📜
၇။ ကိဗ္ဗိဓာနကပ္ပ
ပဌမကဏ္ဍ
(က)
ဗုဒ္ဓံ ¶ ဉာဏသမုဒ္ဒံ၊ သဗ္ဗညုံ လောကဟေတု’ခီဏမတိံ၊
ဝန္ဒိတွာ ပုဗ္ဗမဟံ၊ ဝက္ခာမိ သသာဓနံ ဟိ ကိတကပ္ပံ။
(ခ)
သာဓနမူလံ ဟိ ပယောဂံ၊
အာဟု ပယောဂမူလမတ္ထဉ္စ၊
အတ္ထေသု ဝိသာရဒမတယော၊
သာသနဿုဓရာ ဇိနဿ မတာ။
(ဂ)
အန္ဓော ဒေသကဝိကလော၊
ဃတမဓုတေလာနိ ဘာဇနေန ဝိနာ၊
နဋ္ဌော နဋ္ဌာနိ ယထာ၊
ပယောဂဝိကလော တထာ အတ္ထော။
(ဃ)
တသ္မာ သံရက္ခဏတ္ထံ၊ မုနိဝစနတ္ထဿ ဒုလ္လဘဿာဟံ၊
ဝက္ခာမိ သိဿကဟိတံ၊ ကိတကပ္ပံ သာဓနေန ယုတံ။
၅၂၄၊ ၅၆၁။ ဓာတုယာ ကမ္မာဒိမှိ ဏော။
ဓာတုယာ ကမ္မာဒိမှိ ဏပစ္စယော ဟောတိ။
ကမ္မံ ကရောတီတိ ကမ္မကာရော၊ ဧဝံ ကုမ္ဘကာရော၊ မာလာကာရော၊ ကဋ္ဌကာရော၊ ရထကာရော၊ ရဇတကာရော ¶ ၊ သုဝဏ္ဏကာရော၊ ပတ္တဂ္ဂါဟော၊ တန္တဝါယော၊ ဓညမာယော၊ ဓမ္မကာမော၊ ဓမ္မစာရော။
သညာယမဘိဓေယျာယံ ဓာတုယာ ကမ္မာဒိမှိ အကာရပစ္စယော ဟောတိ၊ နာမမှိ စ နုကာရာဂမော ဟောတိ။
အရိံ ဒမေတီတိ အရိန္ဒမော၊ ရာဇာ။ ဝေဿံ တရတီတိ ဝေဿန္တရော၊ ရာဇာ။ တဏှံ ကရောတီတိ တဏှင်္ကရော၊ ဘဂဝါ။ မေဓံ ကရောတီတိ မေဓင်္ကရော၊ ဘဂဝါ။ သရဏံ ကရောတီတိ သရဏင်္ကရော၊ ဘဂဝါ။ ဒီပံ ကရောတီတိ ဒီပင်္ကရော၊ ဘဂဝါ။
ပုရသဒ္ဒေ အာဒိမှိ ဒဒဣစ္စေတာယ ဓာတုယာ အကာရပစ္စယော ဟောတိ၊ ပုရသဒ္ဒဿ အကာရဿ စ ဣံ ဟောတိ။
ပုရေ ဒါနံ အဒါသီတိ ပုရိန္ဒဒေါ ဒေဝရာဇာ။
၅၂၇၊ ၅၆၈။ သဗ္ဗတော ဏွု တွာဝီ ဝါ။
သဗ္ဗတော ဓာတုတော ကမ္မာဒိမှိ ဝါ အကမ္မာဒိမှိ ဝါ အကာရ ဏွု တု အာဝီဣစ္စေတေ ပစ္စယာ ဟောန္တိ။
တံ ¶ ကရောတီတိ တက္ကရော၊ ဟိတံ ကရောတီတိ ဟိတကရော၊ ဝိနေတိ ဧတ္ထ၊ ဧတေနာတိ ဝါ ဝိနယော နိဿာယ နံ ဝသတီတိ နိဿယော။
ဏွုမှိ – ရထံ ကရောတီတိ ရထကာရကော၊ အန္နံ၊ ဒဒါတီတိ အန္နဒါယကော၊ ဝိနေတိ သတ္တေတိ ဝိနာယကော၊ ကရောတီတိ ကာရကော၊ ဒဒါတီတိ ဒါယကော၊ နေတီတိ နာယကော။
တုမှိ – တံ ကရောတီတိ တက္ကတ္တာ၊ တဿ ကတ္တာတိ ဝါ တက္ကတ္တာ။ ဘောဇနံ ဒဒါတီတိ ဘောဇနဒါတာ၊ ဘောဇနဿ ဒါတာတိ ဝါ ဘောဇနဒါတာ။ ကရောတီတိ ကတ္တာ။ သရတီတိ သရိတာ။
အာဝီမှိ – ဘယံ ပဿတီတိ ဘယဒဿာဝီ ဣစ္စေဝမာဒိ။
ဝိသ ရုဇ ပဒဣစ္စေဝမာဒီဟိ ဓာတူဟိ ဏ ပစ္စယော ဟောတိ။
ပဝိသတီတိ ပဝေသော၊ ရုဇတီတိ ရောဂေါ၊ ဥပ္ပဇ္ဇတီတိ ဥပ္ပာဒေါ၊ ဖုသတီတိ ဖဿော၊ ဥစတီတိ ဩကော၊ ဘဝတီတိ ဘာဝေါ၊ အယတီတိ အာယော၊ သမ္မာ ဗုဇ္ဈတီတိ သမ္ဗောဓော၊ ဝိဟရတီတိ ဝိဟာရော။
၅၂၉၊ ၅၈၀။ ဘာဝေ ¶ စ။
ဘာဝတ္ထာဘိဓေယျေ သဗ္ဗဓာတူဟိ ဏပစ္စယော ဟောတိ။
ပစ္စတေ၊ ပစနံ ဝါ ပါတော၊ စဇတေ၊ စဇနံ ဝါ စာဂေါ၊ ဧဝံ ယာဂေါ၊ ယောဂေါ၊ ဘာဂေါ၊ ပရိဒါဟော။
သဗ္ဗဓာတူဟိ ကွိပစ္စယော ဟောတိ။
သမ္ဘဝတီတိ သမ္ဘူ၊ ဝိသေသေန ဘဝတီတိ ဝိဘူ၊ ဘုဇေန ဂစ္ဆတီတိ ဘုဇဂေါ၊ သံ အတ္တာနံ ခနတိ၊ သံ သဋ္ဌု ခနတီတိ ဝါ သင်္ခေါ။
ဓရဣစ္စေဝမာဒီဟိ ဓာတူဟိ ရမ္မပစ္စယော ဟောတိ။
ဓရတိ တေနာတိ ဓမ္မော၊ ကရီယတေ တန္တိ ကမ္မံ။
၅၃၂၊ ၅၉၀။ တဿီလာဒီသု ဏီတွာဝီ စ။
သဗ္ဗေဟိ ဓာတူဟိ တဿီလာဒီသွတ္ထေသု ဏီ တု အာဝီ ဣစ္စေတေ ပစ္စယာ ဟောန္တိ။
