အည > ဗျာကရဏ ဂန္ထ-သင်္ဂဟော > ပဒရူပသိဒ္ဓိ

MMR Vol 0

Misc. Paragraph

၂။ နာမကဏ္ဍ

ပုလ္လိင်္ဂ

အထ ¶ နာမိကဝိဘတျာဝတာရော ဝုစ္စတေ။

အတ္ထာဘိမုခံ နမနတော၊ အတ္တနိ စတ္ထဿ နာမနတော နာမံ၊ ဒဗ္ဗာဘိဓာနံ။

တံ ပန ဒုဝိဓံ အနွတ္ထရုဠှီဝသေန၊ တိဝိဓံ ပုမိတ္ထိနပုံသကလိင်္ဂဝသေန။ ယထာ – ရုက္ခော၊ မာလာ၊ ဓနံ။

စတုဗ္ဗိဓံ သာမညဂုဏကြိယာယဒိစ္ဆာဝသေန၊ ယထာ – ရုက္ခော၊ နီလော၊ ပါစကော၊ သိရိဝဍ္ဎောတိအာဒိ။

အဋ္ဌဝိဓံ အဝဏ္ဏိဝဏ္ဏုဝဏ္ဏောကာရနိဂ္ဂဟီတန္တပကတိဘေဒေန။

တတ္ထ ပဌမံ အကာရန္တမှာ ပုလ္လိင်္ဂါ ဇာတိနိမိတ္တာ ပုရိသသဒ္ဒါ သျာဒိဝိဘတ္တိယော ပရာ ယောဇီယန္တေ။

အဓိကာရောယံ။ တတ္ထ ပဉ္စ မာရေ ဇိတဝါတိ ဇိနော၊ ဗုဒ္ဓါ။ ဇိနဿ ဝစနံ ဇိနဝစနံ၊ တဿ ဇိနဝစနဿ ယုတ္တံ ဇိနဝစနယုတ္တံ၊ တေပိဋကဿ ဗုဒ္ဓဝစနဿ မာဂဓိကာယ သဘာဝနိရုတ္တိယာ ယုတ္တံ အနုရူပမေဝါတိ ဣဒံ အဓိကာရတ္ထံ ဝေဒိတဗ္ဗံ။

သာ မာဂဓီ မူလဘာသာ၊ နရာ ယာယာဒိကပ္ပိကာ၊

ဗြဟ္မာနော စ’ဿုတာလာပါ၊ သမ္ဗုဒ္ဓါ စာပိ ဘာသရေ။

အဓိကာရော ပန တိဝိဓော သီဟဂတိကမဏ္ဍူကဂတိကယထာနုပုဗ္ဗိကဝသေန၊ အယံ ပန သီဟဂတိကော ပုဗ္ဗာပရဝိလောကနတော၊ ယထာနုပုဗ္ဗိကောယေဝ ဝါ။

သက္ကတဝိသဒိသံ ¶ ကတွာ ဇိနဝစနာနုရူပဝသေန ပကတိဋ္ဌပနတ္ထံ ပရိဘာသမာဟ။

လိင်္ဂံပါဋိပဒိကံ၊ ယထာ ယထာ ဇိနဝစနယုတ္တဉှိ လိင်္ဂံ၊ တထာ တထာ ဣဓ လိင်္ဂံ နိပစ္စတေ ဌပီယတိ။ စသဒ္ဒေန ဓာတဝေါ စာတိ ဇိနဝစနာနုရူပတော ‘‘ပုရိသ’’ဣတိ လိင်္ဂေ ဌပိတေ တတော တဿ ဓာတုပ္ပစ္စယဝိဘတ္တိဝဇ္ဇိတဿ အတ္ထဝတော သဒ္ဒဿ ‘‘ပရသမညာ ပယောဂေ’’တိ ပရိဘာသတော လိင်္ဂသညာယံ –

