📜

၁၄။ အတ္ထတ္တိကဝိဘာဂ

ဘူဓာတု တာယ နိပ္ဖန္န-ရူပဉ္စာတိ ဣဒံ ဒွယံ၊

ကတွာ ပဓာနမမှေဟိ၊ သဗ္ဗမေတံ ပပဉ္စိတံ။

ဘဝတိဿ ဝသာ ဒါနိ၊ ဝက္ခာမတ္ထတ္တိကံ ဝရံ၊

အတ္ထုဒ္ဓါရော တုမန္တဉ္စ၊ တွာဒိယန္တံ တိကံ ဣဓ။

တသ္မာ တာဝ ဘူဓာတုတော ပဝတ္တဿ ဘူတသဒ္ဒဿ အတ္ထုဒ္ဓါရော နီယတေ –

ခန္ဓသတ္တာမနုဿေသု၊ ဝိဇ္ဇမာနေ စ ဓာတုယံ၊

ခီဏာသဝေ ရုက္ခာဒိမှိ၊ ဘူတသဒ္ဒေါ ပဝတ္တတိ။

ဥပ္ပာဒေ စာပိ ဝိညေယျော၊ ဘူတသဒ္ဒေါ ဝိဘာဝိနာ၊

ဝိပုလေ သောပသဂ္ဂေါယံ၊ ဟီဠနေ ဝိဓမေပိ စ၊

ပရာဇယေ ဝေဒိယနေ၊ နာမေ ပါကဋတာယ စ။

ဝုတ္တဉှေတံ – ဘူတသဒ္ဒေါ ပဉ္စက္ခန္ဓာမနုဿဓာတုဝိဇ္ဇမာနခီဏာသဝသတ္တရုက္ခာဒီသု ဒိဿတိ။ ‘‘ဘူတမိဒန္တိ ဘိက္ခဝေ သမနုပဿထာ’’တိအာဒီသု ဟိ အယံ ပဉ္စက္ခန္ဓေသု ဒိဿတိ။ ‘‘ယာနီဓ ဘူတာနိ သမာဂတာနီ’’တိ ဧတ္ထ အမနုဿေ။ ‘‘စတ္တာရော ခေါ ဘိက္ခု မဟာဘူတာ ဟေတူ’’တိ ဧတ္ထ ဓာတူသု။ ‘‘ဘူတသ္မိံ ပါစိတ္တိယ’’န္တိအာဒီသု ဝိဇ္ဇမာနေ။ ‘‘ယော စ ကာလဃသော ဘူတော’’တိ ဧတ္ထ ခီဏာသဝေ။ ‘‘သဗ္ဗေဝ နိက္ခိပိဿန္တိ၊ ဘူတာ လောကေ သမုဿယ’’န္တိ ဧတ္ထ သတ္တေ။ ‘‘ဘူတဂါမပါတဗျတာယာ’’တိ ဧတ္ထ ရုက္ခာဒီသူတိ။ မူလပရိယာယသုတ္တဋ္ဌကထာယ ဝစနံ ဣဒံ။ ဋီကာယမာဒိသဒ္ဒေန ဥပ္ပာဒါဒီနိ ဂယှရေ။ ဝုတ္တဉှေတံ – ‘‘ဇာတံ ဘူတံ သင်္ခတ’’န္တိအာဒီသု ဘူတသဒ္ဒေါ ဥပ္ပာဒေ ဒိဿတိ။ သဥပသဂ္ဂေါ ပန ‘‘ပဘူတမရိယော ပကရောတိ ပုည’’န္တိအာဒီသု ဝိပုလေ။ ‘‘ယေဘုယျေန ဘိက္ခူနံ ပရိဘူတရူပေါ’’တိအာဒီသု ဟီဠနေ။ ‘‘သမ္ဘူတော သာဏဝါသီ’’တိအာဒီသု ပညတ္တိယံ။ ‘‘အဘိဘူတော မာရော ဝိဇိတော သင်္ဂါမော’’တိအာဒီသု ဝိဓမနေ။ ‘‘ပရာဘူတရူပေါခေါ အယံ အစေလော ပါထိကပုတ္တော’’တိအာဒီသု ပရာဇယေ။ ‘‘အနုဘူတံ သုခဒုက္ခ’’န္တိအာဒီသု ဝေဒိယနေ။ ‘‘ဝိဘူတံ ပညာယာ’’တိအာဒီသု ပါကဋီကရဏေ ဒိဿတိ၊ တေ သဗ္ဗေ ‘‘ရုက္ခာဒီသူ’’တိအာဒိသဒ္ဒေန သင်္ဂဟိတာတိ ဒဋ္ဌဗ္ဗာတိ။

