣစ္စေဝမန္တဿ သုဣစ္စေတသ္မိံဝိဘတ္တိမှိ အာအာဒေသော ဟောတိ ဝါ။
ပုမာသု၊ ပုမေသု ဝါ။
ပုမဣစ္စေဝမန္တဿ အာဥအာဒေသာ ဟောန္တိ ဝါ နာမှိ ဝိဘတ္တိမှိ။
ပုမာနာ၊ ပုမုနာ၊ ပုမေန ဝါ။
စဂ္ဂဟဏမနုကဍ္ဎနတ္ထံ။
ကမ္မဣစ္စေဝမန္တဿ စ ဥအ အာဒေသာ ဟောန္တိ ဝါ နာမှိ ဝိဘတ္တိမှိ။
ကမ္မုနာ၊ ကမ္မနာ၊ ကမ္မေန ဝါ။
စဂ္ဂဟဏေန မဃဝယုဝဣစ္စေဝမန္တဿ အာအာဒေ သော ဟောတိ ကွစိ နာသုဣစ္စေတေသု ဝိဘတ္တီသု။ မဃဝါနာ၊ မဃဝါသု၊ မဃဝေသု၊ မဃဝေန ဝါ။ ယုဝါနာ၊ ယုဝါသု၊ ယုဝေသု၊ ယုဝေန ဝါ။
ဣတိ နာမကပ္ပေ ဒုတိယော ကဏ္ဍော။
တတိယကဏ္ဍ
၁၆၁၊ ၂၄၄။ တုမှ’မှေဟိ ¶ နမာကံ။
တေဟိ တုမှအမှေဟိ နံဝစနဿ အာကံ ဟောတိ။
တုမှာကံ၊ အမှာကံ။
နမိတိ ကိမတ္ထံ? တုမှေဟိ၊ အမှေဟိ။
တေဟိ တုမှအမှေဟိ ယော အပ္ပဌမော အာကံဟောတိ ဝါ။
တုမှာကံ ပဿာမိ၊ တုမှေ ပဿာမိ ဝါ။ အမှာကံ ပဿသိ၊ အမှေ ပဿသိ ဝါ။
ယောတိ ကိမတ္ထံ? တုမှေဟိ၊ အမှေဟိ။
အပ္ပဌမောတိ ကိမတ္ထံ? ဂစ္ဆထ တုမှေ၊ ဂစ္ဆာမ မယံ။
ဝါတိဝိကပ္ပနတ္ထေန ယောနံ အံ အာနံ ဟောန္တိ။ တုမှံ တုမှာနံ။ အမှံ၊ အမှာနံ။
တေဟိ ဟုမှအမှေဟိ သဿ ဝိဘတ္တိဿ အံ အာဒေသော ဟောတိ ဝါ။
တုမှံ ဒီယတေ၊ တဝ ဒီယတေ။ တုမှံ ပရိဂ္ဂဟော၊ တဝ ပရိဂ္ဂဟော။ အမှံ ဒီယတေ၊ မမ ဒီယတေ။ အမှံ ပရိဂ္ဂဟော၊ မမ ပရိဂ္ဂဟော။
သဿေတိ ¶ ကိမတ္ထံ? တုမှေသု၊ အမှေသု။
၁၆၄၊ ၂၀၀။ သဗ္ဗနာမ’ကာရတေ ပဌမော။
သဗ္ဗေသံ သဗ္ဗနာမာနံ အကာရတော ယော ပဌမော ဧတ္တမာပဇ္ဇတေ။
သဗ္ဗေ၊ ယေ၊ တေ၊ ကေ၊ တုမှေ၊ အမှေ၊ ဣမေ။
သဗ္ဗနာမာတိ ကိမတ္ထံ? ဒေဝါ၊ အသုရာ၊ နာဂါ၊ ဂန္ဓဗ္ဗာ၊ မနုဿာ။
အကာရတောတိ ကိမတ္ထံ? အမူ ပုရိသာ တိဋ္ဌန္တိ။
ယောတိ ကိမတ္ထံ? သဗ္ဗော၊ ယော၊ သော၊ ကော၊ အယံ။
ပဌမဂ္ဂဟဏံ ဥတ္တရသုတ္တတ္ထံ။
တသ္မာ သဗ္ဗနာမ’ကာရတော ဒွန္ဒဋ္ဌာ ယော ပဌမော ဧတ္တမာပဇ္ဇတေ ဝါ။
ကတရကတမေ၊ ကတရကတမာ ဝါ။
သဗ္ဗနာမာတိ ကိမတ္ထံ? ဒေဝါသုရနာဂ ဂန္ဓဗ္ဗမနုဿာ။
ဒွန္ဒဋ္ဌာတိ ကိမတ္ထံ တေ၊ သဗ္ဗေ။
၁၆၆၊ ၂၀၉။ နာညံ ¶ သဗ္ဗနာမိကံ။
သဗ္ဗနာမိကာနံ ဒွန္ဒဋ္ဌေ နာညံ ကာရိယံ ဟောတိ၊
ပုဗ္ဗာပရာနံ၊ ပုဗ္ဗုတ္တရာနံ၊ အဓရုတ္တရာနံ။
ဗဟုဗ္ဗီဟိမှိ စ သမာသေ သဗ္ဗနာမဝိဓာနဉ္စ နာညံ ကာရိယံ ဟောတိ။
ပိယပုဗ္ဗာယ၊ ပိယပုဗ္ဗာနံ၊ ပိယပုဗ္ဗေ၊ ပိယပုဗ္ဗဿ။
စေတိ ကိမတ္ထံ? သဗ္ဗနာမဝိဓာနံ ဟောတိ၊ ဒက္ခိဏ ပုဗ္ဗဿံ၊ ဒက္ခိဏပုဗ္ဗဿာ၊ ဥတ္တရပုဗ္ဗဿံ၊ ဥတ္တရပုဗ္ဗဿာ။
သဗ္ဗတော သဗ္ဗနာမတော နံဝစနဿ သံသာနံဣစ္စေတေ အာဒေသာ ဟောန္တိ။
သဗ္ဗေသံ၊ သဗ္ဗေသာနံ၊ သဗ္ဗာသံ၊ သဗ္ဗာသာနံ။ ယေသံ၊ ယေသာနံ၊ ယာသံ၊ ယာသာနံ။ တေသံ၊ တေသာနံ၊ တာသံ၊ တာသာနံ။ ကေသံ၊ ကေသာနံ၊ ကာသံ၊ ကာသာနံ။ ဣမေသံ၊ ဣမေသာနံ၊ ဣမာသံ၊ ဣမာသာနံ။ အမူသံ၊ အမူသာနံ။
နမိတိ ကိမတ္ထံ? သဗ္ဗဿ၊ ယဿ၊ တဿ၊ ကဿ။ ဧဝံ သဗ္ဗတ္ထ။
၁၆၉၊ ၁၁၇။ ရာဇဿ ¶ ရာဇု သုနံဟိသု စ။
သဗ္ဗဿေဝ ရာဇသဒ္ဒဿ ရာဇုအာဒေသော ဟောတိ သုနံဟိဣစ္စေတေသု။
ရာဇူသု၊ ရာဇူနံ၊ ရာဇူဟိ၊ ရာဇူဘိ။
သုနံဟိသူတိ ကိမတ္ထံ? ရာဇာ။
