📜

၁။ သဝိကရဏာချာတဝိဘာဂ

တတ္ထ ဓာတူတိ ကေနဋ္ဌေန ဓာတု? သကတ္ထမ္ပိ ဓာရေတီတိ ဓာတု၊ အတ္ထာတိသယယောဂတော ပရတ္ထမ္ပိ ဓာရေတီတိ ဓာတု၊ ဝီသတိယာ ဥပသဂ္ဂေသု ယေန ကေနစိ ဥပသဂ္ဂေန အတ္ထဝိသေသကာရဏေန ပဋိဗဒ္ဓါ အတ္ထဝိသေသမ္ပိ ဓာရေတီတိ ဓာတု၊ ‘‘အယံ ဣမိဿာ အတ္ထော၊ အယမိတော ပစ္စယော ပရော’’တိအာဒိနာ အနေကပ္ပကာရေန ပဏ္ဍိတေဟိ ဓာရိယတိ ဧသာတိပိ ဓာတု၊ ဝိဒဟန္တိ ဝိဒုနော ဧတာယ သဒ္ဒနိပ္ဖတ္တိံ အယလောဟာဒိမယံ အယလောဟာဒိဓာတူဟိ ဝိယာတိပိ ဓာတု။ ဧဝံ တာဝ ဓာတုသဒ္ဒဿတ္ထော ဝေဒိတဗ္ဗော။

ဓာတုသဒ္ဒေါ ဇိနမတေ၊ ဣတ္ထိလိင်္ဂတ္တနေ မတော၊

သတ္ထေ ပုလ္လိင်္ဂဘာဝသ္မိံ၊ ကစ္စာယနမတေ ဒွိသု။

အထ ဝါ ဇိနမတေ ‘‘တတော ဂေါတမိဓာတူနီ’’တိ ဧတ္ထ ဓာတုသဒ္ဒေါ လိင်္ဂဝိပလ္လာသေ ဝတ္တတိ ‘‘ပဗ္ဗတာနိ ဝနာနိ စာ’’တိ ဧတ္ထ ပဗ္ဗတသဒ္ဒေါ ဝိယ၊ န ပနေတ္ထ ဝတ္တဗ္ဗံ ‘‘အဋ္ဌိဝါစကတ္တာ နပုံသကနိဒ္ဒေသော’’တိ အဋ္ဌိဝါစကတ္တေပိ ‘‘ဓာတုယော’’တိ ဣတ္ထိလိင်္ဂဒဿနတော။ ဘူဝါဒယော သဒ္ဒါ ဓာတဝေါ။ သေယျထိဒံ? ဘူ ဣ ကု ကေ တက္က တက တကိ သုကဣစ္စာဒယော။ ဂဏတော တေ အဋ္ဌဝိဓာ ဘူဝါဒိဂဏော ရုဓာဒိဂဏော ဒိဝါဒိဂဏော သွာဒိဂဏော ကိယာဒိဂဏော ဂဟာဒိဂဏော တနာဒိဂဏော စုရာဒိဂဏော စာတိ။ ဣဒါနိ တေသံ ဝိကရဏသညိတေ ပစ္စယေ ဒဿေဿာမ။ အနေကဝိဓာ ဟိ ပစ္စယာ နာနပ္ပကာရေသု နာမနာမ ကိတနာမ သမာသနာမ တဒ္ဓိတနာမာချာတေသု ပဝတ္တနတော။ သင်္ခေပတော ပန ဒုဝိဓာဝ နာမပစ္စယော အာချာတပစ္စယော စာတိ။ တတြာပိ အာချာတပစ္စယာ ဒုဝိဓာ ဝိကရဏပစ္စယနောဝိကရဏပစ္စယဝသေန။ တတ္ထ ဝိကရဏပစ္စယော အကာရာဒိသတ္တရသဝိဓော အဂ္ဂဟိတဂ္ဂဟဏေန ပန္နရသဝိဓော စ။ နောဝိကရဏပစ္စယော ပန ခ ဆ သာဒိနေကဝိဓော။ ယေ ရူပနိပ္ဖတ္တိယာ ဥပကာရကာ အတ္ထဝိသေသဿ ဇောတကာ ဝါ အဇောတကာ ဝါ လောပနီယာ ဝါ အလောပနီယာ ဝါ၊ တေ သဒ္ဒါ ပစ္စယာ။

ပဋိစ္စ ကာရဏံ တံ တံ၊ ဧန္တီတိ ပစ္စယာထ ဝါ၊

ပဋိစ္စ သဒ္ဒနိပ္ဖတ္တိ၊ ဣတော ဧတီတိ ပစ္စယာ။

နာမိကပ္ပစ္စယာနံ ယော၊ ဝိဘာဂေါ အာဝိ ဟေဿတိ၊

နာမကပ္ပေ ယတော တသ္မာ၊ န တံ ဝိတ္ထာရယာမသေ။

ယော နောဝိကရဏာနံ တု၊ ပစ္စယာနံ ဝိဘာဂတော၊

သော ပနာချာတကပ္ပမှိ၊ ဝိတ္ထာရေနာ’ဂမိဿတီတိ။

ဣစ္စာနေကဝိဓေသု ပစ္စယေသု ‘‘ဝိကရဏပစ္စယာ နာမ ဣမေ’’တိ သလ္လက္ခေတဗ္ဗာ။ ကထံ? ဘူဝါဒိဂဏတော အပစ္စယော ဟောတိ ကတ္တရိ၊ ရုဓာဒိဂဏတော အကာရိဝဏ္ဏေကာရောကာရပစ္စယာ ဟောန္တိ ကတ္တရိ၊ ပုဗ္ဗမဇ္ဈဋ္ဌာနေ နိဂ္ဂဟီတာဂမော စ၊ ဒိဝါဒိဂဏတော ယပစ္စယော ဟောတိ ကတ္တရိ၊ သွာဒိဂဏတော ဏု ဏာ ဥဏာပစ္စယာ ဟောန္တိ ကတ္တရိ၊ ကိယာဒိဂဏတော နာပစ္စယော ဟောတိ ကတ္တရိ၊ ဂဟာဒိဂဏတော ပ္ပ ဏှာပစ္စယာ ဟောန္တိ ကတ္တရိ၊ တနာဒိဂဏတော ဩ ယိရပစ္စယာ ဟောန္တိ ကတ္တရိ၊ စုရာဒိဂဏတော ဏေ ဏယပစ္စယာ ဟောန္တိ ကတ္တရိ။