ပိယံ ပသံသိတုံ သီလံ ယဿ ရညော၊ သော ဟောတိ ရာဇာ ပိယပသံသီ၊ ဗြဟ္မံ စရိတုံ သီလံ ယဿ ပုဂ္ဂလဿ သော ¶ ဟောတိ ပုဂ္ဂလော ဗြဟ္မစာရီ၊ ပသယှ ပဝတ္တိတုံ သီလံ ယဿ ရညော၊ သော ဟောတိ ရာဇာ ပသယှပဝတ္ထာ၊ ဘယံ ပဿိတုံ သီလံ ယဿ သမဏဿ၊ သော ဟောတိ သမဏော ဘယဒဿာဝီ ဣစ္စေဝမာဒိ။
၅၃၃၊ ၅၉၁။ သဒ္ဒ ကု ဓ စလ မဏ္ဍတ္ထရုဓာဒီဟိယု။
သဒ္ဒ ကုဓ စလ မဏ္ဍတ္ထေဟိ စ ရုစာဒီဟိ စ ဓာတူဟိ ယုပစ္စယော ဟောတိ တဿီလာဒီသွတ္ထေသု။
ဃောသနသီလော ဃောသနော၊ ဘာသနသီလော ဘာသနော။ ဧဝံ ဝိဂ္ဂဟော ကာတဗ္ဗော။ ကောဓနော၊ ဒေါသနော၊ စလနော၊ ကမ္ပနော၊ ဖန္ဒနော၊ မဏ္ဍနော၊ ဝိဘူသနော၊ ရောစနော၊ ဇောတနော၊ ဝဍ္ဎနော။
ဂမုဣစ္စေတမှာ ဓာတုမှာ ပါရသဒ္ဒါဒိမှာ ရူပစ္စယော ဟောတိ တဿီလာဒီသွတ္ထေသု။
ဘဝဿ ပါရံ ဘဝပါရံ၊ ဘဝပါရံ ဂန္တုံ သီလံ ယဿ ပုရိသဿ၊ သော ဟောတိ ပုရိသော ဘဝပါရဂူ။
တဿီလာဒီသွီတိ ကိမတ္ထံ? ပါရင်္ဂတော။
ပါရာဒိဂမိမှာတိ ကိမတ္ထံ? အနုဂါမီ။
၅၃၅၊ ၅၉၃။ ဘိက္ခာဒိတော ¶ စ။
ဘိက္ခဣစ္စေဝမာဒီဟိ ဓာတူဟိ ရူပစ္စယော ဟောတိ တဿီလာဒီသွတ္ထေသု။
ဘိက္ခနသီလော ယာစနသီလော ဘိက္ခု၊ ဝိဇာနနသီလော ဝိညူ။
ဟနတျာဒီနံ ဓာတူနံ အန္တေ ဏုကပစ္စယော ဟောတိ တဿီလာဒီသွတ္ထေသု။
အာဟနနသီလော အာဃာတုကော၊ ကရဏသီလော ကာရုကော။
၅၃၇၊ ၅၆၆။ နု နိဂ္ဂဟိတံ ပဒန္တေ။
ပဒန္တေ နုကာရာဂမော နိဂ္ဂဟိတမာပဇ္ဇတေ။
အရိံ ဒမေတီတိ အရိန္ဒမော၊ ရာဇာ။ ဝေဿံ တရတီတိ ဝေဿန္တရော၊ ရာဇာ။ ပဘံ ကရောတီတိ ပဘင်္ကရော၊ ဘဂဝါ။
၅၃၈၊ ၅၉၅။ သံဟနာညာယ ဝါ ရော ဃော။
သံပုဗ္ဗာယ ဟနဣစ္စေတာယ ဓာတုယာ၊ အညာယ ဝါ ဓာတုယာ ရပစ္စယော၊ ဟနဿ စ ဃော ဟောတိ။
သမဂ္ဂံ ¶ ကမ္မံ သမုပဂစ္ဆတီတိ သင်္ဃော၊ သမန္တတော နဂရဿ မာဟိရေ ခညတီတိ ပရိခါ၊ အန္တံ ကရောတီတိ အန္တကော။
သံဣတိ ကိမတ္ထံ? ဥပဟနနံ ဥပဃာတော။
၅၃၉၊ ၅၅၈။ ရမှိ ရန္တော ရာဒိနော။
ရမှိ ပစ္စယေ ပရေ သဗ္ဗော ဓာတွန္တော ရကာရာဒိ လောပေါ ဟောတိ။
အန္တကော၊ ပါရဂူ၊ သတ္ထာ၊ ဒိဋ္ဌော ဣစ္စေဝမာဒိ။
၅၄၀၊ ၅၄၅။ ဘာဝကမ္မေသု တဗ္ဗာနီယာ။
ဘာဝကမ္မဣစ္စေတေသွတ္ထေသု တဗ္ဗ အနီယဣစ္စေတေ ပစ္စယာ ဟောန္တိ သဗ္ဗဓာတူဟိ။
ဘဝိတဗ္ဗံ၊ ဘဝနီယံ၊ အာသိတဗ္ဗံ၊ အာသနီယံ၊ ပဇ္ဇိတဗ္ဗံ၊ ပဇ္ဇနီယံ၊ ကတ္တဗ္ဗံ၊ ကရဏီယံ၊ ဂန္တဗ္ဗံ၊ ဂမနီယံ။
ဘာဝကမ္မေသု သဗ္ဗဓာတူဟိ ဏျပစ္စယော ဟောတိ။
ကတ္တဗ္ဗံ ကာရိယံ၊ ဇေတဗ္ဗံ ဇေယျံ၊ နေတဗ္ဗံ နေယျံ၊ ဣစ္စေဝမာဒိ။
စဂ္ဂဟဏေန ¶ တေယျပစ္စယော ဟောတိ။ ဉာတဗ္ဗံ ဉာတေယျံ၊ ဒဋ္ဌေယျံ၊ ပတ္တေယျံ ဣစ္စေဝမာဒိ။
ကရဣစ္စေတမှာ ဓာတုမှာ ရိစ္စပစ္စယော ဟောတိ ဘာဝကမ္မေသု။
ကတ္တဗ္ဗံ ကိစ္စံ။
ဘူဣစ္စေတာယ ဓာတုယာ ဏျပစ္စယဿ ဦကာရေန သဟ အဗ္ဗာဒေသော ဟောတိ ဘာဝကမ္မေသု။
ဘဝိတဗ္ဗော ဘဗ္ဗော၊ ဘဝိတဗ္ဗံ ဘဗ္ဗံ။
၅၄၄၊ ၅၅၆။ ဝဒ မဒ ဂမု ယုဇ ဂရဟာကာရာဒီဟိ ဇ္ဇ မ္မ ဂ္ဂ ယှေယျာ ဂါရော ဝါ။
ဝဒ မဒ ဂမု ယုဇ ဂရဟာကာရန္တဣစ္စေဝမာဒီဟိ ဓာတူဟိ ဏျပစ္စယဿ ယထာသင်္ချံ ဇ္ဇ မ္မ ဂ္ဂ ယှ ဧယျာဒေသာ ဟောန္တိ ဝါ ဓာတွန္တေန သဟ၊ ဂရဿံ စ ဂါရော ဟောတိ ဘာဝကမ္မေသု။
