📜

၂။ ဘဝတိကြိယာပဒမာလာဝိဘာဂ

ဣတော ပရံ ပဝက္ခာမိ၊ သောတူနံ မတိဝဍ္ဎနံ၊

ကြိယာပဒက္ကမံ နာမ၊ ဝိဘတ္တာဒီနိ ဒီပယံ။

တတြ အာချာတိကဿ ကြိယာလက္ခဏတ္တသူစိကာ တျာဒယော ဝိဘတ္တိယော၊ တာ အဋ္ဌဝိဓာ ဝတ္တမာနာပဉ္စမီသတ္တမီပရောက္ခာဟိယျတ္တနဇ္ဇတနီဘဝိဿန္တီ ကာလာတိပတ္တိဝသေန။

တတ္ထတိ အန္တိ၊ သိ ထ၊ မိ မ၊ တေ အန္တေ၊ သေ ဝှေ၊ ဧ မှေ ဣစ္စေတာ ဝတ္တမာနာဝိဘတ္တိယော နာမ။

တု အန္တု၊ ဟိ ထ၊ မိ မ၊ တံ အန္တံ၊ သု ဝှော၊ ဧ အာမသေ ဣစ္စေတာ ပဉ္စမီဝိဘတ္တိယော နာမ။

ဧယျ ဧယျုံ၊ ဧယျာသိ ဧယျာထ၊ ဧယျာမိ ဧယျာမ၊ ဧထ ဧရံ၊ ဧထော ဧယျာဝှော၊ ဧယျံ ဧယျာမှေ ဣစ္စေတာ သတ္တမီဝိဘတ္တိယော နာမ။

အ ဥ၊ ဧ တ္ထ၊ အံ မှ၊ တ္ထ ရေ၊ တ္ထော ဝှော၊ ဣံ မှေ ဣစ္စေတာ ပရောက္ခာဝိဘတ္တိယော နာမ။

အာ ဦ၊ ဩ တ္ထ၊ အံ မှာ၊ တ္ထ တ္ထုံ၊ သေ ဝှံ၊ ဣံ မှသေ ဣစ္စေတာ ဟိယျတ္တနီဝိဘတ္တိယော နာမ။

ဤ ဥံ၊ ဩ တ္ထ၊ ဣံ မှာ၊ အာ ဦ၊ သေ ဝှံ၊ အံ မှေ ဣစ္စေတာ အဇ္ဇတနီဝိဘတ္တိယော နာမ။

ဿတိ ဿန္တိ၊ ဿသိ ဿထ၊ ဿာမိ ဿာမ၊ ဿတေ ဿန္တေ၊ ဿသေ ဿဝှေ၊ ဿံ ဿာမှေ ဣစ္စေတာ ဘဝိဿန္တီဝိဘတ္တိယော နာမ။

ဿာ ဿံသု၊ ဿေ ဿထ၊ ဿံ ဿာမှာ၊ ဿထ ဿိသု၊ ဿသေ ဿဝှေ၊ ဿိံ ဿာမှသေ ဣစ္စေတာ ကာလာတိပတ္တိဝိဘတ္တိယော နာမ။

သဗ္ဗာသမေတာသံ ဝိဘတ္တီနံ ယာနိ ယာနိ ပုဗ္ဗကာနိ ဆ ပဒါနိ၊ တာနိ တာနိ ပရဿပဒါနိ နာမ။ ယာနိ ယာနိ ပန ပရာနိ ဆ ပဒါနိ၊ တာနိ တာနိ အတ္တနောပဒါနိ နာမ။ တတ္ထ ပရဿပဒါနိ ဝတ္တမာနာ ဆ၊ ပဉ္စမိယော ဆ၊ သတ္တမိယော ဆ၊ ပရောက္ခာ ဆ၊ ဟိယျတ္တနိယော ဆ၊ အဇ္ဇတနိယော ဆ၊ ဘဝိဿန္တိယော ဆ၊ ကာလာတိပတ္တိယော ဆာတိ အဋ္ဌစတ္တာလီသဝိဓာနိ ဟောန္တိ၊ တထာ ဣတရာနိ၊ သဗ္ဗာနိ တာနိ ပိဏ္ဍိတာနိ ဆန္နဝုတိဝိဓာနိ။

ပရဿပဒါနမတ္တနောပဒါနဉ္စ ဒွေ ဒွေ ပဒါနိ ပဌမမဇ္ဈိမုတ္တမပုရိသာ နာမ။ တေ ဝတ္တမာနာဒီသု စတ္တာရော စတ္တာရော၊ အဋ္ဌန္နံ ဝိဘတ္တီနံ ဝသေန ဒွတ္တိံသ၊ ပိဏ္ဍိတာနိ ပရိမာဏာနေဝ။

ဒွီသု ဒွီသု ပဒေသု ပဌမံ ပဌမံ ဧကဝစနံ၊ ဒုတိယံ ဒုတိယံ ဗဟုဝစနံ။

တတြ ဝတ္တမာနဝိဘတ္တီနန္တိ အန္တိ၊ သိ ထ၊ မိ မ ဣစ္စေတာနိ ပရဿပဒါနိ။ တေ အန္တေ၊ သေ ဝှေ၊ ဧ မှေ ဣစ္စေတာနိ အတ္တနောပဒါနိ။ ပရဿပဒတ္တနောပဒေသုပိတိ အန္တိ ဣတိ ပဌမပုရိသာ၊ သိထ ဣတိ မဇ္ဈိမပုရိသာ၊ မိ မ ဣတိ ဥတ္တမပုရိသာ၊ တေ အန္တေ ဣတိ ပဌမပုရိသာ၊ သေ ဝှေ ဣတိ မဇ္ဈိမပုရိသာ၊ ဧ မှေ ဣတိ ဥတ္တမပုရိသာ။

ပဌမမဇ္ဈိမုတ္တမပုရိသေသုပိ တိ-ဣတိ ဧကဝစနံ၊ အန္တိ-ဣတိ ဗဟုဝစနန္တိ ဧဝံ ဧကဝစနဗဟုဝစနာနိ ကမတော ဉေယျာနိ။ ဧဝံ သေသာသု ဝိဘတ္တီသု ပရဿပဒတ္တနောပဒပဌမမဇ္ဈိမုတ္တမပုရိသေကဝစနဗဟုဝစနာနိ ဉေယျာနိ။

တတ္ထ ဝိဘတ္တီတိ ကေနဋ္ဌေန ဝိဘတ္တိ? ကာလာဒိဝသေန ဓာတွတ္ထံ ဝိဘဇတီတိ ဝိဘတ္တိ၊ သျာဒီဟိ နာမိကဝိဘတ္တီဟိ သဟ သဗ္ဗသင်္ဂါဟကဝသေန ပန သကတ္ထပရတ္ထာဒိဘေဒေ အတ္ထေ ဝိဘဇတီတိ ဝိဘတ္တိ၊ ကမ္မာဒယော ဝါ ကာရကေ ဧကဝစနဗဟုဝစနဝသေန ဝိဘဇတီတိ ဝိဘတ္တိ၊ ဝိဘဇိတဗ္ဗာ ဉာဏေနာတိပိ ဝိဘတ္တိ၊ ဝိဘဇန္တိ အတ္ထေ ဧတာယာတိပိ ဝိဘတ္တိ၊ အထ ဝါ သတိပိ ဇိနသာသနေ အဝိဘတ္တိကနိဒ္ဒေသေ သဗ္ဗေန သဗ္ဗံ ဝိဘတ္တီဟိ ဝိနာ အတ္ထဿာ’နိဒ္ဒိသိတဗ္ဗတော ဝိသေသေန ဝိဝိဓေန ဝါ အာကာရေန ဘဇန္တိ သေဝန္တိ နံ ပဏ္ဍိတာတိပိ ဝိဘတ္တိ။ တတ္ထ အဝိဘတ္တိကနိဒ္ဒေသလက္ခဏံ ဝဒါမ သဟ ပယောဂနိဒဿနာဒီဟိ။

အဝိဘတ္တိကနိဒ္ဒေသော၊ နာမိကေသုပလဗ္ဘတိ၊

နာချာတေသူတိ ဝိညေယျ-မိဒမေတ္ထ နိဒဿနံ။

နိဂြောဓောဝ မဟာရုက္ခော၊ ထေရ ဝါဒါနမုတ္တမော၊

အနူနံ အနဓိကဉ္စ၊ ကေဝလံ ဇိနသာသနံ။

တတြ ထေရ-ဣတိ အဝိဘတ္တိကော နိဒ္ဒေသော၊ ထေရာနံ အယန္တိ ထေရော။ ကော သော? ဝါဒေါ။ ထေရဝါဒေါ အညေသံ ဝါဒါနံ ဥတ္တမောတိ အယမတ္ထော ဝေဒိတဗ္ဗော။