စဂ္ဂဟဏမဝဓာရဏတ္ထံ။ ရာဇေသု၊ ရာဇာနံ၊ ရာဇေဟိ ရာဇေဘိ။
သဗ္ဗဿေဝ ဣမသဒ္ဒဿ ဧကာရော ဟောတိ ဝါ သုနံဟိဣစ္စေတေသု။
ဧသု၊ ဣမေသု၊ ဧသံ၊ ဣမေသံ၊ ဧဟိ၊ ဧဘိ၊ ဣမေဟိ၊ ဣမေဘိ။
ဣမဿေတိ ကိမတ္ထံ? ဧတေသု၊ ဧတေသံ၊ ဧတေဟိ၊ ဧတေဘိ။
ဣမသဒ္ဒဿ သဗ္ဗဿေဝ အန ဣမိဣစ္စေတေ အာဒေသာ ဟောန္တိ နာမှိ ဝိဘတ္တိမှိ။
အနေန ဓမ္မဒါနေန။ သုခိတာ ဟောတု သာ ပဇာ။
ဣမိနာ ဗုဒ္ဓပူဇေန၊ ပတွာန အမတံ ပဒံ။
နာမှီတိ ကိမတ္ထံ? ဣမေသု၊ ဣမေသံ၊ ဣမေဟိ၊ ဣမေဘိ။
၁၇၂၊ ၂၁၈။ အနပုံသကဿာ ¶ ယံ သိမှိ။
ဣမသဒ္ဒဿ သဗ္ဗဿေဝ အနပုံသကဿ အယံအာဒေသော ဟောတိ သိမှိ ဝိဘတ္တိမှိ။
အယံ ပုရိသော၊ အယံ ဣတ္ထီ။
အနပုံသကဿေတိ ကိမတ္ထံ? ဣဒံ စိတ္တံ တိဋ္ဌတိ။
သိမှိတိ ကိမတ္ထံ? ဣမံ ပုရိသံ ပဿသိ တွံ။
အမုသဒ္ဒဿ အနပုံသကဿ မကာရော သကာရမာပဇ္ဇတေ ဝါ သိမှိ ဝိဘတ္တိမှိ။
အသု ရာဇာ၊ အသု ဣတ္ထီ၊ အမုကော ရာဇာ၊ အမုကာ ဣတ္ထီ။
အနပုံသကဿေတိ ကိမတ္ထံ? အဒုံ ပုပ္ဖံ ဝိရောစတိ။
အမုဿေတိ ကိမတ္ထံ? အယံ ပုရိသော တိဋ္ဌတိ။
သိမှိတိ ကိမတ္ထံ? အမှံ ပုရိသံ ပဿသိ။
ဧတ တဣစ္စေတေသံ အနပုံသကာနံ တကာရော သကာရမာပဇ္ဇတေ သိမှိ ဝိဘတ္တိမှိ။
ဧသော ပုရိသော၊ ဧသာ ဣတ္ထီ၊ သော ပုရိသော၊ သာ ဣတ္ထီ။
ဧတတေသမိတိ ¶ ကိမတ္ထံ? ဣတရော ပုရိသော၊ ဣတရာ ဣတ္ထီ။
အနပုံသကာနမိတိ ကိမတ္ထံ? ဧတံ စိတ္တံ၊ ဧတံ ရူပံ။ တံ စိတ္တံ၊ တံ ရူပံ။
၁၅၇၊ ၂၁၂။ တဿ ဝါ နတ္တံ သဗ္ဗတ္ထ။
တဿ သဗ္ဗနာမဿ တကာရဿ နတ္တံ ဟောတိ ဝါ သဗ္ဗတ္ထ လိင်္ဂေသု။
နာယ၊ တာယ၊ နံ၊ တံ၊ နေ၊ တေ၊ နေသု၊ တေသု၊ နမှိ၊ တမှိ၊ နာဟိ၊ တာဟိ၊ နာဘိ၊ တာဘိ။
၁၇၆၊ ၂၁၃။ သသ္မာသ္မိံသံသာသွတ္တံ။
တဿ သဗ္ဗနာမဿ တကာရဿ သဗ္ဗဿေဝ အတ္တံ ဟောတိ ဝါ သသ္မာသ္မိံ သံသာဣစ္စေတေသု သဗ္ဗတ္ထ လိင်္ဂေသု။
အဿ၊ တဿ၊ အသ္မာ၊ တသ္မာ၊ အသ္မိံ၊ တသ္မိံ၊ အဿံ၊ တဿံ၊ အဿာ၊ တဿာ။
တကာရဿေတိ ကိမတ္ထံ? အမုဿံ၊ အမုဿာ။
ဧတေသွီတိ ကိမတ္ထံ? နေသု၊ တေသု။
ဣမသဒ္ဒဿ စ သဗ္ဗဿေဝ အတ္တံ ဟောတိ ဝါ သသ္မာသ္မိံ သံ သာဣစ္စေတေသု သဗ္ဗတ္ထ လိင်္ဂေသု။
အဿ ¶ ၊ ဣမဿ၊ အသ္မာ၊ ဣမသ္မာ၊ အသ္မိံ၊ ဣမသ္မိံ၊ အဿံ၊ ဣမိဿံ၊ အဿာ၊ ဣမိဿာ။
ဣမသဒ္ဒဿေတိ ကိမတ္ထံ? ဧတိဿံ၊ ဧတိဿာ။
သဗ္ဗတော သဗ္ဗနာမတော ကကာရာဂမော ဟောတိ ဝါ သိမှိ ဝိဘတ္တိမှိ။
သဗ္ဗကော၊ ယကော၊ သကော၊ အမုကော၊ အသုကော။
ဝါတိ ကိမတ္ထံ? သဗ္ဗော၊ ယော၊ သော၊ ကော။
သဗ္ဗနာမတောတိ ကိမတ္ထံ? ပုရိသော။
ပုန သဗ္ဗတောဂ္ဂဟဏေန အညသ္မာပိ ကကာရာဂမော ဟောတိ၊ ဟီနကော၊ ပေါတကော။
၁၇၉၊ ၂၀၄။ ယပတော သ္မိံသာနံ သံသာ။
သဗ္ဗတော သဗ္ဗနာမတော ဃပသညတော သ္မိံသဣစ္စေတေသံ သံသာ အာဒေသာ ဟောန္တိ ဝါ ယထာသင်္ချံ။
သဗ္ဗဿံ၊ သဗ္ဗဿာ၊ သဗ္ဗာယံ၊ သဗ္ဗာယ၊ ဣမိဿံ၊ ဣမိဿာ၊ ဣမာယံ၊ ဣမာယ၊ အမုဿံ၊ အမုဿာ၊ အမုယံ၊ အမုယာ။
သဗ္ဗနာမတောတိ ကိမတ္ထံ? ဣတ္ထိယံ၊ ဣတ္ထိယာ။
သ္မိံသာနမိတိ ကိမတ္ထံ? အမုယော။
၁၈၀၊ ၂၀၇။ နေတာဟိ ¶ သ္မိမာယ ယာ။
ဧတေဟိ သဗ္ဗနာမေဟိ ဃပသညေဟိ သ္မိံဝစနဿ နေဝ အာယ ယာအာဒေသာ ဟောန္တိ။