ဣတော ပရံ ဝိဘတ္တိပ္ပစ္စယာဒိဝိဓာနေ သဗ္ဗတ္ထ လိင်္ဂဂ္ဂဟဏမနုဝတ္တတေ။

တတော ဇိနဝစနယုတ္တေဟိ လိင်္ဂေဟိ ပရာ ဝိဘတ္တိယော ဟောန္တိ။ စသဒ္ဒဂ္ဂဟဏေန တဝေတုနာဒိပစ္စယန္တနိပါတတောပိ။ ကမ္မာဒိဝသေန၊ ဧကတ္တာဒိဝသေန စ လိင်္ဂတ္ထံ ဝိဘဇန္တီတိ ဝိဘတ္တိယော။

ကာ စ ပန တာ ဝိဘတ္တိယော? ‘‘ဝိဘတ္တိယော’’တိ အဓိကာရော။

၆၃။ သိယော၊ အံယော၊ နာဟိ၊ သနံ၊ သ္မာဟိ၊ သနံ၊ သ္မိံသု။

သျာဒယော ဒွိသတ္တ ဝိဘတ္တိယော နာမ ဟောန္တိ။ တတ္ထ သိ၊ ယော ဣတိ ပဌမာ၊ အံ၊ ယော ဣတိ ဒုတိယာ၊ နာ၊ ဟိ ဣတိ တတိယာ၊ သ၊ နံ ဣတိ စတုတ္ထီ၊ သ္မာ၊ ဟိ ဣတိ ပဉ္စမီ၊ သ၊ နံ ဣတိ ဆဋ္ဌီ၊ သ္မိံ၊ သု ဣတိ သတ္တမီ။

ဣဒံ ¶ ပန သညာဓိကာရပရိဘာသာဝိဓိသုတ္တေသု သညာသုတ္တန္တိ ဒဋ္ဌဗ္ဗံ၊ ဝုတ္တဉှိ ဝုတ္တိယံ ‘‘ဝိဘတ္တိဣစ္စနေန ကွတ္ထော၊ အမှဿ မမံ သဝိဘတ္တိဿ သေ’’တိ၊ ဣတရထာ ပုရိမသုတ္တေန ဧကယောဂေါ ကတ္တဗ္ဗောတိ။ ဧတ္ထ စ ပဌမာဒိဝေါဟာရော၊ ဧကဝစနာဒိဝေါဟာရော စ အနွတ္ထဝသေန၊ ပရသမညာဝသေန ဝါ သိဒ္ဓါတိ ဝေဒိတဗ္ဗော။

ဧကဿ ဝစနံ ဧကဝစနံ၊ ဗဟူနံ ဝစနံ ဗဟုဝစနံ၊ ဒွိန္နံ ပူရဏီ ဒုတိယာတိအာဒိ၊ ဣတရထာ ပုရိမသုတ္တေ စသဒ္ဒေန သညာကရဏေ အပ္ပကတနိရတ္ထကဝိဓိပ္ပသင်္ဂေါ သိယာ။

‘‘ဇိနဝစနယုတ္တဉှိ၊ လိင်္ဂဉ္စ နိပစ္စတေ’’တိ စ ဝတ္တတေ။ ဣဓ ပန ပဒနိပ္ဖာဒနမ္ပိ ဇိနဝစနဿာဝိရောဓေနာတိ ဉာပေတုံ ပရိဘာသန္တရမာဟ။

ယထာ ယထာ တေသံ ဇိနဝစနာနံ ဥပရောဓော န ဟောတိ၊ တထာ တထာ ဣဓ လိင်္ဂံ၊ စသဒ္ဒေနာချာတဉ္စ နိပစ္စတေ၊ နိပ္ဖာဒီယတီတိ အတ္ထော။ တေနေဝ ဣဓ စ အာချာတေ စ ဒွိဝစနာဂ္ဂဟဏံ၊ သက္ကတဝိသဒိသတော ဝိဘတ္တိပ္ပစ္စယာဒိဝိဓာနဉ္စ ကတန္တိ ဒဋ္ဌဗ္ဗံ။