‘‘ကာယော တေ သဗ္ဗ သောဝဏ္ဏော’’၊ ဣစ္စာဒိမှိပိ နာမိကေ၊

အဝိဘတ္တိကနိဒ္ဒေသော၊ ဂဟေတဗ္ဗော နယညုနာ။

အဝိဘတ္တိကနိဒ္ဒေသော၊ နနွာချာတေပိ ဒိဿတိ၊

‘‘ဘော ခါဒ ပိဝ’’ဣစ္စတြ၊ ဝဒေ ယော ကောစိ စောဒကော။

ယဒိ ဧဝံ မတေနဿ၊ ဘဝေယျ အဝိဘတ္တိကံ၊

‘‘ဘိက္ခု၊ ဘော ပုရိသိ’’စ္စာဒိ၊ ပဒမ္ပိ၊ န ဟိဒံ တထာ။

‘‘ဘိက္ခု၊ ဘော ပုရိသိ’’စ္စာဒိ၊ သိ ဂ လောပေန ဝုစ္စတိ၊

တထာ ‘‘ခါဒါ’’တိအာဒီနိ၊ ဟိ လောပေန ပဝုစ္စရေ။

ဧဝံ အဝိဘတ္တိကနိဒ္ဒေသော အာချာတေသု န လဗ္ဘတိ၊ နာမေသုယေဝ လဗ္ဘတိ။ တတြာပိ ‘‘အဋ္ဌ စ ပုဂ္ဂလ ဓမ္မဒသာ တေ’’တိ ဧတ္ထ ဆန္ဒဝသေန ပုဂ္ဂလ ဣတိ ရဿကရဏံ ဒဋ္ဌဗ္ဗံ၊ န ‘‘ကကုသန္ဓ ကောဏာဂမနော စ ကဿပေါ’’တိ ဧတ္ထ ကကုသန္ဓ ဣတိ အဝိဘတ္တိကနိဒ္ဒေသော ဝိယ အဝိဘတ္တိကနိဒ္ဒေသော ဒဋ္ဌဗ္ဗော။ ‘‘ဘိက္ခု နိသိန္နေ မာတုဂါမော ဥပနိသိန္နော ဝါ ဟောတိ ဥပနိပန္နော ဝါ’’တိ ဧတ္ထ ပန ဘိက္ခူတိ ဣဒံ ဘိက္ခုမှီတိ ဝတ္တဗ္ဗတ္ထတ္တာ ဘုမ္မေ ပစ္စတ္တန္တိပိ အဒိဋ္ဌဝိဘတ္တိကနိဒ္ဒေသောတိပိ ဝတ္တုံ ယုဇ္ဇတိ။ တတ္ထ ပန ဆန္ဒဝသေန ကတရဿတ္တာ တာနိ ပဒါနိ အဝိဘတ္တိကနိဒ္ဒေသပက္ခမ္ပိ ဘဇန္တီတိ ဝတ္တုံ န ယုဇ္ဇတိ။

တတ္ထ ပရဿပဒါနီတိ ပရဿ အတ္ထဘူတာနိ ပဒါနိ ပရဿပဒါနိ။ ဧတ္ထုတ္တမပုရိသေသု အတ္တနော အတ္ထေသုပိ အတ္တနောပဒဝေါဟာရော န ကရိယတိ။

ကိဉ္စာပိ အတ္တနော အတ္ထာ၊ ပုရိသာ ဥတ္တမဝှယာ၊

တထာပိ ဣတရေသာန-မုဿန္နတ္တာဝ တဗ္ဗသာ၊

တဗ္ဗောဟာရော ဣမေသာနံ၊ ပေါရာဏေဟိ နိရောပိတော။

အတ္တနောပဒါနီတိ အတ္တနော အတ္ထဘူတာနိ ပဒါနိ အတ္တနောပဒါနိ။ ဧတ္ထ ပန ပဌမမဇ္ဈိမပုရိသေသု ပရဿတ္ထေသုပိ ပရဿပဒဝေါဟာရော န ကရိယတိ။

ပဌမမဇ္ဈိမာ စေတေ၊ ပရဿတ္ထာ တထာပိ စ၊

ဣတရေသံ နိရူဠှတ္တာ၊ တဗ္ဗောဟာရဿ သစ္စတော။

ဣမဿ ပနိမေသာနံ၊ ပုဗ္ဗဝေါဟာရတာယ စ၊

တထာ သင်္ကရဒေါသဿ၊ ဟရဏတ္ထာယ သော အယံ၊

အတ္တနောပဒဝေါဟာရော၊ ဧသမာရောပိတော ဓုဝံ။

ပရဿပဒသညာဒိ-သညာယော ဗဟုကာ ဣဓ၊

ပေါရာဏေဟိ ကတတ္တာတာ၊ သညာ ပေါရာဏိကာ မတာ။

တသ္မာ ဣဓ ပဌမပုရိသာဒီနံ တိဏ္ဏံ ပုရိသာနံ ဝစနတ္ထံ န ပရိယေသာမ။ ရူဠှိယာ ဟိ ပေါရာဏေဟိ တျာဒီနံ ပုရိသသညာ ဝိဟိတာ။

ဧကဝစနဗဟုဝစနေသု ပန ဧကဿတ္ထဿ ဝစနံ ဧကဝစနံ။ ဗဟူနမတ္ထာနံ ဝစနံ ဗဟုဝစနံ။ အထ ဝါ ဗဟုတ္တေပိ သတိ သမုဒါယဝသေန ဇာတိဝသေန ဝါ စိတ္တေန သမ္ပိဏ္ဍေတွာ ဧကီကတဿတ္ထဿ ဧကဿ ဝိယ ဝစနမ္ပိ ဧကဝစနံ၊ ဗဟုတ္တေ နိဿိတဿ နိဿယဝေါဟာရေန ဝုတ္တဿ နိဿယဝသေန ဧကဿ ဝိယ ဝစနမ္ပိ ဧကဝစနံ၊ ဧကတ္တလက္ခဏေန ဗဝှတ္ထာနံ ဧကဝစနံ ဝိယ ဝစနမ္ပိ ဧကဝစနံ။ အဗဟုတ္တေပိ သတိ အတ္တဂရုကာရာပရိစ္ဆေဒမာတိကာနုသန္ဓိနယပုစ္ဆာသဘာဂပုထုစိတ္တ- သမာယောဂပုထုအာရမ္မဏဝသေန ဧကတ္ထဿ ဗဟူနံ ဝိယ ဝစနံ ဗဟုဝစနံ၊ တထာ ယေ ယေ ဗဟဝေါ တန္နိဝါသတံပုတ္တသင်္ခါတဿေကဿတ္ထဿ ရူဠှီဝသေန ဗဟူနံ ဝိယ ဝစနမ္ပိ ဗဟုဝစနံ၊ ဧကဿတ္ထဿ အညေနတ္ထေန ဧကာဘိဓာနဝသေန ဗဟူနံ ဝိယ ဝစနမ္ပိ ဗဟုဝစနံ၊ ဧကဿတ္ထဿ နိဿိတဝသေန ဗဟူနံ ဝိယ ဝစနမ္ပိ ဗဟုဝစနံ၊ ဧကဿတ္ထဿ အာရမ္မဏဘေဒကိစ္စဘေဒဝသေန ဗဟူနံ ဝိယ ဝစနမ္ပိ ဗဟုဝစနံ။ ဧဝမိမေဟိ အာကာရေဟိ ဧကမှိ ဝတ္တဗ္ဗေ၊ ဧကမှိ ဝိယ စ ဝတ္တဗ္ဗေ ဧကဝစနံ၊ ဗဟုမှိ ဝတ္တဗ္ဗေ၊ ဗဟုမှိ ဝိယ စ ဝတ္တဗ္ဗေ ဗဟုဝစနံ ဟောတီတိ ဒဋ္ဌဗ္ဗံ။ ပုထုဝစနံ၊ အနေကဝစနန္တိ စ ဣမဿေဝ နာမံ။

ဝစနေသု အယံ အတ္ထော၊ နာမာချာတဝိဘတ္တိနံ၊

ဝသေန အဓိဂန္တဗ္ဗော၊ သာသနတ္ထဂဝေသိနာ။

တသ္မာ တဒတ္ထဝိညာပနတ္ထံ ဣဓ နာမိကပယောဂေဟိ သဟေဝါချာတပယောဂေ ပဝက္ခာမ – ‘‘ရာဇာ အာဂစ္ဆတိ၊ သဟာယော မေ အာဂစ္ဆတိ၊ ဧကံ စိတ္တ’’ မိစ္စေဝမာဒယော ဧကဿတ္ထဿ ဧကဝစနပယောဂါ။ ‘‘ရာဇာနော အာဂစ္ဆန္တိ၊ သဟာယာ မေ အာဂစ္ဆန္တိ၊ န မေ ဒေဿာ ဥဘော ပုတ္တာ၊ ဒွေ တီဏိ’’ ဣစ္စေဝမာဒယော ဗဝှတ္ထာနံ ဗဟုဝစနပယောဂါ။

‘‘သာ သေနာ မဟတီ အာသိ၊ ဗဟုဇ္ဇနော ပသန္နောသိ၊ သဗ္ဗော တံ ဇနော ဩဇိနာယတု၊ ဣတ္ထိဂုမ္ဗဿ ပဝရာ၊ ဗုဒ္ဓဿာဟံ ဝတ္ထယုဂံ အဒါသိံ၊ ဒွယံ ဝေါ ဘိက္ခဝေ ဒေသေဿာမိ၊ ပေမံ မဟန္တံ ရတနတ္တယဿ၊ ကရေ ပသာဒဉ္စ နရော အဝဿံ၊ ဘိက္ခုသင်္ဃော၊ ဗလကာယော၊ ဒေဝနိကာယော၊ အရိယဂဏော’’- ဣစ္စေဝမာဒယော၊ ‘‘ဒွိကံ တိက’’မိစ္စာဒယော စ သမုဒါယဝသေန ဗဝှတ္ထာနံ ဧကဝစနပယောဂါ။

ကတ္ထစိ ပန ဤဒိသေသု ဌာနေသု ဗဟုဝစနပယောဂါပိ ဒိဿန္တိ။ တထာ ဟိ ‘‘ပူဇိတာ ဉာတိသင်္ဃေဟိ၊ ဒေဝကာယာ သမာဂတာ၊ သဗ္ဗေတေ ဒေဝနိကာယာ၊ ဒွေ ဒေဝသင်္ဃာ၊ တီဏိ ဒုကာနိ၊ စတ္တာရိ နဝကာနိ’’ ဣစ္စေဝမာဒယော ပယောဂါပိ ဒိဿန္တိ။ ဣမေ ဧကဝစနဝသေန ဝတ္တဗ္ဗဿ သမုဒါယဿ ဗဟုသမုဒါယဝသေန ဗဟုဝစနပယောဂါတိ ဂဟေတဗ္ဗာ၊ သင်္ဂယှမာနာ စ ဗဝှတ္ထဗဟုဝစနေ သင်္ဂဟံ ဂစ္ဆန္တိ ဝိသုံယေဝ ဝါ၊ တသ္မာ ဗဟုသမုဒါယာပေက္ခဗဟုဝစနန္တိ ဧတေသံ နာမံ ဝေဒိတဗ္ဗံ။

