📜

၃။ ပကိဏ္ဏကဝိနိစ္ဆယ

ဣတော ပရံ ပဝက္ခာမိ၊ ပကိဏ္ဏကဝိနိစ္ဆယံ၊

သပ္ပယောဂေသု အတ္ထေသု၊ ဝိညူနံ ပါဋဝတ္ထယာ။

တတ္ထ အတ္ထုဒ္ဓါရော၊ အတ္ထသဒ္ဒစိန္တာ၊ အတ္ထာတိသယယောဂေါ၊ သမာနာသမာနဝသေနဝစနသင်္ဂဟော၊ အာဂမလက္ခဏဝသေန ဝိဘတ္တိဝစနသင်္ဂဟော၊ ကာလဝသေန ဝိဘတ္တိဝစနသင်္ဂဟော၊ ကာလသင်္ဂဟော၊ ပကရဏသံသန္ဒနာ၊ ဝတ္တမာနာဒီနံ ဝစနတ္ထဝိဘာဝနာ စာတိ နဝဓာ ဝိနိစ္ဆယော ဝေဒိတဗ္ဗော။

အတ္ထုဒ္ဓါရေ တာဝ သမာနသုတိကပဒါနမတ္ထုဒ္ဓါရဏံ ကရိဿာမ။ ဧတ္ထာချာတပဒသညိတာနံ ဘောတိသဒ္ဒ ဘဝေသဒ္ဒါနမတ္ထော ဥဒ္ဓရိတဗ္ဗော။ တထာ ဟေတေ နာမိကပဒသညိတေဟိ အပရေဟိ ဘောတိသဒ္ဒ ဘဝေသဒ္ဒေဟိ သမာနသုတိကာပိ အသမာနတ္ထာ စေဝ ဟောန္တိ အသမာနဝိဘတ္တိကာ စ။ သာသနသ္မိဉှိ ကေစိ သဒ္ဒါ အညမညံ သမာနသုတိကာ သမာနာပိ အသမာနတ္ထာ အသမာနပဝတ္တိနိမိတ္တာ အသမာနလိင်္ဂါ အသမာနဝိဘတ္တိကာ အသမာနဝစနကာ အသမာနန္တာ အသမာနကာလိကာ အသမာနပဒဇာတိကာ စ ဘဝန္တိ။

တေသမသမာနတ္ထတ္တေ ‘‘သဗ္ဗဉှိ တံ ဇီရတိ ဒေဟနိဿိတံ။ အပ္ပဿုတာယံ ပုရိသော၊ ဗလိဗဒ္ဒေါဝ ဇီရတိ။ သန္တော တသိတော။ ပဟု သန္တော န ဘရတိ။ သန္တော အာစိက္ခတေ မုနိ။ သန္တော သပ္ပုရိသာ လောကေ။ သန္တော သံဝိဇ္ဇမာနာ လောကသ္မိ’’န္တိ ဧဝမာဒယော ပယောဂါ။ ဧတ္ထ ဇီရတိသဒ္ဒဒွယံ ယထာသမ္ဘဝံ နဝဘာဝါပဂမဝဍ္ဎနဝါစကံ။ သန္တောသဒ္ဒပဉ္စကံ ယထာသမ္ဘဝံ ပရိဿမပ္ပတ္တသမာနောပသန္တောပလဗ္ဘမာနဝါစကန္တိ ဒဋ္ဌဗ္ဗံ။

အသမာနပဝတ္တိနိမိတ္တတ္တေ ပန ‘‘အကတညူ မိတ္တဒုဗ္ဘီ၊ အဿဒ္ဓါ အကတညူစာ’’တိဧဝမာဒယော။ ဧတ္ထ စ အကတညူသဒ္ဒဒွယံ ကတာကတာဇာနနဇာနနပဝတ္တိနိမိတ္တံ ပဋိစ္စ သမ္ဘူတတ္တာ အသမာနပဝတ္တိနိမိတ္တကန္တိ ဒဋ္ဌဗ္ဗံ။

အသမာနလိင်္ဂတ္တေ ‘‘သုခီ ဟောတု ပဉ္စသိခ သက္ကော ဒေဝါနမိန္ဒော။ တွဉ္စ ဘဒ္ဒေ သုခီ ဟောဟိ။ ယတ္ထ သာ ဥပဋ္ဌိတော ဟောတိ။ မာတာ မေ အတ္ထိ၊ သာ မယာ ပေါသေတဗ္ဗာ’’တိ ဧဝမာဒယော။ ဧတ္ထ သုခီသဒ္ဒဒွယံ သာသဒ္ဒဒွယဉ္စ ပုမိတ္ထိလိင်္ဂဝသေန အသမာနလိင်္ဂန္တိ ဒဋ္ဌဗ္ဗံ။

အသမာနဝိဘတ္တိကတ္တေ ‘‘အာဟာရေ ဥဒရေ ယတော။ ယတော ပဇာနာတိ သဟေတုဓမ္မ’’န္တိ ဧဝမာဒယော။ ဧတ္ထ ယတောသဒ္ဒဒွယံ ပဌမာပဉ္စမီဝိဘတ္တိသဟိတတ္တာ အသမာနဝိဘတ္တိကန္တိ ဒဋ္ဌဗ္ဗံ။

အသမာနဝစနကတ္တေ ဣမေ ပယောဂါ –

‘‘ယာယ မာတု ဘတော ပေါသော၊ ဣမံ လောကံ အဝေက္ခတိ၊

တမ္ပိ ပါဏဒဒိံ သန္တိံ၊ ဟန္တိ ကုဒ္ဓါ ပုထုဇ္ဇနော’’တိ

အာဒီသု ဟန္တိသဒ္ဒေါ ဧကဝစနော။

‘‘ဣမေ နူန အရညသ္မိံ၊ မိဂသင်္ဃာနိ လုဒ္ဒကာ၊

ဝါကုရာဟိ ပရိက္ခိပ္ပ၊ သောဗ္ဘံ ပါတေတွာ တာဝဒေ၊

ဝိက္ကောသမာနာ တိဗ္ဗာဟိ၊ ဟန္တိ နေသံ ဝရံ ဝရ’’န္တိ။

အာဒီသု ပန ဗဟုဝစနော။ ‘‘သီလဝါ ဝတ္တသမ္ပန္နော။ ဧထ တုမှေ အာယသ္မန္တော သီလဝါ ဟောထ။ သန္တော ဒန္တော နိယတော ဗြဟ္မစာရီ။ သန္တော ဟဝေ သဗ္ဘိ ပဝေဒယန္တိ။ မဟာရာဇာ ယသဿီ သော။ စတ္တာရော မဟာရာဇာ’’တိ ဧဝမာဒီသု သီလဝါသဒ္ဒါဒယော ဧကဝစနဗဟုဝစနကာ။

အသမာနန္တတ္တေ ပန ယတ္ထ သမာနသုတိကာနံ အသမာနဝိဘတ္တိကတ္တံ ဝါ အသမာနဝစနတ္တံ ဝါ ဥပလဗ္ဘတိ။ တေယေဝ ပယောဂါ။ တံ ယထာ? ‘‘သတံ သမ္ပဇာနံ၊ သတံ ဓမ္မော၊ သန္တော ဒန္တော၊ သန္တော သပ္ပုရိသာ’’ ဣစ္စေဝမာဒယော။

အသမာနကာလတ္တေ ‘‘နနု တေ သုတံ ဗြာဟ္မဏ ဘညမာနေ၊ ဒေဝါ န ဣဿန္တိ ပုရိသပရက္ကမဿ။ တေ ဇနာ ပါရမိဿန္တိ၊ မစ္စုဓေယျံ သုဒုတ္တရ’’န္တိ ဧဝမာဒယော။ ဧတ္ထ ဣဿန္တိသဒ္ဒဒွယံ ဝတ္တမာနာဘဝိဿန္တီကာလဝသေန အသမာနကာလန္တိ ဒဋ္ဌဗ္ဗံ။ ဝတ္တမာနာဘဝိဿန္တီဝိဘတ္တိဝသေန ပန အသမာနဝိဘတ္တိကန္တိပိ။

အသမာနပဒဇာတိကတ္တေ ‘‘သယံ သမာဟိတော နာဂေါ၊ သယံ အဘိညာယ ကမုဒ္ဒိသေယျံ။ ပထေ ဓာဝန္တိယာ ပတိ၊ ဧကံသံ အဇိနံ ကတွာ၊ ပါဒေသု သိရသာ ပတိ။ ဂိရိံ စဏ္ဍောရဏံ ပတီ’’တိ ဧဝမာဒယော။ ဧတ္ထ သယံသဒ္ဒဒွယံ နာမနိပါတဝသေန ပတိသဒ္ဒတ္တယံ နာမာချာတောပသဂ္ဂဝသေန အသမာနပဒဇာတိကန္တိ ဒဋ္ဌဗ္ဗံ။

ဣမိနာ နယေန သဗ္ဗတ္ထ ဝိတ္ထာရေတဗ္ဗံ။ ဧဝံ သာသနသ္မိံ ကေစိ သဒ္ဒါ အညမညံ သမာနသုတိကာ သမာနာပိ အသမာနတ္ထာ အသမာနပဝတ္တိနိမိတ္တာ အသမာနလိင်္ဂါ အသမာနဝိဘတ္တိကာ အသမာနဝစနကာ အသမာနန္တာ အသမာနကာလိကာ အသမာနပဒဇာတိကာ စ ဘဝန္တိ။ ဧတာဒိသေသု သဒ္ဒေသု ယော ကြိယာပဒတ္တံ ပကာသေတိ၊ န သော နာမိကပဒတ္တံ။ ယော စ နာမိကပဒတ္တံ ပကာသေတိ၊ န သော ကြိယာပဒတ္တံ။ ဧဝံ သန္တေပိ သုတိသာမညတော ဧကတ္တေန ဂဟေတွာ အတ္ထုဒ္ဓါရော ကရဏီယောတိ ယထာဝုတ္တကြိယာပဒါနံ နာမပဒေဟိ သမာနသုတိကာနံ ဘောတိသဒ္ဒ ဘဝေ သဒ္ဒါနမတ္ထုဒ္ဓါရံ ဝဒါမ။

ကထံ? ဘောတိသဒ္ဒေါ ကတ္တုယောဂေ ကြိယာပဒံ၊ ကြိယာယောဂေ နာမိကပဒံ၊ တသ္မာ သော ဒွီသု အတ္ထေသု ဝတ္တတိ ကြိယာပဒတ္ထေ နာမိကပဒတ္ထေ စ။ တတ္ထ ကြိယာပဒတ္ထေ ဝတ္တမာနဝသေန၊ နာမိကပဒတ္ထေ ပနာလပနဝသေန။ ကြိယာပဒတ္ထေ တာဝ ‘‘ဧကော ဘောတိ’’၊ နာမိကပဒတ္ထေ ‘‘မာ ဘောတိ ပရိဒေဝေသိ’’။ အတြိဒံ ဝုစ္စတိ –

ဘာဝေ နာမပဒတ္ထေ စ၊ အာလပနဝိသေသိတေ၊

ဣမေသု ဒွီသု အတ္ထေသု၊ ဘောတိသဒ္ဒေါ ပဝတ္တတိ။

ဘဝေသဒ္ဒေါ ပန ‘‘ဘဝါမီ’’တိမဿ ဝတ္တမာနာဝိဘတ္တိယုတ္တဿ သဒ္ဒဿတ္ထေပိ ဝတ္တတိ။ ‘‘ဘဝါမီ’’တိမဿ ပဉ္စမီဝိဘတ္တိယုတ္တဿ သဒ္ဒဿ အာဏတျာသီသနတ္ထေသုပိ ဝတ္တတိ။ ‘‘ဘဝေယျာမီ’’တိမဿ သတ္တမီဝိဘတ္တိသဟိတဿ သဒ္ဒဿ အနုမတိပရိကပ္ပတ္ထေသုပိ ဝတ္တတိ။ တတြိဒံ ပဌမတ္ထဿ သာဓကံ အာဟစ္စဝစနံ –

‘‘ဒေဝါနံ အဓိကော ဟောမိ၊ ဘဝါမိ မနုဇာဓိပေါ၊

ရူပလက္ခဏသမ္ပန္နော၊ ပညာယ အသမော ဘဝေ’’တိ။

အယံ ပန သဗ္ဗေသံ တေသမတ္ထာနံ သာဓိကာ အမှာကံ ဂါထာရစနာ –

‘‘သုခီ ဘဝတိ ဧသော စ၊ အဟဉ္စာပိ သုခီ ဘဝေ၊

သုခီ ဘဝတု ဧသော စ၊ အဟဉ္စာပိ သုခီ ဘဝေ။

ဣမာယ ဗုဒ္ဓပူဇာယ၊ ဘဝန္တု သုခိတာ ပဇာ၊

ဘဝေ’ဟဉ္စ သုခပ္ပတ္တော၊ သာမစ္စော သဟ ဉာတိဘိ။

သုခီ ဘဝေယျ ဧသော စ၊ အဟဉ္စာပိ သုခီ ဘဝေ၊

သုခီ ဘဝေယျ စေ ဧသော၊ အဟဉ္စာပိ သုခီ ဘဝေ’’တိ။

ဣစ္စေဝံ –

ဝတ္တမာနာယ ပဉ္စမျံ၊ သတ္တမျဉ္စ ဝိဘတ္တိယံ၊

ဧတေသု တီသု ဌာနေသု၊ ဘဝေသဒ္ဒေါ ပဝတ္တတိ။

ဧကဓာ ဝတ္တမာနာယံ၊ ပဉ္စမီသတ္တမီသု စ၊

ဒွေဓာ ဒွေဓာတိမဿတ္ထံ၊ ပဉ္စဓာ ပရိဒီပယေ။

ဒွေဓာ ဝါ ဝတ္တမာနာယ-မာဒိပုရိသဝါစကော၊

အတ္ထော ‘‘ဘဝေ’’တိ ဧတဿ၊ ‘‘ဘဝတီ’’တိပိယုဇ္ဇတိ။

ဣဒါနိ ပန ဧတဿ၊ ဝုတ္တဿတ္ထဿ သာဓကံ၊

ဧတ္ထ ပါဠိပ္ပဒေသံ တု၊ အာဟရိဿံ သုဏာထ မေ။

ကော’ယံ မဇ္ဈေသမုဒ္ဒသ္မိံ၊ အပဿံ တီရမာယုဟေ၊

ကံ တွံ အတ္ထဝသံ ဉတွာ၊ ဧဝံ ဝါယမသေ ဘုသံ။

နိသမ္မ ဝတ္တံ လောကဿ၊ ဝါယာမဿ စ ဒေဝတေ၊

တသ္မာ မဇ္ဈေသမုဒ္ဒသ္မိံ၊ အပဿံ တီရမာယုဟေ။

အဿံ ပုရိမဂါထာယံ၊ ‘‘အာယုဟေ’’တိပဒဿ ဟိ၊

‘‘အာယူဟတီ’’တိ အတ္ထောတိ၊ ဝိညာတဗ္ဗော ဝိဘာဝိနာ။

ဝိဘတ္တိယာ ဝိပလ္လာသ-ဝသေနာယံ သမီရိတော၊

ဝတ္တမာနေ သတ္တမီတိ၊ တိဿေကာရဝသေန ဝါ။

ပစ္ဆိမာယ စ ဂါထာယံ၊ ‘‘အာယုဟေ’’တိပဒဿ တု၊

‘‘အာယူဟာမီ’’တိ အတ္ထောတိ၊ သဒ္ဒတ္ထညူ ဝိဘာဝယေ။

တထာ ‘‘ဘဝေ’’တိဧတဿ၊ ဝတ္တမာနာဝိဘတ္တိယံ၊

‘‘ဘဝတီ’’တိ၊ ‘‘ဘဝါမီ’’တိ၊ စတ္ထံ ဒွေဓာ ဝိဘာဝယေ။

ဧဝံဝိဓေသု အညေသု၊ ပါဌေသုပိ အယံ နယော၊

နေတဗ္ဗော နယဒက္ခေန၊ နယသာဂရသာသနေ။

ဧဝမယံ ဘဝေသဒ္ဒေါ ပဉ္စသု ဆသု ဝါ ကြိယာပဒတ္ထေသု ပဝတ္တတိ။ တထာ သတ္တမီဝိဘတျန္တနာမိကပဒဿ ဝုဒ္ဓိသံသာရကမ္မဘဝူပပတ္တိဘဝသင်္ခါတေသု အတ္ထေသုပိ။ တထာ ဟိ ‘‘အဘဝေ နန္ဒတိ တဿ၊ ဘဝေ တဿ န နန္ဒတီ’’တိအာဒီသု ဝုဒ္ဓိမှိ။ ‘‘ဘဝေ ဝိစရန္တော’’တိအာဒီသု သံသာရေ။ ‘‘ဘဝေ ခေါ သတိ ဇာတိ ဟောတိ၊ ဇာတိပစ္စယာ ဇရာမရဏ’’န္တိအာဒီသု ကမ္မဘဝေ။ ‘‘ဧဝံ ဘဝေဝိဇ္ဇမာနေ’’တိအာဒီသု ဥပပတ္တိဘဝေတိ ဒဋ္ဌဗ္ဗံ။ ဣမိနာ နယေန ဘူဓာတုတော နိပ္ဖန္နာနံ အညတောပိ အညေသံ ကြိယာပဒါနံ ယထာသမ္ဘဝမတ္ထော ဥဒ္ဓရိတဗ္ဗော။

