📜
၅။ တဒ္ဓိတကပ္ပ
အဋ္ဌမကဏ္ဍ
၃၄၄၊ ၃၆၁။ ဝါဏ’ပစ္စေ ¶ ။
ဏပစ္စယော ဟောတိ ဝါ ‘‘တဿာပစ္စ’’ မိစ္စေတသ္မိံ အတ္ထေ။
ဝသိဋ္ဌဿ အပစ္စံ ဝါသိဋ္ဌော၊ ဝသိဋ္ဌဿ အပစ္စံ ဝါ၊ ဝသိဋ္ဌဿ အပစ္စံ ဝါသိဋ္ဌီ၊ ဝသိဋ္ဌဿ အပစ္စံ ဝါသိဋ္ဌံ။ ဧဝံ ဘာရဒွါဇော၊ ဘာရဒွါဇီ၊ ဘာရဒွါဇံ။ ဂေါတမော၊ ဂေါတမီ၊ ဂေါတမံ။ ဝါသုဒေဝေါ၊ ဝါသုဒေဝီ၊ ဝါသုဒေဝံ။ ဗာလဒေဝေါ၊ ဗာလဒေဝီ၊ ဗာလဒေဝံ။ ဝေသာမိတ္တော၊ ဝေသာမိတ္တီ ဝေသာမိတ္တံ။
၃၄၅၊ ၃၆၆။ ဏာယန ဏာန ဝစ္ဆာဒိတော။
တသ္မာ ဝစ္ဆာဒိတော ဂေါတ္တဂဏတော ဏာယနဏာနပစ္စယာ ဟောန္တိ ဝါ ‘‘တဿာပစ္စ’’မိစ္စေတသ္မိံ အတ္ထေ။
ဝစ္ဆဿ အပစ္စံဝစ္ဆာယနော၊ ဝစ္ဆာနော၊ ဝစ္ဆဿ အပစ္စံ ဝါ၊ ဝစ္ဆဿ အပစ္စံ ဝစ္ဆာယနီ၊ ဝစ္ဆာနီ၊ ဝစ္ဆဿ အပစ္စံ ဝစ္ဆာယနံ၊ ဝစ္ဆာနံ။ သကဋဿ အပစ္စံ သာကဋာယနော၊ သာကဋာနော ¶ ၊ သကဋဿ အပစ္စံ ဝါ၊ သာကဋာယနီ၊ သာ ကဋာနီ၊ သာကဋာယနံ၊ သာကဋာနံ။ ဧဝံ ကဏှာယနော၊ ကဏှာနော၊ ကဏှဿ အပစ္စံ ဝါ။ ကဏှာယနီ၊ ကဏှာနီ၊ ကဏှာယနံ၊ ကဏှာနံ။ အဂ္ဂိဝေဿာယနော၊ အဂ္ဂိဝေဿာနော၊ အဂ္ဂိဝေဿာယနီ၊ အဂ္ဂိဝေဿာနီ၊ အဂ္ဂိဝေဿာယနံ၊ အဂ္ဂိဝေဿာနံ။ ဂစ္ဆာယနော၊ ဂစ္ဆာနော၊ ဂစ္ဆာယနီ၊ ဂစ္ဆာနီ၊ ဂစ္ဆာယနံ၊ ဂစ္ဆာနံ။ ကပ္ပာယနော၊ ကပ္ပာနော၊ ကပ္ပာယနီ၊ ကပ္ပာနီ၊ ကပ္ပာယနံ၊ ကပ္ပာနံ။ မောဂ္ဂလ္လာယနော၊ မောဂ္ဂလ္လာနော၊ မောဂ္ဂလ္လာယနီ၊ မောဂ္ဂလ္လာနီ၊ မောဂ္ဂလ္လာယနံ၊ မောဂ္ဂလ္လာနံ။ မုဉ္စာယနော၊ မုဉ္စာနော၊ မုဉ္စာယနီ၊ မုဉ္စာနီ၊ မုဉ္စာယနံ၊ မုဉ္စာနံ။ သင်္ဃာယနော၊ သင်္ဃာနော၊ သင်္ဃာယနီ၊ သင်္ဃာနီ၊ သင်္ဃာယနံ၊ သင်္ဃာနံ။ လောမာယနော၊ လောမာနော၊ လောမာယနီ၊ လောမာနီ၊ လောမာယနံ၊ လောမာနံ၊ သာကမာယနော၊ သာကမာနော၊ သာကမာယနီ၊ သာကမာနီ၊ သာကမာယနံ၊ သာကမာနံ။ နာရာယနော၊ နာရာနော၊ နာရာယနီ၊ နာရာနီ၊ နာရာယနံ၊ နာရာနံ။ စောရာယနောစောရာနော၊ စောရာယနီ၊ စောရာနီ၊ စောရာယနံ၊ စောရာနံ၊ အာဝသာလာယနော၊ အာဝသာလာနော၊ အာဝသာလာယနီ၊ အာဝသာလာနီ၊ အာဝသာလာယနံ၊ အာဝသာလာနံ။ ဒွေပါယနော၊ ဒွေပါနော၊ ဒွေပါယနီ၊ ဒွေပါနီ၊ ဒွေပါယနံ၊ ဒွေပါနံ။ ကုဉ္စာယနော၊ ကုဉ္စာနော၊ ကုဉ္စာယနီ၊ ကုဉ္စာနီ၊ ကုဉ္စာယနံ၊ ကုဉ္စာနံ။ ကစ္စာယနော၊ ကစ္စာနော၊ ကစ္စာယနီ၊ ကစ္စာနီ၊ ကစ္စာယနံ၊ ကစ္စာနံ။
၃၄၆၊ ၃၆၇။ ဏေယျော ¶ ကတ္တိကာဒီဟိ။
တေဟိ ဂေါတ္တဂဏေဟိ ကတ္တိကာဒီဟိ ဏေယျပစ္စယော ဟောတိ ဝါ ‘‘တဿာပစ္စ’’မိစ္စေတသ္မိံ အတ္ထေ။
ကတ္တိကာယ အပစ္စံ ကတ္တိကေယျော၊ ကတ္တိကာယ အပစ္စံ ဝါ။ ဧဝံ ဝေနတေယျော၊ ရောဟိဏေယျော၊ ဂင်္ဂေယျော၊ ကဒ္ဒမေယျော၊ နာဒေယျော၊ အာလေယျော၊ အာဟေယော၊ ကာမေယျော၊ သုစိယာ အပစ္စံ သောစေယျော၊ သာလေယျော၊ ဗာလေယျော၊ မာလေယျော၊ ကာလေယျော။
တသ္မာ အကာရတော ဏိပစ္စယော ဟောတိ ဝါ ‘‘တဿာပစ္စ’’မိစ္စေတသ္မိံ အတ္ထေ။
ဒက္ခဿ အပစ္စံ ဒက္ခိ၊ ဒက္ခဿ အပစ္စံ ဝါ။ ဒုဏဿ အပစ္စံ ဒေါဏိ၊ ဒုဏဿ အပစ္စံ ဝါ၊ ဧဝံ ဝါသဝိ၊ သကျပုတ္တိ၊ နာဋပုတ္တိ၊ ဒါသပုတ္တိ၊ ဒါသဝိ၊ ဝါရုဏိ၊ ဂဏ္ဍိ၊ ဗာလဒေဝိ၊ ပါဝကိ၊ ဇေနဒတ္တိ၊ ဗုဒ္ဓိ၊ ဓမ္မိ၊ သင်္ဃိ၊ ကပ္ပိ၊ အနုရုဒ္ဓိ။
