📜
၆။ အာချာတကပ္ပ
ပဌမကဏ္ဍ
(က)
အာချာတသာဂရမထဇ္ဇတနီတရင်္ဂံ ¶ ၊
ဓာတုဇ္ဇလံ ဝိကရဏာဂမကာလမီနံ၊
လောပါနုဗန္ဓရိယမတ္ထဝိဘာဂတီရံ၊
ဓီရာ တရန္တိ ကဝိနော ပုထုဗုဒ္ဓိနာဝါ။
(ခ)
ဝိစိတ္တသင်္ခါရပရိက္ခိတံ ဣမံ၊
အာချာတသဒ္ဒံ ဝိပုလံ အသေသတော၊
ပဏမျ သမ္ဗုဒ္ဓမနန္တဂေါစရံ၊
သုဂေါစရံ ယံ ဝဒတော သုဏာထ မေ။
(ဂ)
အဓိကာရေ မင်္ဂလေ စေဝ၊ နိပ္ဖန္နေ စာဝဓာရဏေ၊
အနန္တရေ စ ပါဒါနေ၊ အထသဒ္ဒေါ ပဝတ္တတိ။
၄၁၆၊ ၄၂၉။ အထ ပုဗ္ဗာနိ ဝိဘတ္တီနံ ဆ ပရဿပဒါနိ။
အထ သဗ္ဗာသံ ဝိဘတ္တီနံ ယာနိ ယာနိ ပုဗ္ဗကာနိ ဆ ပဒါနိ၊ တာနိ တာနိ ပရဿပဒသညာနိ ဟောန္တိ။
တံ ယထာ? တိ အန္တိ၊ သိ ထ၊ မိ မ။
ပရဿပဒမိစ္စနေန ကွတ္ထော? ကတ္တရိ ပရဿပဒံ။
၄၀၇၊ ၄၃၉။ ပရာဏျတ္တနောပဒါနိ ¶ ။
သဗ္ဗာသံ ဝိဘတ္တီနံ ယာနိ ယာနိ ပရာနိ ဆ ပဒါနိ။ တာနိ တာနိ အတ္တနောပဒသညာနိ ဟောန္တိ။
တံ ယထာ? တေ အန္တေ၊ သေ ဝှေ၊ ဧ မှေ။
အတ္တနောပဒမိစ္စနေန ကွတ္ထော? အတ္တနောပဒါနိ ဘာဝေ စ ကမ္မနိ။
၄၀၈၊ ၄၃၁။ ဒွေ ဒွေ ပဌမ မဇ္ဈိမုတ္တမပုရိသာ။
တာသံ သဗ္ဗာသံ ဝိဘတ္တီနံ ပရဿပဒါနံ၊ အတ္တနောပဒါနဉ္စ ဒွေ ဒွေ ပဒါနိ ပဌမမဇ္ဈိမုတ္တမပုရိသသညာနိ ဟောန္တိ။
တံ ယထာ? တိ အန္တိ ဣတိ ပဌမပုရိသာ၊ သိ ထ ဣတိ မဇ္ဈိမပုရိသာ၊ မိ မ ဣတိ ဥတ္တမပုရိသာ။ အတ္တနောပဒါနမ္ပိ တေ အန္တေ ဣတိ ပဌမပုရိသာ၊ သေ ဝှေ ဣတိ မဇ္ဈိမပုရိသာ၊ ဧ မှေ ဣတိ ဥတ္တမပုရိသာ။ ဧဝံ သဗ္ဗတ္ထ။
ပဌမမဇ္ဈိမုတ္တမပုရိသမိစ္စနေန ကွတ္ထော? နာမမှိ ပယုဇ္ဇမာနေပိ တုလျာဓိကရဏေ ပဌမော၊ တုမှေ မဇ္ဈိမော၊ အမှေ ဥတ္တမော။
၄၀၉၊ ၄၄၁။ သဗ္ဗေသမေကာဘိဓာနေ ပရော ပုရိသော။
သဗ္ဗေသံ တိဏ္ဏံ ပဌမမဇ္ဈိမုတ္တမ ပုရိသာနံ ဧကာဘိဓာနေ ပရော ပုရိသော ဂဟေတဗ္ဗော။
သော ¶ စ ပဌတိ၊ တွဉ္စ ပဌသိ၊ တုမှေ ပဌထ။ သော စ ပစတိ၊ တွဉ္စ ပစသိ။ တုမှေ ပစထ။ ဧဝံ သေသာသု ဝိဘတ္တီသု ပရော ပုရိသော ယောဇေတဗ္ဗော။
၄၁၀၊ ၄၃၂။ နာမမှိ ပယုဇ္ဇမာနေပိ တုလျာဓိကရဏေ ပဌမော။
နာမမှိ ပယုဇ္ဇမာနေပိ အပ္ပယုဇ္ဇမာနေပိ တုလျာဓိကရဏေ ပဌမပုရိသော ဟောတိ။
သော ဂစ္ဆတိ၊ တေ ဂစ္ဆန္တိ။
အပ္ပယုဇ္ဇမာနေပိ – ဂစ္ဆတိ၊ ဂစ္ဆန္တိ။
တုလျာဓိကရဏေတိ ကိမတ္ထံ? တေန ဟညသေ တွံ ဒေဝဒတ္တေန။
တုမှေ ပယုဇ္ဇမာနေပိ အပ္ပယုဇ္ဇမာနေပိ တုလျာဓိကရဏေ မဇ္ဈိမပုရိသော ဟောတိ။
တွံ ယာသိ၊ တုမှေ ယာထ။
အပ္ပယုဇ္ဇမာနေပိ – ယာသိ၊ ယာထ။
တုလျာဓိကရဏေတိ ကိမတ္ထံ? တယာ ပစ္စတေ ဩဒနော။
၄၁၂၊ ၄၃၇။ အမှေ ¶ ဥတ္တမော။
အမှေ ပယုဇ္ဇမာနေပိ အပ္ပယုဇ္ဇမာနေပိ တုလျာဓိကရဏေ ဥတ္တမပုရိသော ဟောတိ။
အဟံ ယဇာမိ၊ မယံ ယဇာမ။
အပ္ပယုဇ္ဇမာနေပိ – ယဇာမိ၊ ယဇာမ။
တုလျာဓိကရဏေတိ ကိမတ္ထံ? မယာ ဣဇ္ဇတေ ဗုဒ္ဓါ။
‘‘ကာလေ’’ ဣစ္စေတံ အဓိကာရတ္ထံ ဝေဒိတဗ္ဗံ။
၄၁၄၊ ၄၂၈။ ဝတ္တမာနာ ပစ္စုပ္ပန္နေ။
ပစ္စုပ္ပန္နေ ကာလေ ဝတ္တမာနာဝိဘတ္တိ ဟောတိ။
ပါဋလိပုတ္တံ ဂစ္ဆတိ၊ သာဝတ္ထိံ ပဝိသတိ။
၄၁၅၊ ၄၅၁။ အာဏတျာ သိဋ္ဌေ’နုတ္တကာလေ ပဉ္စမီ။
အာဏတျတ္ထေ စ အာသီသတ္ထေ စ အနုတ္တကာလေ ပဉ္စမီ ဝိဘတ္တိ ဟောတိ။
ကရောတု ကုသလံ၊ သုခံ တေ ဟောတု။
၄၁၆၊ ၄၅၄။ အနုမတိပရိကပ္ပတ္ထေသု သတ္တမီ။
အနုမတျတ္ထေ စ ပရိကပ္ပတ္ထေ စ အနုတ္တကာလေ သတ္တမီ ဝိဘတ္တိ ဟောတိ။