အာချာတတ္ထမှိမေ အတ္ထာ၊ န လာတဗ္ဗာ ကုဒါစနံ၊

အတ္ထုဒ္ဓါရဝသေနေတေ၊ ဥဒ္ဓဋာ နာမတော ယတော။

ဣဒမေတ္ထ သင်္ခေပတော အတ္ထုဒ္ဓါရနယနိဒဿနံ။

အတ္ထသဒ္ဒစိန္တာယံ ပန ဧဝမုပလက္ခေတဗ္ဗံ – ‘‘ဘဝန္တေ၊ ပရာဘဝန္တေ၊ ပရာဘဝေ’’ဣစ္စာဒယော ဂစ္ဆတိ ဂစ္ဆံ ဂစ္ဆတောသဒ္ဒါဒယော ဝိယ ဝိသေသသဒ္ဒါ၊ န ယာစနောပတာပနတ္ထာဒိဝါစကော နာထတိသဒ္ဒေါ ဝိယ၊ န စ ရာဇဒေဝတာဒိဝါစကော ဒေဝသဒ္ဒေါ ဝိယ သာမညသဒ္ဒါ။ ယေ စေတ္ထ ဝိသေသသဒ္ဒါ၊ တေ သဗ္ဗကာလံ ဝိသေသသဒ္ဒါဝ။ ယေ စ သာမညသဒ္ဒါ၊ တေပိ သဗ္ဗကာလံ သာမညသဒ္ဒါဝ။

တတြ ဂစ္ဆတီတိအာဒီနံ ဝိသေသသဒ္ဒတာ ဧဝံ ဒဋ္ဌဗ္ဗာ – ဂစ္ဆတီတိ ဧကံ နာမပဒံ၊ ဧကမာချာတံ။ တထာ ဂစ္ဆန္တိ ဧကံ နာမပဒံ၊ ဧကမာချာတံ။ ဂစ္ဆတောတိ ဧကော ကိတန္တော၊ အပရော ရူဠှီသဒ္ဒေါ။ သတိပိ ဝိသေသသဒ္ဒတ္တေ သဒိသတ္တာ သုတိသာမညတော တဗ္ဗိသယံ ဗုဒ္ဓိံ နုပ္ပာဒေတိ ဝိနာဝ’တ္ထပ္ပကရဏသဒ္ဒန္တရာဘိသမ္ဗန္ဓေန။ တထာ ဟိ သဒ္ဒန္တရာဘိသမ္ဗန္ဓေန ‘‘ဂစ္ဆတိ ပတိဋ္ဌိတ’’န္တိ ဝုတ္တေ သတ္တမျန္တံ နာမပဒန္တိ ဝိညာယတိ။ ‘‘ဂစ္ဆတိ တိဿော’’တိ ဝုတ္တေ ပနာချာတန္တိ။ တထာ ‘‘သ ဂစ္ဆံ န နိဝတ္တတီ’’တိ ဝုတ္တေ ပဌမန္တံ နာမပဒန္တိ ဝိညာယတိ။ ‘‘ဂစ္ဆံ ပုတ္တနိဝေဒကော’’တိ ဝုတ္တေ အာချာတန္တိ ဝိညာယတိ။ ‘‘ဂစ္ဆတော ဟယတော ပတိတော’’တိ ဝုတ္တေ ကိတန္တောတိ ဝိညာယတိ။ ‘‘ဂစ္ဆတော ပဏ္ဏပုပ္ဖာနိ ပတန္တီ’’တိ ဝုတ္တေ ရုက္ခဝါစကော ရူဠှီသဒ္ဒေါတိ။ ဣတိ ဝိသေသသဒ္ဒါနံ အာချာတနာမာနံ နာမာချာတေဟိ သမာနသုတိကာနံ အတ္ထာဘိသမ္ဗန္ဓာဒီသု ယော ကောစိ အတ္ထဝိသေသဉာပကော သမ္ဗန္ဓော အဝဿမိစ္ဆိတဗ္ဗော။ ဧဝံ ‘‘ဂစ္ဆတီ’’တိအာဒီနံ အာချာတနာမတ္တာဒိဝသေန ပစ္စေကံ ဌိတာနံ ဧကေကတ္ထဝါစကာနံ ဝိသေသသဒ္ဒတာ ဒဋ္ဌဗ္ဗာ။

‘‘နာထတိ ဒေဝေါ’’တိအာဒီနံ ပန အာချာတနာမာနံ နာမာချာတေဟိ အသမာနသုတိကာနံ အနေကတ္ထဝါစကာနံ သာမညသဒ္ဒတာ ဧဝ ဒဋ္ဌဗ္ဗာ။ အတ္ထသမ္ဗန္ဓာဒီသု ဟိ ဝိနာ ယေန ကေနစိ သမ္ဗန္ဓေန ‘‘နာထတီ’’တိ ဝုတ္တေ ‘‘ယာစတီ’’တိ ဝါ ‘‘ဥပတာပေတီ’’တိ ဝါ ‘‘ဣဿရိယံ ကရောတီ’’တိ ဝါ ‘‘အာသီသတီ’’တိ ဝါ အတ္ထော ပဋိဘာတိ၊ တထာ ‘‘ဒေဝေါ’’တိ ဝုတ္တေ ‘‘မေဃော’’တိ ဝါ ‘‘အာကာသော’’တိ ဝါ ‘‘ရာဇာ’’တိ ဝါ ‘‘ဒေဝတာ’’တိ ဝါ ‘‘ဝိသုဒ္ဓိဒေဝေါ’’တိ ဝါ အတ္ထော ပဋိဘာတိ။ ယဒါ ပန သဒ္ဒန္တရာဘိသမ္ဗန္ဓေန ‘‘နာထတိ သုပ္ပဋိပတ္တိ’’န္တိ ဝုတ္တေ တဒါ ‘‘နာထတီ’’တိ ကြိယာပဒဿ ‘‘ယာစတီ’’တိ အတ္ထော ဝိညာယတိ၊ ‘‘နာထတိ သဗ္ဗကိလေသေ’’တိ ဝုတ္တေ ‘‘ဥပတာပေတီ’’တိ အတ္ထော ဝိညာယတိ။ ‘‘နာထတိ သကစိတ္တေ’’တိ ဝုတ္တေ ‘‘ဣဿရိယံ ကရောတီ’’တိ အတ္ထော ဝိညာယတိ။ ‘‘နာထတိ လောကဿ ဟိတ’’န္တိ ဝုတ္တေ ‘‘အာသီသတီ’’တိ အတ္ထော ဝိညာယတိ။ တထာ ‘‘ဒေဝေါ ဂဇ္ဇတီ’’တိ ဝုတ္တေ ‘‘ဒေဝေါ’’တိ နာမပဒဿ ‘‘မေဃော’’တိ အတ္ထော ဝိညာယတိ။ ‘‘ဝိဒ္ဓါ ဝိဂတဝလာဟကော ဒေဝေါ’’တိ ဝုတ္တေ ‘‘အာကာသော’’တိ အတ္ထော ဝိညာယတိ။ ‘‘ပိဝတု ဒေဝေါ ပါနီယ’’န္တိ ဝုတ္တေ ‘‘ရာဇာ’’တိ အတ္ထော ဝိညာယတိ။ ‘‘ဒေဝေါ ဒေဝကာယာ စဝတိ အာယုသင်္ခယာ’’တိ ဝုတ္တေ ‘‘ဒေဝတာ’’တိ အတ္ထော ဝိညာယတိ။ ‘‘ဒေဝါတိဒေဝေါ သတပုညလက္ခဏော’’တိ ဝုတ္တေ ‘‘ဝိသုဒ္ဓိဒေဝေါ’’တိ အတ္ထော ဝိညာယတိ။ ဣမိနာ နယေန အညေပိ သာမညသဒ္ဒါ ဉာတဗ္ဗာ။

သဗ္ဗမေတံ ဉတွာ ယထာ အတ္ထော သဒ္ဒေန၊ သဒ္ဒေါ စတ္ထေန န ဝိရုဇ္ဈတိ၊ တထာတ္ထသဒ္ဒါ စိန္တနီယာ။ တတြိဒံ ဥပလက္ခဏမတ္တံ စိန္တာကာရနိဒဿနံ – ‘‘အတ္ထကုသလာ ဘဝန္တေ’’တိ ဝါ ‘‘ကိစ္စာနိ ဘဝန္တေ’’တိ ဝါ ဝုတ္တေ ‘‘ဘဝန္တေ’’တိ ဣဒံ ‘‘ဘဝန္တီ’’တိမိနာ သမာနတ္ထမာချာတပဒန္တိ ဧဝမတ္ထော စ သဒ္ဒေါ စ စိန္တနီယော။ ‘‘ဘဝန္တေ ပဿာမီ’’တိ ဝါ ‘‘ဣစ္ဆာမီ’’တိ ဝါ ဝုတ္တေ ဥပယောဂတ္ထဝံ နာမပဒန္တိ ဧဝမတ္ထော စ သဒ္ဒေါ စ စိန္တနီယော။ ‘‘ဘဝန္တေ ဇနေ ပသံသတီ’’တိ ဝါ ‘‘ကာမေတီ’’တိ ဝါ ဝုတ္တေ ပစ္စတ္တောပယောဂတ္ထဝန္တာနိ ဒွေ နာမပဒါနီတိ ဧဝမတ္ထော စ သဒ္ဒေါ စ စိန္တနီယော။ ‘‘စောရာ ပရာဘဝန္တေ’’တိ ဝုတ္တေ ‘‘ပရာဘဝန္တေ’’တိ ဣဒံ ‘‘ပရာဘဝန္တီ’’တိမိနာ သမာနတ္ထမာချာတိကပဒန္တိ ဧဝမတ္ထော စ သဒ္ဒေါ စ စိန္တနီယော။ ‘‘ပရာဘဝန္တေ ဇနာ ဣစ္ဆန္တိ အမိတ္တာန’’န္တိ ဝုတ္တေ ‘‘ပရာဘဝန္တေ’’တိ ဣမာနိ ဥပယောဂပစ္စတ္တတ္ထဝန္တာနိ ဒွေ နာမပဒါနီတိ ဧဝမတ္ထော စ သဒ္ဒေါ စ စိန္တနီယော။ ‘‘ဧသော ပရာဘဝေ’’တိ ဝုတ္တေ ‘‘ပရာဘဝေ’’တိ ဣဒံ ‘‘ပရာဘဝေယျာ’’တိမိနာ သမာနတ္ထမာချာတပဒန္တိ ဧဝမတ္ထော စ သဒ္ဒေါ စ စိန္တနီယော။ ‘‘ဧတေ ပရာဘဝေ လောကေ၊ ပဏ္ဍိတော သမဝေက္ခိယာ’’တိ ဝုတ္တေ ‘‘ပရာဘဝေ’’တိ ဣဒံ ဥပယောဂတ္ထဝံ ဗဟုဝစနံ နာမပဒန္တိ ဧဝမတ္ထော စ သဒ္ဒေါ စ စိန္တနီယော။ ‘‘ပရာဘဝေ သတီ’’တိ ဝုတ္တေ ဘာဝလက္ခဏဘုမ္မတ္ထေကဝစနကံ နာမပဒန္တိ ဧဝမတ္ထော စ သဒ္ဒေါ စ စိန္တနီယော။ ‘‘တုမှေ မေ ပသာဒါ သမ္ဘဝေ’’တိ ဝုတ္တေ ‘‘သမ္ဘဝေ’’တိ ဣဒံ ‘‘သမ္ဘဝထာ’’တိမိနာ သမာနတ္ထမာချာတပဒန္တိ ဧဝမတ္ထော စ သဒ္ဒေါ စ စိန္တနီယော။ ‘‘ဧဟိ တွံ သမ္ဘဝဝှေ’’တိ ဝုတ္တေ ‘‘သမ္ဘဝဝှေ’’တိ ဣဒံ သမ္ဘဝါယ နာမ ဣတ္ထိယာ ဝါစကံ ဣတ္ထိလိင်္ဂံ သာလပနံ နာမိကပဒန္တိ ဧဝမတ္ထော စ သဒ္ဒေါ စ စိန္တနီယော။ ‘‘ဧဟိ တွံ သမ္ဘဝဝှေပတိဋ္ဌိတ’’န္တိ ဝုတ္တေ သမ္ဘဝနာမကဿ ပုရိသဿ ဝါစကံ ပုလ္လိင်္ဂံ ဘုမ္မဝစနန္တိ ဧဝမတ္ထော စ သဒ္ဒေါ စ စိန္တနီယော။

‘‘ဝရုဏော ဗြဟ္မဒေဝေါ စ၊ အဟေသုံ အဂ္ဂသာဝကာ၊

သမ္ဘဝေါ နာမုပဋ္ဌာကော၊ ရေဝတဿ မဟေသိနော’’တိ –

ဟိ ပါဠိ။ ‘‘ဓမ္မာ ပါတုဘဝန္တေ’’တိ ဝုတ္တေ ‘‘ပါတုဘဝန္တေ’’တိ ဣဒံ ‘‘ပါတုဘဝန္တီ’’တိမိနာ သမာနတ္ထံ သနိပါတမာချာတပဒန္တိ ဧဝမတ္ထော စ သဒ္ဒေါ စ စိန္တနီယော။ ‘‘ပါတု ဘဝန္တေ ဇနေ’’တိ ဝုတ္တေ ‘‘တေ ဇနေ ဘဝံ ရက္ခတူ’’တိ အတ္ထဝါစကာနိ အာချာတကိတန္တသဗ္ဗနာမိကပဒါနီတိ ဧဝမတ္ထော စ သဒ္ဒေါ စ စိန္တနီယော။ ‘‘ပါတုဘဝသေ တွံ ဂုဏေဟီ’’တိ ဝုတ္တေ ‘‘ပါတုဘဝသေ’’တိ ဣဒံ ‘‘ပါတုဘဝသီ’’တိမိနာ သမာနတ္ထမာချာတပဒန္တိ ဧဝမတ္ထော စ သဒ္ဒေါ စ စိန္တနီယော။ ‘‘ပါတုဘဝသေ ဂုဏေ ယော တွ’’န္တိ ဝုတ္တေ ‘‘ပါတုဘဝါဟိ အတ္တနော ဂုဏဟေတု တွ’’န္တိ အတ္ထဝါစကာနိနိပါတယုတ္တာချာတနာမပဒါနီတိ ဧဝမတ္ထော စ သဒ္ဒေါ စ စိန္တနီယော။ ‘‘အဟမတ္တနော ဂုဏေဟိ ပါတုဘဝေ’’တိ ဝုတ္တေ ‘‘ပါတုဘဝေ’’တိ ဣဒံ ‘‘ပါတုဘဝါမီ’’တိမိနာ သမာနတ္ထံ သနိပါတမာချာတပဒန္တိ ဧဝမတ္ထော စ သဒ္ဒေါ စ စိန္တနီယော။ ‘‘မံ ပါတု ဘဝေ ဣဒံ ပုညကမ္မ’’န္တိ ဝုတ္တေ ‘‘မံ ရက္ခတု သံသာရေ ဣဒံ ပုညကမ္မ’’န္တိ အတ္ထဝါစကာနိ အာချာတနာမပဒါနီတိ ဧဝမတ္ထော စ သဒ္ဒေါ စ စိန္တနီယော။ ဣမိနာ နယေန သဗ္ဗတ္ထ ယထာရဟမတ္ထသဒ္ဒါ စိန္တနီယာ။ တတ္ထ သမာနသုတိကာနံ ကေသဉ္စိ သဒ္ဒါနံ ‘‘န တေသံ ကောဋ္ဌေ ဩပေန္တိ။ န တေသံ အန္တရာ ဂစ္ဆေ။ သတ္တ ဝေါ လိစ္ဆဝီ အပရိဟာနီယေ ဓမ္မေ ဒေသေဿာမိ၊ ဣမေ တေ ဒေဝ သတ္တဝေါ၊ တွဉ္စ ဥတ္တမသတ္တဝေါ’’တိအာဒီသု သမာနသုတိကာနံ ဝိယ ဥစ္စာရဏဝိသေသော ဣစ္ဆနီယော။ ဥစ္စာရဏဝိသေသေ ဟိ သတိ ပဒါနိ ပရိဗျတ္တာနိ၊ ပဒေသု ပရိဗျတ္တေသု အတ္ထော ပရိဗျတ္တော ဟောတိ၊ အတ္ထပရိဂ္ဂါဟကာနံ အတ္ထာဓိဂမော အကိစ္ဆော ဟောတိ၊ သုပရိသုဒ္ဓါဒါသတလေ ပဋိဗိမ္ဗဒဿနံ ဝိယ၊ သော စ ဂဟိတပုဗ္ဗသင်္ကေတဿ အတ္ထသမ္ဗန္ဓာဒီသု အညတရသ္မိံ ဉာတေယေဝ ဟောတိ၊ န ဣတရထာ။ ဝုတ္တဉှေတံ ပေါရာဏေဟိ –

‘‘ဝိသယတ္တမနာပန္နာ၊ သဒ္ဒါ နေဝတ္ထဗောဓကာ၊

န ပဒမတ္တတော အတ္ထေ၊ တေ အညာတာ ပကာသကာ’’တိ။

ယဒိဒမေတ္ထ ဝုတ္တမမှေဟိ ‘‘ဥစ္စာရဏဝိသေသော ဣစ္ဆနီယော’’တိ။ အတြာယမုစ္စာရဏဝိသေသဒီပနီ ဂါထာ သဟတ္ထပ္ပကာသနနယဒါနဂါထာယ။

