📜

၁၀။ လိင်္ဂတ္တယမိဿကနာမိကပဒမာလာ

အဓိကူနကတော စေက-က္ခရတော စ ဣတော ပရံ၊

တီဏိ လိင်္ဂါနိ မိဿေတွာ၊ ပဒမာလမနာကုလံ။

နာနာသုခုမသင်္ကေတ-ဂတေသွတ္ထေသု ဝိညုနံ၊

ဂမ္ဘီရဗုဒ္ဓိစာရတ္ထံ၊ ပဝက္ခာမိ ယထာဗလံ။

ဣတ္ထီ ထီ စ ပဘာ ဘာ စ၊ ဂိရာ ရာ ပဝနံ ဝနံ၊

ဥဒကဉ္စ ဒကံ ကဉ္စ၊ ဝိတက္ကော ဣတိ စာဒယော။

ဘူ ဘူမိ စေဝ အရညံ၊ အရညာနီတိ စာဒယော၊

ပညာ ပညာဏံ ဉာဏဉ္စ၊ ဣစ္စာဒီ စ တိဓာ သိယုံ။

ကော ဝိ သာ စေဝ ဘာ ရာ စ၊ ထီ ဓီ ကု ဘူ တထေဝ ကံ၊

ခံ ဂေါ မော မာ စ သံ ယံ တံ၊ ကိမိစ္စာဒီ စ ဧကိကာတိ။

အယံ လိင်္ဂတ္တယမိဿကော နာမိကပဒမာလာဥဒ္ဒေသော။ တတြ ဣတ္ထီ၊ ဣတ္ထီ၊ ဣတ္ထိယော။ ဣတ္ထိံ…ပေ… ဘောတိယော ဣတ္ထိယော။

ထီ ထီ၊ ထိယော။ ထိံ၊ ထီ၊ ထိယော။ ထိယာ၊ ထီဟိ၊ ထီဘိ။ ထိယာ၊ ထီနံ။ ထိယာ၊ ထီဟိ၊ ထီဘိ။ ထိယာ၊ ထီနံ။ ထိယာ၊ ထိယံ၊ ထီသု။ ဘောတိ ထိ၊ ဘောတိယော ထီ၊ ဘောတိယော ထိယော။ ဧတ္ထ –

‘‘ကုက္ကုဋာ မဏယော ဒဏ္ဍာ၊ ထိယော စ ပုညလက္ခဏာ၊

ဥပ္ပဇ္ဇန္တိ အပါပဿ၊ ကတပုညဿ ဇန္တုနော၊

ထိယာ ဂုယှံ န သံသေယျ၊ ထီနံ ဘာဝေါ ဒုရာဇာနော’’တိ

အာဒီနိ နိဒဿနပဒါနိ။

ပဘာ၊ ပဘာ၊ ပဘာယော။ ပဘံ…ပေ… ဘောတိယော ပဘာယော။

ဘာ၊ ဘာ၊ ဘာယော။ ဘံ၊ ဘာ၊ ဘာယော။ ဘာယ၊ ဘာဟိ၊ ဘာဘိ။ ဘာယ၊ ဘာနံ။ ဘာယ၊ ဘာဟိ၊ ဘာဘိ။ ဘာယ၊ ဘာနံ။ ဘာယ၊ ဘာယံ၊ ဘာသု။ ဘောတိ ဘေ၊ ဘောတိယော ဘာ၊ ဘောတိယော ဘာယော။ ဧတ္ထ စ ‘‘ဘာကရော ဘာနု’’ဣစ္စာဒီနိ နိဒဿနပဒါနိ။

ဂိရာ ၊ ဂိရာ၊ ဂိရာယော။ ဂိရံ…ပေ… ဘောတိယော ဂိရာယော။ ‘‘ဝါစာ ဂိရာ ဗျပ္ပထော။ ယေ ဝေါဟံ ကိတ္တယိဿာမိ၊ ဂိရာဟိ အနုပုဗ္ဗသော’’တိ ဣမာနိ ဂိရာသဒ္ဒဿ ဣတ္ထိလိင်္ဂဘာဝေ နိဒဿနပဒါနိ။

သုဝဏ္ဏဝါစကော ရာသဒ္ဒေါ ပုလ္လိင်္ဂေါ၊ ဣဓ ပန သဒ္ဒဝါစကော ရာသဒ္ဒေါ ဣတ္ထိလိင်္ဂေါ။

ရာ၊ ရာ၊ ရာယော။ ရံ၊ ရာ၊ ရာယော။ ရာယ၊ ရာဟိ၊ ရာဘိ။ ရာယ၊ ရာနံ။ ရာယ၊ ရာဟိ၊ ရာဘိ။ ရာယ၊ ရာနံ။ ရာယ၊ ရာယံ၊ ရာသု။ ဘောတိ ရေ၊ ဘောတိယော ရာ၊ ဘောတိယော ရာယော။

ရာ ဝုစ္စတိ သဒ္ဒေါ။ အဂ္ဂညသုတ္တဋီကာယဉှိ ‘‘ရာ သဒ္ဒေါ တိယတိ ဆိဇ္ဇတိ ဧတ္ထာတိ ရတ္တိ၊ သတ္တာနံ သဒ္ဒဿ ဝူပသမကာလော’’တိ ဝုတ္တံ။ တသ္မာ ရာသဒ္ဒဿ သဒ္ဒဝါစကတ္တေ ‘‘ရတ္တီ’’တိ ပဒံ နိဒဿနံ။

ပဝနံ၊ ပဝနာနိ၊ ပဝနာ။ ပဝနံ၊ ပဝနာနိ၊ ပဝနေ။

ဝနံ၊ ဝနာနိ၊ ဝနာ။ ဝနံ၊ ဝနာနိ၊ ဝနေ။ သေသံ သဗ္ဗံ နေယျံ။

ပဝန ဝနသဒ္ဒါ ကဒါစိ သမာနတ္ထာ ကဒါစိ ဘိန္နတ္ထာ။ တေ ဟိ အရညဝါစကတ္တေ သမာနတ္ထာ ‘‘တေ ဓမ္မေ ပရိပူရေန္တော၊ ပဝနံ ပါဝိသိံ တဒါ။ သပုတ္တော ပါဝိသိံ ဝန’’န္တိအာဒီသု။ ယထာက္ကမံ ပန တေ ဝါယုတဏှာဝနဝါစကတ္တေ ဘိန္နတ္ထာ ‘‘ပရမဒုဂ္ဂန္ဓပဝနဝိစရိတေ။ ဆေတွာ ဝနဉ္စ ဝနထံ၊ နိဗ္ဗနာ ဟောထ ဘိက္ခဝေါ’’တိအာဒီသု။

