📜

၁၃။ သဝိနိစ္ဆယသင်္ချာနာမနာမိကပဒမာလာ

ဣတော ¶ ပရံ ပဝက္ခာမိ၊ သင်္ချာနာမိကပန္တိယော၊

ဘူဓာတုဇေဟိ ရူပေဟိ၊ အညေဟိ စုပယောဇိတုံ။

ယာ ဟိ သာ ဟေဋ္ဌာ အမှေဟိ ဧက ဒွိတိ စတုဣစ္စေတေသံ သင်္ချာသဗ္ဗနာမာနံ နာမိကပဒမာလာ ကထိတာ၊ တံ ဌပေတွာ ဣဓ အသဗ္ဗနာမာနံ ပဉ္စ ဆ သတ္တာဒီနံ သင်္ချာနာမာနံ နာမိကပဒမာလာ ဘူဓာတုမယေဟိ အညေဟိ စ ရူပေဟိ ယောဇနတ္ထံ ဝုစ္စတေ –

ပဉ္စ၊ ပဉ္စဟိ၊ ပဉ္စဘိ၊ ပဉ္စန္နံ၊ ပဉ္စသု။ သတ္တန္နံ ဝိဘတ္တီနံ ဝသေန ဉေယျံ။ ‘‘ပဉ္စ ဘူတာ၊ ပဉ္စ အဘိဘဝိတာရော၊ ပဉ္စ ပုရိသာ၊ ပဉ္စ ဘူမိယော၊ ပဉ္စ ကညာယော၊ ပဉ္စ ဘူတာနိ၊ ပဉ္စ စိတ္တာနီ’’တိအာဒိနာ သဗ္ဗတ္ထ ယောဇေတဗ္ဗံ။ ဆ၊ ဆဟိ၊ ဆဘိ၊ ဆန္နံ၊ ဆသု၊ ဆဿု ဣတိပိ။ ‘‘ဆဿု လောကော သမုပ္ပန္နော၊ ဆဿု ကြုဗ္ဗတိ သန္ထဝ’’န္တိ ဟိ ပါဠိ။ သတ္တ၊ သတ္တဟိ၊ သတ္တဘိ၊ သတ္တန္နံ၊ သတ္တသု။ အဋ္ဌ၊ အဋ္ဌဟိ၊ အဋ္ဌဘိ၊ အဋ္ဌန္နံ၊ အဋ္ဌသု။ နဝ၊ နဝဟိ၊ နဝဘိ၊ နဝန္နံ၊ နဝသု။ ဒသ၊ ဒသဟိ၊ ဒသဘိ၊ ဒသန္နံ၊ ဒသသု။ ဧဝံ ဧကာဒသ။ ဒွါဒသ၊ ဗာရသ။ တေရသ၊ တေဒသ၊ တေဠသ။ စတုဒ္ဒသ၊ စုဒ္ဒသ။ ပဉ္စဒသ၊ ပန္နရသ။ သောဠသ။ သတ္တရသ။ အဋ္ဌာရသ၊ အဋ္ဌာရသဟိ၊ အဋ္ဌာရသဘိ၊ အဋ္ဌာရသန္နံ၊ အဋ္ဌာရသသု။ သဗ္ဗမေတံ ဗဟုဝစနဝသေန ဂဟေတဗ္ဗံ။

ဧကူနဝီသတိ၊ ဧကူနဝီသံ ဣစ္စာဒိပိ။ ဧကူနဝီသာယ၊ ဧကူနဝီသာယံ၊ ဧကူနဝီသ ဘိက္ခူ တိဋ္ဌန္တိ၊ ဧကူနဝီသံ ဘိက္ခူ ပဿတိ၊ ဧဝံ ‘‘ကညာယော စိတ္တာနီ’’တိ စ အာဒိနာ ယောဇေတဗ္ဗံ။ ဧကူနဝီသာယ ဘိက္ခူဟိ ဓမ္မော ဒေသိတော၊ ဧကူနဝီသာယ ကညာဟိ ကတံ၊ ဧကူနဝီသာယ စိတ္တေဟိ ကတံ၊ ဧကူနဝီသာယ ဘိက္ခူနံ စီဝရံ ဒေတိ၊ ဧကူနဝီသာယ ကညာနံ ဓနံ ဒေတိ၊ ဧကူနဝီသာယ စိတ္တာနံ ရုစ္စတိ၊ ဧကူနဝီသာယ ဘိက္ခူဟိ အပေတိ ¶ ။ ဧဝံ ကညာဟိ စိတ္တေဟိ။ ဧကူနဝီသာယ ဘိက္ခူနံ သန္တကံ၊ ဧဝံ ကညာနံ စိတ္တာနံ။ ဧကူနဝီသာယံ ဘိက္ခူသု ပတိဋ္ဌိတံ။ ဧဝံ ‘‘ကညာသု စိတ္တေသူ’’တိ ယောဇေတဗ္ဗံ။ ဧကူနဝီသတိ၊ ဧကူနဝီသတိံ၊ ဧကူနဝီသတိယာ၊ ဧကူနဝီသတိယံ။

ဝီသတိ၊ ဝီသတိံ၊ ဝီသတိယာ၊ ဝီသတိယံ။ ဝီသ၊ ဝီသံ၊ ဝီသာယ၊ ဝီသာယံ။ တထာ ဧကဝီသ ဒွါဝီသ ဗာဝီသ တေဝီသ စတုဝီသ ဣစ္စာဒီသုပိ။ တိံသ၊ တိံသံ၊ တိံသာယ၊ တိံသာယံ။ စတ္တာလီသ၊ စတ္တာလီသံ၊ စတ္တာလီသာယ၊ စတ္တာလီသာယံ။ စတ္တာရီသ ဣစ္စာဒိပိ။ ပညာသ၊ ပညာသံ၊ ပညာသာယ၊ ပညာသာယံ။ ပဏ္ဏာသ၊ ပဏ္ဏာသံ၊ ပဏ္ဏာသာယ၊ ပဏ္ဏာသာယံ။ သဋ္ဌိ၊ သဋ္ဌိံ၊ သဋ္ဌိယာ၊ သဋ္ဌိယံ။ သတ္တတိ၊ သတ္တတိံ၊ သတ္တတိယာ၊ သတ္တတိယံ။ သတ္တရိ ဣစ္စာဒိပိ။ အသီတိ၊ အသီတိံ၊ အသီတိယာ၊ အသီတိယံ။ နဝုတိ။ နဝုတိံ၊ နဝုတိယာ၊ နဝုတိယံ။

ဣတ္ထဉ္စ အညထာပိ သင်္ချာရူပါနိ ဂဟေတဗ္ဗာနိ။ ဧကူနဝီသေဟိ၊ ဧကူနဝီသာနံ၊ ဧကူနဝီသေသု။ ‘‘ဆန္နဝုတီန’’န္တိ စ အာဒိနာပိ သင်္ချာရူပါနံ ကတ္ထစိ ဒဿနတော ကေစိ သဒ္ဒသတ္ထဝိဒူ ဦနဝီသတိသဒ္ဒံ သဗ္ဗဒါပိ ဧကဝစနန္တမိတ္ထိလိင်္ဂမေဝ ပယုဉ္ဇန္တိ။ ကေစိ ‘‘ဝီသတိအာဒယော အာနဝုတိ ဧကဝစနန္တာ ဣတ္ထိလိင်္ဂါ’’တိ ဝဒန္တိ။ ကေစိ ပနာဟု –