တတ္ထ အဝိသေသေန သဗ္ဗသျာဒိဝိဘတ္တိပ္ပသင်္ဂေ ‘‘ဝတ္တိစ္ဆာနုပုဗ္ဗိကာ သဒ္ဒပ္ပဝတ္တီ’’တိ ဝတ္တိစ္ဆာဝသာ –

လိင်္ဂတ္ထာဘိဓာနမတ္တေ ပဌမာဝိဘတ္တိ ဟောတီတိ ပဌမာ။ တတ္ထာပိ အနိယမေနေကဝစနဗဟုဝစနပ္ပသင်္ဂေ ‘‘ဧကမှီ ဝတ္တဗ္ဗေ ဧကဝစန’’န္တိ ပရိဘာသတော လိင်္ဂတ္ထဿေကတ္တဝစနိစ္ဆာယံ ပဌမေကဝစနံ သိ။

‘‘အတော နေနာ’’တိ ဣတော ‘‘အတော’’တိ ဝတ္တတေ၊ လိင်္ဂဂ္ဂဟဏဉ္စ။

သိ၊ ဩဣတိ ဒွိပဒမိဒံ။ လိင်္ဂဿ အကာရတော ပရဿ သိဝစနဿ ဩကာရော ဟောတိ။

သုတ္တေသု ဟိ ပဌမာနိဒ္ဒိဋ္ဌဿ ကာရိယိနော ဆဋ္ဌီဝိပရိဏာမေန ဝိဝရဏံ အာဒေသာပေက္ခန္တိ ဒဋ္ဌဗ္ဗံ။

ဧတ္ထ စ သီတိ ဝိဘတ္တိ ဂယှတေ ဝိဘတ္တိကာရိယဝိဓိပ္ပကရဏတော၊ ‘‘တတော စ ဝိဘတ္တိယော’’တိ ဣတော ဝိဘတ္တိဂ္ဂဟဏာနုဝတ္တနတော ဝါ၊ ဧဝံ သဗ္ဗတ္ထ သျာဒီနံ ကာရိယဝိဓာနေ ဝိဘတ္တိယေဝါတိ ဒဋ္ဌဗ္ဗံ။

‘‘ဝါ ပရော အသရူပါ’’တိ ပရလောပေ သမ္ပတ္တေ တဒပဝါဒေန ပုဗ္ဗလောပမာဟ။

၆၇။ သရလောပေါ’မာဒေသပ္ပစ္စယာဒိမှိ သရလောပေ တု ပကတိ။

ပုဗ္ဗဿရဿ လောပေါ ဟောတိ အံဝစနေ၊ အာဒေသပ္ပစ္စယာဒိဘူတေ စ သရေ ပရေ၊ သရလောပေ ကတေ တု ပရသရဿ ပကတိဘာဝေါ ဟောတိ။ ဧတ္ထ စ ‘‘သရလောပေ’’တိ ပုနဂ္ဂဟဏံ ဣမိနာဝ ကတသရလောပနိမိတ္တေယေဝ ပရဿ ဝိကာရေ သမ္ပတ္တေ ပကတိဘာဝတ္ထံ။ ပရသရဿ ပကတိဘာဝဝိဓာနသာမတ္ထိယတော အမာဒေသပ္ပစ္စယာဒိဘူတေ သရေ ပရေတိပိ သိဒ္ဓံ။

တျာဒိဝိဘတ္တိယော စေတ္ထ၊ ပစ္စယတ္တေန ဂယှရေ၊

အာဒိဂ္ဂဟဏမာချာတ-ကိတကေသွာဂမတ္ထိဒံ။

ပစ္စယသာဟစရိယာ၊ စာဒေသော ပကတီပရော၊

ပဒန္တဿရလောပေါ န၊ တေန’ဗ္ဘာဟာဒိကေ ပရေ။

တုဂ္ဂဟဏံ ¶ ဘိက္ခုနီအာဒီသု သရလောပနိဝတ္တနတ္ထံ၊ ‘‘နယေ ပရံ ယုတ္တေ’’တိ ပရံ နေတဗ္ဗံ။ ပုရိသော တိဋ္ဌတိ။