ဝတ္တဗ္ဗံ ဝဇ္ဇံ၊ မဒနီယံ မဇ္ဇံ၊ ဂမနီယံ ဂမ္မံ၊ ယောဇနီယံ ယောဂ္ဂံ၊ ဂရဟိတဗ္ဗံ ဂါရယှံ၊ ဒါတဗ္ဗံ ဒေယျံ၊ ပါတဗ္ဗံ ပေယျံ၊ ဟာတဗ္ဗံ ¶ ဟေယျံ၊ မာတဗ္ဗံ မေယျံ၊ ဉာတဗ္ဗံ ဉေယျံ၊ ဣစ္စေဝမာဒိ။
ယေ ပစ္စယာ တဗ္ဗာဒယော ရိစ္စန္တာ၊ တေ ကိစ္စသညာတိ ဝေဒိတဗ္ဗာ။
ကိစ္စသညာယ ကိံပယောဇနံ? ဘာဝကမ္မေသု ကိစ္စတ္တခတ္ထာ။
အညေ ပစ္စယာ ကိတ ဧဝ သညာ ဟောန္တိ။
ကိတ သညာယ ကိံပယောဇနံ? ကတ္တရိ ကိတ။
နန္ဒာဒီဟိ ဓာတူဟိ ယုပစ္စယော ဟောတိ ဘာဝကမ္မေသု။
နန္ဒီယတေ နန္ဒနံ၊ နိန္ဒိတဗ္ဗံ ဝါ နန္ဒနံ၊ ဂဟဏီယံ ဂဟဏံ၊ စရိတဗ္ဗံ စရဏံ၊ ဧဝံ သဗ္ဗတ္ထ ယောဇေတဗ္ဗာ။
ကတ္တုကရဏပဒေသဣစ္စေတေသွတ္ထေသု စ ယုပစ္စယော ဟောတိ။
ကတ္တရိ ¶ တာဝ – ရဇံ ဟရတီတိ ရဇောဟရဏံ တောယံ။
ကရဏေ တာဝ – ကရောတိ တေနာတိ ကရဏံ။
ပဒေသေ တာဝ – တိဋ္ဌန္တိ တသ္မိန္တိ ဌာနံ။ ဧဝံ သဗ္ဗတ္ထ ယောဇေတဗ္ဗာ။
ရကာရဟကာရာဒျန္တေဟိ ဓာတူဟိ အနာဒေသဿ နဿ ဏော ဟောတိ။
ကရောတိ တေနာတိ ကရဏံ၊ ပူရေတိ တေနာတိ ပူရဏံ။ ဂဟဏီယံ တေနာတိ ဂဟဏံ။ ဧဝမညေပိ ယောဇေတဗ္ဗာ။
ဣတိ ကိဗ္ဗိဓာနကပ္ပေ ပဌမော ကဏ္ဍော။
ဒုတိယကဏ္ဍ
ဏာဒယော ပစ္စယာ ယုပစ္စယန္တာ တေကာလိကာတိ ဝေဒိတဗ္ဗာ။
ကုမ္ဘံ ကရောတိ အကာသိ ကရိဿတီတိ ကုမ္ဘကာရော၊ ကရောတိ အကာသိ ကရိဿတိ တေနာတိ ကရဏံ။ ဧဝမညေပိ ယောဇေတဗ္ဗာ။
၅၅၁၊ ၅၉၈။ သညာယံ ¶ ဒါ ဓာတော ဣ။
သညာယမဘိဓေယျာယံ ဒါ ဓာတော ဣပစ္စယော ဟောတိ။
ပဌမံ အာဒီယတီတိ အာဒိ၊ ဥဒကံ ဒဓာတီတိ ဥဒမိ၊ မဟောဒကာနိ ဒဓာတီတိ မဟောဒဓိ၊ ဝါလာနိ ဒဓာတိ တသ္မိန္တိ ဝါလဓိ၊ သမ္မာ ဓီယတီတိ သန္ဓိ။
သညာယမဘိဓေယျာယံ သဗ္ဗဓာတူဟိ တိပစ္စယော ဟောတိ၊ ကိတ စ အာသိဋ္ဌေ။
ဇိနော ဇနံ ဗုဇ္ဈတူတိ ဇိနဗုဒ္ဓိ၊ ဓနံ အဿ ဘဝတူတိ ဓနဘူတိ၊ ဘဝတူတိ ဘူတော၊ ဘဝတူတိ ဘာဝေါ၊ ဓမ္မော ဇနံ ဒဒါတူတိ ဓမ္မဒိန္နော၊ ဝဍ္ဎတူတိ ဝဍ္ဎမာနော။ ဧဝမညေပိ ယောဇေတဗ္ဗာ။
ဣတ္ထိယမဘိဓေယျာယံ သဗ္ဗဓာတူဟိ အကာရ တိ ယု ဣစ္စေတေ ပစ္စယာ ဟောန္တိ ဝါ။
ဇီရတီတီ ဇရာ၊ မညတီတိ မတိ၊ စေတယတီတိ စေတနာ၊ ဝေဒယတီတိ ဝေဒနာ။ ဧဝမညေပိ ယောဇေတဗ္ဗာ။
၅၅၄၊ ၆၀၁။ ကရတော ¶ ရိရိယ။
ကရတော ဣတ္ထိယမနိတ္ထိယံ ဝါ အဘိခေယျာယံ ရိရီယပစ္စယော ဟောတိ ဝါ။
ကတ္တဗ္ဗာ ကိရိယာ၊ ကရဏီယံ ကိရိယံ။
အတီတေ ကာလေ သဗ္ဗဓာတူဟိ တတဝန္တုတာဝီဣစ္စေတေ ပစ္စယာ ဟောန္တိ။
ဟုတော၊ ဟုတဝါ၊ ဟုတာဝီ။ ဝုသိတော၊ ဝုသိတဝါ၊ ဝုသိတာဝီ။ ဘုတ္တော၊ ဘုတ္တဝါ၊ ဘုတ္တာဝီ။
ဘာဝကမ္မေသု အတီတေ ကာလေ တပစ္စယော ဟောတိ သဗ္ဗဓာတူဟိ။
ဘာဝေ တာဝ – တဿ ဂီတံ၊ နစ္စံ၊ နဋ္ဋံ၊ ဟသိတံ။
ကမ္မနိ တာဝ – တေန ဘာသိတံ၊ ဒေသိတံ။
၅၅၇၊ ၆၀၆။ ဗုဓဂမာဒိတ္ထေ ကတ္တရိ။
ဗုဓဂမုဣစ္စေဝမာဒီဟိ ဓာတူဟိ တဒတ္ထေ ဂမျမာနေ တပစ္စယော ဟောတိ ကတ္တရိ သဗ္ဗကာလေ။
သဗ္ဗေ ¶ သင်္ခတာသင်္ခတေ ဓမ္မေ ဗုဇ္ဈတိ အဗုဇ္ဈိ ဗုဇ္ဈိဿတီတိ ဗုဒ္ဓါ၊ သရဏင်္ဂတော၊ သမထင်္ဂတော၊ အမထင်္ဂတော၊ ဇာနာတိ အဇာနိ ဇာနိဿတီတိ ဉာတော၊ ဣစ္စေဝမာဒိ။
ဇိဣစ္စေတာယ ဓာတုယာ ဣနပစ္စယော ဟောတိ သဗ္ဗကာလေ ကတ္တရိ။