‘‘သဒ္ဒါ သင်္ချေယျသင်္ခါသု၊ ဧကတ္တေ ဝီသတာဒယော၊

သင်္ခတ္ထေ ဒွိဗဟုတ္တမှိ၊ တာ တု စာနဝုတိတ္ထိယော’’တိ။

ဧတ္ထ ဒွိဝစနံ ဆဍ္ဍေတဗ္ဗံ ဗုဒ္ဓဝစနေ တဒဘာဝတော။ သဗ္ဗေသမ္ပိ စ တေသံ ယထာဝုတ္တဝစနံ ကိဉ္စိ ပါဠိပ္ပဒေသံ ပတွာ ယုဇ္ဇတိ၊ ကိဉ္စိ ပန ပတွာ န ယုဇ္ဇတိ ဝီသတိဝီသံတိံသံဣစ္စာဒီနဉှိ သင်္ခတ္ထာနံ သဒ္ဒါနံ ဗဟုဝစနပ္ပယောဂဝသေနပိ ပါဠိယံ ဒဿနတော ¶ ၊ ကစ္စာယနေ စ ယောဝစနသမ္ဘူတရူပဝန္တတာဒဿနတော။ တသ္မာ ယထာသမ္ဘဝံ ယထာပါဝစနဉ္စ ဣတ္ထိလိင်္ဂဘာဝေ တေသမေကဝစနန္တတာ ဝေဒိတဗ္ဗာ အတ္ထိ နတ္ထိသဒ္ဒါနံ ဝိယ။

အတ္ထိနတ္ထိသဒ္ဒါ ဟိ နိပါတတ္တာ ဧကတ္တေပိ ဗဟုတ္တေပိ ပဝတ္တန္တိ ‘‘ပုတ္တာ မတ္ထိ ဓနမ္မတ္ထိ။ နတ္ထိ အတ္တသမံ ပေမံ။ နတ္ထိ သမဏဗြာဟ္မဏာ’’တိအာဒီသု။ အလိင်္ဂတ္တေပိ ပနေတေသံ ကတ္ထစိ ဣတ္ထိလိင်္ဂဘာဝေါ ဒိဋ္ဌော။ အဘိဓမ္မေ ဟိ ဓမ္မသေနာပတိနာ အနုဓမ္မစက္ကဝတ္တိနာ ဝေါဟာရကုသလေန ဝေါဟာရကုသလသာဓကေန ‘‘အတ္ထိယာ နဝ။ နတ္ထိယာ နဝါ’’တိ ဧကဝစနန္တံ ဣတ္ထိလိင်္ဂရူပံ ဒဿိတံ၊ တသ္မာ ဝီသတိဝီသတိမိစ္စာဒီနမ္ပိ ယထာသမ္ဘဝံ ယထာပါဝစနဉ္စ ဣတ္ထိလိင်္ဂဘာဝေ ဧကဝစနန္တတာ ဝေဒိတဗ္ဗာ။

တတ္ထေကေ ‘‘ဟေတုယာ အဓိပတိယာ’’တိ စ ဣဒံ လိင်္ဂဝိပလ္လာသဝသေန ဂဟေတဗ္ဗံ မညန္တိ။ တမ္မတိဝသေန ‘‘ဟေတုမှိ အဓိပတိမှီ’’တိ ပုလ္လိင်္ဂဘာဝေါ ပဋိပါဒေတဗ္ဗော၊ ‘‘ဟေတုပစ္စယေ အဓိပတိပစ္စယေ’’ ဣစ္စေဝတ္ထော။ အထ ဝါ ‘‘ဟေတုယာ အဓိပတိယာ’’တိ ဒွယမိဒံ ဣတ္ထိလိင်္ဂရူပပဋိဘာဂံ ပုလ္လိင်္ဂရူပန္တိ ဂဟေတဗ္ဗံ ‘‘ဟေတုယော ဇန္တုယော’’တိအာဒီနံ ဣတ္ထိလိင်္ဂရူပပဋိဘာဂါနံ ပုလ္လိင်္ဂရူပါနမ္ပိ ဝိဇ္ဇမာနတ္တာ၊ ‘‘အတ္ထိယာ နတ္ထိယာ’’တိ ဣဒံ ပန လိင်္ဂဝိပလ္လာသဝသေန ဝုတ္တန္တိ န ဂဟေတဗ္ဗံ အတ္ထိ နတ္ထိသဒ္ဒါနံ အလိင်္ဂဘေဒတ္တာ။ န ဟိ အတ္ထိ နတ္ထိသဒ္ဒါ တီသု လိင်္ဂေသု ဧကသ္မိမ္ပိ အန္တောဂဓာ။ ဧတေသု ဟိ အတ္ထိသဒ္ဒေါ အာချာတနိပါတဝသေန ဘိဇ္ဇတိ ‘‘အတ္ထိ သန္တိ သံဝိဇ္ဇတိ။ အတ္ထိခီရာ ဗြာဟ္မဏီ’’တိအာဒီသု ¶ ၊ နတ္ထိသဒ္ဒေါ ပန နိပါတောယေဝ။ ဣစ္စေဝံ အတ္ထိ နတ္ထိသဒ္ဒါနံ နိပါတာနဉ္စ လိင်္ဂဝစနဝသေန ကထနံ ယုဇ္ဇတိ ဣတ္ထိလိင်္ဂါဒိဝသေန ဧကတ္တာဒိဝသေန စ အပ္ပဝတ္တနတော။ ဝုတ္တဉ္စ –

‘‘သဒိသံ တီသု လိင်္ဂေသု၊ သဗ္ဗာသု စ ဝိဘတ္တိသု၊

ဝစနေသု စ သဗ္ဗေသု၊ ယံ န ဗျေတိ တဒဗျယ’’န္တိ။

ဧတ္ထ သိယာ – နနု စ ဘော ‘‘အတ္ထိ သက္ကာ လဗ္ဘာ ဣစ္စေတေ ပဌမာယာ’’တိ ဝစနတော အတ္ထိသဒ္ဒေါ ပဌမာယ ဝိဘတ္တိယာ ယုတ္တော၊ ဧဝံ သန္တေ ကသ္မာ ‘‘သဒိသံ တီသု လိင်္ဂေသူ’’တိအာဒိ ဝုတ္တန္တိ? သစ္စံ အတ္ထိသဒ္ဒေါ ပဌမာယ ဝိဘတ္တိယာ ယုတ္တော၊ တထာ နတ္ထိသဒ္ဒေါ အတ္ထိသဒ္ဒဿ ဝစနလေသေန ဂဟေတဗ္ဗတ္တာ ယုဂဠပဒတ္တာ စ။ ဣဒံ ပန ‘‘သဒိသံ တီသု လိင်္ဂေသူ’’တိအာဒိဝစနံ ဥပသဂ္ဂနိပါတသင်္ခါတေ အသင်္ချာသဒ္ဒေ သန္ဓာယ ဝုတ္တံ၊ န ဧကေကမသင်္ချာသဒ္ဒံ သန္ဓာယ။ တထာ ဟိ ‘‘အသင်္ချာ’’တိ စ ‘‘အဗျယာ’’တိ စ လဒ္ဓဝေါဟာရေသု ဥပသဂ္ဂနိပါတေသု ဥပသဂ္ဂါ သဗ္ဗေပိ သဗ္ဗဝိဘတ္တိဝစနကာ။ နိပါတာနံ ပန ဧကစ္စေ ပဌမာဒီသု ယထာရဟံ ဝိဘတ္တိယုတ္တာ၊ ဧကစ္စေ အဝိဘတ္တိယုတ္တာ။ တတ္ထ ယေ ယဒဂ္ဂေန ဝိဘတ္တိယုတ္တာ၊ တေ တဒဂ္ဂေန တဗ္ဗစနကာ။ ဥပသဂ္ဂနိပါတေသု ဟိ ပစ္စေကံ ‘‘ဣဒံ နာမ ဝစန’’န္တိ လဒ္ဓုံ န သက္ကာ၊ သဗ္ဗသင်္ဂါဟကဝသေန ပန ‘‘သဒိသံ တီသု လိင်္ဂေသူ’’တိအာဒိ ပုဗ္ဗာစရိယေဟိ ဝုတ္တံ။ ကစ္စာယနာစရိယေနပိ ဣမမေဝတ္ထံ သန္ဓာယ ‘‘သဗ္ဗာသမာဝုသောပသဂ္ဂနိပါတာဒီဟိ စာ’’တိ ဝုတ္တံ။ န ဟိ အာဝုသောသဒ္ဒတော သဗ္ဗာပိ ဝိဘတ္တိယော လဗ္ဘန္တိ၊ အထ ခေါ အာလပနတ္ထဝါစကတ္တာ ဧကဝစနိကအနေကဝစနိကာ ပဌမာဝိဘတ္တိယောယေဝ လဗ္ဘန္တိ။ အယမသ္မာကံ ခန္တိ။