ဝါတိ ဝိကပ္ပနတ္ထေန ဏိကပစ္စယော ဟောတိ ‘‘တဿာပစ္စ’’မိစ္စေတသ္မိံ အတ္ထေ။ သကျပုတ္တဿ အပစ္စံ သကျပုတ္တိကော။ ဧဝံ နာဋပုတ္တိကော၊ ဇေနဒတ္တိကော။
၁၄၈၊ ၃၇၁။ ဏဝေါ’ ¶ ပကွာဒီဟိ။
ဥပကုဣစ္စေဝမာဒီဟိ ဏဝပစ္စယော ဟောတိ ဝါ ‘‘တဿာပစ္စ’’မိစ္စေတသ္မိံ အတ္ထေ။
ဥပကုဿ အပစ္စံ ဩပကဝေါ၊ ဥပကုဿ အပစ္စံ ဝါ။ မနုနော အပစ္စံ မာနဝေါ၊ မနုနော အပစ္စံ ဝါ။ ဘဂ္ဂုဿ အပစ္စံ ဘဂ္ဂဝေါ၊ ဘဂ္ဂုဿ အပစ္စံ ဝါ၊ ပဏ္ဍုဿ အပစ္စံ ပဏ္ဍဝေါ၊ ပဏ္ဍုဿ အပစ္စံ ဝါ၊ ဗဟုဿ အပစ္စံ ဗာဟဝေါ၊ ဗဟုဿ အပစ္စံ ဝါ။
တသ္မာ ဝိဓဝါဒိတော ဏေရပစ္စယော ဟောတိ ဝါ ‘‘တဿာပစ္စ’’မိစ္စေတသ္မိံ အတ္ထေ။
ဝိဓဝါယ အပစ္စံ ဝေဓဝေရော၊ ဝိဓဝါယ အပစ္စံ ဝါ။ ဗန္ဓုကိယာ အပစ္စံ ဗန္ဓုကေရော၊ ဗန္ဓုကိယာ အပစ္စံ ဝါ။ သမဏဿ အပစ္စံ သာမဏေရော၊ သမဏဿ အပစ္စံ ဝါ။ ဧဝံ သာမဏေရီ၊ သာမဏေရံ၊ နာဠိကေရော၊ နာဠိကေရီ၊ နာဠိကေရံ။
၃၅၀၊ ၃၇၃။ ယေန ဝါ သံသဋ္ဌံ တရတိ စရတိ ဝဟတိ ဏိကော။
ယေန ဝါ သံသဋ္ဌံ၊ ယေန ဝါ တရတိ၊ ယေန ဝါ စရတိ၊ ယေန ဝါ ဝဟတိ ဣစ္စေတေသွတ္ထေသု ဏိကပစ္စယော ဟောတိ ဝါ။
တိလေန ¶ သံသဋ္ဌံ ဘောဇနံ တေလိကံ၊ တိလေန သံသဋ္ဌံ ဝါ။ ဧဝံ ဂေါဠိကံ၊ ဃာတိကံ။
နာဝါယ တရတီတိ နာဝိကော၊ နာဝါယ တရတိ ဝါ။ ဧဝံ ဩဠုမ္ပိကော။
သကဋေန စရတီတိ သာကဋိကော၊ သကဋေန စရတိ ဝါ။ ဧဝံ ပတ္တိကော၊ ဒဏ္ဍိကော၊ ဓမ္မိကော၊ ပါဒိကော။
သီသေန ဝဟတီတိ သီသိကော၊ သီသေန ဝဟတိ ဝါ။ အံသေန ဝဟတီတိ အံသိကော၊ အံသေန ဝဟတိ ဝါ။ ဧဝံ ခန္ဓိကော၊ အင်္ဂုလိကော။
ဝါတိ ဝိကပ္ပနတ္ထေန အညေသုပိ ဏိကပစ္စယော ဟောတိ။ ရာဇဂဟေ ဝသတီတိ ရာဇဂဟိကော၊ ရာဇဂဟေ ဝသတိ ဝါ။ ရာဇဂဟေ ဇာတော ရာဇဂဟိကော၊ ရာဇဂဟေ ဇာတော ဝါ။ ဧဝံ မာဂဓိကော၊ သာဝတ္ထိကော၊ ကာပိလ ဝတ္ထိကော၊ ပါဋလိပုတ္တိကော၊ ဝေသာလိကော။
၃၅၁၊ ၃၇၄။ တမဓီတေ တေနကတာဒိ သန္နိဓာန နိယောဂ သိပ္ပ ဘဏ္ဍ ဇီဝိကတ္ထေသု စ။
တမဓီတေ၊ တေနကတာဒိအတ္ထေ၊ တမှိ သန္နိဓာနာ၊ တတ္ထ နိယုတ္တော၊ တမဿ သိပ္ပံ၊ တမဿ ဘဏ္ဍံ၊ တမဿ ဇီဝိကံ ဣစ္စေတေသွတ္ထေသု စ ဏိကပစ္စယော ဟောတိ ဝါ။
ဝိနယမဓီတေ ¶ ဝေနယိကော၊ ဝိနယမဓီတေ ဝါ။ ဧဝံ သုတ္တန္တိကော၊ အာဘိဓမ္မိကော၊ ဝေယျာကရဏိကော။
ကာယေန ကတံ ကမ္မံ ကာယိကံ၊ ကာယေန ကတံ ကမ္မံ ဝါ။ ဧဝံ ဝါစသိကံ၊ မာနသိကံ။
သရီရေ သန္နိဓာနာ ဝေဒနာ သာရီရိကာ၊ သရီရေ သန္နိဓာနာ ဝါ၊ ဧဝံ မာနသိကာ။
ဒွါရေ နိယုတ္တော ဒေါဝါရိကော၊ ဒွါရေ နိယုတ္တော ဝါ။ ဧဝံ ဘဏ္ဍာဂါရိကော၊ နာဂရိကော၊ နာဝကမ္မိကော။
ဝီဏာ အဿ သိပ္ပံ ဝေဏိကော၊ ဝီဏာ အဿ သိပ္ပံ ဝါ။ ဧဝံ ပါဏဝိကော၊ မောဒိင်္ဂိကော၊ ဝံသိကော။
ဂန္ဓော အဿ ဘဏ္ဍံ ဂန္ဓိကော၊ ဂန္ဓော အဿ ဘဏ္ဍံ ဝါ။ ဧဝံ တေလိကော၊ ဂေါဠိကော။
ဥရဗ္ဘံ ဟန္တွာ ဇီဝတီတိ ဩရဗ္ဘိကော၊ ဥရဗ္ဘံ ဟန္တွာ ဇီဝတိ ဝါ။ မဂံ ဟန္တွာ ဇီဝတီတိ မာဂဝိကော၊ မဂံ ဟန္တွာ ဇီဝတိ ဝါ။ ဧဝံ သောကရိကော၊ သာကုဏိကော။
အာဒိဂ္ဂဟဏေန အညတ္ထာပိ ဏိက ပစ္စယော ယောဇေတဗ္ဗော။ ဇာလေန ဟတော ဇာလိကော၊ ဇာလေန ဟတော ဝါ။
သုတ္တေန ဗန္ဓော သုတ္တိကော၊ သုတ္တေန ဗန္ဓော ဝါ။
စာပေါ ¶ အဿ အာဝုဓော စာပိကော၊ စာပေါ အဿ အာဝုဓော ဝါ။ ဧဝံ တောမရိကော၊ မုဂ္ဂရိကော၊ မောသလိကော။
