📜
၄။ သမာသကပ္ပ
သတ္တမကဏ္ဍ
၃၁၆၊ ၃၃၁။ နာမာနံ ¶ သမာသော ယုတ္တတ္ထော။
တေသံ နာမာနံ ပယုဇ္ဇမာနပဒတ္ထာနံ ယော ယုတ္တတ္ထော၊ သော သမာသသညော ဟောတိ။
ကထိနဒုဿံ၊ အာဂန္တုကဘတ္တံ၊ ဇီဝိတိန္ဒြိယံ၊ သမဏဗြာဟ္မဏာ၊ သာရိပုတ္တမောဂ္ဂလ္လာနာ၊ ဗြာဟ္မဏ ဂဟပတိကာ။
နာမာနမိတိ ကိမတ္ထံ? ဒေဝဒတ္တော ပစတိ၊ ယညဒတ္တော ပစတိ။
ယုတ္တတ္ထောတိ ကိမတ္ထံ? ဘတော ရညော ပုတ္တော ဒေဝဒတ္တဿ။
သမာသဣစ္စနေန ကွတ္ထော? ကွစိ သမာသန္တဂတာနမကာရန္တော။
၃၁၇၊ ၃၃၂။ တေသံ ဝိဘတ္တိယော လောပါ စ။
တေသံ ယုတ္တတ္ထာနံ သမာသာနံ ဝိဘတ္တိယော လောပါ စ ဟောန္တိ။
ကထိနဒုဿံ ¶ ၊ အာဂန္တုကဘတ္တံ။
တေသံဂဟဏေန သမာသတဒ္ဓိတာချာတကိတကာနံ ဝိဘတ္တိပစ္စယပဒက္ခရာဂမာ စ လောပါ ဟောန္တိ။ ဝါသိဋ္ဌော၊ ဝေနတေယျော။
စဂ္ဂဟဏ မဝဓာရဏတ္ထံ၊ ပဘင်္ကရော၊ အမတဒ္ဒဒေါ၊ မေဓင်္ကရော၊ ဒီပင်္ကရော။
လုတ္တာသု ဝိဘတ္တီသု အဿ သရန္တဿ လိင်္ဂဿ ပကတိရူပါနိ ဟောန္တိ။
စက္ခုသောတံ၊ မုခနာသိကံ၊ ရာဇပုတ္တော၊ ရာဇပုရိသော။
၃၁၉၊ ၃၃၀။ ဥပသဂ္ဂနိပါတပုဗ္ဗကော အဗျယီဘာဝေါ။
ဥပသဂ္ဂနိပါတပုဗ္ဗကော သမာသော အဗျယီဘာဝသညော ဟောတိ။
နဂရဿ ¶ သမီပေ ပဝတ္တတိ ကထာ ဣတိ ဥပနဂရံ၊ ဒရထာနံ အဘာဝေါ နိဒ္ဒရထံ၊ မကသာနံ အဘာဝေါ နိမ္မကသံ၊ ဝုဍ္ဎာနံ ပဋိပါဋိ ယထာဝုဍ္ဎံ၊ ယေ ယေ ဝုဍ္ဎာ ဝါ ယထာဝုဍ္ဎံ၊ ဇီဝဿ ယတ္တကော ပရိစ္ဆေဒေါ ယာဝဇီဝံ၊ စိတ္တမဓိကိစ္စ ပဝတ္တန္တိ တေ ဓမ္မာတိ အဓိစိတ္တံ၊ ပဗ္ဗတဿ တိရော တိရောပဗ္ဗတံ၊ သောတဿ ပတိ ပဝတ္တတိ နာဝါ ဣတိ ပတိသောတံ၊ ပါသာဒဿ အန္တော အန္တောပါသာဒံ။
အဗျယီဘာဝမိစ္စနေန ကွတ္ထော? အံဝိဘတ္တီန မကာရန္တာ အဗျယီဘာဝါ။
သော အဗျယီဘာဝသမာသော နပုံသကလိင်္ဂေါဝ ဒဋ္ဌဗ္ဗော။
ကုမာရီသု အဓိကိစ္စ ပဝတ္တတိ ကထာ ဣတိ အဓိကုမာရိ၊ ဝဓုယာ သမီပေ ပဝတ္တတိ ကထာ ဣတိ ဥပဝဓု၊ ဂင်္ဂါယ သမီပေ ပဝတ္တတိ ကထာ ဣတိ ဥပဂင်္ဂံ၊ မဏိကာယ သမီပေ ပဝတ္တတိ ကထာ ဣတိ ဥပမဏိကံ။
ဒိဂုဿ သမာသဿ ဧကတ္တံ ဟောတိ၊ နပုံသကလိင်္ဂတ္တဉ္စ။
တယော ¶ လောကာ တိလောကံ၊ တယော ဒဏ္ဍာ တိဒဏ္ဍံ၊ တီဏိ နယနာနိ တိနယနံ၊ တယော သိင်္ဂါ တိသိင်္ဂံ။ စတဿော ဒိသာ စတုဒ္ဒိသံ၊ ပဉ္စ ဣန္ဒြိယာနိ ပဉ္စိန္ဒြိယံ။
၃၂၂၊ ၃၅၉။ တထာ ဒွန္ဒေ ပါဏိ တူရိယ ယောဂ္ဂသေနင်္ဂခုဒ္ဒဇန္တုက ဝိဝိဓဝိရုဒ္ဓ ဝိသဘာဂတ္ထာဒီနဉ္စ။
တထာ ဒွန္ဒေ သမာသေ ပါဏိ တူရိယ ယောဂ္ဂ သေနင်္ဂခုဒ္ဒဇန္တုက ဝိဝိဓဝိရုဒ္ဓ ဝိသဘာဂတ္ထဣစ္စေဝမာဒီနံ ဧကတ္တံ ဟောတိ၊ နပုံသကလိင်္ဂတ္တဉ္စ။
