📜
၈။ ဥဏာဒိကပ္ပ
ဆဋ္ဌကဏ္ဍ
၆၂၄၊ ၅၆၃။ ကတ္တရိ ¶ ကိတ။
ကတ္တုဣစ္စေတသ္မိံ အတ္ထေ ကိတ ပစ္စယာ ဟောန္တိ။
ကာရု၊ ကာရုကော၊ ကာရကော၊ ပါစကော၊ ကတ္တာ၊ ဇနိတာ၊ ပစိတာ၊ နေတာ။
၆၂၅၊ ၆၀၅။ ဘာဝကမ္မေသု ကိစ္စတ္တ ခတ္ထာ။
ဘာဝကမ္မဣစ္စေတေသွတ္ထေသု ကိစ္စ တ္တ ခတ္ထဣစ္စေတေ ပစ္စယာ ဟောန္တိ။
ဥပသမ္ပာဒေတဗ္ဗံ ဥပသမ္ပာဒနီယံ ဘဝတာ၊ သယိတဗ္ဗံ ဘဝတာ၊ ကတ္တဗ္ဗံ ဘဝတာ၊ ဘောတ္တဗ္ဗော ဩဒနော ဘဝတာ၊ အသိတဗ္ဗံ ဘောဇနံ ဘဝတာ၊ အသိတံ ဘဝတာ၊ သယိတံ ဘဝတာ၊ ပစိတံ ဘဝတာ၊ အသိတံ အသနံ ဘဝတာ၊ သယိတံ သယနံ ဘဝတာ၊ ပစိတော ဩဒနော ဘဝတာ၊ ကိဉ္စိဿယော၊ ဤသဿယော၊ ဒုဿယော၊ သုဿယော ဘဝတာ။
၆၂၆၊ ၆၃၄။ ကမ္မနိ ¶ ဒုတိယာယ တ္တော။
ကမ္မနိ ဣစ္စေတသ္မိံ အတ္ထေ ဒုတိယာယံ ဝိဘတ္တိယံ ကတ္တရိ တ္တပစ္စယော ဟောတိ။
ဒါနံ ဒိန္နော ဒေဝဒတ္တော၊ သီလံ ရက္ခိတော ဒေဝဒတ္တော၊ ဘတ္တံ ဘုတ္တော ဒေဝဒတ္တော၊ ဂရုံ ဥပါသိတော ဒေဝဒတ္တော။
၆၂၇၊ ၆၅၂။ ချာဒီဟိ မာန မ စ တော ဝါ။
ခိ ဘီ သု ရု ဟု ဝါ ဓူ ဟိ လူ ပီ အဒဣစ္စေဝမာဒီဟိ ဓာတူဟိ မန ပစ္စယော ဟောတိ၊ မဿ စ တော ဟောတိ ဝါ။
ခီယန္တိ ဥပဒ္ဒဝါ ဧတ္ထာတိ ခေမော၊ ဘာယိတဗ္ဗောတိ ဘေမော၊ ဘာယန္တိ ဧတသ္မာတိ ဝါ ဘေမော၊ ရံသိယော အဘိဿဝေတီတိ သောမော၊ ရဝတိ ဂစ္ဆတီတိ ရောမော၊ ဟုဝတိ ဇုဟွတိ ဧတေနာတိ ဟောမော၊ ပဋိလောမဝသေန ဝါတိ ဂစ္ဆတီတိ ဝါမော၊ လာမကဝသေန ဝါတိ ဂစ္ဆတိ ပဝတ္တတီတိ ဝါ ဝါမော၊ ဓုနာတိ ကမ္ပတီတိ ဓူမော၊ သေဋ္ဌဘာဝေန ဟိနောတိ ပဝတ္တတိ စိတ္တံ ဧတသ္မိန္တိ ဟေမော၊ လုနိတဗ္ဗောတိ လောမော၊ မံသစမ္မာနိ လုနာတိ ဆိန္ဒတီတိ ဝါ လောမော၊ ပိယနံ ပေမော၊ ပိယာယိတဗ္ဗောတိ ဝါ ပေမော၊ သုခဒုက္ခံ အဒတိ ဘက္ခတီတိ အတ္တာ၊ ဇာတိဇရာမရဏာဒီဟိ အဒီယတေ ဘက္ခီယတေတိ ဝါ အတ္တာ၊ အာတုမာ။
၆၂၈၊ ၆၅၃။ သမာဒီဟိ ¶ ထ မာ။
သမု ဒမု ဒရ ရဟ ဒု ဟိ သိ ဘီ ဒါ ယာ သာ ဌာဘသဣစ္စေဝမာဒီဟိ ဓာတူဟိ ထ မ ပစ္စယာ ဟောန္တိ။
သမေတီတိ သမထော၊ ဒမတီတိ ဒမထော၊ ဒမနံ ဝါ ဒမထော၊ ဒမိတဗ္ဗောတိ ဝါ ဒမထော၊ ဒရတီတိ ဒရထော၊ ဇိဏ္ဏဘာဝံ ရဟိဿတိ ဂဏှိဿတီတိ ရထော၊ ဒဗ္ဗသမ္ဘာရေ ရဟတိ ဂဏှာတီတိ ဝါ ရထော၊ ဒဝတိ ဂစ္ဆတီတိ ဒုမော၊ ဒဝတိ ဝုဒ္ဓိ ဝိရုဠှိ ဂစ္ဆတိ ပဝတ္တတီတိ ဥဒ္ဓံ ဝါ ဒုမော၊ ပထဝီပဗ္ဗတာဒီသု ဂစ္ဆတိ ပတတီတိ ဟိမော၊ ကမ္မဝါစာယ ဗန္ဓတိ ဧတ္ထာတိ သီမာ။ ဗန္ဓိတဗ္ဗာတိ ဝါ သီမာ။ ဘာယန္တိ ဧတသ္မာတိ ဘီမော၊ သတ္တေ အဝခဏ္ဍေန္တိ နိဝါရေန္တိ ဧတေနာတိ ဒါမော၊ မူသိကာဒီဟိ ခါဒီယတိ အဝခဏ္ဍီယတီတိ ဝါ ဒါမော၊ ယာတိ ဂစ္ဆတီတိ ယာမော၊ ပရေသံ စိတ္တံ ဂဏှိတုံ သမတ္ထေတီတိ သာမော၊ တိဋ္ဌန္တိ ဧတေနာတိ ထာမော၊ ဘသတိ ဘသ္မီကရီယတီတိ ဘသ္မာ။
ဂဟဣစ္စေတဿ ဓာတုဿ ဥပဓဿ အကာရဿ ဧတ္တ ဟောတိ ဝါ။
ဒဗ္ဗသမ္ဘာရ ဂဏှာတီတိ ဂေဟံ၊ ဂဟံ။
၆၃၀၊ ၆၅၄။ မသုဿ ¶ သုဿ စ္ဆရ စ္ဆေရာ။
မသုဣစ္စေတဿ ပါဋိပဒိကဿ သုဿ စ္ဆရစ္ဆေရာဒေသာ ဟောန္တိ။
မစ္ဆရတီတိ မစ္ဆရော၊ ဧဝံ မစ္ဆေရော။
အာပုဗ္ဗဿ စရဣစ္စေတဿ ဓာတုဿ စ္ဆရိယစ္ဆရစ္ဆေရာ ဒေသာ ဟောန္တိ၊ အာပုဗ္ဗဿ စ ရဿော ဟောတိ။
အာဘုသော စရိတဗ္ဗန္တိ အစ္ဆရိယံ။ ဧဝံ အစ္ဆရံ၊ အစ္ဆေရံ။
စဂ္ဂဟဏေန မသုဿ သုဿာပိ စ္ဆရိယာဒေသော ဟောတိ၊ မစ္ဆရိယံ။
အလ ကလ သလဣစ္စေတေဟိ ဓာတူဟိ လ ယပစ္စယာ ဟောန္တိ။
အလတိ သမတ္ထေတီတိ အလ္လံ၊ ကလိတဗ္ဗံ သင်္ချာတဗ္ဗန္တိ ကလ္လံ၊ သလတိ ဂစ္ဆတိ ပဝိသတီတိ သလ္လံ။ ဧဝံ အလျံ၊ ကလျံ၊ သလျံ။