ဣဒါနိ တုမန္တပဒါနိ ဝုစ္စန္တေ –

ဘဝိတုံ၊ ဥဗ္ဘဝိတုံ၊ သမုဗ္ဘဝိတုံ၊ ပဘဝိတုံ၊ ပရာဘဝိတုံ၊ အတိဘဝိတုံ၊ သမ္ဘဝိတုံ၊ ဝိဘဝိတုံ၊ ဘောတုံ၊ သမ္ဘောတုံ၊ ဝိဘောတုံ၊ ပါတုဘဝိတုံ၊ ပါတုဗ္ဘဝိတုံ ဝါ၊ ပါတုဘောတုံ။ ဣမာနိ အကမ္မကာနိ တုမန္တပဒါနိ။

ပရိဘောတုံ ပရိဘဝိတုံ၊ အဘိဘောတုံ အဘိဘဝိတုံ၊ အဓိဘောတုံ အဓိဘဝိတုံ၊ အတိဘောတုံ အတိဘဝိတုံ၊ အနုဘောတုံ အနုဘဝိတုံ၊ သမနုဘောတုံ သမနုဘဝိတုံ၊ အဘိသမ္ဘောတုံ အဘိသမ္ဘဝိတုံ။ ဣမာနိ သကမ္မကာနိ တုမန္တပဒါနိ၊ သဗ္ဗာနေတာနိ သုဒ္ဓကတ္တရိ ဘဝန္တိ။

‘‘ဘာဝေတုံ၊ ပဘာဝေတုံ၊ သမ္ဘာဝေတုံ၊ ဝိဘာဝေတုံ၊ ပရိဘာဝေတုံ’’ဣစ္စေဝမာဒီနိ ဟေတုကတ္တရိ တုမန္တပဒါနိ၊ သဗ္ဗာနိပိ ဟေတုကတ္တရိ တုမန္တပဒါနိ သကမ္မကာနိယေဝ ဘဝန္တိ။ ဥဒ္ဒေသောယံ။

တတြ သမာနတ္ထပဒေသု ဧကမေဝါဒိပဒံ ဂဟေတွာ နိဒ္ဒေသော ကာတဗ္ဗော – ဘဝိတုန္တိ ဟောတုံ ဝိဇ္ဇိတုံ ပညာယိတုံ သရူပံ လဘိတုံ။ ဧတ္ထ ဝုတ္တနယာနုသာရေန သေသာနမ္ပိ တုမန္တာနံ နိဒ္ဒေသော ဝိတ္ထာရေတဗ္ဗော၊ သဗ္ဗာနိ တုမန္တပဒါနိ စတုတ္ထိယတ္ထေ ဝတ္တန္တိ ‘‘တွံ မမ စိတ္တမညာယ၊ နေတ္တံ ယာစိတုမာဂတော’’တိ ဧတ္ထ ဝိယ။ ယာစိတုန္တိ ဟိ ယာစနတ္ထာယာတိ အတ္ထော။ တသ္မာ ဘဝိတုန္တိအာဒီနမ္ပိ ‘‘ဘဝနတ္ထာယာ’’တိ ဝါ ‘‘ဘဝနတ္ထ’’န္တိ ဝါ ‘‘ဘဝနာယာ’’တိ ဝါ အာဒိနာ အတ္ထော ဂဟေတဗ္ဗော။ အပိစ ‘‘နေက္ခမ္မံ ဒဋ္ဌု ခေမတော’’တိ ဧတ္ထ ‘‘ဒဋ္ဌု’’န္တိ ပဒဿ ‘‘ဒိသွာ’’တိ အတ္ထဒဿနတော ယထာရဟံ တုမန္တာနိ တွာသဒ္ဒန္တပဒတ္ထဝသေနပိ ဂဟေတဗ္ဗာနိ။ ဧတာနိ စ နိပါတပဒေသု သင်္ဂဟံဂစ္ဆန္တိ။ ဝုတ္တဉှိ နိရုတ္တိပိဋကေ နိပါတပဒပရိစ္ဆေဒေ ‘‘တုံ ဣတိ စတုတ္ထိယာ’’တိ။ တတြာယမတ္ထော ‘‘တုံ ဣတိ ဧတဒန္တော နိပါတော စတုတ္ထိယာ အတ္ထေ ဝတ္တတီ’’တိ။