‘‘ပါဏံ န ဟနေ၊ သဿော သမ္ပဇ္ဇတိ’’ ဣစ္စေဝမာဒယော ဇာတိဝသေန ဗဝှတ္ထာနံ ဧကဝစနပယောဂါ၊ တဗ္ဘာဝသာမညေန ဗဝှတ္ထာနံ ဧကဝစနပယောဂါတိပိ ဝတ္တုံ ဝဋ္ဋတိ။

‘‘နာဂံ ရဋ္ဌဿ ပူဇိတံ၊ သာဝတ္ထီ သဒ္ဓါ အဟောသိ ပသန္နာ’’ ဣစ္စေဝမာဒယော နိဿယဝသေန ပဝတ္တာနံ နိဿယဝေါဟာရေန ဝုတ္တာနမေကဝစနပယောဂါ။

‘‘တိလက္ခဏံ၊ ကုသလာကုသလံ၊ ဝိညာဏပစ္စယာ နာမရူပံ၊ နာမရူပပစ္စယာ သဠာယတနံ၊ ဓမ္မဝိနယော၊ စိတ္တသေနော စ ဂန္ဓဗ္ဗော၊ နတိယာ အသတိ အာဂတိဂတိ န ဟောတိ၊ အာဂတိဂတိယာ အသတိ စုတူပပါတော န ဟောတိ’’ ဣစ္စေဝမာဒယော ဧကတ္တလက္ခဏေ ဗဝှတ္ထာနံ ဧကဝစနပယောဂါ။

‘‘ဧဝံ မယံ ဂဏှာမ၊ အမှာကံ ပကတိ၊ ပဓာနန္တိ ခေါ မေဃိယ ဝဒမာနံ ကိန္တိ ဝဒေယျာမ’’ ဣစ္စေဝမာဒယော ဧကဿတ္ထဿ အတ္တဝသေန ဗဟုဝစနပယောဂါ။

‘‘တေ မနုဿာ တံ ဘိက္ခုံ ဧတဒဝေါစုံ ‘ဘုဉ္ဇထ ဘန္တေ’တိ၊ အဟံ မနုဿေသု မနုဿဘူတာ၊ အဗ္ဘာဂတာနာ’သနကံ အဒါသိံ’’ ဣစ္စေဝမာဒယော ဧကဿတ္ထဿ ဂရုကာရဝသေန ဗဟုဝစနပယောဂါ။

‘‘အပ္ပစ္စယာ ဓမ္မာ၊ အသင်္ခတာ ဓမ္မာ’’ ဣစ္စေဝမာဒယော ဧကဿတ္ထဿ အပရိစ္ဆေဒဝသေန ဗဟုဝစနပယောဂါ၊ အနိယမိတသင်္ခါဝသေန ဗဟုဝစနပယောဂါ ဝါ။

ကေစိ ပန ‘‘ဒေသနာသောတပါတဝသေန ဗဟုဝစနပယောဂါ’’တိပိ ဝဒန္တိ၊ တံ န ဂဟေတဗ္ဗံ။ န ဟိ တထာဂတော သတိသမ္ပဇညရဟိတော ဓမ္မံ ဒေသေတိ၊ ယုတ္တိ စ န ဒိဿတိ ‘‘မာတိကာယံ ပုစ္ဆာယံ ဝိဿဇ္ဇနေ စာတိ တီသုပိ ဌာနေသု အပ္ပစ္စယာဒိဓမ္မေ ဒေသေန္တော သတ္ထာ ပုနပ္ပုနံ ဗဟုဝစနဝသေန ဒေသနာသောတေ ပတိတွာ ဓမ္မံ ဒေသေတီ’’တိ။

‘‘ကတမေ ဓမ္မာ အပ္ပစ္စယာ’’ ဣစ္စေဝမာဒယော ဧကဿတ္ထဿ မာတိကာနုသန္ဓိနယေန ဗဟုဝစနပယောဂါ။

‘‘ဣမေ ဓမ္မာ အပ္ပစ္စယာ’’ ဣစ္စေဝမာဒယော ဧကဿတ္ထဿ ပုစ္ဆာနုသန္ဓိနယေန ဗဟုဝစနပယောဂါ။

‘‘ကတမေ ဓမ္မာ နော ပရာမာသာ၊ တေ ဓမ္မေ ဌပေတွာ အဝသေသာ ကုသလာကုသလာဗျာကတာ ဓမ္မာ’’ ဣစ္စေဝမာဒယော ဧကဿတ္ထဿ ပုစ္ဆာသဘာဂေန ဗဟုဝစနပယောဂါ။

‘‘အတ္ထိ ဘိက္ခဝေ အညေဝ ဓမ္မာ ဂမ္ဘီရာ ဒုဒ္ဒသာ ဒုရနုဗောဓာ သန္တာ ပဏီတာ အတက္ကာဝစရာ နိပုဏာ ပဏ္ဍိတဝေဒနီယာ၊ ယေ တထာဂတော သယံ အဘိညာ သစ္ဆိကတွာ ပဝေဒေတီ’’တိ အယမေကဿတ္ထဿ ပုထုစိတ္တသမာယောဂပုထုအာရမ္မဏဝသေန ဗဟုဝစနပယောဂေါ။

‘‘ဧကံ သမယံ ဘဂဝါ သက္ကေသု ဝိဟရတိ ကပိလဝတ္ထုသ္မိံ မဟာဝနေ၊

သန္တိ ပုတ္တာ ဝိဒေဟာနံ၊ ဒီဃာဝု ရဋ္ဌဝဍ္ဎနော၊

တေ ရဇ္ဇံ ကာရယိဿန္တိ၊ မိထိလာယံ ပဇာပတိ’’ –

ဣစ္စေဝမာဒယော သဒ္ဒါ ယေ ယေ ဗဟဝေါ၊ တန္နိဝါသတံပုတ္တသင်္ခါတဿေကတ္ထဿ ရူဠှီဝသေန ဗဟုဝစနပယောဂါ။

‘‘သာရိပုတ္တမောဂ္ဂလ္လာနေ အာမန္တေသိ ‘ဂစ္ဆထ တုမှေ သာရိပုတ္တာ ကီဋာဂိရိံ ဂန္တွာ အဿဇိပုနဗ္ဗသုကာနံ ဘိက္ခူနံ ကီဋာဂိရိသ္မာ ပဗ္ဗာဇနီယကမ္မံ ကရောထ၊ တုမှာကံ ဧတေ သဒ္ဓိဝိဟာရိနော’တိ’’၊ ‘‘ကစ္စိ ဝေါ ကုလပုတ္တာ၊ ဧထ ဗျဂ္ဃာ နိဝတ္တဝှော’’ ဣစ္စေဝမာဒယော ဧကဿတ္ထဿ အညေနတ္ထေန ဧကာဘိဓာနဝသေန ဗဟုဝစနပယောဂါ။

‘‘မဉ္စာ ဥက္ကုဋ္ဌိံ ကရောန္တိ’’ ဣစ္စေဝမာဒယော ဧကဿတ္ထဿ နိဿိတဝသေန ဗဟုဝစနပယောဂါ။

‘‘စတ္တာရော သတိပဋ္ဌာနာ’’တိ အယမာရမ္မဏဘေဒေန ဧကဿတ္ထဿ ဗဟုဝစနပယောဂေါ။

‘‘စတ္တာရော သမ္မပ္ပဓာနာ’’တိ အယံ ပန ကိစ္စဘေဒေန ဧကဿတ္ထဿ ဗဟုဝစနပယောဂေါ။

တတ္ထ ဧကတ္ထေကဝစနံ၊ သမုဒါယာပေက္ခေကဝစနံ၊ ဇာတျာပေက္ခေကဝစနံ၊ တန္နိဿယာပေက္ခေကဝစနံ၊ ဧကတ္တလက္ခဏေကဝစနန္တိ ပဉ္စဝိဓံ ဧကဝစနံ ဘဝတိ။ ဧတ္ထ ပန ဇာတျာပေက္ခေကဝစနံ အတ္ထတော သာမညာပေက္ခေကဝစနမေဝါတိ ဒဋ္ဌဗ္ဗံ။

ဗဝှတ္ထဗဟုဝစနံ၊ ဗဟုသမုဒါယာပေက္ခဗဟုဝစနံ၊ အတ္တဗဟုဝစနံ၊ ဂရုကာရဗဟုဝစနံ၊ အပရိစ္ဆေဒဗဟုဝစနံ၊ မာတိကာနုသန္ဓိနယဗဟုဝစနံ၊ ပုစ္ဆာနုသန္ဓိနယဗဟုဝစနံ၊ ပုစ္ဆာသဘာဂဗဟုဝစနံ၊ ပုထုစိတ္တသမာယောဂပုထုအာရမ္မဏဗဟုဝစနံ၊ တန္နိဝါသဗဟုဝစနံ၊ တံပုတ္တဗဟုဝစနံ၊ ဧကာဘိဓာနဗဟုဝစနံ၊ တန္နိဿိတာပေက္ခဗဟုဝစနံ ၊ အာရမ္မဏဘေဒဗဟုဝစနံ၊ ကိစ္စဘေဒဗဟုဝစနန္တိ ပန္နရသဝိဓံ ဗဟုဝစနံ ဘဝတိ။ ဣစ္စေဝံ ဝီသဓာ သဗ္ဗာနိ ဧကဝစနဗဟုဝစနာနိ သင်္ဂဟိတာနိ။ အတြိဒံ ပါဠိဝဝတ္ထာနံ –