ပါပကေ အကုသလေ ဓမ္မေ ဇိနာတိ အဇိနိ ဇိနိဿတီတိ ဇိနော။
သုပဣစ္စေတာယ ဓာတုယာ ဣနပစ္စယော ဟောတိ ကတ္တရိ၊ ဘာဝေ စ။
သုပတီတိ သုပိနံ၊ သုပီယတေ သုပိနံ။
ဤသံဒုသုသဒ္ဒါဒီဟိ သဗ္ဗဓာတူဟိ ခပစ္စယော ဟောတိ။
ဤသဿယော၊ ဒုဿယော၊ သုဿယော ဘဝတာ၊ ဤသက္ကရံ၊ ဒုက္ကရံ၊ သုကရံ၊ ဘဝတာ။
၅၆၁၊ ၆၃၆။ ဣစ္ဆတ္ထေသု ¶ သမာနကတ္တုကေသု တဝေ တုံ ဝါ။
ဣစ္ဆတ္ထေသု သမာနကတ္တုကေသု သဗ္ဗဓာတူဟိတဝေတုံဣစ္စေတေ ပစ္စယာ ဟောန္တိ သဗ္ဗကာလေ ကတ္တရိ။
ပုညာနိ ကာတဝေ၊ သဒ္ဓမ္မံ သောတု မိစ္ဆတိ။
အရဟသက္ကာဒီသု စ အတ္ထေသု သဗ္ဗဓာတူဟိ တုံပစ္စယော ဟောတိ။
ကော တံ နိန္ဒိတုမရဟတိ၊ သက္ကာ ဇေတုံ ဓနေန ဝါ။ ဧဝမညေပိ ယောဇေတဗ္ဗာ။
၅၆၃၊ ၆၃၉။ ပတ္တဝစနေ အလမတ္ထေသု စ။
ပတ္တဝစနေ အလမတ္ထေသု သဗ္ဗဓာတူဟိ တုံပစ္စယော ဟောတိ။
အလမေဝ ဒါနာနိ ဒါတုံ၊ အလမေဝ ပုညာနိ ကာတုံ။
၅၆၄၊ ၆၄၀။ ပုဗ္ဗကာလေ’ ကကတ္တုကာနံ တုန တွာန တွာဝါ။
ပုဗ္ဗကာလေ ဧကကတ္တုကာနံ ဓာတူနံ တုနတွာန တွာဣစ္စေတေ ပစ္စယာ ဟောန္တိ ဝါ။
ကာတုန ¶ ကမ္မံ ဂစ္ဆတိ၊ အကာတုန ပုညံ ကိလိဿတိ၊ သတ္တာ သုတွာန ဓမ္မံ မောဒန္တိ၊ ရိပုံ ဇိတွာန ဝသတိ၊ ဓမ္မံ သုတွာန’ဿ ဧတဒဟောသိ၊ ဣတော သုတွာန အမုတြ ကထယန္တိ၊ သုတွာ ဇာနိဿာမ။ ဧဝံ သဗ္ဗတ္ထ ယောဇေတဗ္ဗာ။
ဝတ္တမာနေ ကာလေ သဗ္ဗဓာတူဟိ မာနအန္တဣစ္စေတေ ပစ္စယာ ဟောန္တိ။
သရမာနော ရောဒတိ။ ဂစ္ဆန္တော ဂဏှာတိ။
သာသဣစ္စေဝမာဒီဟိ ဓာတူဟိ ရတ္ထုပစ္စယော ဟောတိ။
သာသတီတိ သတ္ထာ၊ သာသတိ ဟိံသတီတိ ဝါ သတ္ထာ။
ပါဣစ္စေတာယ ဓာတုယာ ရိတုပစ္စယော ဟောတိ။
ပါတိ ပုတ္တန္တိ ပိတာ။
၅၆၈၊ ၅၇၆။ မာနာဒီဟိ ¶ ရာတု။
မာနဣစ္စေဝမာဒီဟိ ဓာတူဟိ ရာတုပစ္စယော ဟောတိ၊ ရိတု ပစ္စယော စ။
ဓမ္မေန ပုတ္တံ မာနေတီတိ မာတာ၊ ပုဗ္ဗေ ဘာသတီတိ ဘာတာ၊ မာတာပိတူဟိ ဓာရီယတီတိ ဓီတာ။
အာဣစ္စာဒိမှာ ဂမိတော တုကပစ္စယော ဟောတိ။
အာဂစ္ဆတီတိ အာဂန္တုကော၊ ဘိက္ခု။
ဂမုဣစ္စေတမှာ ဓာတုမှာ ဣကပစ္စယော ဟောတိ ဘဗ္ဗေ။ ဂမိဿတိ ဂန္တုံ ဘဗ္ဗောတိ ဂမိကော၊ ဘိက္ခု။
ဣတိ ကိဗ္ဗိဓာနကပ္ပေ ဒုတိယော ကဏ္ဍော။
တတိယကဏ္ဍ
၅၇၁၊ ၆၂၄။ ပစ္စယာဒနိဋ္ဌာ နိပါတနာ သိဇ္ဈန္တိ၊
သင်္ချာနာမသမာသတဒ္ဓိတာချာတကိတကပ္ပမှိ သပ္ပစ္စယာ ယေ သဒ္ဒါ အနိဋ္ဌင်္ဂတာ၊ တေ သာဓနေန နိရက္ခိတွာ သကေဟိ သကေဟိ နာမေဟိ နိပါတနာ သိဇ္ဈန္တိ။
သင်္ချာယံ ¶ တာဝ – ဧကဿ ဧတာ ဟောတိ၊ ဒသဿ စ ဒကာရဿ ရကာရာဒေသော ဟောတိ။ ဧကော စ ဒသ စ ဧကာရသ။
ဒွိဿ ဗာ ဟောတိ၊ ဒသဿ စ ဒကာရဿ ရကာရာဒေသော ဟောတိ၊ ဒွေ စ ဒသ စ ဗာရသ။
ဒွိဿ ဗာ ဟောတိ၊ ဒသဿ စ ဝီသံ ဟောတိ။ ဒွေ စ ဝီသဉ္စ ဗာဝီသံ။
ဆဿ သော ဟောတိ၊ ဒသဿ စ ဒကာရဿ ဠော ဟောတိ၊ ဆ စ ဒသ စ သောဠသ။
ဆအာယတနမှိ ဆဿ သဠော ဟောတိ၊ သဠာယတနံ။ ဧဝံ သေသာ သင်္ချာ ကာတဗ္ဗာ။
နာမိကေ တာဝ-ဣမ သမာန အပရဣစ္စေတေဟိ ဇ္ဇဇ္ဇု ပစ္စယာ ဟောန္တိ၊ ဣမ သမာနသဒ္ဒါနဉ္စ အကာရသကာရာဒေသာ ဟောန္တိ။ ဣမသ္မိံ ကာလေ အဇ္ဇ၊ အဇ္ဇု၊ သမာနေ ကာလေ သဇ္ဇ၊ သဇ္ဇု၊ အပရသ္မိံ ကာလေ အပရဇ္ဇ၊ အပရဇ္ဇု။