တွံ ¶ ဂစ္ဆေယျာသိ၊ ကိမဟံ ကရေယျာမိ။
၄၁၇၊ ၄၆၀။ အပစ္စက္ခေ ပရောက္ခာတီတေ။
အပစ္စက္ခေ အတီတေ ကာလေ ပရောက္ခာဝိဘတ္တိ ဟောတိ။
သုပိနေ ကိလမာဟ၊ ဧဝံ ကိလ ပေါရာဏာဟု။
၄၁၈၊ ၄၅၆။ ဟိယျောပဘုတိ ပစ္စက္ခေ ဟိယျတ္တနီ။
ဟိယျောပဘုတိ အတီတေ ကာလေ ပစ္စက္ခေ ဝါ အပစ္စက္ခေ ဝါ ဟိယျတ္တနီ ဝိဘတ္တိ ဟောတိ။
သော အဂမာ မဂ္ဂံ၊ တေ အဂမူ မဂ္ဂံ။
အဇ္ဇပ္ပဘုတိ အတီတေ ကာလေ ပစ္စက္ခေ ဝါ အပစ္စက္ခေ ဝါ သမီပေ အဇ္ဇတနီဝိဘတ္တိ ဟောတိ။
သော မဂ္ဂံ အဂမီ၊ တေ မဂ္ဂံ အဂမုံ။
ဟိယျတ္တနီအဇ္ဇတနီဣစ္စေတာ ဝိဘတ္တိယော ယဒါ မာယောဂါ၊ တဒါ သဗ္ဗကာလေ စ ဟောန္တိ။
မာ ဂမာ၊ မာ ဝစာ၊ မာ ဂမီ၊ မာ ဝစီ။
စဂ္ဂဟဏေန ¶ ပဉ္စမီဝိဘတ္တိပိ ဟောတိ။ မာ ဂစ္ဆာဟိ။
အနာဂတေ ကာလေ ဘဝိဿန္တီ ဝိဘတ္တိ ဟောတိ။
သော ဂစ္ဆိဿတိ၊ ကရိဿတိ။ တေ ဂစ္ဆိဿန္တိ၊ ကရိဿန္တိ။
၄၂၂၊ ၄၇၅။ ကြိယာတိပန္နေ’တီတေ ကာလာတိပတ္တိ။
ကြိယာတိပန္နမတ္တေ အတီတေ ကာလေ ကာလာတိပတ္တိ ဝိဘတ္တိ ဟောတိ။
သော စေ တံ ယာနံ အလဘိဿာ၊ အဂစ္ဆိဿာ။ တေ စေ တံ ယာနံ အလဘိဿံသု၊ အဂစ္ဆိဿံသု။
၄၂၃၊ ၄၂၆။ ဝတ္တမာနာ တိ အန္တိ၊ သိ ထ၊ မိ မ၊ တေ အန္တေ၊ သေ ဝှေ၊ ဧ မှေ။
ဝတ္တမာနာ ဣစ္စေသာ သညာ ဟောတိ တိ အန္တိ၊ သိ ထ၊ မိ မ၊ တေ အန္တေ၊ သေ ဝှေ၊ ဧ မှေ ဣစ္စေတေသံ ဒွါဒသန္နံ ပဒါနံ။
ဝတ္တမာနာ ဣစ္စနေန ကွတ္ထော? ဝတ္တမာနာ ပစ္စုပ္ပန္နေ။
၄၂၄၊ ၄၅၀။ ပဉ္စမီ တု အန္တု၊ ဟိထ၊ မိမ၊ တံ အန္တံ၊ ဿု ဝှော၊ ဧ အာမသေ။
ပဉ္စမီဣစ္စေသာ ¶ သညာ ဟောတိ တု အန္တု၊ ဟိ ထ၊ မိမ၊ တံ အန္တံ၊ ဿု ဝှော၊ ဧ အာမသေ ဣစ္စေတေသံ ဒွါဒသန္နံ ပဒါနံ။
ပဉ္စမီဣစ္စနေန ကွတ္ထော? အာဏတျာသိဋ္ဌေ၊ နုတ္တကာလေ ပဉ္စမီ။
၄၂၅၊ ၄၅၃။ သတ္တမီ ဧယျ ဧယျုံ၊ ဧယျာ သိ ဧယျာ ထ၊ ဧယျာမိ ဧယျာမ၊ ဧထ ဧရံ၊ ဧထော ဧယျာဝှော၊ ဧယျံ ဧယျာမှေ။
သတ္တမီ ဣစ္စေသာ သညာ ဟောတိ ဧယျ ဧယျုံ၊ ဧယျာသိ ဧယျာထ၊ ဧယျာမိ ဧယျာမ၊ ဧထ ဧရံ၊ ဧထော၊ ဧယျာဝှော၊ ဧယျံ ဧယျာမှေ ဣစ္စေတေသံ ဒွါဒသန္နံ ပဒါနံ။
သတ္တမီ ဣစ္စနေန ကွတ္ထော? အနုမတိပရိကပ္ပတ္ထေသု သတ္တမီ။
၄၂၆၊ ၄၅၉။ ပရောက္ခာ အဥ ဧတ္ထ၊ အံမှ၊ တ္ထရေ၊ တ္ထော ဝှော၊ ဣံ မှေ။
ပရောက္ခာ ဣစ္စေသာ သညာ ဟောတိ အ ဥ၊ ဧတ္ထ၊ အံ မှ၊ တ္ထ ရေ တ္ထော ဝှော၊ ဣံ မှေ ဣစ္စေတေသံ ဒွါဒသန္နံ ပဒါနံ။
ပရောက္ခာ ဣစ္စနေန ကွတ္ထော? အပစ္စက္ခေ ပရောက္ခာတီတေ။
၄၂၇၊ ၄၅၅။ ဟိယျတ္တနီ ¶ အာဦ၊ ဩတ္ထ၊ အံမှာ၊ တ္ထတ္ထုံ၊ သေ ဝှံ၊ ဣံ မှသေ။
ဟိယျတ္တနီ ဣစ္စေသာ သညာ ဟောတိ အာ ဦ၊ ဩ တ္ထ၊ အံ မှာ၊ တ္ထ တ္ထုံ၊ သေ ဝှံ၊ ဣံ မှသေ ဣစ္စေတေသံ ဒွါဒသန္နံ ပဒါနံ။
ဟိယျတ္တနီ ဣစ္စနေန ကွတ္ထော? ဟိယျောပဘုတိ ပစ္စက္ခေ ဟိယျတ္တနီ။
၄၂၈၊ ၄၆၈။ အဇ္ဇတနီ ဤ ဥံ၊ ဩ တ္ထ၊ ဣံ မှာ၊ အာ ဦ၊ သေ ဝှံ၊ အံ မှေ။
အဇ္ဇတနီ ဣစ္စေသာ သညာ ဟောတိ ဤ ဥံ၊ ဩ တ္ထ၊ ဣံမှာ၊ အာ ဦ၊ သေဝှံ၊ အံ မှေ ဣစ္စေတေသံ ဒွါဒသန္နံ ပဒါနံ။
အဇ္ဇတနီ ဣစ္စနေန ကွတ္ထော? သမီပေဇ္ဇတနီ။
၄၂၉၊ ၄၇၂။ ဘဝိဿန္တီ ဿတိ ဿန္တိ၊ ဿသိ ဿထ၊ ဿာမိ ဿာမ၊ ဿတေ ဿန္တေ၊ ဿသေ ဿဝှေ၊ ဿံ ဿာမှေ။
ဘဝိဿန္တီ ဣစ္စေသာ သညာ ဟောတိ ဿတိ ဿန္တိ၊ ဿသိ ဿထ၊ ဿာမိ ဿာမ၊ ဿတေ ဿန္တေ၊ ဿသေ ဿဝှေ၊ ဿံ ဿာမှေ ဣစ္စေတေသံ ဒွါဒသန္နံ ပဒါနံ။