ဧကတ္ထေ ဒေကဝစန-ဉ္စိတရသ္မိတရမ္ပိ စ၊

သမုဒါယဇာတိဧကတ္တ-လက္ခဏေကဝစောပိ စ၊

သာဋ္ဌကထေ ပိဋကမှိ၊ ပါဌေ ပါယေန ဒိဿရေ။

ဂရုမှိ စတ္တနေကသ္မိံ၊ ဗဟုဝစနကံ ပန၊

ပါဠိယံ အပ္ပကံ အဋ္ဌ-ကထာဋီကာသု တံ ဗဟုံ။

တထာ ဟိ ဗဟုကံ ဒေက-ဝစနံယေဝ ပါဠိယံ၊

ဂရုမှိ စတ္တနေကသ္မိံ၊ ဣဒမေတ္ထ နိဒဿနံ။

‘‘နမော တေ ပုရိသာဇည၊ နမော တေ ပုရိသုတ္တမ၊

တဝ သာသနမာဂမ္မ၊ ပတ္တောမှိ အမတံ ပဒံ’’။

ဣစ္စေဝမာဒယော ပါဌာ၊ ဗဟုဓာ ဇိနသာသနေ၊

ဒိဿန္တီတိ ဝိဇာနေယျ၊ ဝိဒွါ အက္ခရစိန္တကော။

သာတိသယံ ဂရုကာရာ-ရဟဿာပိ မဟေသိနော၊

ဧကဝစနယောဂေန၊ နိဒ္ဒေသော ဒိဿတေ ယတော။

တတော ဝေါဟာရကုသလော၊ ကရေယျတ္ထာနုရူပတော၊

ဧကဝစနယောဂံ ဝါ၊ ဣတရံ ဝါ သုမေဓသော။

ပါယေန တန္နိဝါသမှိ၊ ဗဟုဝစနကံ ဌိတံ၊

တံပုတ္တေ အပ္ပကံ တန္နိ-ဿယေကဝစနမ္ပိ စ။

ပုထုစိတ္တာပရိစ္ဆေဒ-မာတိကာသန္ဓိအာဒိသု၊

ဗဟုဝစနကဉ္စာပိ၊ အပ္ပကန္တိ ပကာသယေ။

ဧကာဘိဓာနတော ကိစ္စာ၊ တထာ ဂေါစရတောပိ စ၊

ဗဟုဝစနကံ တန္နိ-ဿိတာပေက္ခဉ္စ အပ္ပကံ။

ဣစ္စေဝံ သပ္ပယောဂံ တု၊ ဉတွာန ဝစနဒွယံ၊

ကာတဗ္ဗော ပန ဝေါဟာရော၊ ယထာပါဠိ ဝိဘာဝိနာ။

ဣဒါနိ ကာလာဒိဝသေန အာချာတပ္ပဝတ္တိံ ဒီပယိဿာမ – ကာလကာရကပုရိသပရိဒီပကံ ကြိယာလက္ခဏံ အာချာတိကံ။ တတြ ကာလန္တိ အတီတာနာဂတပစ္စုပ္ပန္နဝသေန တယော ကာလာ၊ အတီတာနာဂတပစ္စုပ္ပန္နာဏတ္တိပရိကပ္ပကာလာတိပတ္တိဝသေန ပန ဆ၊ တေ ဧကေကာ တိပုရိသကာ။

ဝုတ္တပ္ပကာရကာလေသု၊ ယဒိဒံ ဝတ္တတေ ယတော၊

အာချာတိကံ တတော တဿ၊ ကာလဒီပနတာ မတာ။

ကာရကန္တိ ကမ္မကတ္တုဘာဝါ။ တေ ဟိ ဥပစာရမုချသဘာဝဝသေန ကရောန္တိ ကရဏန္တိ စ ‘‘ကာရကာ’’တိ ဝုစ္စန္တိ။ တေဝ ယထာက္ကမံ ကြိယာနိမိတ္တ တံသာဓက တံသဘာဝါတိ ဝေဒိတဗ္ဗာ။

ကမ္မံ ကတ္တာ စ ဘာဝေါ စ၊ ဣစ္စေဝံ ကာရကာ တိဓာ၊

ဝိဘတ္တိပစ္စယာ ဧတ္ထ၊ ဝုတ္တာ နာညတြ သစ္စတော။

‘‘ပရိဘဝိယျတိ’’စ္စာဒီ၊ ကမ္မေ သိဇ္ဈန္တိ ကာရကေ၊

‘‘သမ္ဘဝတီ’’တိအာဒီနိ၊ သိဇ္ဈရေ ကတ္တုကာရကေ။

‘‘ဝိဘဝိယျတိ’’ဣစ္စာဒီ၊ ဘာဝေ သိဇ္ဈန္တိ ကာရကေ၊

တိဝိဓေသွေဝမေတေသု၊ ဝိဘတ္တိပစ္စယာ မတာ။

ကာရကတ္တယမုတ္တံ ယံ၊ အာချာတံ နတ္ထိ သဗ္ဗသော၊

တသ္မာ တဒ္ဒီပနတ္တမ္ပိ၊ တဿာချာတဿ ဘာသိတံ။

ကာရကတ္တံ တု ဘာဝဿ၊ သစေပိ န သမီရိတံ၊

ကာရကလက္ခဏေ တေန၊ ဘာဝေန စ အဝတ္ထုနာ။

ကြိယာနိပ္ဖတ္တိ နတ္ထီတိ၊ ယုတ္တိတောပိ စ နတ္ထိ တံ၊

တထာပါချာတိကေ တဿ၊ တဗ္ဗောဟာရော နိရုတ္တိယံ၊

ပတိဋ္ဌိတနယောဝါတိ၊ မန္တွာ အမှေဟိ ဘာသိတော။

ပုရိသောတိ ဧကဝစနဗဟုဝစနကာ ပဌမမဇ္ဈိမုတ္တမပုရိသာ။ တတ္ထ ပဌမပုရိသော အာချာတပဒေန တုလျာဓိကရဏေ သာဓကဝါစကေ ဝါ ကမ္မဝါစကေ ဝါ တုမှာ’မှသဒ္ဒဝဇ္ဇိတေ ပစ္စတ္တဝစနဘူတေ နာမမှိ ‘‘အဘိနီဟာရော သမိဇ္ဈတိ၊ ဗောဓိ ဝုစ္စတိ စတူသု မဂ္ဂေသုဉာဏ’’န္တိအာဒီသု ဝိယ ပယုဇ္ဇမာနေပိ၊ တဋ္ဌာနိယတ္တေ သတိ ‘‘ဘာသတိ ဝါ ကရောတိ ဝါ၊ ပီဠိယက္ခောတိ မံ ဝိဒူ၊ ဝုစ္စတီတိ ဝစန’’န္တိအာဒီသု ဝိယ အပ္ပယုဇ္ဇမာနေပိ သဗ္ဗဓာတူဟိ ပရော ဟောတိ။ ကတ္ထစိ ပန ပါဠိပ္ပဒေသေ နာမဿ အပ္ပယုတ္တတ္တာ ပဌမပုရိသပယောဂတ္ထော ဒုရနုဗောဓော ဘဝတိ၊ ယထာ ‘‘ဒုက္ခံ တေ ဝေဒယိဿာမိ၊ တတ္ထ အဿာသယန္တု မ’’န္တိ။ တထာ ဟိ ဧတ္ထ ‘‘ပါဒါ’’တိ ပါဌသေသော၊ တသ္မိံ ဒုက္ခသာသနာရောစနေ ဝတ္တုံ အဝိသဟနဝသေန ကိလမန္တံ မံ ဒေဝဿ ဥဘော ပါဒါ အဿာသေန္တု၊ ဝိဿဋ္ဌော ကထေဟီတိ မံ ဝဒထာတိ အဓိပ္ပာယော စ ဘဝတိ။

အဓိပ္ပာယော သုဒုဗ္ဗောဓော၊ ယသ္မာ ဝိဇ္ဇတိ ပါဠိယံ၊

တသ္မာ ဥပဋ္ဌဟံ ဂဏှေ၊ ဂရုံ ဂရုမတံ ဝိဒူ။

တတြိမာနိ ဘူဓာတာဓိကာရတ္တာ ဘူဓာတုဝသေန နိဒဿနပဒါနိ။ သော ပရိဘဝတိ၊ တေ ပရိဘဝန္တိ၊ ပရိဘဝတိ၊ ပရိဘဝန္တိ။ သပတ္တော အဘိဘဝိယတေ၊ သဗ္ဗာ ဝိတျာ’နုဘူယတေ၊ အဘိဘဝိယတေ၊ အနုဘူယတေတိ။ ယတ္ထ သတိပိ နာမဿ သာဓကဝါစကတ္တေ အပစ္စတ္တဝစနတ္တာ အာချာတပဒေန တုလျာဓိကရဏတာ န လဗ္ဘတိ၊ တတ္ထ ကမ္မဝါစကံ ပစ္စတ္တဝစနဘူတံ တုလျာဓိကရဏပဒံ ပဋိစ္စ ပဌမပုရိသာဒယော တယော လဗ္ဘန္တိ။ တံ ယထာ? ပရိဘဝိယျတေ ပုရိသော ဒေဝဒတ္တေန၊ ပရိဘဝိယျသေ တွံ ဒေဝဒတ္တေန၊ ပရိဘဝိယျမှေ မယံ အကုသလေဟိ ဓမ္မေဟိ။ ဧတ္ထ ပနိဒံ ဝစနံ န ဝတ္တဗ္ဗံ ‘‘နိန္ဒန္တိ တုဏှိမာသိန’န္တိအာဒီသု သတိပိ နာမဿ ကမ္မဝါစကတ္တေ အပစ္စတ္တဝစနတ္တာ အာချာတပဒေန တုလျာဓိကရဏတာ န လဗ္ဘတီတိ ပဌမပုရိသုပ္ပတ္တိ န သိယာ’’တိ။ ကသ္မာတိ စေ? ‘‘နိန္ဒန္တိ တုဏှိမာသိန’’န္တိအာဒီသု ‘‘ဇနာ’’တိ အဇ္ဈာဟရိတဗ္ဗဿ သာဓကဝါစကဿ နာမဿ သဒ္ဓိမာချာတပဒေန တုလျာဓိကရဏဘာဝဿ ဣစ္ဆိတတ္တာ။ ဧဝမုတ္တရတြာပိ နယော။