ဝါတော အဿ အာဗာဓော ဝါတိကော၊ ဝါတော အဿ အာဗာဓော ဝါ။ ဧဝံ သေမှိကော၊ ပိတ္တိကော။
ဗုဒ္ဓေ ပသန္နော ဗုဒ္ဓိကော၊ ဗုဒ္ဓေ ပသန္နော ဝါ။ ဧဝံ ဓမ္မိကော၊ သင်္ဃိကော။
ဗုဒ္ဓဿ သန္တကံ ဗုဒ္ဓိကံ၊ ဗုဒ္ဓဿ သန္တကံ ဝါ။ ဧဝံ ဓမ္မိကံ၊ သင်္ဃိကံ။
ဝတ္ထေန ကီတံ ဘဏ္ဍံ ဝတ္ထိကံ၊ ဝတ္ထေန ကီတံ ဘဏ္ဍံ ဝါ။ ဧဝံ ကုမ္ဘိကံ၊ ဖာလိကံ၊ ကိံ ကဏိကံ၊ သောဝဏ္ဏိကံ။
ကုမ္ဘော အဿ ပရိမာဏံ ကုမ္ဘိကံ၊ ကုမ္ဘော အဿ ပရိမာဏံ ဝါ။
ကုမ္ဘဿ ရာသိ ကုမ္ဘိကံ၊ ကုမ္ဘဿ ရာသိ ဝါ။
ကုမ္ဘံ အရဟတီတိ ကုမ္ဘိကော၊ ကုမ္ဘံ အရဟတိ ဝါ။
အက္ခေန ဒိဗ္ဗတီတိ အက္ခိကော၊ အက္ခေန ဒိဗ္ဗတိ ဝါ။ ဧဝံ သာလာကိကော၊ တိန္ဒုကိကော၊ အမ္ဗဖလိကော။ ကပိဋ္ဌဖလိကော၊ နာဠိကေရိကော ဣစ္စေဝမာဒိ။
၃၅၂၊ ၃၇၆။ ဏ ရာဂါ တဿေ ဒမညတ္ထေသု စ။
ဏပစ္စယော ဟောတိ ဝါ ရာဂမှာ ‘‘တေန ရတ္တံ’’ ဣစ္စေတသ္မိံ အတ္ထေ၊ ‘‘တဿေဒံ’’ အညတ္ထေသု စ။
ကသာဝေန ¶ ရတ္တံ ဝတ္ထံ ကာသာဝံ၊ ကသာဝေန ရတ္တံ ဝတ္ထံ ဝါ။ ဧဝံ ကောသုမ္ဘံ၊ ဟာလိဒ္ဒံ၊ ပါဋင်္ဂံ၊ ရတ္တင်္ဂ၊ မဉ္ဇိဋ္ဌံ၊ ကုင်္ကုမံ။
သူကရဿ ဣဒံ မံသံ သောကရံ၊ သူကရဿ ဣဒံ မံသံ ဝါ။ ဧဝံ မာဟိသံ။
ဥဒုမ္ဗရဿ အဝိဒူရေ ပဝတ္တံ ဝိမာနံ ဩဒုမ္ဗရံ၊ ဥဒုမ္ဗရဿ အဝိဒူရေ ပဝတ္တံ ဝိမာနံ ဝါ။
ဝိဒိသာယ အဝိဒူရေ နိဝါသော ဝေဒိသော၊ ဝိဒိသာယ အဝိဒူရေ နိဝါသော ဝါ။
မထုရာယ ဇာတော မာထုရော၊ မထုရာယ ဇာတော ဝါ။
မထုရာယ အာဂတော မာထုရော၊ မထုရာယ အာဂတော ဝါ။
ကတ္တိကာယ နိယုတ္တော မာသော ကတ္တိကော၊ ကတ္တိကာယ နိယုတ္တော မာသော ဝါ။ ဧဝံ မာဂသိရော၊ ဖုဿော၊ မာဃော၊ ဖဂ္ဂုနော၊ စိတ္တော၊ ဝေသာခေါ၊ ဇေဋ္ဌော၊ အာသဠှော၊ သာဝဏော၊ ဘဒ္ဒေါ၊ အဿယုဇော။
န ဝုဒ္ဓိ နီလပီတာဒေါ၊ ပစ္စယေ သဏကာရကေ။
ဖကာရော ဖုဿသဒ္ဒဿ၊ ‘‘သိရော’’တိ သိရသံ ဝဒေ။
သိက္ခာနံ ¶ သမူဟော သိက္ခော၊ ဘိက္ခာနံ သမူဟော ဘိက္ခော။ ဧဝံ ကာပေါတော၊ မာယူရော၊ ကောကိလော။
ဗုဒ္ဓေ၊ အဿ ဒေဝတာ ဗုဒ္ဓါ။ ဧဝံ ဘဒ္ဒေါ၊ မာရော၊ မာဟိန္ဒော၊ ဝေဿဝဏော၊ ယာမော၊ သောမော၊ နာရာယဏော။
သံဝစ္ဆရမဓီတေ သံဝစ္ဆရော။ ဧဝံ မောဟုတ္တော၊ နေမိတ္တော၊ အင်္ဂဝိဇ္ဇော၊ ဝေယျာကရဏော၊ ဆန္ဒော၊ ဘာဿော၊ စန္ဒော။
ဝသာဒါနံ ဝိသယော ဒေသော ဝါသာဒေါ။ ဧဝံ ကုမ္ဘော၊ သာကုန္တော၊ အာတိသာရော။
ဥဒုမ္ဗရာ အသ္မိံ ပဒေသေ သန္တီတိ ဩဒုမ္ဗရော။ သာဂရေဟိ နိဗ္ဗတ္တော သာဂရော။ သာဂလမဿ နိဝါသော သာဂလော။ မထုရာ အဿ နိဝါသော မာထုရော။ မထုရာယ ဣဿရော မာထုရော။ ဣစ္စေဝမာဒယော ယောဇေတဗ္ဗာ။
ဇာတဣစ္စေဝမာဒီနမတ္ထေ ဣမဣယပစ္စယာ ဟောန္တိ။
ပစ္ဆာ ဇာတော ပစ္ဆိမော။ ဧဝံ အန္တိမော၊ မဇ္ဈိမော၊ ပုရိမော၊ ဥပရိမော၊ ဟေဋ္ဌိမော၊ ဂေါပ္ဖိမော။ ဗောဓိသတ္တဇာတိယာ ဇာတော ဗောဓိသတ္တဇာတိယော၊ ဧဝံ ¶ အဿဇာတိယော၊ ဟတ္ထိဇာတိယော၊ မနုဿဇာတိယော။
အာဒိဂ္ဂဟဏေန နိယုတ္တတ္ထာဒိတောပိ တဒဿတ္ထာဒိတောပိ ဣမ ဣယ ဣက ဣစ္စေတေ ပစ္စယာ ဟောန္တိ။ အန္တော နိယုတ္တော အန္တိမော။ ဧဝံ အန္တိယော၊ အန္တိကော။
ပုတ္တော အဿ အတ္ထိ၊ တသ္မိံ ဝါ ဝိဇ္ဇတီတိ ပုတ္တိမော။ ဧဝံ ပုတ္တိယေဝ၊ ပုတ္တိကော၊ ကပ္ပိမော၊ ကပ္ပိယော၊ ကပ္ပိကော။