ဥဒကံ၊ ဥဒကာနိ၊ ဥဒကာ။ ဥဒကံ၊ ဥဒကာနိ၊ ဥဒကေ။

ဒကံ၊ ဒကာနိ၊ ဒကာ။ ဒကံ၊ ဒကာနိ၊ ဒကေ။ သေသံ သဗ္ဗံ နေယျံ။

‘‘အမ္ဗပက္ကံ ဒကံ သီတံ။ ထလဇာ ဒကဇာ ပုပ္ဖာ’’တိအာဒီနေတ္ထ နိဒဿနပဒါနိ။ ‘‘နီလောဒံ ဝနမဇ္ဈတော။ မဟောဒဓိ။ ဥဒဗိန္ဒုနိပါတေန၊ ဥဒကုမ္ဘောပိ ပူရတီ’’တိ ပါဠိပ္ပဒေသေသု ပန သမာသန္တဂတနာမတ္တာ ဥဒသဒ္ဒေနေဝ ဥဒကတ္ထော ဝုတ္တော ‘‘ရိတ္တဿာဒ’’န္တိ ဝတ္တဗ္ဗဋ္ဌာနေ ‘‘ရိတ္တဿ’’န္တိ သဒ္ဒေန ရိတ္တဿာဒတ္ထော ဝိယ။ ပါဠိယဉှိ ကေဝလော ဥဒသဒ္ဒေါ န ဒိဋ္ဌပုဗ္ဗော။ အတ္ထိ စေ၊ သုဋ္ဌု မနသိ ကာတဗ္ဗော။

ကံ၊ ကာနိ၊ ကာ။ ကံ၊ ကာနိ၊ ကေ။ ကေန၊ ကေဟိ၊ ကေဘိ။ ကဿ၊ ကာနံ။ ကာ၊ ကသ္မာ၊ ကမှာ၊ ကေဟိ၊ ကေဘိ။ ကဿ၊ ကာနံ။ ကေ၊ ကသ္မိံ၊ ကမှိ၊ ကေသု။ ဘော က၊ ဘဝန္တော ကာ၊ ဘဝန္တော ကာနိ။ ဘောသဒ္ဒေန ဝါ ဗဟုဝစနံ ယောဇေတဗ္ဗံ ‘‘ဘော ကာနိ၊ ဘော ကာ’’တိ။

ဧတ္ထ ကံ ဝုစ္စတိ ဥဒကံ သီသံ သုခဉ္စ။ အတြ ‘‘ကန္တာရော ကန္ဒရော ကေဝဋ္ဋာ ကေသာ ကရုဏာ နာကော’’တိအာဒီနိ ပယောဂါနိ ဝေဒိတဗ္ဗာနိ။ တတြ ကန္တာရောတိ ကံ ဝုစ္စတိ ဥဒကံ၊ တေန တရိတဗ္ဗော အတိက္ကမိတဗ္ဗောတိ ကန္တာရော၊ နိရုဒကပ္ပဒေသော။ စောရကန္တာရန္တိအာဒီသု ပန ရူဠှိယာ ဒုဂ္ဂမနဋ္ဌာနေပိ ကန္တာရသဒ္ဒေါ ပဝတ္တတီတိ ဒဋ္ဌဗ္ဗံ။ ကန္ဒရောတိ ဧတ္ထာပိ ကံ ဝုစ္စတိ ဥဒကံ၊ တေန ဒါရိတော ဘိန္နောတိ ကန္ဒရော။ ကေဝဋ္ဋာတိအာဒီသု ပန ကေ ဥဒကေ ဝတ္တနတော ဂဟဏတ္ထံ ပဝတ္တနတော ကေဝဋ္ဋာ။ ကေ သီသေ သေန္တိ ဥပ္ပဇ္ဇန္တီတိ ကေသာ။ ကံ သုခံ ရုန္ဓတီတိ ကရုဏာ။ နာကောတိ သဂ္ဂေါ။ ကန္တိ ဟိ သုခံ၊ န ကံ အကံ၊ ဒုက္ခံ၊ တံ နတ္ထိ ဧတ္ထာတိ နာကောတိ အတ္ထော ဂဟေတဗ္ဗော ။ ယထေတ္ထ ဣတ္ထီသဒ္ဒါဒီနံ နာမိကပဒမာလာ ယောဇိတာ၊ ဧဝံ ‘‘ဝိတက္ကော ဝိစာရော အာဘာ ပဒီပေါ’’တိအာဒီနမ္ပိ ယောဇေတဗ္ဗာ။

ဘူ၊ ဘူ၊ ဘုယော။ ဘုံ၊ ဘူ၊ ဘုယော။ ဘုယာ၊ ဘူဟိ၊ ဘူဘိ။ ဘုယာ၊ ဘူနံ။ ဘုယာ၊ ဘူဟိ၊ ဘူဘိ။ ဘုယာ၊ ဘူနံ။ ဘုယာ၊ ဘုယံ၊ ဘူသု။ ဘောတိ ဘု၊ ဘောတိယော ဘူ၊ ဘောတိယော ဘုယော။ ဧတ္ထ စ ‘‘ဘူရုဟော ဘူပါလော ဘူဘုဇော ဘူတလ’’န္တိ နိဒဿနပဒါနိ။

ဘူမိ၊ ဘူမီ၊ ဘူမိယော၊ သေသံ ဝိတ္ထာရေတဗ္ဗံ၊

အရညံ၊ အရညာနိ၊ အရညာ၊ သေသံ ဝိတ္ထာရေတဗ္ဗံ။

အရညာနီ ဝုစ္စတိ မဟာအရညံ၊ ‘‘ဂဟပတာနီ’’တိ ပဒမိဝ ဣနီပစ္စယဝသေန သာဓေတဗ္ဗံ ပဒံ ဣတ္ထိလိင်္ဂဉ္စ။ ‘‘အရညာနီ’’တိ ဟိ အဋ္ဌကထာပါဌောပိ ဒိဿတိ။

အရညာနီ၊ အရညာနီ၊ အရညာနိယော။ အရညာနိံ၊ အရညာနီ၊ အရညာနိယော။ အရညာနိယာ၊ အရညာနီဟိ၊ အရညာနီဘိ။ အရညာနိယာ၊ အရညာနီနံ။ အရညာနိယာ၊ အရညာနီဟိ၊ အရညာနီဘိ။ အရညာနိယာ၊ အရညာနီနံ။ အရညာနိယာ၊ အရညာနိယံ၊ အရညာနီသု။ ဘောတိ အရညာနိ၊ ဘောတိယော အရညာနီ၊ ဘောတိယော အရညာနိယော။