ဘဝိဿန္တီ ဣစ္စနေန ကွတ္ထော? အနာဂတေ ဘဝိဿန္တီ။
၄၃၀၊ ၃၇၃။ ကာလာတိပတ္တိ ¶ ဿာ ဿံသု၊ ဿေ ဿထ၊ ဿံ ဿာမှာ၊ ဿထ သိဿု၊ ဿသေ ဿဝှေ၊ ဿိံ ဿာမှသေ။
ကာလာတိပတ္တိ ဣစ္စေသာ သညာ ဟောတိ ဿာ ဿံသု၊ ဿေ ဿထ၊ ဿံ ဿာမှာ၊ ဿထ ဿိသု၊ ဿသေ ဿဝှေ၊ ဿိံ ဿာမှသေ ဣစ္စေတေသံ ဒွါဒသန္နံ ပဒါနံ။
ကာလာတိပတ္တိ ဣစ္စနေန ကွတ္ထော? ကြိယာတိပန္နေ’ တီတေ ကာလာတိပတ္တိ။
၄၃၁၊ ၄၅၈။ ဟိယျတ္တနီ သတ္တမီ ပဉ္စမီ ဝတ္တမာနာ သဗ္ဗဓာတုကံ။
ဟိယျတ္တနာဒယော စတဿော ဝိဘတ္တိယော သဗ္ဗဓာတုက သညာ ဟောန္တိ။
အဂမာ၊ ဂစ္ဆေယျ၊ ဂစ္ဆတု၊ ဂစ္ဆတိ။
သဗ္ဗဓာတုက ဣစ္စနေန ကွတ္ထော? ဣကာရာဂမော အသဗ္ဗဓာတုကမှိ။
ဣတိ အာချာတကပ္ပေ ပဌမော ကဏ္ဍော။
ဒုတိယကဏ္ဍ
၄၃၂၊ ၃၆၂။ ဓာတုလိင်္ဂေဟိ ¶ ပရာ ပစ္စယာ။
ဓာတုလိင်္ဂဣစ္စေတေဟိ ပရာ ပစ္စယာ ဟောန္တိ။
ကရောတိ၊ ဂစ္ဆတိ။ ယော ကောစိ ကရောတိ၊ တံ အညော ‘‘ကရောဟိ ကရောဟိ’’ ဣစ္စေဝံ ဗြဝီတိ၊ အထ ဝါ ကရောန္တံ ပယောဇယတိ = ကာရေတိ။ သင်္ဃော ပဗ္ဗတမိဝ အတ္တာနမာစရတိ = ပဗ္ဗတာယတိ။ တဠာကံ သမုဒ္ဒမိဝ အတ္တာနမာစရတိ = သမုဒ္ဒါယတိ၊ သဒ္ဒေါ စိစ္စိဋမိဝ အတ္တာနမာစရတိ = စိစ္စိဋာယတိ၊ ဝသိဋ္ဌဿ အပစ္စံ ဝါသိဋ္ဌော။ ဧဝမညေပိ ယောဇေတဗ္ဗာ။
၄၃၃၊ ၅၂၈။ တိဇ ဂုပ ကိတ မာနေ ဟိ ခ ဆ သာ ဝါ။
တိဇ ဂုပ ကိတ မာနု ဣစ္စေတေဟိ ဓာတူဟိ ခ ဆ သ ဣစ္စေတေ ပစ္စယာ ဟောန္တိ ဝါ။
တိတိက္ခတိ၊ ဇိဂုစ္ဆတိ၊ တိကိစ္ဆတိ၊ ဝီမံသတိ။
ဝါတိ ကိမတ္ထံ? တေဇတိ၊ ဂေါပတိ၊ မာနေတိ။
၄၃၄၊ ၅၃၄။ ဘုဇ ဃသ ဟရ သု ပါဒီဟိ တုမိစ္ဆတ္ထေသု။
ဘုဇ ¶ ဃသ ဟရ သု ပါဣစ္စေဝမာဒီဟိ ဓာတူဟိ တုမိစ္ဆတ္ထေသု ခ ဆ သဣစ္စေတေ ပစ္စယာ ဟောန္တိ ဝါ။
ဘောတ္တုမိစ္ဆတိ=ဗုဘုက္ခတိ၊ ဃသိတုမိစ္ဆတိ=ဇိဃစ္ဆတိ၊ ဟရိတုမိစ္ဆတိ=ဇိဂီသတိ၊ သောတုမိစ္ဆတိ=သုဿုသတိ၊ ပါတုမိစ္ဆတိ=ပိဝါသတိ။
ဝါတိ ကိမတ္ထံ? ဘောတ္တုမိစ္ဆတိ။
တုမိစ္ဆတ္ထေသူတိ ကိမတ္ထံ? ဘုဉ္ဇတိ။
၄၃၅၊ ၅၃၆။ အာယ နာမတော ကတ္တူပမာနာဒါစာရေ။
နာမတော ကတ္တူပမာနာ အာစာရတ္ထေ အာယပစ္စယော ဟောတိ။
သင်္ဃော ပဗ္ဗတမိဝ အတ္တာနမာစရတိ = ပဗ္ဗတာယတိ၊ တဠာကံ သမုဒ္ဒမိဝ အတ္တာနမာစရတိ = သမုဒ္ဒါယတိ၊ သဒ္ဒေါ စိစ္စိဋမိဝ အတ္တာနမာစရတိ = စိစ္စိဋာယတိ။ ဧဝမညေပိ ယောဇေတဗ္ဗာ။
နာမတော ဥပမာနာ အာစာရတ္ထေ စ ဤယပစ္စယော ဟောတိ။
အဆတ္တံ ¶ ဆတ္တမိဝ အာစရတိ =ဆတ္တီယတိ၊ အပုတ္တံ ပုတ္တမိဝ အာစရတိ=ပုတ္တီယတိ။
ဥပမာနာတိ ကိမတ္ထံ? ဓမ္မံ အာစရတိ။
အာစာရေတိ ကိမတ္ထံ? အဆတ္တံ ဆတ္တမိဝ ရက္ခတိ။ ဧဝမညေပိ ယောဇေတဗ္ဗာ။
နာမမှာ အတ္တနော ဣစ္ဆတ္ထေ ဤယပစ္စယော ဟောတိ။
အတ္တနော ပတ္တမိစ္ဆတိ = ပတ္တီယတိ။ ဧဝံ ဝတ္ထီယတိ၊ ပရိက္ခာရီယတိ၊ စီဝရီယတိ၊ ဓနီယတိ၊ ဃဋီယတိ။
အတ္တိစ္ဆတ္ထေတိ ကိမတ္ထံ? အညဿ ပတ္တမိစ္ဆတိ။ ဧဝမညေပိ ယောဇေတဗ္ဗာ။
၄၃၈၊ ၅၄၀။ ဓာတူဟိ ဏေ ဏယ ဏာပေ ဏာပယာ ကာရိတာနိ ဟေတွတ္ထေ။
သဗ္ဗေဟိ ဓာတူဟိ ဏေဏယ ဏာပေ ဏာပယဣစ္စေတေ ပစ္စယာ ဟောန္တိ ကာရိတသညာ စ ဟေတွတ္ထေ။