ကေစိ ¶ ပန သဗ္ဗေဟိပိ နိပါတေဟိ သဗ္ဗဝိဘတ္တိလောပံ ဝဒန္တိ၊ တံ န ဂဟေတဗ္ဗံ။ ‘‘အတ္ထိ သက္ကာ လဗ္ဘာ ဣစ္စေတေ ပဌမာယ။ ဒိဝါ ဘိယျော နမော ဣစ္စေတေ ပဌမာယ စ ဒုတိယာယ စာ’’တိအာဒိဝစနတော၊ ပဒပူရဏမတ္တာနဉ္စ အဝိဘတ္တိယုတ္တာနံ အထ ခလု ဝတ ဝထ ဣစ္စာဒီနံ နိပါတာနံ ဝစနတော။ ဧတ္ထာပိ သိယာ ‘‘နနု စ ဘော အဝိဘတ္တိယုတ္တာနမ္ပိ နိပါတာနံ သမ္ဘဝတော အတ္ထိ နတ္ထိသဒ္ဒါနံ အဝိဘတ္တိကော နိဒ္ဒေသော ကာတဗ္ဗော၊ အထ ကိမတ္ထံ ‘အတ္ထိယာ နဝ၊ နတ္ထိယာ နဝါ’တိ သဝိဘတ္တိကော နိဒ္ဒေသော ကတော’’တိ? သဗ္ဗထာ ဝိဘတ္တီဟိ ဝိနာ အတ္ထဿ နိဒ္ဒိသိတုမသက္ကုဏေယျတ္တာတိ။

ယဒိ ဧဝံ ‘‘အတ္ထိ သက္ကာ လဗ္ဘာ ဣစ္စေတေ ပဌမာယာ’’တိ ဝစနတော အတ္ထိ နတ္ထိသဒ္ဒါ လုတ္တာယ ပဌမာယ ဝိဘတ္တိယာ ဝသေန ပဌမာဝိဘတ္တိကာယေဝ နိဒ္ဒိသိတဗ္ဗာ၊ ဧဝမကတွာ ကသ္မာ သတ္တမျန္တဝသေန ‘‘အတ္ထိယာ နတ္ထိယာ’’တိ နိဒ္ဒိဋ္ဌာတိ? သစ္စံ၊ အတ္ထိ နတ္ထိသဒ္ဒါ ပဌမာဝိဘတ္တိယုတ္တာယေဝ နိဒ္ဒိသိတဗ္ဗာ၊ တထာပိ ‘‘အတ္ထိပစ္စယေ နဝ၊ နတ္ထိပစ္စယေ နဝါ’’တိ ဧတဿတ္ထဿ ပရိဒီပနေ ပဌမာယ ဩကာသော နတ္ထိ၊ သတ္တမိယာယေဝ ပန အတ္ထိ၊ တသ္မာ ‘‘အတ္ထိယာ နဝ၊ နတ္ထိယာ နဝါ’’တိ ဝုတ္တံ။ ဣတိ အတ္ထိယာနတ္ထိယာသဒ္ဒါနံ သတ္တမျန္တဘာဝေ သိဒ္ဓေယေဝ တတိယာစတုတ္ထီပဉ္စမီဆဋ္ဌိယန္တဘာဝေါပိ သိဒ္ဓါယေဝ ဟောတိ။ တသ္မာ ‘‘အတ္ထိဘာဝေါ အတ္ထိတာ’’တိအာဒီသုပိ အတ္ထိယာ ဘာဝေါ အတ္ထိဘာဝေါ၊ နတ္ထိယာ ဘာဝေါ နတ္ထိဘာဝေါ၊ အတ္ထိယာ ဘာဝေါ အတ္ထိတာဘိအာဒိနာ သမာသတဒ္ဓိတဝိဂ္ဂဟော အဝဿမိစ္ဆိတဗ္ဗော။ ယဒိဒမမှေဟိ ဝုတ္တံ၊ တံ ‘‘ပါဠိယာ ဝိရုဇ္ဈတီ’’တိ န ဝတ္တဗ္ဗံ ပါဠိနယာနုသာရေန ဝုတ္တတ္တာတိ။

ဧဝံ ဟောတု၊ ကသ္မာ ဘော ‘‘အတ္ထိယာ၊ နတ္ထိယာ’’တိ ဣတ္ထိလိင်္ဂနိဒ္ဒေသော ကတော၊ နနု နိပါတောပသဂ္ဂါ အလိင်္ဂဘေဒါတိ? သစ္စံ၊ ဣဒံ ပန ဌာနံ အတီဝ သုခုမံ၊ တထာပိ ပုဗ္ဗာစရိယာနုဘာဝညေဝ ¶ နိဿာယ ဝိနိစ္ဆယံ ဗြူမ။ ယထာ ဟိ ဝီသတိဣစ္စာဒီနံ သင်္ချာသဒ္ဒါနံ သရူပတော အဒဗ္ဗဝါစကတ္တေပိ ဒဗ္ဗဝါစကာနံ လတာမတိရတ္တိဣတ္ထီ ယာဂုဝဓူသဒ္ဒါနံ ဝိယ ဣတ္ထိလိင်္ဂဘာဝေါ သဒ္ဒသတ္ထဝိဒူဟိ အနုမတော၊ ဧဝံ အဒဗ္ဗဝါစကတ္တေပိ အတ္ထိ နတ္ထိသဒ္ဒါနံ ကတ္ထစိ ဣတ္ထိလိင်္ဂဘာဝေါ သဒ္ဓမ္မဝိဒူဟိ အနုမတော။ တေနာဟ အာယသ္မာ ဓမ္မသေနာပတိ ‘‘အတ္ထိယာ နဝ၊ နတ္ထိယာ နဝါ’’တိ။ အထ ဝါ ‘‘အတ္ထိယာ၊ နတ္ထိယာ’’တိ ဣမာနိ လိင်္ဂဘာဝဝိနိမုတ္တာနိ သတ္တမိယန္တာနိ နိပါတပဒါနီတိပိ ဂဟေတဗ္ဗာနိ၊ န ဧတ္ထ စောဒေတဗ္ဗံ၊ ဧဝရူပါနိ နိပါတပဒါနိ ပုဗ္ဗာစရိယေဟိ ဝုတ္တာနိ န သန္တိ၊ တသ္မာ ဆဍ္ဍေတဗ္ဗမိဒံ ဝစနန္တိ။