တံ ယထာ? စက္ခု စ သောတဉ္စ စက္ခုသောတံ၊ မုခဉ္စ နာသိကာ စ မုခနာသိကံ၊ ဆဝိ စ မံသဉ္စ လောဟိတဉ္စ ဆဝိမံသလောဟိတံ။ ဧဝံ ပါဏျင်္ဂတ္ထေ။
သင်္ခေါ စ ပဏဝေါ စ သင်္ခပဏဝံ၊ ဂီတဉ္စ ဝါဒိတဉ္စ ဂီတဝါဒိတံ၊ ဒဒ္ဒရိ စ ဍိဏ္ဍိမော စ ဒဒ္ဒရိဍိဏ္ဍိမံ။ ဧဝံ တူရိယင်္ဂတ္ထေ။
ဖာလော စ ပါစနဉ္စ ဖာလပါစနံ၊ ယုဂဉ္စ နင်္ဂလဉ္စ ယုဂနင်္ဂလံ။ ဧဝံ ယောဂ္ဂင်္ဂတ္ထေ။
အသိ စ စမ္မဉ္စ အသိစမ္မံ၊ ဓနု စ ကလာပေါ စ ဓနုကလာပံ၊ ဟတ္ထီ စ အဿော စ ဟတ္ထိအဿံ၊ ရထော စ ပတ္တိကော စ ရထပတ္တိကံ။ ဧဝံ သေနင်္ဂတ္ထေ။
ဍံသာ ¶ စ မကသာ စ ဍံသမကသံ၊ ကုန္ထော စ ကိပိလ္လိကော စ ကုန္ထကိပိလ္လိကံ၊ ကီဋော စ သရီသပေါ စ ကီဋသရီသပံ။ ဧဝံ ခုဒ္ဒဇန္တုကတ္ထေ။
အဟိ စ နကုလော စ အဟိနကုလံ၊ ဗိဠာရော စ မူသိကော စ ဗိဠာရမူသိကံ၊ ကာကော စ ဥလူကော စ ကာကောလူကံ။ ဧဝံ ဝိဝိဓဝိရုဒ္ဓတ္ထေ။
သီလဉ္စ ပညာဏဉ္စ သီလပညာဏံ၊ သမထော စ ဝိပဿနာ စ သမထဝိပဿနံ၊ ဝိဇ္ဇာ စ စရဏဉ္စ ဝိဇ္ဇာစရဏံ။ ဧဝံ ဝိသဘာဂတ္ထေ။
အာဒိဂ္ဂဟဏံ ကိမတ္ထံ? ဒါသီ စ ဒါသော စ ဒါသိဒါသံ၊ ဣတ္ထီ စ ပုမာ စ ဣတ္ထိပုမံ၊ ပတ္တော စ စီဝရဉ္စ ပတ္တစီဝရံ၊ ဆတ္တဉ္စ ဥပါဟနာ စ ဆတ္တုပါဟနံ၊ တိကဉ္စ စတုက္ကဉ္စ တိကစတုက္ကံ၊ ဝေနော စ ရထကာရော စ ဝေနရထကာရံ၊ သာကုဏိကော စ မာဂဝိကော စ သဝကုဏိကမာဂဝိကံ၊ ဒီဃော စ မဇ္ဈိမော စ ဒီဃမဇ္ဈိမံ ဣစ္စေဝမာဒိ။
၃၂၃၊ ၃၆၀။ ဝိဘာသာ ရုက္ခ တိဏ ပသုခ န ဓည ဇနပဒါဒီနဉ္စ။
ရုက္ခတိဏ ပသု ဓန ဓည ဇနပဒဣစ္စေဝမာဒီနံ ဝိဘာသာ ဧကတ္တံ ဟောတိ၊ နပုံသကလိင်္ဂတ္တဉ္စ ဒွန္ဒေ သမာသေ။ အဿတ္ထော ¶ စ ကပီတနော စ အဿတ္ထကပီတနံ၊ အဿတ္ထကပီတနာ ဝါ။ ဥသီရဉ္စ ဗီရဏဉ္စ ဥသီရဗီရဏံ၊ ဥသီရဗီရဏာ ဝါ။ အဇော စ ဧဠကော စ အဇေဠကံ၊ အဇေဠကာ ဝါ။ ဟိရညဉ္စ သုဝဏ္ဏဉ္စ ဟိရညသုဝဏ္ဏံ၊ ဟိရညသုဝဏ္ဏာ ဝါ။ သာလိ စ ယဝေါ စ သာလိယဝံ၊ သာလိယဝါ ဝါ။ ကာသီ စ ကောသလာ စ ကာသိကောသလံ၊ ကာသိကောသလာ ဝါ။
အာဒိဂ္ဂဟဏံ ကိမတ္ထံ? သာဝဇ္ဇဉ္စ အနဝဇ္ဇဉ္စ သာဝဇ္ဇာနဝဇ္ဇံ၊ သာဝဇ္ဇာ နဝဇ္ဇာ ဝါ။ ဟီနဉ္စ ပဏီတဉ္စ ဟီနပဏီတံ။ ဟီနပဏီတာ ဝါ။ ကဏှော စ သုက္ကော စ ကဏှသုက္ကံ၊ ကဏှသုက္ကာ ဝါ။
၃၂၄၊ ၃၃၉။ ဒွိပဒေ တုလျာဓိကရဏေ ကမ္မဓာရယော။
ဒွေ ပဒါနိ တုလျာဓိကရဏာနိ ယဒါ သမသျန္တေ၊ တဒါ သော သမာသော ကမ္မဓာရယသညော ဟောတိ။
မဟန္တော ¶ စ သော ပုရိသော စာတိ မဟာပုရိသော၊ ကဏှော စ သော သပ္ပော စာတိ ကဏှသပ္ပော၊ နီလဉ္စ တံ ဥပ္ပလဉ္စာတိ နီလုပ္ပလံ၊ လောဟိတဉ္စ တံ စန္ဒနဉ္စာတိ လောဟိတစန္ဒနံ၊ ဗြာဟ္မဏီ စ သာ ဒါရိကာ စာတိ ဗြာဟ္မဏဒါရိကာ၊ ခတ္တိယာ စ သာ ကညာ စာတိ ခတ္တိယကညာ။