‘‘န တေ သံ ကောဋ္ဌေ ဩပေန္တိ’’၊ ဣတိ ပါဌေ သုမေဓသော၊

ပဒံ ‘‘န တေ’’တိ ဆိန္ဒိတွာ၊ ‘‘သံ ကောဋ္ဌေ’’တိ ပဌေယျ ဝေ။

‘‘သံ န ဩပေန္တိ ကောဋ္ဌေ တေ၊ ဘိက္ခူ’’တိ အတ္ထမီရယေ၊

ဧဝမိမေသု အညေသု၊ ပါဌေသုပိ အယံ နယော။

အထ ယံ ပနိဒမ္ပိ ဝုတ္တံ ‘‘ကေသဉ္စီ’’တိ၊ တံ ကိမတ္ထံ? ‘‘ဂစ္ဆတိ ပတိဋ္ဌိတံ၊ ဂစ္ဆတိ တိဿော၊ ဘဝန္တေ ပဿာမိ၊ အတ္ထကုသလာ ဘဝန္တေ၊ ဝဒန္တံ ဧကပေါက္ခရာ၊ ဝဒန္တံ ပဋိဝဒတီ’’တိအာဒီသု သမာနသုတိကာနမုစ္စာရဏဝိသေသော န လဗ္ဘတီတိ ဒဿနတ္ထံ။ တသ္မာ ဣဒမေတ္ထ သလ္လက္ခေတဗ္ဗံ – ယတ္ထ သမာနသုတိကာနမုစ္စာရဏဝိသေသော လဗ္ဘတိ အတ္ထဝိသေသော စ ပဒါနံ ဝိဘာဂဝသေန ဝါ အဝိဘာဂဝသေန ဝါ၊ တတ္ထ ပယောဂေ သမာနသုတိကမေကစ္စံ ပဒံ ဝိစ္ဆိန္ဒိတွာ ဥစ္စာရေတဗ္ဗံ။ သေယျထိဒံ? ‘‘ဟေတု ဟေတုသမ္ပယုတ္တကာနံ ဓမ္မာနံ တံသမုဋ္ဌာနာနဉ္စ ရူပါနံ ဟေတုပစ္စယေန ပစ္စယော။ သော တေန သဒ္ဓိံ ဘာသတိ၊ သောတေန ဝုယှတိ။ ဘဝန္တေ ဇနေ ပသံသတိ၊ ဘဝန္တေ ပဿာမီ’’တိ ဧဝမာဒယော ပယောဂါ။ ဧတ္ထ ‘‘ဟေတူ’’တိ ဤသကံ ဝိစ္ဆိန္ဒိတွာ ‘‘ဟေတုသမ္ပယုတ္တာန’’န္တိ ဥစ္စာရေတဗ္ဗံ။ တထာ ‘‘သော’’တိ ဝိစ္ဆိန္ဒိတွာ ‘‘တေန သဒ္ဓိ’’န္တိ ဥစ္စာရေတဗ္ဗံ။ ‘‘ဘဝ’’န္တိ ဝိစ္ဆိန္ဒိတွာ ‘‘တေ ဇနေ’’တိ ဥစ္စာရေတဗ္ဗံ။

သေသံ ပန သမာနသုတိကံ ဝိစ္ဆိန္ဒိတွာ န ဥစ္စာရေတဗ္ဗံ။ အဝိစ္ဆိန္ဒနီယသ္မိဉှိ ဌာနေ ဝိစ္ဆိန္ဒိတွာ ပဌိတဿ အတ္ထော ဒုဋ္ဌော ဟောတိ။ ဧဝံ ပဒဝိဘာဂါဝိဘာဂဝသေန သမာနသုတိကာနမတ္ထုစ္စာရဏဝိသေသော ဝေဒိတဗ္ဗော။ ဧတ္ထ ဟိ ‘‘သော တေနာ’’တိအာဒီသု ဒွိပဒတ္ထဂ္ဂဟဏံ ဝိဘာဂေါ၊ ဧကပဒတ္ထဂ္ဂဟဏမဝိဘာဂေါတိ အဓိပ္ပေတော။ ဧတ္ထ စ ဝိသုံ ဝဝတ္ထိတာနံ အသမာနသုတိကာနံ ဧကတော ကတွာ သမာနသုတိကဘာဝပရိကပ္ပနံ အတ္ထန္တရဝိညာပနတ္ထဉ္စေဝ ဥစ္စာရဏဝိသေသဒဿနတ္ထဉ္စ။ န ဟိ ဧတာနိ ‘‘သပ္ပော သပ္ပော’’တိအာဒီသု ဝိယ ဧကသ္မိံယေဝတ္ထေ သမာနသုတိကာနိ။ ဧဝံ သန္တေပိ ဧကဇ္ဈကရဏေန လဒ္ဓံ သမာနသုတိလေသံ ဂဟေတွာ အတ္ထန္တရဝိညာပနတ္ထံ ဥစ္စာရဏဝိသေသဒဿနတ္ထဉ္စ ‘‘သမာနသုတိကာနီ’’တိ ဝုတ္တာနိ။ ဧသ နယော အညတြာပိ ဤဒိသေသု ဌာနေသု။ ဣဒမေတ္ထ သလ္လက္ခေတဗ္ဗံ –

ယတ္ထ သမာနသုတိကာနံ အဋ္ဌာရသာကာရေသု ယေန ကေနစိ အာကာရေန အတ္ထဝိသေသော လဗ္ဘတိ၊ ဝိစ္ဆိန္ဒိတွာ ပန ဥစ္စာရဏေ သဒ္ဒဝိလာသော န ဟောတိ၊ အတ္ထော ဝါ ဒုဋ္ဌော ဟောတိ၊ န တာဒိသေသု ပယောဂေသု သမာနသုတိကာနိ ပဒါနိ ဝိစ္ဆိန္ဒိတွာ ဥစ္စာရေတဗ္ဗာနိ။ တတြ ကတမေန စာကာရေန အတ္ထဝိသေသလာဘော ဘဝတိ? ပဒါနံ ဝိဘာဂဝသေန ဝါ အဝိဘာဂဝသေန ဝါ အက္ခရသန္နိဓာနဝသေန ဝါ ပဒသန္နိဓာနဝသေန ဝါ ပဒက္ခရသန္နိဓာနဝသေန ဝါ ဝိစ္ဆာဝသေန ဝါ ကမ္မပ္ပဝစနီယဝသေန ဝါ ဘယကောဓာဒီသု ဥပ္ပန္နေသု ကထိတာမေဍိတဝစနဝသေန ဝါ ဂုဏဝါစကသဒ္ဒဿ ဒွိရုတ္တဝသေန ဝါ ကြိယာပဒဿ ဒွိရုတ္တဝသေန ဝါ သံဟိတာပဒစ္ဆေဒဝသေန ဝါ အဂါရဝတ္ထပရိဒီပနဝသေန ဝါ နိရန္တရတ္ထပရိဒီပနဝသေန ဝါ နနိရန္တရတ္ထပရိဒီပနဝသေန ဝါ ‘‘ပုနပ္ပုန’’မိစ္စတ္ထပရိဒီပနဝသေန ဝါ ဥပမာနေ ဣဝ သဒ္ဒဝသေန ဝါ ဣတိသဒ္ဒံ ပဋိစ္စ သဒ္ဒပဒတ္ထဝါစကတ္ထပရိဒီပနဝသေန ဝါ တထာပဝတ္တစိတ္တပရိဒီပနဝသေန ဝါတိ ဣမေသုဋ္ဌာရသာကာရေသု၊ ဝိတ္ထာရတော ပန ဆဗ္ဗီသာယ အာကာရေသု တတော ဝါဓိကေသု ယေန ကေနစိ အာကာရေန အတ္ထဝိသေသလာဘော ဘဝတိ။

ဧတ္ထ ပဒါနံ တာဝ ဝိဘာဂဝသေန ဝါ အဝိဘာဂဝသေန ဝါ သမာနသုတိကာနမတ္ထဝိသေသလာဘေ ‘‘သာ နံ သင်္ဂတိ ပါလေတိ၊ အဘိက္ကမော သာနံ ပညာယတိ။ မာ နော ဒေဝ အဝဓိ၊ မာနော မယှံ န ဝိဇ္ဇတီ’’တိ ဧဝမာဒယော ပယောဂါ။

အက္ခရသန္နိဓာနဝသေန ပန အတ္ထဝိသေသလာဘေ ‘‘သန္တေဟိ မဟိတော ဟိတော။ သင်္ဂါ သင်္ဂါမဇိံ မုတ္တံ၊ တမဟံ ဗြူမိ ဗြာဟ္မဏံ။ ဒါဌီ ဒါဌီသု ပက္ခန္ဒိ၊ မညမာနော ယထာ ပုရေ။ သဗ္ဗာဘိဘုံဝ သိရသာသိရသာ နမာမိ။ ဘူမိတော ဥဋ္ဌိတာ ယာဝ၊ ဗြဟ္မလောကာ ဝိဓာဝတိ။ အစ္စိ အစ္စိမတော လောကေ၊ ဍယှမာနမှိ တေဇသာ’’တိ ဧဝမာဒယော ပယောဂါ။

ပဒသန္နိဓာနဝသေန အတ္ထဝိသေသလာဘေ ‘‘အာပေါ အာပေါဂတံ။ ရာဇရာဇမဟာမတ္တာဒယော၊ သုခေါ’လောကဿ လောကဿ၊ ကာရကော ဉာဏစက္ခုဒေါ၊ နိရာပဒေ ပဒေ နိန္နော၊ အနန္တဉာဏံ ကရုဏာလယံ လယံ၊ မလဿ ဗုဒ္ဓံ သုသမာဟိတံ ဟိတံ။ နမာမိ ဓမ္မံ ဘဝသံဝရံ ဝရံ၊ ဂုဏာကရဉ္စေဝ နိရင်္ဂဏံ ဂဏ’’န္တိ ဧဝမာဒယော ပယောဂါ။

ပဒက္ခရသန္နိဓာနဝသေန အတ္ထဝိသေသလာဘေ ‘‘ပမာဏရဟိတံ ဟိတံ၊ သိဒ္ဓတ္ထော သဗ္ဗသိဒ္ဓတ္ထော၊ တိလောကမဟိတော ဟိတော။ ဥပဂန္တွာန သမ္ဗုဒ္ဓါ၊ ဣဒံ ဝစနမဗြဝီ’’တိ ဧဝမာဒယော ပယောဂါ။ တတြိမာ အက္ခရသန္နိဓာနာဒီသု အဓိပ္ပာယဝိညာပနိယော ဂါထာ –

မဟိတောဣတိ သဒ္ဒမှာ၊ မကာရော စေ ဝိဝေစိတော၊

သဒ္ဒေါ နိရတ္ထကော ဧတ္ထ၊ ‘‘အက္ခရ’’န္တိ ဝဒေ ဗုဓော။

ဉေယျာ အက္ခရယောဂေန၊

‘‘သန္တေဟိ မဟိတော ဟိတော’’၊

ဣစ္စာဒီသု သရူပါနံ၊

ဟောတိ အတ္ထဝိသေသတာ။

ဥပသဂ္ဂါ နိပါတာ စ၊ ယဉ္စညံ အတ္ထဇောတကံ၊

ဧကက္ခရမ္ပိ ဝိညူဟိ၊ တံ ‘‘ပဒ’’န္တိ သမီရိတံ။

ပဒါနံ သန္နိဓာနဉ္စ၊ ပဒက္ခရာနမေဝ စ၊

သမာသေ လဗ္ဘမာနတ္တံ၊ သန္ဓာယ လပိတံ မယာ။

ဝိစ္ဆာဝသေန အတ္ထဝိသေသလာဘေ ‘‘ဂါမေ ဂါမေ သတံ ကုမ္ဘာ၊ ဂါမော ဂါမော ရမဏီယော’’တိ ဧဝမာဒယော ပယောဂါ။ ဧတ္ထ ဟိ ဝိစ္ဆာဝသေန သဗ္ဗေပိ ဂါမာ ပရိဂ္ဂဟိတာ။

နာနာဓိကရဏာနံ တု၊ ဝတ္တုမေကက္ခဏမှိ ယာ၊

ဣစ္ဆတော ဗျာပိတုံ ဣစ္ဆာ၊ သာ ဝိစ္ဆာတိ ပကိတ္တိတာ။

ကမ္မပ္ပဝစနီယဝသေန အတ္ထဝိသေသလာဘေ ‘‘ရုက္ခံ ရုက္ခံ ပတိ ဝိဇ္ဇောတတေ စန္ဒော၊ ရုက္ခံ ရုက္ခံ ပရိ ဝိဇ္ဇောတတေ စန္ဒော’’တိ ပယောဂါ၊ ရုက္ခာနံ ဥပရိ ဥပရိ ဝိဇ္ဇောတတေတိ အတ္ထော။

ဘယကောဓာဒီသု ဥပ္ပန္နေသု ကထိတာမေဍိတဝစနဝသေန ပန အတ္ထဝိသေသလာဘေ ဣမေ ပယောဂါ – ဘယေ တာဝ ‘‘စောရော စောရော၊ သပ္ပော သပ္ပော’’ဣစ္စာဒယော။ ကောဓေ ‘‘ဝသလ ဝသလ၊ စဏ္ဍာလ စဏ္ဍာလ၊ ဝိဇ္ဈ ဝိဇ္ဈ၊ ပဟရ ပဟရ’’ဣစ္စာဒယော။ ပသံသာယံ ‘‘သာဓု သာဓု သာရိပုတ္တ၊ အဘိက္ကန္တံ ဘန္တေ အဘိက္ကန္တံ ဘန္တေ’’ဣစ္စာဒယော။ တုရိတေ ‘‘အဘိက္ကမ ဝါသေဋ္ဌ အဘိက္ကမ ဝါသေဋ္ဌ၊ ဂစ္ဆ ဂစ္ဆ၊ လုနာဟိ လုနာဟိ’’ဣစ္စာဒယော။ ကောတူဟလေ ‘‘အာဂစ္ဆ အာဂစ္ဆ’’ဣစ္စာဒယော။ အစ္ဆရိယေ ‘‘အဟော ဗုဒ္ဓါ အဟော ဗုဒ္ဓါ’’ဣစ္စာဒယော။ ဟာသေ ‘‘အဟော သုခံ အဟော သုခံ၊ အဟော မနာပံ အဟော မနာပံ’’ဣစ္စာဒယော။ သောကေ ‘‘ကဟံ ဧကပုတ္တက ကဟံ ဧကပုတ္တက’’ဣစ္စာဒယော။ ပသာဒေ ‘‘ဘဝိဿန္တိ ဝဇ္ဇီ ဘဝိဿန္တိ ဝဇ္ဇီ’’ဣစ္စာဒယော။ ဧဝံ ဘယကောဓာဒီသု ဥပ္ပန္နေသု ကထိတာမေဍိတဝစနဝသေန အတ္ထဝိသေသလာဘော ဘဝတိ။ ဧတ္ထ ပန အတ္ထန္တရာဘာဝေပိ ဒဠှီကမ္မဝသေန ပဒါနမတ္ထဇောတကဘာဝေါယေဝ အတ္ထဝိသေသလာဘော။

ဘယေ ကောဓေ ပသံသာယံ၊

တုရိတေ ကောတူဟလ’စ္ဆရေ၊

ဟာသေ သောကေ ပသာဒေ စ၊

ကရေ အာမေဍိတံ ဗုဓော။

စသဒ္ဒေါ အဝုတ္တသမုစ္စယတ္ထော၊ တေန ဂရဟာအသမ္မာနာဒီနံ သင်္ဂဟော ဒဋ္ဌဗ္ဗော။ ‘‘ပါပေါ ပါပေါ’’တိအာဒီသု ဟိ ဂရဟာယံ။ ‘‘အဘိရူပက အဘိရူပကာ’’တိအာဒီသု အသမ္မာနေ။ ‘‘ကွာယံ အဗလဗလော ဝိယာ’’တိအာဒီသု အတိသယတ္ထေ အာမေဍိတံ ဒဋ္ဌဗ္ဗံ။ ဂုဏဝါစကဿ ဒွိရုတ္တဝသေန အတ္ထဝိသေသလာဘေ ‘‘ကဏှော ကဏှော စ ဃောရော စာ’’တိ ဧဝမာဒယော။ ‘‘ကဏှော ကဏှော’’တိ ဟိ အတီဝ ကဏှောတိ အတ္ထော။ ကြိယာပဒဿ ဒွိရုတ္တဝသေန အတ္ထဝိသေသလာဘေ ‘‘ဓမေ ဓမေ နာတိဓမေ’’တိ ဧဝမာဒယော။ တတ္ထ ဓမေ ဓမေတိ ဓမေယျ နော န ဓမေယျ။ နာတိဓမေတိ ပမာဏာတိက္ကန္တံ ပန န ဓမေယျ။ သံဟိတာပဒစ္ဆေဒဝသေန အတ္ထဝိသေသလာဘေ ‘‘နရာနရာ၊ သုရာသုရာ၊ ကတာကတကုသလာကုသလဝိသယံ ဝိပ္ပဋိသာရာကာရေန ပဝတ္တံ အနုသောစနံ ကုက္ကုစ္စ’’န္တိ ဧဝမာဒယော။ ဧတ္ထ ပန ဝိညူနံ ပရမကောသလ္လဇနနတ္ထံ သိလောကံ ရစယာမ –

ဟိတာဟိတာ ဟိတံဟိတံ၊ အာနုဘာဝေန တေ ဇိန၊

ပဝရာပဝရာဟစ္စ၊ ဘဝါမာ’နာမယာ မယန္တိ။

အဂါရဝတ္ထပရိဒီပနဝသေန အတ္ထဝိသေသလာဘေ ‘‘တုဝံတုဝံ ပေသုညကလဟဝိဂ္ဂဟဝိဝါဒါ’’တိ ဧဝမာဒယော။ နိရန္တရတ္ထပရိဒီပနဝသေန အတ္ထဝိသေသလာဘေ ‘‘ဒိဝသေ ဒိဝသေ ပရိဘုဉ္ဇတီ’’တိ ဧဝမာဒယော။ နနိရန္တရတ္ထပရိဒီပနဝသေန အတ္ထဝိသေသလာဘေ ‘‘ခဏေ ခဏေ ပီတိ ဥပ္ပဇ္ဇတီ’’တိ ဧဝမာဒယော။ ‘‘ပုနပ္ပုန’’မိစ္စတ္ထပရိဒီပနဝသေန အတ္ထဝိသေသလာဘေ ‘‘မုဟုံ မုဟုံ ဘာယယတေ ကုမာရေ’’တိ ဧဝမာဒယော။ ဥပမာနေ ဣဝသဒ္ဒဝသေန အတ္ထဝိသေသလာဘေ ‘‘ရာဇာ ရက္ခတု ဓမ္မေန၊ အတ္တနောဝ ပဇံ ပဇ’’န္တိ ဧဝမာဒယော။ ဣတိသဒ္ဒံ ပဋိစ္စ သဒ္ဒပဒတ္ထဝါစကတ္တပရိဒီပနဝသေန အတ္ထဝိသေသလာဘေ ‘‘ဗုဒ္ဓါ ဗုဒ္ဓါတိ ကထယန္တော၊ သောမနဿံ ပဝေဒယိ’’န္တိ ဧဝမာဒယော။ တထာပဝတ္တစိတ္တပရိဒီပနဝသေန အတ္ထဝိသေသလာဘေ ‘‘ဗုဒ္ဓါ ဗုဒ္ဓါတိ စိန္တေန္တော၊ မဂ္ဂံ သောဓေမဟံ တဒါ’’တိ ဧဝမာဒယော။ ဧဝံ ဤဒိသေသု ပယောဂေသု သမာနသုတိကပဒံ ဝိစ္ဆိန္ဒိတွာ န ဥစ္စာရေတဗ္ဗံ။ ဝိစ္ဆိန္ဒိတွာ ဟိ ဥစ္စာရဏေ သတိ သဒ္ဒဝိလာသော န ဘဝတိ၊ ကတ္ထစိ ပန ‘‘ကတာကတာကုသလာကုသလဝိသယ’’န္တိ ဧဝမာဒီသု ဝိစ္ဆိန္ဒိတွာ ဥစ္စာရိတဿ အတ္ထော ဒုဋ္ဌော ဟောတိ၊ တသ္မာ ဝိစ္ဆိန္ဒိတွာ န ဥစ္စာရေတဗ္ဗံ၊ ဧကာဗဒ္ဓံယေဝ ကတွာ ဥစ္စာရေတဗ္ဗံ။ ဣတိ သမာနသုတိကေသု ဝိနိစ္ဆယော ဆဗ္ဗီသာယ အာကာရေဟိ အဓိကေဟိ စ မဏ္ဍေတွာ ဒဿိတော။