ယော ကောစိ ကရောတိ၊ တံ အညော ‘‘ကရောဟိ ကရောဟိ’’ ဣစ္စေဝံ ဗြဝီတိ၊ အထ ဝါ ကရောန္တံ ပယောဇယတိ ¶ = ကာရေတိ၊ ကာရယတိ၊ ကာရာပေတိ၊ ကာရာ ပယတိ။ ယေ ကေစိ ကရောန္တိ၊ တေ အညေ ‘‘ကရောထ ကရောထ’’ ဣစ္စေဝံ ဗြုဝန္တိ = ကာရေန္တိ၊ ကာရယန္တိ၊ ကာရာပေန္တိ၊ ကာရာပယန္တိ။ ယော ကောစိ ပစတိ၊ တံ အညော ‘‘ပစာဟိ ပစာဟိ’’ဣစ္စေဝံ ဗြဝီတိ၊ အထ ဝါ ပစန္တံ ပယောဇယတိ = ပါစေတိ၊ ပါစယတိ၊ ပါစာပေတိ၊ ပါစာပယတိ။ ယေ ကေစိ ပစန္တိ၊ တေ အညေ ‘‘ပစထ ပစထ’’ ဣစ္စေဝံ ဗြုဝန္တိ = ပါစေန္တိ၊ ပါစယန္တိ၊ ပါစာပေန္တိ။ ပါစာပယန္တိ။ ဧဝံ ဘဏေတိ၊ ဘဏယတိ၊ ဘဏာပေတိ၊ ဘဏာပယတိ။ ဘဏေန္တိ၊ ဘဏယန္တိ၊ ဘဏာပေန္တိ၊ ဘဏာပယန္တိ။ တထရိဝ အညေပိ ယောဇေတဗ္ဗာ။
ဟေတွတ္ထေတိ ကိမတ္ထံ? ကရောတိ၊ ပစတိ။
အတ္ထဂ္ဂဟဏေန အလပစ္စယော ဟောတိ၊ ဇောတလတိ။
၄၃၉၊ ၅၃၉။ ဓာတုရူပေ နာမသ္မာ ဏယော စ။
တသ္မာ နာမသ္မာ ဏယပစ္စယော ဟောတိ ကာရိတသညော စ ဓာတုရူပေ သတိ။
ဟတ္ထိနာ အတိက္ကမတိ မဂ္ဂံ = အတိဟတ္ထယတိ၊ ဝီဏာယ ဥပဂါယတိ ဂီတံ = ဥပဝီဏယတိ၊ ဒဠှံ ကရောတိ ဝီရိယံ ¶ = ဒဠှယတိ၊ ဝိသုဒ္ဓါ ဟောတိ ရတ္တိ = ဝိသုဒ္ဓယတိ။
စဂ္ဂဟဏေန အာရ အာလဣစ္စေတေ ပစ္စယာ ဟောန္တိ။ သန္တံ ကရောတိ = သန္တာရတိ၊ ဥပက္ကမံ ကရောတိ = ဥပက္ကမာလတိ။
သဗ္ဗေဟိ ဓာတူဟိ ဘာဝကမ္မေသု ယပစ္စယော ဟောတိ။
ဌီယတေ၊ ဗုဇ္ဈတေ၊ ပစ္စတေ၊ လဗ္ဘတေ၊ ကရီယတေ၊ ယုဇ္ဇတေ၊ ဥစ္စတေ။
ဘာဝကမ္မေသူတိ ကိမတ္ထံ? ကရောတိ၊ ပစတိ၊ ပဌတိ။
၄၄၁၊ ၄၄၇။ တဿ စဝဂ္ဂယကာရဝကာရတ္တံ သဓာတွန္တဿ။
တဿ ယပစ္စယဿ စဝဂ္ဂယကာရဝကာရတ္တံ ဟောတိ ဓာတူနံ အန္တေန သဟ ယထာသမ္ဘဝံ။
ဝုစ္စတေ၊ ဝုစ္စန္တေ၊ ဥစ္စတေ၊ ဥစ္စန္တေ၊ ပစ္စတေ၊ ပစ္စန္တေ။ မဇ္ဇတေ၊ မဇ္ဇန္တေ၊ ယုဇ္ဇတေ၊ ယုဇ္ဇန္တေ။ ဗုဇ္ဈတေ၊ ဗုဇ္ဈန္တေ၊ ကုဇ္ဈတေ၊ ကုဇ္ဈန္တေ၊ ဥဇ္ဈတေ၊ ဥဇ္ဈန္တေ။ ဟညတေ၊ ဟညန္တေ။ ကယျတေ၊ ကယျန္တေ။ ဒိဗ္ဗတေ၊ ဒိဗ္ဗန္တေ။
၄၄၂၊ ၄၄၈။ ဣဝဏ္ဏာဂမော ¶ ဝါ။
သဗ္ဗေဟိ ဓာတူဟိ ယမှိ ပစ္စယေ၊ ပရေ ဣဝဏ္ဏာဂမော ဟောတိ ဝါ။
ကရီယတေ၊ ကရီယတိ၊ ဂစ္ဆီယတေ၊ ဂစ္ဆီယတိ။
ဝါတိ ကိမတ္ထံ? ကယျတေ။
သဗ္ဗေဟိ ဓာတူဟိ ယပစ္စယော ပုဗ္ဗရူပမာပဇ္ဇတေ ဝါ။
ဝုဍ္ဎတေ၊ ဖလ္လတေ၊ ဒမ္မတေ၊ သက္ကတေ၊ လဗ္ဘတေ၊ ဒိဿတေ။
ယထာ ဟေဋ္ဌာ ဘာဝကမ္မေသု ယပစ္စယဿ အာဒေသော ဟောတိ တထာ ကတ္တရိပိ ယပစ္စယဿ အာဒေသော ကာတဗ္ဗော။
ဗုဇ္ဈတိ၊ ဝိဇ္ဈတိ၊ မညတိ၊ သိဗ္ဗတိ။
ဘူဣစ္စေဝမာဒိတော ဓာတုဂဏတော အပစ္စယော ဟောတိ ကတ္တရိ။
ဘဝတိ ¶ ၊ ပဌတိ၊ ပစတိ၊ ဇယတိ။
၄၄၆၊ ၅၀၉။ ရုဓာဒိတော နိဂ္ဂဟိတပုဗ္ဗဉ္စ။
ရုဓဣစ္စေဝမာဒိတော ဓာတုဂဏတော အပစ္စယော ဟောတိ ကတ္တရိ၊ ပုဗ္ဗေ နိဂ္ဂဟိတာဂမော ဟောတိ။
ရုန္ဓတိ၊ ဆိန္ဒတိ၊ ဘိန္ဒတိ။
စဂ္ဂဟဏေန ဣ ဤ ဧ ဩဣစ္စေတေ ပစ္စယာ ဟောန္တိ နိဂ္ဂဟိတပုဗ္ဗဉ္စ။
ရုန္ဓိတိ၊ ရုန္ဓီတိ၊ ရုန္ဓေတိ၊ ရုန္ဓောတိ၊ သုမ္ဘောတိ၊ ပရိသုမ္ဘောတိ။
ဒိဝုဣစ္စေဝမာဒိတော ဓာတုဂဏတော ယပစ္စယော ဟောတိ ကတ္တရိ။
ဒိဗ္ဗတိ၊ ထိဗ္ဗတိ၊ ယုဇ္ဈတိ၊ ဝိဇ္ဈတိ၊ ဗုဇ္ဈတိ။
၄၄၈၊ ၅၁၂။ သွာဒိတော ဏု ဏာ ဥဏာ စ။
သုဣစ္စေဝမာဒိတော ဓာတုဂဏတော ဏု ဏာ ဥ ဏာဣစ္စေတေ ပစ္စယာ ဟောန္တိ ကတ္တရိ။
အဘိသုဏောတိ ¶ ၊ အဘိသုဏာတိ၊ သံဝုဏောတိ၊ သံဝုဏာတိ၊ အာဝုဏောတိ၊ အာဝုဏာတိ၊ ပါပုဏောတိ၊ ပါပုဏာတိ။
ကီဣစ္စေဝမာဒိတော ဓာတုဂဏတော နာပစ္စယော ဟောတိ ကတ္တရိ။
ကိဏာတိ၊ ဇိနာတိ၊ ဓုနာတိ၊ မုနာတိ၊ လုနာတိ၊ ပုနာတိ။
ဂဟဣစ္စေဝမာဒိတော ဓာတုဂဏတော ပ္ပဏှာဣစ္စေတေ ပစ္စယာ ဟောန္တိ ကတ္တရိ။