၆၃၃၊ ၆၅၇။ ယာဏ ¶ လာဏာ။
တေဟိ ကလ သလဣစ္စေတေဟိ ဓာတူဟိ ယာဏ လာဏပစ္စယာ ဟောန္တိ။
ကလိတဗ္ဗံ သင်္ချာတဗ္ဗန္တိ ကလျာဏံ၊ ဂဏတော ပဋိက္ကမိတွာ သလန္တိ ဧတ္ထာတိ ပဋိသလျာဏံ။ ဧဝံ သလ္လာဏော၊ ပဋိသလ္လာဏော။
မထဣစ္စေတဿ ဓာတုဿ ထဿ လာဒေသောဟောတိ။ အညမညံ မထတိ ဝိလောဠတီတိ မလ္လော၊ မလ္လံ။
စဂ္ဂဟဏေန လတော ကော စ အာဂမော ဟောတိ။ မလ္လကော၊ မလ္လကံ။
၆၃၅၊ ၅၅၉။ ပေသာတိသဂ္ဂပတ္တကာလေသုကိစ္စာ။
ပေသ အတိသဂ္ဂ ပတ္တကာလဣစ္စေတေသွတ္ထေသု ကိစ္စပစ္စယာ ဟောန္တိ။
ကတ္တဗ္ဗံ ကမ္မံ ဘဝတာ၊ ကရဏီယံ ကိစ္စံ ဘဝတာ၊ ဘောတ္တဗ္ဗံ ဘောဇနံ ဘဝတာ၊ ဘောဇနီယံ ဘောဇနံ ဘဝတာ၊ အဇ္ဈယိတဗ္ဗံ အဇ္ဈေယျံ ဘဝတာ၊ အဇ္ဈယနီယံ အဇ္ဈေယျံ ဘဝတာ။
၆၃၆၊ ၆၅၉။ အဝဿကာ’ဓမိဏေသု ¶ ဏီ စ။
အဝဿက အဓမိဏဣစ္စေတေသွတ္ထေသု ဏီပစ္စယော ဟောတိ၊ ကိစ္စာ စ။
အဝဿတေ တာဝ – ကာရီသိ မေ ကမ္မံ အဝဿံ ဟာရီသိ မေ ဘာရံ အဝဿံ။
အဓမိဏေ – ဒါယီသိ မေ သတံ ဣဏံ၊ ဓာရီသိ မေ သဟဿံ ဣဏံ။
ကိစ္စာ စ – ဒါတဗ္ဗံ မေ ဘဝတာ သတံ ဣဏံ။ ဓာရယိတဗ္ဗံ မေ ဘဝတာ သဟဿံ ဣဏံ၊ ကတ္တဗ္ဗံ မေ ဘဝတာ ဂေဟံ၊ ကရဏီယံ မေ ဘဝတာ ကိစ္စံ၊ ကာရိယံ မေ ဘဝတာ သယနံ။
အရဟ သက္က ဘဗ္ဗဣစ္စေဝမာဒီဟိ ပယောဂေ သတိ သဗ္ဗဓာတူဟိ တုံပစ္စယော ဟောတိ။
အရဟာ ဘဝံ ဝတ္တုံ၊ အရဟာ ဘဝံ ကတ္တုံ၊ သက္ကာ ဘဝံ ဟန္တုံ၊ သက္ကာ ဘဝံ ဇနေတုံ၊ ဇနိတုံ၊ ဘဝိတုံ၊ သက္ကာ ဘဝံ ဒါတုံ၊ သက္ကာ ဘဝံ ဂန္တုံ၊ တဗ္ဗော ဘဝံ ဇနေတုံ ဣစ္စေဝမာဒိ။
၆၃၈၊ ၆၆၀။ ဝဇာဒီဟိပဗ္ဗဇ္ဇာဒယော ¶ နိပ္ပဇ္ဇန္တေ။
ဝဇဣစ္စေဝမာဒီဟိ ဓာတူဟိ၊ ဥပသဂ္ဂပစ္စယာဒီဟိ စ ပဗ္ဗဇ္ဇာဒယော သဒ္ဒါ နိပ္ပဇ္ဇန္တေ။
ပဌမမေဝ ဝဇိတဗ္ဗာတိ ပဗ္ဗဇ္ဇာ၊ ဣဉ္ဇနံ ဧဇ္ဇာ၊ သမဇ္ဇနံ သမဇ္ဇာ၊ နိသီဒနံ နိသဇ္ဇာ၊ ဝိဇာနနံ ဝိဇ္ဇာ ဝိသဇ္ဇနံ ဝိသဇ္ဇာ၊ ပဒနံ ပဇ္ဇာ၊ ဟနနံ ဝဇ္ဈာ၊ ဧသနံ ဣစ္ဆာ၊ အတိဧသနံ အတိစ္ဆာ၊ သဒနံ သဇ္ဇာ၊ သယန္တိ ဧတ္ထာတိ သေယျာ၊ သမ္မာ စိတ္တံ နိဓေတိ ဧတာယာတိ သဒ္ဓါ၊ စရိတဗ္ဗာ စရိယာ၊ ကရဏံ ကိရိယာ၊ ရုဇနံ ရုစ္ဆာ၊ ပဒနံ ပစ္ဆာ၊ ရိဉ္စနံ ရိစ္ဆာ၊ တိကိစ္ဆနံ တိတိစ္ဆာ၊ သံကောစနံ သံကုစ္ဆာ၊ မဒနံ မစ္ဆာ၊ လဘနံ လစ္ဆာ၊ ရဒိဟဗ္ဗာတိ ရစ္ဆာ၊ ရဒနံ ဝိလေခနံ ဝါရစ္ဆာ၊ အဓော ဘာဂေန ဂစ္ဆတီတိ တိရစ္ဆာ၊ တိရစ္ဆာနော၊ အဇနံ အစ္ဆာ၊ တိတိက္ခတီတိ တိတိက္ခာ၊ သဟ အာဂမနံ သာဂစ္ဆာ၊ ဒုဋ္ဌု ဘက္ခနံ ဒေါဘစ္ဆာ၊ ဒုဋ္ဌု ရောသနံ ဒုရုစ္ဆာ၊ ပုစ္ဆနံ ပုစ္ဆာ၊ မုဟနံ မုစ္ဆာ၊ ဝသနံ ဝစ္ဆာ၊ ကစနံ ကစ္ဆာ၊ သဟ ကထနံ သာကစ္ဆာ၊ တုဒနံ တုစ္ဆာ၊ ဝိသနံ ဝိစ္ဆာ၊ ပိသနံ ပိစ္ဆိလ္လာ၊ သုခဒုက္ခံ မုဒတိ ဘက္ခတီတိ မစ္ဆော ¶ ၊ သတ္တာနံ ပါဏံ မုသေတိ စဇေတီတိ မစ္စု၊ သတနံ သစ္စံ၊ ဥဒ္ဓံ ဓုနာတိ ကမ္ပတီတိ ဥဒ္ဓစ္စံ၊ နဋနံ နစ္စံ၊ နိတနံ နိစ္စံ၊ တထနံ တစ္ဆံ ဣစ္စေဝမာဒိ။
ကွိလောပေါ ဟောတိ၊ ပုန စ နိပ္ပဇ္ဇန္တေ။
ဝိဝိဓေဟိ သီလာဒိဂုဏေဟိ ဘဝတီတိ ဝိဘူ၊ ဝိသေသေန ဝါ ဘဝတီတိ ဝိဘူ၊ သယံ အတ္တနာ ဘဝတီတိ သယမ္ဘူ၊ အဘိဝိတွာ ဘဝတီတိ အဘိဘူ၊ သံ သုဋ္ဌု ဓုနာတိ ကမ္ပတီတိ သန္ဓူ၊ ဝိသေသေန ဘာတိ ဒိဗ္ဗတီတိ ဝိဘာ၊ နိဿေသေန ဘာတိ ဒိဗ္ဗတီတိ နိဘာ၊ ပကာရေန ဘာတိ ဒိဗ္ဗတီတိ ပဘာ၊ သဟ ဘာသန္တိ ဧတ္ထာတိ သဘာ၊ အာဘုသော ဘာတိ ဒိဗ္ဗတီတိ အာဘာ၊ ဘုဇေန ကုဋိလေန ဂစ္ဆတီတိ ဘုဇဂေါ၊ တုရိတတုရိတော ဂစ္ဆတီတိ တုရဂေါ၊ သံ သုဋ္ဌု ပထဝိံ ခနတီတိ သင်္ခေါ၊ ဝိသေသေန ယမတိ ဥပရမတီတိ ဝိယော၊ သုဋ္ဌု မနတိ ဇာနာတီတိ သုမော၊ ပရိ သမန္တတော တနောတိ ဝိတ္ထာရေတီတိ ပရိတော ဣစ္စေဝမာဒိ။