ဧတိဿံ၊ ဧတာယံ၊ ဣမိဿံ၊ ဣမာယံ၊ အမုဿံ၊ အမုယံ။
သ္မိံန္တိ ကိမတ္ထံ? တာယ ဣတ္ထိယာ မုခံ။
ဧတာဟီတိ ကိမတ္ထံ? ကညာယ၊ ဝီဏာယ၊ ဂင်္ဂါယ၊ ကပါလိကာယ။
၁၈၁၊ ၉၅။ မနောဂဏာဒိတော သ္မိံနာနမိအာ။
တသ္မာ မနောဂဏာဒိတော သ္မိံနာဣစ္စေတေသံ ဣကာရအာကာရာဒေသာ ဟောန္တိ ဝါ ယထာသင်္ချံ။
မနသိ၊ မနုသ္မိံ၊ သိရသိ၊ သိရသ္မိံ၊ မနသာ၊ မနေန၊ ဝစသာ၊ ဝစေန၊ သိရသာ၊ သိရေန၊ သရသာ၊ သရေန၊ တပသာ၊ တပေန၊ ဝယသာ၊ ဝယေန၊ ယသသာ၊ ယသေန၊ တေဇသာ၊ တေဇေန၊ ဥရသာ၊ ဥရေန၊ ထာမသာ၊ ထာမေန။
သ္မိံနာနမိတိ ကိမတ္ထံ? မနော၊ သိရော၊ တမော၊ တပေါ၊ တေဇော။
အာဒိဂ္ဂဟဏေန အညာသ္မာပိ သ္မိံနာနံ ဣကာရအာကာရာဒေသာ ဟောန္တိ၊ ဗိလသိ၊ ဗိလသာ၊ ပဒသိ၊ ပဒသာ။
၁၈၂၊ ၉၇။ သဿ ¶ စော။
တသ္မာ မနောဂဏာဒိတော သဿ စ ဩကာရော ဟောတိ။
မနသော၊ ထာမသော၊ တပသော။
ဧတေသံ မနောဂဏာဒီနံ အန္တော ဩတ္တမာပဇ္ဇတေ ဝိဘတ္တိလောပေ ကတေ။
မနောမယံ၊ အယောမယံ၊ တေဇောသမေန၊ တပေါဂုဏေန၊ သိရောရုဟေန။
အာဒိဂ္ဂဟဏံကိမတ္ထံ? အညေသမန္တော ဩတ္တမာပဇ္ဇတေ။ အာပေါသမေန၊ ဝါယောသမေန။
လောပေတိ ကိမတ္ထံ? ပဒယာ၊ တပသာ၊ ယသသာ၊ ဝစသာ၊ မနသာ၊ ဧဝမညေပိ ယောဇေတဗ္ဗာ။
ဧတေဟေဝ မနောဂဏာဒီဟိ ဝိဘတ္တာဒေသေ သရေ ပရေ သကာရာဂမော ဟောတိ ဝါ။
မနသာ၊ ဝစသာ၊ မနသိ၊ ဝစသိ။
ဝါတိ ကိမတ္ထံ? မနေန၊ တေဇေန၊ ဝသေန၊
သရေတိ ¶ ကိမတ္ထံ? မနော၊ တေဇော၊ ယသော။
ပုန အာဒိဂ္ဂဟဏေန အညသ္မိမ္ပိ ပစ္စယေ ပရေ သကာရာဂမော ဟောတိ။ မာနသိကံ၊ ဝါစသိကံ။
၁၈၅၊ ၁၁၂။ သန္တသဒ္ဒဿ သော တေ ဗော စန္တေ။
သဗ္ဗဿ သန္တသဒ္ဒဿ သကာရာဒေသော ဟောတိ ဘကာရေ ပရေ၊ အန္တေ စ ဗကာရာဂမော ဟောတိ။
သဗ္ဘိရေဝ သမာသေထ၊
သဗ္ဘိကုဗ္ဗေထ သန္ထဝံ။
သတံ သဒ္ဓမ္မမညာယ၊
သေယျော ဟောတိ န ပါပိယော။
ဇီရန္တိ ဝေ ရာဇရထာ သုစိတ္တာ။
အထော သရီရမ္ပိ ဇရံ ဥပေတိ။
သတဉ္စ ဓမ္မော န ဇရံ ဥပေတိ၊
သန္တော ဟဝေ သဗ္ဘိ ပဝေဒယန္တိ။
သဗ္ဘူတော၊ သဗ္ဘာဝေါ။
ဘေတိ ကိမတ္ထံ? သန္တေဟိ ပူဇိတော ဘဂဝါ။
စဂ္ဂဟဏံ ကွစိ သကာရဿေဝ ပသိဒ္ဓတ္ထံ။ သက္ကာရော၊ သက္ကတော။
၁၉၆၊ ၁၀၇။ သိမှိဂစ္ဆန္တာဒီနံ ¶ န္တသဒ္ဒေါ အံ။
သိမှိ ဂစ္ဆန္တာဒီနံ န္တသဒ္ဒေါ အမာပဇ္ဇတေ ဝါ။
ဂစ္ဆံ၊ ဂစ္ဆန္တော၊ မဟံ၊ မဟန္တော၊ စရံ၊ စရန္တော၊ ခါဒံ၊ ခါဒန္တော။
ဂစ္ဆန္တာဒီနမိတိ ကိမတ္ထံ? အန္တော၊ ဒန္တော၊ ဝန္တော၊ သန္တော။
ဂစ္ဆန္တာဒီနံန္တသဒ္ဒေါန္တုပ္ပစ္စယောဝ ဒဋ္ဌဗ္ဗော သေသေသု ဝိဘတ္တိပ္ပစ္စယေသု။
ဂစ္ဆတော၊ မဟတော၊ ဂစ္ဆတိ၊ မဟတိ၊ ဂစ္ဆတာ၊ မဟတာ။
သေသေသူတိ ကိမတ္ထံ? ဂစ္ဆံ၊ မဟံ၊ စရံ၊ ခါဒံ။
၁၈၈၊ ၁၁၅။ ဗြဟ္မတ္တ သခ ရာဇာဒိတော အမာနံ။
ဗြဟ္မ အတ္တ သခ ရာဇဣစ္စေဝမာဒိတော အံဝစနဿ အာနံ ဟောတိ ဝါ။
ဗြဟ္မာနံ၊ ဗြဟ္မံ၊ အတ္တာနံ၊ အတ္တံ၊ သခါနံ၊ သခံ၊ ရာဇာနံ၊ ရာဇံ။
အမိတိ ကိမတ္ထံ? ရာဇာ။
၁၈၉၊ ၁၁၃။ သျာ ¶ စ။
ဗြဟ္မ အတ္တ သခ ရာဇဣစ္စေဝမာဒိတော သိဝစနဿ အာ စ ဟောတိ။
ဗြဟ္မာ၊ အတ္တာ၊ သခါ၊ ရာဇာ၊ အာတုမာ။
ဗြဟ္မအတ္တ သခ ရာဇဣစ္စေဝမာဒိတော ယောနံ အာနောအာဒေသော ဟောတိ။