မဇ္ဈိမပုရိသော အာချာတပဒေန တုလျာဓိကရဏေ သာဓကဝါစကေ ဝါ ကမ္မဝါစကေ ဝါ ပစ္စတ္တဝစနဘူတေ တုမှသဒ္ဒေ ပယုဇ္ဇမာနေပိ၊ တဋ္ဌာနိယတ္တေ သတိ အပ္ပယုဇ္ဇမာနေပိ သဗ္ဗဓာတူဟိ ပရော ဟောတိ။ တွံ အတိဘဝသိ၊ တုမှေ အတိဘဝထ၊ အတိဘဝသိ၊ အတိဘဝထ။ တွံ ပရိဘဝိယသေ ဒေဝဒတ္တေန၊ တုမှေ ပရိဘဝိယဝှေ။ ယတ္ထ သတိပိ တုမှသဒ္ဒဿ သာဓကဝါစကတ္တေ အပစ္စတ္တဝစနတ္တာ အာချာတပဒေန တုလျာဓိကရဏတာ န လဗ္ဘတိ၊ န တတ္ထ မဇ္ဈိမပုရိသော ဟောတိ။ ဣတရေ ပန ဒွေ ဟောန္တိ ကမ္မဝါစကံ ပစ္စတ္တဝစနဘူတံ တုလျာဓိကရဏပဒံ ပဋိစ္စ။ တံ ယထာ? တယာ အဘိဘဝိယတေ သပတ္တော၊ တယာ အဘိဘဝိယေ အဟံ။

ဥတ္တမပုရိသော အာချာတပဒေန တုလျာဓိကရဏေ သာဓကဝါစကေ ဝါ ကမ္မဝါစကေ ဝါ ပစ္စတ္တဝစနဘူတေ အမှသဒ္ဒေ ပယုဇ္ဇမာနေပိ၊ တဋ္ဌာနိယတ္တေ သတိ အပ္ပယုဇ္ဇမာနေပိ သဗ္ဗဓာတူဟိ ပရော ဟောတိ။ အဟံ ပရိဘဝါမိ၊ မယံ ပရိဘဝါမ၊ ပရိဘဝါမိ၊ ပရိဘဝါမ။ အဟံ ပရိဘဝိယျာမိ အကုသလေဟိ ဓမ္မေဟိ၊ မယံ ပရိဘဝိယျာမ၊ ပရိဘဝိယျာမိ၊ ပရိဘဝိယျာမ။ ယတ္ထ သတိပိ အမှသဒ္ဒဿ သာဓကဝါစကတ္တေ အပစ္စတ္တဝစနတ္တာ အာချာတပဒေန တုလျာဓိကရဏတာ န လဗ္ဘတိ၊ န တတ္ထ ဥတ္တမပုရိသော ဟောတိ။ ဣတရေ ပန ဒွေ ဟောန္တိ ကမ္မဝါစကံ ပစ္စတ္တဝစနဘူတံ တုလျာဓိကရဏပဒံ ပဋိစ္စ။ တံ ယထာ? မယာ အနုဘဝိယတေ သမ္ပတ္တိ၊ မယာ အဘိဘဝိယသေ တွံ။ ဧဝံ ယတ္ထ ယတ္ထ သာဓကဝါစကာနံ ဝါ ကမ္မဝါစကာနံ ဝါ နာမာဒီနံ ပစ္စတ္တဝစနဘူတာနံ အာချာတပဒေဟိ တုလျာဓိကရဏတ္တေ လဒ္ဓေ တတ္ထ တတ္ထ ပဌမပုရိသာဒယော လဗ္ဘန္တိ၊ တသ္မာ နာမာဒီနံ ပစ္စတ္တဝစနဘူတာနံ တုလျာဓိကရဏဘာဝေါယေဝ ပဌမပုရိသာဒီနမုပ္ပတ္တိယာ ကာရဏံ။

ဒွိန္နံ တိဏ္ဏံ ဝါ ပုရိသာနမေကာဘိဓာနေ ပရော ပုရိသော ဂဟေတဗ္ဗော။ ဧတ္ထ ဧကာဘိဓာနံ နာမ ဧကတော အဘိဓာနံ ဧကကာလာဘိဓာနဉ္စ။ တဉ္စ ခေါ စသဒ္ဒပယောဂေယေဝ၊ အစသဒ္ဒပယောဂေ ဘိန္နကာလာဘိဓာနေ တဂ္ဂဟဏာဘာဝတော။ ‘‘တုမှေ အတ္ထကုသလာ ဘဝထ၊ မယမတ္ထကုသလာ ဘဝါမ’’ ဣစ္စေဝမာဒယော တပ္ပယောဂါ။ တတ္ထ တုမှေ အတ္ထကုသလာ ဘဝထ – ဣစ္စေတသ္မိံ ဝေါဟာရေ ‘‘သော စ အတ္ထကုသလော ဘဝတိ၊ တွဉ္စ အတ္ထကုသလော ဘဝသိ၊ တုမှေ အတ္ထကုသလာ ဘဝထာ’’တိ ဧဝံ ဒွိန္နမေကာဘိဓာနေ ပရော ပုရိသော ဂဟေတဗ္ဗော။ ‘‘မယမတ္ထကုသလာ ဘဝါမ’’ ဣစ္စေတသ္မိံ ပန ‘‘သော စ အတ္ထကုသလော ဘဝတိ၊ အဟဉ္စ အတ္ထကုသလော ဘဝါမိ၊ မယမတ္ထကုသလာ ဘဝါမာ’’တိ ဝါ ‘‘တွဉ္စ အတ္ထကုသလော ဘဝသိ၊ အဟဉ္စ အတ္ထကုသလော ဘဝါမိ၊ မယမတ္ထကုသလာ ဘဝါမာ’’တိ ဝါ ဧဝမ္ပိ ဒွိန္နမေကာဘိဓာနေ ပရော ပုရိသော ဂဟေတဗ္ဗော။ ‘‘သော စ အတ္ထကုသလော ဘဝတိ၊ တွဉ္စ အတ္ထကုသလော ဘဝသိ၊ အဟဉ္စ အတ္ထကုသလော ဘဝါမိ၊ မယမတ္ထကုသလာ ဘဝါမာ’’တိ ဝါ ‘‘သော စ အတ္ထကုသလော ဘဝတိ၊ တေ စ အတ္ထကုသလာ ဘဝန္တိ၊ တွဉ္စ အတ္ထကုသလော ဘဝသိ၊ တုမှေ စ အတ္ထကုသလာ ဘဝထ၊ အဟဉ္စ အတ္ထကုသလော ဘဝါမိ၊ မယမတ္ထကုသလာ ဘဝါမာ’’တိ ဝါ ဧဝံ တိဏ္ဏမေကာဘိဓာနေ ပရော ပုရိသော ဂဟေတဗ္ဗော။

အပရောပိ အတ္ထနယော ဝုစ္စတိ – ‘‘တွဉ္စ အတ္ထကုသလော ဘဝသိ၊ သော စ အတ္ထကုသလော ဘဝတိ၊ တုမှေ အတ္ထကုသလာ ဘဝထာ’’တိ ဝါ ‘‘အဟဉ္စ အတ္ထကုသလော ဘဝါမိ၊ သော စ အတ္ထကုသလော ဘဝတိ၊ မယမတ္ထကုသလာ ဘဝါမာ’’တိ ဝါ ဣမိနာ နယေန အနေကပ္ပဘေဒေါ အတ္ထနယော။ ဧဝံ သေသာသု ဝိဘတ္တီသု ပဉ္စမီသတ္တမိယာဒီသု ပရောပုရိသော ဂဟေတဗ္ဗော။ သဗ္ဗေသု စ ကြိယာပဒေသု ဗဝှတ္ထဝါစကေသု ဗဟုဝစနန္တေသု၊ န ပန ဗဟုဝစနန္တေသုပိ ဧကဿတ္တနော ဝါစကေသု ဂရုကာတဗ္ဗဿေကဿတ္ထဿ ဝါစကေသု စ ကြိယာပဒေသု။ ဧတ္ထ စောဒနာသန္ဒီပနိယော ဣမာ ဂါထာ –