သစ ဇာနံ ဓာတူနမန္တာနံ စဇာနံ ကဂါဒေသာ ဟောန္တိ ယထာသင်္ချံ ဏာနုဗန္ဓေ ပစ္စယေ ပရေ။
ဩကော ¶ ၊ ပါကော၊ သေကော၊ သောကော၊ ဝိဝေကော၊ စာဂေါ၊ ယောဂေါ၊ ဘောဂေါ၊ ရောဂေါ၊ ရာဂေါ၊ ဘာဂေါ၊ ဘင်္ဂေါ၊ ရင်္ဂေါ၊ သင်္ဂေါ။
၆၄၁၊ ၅၇၂။ နုဒါဒီဟိ ယုဏွူနမနာနနာကာနနကာ သကာရိတေဟိ စ။
နုဒ သူဒ ဇန သု လူ ဟု ပု ဘူ ဉာ အ သ သမုဣစ္စေဝမာဒီဟိ ဓာတူဟိ၊ ဖန္ဒ စိတိ အာဏ ဣစ္စေဝမာဒီဟိ သကာရိတေဟိ စ ယုဏွူနံ ပစ္စယာနံ အန အာနန အက အာနနကာဒေသာ ဟောန္တိ ယထာသင်္ချံ ကတ္တရိ၊ ဘာဝကရဏေသု စ။
ကတ္တရိ တာဝ – ပနုဒတီတိ ပနူဒနော။ ဧဝံ သူဒနော၊ ဇနနော၊ သဝဏော၊ လဝနော၊ ဟဝနော၊ ပဝနော၊ ဘဝနော၊ ဉာဏော၊ အသနော၊ သမဏော။
ဘာဝေ စ – ပနုဒတေ ပနူဒနံ။ ဧဝံ သူဒနံ၊ ဇနနံ၊ သဝဏံ၊ လဝနံ၊ ဟဝနံ၊ ပဝနံ၊ ဘဝနံ၊ ဉာဏံ၊ အသနံ၊ သမဏံ၊ သဉ္ဇာနနံ၊ ကုယတေ ကာနနံ။
ကာရိတေ စ – ဖန္ဒာပီယတေ ဖန္ဒာပနံ၊ စေတာပီယတေ စေတာပနံ၊ အာဏာပီယတေ အာဏာပနံ။
ကရဏေ – နုဒန္တိ အနေနာတိ နူဒနံ၊ ဧဝံ သူဒနံ၊ ဇနနံ၊ သဝဏံ၊ လဝဏံ၊ ဟဝနံ၊ ပဝနံ၊ ဘဂနံ၊ ဉာဏံ၊ အသနံ၊ သဝဏံ။
ပုန ¶ ကတ္တရိ – နုဒတီတိ နူဒကော၊ သူဒတီတိ သူဒဓကာ၊ ဇနေတီတိ ဇနကော၊ သုဏောတီတိ သာဝကော၊ လုနာတီတိ လာဝကော၊ ဇုဟောတီတိ ဟာဝကော၊ ပုနာတီတိ ပါဝကော၊ ဘဝတီတိ ဘာဝကော၊ ဇာနာတီတိ ဇာနကော၊ အသတီတိ အသကော၊ ဥပါသတီတိ ဥပါသကော၊ သမေတီတိ သမကော။
ကာရိတေ တု – ဖန္ဒာပယတီတိ ဖန္ဒာပယကော။ ဧဝံ အာဏာပယကော၊ စေတာပယကော၊ သဉ္ဇာနနကော။
၆၄၂၊ ၅၈၈။ ဣ ယ တ မ ကိ ဧ သာန’မန္တဿရော ဒီဃံ ကွစိ ဒု သ ဿ ဂုဏံ ဒေါ ရံ သက္ခီ စ။
ဣယ တ မ ကိ ဧ သဣစ္စေတေသံ သဗ္ဗနာမာနမန္တော သရော ဒီဃမာပဇ္ဇတေ၊ ကွစိ ဒုသဣစ္စေတဿ ဓာတုဿ ဥကာရော ဂုဏမာပဇ္ဇတေ၊ ဒကာရော ရကာရမာပဇ္ဇတေ၊ ဓာတွန္တဿ သဿ စ သ က္ခ ဤဣစ္စေတေ အာဒေသာ ဟောန္တိ ယထာသမ္ဘဝံ။ ဧတေ သဒ္ဒါ သကေန သကေန နာမေန ယထာနုပရောဓေန ဗုဒ္ဓသာသနေ ပစ္ဆာ ပုန နိပ္ပဇ္ဇန္တေ။
ဣမမိဝ နံ ပဿတီတိ ဤဒိသော၊ ယမိဝ နံ ပဿတီတိ ယာဒိသော၊ တမိဝ နံ ပဿတီတိ တာဒိသော၊ မမိဝ နံ ပဿတီတိ မာဒိသော၊ ကိမိဝ နံ ပဿတီတိ ကီဒိသော၊ ဧတမိဝ နံ ပဿတီတိ ဧဒိသော၊ သမာနမိဝ နံ ပဿတီတိ သာဒိသော ¶ ။ ဣမမိဝ နံ ပဿတီတိ ဤရိသော၊ ယမိဝ နံ ပဿတီတိ ယာရိသော၊ တမိဝ နံ ပဿတီတိ တာရိသော၊ မမိဝ နံ ပဿတီတိ မာရိသော၊ ကိမိဝ နံ ပဿတီတိ ကီရိသော၊ ဧတမိဝ နံ ပဿတီတိ ဧရိသော၊ သမာနမိဝ နံ ပဿတီတိ သာရိသော။ ဣမမိဝ နံ ပဿတီတိ ဤဒိက္ခော၊ ယမိဝ နံ ပဿတီတိ ယာဒိက္ခော၊ တမိဝ နံ ပဿတီတိ တာဒိက္ခော၊ ဧဝံ မာဒိက္ခော၊ ကီဒိက္ခော၊ ဧဒိက္ခော၊ သာဒိက္ခော။ ဤဒီ၊ ယာဒီ၊ တာဒီ၊ မာဒီ၊ ကီဒီ၊ ဧဒီ၊ သာဒီ။
စဂ္ဂဟဏေန တေသမေဝ သဒ္ဒါနံ ဣယဣစ္စေဝမာဒီနမန္တော စ သရော ကွစိ ဒီဃတ္ထမာဟု။ ဤဒိက္ခော၊ ယာဒိက္ခော၊ တာဒိက္ခော၊ မာဒိက္ခော၊ ကီဒိက္ခော၊ ဧဒိက္ခော၊ သာဒိက္ခော။ ဣဒိသော၊ သဒိသော၊ သရိသော၊ သရိက္ခော။
၆၄၃၊ ၆၃၅။ ဘျာဒီဟိ မတိ ဗုဓိ ပူဇာဒီဟိ စ တ္တော။
ဘီဣစ္စေဝမာဒီဟိ ဓာတူဟိ၊ မတိ။ ဗုဓိ ပူဇာဒိတော စ တ္တ ပစ္စယော ဟောတိ။