ဗြဟ္မာနော၊ အတ္တာနော၊ သခါနော၊ ရာဇာနော၊ အာတုမာနော။
တသ္မာ သခတော စ ယောနံ အာယော နော အာဒေသာ ဟောန္တိ။
သခါယော၊ သခိနော။
ယောနမိတိ ကိမတ္ထံ? သခါ။
တသ္မာ သခတော သ္မိံဝစနဿ ဧကာရော ဟောတိ။ သခေ။
၁၉၃၊ ၁၂၂။ ဗြဟ္မတော ¶ ဂဿ စ။
တသ္မာ ဗြဟ္မတော ဂဿ စ ဧကာရော ဟောတိ။ ဟေ ဗြဟ္မေ။
၁၉၄၊ ၁၃၁။ သခန္တဿိ နော နာ နံ သေသု။
တဿ သခန္တဿ ဣကာရော ဟောတိ နောနာနံသဣစ္စေတေသု။
သခိနော၊ သခိနာ၊ သခီနံ၊ သခိဿ။
ဧတေသွီတိ ကိမတ္ထံ? သခါရေဟိ။
တဿ သခန္တဿ အာရော ဟောတိ ဝါ ဟိမှိ ဝိဘတ္တိမှိ။ သခါရေဟိ၊ သခေဟိ။
တဿ သခန္တဿ အာရော ဟောတိ ဝါ သုနံ အံဣစ္စေတေသု။
သခါရေသု၊ သခေသု၊ သခါရာနံ၊ သခီနံ၊ သခါရံ၊ သခံ။
၁၉၇၊ ၁၂၅။ ဗြဟ္မတော တု သ္မိံ နိ။
တသ္မာ ဗြဟ္မတော သ္မိံဝစနဿ နိအာဒေသော ဟောတိ။ ဗြဟ္မနိ။
တုဂ္ဂဟဏေန ¶ အဗြဟ္မတောပိ သ္မိံ ဝစနဿ နိ ဟောတိ။ ကမ္မနိ၊ စမ္မနိ၊ မုဒ္ဓနိ။
တဿ ဗြဟ္မသဒ္ဒဿ အန္တော ဥတ္တမာပဇ္ဇတေ သနာဣစ္စေတေသု။
ဗြဟ္မုနော၊ ဗြဟ္မုနာ။
သနာသူတိ ကိမတ္ထံ? ဗြဟ္မာ။
၁၉၉၊ ၁၅၈။ သတ္ထုပိတာဒီနမာ သိသ္မိံသိလောပေါစ။
သတ္ထုပိတုအာဒီနမန္တော အတ္တမာပဇ္ဇတေ သိသ္မိံ၊ သိလောပေါ စ ဟောတိ။
သတ္ထာ၊ ပိတာ၊ မာတာ၊ ဘာတာ၊ ကတ္တာ။
သိသ္မိန္တိ ကိမတ္ထံ? သတ္ထုဿ၊ ပိတုဿ၊ မာတုဿ၊ ဘာတုဿ၊ ကတ္တုဿ။
သတ္ထုပိတုအာဒီနမန္တော အညေသု ဝစနေသု အာရတ္တမာပဇ္ဇတေ။
သတ္ထာရံ၊ ပိတရံ၊ မာတရံ၊ ဘာတရံ၊ ကတ္တာရံ၊ သတ္ထာရေဟိ၊ ပိတရေဟိ၊ မာတရေဟိ၊ ဘာတရေဟိ၊ ကတ္တာရေဟိ။
အညေသွီတိ ¶ ကိမတ္ထံ? သတ္ထာ၊ ပိတာ၊ မာတာ၊ ဘာတာ၊ ကတ္တာ။
သတ္ထုပိတုအာဒီနမန္တော အာရတ္တမာပဇ္ဇတေ ဝါ နံမှိ ဝိဘတ္တိမှိ။
သတ္ထာရာနံ၊ ပိတရာနံ၊ မာတရာနံ၊ ဘာတရာနံ။
ဝါတိ ကိမတ္ထံ? သတ္ထာနံ၊ ပိတူနံ၊ မာတူနံ၊ ဘာတူနံ။
တဿ သတ္ထုသဒ္ဒဿ အန္တော အတ္တမာပဇ္ဇတေ ဝါ နံမှိ ဝိဘတ္တိမှိ။
သတ္ထာနံ၊ ပိတာနံ၊ မာတာနံ၊ ဘာတာနံ၊ ကတ္တာနံ။
ဝါတိ ကိမတ္ထံ? သတ္ထာရာနံ၊ ပိတရာနံ၊ မာတရာနံ၊ ဘာတရာနံ၊ ဓီတရာနံ။
စဂ္ဂဟဏံ အညေသမ္ပိ သင်္ဂဟဏတ္ထံ။
သတ္ထုပိတုဣစ္စေဝမာဒီနမန္တဿ ဥတ္တံ ဟောတိ ဝါ သသ္မိံ၊ သလောပေါ စ။
သတ္ထု ¶ ၊ သတ္ထုဿ၊ သတ္ထုနော ဒီယတေ၊ ပရိဂ္ဂဟော ဝါ။ ပိတု၊ ပိတုဿ၊ ပိတုနော ဒီယတေ၊ ပရိဂ္ဂဟော ဝါ။ ဘာတု၊ ဘာတုဿ၊ ဘာတုနော ဒီယတေ၊ ပရိဂ္ဂဟော ဝါ။
စဂ္ဂဟဏံ ဒုတိယသမ္ပိဏ္ဍနတ္ထံ။
သက္ကမန္ဓာတုဣစ္စေဝမာဒီနမန္တော ဥတ္တမာပဇ္ဇတေ သသ္မိံ၊ သလောပေါ စ ဟောတိ။
သက္ကမန္ဓာတု ဣဝ အဿ ရာဇိနော ဝိဘဝေါ။ ဧဝံ ကတ္တု၊ ဂန္တု၊ ဒါတု ဣစ္စေဝမာဒီ။
ပုနာရမ္ဘဂ္ဂဟဏံ ကိမတ္ထံ? နိစ္စဒီပနတ္ထံ။ သက္ကမန္ဓာတု။
စဂ္ဂဟဏံ ဒုတိယသမ္ပိဏ္ဍနတ္ထံ။
တတော အာရာဒေသတော သဗ္ဗေသံ ယော နံ ဩကာရာဒေသော ဟောတိ။
သတ္ထာရော၊ ပိတရော၊ မာတရော၊ ဘာတရော၊ ကတ္တာရော၊ ဝတ္တာရော။
တုဂ္ဂဟဏေန အညသ္မာပိ ယောနံ ဩကာရော ဟောတိ။ စတုရော ဇနာ၊ ဂါဝေါ၊ ဥဘော ပုရိသာ။
၂၀၆၊ ၁၆၅။ တတော ¶ သ္မိမိ။