ယသ္မာ ပန သမာနသုတိကေသု ဝိနိစ္ဆယေ ဒဿိတေ အသမာနသုတိကေသုပိ ဝိနိစ္ဆယော ဒဿေတဗ္ဗော ဟောတိ၊ တသ္မာ တမ္ပိ ဒဿေဿာမ – ယတ္ထ နိဂ္ဂဟီတမှာ ပရာကာရလောပေါပိ ပါဌော ပညာယတိ၊ သံယောဂဗျဉ္ဇနဿ ဝိသံယောဂတ္တမ္ပိ။ တေသု ပယောဂေသု နိဂ္ဂဟီတပဒံ အနန္တရပဒေန သဒ္ဓိံ ဧကာဗဒ္ဓံယေဝ ကတွာ ဥစ္စာရေတဗ္ဗံ။ ကတမာနိ တာနိ? ‘‘သစေ ဘုတ္တော ဘဝေယျာဟံ-သာ’ဇီဝေါ ဂရဟိတော မမ။ ပုပ္ဖံ’သာ ဥပ္ပဇ္ဇိ။ ခယမတ္တံ န နိဗ္ဗာနံ’သ ဂမ္ဘီရာဒိဝါစတော’’တိ ဧဝမာဒယော။ ဧတ္ထ ဟိ ‘‘သစေ ဘုတ္တော ဘဝေယျာဟ’’န္တိအာဒိနာ ဝိစ္ဆေဒမကတွာ အနန္တရေ ဒွီသု ဂါထာပဒေသု အန္တရီဘူတာနံ ဒွိန္နံ သမာနသုတိကပဒါနံ ဧကတော ဥစ္စာရဏမိဝ အနန္တရပဒေဟိ သဒ္ဓိံ ဧကာဗဒ္ဓုစ္စာရဏဝသေန ‘‘သစေ ဘုတ္တော ဘဝေယျာဟံ-သာ’ဇီဝေါ ဂရဟိတော မမာ’’တိအာဒိနာ ဥစ္စာရေတဗ္ဗံ။ ဧဝရူပေါယေဝ ဟိ ဥစ္စာရဏဝိသေသော သကလေဟိပိ ပေါရာဏေဟိ ဝိညူဟိ အနုမတော ဥစ္စာရိတော စ ‘‘အဿ အာဇီဝေါ ဂရဟိတော မမ၊ အဿာ ဥပ္ပဇ္ဇိ၊ အဿ ဂမ္ဘီရာဒိဝါစတော’’တိဧဝမာဒိအတ္ထပ္ပဋိပါဒနဿာနုရူပတ္တာ။

ယတ္ထ ပန ယာဒိသေ ဥစ္စာရဏေ ကရိယမာနေ အတ္ထော ပရိဗျတ္တော ဟောတိ၊ တေသု ပယောဂေသု ကွစိ စသဒ္ဒ ပနသဒ္ဒါဒိယောဂဋ္ဌာနေ ဤသကံ ဝိစ္ဆိန္ဒိတွာ ပဒမုစ္စာရေတဗ္ဗံ။ သေယျထိဒံ? ‘‘ဝါဠာ စ လပသက္ခရာ။ အစ္စန္တသန္တာ ပန ယာ၊ အယံ နိဗ္ဗာနသမ္ပဒါ၊ ‘‘ဣဒံ ဒုက္ခ’’န္တိ ဝါစံ ဘာသတော ‘‘ဣဒံ ဒုက္ခ’’န္တိ ဉာဏံ ပဝတ္တတီတိ? အာမန္တာ။ ဣတိ စ ဒန္တိ စ ဒုတိ စ ခန္တိ စ ဉာဏံ ပဝတ္တတီတိ? န ဟေဝံ ဝတ္တဗ္ဗေ’’တိ ဧဝမာဒယော ပယောဂါ။

ဧတေသု ဟိ ပဌမပယောဂေ ‘‘ဝါဠာ စာ’’တိ ဤသကံ ဝိစ္ဆိန္ဒိတွာ ‘‘လပသက္ခရာ’’တိ ဥစ္စာရေတဗ္ဗံ။ တတ္ထ လပသက္ခရာတိ သက္ခရသဒိသမဓုရဝစနာ။ ဇာတကဋ္ဌကထာယံ ပန ‘‘နိရတ္ထကဝစနေဟိ သက္ခရာ ဝိယ မဓုရာ’’တိ ဝုတ္တံ၊ တသ္မာတြ ဗဟုဗ္ဗီဟိတပ္ပုရိသဝသေန ဒွိဓာ သမာသော ဒဋ္ဌဗ္ဗော ‘‘လပါ သက္ခရာ ဝိယ ယာသံ တာ လပသက္ခရာ၊ လပေဟိ ဝါ သက္ခရာ ဝိယာတိ လပသက္ခရာ’’တိ။

ဒုတိယပယောဂေ ‘‘အစ္စန္တသန္တာ ပန’’ဣတိ ဤသကံ ဝိစ္ဆိန္ဒိတွာ ‘‘ယာ’’တိ ဥစ္စာရေတဗ္ဗံ။ ယာ ပန အယံ နိဗ္ဗာနသမ္ပဒါ အစ္စန္တသန္တာတိ ဟိ အတ္ထော။

တတိယပယောဂေ ဣတိ စ ဒန္တိ စ ဒုတိ စ ခန္တိ စာတိ ဧတေသု စတူသု ဌာနေသု ဣကာရဉ္စ ဒံကာရဉ္စ ဒုကာရဉ္စ ခံကာရဉ္စ ဤသကံ ဝိစ္ဆိန္ဒိတွာ တဒနန္တရံ တိ စ သဒ္ဒါ ဥစ္စာရေတဗ္ဗာ။

ဧတ္ထ ဟိ အဝိစ္ဆိန္ဒိတွာ ဥစ္စာရဏေ သတိ အညထာ ဂဟေတဗ္ဗတ္တာ အတ္ထော ဒုဋ္ဌော ဘဝတိ။ ကထံ? ဤဒိသေသု ဌာနေသု အဝိစ္ဆိန္ဒိတွာ ဥစ္စာရဏေ သတိ ဣတိသဒ္ဒေါ ဧဝန္တိ အတ္ထဝါစကော နိပါတော သိယာ၊ သန္ဓိဝသေန ပန ဣကာရတ္ထဝါစကော ရူဠှီသဒ္ဒေါ န သိယာ။ ဒန္တိသဒ္ဒေါ ဒမနတ္ထော သိယာ၊ ဒံကာရဝါစကော န သိယာ။ ဒုတိသဒ္ဒေါ နိရတ္ထကော သိယာ၊ ဒုကာရဝါစကော န သိယာ။ ခန္တိသဒ္ဒေါ ခမနတ္ထော သိယာ၊ ခံကာရဝါစကော န သိယာ။ တသ္မာ ဣကာရ ဒံကာရ ဒုကာရ ခံကာရာနိ ဤသကံ ဝိစ္ဆိန္ဒိတဗ္ဗာနိ။

ဧတ္ထ ဟိ ဣဣတိ ဒံဣတိ ဒုဣတိ ခံဣတီတိအာဒိနာ သံဟိတာပဒစ္ဆေဒေါ ဝေဒိတဗ္ဗော၊ ပရဘူတဿ စ ဣကာရဿ လောပေါ။ န ပနေတ္ထ ဣဒံ ဝတ္တဗ္ဗံ ‘‘သရူပသရာနံ ဝိသယေ ပရဘူတဿ သရူပသရဿ လောပေါ န ဟောတိ၊ ပုဗ္ဗသရဿေဝ လောပေါ ဟောတိ တတြာယန္တိ ဧတ္ထ ဝိယာ’’တိ ‘‘အကိလာသုနော ဝဏ္ဏပထေ ခဏန္တာ၊ ဥဒင်္ဂဏေ တတ္ထ ပပံ အဝိန္ဒု’’န္တိ ပါဠိယံ သရူပပရသရဿ လောပဒဿနတော။ တထာ ဟိ အဋ္ဌကထာစရိယေဟိ ‘‘ပဝဒ္ဓံ အာပံ ပပ’’န္တိ အတ္ထော သံဝဏ္ဏိတော။ တသ္မာ ‘‘ဣတိ စာ’’တိ ဧတ္ထာပိ ဣဣတိ စာတိ ဆေဒံ ကတွာ ဒွီသု ဣကာရေသု ပရဿ ဣကာရဿ လောပေါ ကာတဗ္ဗော၊ န ပုဗ္ဗဿ။

ပုဗ္ဗသ္မိဉှိ ဣကာရဝါစကေ ဣကာရေ နဋ္ဌေ သတိ နိပါတဘူတေန ဣတိသဒ္ဒေန ဣကာရသင်္ခါတော အတ္ထော န ဝိညာယေယျ၊ နိပါတဘူတဿ ပန ဣတိသဒ္ဒဿ ဣကာရေ နဋ္ဌေပိ သော အတ္ထော ဝိညာယတေဝ ‘‘ဒေဝဒတ္တောတိ မေ သုတ’’န္တိ ဧတ္ထ ဒေဝဒတ္တပဒတ္ထော ဝိယ။ တသ္မာ ဣတိသဒ္ဒဿ ပရဘူတဿ ဣကာရဿေဝ လောပေါ ကာတဗ္ဗော၊ န ပုဗ္ဗဿ ဣကာရဝါစကဿ ဣကာရဿ။ ကစ္စာယနေ ပန ယေဘုယျပ္ပဝတ္တိံ သန္ဓာယ အသရူပသရတော ပရဿေဝ အသရူပသရဿ လောပေါ ဝုတ္တော၊ န သရူပသရတော ပရဿ သရူပသရဿ။ မဟာပဒေသသုတ္တေဟိ ဝါ သရူပဿ ပရသရဿ လောပေါ ဝုတ္တောတိ ဒဋ္ဌဗ္ဗံ။

‘‘အန္တရာ စ ရာဇဂဟံ အန္တရာ စ နာဠန္ဒ’’န္တိအာဒီသု ပန စသဒ္ဒါဒိယောဂဋ္ဌာနေပိ သတိ ဝိစ္ဆိန္ဒိတွာ ပဒံ န ဥစ္စာရေတဗ္ဗံ။ ယတ္ထ စ အာဂမက္ခရာဒီနိ ဒိဿန္တိ၊ တေသု ပယောဂေသု ပုဗ္ဗပဒါနိ ဝိစ္ဆိန္ဒိတွာ န ဥစ္စာရေတဗ္ဗာနိ၊ အာဂမက္ခရဝန္တေဟိ ပရပဒေဟိ သဒ္ဓိံယေဝ ဥစ္စာရေတဗ္ဗာနိ။ သေယျထိဒံ? ‘‘နက္ခတ္တရာဇာရိဝ တာရကာနံ။ ဘဂဝါ ဧတဒဝေါစ’’ဣစ္စေဝမာဒယော ပယောဂါ။ ယတ္ထ ယေသံ ဝိသုံ ဝိသုံ သမ္ဗန္ဓော ဒိဿတိ၊ အတ္ထော စ ယုဇ္ဇတိ၊ တတ္ထ တာနိ အတ္ထာနုရူပံ ဝိစ္ဆိန္ဒိတွာ ဥစ္စာရေတဗ္ဗာနိ။ သေယျထိဒံ? ‘‘နဟာနေ ဥဿုက္ကံ အကာသိ၊ ဥဿုက္ကမ္ပိ အကာသိ ယာဂုယာ ခါဒနီယေ ဘတ္တသ္မိံ’’ ဣစ္စေဝမာဒယော ပယောဂါ။ ဧတ္ထ ဟိ ‘‘နဟာနေ ဥဿုက္ကံ အကာသီ’’တိ ဝိစ္ဆိန္ဒိတွာ ‘‘ဥဿုက္ကမ္ပိ အကာသိ ယာဂုယာ ခါဒနီယေ ဘတ္တသ္မိ’’န္တိ ဥစ္စာရေတဗ္ဗံ။ ဧဝဉှိ သတိ န ကေဝလံ သော ဘိက္ခု နဟာနေယေဝ ဥဿုက္ကံ အကာသိ၊ အထ ခေါ ယာဂုယာပိ ခါဒနီယေပိ ဘတ္တသ္မိမ္ပိ ဥဿုက္ကံ အကာသီတိ အတ္ထပ္ပကာသနေ သမတ္ထော ဘဝတိ၊ အဋ္ဌာနပ္ပယုတ္တော သမုစ္စယတ္ထဝါစကော အပိသဒ္ဒေါ။

ယတ္ထ ပန ယေသမိတရေန ဝါ ဣတရေန ဝါ ဧကေကပဒေန ဥဘယပဒေဟိ ဝါ သမ္ဗန္ဓော ဒိဿတိ သဟေဝတ္ထယုတ္တိယာ၊ တတ္ထ တာနိ ယထာရဟံ ဝိစ္ဆိန္ဒိတွာ ဥစ္စာရေတဗ္ဗာနိ။ သေယျထိဒံ? ‘‘သော ဓမ္မံ ဒေသေတိအာဒိကလျာဏံ မဇ္ဈေကလျာဏံ ပရိယောသာနကလျာဏံ သာတ္ထံ သဗျဉ္ဇနံ ကေဝလပရိပုဏ္ဏံ ပရိသုဒ္ဓံ ဗြဟ္မစရိယံ ပကာသေတိ။ ပဋိစ္စသမုပ္ပာဒံ ဝေါ ဘိက္ခဝေ ဒေသေဿာမိ၊ တံ သုဏာထ သာဓုကံ မနသိကရောထ။ အဇ္ဈတ္တံ သမ္ပသာဒနံ စေတသော ဧကောဒိဘာဝ’’န္တိ ဧဝမာဒယော ပယောဂါ။ တတြိမာ အဓိပ္ပာယဝိညာပိကာ ဂါထာ –

ဓမ္မသဒ္ဒေန ဝါ ဗြဟ္မ-စရိယသဒ္ဒေန ဝါ ပဒံ၊

ယောဇေတွာ ဤရယေ ဝိညူ၊ ‘‘သာတ္ထံ သဗျဉ္ဇန’’န္တိဒံ။

‘‘သာဓုက’’န္တိ ပဒံ ဝိညူ၊ ‘‘သုဏာထာ’’တိ ပဒေန ဝါ၊

တထာ ‘‘မနသိကရောထ’’၊ ဣတိ ဝုတ္တပဒေန ဝါ၊

ဤရယေ ယောဇယိတွာန၊ ဥဘယေဟိ ပဒေဟိ ဝါ။

ဧကမေကေန သမ္ဗန္ဓော၊ သမ္ဗန္ဓော ဥဘယေဟိ ဝါ၊

ဒိဿတီတိ ဝိဇာနေယျ၊ သဒ္ဓိမေဝတ္ထယုတ္တိယာ။

နတ္တနောမတိယာ ဧသော၊ အတ္ထော ဧတ္ထ မယာ ရုတော၊

ပုဗ္ဗာစရိယသီဟာနံ၊ နယံ နိဿာယ မေ ရုတော။

ဧဝံဝိဓေသု အညေသု၊ ပါဌေသုပိ အယံ နယော၊

နေတဗ္ဗော နယဒက္ခေန၊ သာသနတ္ထဂဝေသိနာ။

အတ္ထာနုရူပတော သဒ္ဒံ၊ အတ္ထံ သဒ္ဒါနုရူပတော၊

စိန္တယိတွာန မေဓာဝီ၊ ဝေါဟရေ န ယထာ တထာတိ။

အယမေတ္ထ အတ္ထသဒ္ဒစိန္တာ။

အတ္ထာတိသယယောဂေ ဧဝံ ဥပလက္ခေတဗ္ဗံ – ဘူဓာတုအတ္ထာတိသယယောဂတော ဝဍ္ဎနေ ဒိဋ္ဌာ ‘‘ဧကမန္တံ နိသိန္နော ခေါ မဟာနာမော လိစ္ဆဝီ ဥဒါနံ ဥဒါနေသိ ‘ဘဝိဿန္တိ ဝဇ္ဇီ ဘဝိဿန္တိ ဝဇ္ဇီ’တိ’’ ဣတိ ဝါ ‘‘အဟမေဝ ဒူသိယာ ဘူနဟတာ၊ ရညော မဟာပတာပဿာ’’တိ ဝါ ‘‘ဝေဒါ န တာဏာယ ဘဝန္တိဒဿ၊ မိတ္တဒ္ဒုနော ဘူနဟုနော နရဿာ’’တိ ဝါ ‘‘ဘူနဟစ္စံ ကတံ မယာ’’တိ ဝါ ဧဝံ ဝဍ္ဎနေ ဒိဋ္ဌာ။