အကာရော စ ဣဝဏ္ဏော စ၊ ဧ ဩကာရာ စ ယော တထာ၊

ဏု ဏာ ဥဏာ စ နာ ပ္ပ ဏှာ-ယိရာ ဏေ ဏယပစ္စယာ။

အဂ္ဂဟိတဂ္ဂဟဏေန၊ ဧဝံ ပန္နရသေ’ရိတာ၊

ဝိကရဏဝှယာ ဧတေ၊ ပစ္စယာတိ ဝိဘာဝယေ။

ယေ ဧဝံ နိဒ္ဒိဋ္ဌေဟိ ဝိကရဏပစ္စယေဟိ တဒညေဟိ စ သပ္ပစ္စယာ အဋ္ဌဝိဓာ ဓာတုဂဏာ သုတ္တန္တေသု ဗဟူပကာရာ၊ တေသွာယံ ဘူဝါဒိဂဏော။ ဘူ သတ္တာယံ၊ ဘူဓာတု ဝိဇ္ဇမာနတာယံ ဝတ္တတိ။ သကမ္မိကာကမ္မိကာသု ဓာတူသု အယံ အကမ္မိကာ ဓာတု၊ န ပန ‘‘ဓမ္မဘူတော’’တိအာဒီသု ပတ္တိအတ္ထဝါစိကာ အပရာ ဘူဓာတု ဝိယ သကမ္မိကာ။ ဧသာ ဟိ ပရိအဘိအာဒီဟိ ဥပသဂ္ဂေဟိ ယုတ္တာယေဝ သကမ္မိကာ ဘဝတိ၊ န ဥပ ပရာ ပါတုအာဒီဟိ ဥပသဂ္ဂနိပါတေဟိ ယုတ္တာပိ။ အတော ဣမိဿာ သိဒ္ဓါနိ ရူပါနိ ဒွိဓာ ဉေယျာနိ အကမ္မကပဒါနိ သကမ္မကပဒါနိ စာတိ။

သုဒ္ဓကတ္တုကြိယာပဒနိဒ္ဒေသ

တတြ ဘဝတိ ဥဗ္ဘဝတိ သမုဗ္ဘဝတိ ပဘဝတိ ပရာဘဝတိ သမ္ဘဝတိ ဝိဘဝတိ၊ ဘောတိ သမ္ဘောတိ ဝိဘောတိ ပါတုဘဝတိ ပါတုဗ္ဘဝတိ ပါတုဘောတိ၊ ဣမာနိ အကမ္မကပဒါနိ။ ဧတ္ထ ပါတုဣတိ နိပါတော၊ သော ‘‘အာဝိဘဝတိ တိရောဘဝတီ’’တိအာဒီသု အာဝိ တိရောနိပါတာ ဝိယ ဘူဓာတုတော နိပ္ဖန္နာချာတသဒ္ဒဿ နေဝ ဝိသေသကရော၊ န စ သကမ္မကတ္တသာဓကော။ ဥဣစ္စာဒယော ဥပသဂ္ဂါ၊ တေ ပန ဝိသေသကရာ၊ န သကမ္မကတ္တသာဓကာ။ ယေသမတ္ထော ကမ္မေန သမ္ဗန္ဓနီယော န ဟောတိ၊ တာနိ ပဒါနိ အကမ္မကာနိ။ အကမ္မကပဒါနံ ယထာရဟံ သကမ္မကာကမ္မကဝသေန အတ္ထော ကထေတဗ္ဗော။ ပရိဘောတိ ပရိဘဝတိ၊ အဘိဘောတိ အဘိဘဝတိ၊ အဓိဘောတိ အဓိဘဝတိ၊ အတိဘောတိ အတိဘဝတိ၊ အနုဘောတိ အနုဘဝတိ၊ သမနုဘောတိ သမနုဘဝတိ၊ အဘိသမ္ဘောတိ အဘိသမ္ဘဝတိ၊ ဣမာနိ သကမ္မကပဒါနိ။ ဧတ္ထ ပရိဣစ္စာဒယော ဥပသဂ္ဂါ၊ တေ ဘူဓာတုတော နိပ္ဖန္နာချာတသဒ္ဒဿ ဝိသေသကရာ စေဝ သကမ္မကတ္တသာဓကာ စ။ ယေသမတ္ထော ကမ္မေန သမ္ဗန္ဓနီယော၊ တာနိ ပဒါနိ သကမ္မကာနိ။ သကမ္မကပဒါနံ သကမ္မကဝသေန အတ္ထော ကထေတဗ္ဗော၊ ကွစိ အကမ္မကဝသေနပိ။ ဧဝံ သုဒ္ဓကတ္တုကြိယာပဒါနိ ဘဝန္တိ။ ဥဒ္ဒေသောယံ။

တတြ ဘဝတီတိ ဟောတိ ဝိဇ္ဇတိ ပညာယတိ သရူပံ လဘတိ။ ဥဗ္ဘဝတီတိ ဥပ္ပဇ္ဇတိ သရူပံ လဘတိ။ သမုဗ္ဘဝတီတိ သမုပ္ပဇ္ဇတိ သရူပံ လဘတိ။ ပဘဝတီတိ ဟောတိ သမ္ဘဝတိ။ အထ ဝါ ပဘဝတီတိ ယတော ကုတောစိ သန္ဒတိ၊ န ဝိစ္ဆိဇ္ဇတိ၊ အဝိစ္ဆိန္နံ ဟောတိ၊ တံ တံ ဌာနံ ဝိသရတိ။ ပရာဘဝတီတိ ပရာဘဝေါ ဟောတိ ဗျသနံ အာပဇ္ဇတိ အဝုဒ္ဓိံ ပါပုဏာတိ။ သမ္ဘဝတီတိ သုဋ္ဌု ဘဝတိ ဝုဒ္ဓိံ ဝိရူဠှိံ ဝေပုလ္လံ အာပဇ္ဇတိ။ ဝိဘဝတီတိ ဥစ္ဆိဇ္ဇတိ ဝိနဿတိ ဝိပဇ္ဇတိ၊ ဝိသေသတော ဝါ ဘဝတိ သမ္ပဇ္ဇတိ။ ဘောတိ သမ္ဘောတိ ဝိဘောတီတိ ဣမာနိ ‘‘ဘဝတိ သမ္ဘဝတိ ဝိဘဝတီ’’တိ ဣမေဟိ ယထာက္ကမံ သမာနနိဒ္ဒေသာနိ။ ပါတုဘဝတီတိ ပကာသတိ ဒိဿတိ ပညာယတိ ပါကဋံ ဟောတိ။ ပါတုဗ္ဘဝတိ ပါတုဘောတီတိ ဣမာနိ ‘‘ပါတုဘဝတီ’’တိ ဣမိနာ သမာနနိဒ္ဒေသာနိ။ ဧဝံ အကမ္မကပဒါနံ ယထာရဟံ သကမ္မကာကမ္မကဝသေန အတ္ထကထနံ ဒဋ္ဌဗ္ဗံ။ ဧဝမုတ္တရတြာပိ အညေသမ္ပိ အကမ္မကပဒါနံ။