ကမ္မဓာရယဣစ္စနေန ကွတ္ထော? ကမ္မဓာရယသညေ စ။
၃၂၅၊ ၃၄၈။ သင်္ချာပုဗ္ဗော ဒိဂု။
သင်္ချာပုဗ္ဗော ကမ္မဓာရယသမာသော ဒိဂုသညော ဟောတိ။
တီဏိ မလာနိ တိမလံ၊ တီဏိ ဖလာနိ တိဖလံ၊ တယော လောကာ တိလောကံ၊ တယော ဒဏ္ဍာ တိဒဏ္ဍံ၊ စတဿော ဒိသာ စတုဒ္ဒိသံ၊ ပဉ္စ ဣန္ဒြိယာနိ ပဉ္စိန္ဒြိယံ၊ သတ္တ ဂေါဒါဝရိယော သတ္တဂေါဒါဝရံ။
ဒိဂုဣစ္စနေန ကွတ္ထော? ဒိဂုဿေ ကတ္တံ။
ဥဘေ ဒိဂုကမ္မဓာရယသမာသာ တပ္ပုရိသသညာ ဟောန္တိ။
န ဗြာဟ္မဏော အဗြာဟ္မဏော၊ န ဝသလော အဝသလော၊ န ဘိက္ခု အဘိက္ခု၊ န ပဉ္စဝဿံ အပဉ္စဝဿံ၊ န ¶ ပဉ္စပူလီ အပဉ္စပူလီ၊ န သတ္တဂေါဒါဝရံအသတ္တဂေါဒါဝရံ၊ န ဒသဂဝံ အဒသဂဝံ၊ န ပဉ္စဂဝံ အပဉ္စဂဝံ။
တပ္ပုရိသဣစ္စနေန ကွတ္ထော? အတ္တံ နဿ တပ္ပုရိသေ။
တာ အမာဒယော နာမေဟိ ပရပဒေဘိ ယဒါ သမသျန္တေ၊ တဒါ သော သမာသော တပ္ပုရိသသညော ဟောတိ။
ဘူမိံ ဂတော ဘူမိဂတော၊ သဗ္ဗရတ္တိံ သောဘဏော သဗ္ဗရတ္တိသောဘဏော။ အပါယံ ဂတော အပါယဂတော၊ ဣဿရေန ကတံ ဣဿရကတံ၊ သလ္လေန ဝိဒ္ဓါ သလ္လဝိဒ္ဓါ၊ ကထိနဿ ဒုဿံ ကထိနဒုဿံ၊ အာဂန္တုကဿ ဘတ္တံ အာဂန္တုကဘတ္တံ၊ မေထုနာ အပေတော မေထုနာပေတော၊ စောရာ ဘယံ စောရဘယံ၊ ရညော ပုတ္တော ရာဇပုတ္တော၊ ဓညာနံ ရာသိ ဓညရာသိ၊ ရူပေ သညာ ရူပသညာ၊ သံသာရေ ဒုက္ခံ သံသာရဒုက္ခံ။
၃၂၈၊ ၃၅၂။ အညပဒတ္ထေသု ဗဟုဗ္ဗီဟိ။
အညေသံ ပဒါနံ အတ္ထေသု ဒွေ နာမာနိ ဗဟူနိ နာမာနိ ယဒါ သမသျန္တေ၊ တဒါ သော သမာသော ဗဟုဗ္ဗီဟိ သညော ဟောတိ။
အာဂတာ ¶ သမဏာ ဣမံ သင်္ဃာရာမံ သောယံ အာဂတသမဏော၊ သင်္ဃာရာမော။ ဇိတာနိ ဣန္ဒြိယာနိ အနေန သမဏေန သောယံ ဇိတိန္ဒြိယော၊ သမဏော။ ဒိန္နော သုင်္ကော ယဿ ရညော သောယံ ဒိန္နသုင်္ကော၊ ရာဇာ။ နိဂ္ဂတာ ဇနာ အသ္မာ ဂါမာ သောယံ နိဂ္ဂတဇနော၊ ဂါမော။ ဆိန္နော ဟတ္တော ယဿ ပုရိသဿ သောယံ ဆိန္နဟတ္ထော၊ ပုရိသော။ သမ္ပန္နာနိ သဿာနိ ယသ္မိံ ဇနပဒေ သောယံ သမ္ပန္နသဿော၊ ဇနပဒေါ။
နိဂြောဓဿ ပရိမဏ္ဍလော နိဂြောဓပရိမဏ္ဍလော၊ နိဂြောဓပရိမဏ္ဍလော ဣဝ ပရိမဏ္ဍလော ယော ရာဇကုမာရော သောယံ နိဂြောဓပရိမဏ္ဍလော။ အထ ဝါ နိဂြောဓပရိမဏ္ဍလော ဣဝ ပရိမဏ္ဍလော ယဿ ရာဇကုမာရဿ သောယံ နိဂြောဓပရိမဏ္ဍလော၊ ရာဇကုမာရော။
စက္ခုနော ဘူတော စက္ခုဘူတော၊ စက္ခုဘူတော ဣဝ ဘူတော ယော ဘဂဝါ သောယံ စက္ခုဘူတော၊ ဘဂဝါ။
သုဝဏ္ဏဿ ဝဏ္ဏော သုဝဏ္ဏဝဏ္ဏော၊ သုဝဏ္ဏဝဏ္ဏော ဝိယ ဝဏ္ဏော ယဿ ဘဂဝတော သောယံ သုဝဏ္ဏဝဏ္ဏော၊ ဘဂဝါ။
ဗြဟ္မုနော သရော ဗြဟ္မဿရော၊ ဗြဟ္မဿရော ဝိယ သရော ယဿ ဘဂဝတော သောယံ ဗြဟ္မဿရော၊ ဘဂဝါ။