ဘာယိတဗ္ဗောတိ ဘီတော၊ သုပိတဗ္ဗောတိ သုတ္တော၊ မိဇ္ဇိတဗ္ဗော သိနေဟေတဗ္ဗောတိ မိတ္တော၊ သမ္မန္နိတဗ္ဗောတိ သမ္မတော၊ သံ သုဋ္ဌု မာနိတဗ္ဗော ပူဇေတဗ္ဗောတိ သမ္မတော၊ သမ္မာနီယိတ္ထာတိ သမ္မတော၊ သံကပ္ပီယတေတိ သင်္ကပ္ပိတော ¶ ၊ သံကပ္ပီယိတ္ထာတိ သင်္ကပ္ပိတော၊ သမ္ပာဒီယတေတိ သမ္ပာဒိတော၊ သမ္ပာဒီယိတ္ထာတိ သမ္ပာဒိတော၊ အဝဓာရီယတေတိ အဝဓာရိတော၊ အဝဓာရီယိတ္ထာတိ အဝဓာရိတော၊ ဗုဇ္ဈိတဗ္ဗော ဉာတဗ္ဗောတိ ဗုဒ္ဓါ၊ အဇ္ဈယိတဗ္ဗောတိ ဣတော၊ ဧတဗ္ဗော ဂန္တဗ္ဗောတိ ဣတော၊ ဝိဒိတဗ္ဗော ဉာတဗ္ဗောတိ ဝိဒိတော၊ တက္ကီယတေတိ တက္ကိတော၊ ပူဇီယတေတိ ပူဇိတော၊ ပူဇီယိတ္ထာတိ ပူဇိတော၊ အပစာယိတဗ္ဗောတိ အပစာယိတော၊ မာနိတဗ္ဗော ပူဇေတဗ္ဗောတိ မာနိတော၊ အပစီယတေတိ အပစိတော၊ ဝန္ဒီယတေတိ ဝန္ဒိတော၊ ဝန္ဒီယိတ္ထာတိ ဝန္ဒိတော၊ သက္ကရီယတေတိ သက္ကာရိတော၊ သက္ကရီယိတ္ထာတိ သက္ကာရိတော။
၆၄၄၊ ၆၆၁။ ဝေပု သီ ဒဝ ဝမု ကု ဒါ ဘူ ဟွာဒီဟိ ထု တ္တိမ ဏိမာ နိဗ္ဗတ္တေ။
ဝေပု သီ ဒဝ ဝမု ကု ဒါ ဘူ ဟုဣစ္စေဝမာဒီဟိ ဓာတူဟိ ယထာသမ္ဘဝံ ထု တ္တိမ ဏိမပစ္စယာ ဟောန္တိ နိဗ္ဗတ္တတ္ထေ။
ဝေပနံ ဝေပေါ၊ တေန နိဗ္ဗတ္တော ဝေပထု၊ သယနံ သယော၊ တေန နိဗ္ဗတ္တော သယထု၊ ဒဝနံ ဒဝေါ၊ တေန နိဗ္ဗတ္တော ဒဝထု။ ဝမနံ ဝမော၊ တေန နိဗ္ဗတ္တော ဝမထု။ ကုတ္တိ ကရဏံ၊ တေန နိဗ္ဗတ္တံ ကုတ္တိမံ။ ဒါတိ ဒါနံ၊ တေန နိဗ္ဗတ္တံ ဒတ္တိမံ။ ဘူတိ ဘဝနံ၊ တေန နိဗ္ဗတ္တံ ဘောတ္တိမံ။ အဝဟုတိ အဝဟနံ၊ တေန နိဗ္ဗတ္တံ ဩဟာဝိမံ။
၆၄၅၊ ၆၆၂။ အက္ကောသေ ¶ နမှာနိ။
အက္ကောသဣစ္စေတသ္မိံ အတ္ထေ နမှိ ပဋိသေဓယုတ္တေ အာနိပစ္စယော ဟောတိ ဓာတူဟိ။
န ဂမိတဗ္ဗံ အဂမာနိ တေ ဇမ္မ ဒေသံ၊ န ကတ္တဗ္ဗံ အကရာဏိ တေ ဇမ္မ ကမ္မံ။
နမှီတိ ကိမတ္ထံ? ဝိပတ္တိ တေ ဇမ္မ၊ ဝိကတိ တေ ဇမ္မ။
အက္ကောသေတိ ကိမတ္ထံ? န ဂန္တဗ္ဗာ အဂတိ တေ။
၆၄၆၊ ၄၁၉။ ဧကာဒိတော သကိဿ က္ခတ္တုံ။
ဧကာဒိတော သကိဿ က္ခတ္တုံ ဟောတိ။
ဧကဿ ပဒတ္ထဿ သကိံ ဝါရံ ဧကက္ခတ္တုံ၊ ဒွိန္နံ ပဒတ္ထာနံ သကိံ ဝါရံ ဒွိက္ခတ္တုံ၊ တိဏ္ဏံ ပဒတ္ထာနံ သကိံ ဝါရံ တိက္ခတ္တုံ၊ ဧဝံ စတုက္ခတ္တုံ၊ ပဉ္စက္ခတ္တုံ၊ ဆက္ခတ္တုံ၊ သတ္တက္ခတ္တုံ၊ အဋ္ဌက္ခတ္တုံ၊ နဝက္ခတ္တုံ၊ ဒသက္ခတ္တုံ။ ဣစ္စေဝမာဒယော သဒ္ဒါ ယောဇေတဗ္ဗာ။
၆၄၇၊ ၆၆၃။ သုနဿုနဿောဏ ဝါနုဝါနူနုနခုနာနာ။
သုနဣစ္စေတဿ ပါဋိပဒိကဿ ဥနဿ ဩဏ ဝါန ဥဝါန ဦန ဥနခ ဥန အာ အာနာဒေသာ ဟောန္တိ။
သာမိကဿ ¶ သဒ္ဒံ သုဏာတီတိ သောဏော၊ သာမိကဿ သဒ္ဒံ သုဏာတီတိ သွာနော၊ ဧဝံ သုဝါနော၊ သူနော၊ သုနခေါ၊ သုနော၊ သာ၊ သာနော။
တရုဏဣစ္စေတဿ ပါဋိပဒိကဿ သုသု အာဒေသော ဟောတိ။
သုသု ကာဠကေသော။
ယုဝဣစ္စေတဿ ပါဋိပဒိကဿ ဥဝဿ ဥဝဥဝါန ဥနဦနာဒေသာ ဟောန္တိ။
ယုဝါ၊ ယုဝါနော၊ ယုနော၊ ယူနော။
၆၅၀၊ ၆၅၁။ ကာလေ ဝတ္တမာနာတီတေ ဏွာဒယော။
ကာလေ ဝတ္တမာနတ္ထေ စ အတီတတ္ထေ စ ဏု ယု တပစ္စယာ ဟောန္တိ။
အကာသိ၊ ကရောတီတိ ကာရု၊ အဂစ္ဆိ၊ ဂစ္ဆတီတိ၊ ဝါယု၊ အဘဝိ၊ ဘဝတီတိ ဘူတံ။
၆၅၁၊ ၆၄၇။ တဝိဿတိ ¶ ဂမာဒီဟိ ဏီ ဃိဏ။
ဘဝိဿတိကာလတ္ထေ ဂမု ဘဇ သု ဌာဣစ္စေဝမာဒီဟိ ဓာတူဟိ ဏီ ဃိဏ ပစ္စယာ ဟောန္တိ။
အာယတိံ ဂမိတုံ သီလံ ယဿ၊ သော ဟောတီတိ ဂါမီ၊ အာယတိံ ဘဇိတုံ သီလံ ယဿ၊ သော ဟောတီတိ ဘာဇီ၊ အာယတိံ ပဿာပိတုံ သီလံ ယဿ၊ သော ဟောတီတိ ပဿာဝိ၊ အာယတိံ ပဋ္ဌာယိတုံ သီလံ ယဿ၊ သော ဟောတီတိ ပဋ္ဌာယိ။
ကြိယာယမတ္ထေ ဏွု တုဣစ္စေတေ ပစ္စယာ ဟောန္တိ ဘဝိဿတိကာလေ။
‘‘ကရိဿ’’န္တိ ကာရကော ဝဇတိ၊ ‘‘ဘုဉ္ဇိဿ’’န္တိ ဘောတ္တာ ဝဇတိ။