စဂ္ဂဟဏေန ကိယပစ္စယော ဟောတိ နိယုတ္တတ္ထေ။ ဇာတိယံ နိယုတ္တော ဇာတိကိယော၊ အန္ဓေ နိယုတ္တော အန္ဓကိယော၊ ဇာတိယာ အန္ဓော ဇစ္စန္ဓော၊ ဇစ္စန္ဓေ နိယုတ္တော ဇစ္စန္ဓကိယော။
သမူဟတ္ထေ ကဏ ဏဣစ္စေတေ ပစ္စယာ ဟောန္တိ။
ရာဇပုတ္တာနံ သမူဟော ရာဇပုတ္တကော။ ဧဝံ ရာဇပုတ္တော၊ မာနုဿကော၊ မာနုဿော၊ မာယူရကော၊ မာယူရော၊ မာဟိံသကော၊ မာဟိံသော။
၃၅၅၊ ၃၈၀။ ဂါမ ဇန ဗန္ဓု သဟာယာဒီဟိတာ။
ဂါမ ဇန ဗန္ဓု သဟာယဣစ္စေဝမာဒီဟိ တာပစ္စယော ဟောတိ သမူဟတ္ထေ။
ဂါမာနံ ¶ သမူဟော ဂါမတာ။ ဧဝံ ဇနတာ၊ ဗန္ဓုတာ၊ သဟာယတာ၊ နဂရတာ။
‘‘တဒဿ ဌာန’’ မိစ္စေတသ္မိံ အတ္ထေ ဣယပစ္စယော ဟောတိ။
မဒနဿ ဌာနံ မဒနိယံ၊ ဗန္ဓနဿ ဌာနံ ဗန္ဓနိယံ၊ မုစ္ဆနဿ ဌာနံ မုစ္ဆနိယံ၊ ဧဝံ ရဇနိယံ၊ ကမနိယံ၊ ဂမနိယံ၊ ဒုဿနိယံ၊ ဒဿနိယံ။
ဥပမတ္ထေ အာယိတတ္တပစ္စယော ဟောတိ။
ဓူမော ဝိယ ဒိဿတိ အဒုံ ဝနံ တဒိဒံ ဓူမာယိတတ္တံ၊ တိမိရံ ဝိယ ဒိဿတိ အဒုံ ဝနံ တဒိဒံ တိမိရာယိတတ္တံ။
‘‘တန္နိဿိတတ္ထေ၊ တဒဿ ဌာန’’မိစ္စေတသ္မိံ အတ္ထေ စ လပစ္စယော ဟောတိ။
ဒုဋ္ဌု ¶ နိဿိတံ ဒုဋ္ဌုလ္လံ၊ ဝေဒံ နိဿိတံ ဝေဒလ္လံ၊ ဒုဋ္ဌု ဌာနံ ဒုဋ္ဌုလ္လံ၊ ဝေဒဿ ဌာနံ ဝေဒလ္လံ။
အာလုပစ္စယော ဟောတိ တဗ္ဗဟုလတ္ထေ။
အဘိဇ္ဈာ အဿ ပကတိ အဘိဇ္ဈာလု၊ အဘိဇ္ဈာ အဿ ဗဟုလာ ဝါ အဘိဇ္ဈာလု။ ဧဝံ သီတာလု၊ ဓဇာလု၊ ဒယာလု။
ဏျတ္တတာဣစ္စေတေ ပစ္စယာ ဟောန္တိ ဘာဝတ္ထေ။
အလသဿ ဘာဝေါ အာလသျံ၊ အရောဂဿ ဘာဝေါ အာရောဂျံ။ ပံသုကူလိကဿ ဘာဝေါ ပံသုကူလိကတ္တံ၊ အနောဒရိကဿ ဘာဝေါ အနောဒရိကတ္တံ။ သင်္ဂဏိကာရာမဿ ဘာဝေါ သင်္ဂဏိကာရာမတာ၊ နိဒ္ဒါရာမဿ ဘာဝေါ နိဒ္ဒါရာမတာ။
တုဂ္ဂဟဏေန တ္တနပစ္စယော ဟောတိ။ ပုထုဇ္ဇနတ္တနံ၊ ဝေဒနတ္တနံ။
၃၆၁၊ ၃၈၈။ ဏ ¶ ဝိသမာဒီဟိ။
ဏပစ္စယော ဟောတိ ဝိသမာဒီဟိ ‘‘တဿ ဘာဝေါ’’ဣစ္စေတသ္မိံ အတ္ထေ။
ဝိသမဿ ဘာဝေါ ဝေသမံ၊ သုစိဿ ဘာဝေါ သောစံ။
ရမဏီယဣစ္စေဝမာဒိတော ကဏ ပစ္စယော ဟောတိ ‘‘တဿ ဘာဝေါ’’ဣစ္စေတသ္မိံ အတ္ထေ။
ရမဏီယဿ ဘာဝေါ ရာမဏီယကံ၊ မနုညဿ ဘာဝေါ မာနုညကံ။
၃၆၃၊ ၃၉၀။ ဝိသေသေ တရတမိသိကိယိဋ္ဌာ။
ဝိသေသတ္ထေ တရ တမ ဣသိက ဣယ ဣဋ္ဌဣစ္စေတေ ပစ္စယာ ဟောန္တိ။
သဗ္ဗေ ဣမေ ပါပါ၊ အယမိမေသံ ဝိသေသေန ပါပေါတိ ပါပတရော။ ဧဝံ ပါပတမော၊ ပါပိသိကော၊ ပါပိယော၊ ပါပိဋ္ဌော။
‘‘တဒဿတ္ထိ’’ဣစ္စေတသ္မိံ အတ္ထေ ဝီပစ္စယော ဟောတိ။
မေဓာ ¶ ယဿ အတ္ထိ၊ တသ္မိံ ဝါ ဝိဇ္ဇတီတိမေဓာဝီ။ ဧဝံ မာယာဝီ။
စဂ္ဂဟဏေန သောပစ္စယော ဟောတိ။ သုမေဓာ ယဿ အတ္ထိ၊ တသ္မိံ ဝါ ဝိဇ္ဇတီတိ သုမေဓသော။
တပါဒိတော သီပစ္စယော ဟောတိ ‘‘တဒဿတ္ထိ’’ဣစ္စေတသ္မိံ အတ္ထေ။
တပေါ ယဿ အတ္ထိ တသ္မိံ ဝါ ဝိဇ္ဇတီတိ တပဿီ။ ဧဝံ ယသဿီ၊ တေဇဿီ။
ဒဏ္ဍာဒိတော ဣက ဤဣစ္စေတေ ပစ္စယာ ဟောန္တိ ‘‘တဒဿတ္ထိ’’ဣစ္စေတသ္မိံ အတ္ထေ။
ဒဏ္ဍော ယဿ အတ္ထိ၊ တသ္မိံ ဝါ ဝိဇ္ဇတီတိ ဒဏ္ဍိကော၊ ဒဏ္ဍီ။ ဧဝံ မာလိကော၊ မာလီ။
မဓုဣစ္စေဝမာဒိတော ရပစ္စယော ဟောတိ ‘‘တဒဿတ္ထိ’’ဣစ္စေတသ္မိံ အတ္ထေ။
မဓု ¶ ယဿ အတ္ထိ၊ တသ္မိံ ဝါ ဝိဇ္ဇတီတိ မဓုရော။ ဧဝံ ကုဉ္ဇရော၊ မုဂ္ဂရော၊ မုခရော၊ သုသိရော၊ (သီသရော၊ သုကရော၊ သုင်္ကရော)၊ သုဘရော၊ သုစိရော၊ ရုစိရော။