သယံ ¶ ပတိတ ပဏ္ဏ ပုပ္ဖဖလဝါယုတောယာဟာရာတိ ပဏ္ဏဉ္စ ပုပ္ဖဉ္စ ဖလဉ္စ ပဏ္ဏပုပ္ဖဖလာနိ၊ သယမေဝ ပတိတာနိ သယံပတိတာနိ၊ သယံပတိတာနိ စ တာနိ ပဏ္ဏပုပ္ဖဖလာနိ စေတိ သယံပတိတပဏ္ဏပုပ္ဖဖလာနိ ဝါယု စ တောယဉ္စ ဝါယုတောယာနိ၊ သယံပတိတပဏ္ဏပုပ္ဖဖလာနိ စ ဝါယုတောယာနိ စ သယံပတိတပဏ္ဏပုပ္ဖဖလဝါယုတောယာနိ။ သယံပတိတပဏ္ဏပုပ္ဖဖလဝါယုတောယာနိ အာဟာရာ ယေသံ တေ သယံပတိတပဏ္ဏပုပ္ဖဖလဝါယုတောယာဟာရာ၊ ဣသယော။ ယမေတ္ထ ဝတ္တဗ္ဗံ၊ တံ ဟေဋ္ဌာ ဝုတ္တမေဝ။ အယံ ပန ဒွန္ဒကမ္မဓာရယဂဗ္ဘော တုလျာဓိကရဏပဟုဗ္ဗီဟိ။
အထ ဝါ – သယံပတိတပဏ္ဏပုပ္ဖဖလဝါယုတောယေဟိ အာဟာရာ ယေသံ တေ သယံပတိတပဏ္ဏပုပ္ဖဖလဝါယုတောယာဟာရာ။ အယံ ပန ဘိန္နာဓိကရဏဗဟုဗ္ဗီဟိ။
နာနာ ဒုမပတိတ ပုပ္ဖဝါသိတ သာနူတိ နာနာပကာရာ ဒုမာ နာနာဒုမာ၊ နာနာဒုမေဟိ ပတိတာနိ နာနာဒုမပတိ တာနိ၊ နာနာဒုမပတိတာနိ စ တာနိ ပုပ္ဖာနိ စေတိ နာနာဒုမပတိတပုပ္ဖာနိ၊ နာနာဒုမပတိတပုပ္ဖေဟိ ဝါသိတာ နာနာဒုမပတိတပုပ္ဖဝါသိတာ၊ နာနာဒုမပတိတပုပ္ဖဝါသိတာ သာနူ ယဿ ပဗ္ဗတရာဇဿ သောယံ နာနာဒုမပတိတပုပ္ဖဝါသိတသာနု၊ ပဗ္ဗတရာဇာ။ အယံ ပန ကမ္မဓာရယတပ္ပုရိသဂဗ္ဘော တုလျာဓိကရဏဗဟုဗ္ဗီဟိ။
အထ ¶ ဝါ – ဝါသိတာ သာနူ ဝါသိတသာနု၊ သာပေက္ခတ္တေ သတိပိ ဂမကတ္တာ သမာသော။ နာနာဒုမပတိတပုပ္ဖေဟိ ဝါသိတသာနူ ယဿ ပဗ္ဗတရာဇဿ သောယံ နာနာဒုမပတိတပုပ္ဖဝါသိတသာနု၊ ပဗ္ဗတရာဇာ။ အယံ ပန ဘိန္နာဓိကရဏဗဟုဗ္ဗီဟိ။
ဗျာလမ္ဗမ္ဗုဓရဗိန္ဒုစုမ္ဗိတကူဋောတိ အမ္ဗုံ ဓာရေတီတိ အမ္ဗုဓရော၊ ကော သော? ပဇ္ဇုန္နော။ ဝိဝိဓာ အာလမ္ဗော ဗျာလမ္ဗော၊ ဗျာလမ္ဗော စ သော အမ္ဗုဓရော စာတိ ဗျာလမ္ဗမ္ဗုဓရော၊ ဗျာလမ္ဗမ္ဗုဓရဿ ဗိန္ဒူ ဗျာလမ္ဗမ္ဗုဓရဗိန္ဒူ၊ ဗျာလမ္ဗမ္ဗုဓရဗိန္ဒူဟိ စုမ္ဗိတော ဗျာလမ္ဗမ္ဗုဓရဗိန္ဒုစုမ္ဗိတော၊ ဗျာလမ္ဗမ္ဗုရေဗိန္ဒုစုမ္ဗိတော ကူဋော ယဿ ပဗ္ဗတရာဇဿ သောယံ ဗျာလမ္ဗမ္ဗုဓရဗိန္ဒုစုမ္ဗိတကူဋော။ အယံ ပန ကမ္မဓာရယတပ္ပုရိသဂဗ္ဘော တုလျာဓိကရဏဗဟုဗ္ဗီဟိ။
အထ ဝါ – စုမ္ဗိတော ကူဋော စုမ္ဗိတကူဋော၊ သာပေက္ခတ္တေ သတိပိ ဂမကတ္တာ သမာသော။ ဗျာလမ္ဗမ္ဗုဓရဗိန္ဒူဟိ စုမ္ဗိတကူဋော ယဿ ပဗ္ဗတရာဇဿ သောယံ ဗျာလမ္ဗမ္ဗုဓရဗိန္ဒုစုမ္ဗိတကူဋော။ အယံ ပန ဘိန္နာဓိကရဏဗဟုဗ္ဗီဟိ။
အမိတ ဗလ ပရက္ကမဇုတီတိ န မိတာ အမိတာ၊ ဗလဉ္စ ပရက္ကမော စ ဇုတိ စ ဗလပရက္ကမဇုတိယော၊ အမိတာ ဗလပရက္ကမဇုတိယော ယဿ သောယံ အမိတဗလပရက္ကမဇုတိ၊ အယံ ပန ကမ္မဓာရယဒွန္ဒဂဗ္ဘော တုလျာဓိကရဏဗဟုဗ္ဗီဟိ။