ဃေပ္ပတိ၊ ဂဏှာတိ။
တနုဣစ္စေဝမာဒိတော ဓာတုဂဏတော ဩ ယိရဣစ္စေတေ ပစ္စယာ ဟောန္တိ ကတ္တရိ။
တနောတိ ¶ ၊ တနောဟိ၊ ကရောတိ၊ ကရောဟိ၊ ကယိ ရတိ၊ ကယိရာဟိ။
စုရဣစ္စေဝမာဒိတော ဓာတုဂဏတော ဏေ ဏယဣစ္စေတေ ပစ္စယာ ဟောန္တိ ကတ္တရိ၊ ကာရိတသညာ စ။
စောရေတိ၊ စောရယတိ၊ စိန္တေတိ၊ စိန္တယတိ၊ မန္တေတိ၊ မန္တယတိ။
၄၅၃၊ ၄၄၄။ အတ္တနောပဒါနိ ဘာဝေ စ ကမ္မနိ။
ဘာဝေ စ ကမ္မနိ စ အတ္တနောပဒါနိ ဟောန္တိ။
ဥစ္စတေ၊ ဥစ္စန္တေ၊ မဇ္ဇတေ၊ မဇ္ဇန္တေ၊ ယုဇ္ဇတေ၊ ယုဇ္ဇန္တေ၊ ကုဇ္ဈတေ၊ ကုဇ္ဈန္တေ၊ လဗ္ဘတေ၊ လဗ္ဘန္တေ၊ ကယျတေ၊ ကယျန္တေ။
ကတ္တရိ စ အတ္တနောပဒါနိ ဟောန္တိ။
မညတေ၊ ရောစတေ၊ သောစတေ၊ ဗုဇ္ဈတေ၊ ဇာယတေ။
၄၅၅၊ ၅၃၀။ ဓာတုပ္ပစ္စယေဟိ ဝိဘတ္တိယော။
ဓာတုနိဒ္ဒိဋ္ဌေဟိ ပစ္စယေဟိ ခါဒိကာရိတန္တေဟိ ဝိဘတ္တိယော ဟောန္တိ။
တိတိက္ခတိ ¶ ၊ ဇိဂုစ္ဆတိ၊ ဝီမံသတိ၊ သမုဒ္ဒါယတိ၊ ပုတ္တီယတိ၊ ကာရေတိ၊ ပါစေတိ။
ကတ္တရိ ပရဿပဒံ ဟောတိ။
ကရောတိ၊ ပစတိ၊ ပဌတိ၊ ဂစ္ဆတိ။
ဘူဣစ္စေဝမာဒယော ယေ သဒ္ဒဂဏာ၊ တေ ဓာတုသညာ ဟောန္တိ။
ဘဝတိ၊ ဘဝန္တိ၊ စရတိ၊ စရန္တိ၊ ပစတိ၊ ပစန္တိ၊ စိန္တယတိ၊ စိန္တယန္တိ၊ ဟောတိ၊ ဟောန္တိ၊ ဂစ္ဆတိ၊ ဂစ္ဆန္တိ။
ဣတိ အာချာတကပ္ပေ ဒုတိယော ကဏ္ဍော။
တတိယကဏ္ဍ
၄၅၈၊ ၄၆၁။ ကွစာဒိဝဏ္ဏာနမေကဿရာနံ ဒွေဘာဝေါ။
အာဒိဘူတာနံ ဝဏ္ဏာနံ ဧကဿရာနံ ကွစိ ဒွေဘာဝေါ ဟောတိ။
တိတိက္ခတိ ¶ ၊ ဇိဂုစ္ဆတိ၊ တိကိစ္ဆတိ၊ ဝီမံသတိ၊ ဗုဘုက္ခတိ၊ ပိဝါသတိ၊ ဒဒ္ဒလ္လတိ၊ ဒဒါတိ၊ ဇဟာတိ၊ စင်္ကမတိ။
ကွစီတိ ကိမတ္ထံ? ကမ္ပတိ၊ စလတိ။
ဒွေဘူတဿ ဓာတုဿ ယော ပုဗ္ဗော၊ သော အဗ္ဘာသသညော ဟောတိ။
ဒဓာတိ၊ ဒဒါတိ၊ ဗဘူဝ။
အဗ္ဘာသေ ဝတ္တမာနဿ သရဿ ရဿော ဟောတိ။ ဒဓာတိ၊ ဇဟာတိ။
၄၆၁၊ ၄၆၄။ ဒုတိယစတုတ္ထာနံ ပဌမတတိယာ။
အဗ္ဘာသဂတာနံ ဒုတိယစတုတ္ထာနံ ပဌမတတိယာ ဟောန္တိ။
စိစ္ဆေဒ၊ ဗုဘုက္ခတိ၊ ဗဘူဝ၊ ဒဓာတိ။
အဗ္ဘာသေ ဝတ္တမာနဿ ကဝဂ္ဂဿ စ ဝဂ္ဂေါ ဟောတိ။
စိကိစ္ဆတိ ¶ ၊ ဇိဂုစ္ဆတိ၊ ဇိဃစ္ဆတိ၊ ဇိဂီသတိ၊ ဇင်္ဂမတိ၊ စင်္ကမတိ။
၄၆၃၊ ၅၃၂။ မာနကိတာနံ ဝတတ္တံ ဝါ။
မာနကိတဣစ္စေတေသံ ဓာတူနံ အဗ္ဘာသဂတာနံ ဝကာရ တကာရတ္တံ ဟောတိ ဝါ ယထာသင်္ချံ။
ဝီမံသတိ၊ တိကိစ္ဆတိ။
ဝါတိ ကိမတ္ထံ? စိကိစ္ဆတိ။
အဗ္ဘာသေ ဝတ္တမာနဿ ဟကာရဿ ဇော ဟောတိ။
ဇဟာတိ၊ ဇုဟွတိ၊ ဇုဟောတိ၊ ဇဟာရ။
၄၆၅၊ ၄၆၃။ အန္တဿိဝဏ္ဏာကာရော ဝါ။
အဗ္ဘာသဿ အန္တဿ ဣဝဏ္ဏော ဟောတိ၊ အကာရော ဝါ။
ဇိဂုစ္ဆတိ၊ ပိဝါသတိ၊ ဝီမံသတိ၊ ဇိဃစ္ဆတိ၊ ဗဘူဝ၊ ဒဓာတိ။
ဝါတိ ကိမတ္ထံ? ဗုဘုက္ခတိ။
၄၆၆၊ ၄၈၉။ နိဂ္ဂဟိတဉ္စ ¶ ။
အဗ္ဘာသဿ အန္တေ နိဂ္ဂဟိတာဂမော ဟောတိ ဝါ။
စင်္ကမတိ၊ စဉ္စလတိ၊ ဇင်္ဂမတိ။
ဝါတိ ကိမတ္ထံ? ပိဝါသတိ၊ ဒဒ္ဒလ္လတိ။
၄၆၇၊ ၅၃၃။ တတော ပါမာနာနံ ဝါ မံ သေသု။
တတော အဗ္ဘာသတော ပါမာနဣစ္စေတေသံ ဓာတူနံ ဝါမံဣစ္စေတေ အာဒေသာ ဟောန္တိ ယထာသင်္ချံ သပစ္စယေ ပရေ။
ပိဝါသတိ၊ ဝီမံသတိ။
ဌာဣစ္စေတဿ ဓာတုဿ တိဋ္ဌာဒေသော ဟောတိ ဝါ။
တိဋ္ဌတိ၊ တိဋ္ဌတု၊ တိဋ္ဌေယျ၊ တိဋ္ဌေယျုံ။
ဝါတိ ကိမတ္ထံ? ဌာတိ။
ပါဣစ္စေတဿ ဓာတုဿ ပိဝါဒေသော ဟောတိ ဝါ။
ပိဝတိ၊ ပိဝတု၊ ပိဝေယျ၊ ပိဝေယျုံ။
ဝါတိ ကိမတ္ထံ? ပါတိ။
၄၇၀၊ ၅၁၄။ ဉာဿ ¶ ဇာ ဇံ နာ။