တုမန္တကထာ သမတ္တာ။

ဣဒါနိ တွာဒိယန္တပဒါနိ ဝုစ္စန္တေ –

ဘဝိတွာ၊ ဘဝိတွာန၊ ဘဝိတုန၊ ဘဝိယ၊ ဘဝိယာန။ ဥဗ္ဘဝိတွာ၊ ဥဗ္ဘဝိတွာန၊ ဥဗ္ဘဝိတုန၊ ဥဗ္ဘဝိယ၊ ဥဗ္ဘဝိယာန။ ဧသ နယော ‘‘သမုဗ္ဘဝိတွာ၊ ပရာဘဝိတွာ၊ သမ္ဘဝိတွာ၊ ဝိဘဝိတွာ၊ ပါတုဗ္ဘဝိတွာ’’တိ ဧတ္ထာပိ။ ဣမာနိ အကမ္မကာနိ ဥဿုက္ကနတ္ထာနိ တွာဒိယန္တပဒါနိ။

ဘုတွာ၊ ဘုတွာန၊ ပရိဘဝိတွာ၊ ပရိဘဝိတွာန၊ ပရိဘဝိတုန၊ ပရိဘဝိယ၊ ပရိဘဝိယာန၊ ပရိဘုယျ။ အဘိဘဝိတွာ၊ အဘိဘဝိတွာန၊ အဘိဘဝိတုန၊ အဘိဘဝိယ၊ အဘိဘဝိယာန၊ အဘိဘုယျ။ ဧသ နယော ‘‘အဓိဘဝိတွာ၊ အတိဘဝိတွာ၊ အနုဘဝိတွာ’’တိ ဧတ္ထာပိ။ ဣဒဉ္စေတ္ထ နိဒဿနံ။ ‘‘တမဝေါစ ရာဇာ အနုဘဝိယာန တမ္ပိ၊ ဧယျာသိ ခိပ္ပံ အဟမပိ ပူဇံ ကဿ’’န္တိ။ အနုဘုတွာ၊ အနုဘုတွာန။ အဓိဘောတွာ၊ အဓိဘောတွာန။

‘‘သဋ္ဌိ ကပ္ပသဟဿာနိ၊ ဒေဝလောကေ ရမိဿတိ၊

အညေ ဒေဝေ အဓိဘောတွာ၊ ဣဿရံ ကာရယိဿတီ’’တိ

ဣဒမေတ္ထ ပါဠိနိဒဿနံ၊ ဣမာနိ သကမ္မကာနိ ဥဿုက္ကနတ္ထာနိ တွာဒိယန္တပဒါနိ။ ဣမာနိ စတ္တာရိ သုဒ္ဓကတ္တရိယေဝ ဘဝန္တိ။