ဘာဝဝါစိမှိ စတုတ္ထီဝိဘတ္တိ ဟောတိ ဘဝိဿတိကာလေ၊
ပစိဿတေ၊ ပစနံ ဝါ ပါကော၊ ပါကာယ ဝဇတိ။ ဘုဉ္ဇိဿတေ၊ ဘောဇနံ ဝါ ဘောဂေါ၊ ဘောဂါယ ဝဇတိ။ နစ္စိဿတေ၊ နစ္စနံ ဝါ နစ္စံ၊ နစ္စာယ ဝဇတိ။
၆၅၄၊ ၆၄၉။ ကမ္မနိ ¶ ဏော။
ကမ္မနိ ဥပပဒေ ဏပစ္စယော ဟောတိ ဘဝိဿတိကာလေ။
နဂရံ ကရိဿတိ နဂရကာရော ဝဇတိ၊ သာလိံ လာဝိဿတိ သာလိလာဝေါ ဝဇတိ၊ ဓညံ ဝပိဿတိ ဓညဝါပေါ ဝဇတိ၊ ဘောဂံ ဒဒိဿတိ ဘောဂဒါယော ဝဇတိ၊ သိန္ဓုံ ပိဝိဿတိ သိန္ဓုပါယော ဝဇတိ။
သေသဣစ္စေတသ္မိံ အတ္ထေ ဿံ န္တု မာန အာန ဣစ္စေတေ ပစ္စယာ ဟောန္တိ ဘဝိဿတိကာလေ ကမ္မူပပဒေ။
ကမ္မံ ကရိဿတိ ကမ္မံ ကရိဿံ၊ ဧဝံ ကမ္မံ ကရောန္တော၊ ကမ္မံ ကုရုမာနော၊ ကမ္မံ ကရာနော ဝဇတိ။ ဘောဇနံ ဘုဉ္ဇိဿတိ ဘောဇနံ ဘုဉ္ဇိဿံ၊ ဧဝံ ဘောဇနံ ဘုဉ္ဇန္တော၊ ဘောဇနံ ဘုဉ္ဇမာနော၊ ဘောဇနံ ဘုဉ္ဇာနော ဝဇတိ။ ခါဒနံ ခါဒိဿတိ ခါဒနံ ခါဒိဿံ၊ ဧဝံ ခါဒနံ ခါဒန္တော၊ ခါဒနံ ခါဒမာနော၊ ခါဒနံ ခါဒါနော ဝဇတိ။ မဂ္ဂံ စရိဿတိ မဂ္ဂံ စရိဿံ၊ ဧဝံ မဂ္ဂံ စရန္တော၊ မဂ္ဂံ စရမာနော၊ မဂ္ဂံ စရာနော ဝဇတိ။ ဘိက္ခံ ဘိက္ခိဿတိ ဘိက္ခံ ဘိက္ခိဿံ၊ ဧဝံ ဘိက္ခံ ဘိက္ခန္တော၊ ဘိက္ခံ ဘိက္ခမာနော၊ ဘိက္ခံ ဘိက္ခာနော ဝဇတိ။
၆၅၆၊ ၆၆၆။ ဆဝါဒီတိ ¶ တတြဏ။
ဆ ဒ စိ တိ သု နီ ဝိ ဒ ပဒ တနု ယတ အဒ မဒ ယုဇ ဝတုမိဒ မာ ပု က လ ဝရ ဝေ ပု ဂုပ ဒါ ဣစ္စေဝမာဒီဟိ ဓာတူဟိ တတြဏ ဣစ္စေတေ ပစ္စယာ ဟောန္တိ ယထာသမ္ဘဝံ။
အာတပံ ဆာဒေတီတိ ဆတ္တံ၊ ဆတြံ။ အာရမ္မဏံ စိန္တေတီတိ စိတ္တံ၊ စိတြံ။ စိန္တေန္တိ သမ္ပယုတ္တဓမ္မာ ဧထေနာတိ ဝါ စိတ္တံ၊ စိတြံ။ အတ္ထေ အဘိဿဝေတီတိ သုတ္တံ၊ သုတြံ။ အတ္ထေ သူစေတီတိ ဝါ သုတ္တံ၊ သုတြံ။ သတ္တေ နေတီတိ နေတ္တံ၊ နေတြံ။ သတ္တေ ဣစ္ဆိတဋ္ဌာနံ နေန္တိ ဧတေနာတိ ဝါ နေတ္တံ၊ နေတြံ။ ပကာရေန ဝိဒတီတိ ပဝိတ္တံ၊ ပဝိတြံ။ ဝိဝိဓေန အာကာရေန မင်္ဂ ပါပံ ပုနာတိ၊ သောဓေတီတိ ပဝိတ္တံ၊ ပဝိတြံ။ သုစိဘာဝံ ဝါ ပါပုဏာတီတိ ပဝိတ္တံ၊ ပဝိတြံ။ ပဒတိ ပါပုဏာတီတိ ပတ္တော၊ ပတြော။ အာဟာရာ ပတန္တိ ဧတ္ထ ဘာဇနေတိ ပတ္တံ၊ ပတြံ။ ပဒတိ ပဝတ္တတီတိ ဝါ ပတ္တံ၊ ပတြံ။ တနောတိ ဝိတ္ထာရေတီတိ တန္တံ၊ တန္တြံ၊ တနိတဗ္ဗံ ဝိတ္ထာရေတဗ္ဗန္တိ ဝါ တန္တံ၊ တန္တြ။ ယတတီတိ ယတ္တံ၊ ယတြံ။ ယတတိ ဝီရိယံ ကရောတိ ဧတေနာတိ ဝါ ယတ္တံ၊ ယတြံ။ ယတနံ ဝါ ယတ္တံ၊ ယတြံ။ သုခဒုက္ခံ အဒတိ ဘက္ခတီတိ အတ္တာ၊ အတြာ။ မဒတီတိ မတ္တံ၊ မတြံ။ ဝတ္ထုံ ယုဇ္ဇန္တိ ဧတေနာတိ ယောတ္တံ၊ ယောတြံ။ ဝတ္တတီတိ ဝတ္တံ၊ ဝတြံ။ မိဒတိ ¶ သိနေဟံ ကရောတီတိ မိတ္တံ။ မိတြံ။ မိဒတိ သိနေဟတိ ဧတာယာတိ မေတ္တာ၊ မေတြာ။ ပရိ သမန္တ တော သဗ္ဗာကာရေန မိနန္တိ ဧတာယာတိ မတ္တာ၊ မတြာ။ မာနနံ ဝါ မတ္တံ၊ မတြံ။ အတ္တနော ကုလံ ပုနာတိ သောဓေတီတိ ပုတ္တော၊ ပုတြော။ ကလိတဗ္ဗံ သင်္ချာတဗ္ဗန္တိ ကလတ္တံ၊ ကလတြံ။ သံသုဋ္ဌု ဝါရေတိ ဧတေနာတိ ဝရတ္တံ၊ ဝရတြံ။ ဝေပတိ ကမ္ပတီတိ ဝေတ္တံ၊ ဝေတြံ။ ဂေါပိတဗ္ဗံ ရက္ခိတဗ္ဗန္တိ ဂုတ္တံ။ ဂုတြံ၊ ဂေါတ္တံ၊ ဂေါတြံ။ ဒါတိ အဝခဏ္ဍတိ ဧတေနာတိ ဒါတ္တံ၊ ဒါတြံ ဣစ္စေဝမာဒိ။
၆၅၇၊ ၆၆၇။ ဝဒါဒီဟိ ဏိတ္တော ဂဏေ။
ဝဒ စရ ဝရဣစ္စေဝမာဒီဟိ ဓာတူဟိ ဏိတ္တပစ္စယော ဟောတိ ဂဏတ္ထေ။
ဝါဒိတာနံ ဂဏော ဝါဒိတ္တံ။ ဧဝံ စာရိတ္တံ၊ ဝါရိတ္တံ၊ ဣစ္စေဝမာဒိ။