ပရိဘောတိဒုကာဒီသု ပန သတ္တသု ဒုကေသု ယထာက္ကမံ ဒွေ ဒွေ ပဒါနိ သမာနတ္ထာနိ၊ တသ္မာ ဒွေ ဒွေ ပဒါနိယေဝ ဂဟေတွာ နိဒ္ဒိသိဿာမ။ တတြ ပရိဘောတိ ပရိဘဝတီတိ ပရံ ဟိံသတိ ပီဠေတိ၊ အထ ဝါ ဟီဠေတိ အဝဇာနာတိ။ အဘိဘောတိ အဘိဘဝတီတိ ပရံ အဇ္ဈောတ္ထရတိ မဒ္ဒတိ။ အဓိဘောတိ အဓိဘဝတီတိ ပရံ အဘိမဒ္ဒိတွာ ဘဝတိ အတ္တနော ဝသံ ဝတ္တာပေတိ။ အတိဘောတိ အတိဘဝတီတိ ပရံ အတိက္ကမိတွာ ဘဝတိ။ အနုဘောတိ အနုဘဝတီတိ သုခဒုက္ခံ ဝေဒေတိ ပရိဘုဉ္ဇတိ သုခဒုက္ခပဋိသံဝေဒီ ဟောတိ။ သမနုဘောတိ သမနုဘဝတီတိ သုခဒုက္ခံ သုဋ္ဌု ဝေဒေတိ သုဋ္ဌု ပရိဘုဉ္ဇတိ သုဋ္ဌု သုခဒုက္ခပဋိသံဝေဒီ ဟောတိ။ အဘိသမ္ဘောတိ အဘိသမ္ဘဝတီတိ ပရံ အဇ္ဈောတ္ထရတိ မဒ္ဒတိ။ ဧဝံ သကမ္မကပဒါနံ သကမ္မကဝသေန အတ္ထကထနံ ဒဋ္ဌဗ္ဗံ။ ကတ္ထစိ ပန ဂစ္ဆတီတိ ပဝတ္တတီတိ ဧဝံ အကမ္မကဝသေနပိ။ ဧဝမုတ္တရတြာပိ အညေသံ သကမ္မကပဒါနံ။

အပစ္စယော ပရော ဟောတိ၊ ဘူဝါဒိဂဏတော သတိ၊

သုဒ္ဓကတ္တုကြိယာချာနေ၊ သဗ္ဗဓာတုကနိဿိတေ။

အယံ သုဒ္ဓကတ္တုကြိယာပဒါနံ နိဒ္ဒေသော။

ဟေတုကတ္တုကြိယာပဒနိဒ္ဒေသ

ဘာဝေတိ ဝိဘာဝေတိသမ္ဘာဝေတိ ပရိဘာဝေတိ၊ ဧဝံ ဟေတုကတ္တုကြိယာပဒါနိ ဘဝန္တိ။ ဧကကမ္မကဝသေနေသမတ္ထော ဂဟေတဗ္ဗော ။ ပစ္ဆိမဿ ပန ဒွိကမ္မကဝသေနပိ။ ပရိဘာဝါပေတိ အဘိဘာဝါပေတိ အနုဘာဝါပေတိ၊ ဧဝမ္ပိ ဟေတုကတ္တုကြိယာပဒါနိ ဘဝန္တိ။ ဒွိကမ္မကဝသေနေသမတ္ထော ဂဟေတဗ္ဗော။ ဣစ္စေဝံ ဒွိဓာ ဟေတုကတ္တုကြိယာပဒါနိ ဉေယျာနိ၊ အညာနိပိ ဂဟေတဗ္ဗာနိ။

တတြ ဘာဝေတီတိ ပုဂ္ဂလော ဘာဝေတဗ္ဗံ ယံ ကိဉ္စိ ဘာဝေတိ အာသေဝတိ ဗဟုလီကရောတိ၊ အထ ဝါ ဘာဝေတီတိ ဝဍ္ဎေတိ။ ဝိဘာဝေတီတိ ဘာဝေတဗ္ဗံ ယံ ကိဉ္စိ ဝိဘာဝေတိ ဝိသေသေန ဘာဝေတိ၊ ဝိဝိဓေန ဝါ အာကာရေန ဘာဝေတိ ဘာဝယတိ ဝဍ္ဎေတိ၊ အထ ဝါ ဝိဘာဝေတီတိ အဘာဝေတိ အန္တရဓာပေတိ။ သမ္ဘာဝေတီတိ ယဿ ကဿစိ ဂုဏံ သမ္ဘာဝေတိ သမ္ဘာဝယတိ သုဋ္ဌု ပကာသေတိ ဥက္ကံသေတိ။ ပရိဘာဝေတီတိ ပရိဘာဝေတဗ္ဗံ ယံ ကိဉ္စိ ပရိဘာဝေတိ ပရိဘာဝယတိ သမန္တတော ဝဍ္ဎေတိ။ ဧဝံ ဧကကမ္မကဝသေနတ္ထော ဂဟေတဗ္ဗော။ အထ ဝါ ပရိဘာဝေတီတိ ဝါသေတဗ္ဗံ ဝတ္ထုံ ပရိဘာဝေတိ ပရိဘာဝယတိ ဝါသေတိ ဂန္ဓံ ဂါဟာပေတိ။ ဧဝံ ဒွိကမ္မကဝသေနာပိ အတ္ထော ဂဟေတဗ္ဗော။ ပရိဘာဝါပေတီတိ ပုဂ္ဂလော ပုဂ္ဂလေန သပတ္တံ ပရိဘာဝါပေတိ ဟိံသာပေတိ၊ အထ ဝါ ပရိဘာဝါပေတီတိ ဟီဠာပေတိ အဝဇာနာပေတိ။ အဘိဘာဝါပေတီတိ ပုဂ္ဂလော ပုဂ္ဂလေန သပတ္တံ အဘိဘာဝါပေတိ အဇ္ဈောတ္ထရာပေတိ။ အနုဘာဝါပေတီတိ ပုဂ္ဂလော ပုဂ္ဂလေန သမ္ပတ္တိံ အနုဘာဝါပေတိ ပရိဘောဇေတိ။

ပယုတ္တော ကတ္တုနာ ယောဂေ၊ ဌိတောယေဝါပ္ပဓာနိယေ၊

ကြိယံ သာဓေတိ ဧတဿ၊ ဒီပကံ သာသနေ ပဒံ။

ကရဏဝစနံယေဝ၊ ယေဘုယျေန ပဒိဿတိ၊

အာချာတေ ကာရိတဋ္ဌာနံ၊ သန္ဓာယ ကထိတံ ဣဒံ။

န နာမေ ကာရိတဋ္ဌာနံ၊ ‘‘ဗောဓေတာ’’ ဣတိအာဒိကံ၊

‘‘သုနခေဟိပိ ခါဒါပေန္တိ’’၊ ဣစ္စာဒီနိ ပဒါနိ စ၊

အာဟရိတွာန ဒီပေယျ၊ ပယောဂကုသလော ဗုဓော။

တတြိဒံ ကရဏဝစနံ ကမ္မတ္ထဒီပကံ၊ ဥပယောဂသာမိဝစနာနိပိ တဒ္ဒီပကာနိ ယောဇေတဗ္ဗာနိ။ ကထံ? ပရိဘာဝါပေတီတိ ပုဂ္ဂလော ပုဂ္ဂလံ သပတ္တံ ပရိဘာဝါပေတီတိ၊ တထာ ပရိဘာဝါပေတီတိ ပုဂ္ဂလော ပုဂ္ဂလဿ သပတ္တံ ပရိဘာဝါပေတီတိ။ သေသာနိ နယာနုသာရေန နိဒ္ဒိသိတဗ္ဗာနိ။ ဧဝံ သဗ္ဗာနေတာနိ ကရဏောပယောဂသာမိဝစနာနိ ကမ္မတ္ထဒီပကာနိယေဝ ဟောန္တိ၊ တသ္မာ ဒွိကမ္မကဝသေနတ္ထော ဂဟေတဗ္ဗော။