ဂုဏဣစ္စေဝမာဒိတော ဝန္တုပစ္စယော ဟောတိ ‘‘တဒဿတ္ထိ’’ဣစ္စေတသ္မိံ အတ္ထေ။
ဂုဏော ယဿ အတ္ထိ၊ တသ္မိံ ဝါ ဝိဇ္ဇတီတိ ဂုဏဝါ။ ဧဝံ ယသဝါ၊ ဓနဝါ၊ ပညဝါ၊ ဗလဝါ၊ ဘဂဝါ။
သတိဣစ္စေဝမာဒီဟိ မန္တုပစ္စယောဟောတိ ‘‘တဒဿတ္ထိ’’ ဣစ္စေတသ္မိံ အတ္ထေ။
သတိ ယဿ အတ္ထိ၊ တသ္မိံ ဝါ ဝိဇ္ဇတီတိ သတိမာ၊ ဧဝံ ဇုတိမာ၊ ရုစိမာ၊ ထုတိမာ၊ ဓိတိမာ၊ မတိမာ၊ ဘာဏုမာ။
သဒ္ဓါဣစ္စေဝမာဒိတော ဏ ပစ္စယော ဟောတိ ‘‘တဒဿတ္ထိ’’ဣစ္စေတသ္မိံ အတ္ထေ။
သဒ္ဓါ ¶ ယဿ အတ္ထိ၊ တသ္မိံ ဝါ ဝိဇ္ဇတီဘိ သဒ္ဓါ၊ ဧဝံ ပညော၊ အမစ္ဆရော။
၃၇၁၊ ၄၀၄။ အာယုဿုကာရာသ မန္တုမှိ။
အာယုဿ အန္တော ဥကာရော အသာဒေသော ဟောတိမန္တုမှိ ပစ္စယေ ပရေ။
အာယု အဿ အတ္ထိ၊ တသ္မိံ ဝါ ဝိဇ္ဇတီတိ အာယသ္မာ။
တပ္ပကတိဝစနတ္ထေ မယပစ္စယော ဟောတိ။
သုဝဏ္ဏေန ပကတံ ကမ္မံ သောဝဏ္ဏမယံ။ ဧဝံ ရူပိယမယံ ဇတုမယံ၊ ရဇတမယံ၊ ဣဋ္ဌကမယံ၊ အယောမယံ၊ မတ္တိကာ မယံ၊ ဒါရုမယံ၊ ဂေါမယံ။
သင်္ချာပူရဏတ္ထေ မပစ္စယော ဟောတိ။
ပဉ္စန္နံ ပူရဏော ပဉ္စမော၊ ဧဝံ သတ္တမော၊ အဋ္ဌမော၊ နဝမော၊ ဒသမော။
၃၇၄၊ ၄၀၈။ သ ¶ ဆဿဝါ။
ဆဿ သကာရာဒေသော ဟောတိ ဝါ သင်္ချာပူရဏတ္ထေ။
ဆန္နံ ပူရဏော သဋ္ဌော၊ ဆဋ္ဌော ဝါ။
ဧကာဒိတော ဒသဿ အန္တေ ဤပစ္စယော ဟောတိ ဝါ သင်္ချာပူရဏတ္ထေ။
ဧကော စ ဒသ စ ဧကာဒသ၊ ဧကာဒသန္နံ ပူရဏီ ဧကာဒသီ။ ပဉ္စစ ဒသ စ ပဉ္စဒသ၊ ပဉ္စဒသန္နံ ပူရဏီ ပဉ္စဒသီ။ စတ္တာရော စ ဒသ စ စတုဒ္ဒသ၊ စတုဒ္ဒသန္နံ ပူရဏီ စာတုဒ္ဒသီ။
ပူရဏေတိ ကိမတ္ထံ? ဧကာဒသ၊ ပဉ္စဒသ။
ဒသသဒ္ဒေ ပရေ နိစ္စံ ဆဿ သော ဟောတိ။
သောဠသ။
တာသံ သင်္ချာနံ အန္တေ နိဂ္ဂဟိတာဂမော ဟောတိ။
ပဉ္စဒသိ၊ စာတုဒ္ဒသိ။
၃၇၈၊ ၄၁၄။ တိ ¶ စ။
တာသံ သင်္ချာနံ အန္တေ တိကာရာဂမော ဟောတိ။ ဝီသတိ၊ တိံသတိ။
ဒကာရ ရကာရာနံ သင်္ချာနံ လကာရာဒေသော ဟောတိ။ သောဠသ၊ စတ္တာလီသံ။
၃၈၀၊ ၂၅၅။ ဝီသတိ ဒသေသု ဗာ ဒွိဿ တု။
ဝီသတိ ဒသဣစ္စေတေသု ဒွိဿ ဗာ ဟောတိ။
ဗာဝီသတိန္ဒြိယာနိ၊ ဗာရသ မနုဿာ။
တုဂ္ဂဟဏေန ဒွိဿ ဒု ဒိ ဒေါ အာဒေသာ စ ဟောန္တိ။ ဒုရတ္တံ၊ ဒိရတ္တံ၊ ဒိဂုဏံ၊ ဒေါဟဠိနီ။
၃၈၁၊ ၂၅၄။ ဧကာဒိတော ဒဿ ရ သင်္ချာနေ။
ဧကာဒိတော ဒသဿ ဒကာရဿ ရကာရော ဟောတိ ဝါ သင်္ချာနေ။
ဧကာရသ၊ ဧကာဒသ၊ ဗာရသ၊ ဒွါဒသ။
သင်္ချာနေတိ ကိမတ္ထံ? ဒွါဒသာယတနာနိ။
၃၈၂၊ ၂၅၉။ အဋ္ဌာဒိတော ¶ စ။
အဋ္ဌဣစ္စေဝမာဒိတော စ ဒသသဒ္ဒဿ ဒကာရဿ ရကာရာဒေသော ဟောတိ ဝါ သင်္ချာနေ။
အဋ္ဌာရသ၊ အဋ္ဌဒသ။
အဋ္ဌာဒိတောတိ ကိမတ္ထံ? ပဉ္စဒသ၊ သောဠသ။
သင်္ချာနေတိ ကိမတ္ထံ? အဋ္ဌဒသိကော။
၃၈၃၊ ၂၅၃။ ဒွေကဋ္ဌာနမာကာရော ဝါ။
ဒွိ ဧက အဋ္ဌဣစ္စေတေသမန္တော အာကာရော ဟောတိ ဝါ သင်္ချာနေ။
ဒွါဒသ၊ ဧကာဒသ၊ အဋ္ဌာရသ။
သင်္ချာနေတိ ကိမတ္ထံ? ဒွိဒန္တော၊ ဧကဒန္တော၊ ဧကစ္ဆန္နော၊ အဋ္ဌတ္ထမ္ဘော။
စတု ဆဣစ္စေတေဟိ ထ ဌဣစ္စေတေ ပစ္စယာ ဟောန္တိ သင်္ချာပူရဏတ္ထေ။
စတုတ္ထော၊ ဆဋ္ဌော။
၃၈၅၊ ၄၀၉။ ဒွိတီဟိ ¶ တိယော။
ဒွိ တိဣစ္စေတေဟိ တိယပစ္စယော ဟောတိ သင်္ချာပူရဏတ္ထေ။
ဒုတိယော၊ တတိယော။