မိဒ ပဒ ရန္ဇ တနု ဓာဣစ္စေဝမာဒီဟိ ဓာတူဟိ တ္တိ တိ ဣစ္စေတေ ပစ္စယာ ဟောန္တိ။
မိဒတိ သိနေဟတီတိ မေတ္တိ၊ ပဒတိ ဂစ္ဆတီတိ ပတ္တိ၊ ရန္ဇတိ ဧတ္ထာတိ ရတ္တိ၊ တနောတိ ဝိတ္ထာရေတီတိ တန္တိ၊ အတ္တနော ¶ ကုလံ တနောတိ ဝိတ္ထာရေတီတိ ဝါ တန္တိ၊ ပရေသံ ဣတ္ထီနံ ပုတ္တံ ဓာရေတီတိ ဓာတိ၊ ခီရံ ဓာရေတီတိ ဝါ ဓာတိ၊ အတ္တနော သဘာဝံ ဓာရေတီတိ ဝါ ဓာတိ ဣစ္စေဝမာဒိ။
၆၅၉၊ ၆၆၉။ ဥသု ရန္ဇ ဒံသာနံ ဒံသဿ ဒဍ္ဎောဎ ဌာ စ။
ဥသု ရန္ဇ ဒံသဣစ္စေတေသံ ဓာတူနံ ဒံသဿ ဒဍ္ဎာဒေသော ဟောတိ၊ ဎ ဌပစ္စယာ စ ဟောန္တိ။
ဥသီယတေ ဥဍ္ဎော၊ ရန္ဇန္တိ ဧတ္ထာတိ ရဋ္ဌံ၊ ဒံသီယတေတိ ဒဍ္ဎော။
၆၆၀၊ ၆၇၀။ သူဝုသာနမူဝုသာနမတောထောစ။
သူဝု အသဣစ္စေတေသံ ဓာတူနံ ဦဥအသာနံ အတာဒေသော ဟောတိ၊ ထပစ္စယော စ။
သဝတိ ဟိံသတိ ဧတေနာတိ သတ္ထံ၊ ဟိရောတ္တပ္ပံ သံဝရတိ ဧတေနာတိဝတ္ထံ၊ သဒ္ဒါနုရူပံ အသတိဘဝတီတိ အတ္ထော၊
၆၆၁၊ ၆၇၁။ ရန္ဇုဒါဒီဟိ ¶ ဓ ဒိဒ္ဒ ကိရာ ကွစိ ဇဒလောပေါစ။
ရန္ဇ ဥဒ ဣဒိ စဒိ မဒိ ခုဒ ဆိဒိ ရုဒိ ဒလ သုသ သုစ ဝစ ဝဇ ဣစ္စေဝမာဒီဟိ ဓာတူဟိ ဓ ဒ ဣဒ္ဒ က ဣရဣစ္စေတေ ပစ္စယာ ဟောန္တိ၊ ကွစိ ဇ ဒ လောပေါ စ၊ ပုန နိပ္ပဇ္ဇန္တေ။
ရဉ္ဇိတဗ္ဗန္တိ ရန္ဓံ၊ ရန္ဇယိတ္ထာတိ ဝါ ရန္ဓံ၊ အတ္တနိ သန္နိဿိတာနံ မစ္ဆမကရာနံ ပီတိသောမနဿံ ဥန္ဒတိ ပသဝတိ ဇနေတီတိ သမုဒ္ဒေါ၊ ဣန္ဒတိ ပရမိဿရိယံ ကရောတီတိ ဣန္ဒော၊ ဣန္ဒတ္တံ အဓိပတိဘာဝံ ကရောတီတိ ဝါ ဣန္ဒော၊ စန္ဒိတဗ္ဗော ဣစ္ဆိတဗ္ဗောတိ စန္ဒော၊ မန္ဒတိ ဟာသေတီတိ မန္ဒော၊ မဒိတဗ္ဗော ဟာသေတဗ္ဗောတိ ဝါ မန္ဒော၊ ခုဒတိ ပိပါသေတီတိ ခုဒ္ဒေါ၊ ဆိန္ဒိတဗ္ဗောတိ ဆိဒ္ဒေါ၊ ရုဒတိ ဟိံသတီတိ ရုဒ္ဒေါ၊ ဒလတိ ဒုဂ္ဂတဘာဝံ ဂစ္ဆတီတိ ဒလိဒ္ဒေါ၊ သုဿတီတိ သုက္ကံ၊ သုစတီတိသောကော၊ ဝစိတဗ္ဗန္တိ ဝက္ကံ၊ အပ္ပဋိဟတော ဟုတွာ ဝဇတိ ဂစ္ဆတီတိ ဝဇိရံ ဣစ္စေဝမာဒိ။
၆၆၂၊ ၆၇၂။ ပဋိတော ဟိဿ ဟေရဏ ဟီရဏ။
ပဋိဣစ္စေတသ္မာ ဟိဿ ဓာတုဿ ဟေရဏ ဟီရဏ အာဒေသာ ဟောန္တိ။
ပဋိပက္ခေမဒ္ဒိတွာဂစ္ဆတိ ပဝတ္တတီတိ ပါဋိဟေရံ၊ ပါဋိဟီရံ။
၆၆၃၊ ၆၇၃။ ကဍျာဒီဟိ ¶ ကော။
ကဍိ ဃဍိ ဝဍိ ကရဍိ မဍိ သဍိ ကုဌိ ဘဍိ ပဍိ ဒဍိ ရဍိ တဍိ ဣသိဍိ စဍိ ဂဍိ အဍိ လဍိ မေဍိ ဧရဍိ ခဍိ ဣစ္စေဝမာဒီဟိ ဓာတူဟိ ကပစ္စယော ဟောတိ သဟ ပစ္စယေန စ နိပ္ပဇ္ဇန္တေ ယထာသမ္ဘဝံ။
ကဏ္ဍိတဗ္ဗော ဆိန္ဒိတဗ္ဗောတိ ကဏ္ဍော၊ ဃဏ္ဍိတဗ္ဗော ဃဋေတဗ္ဗောတိ ဃဏ္ဍော၊ ဝဏ္ဍန္တိ ဧတ္ထာတိ ဝဏ္ဍော၊ ကရဏ္ဍိတဗ္ဗော ဘာဇေတဗ္ဗောတိ ကရဏ္ဍော၊ မဏ္ဍီယတေ ဝိဘူသီယတေ ဧတေနာတိ မဏ္ဍော၊ သဏ္ဍန္တိ ဂုမ္ဗန္တိ ဧတ္ထာတိ သဏ္ဍော၊ အင်္ဂမင်္ဂါနိ ကုဏ္ဌတိ ဆိန္ဒတီတိ ကုဋ္ဌံ၊ ဘဏ္ဍိတဗ္ဗန္တိ ဘဏ္ဍံ၊ ပဏ္ဍတိ လိင်္ဂဝေကလ္လဘာဝံ ဂစ္ဆတီတိ ပဏ္ဍကော။ ဒဏ္ဍတိ အာဏံ ကရောတိ ဧတေနာတိ ဒဏ္ဍော၊ ရဏ္ဍတိ ဟိံသတီတိ ရဏ္ဍော၊ ဝိသေသေန တဏ္ဍတိ စာလေတိ ပရေသံ ဝိညူနံ ဟဒယံ ကမ္ပေတီတိ ဝိတဏ္ဍော၊ ဣသိဏ္ဍတိ ပရေသံ မဒ္ဒတီတိ ဣသိဏ္ဍော၊ စဏ္ဍတိ စဏ္ဍိက္ကဘာဝံ ကရောတီတိ စဏ္ဍော၊ ဂဏ္ဍတိ သန္နိစယတိ သမူဟံ ကရောတိ ဧတ္ထာတိ ဂဏ္ဍော၊ အဏ္ဍီယတိ နိဗ္ဗတ္တီယတီတိ အဏ္ဍော၊ လဏ္ဍိတဗ္ဗော ဇိဂုစ္ဆိတဗ္ဗောတိ လဏ္ဍော၊ မေဏ္ဍတိ ¶ ကုဋိလဘာဝံ ဂစ္ဆတီတိ မေဏ္ဍော၊ ဧရဏ္ဍတိ ရောဂံ ဟိံသတီတိ ဧရဏ္ဍော၊ ခဏ္ဍိတဗ္ဗော ဆိန္ဒိတဗ္ဗောတိ ခဏ္ဍော ဣစ္စေဝမာဒိ။
၆၆၄၊ ၆၇၄။ ခါဒါမဂမာနံ ခ န္ဓ’န္ဓ ဂန္ဓာ။