အယံ ဟေတုကတ္တုကြိယာပဒါနံ နိဒ္ဒေသော။

ကမ္မကြိယာပဒနိဒ္ဒေသ

ဘဝိယတေ ဝိဘဝိယတေ ပရိဘဝိယတေ အဘိဘဝိယတေ အနုဘဝိယတေ ပရိဘူယတေ အဘိဘူယတေ အနုဘူယတေ၊ ဧဝံ ကမ္မုနော ကြိယာပဒါနိ ဘဝန္တိ။ အညထာ စ ဘဝိယျတေ ဝိဘဝိယျတေ ပရိဘဝိယျတေ အဘိဘဝိယျတေ အနုဘဝိယျတေ ပရိဘုယျတေ အဘိဘုယျတေ အနုဘုယျတေတိ။ ဧတ္ထ ကမ္မုနော ကြိယာပဒါနိယေဝ ကမ္မကတ္တုနော ကြိယာပဒါနိ ကတွာ ယောဇေတဗ္ဗာနိ။ ဝိသုဉှိ ကမ္မကတ္တုနော ကြိယာပဒါနိ န လဗ္ဘန္တိ။

တတြ ဘဝိယတေတိ ဘာဝေတဗ္ဗံ ယံ ကိဉ္စိ ပုဂ္ဂလေန ဘာဝိယတေ အာသေဝိယတေ ဗဟုလီကရိယတေ၊ အထ ဝါ ဘဝိယတေတိ ဝဍ္ဎိယတေ။ ဝိဘဝိယတေတိ ဝိဘာဝေတဗ္ဗံ ယံ ကိဉ္စိ ပုဂ္ဂလေန ဝိဘဝိယတေ ဝိသေသေန ဘဝိယတေ၊ ဝိဝိဓေန ဝါ အာကာရေန ဘဝိယတေ ဝဍ္ဎိယတေ၊ အထ ဝါ ဝိဘဝိယတေတိ အဘဝိယတေ အန္တရဓာပိယတေ။ ပရိဘဝိယတေတိ သပတ္တော ပုဂ္ဂလေန ပရိဘဝိယတေ ဟိံသိယတေ၊ အထ ဝါ ပရိဘဝိယတေတိ ဟီဠိယတေ အဝဇာနိယတေ။ အဘိဘဝိယတေတိ သပတ္တော ပုဂ္ဂလေန အဘိဘဝိယတေ အဇ္ဈောတ္ထရိယတေ အဘိမဒ္ဒိယတေ။ အနုဘဝိယတေတိ သမ္ပတ္တိ ပုဂ္ဂလေန အနုဘဝိယတေ ပရိဘုဉ္ဇိယတေ။ ပရိဘူယတေတိအာဒီနိ တီဏိ ‘‘ပရိဘဝိယတေ’’တိအာဒီဟိ တီဟိ သမာနနိဒ္ဒေသာနိ။ သေသာနိ ပန ယထာဝုတ္တေဟိ ယံ ကမ္မမေဝ ပဓာနတော ဂဟေတွာ နိဒ္ဒိသိယတိ ပဒံ၊ တံ ကမ္မတ္ထဒီပကံ။ တသ္မာ ကတ္တရိ ဧကဝစနေန နိဒ္ဒိဋ္ဌေပိ ယဒိ ကမ္မံ ဗဟုဝစနဝသေန ဝတ္တဗ္ဗံ၊ ဗဟုဝစနန္တညေဝ ကမ္မုနော ကြိယာပဒံ ဒိဿတိ။ ယဒိ ပနေကဝစနဝသေန ဝတ္တဗ္ဗံ၊ ဧကဝစနန္တညေဝ။ တထာ ကတ္တရိ ဗဟုဝစနေန နိဒ္ဒိဋ္ဌေပိ ယဒိ ကမ္မံ ဧကဝစနဝသေန ဝတ္တဗ္ဗံ၊ ဧကဝစနန္တညေဝ ကမ္မုနော ကြိယာပဒံ ဒိဿတိ။ ယဒိ ပန ဗဟုဝစနဝသေန ဝတ္တဗ္ဗံ၊ ဗဟုဝစနန္တညေဝ။ ကထံ? ဘိက္ခုနာ ဓမ္မော ဘဝိယတေ၊ ဘိက္ခုနာ ဓမ္မာ ဘဝိယန္တေ၊ ဘိက္ခူဟိ ဓမ္မော ဘဝိယတေ၊ ဘိက္ခူဟိ ဓမ္မာ ဘဝိယန္တေတိ။ ဣမိနာ နယေန သဗ္ဗတ္ထ ကမ္မုနော ကြိယာပဒေသု ဝေါဟာရော ကာတဗ္ဗော။ ယသ္မိံ ပန ကမ္မုနော ကြိယာပဒေ ကမ္မတ္ထဒီပကေ ကမ္မဘူတဿေဝတ္ထဿ ကတ္တုဘာဝပရိကပ္ပော ဟောတိ၊ တံ ကမ္မကတ္တုတ္ထဒီပကံ၊ တံ ကမ္မုနော ကြိယာပဒတော ဝိသုံ န လဗ္ဘတိ။ အယံ ပနေတ္ထ အတ္ထဝိညာပနေ ပယောဂရစနာ။ သယမေဝ ပရိဘဝိယတေ ဒုဗ္ဘာသိတံ ဘဏံ ဗာလော တပ္ပစ္စယာ အညေဟိ ပရိဘူတောပိ၊ သယမေဝ အဘိဘဝိယတေ ပါပကာရီ နိရယေ နိရယပါလေဟိ အဘိဘူတောပိ တထာရူပဿ ကမ္မဿ သယံ ကတတ္တာတိ။ ဧတ္ထ ဟိ သယမေဝ ပီယတေ ပါနီယံ၊ သယမေဝ ကဋော ကရိယတေတိအာဒီသု ဝိယ သုခါဘိသင်္ခရဏီယတာ လဗ္ဘတေဝ၊ တတော ကမ္မကတ္တုတာ စ။