သမာသေ တာဝ – ဘူမိဂတော၊ အပါယဂတော၊ ဣဿရကတံ။ သလ္လဝိဒ္ဓါ၊ ကထိနဒုဿံ၊ စောရဘယံ၊ ဓညရာသိ၊ သံသာရဒုက္ခံ၊ ပုဗ္ဗာပရံ။
တဒ္ဓိတေ ¶ တာဝ – ဝါသိဋ္ဌော၊ ဘာရဒွါဇော၊ ဘဂ္ဂဝေါ၊ ပဏ္ဍဝေါ၊ ကာလေယျော။
အာချာတေ တာဝ – ‘‘အသ ဘာဝေ’’တိ ဓာတုတော ဝတ္တမာနေသု ဧကဝစနဗဟုဝစနေသု ဧကဝစနဿ တိဿ ဿော ဟောတိ အန္တေန သဟ၊ ဗဟုဝစနဿ အန္တိဿ ဿု ဟောတိ အန္တေန သဟ။ ဧဝမဿ ဝစနီယော၊ ဧဝမဿု ဝစနီယာ။
အာဏတ္တိယံ ဟိဿ ဿု ဟောတိ ဝါ၊ ဂစ္ဆဿု၊ ဂစ္ဆာဟိ။
ကိတကေ တာဝ – ဝဒ ဟနဣစ္စေဝမာဒီဟိ ဓာတူဟိ ကပစ္စယော ဟောတိ၊ ဝဒဿ စ ဝါဒေါ ဟောတိ၊ ဟနဿ စ ဃာတော ဟောတိ။ ဝါဒကော၊ ဃာတကော။
နဋဓာတုတော တပဉ္စယဿ စ္စ ဋ္ဋာဒေသာ ဟောန္တိ အန္တေန သဟ။ နစ္စံ၊ နဋ္ဋံ။ ဣစ္စေဝမာဒယော နိပါတနာ သိဇ္ဈန္တိ။
၅၇၂၊ ၆၂၅။ သာသ ဒိသတော တဿ ရိဋ္ဌော စ။
သာသ ဒိသဣစ္စေဝမာဒီဟိ ဓာတူဟိ တပစ္စယဿ ရိဋ္ဌာဒေသော ဟောတိ ဌာနေ။
အနုသိဋ္ဌော သော မယာ၊ ဒိဋ္ဌံ မေ ရူပံ။
စဂ္ဂဟဏေန ¶ ကိစ္စတကာရဿ စ တုံ ပစ္စယဿ စ ရဋ္ဌရဋ္ဌုံအာဒေသာ ဟောန္တိ။ ဒဿနီယံ ဒဋ္ဌဗ္ဗံ။ ဒဋ္ဌုံ ဝိဟာရံ ဂစ္ဆန္တိ သမဏာနံ။
၅၇၃၊ ၆၂၆။ သာဒိသန္တ ပုစ္ဆ ဘန္ဇ ဟန္သာဒီဟိဋ္ဌော။
သကာရန္တ ပုစ္ဆ ဘန္ဇ ဟန္သ ဣစ္စေဝမာဒီဟိ ဓာတူဟိ တပစ္စယဿ သဟာဒိဗျဉ္ဇနေန ဋ္ဌာဒေသော ဟောတိ ဌာနေ။
တုဋ္ဌော၊ အဟိနာ ဒဋ္ဌော နရော၊ မယာ ပုဋ္ဌော၊ ဘဋ္ဌော၊ ပဘဋ္ဌော၊ ဟဋ္ဌော၊ ပဟဋ္ဌော၊ ယိဋ္ဌော။ ဧဝမညေပိ ဓာတဝေါ သဗ္ဗတ္ထ ယောဇေတဗ္ဗာ။
ဝသဣစ္စေတမှာ ဓာတုမှာ တကာရပစ္စယဿ သဟာဒိဗျဉ္ဇနေန ဥဋ္ဌာဒေသော ဟောတိ ဌာနေ။
ဝဿံဝုဋ္ဌော။
ဝသဿေဝ ဓာတုဿ တပစ္စယေ ပရေ ဝကာရဿ ဥကာရာဒေသော ဟောတိ ဝါ။
ဝုသိတံ ဗြဟ္မစရိယံ၊ ဥဋ္ဌော။ ဝုဌော ဝါ။
၅၇၆၊ ၆၀၇။ ဓ ¶ ဎ ဘ ယေ ဟိ ဓ ဎာ စ။
ဓ ဎ ဘ ဟဣစ္စေဝမန္တေဟိ ဓာတူဟိ တကာရပစ္စယဿ ယထာက္ကမံ ဓ ဎာဒေသာ ဟောန္တိ။
ယထာ? ဗုဒ္ဓါ ဘဂဝါ၊ ဝဍ္ဎော ဘိက္ခု၊ လဒ္ဓံ မေ ပတ္ထစီဝရံ၊ အဂ္ဂိနာ ဒဍ္ဎံ ဝနံ။
ဘန္ဇတော ဓာတုမှာ တကာရပစ္စယဿ ဂ္ဂေါ အာဒေသော ဟောတိ သဟာဒိဗျဉ္ဇနေန။
ဘဂ္ဂေါ။
၅၇၈၊ ၅၆၀။ ဘုဇာဒီနမန္တော နော ဒွိ စ။
ဘုဇဣစ္စေဝမာဒီနံ ဓာတူနံ အန္တော နော ဟောတိ၊ တပစ္စယဿ စ ဒွိတာဝေါ ဟောတိ။
ဘုတ္တော၊ ဘုတ္တာဝီ၊ စတ္တော၊ သတ္တော၊ ရတ္တော၊ ယုတ္တော၊ ဝိဝိတ္တော။
ဝစဣစ္စေတဿ ¶ ဓာတွဿ ဝကာရဿ ဥကာရာဒေသော ဟောတိ အန္တော စကာရော နော ဟောတိ၊ တပစ္စယဿ စ ဒွေဘာဝေါ ဟောတိ ဝါ။
ဝုတ္တံ ဘဂဝတာ၊ ဥတ္တံ ဝါ။
ဂုပဣစ္စေဝမာဒီနံ ဓာတူနံ အန္တော စ ဗျဉ္ဇနော နော ဟောတိ၊ တပစ္စယဿ စ ဒွေဘာဝေါ ဟောတိ။
သုဂုတ္တော၊ စတ္တော၊ လိတ္တော၊ သန္တတ္တော၊ ဥတ္တော၊ ဝိဝိတ္တော၊ သိတ္တော။ ဧဝမညေပိ ယောဇေတဗ္ဗာ။
တရဣစ္စေဝမာဒီဟိ ဓာတူဟိ တပစ္စယဿ ဣဏ္ဏာဒေသော ဟောတိ၊ အန္တော စ ဗျဉ္ဇနော နော ဟောတိ။
တရတီတိ တိဏ္ဏော၊ ဥတ္တရတီတိ ဥတ္တိဏ္ဏော၊ သံပူရတီတိ သမ္ပုဏ္ဏော၊ တုရတီတိ တုဏ္ဏော၊ ပရိဇီရတီတိ ပရိဇိဏ္ဏော၊ အာကိရတီတိ အာကိဏ္ဏော။
၅၈၂၊ ၆၃၁။ ဘိဒါဒိတော ¶ ဣန္န အန္န ဤဏာဝါ။
ဘိဒိဣစ္စေဝမာဒီဟိ ဓာတူဟိ တပစ္စယဿ ဣန္န အန္န ဤဏာဒေသာ ဟောန္တိ ဝါ၊ အန္တော စ ဗျဉ္ဇနော နော ဟောတိ။