‘‘တွဉ္စ ဘဝသိ သော စာပိ၊ ဘဝတိ’’စ္စာဒိဘာသနေ၊

‘‘တုမှေ ဘဝထ’’ ဣစ္စာဒိ၊ ပရောပေါသော ကထံ သိယာ?၊

‘‘အဟံ ဘဝါမိ သော စာပိ၊ ဘဝတိ’’စ္စာဒိဘာသနေ၊

‘‘မယံ ဘဝါမ’’ဣစ္စာဒိ၊ ဥတ္တမော စ ကထံ သိယာ?၊

ဧတ္ထ စ ဝုစ္စတေ –

ပစ္ဆာ ဝုတ္တော ပရော နာမ၊ သညာယ ပဋိပါဋိယာ၊

ဧဝံ ပန ဂဟေတဗ္ဗော၊ ပရောပုရိသနာမကော။

ပဌမမှာ ပရော နာမ၊ မဇ္ဈိမော ဥတ္တမောပိ စ၊

မဇ္ဈိမမှာ ပရော နာမ၊ ဥတ္တမော ပုရိသော ရုတော။

ဧဝံ တု ဂဟဏဉှေတ္ထ၊ ဝေါဟာရဿာနုလောမကံ၊

ဒေါသော တဒနုလောမမှိ၊ ဂဟဏသ္မိံ န ဝိဇ္ဇတိ။

‘‘တွဉ္စ ဘဒ္ဒေ သုခီ ဟောဟိ၊ ဧသော စာပိ မဟာမိဂေါ’’၊

ဣတိ ပါဌော ယတော ဒိဋ္ဌော၊ တသ္မာ ဧဝံ ဝဒေမသေ။

‘‘တုမှေ ဒွေ သုခိတာ ဟောထ’’၊ ဣစ္စတ္ထော တတ္ထ ဒိဿတိ၊

ဧဝံပျယံ နယော ဝုတ္တော၊ အတ္တနောမတိယာ မမ။

အတ္တနောမတိ ကိဉ္စာပိ၊ ကထိတာ သဗ္ဗဒုဗ္ဗလာ၊

တထာပိ နယမာဒါယ၊ ကထိတတ္တာ အကောပိယာ။

‘‘ဓမ္မေန ရဇ္ဇံ ကာရေန္တံ၊ ရဋ္ဌာ ပဗ္ဗာဇယိတ္ထ မံ၊

တွဉ္စ ဇာနပဒါ စေဝ၊ နေဂမာ စ သမာဂတာ’’။

‘‘အဟဉ္စ မဒ္ဒိဒေဝီ စ၊ ဇာလီကဏှာဇိနာ စုဘော၊

အညမညံ သောကနုဒါ၊ ဝသာမ အဿမေ တဒါ’’။

ဧတာ ဂါထာပိ ဧတဿ၊ အတ္ထဿ ပန သာဓိကာ၊

တာသု ဝုတ္တနယေနေဝ၊ အတ္ထော သုပါကဋော သိယာ၊

ဧဝံ ဝိညူဟိ ဝိညေယျံ၊ ဗဟုနာ ဘာသိတေန ကိံ။

အာကာရေန မနာပေန၊ ကထနေ ယေန ကေနစိ၊

န ဝိရုဇ္ဈတိ စေ အတ္ထော၊ တံ ပမာဏံ သုဓီမတံ။

ပုရိသတ္တယတော ဧသော၊ ပရောပုရိသနာမကော၊

နုပလဗ္ဘတိ ပစ္စေကံ၊ တဒန္တောဂဓတောဝ ယံ။

ပါဋဝတ္ထာယ သောတူနံ၊ ဝေါဟာရတ္ထေသု သဗ္ဗသော၊

ဝိသုံ အလဗ္ဘမာနောပိ၊ လဗ္ဘမာနောဝ ဥဒ္ဓဋော။

သင်္ခေပတောပေတ္ထ ပုရိသပ္ပဝတ္တိ ဧဝံ ဥပလက္ခိတဗ္ဗာ ‘‘အမှဝစနတ္ထေ ဥတ္တမော၊ တုမှဝစနတ္ထေ မဇ္ဈိမော၊ အညေသံ ဝစနတ္ထေ ပဌမော’’တိ။

တျာဒီနံ ပုရိသသညာ၊ ယသ္မာ ဝုတ္တာ တတော ဣဒံ၊

တဗ္ဗန္တာချာတိကံ ဉေယျံ၊ ပုရိသပရိဒီပကံ။

ဧဝံ သဗ္ဗထာပိ အာချာတိကဿ ကာလကာရကပုရိသပရိဒီပနတာ ဝုတ္တာ။

ကြိယာလက္ခဏန္တိ ဧတ္ထ ကထံ အာချာတိကဿ ကြိယာလက္ခဏတာ ဝေဒိတဗ္ဗာ?

လက္ခိယတိ ကြိယာယေတံ၊ ကြိယာ ဝါ အဿ လက္ခဏံ၊

ကြိယာလက္ခဏတာ ဧဝံ၊ ဝေဒိတဗ္ဗာ တထာ ဟိ စ။

‘‘ဂစ္ဆတိ’’စ္စာဒိကံ သုတွာ၊ ကြိယာသန္ဒီပနံ ပဒံ၊

‘‘အာချာတိက’’န္တိ ဓီရေဟိ၊ အာချာတညူဟိ သညိတံ။

လက္ခဏံ ဟောတိ နာမဿ၊ ယထာ သတွာဘိဓာနတာ၊

ကြိယာဘိဓာနတာ ဧဝံ၊ အာချာတဿေဝ လက္ခဏံ။

အတ္ထတော ပန ဧတဿ၊ ကြိယာဝါစကတာ ဣဓ၊

လက္ခဏံ ဣတိ ဝိညေယျံ၊ လက္ခဏညူဟိ လက္ခိတံ။

‘‘ကိံ ကရောသီ’’တိ ပုဋ္ဌဿ၊ ‘‘ပစာမိ’’စ္စာဒိနာ ‘‘အဟံ’’၊

ပဋိဝါစာယ ဒါနေန၊ ကြိယာဝါစကတာ မတာ။

ဧဝမာချာတိကဿ ကြိယာလက္ခဏတာ ဝေဒိတဗ္ဗာ၊

ဣဒါနိ ကာလေသု ဝိဘတ္တိပ္ပဝတ္တိ ဧဝံ ဝေဒိတဗ္ဗာ –

ပစ္စုပ္ပန္နမှိ ကာလသ္မိံ၊ ဝတ္တမာနာ ပဝတ္တတိ၊

အာသိဋ္ဌာဏာပနတ္ထေသု၊ ပစ္စုပ္ပန္နမှိ ပဉ္စမီ။

ပစ္စုပ္ပန္နေ ပရိကပ္ပာ-နုမတျတ္ထေသု သတ္တမီ၊

အပ္ပစ္စက္ခေ အတီတမှိ၊ ပရောက္ခာ သမ္ပဝတ္တတိ။

ဟိယျော ပဘုတိ ကာလသ္မိံ၊ အတီတမှိ ပဝတ္တတိ၊

ပစ္စက္ခေ ဝါ အပစ္စက္ခေ၊ ဟိယျတ္တနီ နိရုတ္တိတာ။

အဇ္ဇပ္ပဘုတိ ကာလသ္မိံ၊ အတီတမှိ ပဝတ္တတိ၊

ပစ္စက္ခေ ဝါ အပစ္စက္ခေ၊ သမီပေဇ္ဇတနဝှယာ။

အနာဂတေ ဘဝိဿန္တီ၊ ကာလသ္မိံ သမ္ပဝတ္တတိ၊

ကြိယာတိပန္နမတ္တမှိ၊ တီတေ ကာလာတိပတ္တိကာ၊

အနာဂတေပိ ဟောတီတိ၊ နိရုတ္တညူဟိ ဘာသိတာ။

ဧဝံ ကာလေသု ဝိဘတ္တိပ္ပဝတ္တိံ ဉတွာ ယေ တေ သုတ္တန္တေသု ဝိစိတ္တာ သုဝိသဒဝိပုလတိခိဏဗုဒ္ဓိဝိသယဘူတာ ပယောဂါ ဒိဿန္တိ၊ တေသု ပါဋဝမိစ္ဆန္တေဟိ တျာဒိက္ကမေန ဝုစ္စမာနာ ကြိယာပဒမာလာ သလ္လက္ခိတဗ္ဗာ – ဘဝတိ၊ ဘဝန္တိ။ ဘဝသိ၊ ဘဝထ။ ဘဝါမိ၊ ဘဝါမ။ ဘဝတေ၊ ဘဝန္တေ။ ဘဝသေ၊ ဘဝဝှေ။ ဘဝေ၊ ဘဝါမှေ။ အယံ အညယောဂါဒိရဟိတာ ကြိယာပဒမာလာ။

ဒိဿန္တိ စ သုတ္တန္တေသု အတ္ထသမ္ဘဝေပိ အညယောဂါဒိရဟိတာနိ ကြိယာပဒါနိ။ သေယျထိဒံ? ‘‘သဗ္ဗေ သင်္ခါရာ အနိစ္စာတိ၊ ယဒါ ပညာယ ပဿတိ။ ယံ မံ ဘဏသိ သာရထိ။ အညံ သေပဏ္ဏိ ဂစ္ဆာမိ’’ ဣစ္စေဝမာဒီနိ ဧတဿတ္ထဿ ပရိဒီပနိယာ ကြိယာပဒမာလာ။

ဧတ္ထ တိဝိဓော ကြိယာပဒေသု ယောဂေါ တယောဂေါ၊ မယောဂေါ၊ အညယောဂေါ စ။ တတ္ထ မဇ္ဈိမပုရိသာ တယောဂဝသေန ဂဟေတဗ္ဗာ၊ ဥတ္တမပုရိသာ မယောဂဝသေန။ ပဌမပုရိသာ အညယောဂဝသေန။ တျာဒီနမေတ္ထ ပဋိပါဋိယာ အယံ အနုဂီတိ –

အညယောဂေန ပဌမာ၊ တယောဂေန တု မဇ္ဈိမာ၊

မယောဂေနုတ္တမာ ဟောန္တိ၊ ဂဟေတဗ္ဗာ ဝိဘာဝိနာ။

သောတူနံ ပယောဂေသု ကောသလ္လတ္ထံ အညယောဂါဒိသဟိတမပရမ္ပိ ကြိယာပဒမာလံ ဝဒါမ – သော ဘဝတိ၊ တေ ဘဝန္တိ။ တွံ ဘဝသိ၊ တုမှေ ဘဝထ။ အဟံ ဘဝါမိ၊ မယံ ဘဝါမ။ သော ဘဝတေ၊ တေ ဘဝန္တေ။ တွံ ဘဝသေ၊ တုမှေ ဘဝဝှေ။ အဟံ ဘဝေ၊ မယံ ဘဝါမှေ။ အယံ အညယောဂါဒိသဟိတာ ကြိယာပဒမာလာ။

ဒိဿန္တိ စ သုတ္တန္တေသု အညယောဂါဒိသဟိတာနိပိ ကြိယာပဒါနိ။ သေယျထိဒံ? ‘‘ယံပါယံ ဒေဝ ကုမာရော သုပ္ပတိဋ္ဌိတပါဒေါ၊ ဣဒမ္ပိမဿ မဟာပုရိသဿ မဟာပုရိသလက္ခဏံ ဘဝတိ၊ တဿိမာနိ သတ္တ ရတနာနိ ဘဝန္တိ။ ယော ဒန္ဓကာလေ တရတိ ၊ တရဏီယေ စ ဒန္ဓတိ၊ တွံသိ အာစရိယော မမ၊ အဟမ္ပိ ဒဋ္ဌုကာမောသ္မိ၊ ပိတရံ မေ ဣဓာဂတံ’’ ဣစ္စေဝမာဒီနိ ဧတဿတ္ထဿ ပရိဒီပနိယာ ကြိယာပဒမာလာ။

ယော တုမှသဒ္ဒေန ဝတ္တဗ္ဗေ အတ္ထေ နိပတတိ၊ န ပန ဟောတိ တုမှတ္ထဝါစကော၊ နေသော သဒ္ဒေါ ကြိယာပဒဿ တယောဂသဟိတတ္တံ သာဓေတိ၊ အညဒတ္ထု အညယောဂသဟိတတ္တညေဝ သာဓေတိ။ ယော စ အမှသဒ္ဒေန ဝတ္တဗ္ဗေ အတ္ထေ နိပတတိ၊ န ပန ဟောတိ အမှတ္ထဝါစကော၊ န သောပိ သဒ္ဒေါ ကြိယာပဒဿ မယောဂသဟိတတ္တံ သာဓေတိ၊ အညဒတ္ထု အညယောဂသဟိတတ္တညေဝ သာဓေတိ။