ဝစနသင်္ဂဟေ ဧဝံ ဥပလက္ခေတဗ္ဗံ – ဝတ္တမာနာယ ဝိဘတ္တိယာ ပရဿပဒံ မဇ္ဈိမပုရိသဗဟုဝစနံ ပဉ္စမိယာ ပရဿပဒေန မဇ္ဈိမပုရိသဗဟုဝစနေန သဒိသံ။ တုမှေ ဘဝထ။

ဝတ္တမာနပဉ္စမီနံ ပရဿပဒေ ဥတ္တမပုရိသစတုက္ကေ ဧကဝစနံ ဧကဝစနေန၊ ဗဟုဝစနမ္ပိ ဗဟုဝစနေန သဒိသံ။ အဟံ ဘဝါမိ၊ မယံ ဘဝါမ။

ဝတ္တမာနာယ အတ္တနောပဒံ မဇ္ဈိမပုရိသေကဝစနံ ဟိယျတ္တနဇ္ဇတနီနံ အတ္တနောပဒေဟိ ဒွီဟိ မဇ္ဈိမပုရိသေကဝစနေဟိ သဒိသံ ကတ္ထစိ ဝဏ္ဏသမုဒါယဝသေန ကိဉ္စိ ဝိသေသံ ဝဇ္ဇေတွာ၊ ဧသ နယော ဥတ္တရတြာပိ ယောဇေတဗ္ဗော။ တွံ ဘဝသေ၊ ဣဒံ ဝတ္တမာနာယ ရူပံ။ တွံ အဘဝသေ၊ ဣဒံ ဟိယျတ္တနဇ္ဇတနီနံ ရူပံ။

ဝတ္တမာနာယ အတ္တနောပဒံ ဥတ္တမပုရိသေကဝစနံ ပဉ္စမိယာ အတ္တနောပဒေနုတ္တမပုရိသေကဝစနေန စ ပရောက္ခာယ ပရဿပဒေန မဇ္ဈိမပုရိသေကဝစနေန စာတိ ဒွီဟိ ဝစနေဟိ သဒိသံ။ အဟံ ဘဝေ၊ ဣဒံ ဝတ္တမာနပဉ္စမီနံ ရူပံ။ တွံ ဗဘူဝေ၊ ဣဒံ ပရောက္ခာယ ရူပံ။

ဝတ္တမာနာယ အတ္တနောပဒံ ဥတ္တမပုရိသဗဟုဝစနံ ပရောက္ခဇ္ဇတနီနံ အတ္တနောပဒေဟိ ဒွီဟိ ဥတ္တမပုရိသဗဟုဝစနေဟိ သဒိသံ။ မယံ ဘဝါမှေ၊ ဣဒံ ဝတ္တမာနာယ ရူပံ။ မယံ ဗဘူဝိမှေ၊ ဣဒံ ပရောက္ခာယ ရူပံ။ မယံ အဘဝိမှေ၊ ဣဒမဇ္ဇတနိယာ ရူပံ။

ပဉ္စမိယာ အတ္တနောပဒံ မဇ္ဈိမပုရိသဗဟုဝစနံ ပရောက္ခာယ အတ္တနောပဒေန မဇ္ဈိမပုရိသဗဟုဝစနေန သဒိသံ။ တုမှေ ဘဝဝှော၊ ဣဒံ ပဉ္စမိယာ ရူပံ။ တုမှေ ဗဘူဝိဝှော၊ ဣဒံ ပရောက္ခာယ ရူပံ။

ပရောက္ခာယ ပရဿပဒံ ပဌမပုရိသဗဟုဝစနံ ဟိယျတ္တနိယာ ပရဿပဒေန ပဌမပုရိသဗဟုဝစနေန စ အဇ္ဇတနိယာ အတ္တနောပဒေန ပဌမပုရိသဗဟုဝစနေန စာတိ ဒွီဟိ ဝစနေဟိ သဒိသံ။ တေ ဗဘူဝု၊ ဣဒံ ပရောက္ခာယ ရူပံ။ တေ အဘဝု၊ ဣဒံ ဟိယျတ္တနဇ္ဇတနီနံ ရူပံ။

ပရောက္ခာယ ပရဿပဒံ မဇ္ဈိမပုရိသဗဟုဝစနံ အတ္တနောပဒေန ပဌမပုရိသေကဝစနေန စ ဟိယျတ္တနိယာ ပရဿပဒေန မဇ္ဈိမပုရိသဗဟုဝစနေန စ အတ္တနောပဒေန ပဌမပုရိသေကဝစနေန စ အဇ္ဇတနိယာ ပရဿပဒေန မဇ္ဈိမပုရိသဗဟုဝစနေန စာတိ စတူဟိ ဝစနေဟိ သဒိသံ။ တုမှေ ဗဘူဝိတ္ထ၊ သော ဗဘူဝိတ္ထ၊ ဣမာနိ ပရောက္ခာယ ရူပါနိ။ တုမှေ အဘဝတ္ထ၊ သော အဘဝတ္ထ၊ ဣမာနိ ဟိယျတ္တနိယာ ရူပါနိ။ တုမှေ အဘဝိတ္ထ၊ ဣဒမဇ္ဇတနိယာ ရူပံ။

ပရောက္ခာယ ပရဿပဒံ ဥတ္တမပုရိသေကဝစနံ ဟိယျတ္တနိယာ ပရဿပဒေနုတ္တမပုရိသေကဝစနေန စ အဇ္ဇတနိယာ အတ္တနောပဒေနုတ္တမပုရိသေကဝစနေန စာတိ ဒွီဟိ ဝစနေဟိ သဒိသံ။ အဟံ ဗဘူဝံ၊ ဣဒံ ပရောက္ခာယ ရူပံ။ အဟံ အဘဝံ၊ ဣဒံ ဟိယျတ္တနဇ္ဇတနီနံ ရူပံ။

ပရောက္ခာယ ပရဿပဒံ ဥတ္တမပုရိသဗဟုဝစနံ ဟိယျတ္တနိယာ ပရဿပဒေနုတ္တမပုရိသဗဟုဝစနေန သဒိသံ။ မယံ ဗဘူဝိမှ၊ ဣဒံ ပရောက္ခာယ ရူပံ။ မယံ အဘဝမှ၊ ဣဒံ ဟိယျတ္တနိယာ ရူပံ။

ပရောက္ခာယ အတ္တနောပဒဥတ္တမပုရိသေကဝစနံ ဟိယျတ္တနိယာ အတ္တနောပဒေနုတ္တမပုရိသေကဝစနေန စ အဇ္ဇတနိယာ ပရဿပဒေနုတ္တမပုရိသေကဝစနေန စာတိ ဒွီဟိ ဝစနေဟိ သဒိသံ။ အဟံ ဗဘူဝိံ၊ ဣဒံ ပရောက္ခာယ ရူပံ။ အဟံ အဘဝိံ၊ ဣဒံ ဟိယျတ္တနဇ္ဇတနီနံ ရူပံ။

ဟိယျတ္တနိယာ ပရဿပဒံ ပဌမပုရိသေကဝစနံ အဇ္ဇတနိယာ အတ္တနောပဒေန ပဌမပုရိသေကဝစနေန သဒိသံ။ သော အဘဝါ။

ဟိယျတ္တနိယာ ပရဿပဒံ မဇ္ဈိမပုရိသေကဝစနံ အဇ္ဇတနိယာ ပရဿပဒေန မဇ္ဈိမပုရိသေကဝစနေန သဒိသံ။ တွံ အဘဝေါ။

ဘဝိဿန္တိယာ ပရဿပဒံ မဇ္ဈိမပုရိသဗဟုဝစနံ ကာလာတိပတ္တိယာ ပရဿပဒေန မဇ္ဈိမပုရိသဗဟုဝစနေန အတ္တနောပဒေန ပဌမပုရိသေကဝစနေန စာတိ ဒွီဟိ ဝစနေဟိ သဒိသံ။ တုမှေ ဘဝိဿထ၊ ဣဒံ ဘဝိဿန္တိယာ ရူပံ။ တုမှေ အဘဝိဿထ၊ သော အဘဝိဿထ၊ ဣမာနိ ကာလာတိပတ္တိယာ ရူပါနိ။

ဘဝိဿန္တိယာ အတ္တနောပဒံ မဇ္ဈိမပုရိသေကဝစနံ ကာလာတိပတ္တိယာ အတ္တနောပဒေန မဇ္ဈိမပုရိသေကဝစနေန သဒိသံ။ တွံ ဘဝိဿသေ၊ ဣဒံ ဘဝိဿန္တိယာ ရူပံ။ တွံ အဘဝိဿသေ၊ ဣဒံ ကာလာတိပတ္တိယာ ရူပံ။

ဘဝိဿန္တိယာ အတ္တနောပဒံ မဇ္ဈိမပုရိသဗဟုဝစနံ ကာလာတိပတ္တိယာ အတ္တနောပဒေန မဇ္ဈိမပုရိသဗဟုဝစနေန သဒိသံ။ တုမှေ ဘဝိဿဝှေ၊ ဣဒံ ဘဝိဿန္တိယာ ရူပံ။ တုမှေ အဘဝိဿဝှေ၊ ဣဒံ ကာလာတိပတ္တိယာ ရူပံ။

ဘဝိဿန္တိယာ အတ္တနောပဒံ ဥတ္တမပုရိသေကဝစနံ ကာလာတိပတ္တိယာ ပရဿပဒေနုတ္တမပုရိသေကဝစနေန သဒိသံ။ အဟံ ဘဝိဿံ၊ ဣဒံ ဘဝိဿန္တိယာ ရူပံ။ အဟံ အဘဝိဿံ၊ ဣဒံ ကာလာတိပတ္တိယာ ရူပံ။ သေသာနိ သဗ္ဗာသမဋ္ဌန္နံ ဝိဘတ္တီနံ ဝစနာနိ အညမညံ ဝိသဒိသာနီတိ ဒဋ္ဌဗ္ဗံ။ ဘဝန္တိ စတြ –