ပီဏောရက္ခံသ ¶ ဗာဟူတိ ဥရော စ အက္ခဉ္စ အံသော စ ဗာဟု စ ဥရက္ခံသဗာဟဝေါ၊ ပီဏာ ဥရက္ခံသဗာဟဝေါ ယဿ ဘဂဝတော သောယံ ပီဏောရက္ခံသဗာဟု။ အယံ ပန ဒွန္ဒဝဗ္ဘော တုလျာဓိကရဏဗဟုဗ္ဗီဟိ။
ပီဏ ဂဏ္ဍ ဝဒန ထနူရုဇဃနာတိ ဂဏ္ဍော စ ဝဒနဉ္စ ထနော စ ဦရု စ ဇဃနဉ္စ ဂဏ္ဍဝဒနထနူရုဇဃနာ၊ ပီဏာ ဂဏ္ဍဝဒနထနူရုဇဃနာ ယဿာ သာယံ ပီဏဂဏ္ဍဝဒနထနူရုဇဃနာ။ အယမ္ပိ ဒွန္ဒဂဗ္ဘော တုလျာဓိကရဏဗဟုဗ္ဗီဟိ။
ဝဝရ သုရာသုရ ဂရုဍ မနုဇ ဘုဇဂ ဂန္ဓဗ္ဗ မကုဋ ကူဋ စုမ္ဗိတ သေလသင်္ဃဋ္ဋိတ စရဏောတိ သုရာ စ အသုရာ စ ဂရုဍာ စ မနုဇာ စ ဘုဇဂါ စ ဂန္ဓဗ္ဗာ စ သုရာသုရဂရုဍမနုဇဘုဇဂဂန္ဓဗ္ဗာ၊ ပဝရာ စ တေ သုရာသုရဂရုဍမနုဇဘုဇဂ ဂန္ဓဗ္ဗာ စေတိ ပဝရသုရာသုရဂရုဍမနုဇဘုဇဂဂန္ဓဗ္ဗာ၊ ပဝရသုရာသုရဂရုဍမနုဇဘုဇဂဂန္ဓဗ္ဗာနံ မကုဋာနိ ပဝရသုရာသုရဂရုဍမနုဇဘုဇဂဂန္ဓဗ္ဗမကုဋာနိ၊ ပဝရသုရာသုရဂရုဍမနုဇဘုဇဂဂန္ဓဗ္ဗမကုဋာနံ ကူဋာနိ ပဝရသုရာသုရဂရုဍမနုဇဘုဇဂဂန္ဓဗ္ဗမကုဋကူဋာနိ၊ ပဝရသုရာသုရဂရုဍမနုဇဘုဇဂဂန္ဓဗ္ဗမကုဋကူဋေသု စုမ္ဗိတာ ပဝရသုရာသုရဂရုဍမနုဇဘုဇဂဂန္ဓဗ္ဗမကုဋကူဋစုမ္ဗိတာ၊ ပဝရသုရာသုရဂရုဍမနုဇဘုဇဂဂန္ဓဗ္ဗမကုဋကူဋစုမ္ဗိတာ စ တေ သေလာ စာတိ ပဝရသုရာသုရဂရုဍမနုဇဘုဇဂဂန္ဓဗ္ဗမကုဋကူဋစုမ္ဗိတသေလာ၊ ပဝရသုရာသုရ ဂရုဍမနုဇဘုဇဂဂန္ဓဗ္ဗမကုဋကူဋစုမ္ဗိတသေလေဟိ သင်္ဃဋ္ဋိတာ ပဝရသုရာသုရ ဂရုဍမနုဇဘုဇဂဂန္ဓဗ္ဗမကုဋကူဋစုမ္ဗိတသေလသင်္ဃဋ္ဋိတာ၊ ပဝရသုရာသုရဂရုဍမနုဇဘုဇဂဂန္ဓဗ္ဗမကုဋကူဋစုမ္ဗိတသေလသင်္ဃဋ္ဋိတာ စရဏာ ယဿ တထာဂတဿ သောယံ ¶ ပဝရသုရာသုရဂရုဍမနုဇဘုဇဂဂန္ဓဗ္ဗမကုဋကူဋစုမ္ဗိတသေလသင်္ဃဋ္ဋိတစရဏော၊ တထာဂတော၊ အယံ ပန ဒွန္ဒကမ္မဓာရယတပ္ပုရိသဂဗ္ဘော တုလျာဓိကရဏဗဟုဗ္ဗီဟိ။
အထ ဝါ–သင်္ဃဋ္ဋိတာ စရဏာ သင်္ဃဋ္ဋိတစရဏာ၊ သာပေက္ခတ္တေ သတိပိ ဂမကတ္တာ သမာသော။ ပဝရသုရာသုရ ဂရုဍမနုဇဘုဇဂ ဂန္ဓဗ္ဗမကုဋကူဋစုမ္ဗိတသေလေဟိ သင်္ဃဋ္ဋိတစရဏာ ယဿ တထာဂတဿ သောယံ ပဝရသုရာသုရဂရုဍ မနုဇဘုဇဂ ဂန္ဓဗ္ဗမကုဋကူဋစုမ္ဗိတသေလသင်္ဃဋ္ဋိတ စရဏော။ အယံ ပန ဘိန္နာဓိကရဏဗဟုဗ္ဗီဟိ။
စတုဒ္ဒိသောတိ စတဿော ဒိသာ ယဿ သောယံ စတုဒ္ဒိသော၊ ဘဂဝါ။
ပဉ္စစက္ခူတိ ပဉ္စ စက္ခူနိ ယဿ တထာဂတဿ သောယံ ပဉ္စစက္ခု၊ တထာဂတော။
ဒသဗလောတိ ဒသ ဗလာနိ ယဿ သောယံ ဒသဗလော၊ ဘဂဝါ။
အနန္တဉာဏောတိ နဿ အန္တော အနန္တံ၊ အနန္တံ ဉာဏံ ယဿ တထာဂတဿ သောယံ အနန္တဉာဏော၊ တထာဂတော။
အမိတ ဃန သရီရောတိ န မိတံ အမိတံ၊ ဃနံ ဧဝ သရီရံ ဃနသရီရံ၊ အမိတံ ဃနသရီရံ ယဿ တထာဂတဿ သောယံ အမိတဃနသရီရော၊ တထာဂတော။