ယထေတ္ထ ဥတ္တရာဓိကဝသေန ယောဇိတာ၊ ဧဝံ ‘‘သဘာ၊ သဘာယ’’န္တိအာဒီသုပိ ယောဇေတဗ္ဗာ။ သဘာယန္တိ သဘာ ဧဝ ၊ လိင်္ဂဗျတ္တယဝသေန ပန ဧဝံ ဝုတ္တံ။ ‘‘သဘာယေ ဝါ ဒွါရမူလေ ဝါ ဝတ္ထဗ္ဗ’’န္တိ ပါဠိ ဧတ္ထ နိဒဿနံ။

ပညာ၊ ပညာ၊ ပညာယော။ ပညံ၊ ပညာ၊ ပညာယော။ ပညာယ။

ပညာဏံ၊ ပညာဏာနိ၊ ပညာဏာ။ ပညာဏံ၊ ပညာဏာနိ၊ ပညာဏေ။ ပညာဏေန။

‘‘တထာ ဟိ ဘန္တေ ဘဂဝတော သီလပညာဏံ။ သာဓု ပညာဏဝါ နရော’’တိအာဒီနေတ္ထ နိဒဿနပဒါနိ။

ဉာဏံ၊ ဉာဏာနိ၊ ဉာဏာ။ ဉာဏံ၊ ဉာဏာနိ၊ ဉာဏေ။ ဉာဏေန။ သေသံ သဗ္ဗံ နေယျံ။ ‘‘အဂ္ဂိ အဂ္ဂိနိ ဂိနိ’’ဣစ္စာဒီသုပိ ဥတ္တရာဓိကဝသေန နာမိကပဒမာလာ ယောဇေတဗ္ဗာ။

ကော ဝီ သာဒီသုပိ ဧကက္ခရေသု ကော ဝုစ္စတိ ဗြဟ္မာ ဝါတော စ သရီရဉ္စ၊ တဿ တဗ္ဗာစကတ္တေ ဣမေ ပယောဂါ။ သေယျထိဒံ?

‘‘ဇိနေန ယေန အာနီတံ၊ လောကဿ အမိတံ ဟိတံ၊

တဿ ပါဒမ္ဗုဇံ ဝန္ဒေ၊ ကမောဠိအလိသေဝိတံ။

ကကုဓရုက္ခော။ ကရဇကာယော’’ ဣစ္စေဝမာဒယော။ တတ္ထ ကမောဠိအလိသေဝိတန္တိ ဝန္ဒန္တာနံ အနေကသတာနံ ဗြဟ္မာနံ မောဠိဘမရသေဝိတန္တိ ကဝယော ဣစ္ဆန္တိ။ ကကုဓရုက္ခောတိ ဧတ္ထ ပန ကော ဝုစ္စတိ ဝါတော၊ တဿ ယော ကုဇ္ဈတိ၊ ဝါတရောဂါပနယနဝသေန တံ နိဝါရေတိ၊ တသ္မာ သော ရုက္ခော ကကုဓောတိ ဝုစ္စတီဘိ အာစရိယာ။ ကရဇကာယောတိ ဧတ္ထ တု ကော ဝုစ္စတိ သရီရံ၊ တတ္ထ ပဝတ္တော ရဇော ကရဇော။ ကိံ တံ ? သုက္ကသောဏိတံ။ တဉှိ ‘‘ရာဂေါ ရဇော၊ န စ ပန ရေဏု ဝုစ္စတီ’’တိ ဧဝံ ဝုတ္တရာဂရဇဖလတ္တာ သရီရဝါစကေန ကသဒ္ဒေန ဝိသေသေတွာ ဖလဝေါဟာရေန ‘‘ကရဇော’’တိ ဝုစ္စတိ။ တေန သုက္ကသောဏိတသင်္ခါတေန ကရဇေန သမ္ဘူတော ကာယော ကရဇကာယောတိ အာစရိယာ။ တထာ ဟိ ‘‘ကာယော မာတာပေတ္တိကသမ္ဘဝေါ’’တိ ဝုတ္တော၊ မဟာအဿပူရသုတ္တဋီကာယံ ပန ‘‘ကရိယတိ ဂဗ္ဘာသယေ ခိပိယတီတိ ကရော၊ သမ္ဘဝေါ။ ကရတော ဇာတောတိ ကရဇော၊ မာတာပေတ္တိကသမ္ဘဝေါတိ အတ္ထော။ မာတုအာဒီနံ သဏ္ဌာပနဝသေန ကရတော ဇာတောတိ အပရေ၊ ဥဘယထာပိ ကရဇကာယန္တိ စတုသန္တတိရူပမာဟာ’’တိ ဝုတ္တံ။ အယံ ပနတ္ထော ဣဓ နာဓိပ္ပေတော၊ ပုရိမောယေဝတ္ထော အဓိပ္ပေတော ကသဒ္ဒါဓိကာရတ္တာ။

ကော၊ ကာ။ ကံ၊ ကေ။ ကေန၊ ကေဟိ၊ ကေဘိ။ ကဿ၊ ကာနံ။ ကာ၊ ကသ္မာ၊ ကမှာ၊ ကေဟိ၊ ကေဘိ။ ကဿ၊ ကာနံ။ ကေ၊ ကသ္မိံ၊ ကမှိ၊ ကေသု။ ဘော က၊ ဘဝန္တော ကာ။

တတြ ဝိ ဝုစ္စတိ ပက္ခီ။ တထာ ဟိ ပက္ခီနံ ဣဿရော သုပဏ္ဏရာဇာ ဝိန္ဒောတိ ကထိယတိ။ ဧတမတ္ထဉှိ သန္ဓာယ ပုဗ္ဗာစရိယေနပိ အယံ ဂါထာ ဘာသိတာ –

‘‘သဒ္ဓါနတေ မုဒ္ဓနိ သဏ္ဌပေမိ၊ မုနိန္ဒ နိန္ဒာပဂတံ တဝဂ္ဂံ၊

ဒေဝိန္ဒနာဂိန္ဒနရိန္ဒဝိန္ဒ-န တံ ဝိဘိန္နံ စရဏာရဝိန္ဒ’’န္တိ။

တတ္ထ ဝီနံ ဣန္ဒောတိ ဝိန္ဒော၊ ပက္ခိဇာတိယာ ဇာတာနံ သုပဏ္ဏာနံ ရာဇာတိ အတ္ထော။

ဝိံ၊ ဝီ၊ ဝယော။ ဝိံ၊ ဝီ၊ ဝယော။ ဝိနာ၊ ဝီဟိ၊ ဝီဘိ။ ဝိဿ၊ ဝိနော၊ ဝီနံ။ ဝိနာ၊ ဝိသ္မာ၊ ဝိမှာ၊ ဝီဟိ၊ ဝီဘိ။ ဝိဿ၊ ဝိနော၊ ဝီနံ။ ဝိသ္မိံ၊ ဝိမှိ၊ ဝီသု။ ဘော ဝိ၊ ဘဝန္တော ဝယော။