ပုရိသော စ ပုရိသော စာတိ ပုရိသ ပုရိသဣတိ ဝတ္တဗ္ဗေ –

သရူပါနံ သမာနရူပါနံ ပဒဗျဉ္ဇနာနံ မဇ္ဈေ ဧကောဝ သိဿတေ၊ အညေ လောပမာပဇ္ဇန္တေ အသကိန္တိ ဧကသေသော။ ဧတ္ထ စ ‘‘သရူပါန’’န္တိ ဝုတ္တတ္တာဝ သိဒ္ဓေ အသကိမ္ပယောဂေ ပုနာသကိံဂဟဏံ ဧကဝိဘတ္တိဝိသယာနမေဝါသကိမ္ပယောဂေ ဧဝါယန္တိ ဒဿနတ္ထံ၊ န စ ဝိစ္ဆာပယောဂေ’တိပ္ပသင်္ဂေါ။ ‘‘ဝဂ္ဂါ ပဉ္စပဉ္စသော မန္တာ’’တိ ဧတ္ထ ‘‘ပဉ္စပဉ္စသော’’တိ နိဒ္ဒေသေနေဝ ဝိစ္ဆာပယောဂသိဒ္ဓိယာ ဉာပိတတ္တာ၊ အထ ဝါ သဟဝစနိစ္ဆာယ’မယ’မေကသေသော။

ယောဂဝိဘာဂတော စေတ္ထ၊ ဧကသေသွသကိံ ဣတိ၊

ဝိရူပေကသေသော ဟောတိ၊ ဝါ ‘‘ပိတူန’’န္တိအာဒိသု။

တတ္ထေဝ လိင်္ဂတ္ထဿ ဗဟုတ္တဝစနိစ္ဆာယံ ‘‘ဗဟုမှိ ဝတ္တဗ္ဗေ ဗဟုဝစန’’န္တိ ပဌမာဗဟုဝစနံ ယော၊ ပုရိသ ယော ဣတီဓ ‘‘အတော၊ ဝါ’’တိ စ ဝတ္တတေ။

အကာရန္တတော လိင်္ဂမှာ ပရေသံ သဗ္ဗေသံ ပဌမာယောနီနံ၊ ဒုတိယာယောနီနဉ္စ ယယာက္ကမံ အာကာရေကာရာဒေသာ ဟောန္တိ ဝါတိ အာကာရော၊ သဗ္ဗဂ္ဂဟဏံ သဗ္ဗာဒေသတ္ထံ၊ သရလောပါဒိ ပုရိမသဒိသမေဝ၊ ပုရိသာ တိဋ္ဌန္တိ။

ဝါ ဣစ္စေဝ ရူပါ ရူပါနိ၊ အဂ္ဂယော၊ မုနယော။

ဝါသဒ္ဒေါယံ ဝဝတ္ထိတပိဘာသတ္ထော၊ တေန စေတ္ထ –

နိစ္စမေဝ ¶ စ ပုလ္လိင်္ဂေ၊ အနိစ္စဉ္စ နပုံသကေ၊

အသန္တံ ဈေ ကတတ္တေ တု၊ ဝိဓိံ ဒီပေတိ ဝါသုတိ။

တတ္ထေဝါလပနဝစနိစ္ဆာယံ ‘‘လိင်္ဂတ္ထေ ပဌမာ’’တိ ဝတ္တတေ။

အဘိမုခံ ကတွာ လပနံ အာလပနံ၊ သမ္ဗောဓနံ။ တသ္မိံ အာလပနတ္ထာဓိကေ လိင်္ဂတ္ထာဘိဓာနမတ္တေ စ ပဌမာဝိဘတ္တိ ဟောတိ။ ပုရေ ဝိယ ဧကဝစနာဒိ။