ဘိန္ဒိတဗ္ဗောတိ ဘိန္နော၊ ဆိန္ဒီယတီတိ ဆိန္နော၊ ဥစ္ဆိန္ဒီယိတ္ထာတိ ဥစ္ဆိန္နော၊ ဒီယတီတိ ဒိန္နော၊ နိသီဒတီတိ နိသိန္နော၊ သုဋ္ဌု ဆာဒီယတီတိ သုဆန္နော၊ ခိဒတီတိ ခိန္နော၊ ရောဒတီတိ ရုန္နော၊ ခီဏာ ဇာတိ။
ဝါတိ ကိမတ္ထံ? ဘိဇ္ဇတီတိ ဘိတ္တိ။
၅၈၃၊ ၆၁၇။ သုသ ပစ သကတော က္ခ က္ကာ စ။
သုသ ပစ သကဣစ္စေဝမာဒီဟိ ဓာတူဟိ တပစ္စယဿ က္ခက္ကာဒေသာ ဟောန္တိ၊ အန္တော စ ဗျဉ္ဇနော နော ဟောတိ။
သုဿတီတိ သုက္ခံ၊ ကဋ္ဌံ၊ ပစ္စတီတိ ပက္ကံ၊ ဖလံ။ သကတိ သမတ္ထေတိ၊ ပူဇေတီတိ ဝါ သက္ကော၊ သုဇမ္ပတိ။
ပက္ကမဣစ္စေဝမာဒီဟိ ဓာတူဟိ တပစ္စယဿ န္တောအာဒေသော ဟောတိ၊ အန္တော စ နော ဟောတိ။
ပက္ကမတီတိ ¶ ပက္ကန္တော၊ ဝိဗ္ဘမတီတိ ဝိဗ္ဘန္တော၊ သင်္ကန္တော၊ ခန္တော၊ သန္တော၊ ဒန္တော၊ ဝန္တော။
စဂ္ဂဟဏံ ကိမတ္ထံ? တေဟေဝ ဓာတူဟိ တပစ္စယဿန္တိ ဟောတိ။ အန္တော စ နော ဟောတိ။ ကန္တိ၊ ခန္တိ။ ဧဝံ သဗ္ဗတ္ထ။
ဇနဣစ္စေဝမာဒီနံ ဓာတူနံ အန္တဿ ဗျဉ္ဇနဿ အာတ္တံ ဟောတိ တပစ္စယေ ပရေ၊ တိမှိ စ။
အဇနီတိ ဇာတော၊ ဇနနံ ဇာတိ။
တိမှီတိ ကိမတ္ထံ? အညသ္မိမ္ပိ ပစ္စယေ ပရေ အာကာရနိဝတ္တနတ္ထံ။ ဇနိတွာ၊ ဇနိတာ၊ ဇနိတုံ၊ ဇနိတဗ္ဗံ ဣစ္စေဝမာဒိ။
၅၈၆၊ ၆၀၀။ ဂမ ခန ဟန ရမာဒီနမန္တော။
ဂမ ခန ဟန ရမုဣစ္စေဝမာဒီနံ ဓာတူနံ အန္တော ဗျဉ္ဇနော နော ဟောတိ ဝါ တပစ္စယေ ပရေ တိမှိ စ။
သုန္ဒရံ နိဗ္ဗာနံ ဂစ္ဆတီတိ သုဂတော။ သုန္ဒရံ နိဗ္ဗာနံ ဂစ္ဆတီတိ သုဂတိ၊ ခတံ၊ ခတိ။ ဥပဟတံ၊ ဥပဟတိ။ ရတော၊ ရတိ၊ မတော၊ မတိ။
ဝါတိ ¶ ကိမတ္ထံ? ရမတော၊ ရမတိ။
ရကာရော စ ဓာတူနမန္တဘူတော နော ဟောတိ တပစ္စယေ၊ ပရေ တိမှိ စ။
ပကာရေန ကရီယတီတိ ပကတော၊ ပဌမံ ကရီယတီတိ ပကတိ၊ ဝိသရီယတီတိ ဝိသတော၊ ဝိသတိ။
ဌာ ပါဣစ္စေတေသံ ဓာတူနံ အန္တဿ အာကာရဿ ဣကာရ ဤကာရာဒေသာ ဟောန္တိ ယထာသင်္ချံ တပစ္စယေ ပရေ၊ တိမှိ စ။
ယတြ ဌိတော၊ ဌိတိ၊ ပီတော၊ ပီတိ။
၅၈၉၊ ၆၂၁။ ဟန္တေဟိ ဟော ဟဿ ဠော ဝါ အဒဟနဟာနံ။
ဟကာရန္တေဟိ ဓာတူဟိ တပစ္စယဿ ဟကာရာဒေသော ဟောတိ၊ ဟကာရဿ ဓာတွန္တဿ ဠော ဟောတိ ဝါ အဒဟနဟာနံ။
အာရုဟိတ္ထာတိ အာရုဠှော။ ဂါဠှော၊ ဗာဠှော။ မူဠော။
အဒဟနဟာနမိတိ ¶ ကိမတ္ထံ? ဒယှတီတိ ဒဍ္ဎော၊ သံသုဋ္ဌု နယှတီတိ သန္နဒ္ဓါ။
ဣတိ ကိဗ္ဗိဓာနကပ္ပေ တတိယော ကဏ္ဍော။
စတုတ္ထကဏ္ဍ
၅၉၀၊ ၅၇၉။ ဏမှိရန္ဇဿ ဇော ဘာဝကရဏေသု။
ဏမှိ ပစ္စယေ ပရေ ရန္ဇဣစ္စေတဿ ဓာတုဿ အန္တဘူတဿ န္ဇကာရဿ ဇောအာဒေသော ဟောတိ ဘာဝကရဏေသု။
ရဉ္ဇနံ ရာဂေါ၊ ရန္ဇန္တိ ဧတေနာတိ ရာဂေါ။
ဘာဝကရဏေသူတိ ကိမတ္ထံ? ရန္ဇတီတိ ရင်္ဂေါ။
ဟနဣစ္စေတဿ ဓာတုဿ သဗ္ဗဿ ဃာတာဒေသော ဟောတိ ဏမှိ ပစ္စယေ ပရေ။
ဥပဟနတီတိ ဥပဃာတော၊ ဂါဝေါ ဟနတီတိ ဂေါဃာတကော။
၅၉၂၊ ၅၀၃။ ဝဓော ¶ ဝါ သဗ္ဗတ္ထ။
ဟနဣစ္စေတဿ ဓာတုဿ ဝဓာဒေသော ဟောတိ ဝါ သဗ္ဗတ္ထ ဌာနေသု။
ဟနတီတိ ဝဓော၊ ဝဓကော၊ အဝဓိ၊ အဟနိ ဝါ။
အာကာရန္တာနံ ဓာတူနံ အန္တဿ အာကာရဿ အာယာဒေသော ဟောတိ ဏမှိ ပစ္စယေ ပရေ။