တတော အာရာဒေသတော သ္မိံဝစနဿ ဣကာရာဒေသော ဟောတိ။
သတ္ထရိ၊ ပိတရိ၊ မာတရိ၊ ဓီတရိ၊ ဘာတရိ၊ ကတ္တရိ၊ ဝတ္တရိ။
ပုန တတောဂဟဏေန အညသ္မာပိ သ္မိံဝစနဿ ဣကာရော ဟောတိ။ ဘုဝိ။
တတော အာရာဒေသတော နာဝစနဿ အာအာဒေသော ဟောတိ။
သတ္ထာရာ၊ ပိတရာ၊ မာတရာ၊ ဘာတရာ၊ ဓီတရာ၊ ကတ္တာရာ၊ ဝတ္တာရာ။
အာရာဒေသော ရဿမာပဇ္ဇတေ ဣကာရေ ပရေ။
သတ္ထရိ၊ ပိတရိ၊ မာတရိ၊ ဓီတရိ၊ ကတ္တရိ၊ ဝတ္တရိ။
ပိတာဒီန မာရာဒေသော ရဿမာပဇ္ဇတေ အသိမှိ ဝိဘတ္တိမှိ။
ပိတရာ၊ မာတရာ၊ ဘာတရာ၊ မီတရာ ပိတရော၊ မာတရော၊ ဘာတရော၊ ဓီတရော။
အသိမှိဂ္ဂဟဏံ ¶ တောမှိ ပရေ ဣကာရာဒေသဉာပနတ္ထံ။ မာတိတော၊ ပိတိတော၊ ဘာတိတော၊ ဒုဟိတိတော။
၂၁၀၊ ၂၃၉။ တယာတယီနံ တကာရော တွတ္တံ ဝါ။
တယာတယိ ဣစ္စေတေသံ တကာရော တွတ္တမာပဇ္ဇတေ ဝါ။
တွယာ၊ တယာ၊ တွယိ၊ တယိ။
ဧတေသမိတိ ကိမတ္ထံ? တုဝံ၊ တဝံ။
ဣတိ နာဓကပ္ပေ တတိယော ကဏ္ဍော။
စတုတ္ထကဏ္ဍ
၂၁၁၊ ၁၂၆။ အတ္တန္တော ဟိသ္မိ’မနတ္တံ။
တဿ အတ္တနော အန္တော အနတ္တမာပဇ္ဇတေ ဟိမှိ ဝိဘတ္တိမှိ။
အတ္တနေဟိ၊ အတ္တနေဘိ။
အတ္တန္တောတိ ကိမတ္ထံ? ရာဇေဟိ၊ ရာဇေဘိ။
ဟိသ္မိန္တိ ကိမတ္ထံ? အတ္တနော။
အနတ္တမိတိဘာဝနိဒ္ဒေသေန အတ္တသဒ္ဒဿ သကာဒေသော ဟောတိ သဗ္ဗာသု ဝိဘတ္တီသု။ သကော၊ သကာ၊ သကံ၊ သကေ။
၂၁၂၊ ၃၂၉။ တတော ¶ သ္မိံနိ။
တတော အတ္တတော သ္မိံဝစနဿ နိ ဟောတိ။ အတ္တနိ။
တတောအတ္တတော သဿ ဝိဘတ္တိဿ နော ဟောတိ၊ အတ္တနော။
တတော အတ္တတော သ္မာ ဝစနဿ နာ ဟောတိ။ အတ္တနာ။
ပုန တတောဂဟဏေန တဿ အတ္တနော တကာရဿေဝ ရကာရော ဟောတိ သဗ္ဗေသု ဝစနေသု။ အတြဇော၊ အတြဇံ။
ဈလဣစ္စေတေဟိ သ္မာဝစနဿ နာ ဟောတိ။
အဂ္ဂိနာ၊ ဒဏ္ဍိနာ၊ ဘိက္ခုနာ၊ သယမ္ဘုနာ။
သ္မာတိ ကိမတ္ထံ? အဂ္ဂယော၊ မုနယော၊ ဣသယော။
တသ္မာ ဃပတော သ္မိံ ဝစနဿ ယံ ဟောတိ ဝါ။
ကညာယံ ¶ ၊ ကညာယ။ ရတ္တိယံ၊ ရတ္တိယာ။ ဣတ္ထိယံ၊ ဣတ္ထိယာ။ ယာဂုယံ၊ ယာဂုယာ။ ဝခုယံ၊ ဝဓုယာ။
သဗ္ဗေသံ ယောနံ နိ ဟောတိ ဝါ နပုံသကေဟိ လိင်္ဂေဟိ။
အဋ္ဌီနိ၊ အဋ္ဌီ၊ အာယူနိ၊ အာယူ။
နပုံသကေဟီတိ ကိမတ္ထံ? ဣတ္ထိယော။
အကာရန္တေဟိ နပုံသကလိင်္ဂေဟိ ယောနံ နိ ဟောတိ နိစ္စံ။
ယာနိ၊ ယာနိ။ တာနိ၊ တာနိ။ ကာနိ၊ ကာနိ။ ဘယာနိ၊ ဘယာနိ။ ရူပါနိ၊ ရူပါနိ။
အကာရန္တေဟိ နပုံသကလိင်္ဂေဟိ သိဝစနဿ အံ ဟောတိ နိစ္စံ။
သဗ္ဗံ၊ ယံ၊ တံ၊ ကံ၊ ရူပံ။
တတော နိဒ္ဒိဋ္ဌေဟိ လိဂေဟိ သေသခတာ ဂသိဣစ္စေတေ လောပမာပဇ္ဇန္တေ။
ဘောတိ ¶ ဣတ္ထိ၊ သာ ဣတ္ထီ။ ဘော ဒဏ္ဍိ၊ သော ဒဏ္ဍီ။ ဘော သတ္ထ၊ သော သတ္ထာ။ ဘော ရာဇ၊ သော ရာဇာ။ သေသတောတိ ကိမတ္ထံ? ပုရိသော ဂစ္ဆတိ။
ဂသီတိ ကိမတ္ထံ? ဣတ္ထိယာ၊ သတ္ထုဿ။
၂၂၁၊ ၂၈၂။ သဗ္ဗာသမာဝုသော ပသဂ္ဂနိပါတာဒီဟိ စ။
သဗ္ဗာသံ ဝိဘတ္တီနံ ဧကဝစနဗဟုဝစနာနံ ပဌမာ ဒုတိယာတတိယာ စတုတ္ထီ ပဉ္စမီ ဆဋ္ဌီ သတ္တမီနံ လောပေါ ဟောတိ၊ အာဝုသော ဥပသဂ္ဂ နိပါတဣစ္စေဝမာဒီဟိ စ၊
တွံ ပနာဝုသော၊ တုမှေ ပနာဝုသော၊ ပဒသော ဓမ္မံ ဝါစေယျ၊ ဝိဟာရံ သွေ ဥပဂစ္ဆေယျ။