အယံ ကမ္မုနော ကြိယာပဒါနံ နိဒ္ဒေသော။

ဘာဝကြိယာပဒနိဒ္ဒေသ

ဘူယတေ ဘဝိယတေ ဥဗ္ဘဝိယတေ၊ ဧဝံ ဘာဝဿ ကြိယာပဒါနိ ဘဝန္တိ။ အညထာ စ ဘုယျတေ ဘဝိယျတေ ဥဗ္ဘဝိယျတေတိ။ တတြ ယထာ ဌီယတေပဒဿ ဌာနန္တိ ဘာဝဝသေန အတ္ထကထနမိစ္ဆန္တိ၊ ဧဝံ ဘူယတေတိအာဒီနမ္ပိ ဘဝနန္တိအာဒိနာ ဘာဝဝသေန အတ္ထကထနမိစ္ဆိတဗ္ဗံ။ ယထာ စ ဌာနံ ဌိတိ ဘဝနန္တိအာဒီဟိ ဘာဝဝါစကကိတန္တနာမပဒေဟိ သဒ္ဓိံ သမ္ဗန္ဓေ ဆဋ္ဌိယောဇနမိစ္ဆန္တိ၊ န တထာ ဌီယတေ ဘူယတေတိအာဒီဟိ ဘာဝဝါစကာချာတပဒေဟိ သဒ္ဓိံ သမ္ဗန္ဓေ ဆဋ္ဌိယောဇနာ ဣစ္ဆိတဗ္ဗာ သမ္ဗန္ဓေ ပဝတ္တဆဋ္ဌိယန္တသဒ္ဒေဟိ အသမ္ဗန္ဓနီယတ္တာ အာချာတိကပဒါနံ။ ယသ္မိံ ပယောဂေ ယံ ကမ္မုနော ကြိယာပဒေန သမာနဂတိကံ ကတွာ ဝိနာ ကမ္မေန နိဒ္ဒိသိယတိ ကြိယာပဒံ၊ ကတ္တုဝါစကပဒံ ပန ပစ္စတ္တဝစနေန ဝါ ကရဏဝစနေန ဝါ နိဒ္ဒိသိယတိ၊ တံ တတ္ထ ဘာဝတ္ထဒီပကံ။ န ဟိ သဗ္ဗထာ ကတ္တာရမနိဿာယ ဘာဝေါ ပဝတ္တတိ။ ဧဝံ သန္တေပိ ဘာဝေါ နာမ ကေဝလော ဘဝနလဝနပစနာဒိကော ဓာတုအတ္ထောယေဝ။ အက္ခရစိန္တကာ ပန ‘‘ဌီယတေ ဘူယတေ’’တိအာဒီသု ဘာဝဝိသယေသု ကရဏဝစနမေဝ ပယုဉ္ဇန္တိ ‘‘နနု နာမ ပဗ္ဗဇိတေန သုနိဝတ္ထေန ဘဝိတဗ္ဗံ သုပါရုတေန အာကပ္ပသမ္ပန္နေနာ’’တိအာဒီသု ဝိယ၊ တသ္မာ တေသံ မတေ ‘‘တေန ဥဗ္ဘဝိယတေ’’တိ ကရဏဝစနေန ယောဇေတဗ္ဗံ။ ဇိနမတေန ပန ‘‘သော ဘူယတေ’’တိအာဒိနာ ပစ္စတ္တဝစနေနေဝ။ သစ္စသင်္ခေပပ္ပကရဏေ ဟိ ဓမ္မပါလာစရိယေန၊ နိဒ္ဒေသပါဠိယံ ပန ဓမ္မသေနာပတိနာ၊ ဓဇဂ္ဂသုတ္တန္တေ ဘဂဝတာ စ ဘာဝပဒံ ပစ္စတ္တဝစနာပေက္ခဝသေနု’စ္စာရိတံ။

ကထိတော သစ္စသင်္ခေပေ၊ ပစ္စတ္တဝစနေန ဝေ၊

‘‘ဘူယတေ’’ ဣတိ သဒ္ဒဿ၊ သမ္ဗန္ဓော ဘာဝဒီပနော။

နိဒ္ဒေသပါဠိယံ ‘‘ရူပံ၊ ဝိဘောတိ ဝိဘဝိယျတိ’’၊

ဣတိ ဒဿနတော ဝါပိ၊ ပစ္စတ္တဝစနံ ထိရံ။

တထာ ဓဇဂ္ဂသုတ္တန္တေ၊ မုနိနာဟစ္စဘာသိတေ၊

‘‘သော ပဟီယိဿတိ’’ ဣတိ၊ ပါဠိဒဿနတောပိ စ။

ပါရမိတာနုဘာဝေန၊ မဟေသီနံဝ ဒေဟတော၊

သန္တိ နိပ္ဖာဒနာ၊ နေဝ၊ သက္ကတာဒိဝစော ဝိယ။

ပစ္စတ္တဒဿနေနေဝ၊ ပုရိသတ္တယယောဇနံ၊

ဧကဝစနိကဉ္စာပိ၊ ဗဟုဝစနိကမ္ပိ စ၊

ကာတဗ္ဗမိတိ နော ခန္တိ၊ ပရဿပဒအာဒိကေ။

တသ္မာ ရူပံ ဝိဘဝိယျတိ၊ ရူပါနိ ဝိဘဝိယျန္တိ၊ တွံ ဝိဘဝိယျသိ၊ တုမှေ ဝိဘဝိယျထ၊ အဟံ ဝိဘဝိယျာမိ၊ မယံ ဝိဘဝိယျာမ၊ ရူပံ ဝိဘဝိယျတေ၊ ရူပါနိ ဝိဘဝိယျန္တေ ဣစ္စေဝမာဒိ ဇိနဝစနာနုရူပတော ယောဇေတဗ္ဗံ။ အတြာယံ ပဒသောဓနာ –