ဒဒါတီတိ ဒါယကော၊ ဒါနံ ဒါတုံ သီလံ ယဿာတိ ဒါနဒါယီ၊ မဇ္ဇံ ဒါတုံ သီလံ ယဿာတိ မဇ္ဇဒါယီ၊ နဂရံ ယာတုံ သီလံ ယဿာတိ နဂရယာယီ။
၅၉၄၊ ၅၈၂။ ပုရ သမုပ ပရီဟိ ကရောတိဿ ခ ခရာ ဝါ တပ္ပစ္စယေသုစ။
ပုရ သံ ဥပ ပရိဣစ္စေတေဟိ ကရောတိဿ ဓာတုဿ ခ ခရာဒေသာ ဟောန္တိ ဝါ တပစ္စယေ ပရေ၊ ဏမှိ စ။
ပုရေ ကရီယတီတိ ပုရက္ခတော၊ သမ္မာ ကရီယတီတိ သင်္ခတော၊ ဥပဂန္တွာ ကရီယတီတိ ဥပက္ခတော၊ ပရိသမန္တတော ကရောတီတိ ပရိက္ခာရော၊ သံကရီယတီတိ သင်္ခါရော။
ဝါတိ ကိမတ္ထံ? ဥပဂန္တွာ ကရောတီတိ ဥပကာရော။
၅၉၅၊ ၆၃၇။ တဝေ ¶ တုနာဒီသု ကာ။
တဝေ တုနဣစ္စေဝမာဒီသု ပစ္စယေသု ကရောတိဿ ဓာတုဿ ကာအာဒေသော ဟောတိ ဝါ။
ကာတဝေ၊ ကာတုံ၊ ကတ္တုံ ဝါ၊ ကာတုန၊ ကတ္တုန ဝါ။
၅၉၆၊ ၅၅၁။ ဂမ ခန ဟနာဒီနံ တုံ တဗ္ဗာဒီသု န။
ဂမ ခန ဟနဣစ္စေဝမာဒီနံ ဓာတူနံ အန္တဿ နကာရော ဟောတိ ဝါ တုံ တဗ္ဗာဒီသု ပစ္စယေသု။
ဂန္တုံ၊ ဂမိတုံ၊ ဂန္တဗ္ဗံ၊ ဂမိတဗ္ဗံ။ ခန္တုံ။ ခနိတုံ၊ ခန္တဗ္ဗံ၊ ခနိတဗ္ဗံ။ ဟန္တုံ၊ ဟနိတုံ၊ ဟန္တဗ္ဗံ။ ဟနိတဗ္ဗံ။ မန္တုံ၊ မနိတုံ၊ မန္တဗ္ဗံ၊ မနိတဗ္ဗံ။
အာဒိဂ္ဂဟဏံ ကိမတ္ထံ? တုနဂ္ဂဟဏတ္ထံ။ ဂန္တုန၊ ခန္တုန၊ ဟန္တုန၊ မန္တုန။
၅၉၇၊ ၆၄၁။ သဗ္ဗေဟိ တုနာဒီနံ ယော။
သဗ္ဗေဟိ ဓာတူဟိ တုနာဒီနံ ပစ္စယာနံ ယကာရာဒေသော ဟောတိ ဝါ။
အဘိဝန္ဒိယ၊ အဘိဝန္ဒိတွာ၊ ဩဟာယ၊ ဩဟိတွာ၊ ဥပနီယ၊ ဥပနေတွာ၊ ပဿိယ၊ ပဿိတွာ၊ ဥဒ္ဒိဿ၊ ဥဒ္ဒိသိတွာ၊ အာဒါယ၊ အာဒိယိတွာ။
၅၉၈၊ ၆၄၃။ စနန္တေဟိ ¶ ရစ္စံ။
စကာရနကာရန္တေဟိ ဓာတူဟိ တုနာဒီနံ ပစ္စယာနံ ရစ္စာဒေသော ဟောတိ ဝါ။
ဝိဝိစ္စ၊ အာဟစ္စ၊ ဥဟစ္စ။
ဝါတိ ကိမတ္ထံ? ဟန္တွာ။
၅၉၉၊ ၆၄၄။ ဒိသာ သွာန သွာန္တလောပေါ စ။
ဒိသဣစ္စေတာယ ဓာတုယာ တုနာဒီနံ ပစ္စယာနံ သွာနသွာဒေသာ ဟောန္တိ၊ အန္တလောပေါ စ။
ဒိသွာန၊ ဒိသွာ။
၆၀၀၊ ၆၄၅။ မ ဟ ဒ ဘေဟိ မ္မ ယှ ဇ္ဇ ဗ္ဘ ဒ္ဓါ စ။
မ ဟ ဒ ဘ ဣစ္စေဝမန္တေဟိ ဓာတူဟိ တုနာဒီနံ ပစ္စယာနံ မ္မ ယှ ဇ္ဇ ဗ္ဘ ဒ္ဓါ အာဒေသာ ဟောန္တိ ဝါ အန္တလောပေါ စ။
အာဂမ္မ၊ အာဂမိတွာ၊ ဩက္ကမ္မ။ ဩက္ကမိတွာ၊ ပဂ္ဂယှ၊ ပဂ္ဂဏှိတွာ၊ ဥပ္ပဇ္ဇ၊ ဥပ္ပဇ္ဇိတွာ၊ အာရဗ္ဘ၊ အာရဘိတွာ၊ အာရဒ္ဓ၊ အာရဘိတွာ။
၆၀၁၊ ၃၃၄။ တဒ္ဓိတသမာသကိတကာ ¶ နာမံ ဝါ’ တဝေ တုနာဒီသု စ။
တဒ္ဓိတသမာသကိတကဣစ္စေဝမန္တာ သဒ္ဒါနာမံဝ ဒဋ္ဌဗ္ဗာ တဝေ တုန တွာန တွာဒိပစ္စယန္တေ ဝဇ္ဇေတွာ။
ဝါသိဋ္ဌော၊ ပတ္တဓမ္မော၊ ကုမ္ဘကာရော ဣစ္စေဝမာဒိ။
ဒုမှိ အက္ခရေ ယော ပုဗ္ဗော အက္ခရော၊ သော ဂရုကောဝ ဒဋ္ဌဗ္ဗော။
ဘိတွာ၊ ဆိတွာ၊ ဒတွာ၊ ဟုတွာ။
ဒီဃော စ သရော ဂရုကောဝ ဒဋ္ဌဗ္ဗော။
အာဟာရော၊ နဒီ၊ ဝဓူ၊ တေ ဓမ္မာ၊ ဩပနယိကော။
အက္ခရတ္ထေဟိ အက္ခရာဘိဓေယျေဟိ ကာရပစ္စယော ဟောတိ ပယောဂေ သတိ။
အ ဧဝ အကာရော၊ အာ ဧဝ အာကာရော၊ ယ ဧဝ ယကာရော။
၆၀၅၊ ၆၄၇။ ယထာဂမမိကာရော ¶ ။
ယထာဂမံ သဗ္ဗဓာတူဟိ သဗ္ဗပစ္စယေသု ဣကာရာဂမော ဟောတိ။
ကာရိယံ၊ ဘဝိတဗ္ဗံ၊ ဇနိတဗ္ဗံ၊ ဝိဒိတဗ္ဗံ၊ ကရိတွာ၊ ဣစ္ဆိတံ။
ဒကာရဓကာရန္တာယ ဓာတုယာ ယထာဂမံ ယကာရာဂမော ဟောတိ ကွစိ တုနာဒီသု ပစ္စယေသု။