တတြ တုမှသဒ္ဒေန တာဝ ဝတ္တဗ္ဗတ္ထေ – ‘‘န ဘဝံ ဧတိ ပုညတ္ထံ၊ သိဝိရာဇဿ ဒဿနံ။ မာယသ္မာ သမဂ္ဂဿ သင်္ဃဿ ဘေဒါယ ပရက္ကမိ။ ဣဓ ဘန္တေ ဘဂဝါ ပံသုကူလံ ဓောဝတူ’’တိ ဣစ္စေဝမာဒယော ပယောဂါ။ အမှသဒ္ဒေန ပန ဝတ္တဗ္ဗတ္ထေ ‘‘ဥပါလိ တံ မဟာဝီရ၊ ပါဒေ ဝန္ဒတိ သတ္ထုနော။ သာဝကော တေ မဟာဝီရ၊ သရဏော ဝန္ဒတိ သတ္ထုနော’’တိ စ ဣစ္စေဝမာဒယော ပယောဂါ။ ဣဒမေတ္ထုပလက္ခိတဗ္ဗံ ‘‘တွံ တုမှေ အဟံ မယ’’န္တိ အတ္ထဒီပက တယောဂ မယောဂတော အညော အညတ္ထဒီပနော ပယောဂေါယေဝ အညယောဂေါ နာမ၊ တတ္ထ ပဌမပုရိသော ဘဝတီတိ။

ယဇ္ဇေဝံ ‘‘သဗ္ဗာယသံ ကူဋမတိပ္ပမာဏံ၊ ပဂ္ဂယှ သော တိဋ္ဌသိ အန္တလိက္ခေ။ ဧသ သုတွာ ပသီဒါမိ၊ ဝစော တေ ဣသိသတ္တမာ’’တိအာဒီသု ကထံ။ ဧတ္ထ ဟိ မဇ္ဈိမုတ္တမပုရိသသမ္ဘဝေါယေဝ ဒိဿတိ၊ န တု ပဌမပုရိသသမ္ဘဝေါတိ? ဝုစ္စတေ – ‘‘သဗ္ဗာယသံ ကူဋမတိပ္ပမာဏံ၊ ပဂ္ဂယှ သော တိဋ္ဌသိ အန္တလိက္ခေ’’တိအာဒီသု ‘‘သော’’တိအာဒိကဿ နာမသဒ္ဒဿ တုမှ’မှသဒ္ဒဿတ္ထဝါစကသဒ္ဒေဟိ‘‘တိဋ္ဌသီ’’တိအာဒီနံ သျာဒျန္တာနံ ပဒါနံ ဒဿနတော အစ္စန္တမဇ္ဈာဟရိတဗ္ဗေဟိ သမာနာဓိကရဏတ္တာ တဂ္ဂုဏဘူတတ္တာ စ မဇ္ဈိမုတ္တမပုရိသသမ္ဘဝေါ သမဓိဂန္တဗ္ဗော။ ဤဒိသေသု ပယောဂေသု သျာဒျန္တာနံ ဒဿနဝသေန အဝိဇ္ဇမာနာနိပိ အဇ္ဈာဟရိတဗ္ဗာနိ ‘‘တွမဟ’’မိစ္စာဒီနိ ပဒါနိ ဘဝန္တိ။ ကတ္ထစိ ပန ပရိပုဏ္ဏာနိ ဒိဿန္တိ ‘‘သာတွံ ဝင်္ကမနုပ္ပတ္တာ၊ ကထံ မဒ္ဒိ ကရိဿသိ။ သော အဟံ ဝိစရိဿာမိ၊ ဂါမာ ဂါမံ ပုရာ ပုရ’’န္တိ ဣစ္စေဝမာဒီသု။

အာချာတိကဿ ကြိယာလက္ခဏတ္တာ အလိင်္ဂဘေဒတ္တာ စ တိဏ္ဏံ လိင်္ဂါနံ သာဓာရဏဘာဝပရိဒီပနတ္ထံ အပရမ္ပိ ကြိယာပဒမာလံ ဝဒါမ –

ပုရိသော ဘဝတိ၊ ကညာ ဘဝတိ၊ စိတ္တံ ဘဝတိ၊ ပုရိသာ ဘဝန္တိ၊ ကညာယော ဘဝန္တိ၊ စိတ္တာနိ ဘဝန္တိ။ ဘော ပုရိသ တွံ ဘဝသိ၊ ဘောတိ ကညေ တွံ ဘဝသိ၊ ဘော စိတ္တ တွံ ဘဝသိ၊ ဘဝန္တော ပုရိသာ တုမှေ ဘဝထ၊ ဘောတိယော ကညာယော တုမှေ ဘဝထ၊ ဘဝန္တော စိတ္တာနိ တုမှေ ဘဝထ။ အဟံ ပုရိသော ဘဝါမိ၊ အဟံ ကညာ ဘဝါမိ၊ အဟံ စိတ္တံ ဘဝါမိ၊ မယံ ပုရိသာ ဘဝါမ၊ မယံ ကညာယော ဘဝါမ၊ မယံ စိတ္တာနိ ဘဝါမ။

ဧသ နယော အတ္တနောပဒေသု၊ သေသဝိဘတ္တီနံ သဗ္ဗပဒေသုပိ။ အယမာချာတိကဿ တိဏ္ဏံ လိင်္ဂါနံ သာဓာရဏဘာဝပရိဒီပနီ ကြိယာပဒမာလာဝ။

ဝုတ္တဉှေတံ နိရုတ္တိပိဋကေ ‘‘ကြိယာလက္ခဏမာချာတိကမလိင်္ဂဘေဒ’’မိတိ။ တတြ အလိင်္ဂဘေဒမိတိ ကော အတ္ထော? ဣတ္ထိပုမနပုံသကာနံ အဝိသေသတ္ထော ဝုစ္စတေ ‘‘အလိင်္ဂဘေဒ’’မိတိ။ ယထာ ‘‘ပုရိသော ဂစ္ဆတိ၊ ကညာ ဂစ္ဆတိ၊ စိတ္တံ ဂစ္ဆတီ’’တိ။ စတုဓာ ဥဒ္ဒိဋ္ဌကြိယာပဒေသု ယထာ ‘‘ဘဝတီ’’တိ အကာရာနန္တရတျန္တပဒံ ဂဟေတွာ ‘‘ဘဝတိ ဘဝန္တိ ဘဝသီ’’တိအာဒိနာ ကြိယာပဒမာလာ သဗ္ဗထာ ကတာ၊ ဧဝံ ‘‘ဥဗ္ဘဝတိ’’စ္စာဒီနိပိ အကာရာနန္တရတျန္တပဒါနိ ဂဟေတွာ ‘‘ဥဗ္ဘဝတိ ဥဗ္ဘဝန္တိ ဥဗ္ဘဝသီ’’တိအာဒိနာ ကြိယာပဒမာလာ သဗ္ဗထာ ကာတဗ္ဗာ။ ‘‘ဘောတိ သမ္ဘောတီ’’တိအာဒီနိ ပန ဩကာရာနန္တရတျန္တပဒါနိ၊ ‘‘ဘာဝေတိ ဝိဘာဝေတီ’’တိအာဒီနိ စ ဧကာရာနန္တရတျန္တပဒါနိ ဂဟေတွာ ပါဠိနယာနုသာရေနေဝ ပဒမာလာ ကာတဗ္ဗာ၊ နယိဓ ဝုတ္တနယာနုသာရေန။ ဤဒိသေသု ဟိ ဌာနေသု ဒုရနုဗောဓာ ကြိယာပဒဂတိ။ အတော လဗ္ဘမာနဝသေန ကြိယာပဒမာလာ ကာတဗ္ဗာ။ န ဟိ လောကေ လောကိယာ သဗ္ဗေ ဓာတုသဒ္ဒေ ပစ္စေကံ သဗ္ဗေဟိပိ ဆန္နဝုတိယာ ဝစနေဟိ ယောဇေတွာ ဝဒန္တိ၊ ဧဝံ အဝဒန္တာနမ္ပိ နေသံ ကထာ အပရိပုဏ္ဏာ နာမ န ဟောတိ၊ တသ္မာ ဝဇ္ဇေတဗ္ဗဋ္ဌာနံ ဝဇ္ဇေတွာ ယထာသမ္ဘဝံ ပဒမာလာ ကာတဗ္ဗာ။ ဧဝံ ပဉ္စမိယာဒီသုပိ ဝိဘတ္တီသု။ အယံ ဝတ္တမာနဝိဘတ္တိဝသေန ကြိယာပဒမာလာနိဒ္ဒေသော။

ဣတော ပဋ္ဌာယ ပန ယထုဒ္ဒိဋ္ဌပဒါနေဝ ပရိဏာမေတွာ ပရိဏာမေတွာ ပဉ္စမိယာဒီနံ မာတိကာဘာဝေန ဂဟေတဗ္ဗာနိ။ ဣဒါနိ ပန တယောဂါဒိသဟိတာသဟိတဝသေန ဒွိဓာ ကြိယာပဒမာလာယော ဒဿေဿာမ ကွစာဒေသဝသေန သမ္ဘူတာနိ စ ရူပန္တရာနိ သောတူနံ သုခဓာရဏတ္ထဉ္စေဝ ပုရိသပ္ပယောဂေ အသမ္မောဟတ္ထဉ္စ။

ဘဝတု၊ ဘဝန္တု။ ဘဝါဟိ၊ ဘဝ၊ ဘဝထ။ ဘဝါမိ၊ ဘဝါမ။ ဘဝတံ၊ ဘဝန္တံ။ ဘဝဿု၊ ဘဝဝှော။ ဘဝေ၊ ဘဝါမသေ။ သော ဘဝတု၊ တေ ဘဝန္တု။ တွံ ဘဝါဟိ၊ ဘဝ၊ တုမှေ ဘဝထ။ အဟံ ဘဝါမိ၊ မယံ ဘဝါမ။ သော ဘဝတံ၊ တေ ဘဝန္တံ။ တွံ ဘဝဿု၊ တုမှေ ဘဝဝှော။ အဟံ ဘဝေ၊ မယံ ဘဝါမသေ။ အယံ ပဉ္စမီဝိဘတ္တိဝသေန ကြိယာပဒမာလာနိဒ္ဒေသော။