ဝတ္တမာနာပဉ္စမီသု၊ ထဒွယံ သမုဒီရိတံ၊

‘‘တုမှေ ဘဝထ’’ဣစ္စတြ၊ ဥဒါဟရဏကံ ဒွိဓာ။

မိဒွယံ မဒွယဉ္စေဝ၊ တာသု ဝုတ္တံ ဒွိဓာ ဒွိဓာ၊

‘‘ဘဝါမီ’’တိ ‘‘ဘဝါမာ’’တိ၊ စေတ္ထ ရူပါနိ နိဒ္ဒိသေ။

ဝတ္တမာနကဟိယျတ္တ-နဇ္ဇတနီဝိဘတ္တိသု၊

သေတ္တယံ ‘‘ဘဝသေ တွ’’န္တိ၊ ဝတ္တမာနာဝိဘတ္တိတော၊

‘‘အဘဝသေ’’တိ ဟိယျတ္တ-နဇ္ဇတနီဝိဘတ္တိတော။

ဝတ္တမာနာပဉ္စမိကာ-ပရောက္ခာသု ဝိဘတ္တိသု၊

ဧတ္တယံ လပိတံ တတ္ထ၊ အာဒေါ ဒွိန္နံ ဝသေန တု။

ဇညာ ‘‘အဟံ ဘဝေ’’တိ ‘‘တွံ၊ ဗဘူဝေ’’တိ ပရောက္ခတော၊

ဝတ္တမာနာပရောက္ခဇ္ဇ-တနီသု တီသု သဒ္ဒိတံ။

မှေတ္တယံ ကမတော ရူပံ၊ မယံသဒ္ဒဝိသေသိယံ၊

‘‘သမ္ဘဝါမှေ ဗဘူဝိမှေ၊ အဘဝိမှေ’’တိ နိဒ္ဒိသေ။

ပဉ္စမိကာပရောက္ခာသု၊ ဝှောဒွယံ ရူပမေတ္ထ ဟိ၊

‘‘ဘဝဝှော ဗဘူဝိဝှော’’တိ၊ တုမှေသဒ္ဒဝိသေသိယံ။

ပရောက္ခမှိ ဝါ ဟိယျတ္တ-နဇ္ဇတနီဝိဘတ္တိသု၊

ဥတ္တယံ ‘‘တေ ဗဘူဝူ’’တိ၊ ရူပံ ဇညာ ပရောက္ခတော၊

ဟိယျတ္တနဇ္ဇတနိတော၊ ဇညာ ‘‘တေ အဘဝူ’’ဣတိ။

ပရောက္ခမှိ ဝါ ဟိယျတ္တ-နဇ္ဇတနီဝိဘတ္တိသု၊

သဒ္ဒိတံ တထသံယောဂ- ပဉ္စကံ ဣတိ နိဒ္ဒိသေ။

ဗဘူဝိတ္ထဒွယံ တတ္ထ၊ ရူပံ ဇညာ ပရောက္ခဇံ၊

ဗဝှတ္တေကတ္တတော ဝုတ္တံ၊ မဇ္ဈိမပဌမဝှယံ။

အဘဝတ္ထဒွယံ ဉေယျံ၊ ဟိယျတ္တနီဝိဘတ္တိဇံ၊

ဗဝှတ္တေကတ္တတော ဝုတ္တံ၊ မဇ္ဈိမော ပဌမော စ သော၊

‘‘အဘဝိတ္ထာ’’တိဒံ ရူပံ၊ အဇ္ဇတနီဝိဘတ္တိဇံ။

တဉ္စ ခေါ ဗဟုကတ္တမှိ၊ တုမှေသဒ္ဒေန ယောဇယေ၊

ပရောက္ခာဝှယဟိယျတ္တ-နဇ္ဇတနီသု ကိတ္တိတံ။

အံတယံ တတ္ထ အာဒိယံ၊ ‘‘ဗဘူဝံ’’ရူပမီရိတံ၊

ဒုဝိန္နံ အဘဝံရူပံ၊ အဟံသဒ္ဒေန ယောဇယေ။

ပရောက္ခကာဟိယျတ္တနီ-ဝသေန မှဒုကံ ‘‘မယံ၊

ဗဘူဝိမှ အဘဝိမှ’’၊ ဣတိ ရူပဒွယံ ကမာ။

ပရောက္ခာဝှယဟိယျတ္တ-နဇ္ဇတနီဝိဘတ္တိသု၊

ဣံတယံ တု တဟိံ ရူပံ၊ ‘‘ဗဘူဝိ’’န္တိ ပရောက္ခဇံ၊

‘‘အဘဝိ’’န္တီတရာသံ တု၊ အဟံသဒ္ဒယုတာခိလံ။

ဟိယျတ္တနဇ္ဇတနီသု ၊ အာဒွယံ မတမေတ္ထ ဟိ၊

‘‘အဘဝါ’’ ဣတိ ဧကတ္တေ၊ ရူပံ ပဌမပေါရိသံ။

ဟိယျတ္တနဇ္ဇတနီသု၊ ဩဒွယံ ဝုတ္တမေတ္ထ တု၊

‘‘အဘဝေါ’’ဣတိ ဧကတ္တေ၊ ရူပံ မဇ္ဈိမပေါရိသံ။

ဘဝိဿန္တိယကာလာတိ-ပတ္တီသု ဒွီသု ဘာသိတံ၊

ဗဝှတ္တေ ဗဟုဧကတ္တေ၊ သသံယောဂံ ဿထတ္တယံ။

‘‘တုမှေ ဘဝိဿထိ’’စ္စေတံ၊ ဘဝိဿန္တိယတော မတံ၊

‘‘အဘဝိဿထ တုမှေ’’တိ၊ ‘‘အဘဝိဿထ သော’’တိ စ၊

ကာလာတိပတ္တိတော ဝုတ္တံ၊ ဧတဉှိ ဝစနဒွယံ။

ဘဝိဿန္တိယကာလာတိ-ပတ္တီသု သမုဒီရိတံ၊

မဇ္ဈိမပုရိသဋ္ဌာနေ၊ သသံယောဂံ ဿသေယုဂံ။

‘‘ဘဝိဿသေ တွ’’မိစ္စေတံ၊ ‘‘တွံ အဘဝိဿသေ’’တိ စ၊

ဣမာနိ တု ပယောဂါနိ၊ တတ္ထ ဝိညူ ပကာသယေ။

ဿဝှေဒွယံ သေန ယုတံ၊ ဿံဒွယဉ္စ စတုက္ကကံ၊

ဣဒမ္ပိ ကထိတံ ဒွီသု၊ ယထာရုတဝိဘတ္တိသု။

‘‘ဘဝိဿဝှေ’’တိ ဗဝှတ္တေ၊ ဘဝိဿန္တိကမဇ္ဈိမော၊

ဗဝှတ္တေ ‘‘အဘဝိဿဝှေ’’၊ ကာလာတိပတ္တိမဇ္ဈိမော။

‘‘ဘဝိဿံ’’ ဣတိ ဧကတ္တေ၊ ဘဝိဿန္တိကမုတ္တမော၊

‘‘အဘဝိဿ’’န္တိ ဧကတ္တေ၊ ကာလာတိပတ္တိကုတ္တမော။

ဣတိ ဝုတ္တာနိ ဝုတ္တေဟိ၊ ဝစနေဟိ သမာနတံ၊

ယန္တေ’ကစ္စေဟိ တံ သဗ္ဗံ၊ ဧကတာလီသဓာ ဌိတံ။

သေသာနိ ပဉ္စပညာသ၊ အသမာနာနိ သဗ္ဗထာ၊

ဧတံ နယံ ဂဟေတွာန၊ ဝဒေ သဗ္ဗတ္ထ သမ္ဘဝါတိ။

အယမေတ္ထ သမာနာသမာနဝသေန ဝစနသင်္ဂဟော။

အာဂမလက္ခဏဝသေန ဝိဘတ္တိဝစနသင်္ဂဟေ ဧဝံ ဥပလက္ခေတဗ္ဗံ –

ဘဝိဿန္တီပရောက္ခဇ္ဇ-တနီကာလာတိပတ္တိသု၊

နိစ္စံ ကွစိ ကွစာ’နိစ္စံ၊ ဣကာရာဂမနံ ဘဝေ။

ဣကာရာဂမနံ တဉှိ၊ ပရောက္ခာယံ ဝိဘတ္တိယံ၊

ဗဝှတ္တေ မဇ္ဈိမဋ္ဌာနေ၊ ဗဝှတ္တေ စုတ္တမေ သိယာ၊

ပရဿပဒံ သန္ဓာယ၊ ဣဒံ ဝစနမီရိတံ။

ဥတ္တမေကဝစော စာပိ၊ နေတဿ အတ္တနောပဒေ၊

ဟောတီတိ အဝဂန္တဗ္ဗံ၊ ဘဝိဿန္တိမှိ သဗ္ဗသော။

ဟိယျတ္တနဇ္ဇတနိက-ကာလာတိပတ္တီသု ပန၊

အကာရာဂမနံ ဟောတိ၊ သဗ္ဗသော ဣတိ လက္ခယေ။

အဇ္ဇတနိမှိ ဗဝှတ္တေ၊ မဇ္ဈိမေ ဥတ္တမေ တထာ၊

ဗဝှတ္တမှိ အကာရေန၊ ဣကာရာဂမနံ ဘဝေ။

ဣကာရာဂမနံ နိစ္စံ၊ ကာလာတိပတ္တိယံ ဘဝေ၊

အကာရာဂမနံ တတ္ထ၊ အနေကန္တိကမီရိတံ။

အကာရာဂမနံယေဝ၊ ဟိယျတ္တနျံ ပကာသတိ၊

ပရောက္ခာယံ ဘဝိဿန္တျ-ဉ္စိကာရောယေဝ ဒိဿတိ။

အကာရာဂမနဉ္စေဝ၊ ဣကာရာဂမနမ္ပိ စ၊

အဇ္ဇတနိကကာလာတိ-ပတ္တီသု ပန ဒိဿတိ။

တီသု သေသဝိဘတ္တီသု၊ နာ’ကာရတ္တယမီရိတံ၊

ဝတ္တမာနာယ ပဉ္စမျံ၊ သတ္တမိယန္တိ သဗ္ဗသော။

ဣကာရေနေဝ သဟိတာ၊ ဒွေ ဘဝန္တိ ဝိဘတ္တိယော၊

သတ္တ ဒွါဒသ ဟောန္တေတ္ထ၊ ဝစနာနီတိ လက္ခယေ။

အကာရေနေဝ သဟိတာ၊ ဧကာယေဝ ဝိဘတ္တိ တု၊

ဒွါဒသ ဝစနာနေတ္ထ၊ ဘဝန္တီတိ စ လက္ခယေ။

အကာရိကာရသဟိတာ ၊ ဒုဝေယေဝ ဝိဘတ္တိယော၊

စတ္တာရိ ဒွါဒသဉ္စေဝ၊ ဝစနာနိ ဘဝန္တိဓ။

အာကာရတ္တယမုတ္တာ တု၊ တိဿောယေဝ ဝိဘတ္တိယော၊

ဝစနာနေတ္ထ ဆတ္တိံသ၊ ဟောန္တီတိ ပရိဒီပယေ။

ပရောက္ခာအဇ္ဇတနီသု၊ ပဉ္စဋ္ဌ စ ယထာက္ကမံ၊

ဣကာရတော ဝိမုတ္တာနိ၊ ဝစနာနိ ဘဝန္တိတိ။

ဧဝမေတ္ထ ဝိဘတ္တီနံ၊ ဆန္နဝုတိဝိဓာန စ၊

သင်္ဂဟော ဝစနာနန္တိ၊ ဝိညာတဗ္ဗော ဝိဘာဝိနာတိ။

အယမေတ္ထ အာဂမလက္ခဏဝသေန ဝိဘတ္တိဝစနသင်္ဂဟော။

ကာလဝသေန ပန ဝိဘတ္တိဝစနသင်္ဂဟေ ဒုဝိဓော သင်္ဂဟော ကာလတ္တယဝသေန သင်္ဂဟော၊ ကာလဆက္ကဝသေန သင်္ဂဟော စာတိ။ တတ္ထ ဝတ္တမာနာပဉ္စမီသတ္တမီဝိဘတ္တိယော ပစ္စုပ္ပန္နကာလိကာ၊ ဝတ္တမာနာပဉ္စမီသတ္တမီဝိဘတျန္တာနိ ပဒါနိ ပစ္စုပ္ပန္နဝစနာနိ။ ပရောက္ခာဟိယျတ္တနဇ္ဇတနီဝိဘတ္တိယော အတီတကာလိကာ၊ ပရောက္ခာဟိယျတ္တနဇ္ဇတနီဝိဘတျန္တာနိ ပဒါနိ အတီတဝစနာနိ။ ဘဝိဿန္တီဝိဘတ္တိ အနာဂတကာလိကာ၊ ဘဝိဿန္တီဝိဘတျန္တာနိ ပဒါနိ အနာဂတဝစနာနိ။ ကာလာတိပတ္တိဝိဘတ္တိ ပန ကတ္ထစိ အတီတကာလိကာ ကတ္ထစိ အနာဂတကာလိကာ၊ တသ္မာ တဒန္တာနိ ပဒါနိ အတီတဝစနာနိပိ အနာဂတဝစနာနိပိ ဟောန္တိ။ အယံ ကာလတ္တယဝသေန ဝိဘတ္တိဝစနသင်္ဂဟော။

အယံ ပန ကာလဆက္ကဝသေန ဝိဘတ္တိဝစနသင်္ဂဟော – ပရောက္ခာဟိယျတ္တနဇ္ဇတနီဝိဘတ္တိယော အတီတကာလိကာ၊ ပရောက္ခာဟိယျတ္တနဇ္ဇတနီဝိဘတျန္တာနိ ပဒါနိ အတီတဝစနာနိ။ ဘဝိဿန္တီဝိဘတ္တိ အနာဂတကာလိကာ၊ ဘဝိဿန္တီဝိဘတျန္တာနိ ပဒါနိ အနာဂတဝစနာနိ။ ဝတ္တမာနာဝိဘတ္တိ ပစ္စုပ္ပန္နကာလိကာ၊ ဝတ္တမာနာဝိဘတျန္တာနိ ပဒါနိ ပစ္စုပ္ပန္နဝစနာနိ။ ပဉ္စမီဝိဘတ္တိ အာဏတ္တိကာလိကာ ၊ ပဉ္စမီဝိဘတျန္တာနိ ပဒါနိ အာဏတ္တိဝစနာနိ။ သတ္တမီဝိဘတ္တိ ပရိကပ္ပကာလိကာ၊ သတ္တမီဝိဘတျန္တာနိ ပဒါနိ ပရိကပ္ပဝစနာနိ။ ဧတ္ထ ပန ‘‘အာဏတ္တိဝစနာနီ’’တိ စ ‘‘ပရိကပ္ပဝစနာနီ’’တိ စ ဣဒံ တထာသီသမတ္တံ အာသိဋ္ဌာနုမတျာဒီသု ပဉ္စမျာဒီနံ ဒိဿနတော။ ကာလာတိပတ္တိဝိဘတ္တိ ကာလာတိပတ္တိကာလိကာ၊ ကာလာတိပတ္တိဝိဘတျန္တာနိ ပဒါနိ ကာလာတိပတ္တိဝစနာနိ။ ဧဝံ ကာလဆက္ကဝသေန ဝိဘတ္တိဝစနသင်္ဂဟော ဝေဒိတဗ္ဗော။

ကာလသင်္ဂဟေ တိဝိဓော ကာလသင်္ဂဟော ကာလတ္တယသင်္ဂဟော ကာလစတုက္ကသင်္ဂဟော ကာလဆက္ကသင်္ဂဟော စာတိ။

ပစ္စုပ္ပန္နေ ဝတ္တမာနာ၊ ပဉ္စမီ သတ္တမီ စိမာ၊

ဟောန္တာတီတေ ပရောက္ခာဒီ၊ သဟ ကာလာတိပတ္တိယာ။

အနာဂတေ ဘဝိဿန္တီ၊ ကာလာတိပတ္တိကာပိ ဝါ၊

ဧဝံ ကာလတ္တယံ ဉေယျံ၊ အာချာတံ တပ္ပကာသကံ။

နနု ကစ္စာယနေ ဂန္ထေ၊ ကာလော ဝုတ္တော စတုဗ္ဗိဓော၊

ပစ္စုပ္ပန္နေနုတ္တကာလေ၊ အတီတေနာဂတေ ဣတိ။

သစ္စံ ဝုတ္တော နုတ္တကာလော၊ ပစ္စုပ္ပန္နောတိ ဣစ္ဆိတော၊

သမီပေ ဝုတ္တကာလောတိ၊ အတ္ထသမ္ဘဝတော ပန။

တထာ ဟိ ‘‘ယံ တိကာလ’’န္တိ၊ ဝုတ္တမာစရိယေဟိပိ၊

န ကာလတော ဝိနိမုတ္တံ၊ အာချာတံ ကိဉ္စိ ဒိဿတိ။

နနု စာဝုတ္တကာလေတိ၊ အတ္ထော တတြ တု ယုဇ္ဇတိ၊

တထာ ဟိ ဆဗ္ဗိဓော ကာလော၊ နိရုတ္တိမှိ ပကာသိတော။

အတီတာနာဂတော ပစ္စု-ပ္ပန္နော အာဏတ္တိမေဝ စ၊

ပရိကပ္ပော စ ကာလဿ၊ အတိပတ္တီတိ ဆဗ္ဗိဓော။

ဒုဝေ ဝိဘတ္တိယော တတ္ထ၊ အာဏတ္တိပရိကပ္ပိကာ၊

ကာလမနာမသိတွာပိ၊ နိရုတ္တညူဟိ ဘာသိတာ။

‘‘ဂစ္ဆတု ဂစ္ဆေယျိ’’စ္စာဒိ-ဝစနေ ကထိတေ န ဟိ၊

ကြိယာ နိပ္ဖဇ္ဇတိ နိဋ္ဌံ၊ နာဂတာ နာတိပန္နိကာ။

ကာလာတိပတ္တိကာ သဒ္ဒါ၊ အတီတေနာဂတေပိ စ၊

ဘဝန္တီတိ ယထာဝုတ္တာ၊ နိရုတ္တိမှိ ဝိဒူဟိ ဝေ။

ပဉ္စမီသတ္တမီဝှိတာ၊ အာဏတ္တိပရိကပ္ပိကာ၊

ပစ္စုပ္ပန္နေ ဘဝန္တီတိ၊ န တထာ တတ္ထ ဘာသိတာ။

တသ္မာ ကစ္စာယနေ ဂန္ထေ၊ ‘‘နုတ္တကာလေ’’တိ ယံ ပဒံ၊

အတ္ထော ‘‘အဝုတ္တကာလေ’’တိ၊ တဿ ဉာယတိမေဝိဒံ။

သစ္စမေဝံ တု သန္တေပိ၊ အာဏတ္တိပရိကပ္ပိကာ၊

ပစ္စုပ္ပန္နေပိ ဒဋ္ဌဗ္ဗာ၊ ပဏ္ဍိတေန နယညုနာ။

ကသ္မာတိ စေ အာဏာပနံ၊ ပရိကပ္ပော စ သစ္စတော၊

ပစ္စုပ္ပန္နေ ယတော အတ္ထာ၊ နိပ္ဖန္နာ ဒိဿရေ ဣမေ။

‘‘အနုတ္တကာလေ’’တိ ပဒံ၊ ဧတဿတ္ထဿ ဇောတကံ၊

‘‘သမီပေ ဝုတ္တကာလေ’’တိ၊ အတ္ထဒီပနတောထ ဝါ။

အတ္ထာနံ ဂမနာဒီနံ၊ နိပ္ဖတ္တိ န တု ဒိဿတိ၊

‘‘ဂစ္ဆတု ဂစ္ဆေယျိ’’စ္စာဒိ၊ ဝုတ္တကာလေ ယတော တတော၊

အဝုတ္တကာလေ နိဒ္ဒိဋ္ဌာ၊ တဒ္ဒီပကဝိဘတ္တိယော။

ကာလော ဝါ ဝုတ္တကာလောတိ၊ ဣစ္စေဝံ ဂဟိတော ဣဓ၊

ဒက္ခိဏာသုဒ္ဓိပါဌမှိ၊ ကတာဝ တတိယာ အယံ၊

ကာလဒီပနတာ တာသံ၊ ဣတိ ယုဇ္ဇတိ နာညထာ။

အတ္ထဒွယံ ပကာသေတုံ၊ ဂန္ထေ ကစ္စာယနဝှယေ၊

ထေရော ကစ္စာယနော ‘‘နုတ္တ-ကာလေ’’တိ ပဒမဗြဝိ။

ဧဝံ တိဓာ စတုဓာပိ၊ ဝုတ္တော ကာလာန သင်္ဂဟော၊

ဆဓာ ဣဒါနိ ကာလာနံ၊ သင်္ဂဟော နာမ နိယျတေ။

ဝိဘတ္တိယော ပရောက္ခာ စ၊ ဟိယျတ္တနီဝိဘတ္တိယော၊

အထ အဇ္ဇတနီ စာတိ၊ တိဿော’တီတေ ပကာသိတာ။

အနာဂတေ ဘဝိဿန္တီ၊ ဘဝတီတိ ပကိတ္တိတာ၊

ပစ္စုပ္ပန္နေ ဝတ္တမာနာ၊ တိကာလေ ပဉ္စဓာ ကတာ။

ပဉ္စမီသတ္တမီဝှိတာ၊ အာဏတ္တိပရိကပ္ပိကာ၊

သင်္ဂယှမာနာ တာ ယန္တိ၊ ပစ္စုပ္ပန္နမှိ သင်္ဂဟံ။

ယသ္မာ ပဉ္စမိဘူတာယ၊ ဝတ္တမာနာယ ဌာနတော၊

သမာနာ ပဉ္စမီ ဟောတိ၊ တသ္မာ သာ ပဉ္စမီ မတာ။

သတ္တမီ ပန ကိဉ္စာပိ၊ သမာနာ တာဟိ သတ္တမာ၊

ဟောတိ ယသ္မာ တတော ဝုတ္တာ၊ သတ္တမီတွေဝ နော မတိ။

ကာလာတိပတ္တိယာဒီဟိ၊ ယဇ္ဇေဝံ ဝတ္တမာနိကာ၊

ဆဋ္ဌီ ဘဝေယျ ကာလာတိ-ပတ္တိကာတီတဝါစိကာ။

ပဉ္စမီ တာယ ဆဋ္ဌဿ၊ တုလျတ္တာ ဌာနတော နနု၊

တာဟိ သတ္တဝိဘတ္တီဟိ၊ သတ္တမီ အဋ္ဌမီ သိယာ။

ဣတိ စေ ကောစိ ဘာသေယျ၊ ‘‘တန္နာ’’တိ ပဋိသေဓယေ၊

အတီတေနာဂတေ စာပိ၊ ကာလာတိပတ္တိသမ္ဘဝါ။

တထာ ဟိ ဘာသိတာ စူဠ-နိရုတ္တိမှိ ဝိသုံ အယံ၊

ကာလာတိပတျတီတမှာ-နာဂတေ စာတိ ဒီပယေ။

ကြိယာတိပန္နေတီတေတိ၊ ကသ္မာ ကစ္စာယနေ ရုတံ၊

အထာပိ စေ ဝဒေယျတြ၊ ‘‘ပါယေနာ’’တိ ပကာသယေ။

ယေဘုယျေန ဟိ လောကသ္မိံ၊ အတီတမှိ ပဝတ္တတိ၊

ကာလာတိပတ္တိသံယုတ္တော၊ ဝေါဟာရော ဣတိ လက္ခယေ။

အတြိဒံ ကာလာတိပတ္တိယာ အတီတဝစနံ – ‘‘သစာယံ ဘိက္ခဝေ ရာဇာ ပိတရံ ဓမ္မိကံ ဓမ္မရာဇာနံ ဇီဝိတာ န ဝေါရောပေဿထ၊ ဣမသ္မိံယေဝဿ အာသနေ ဝိရဇံ ဝီတမလံ ဓမ္မစက္ခု ဥပ္ပဇ္ဇိဿထာ’’တိ။ ‘‘ပဿာနန္ဒ ဣမံ မဟာဓနသေဋ္ဌိပုတ္တံ ဣမသ္မိံယေဝ နဂရေ ဒွေအသီတိကောဋိဓနံ ခေပေတွာ ဘရိယံ အာဒါယ ဘိက္ခာယ စရန္တံ။ သစေ ဟိ အယံ ပဌမဝယေ ဘောဂေ အခေပေတွာ ကမ္မန္တေ ပယောဇယိဿာ၊ ဣမသ္မိံယေဝ နဂရေ အဂ္ဂသေဋ္ဌိ အဘဝိဿာ။ သစေ ပန နိက္ခမိတွာ ပဗ္ဗဇိဿာ၊ အရဟတ္တံ ပါပုဏိဿာ၊ ဘရိယာပိဿ အနာဂါမိဖလေ ပတိဋ္ဌဟိဿာ။ သစေ မဇ္ဈိမဝယေ ဘောဂေ အခေပေတွာ ကမ္မန္တေ ပယောဇယိဿာ၊ ဒုတိယသေဋ္ဌိ အဘဝိဿာ။ နိက္ခမိတွာ ပဗ္ဗဇန္တော အနာဂါမီ အဘဝိဿာ၊ ဘရိယာပိဿ သကဒါဂါမိဖလေ ပတိဋ္ဌဟိဿာ။ သစေ ပစ္ဆိမဝယေ ဘောဂေ အခေပေတွာ ကမ္မန္တေ ပယောဇယိဿာ၊ တတိယသေဋ္ဌိ အဘဝိဿာ။ နိက္ခမိတွာ ပဗ္ဗဇန္တော သကဒါဂါမီ အဘဝိဿာ၊ ဘရိယာပိဿ သောတာပတ္တိဖလေ ပတိဋ္ဌဟိဿာ’’ ဣတိ ဝါ၊ ‘‘သစေ သတ္ထာ အဂါရံ အဇ္ဈာဝသိဿာ၊ စက္ကဝတ္တိရာဇာ အဘဝိဿာ။ ရာဟုလသာမဏေရော ပရိဏာယကရတနံ၊ ထေရီ ဣတ္ထိရတနံ၊ သကလစက္ကဝါဠရဇ္ဇံ ဧတေသညေဝ အဘဝိဿာ’’ ဣတိ ဝါ ဧဝံ ကာလာတိပတ္တိယာ အတီတဝစနံ ဘဝတိ။