ဗုဒ္ဓါ လောကေ ဥပ္ပဇ္ဇိတွာ၊ ဓမ္မံ ဗုဇ္ဈိတွာ။
ဒဓန္တတောတိ ကိမတ္ထံ? လဘိတွာ။
ကွစီတိ ကိမတ္ထံ? ဥပ္ပာဒေတွာ။
ဣတိ ကိဗ္ဗိဓာနကပ္ပေ စတုတ္ထော ကဏ္ဍော။
ပဉ္စမကဏ္ဍ
၆၀၇၊ ၅၇၈။ နိဂ္ဂဟိတ သံယောဂါဒိနော။
သံယောဂါဒိဘူတော နကာရော နိဂ္ဂဟိတမာပဇ္ဇတေ။
ရင်္ဂေါ၊ ဘင်္ဂေါ၊ သင်္ဂေါ။
၆၀၈၊ ၆၂၃။ သဗ္ဗတ္ထ ¶ ဂေ ဂီ။
ဂေဣစ္စေတဿ ဓာတုဿ ဂီအာဒေသော ဟောတိ သဗ္ဗတ္ထ ဌာနေ။
ဂီတံ ဂါယတိ။
သဒဣစ္စေတဿ ဓာတုဿ သီဒါဒေသော ဟောတိ သဗ္ဗတ္ထ ဌာနေ။
နိသိန္နော၊ နိသီဒတိ။
ယဇဣစ္စေတဿ ဓာတုဿ သရဿ ဣကာရာဒေသော ဟောတိ ဋ္ဌေ ပရေ။
ယိဋ္ဌော၊ ယိဋ္ဌာ။
ဋ္ဌေတိ ကိမတ္ထံ? ယဇနံ။
၆၁၁၊ ၆၀၈။ ဟစတုတ္ထာနမန္တာနံ ဒေါ ဓေ။
ဟစတုတ္ထာနံ ဓာတွန္တာနံ ဒေါ အာဒေသော ဟောတိ ဓေ ပရေ။
သန္နဒ္ဓါ၊ ကုဒ္ဓါ၊ ယုဒ္ဓါ၊ သိဒ္ဓါ၊ လဒ္ဓါ၊ အာရဒ္ဓါ။
၆၁၂၊ ၆၁၅။ ဍော ¶ ဎကာရေ။
ဟစတုတ္ထာနံ ဓာတွန္တာနံ ဍော အာဒေသော ဟောတိ ဎကာရေ ပရေ။
ဒယှတီတိ ဒဍ္ဎော၊ ဝဍ္ဎတီတိ ဝုဍ္ဎော။
ဎကာရေတိ ကိမတ္ထံ? ဒါဟော။
ဂဟဣစ္စေတဿ ဓာတုဿ သဗ္ဗဿ ဃရာဒေသော ဟောတိ ဝါ ဏပစ္စယေ ပရေ။
ဃရံ၊ ဃရာနိ။
ဝါတိ ကိမတ္ထံ? ဂါဟော။
ဒဟဣစ္စေတဿ ဓာတုဿ ဒကာရော ဠတ္တမာပဇ္ဇတေ ဝါ ဏပစ္စယေ ပရေ။
ပရိဒဟနံ ပရိဠာဟော။
ဝါတိ ကိမတ္ထံ? ပရိဒါဟော။
၆၁၅၊ ၅၈၆။ ဓာတွန္တဿ လောပေါ ကွိမှိ။
ဓာတွန္တဿ ဗျဉ္ဇနဿ လောပေါ ဟောတိ ကွိမှိ ပစ္စယေ ပရေ။
ဘုဇေန ¶ ဂစ္ဆတီတိ၊ ဘုဇဂေါ။ ဥရေန ဂစ္ဆတီတိ ဥရဂေါ၊ တုရဂေါ၊ သင်္ခေါ။
ဝိဒဣစ္စေတဿ ဓာတုဿ အန္တေ ဦကာရာဂမော ဟောတိ ကွိမှိ ပစ္စယေ ပရေ။
လောကံ ဝိဒတိ ဇာနာတီတိ လောကဝိဒူ။
၆၁၇၊ ၆၃၃။ န မ က ရာနမန္တာနံ နိယုတ္တတမှိ။
နကာရ မကာရ ကကာရ ရကာရာနံ ဓာတွန္တာနံ လောပေါ န ဟောတိ ဣကာရယုတ္တေ တပစ္စယေ ပရေ။
ဟနိဘုံ၊ ဂမိတော၊ ရမိတော၊ သကိတော၊ သရိတော၊ ကရိတွာ။
ဣယုတ္တတမှီတိ ကိမတ္ထံ? ဂတော၊ သတော။
၆၁၈၊ ၅၇၁။ န က ဂတ္တံ စ ဇာဏွုမှိ။
စကာရ ဇကာရာ ကကာရ ဂကာရတ္တံ နာပဇ္ဇန္တေ ဏွုမှိ ပစ္စယေ ပရေ။
ပစတီတိ ပါစကော၊ ယဇတီတိ ယာဇကော။
၆၁၉၊ ၅၇၃။ ကရဿ ¶ စ တတ္တံ တုသ္မိံ။
ကရဣစ္စေတဿ ဓာတုဿ အန္တဿ ရကာရဿ တကာရတ္တံ ဟောတိ တုပစ္စယေ ပရေ။
ကရောတီတိ ကတ္တာ၊ ကရောန္တီတိ ကတ္တာရော။
ကရဣစ္စေတဿ ဓာတုဿ အန္တဿ ရကာရဿ တကာရတ္တံ ဟောတိ ဝါ တုံ တုန တဗ္ဗဣစ္စေတေသု ပစ္စယေသု။
ကတ္တုံ၊ ကာတုံ၊ ကတ္တုန။ ကာတုန၊ ကတ္တဗ္ဗံ၊ ကာတဗ္ဗံ။
၆၂၁၊ ၅၅၃။ ကာရိတံ ဝိယ ဏာနုဗန္ဓော။
ဏကာရာနုဗန္ဓော ပစ္စယော ကာရိတံ ဝိယ ဒဋ္ဌဗ္ဗော ဝါ။
ဒါဟော၊ ဒေဟော၊ ဝါဟော၊ ဗာဟော၊ စာဂေါ၊ ဝါရော၊ စာရော၊ ပရိက္ခာရော၊ ဒါယကော၊ နာယကော၊ လာဝကော၊ ဘာဝကော၊ ကာရီ၊ ဃာတီ၊ ဒါယီ။
ဝါတိ ကိမတ္ထံ? ဥပက္ခရော။
၆၂၂၊ ၅၇၀။ အနကာ ¶ ယု ဏွူနံ။
ယုဏွုဣစ္စေတေသံ ပစ္စယာနံ အန အကဣစ္စေတေ အာဒေသာ ဟောန္တိ။
နန္ဒနံ၊ ကာရကော။
စ ဇဣစ္စေတေသံ ဓာတွန္တာနံ ကကာရဂကာရာဒေသာ ဟောန္တိ ဏာနုဗန္ဓေ ပစ္စယေ ပရေ။
ပါကော၊ ယောဂေါ။
ဣတိ ကိဗ္ဗိဓာနကပ္ပေ ပဉ္စမော ကဏ္ဍော။
ကိတကပ္ပော နိဋ္ဌိတော။