ပ၊ ပရာ၊ နိ၊ နီ၊ ဥ၊ ဒု၊ သံ၊ ဝိ၊ အဝ၊ အနု၊ ပရိ၊ အဓိ၊ အဘိ၊ ပတိ၊ သု၊ အာ၊ အတိ၊ အပိ၊ အပ၊ ဥပ၊ ပဟာရော၊ ပရာဘဝေါ၊ နိဟာရော၊ နီဟာရော၊ ဥဟာရော၊ ဒုဟာရော၊ သံဟာရော၊ ဝိဟာရော၊ အဝဟာရော၊ အနုဟာရော၊ ပရိဟာရော၊ အဓိဟာရော၊ အဘိဟာရော၊ ပတိဟာရော၊ သုဟာရော၊ အာဟာရော၊ အတိဟာရော၊ အပိဟာရော၊ အပဟာရော၊ ဥပဟာရော၊ ဧဝံ ဝီသတိ ဥပသဂ္ဂေဟိ စ။
ယထာ၊ တထာ၊ ဧဝံ၊ ခလု၊ ခေါ၊ တတြ၊ အထော၊ အထ၊ ဟိ၊ တု စ၊ ဝါ၊ ဝေါ၊ ဟံ၊ အဘံ၊ အလံ၊ ဧဝ၊ ဟော အဟော၊ ဟေ ¶ ၊ အဟေ၊ ရေ၊ အရေ၊ ဧဝမာဒီဟိ နိပါတေဟိ စ ယောဇေတဗ္ဗာနိ။
စဂ္ဂဟဏမ ဝဓာရဏတ္ထံ။
၂၂၂၊ ၃၄၂။ ပုမဿ လိင်္ဂါဒီသု သမာသေသု။
ပုမဣစ္စေတဿ အန္တော လောပမာပဇ္ဇတေ လိင်္ဂါဒီသု ပရပဒေသု သမာသေသု။
ပုလ္လိင်္ဂံ၊ ပုမ္ဘာဝေါ၊ ပုင်္ကောကိလော။
ပုမဿေတိ ကိမတ္ထံ? ဣတ္ထိလိင်္ဂံ၊ နပုံသကလိင်္ဂံ။
လိင်္ဂါဒီသူတိ ကိမတ္ထံ? ပုမိတ္ထီ။
သမာသေသူတိ ကိမတ္ထံ? ပုမဿ လိင်္ဂံ။
အံ ဝစနဿ ယံ ဟောတိ ဝါ ဤတော ပသညတော။
ဣတ္ထိယံ၊ ဣတ္ထိံ။
ပသညတောတိ ကိမတ္ထံ? ဒဏ္ဍိနံ၊ ဘောဂိနံ။
အမိတိ ကိမတ္ထံ? ဣတ္ထီဟိ။
တသ္မာ ဈတော ကတရဿာ အံ ဝစနဿ နံ ဟောတိ။
ဒဏ္ဍိနံ ¶ ၊ ဘောဂိနံ။
ဈတောတိ ကိမတ္ထံ? ဝေဿဘုံ။
ကတရဿာတိ ကိမတ္ထံ? ကုစ္ဆိံ။
သဗ္ဗေသံ ယောနံ ဈတော ကတရဿာ နော ဟောတိ။
ဒဏ္ဍိနော ဘောဂိနော၊ ဟေ ဒဏ္ဍိနော၊ ဟေ ဘောဂိနော။
ကတရဿာတိ ကိမတ္ထံ? အဂ္ဂယော၊ မုနယော၊ ဣသယော။
ဈတောတိ ကိမတ္ထံ? သယမ္ဘုနော။
ယောနန္တိ ကိမတ္ထံ? ဒဏ္ဍိနာ၊ ဘောဂိနာ။
တသ္မာ ဈတော ကတရဿာ သ္မိံဝစနဿ နိအာဒေ သော ဟောတိ။
ဒဏ္ဍိနိ၊ ဘောဂိနိ။
ကတရဿာတိ ကိမတ္ထံ? ဗျာဓိမှိ။
ကိမိစ္စေတဿ ကော စ ဟောတိ ဝပစ္စယေ ပရေ။
ကွ ¶ ဂတောသိ တွံ ဒေဝါနံ ပိယတိဿ။
စဂ္ဂဟဏေန အဝပစ္စယေ ပရေပိ ကော စ ဟောတိ။ ကော တံနိန္ဒိတု မရဟတိ၊ ကထံ ဗောဓယိတုံ ဓမ္မံ။
ဝေတိ ကိမတ္ထံ? ကုတော အာဂတောသိ တွံ။
ကိမိစ္စေတဿ ကု ဟောတိ ဟိံ ဟံဣစ္စေတေသု စ။ ကုဟိံ ဂစ္ဆသိ၊ ကုလံ ဂစ္ဆသိ။
စဂ္ဂဟဏေန ဟိဉ္စနံဒါစနံ ပစ္စယေသု ပရေသု အညတ္ထာပိ ကု ဟောတိ။ ကုဟိဉ္စနံ၊ ကုဒါစနံ။
ကိမိစ္စေတဿ ကော ဟောတိ သေသေသု ဝိဘတ္တိပစ္စယေသု ပရေသု။
ကော ပကာရော ကထံ၊ ကံ ပကာရံ ကထံ။
စဂ္ဂဟဏမနုကဍ္ဎနတ္ထံ။
ကိမိစ္စေတဿ ကု ဟောတိ တြတောထ ဣစ္စေတေသု စ။
ကုတြ၊ ကုတော၊ ကုတ္ထ။
စဂ္ဂဟဏမနုကဍ္ဎနတ္ထံ၊
၂၃၁၊ ၂၆၃။ သဗ္ဗဿေတဿ ¶ ၊ ကာရော ဝါ။
သဗ္ဗဿ ဧတသဒ္ဒဿ အကာရော ဟောတိ ဝါ တောထဣစ္စေတေသု။
အတော၊ အတ္ထ၊ ဧတ္တော၊ ဧတ္ထ။
သဗ္ဗဿ ဧတသဒ္ဒဿ အကာရော ဟောတိ နိစ္စံ တြပစ္စယေ ပရေ။
အတြ။
သဗ္ဗဿ ဧတသဒ္ဒဿ ဧကာရော ဟောတိ ဝါ တောထဣစ္စေတေသု။
ဧတ္တော၊ အတော၊ ဧတ္ထ၊ အတ္ထ။
၂၃၄၊ ၂၆၅။ ဣမဿိ ထံ ဒါနိ ဟ တော ဓေသု စ။
ဣမသဒ္ဒဿ သဗ္ဗဿေဝ ဣကာရော ဟောတိ ထံ ဒါနိဟတော ဓဣစ္စေတေသု။
ဣတ္ထံ၊ ဣဒါနိ၊ ဣဟ၊ ဣတော၊ ဣဓ။
၂၃၅၊ ၂၈၁။ အဓုနာမှိ ¶ စ။
ဣမသဒ္ဒဿ သဗ္ဗဿေဝ အကာရော ဟောတိ ဓုနာမှိ ပစ္စယေ ပရေ။
အဓုနာ။
စဂ္ဂဟဏမဝဓာရဏတ္ထံ။
သဗ္ဗဿေဝ ဣမသဒ္ဒဿ ဧတာဒေသော ဟောတိ ရဟိမှိ ပစ္စယေ ပရေ။