ပါဝစနသ္မိဉှိ ဂရူဟိ အနိဒ္ဒိဋ္ဌာနိပိ အနေကဝိဟိတာနိ နိပါတပဒါနိ သန္ဒိဿန္တိ၊ နာပိ ‘‘ဟေတုယာ၊ အဓိပတိယာ၊ အတ္ထိယာ၊ နတ္ထိယာ’’တိ ဧဝမာဒီသု ‘‘အပသဒ္ဒါ ဣမေ’’တိ ဝိရောဓော ဥပ္ပာဒေတဗ္ဗော။ န ဟိ အစိန္တေယျာနုဘာဝေန ပါရမိတာပုညေန နိပ္ဖန္နေန အနာဝရဏဉာဏေန သဗ္ဗံ ဉေယျမဏ္ဍလံ ဟတ္ထတလေ အာမလကံ ဝိယ ပစ္စက္ခံ ကတွာ ပဿတော ဗုဒ္ဓဿ ဝစနေ အညေသံ ဝါစာဝိပ္ပလာပေါ အဝဿံ လဗ္ဘတီတိ။ နနု စ ဘော ‘‘ဟေတုယာ၊ အဓိပတိယာ၊ အတ္ထိယာ၊ နတ္ထိယာ’’တိ စ ဣဒံ သာရိပုတ္တတ္ထေရဝစနံ တေန နိက္ခိတ္တတ္တာ။ တထာဂတေန ဟိ တာဝတိံသဘပနေ ဒေသိတကာလေ ဣမာနိ ပဒါနိ န သန္တိ၊ ဧဝံ သန္တေ ကသ္မာ ‘‘ဗုဒ္ဓဝစန’’န္တိ ဝဒထာတိ? ဗုဒ္ဓဝစနံယေဝ နာမ။ အာယသ္မတော ဟိ သာရိပုတ္တဿ တထာဂတေန နယော ဒိန္နော၊ တေနပိ ပဘိန္နပဋိသမ္ဘိဒေန သတ္ထုကပ္ပေန အဂ္ဂသာဝကေန သတ္ထု သန္တိကာ နယံ လဘိတွာ ဗျဉ္ဇနံ သုရောပိတံ ကတံ။ သဗ္ဗေပိ ဟိ ပဋိသမ္ဘိဒပ္ပတ္တာ အရိယာ ဒုန္နိရုတ္တိံ န ဝဒန္တိ နိရုတ္တိပဘေဒသ္မိံ သုကုသလတ္တာ၊ တသ္မာ အညေသမဝိသယော ဧသ အရိယာနံ ဝေါဟာရောတိ ဒဋ္ဌဗ္ဗံ။

ဣဒါနိ ¶ သတာဒီနံ နာမိကပဒမာလာ ဝုစ္စတေ –

သတံ၊ သတာနိ၊ သတာ။ သတံ၊ သတာနိ၊ သတေ။ သတေန၊ သတေဟိ၊ သတေဘိ။ သတဿ၊ သတာနံ။ သတာ၊ သတသ္မာ၊ သတမှာ၊ သတေဟိ၊ သတေဘိ။ သတဿ၊ သတာနံ။ သတေ၊ သတသ္မိံ၊ သတမှိ၊ သတေသု။ ဧဝံ သဟဿံ၊ သဟဿာနီတိ ယောဇေတဗ္ဗံ။ ဒသသဟဿံ သတသဟဿံ ဒသသတသဟဿန္တိ ဧတ္ထာပိ ဧသေဝ နယော။ အယံ ပနေတ္ထ ပယောဂေါ ‘‘သတံ ဘိက္ခူ၊ သတံ ဣတ္ထိယော၊ သတံ စိတ္တာနိ။ ဘိက္ခူနံ သတံ၊ ဣတ္ထီနံ သတံ၊ စိတ္တာနံ သတံ။ သဟဿာဒီသုပိ ဧသေဝ နယော။ ဣတ္ထဉ္စ အညထာပိ သဒ္ဒရူပါနိ ဘဝန္တိ။ ကောဋိ၊ ကောဋီ၊ ကောဋိယော။ ရတ္တိနယေန ဉေယျံ။

ဧကပ္ပဘုတိတော ယာဝ၊ ဒသကာ ယာ ပဝတ္တတိ၊

သင်္ချာ တာဝ သာ သင်္ချေယျ-ပ္ပဓာနာတိ ဂရူ ဝဒုံ။

ဝီသတိတော ယာဝ သတာ၊ ယာ သင်္ချာ တာဝ သာ ပန၊

သင်္ချာပ္ပဓာနာ သင်္ချေယျ-ပ္ပဓာနာတိ စ ဝဏ္ဏယုံ။

အပိစ –

ဝီသတော ယာဝ ကောဋိယာ၊ သင်္ချာ တာဝ ဟိ သာ ခလု၊

သင်္ချာပ္ပဓာနာ သင်္ချေယျ-ပ္ပဓာနာ စာတိ နိဒ္ဒိသေ။

တထာ ဟိ ‘‘အသီတိ ကောဋိယော ဟိတွာ၊ ဟိရညဿာပိ ပဗ္ဗဇိ’’န္တိ၊ ‘‘ခီဏာသဝါ ဝီတမလာ၊ သမိံသု သတကောဋိယော’’တိ စ ပါဠိ ဒိဿတိ။

ဣမသ္မိံ ပန ဌာနေ သဗ္ဗေသံ သင်္ချာသဒ္ဒရူပါနံ ပါကဋီကရဏေန ဝိညူနံ သုခုမဉာဏပဋိလာဘတ္ထံ သာဋ္ဌကထံ ဥဒါနပါဠိပ္ပဒေသံ အညဉ္စ ပါဠိပ္ပဒေသမဋ္ဌကထာဝစနဉ္စ အာဟရိတွာ ဒဿယိဿာမိ –

‘‘ယေသံ ¶ ခေါ ဝိသာခေ သတံ ပိယာနိ၊ သတံ တေသံ ဒုက္ခာနိ၊ ယေသံ နဝုတိ ပိယာနိ၊ နဝုတိ တေသံ ဒုက္ခာနိ။ ယေသံ အသီတိ…ပေ… ယေသံ သတ္တတိ။ ယေသံ သဋ္ဌိ။ ယေသံ ပညာသံ၊ ယေသံ စတ္တာရီသံ၊ ယေသံ တိံသံ။ ယေသံ ခေါ ဝိသာခေ ဝီသံ ပိယာနိ၊ ဝီသတိ တေသံ ဒုက္ခာနိ။ ယေသံ ဒသ။ ယေသံ နဝ။ ယေသံ အဋ္ဌ။ ယေသံ သတ္တ။ ယေသံ ဆ။ ယေသံ ပဉ္စ။ ယေသံ စတ္တာရိ။ ယေသံ တီဏိ။ ယေသံ ဒွေ။ ယေသံ ဧကံ ပိယံ၊ တေသံ ဧကံ ဒုက္ခ’’န္တိ။

တတ္ထ သတံ ပိယာနီတိ သတံ ပိယာယိတဗ္ဗဝတ္ထူနိ။ ‘‘သတံ ပိယ’’န္တိပိ ကေစိ ပဌန္တိ။ ဧတ္ထ စ ယသ္မာ ဧကတော ပဋ္ဌာယ ယာဝ ဒသ၊ တာဝ သင်္ချာသင်္ချေယျပ္ပဓာနာ၊ တသ္မာ ‘‘ယေသံ ဒသ ပိယာနိ၊ ဒသ တေသံ ဒုက္ခာနီ’’တိအာဒိနာ ပါဠိ အာဂတာ။ ကေစိ ပန ‘‘ယေသံ ဒသ ပိယာနံ၊ ဒသ တေသံ ဒုက္ခာန’’န္တိအာဒိနာ ပဌန္တိ၊ တံ န သုန္ဒရံ။ ယသ္မာ ပန ဝီသတိတော ပဋ္ဌာယ ယာဝ သတံ၊ တာဝ သင်္ချေယျပ္ပဓာနာ သင်္ချာပ္ပဓာနာ စ၊ တသ္မာ တတ္ထာပိ သင်္ချေယျပ္ပဓာနံယေဝ ဂဟေတွာ ‘‘ယေသံ ခေါ ဝိသာခေ သတံ ပိယာနိ၊ သတံ တေသံ ဒုက္ခာနီ’’တိအာဒိနာ ပါဠိ အာဂတာ။ သဗ္ဗေသမ္ပိ စ ယေသံ ဧကံ ပိယံ၊ ဧကံ တေသံ ဒုက္ခန္တိ ပါဌော၊ န ပန ဒုက္ခဿာတိ။ ဧကသ္မိဉှိ ပဒက္ကမေ ဧကရသာဝ ဘဂဝတော ဒေသနာ ဟောတီတိ။ တသ္မာ ယထာဝုတ္တနယာဝ ပါဠိ ဝေဒိတဗ္ဗာ။ အယံ တာဝ သာဋ္ဌကထော ဥဒါနပါဠိပ္ပဒေသော။