ကထံ ကာလာတိပတ္တိယာ အနာဂတဝစနံ ဘဝတိ? ‘‘စိရမ္ပိ ဘက္ခော အဘဝိဿာ၊ သစေ န ဝိဝဒါမသေ။ အသီသကံ အနင်္ဂုဋ္ဌံ၊ သိင်္ဂါလော ဟရတိ ရောဟိတံ’’ဣတိဝါ၊ ‘‘သစေ အာနန္ဒ နာလဘိဿာ မာတုဂါမော တထာဂတပ္ပဝေဒိတေ ဓမ္မဝိနယေ အဂါရသ္မာ အနဂါရိယံ ပဗ္ဗဇ္ဇံ၊ စိရဋ္ဌိတိကံ အာနန္ဒ ဗြဟ္မစရိယံ အဘဝိဿာ’’တိ ဣတိ ဝါ၊ ‘‘အယံ အင်္ဂုလိမာလဿ မာတာ ‘အင်္ဂုလိမာလံ အာနေဿာမီ’တိ ဂစ္ဆတိ၊ သစေ သမာဂမိဿတိ၊ အင်္ဂုလိမာလော ‘အင်္ဂုလိသဟဿံ ပူရေဿာမီ’တိ မာတရံ မာရေဿတိ။ သစာဟံ န ဂမိဿာမိ၊ မဟာဇာနိကော အဘဝိဿာ’’ ဣတိ ဝါ ဧဝံ ကာလာတိပတ္တိယာ အနာဂတဝစနံ ဘဝတိ ။ ကစ္စာယနေ ပန ယေဘုယျေန အတီတပ္ပဝတ္တိံ သန္ဓာယ ကာလာတိပတ္တိဝိဘတ္တိယာ အတီတကာလိကတာ ဝုတ္တာတိ ဒဋ္ဌဗ္ဗံ။

ကစ္စာယနေပိ ဝါ ဧသာ၊ ကာလာတိပတ္တိကာ ပန၊

အနာဂတေပိ ဟောတီတိ၊ အယမတ္ထောပိ ဒိဿတိ။

အပ္ပစ္စက္ခေ ပရောက္ခာယ-တီတေ ဣတိ ဟိ လက္ခဏေ၊

သန္တေပျတီတဂ္ဂဟဏေ၊ အနပေက္ခိယ တံ ဣဒံ။

အနာဂတေ ဘဝိဿန္တီ၊ ဣတိ သုတ္တဿနန္တရံ၊

ကာလာတိပတ္တိဝစနာ၊ အနာဂတာနုကဍ္ဎနံ၊

တသ္မာ အနိယတံ ကာလံ၊ ကာလာတိပတ္တိကံ ဝိနာ။

အတီတာနာဂတပစ္စု-ပ္ပန္နိကာဟိ ဝိဘတ္တိဟိ၊

သတ္တမီ သတ္တမီယေဝ၊ ဘဝတေ န တု အဋ္ဌမီ။

ပဉ္စမီသတ္တမီနံ တု၊ ပစ္စုပ္ပန္နဝိဘတ္တိယံ၊

သင်္ဂဏှနတ္ထမေတာသံ၊ မဇ္ဈေ ဆဋ္ဌီ န ဝုစ္စတိ။

တထာ ပဉ္စ ဥပါဒါယ၊ ဘဝိတဗ္ဗဉ္စ ဆဋ္ဌိယာ၊

ပဉ္စမိယာ တု သာ ဧသာ၊ ‘‘ဆဋ္ဌီ’’တိ န သမီရိတာ။

ဆဋ္ဌီဘာဝမှိ သန္တေပိ၊ ‘‘ပဉ္စမီ’’တိ ဝစော ပန၊

ပဉ္စမိယာ ဝိဘတ္တိယာ၊ ပစ္စုပ္ပန္နဝိဘတ္တိယံ။

သင်္ဂဏှနတ္ထံ ဝုတ္တန္တိ၊ ဝိညာတဗ္ဗာ ဝိဘာဝိနာ၊

ပဉ္စမိံ တု ဥပါဒါယ၊ သတ္တမိယာ ဝိဘတ္တိယာ။

ဆဋ္ဌိယာ စ ဘဝိတဗ္ဗံ၊ န သာ ‘‘ဆဋ္ဌီ’’တိ ဤရိတာ၊

ဆဋ္ဌိံ ပန ဥပါဒါယ၊ ‘‘သတ္တမီ’’တွေဝ ဤရိတာ။

မဇ္ဈေ ဆဋ္ဌိံ အဒဿေတွာ၊ ဧဝံ တု ကထနမ္ပိ စ၊

သတ္တမိယာ ဝိဘတ္တိယာ၊ ပစ္စုပ္ပန္နဝိဘတ္တိယံ၊

သင်္ဂဏှနတ္ထံ ဝုတ္တန္တိ၊ အဓိပ္ပာယံ ဝိဘာဝယေ။

သဘာဝေါ ဟေသ ဝတ္ထူနံ၊ ဂမ္ဘီရတ္ထေသု အတ္တနော၊

ယေန ကေနစာကာရေန၊ အဓိပ္ပာယဿ ဉာပနံ။

ယဇ္ဇေဝံ ပဌမံတီတေ-နာဂတေ စ ဝိဘတ္တိယော၊

ဝတွာ တတော ပစ္စုပ္ပန္နေ၊ ကထေတဗ္ဗာ ဝိဘတ္တိယော။

ကစ္စာယနဝှယေ ဂန္ထေ၊ ကသ္မာ ဧဝံ န ဘာသိတာ၊

ပစ္စုပ္ပန္နဝိဘတျောဝ၊ ကသ္မာ အာဒိမှိ ဘာသိတာ?

ယသ္မာ ဝဒန္တိ ဝေါဟာရ-ပထေ ဧတာဝ ပါယတော၊

တသ္မာ ဗဟုပ္ပယောဂတ္တံ၊ ဟောတေတာသံ ဝိဘတ္တိနံ။

အာဒေါဗဟုပ္ပယောဂေါဝ၊ ကထေတဗ္ဗောတိ ဉာယတော၊

ပစ္စုပ္ပန္နမှိ သမ္ဘူတာ၊ ဝိဘတျောဝါဒိတော မတာ။

အတီတာနာဂတံ ဝတွာ၊ ပစ္စုပ္ပန္နေ တတော ပရံ၊

ယသ္မာ ဝုတ္တမှိ လောကသ္မိံ၊ ဟောတိ ဝါစာသိလိဋ္ဌတာ။

တသ္မာ သိလိဋ္ဌကထနေ၊ အတီတာဒိမပေက္ခိယ၊

ပဉ္စမီ သတ္တမီ စေတာ၊ ဝတ္တမာနာယနန္တရံ၊

သင်္ဂဏှနတ္ထမက္ခာတာ၊ ပစ္စုပ္ပန္နဝိဘတ္တိသု။

ဧတ္ထ ဟိ ယထာ ‘‘မာတာပိတရော’’တိ ဝုတ္တေ သိလိဋ္ဌကထနံ ဟောတိ၊ တသ္မိံယေဝ ဝစနေ ဝိပရိယယံ ကတွာ သမာသဝသေန ‘‘ပိတာမာတရော’’တိ ဝုတ္တေ သိလိဋ္ဌကထနံ န ဟောတိ၊ တသ္မာ တာဒိသီ သဒ္ဒရစနာ အပူဇနီယာ၊ ‘‘ပိတာ မာတာ စ မေ ဒဇ္ဇု’’န္တိ ပါဌော ပန ဗျာသဝသေန ယထိစ္ဆိတပ္ပယောဂတ္တာ ပူဇနီယော၊ ဧဝမေဝ ‘‘အတီတာနာဂတပစ္စုပ္ပန္န’’န္တိ ဝုတ္တေ သိလိဋ္ဌကထနံ ဟောတိ၊ ‘‘အတီတပစ္စုပ္ပန္နာနာဂတ’’န္တိ ဧဝမာဒိနာ ဝုတ္တေ သိလိဋ္ဌကထနံ န ဟောတိ၊ တသ္မာ တာဒိသီ သဒ္ဒရစနာ အပူဇနီယာ သိယာ။ ‘‘အတီတာရမ္မဏာ ပစ္စု-ပ္ပန္နာနာဂတဂေါစရာ’’တိ ဝစနံ ပန ဂါထာဗန္ဓသုခတ္ထံ ယထိစ္ဆိတပ္ပယောဂတ္တာ ပူဇနီယမေဝ။ အယမေတ္ထ ပါဠိ ဝေဒိတဗ္ဗာ –

‘‘ယံကိဉ္စိ ရူပံ အတီတာနာဂတပစ္စုပ္ပန္န’’န္တိ စ၊

‘‘ဧကာယနံ ဇာတိခယန္တဒဿီ၊

မဂ္ဂံ ပဇာနာတိ ဟိတာနုကမ္ပီ၊

ဧတေန မဂ္ဂေန အတံသု ပုဗ္ဗေ၊

တရိဿန္တိ ယေ စ တရန္တိ ဩဃ’’န္တိ စ၊

‘‘ယေ စဗ္ဘတီတာ သမ္ဗုဒ္ဓါ၊ ယေ စ ဗုဒ္ဓါ အနာဂတာ၊

ယေ စေတရဟိ သမ္ဗုဒ္ဓါ၊ ဗဟူနံ သောကနာသကာ။

သဗ္ဗေ သဒ္ဓမ္မဂရုနော၊ ဝိဟံသု ဝိဟရန္တိ စ၊

အထောပိ ဝိဟရိဿန္တိ၊ ဧသာ ဗုဒ္ဓါန ဓမ္မတာ’’တိ စ

ဧဝမနေကေသု သဒ္ဒပ္ပယောဂေသု။ ဣဓ ယထိစ္ဆိတပ္ပယောဂဝသေန အတီတာနာဂတပစ္စုပ္ပန္နကာလိကာသု အဋ္ဌသု ဝိဘတ္တီသု တိဿော ပစ္စုပ္ပန္နကာလိကာ ဝိဘတ္တိယော အာဒိမှိ ကထိတာ၊ တဉ္စ ကထနံ တာသညေဝ ဝေါဟာရပထေ ယေဘုယျေန ပဝတ္တိတော ဗဟုပ္ပယောဂတာဉာပနတ္ထံ။ တာသု ပန ဒွိန္နံ ဝိဘတ္တီနံ ‘‘ပဉ္စမီသတ္တမီ’’တိသညာ သိလိဋ္ဌကထနိစ္ဆာယံ ကမေန ဝတ္တဗ္ဗာ၊ အတီတာနာဂတကာလိကာ ဝိဘတ္တိယော အပေက္ခိတွာ ကတာ။ ဣစ္စေဝံ

ယထိစ္ဆိတပ္ပယောဂေန၊ ပစ္စုပ္ပန္နဝိဘတ္တိယော၊

တိဓာ ကတွာန အာဒိမှိ၊ ကစ္စာနေန ဥဒီရိတာ။

အာဒိမှိ ကထနံ တဉ္စ၊ တာသံ ပါယေန ဝုတ္တိတော၊

ဗဟုပ္ပယောဂဘာဝဿ၊ ဉာပနတ္ထန္တိ နိဒ္ဒိသေ။

အတီတာဒိမပေက္ခိတွာ၊ သိလိဋ္ဌကထနေ ဓုဝံ၊

‘‘ပဉ္စမီ သတ္တမိ’’စ္စေဝ၊ ဒွိန္နံ နာမံ ကတန္တိ စ၊

ကာလာတိပတ္တိံ ဝဇ္ဇေတွာ၊ ဣဒံ ဝစနမီရိတံ။

ယဒိ ဧဝံ အယံ ဒေါသော၊ အာပဇ္ဇတိ န သံသယော၊

ဣတိ စေ ကောစိ ဘာသေယျ၊ အတ္ထေ အကုသလောနရော။

တေကာလိကာချာတပဒေ ၊ ကာလာတိပတ္တိယာ ပန၊

အသင်္ဂဟောဝ ဟောတီတိ၊ ‘‘တန္နာ’’တိ ပဋိသေဓယေ။

တေကာလိကာချာတပဒေ၊ န နော ကာလာတိပတ္တိယာ၊

ဣဋ္ဌော အသင်္ဂဟော တတ္ထ၊ သင်္ဂဟောယေဝ ဣစ္ဆိတော။

ပဉ္စမီသတ္တမီသညာ၊ ကာလာတိပတ္တိကံ ပန၊

ဝိဘတ္တိမနပေက္ခိတွာ၊ ကတာ ဣစ္စေဝ နော မတိ။

နာနာနယံ ဂဟေတွာန၊

ပစ္စေတဗ္ဗံ တု သာရတော၊

ယာယ ဧသော ရုတော အတ္ထော၊

တသ္မာ ဧသာ န ဒုဗ္ဗလာ။

အတ္ထော လဗ္ဘတိ ပါသံသော၊

ယတ္ထ ယတ္ထ ယထာ ယထာ၊

တထာ တထာ ဂဟေတဗ္ဗော၊

တတ္ထ တတ္ထ ဝိဘာဝိနာ။

ဝုတ္တဉှေတံ အဘိဓမ္မဋီကာယံ ‘‘ယတ္ထ ယတ္ထ ယထာ ယထာ အတ္ထော လဗ္ဘတိ၊ တတ္ထ တတ္ထ တထာ တထာ ဂဟေတဗ္ဗော’’တိ။

ပဉ္စမီသတ္တမီသညာ၊ ရူဠှီသညာတိ ကေစန၊

န ပနေဝံ ဂဟေတဗ္ဗံ၊ အဇာနိတွာ ဝဒန္တိ တေ။

နေသာ ပုရိသသညာဒိ၊ ဈလ သညာဒယော ဝိယ၊

ရူဠှိယာ ဘာသိတာ သညာ၊ ဘူတေနတ္ထေန ဘာသိတာ။

ဥပနိဓာယ ပညတ္တိ၊ ဧသာ သညာ ယတော တတော၊

အနွတ္ထသညာ ဌပိတာ၊ ပေါရာဏေဟီတိ လက္ခယေ။

ဣစ္စေဝံ ကာလဆက္ကံ တု၊ သင်္ခေပေန တိဓာ မတံ၊

ဧတမတ္ထဉှိ သန္ဓာယ၊ ‘‘ယံ တိကာလ’’န္တိ ဘာသိတံ။

အယမေတ္ထ ကာလဆက္ကသင်္ဂဟော။

ဧဝံ တိဓာ စတုဓာ ဝါ၊ ဆဓာ ဝါပိ သုမေဓသော၊

ကာလဘေဒံ ဝိဘာဝေယျ၊ ကာလညူဟိ ဝိဘာဝိတံ။

အတီတာနာဂတံ ကာလံ၊ ဝိသုံ ကာလာတိပတ္တိကံ၊

ဂဟေတွာ ပဉ္စဓာ ဟောတိ၊ ဧဝဉ္စာပိ ဝိဘာဝယေ။

ဧတ္ထ နယောဝ ‘‘အဇ္ဈတ္တ-ဗဟိဒ္ဓါ ဝါ’’တိ ပါဠိယံ၊

အတီတာနာဂတကာလီ၊ ဝိဘတ္တိ သမုဒီရိတာ။

ဣစ္စေဝံ သဗ္ဗထာပိ ကာလသင်္ဂဟော သမတ္တော။

ဣဒါနိ ဝိညူနံ အတ္ထဂ္ဂဟဏေ ကောသလ္လဇနနတ္ထံ ပကရဏန္တရဝသေနပိ ဣမသ္မိံ ပကရဏေ ဝတ္တမာနာနန္တရံ ဝုတ္တာနံ အာဏတ္တိပရိကပ္ပကာလိကာနံ ‘‘ပဉ္စမီသတ္တမီ’’တိသင်္ခါတာနံ ဒွိန္နံ ဝိဘတ္တီနံ ပဋိပါဋိဋ္ဌပနေ ပကရဏသံသန္ဒနံ ကထယာမ – ကာတန္တပ္ပကရဏသ္မိဉှိ သက္ကတဘာသာနုရူပေန ဒသဓာ အာချာတဝိဘတ္တိယော ဌပိတာ၊ ကစ္စာယနပ္ပကရဏေ ပန မာဂဓဘာသာနုရူပေန အဋ္ဌဓာ ဌပိတာ၊ နိရုတ္တိယဉ္စ ပန မာဂဓဘာသာနုရူပေနေဝ အတီတာနာဂတပစ္စုပ္ပန္နာဏတ္တိပရိကပ္ပကာလာတိပတ္တိဝသေန ဆဓာ ဌပိတာ။ တေသု ဟိ ကာတန္တေ ဝတ္တမာနာ၊ သတ္တမီ၊ ပဉ္စမီ၊ ဟိယျတ္တနီ၊ အဇ္ဇတနီ၊ ပရောက္ခာ၊ သွာတနီ၊ အာသီ၊ ဘဝိဿန္တီ၊ ကြိယာတိပတ္တိ စာတိ ဒသဓာ ဝိဘတ္တာ။ ကစ္စာယနေ ပန ဝတ္တမာနာ၊ ပဉ္စမီ၊ သတ္တမီ၊ ပရောက္ခာ၊ ဟိယျတ္တနီ၊ အဇ္ဇတနီ၊ ဘဝိဿန္တီ၊ ကာလာတိပတ္တိ စာတိ အဋ္ဌဓာ ဝိဘတ္တာ။ ဣတိ ဧတေသု ဒွီသု ကာတန္တကစ္စာယနေသု ဝိဘတ္တိယော ဝိသဒိသာယ ပဋိပါဋိယာ ဌပိတာ။ ကိဉ္စာပေတ္ထ ဝိသဒိသာ ပဋိပါဋိ၊ တထာပေတာ နိရုတ္တိယံ ဝုတ္တာတီတာဒိကာလဝိဘာဂဝသေန ဧကတော သံသန္ဒန္တိ သမေန္တိ ကိဉ္စိ ဝိသေသံ ဌပေတွာ။