ဧတရဟိ။
၂၃၇၊ ၁၇၆။ ဣတ္ထိယမတော အာပစ္စယော။
ဣတ္ထိယံ ဝတ္တမာနာယ အကာရတော အာပစ္စယော ဟောတိ။
သဗ္ဗာ၊ ယာ၊ သာ၊ ကာ။ ကတရာ။
နဒါဒိတော ဝါအနဒါဒိတောဝါ ဣတ္ထိယံ ဝတ္တမာနာယ ဤပစ္စယော ဟောတိ။
နဒီ၊ မဟီ၊ ကုမာရီ၊ တရုဏီ၊ သခီ၊ ဣတ္ထီ။
၂၃၉၊ ၁၉၀။ ဏဝ ¶ ဏိက ဏေယျ ဏ န္တုဟိ။
ဏဝ ဏိက ဏေယျ ဏ န္တုဣစ္စေတေဟိ ဣတ္ထိယံ ဝတ္တမာနေဟိ ဤပစ္စယော ဟောတိ။
မာဏဝီ၊ ပဏ္ဍဝီ၊ နာဝိကီ၊ ဝေနတေယျီ၊ ကုန္တေယျီ၊ ဂေါတမီ၊ ဂုဏဝတီ၊ သာမာဝတီ။
၂၄၀၊ ၁၉၃။ ပတိ ဘိက္ခုရာဇီကာရန္တေဟိ ဣနီ။
ပတိ ဘိက္ခု ရာဇီကာရန္တေဟိ ဣတ္ထိယံ ဝတ္တမာနေဟိ ဣနီပစ္စယော ဟောတိ။
ဂဟပတာနီ၊ ဘိက္ခုနီ၊ ရာဇိနီ၊ ဟတ္ထိနီ၊ ဒဏ္ဍိနီ၊ မေဓာဝိနီ၊ တပဿိနီ။
သဗ္ဗဿေဝ န္တုပစ္စယဿ တကာရော ဟောတိ ဝါ ဤကာရေ ပရေ။
ဂုဏဝတီ၊ ဂုဏဝန္တီ၊ ကုလဝတီ၊ ကုလဝန္တီ၊ သတိမတီ။ သတိမန္တီ၊ မဟတီ၊ မဟန္တီ၊ ဂေါတ္တမတီ၊ ဂေါတ္တမန္တီ။
သဗ္ဗဿေဝ ဘဝန္တသဒ္ဒဿ ဘောတာဒေသော ဟောတိ ဤကာရေ ဣတ္ထိဂတေ ပရေ။
ဘောတိ အယျေ၊ ဘောတိ ကညေ၊ ဘောတိ ခရာဒိယေ။
၂၄၃၊ ၁၁၀။ ဘောဂေ ¶ တု။
သဗ္ဗဿေဝ ဘဝန္တသဒ္ဒဿ ဘောအာဒေသော ဟောတိ ဂေ ပရေ။
ဘော ပုရိသ၊ ဘော အဂ္ဂိ၊ ဘော ရာဇ၊ ဘော သတ္ထ၊ ဘော ဒဏ္ဍိ၊ ဘော သယမ္ဘု။
ဂေတိ ကိမတ္ထံ? ဘဝတာ၊ ဘဝံ။
တုဂ္ဂဟဏေန အညသ္မိမ္ပိ ဝစနေ သဗ္ဗဿ ဘဝန္တသဒ္ဒဿ ဘောန္တ ဘန္တေ ဘောန္တော ဘဒ္ဒေ ဘောတာ ဘော တောဣစ္စေတေ အာဒေသာ ဟောန္တိ။
ဘောန္တ၊ ဘန္တေ၊ ဘောန္တော၊ ဘဒ္ဒေ၊ ဘောတာ၊ ဘောတော။
အကာရော စ ပိတာဒီနမန္တော စ အတ္တမာပဇ္ဇတေ ဂေ ပရေ။
ဘော ပုရိသာ၊ ဘော ရာဇာ၊ ဘော ပိတာ၊ ဘော မာတာ၊ ဘော သတ္ထာ။
ဈလပဣစ္စေတေ ရဿမာပဇ္ဇန္တေ ဂေ ပရေ။
ဘော ဒဏ္ဍိ၊ ဘော သယမ္ဘု၊ ဘောတိ ဣတ္ထိ၊ ဘောတိဝဓု၊
၂၄၆၊ ၇၃။ အာကာရော ¶ ဝါ။
အာကာရော ရဿမာပဇ္ဇတေ ဝါ ဂေ ပရေ။
ဘော ရာဇ၊ ဘော ရာဇာ၊ ဘော အတ္တ၊ ဘော အတ္တာ၊ ဘော သခ၊ ဘော သခါ၊ ဘော သတ္ထ၊ ဘော သတ္ထာ။
ဣတိ နာမကပ္ပေ စတုတ္ထော ကဏ္ဍော။
ပဉ္စမကဏ္ဍ
၂၄၇၊ ၂၆၁။ တွာဒယော ဝိဘတ္တိသညာယော။
တောအာဒိ ယေသံ ပစ္စယာနံ၊ တေ ဟောန္တိ တွာဒယော။ တေ ပစ္စယာ တွာဒယော ဝိဘတ္တိသညာဝ ဒဋ္ဌဗ္ဗာ။
သဗ္ဗတော၊ ယတော၊ တတော၊ ကုတော၊ အတော၊ ဣတော၊ သဗ္ဗဒါ၊ ယဒါ၊ တဒါ၊ ကဒါ၊ ဣဓ၊ ဣဒါနိ။
၂၄၈၊ ၂၆၀။ ကွစိ တော ပဉ္စမျတ္ထေ။
ကွစိ တောပစ္စယော ဟောတိ ပဉ္စမျတ္ထေ။
သဗ္ဗတော၊ ယတော၊ တတော၊ ကုတော၊ အတော၊ ဣတော။
ကွစီတိ ကိမတ္ထံ? သဗ္ဗသ္မာ၊ ဣမသ္မာ။
၂၄၉၊ ၂၆၆။ တြ ¶ ထ သတ္တမိယာ သဗ္ဗနာမေဟိ။
တြထဣစ္စေတေ ပစ္စယာ ဟောန္တိ သတ္တမျတ္ထေ သဗ္ဗ နာမေဟိ။
သဗ္ဗတြ၊ သဗ္ဗတ္ထ၊ ယတြ၊ ယတ္ထ၊ တတြ၊ တတ္ထ။
သဗ္ဗဣစ္စေတသ္မာ ဓိပစ္စယော ဟောတိ ကွစိ သတ္တမျတ္ထေ။ သဗ္ဗဓိ၊ သဗ္ဗသ္မိံ။
ကိမိစ္စေတသ္မာ ဝပစ္စယော ဟောတိ သတ္တမျတ္ထေ။
ကွ ဂတောသိ တွ ဒေဝါနံပိယတိဿ။
ကိမိစ္စေတသ္မာ ဟိံဟံဟိဉ္စနံဣစ္စေတေ ပစ္စယာ ဟောန္တိ သတ္တမျတ္ထေ။
ကုဟိံ၊ ကုလံ၊ ကုဟိဉ္စနံ။
တမှာ စ ဟိ ဟံဣစ္စေတေ ပစ္စယာ ဟောန္တိ သတ္တမျတ္ထေ။ တဟိံ၊ တဟံ။