ဣဒါနိ အညော ပါဠိပ္ပဒေသော အဋ္ဌကထာပါဌပ္ပဒေသော စ နီယတေ –

‘‘သတံ ¶ ဟတ္ထီ သတံ အဿာ၊ သတံ အဿတရီရထာ၊

သတံ ကညာ သဟဿာနိ၊ အာမုက္ကမဏိကုဏ္ဍလာ၊

ဧကဿ ပဒဝီတိဟာရဿ၊ ကလံ နာဂ္ဃန္တိ သောဠသိ’’န္တိ

ပါဠိ။ ဧတ္ထ ‘‘သတံ ဟတ္ထီ’’တိအာဒီနိ ဝိသေသိတာနိ၊ ‘‘သဟဿာနီ’’တိ ဝိသေသနံ၊ တသ္မာ သတံသဒ္ဒံ သဟဿသဒ္ဒေန ယောဇေတွာ ‘‘ဟတ္ထီ’’တိအာဒီနိ ပန ဥပပဒံ ကတွာ အတ္ထော ဂဟေတဗ္ဗော။ ဟတ္ထီ သတံ သဟဿာနိ။ အဿာ သတံ သဟဿာနိ။ အဿတရီရထာ သတံ သဟဿာနိ။ အာမုက္ကမဏိကုဏ္ဍလာ ကညာ သတံ သဟဿာနိ။ ဣဒံ သင်္ချေယျပ္ပဓာနဝသေနတ္ထဂဟဏံ။ သင်္ချာပ္ပဓာနဝသေန ပန အယမ္ပိ အတ္ထော ဂဟေတဗ္ဗော ‘‘ဟတ္ထီနံ သတသဟဿံ၊ အဿာနံ သတသဟဿံ၊ အဿတရီရထာနံ သတသဟဿံ၊ အာမုက္ကမဏိကုဏ္ဍလာနံ ကညာနံ သတသဟဿ’’န္တိ။ အယံ နယော အညေသုပိ ဤဒိသေသု ဌာနေသု နေတဗ္ဗော။ ‘‘ယောဇနာနံ သတာနုစ္စော၊ ဟိမဝါ ပဉ္စ ပဗ္ဗတော’’တိ အယမဋ္ဌကထာပါဌော။ ဧတ္ထ ‘‘ပဉ္စာ’’တိ သဒ္ဒံ သတသဒ္ဒေန သဒ္ဓိံ ယောဇေတွာ ‘‘သိပ္ပိကာနံ သတံ နတ္ထီ’’တိ ဧတ္ထ ဝိယ ဟိမဝါ ပဗ္ဗတော ယောဇနာနံ ပဉ္စ သတာနိ ဥစ္စောတိ သင်္ချာပ္ပဓာနဝသေန အတ္ထော ဂဟေတဗ္ဗော။ ‘‘ပဉ္စ သတာနီ’’တိ စ အဒ္ဓုနော အစ္စန္တသံယောဂဝသေန ဥပယောဂဝစနံ။ အယံ နယော အညေသုပိ ဤဒိသေသု ဌာနေသု နေတဗ္ဗော။ သတမိတိ သဒ္ဒေါ ‘‘သတံ ဟောမိ၊ သဟဿံ ဟောမီ’’တိအာဒီသု ဧကဝစနော။ ‘‘အထေတ္ထေကသတံ ခတျာ၊ အနုယန္တာ ယသဿိနော’’တိအာဒီသု ဗဟုဝစနော။ ဧဝံ သဟဿာဒီနမ္ပိ ဧကဝစနဗဟုဝစနတာ လဗ္ဘတိ။ တထာ ဟိ ‘‘ဘိယျော နံ သတသဟဿံ၊ ယက္ခာနံ ပယိရုပါသတီ’’တိ ဧတ္ထ ‘‘သတသဟဿ’’န္တိ ဧကဝစနံ။ ‘‘ပရောသဟဿံ ခေါ ပနဿ ပုတ္တာ ဘဝိဿန္တီ’’တိ ဧတ္ထ သဟဿန္တိ ဗဟုဝစနန္တိ ဒဋ္ဌဗ္ဗံ။

‘‘ကပ္ပေ ¶ စ သတသဟဿေ၊ စတုရော စ အသင်္ခိယေ၊

အမရံ နာမ နဂရံ၊ ဒဿနေယျံ မနောရမ’’န္တိ

ပါဠိ။ ဧတ္ထ ‘‘ကပ္ပေ စ သတသဟဿေ စတုရော စ အသင်္ခိယေတိ သာမိအတ္ထေ ဥပယောဂဗဟုဝစနံ၊ တသ္မာ ‘‘မဟာကပ္ပာနံ သတသဟဿာနံ စတုန္နံ အသင်္ခိယာနံ မတ္ထကေ’’တိ အတ္ထော ဂဟေတဗ္ဗော၊ ‘‘မတ္ထကေ’’တိ စေတ္ထ ဝစနသေသော။ ‘‘ကပ္ပသတသဟဿာဓိကာနံ စတုန္နံ အသင်္ခိယာနံ မတ္ထကေ’’ဣစ္စေဝတ္ထော။ အယံ နယော အညေသုပိ ဤဒိသေသု ဌာနေသု နေတဗ္ဗော။

‘‘ကပ္ပေ စ သတသဟဿေ၊ စတုရော စ အသင်္ခိယေ၊

ဧတ္ထန္တရေ ယံ စရိတံ၊ သဗ္ဗံ တံ ဗောဓိပါစန’’န္တိ

ပါဠိ။ ဧတ္ထ ‘‘ကပ္ပေ’’တိ အစ္စန္တသံယောဂဝသေန ဥပယောဂဗဟုဝစနံ။ ‘‘သတသဟဿေ ကပ္ပေ’’တိ ကပ္ပသဒ္ဒသမ္ဗန္ဓေန စာယံ ပုလ္လိင်္ဂနိဒ္ဒေသော ဥပယောဂနိဒ္ဒေသော စ။ သမာနာဓိကရဏဉှိ ဣဒံ ကပ္ပသဒ္ဒေန။ ‘‘စတုရော စ အသင်္ခိယေ’’တိ အစ္ဆန္တသံယောဂဝသေန ဥပယောဂဗဟုဝစနာနိ။ ကဿ ပန အသင်္ခိယေတိ? အညဿ အဝုတ္တတ္တာ ကပ္ပဿ စ ဝုတ္တတ္တာ ပကရဏတော ‘‘ကပ္ပာန’’န္တိ အယမတ္ထော ဝိညာယတေဝ။ န ဟိ ဝုတ္တံ ဝဇ္ဇေတွာ အဝုတ္တဿ ကဿစိ ဂဟဏံ ယုတ္တန္တိ။ စသဒ္ဒေါ သမ္ပိဏ္ဍနတ္ထော ‘‘မဟာကပ္ပာနံ စတုရော အသင်္ချေယျေ သတသဟဿေ စ မဟာကပ္ပေ’’တိ။ အယံ နယော အညေသုပိ ဤဒိသေသု ဌာနေသု နေတဗ္ဗော။