ကထံ ? ကာတန္တေ တာဝ ဟိယျတ္တနီ အဇ္ဇတနီ ပရောက္ခာ စာတိ ဣမာ တိဿော ဧကန္တေန အတီတကာလိကာ၊ သွာတနီ အာသီ ဘဝိဿန္တိ စာတိ ဣမာ တိဿော ဧကန္တေန အနာဂတကာလိကာ၊ ဝတ္တမာနာ ဧကာယေဝ ပစ္စုပ္ပန္နကာလိကာ၊ သတ္တမီ ပန ပဉ္စမီ စ ပစ္စုပ္ပန္နာနာဂတကာလဝသေန ဒွိကာလိကာ ‘‘အဇ္ဇ ပုညံ ကရေယျ၊ သွေပိ ကရေယျ။ အဇ္ဇ ဂစ္ဆတု၊ သွေ ဝါ ဂစ္ဆတူ’’တိ ပယောဂါရဟတ္တာ။ ကြိယာတိပတ္တိ အနိယတကာလိကာ ‘‘သော စေ ဟိယျော ယာနံ အလဘိဿာ၊ အဂစ္ဆိဿာ။ သော စေ အဇ္ဇ အနတ္ထင်္ဂတေ သူရိယေ ယာနံ အလဘိဿာ၊ အဂစ္ဆိဿာ။ သော စေ သွေ ယာနံ အလဘိဿာ၊ အဂစ္ဆိဿာ’’တိ ပယောဂါရဟတ္တာ။ ဧဝံ အသင်္ကရတော ဝဝတ္ထပေတဗ္ဗံ။

ဧဝံ ဝဝတ္ထပေတွာ အယမမှေဟိ ဝုစ္စမာနော နယော သာဓုကံ သလ္လက္ခေတဗ္ဗော။ ကထံ? ဟိယျတ္တနဇ္ဇတနီပရောက္ခာသွာတနျာသီဘဝိဿန္တိဝသေန ဧကန္တာတီတာနာဂတကာလိကာ ဝိဘတ္တိယော ဆ၊ ဝတ္တမာနဝသေန ဧကန္တပစ္စုပ္ပန္နကာလိကာ ဝိဘတ္တိ ဧကာယေဝ၊ သာ ပဋိပါဋိယာ ဂဏိယမာနာ သတ္တမံ ဌာနံ ဘဇတိ။ ဧဝံ ဧတသ္မိံ ဝတ္တမာနာသင်္ခါတေ သတ္တမဋ္ဌာနေ ပက္ခိပိတုံ နိရုတ္တိနယေန ‘‘ပရိကပ္ပကာလိကာ’’တိ သင်္ခံ ဂတံ သတ္ထနယေန ‘‘ပစ္စုပ္ပန္နာနာဂတကာလိကာ’’တိဝတ္တဗ္ဗံ ဧကံ ဝိဘတ္တိံ သတ္တမီဘူတာယ ဝတ္တမာနာယ သမာနဋ္ဌာနတ္တာ သတ္တမီသညံ ကတွာ ဌပေသိ။ တတော ပုနဒေဝ သွာတနျာသီဘဝိဿန္တိဝသေန ဧကန္တာနာဂတကာလိကာ တိဿော ဝိဘတ္တိယော ဂဏေတွာ တံ ပစ္စုပ္ပန္နာနာဂတကာလိကံ ‘‘သတ္တမီ’’တိ လဒ္ဓသညံ ဝိဘတ္တိံ အနာဂတကာလိကဘာဝေန တာဟိ တီဟိ သဒ္ဓိံ သမာနဋ္ဌာနတ္တာ စတုတ္ထံ ကတွာ နိရုတ္တိနယေန ‘‘အာဏတ္တိကာလိကာ’’တိ သင်္ခံ ဂတံ သတ္ထနယေန ‘‘ပစ္စုပ္ပန္နာနာဂတကာလိကာ’’တိ ဝတ္တဗ္ဗံ ဧကံ ဝိဘတ္တိံ ပဉ္စန္နံ သင်္ချာနံ ပူရဏေန ပဉ္စမီသညံ ကတွာ ဌပေသိ။

ကြိယာတိပတ္တိယာ ပန အနိယတကာလိကတ္တာ တံ ဝဇ္ဇေတွာ အယံ ဝိနိစ္ဆယော ကတော၊ သော စ ခေါ နိရုတ္တိနယံယေဝ နိဿာယ။ အယံ တာဝ ကာတန္တေ ဝတ္တမာနာနန္တရံ ဝုတ္တာနံ သတ္တမီပဉ္စမီနံ အနွတ္ထသညံ ဣစ္ဆန္တာနံ အမှာကံ ရုစိ၊ ဧသာ သဒ္ဓမ္မဝိဒူဟိ ဂရူဟိ အပ္ပဋိက္ကောသိတာ အနုမတာ သမ္ပဋိစ္ဆိတာ ‘‘ဧဝမေဝံ အာဝုသော၊ ဧဝမေဝံ အာဝုသော’’တိ။ ဝေယျာကရဏေဟိပိ အပ္ပဋိက္ကောသိတာ အနုမတာ သမ္ပဋိစ္ဆိတာ ‘‘ဧဝမေဝံ ဘန္တေ၊ ဧဝမေဝံ ဘန္တေ’’တိ။ ဧဝံ သဗ္ဗေဟိပိ တေဟိ ပုဗ္ဗာစရိယေဟိ အဗ္ဘနုမောဒိတာ အပ္ပဋိက္ကောသိတာ။

ကစ္စာယနပ္ပကရဏေ ပန ဗုဒ္ဓဝစနာနုရူပေန အဋ္ဌဓာ ဝိဘတ္တီနံ ဝုတ္တတ္တာ ဝတ္တမာနာဝိဘတ္တိ ပဉ္စမဋ္ဌာနေ ဌိတာ။ ကထံ? ပရောက္ခာဟိယျတ္တနဇ္ဇတနီဘဝိဿန္တိဝသေန ဧကန္တာတီတာနာဂတကာလိကာ စတဿော ဝိဘတ္တိယော၊ ဝတ္တမာနဝသေန ဧကန္တပစ္စုပ္ပန္နကာလိကာ ဝိဘတ္တိ ဧကာယေဝ၊ သာ ပဋိပါဋိယာ ဂဏိယမာနာ ပဉ္စမံ ဌာနံ ဘဇတိ။ ဧဝံ ဧတသ္မိံ ဝတ္တမာနာသင်္ခါတေ ပဉ္စမဋ္ဌာနေ ပက္ခိပိတုံ နိရုတ္တိနယေန ‘‘အာဏတ္တိကာလိကာ’’တိ သင်္ခံ ဂတံ ‘‘အနုတ္တကာလိကာ’’တိ ဝုတ္တံ ဝိဘတ္တိံ ပဉ္စမီဘူတာယ ဝတ္တမာနာယ သမာနဋ္ဌာနတ္တာ ပဉ္စမီသညံ ကတွာ ဌပေသိ။ တတော ပရံ တံ ပဉ္စမံ ဆဋ္ဌိဋ္ဌာနေ ဌပေတွာ ပရောက္ခာ ဟိယျတ္တနီ အဇ္ဇတနီ ဘဝိဿန္တီ ဝတ္တမာနာ ပဉ္စမီတိ ဧဝံ ဂဏနာဝသေန ဆ ဝိဘတ္တိယော ဥပါဒါယ နိရုတ္တိနယေန ‘‘ပရိကပ္ပကာလိကာ’’တိ သင်္ခံ ဂတံ ‘‘အနုတ္တကာလိကာ’’တိ ဝုတ္တံ ဝိဘတ္တိံ သတ္တန္နံ သင်္ချာနံ ပူရဏေန သတ္တမီသညံ ကတွာ ဌပေသိ။

ကာလာတိပတ္တိယာ ပန အတီတာနာဂတကာလိကတ္တာ တံ ဝဇ္ဇေတွာ အယံ ဝိနိစ္ဆယော ကတော၊ သော စ ခေါ နိရုတ္တိနယံယေဝ နိဿာယ။ အယံ ကစ္စာယနေ ဝတ္တမာနာနန္တရံ ဝုတ္တာနံ ပဉ္စမီသတ္တမီနံ အနွတ္ထသညံ ဣစ္ဆန္တာနံ အမှာကံ ရုစိ၊ ဧသာ စ သဒ္ဓမ္မဝိဒူဟိ ဂရူဟိ အပ္ပဋိက္ကောသိတာ အနုမတာ သမ္ပဋိစ္ဆိတာ ‘‘ဧဝမေဝံ အာဝုသော၊ ဧဝမေဝံ အာဝုသော’’တိ။ ဝေယျာကရဏေဟိပိ အပ္ပဋိက္ကောသိတာ အနုမတာ သမ္ပဋိစ္ဆိတာ ‘‘ဧဝမေဝံ ဘန္တေ၊ ဧဝမေဝံ ဘန္တေ’’တိ။ ဧဝံ သဗ္ဗေဟိပိ တေဟိ ပုဗ္ဗာစရိယေဟိ အဗ္ဘနုမောဒိတာ အပ္ပဋိက္ကောသိတာ။

ယသ္မာ ဟိ ကာတန္တကစ္စာယနာနိ အညမညံ ဝိသဒိသဝိဘတ္တိက္ကမာနိပိ အန္တရေန ကိဉ္စိ ဝိသေသံ နိရုတ္တိယံ ဝုတ္တာတီတာဒိကာလဝိဘာဂဝသေနေကဇ္ဈံ သံသန္ဒန္တိ သမေန္တိ၊ တသ္မာ နိရုတ္တိနယညေဝ သာရတော ဂဟေတွာ ပဉ္စမီသတ္တမီဝိဘတ္တီနံ အနွတ္ထသညာပရိကပ္ပနေ အမှာကံ ရုစိ ပုဗ္ဗာစရိယေဟိ အဗ္ဘနုမောဒိတာ အပ္ပဋိက္ကောသိတာ၊ တသ္မာ ဧဝ ယော ကောစိ ဣမံ ဝါဒံ မဒ္ဒိတွာ အညံ ဝါဒံ ပတိဋ္ဌာပေတုံ သက္ခိဿတီတိ နေတံ ဌာနံ ဝိဇ္ဇတိ။ အယဉှိ နယော အတီဝ သုခုမော ဒုဒ္ဒသော စ ပရမာဏုရိဝ၊ ဒုက္ခောဂါဠှော စ မဟာဂဟနမိဝ၊ အတိဂမ္ဘီရော စ မဟာသမုဒ္ဒေါ ဝိယ၊ တသ္မာ ဣမိဿံ သဒ္ဒနီတိယံ သဒ္ဓါသမ္ပန္နေဟိ ကုလပုတ္တေဟိ သာသနောပကာရတ္ထံ ယောဂေါ သုဋ္ဌု ကရဏီယော။ တထာ ဟိ ဣဓ ကတယောဂေဟိ နာမာချာတာဒီသု စတူသု ပဒေသု ဥပ္ပန္နဝါဒါ ပရဝါဒိနော ဇိတာဝ ဟောန္တိ။

မုနိနာ မုနိနာဂေန၊ ဒုဋ္ဌာ ပဗ္ဗဇိတာ ဇိတာ၊

ယထာ ယထာ အသဒ္ဓမ္မ-ပူရဏာ ပူရဏာဒယော။

တထာ တထာဂတာဒါယာ-နုဂါယံ သဒ္ဒနီတိယံ၊

ကတယောဂေဟိပိ ဇိတာ၊ သဝန္တိ ပရဝါဒိနောတိ။

အယံ ပဉ္စမီသတ္တမီနံ ပဋိပါဋိဋ္ဌပနေ ပကရဏသံသန္ဒနာ။

အထ ဝတ္တမာနာဒီနံ ဝစနတ္ထံ ကထယာမ – တတ္ထ ဝတ္တမာနာတိ ကေနဋ္ဌေန ဝတ္တမာနာ? ဝတ္တမာနကာလဝစနဋ္ဌေန။ ပစ္စုပ္ပန္နဘာဝေန ဟိ ဝတ္တတီတိ ဝတ္တမာနော၊ ပစ္စုပ္ပန္နကြိယာသင်္ခါတော ကာလော။ တဗ္ဗာစကဝသေန ဝတ္တမာနော ကာလော ဧတိဿာ အတ္ထီတိ အယံ တိ အန္တိအာဒိဝိဘတ္တိ ဝတ္တမာနာ။ တထာ ဟိ ‘‘ဂစ္ဆတိ ဒေဝဒတ္တော’’တိ ဧတ္ထ ဒေဝဒတ္တဿ ပစ္စုပ္ပန္နံ ဂမနကြိယံ ဝိဘတ္တိဘူတော တိသဒ္ဒေါယေဝ ဝဒတိ၊ တသ္မာ တဗ္ဗာစကဝသေန ဝတ္တမာနော ကာလော ဧတိဿာ အတ္ထီတိ ဝတ္တမာနာတိ ဝုစ္စတိ။ ပဉ္စမီတိ ကေနဋ္ဌေန ပဉ္စမီ? ပဉ္စမံ ဝတ္တမာနဋ္ဌာနံ ဂမနဋ္ဌေန၊ ပဉ္စန္နဉ္စ သင်္ချာနံ ပူရဏဋ္ဌေန။ တထာ ဟိ နိယောဂါ အတီတာနာဂတပစ္စုပ္ပန္နကာလိကာနံ ပရောက္ခာဟိယျတ္တနဇ္ဇတနီဘဝိဿန္တီဝတ္တမာနာသင်္ခါတာနံ ပဉ္စန္နံ ဝိဘတ္တီနမန္တရေ ပဉ္စမီဘူတာယ ဝတ္တမာနာယ သယမ္ပိ ပစ္စုပ္ပန္နကာလိကဘာဝေန သမာနဋ္ဌာနတ္တာ ပဉ္စမံ ဝတ္တမာနဋ္ဌာနံ ဂစ္ဆတီတိ ပဉ္စမီ။ ယထာ နဒန္တီ ဂစ္ဆတီတိ နဒီ။ တထာ နိယောဂါ အတီတာနာဂတကာလိကာ ပရောက္ခာဟိယျတ္တနဇ္ဇတနီဘဝိဿန္တီသင်္ခါတာ စတဿော ဝိဘတ္တိယော ဥပါဒါယ သယမ္ပိ ဝတ္တမာနာဝိဘတ္တိ ဝိယ ပဉ္စန္နံ သင်္ချာနံ ပူရဏီတိ ပဉ္စမီ။ သတ္တမီတိ ကေနဋ္ဌေန သတ္တမီ? သတ္တန္နံ သင်္ချာနံ ပူရဏဋ္ဌေန။ တထာ ဟိ အတီတာနာဂတပစ္စုပ္ပန္နကာလိကာ ပရောက္ခာဟိယျတ္တနဇ္ဇတနီဘဝိဿန္တီဝတ္တမာနာပဉ္စမီသင်္ခါတာ ဆ ဝိဘတ္တိယော ဥပါဒါယ သယမ္ပိ ပစ္စုပ္ပန္နကာလိကာ ဟုတွာ သတ္တန္နံ သင်္ချာနံ ပူရဏီတိ သတ္တမီ။

ပရောက္ခာတိ ကေနဋ္ဌေန ပရောက္ခာ? ပရောက္ခေ ဘဝါတိ အတ္ထေန။ တထာ ဟိ စက္ခာဒိန္ဒြိယသင်္ခါတဿ အက္ခဿ ပရော တိရောဘာဝေါ ပရောက္ခံ၊ တဗ္ဗာစကဘာဝေန ပရောက္ခေ ဘဝါတိ ပရောက္ခာ။ ဟိယျတ္တနီတိ ကေနဋ္ဌေန ဟိယျတ္တနီ? ဟိယျော ပဘုတိ အတီတေ ကာလေ ဘဝါ တဗ္ဗာစကဘာဝေနာတိ အတ္ထေန။ အဇ္ဇတနီတိ ကေနဋ္ဌေန အဇ္ဇတနီ? အဇ္ဇ ပဘုတိ အတီတေ ကာလေ ဘဝါ တဗ္ဗာစကဘာဝေနာတိ အတ္ထေန။ ဘဝိဿန္တီတိ ကေနဋ္ဌေန ဘဝိဿန္တီ? ‘‘ဧဝံ အနာဂတေ ဘဝိဿတီ’’တိ အတ္ထံ ပကာသေန္တီ ဧတိ ဂစ္ဆတီတိ အတ္ထေန။ ကာလာတိပတ္တီတိ ကေနဋ္ဌေန ကာလာတိပတ္တိ? ကာလဿာတိပတနဝစနဋ္ဌေန။ တထာ ဟိ ကာလဿ အတိပတနံ အစ္စယော အတိက္ကမိတွာ ပဝတ္တိ ကာလာတိပတ္တိ၊ လဘိတဗ္ဗဿ အတ္ထဿ နိပ္ဖတ္တိရဟိတံ ကြိယာတိက္ကမနံ ။ ကာလောတိ စေတ္ထ ကြိယာ အဓိပ္ပေတာ။ ကရဏံ ကာရော၊ ကာရော ဧဝ ကာလော ရကာရဿ လကာရံ ကတွာ ဥစ္စာရဏဝသေန။ အယံ ပန ဝိဘတ္တိ တဗ္ဗာစကတ္တာ ကာလာတိပတ္တီတိ။ အယံ ပန ဝတ္တမာနာဒီနံ ဝစနတ္ထဝိဘာဝနာ။

ဝိပ္ပကိဏ္ဏဝိဝိဓနယေ၊ သံကိဏ္ဏလက္ခဏဓရဝရသာသနေ၊

သုမတိမတိဝဍ္ဎနတ္ထံ၊ ကထိတော ပကိဏ္ဏကဝိနိစ္ဆယော။

ဣတိ နဝင်္ဂေ သာဋ္ဌကထေ ပိဋကတ္တယေ ဗျပ္ပထဂတီသု ဝိညူနံ

ကောသလ္လတ္ထာယ ကတေ သဒ္ဒနီတိပ္ပကရဏေ

ပကိဏ္ဏကဝိနိစ္ဆယော နာမ

တတိယော ပရိစ္ဆေဒေါ။