သာ ဝုစ္စတိ သုနခေါ၊ ‘‘မာတာ မေ အတ္ထိ၊ သာ မယာ ပေါသေတဗ္ဗာ’’တိအာဒီသု ပန သာသဒ္ဒေါ သဗ္ဗနာမိကပရိယာပန္နော ပရမ္မုခဝစနော တသဒ္ဒေန သမ္ဘူတော ဒဋ္ဌဗ္ဗော။ သာသဒ္ဒဿ ဘာ ရာ ထီ ဘူ ကသဒ္ဒါနဉ္စ နာမိကပဒမာလာ ဟေဋ္ဌာ ပကာသိတာ။

ဓီ ဝုစ္စတိ ပညာ။ ဧတ္ထ စ ‘‘အမစ္စေ တာတ ဇာနာဟိ၊ ဓီရေ အတ္ထဿ ကောဝိဒေ’’တိ။ ‘‘ဓီမာ၊ ဓီမတိ၊ သုဓီ၊ သုဓိနီ၊ ဓီယုတ္တ’’န္တိ စ အာဒီနိ နိဒဿနပဒါနိ။

ဓီ၊ ဓီ၊ ဓိယော။ ဓိံ၊ ဓီ၊ ဓိယော။ ဓိယာ၊ ဓီဟိ၊ ဓီဘိ။ ဓိယာ၊ ဓီနံ။ ဓိယာ၊ ဓီဟိ၊ ဓီဘိ။ ဓိယာ၊ ဓီနံ။ ဓိယာ၊ ဓိယံ၊ ဓီသု။ ဘောတိ ဓိ၊ ဘောတိယော ဓီ၊ ဘောတိယော ဓိယော။

ကု ဝုစ္စတိ ပထဝီ။ ဧတ္ထ စ ‘‘ကုဒါလော။ ကုမုဒံ။ ကုဉ္ဇရော’’တိ ဣမာနိ နိဒဿနပဒါနိ။ တတြ ကုံ ပထဝိံ ဒါလယတိ ပဒါလေတိ ဘိန္ဒတိ ဧတေနာတိ ကုဒါလော။ ကုယံ ပထဝိယံ မောဒတီတိ ကုမုဒံ။ ကုံ ဇရတီတိ ကုဉ္ဇရော။ တထာ ဟိ ဝိမာနဝတ္ထုအဋ္ဌကထာယံ ဝုတ္တံ ‘‘ကုံ ပထဝိံ တဒဘိဃာတေန ဇရယတီတိ ကုဉ္ဇရော’’တိ။

ကု၊ ကူ၊ ကုယော။ ကုံ၊ ကူ၊ ကုယော။ ကုယာ၊ ကူဟိ၊ ကူဘိ။ ကုယာ၊ ကူနံ။ ကုယာ၊ ကူဟိ၊ ကူဘိ။ ကုယာ၊ ကူနံ။ ကုယာ၊ ကုယံ၊ ကူသု။ ဘောတိ ကု၊ ဘောတိယော ကူ၊ ဘောတိယော ကုယော။

ခ’မိန္ဒြိယံ ပကထိတံ၊ ခ’မာကာသမုဒီရိတံ၊

သဂ္ဂဋ္ဌာနမ္ပိ ခံ ဝုတ္တံ၊ သုညတ္တမ္ပိ စ ခံ မတံ။

တတြိန္ဒြိယံ စက္ခုဝိညာဏာဒီနံ ဂတိနိဝါသဘာဝတော ‘‘ခ’’န္တိ ဝုစ္စတိ၊ အာကာသံ ဝိဝိတ္တဋ္ဌေန။ သဂ္ဂေါ ကတသုစရိတေဟိ ဧကန္တေန ဂန္တဗ္ဗတာယ ‘‘ခ’’န္တိ သင်္ခံ ဂစ္ဆတိ။ ‘‘ခဂေါ ယထာ ဟိ ရုက္ခဂ္ဂေ၊ နိလီယန္တောဝ သာခိနော။ သာခံ ဃဋ္ဋေတီ’’တိ စ၊ ‘‘ခေ နိမ္မိတော အစရိ အဋ္ဌသတံ သယမ္ဘူ’’တိ စ အာဒိ ဧတ္ထ နိဒဿနံ။

ခံ၊ ခါနိ၊ ခါ။ ခံ၊ ခါနိ၊ ခေ။ ခေန၊ ခေဟိ၊ ခေဘိ။ ခဿ၊ ခါနံ။ ခါ၊ ခသ္မာ၊ ခမှာ၊ ခေဟိ၊ ခေဘိ။ ခဿ၊ ခါနံ။ ခေ၊ ခသ္မိံ၊ ခမှိ၊ ခေသု။ ဘော ခ၊ ဘဝန္တော ခါနိ၊ ဘဝန္တော ခါ။