ခါဒ အမ ဂမုဣစ္စေတေသံ ဓာတူနံ ခန္ဓ အန္ဓ ဂန္ဓာဒေသာ ဟောန္တိ၊ ကပစ္စယော စ ဟောတိ။
ဇာတိဇရာမရဏာဒီဟိ သံသာရဒုက္ခေဟိ ခါဒိတဗ္ဗောတိ ခန္ဓော၊ အမတိ အင်္ဂမင်္ဂဿ ရုဇ္ဇနဘာဝံ ဂစ္ဆတီတိ အန္ဓော၊ စက္ခုနာ အမတိ ရုဇ္ဇတီတိ ဝါ အန္ဓော၊ တံ တံ ဌာနံ ဝါတေန ဂစ္ဆတီတိ ဂန္ဓော။ ဧဝံ ခန္ဓကော၊ အန္ဓကော၊ ဂန္ဓကော။
ပဋ ကလ ကုသ ကဒ ဘဂန္ဒ မေခ ဝက္က တက္က ပလ္လ သဒ္ဒ မူလ ဗိလ ဝိဒ စဍံ ပဉ္စ ဝါ ဝသ ပစိ မစ မုသ ဂေါတ္ထု ပုထု ဗဟု မင်္ဂ ဗဟ ကမ္ဗ သမ္ဗ အဂ္ဂဣစ္စေဝမာဒီဟိ ဓာတူဟိ ပါဋိ ပဒိကေဟိ စ ဥတ္တရပဒေသု အလပစ္စယော ဟောတိ၊ ပစ္ဆာ ပုန နိပ္ပဇ္ဇန္တေ။
ပဋေ အလန္တိ ပဋလံ၊ ကလေ အလန္တိ ကလလံ၊ ပါပကေ အကုသလေ ဓမ္မေ ကုသတိ ဆိန္ဒတီတိ ကုသလံ၊ ကုသဘူတေ ယထာသဘာဝဓမ္မေ အလန္တိ ဝါ ကုသလံ၊ ကုသေ ဥဒ္ဒိဿ ဒါနေ အလန္တိ ဝါ ကုသလံ၊ ကုသေ သဉ္စယေ ဓမ္မသမုဒါယေ အလန္တိ ¶ ဝါ ကုသလံ၊ ကဒ္ဒေ မဒ္ဒေ အလန္တိ ကဒလံ၊ ဘဂန္ဒေ သေစနေ အလန္တိ ဘဂန္ဒလံ၊ ဘဂန္ဒေ မုတ္တကရီသဟရဏေ အလန္တိ ဝါ ဘဂန္ဒလံ၊ မေခေ ကဋိဝိစိတ္တေ အလန္တိ မေခလံ၊ ဝက္ကေ ရုက္ခတစေ အလန္တိ ဝက္ကလံ၊ တက္ကေ ရုက္ခသိလေသေ အလန္တိ တက္ကလံ၊ ပလ္လေ နိန္နဋ္ဌာနေ အလန္တိ ပလ္လလံ၊ သဒ္ဒေ ဟရိတေ အလန္တိ သဒ္ဒလံ၊ မူလေ ပတိဋ္ဌာနေ အလန္တိ မုလာလံ၊ ဗိဠေ နိဿယေ အလန္တိ ဗိလာလံ၊ ဝိဒေ ဝိဇ္ဇမာနေ အလန္တိ ဝိဒလံ၊ စဏ္ဍေ အလန္တိ စဏ္ဍာလော၊ ပဉ္စန္နံ ရာဇူနံ အလန္တိ ပဉ္စာလော၊ ဝါ ဂတိဂန္ဓနေသု အလန္တိ ဝါလံ၊ ဝါ ပဒဂမနေ အလန္တိ ဝါ ဝါဠော၊ ဝသေ အစ္ဆာဒနေ အလန္တိ ဝသလော၊ ပစေ ဝိတ္ထာရေ အလန္တိ ပစလော၊ မစေ စောရကမ္မေ အလန္တိ မစလော၊ မုသေ ထေယျေ၊ မုသေ ပါဏစာဂေ ဝါ အလန္တိ မုသလော၊ ဂေါတ္တေ ဝံသေ သိင်္ဂါလဇာတိယံ အလန္တိ ဂေါတ္ထုလော၊ ပုထုမှိ ဝိတ္ထာရေ အလန္တိ ပုထုလော၊ ဗဟုမှိ သင်္ချာနေ အလန္တိ ဗဟုလော၊ ဗဟုမှိ ဝုဒ္ဓိမှိ အလန္တိ ဝါ ဗဟုလော၊ မင်္ဂမှိ ဂမနေ အလန္တိ မင်္ဂလံ၊ ဗဟုမှိ ဝုဒ္ဓိမှိ အလန္တိ ဗဟလံ၊ ကမ္ဗမှိ သဉ္စလနေ အလန္တိ ¶ ကမ္ဗလံ။ သမ္ဗမှိ မဏ္ဍလေ အလန္တိ သမ္ဗလံ၊ အဂ္ဂေ ဂတိကောဋိလ္လေ အလန္တိ အဂ္ဂဠံ။ ဣစ္စေဝမာဒယော အညေပိ သဒ္ဒါ ဘဝန္တိ။
၆၆၆၊ ၆၇၆။ ပုထဿ ပုထု ပထာ မော ဝါ။
ပုထဣစ္စေတဿ ပါဋိပဒိကဿ ပုထု ပထာဒေသာ ဟောန္တိ၊ ကွစိ အမပစ္စယော ဟောတိ။
ပုထ ဟုတွာ ဇာတန္တိ ပုထဝီ ပထမေ ဇာတော ပထမော၊ ပထဝီ၊ ပဌမော ဝါ၊ ပုထု ကိလေသေ ဇနေတီတိ ပုထုဇ္ဇနော၊ ပုထု ဟုတွာ ဇာတန္တိ ပထဝီ၊ ပထဝီ ဝါ။
သသု ဒဒ အဒ မဒဣစ္စေဝမာဒီဟိ ဓာတူဟိ တု ဒုဣစ္စေတေ ပစ္စယာ ဟောန္တိ။
အညေ သတ္တေ သသတိ ဟိံသတီတိ သတ္တု၊ ဒုက္ခံ ဒဒါတီတိ ဒဒ္ဒု၊ ဒုက္ခေန အဒတိ ဘက္ခတိ ဧတ္ထာတိ အဒ္ဒု၊ ဒုက္ခံ အဒတိ အနုဘဝတိ ဇနော ဧတေနာတိ ဝါ အဒ္ဒု၊ ဒုက္ခံ ဘာဇနံ ¶ အာဓာရံ ဘာဝတီတိ ဝါ အဒ္ဒု၊ မဒတိ ဥမ္မတ္တံ ကရောတီတိ မဒ္ဒု၊ မဒတိ မဒ္ဒဘာဝံ ကရောတီတိ ဝါ မဒ္ဒု။
စိ ပါ ဓာဣစ္စေဝမာဒီဟိ ဓာတူဟိ ဤဝရပစ္စယောဟောတိ။
စီယတီတိ စီဝရံ၊ ပိဝတီတိ ပီဝရော၊ ပါတဗ္ဗံ ရက္ခိတဗ္ဗန္တိ ဝါ ပီဝရံ။ ဓာရေတိ ဓာရေတွာ ဇီဝိတံ ကပ္ပေတီတိ ဓီဝရော၊ ဓီဝရံ။
မုန ယတ အဂ္ဂ ပတ ကဝ သုစ ရုစ မဟာလ ဘဒ္ဒါလ မနဣဣစ္စေဝမာဒီဟိ ဓာတူဟိ၊ ပါဋိပဒိကေဟိ စ ဣပစ္စယော ဟောတိ။