‘‘ဃဋာနေကသဟဿာနိ၊ ကုမ္ဘီနဉ္စ သတာ ဗဟူ’’တိ ပါဠိ။ ဧတ္ထ ဃဋာတိ ဃဋာနံ။ သာမိအတ္ထေ ဟိ ဣဒံ ပစ္စတ္တဝစနံ။ ‘‘ဃဋာနံ အနေကသဟဿာနိ’’ ဣစ္စေဝတ္ထော။ ကုမ္ဘီနဉ္စ သတာ ဗဟူတိ အနေကာနိ စ ကုမ္ဘီနံ သတာနိ။ ဧတ္ထ နိကာရလောပေါ ဒဋ္ဌဗ္ဗော။ အယံ နယော အညေသုပိ ဤဒိသေသု ဌာနေသု နေတဗ္ဗော။

‘‘ဒသဝီသသဟဿာနံ ¶ ၊ ဓမ္မာဘိသမယော အဟု၊

ဧကဒွိန္နံ အဘိသမယော၊ ဂဏနာတော အသင်္ခိယော’’တိ

ပါဠိ။ ဧတ္ထ ဒသဝီသသဟဿာနန္တိ ဒသသဟဿာနံ ဝီသသဟဿာနဉ္စ။ ဓမ္မာဘိသမယောတိ စတုသစ္စပ္ပဋိဝေဓော။ ဧကဒွိန္နန္တိ သီသမတ္တကထနံ၊ တေန ‘‘ဧကဿ စေဝ ဒွိန္နဉ္စ တိဏ္ဏံ စတုန္နံ…ပေ… ဒသန္န’’န္တိအာဒိနာ နယေန အသင်္ချေယျောတိ အတ္ထော။ အယံ နယော အညေသုပိ ဤဒိသေသု ဌာနေသု နေတဗ္ဗော။

‘‘စတ္တာရိ သတသဟဿာနိ၊ ဆဠဘိညာ မဟိဒ္ဓိကာ၊

ဒီပင်္ကရံ လောကဝိဒုံ၊ ပရိဝါရေန္တိ သဗ္ဗဒါ’’တိ

ပါဠိ။ ဧတ္ထ စတ္တာရိ သတသဟဿာနီတိ ဣဒံ လိင်္ဂဘေဒဝသေန ‘‘ဆဠဘိညာ မဟိဒ္ဓိကာ’’တိ ဣမေဟိ ဒွီဟိ ပဒေဟိ သမာနာဓိကရဏံ။ ဤဒိသေသု ဟိ ဌာနေသု အသင်္ချေယျ ဝါစကောပိ သဒ္ဒေါ နပုံသကောဝ ဟောတိ၊ တသ္မာ ‘‘စတ္တာရိ သတသဟဿာနီ’’တိ စ ‘‘ဆဠဘိညာ’’တိ စ ‘‘မဟိဒ္ဓိကာ’’တိ စ ဧတံ ပဒတ္တယံ သမာနာဓိကရဏံ။ အထ ဝါ ဆဠဘိညာ မဟိဒ္ဓိကာတိ ဆဠဘိညာနံ မဟဒ္ဓိကာနန္တိ သာမိအတ္ထေ ပစ္စတ္တဝစနံ ဒဋ္ဌဗ္ဗံ။ ဣမသ္မိံ ပနတ္ထေ ‘‘စတ္တာရိ သတသဟဿာနီ’’တိ အယံ သင်္ချာဝစနော ဘဝတိ။ ‘‘တီဏိ သတသဟဿာနိ၊ နာရိယော သမလင်္ကတာ’’တိအာဒီသုပိ အယံ နယော နေတဗ္ဗော။ ‘‘တာ စ သတ္တ သတာ ဘရိယာ၊ ဒါသျော သတ္တ သတာနိ စာ’’တိ ပါဠိ။ ဧတ္ထ သတာတိ ‘‘သတာနီ’’တိ နပုံသကဝသေန ဂဟေတဗ္ဗံ၊ န ဣတ္ထိလိင်္ဂဝသေန။ ‘‘သတာ’’တိ ဟိ ‘‘ပဉ္စ စိတ္တာ ဝိပါကာ’’တိအာဒီနိ ဝိယ နပုံသကရူပံ။ ဣတ္ထိလိင်္ဂဘူတာ ဟိ သတသဒ္ဒေါ နတ္ထိ၊ တထာ ပုလ္လိင်္ဂဘူတော။ ယဒိ စ ဒွိလိင်္ဂေါ သတသဒ္ဒေါ သိယာ ¶ ၊ ဧဝဉ္စ သတိ ‘‘ပုရိသော၊ ကညာ’’တိ စ ဩကာရန္တပုလ္လိင်္ဂအာကာရန္တိတ္ထိရူပေဟိပိဘဝိတဗ္ဗံ။ ရူပဒွယမ္ပိ သတသဒ္ဒဿ နတ္ထိ၊ တေန ဉာယတိ ‘‘သတသဒ္ဒေါ ဧကန္တနပုံသကော’’တိ။

နနု စ ဘော ‘‘တာ ဒေဝတာ သတ္တသတာ ဥဠာရာ’’တိ ဧတ္ထ သတသဒ္ဒေါ ဣတ္ထိလိင်္ဂေါ ဟုတွာ ဒိဿတီတိ? န၊ နပုံသကောယေဝါတိ။ နနု စ ဘော ဒေဝတာသဒ္ဒေန သမာနာဓိကရဏောတိ? သစ္စံ သမာနာဓိကရဏော၊ တထာပိ နပုံသကောယေဝ။ ဤဒိသေသု ဟိ သင်္ချာဝိသယေသု သမာနာဓိကရဏဘာဝေါ အပ္ပမာဏော။ တထာ ဟိ ‘‘ပဉ္စ ပစ္စေကဗုဒ္ဓသတာနိ ဣမသ္မိံ ဣသိဂိလိသ္မိံ ပဗ္ဗတေ စိရဝါသိနော အဟေသု’’န္တိ နပုံသကလိင်္ဂေန ပုလ္လိင်္ဂဿ သမာနာဓိကရဏတာ ဒိဿတိ၊ တသ္မာ ‘‘တာ ဒေဝတာ သတ္တသတာ ဥဠာရာ’’တိ ဧတ္ထာပိ ‘‘သတ္တသတာနီ’’တိ နပုံသကဘာဝေါယေဝါတိ အဝဂန္တဗ္ဗော။ ‘‘သတ္တ ဟတ္ထိသတေ ဒတွာ’’တိအာဒီသုပိ သတသဒ္ဒေါ နပုံသကောယေဝ။ အယံ နယော အညေသုပိ ဤဒိသေသု ဌာနေသု နေတဗ္ဗော။

‘‘နဝုတိကောဋိသဟဿေဟိ၊ ပရိဝါရေသိ မဟာမုနီ’’တိ ပါဠိ။ ဧတ္ထ ‘‘နဝုတိကောဋိသဟဿေဟိ ဘိက္ခူဟီ’’တိ ဝါ ‘‘ဘိက္ခူနံ နဝုတိကောဋိသဟဿေဟီ’’တိ ဝါ သင်္ချေယျသင်္ချာပဓာနဝသေန အတ္ထော ဂဟေတဗ္ဗော။ အယံ နယော အညေသုပိ ဤဒိသေသု ဌာနေသု နေတဗ္ဗော။

‘‘သတသဟဿဝဿာနိ၊ အာယု တဿ မဟေသိနော’’တိ ပါဠိ။ ဧတ္ထ ‘‘သတသဟဿဝဿာနီ’’တိ ကာလဿ အစ္စန္တသံယောဂဝသေန ဥပယောဂဝစနံ။ တထာ ‘‘ဒသဝဿသဟဿာနိ၊ အဂါရ’မဇ္ဈ သော ဝသီ’’တိ ပါဠိယမ္ပိ။ အယံ နယော အညေသုပိ ဤဒိသေသု ဌာနေသု နေတဗ္ဗော။