ဂေါသဒ္ဒဿ အတ္ထုဒ္ဓါရော ဝုစ္စတေ –

ဂေါ ဂေါဏေ စိန္ဒြိယေ ဘူမျံ၊ ဝစနေ စေဝ ဗုဒ္ဓိယံ၊

အာဒိစ္စေ ရသ္မိယဉ္စေဝ၊ ပါနီယေပိ စ ဝတ္တတေ၊

တေသု အတ္ထေသု ဂေါဏေ ထိ-ပုမာ စ ဣတရေ ပုမာ။

တထာ ဟိ ‘‘ဂေါသု ဒုယှမာနာသု ဂတော။ ဂေါပဉ္စမော’’တိအာဒီသု ဂေါသဒ္ဒေါ ဂေါဏေ ဝတ္တတိ။ ဂေါစရောတိ ဧတ္ထိန္ဒြိယေပိ ဝတ္တတိ ဂါဝေါ စက္ခာဒီနိန္ဒြိယာနိ စရန္တိ ဧတ္ထာတိ ဂေါစရော။ တထာ ဟိ ပေါရာဏာ ကထယိံသု ‘‘ဂါဝေါ စရန္တိ ဧတ္ထာတိ ဂေါစရော၊ ဂေါစရော ဝိယ ဂေါစရော၊ အဘိဏှံ စရိတဗ္ဗဋ္ဌာနံ။ ဂါဝေါဝါစက္ခာဒီနိန္ဒြိယာနိ၊ တေဟိ စရိတဗ္ဗဋ္ဌာနံ ဂေါစရော’’တိ။ ‘‘ဂေါမတိံ ဂေါတမံ နမေ’’တိ ပေါရာဏကဝိရစနာယံ ပန ပထဝိယံ ဝတ္တတိ။ ‘‘ဘူရိပညံ ဂေါတမံ သမ္မာသမ္ဗုဒ္ဓံဝန္ဒာမီ’’တိ ဟိ အတ္ထော။ တထာ သုတ္တနိပါတဋ္ဌကထာယဝါသေဋ္ဌသုတ္တသံဝဏ္ဏနပ္ပဒေသေ ‘‘ဂေါရက္ခန္တိ ခေတ္တရက္ခံ၊ ကသိရက္ခန္တိ ဝုတ္တံ ဟောတိ။ ပထဝီ ဟိ ‘‘ဂေါ’’တိ ဝုစ္စတိ၊ တပ္ပဘေဒေါ စ ခေတ္တ’’န္တိ ဝုတ္တံ။

‘‘ဂေါတ္တဝသေန ဂေါတမော’’တိ ဧတ္ထ တု ဝစနေ ဗုဒ္ဓိယဉ္စ ဝတ္တတိ။ တေနာဟု ပေါရာဏာ ‘‘ဂံ တာယတီတိ ဂေါတ္တံ။ ဂေါတမောတိ ဟိ ပဝတ္တမာနံ ဂံ ဝစနံ ဗုဒ္ဓိဉ္စ တာယတိ ဧကံသိကဝိသယတာယ ရက္ခတီတိ ဂေါတ္တံ။ ယထာ ဟိ ဗုဒ္ဓိ အာရမ္မဏဘူတေန အတ္ထေန ဝိနာ န ဝတ္တတိ၊ ဧဝံ အဘိဓာနံ အဘိဓေယျဘူတေန၊ တသ္မာ သော ဂေါတ္တသင်္ခါတော အတ္ထော တာနိ တာယတိ ရက္ခတီတိ ဝုစ္စတိ။ ကော ပန သောတိ? အညကုလပရမ္ပရာသာဓာရဏံ တဿ ကုလဿ အာဒိပုရိသသမုဒါဂတံ တံကုလပရိယာပန္နသာဓာရဏံ သာမညရူပန္တိ ဒဋ္ဌဗ္ဗ’’န္တိ။ တထာ ဟိ တံဂေါတ္တဇာတာ သုဒ္ဓါဒနမဟာရာဇာဒယောပိ ဂေါတမောတွေဝ ဝုစ္စန္တိ။ ဘေန ဘဂဝါ အတ္တနော ပိတရံ သုဒ္ဓါဒနမဟာရာဇာနံ ‘‘အတိက္ကန္တဝရာ ခေါ ဂေါတမ တထာဂတာ’’တိ အဝေါစ။ ဝေဿဝဏောပိ မဟာရာဇာ ဘဂဝန္တံ ‘‘ဝိဇ္ဇာစရဏသမ္ပန္နံ၊ ဗုဒ္ဓံ ဝန္ဒာမ ဂေါတမ’’န္တိ အဝေါစ၊ အာယသ္မာပိ ဝင်္ဂီသော အာယသ္မန္တံ အာနန္ဒံ ‘‘သာဓု နိဗ္ဗာပနံ ဗြူဟိ၊ အနုကမ္ပာယ ဂေါတမာ’’တိ အဝေါစ။ ဧဝံ ဣဒံ သာမညရူပံ ဂံ တာယတီတိ ဂေါတ္တန္တိ ဝုတ္တံ။ တံ ပန ဂေါတမဂေါတ္တကဿပဂေါတ္တာဒိဝသေန ဗဟုဝိဓံ။

တထာ ဂေါသဒ္ဒေါ အာဒိစ္စေ ဝတ္တတိ။ ‘‘ဂေါဂေါတ္တံ ဂေါတမံ နမေ’’တိ ပေါရာဏကဝိရစနာ ဧတ္ထ နိဒဿနံ၊ အာဒိစ္စဗန္ဓုံ ဂေါတမံ သမ္မာသမ္ဗုဒ္ဓံ ဝန္ဒာမီတိ အတ္ထော။ အာဒိစ္စောပိ ဟိ ဂေါတမဂေါတ္တေ ဇာတော ဘဂဝါပိ၊ ဧဝံ တေန သမာနဂေါတ္တတာယ တတ္ထ တတ္ထ ‘‘အာဒိစ္စဗန္ဓူ’’တိအာဒိနာ ဘဂဝတော ထောမနာ ဒိဿတိ ‘‘ပုစ္ဆာမိ တံ အာဒိစ္စဗန္ဓု၊ ဝိဝေကံ သန္တိပဒဉ္စ မဟေသီ’’တိ စ၊ ‘‘ဝန္ဒေ ဇေတဝနံ နိစ္စံ၊ ဝိဟာရံ ရဝိဗန္ဓုနော’’တိ စ၊ ‘‘လောကေကဗန္ဓု’မရဝိန္ဒသဟာယဗန္ဓု’’န္တိ စ။ ‘‘ဥဏှဂူ’’တိ ဧတ္ထ ပန ဂေါသဒ္ဒေါ ရသ္မိယံ ဝတ္တတိ။ ဥဏှာ ဂါဝေါ ရသ္မိယော ဧတဿာတိ ဥဏှဂူ၊ သူရိယော။ ပုဗ္ဗာစရိယာပိ ဟိ ဆန္ဒောဝိစိတိသတ္ထေ ဣမမေဝတ္ထံ ဗျာကရိံသု။

‘‘ဂေါသီတစန္ဒန’’န္တိ ဧတ္ထ ပါနီယေ ဝတ္တတိ။ ဂေါသဒ္ဒေန ဟိ ဇလံ ဝုစ္စတိ။ ဂေါ ဝိယ သီတံ စန္ဒနံ၊ တသ္မိံ ပန ဥဒ္ဓနတော ဥဒ္ဓရိတပက္ကုထိတတေလမှိ ပက္ခိတ္တေ တင်္ခဏညေဝ တံ တေလံ သုသီတလံ ဟောတိ။