အတ္ထာနတ္ထံ မုနာတိ၊ ဉေယျဓမ္မံ လက္ခဏာဒိဝသေန ဝါ ဇာနာတီတိ မုနိ၊ ယတတိ ဝီရိယံ ကရောတီတိ ယတိ၊ အဂ္ဂတိ ကုဋိလဘာဝံ ဂစ္ဆတီတိ အဂ္ဂိ၊ ပတတိ သေဋ္ဌော ဟုတွာ ပုရတော ဂစ္ဆတီတိ ပတိ၊ ကဗျံ ဗန္ဓတီတိ ကဝိ၊ ကန္တံ မနာပဝစနံ ဝဒတီတိ ဝါ ကဝိ။ သုစတိ ပရိသုဒ္ဓံ ဘဝတီတိ သုစိ၊ ရုစတိ ဒိဗ္ဗတီတိ ရုစိ၊ မဟန္တံ ဝိဘာဝံ ဘောဂက္ခန္ဓံ လာတီတိ မဟာလိ၊ ဘဒ္ဒံ ယသံ လာတီတိ ဘဒ္ဒါလိ၊ မနံ တတ္ထ ရတနေ နယတီတိ မဏိ။
၆၇၀၊ ၆၈၀။ ဝိဒါဒီဟျူရော ¶ ။
ဝိဒ ဝလ္လ မသ သိဒ ဒုကုကပု မယ ဥဒိ ခဇ္ဇ ကုရဣစ္စေဝမာဒီဟိ ဓာတူဟိ၊ ပါဋိပဒိကေဟိ စ ဦရပစ္စယောဟောတိ။
ဝိဒိတုံ အလန္တိ ဝိဒူရော၊ ဝိဒူရဋ္ဌာနေ ဇာတော ဝေဒူရော၊ ဝလ္လတိ ဝလ္လဘာဝေန ဘဝတီတိ ဝလ္လူရော၊ ဝလ္လတိ အညမညံ ဗန္ဓတီတိ ဝါ ဝလ္လူရော၊ အာမသိတဗ္ဗောတိ မသူရော၊ သိန္ဒတိ သိင်္ဂါရဘာဝံ ဂစ္ဆတီတိ သိန္ဒူရော၊ သိန္ဒတိ ဝိရောစတီတိ ဝါ သိန္ဒူရော၊ ဂမိတုံ အလံ အနာသန္နတ္တာတိ ဒူရော၊ ကုတိ သဒ္ဒံ ကရောတီတိ ကူရော၊ အတ္တနော ဂန္ဓေန အညံ ဂန္ဓံ ကပတိ ဟနတိ ဟိံသတီတိ ကပ္ပူရော၊ ကပ္ပတိ ရောဂါပနယနေ သမတ္ထေတီတိ ဝါ ကပ္ပူရော၊ မဟိယံ ရဝတီတိ မယူရော၊ မဟိယံ ယာတိ ဂစ္ဆတီတိ မယူရော၊ ပံသုံ ဥန္ဒတိ ပသဝတီတိ ဥန္ဒူရော၊ ခဇ္ဇိတဗ္ဗော ခါဒိတဗ္ဗောတိ ခဇ္ဇူရော၊ ကုရတိ အက္ကောသတီတိ ကုရူရော။
ဟန ဇန ဘာရိ ခနု အမ ဝေ ဝေဓာ သိကိ ဟိ ဣစ္စေဝမာဒီဟိ ဓာတူဟိ နု ဏု ကုဣစ္စေတေ ပစ္စယာ ဟောန္တိ။
ဘောဇနံ ¶ ဟနတိ ဟိံသတိ ဧတေနာတိ ဟဏု၊ ဟနု ဝါ။ ဂမနံ ဇနေတီတီ ဇာဏု၊ ဘာဏု ဒိဗ္ဗတီတိ ဘာဏု၊ နိဝါတေ ရိတိ ဂစ္ဆတီတီ ရေဏု၊ ခဏိတဗ္ဗော အဝဒါရိတဗ္ဗောတိ ခါဏု။ အင်္ဂမင်္ဂဿ ရုဇ္ဇနဘာဝံ ဝိဇ္ဈနဘာဝံ အမတိ ဂစ္ဆတီတိ အဏု၊ ဝေဏု၊ ဝေတိ တန္တသန္တာနေ ဘဝတီတီ ဝေဏု၊ ဗဟိသာရေအလန္တိဝါဝေဏု ဝစ္ဆံ၊ ပါယေတီတီ ဓေနု၊ အတ္ထံ ဓာရေတီတီ ဓာတု၊ ဂမနပစနာဒိကံ ကြိယံ ဓာရေတီတီ ဝါ ဓာတု၊ သီယတီ ဗန္ဓီယတီတီ သေတု၊ ဥဒ္ဓံ ဂစ္ဆတိ ပဝတ္တတီတီ ကေတု၊ အတ္တနော ဖလံ ဟိနောတိ ပဝတ္တတီတီ ဟေတု။
ကုဋ ကုသ ကဋဣစ္စေဝမာဒီဟိ ဓာတူဟိ၊ ပါဋိပဒိကေဟိ စ ဌပစ္စယော ဟောတီ။
အင်္ဂမင်္ဂံ ကုဋတိ ဆိန္ဒတီတီ ကုဋ္ဌံ၊ ဓညေန ဆာဒေတဗ္ဗော ပူရေတဗ္ဗောတီ ကောဋ္ဌော၊ ကဋိတဗ္ဗံ မဒ္ဒိတဗ္ဗန္တိ၊ ကဋ္ဌံ။
၆၇၃၊ ၆၈၃။ မနု ပူရ သုဏာဒီဟိ ဥဿ နုသိသာ။
မနု ပူရ သုဏ ကုသု ဣလ အလ မဟ သိ ကိ ဣစ္စေဝမာဒီဟိ ဓာတူဟိ၊ ပါဋိပဒိကေဟိ စ ဥသ နုသ ဣသဣစ္စေတေ ပစ္စယာ ဟောန္တိ၊ ပုန နိပ္ပဇ္ဇန္တေ။
ကုသလာကုသလေ ¶ ဓမ္မေ မနတိ ဇာနာတီတိ မနုဿော၊ မာနုသော။ ကာရဏာ ကာရဏံ မနတိ ဇာနာတီတိ ဝါ မနုဿော၊ မာနုဿော။ အတ္ထာနတ္ထံ မနတိ ဇာနာတီတိ ဝါ မနုဿော၊ မာနုဿော။ မာတာပိတူနံ ဟဒယံ ပူရေတီတိ ပုရိသော၊ အတ္တနော မနောရထံ ပူရေတီတိ ဝါ ပုရိသော၊ ပူရေတီတိ ဝါ ပေါသော၊ သသုရေဟိ သုဏိတဗ္ဗာ ဟိံသိတဗ္ဗာတိ သုဏိသာ၊ ဒွိန္နံ ဇာနာနံ ကုလသန္တာနံ ကရောတီတိ ဝါ သုဏိသာ၊ ကုစ္ဆိတဗ္ဗန္တိ ကရီသံ၊ ဂဗ္ဘံ ဝိမောစေတီတိ သုရိသော၊ တမန္ဓကာရဝိဓမနေန သတ္တာနံ ဘယံ သုရတိ ဟိံသတီတိ သူရိယော၊ ရောဂံ ဟိံသတီတိ သိရီသော၊ ဣလတိ ကမ္ပတီတိ ဣလ္လိသော၊ တဏှာယ ဒုဗ္ဗလော ဟုတွာ ဣလတိ ကမ္ပတီတိ ဝါ ဣလ္လိဃော၊ ပါပကရဏေ အလတိ သမတ္ထေတီတိ အလသော၊ မဟိတဗ္ဗော ပူဇေတဗ္ဗောတိ မဟိသော၊ သီယတိ ဗန္ဓီယတီတိ သီသံ၊ ကိတဗ္ဗံ ဟိံသိတဗ္ဗန္တိ ကိသံ၊ ဣစ္စေဝမာဒိ။
ဣတိ ကိဗ္ဗိဓာနကပ္ပေ ဥဏာဒိကပ္ပော ဆဋ္ဌော ကဏ္ဍော။
ဥဏာဒိကပ္ပော နိဋ္ဌိတော။
ကစ္စာယနပကရဏံ နိဋ္ဌိတံ။