ဒွိ တိဣစ္စေတေသံ ဒု တဣစ္စေတေ အာဒေသာ ဟောန္တိ တိယပစ္စယေ ပရေ။
ဒုတိယော၊ တတိယော။
အပိဂ္ဂဟဏေန အညေသုပိ ဒွိဣစ္စေတဿ ဒုအာဒေသော ဟောတိ။ ဒုရတ္တံ။
စဂ္ဂဟဏေန ဒွိဣစ္စေတဿ ဒိကာရော ဟောတိ။ ဒိရတ္တံ၊ ဒိဂုဏံ သင်္ဃာဋိံ ပါရုပေတွာ။
၃၈၇၊ ၄၁၁။ တေသမဍ္ဎူပပဒေန အဍ္ဎုဍ္ဎ ဒိဝဍ္ဎ ဒိယဍ္ဎဍ္ဎတိယာ။
တေသံ ¶ စတုတ္ထ ဒုတိယ တတိယာနံ အဍ္ဎူပပဒါနံ အဍ္ဎဍ္ဎုဒိဝဍ္ဎ ဒိယဍ္ဎ အဍ္ဎတိယာဒေသာ ဟောန္တိ၊ အဍ္ဎူပပဒေန သဟနိပ္ပဇ္ဇန္တေ။
အဍ္ဎေန စတုတ္ထော အဍ္ဎုဍ္ဎော၊ အဍ္ဎေန ဒုတိယော ဒိဝဍ္ဎော၊ အဍ္ဎေန ဒုတိယော ဒိယဍ္ဎော၊ အဍ္ဎေန တတိယော အဍ္ဎတိယော။
သရူပါနံ ပဒဗျဉ္ဇနာနံ ဧကသေသော ဟောတိ အသကိံ။ ပုရိသော စ ပုရိသော စ ပုရိသာ။
သရူပါနမိတိ ကိမတ္ထံ? ဟတ္ထီ စ အဿော စ ရထော စ ပတ္တိကော စ ဟတ္ထိအဿရထပတ္တိကာ၊
အသကိန္တိ ကိမတ္ထံ? ပုရိသော။
၃၈၉၊ ၄၁၃။ ဂဏနေ ဒသဿ ဒွိတိစတုပဉ္စဆသတ္တအဋ္ဌနဝကာနံ ဝီ တိ စတ္တာရ ပညာ ဆ သတ္တာသနဝါ ယောသု၊ ယောနဉ္စီသမာသံ ဌိ ရိ တီ တုတိ။
ဂဏနေ ဒသဿ ဒွိက တိက စတုက္က ပဉ္စက ဆက္က သတ္တကအဋ္ဌက နဝကာနံ သရူပါနံ ကတေကသေသာနံ ယထာသင်္ချံ ဝီ တိ စတ္တာရ ပညာ ဆ သတ္တ အသ နဝဣစ္စာဒေသာ ဟောန္တိ အသကိံ ယောသု၊ ယောနဉ္စ ဤသံ အာသံ ဌိ ရိ တိ ဤတိ ဥတိဣစ္စာဒေသာ ဟောန္တိ။ ပစ္ဆာ ပုန နိပ္ပဇ္ဇန္တေ။
ဝီသံ ¶ ၊ တိံသံ၊ စတ္တာလီသံ၊ ပညာသံ၊ သဋ္ဌိ၊ သတ္တရိ၊ သတ္တတိ၊ အသီတိ၊ နဝုတိ။
အသကိန္တိ ကိမတ္ထံ? ဒသ။
ဂဏနေတိ ကိမတ္ထံ? ဒသဒသကာ ပုရိသာ။
၃၉၀၊ ၂၅၆။ စတူပပဒဿ လောပေါ တုတ္တရပဒါဒိစဿ စုစောပိ နဝါ။
စတူပပဒဿ ဂဏနေ ပရိယာပန္နဿ တုကာရဿ လောပေါ ဟောတိ၊ ဥတ္တရပဒါဒိစကာရဿ စုစောပိ အာဒေသာ ဟောန္တိ နဝါ။
စုဒ္ဒသ၊ စောဒ္ဒသ၊ စတုဒ္ဒသ။
အပိဂ္ဂဟဏေန အနုပပဒဿာပိ ပဒါဒိစကာရဿ။ လောပေါဟောတိ နဝါ၊ စဿ စုစောပိ ဟောန္တိ။ တာလီသံ၊ စတ္တာလီသံ၊ စုတ္တာလီသံ၊ စောတ္တာလီသံ။
၃၉၁၊ ၄၂၃။ ယဒနုပပန္နာ နိပါတနာ သိဇ္ဈန္တိ။
ယေ သဒ္ဒါ အနိဒ္ဒိဋ္ဌလက္ခဏာ၊ အက္ခရပဒဗျဉ္ဇနတော၊ ဣတ္ထိပုမနပုံသကလိင်္ဂတော ¶ ၊ နာမုပသဂ္ဂနိပါတတော၊ အဗျယီဘာဝသမာသတဒ္ဓိတာချာတတော၊ ဂဏနသင်္ချာကာလကာရကပ္ပယောဂသညာတော၊ သန္ဓိပကတိဝုဒ္ဓိလောပါဂမဝိကာရဝိပရိတတော၊ ဝိဘတ္တိဝိဘဇနတော စ၊ တေ နိပါတနာ သိဇ္ဈန္တိ။
၃၉၂၊ ၄၁၈။ ဒွါဒိတော ကော’နေကတ္ထေစ။
ဒွိဣစ္စေဝမာဒိတော ကပစ္စယော ဟောတိ အနေကတ္ထေ စ၊ နိပါတနာ သိဇ္ဈန္တိ။
သတဿ ဒွိကံ ဒွိသတံ၊ သတဿ တိကံ တိသတံ၊ သတဿ စတုက္ကံ စတုသတံ၊ သတဿ ပဉ္စကံ ပဉ္စသတံ၊ သတဿ ဆက္ကံ ဆသတံ၊ သတဿ သတ္တကံ သတ္တသတံ၊ သတဿ အဋ္ဌကံ အဋ္ဌသတံ၊ သတဿ နဝကံ နဝသတံ၊ သတဿ ဒသကံ ဒသသတံ၊ သဟဿံ ဟောတိ။
၃၉၃၊ ၄၁၅။ ဒသဒသကံ သတံ ဒသကာနံ သတံ သဟဿဉ္စ ယောမှိ။
ဂဏနေ ပရိယာပန္နဿ ဒသဒသကဿ သတံ ဟောတိ၊ သတဒသကဿ သဟဿံ ဟောတိ ယောမှိ ပရေ။
သတံ၊ သဟဿံ။
ဒွိကာဒီနံ တဒုတ္တရပဒါနဉ္စ နိပ္ပဇ္ဇန္တေ ယထာသင်္ချံ။ သတဿ ဒွိကံ (တဒိဒံ ဟောတိ) ဒွိသတံ၊ ဧဝံ တိသတံ၊ စတုသတံ ¶ ၊ ပဉ္စသတံ၊ ဆသတံ၊ သတ္တသတံ၊ အဋ္ဌသတံ၊ နဝသတံ၊ ဒသသတံ၊ သဟဿံ ဟောတိ။
၃၉၄၊ ၄၁၆။ ယာဝ တဒုတ္တရိ ဒသဂုဏိတဉ္စ။
ယာဝ တာသံ သင်္ချာနံ ဥတ္တရိ ဒသဂုဏိတဉ္စ ကာတဗ္ဗံ။