ဉာဣစ္စေတဿ ဓာတုဿ ဇာ ဇံ နာအာဒေသာ ဟောန္တိ ဝါ။
ဇာနာတိ၊ ဇာနေယျ၊ ဇာနိယာ၊ ဇညာ၊ နာယတိ။
၄၇၁၊ ၄၈၃။ ဒိသဿ ပဿ ဒိဿ ဒက္ခာ ဝါ။
ဒိသဣစ္စေတဿ ဓာတုဿ ပဿ ဒိဿ ဒက္ခဣစ္စေတေ အာဒေသာ ဟောန္တိ ဝါ။
ပဿတိ၊ ဒိဿတိ၊ ဒက္ခတိ၊ အဒက္ခ။
ဝါတိ ကိမတ္ထံ? အဒ္ဒသ။
၄၇၂၊ ၅၃၁။ ဗျဉ္ဇနန္တဿ စော ဆပစ္စယေသု စ။
ဗျဉ္ဇနန္တဿ ဓာတုဿ စော ဟောတိ ဆပစ္စယေသု ပရေသု။
ဇိဂုစ္ဆတိ၊ တိကိစ္ဆတိ၊ ဇိဃစ္ဆတိ။
ဗျဉ္ဇနန္တဿ ဓာတုဿ ကော ဟောတိ ခပစ္စယေ ပရေ။
တိတိက္ခတိ ¶ ၊ ဗုဘုက္ခတိ။
ဟရဣစ္စေတဿ ဓာတုဿ သဗ္ဗဿေဝ ဂီအာဒေသော ဟောတိ သပစ္စယေ ပရေ။
ဇိဂီသတိ။
၄၇၅၊ ၅၆၅။ ဗြူဘူနမာဟဘူဝါ ပရောက္ခာယံ။
ဗြူဘူဣစ္စေတေသံ ဓာတူနံ အာဟဘူဝဣစ္စေတေ အာဒေသာ ဟောန္တိ ယထာသင်္ချံ ပရောက္ခာယံ ဝိဘတ္တိယံ။
အာဟ၊ အာဟု၊ ဗဘူဝ၊ ဗဘူဝု။
ပရောက္ခာယမိတိ ကိမတ္ထံ? အဗြစုံ။
၄၇၆၊ ၄၄၂။ ဂမိဿန္တော စ္ဆော ဝါ သဗ္ဗာသု။
ဂမုဣစ္စေတဿ ဓာတုဿ အန္တော မကာရော စ္ဆော ဟောတိ ဝါ သဗ္ဗာသု ပစ္စယဝိဘတ္တီသု။
ဂစ္ဆမာနော၊ ဂစ္ဆန္တော။ ဂစ္ဆတိ၊ ဂမေတိ။ ဂစ္ဆတု၊ ဂမေတု။ ဂစ္ဆေယျ။ ဂမေယျ။ အဂစ္ဆာ၊ အဂမာ။ အဂစ္ဆီ၊ အဂမီ။ ဂစ္ဆိဿတိ၊ ဂမိဿတိ။ အဂစ္ဆိဿာ၊ အဂမိဿာ။
ဂမိဿေတိ ¶ ကိမတ္ထံ? ဣစ္ဆတိ။
၄၇၇၊ ၄၇၉။ ဝစဿဇ္ဇတနိမှိ မကာရော ဩ။
ဝစဣစ္စေတဿ ဓာတုဿ အကာရော ဩတ္တမာပဇ္ဇတေ အဇ္ဇတနိမှိ ဝိဘတ္တိမှိ။
အဝေါစ။ အဝေါစုံ။
အဇ္ဇတနိမှီတိ ကိမတ္ထံ? အဝစ၊ အဝစူ။
၄၇၈၊ ၄၃၈။ အကာရော ဒီဃံ ဟိ မိ မေသု။
အကာရော ဒီဃမာပဇ္ဇတေ ဟိမိမဣစ္စေတေသု ဝိဘတ္တီသု။
ဂစ္ဆာဟိ၊ ဂစ္ဆာမိ၊ ဂစ္ဆာမ၊ ဂစ္ဆာမှေ။
မိကာရဂ္ဂဟဏေန ဟိဝိဘတ္တိမှိ အကာရော ကွစိ န ဒီဃမာပဇ္ဇတေ။ ဂစ္ဆဟိ။
ဟိဝိဘတ္တိ လောပမာပဇ္ဇတေ ဝါ။
ဂစ္ဆ၊ ဂစ္ဆာဟိ၊ ဂမ၊ ဂမာဟိ၊ ဂမယ၊ ဂမယာဟိ။
ဟီတိ ကိမတ္ထံ? ဂစ္ဆတိ၊ ဂမယတိ။
၄၈၀၊ ၄၉၀။ ဟောတိဿရေဟောဟေ ဘဝိဿန္တိမှိဿဿ စ။
ဟူဣစ္စေတဿ ¶ ဓာတုဿ သရော ဧ ဟ ဩဟ ဧတ္တမာပဇ္ဇ တေ ဘဝိဿန္တိမှိ၊ ဿဿ စ လောပေါ ဟောတိ ဝါ။
ဟေဟိတိ၊ ဟေဟိန္တိ၊ ဟောဟိတိ၊ ဟောဟိန္တိ၊ ဟေတိ၊ ဟေန္တိ၊ ဟေဟိဿတိ၊ ဟေဟိဿန္တိ၊ ဟောဟိဿတိ၊ ဟောဟိဿန္တိ၊ ဟေဿတိ၊ ဟေဿန္တိ။
ဟူတိ ကိမတ္ထံ? ဘဝိဿတိ၊ ဘဝိဿန္တိ။
ဘဝိဿန္တိမှီတိ ကိမတ္ထံ? ဟောတိ။
ကရဣစ္စေတဿ ဓာတုဿ သပစ္စယဿ ကာဟာဒေသော ဟောတိ ဝါ ဘဝိဿန္တိမှိ ဝိဘတ္တိမှိ၊ သဿ စ နိစ္စံ လောပေါ ဟောတိ။
ကာဟတိ၊ ကာဟိတိ၊ ကာဟသိ၊ ကာဟိသိ၊ ကာဟာမိ၊ ကာဟာမ။
ဝါတိ ကိမတ္ထံ? ကရိဿတိ၊ ကရိဿန္တိ။
သပစ္စယဂ္ဂဟဏေန အညေဟိပိ ဘဝိဿန္တိယာ ဝိဘတ္တိယာ ခါမိ ခါမ ဆာမိ ဆာမဣစ္စာဒယော အာဒေသာ ဟောန္တိ။ ဝက္ခာမိ၊ ဝက္ခာမ၊ ဝစ္ဆာမိ၊ ဝစ္ဆာမ။
ဣတိ အာချာတကပ္ပေ တတိယော ကဏ္ဍော။
စတုတ္ထကဏ္ဍ
၄၈၂၊ ၅၀၈။ ဒါဒန္တဿံ ¶ မိ မေသု။
ဒါဣစ္စေတဿ ဓာတုဿ အန္တဿ အံ ဟောတိ မိမဣစ္စေတေသု။
ဒမ္မိ၊ ဒမ္မ။
၄၈၃၊ ၅၂၇။ အသံယောဂန္တဿ ဝုဒ္ဓိ ကာရိတေ။
အသံယောဂန္တဿ ဓာတုဿ ကာရိတေ ဝုဒ္ဓိ ဟောတိ။
ကာရေတိ၊ ကာရေန္တိ၊ ကာရယတိ၊ ကာရယန္တိ၊ ကာရာပေတိ၊ ကာရာပေန္တိ၊ ကာရာပယတိ၊ ကာရာပယန္တိ။
အသံယောဂန္တဿေတိ ကိမတ္ထံ? စိန္တယတိ၊ မန္တယတိ။
ဃဋာဒီနံ ဓာတူနံ အသံယောဂန္တာနံ ဝုဒ္ဓိ ဟောတိ ဝါ ကာရိတေ။