‘‘ဘာဝေတွာ၊ ဘာဝေတွာန။ ပဘာဝေတွာ၊ ပဘာဝေတွာန။ သမ္ဘာဝေတွာ၊ သမ္ဘာဝေတွာန။ ဝိဘာဝေတွာ၊ ဝိဘာဝေတွာန။ ပရိဘာဝေတွာ၊ ပရိဘာဝေတွာန’’ဣစ္စေဝမာဒီနိ သကမ္မကာနိ ဥဿုက္ကနတ္ထာနိ တွာဒိယန္တပဒါနိ ဟေတုကတ္တရိယေဝ ဘဝန္တိ။ ဥဒ္ဒေသောယံ။

တတြ သမာနတ္ထပဒေသု ဧကမေဝါဒိပဒံ ဂဟေတွာ နိဒ္ဒေသော ကာတဗ္ဗော – ဘဝိတွာတိ ဟုတွာ ပညာယိတွာ သရူပံ လဘိတွာ။ ဧဝံ ဝုတ္တနယာနုသာရေန သေသာနမ္ပိ တွာဒိယန္တပဒါနံ နိဒ္ဒေသော ဝိတ္ထာရေတဗ္ဗော။ အယံ ပန ဝိသေသော ဘုတွာတိ သမ္ပတ္တိံ အနုဘုတွာတိ သကမ္မကဝသေန အတ္ထော ဂဟေတဗ္ဗော။ ဘုတွာ အနုဘုတွာတိ ဣမေသဉှိ သမာနတ္ထတံ သဒ္ဓမ္မဝိဒူ ဣစ္ဆန္တိ။ အတြိဒံ ဝုစ္စတိ –

‘‘ဘုတွာ ဘုတွာန’’ဣစ္စေတေ၊ ‘‘အနုဘုတွာ’’တိမဿ ဟိ၊

အတ္ထံ သူစေန္တိ ‘‘ဟုတွာ’’တိ၊ ပဒဿ ပန နေဝ တေ။

ကေစိ ‘‘ဘူတွာ’’တိ ဒီဃတ္တံ၊ တဿ ဣစ္ဆန္တိ သာသနေ၊

ဒီဃတာ ရဿတာ စေဝ၊ ဒွယမ္ပေတံ ပဒိဿတိ။

သဒ္ဒသတ္ထေ စ ‘‘ဘူတွာ’’တိ၊ ဒီဃတ္တသဉှိတံ ပဒံ၊

‘‘ဘဝိတွာ’’တိ ပဒဿတ္ထံ၊ ဒီပေတိ န တု သာသနေ။

‘‘ဟုတွာ’’ဣတိ ပဒံယေဝ၊ ဒီပေတိ ဇိနသာသနေ၊

‘‘ဘဝိတွာ’’တိ ပဒဿတ္ထံ၊ နတ္ထိ အညတ္ထ တံ ပဒံ။

ဣစ္စေဝံ သဝိသေသန္တု၊ ဝစနံ သာရဒဿိနာ၊

သာသနေ သဒ္ဒသတ္ထေ စ၊ ဝိညုနာ ပေက္ခိတဗ္ဗကံ။

ဧဝံ ဥဿုက္ကနတ္ထေ ပဝတ္တာနိ တွာဒိယန္တပဒါနိပိ နိဒ္ဒိဋ္ဌာနိ၊ သဗ္ဗာနေတာနိ အဝိဘတ္တိကာနီတိ ဂဟေတဗ္ဗာနိ။ နိရုတ္တိပိဋကေ ဟိ နိပါတပရိစ္ဆေဒေ အဝိဘတ္တိကာနိ ကတွာ တွာဒိယန္တပဒါနိ ဝုတ္တာနိ။ သဒ္ဒတ္ထဝိဒူနံ ပန မတေ ပဌမာဒိဝိဘတ္တိဝသေန သဝိဘတ္တိကာနိ ဘဝန္တိ။