အမိတ ဗလ ပရက္ကမ ပတ္တောတိ န မိတာ အမိတာ၊ ဗလဉ္စ ပရက္ကမော စ ဗလပရက္ကမာ၊ အမိတာ ဧဝ ဗလပရက္ကမာ အမိတဗလပရက္ကမာ ¶ ၊ အမိတဗလပရက္ကမာ ပတ္တာ ယေန သောယံ အမိတဗလပရက္ကမပတ္တော၊ ဘဂဝါ။ အယံ ပန ကမ္မဓာရယဒွန္ဒဂဗ္ဘော တုလျာဓိကရဏဗဟုဗ္ဗီဟိ။
မတ္တ ဘမရ ဂဏ စုမ္ဗိတ ဝိကသိတပုပ္ဖဝလ္လိနာဂရုက္ခော ပသောဘိတ ကန္ဒရောတိ မတ္တာ ဧဝ ဘမရာ မတ္တဘမရာ၊ မတ္တဘမရာနံ ဂဏာ မတ္တဘမရဂဏာ၊ မတ္တဘမရဂဏေဟိ စုမ္ဗိတာနိ မတ္တဘမရဏစုမ္ဗိတာနိ၊ ဝိကသိတာနိ ဧဝ ပုပ္ဖာနိ ဝိကသိတပုပ္ဖာနိ၊ မတ္တဘမရဂဏစုမ္ဗိတာနိ ဝိကသိတပုပ္ဖာနိ ယေသံ တေဟိ မတ္တဘမရဂဏစုမ္ဗိတဝိကသိတပုပ္ဖာ၊ ဝလ္လိ စ နာဂရုက္ခော စ မလ္လိနာဂရုက္ခာ၊ မတ္တဘမရဂဏစုမ္ဗိတဝိကသိတပုပ္ဖာ စ တေ ဝလ္လိနာဂရုက္ခာ စေတိ မတ္တဘမရဂဏစုမ္ဗိတဝိကသိတပုပ္ဖဝလ္လိနာဂရုက္ခာ၊ မတ္တဘမရဂဏစုမ္ဗိတဝိကသိတပုပ္ဖဝလ္လိနာဂရုက္ခေဟိ ဥပသောဘိတာနိ မတ္တဘမရဂဏစုမ္ဗိတဝိကသိတပုပ္ဖဝလ္လိနာဂရုက္ခော ပသောဘိတာနိ၊ မတ္တဘမရဂဏစုမ္ဗိတဝိကသိတပုပ္ဖဝလ္လိနာဂရုက္ခော ပသောဘိတာနိ ကန္ဒရာနိ ယဿ ပဗ္ဗတရာဇဿ သောယံ မတ္တဘမရဂဏစုမ္ဗိတဝိကသိတပုပ္ဖ ဝလ္လိနာဂရုက္ခော ပသော ဘိတကန္ဒရော၊ ပဗ္ဗတရာဇာ။ အယံ ပန ဒွန္ဒကမ္မဓာရယတပ္ပုရိသဂဗ္ဘော တုလျာဓိကရဏဗဟုဗ္ဗီဟိ။
အထ ဝါ–ဥပသောဘိတာနိ ကန္ဒရာနိ ဥပသောဘိတကန္ဒရာနိ၊ သာပေက္ခတ္တေ သတိပိ ဂမကတ္တာ သမာသော။ မတ္တဘမရဂဏစုမ္ဗိတဝိကသိတပုပ္ဖဝလ္လိနာဂရုက္ခေဟိ ဥပသောဘိတကန္ဒရာနိ ယဿ ပဗ္ဗတရာဇဿ သောယံ မတ္တဘမရဂဏစုမ္ဗိတဝိကသိတပုပ္ဖဝလ္လိနာဂရုက္ခော ပသောဘိတကန္ဒရော၊ ပဗ္ဗတရာဇာ။ အယံ ပန ဘိန္နာဓိကရဏဗဟုဗ္ဗီဟိ။
နာနာ ¶ ရုက္ခ တိဏ ပတိတ ပုပ္ဖောပသောဘိတ ကန္ဒရောတိ ရုက္ခော စ တိဏဉ္စ ရုက္ခတိဏာနိ၊ နာနာ ပကာရာနိ ဧဝ ရုက္ခတိဏာနိ နာနာရုက္ခတိဏာနိ၊ နာနာရုက္ခတိဏေဟိ ပတိတာနိ နာနာရုက္ခတိဏပတိတာနိ၊ နာနာရုက္ခတိဏပတိတာနိ စ တာနိ ပုပ္ဖာနိ စေတိ နာနာရုက္ခတိဏပတိတပုပ္ဖာနိ၊ နာနာရုက္ခတိဏပတိတပုပ္ဖေဟိ ဥပသောဘိတာနိ နာနာရုက္ခတိဏပတိတ ပုပ္ဖောပသောဘိတာနိ၊ နာနာရုက္ခတိဏပတိတပုပ္ဖောပသောဘိတာနိ ကန္ဒရာနိ ယဿ ပဗ္ဗတရာဇဿ သောယံ နာနာရုက္ခတိဏပတိတပုပ္ဖောပသောဘိတကန္ဒရော၊ ပဗ္ဗတရာဇာ။ အယံ ပန ဒွန္ဒကမ္မဓာရယတပ္ပုရိသဂဗ္ဘော တုလျာဓိကရဏဗဟုဗ္ဗီဟိ။
အထ ဝါ–ဥပသောဘိတာနိ ဧဝ ကန္ဒရာနိ ဥပသောဘိတကန္ဒရာနိ၊ (သာပေက္ခတ္တေ သတိပိ ဂမကတ္တာ သမာသော။) နာနာရုက္ခတိဏပတိတပုပ္ဖေဟိ ဥပသောဘိတကန္ဒရာနိ ယဿ ပဗ္ဗတရာဇဿ သောယံ နာနာရုက္ခတိဏပတိတပုပ္ဖောပသောဘိတကန္ဒရော၊ ပဗ္ဗတရာဇာ။ အယံ ပန ဘိန္နာဓိကရဏဗဟုဗ္ဗီဟိ။