ဧတ္ထေကေ ဝဒန္တိ ‘‘ကသ္မာ ဘော ‘ဂေါပဒတ္ထေ ဝတ္တမာနော ဂေါသဒ္ဒေါ ဣတ္ထိလိင်္ဂေါ စေဝ ပုလ္လိင်္ဂေါ စာ’တိ ဝဒထ၊ ကသ္မာ စ ပန ‘ဣန္ဒြိယပထဝီဝစနဗုဒ္ဓိသူရိယရသ္မိပါနီယေသု ဝတ္တမာနော ပုလ္လိင်္ဂေါ’တိ ဝဒထ၊ ဧတေသု သူရိယတ္ထေ ဝတ္တမာနော ပုလ္လိင်္ဂေါ ဟောတု၊ နနု ဣန္ဒြိယဝစနပါနီယေသု ဝတ္တမာနေန ပန ဂေါသဒ္ဒေန နပုံသကလိင်္ဂေန ဘဝိတဗ္ဗံ၊ ပထဝီဗုဒ္ဓိရသ္မီသု ဝတ္တမာနေန ဣတ္ထိလိင်္ဂေန ဘဝိတဗ္ဗံ ဣန္ဒြိယာဒိပထဝါဒိပဒတ္ထေသု ဝတ္တမာနာနံ ဣန္ဒြိယသဒ္ဒါဒိပထဝီသဒ္ဒါဒီနံ နပုံသကိတ္ထိလိင်္ဂဝသေန နိဒ္ဒေသဿ ဒဿနတော’’တိ? တန္န၊ နိယမာဘာဝတော။ ဣတ္ထိပဒတ္ထေ ဝတ္တမာနဿာပိ ဟိ သတော ကဿစိ သဒ္ဒဿ ပုလ္လိင်္ဂဝသေန နိဒ္ဒေသော ဒိဿတိ ယထာ ‘‘ဩရောဓော’’တိ။ ပုရိသပဒတ္ထေ ဝတ္တမာနဿာပိ စ သတော ကဿစိ ဣတ္ထိလိင်္ဂဝသေန နိဒ္ဒေသော ဒိဿတိ၊ ယထာ ‘‘အတ္ထကာမောသိ မေ ယက္ခ၊ ဟိတကာမာသိ ဒေဝတေ’’တိ။ ဣတ္ထိပုရိသပဒတ္ထေသု ပန အဝတ္တမာနာနမ္ပိ သတံ ကေသဉ္စိ သဒ္ဒါနံ ဧကသ္မိံယေဝ ဉာဏာဒိအတ္ထေ ဝတ္တမာနာနံ ဣတ္ထိပုမနပုံသကလိင်္ဂဝသေန နိဒ္ဒေသော ဒိဿတိ ယထာ ‘‘ပညာ အမောဟော ဉာဏ’’န္တိ၊ ‘‘တဋံတဋီတဋော’’တိ စ။ တထာ ဟိ အနိတ္ထိဘူတောပိ သမာနော ‘‘မာတုလာ’’တိ ဣတ္ထိလိင်္ဂဝသေန ရုက္ခောပိ နာမံ လဘတိ၊ တဗ္ဗသေန နဂရမ္ပိ။ တေနာဟ စက္ကဝတ္တိသုတ္တဋီကာယံ ‘‘မာတုလာတိ ဣတ္ထိလိင်္ဂဝသေန လဒ္ဓနာမော ဧကော ရုက္ခော၊ တာယ အာသန္နပ္ပဒေသေ မာပိတတ္တာ နဂရမ္ပိ ‘မာတုလာ’တွေဝ ပညာယိတ္ထ။ တေန ဝုတ္တံ မာတုလာယန္တိ ဧဝံနာမကေ နဂရေ’’တိ။

ဂေါသဒ္ဒဿ နာမိကပဒမာလာ ဟေဋ္ဌာ ပကာသိတာ။

မော ဝုစ္စတိ စန္ဒော၊ အဋ္ဌကထာယံ ပန ‘‘မာ ဝုစ္စတိ စန္ဒော’’တိ အာကာရန္တပါဌော ဒိဿတိ၊ ဩကာရန္တပါဌေန တေန ဘဝိတဗ္ဗံ သက္ကဋဘာသာယ ဧကက္ခရကောသတော နယံ ဂဟေတွာ ‘‘မော သိဝေါ စန္ဒိမာ စေဝါ’’တိ ဩကာရန္တဝသေန ဝတ္တဗ္ဗတ္တာ။ ဧတ္ထ စ ဩကာရန္တဝသေန ဝုတ္တဿ မသဒ္ဒဿ စန္ဒဝါစကတ္တေ ‘‘ပုဏ္ဏမီ၊ ပုဏ္ဏမာ’’တိ စ နိဒဿနပဒါနိ။ တတ္ထ ပုဏ္ဏော မော ဧတ္ထာတိ ပုဏ္ဏမီ၊ ဧဝံ ပုဏ္ဏမာ၊ ရတ္တာပေက္ခံ ဣတ္ထိလိင်္ဂဝစနံ။ ဧတ္ထ ပန ‘‘ဝိသာခပုဏ္ဏမာယ ရတ္တိယာ ပဌမယာမေပုဗ္ဗေနိဝါသံ အနုဿရီ’’တိ ဣဒံ နိဒဿနံ။ ဧတ္ထ သိယာ – ယဒိ ‘‘ပုဏ္ဏမာ’’တိ အယံသဒ္ဒေါ ရတ္တာပေက္ခော ဣတ္ထိလိင်္ဂေါ။