ဣမသ္မိဉ္စ ပန တွာဒိယန္တာဓိကာရေ ဣဒဉ္စုပလက္ခိတဗ္ဗံ – ဘုတွာ ဂစ္ဆတိ၊ ဘုတွာ ဂတော၊ ဘုတွာ ဂမိဿသိ၊ ကသိတွာ ဝပတိ။ ဥမင်္ဂါ နိက္ခမိတွာန၊ ဝေဒေဟော နာဝမာရုဟိ။ ဘုတွာန ဘိက္ခု ဘိက္ခဿု ဣစ္စာဒီ သမာနကတ္တုကာနံ ဓာတူနံ ပုဗ္ဗကာလေ တွာဒိသဒ္ဒပ္ပယောဂါ။ ‘‘ဘုတွာ ဂစ္ဆတီ’’တိ ဧတ္ထ ဟိ ‘‘ဘုတွာ’’တိ ဣဒံ ပုဗ္ဗကာလကြိယာဒီပကံ ပဒံ။ ‘‘ဂစ္ဆတီ’’တိ ဣဒံ ပန ဥတ္တရကာလကြိယာဒီပကံ၊ သမာနကတ္တုကာနိ စေတာနိ ပဒါနိ ဧကကတ္တုကာနံ ကြိယာနံ ဝါစကတ္တာ။ တထာ ဟေတ္ထ ယော ဂမနကြိယာယ ကတ္တာ၊ သော ဧဝ ဘုဉ္ဇနကြိယာယ ကတ္တုဘူတော ဒဋ္ဌဗ္ဗော။ အယံ နယော အညတြာပိ ဤဒိသေသု ဌာနေသု နေတဗ္ဗော။

‘‘အန္ဓကာရံ နိဟန္တွာန၊ ဥဒိတောယံ ဒိဝါကရော၊

ဝဏ္ဏံ ပညာဝဘာသေဟိ၊ ဩဘာသေတွာ သမုဂ္ဂတော’’

ဣစ္စာဒီနိပိ ပန သမာနကတ္တုကာနံ သမာနကာလေ တွာဒိသဒ္ဒပ္ပယောဂါ။ ဧတ္ထ ဟိ ‘‘နိဟန္တွာနာ’’တိ ပဒံ သမာနကာလကြိယာဒီပကံ ပဒံ။ ‘‘ဥဒိတော’’တိ ဣဒံ ပန ဥတ္တရကာလကြိယာဒီပကံ ပဒန္တိ န ဝတ္တဗ္ဗံ သမာနကာလကြိယာယ ဣဓာဓိပ္ပေတတ္တာ။ တသ္မာယေဝ သမာနကာလကြိယာဒီပကံ ပဒန္တိ ဂဟေတဗ္ဗံ။ အယံ နယော အညတြာပိ ဤဒိသေသု ဌာနေသု နေတဗ္ဗော။

ကေစိ ပန ‘‘မုခံ ဗျာဒါယ သယတိ၊ အက္ခိံ ပရိဝတ္တေတွာ ပဿတီ’’တိ ဥဒါဟရန္တိ။ အပရေ ‘‘နိသဇ္ဇ အဓီတေ၊ ဌတွာ ကထေတီ’’တိ။ တတ္ထ ဗျာဒါနပရိဝတ္တနုတ္တရကာလော ဗျာဒါနူပသမလက္ခဏံ ပဿနကြိယာယ လက္ခိယတိ။ ‘‘နိသဇ္ဇ အဓီတေ၊ ဌတွာ ကထေတီ’’တိ စ သမာနကာလတာယပိ အဇ္ဈေနကထနေဟိ ပုဗ္ဗေပိ နိသဇ္ဇဋ္ဌာနာနိ ဟောန္တီတိ သက္ကာ ပုဗ္ဗုတ္တရကာလတာ သမ္ဘာဝေတုံ၊ တသ္မာ ပုရိမာနိယေဝ ဥဒါဟရဏာနိ ယုတ္တာနိ။ ဥဒယသမကာလမေဝ ဟိ တန္နိဝတ္တနီယနိဝတ္တနန္တိ။