နာနာ မုသလ ဖာလ ပဗ္ဗတ တရု ကလိင်္ဂရ သရ ဓနုဂဒါသိ တောမရဟတ္ထာတိ မုသလော စ ဖာလော စ ပဗ္ဗတော စ တရု စ ကလိင်္ဂရော စ သရော စ ဓနု စ ဂဒါ စအသိ စ တောမရော၊ စ မုသလဖာလပဗ္ဗတတရုကလိင်္ဂရသရဓနုဂဒါသိတောမရာ၊ နာနာ ပကာရာ ဧဝ မုသလဖာလပဗ္ဗတတရုကလိင်္ဂရသရဓနုဂဒါသိတောမရာ နာနာမုသလဖာလပဗ္ဗတတရုကလိင်္ဂရသရဓနုဂဒါသိတောမရာ၊ နာနာမုသလဖာလပဗ္ဗတတရုကလိင်္ဂရသရဓနုဂဒါသိတောမရာ ဟတ္ထေသု ¶ ယေသံ တေ နာနာမုသလဖာလပဗ္ဗတတရုကလိင်္ဂရ သရဓနုဂဒါသိတောမရဟတ္ထာ။ အယံ ပန ဒွန္ဒကမ္မဓာရယဂဗ္ဘော ဘိန္နာဓိကရဏဗဟုဗ္ဗီဟိ။
ဗဟုဗ္ဗီဟိ ဣစ္စနေန ကွတ္ထော? ဗဟုဗ္ဗီဟိမှိ စ။
၃၂၉၊ ၃၅၇။ နာမာနံ သမုစ္စယော ဒွန္ဒော။
နာမာနံ ဧကဝိဘတ္တိကာနံ ယော သမုစ္စယော၊ သော ဒွန္ဒသညော ဟောတိ။
စန္ဒိမာ စ သူရိယော စ စန္ဒိမသူရိယာ၊ သမဏော စ ဗြာဟ္မဏော စ သမဏဗြာဟ္မဏာ၊ သာရိပုတ္တော စ မောဂ္ဂလ္လာနော စ သာရိပုတ္တမောဂ္ဂလ္လာနာ၊ ဗြာဟ္မဏော စ ဂဟပတိကော စ ဗြာဟ္မဏဂဟပတိကာ၊ ယမော စ ဝရုဏော စ ယမဝရုဏာ၊ ကုဝေရော စ ဝါသဝေါ စ ကုဝေရဝါသဝါ။
ဒွန္ဒဣစ္စနေန ကွတ္ထော? ဒွန္ဒဋ္ဌာ ဝါ။
၃၃၀၊ ၃၄၀။ မဟတံ မဟာ တုလျာဓိကရဏေ ပဒေ။
တေသံ မဟန္တသဒ္ဒါနံ မဟာအာဒေသော ဟောတိ တုလျာဓိကရဏေ ပဒေ။
မဟန္တော ¶ စ သော ပုရိသော စာတိ မဟာပုရိသော၊ မဟန္တီ စ သာ ဒေဝီ စာတိ မဟာဒေဝီ၊ မဟန္တဉ္စ တံ ဗလဉ္စာတိ မဟာဗလံ၊ မဟန္တော စ သော နာဂေါ စာတိ မဟာနာဂေါ၊ မဟန္တော စ သော ယသော စာတိ မဟာယသော၊ မဟန္တဉ္စ တံ ပဒုမဝနဉ္စာတိ မဟာပဒုမဝနံ၊ မဟန္တီ စ သာ နဒီ စာတိ မဟာနဒီ၊ မဟန္တော စ သော မဏိ စာတိ မဟာမဏိ၊ မဟန္တော စ သော ဂဟပတိကော စာတိ မဟာဂဟပတိကော၊ မဟန္တဉ္စ တံ ဓနဉ္စာတိ မဟာဓနံ၊ မဟန္တော စ သော ပုညော စာတိ မဟာပုညော။
ဗဟုဝစနဂ္ဂဟဏေန ကွစိ မဟန္တ သဒ္ဒဿ မဟာဒေသော ဟောတိ။ မဟန္တဉ္စ တံ ဖလဉ္စာတိ မဟပ္ဖလံ၊ မဟဗ္ဗလံ၊ ဧဝံ မဟဒ္ဓနံ၊ မဟဗ္ဘယံ။
၃၃၁၊ ၃၅၃။ ဣတ္ထိယံ ဘာသိတပုမိတ္ထီ ပုမာဝ စေ။
ဣတ္ထိယံ တုလျာဓိကရဏေ ပဒေ စေ ဘာသိတပုမိတ္ထီ ပုမာဝ ဒဋ္ဌဗ္ဗာ။
ဒီဃာ ဇင်္ဃာ ယဿ သောယံ ဒီဃဇင်္ဃော၊ ကလျာဏဘရိယော၊ ပဟူတပညော။
ဘာသိတပုပေတိ ¶ ကိမတ္ထံ? ဗြာဟ္မဏဗန္ဓု စ သာ ဘရိယာ စာတိဗြာဟ္မဏဗန္ဓုဘရိယာ။
ကမ္မဓာရယသညေ စ သမာသေ ဣတ္ထိယံ တုလျာဓိကရဏေ ပဒေ ပုဗ္ဗေ ဘာသိတပုမိတ္ထီ စေ၊ ပုမာဝ ဒဋ္ဌဗ္ဗာ။ ဗြာဟ္မဏဒါရိကာ၊ ခတ္တိယကညာ၊ ခတ္တိယကုမာရိကာ။
ဘာသိတပုမေတိ ကိမတ္ထံ? ခတ္တိယဗန္ဓုဒါရိကာ၊ ဗြာဟ္မဏဗန္ဓုဒါရိကာ။
နဿ ပဒဿ တပ္ပုရိသေ ဥတ္တရပဒေ အတ္တံ ဟောတိ။
နဗြာဟ္မဏော အဗြာဟ္မဏော၊ အဝသလော၊ အဘိက္ခု၊ အပဉ္စဝဿံ၊ အပဉ္စဂဝံ။