‘‘ပုဏ္ဏမာယေ ယထာ စန္ဒော၊ ပရိသုဒ္ဓါ ဝိရောစတိ၊

တထေဝ တွံ ပုဏ္ဏမနော၊ ဝိရောစ ဒသသဟဿိယံ။

အနွဒ္ဓမာသေ ပန္နရသေ၊ ပုဏ္ဏမာယေ ဥပေါသထေ၊

ပစ္စယံ နာဂမာရုယှ၊ ဒါနံ ဒါတုမုပါဂမိ’’န္တိ

အာဒီသု ကထံ ‘‘ပုဏ္ဏမာယေ’’တိ ပဒသိဒ္ဓီတိ? ယကာရဿ ယေကာရာဒေသဝသေန။ ဓမ္မိဿရေန ဟိ ဘဂဝတာ ‘‘ပုဏ္ဏမာယာ’’တိ ဝတ္တဗ္ဗေ ‘‘ပုဏ္ဏမာယေ’’တိ ဝဒတာ ယကာရဿ ဌာနေ ယေကာရော ပဌိတော ဣတ္ထိလိင်္ဂဝိသယေ တ္တာကာရဿ ဌာနေ တ္တေကာရော ဝိယ၊ နီကာရဿ ဌာနေ နေကာရော ဝိယ စ။ တထာ ဟိ ယထာ ‘‘အဗျယတံ ဝိလပသိ ဝိရတ္တေ ကောသိယာယနေ’’တိ ဣမသ္မိံ ရာဓဇာတကေ ‘‘ဝိရတ္တာ’’တိ ဝတ္တဗ္ဗေ ‘‘ဝိရတ္တေ’’တိ ဝဒန္တေန တ္တာကာရဿ ဌာနေ တ္တေကာရော ပဌိတော၊ ‘‘ကောသိယာယနီ’’တိ စ ဝတ္တဗ္ဗေ ‘‘ကောသိယာယနေ’’တိ ဝဒန္တေန နီကာရဿ ဌာနေ နေကာရော ပဌိတော။ ဧဝံ ‘‘ပုဏ္ဏမာယာ’’တိ ဝတ္တဗ္ဗေ ‘‘ပုဏ္ဏမာယေ’’တိ ဝဒတာ ယကာရဿ ဌာနေ ယေကာရော ပဌိတော။ ယထာ စ ‘‘ဒက္ခိတာယေ အပရာဇိတသင်္ဃ’’န္တိ ဣမသ္မိံ မဟာသမယသုတ္တပ္ပဒေသေ ‘‘ဒက္ခိတာယာ’’တိ ဝတ္တဗ္ဗေ ‘‘ဒက္ခိတာယေ’’တိ ဝဒတာ ယကာရဿ ဌာနေ ယေကာရော ပဌိတော၊ ဧဝမိဓာပိ။ ယထာ ပန ‘‘သဘာယေ ဝါ ဒွါရမူလေ ဝါ’’တိ ဧတ္ထ ‘‘သဘာယ’’န္တိ လိင်္ဂဗျတ္တယဝသေန သဘာ ဝုတ္တာ၊ န တထာ ဣဓ ‘‘ပုဏ္ဏမာယ’’န္တိ လိင်္ဂဗျတ္တယေန ပုဏ္ဏမာ ဝုတ္တာ၊ အထ ခေါ ‘‘ပုဏ္ဏမာ’’တိ အာကာရန္တိတ္ထိလိင်္ဂဝသေန ဝုတ္တာ။ တထာ ဟိ ‘‘ပုဏ္ဏမာယော’’တိ ပဒံ ယကာရဋ္ဌာနေ ယေကာရုစ္စာရဏဝသေန သမ္ဘူတံ ဘုမ္မဝစနန္တိ ဒဋ္ဌဗ္ဗံ။

မာ ဝုစ္စတိ သိရီ။ တထာ ဟိ ဝိဒွမုခမဏ္ဍနဋီကာယံ ‘‘မာလိနီ’’တိ ပဒဿတ္ထံ ဝဒတာ ‘‘မာ ဝုစ္စတိ လက္ခီ၊ အလိနီ ဘမရီ’’တိ ဝုတ္တံ။ လက္ခီသဒ္ဒေါ စ သိရီသဒ္ဒေန သမာနတ္ထော၊ တေန ‘‘မာ ဝုစ္စတိ သိရီ’’တိ အတ္ထော အမှေဟိ အနုမတော၊ တထာ ပေါရာဏေဟိပိ ‘‘မံ သိရိံ ဓာရေတိ ဝိဒဓာတိ စာတိ မန္ဓာတာ’’တိ အတ္ထော ပကာသိတော၊ တသ္မာ ‘‘မာလိနီ မန္ဓာတာ’’တိ စ ဣမာနေတ္ထ နိဒဿနပဒါနိ။ တတြ ပုလ္လိင်္ဂဿ တာဝ မသဒ္ဒဿ အယံ နာမိကပဒမာလာ –

မော၊ မာ။ မံ၊ မေ။ မေန၊ မေဟိ၊ မေဘိ။ မဿ၊ မာနံ။ မာ၊ မသ္မာ၊ မမှာ၊ မေဟိ၊ မေဘိ။ မဿ၊ မာနံ။ မေ၊ မသ္မိံ၊ မမှိ၊ မေသု။ ဘော မ၊ ဘဝန္တော မာ။

အယံ ပန ဣတ္ထိလိင်္ဂဿ မာသဒ္ဒဿ နာမိကပဒမာလာ –

မာ၊ မာ၊ မာယော။ မံ၊ မာ၊ မာယော။ မာယ၊ မာဟိ၊ မာဘိ။ မာယ၊ မာနံ။ မာယ၊ မာဟိ၊ မာဘိ။ မာယ၊ မာနံ။ မာယ၊ မာယံ၊ မာသု။ ဘောတိ မေ၊ ဘောတိယော မာယော။

ဧတ္ထ ပန သိရီဝါစကော မာသဒ္ဒေါ စ သဒ္ဒဝါစကော ရာသဒ္ဒေါ စာတိ ဣမေ သမာနဂတိကာ ဧကက္ခရတ္တာ နိစ္စမာကာရန္တပကတိကတ္တာ ဣတ္ထိလိင်္ဂတ္တာ စ။

တတြ သံ ဝုစ္စတိ သန္တစိတ္တော ပုရိသော။ ယံ လောကေ ‘‘သပ္ပုရိသော’’တိ စ၊ ‘‘အရိယော’’တိ စ၊ ‘‘ပဏ္ဍိတော’’တိ စ ဝဒန္တိ၊ တဿေတံ အဓိဝစနံ ယဒိဒံ ‘‘သ’’န္တိ။ ဧဝံ သပ္ပုရိသာရိယပဏ္ဍိတဝါစကဿ သံသဒ္ဒဿ ပစ္စတ္တဝစနဝသေန အတ္ထိဘာဝေ ‘‘သမေတိ အသတာ အသ’’န္တိ ဣဒံ ပယောဂနိဒဿနံ။ ဧတ္ထ ဟိ ‘‘န သံ အသ’’န္တိ သမာသစိန္တာယ သပ္ပုရိသာသပ္ပုရိသပဒတ္ထာ သံ အသံသဒ္ဒေဟိ ဝုတ္တာတိ ဉာယန္တိ၊ တသ္မာ ‘‘သပ္ပုရိသပဒတ္ထော ပစ္စတ္တဝစနေန သံသဒ္ဒေန ဝုတ္တော နတ္ထီ’’တိ ဝစနံ န ဝတ္တဗ္ဗံ။ ယေ ‘‘နတ္ထီ’’တိ ဝဒန္တိ၊ တေသံ ဝစနံ န ဂဟေတဗ္ဗံ။ နာမိကပဒမာလာ ပနဿ ‘‘သံ၊ သန္တံ၊ သန္တေ’’တိအာဒိနာ ဟေဋ္ဌာ ပကာသိတာ။ နပုံသကလိင်္ဂတ္တေ သံ ဝုစ္စတိ ဓနံ၊ ‘‘မနုဿဿံ။ ပရဿံ။ သဗ္ဗဿံ။ သဗ္ဗဿဟရဏံ။ ပရဿဟရဏ’’န္တိအာဒီနေတ္ထ နိဒဿနပဒါနိ။ တတ္ထ မနုဿဿ သံ မနုဿဿံ။ ဧဝံ ပရဿ သံ ပရဿံ။ သဗ္ဗဿ သံ သဗ္ဗဿံ။ တဿ ဟရဏံ ပရဿဟရဏံ သဗ္ဗဿဟရဏန္တိ သမာသော။ တထာ သံ ဝုစ္စတိ သုခံ သန္တိ စ။ ဝုတ္တဉှိ တဗ္ဗာစကတ္တံ ပေါရာဏကဝိရစနာယံ –