တံ ယထာ? ဒသဿ ဂဏနဿ ဒသဂုဏိတံ ကတွာ သတံ ဟောတိ၊ သတဿ ဒသဂုဏိတံ ကတွာ သဟဿံ ဟောတိ၊ သဟဿဿ ဒသဂုဏိတံ ကတွာ ဒသသဟဿံ ဟောတိ၊ ဒသသဟဿဿ ဒသဂုဏိတံ ကတွာသတသဟဿံ ဟောတိ၊ သတသဟဿဿ ဒသဂုဏိတံ ကတွာဒသသတသဟဿံ ဟောတိ၊ ဒသသတသဟဿဿဒသဂုဏိတံ ကတွာ ကောဋိ ဟောတိ၊ ကောဋိသတသဟဿဿ သတဂုဏိတံ ကတွာ ပကောဋိ ဟောတိ။ ဧဝံ သေသာပိ ယောဇေတဗ္ဗာ။
စဂ္ဂဟဏံ ဝိသေသနတ္ထံ။
ယာသံ ပန သင်္ချာနံ အနိဒ္ဒိဋ္ဌနာမဓေယျာနံ သကေဟိ သကေဟိ နာမေဟိ နိပ္ပဇ္ဇန္တေ။
သတသဟဿာနံ သတံ ကောဋိ၊ ကောဋိသတသဟဿာနံ သတံ ပကောဋိ၊ ပကောဋိသတသဟဿာနံ သတံ ကောဋိပကောဋိ ¶ ၊ ကောဋိပကောဋိသတသဟဿာနံ သတံ နဟုတံ၊ နဟုတသတသဟဿာနံ သတံ နိန္နဟုတံ၊ နိန္နဟုတသတသဟဿာနံ သတံ အက္ခောဘိဏီ။ တထာ ဗိန္ဒု၊ အဗ္ဗုဒံ၊ နိရဗ္ဗုဒံ၊ အဟဟံ၊ အဗဗံ၊ အဋဋံ၊ သောဂန္ဓိကံ၊ ဥပ္ပလံ၊ ကုမုဒံ၊ ပဒုမံ၊ ပုဏ္ဍရိကံ၊ ကထာနံ၊ မဟာကထာနံ၊ အသင်္ချေယျံ။
တေသံ ပစ္စယာနံ ဏော လောပမာပဇ္ဇတေ။
ဂေါတမဿ အပစ္စံ ဂေါတမော။ ဧဝံ ဝါသိဋ္ဌော။ ဝေနတေယျော၊ အာလသျံ၊ အာရောဂျံ။
ဝိဘာဂတ္ထေ စ ဓာပစ္စယော ဟောတိ။
ဧကေန ဝိဘာဂေန ဧကဓာ။ ဧဝံ ဒွိဓာ၊ တိဓာ၊ စတုဓာ၊ ပဉ္စဓာ၊ ဆဓာ။
စေတိ ကိမတ္ထံ? သောပစ္စယော ဟောတိ။ သုတ္တသော၊ ဗျဉ္ဇနသော၊ ပဒသော။
၃၉၈၊ ၄၂၁။ သဗ္ဗနာမေဟိ ¶ ပကာရဝစနေ တု ထာ။
သဗ္ဗနာမေဟိ ပကာရဝစနတ္ထေ ထာပစ္စယော ဟောတိ။
သော ပကာရော တထာ၊ တံ ပကာရံ တထာ၊ တေန ပကာရေန တထာ၊ တဿ ပကာရဿ တထာ၊ တသ္မာ ပကာရာ တထာ၊ တဿ ပကာရဿ တထာ၊ တသ္မိံ ပကာရေ တထာ။ ဧဝံ ယထာ၊ သဗ္ဗထာ၊ အညထာ၊ ဣတရထာ။
တုဂ္ဂဟဏံ ကိမတ္ထံ? တတ္ထာပစ္စယော ဟောတိ။ သော ပကာရော တထတ္ထာ။ ဧဝံ ယထတ္ထာ။ သဗ္ဗထတ္ထာ၊ အညထတ္ထာ၊ ဣတရထတ္ထာ။
ကိံ ဣမဣစ္စေတေဟိ ထံပစ္စယော ဟောတိ ပကာရဝစနတ္ထေ။
ကော ပကာရော ကထံ၊ ကံ ပကာရံ ကထံ၊ ကေန ပကာရေန ကထံ၊ ကဿ ပကာရဿ ကထံ၊ ကသ္မာ ပကာရာ ကထံ။ ကဿ ပကာရဿ ကထံ၊ ကသ္မိံ ပကာရေ ကထံ၊ အယံ ပကာရော ဣတ္ထံ၊ ဣမံ ပကာရံ ဣတ္ထံ၊ ဣမိနာ ပကာရေန ဣတ္ထံ၊ ဣမဿ ပကာရဿ ဣတ္ထံ၊ ဣမသ္မာ ပကာရာ ဣတ္ထံ၊ ဣမဿ ပကာရဿ ဣတ္ထံ၊ ဣမသ္မိံ ပကာရေ ဣတ္ထံ။
၄၀၀၊ ၃၆၄။ ဝုဒ္ဓါဒိသရဿ ¶ ဝါ’သံယောဂန္တဿ သဏေ စ။
အာဒိသရဿ ဝါ အသံယောဂန္တဿ အာဒိဗျဉ္ဇနဿ ဝါ သရဿ ဝုဒ္ဓိ ဟောတိ သဏကာရကေ ပစ္စယေ ပရေ။
အာဘိဓမ္မိကော၊ ဝေနတေယျော၊ ဝါသိဋ္ဌော၊ အာလသျံ၊ အာရောဂျံ။
အသံယောဂန္တဿေတိ ကိမတ္ထံ? ဘဂ္ဂဝေါ၊ မန္တေယျော၊ ကုန္တေယျော။
ဣဥဣစ္စေတေသံ အာဒိဘူတာနံ မာ ဝုဒ္ဓိ ဟောတိ။ တေသု စ ဧ ဩ ဝုဒ္ဓါဂမော ဟောတိ ဌာနေ။
ဗျာကရဏမဓီတေ ဝေယျာကရဏိကော၊ နျာယမဓီတေ နေယျာယိကော၊ ဗျာဝစ္ဆဿ အပစ္စံ ဝေယျာဝစ္ဆော၊ ဒွါရေ နိယုတ္တော ဒေါဝါရိကော။
၄၀၂၊ ၃၇၇။ အာတ္တဉ္စ ¶ ။
ဣဥဣစ္စေတေသံ အာတ္တဉ္စ ဟောတိ၊ ရိကာရာဂမော စ ဌာနေ။
ဣသိဿ ဘာဝေါ အာရိသျံ၊ ဣဏဿ ဘာဝေါ အာဏျံ၊ ဥသဘဿ ဘာဝေါ အာသဘံ၊ ဥဇုနော ဘာဝေါ အဇ္ဇဝံ၊ ဣစ္စေဝမာဒီ ယောဇေတဗ္ဗာ။
ယူနမိတိ ကိမတ္ထံ? အပါယေသု ဇာတော အာပါယိ ကော။
ဌာနေတိ ကိမတ္ထံ? ဝေမတိကော၊ ဩပနယိကော၊ ဩပမာယိကော၊ ဩပါယိကော။
၄၀၃၊ ၃၅၄။ ကွစာဒိမဇ္ဈုတ္တရာနံ ဒီဃရဿာ ပစ္စယေသု စ။