စဂ္ဂဟဏံ ¶ ဟိဉ္စနဂ္ဂဟဏနိဝတ္တနတ္ထံ။
ဣမသ္မာ ဟဓဣစ္စေတေ ပစ္စယာ ဟောန္တိ သတ္တမျတ္ထေ။ ဣဟ၊ ဣဓ။
စဂ္ဂဟဏမဝဓာရဏတ္ထံ။
တသ္မာ ယတော ဟိံပစ္စယော ဟောတိ သတ္တမျတ္ထေ။ ယဟိံ။
‘‘ကာလေ’’ဣစ္စေတံ အဓိကာရတ္ထံ ဝေဒိတဗ္ဗံ။
၂၅၇၊ ၂၇၉။ ကိံသဗ္ဗညေကယကုဟိဒါဒါစနံ။
ကိံ သဗ္ဗအည ဧက ယ ကုဣစ္စေတေဟိ ဒါ ဒါစနံဣစ္စေတေ ပစ္စယာ ဟောန္တိ ကာလေ သတ္တမျတ္ထေ။
ကဒါ၊ သဗ္ဗဒါ၊ အညဒါ၊ ဧကဒါ၊ ယဒါ၊ ကုဒါစနံ။
တဣစ္စေတသ္မာ ဒါနိ ဒါဣစ္စေတေ ပစ္စယာ ဟောန္တိ၊ ကာလေ သတ္တမျတ္ထေ။
တဒါနိ ¶ ၊ တဒါ။
စဂ္ဂဟဏမနုကဍ္ဎနတ္ထံ။
၂၅၉၊ ၂၇၉။ ဣမသ္မာ ရဟိ ဓုနာ ဒါနိ စ။
ဣမသ္မာ ရဟိ ဓုနာ ဒါနိဣစ္စေတေ ပစ္စယာ ဟောန္တိ ကာလေ သတ္တမျတ္ထေ။
တေရဟိ၊ အဓုနာ၊ ဣဒါနိ။
စဂ္ဂဟဏမနုကဍ္ဎနတ္ထံ။
သဗ္ဗဣစ္စေတဿ သကာရာဒေသော ဟောတိ ဝါ ဒါမှိ ပစ္စယေ ပရေ။
သဒါ၊ သဗ္ဗဒါ။
အဝဏ္ဏော ယေ ပစ္စယေ ပရေ လောပမာပဇ္ဇတေ။
ဗာဟုဿစ္စံ၊ ပဏ္ဍိစ္စံ၊ ဝေပုလ္လံ၊ ကာရုညံ၊ ကောသလ္လံ၊ သာမညံ၊ သောဟဇ္ဇံ။
၂၆၂၊ ၃၉၁။ ဝုဍ္ဎဿ ဇော ဣယိဋ္ဌေသု။
သဗ္ဗဿေဝ ဝုဍ္ဎသဒ္ဒဿ ဇောအာဒေသော ဟောတိ ဣယ ဣဋ္ဌဣစ္စေတေသု ပစ္စယေသု။
ဇေယျော ¶ ၊ ဇေဋ္ဌော။
သဗ္ဗဿေဝ ပသတ္ထသဒ္ဒဿ သောအာဒေသော ဟောတိ၊ ဇာဒေသော စ ဣယဣဋ္ဌဣစ္စေတေသု ပစ္စယေသု။
သေယျော၊ သေဋ္ဌော၊ ဇေယျော၊ ဇေဋ္ဌော။
သဗ္ဗဿ အန္တိကသဒ္ဒဿ နေဒါဒေသော ဟောတိ ဣယ ဣဋ္ဌဣစ္စေတေသု ပစ္စယေသု။
နေဒိယော၊ နေဒိဋ္ဌော။
သဗ္ဗဿ ဗာဠှသဒ္ဒဿ သာဓာဒေသော ဟောတိ ဣယ ဣဋ္ဌဣစ္စေတေသု ပစ္စယေသု။
သာဓိယော၊ သာဓိဋ္ဌော။
သဗ္ဗဿ အပ္ပသဒ္ဒဿ ကဏ အာဒေသော ဟောတိ ဣယ ဣဋ္ဌဣစ္စေတေသု ပစ္စယေသု။
ကဏိယော၊ ကဏိဋ္ဌော။
၂၆၇၊ ၃၉၆။ ယုဝါနဉ္စ ¶ ။
သဗ္ဗဿ ယုဝသဒ္ဒဿ ကဏ အာဒေသော ဟောတိ ဣယ ဣဋ္ဌဣစ္စေတေသု ပစ္စယေသု။
ကနိယော၊ ကနိဋ္ဌော။
စဂ္ဂဟဏမနုကဍ္ဎနတ္ထံ။
၂၆၈၊ ၃၉၇။ ဝန္တုမန္တု ဝီနဉ္စ လောပေါ။
ဝန္တုမန္တုဝီဣစ္စေတေသံ ပစ္စယာနံ လောပေါ ဟောတိ ဣယဣဋ္ဌဣစ္စေတေသု ပစ္စယေသု။
ဂုဏိယော၊ ဂုဏိဋ္ဌော၊ သတိယော၊ သတိဋ္ဌော၊ မေဓိယော၊ မေဓိဋ္ဌော။
၂၆၉၊ ၄၀၁။ ယဝတံ တ လ ဏ ဒကာရာနံ ဗျဉ္ဇနာနိ စ လ ဉ ဇကာရတ္တံ။
ယကာရဝန္တာနံ တ လ ဏ ဒကာရာနံ ဗျဉ္ဇနာနိ စ လ ဉ ဇကာရတ္တမာပဇ္ဇန္တေ ယထာသင်္ချံ။
ဗာဟုဿစ္စံ၊ ပဏ္ဍိစ္စံ၊ ဝေပုလ္လံ၊ ကာရုညံ၊ ကောသလ္လံ၊ နေပုညံ၊ သာမညံ၊ သောဟဇ္ဇံ။
ယ ဝ တမိတိ ကိမတ္ထံ? တိဏဒလံ။
တ လ ဏ ဒကာရာနမိတိ ကိမတ္ထံ? အာလသျံ၊ အာရောဂျံ။
ဗျဉ္ဇနာနမိတိ ¶ ကိမတ္ထံ? မစ္စုနာ။
ကာရဂ္ဂဟဏံ ကိမတ္ထံ? ယကာရဿ မကာရာဒေသဉာပနတ္ထံ။ ဩပမ္မံ။
၂၇၀၊ ၁၂၀။ အမှ တုမှန္တုရာဇ ဗြဟ္မတ္တ သခသတ္ထု ပိတာဒီဟိသ္မာ နာဝ။
အမှ တုမှန္တုရာဇ ဗြဟ္မ အတ္တ သခ သတ္ထု ပိတုဣစ္စေဝမာဒီဟိ သ္မာဝစနံ နာဝ ဒဋ္ဌဗ္ဗံ။
မယာ၊ တယာ၊ ဂုဏဝတာ၊ ရညာ၊ ဗြဟ္မုနာ၊ အတ္တနာ၊ သခိနာ၊ သတ္ထာရာ၊ ပိတရာ၊ မာတရာ၊ ဘာတရာ၊ ဓီတရာ၊ ကတ္တာရာ၊ ဝတ္တာရာ။
ဧတေဟီတိ ကိမတ္ထံ? ပုရိသာ။
ဣတိ နာမကပ္ပေ ပဉ္စမော ကဏ္ဍော
နာမကပ္ပော နိဋ္ဌိတော။