‘‘ဒွါရမာဝရိတွာ ပဝိသတိ’’ဣစ္စာဒိ သမာနကတ္တုကာနံ အပရကာလေ တွာဒိသဒ္ဒပ္ပယောဂေါ။ ယသ္မာ ပနေတ္ထ ပဝိသနကြိယာ ပုရိမာ၊ အာဝရဏကြိယာ ပန ပစ္ဆိမာ၊ တသ္မာ ‘‘အာဝရိတွာ’’တိ ဣဒံ အပရကာလကြိယာဒီပကံ ပဒန္တိ ဝေဒိတဗ္ဗံ။ ‘‘ပဝိသတီ’’တိ ဣဒံ ပန ပုဗ္ဗကာလကြိယာဒီပကံ ပဒန္တိ။ အယံ နယော အညတြာပိ ဤဒိသေသု ဌာနေသု နေတဗ္ဗော။ အပရေ ‘‘ဓ’န္တိ ကစ္စ ပတိတော ဒဏ္ဍော’’တိ ဥဒါဟရဏန္တိ။ အဘိဃာတဘူတသမာယောဂေ ပန အဘိဃာတဇသဒ္ဒဿ သမာနကာလတာ ဧတ္ထ လဗ္ဘတီတိ ဣဓာပိ ပုရိမာနိယေဝ ဥဒါဟရဏာနိ ယုတ္တာနီတိ။

‘‘ပိသာစံ ဒိသွာ စဿ ဘယံ ဟောတိ။ ပညာယ စဿ ဒိသွာ အာသဝါ ပရိက္ခီဏာ’’ဣစ္စာဒိ အသမာနေ ကတ္တရိ ပယောဂေါ။ ဧတ္ထ ဟိ ပိသာစံ ဒိသွာ ပုရိသဿ ဘယံ ဟောတိ၊ ပညာယ ဒိသွာ အဿ ပုဂ္ဂလဿ အာသဝါ ပရိက္ခီဏာ။ ဧဝံ သမာနကတ္တုကတာ ဓာတူနံ န လဗ္ဘတိ ဒဿနကြိယာယ ပုရိသေသု ပဝတ္တနတော၊ ဘဝနာဒိကြိယာယ စ ဘယာဒီသု ပဝတ္တနတောတိ ဒဋ္ဌဗ္ဗံ။ အယံ နယော အညတြာပိ ဤဒိသေသု ဌာနေသု နေတဗ္ဗော။

ဣဒမ္ပိ ပနေတ္ထ ဥပလက္ခိတဗ္ဗံ ‘‘အပ္ပတွာ နဒိံ ပဗ္ဗတော၊ အတိက္ကမ္မ ပဗ္ဗတံ နဒီ’’ဣစ္စာဒိ ပရာပရယောဂေါ။ ‘‘သီဟံ ဒိသွာ ဘယံ ဟောတိ၊ ဃတံ ပိဝိတွာ ဗလံ ဇာယတေ၊ ‘ဓ’န္တိ ကတွာ ဒဏ္ဍော ပတိတော’’ဣစ္စာဒိ လက္ခဏဟေတုအာဒိပ္ပယောဂေါ။ ‘‘နှတွာ ဂမနံ၊ ဘုတွာ သယနံ။ ဥပါဒါယ ရူပ’’မိစ္စာပိ ဗျတ္တယေန သဒ္ဒသိဒ္ဓိပ္ပယောဂေါတိ။

ဣစ္စေဝံ သဗ္ဗထာပိ သမာနကတ္တုကာနံ ဓာတူနံ ပုဗ္ဗကာလေ တွာဒိသဒ္ဒပ္ပယောဂေါ၊ သမာနကတ္တုကာနံ သမာနကာလေ တွာဒိသဒ္ဒပ္ပယောဂေါ၊ သမာနကတ္တုကာနံ အပရကာလေ တွာဒိသဒ္ဒပ္ပယောဂေါ၊ အသမာနကတ္တုကာနံ တွာဒိသဒ္ဒပ္ပယောဂေါ၊ ပရာပရယောဂေါ ၊ လက္ခဏဟေတုအာဒိပ္ပယောဂေါ၊ ဗျတ္တယေန သဒ္ဒသိဒ္ဓိပ္ပယောဂေါတိ သတ္တဓာ တွာဒိယန္တာနံ ပဒါနံ ပယောဂေါ ဝေဒိတဗ္ဗော။