‘‘ဣတော ¶ သတသဟဿမှိ၊ ကပ္ပေ ဥပ္ပဇ္ဇိ နာယကော’’တိ ပါဠိ၊ ‘‘ဧကနဝုတေ ဣတော ကပ္ပေ’’တိ ပါဠိ စ။ ဧတ္ထ သတသဟဿမှိ ကပ္ပေတိ သတသဟဿာနံ ကပ္ပာနံ မတ္ထကေ။ ဧကနဝုတေ ကပ္ပေတိ ဧကနဝုတိယာ ကပ္ပာနံ မတ္ထကေတိ ဘုမ္မဝစနဿ သာမိဘုမ္မဝစနဝသေန အတ္ထော ဂဟေတဗ္ဗော။ တထာ ဟိ ‘‘ဘဂဝတိ ဗြဟ္မစရိယံ ဝုဿတီ’’တိ ဧတ္ထ ဘုမ္မဝစနဿ ‘‘ဘဂဝတော သန္တိကေ’’တိ သာမိဘုမ္မဝစနဝသေန အတ္ထော ဂဟိတော။ အယံ နယော အညေသုပိ ဤဒိသေသု ဌာနေသု နေတဗ္ဗော။

‘‘ယဒိ တတ္ထ သဟဿာနိ၊ သတာနိ နဟုတာနိ စ၊

နေဝမှာကံ ဘယံ ကောစိ၊ ဝနေ ဝါဠေသု ဝိဇ္ဇတီ’’တိ

ပါဠိ။ အယမေတဿာ အတ္ထော – တတ္ထ ဝနေ ဝါဠာနံ သဟဿာနိ စ သတာနိ စ နဟုတာနိ စ ယဒိ ဝိဇ္ဇန္တိ။ အထ ဝါ သဟဿာနိ သတာနီတိ သတသဟဿာနိ၊ ဝါဠာနံ သတသဟဿာနိ စ နဟုတာနိ စ ယဒိ ဝိဇ္ဇန္တိ၊ ဧဝံ ဝိဇ္ဇန္တေသုပိ ဝါဠေသု ကောစီတိ ကွစိ။ ကောစိသဒ္ဒေါ ဟိ ‘‘ကော တေ ဗလံ မဟာရာဇာ’’တိ ဧတ္ထ ကောသဒ္ဒေါ ဝိယ ကွသဒ္ဒတ္ထေ ဝတ္တတိ၊ နိမိတ္တတ္ထေ စာယံ နိဒ္ဒေသော။ တေန ‘‘ကောစိ ကွစိ ကိသ္မိဉ္စိ ဝါဠေ ဧကဿပိ ဝါဠမိဂဿ ကာရဏာ နေဝမှာကံ ဘယံ ဝိဇ္ဇတီ’’တိ အတ္ထော ဂဟေတဗ္ဗော။ အထ ဝါ ကောစီတိ ကိဉ္စိ အပ္ပမတ္တကမ္ပိ။ ဧတ္ထ ပန ‘‘ဝါဠေသူ’’တိ နိမိတ္တတ္ထေ ဘုမ္မံ။ ဝါဠာနံ ကာရဏာ အပ္ပမတ္တကမ္ပိ အမှာကံ ဘယံ န ဝိဇ္ဇတီတိ။ အယံ နယော အညေသုပိ ဤဒိသေသု ဌာနေသု နေတဗ္ဗော။

‘‘သဗ္ဗံ သတသဟဿာနိ၊ ဆတ္တိံသပရိမဏ္ဍလံ၊

ဒသဉ္စေဝ သဟဿာနိ၊ အဍ္ဎုဍ္ဎာနိ သတာနိ စာ’’တိ

အဋ္ဌကထာပါဌော ¶ ။ ဧတ္ထ ယသ္မာ သဒ္ဒတော သမာနဝိဘတ္တိလိင်္ဂဝစနာနံ ပဒါနံ အသမာနဝိဘတ္တိလိင်္ဂဝစနာနံ ဝါ အတ္ထတော ပန သမာနာနံ ဒူရေ ဌိတာနမ္ပိ ဧကသမ္ဗန္ဓော ဟောတိ၊ ဣတရေသံ သမီပေ ဌိတာနမ္ပိ န ဟောတိ၊ တသ္မာ ‘‘သဗ္ဗ’’န္တိဒံ ‘‘ပရိမဏ္ဍလ’’န္တိမိနာ သမ္ဗန္ဓိတဗ္ဗံ။ ‘‘ဆတ္တိံသာ’’တိ ဣဒံ ပန ‘‘သတသဟဿာနီ’’တိမိနာ သမ္ဗန္ဓိတဗ္ဗံ။ အယံ နယော အညေသုပိ ဤဒိသေသု ဌာနေသု နေတဗ္ဗော။

‘‘ဒုဝေ သတသဟဿာနိ၊ စတ္တာရိ နဟုတာနိ စ၊

ဧတ္တကံ ဗဟလတ္တေန၊ သင်္ခါတာယံ ဝသုန္ဓရာ’’တိ

အဋ္ဌကထာပါဌော။ ဧတ္ထ ‘‘ဒုဝေ’’တိ ဝိသေသနံ၊ ‘‘သတသဟဿာနီ’’တိ ဝိသေသိတဗ္ဗံ။ တထာ ‘‘စတ္တာရီ’’တိ ဝိသေသနံ၊ ‘‘နဟုတာနီ’’တိ ဝိသေသိတဗ္ဗံ။ တထာ ဟိ ‘‘သတသဟဿာနိ နဟုတာနိ စာ’’တိ ဣမာနိ ‘‘ဒုဝေ စတ္တာရီ’’တိ ဣမေဟိ ဝိသေသိတဗ္ဗတ္တာ ‘‘ဒွိသတသဟဿံ စတုနဟုတ’’န္တိ အတ္ထပ္ပကာသနာနိ ဘဝန္တိ။ ဧဝံ သန္တေပိ ‘‘ဒုဝေ’’ဣစ္စာဒီနံ သင်္ချာသဒ္ဒါနံ ‘‘သတသဟဿာနီ’’တိအာဒီဟိ သင်္ချာသဒ္ဒေဟိ သမာနာဓိကရဏတာ ပုဗ္ဗာစရိယေဟိ န ဝုတ္တာ။ ယသ္မာ ပန ယထာ ‘‘ဒုဝေ ပုထုဇ္ဇနာ ဝုတ္တာ။ သတသဟဿံ ဘိက္ခူ’’တိအာဒီသု သမာနာဓိကရဏတာ လဗ္ဘတိ ဒဗ္ဗဝါစကတ္တာ ဝိသေသိတဗ္ဗပဒါနံ၊ န တထာ ‘‘ဒုဝေ သတသဟဿာနီ’’တိအာဒီသု အဒဗ္ဗဝါစကတ္တာ ဝိသေသိတဗ္ဗပဒါနံ၊ တသ္မာ ဤဒိသေသု ဌာနေသု သမာနာဓိကရဏတာ န ဣစ္ဆိတဗ္ဗာ ယုတ္တိယာ အဘာဝတော။ ယဒိ ဧဝံ ‘‘ကုသလာ၊ ရူပံ၊ စက္ခုမာ’’တိအာဒီနံ ဝိယ ဣမေသမညမညသမ္ဗန္ဓရဟိတာ သိယာတိ? န၊ ဝိသေသနဝိသေသိတဗ္ဗဘာဝေန ဂဟိတတ္တာ။ ယဇ္ဇေဝံ သမာနာဓိကရဏဘာဝေါ လဒ္ဓဗ္ဗောတိ? န၊ နိယမာဘာဝတော။ ဧကန္တေန ဟိ ¶ ဂုဏဂုဏီနံယေဝ ဝိသေသနဝိသေသိတဗ္ဗာနံ သမာနာဓိကရဏဘာဝေါ၊ န ဣတရေသံ ဝိသေသနဝိသေသိတဗ္ဗတ္တေပိ။