ဝိဘဝိယျတီတိ ဣဒံ၊ ကမ္မပဒသမာနကံ၊

န စ ကမ္မပဒံ နာပိ၊ ကမ္မကတ္တုပဒါဒိကံ။

ယဒိ ကမ္မပဒံ ဧတံ၊ ပစ္စတ္တဝစနံ ပန၊

ကမ္မံ ဒီပေယျ ကရဏ-ဝစနံ ကတ္တုဒီပကံ။

ယဒိ ကမ္မကတ္တုပဒံ၊ ‘‘ပီယတေ’’တိ ပဒံ ဝိယ၊

သိယာ သကမ္မကံ၊ နေတံ၊ တထာ ဟောတီတိ ဒီပယေ။

ယဒိ ကတ္တုပဒံ ဧတံ၊ ဝိဘဝတိပဒံ ဝိယ၊

ဝိနာ ယပစ္စယံ တိဋ္ဌေ၊ န တထာ တိဋ္ဌတေ ဣဒံ။

န ကတ္တရိ ဘုဝါဒီနံ၊ ဂဏေ ယပစ္စယော ရုတော၊

ဒိဝါဒီနံ ဂဏေယေဝ၊ ကတ္တရိ သမုဒီရိတော။

န ဘူဓာတု ဒိဝါဒီနံ၊ ဓာတူနံ ဒိဿတေ ဂဏေ၊

ဘူဝါဒိကစုရာဒီနံ၊ ဂဏေသုယေဝ ဒိဿတိ။

‘‘ဝိဘဝိယျတိ’’ ဣစ္စာဒေါ၊ တသ္မာ ယပစ္စယော ပန၊

ဘာဝေယေဝါတိ ဝိညေယျံ၊ ဝိညုနာ သမယညုနာ။

ဧတ္ထ ဟိ ပါကဋံ ကတွာ၊ ဘာဝကာရကလက္ခဏံ၊

ဒဿယိဿာမဟံ ဒါနိ၊ သက္ကစ္စံ မေ နိဗောဓထ။

‘‘တိဿော ဂစ္ဆတိ’’ဣစ္စတြ၊ ကတ္တာရံ ကတ္တုနော ပဒံ၊

‘‘ဓမ္မော ဒေသိယတိ’’စ္စတြ၊ ကမ္မံ တု ကမ္မုနော ပဒံ။

သရူပတော ပကာသေတိ၊ တသ္မာ တေ ပါကဋာ ဥဘော၊

တထာ ဝိဘဝိယျတီတိ-အာဒိဘာဝပဒံ ပန။

သရူပတော န ဒီပေတိ၊ ကာရကံ ဘာဝနာမကံ၊

ဒဗ္ဗဘူတံ တု ကတ္တာရံ၊ ပကာသေတိ သရူပတော။

ကတ္တာရံ ပန ဒီပေန္တံ၊ ကတ္တုသန္နိဿိတမ္ပိ တံ၊

ဘာဝံ ဒီပေတိ သွာကာရော၊ ပစ္စယေန ဝိဘာဝိတော။

ယသ္မာ စ ကတ္တုဘာဝေန၊ ဘာဝေါ နာမ န တိဋ္ဌတိ၊

ကတ္တာဝ ကတ္တုဘာဝေန၊ ဘာဝဋ္ဌာနေ ဌိတော တတော။

ယဇ္ဇေဝံ ကတ္တုဝေါဟာရော၊ ဘာဝဿ တု ကထံ သိယာ၊

‘‘သာဝကာနံ သန္နိပါတော၊ အဟောသိ’’ဣတိအာဒိသု။

ဣတိ စေ နိဿယာနံ တု၊ ဝသာ နိဿိတသမ္ဘဝါ၊

ကတ္တုဋ္ဌာနေပိ ဘာဝဿ၊ ကတ္တုပညတ္တိ သိဇ္ဈတိ။

ကာရကေ ကတ္တုကမ္မဝှေ၊ ကြိယာသန္နိဿယေ ယထာ၊

ဓာရေန္တီ အာသနထာလီ၊ ကြိယာဓာရောတိ ကပ္ပိတာ။

တထာ ဘာဝပဒံ ဓီရာ၊ ကတ္တာရံ ဘာဝနိဿယံ၊

ဒီပယန္တမ္ပိ ကပ္ပေန္တိ၊ ဘာဝဿ ဝါစကံ ဣတိ။

ကေစိ အဒဗ္ဗဘူတဿ၊ ဘာဝဿေကတ္တတော ဗြဝုံ၊

ဘာဝေဒေကဝစောဝါဒိ-ပုရိသဿေဝ ဟောတိတိ။

ပါဠိံ ပတွာန တေသံ တု၊ ဝစနံ အပ္ပမာဏကံ၊

‘‘တေ သံကိလေသိကာ ဓမ္မာ၊ ပဟီယိဿန္တိ’’ ဣတိ ဟိ။

ပါဌော ပါဝစနေ ဒိဋ္ဌော၊ တသ္မာ ဧဝံ ဝဒေမသေ၊

ပစ္စတ္တဒဿနေနေဝ၊ ပုရိသတ္တယယောဇနံ။

ဝစနေဟိ ယုတံ ဒွီဟိ၊ ဣစ္ဆိတဗ္ဗန္တိ နော ရုစိ၊

ဘာဝေ ကြိယာပဒံ နာမ၊ ပါဠိယံ အတိဒုဒ္ဒသံ၊

တသ္မာ တဂ္ဂဟဏူပါယော၊ ဝုတ္တော ဧတ္တာဝတာ မယာတိ။

အယံ ဘာဝဿ ကြိယာပဒါနံ နိဒ္ဒေသော။

ဧဝံ သုဒ္ဓကတ္တုကြိယာပဒါနိ ဟေတုကတ္တုကြိယာပဒါနိ ကမ္မုနော ကြိယာပဒါနိ၊ ဘာဝဿ ကြိယာပဒါနိ စာတိ စတုဓာ၊ ကမ္မကတ္တုကြိယာပဒေဟိ ဝါ ပဉ္စဓာ ဘူဓာတုတော နိပ္ဖန္နာနိ ကြိယာပဒါနိ နာနပ္ပကာရေန နိဒ္ဒိဋ္ဌာနိ၊ ဧတာနိ လောကိယာနံ ဘာဝဘေဒဝသေန ဝေါဟာရဘေဒေါ ဟောတီတိ ဒဿနတ္ထံ ဝိသုံ ဝိသုံ ဝုတ္တာနိ။ အတ္ထတော ပန ကမ္မကတ္တုဘာဝကာရကတ္တယဝသေန တိဝိဓာနေဝ။ ဟေတုကတ္တာ ဟိ သုဒ္ဓကတ္တုသင်္ခါတေ ကာရကေ တဿင်္ဂဘာဝတော သင်္ဂဟမုပဂစ္ဆတိ၊ တထာ ကမ္မကတ္တာ ကမ္မကာရကေ၊ ဘာဝေါ ပန ကေဝလော။ သော ဟိ ဂမနပစနလဝနာဒိဝသေနာနေကဝိဓောပိ ကြိယာသဘာဝတ္တာ ဘေဒရဟိတော ကာရကန္တရော။ ဧဝံ သန္တေပိ ဒဗ္ဗသန္နိဿိတတ္တာ ဒဗ္ဗဘေဒေန ဘိဇ္ဇတိ။ တေန ပါဝစနေ ဘာဝဝါစကံ ပဒံ ဗဟုဝစနန္တမ္ပိ ဒိဿတိ။ အာချာတိကပဒေ ဘာဝကာရကဝေါဟာရော နိရုတ္တိနယံ နိဿာယ ဂတော၊ အတ္ထတော ပန ဘာဝဿ ကာရကတာ နုပပဇ္ဇတိ။ သော ဟိ န ကိဉ္စိ ဇနေတိ၊ န စ ကြိယာယ နိမိတ္တံ။ ကြိယာနိမိတ္တဘာဝေါယေဝ ဟိ ကာရကလက္ခဏံ။ ဣတိ မုချတော ဝါ ဟေတုတော ဝါ ဘာဝဿ ကာရကတာ န လဗ္ဘတိ။ ဧဝံ သန္တေပိ သော ကရဏမတ္တတ္တာ ကာရကံ။ တထာ ဟိ ကရဏံ ကာရော၊ ကြိယာ၊ တဒေဝ ကာရကန္တိ ဘာဝဿ ကာရကတာ ဒဋ္ဌဗ္ဗာ။ ယသ္မာ ပန ကြိယာနိမိတ္တဘာဝေါယေဝ ကာရကလက္ခဏံ၊ တသ္မာ နာမိကပဒေ ကာရကလက္ခဏေ ဘာဝကာရကန္တိ ဝေါဟာရံ ပဟာယ ကတ္တုကမ္မကရဏသမ္ပဒါနာပါဒါနာဓိကရဏာနံ ဆန္နံ ဝတ္ထူနံ ကတ္တုကာရကကမ္မကာရကန္တိအာဒိ ဝေါဟာရော ကရိယတိ ဝေယျာကရဏေဟိ။ ဧဝံ နိရုတ္တိနယံ နိဿာယ ဝုတ္တံ ဘာဝကာရကဉ္စ ဒွေ စ ကမ္မကတ္တုကာရကာနီတိ ကာရကတ္တယံ ဘဝတိ။ တဒ္ဒီပကဉ္စာချာတိကပဒံ တိကာရကံ။