‘‘ဒေဝဒေဝေါ သံဒေဟီ နော၊ ဟီနော ဒေဝါတိဒေဟတော၊

ဟတောပပါတသံသာရော၊ သာရော သံ ဒေတု ဒေဟိန’’န္တိ။

တသ္မာ အယမေတ္ထ ဂါထာ၊ ‘‘သကလလောကသင်္ကရော ဒီပင်္ကရော’’တိ ဧတ္ထ ‘‘သင်္ကရော’’တိ ပဒဉ္စနိဒဿနံ။ ‘‘သံ၊ သာနိ၊ သာ။ သံ၊ သာနိ၊ သေ။ သေန’’ဣစ္စာဒိ ပုဗ္ဗေ ပကာသိတနယေန ဉေယျံ။ ဧတ္ထ စ သောတူနံ သုဂတမတဝရေ ကောသလ္လဇနနတ္ထံ သမာသန္တဂတဿ သံသဒ္ဒဿ နာမိကပဒမာလံ ပရိပုဏ္ဏံ ကတွာ ကထယာမ –

မနုဿဿံ၊ မနုဿဿာနိ၊ မနုဿဿာ။ မနုဿဿံ၊ မနုဿဿာနိ၊ မနုဿဿေ။ မနုဿဿေန၊ မနုဿဿေဟိ၊ မနုဿဿေဘိ။ မနုဿဿဿ၊ မနုဿဿာနံ။ မနုဿဿာ၊ မနုဿဿသ္မာ၊ မနုဿဿမှာ၊ မနုဿဿေဟိ၊ မနုဿဿေဘိ။ မနုဿဿဿ၊ မနုဿဿာနံ။ မနုဿဿေ၊ မနုဿဿသ္မိံ၊ မနုဿဿမှိ၊ မနုဿဿေသု။ ဘော မနုဿဿ၊ ဘောန္တော မနုဿဿာနိ၊ မနုဿဿာ။ ဧသ နယော ‘‘ပရဿံ သဗ္ဗဿ’’န္တိအာဒီသုပိ၊ သဗ္ဗာနေတာနိ ပဒါနိ အဘိဓေယျလိင်္ဂါနီတိ ဂဟေတဗ္ဗာနိ။

ယံ တံ ကိမိတိသဒ္ဒါနံ၊ နာမမာလံ ပနတ္တရိ၊

သဗ္ဗနာမပရိစ္ဆေဒေ၊ ပကာသိဿံ တိလိင်္ဂတော။

ဣစ္စေဝံ ဟေဋ္ဌာ ဥဒ္ဒိဋ္ဌာနံ ကော ဝိ သာဒီနံ နာမိကပဒမာလာ သဒ္ဓိံ အတ္ထန္တရနိဒဿနပဒေဟိ ဝိဘတ္တာ။ တတြိဒံ လိင်္ဂဝဝတ္ထာနံ –

ကော ဝိ သာ ဟောန္တိ ပုလ္လိင်္ဂေ၊ ဘာ ရာ ထီ ဓီ ကု ဘူ ထိယံ၊

ကံ ခံ နပုံသကေ ဂေါ တု၊ ပုမေ စေဝိတ္ထိလိင်္ဂကေ။

မော ပုမေ ဣတ္ထိလိင်္ဂေ မာ၊ သံ ပုမေ စ နပုံသကေ၊

ယံ တံ ကိမိတိ သဗ္ဗတြ၊ လိင်္ဂေသွေဝ ပဝတ္တရေ။

ဣတော အညာနိပိ ဧကက္ခရာနိ ဥပပရိက္ခိတွာ ဂဟေတဗ္ဗာနိ။

ဧဝံ ဝိညူနံ နယညူနံ သဒ္ဒရစနာဝိသယေ ပရမဝိသုဒ္ဓဝိပုလဗုဒ္ဓိပဋိလာဘတ္ထံ ပရမသဏှသုခုမတ္ထေသု ပယောဂေသု အသမ္မောဟတ္ထံ သုဝဏ္ဏတလေ သီဟဝိဇမ္ဘနေန ကေသရီသီဟဿ ဝိဇမ္ဘနမိဝ တေပိဋကေ ဗုဒ္ဓဝစနေ ဉာဏဝိဇမ္ဘနေန ဝိဇမ္ဘနတ္ထဉ္စ အဓိကူနေကက္ခရဝသေန လိင်္ဂတ္တယံ မိဿေတွာ နာမိကပဒမာလာ ဝိဘတ္တာ။

သဒ္ဒေ ဘဝန္တိ ကုသလာ န တု ကေစိ အတ္ထေ၊

အတ္ထေ ဘဝန္တိ ကုသလာ န တု ကေစိ သဒ္ဒေ။

ကောသလ္လမေဝ ပရမံ ဒုဘယတ္ထ တသ္မာ၊

ယောဂံ ကရေယျ သတတံ မတိမာ ဝရန္တိ။

ဣတိ နဝင်္ဂေ သာဋ္ဌကထေ ပိဋကတ္တယေ ဗျပ္ပထဂတီသု

ဝိညူနံ ကောသလ္လတ္ထာယ ကတေ သဒ္ဒနီတိပ္ပကရဏေ

လိင်္ဂတ္တယမိဿကော နာမိကပဒမာလာဝိဘာဂေါ

ဒသမော ပရိစ္ဆေဒေါ။