တတ္ထ ‘‘ဧတ္တက’’န္တိ ပမာဏဝစနံ။ ‘‘ဗဟလတ္တေနာ’’တိ ဝိသေသနေ တတိယာ။ ဥဘယေန ဣမမတ္ထံ ဒဿေတိ ‘‘အယံ ဝသုန္ဓရာ ဗဟလတ္တေန ယောဇနာနံ ဒုဝေ သတသဟဿာနိ စတ္တာရိ နဟုတာနိ စ ဧတ္တကံ သင်္ခါတာ’’တိ။ ‘‘ဧတ္တက’’န္တိ ပဒဿ စ ‘‘ဒုဝေ သတသဟဿာနိ စတ္တာရိ နဟုတာနိ စာ’’တိ ဣမေဟိ ဝါ ‘‘ဝသုန္ဓရာ’’တိ ဣမိနာ ဝါ သမာနာဓိကရဏတာ န ဣစ္ဆိတဗ္ဗာ။ ဧတ္တကန္တိ ဟိ ဘာဝနပုံသကံ၊ ယံ သဒ္ဒသတ္ထေ ကြိယာဝိသေသနန္တိ ဝဒန္တိ။ တဿ ‘‘ဧတ္တကေန ပမာဏေန’’ဣစ္စေဝတ္ထော။ အပိစ ‘‘ဒုဝေ သတသဟဿာနိ စတ္တာရိ န ဟုတာနိ စာ’’တိ ဣမေသမ္ပိ ‘‘ဝသုန္ဓရာ’’တိ ဣမိနာ သမာနာဓိကရဏတာ န ဣစ္ဆိတဗ္ဗာ ‘‘ဘိက္ခူနံ သတ’’န္တိ ဧတ္ထ သတသဒ္ဒဿ ဝိယ သင်္ချာဝစနမတ္တတ္တာ။ တထာ ဟိ ‘‘ဧတ္တက’’န္တိ ဝုတ္တံ။ ‘‘သင်္ခါတာ’’တိ ပန ‘‘အယ’’န္တိ စ ဣမေသံ ‘‘ဝသုန္ဓရာ’’တိ ဣမိနာ သမာနာဓိကရဏတာ လဗ္ဘတိ။ သဗ္ဗောပါယံ နယော အညေသုပိ ဤဒိသေသု ဌာနေသု နေတဗ္ဗော။

‘‘ဒသေတ္ထ ရာဇိယော သေတာ၊ ဒဿနီယာ မနောရမာ၊

ဆ ပိင်္ဂလာ ပန္နရသ၊ ဟလိဒ္ဒါ တာ စတုဒ္ဒသာ’’တိ

ပါဠိ။ ဧတ္ထ ဆ ပိင်္ဂလာ ပန္နရသာတိ ဆ စ ပန္နရသ စာတိ ဧကဝီသတိ ပိင်္ဂလာ ရာဇိယောတိ အတ္ထော ဂဟေတဗ္ဗော။

တထာ –

‘‘ပုတ္တာပိ တဿ ဗဟဝေါ၊ ‘ဧကနာမာ’တိ မေ သုတံ၊

အသီတိ ဒသ ဧကော စ၊ ဣန္ဒနာမာ မဟဗ္ဗလာ’’တိ

ပါဠိ ¶ ။ ဧတ္ထ ပန ‘‘ဧကနဝုတီ’’တိ ဝတ္တဗ္ဗေ ‘‘အသီတိ ဒသ ဧကော စာ’’တိ ဝုတ္တံ။ ဝိစိတြသဒ္ဒရစနဉှိ ပါဝစနံ။ အယံ နယော အညေသုပိ ဤဒိသေသု ဌာနေသု နေတဗ္ဗော။

‘‘တိံသပုရိသနာဝုတျော၊ သဗ္ဗေဝေကေကနိစ္စိတာ၊

ယေသံ သမံ န ပဿာမိ၊ ကေဝလံ မဟိ’မံ စရ’’န္တိ

ပါဠိ။ ဧတ္ထ ‘‘ပုရိသာနံ တိံသသဟဿာနိ နဝုတိ စ သတာနိ တိံသ နာဝုတျော’’တိ ဝုစ္စန္တိ။ ဣမသ္မိံ ပန ဌာနေ တိံသသဒ္ဒတော သဟဿသဒ္ဒဿ နဝုတိသဒ္ဒတော စ သတသဒ္ဒဿ လောပံ ကတွာ ‘‘တိံသ နာဝုတျော’’တိ ဝုတ္တန္တိ န ဂဟေတဗ္ဗံ။ ဧဝဉှိ ဂဟဏေ သတိ ယတ္ထ ကတ္ထစိပိ ဧဒိသီ သဒ္ဒရစနာ ကာတဗ္ဗာ သိယာ၊ ကတာယ စ ဧဒိသာယ သဒ္ဒရစနာယ အတ္ထာဝဂမော ဝိနာ ဥပဒေသေန သုဏန္တာနံ န သိယာ၊ တသ္မာ နေဝံ ဂဟေတဗ္ဗံ။ ဧဝံ ပန ဂဟေတဗ္ဗံ – ‘‘တိံသ နာဝုတျော’’တိ ဣဒံ လောကသင်္ကေတရူဠှံ ဝစနံ၊ သင်္ကေတရူဠှဿ ပန ဝစနဿတ္ထော ယသ္မာ ဂဟိတပုဗ္ဗသင်္ကေတေဟိ သုတွာ ဉာယတေ၊ န ဥပဒေသတော၊ တသ္မာ ဗြဟ္မဒတ္တေန ရညာ ဝုတ္တကာလေပိ သတ္ထာရာ တံ ကထံ အာဟရိတွာ ဝုတ္တကာလေပိ သဗ္ဗေ မနုဿာ ဝိနာပိ ဥပဒေသေန ဝစနတ္ထံ ဇာနန္တီတိ ဂဟေတဗ္ဗံ။

တိံသဉ္စေဝ သဟဿာနိ၊ နဝုတိ စ သတာနိ တု၊

တိံသ နာဝုတိယော နာမ၊ ဝုတ္တာ ဥမင်္ဂဇာတကေ။

ယသ္မာ ပါဝစနေ သန္တိ၊ နယာ စေဝ အစိန္တိယာ၊

ဝေါဟာရာ စ သုဂုဠှတ္ထာ၊ ဒယာပန္နေန ဒေသိတာ။

တသ္မာ သာဋ္ဌကထေ ဓီရော၊ ဂမ္ဘီရေ ဇိနဘာသိတေ၊

ဥပဒေသံ သဒါ ဂဏှေ၊ ဂရုံ သမ္မာ ဥပဋ္ဌဟံ။

ဂရူပဒေသဟီနော ဟိ၊ အတ္ထသာရံ န ဝိန္ဒတိ၊

အတ္ထသာရဝိဟီနော သော၊ သဒ္ဓမ္မာ ပရိဟာယတိ။

ဂရူပဒေသလာဘီ ¶ စ၊ အတ္ထသာရသမာယုတော၊

သဒ္ဓမ္မံ ပရိပါလေန္တော၊ သဒ္ဓမ္မသ္မာ န ဟာယတိ။

သဒ္ဓမ္မတ္ထာယ မေ တသ္မာ၊ သင်္ချာမာလာပိ ဘာသိတာ၊

သပ္ပယောဂါ ယထာယောဂံ၊ သဟေဝတ္ထဝိနိစ္ဆယာ။

ဣတိ နဝင်္ဂေ သာဋ္ဌကထေ ပိဋကတ္တယေ ဗျပ္ပထဂတီသု ဝိညူနံ

ကောသလ္လတ္ထာယ ကတေ သဒ္ဒနီတိပ္ပကရဏေ

သဝိနိစ္ဆယော သင်္ချာနာမာနံ နာမိကပဒမာလာဝိဘာဂေါ

နာမ

တေရသမော ပရိစ္ဆေဒေါ။