ကွစိ အာဒိမဇ္ဈဥတ္တရဣစ္စေတေသံ ဒီဃရဿာ ဟောန္တိ ပစ္စယေသု စ အပစ္စယေသု စ။
အာဒိဒီဃော တာဝ – ပါကာရော၊ နီဝါရော၊ ပါသာဒေါ၊ ပါကဋော၊ ပါတိမောက္ခော၊ ပါဋိကင်္ခေါ ဣစ္စေဝမာဒိ။
မဇ္ဈေဒီဃော ¶ တာဝ – အင်္ဂမာဂဓိကော၊ ဩရဗ္ဘမာဂဝီကော ဣစ္စေဝမာဒိ။
ဥတ္တရဒီဃော တာဝ – ခန္တီ ပရမံ တပေါ တိတိက္ခာ၊ အဉ္ဇနာ ဂိရိ၊ ကောဋရာ ဝနံ၊ အင်္ဂုလီ ဣစ္စေဝမာဒိ။
အာဒိရဿော တာဝ – ပဂေဝ ဣစ္စေဝမာဒိ။
မဇ္ဈေရဿော တာဝ – သုမေဓသော သုဝဏ္ဏဓရေဟိ ဣစ္စေဝမာဒိ။
ဥတ္တရရဿော တာဝ – ဘောဝါဒိ နာမ သော ဟောတိ၊ ယထာဘာဝိ ဂုဏေန သော ဣစ္စေဝမာဒိ။ အညေပိ ယထာဇိနဝစနာနုပရောဓေန ယောဇေတဗ္ဗာ။
စဂ္ဂဟဏေန အပစ္စယေသု စာတိ အတ္ထံ သမုစ္စေတိ၊
၄၀၄၊ ၃၇၀။ တေသု ဝုဒ္ဓိလောပါဂမဝိကာရဝိပရီတာဒေသာ စ။
တေသု အာဒိမဇ္ဈုတ္တရေသု ယထာဇိနဝစနာနုပရောဓေန ကွစိ ဝုဒ္ဓိ ဟောတိ၊ ကွစိ လောပေါ ဟောတိ၊ ကွစိ အာဂမော ဟောတိ၊ ကွစိ ဝိကာရော ဟောတိ၊ ကွစိ ဝိပရီတော ဟောတိ၊ ကွစိ အာဒေသော ဟောတိ။
အာဒိဝုဒ္ဓိ တာဝ – အာဘိဓမ္မိကော၊ ဝေနတေယျော ဣစ္စေဝမာဒိ။
မဇ္ဈေဝုဒ္ဓိ ¶ တာဝ – သုခသေယျံ၊ သုခကာရိ ဒါနံ၊ သုခကာရိ သီလံ ဣစ္စေဝမာဒိ။
ဥတ္တရဝုဒ္ဓိ တာဝ – ကာလိင်္ဂေါ၊ မာဂဓိကော၊ ပစ္စက္ခဓမ္မာ ဣစ္စေဝမာဒိ။
အာဒိလောပေါ တာဝ – တာလီသံ ဣစ္စေဝမာဒိ။
မဇ္ဈေလောပေါ တာဝ – ကတ္တုကာမော၊ ကုမ္ဘကာရပုတ္တော၊ ဝေဒလ္လံ ဣစ္စေဝမာဒိ။
ဥတ္တရလောပေါ တာဝ – ဘိက္ခု၊ ဘိက္ခုနီ ဣစ္စေဝမာဒိ။
အာဒိအာဂမော တာဝ – ဝုတ္တော ဘဂဝတာ ဣစ္စေဝမာဒိ။
မဇ္ဈေအာဂမော တာဝ – သသီလဝါ၊ သပညဝါဣစ္စေဝမာဒိ။
ဥတ္တရအာဂမော တာဝ – ဝေဒလ္လံ ဣစ္စေဝမာဒိ။
အာဒိဝိကာရော တာဝ – အာရိသျံ၊ အာဏျံ၊ အာသဘံ၊ အဇ္ဇဝံ ဣစ္စေဝမာဒိ။
မဇ္ဈေဝိကာရော တာဝ – ဝရာရိသျံ၊ ပရာရိသျံ ဣစ္စေဝမာဒိ။
ဥတ္တရဝိကာရော တာဝ – ယာနိ၊ တာနိ၊ သုခါနိ ဣစ္စေဝမာဒိ။
အာဒိဝိပရီတော ¶ တာဝ – ဥဂ္ဂတေ သူရိယေ ဥဂ္ဂစ္ဆတိ ဣစ္စေဝမာဒိ။
မဇ္ဈေဝိပရီတော တာဝ – သမုဂ္ဂစ္ဆတိ၊ သမုဂ္ဂတေ သူရိယေ ဣစ္စေဝမာဒိ။
ဥတ္တရဝိပရီတော တာဝ – ဒိဂု၊ ဒိဂုဏံ ဣစ္စေဝမာဒိ။
အာဒိအာဒေသော တာဝ – ယူနံ ဣစ္စေဝမာဒိ။
မဇ္ဈေအာဒေသော တာဝ – နျာယောဂါ ဣစ္စေဝမာဒိ။
ဥတ္တရအာဒေသော တာဝ – သဗ္ဗသေယျော၊ သဗ္ဗသေဋ္ဌော၊ စိတ္တံ ဣစ္စေဝမာဒိ။ ဧဝံ ယထာဇိနဝစနာနုပရောဓေန သဗ္ဗတ္ထ ယောဇေတဗ္ဗာ။
၄၀၅၊ ၃၆၅။ အယုဝဏ္ဏာနဉ္စာယော ဝုဒ္ဓိ။
အ ဣတိ အကာရော၊ ဣ ဤဣတိ ဣဝဏ္ဏော၊ ဥ ဦဣတိ ဥဝဏ္ဏော၊ တေသံ အကာရဣဝဏ္ဏုဝဏ္ဏာနံ အာ ဧ ဩဝုဒ္ဓိယော ဟောန္တိ ယထာသင်္ချံ၊ အာ ဤ ဦဝုဒ္ဓိ စ။
အာဘိဓမ္မိကော၊ ဝေနတေယျော၊ ဩဠုမ္ပိကော။
ပုန ဝုဒ္ဓိဂ္ဂဟဏံ ကိမတ္ထံ? ဥတ္တရပဒဝုဒ္ဓိဘာဝတ္ထံ၊ အင်္ဂမဂဓေဟိ အာဂတာတိ အင်္ဂမာဂဓိကာ။ နိဂမဇနပဒေသု ဇာတာတိ ¶ နေဂမဇာနပဒါ။ ပုရိမဇနပဒေသု ဇာတာတိ ပေါရိမဇာနပဒါ။ သတ္တာဟေ နိယုတ္တောတိ သတ္တာဟိကာ၊ စတုဝိဇ္ဇေ နိယုတ္တောတိ စာတုဝိဇ္ဇိကာ။ ဣစ္စေဝမာဒီ ယောဇေတဗ္ဗာ။
ဝုဒ္ဓိဣစ္စနေန ကွတ္ထော? ဝုဒ္ဓါဒိသရဿ ဝါ’သံယောဂန္တဿ သဏေ စ။
ဣတိ နာမကပ္ပေ တဒ္ဓိတကပ္ပော အဋ္ဌမော ကဏ္ဍော။
တဒ္ဓိတကပ္ပော နိဋ္ဌိတော။