ဃာဋေတိ၊ ဃဋေတိ၊ ဃာဋယတိ၊ ဃဋယတိ၊ ဃာဋာပေတိ၊ ဃဋာပေတိ၊ ဃာဋာပယတိ၊ ဃဋာပယတိ၊ ဂါမေတိ၊ ဂမေတိ၊ ဂါမယတိ၊ ဂမယတိ၊ ဂါမာပေတိ၊ ဂမာပေတိ။ ဂါမာပယတိ၊ ဂမာပယတိ။
ဃဋာဒီနမိတိ ကိမတ္ထံ? ကာရေတိ။
၄၈၅၊ ၄၃၄။ အညေသု ¶ စ။
အညေသု စ ပစ္စယေသု သဗ္ဗေသံ ဓာတူနံ အသံယောဂန္တာနံ ဝုဒ္ဓိ ဟောတိ။
ဇယတိ၊ ဟောတိ၊ ဘဝတိ။
စဂ္ဂဟဏေန ဏုပစ္စယဿာပိ ဝုဒ္ဓိ ဟောတိ။ အဘိသုဏောတိ။
ဂုဟ ဒုသဣစ္စေတေသံ ဓာတူနံ သရော ဒီဃမာပဇ္ဇတေ ကာရိတေ။
ဂူဟယတိ၊ ဒူသယတိ။
၄၈၇၊ ၄၇၈။ ဝစ ဝသ ဝဟာဒီနမုကာရော ဝဿ ယေ။
ဝစ ဝသ ဝဟဣစ္စေဝမာဒီနံ ဓာတူနံ ဝကာရဿ ဥကာရော ဟောတိ ယပစ္စယေ ပရေ။
ဥစ္စတေ၊ ဝုစ္စတိ၊ ဂုဿတိ၊ ဝုယှတိ။
ဟကာရဿ ဝိပရိယယော ဟောတိ ယပစ္စယေ ပရေ၊ ယပစ္စယဿ စ လော ဟောတိ ဝါ။
ဝုလှတိ၊ ဝုယှတိ။
၄၈၉၊ ၅၁၉။ ဂဟဿ ¶ ဃေ ပ္ပေ။
ဂဟဣစ္စေတဿ ဓာတုဿ သဗ္ဗဿ ဃေကာရော ဟောတိ ပ္ပပစ္စယေ ပရေ။
ဃေပ္ပတိ။
ဂဟဣစ္စေတဿ ဓာတုဿ ဟကာရဿ လောပေါ ဟောတိ ဏှာမှိ ပစ္စယေ ပရေ။
ဂဏှာတိ။
၄၉၁၊ ၅၂၃။ ကရဿ ကာသတ္တမဇ္ဇတနိမှိ။
ကရဣစ္စေတဿ ဓာတုဿ သဗ္ဗဿ ကာသတ္တံ ဟောတိ ဝါ အဇ္ဇတနိမှိ ဝိဘတ္တိမှိ။
အကာသိ၊ အကာသုံ။ အကရိ၊ အကရုံ။
ကာသတ္တမိတိဘာဝနိဒ္ဒေသေန အညတ္ထာပိ သာဂမော ဟောတိ။ အဟောသိ၊ အဒါသိ။
၄၉၂၊ ၄၉၉။ အသသ္မာ မိမာနံ မှိမှာ’ န္တလောပေါ စ။
အသဣစ္စေတာယ ဓာတုယာ မိမဣစ္စေတေသံ ဝိဘတ္တီနံ မှိမှာဒေသာ ဟောန္တိ ဝါ၊ ဓာတွန္တဿ လောပေါ စ။
အမှိ ¶ ၊ အမှ၊ အသ္မိ၊ အသ္မ။
အသဣစ္စေတာယ ဓာတုယာ ထဿ ဝိဘတ္တိဿ တ္ထတ္တံ ဟောတိ၊ ဓာတွန္တဿ လောပေါ စ။
အတ္ထ။
အသဣစ္စေတာယ ဓာတုယာ တိဿ ဝိဘတ္တိဿ တ္ထိတ္တံ ဟောတိ၊ ဓာတွန္တဿ လောပေါ စ။
အတ္ထိ။
အသဣစ္စေတာယ ဓာတုယာ တုဿ ဝိဘတ္တိဿ တ္ထုတ္တံ ဟောတိ၊ ဓာတွန္တဿ လောပေါ စ။
အတ္ထု။
အသဿေဝ ဓာတုဿ သိမှိ ဝိဘတ္တိမှိ အန္တဿ လောပေါ စ ဟောတိ။
ကော နု တွမသိ မာရိသ။
၄၉၇၊ ၄၇၇။ လဘသ္မာ ¶ ဤ ဣံနံ တ္ထ တ္ထံ။
လဘဣစ္စေတာယ ဓာတုယာ ဤ ဣံနံ ဝိဘတ္တီနံ တ္ထ တ္ထံအာဒေသာ ဟောန္တိ၊ ဓာတွန္တဿ လောပေါ စ။
အလတ္ထ၊ အလတ္ထံ။
ကုသဣစ္စေတာယ ဓာတုယာ ဤဝိဘတ္တိဿ စ္ဆိဟောတိ၊ ဓာတွန္တဿ လောပေါ စ။
အက္ကောစ္ဆိ။
ဒါဣစ္စေတဿ ဓာတုဿ သဗ္ဗဿ ဒဇ္ဇာဒေသော ဟောတိ ဝါ။
ဒဇ္ဇာမိ၊ ဒဇ္ဇေယျ၊ ဒဒါမိ၊ ဒဒေယျ။
ဝဒဣစ္စေတဿ ဓာတုဿ သဗ္ဗဿ ဝဇ္ဇာဒေသော ဟောတိ ဝါ။
ဝဇ္ဇာမိ၊ ဝဇ္ဇေယျ၊ ဝဒါမိ၊ ဝဒေယျ။
၅၀၁၊ ၄၄၃။ ဂမိဿ ¶ ဃမ္မံ။
ဂမုဣစ္စေတဿ ဓာတုဿ သဗ္ဗဿ ဃမ္မာဒေသော ဟောတိ ဝါ။
ဃမ္မတု။ ဃမ္မာဟိ၊ ဃမ္မာမိ။
ဝါတိ ကိမတ္ထံ? ဂစ္ဆတု၊ ဂစ္ဆာဟိ၊ ဂစ္ဆာမိ။
၅၀၂၊ ၄၉၃။ ယမှိ ဒါ ဓာ မာ ဌာ ဟာ ပါ မဟမထာဒီနမီ။
ယမှိ ပစ္စယေ ပရေ ဒါ ဓာ မာ ဌာ ဟာ ပါ မဟ မထ ဣစ္စေဝမာဒီနံ ဓာတူနံ အန္တော ဤကာရမာပဇ္ဇတေ။
ဒီယတိ၊ ဓီယတိ၊ မီယတိ၊ ဌီယတိ၊ ဟီယတိ၊ ပီယတိ၊ မဟီယတိ၊ မထီယတိ။
ယဇဣစ္စေတဿ ဓာတုဿ အာဒိဿ ဣကာရာဒေသော ဟောတိ ယပစ္စယေ ပရေ။
ဣဇ္ဇတေ မယာ ဗုဒ္ဓါ။
သဗ္ဗေဟိ ဓာတူဟိ ဥံဝိဘတ္တိဿ ဣံသုအာဒေသော ဟောတိ။
ဥပသင်္ကမိံသု ¶ ၊ နိသီဒိံသု။
၅၀၅၊ ၄၈၂။ ဇရ မရာနံ ဇီရ ဇိယျ မိယျာ ဝါ။
ဇရ မရ ဣစ္စေတေသံ ဓာတူနံ ဇီရ ဇိယျ မိယျာဒေသာ ဟောန္တိ ဝါ။
ဇီရတိ၊ ဇီရန္တိ၊ ဇိယျတိ၊ ဇိယျန္တိ၊ မိယျတိ၊ မိယျန္တိ၊ မရတိ၊ မရန္တိ။
၅၀၆၊ ၄၉၆။ သဗ္ဗတ္ထာ’ သဿာဒိလောပေါ စ။