ဣမမတ္ထဉှိ သန္ဓာယ၊ ဝုတ္တမာစရိယေဟိပိ၊

မဟာဝေယျာကရဏေဟိ၊ နိရုတ္တိနယဒဿိဘိ။

‘‘ယံ တိကာလံ တိပုရိသံ၊ ကြိယာဝါစိ တိကာရကံ၊

အတိလိင်္ဂံ ဒွိဝစနံ၊ တဒါချာတန္တိ ဝုစ္စတီ’’တိ။

ဣဓ ဘာဝကမ္မေသု အတ္တနောပဒုပ္ပတ္တိံ ကေစိ အက္ခရစိန္တကာ အဝဿမိစ္ဆန္တီတိ တေသံ မတိဝိဘာဝနတ္ထမမှေဟိ ဘာဝကမ္မာနံ ကြိယာပဒါနိ အတ္တနောပဒဝသေနုဒ္ဒိဋ္ဌာနိ စေဝ နိဒ္ဒိဋ္ဌာနိ စ။ သဗ္ဗာနိပိ ပနေတာနိ တိကာရကာနိ ကြိယာပဒါနိ ကြိယာပဒမာလမိစ္ဆတာ ပရဿပဒတ္တနောပဒဝသေန ယောဇေတဗ္ဗာနိ။ ပါဠိအာဒီသု ဟိ တိကာရကာနိ ကြိယာပဒါနိ ပရဿပဒတ္တနောပဒဝသေန ဒွိဓာ ဌိတာနိ။ သေယျထိဒံ? ဘဂဝါ သာဝတ္ထိယံ ဝိဟရတိ။ သမာဓိဇ္ဈာနကုသလာ၊ ဝန္ဒန္တိ လောကနာယကံ။ မောနံ ဝုစ္စတိ ဉာဏံ။ အတ္ထာဘိသမယာ ဓီရော၊ ပဏ္ဍိတောတိ ပဝုစ္စတိ။ ကထံ ပဋိပန္နဿ ပုဂ္ဂလဿ ရူပံ ဝိဘောတိ ဝိဘဝိယျတိ။ သော ပဟီယိဿတိ။ ပဏ္ဍုကမ္ဗလေ နိက္ခိတ္တံ ဘာသတေ တပတေ။ ပူဇကော လဘတေ ပူဇံ။ ပုတ္တကာမာ ထိယော ယာစံ၊ လဘန္တေ တာဒိသံ သုတံ။ အသိတော တာဒိ ဝုစ္စတေ သဗြဟ္မာ။ အဂ္ဂိဇာဒိ ပုဗ္ဗေဝ ဘူယတေ။ သော ပဟီယေထာပိ နော ပဟီယေထာတိ ဧဝံ ဒွိဓာ ဌိတာနိ။ အတြိဒံ ပါဠိဝဝတ္ထာနံ –

တိကာရကာနိ သဗ္ဗာနိ၊ ကြိယာပဒါနိ ပါယတော၊

ပရဿပဒယောဂေန၊ ဒိဿန္တိ ပိဋကတ္တယေ။

အတ္တနောပဒယုတ္တာနိ၊ စုဏ္ဏိယေသု ပဒေသု ဟိ၊

အတီဝပ္ပာနိ ဂါထာသု၊ ပဒါနီတိ ဗဟူနိ တု။

ဂါထာသု စေဝိတရာနိ၊ စုဏ္ဏိယေသု ပဒေသု စ၊

သုဗဟူနေဝ ဟုတွာန၊ ဒိဿန္တီတိ ပကာသယေ။

ပဒါနံ နိဒ္ဒေသော ပနတိ အန္တိအာဒီနံ တေသံ တေသံ ဝစနာနမနုရူပေန ယောဇေတဗ္ဗော။ ဧဝံ တိကာရကကြိယာပဒါနိ သရူပတော ဝဝတ္ထာနတော နိဒ္ဒေသတော စ ဝေဒိတဗ္ဗာနိ။