ဘဝေယျ၊ ဘဝေ၊ ဘဝေယျုံ။ ဘဝေယျာသိ၊ ဘဝေယျာထ။ ဘဝေယျာမိ၊ ဘဝေယျာမ၊ ဘဝေမု။ ဘဝေထ၊ ဘဝေရံ။ ဘဝေထော၊ ဘဝေယျာဝှော။ ဘဝေယျံ၊ ဘဝေယျာမှေ ဣတိ ဝါ၊ သော ဘဝေယျ ၊ ဘဝေ၊ တေ ဘဝေယျုံ။ တွံ ဘဝေယျာသိ၊ တုမှေ ဘဝေယျာထ။ အဟံ ဘဝေယျာမိ၊ မယံ ဘဝေယျာမ၊ ဘဝေမု။ သော ဘဝေထ၊ တေ ဘဝေရံ။ တွံ ဘဝေထော၊ တုမှေ ဘဝေယျာဝှော။ အဟံ ဘဝေယျံ၊ မယံ ဘဝေယျာမှေ ဣတိ ဝါ။ အယံ သတ္တမီဝိဘတ္တိဝသေန ကြိယာပဒမာလာနိဒ္ဒေသော။

ဗဘူဝ၊ ဗဘူဝု။ ဗဘူဝေ၊ ဗဘူဝိတ္ထ။ ဗဘူဝံ၊ ဗဘူဝိမှ။ ဗဘူဝိတ္ထ၊ ဗဘူဝိရေ။ ဗဘူဝိတ္ထော၊ ဗဘူဝိဝှော။ ဗဘူဝိံ၊ ဗဘူဝိမှေ ဣတိ ဝါ၊ သော ဗဘူဝ၊ တေ ဗဘူဝု။ တွံ ဗဘူဝေ၊ တုမှေ ဗဘူဝိတ္ထ။ အဟံ ဗဘူဝံ၊ မယံ ဗဘူဝိမှ။ သော ဗဘူဝိတ္ထ၊ တေ ဗဘူဝိရေ။ တွံ ဗဘူဝိတ္ထော၊ တုမှေ ဗဘူဝိဝှော။ အဟံ ဗဘူဝိံ၊ မယံ ဗဘူဝိမှေ ဣတိ ဝါ။ အယံ ပရောက္ခာဝိဘတ္တိဝသေန ကြိယာပဒမာလာနိဒ္ဒေသော။

အဘဝါ၊ အဘဝူ။ အဘဝေါ၊ အဘဝတ္ထ။ အဘဝံ၊ အဘဝမှာ။ အဘဝတ္ထ၊ အဘဝတ္ထုံ။ အဘဝသေ၊ အဘဝဝှံ။ အဘဝိံ၊ အဘဝမှသေ ဣတိ ဝါ၊ သော အဘဝါ၊ တေ အဘဝူ။ တွံ အဘဝေါ၊ တုမှေ အဘဝတ္ထ။ အဟံ အဘဝံ၊ မယံ အဘဝမှာ။ သော အဘဝတ္ထ၊ တေ အဘဝတ္ထုံ။ တွံ အဘဝသေ၊ တုမှေ အဘဝဝှံ။ အဟံ အဘဝိံ၊ မယံ အဘဝမှသေ ဣတိ ဝါ။ အယံ ဟိယျတ္တနီဝိဘတ္တိဝသေန ကြိယာပဒမာလာနိဒ္ဒေသော။

အဘဝိ၊ အဘဝုံ။ အဘဝေါ၊ အဘဝိတ္ထ။ အဘဝိံ၊ အဘဝိမှာ။ အဘဝါ၊ အဘဝူ။ အဘဝသေ၊ အဘဝိဝှံ။ အဘဝှံ၊ အဘဝိမှေ ဣတိ ဝါ၊ သော အဘဝိ၊ တေ အဘဝုံ။ တွံ အဘဝေါ၊ တုမှေ အဘဝိတ္ထ။ အဟံ အဘဝိံ၊ မယံ အဘဝိမှာ။ သော အဘဝါ၊ တေ အဘဝူ။ တွံ အဘဝသေ၊ တုမှေ အဘဝိဝှံ။ အဟံ အဘဝံ၊ မယံ အဘဝိမှေ ဣတိ ဝါ။ အယံ အဇ္ဇတနီဝိဘတ္တိဝသေန ကြိယာပဒမာလာနိဒ္ဒေသော။

ဧတ္ထ ပနဇ္ဇတနိယာ ဥံဝစနဿ ဣံသုမာဒေသဝသေန ဘဝတိနော ရူပန္တရာနိပိ ဝေဒိတဗ္ဗာနိ။ သေယျထိဒံ? တေ ဘဝိံသု၊ သမုဗ္ဘဝိံသု၊ ပဘဝိံသု၊ ပရာဘဝိံသု၊ သမ္ဘဝိံသု၊ ပါတုဘဝိံသု၊ ပါတုဗ္ဘဝိံသု ၊ ဣမာနိ အကမ္မကပဒါနိ။ ပရိဘဝိံသု၊ အဘိဘဝိံသု၊ အဓိဘဝိံသု၊ အတိဘဝိံသု၊ အနုဘဝိံသု၊ သမနုဘဝိံသု၊ အဘိသမ္ဘဝိံသု။

‘‘အဓိဘောသု’’န္တိ ရူပမ္ပိ၊ ယသ္မာ ဒိဿတိ ပါဠိယံ၊

တသ္မာ ဟိ နယတော ဉေ ယျံ၊ ‘‘ပရိဘောသု’’န္တိအာဒိကံ။

တတြာယံ ပါဠိ – ‘‘ဧဝံဝိဟာရိဉ္စာဝုသော ဘိက္ခုံ ရူပါ အဓိဘောသုံ၊ န ဘိက္ခု ရူပေ အဓိဘောသီ’’တိ။ ဣမာနိ သကမ္မကပဒါနိ၊ ဧဝမဇ္ဇတနိယာ ဥံဝစနဿ ဣံသုမာဒေသဝသေန ဘဝတိနော ရူပန္တရာနိ ဘဝန္တိ။ အပိစ

‘‘အနွဘိ’’ ဣတိရူပမ္ပိ၊ အဇ္ဇတနျာ ပဒိဿတိ၊

တသ္မာ ဟိ နယတော ဉေယျံ၊ ‘‘အဇ္ဈဘိ’’စ္စာဒိကမ္ပိ စ။

တတြာယံ ပါဠိ – သော တေန ကမ္မေန ဒိဝံ သမက္ကမိ၊ သုခဉ္စ ခိဍ္ဍာရတိယော စ အနွဘီတိ။ တတ္ထ အနွဘီတိ အနု အဘီတိ ဆေဒေါ။ အနူတိ ဥပသဂ္ဂေါ။ အဘီတိ အာချာတိကပဒန္တိ ဒဋ္ဌဗ္ဗံ။

ဘဝိဿတိ၊ ဘဝိဿန္တိ။ ဘဝိဿသိ၊ ဘဝိဿထ။ ဘဝိဿာမိ၊ ဘဝိဿာမ။ ဘဝိဿတေ၊ ဘဝိဿန္တေ။ ဘဝိဿသေ၊ ဘဝိဿဝှေ။ ဘဝိဿံ၊ ဘဝိဿာမှေ ဣတိ ဝါ၊ သော ဘဝိဿတိ၊ တေ ဘဝိဿန္တိ။ တွံ ဘဝိဿသိ၊ တုမှေ ဘဝိဿထ။ အဟံ ဘဝိဿာမိ၊ မယံ ဘဝိဿာမ။ သော ဘဝိဿတေ၊ တေ ဘဝိဿန္တေ။ တွံ ဘဝိဿသေ၊ တုမှေ ဘဝိဿဝှေ။ အဟံ ဘဝိဿံ၊ မယံ ဘဝိဿာမှေ ဣတိ ဝါ။ အယံ ဘဝိဿန္တီဝိဘတ္တိဝသေန ကြိယာပဒမာလာနိဒ္ဒေသော။

အဘဝိဿာ၊ အဘဝိဿံသု။ အဘဝိဿေ၊ အဘဝိဿထ။ အဘဝိဿံ၊ အဘဝိဿာမှာ။ အဘဝိဿထ၊ အဘဝိဿိသု။ အဘဝိဿသေ၊ အဘဝိဿဝှေ။ အဘဝိဿိံ၊ အဘဝိဿာမှသေ ဣတိ ဝါ၊ သော အဘဝိဿာ၊ တေ အဘဝိဿံသု။ တွံ အဘဝိဿေ၊ တုမှေ အဘဝိဿထ။ အဟံ အဘဝိဿံ၊ မယံ အဘဝိဿာမှာ။ သော အဘဝိဿထ၊ တေ အဘဝိဿိသု။ တွံ အဘဝိဿသေ၊ တုမှေ အဘဝိဿဝှေ။ အဟံ အဘဝိဿိံ၊ မယံ အဘဝိဿာမှသေ ဣတိ ဝါ။ အယံ ကာလာတိပတ္တိဝိဘတ္တိဝသေန ကြိယာပဒမာလာနိဒ္ဒေသော။

ဝေါဟာရဘေဒကုသလေန သုဗုဒ္ဓိနာ ယော၊

ကစ္စာယနေန ကထိတော ဇိနသာသနတ္ထံ၊

တျာဒိက္ကမော တဒနုဂံ ကိရိယာပဒါနံ၊

ကတွာ ကမော ဘဝတိဓာတုဝသေန ဝုတ္တော။

ဣတိ နဝင်္ဂေ သာဋ္ဌကထေ ပိဋကတ္တယေ ဗျပ္ပထဂတီသု ဝိညူနံ

ကောသလ္လတ္ထာယ ကတေ သဒ္ဒနီတိပ္ပကရဏေ

ဘဝတိနော ကြိယာပဒမာလာဝိဘာဂေါ နာမ

ဒုတိယော ပရိစ္ဆေဒေါ။