သဗ္ဗတ္ထ ဝိဘတ္တိပစ္စယေသု အသဣစ္စေတဿ ဓာတုဿ အာဒိဿ လောပေါ ဟောတိ ဝါ။
သိယာ၊ သန္တိ၊ သန္တေ၊ သမာနော။
ဝါတိ ကိမတ္ထံ? အသိ။
အသဿေဝ ဓာတုဿ ဘူဟောတိ ဝါ အသဗ္ဗဓာတုကေ။
ဘဝိဿတိ။ ဘဝိဿန္တိ။
ဝါတိ ကိမတ္ထံ? အာသုံ။
၅၀၈၊ ၅၁၅။ ဧယျဿ ¶ ဉာတော ဣယာ ဉာ။
ဧယျဿ ဝိဘတ္တိဿ ဉာဣစ္စေတာယ ဓာတုယာ ပရဿ ဣယာ ဉာအာဒေသာ ဟောန္တိ ဝါ။
ဇာနိယာ၊ ဇညာ။
ဝါတိ ကိမတ္ထံ? ဇာနေယျ။
၅၀၉၊ ၅၁၆။ နာဿ လောပေါ ယကာရတ္တံ။
ဉာဣစ္စေတာယ ဓာတုယာ ပရဿ နာပစ္စယဿ လောပေါ ဟောတိ ဝါ၊ ယကာရတ္တဉ္စ။
ဇညာ၊ နာယတိ။
ဝါတိ ကိမတ္ထံ? ဇာနာတိ။
အကာရပစ္စယော လောပမာပဇ္ဇတေ၊ ဧတ္တဉ္စ ဟောတိ ဝါ။
ဝဇ္ဇေမိ၊ ဝဒေမိ၊ ဝဇ္ဇာမိ၊ ဝဒါမိ။
ဩကာရပစ္စယော ဥတ္တမာပဇ္ဇတေ ဝါ။
ကုရုတေ၊ ကရောတိ။
ဩကာရောတိ ¶ ကိမတ္ထံ? ဟောတိ။
ကရဣစ္စေတဿ ဓာတုဿ အကာရော ဥတ္တမာပဇ္ဇတေ ဝါ။
ကုရုတေ၊ တရောတိ၊ တုဗ္ဗန္တိ၊ ကယိရတိ။
ကရဿေတိ ကိမတ္ထံ? သရတိ၊ မရတိ။
ဩကာရဿ ဓာတွန္တဿ သရေ ပရေ အဝါဒေသော ဟောတိ။
စဝတိ။ ဘဝတိ။
ဩတိ ကိမတ္ထံ? ဇယတိ။
ဧကာရဿ ဓာတွန္တဿ သရေ ပရေ အယာဒေသော ဟောတိ။
နယတိ၊ ဇယတိ။
၅၁၅၊ ၅၄၁။ တေ ¶ အာဝါယာ ကာရိတေ။
တေ ဩ ဧဣစ္စေတေ အာဝ အာယာဒေသေ ပါပုဏန္တိ ကာရိတေ။
လာဝေတိ၊ နာယေတိ။
ယောဂဝိဘာဂေန အညသ္မိမ္ပိ ဧကာရဿ အာယာဒေသော ဟောတိ။ ဂါယတိ၊ ဂါယန္တိ။
၅၁၆၊ ၄၆၆။ ဣကာရာဂမော အသဗ္ဗဓာတုကမှိ။
သဗ္ဗသ္မိံ အသဗ္ဗဓာတုကမှိ ဣကာရာဂမော ဟောတိ။
ဂမိဿတိ၊ ကရိဿတိ၊ လဘိဿတိ၊ ပစိဿတိ။
အသဗ္ဗဓာတုကမှီတိ ကိမတ္ထံ? ဂစ္ဆတိ၊ ကရောတိ၊ လဘတိ၊ ပစတိ။
၅၁၇၊ ၄၈၈။ ကွစိ ဓာတုဝိဘတ္တိပစ္စယာနံ ဒီဃ ဝိပရီတာဒေသလောပါဂမာ စ။
ဣဓ အာချာတေ အနိဒ္ဒိဋ္ဌေသု သာဓနေသု ကွစိ ဓာတုဝိဘတ္တိပစ္စယာနံ ဒီဃဝိပရီတာဒေသလောပါဂမဣစ္စေတာနိ ကာရိယာနိ ဇိနဝစနာနုရူပါနိ ကာတဗ္ဗာနိ။
ဇာယတိ ¶ ၊ ကရေယျ၊ ဇာနိယာ၊ သိယာ၊ ကရေ၊ ဂစ္ဆေ၊ ဇညာ၊ ဝက္ခေထ၊ ဒက္ခေထ၊ ဒိစ္ဆတိ၊ အဂစ္ဆိ၊ အဂစ္ဆုံ၊ အဟောသိ၊ အဟေသုံ ဣစ္စေဝမာဒီနိ အညာနိပိ သာဓနာနိ ယောဇေတဗ္ဗာနိ။
၅၁၈၊ ၄၄၆။ အတ္တနောပဒါနိ ပရဿပဒတ္တံ။
အတ္တနောပဒါနိ ကွစိ ပရဿပဒတ္တမာပဇ္ဇန္တေ။
ဝုစ္စတိ၊ လဗ္ဘတိ၊ ပစ္စတိ။
ကွစီတိ ကိမတ္ထံ? ကရီယတေ၊ လဗ္ဘတေ၊ ပစ္စတေ။
၅၁၉၊ ၄၅၇။ အကာရာဂမော ဟိယျတ္တနီအဇ္ဇတနီကာလာတိပတ္တီသု။
ကွစိ အကာရာဂမော ဟောတိ ဟိယျတ္တနီ အဇ္ဇတနီကာလာတိပတ္တိဣစ္စေတာသု ဝိဘတ္တီသု။
အဂမာ၊ အဂမီ၊ အဂမိဿာ။
ကွစီတိ ကိမတ္ထံ? ဂမာ၊ ဂမီ၊ ဂမိဿာ။
ဗြူဣစ္စေတာယ ဓာတုယာ ဤကာရာဂမော ဟောတိ တိမှိ ဝိဘတ္တိမှိ။
ဗြဝီတိ။
၅၂၁၊ ၄၂၅။ ဓာတုဿန္တော ¶ လောပေါ’နေကသရဿ။
ဓာတုဿ အန္တော ကွစိ လောပေါ ဟောတိ အနေကသရဿ။
ဂစ္ဆတိ၊ သရတိ၊ မရတိ။
အနေကသရဿေတိ ကိမတ္ထံ? ပါတိ၊ ယာတိ၊ ဝါတိ။
ကွစီတိ ကိမတ္ထံ? မဟီယတိ၊ မထီယတိ။
၅၂၂၊ ၄၇၆။ ဣသုယမူနမန္တော စ္ဆော ဝါ။
ဣသု ယမု ဣစ္စေတေသံ ဓာတူနံ အန္တော စ္ဆော ဟောတိ ဝါ။ ဣစ္ဆတိ၊ နိယစ္ဆတိ။
ဝါတိ ကိမတ္ထံ? ဧသတိ၊ နိယမတိ။
ကာရိတဣစ္စေတေသံ ပစ္စယာနံ ဏော လောပမာပဇ္ဇတေ။
ကာရေတိ၊ ကာရယတိ၊ ကာရာပေတိ၊ ကာရာပယတိ။
သာသနတ္ထံ သမုဒ္ဒိဋ္ဌံ၊ မယာချာတံ သမာသတော၊
သကံ ဗုဒ္ဓိဝိသေသေန၊ စိန္တယန္တု ဝိစက္ခဏာ။
ဣတိ အာချာတကပ္ပေ စတုတ္ထော ကဏ္ဍော။
အာချာတကပ္ပော နိဋ္ဌိတော။