ဣဒါနိ နောပသဂ္ဂါကမ္မိကာဒိဝသေန ဘဝတိဿ ဓာတုဿ ဝိနိစ္ဆယံ ဝဒါမ –

နောပသဂ္ဂါ အကမ္မာ စ၊ သောပသဂ္ဂါ အကမ္မိကာ၊

သောပသဂ္ဂါ သကမ္မာ စ၊ ဣတိ ဘူတိ ဝိဘာဝိတာ။

ဣဒံ တု ဝစနံ ‘‘ဓမ္မ-ဘူတော ဘုတွာ’’တိအာဒိသု၊

ပတ္တာနုဘဝနတ္ထံ မေ၊ ဝိဝဇ္ဇေတွာ ဥဒီရိတံ။

ဧတေန ပန အတ္ထေန၊ နောပသဂ္ဂသကမ္မိကံ၊

ဂဟေတွာ စတုဓာ ဟောတိ၊ ဣတိ ဉေယျံ ဝိသေသတော။

နောပသဂ္ဂါ အကမ္မာ စ၊ သောပသဂ္ဂါ အကမ္မိကာ၊

ဘူဓာတု ကာရိတေ သန္တေ၊ ဧကကမ္မာ ဘဝန္တိ ဟိ။

‘‘ဘာဝေတိ ကုသလံ ဓမ္မံ၊ ဝိဘာဝေတီ’’တိမာနိဓ၊

ဒဿေတဗ္ဗာနိ ဝိညူဟိ၊ သာသနညူဟိ သာသနေ။

သောပသဂ္ဂါ သကမ္မာ တု၊ ကာရိတပ္ပစ္စယေ သတိ၊

ဒွိကမ္မာယေဝ ဟောတီတိ၊ ဉာတဗ္ဗံ ဝိညုနာ ကထံ။

အဘိဘာဝေန္တိ ပုရိသာ၊ ပုရိသေ ပါဏဇာတိကံ၊

အနုဘာဝေတိ ပုရိသော၊ သမ္ပတ္တိံ ပုရိသံ ဣတိ။

ဣဒံ သကမ္မကံ နာမ၊ အကမ္မကမိဒံ ဣတိ၊

ကထမမှေဟိ ဉာတဗ္ဗံ၊ ဝိတ္ထာရေန ဝဒေထ နော။

ဝိတ္ထာရေနေဝ ကိံ ဝတ္တုံ၊ သက္ကောမိ ဧကဒေသတော၊

ကထယိဿာမိ သက္ကစ္စံ၊ ဝဒတော မေ နိဗောဓထ။

အာချာတိကပဒံ နာမ၊ ဒုဝိဓံ သမုဒီရိတံ၊

သကမ္မကမကမ္မဉ္စ၊ ဣတိ ဝိညူ ဝိဘာဝယေ။

တတြ ယဿ ပယောဂမှိ၊ ပဒဿ ကတ္တုနာ ကြိယာ၊

နိပ္ဖာဒိတာ ဝိနာ ကမ္မံ၊ န ဟောတိ တံ သကမ္မကံ။

‘‘ပစတီ’’တိ ဟိ ဝုတ္တေ တု၊ ယေန ကေနစိ ဇန္တုနာ၊

ဩဒနံ ဝါ ပနညံ ဝါ၊ ကိဉ္စိ ဝတ္ထုန္တိ ဉာယတိ။

ယဿ ပန ပယောဂမှိ၊ ကမ္မေန ရဟိတာ ကြိယာ၊

ပဒဿ ဉာယတေ ဧတံ၊ အကမ္မကန္တိ တီရယေ။

‘‘တိဋ္ဌတိ ဒေဝဒတ္တော’’တိ၊ ဝုတ္တေ ကေနစိ ဇန္တုနာ၊

ဌာနံဝ ဗုဒ္ဓိဝိသယော၊ ကမ္မဘူတံ န ကိဉ္စိပိ။

သကမ္မကပဒံ တတ္ထ၊ ကတ္တာရံ ကမ္မမေဝ စ၊

ပကာသေတိ ယထာယောဂ-မိတိ ဝိညူ ဝိဘာဝယေ။

‘‘ဩဒနံ ပစတိ ပေါသော၊ ဩဒနော ပစ္စတေ သယံ’’၊

ဣစ္စုဒါဟရဏာ ဉေယျာ၊ အဝုတ္တေပိ အယံ နယော။

အကမ္မကပဒံ နာမ၊ ကတ္တာရံ ဘာဝမေဝ စ၊

ယထာရဟံ ပကာသေတိ၊ ဣတိ ဓီရောပလက္ခယေ။

ကတ္တာရံ ‘‘တိဋ္ဌတိ’’စ္စတြ၊ သူစေတိ ဘာဝနာမကံ၊

‘‘ဥပဋ္ဌီယတိ’’ ဣစ္စတြ၊ အဝုတ္တေပိ အယံ နယော။

ဧဝံ သကမ္မကာကမ္မံ၊ ဉတွာ ယောဇေယျ ဗုဒ္ဓိမာ၊

တိကမ္မကဉ္စ ဇာနေယျ၊ ကရာဒေါ ကာရိတေ သတိ။

‘‘သုဝဏ္ဏံ ကဋကံ ပေါသော၊ ကာရေတိ ပုရိသ’’န္တိ စ၊

‘‘ပုရိသော ပုရိသေ ဂါမံ၊ ရထံ ဝါဟေတိ’’ဣစ္စပိ။

ဧတ္ထ ဘဝတိဓာတုမှိ၊ နယော ဧသော န လဗ္ဘတိ၊

တသ္မာ ဒွိကမ္မကညေဝ၊ ပဒမေတ္ထ ဝိဘာဝိတံ။

ဧဒိသော စ နယော နာမ၊ ပါဠိယံ တု န ဒိဿတိ၊

ဧကစ္စာနံ မတေနေဝ၊ မယာ ဧဝံ ပကာသိတော။

ဧတ္ထ စ ‘‘တမေနံ ရာဇာ၊ ဝိဝိဓာ ကမ္မကာရဏာ၊

ကာရာပေတီ’’တိ ယော ပါဌော၊ နိဒ္ဒေသေ တံ သုနိဒ္ဒိသေ။

‘‘မနုဿေဟီ’’တိ အာဟရိတွာ၊ ပါဌသေသံ သုမေဓသော၊

‘‘သုနခေဟိပိ ခါဒါပေန္တိ’’၊ ဣတိ ပါဌဿ ဒဿနာ။

ဧတံ နယံ ဝိဒူ ဉတွာ၊ ယောဇေ ပါဌာနုရူပတော၊

‘‘သုဝဏ္ဏံ ကဋကံ ပေါသော၊ ကာရေတိ ပုရိသေနိ’’တိ။

ဝိကရဏပ္ပစ္စယာဝ၊ ဝုတ္တာ ဧတ္ထ သရူပတော၊

သဂဏေ သဂဏေ တေသံ၊ ဝုတ္တိံ ဒီပေတုမေဝ စ။

‘‘အသ္မိံ ဂဏေ အယံ ဓာတု၊ ဟောတီ’’တိ တေဟိ ဝိညုနော၊

ဝိညာပေတုဉ္စ အညေဟိ၊ ဉာပနာ ပစ္စယေဟိ န။

တထာ ဟိ ဘာဝကမ္မေသု၊ ဝိဟိတော ပစ္စယော တု ယော၊

အဋ္ဌဝိဓေပိ ဓာတူနံ၊ ဂဏသ္မိံ သမ္ပဝတ္တတိ။

ဘူဓာတုဇေသု ရူပေသု၊ အသမ္မောဟာယ သောတုနံ၊

နာနာဝိဓော နယော ဧဝံ၊ မယာ ဧတ္ထ ပကာသိတော။

ယေ လောကေ အပ္ပယုတ္တာ ဝိဝိဓဝိကရဏာချာတသဒ္ဒေသွဆေကာ၊

တေ ပတွာချာတသဒ္ဒေ အဝိဂတဝိမတီ ဟောန္တိ ဉာဏီပိ တသ္မာ၊

အစ္စန္တညေဝ ဓီရော သပရဟိတရတော သာသနေ ဒဠှပေမော၊

ယောဂံ တေသံ ပယောဂေ ပဋုတရမတိတံ ပတ္ထယာနော ကရေယျ။

ဣတိ နဝင်္ဂေ သာဋ္ဌကထေ ပိဋကတ္တယေ ဗျပ္ပထဂတီသု

ဝိညူနံ ကောသလ္လတ္ထာယ ကတေ သဒ္ဒနီတိပ္ပကရဏေ

သဝိကရဏာချာတဝိဘာဂေါ နာမ

ပဌမော ပရိစ္ဆေဒေါ။