ယဒိ ဧဝံ ကသ္မာ ကစ္စာယနေ ‘‘ပုဗ္ဗကာလေကကတ္တုကာနံ တုန တွာန တွာ ဝါ’’တိ ပုဗ္ဗကာလေယေဝ ဧကကတ္တုကဂ္ဂဟဏံ ကတန္တိ? ယေတုယျေန တွာဒိယန္တာနံ ပဒါနံ ပုရိမကာလကြိယာဒီပနတော။ ကစ္စာယနေ ဟိ ယေဘုယျေန ပဝတ္တိံ သန္ဓာယ ‘‘ပုဗ္ဗကာလေကကတ္တုကာန’’န္တိ ဝုတ္တံ။ ယသ္မာ ပန ‘‘ဣတိ ကတွာ’’တိအာဒီနံ ပဒါနံ ဟေတုအတ္ထဝသေနပိ ပုဗ္ဗာစရိယေဟိ အတ္ထော သံဝဏ္ဏိတော၊ တသ္မာ ‘‘ဘဝိတွာ’’တိအာဒီနံ ဘူဓာတုမယာနံ တွာဒိသဒ္ဒန္တာနံ ပဒါနံ အညေသဉ္စ ‘‘ပစိတွာ’’တိအာဒီနံ ယထာပယောဂံ ‘‘ဘဝနဟေတု ပစနဟေတူ’’တိအာဒိနာ ဟေတုအတ္ထောပိ ဂဟေတဗ္ဗော။ အတြိဒံ ဝုစ္စတိ –

ဟေတုတ္ထေပိ ယတော ဟောန္တိ၊ သဒ္ဒါ ဥဿုက္ကနတ္ထကာ၊

တသ္မာ ဟေတုဝသေနာပိ၊ ဝဒေယျတ္ထံ ဝိစက္ခဏော။

‘‘ဣတိ ကတွာ’’တိ သဒ္ဒဿ၊ အတ္ထသံဝဏ္ဏနာသု ဟိ၊

‘‘ဣတိ ကရဏဟေတူ’’တိ၊ အတ္ထော ဓီရေဟိ ဂယှတိ။

‘‘ဂစ္ဆာမိ ဒါနိ နိဗ္ဗာနံ၊ ယတ္ထ ဂန္တွာ န သောစတိ’’၊

ဣတိ ပါဌေပိ ဟေတုတ္ထော၊ ဂယှတေ ပုဗ္ဗဝိညုဘိ။

‘‘ယသ္မိံ နိဗ္ဗာနေ ဂမန-ဟေတူ’’တိ ဟိ ကထီယတေ၊

ဟေတုတ္ထေဝံ ယထာယောဂ-မညတြာပိ အယံ နယော။

ဧဝံ ဘူတသဒ္ဒဿ အတ္ထုဒ္ဓါရော စ တုမန္တပဒဉ္စ တွာဒိယန္တပဒဉ္စာတိ အတ္ထတ္တိကံ ဝိဘတ္တံ။

ယော ဣမမတ္ထတိကံ သုဝိဘတ္တံ၊

ကဏ္ဏရသာယနမာဂမိကာနံ၊

ဓာရယတေ သ ဘဝေ ဂတကင်္ခါ၊

ပါဝစနမှိ ဂတေ သုခုမတ္ထေ။

ဣတိ နဝင်္ဂေ သာဋ္ဌကထေ ပိဋကတ္တယေ ဗျပ္ပထဂတီသု ဝိညူနံ

ကောသလ္လတ္ထာယ ကတေ သဒ္ဒနီတိပ္ပကရဏေ

အတ္ထတ္တိကဝိဘာဂေါ နာမ

စုဒ္ဒသမော ပရိစ္ဆေဒေါ။

ဧဝံ နာနပ္ပကာရတော ဘူဓာတုရူပါနိ ဒဿိတာနိ။

ပဒမာလာ နိဋ္ဌိတာ။