နဿ ပဒဿ တပ္ပုရိသေ အန အာဒေသော ဟောတိ သရေ ပရေ။
န အဿော အနဿော၊ အနိဿရော၊ အနရိယော။
၃၃၅၊ ၃၄၆။ ကဒ ¶ ကုဿ။
ကုဣစ္စေတဿ ကဒ ဟောတိ သရေ ပရေ။
ကုစ္ဆိတံ အန္နံ ကဒန္နံ၊ ကုစ္ဆိတံ အသနံ ကဒဿနံ။
သရေတိ ကိမတ္ထံ? ကုစ္ဆိတာ ဒါရာ ယေသံ (အပုညကာရာနံ) တေ ဟောန္တီတိ ကုဒါရာ၊ ကုဇနာ။ ဧဝံ ကုပုတ္တာ၊ ကုဂေဟာ၊ ကုဝတ္ထာ၊ ကုဒါသာ။
ကုဣစ္စေတဿ ကာ ဟောတိ အပ္ပတ္ထေသု စ။
ကာလဝဏံ၊ ကာပုပ္ဖံ။
ဗဟုဝစနဂ္ဂဟဏံ ကိမတ္ထံ? ကုဣစ္စေတဿ အနပ္ပတတ္ထေသုပိ ကွစိ ကာ ဟောတိ၊ ကာပုရိသာ။
၃၃၇၊ ၃၅၀။ ကွစိ သမာသန္တဂတာနမကာရန္တော။
သမာသန္တဂတာနံ နာမာနမန္တော သရော ကွစိ အကာရော ဟောတိ။
ဒေဝါနံ ရာဇာ ဒေဝရာဇော၊ ဒေဝရာဇာ၊ ဒေဝါနံ သခါ ဒေဝသခေါ၊ ဒေဝသခါ၊ ပဉ္စ အဟာနိ ပဉ္စာဟံ၊ သတ္တာဟံ၊ ပဉ္စဂဝံ၊ ဆတ္တုပါဟနံ၊ ဥပသရဒံ၊ ဝိသာလက္ခော၊ ဝိမုခေါ။
ကာရဂ္ဂဟဏံ ¶ ကိမတ္ထံ? အာကာရန္တ ဣကာရန္တာ စ ဟောန္တိ၊ ပစ္စက္ခာ ဓမ္မာ ယဿ သောယန္တိ ပစ္စက္ခဓမ္မာ၊ သုရဘိနော ဂန္ဓော သုရဘိဂန္ဓိ၊ သုန္ဒရော ဂန္ဓော သုဂန္ဓိ၊ ပူတိနော ဂန္ဓော ပူတိဂန္ဓိ၊ ကုစ္ဆိတော ဂန္ဓော ကုဂန္ဓိ၊ ဒုဋ္ဌု ဂန္ဓော ယဿ သောယန္တိ ဒုဂန္ဓိ၊ ပူတိ ဧဝ ဂန္ဓော ပူတိဂန္ဓိ။
နဒီအန္တာ စ ကတ္တုအန္တာ စ ကပစ္စယော ဟောတိ သမာသန္တေ။
ဗဟူ နဒိယော ယသ္မိံ သောယံ ဗဟုနဒိကော၊ ဇနပဒေါ။ ဗဟဝေါ ကတ္တာရော ယဿ သောယံ ဗဟုကတ္တုကော၊ ပုရိသော။
နဒိမှာ စ ကပစ္စယော ဟောတိ သမာသန္တေ။
ဗဟူ နဒိယော ယသ္မိံ သောယန္တိ ဗဟုနဒိကော။ ဗဟူ ကန္တိယော ယဿ သောယန္တိ ဗဟုကန္တိကော။ ဗဟုနာရိကော။
၃၃၉၊ ၃၅၈။ ဇာယာယ တုဒံ ဇာနိ ပတိမှိ။
ဇာယာဣစ္စေတာယ တုဒံ ဇာနိဣစ္စေတေ အာဒေသာ ဟောန္တိ ပတိမှိ ပရေ။
တုဒံပတီ၊ ဇာနိပတီ။
ဓနုမှာ စ အာပစ္စယော ဟောတိ သမာသန္တေ။
ဂါဏ္ဍီဝေါ ¶ ဓနု ယဿ သောယံ ဂါဏ္ဍီဝဓနွာ။
၃၄၁၊ ၃၃၆။ အံ ဝိဘတ္တီနမကာရန္တာ အဗျယီဘာဝါ။
တသ္မာ အကာရန္တာ အဗျယီဘာဝသမာသာ ပရာသံ ဝိဘတ္တီနံ ကွစိ အံ ဟောတိ။
အဓိစိတ္တံ၊ ယထာဝုဍ္ဎံ၊ ဥပကုမ္ဘံ၊ ယာဝဇီဝံ၊ တိရောပဗ္ဗတံ၊ တိရောပါကာရံ၊ တိရောကုဋ္ဋံ၊ အန္တောပါသာဒံ။
ကွစီတိ ကိမတ္ထံ? အဓိစိတ္တဿ ဘိက္ခုနော။
နပုံသကေ ဝတ္တမာနဿ အဗျယီဘာဝသမာသဿ လိင်္ဂဿ သရော ရဿော ဟောတိ။
ကုမာရီသု အဓိကိစ္စ ပဝတ္တတိ ကထာ ဣတိ အဓိကုမာရိ။ ဥပဝဓု၊ ဥပဂင်္ဂံ၊ ဥပမဏိကံ။
အညသ္မာ အဗျယီဘာဝသမာသာ အနကာရန္တာ ပရာသံ ဝိဘတ္တီနံ လောပေါ စ ဟောတိ။
အဓိတ္ထိ၊ အဓိကုမာရိ၊ ဥပဝဓု။
ဣတိ နာမကပ္ပေ သမာသကပ္ပော သတ္တမော ကဏ္ဍော။
သမာသကပ္ပော နိဋ္ဌိတော။