အာလပနတ္ထေ ဝိဟိတော သိ ဂသညော ဟောတီတိ ဂသညာယံ ‘‘ဘော ဂေ တူ’’တိ ဣတော ‘‘ဂေ’’တိ ဝတ္တတေ။

လိင်္ဂဿ သမ္ဗန္ဓီ အကာရော စ ပိတုသတ္ထုဣစ္စေဝမာဒီနမန္တော စ အာကာရတ္တမာပဇ္ဇတေ ဂေ ပရေ။

လိင်္ဂဿ သမ္ဗန္ဓီ အာကာရော ရဿမာပဇ္ဇတေ ဂေ ပရေ ဝိကပ္ပေန၊ အဒူရဋ္ဌဿာလပနေဝါယံ။

‘‘သိံ၊ သော၊ သျာ စ၊ သခတော ဂဿေ ဝါ၊ ဃတေ စာ’’တိ ဧဝမာဒီဟိ နိဒ္ဒိဋ္ဌေဟိ အညော သေသော နာမ၊ တတော သေသတော လိင်္ဂမှာ ဂသိဣစ္စေတေ လောပမာပဇ္ဇန္တေ။ အပိဂ္ဂဟဏံ ¶ ဒုတိယတ္ထသမ္ပိဏ္ဍနတ္ထံ၊ ဧတ္ထ စ သတိပိ သိဂ္ဂဟဏေ ဝဣတိ ဝစနမေဝ ဉာပကမညတ္ထာပိ သိဂ္ဂဟဏေ အာလပနာဂ္ဂဟဏဿ။ ကေစိ အာလပနာဘိဗျတ္တိယာ ဘဝန္တသဒ္ဒံ ဝါ ဟေသဒ္ဒံ ဝါ ပယုဇ္ဇန္တေ။ ဘော ပုရိသ တိဋ္ဌ၊ ဟေ ပုရိသာ ဝါ။

ဗဟုဝစနေ န ဝိသေသော၊ ဘဝန္တော ပုရိသာ တိဋ္ဌထ။

တတ္ထေဝ ကမ္မတ္ထဝစနိစ္ဆာယံ ‘‘ဝ၊’’တိ ဝတ္တတေ။

ယံ ဝါ ကရောတိ၊ ယံ ဝါ ဝိကရောတိ၊ ယံ ဝါ ပါပုဏာတိ၊ တံ ကာရကံ ကြိယာနိမိတ္တံ ကမ္မသညံ ဟောတိ။

ကမ္မတ္ထေ ဒုတိယာဝိဘတ္တိ ဟောတိ။ ပုရေ ဝိယ ဒုတိယေကဝစနံ အံ၊ ‘‘သရလောပေါ’’တိအာဒိနာ သရေ လုတ္တေ ‘‘ဒီဃ’’န္တိ ဒီဃေ သမ္ပတ္တေ ပကတိဘာဝေါ စ၊ ပုရိသံ ပဿ။

ဗဟုဝစနေ ‘‘သဗ္ဗယောနီနမာဧ’’တိ ယောဝစနဿေကာရော၊ ပုရိသေ ပဿ။

ယော အတ္တပ္ပဓာနော ကြိယံ ကရောတိ၊ သော ကတ္တုသညော ဟောတိ။

ကတ္တရိ စ ကာရကေ တတိယာဝိဘတ္တိ ဟောတီတိ တတိယေကဝစနံ နာ။

ဧနာတိ အဝိဘတ္တိကနိဒ္ဒေသော။ အကာရန္တတော လိင်္ဂမှာ ပရဿ နာဝစနဿ ဧနာဒေသော ဟောတိ၊ သရလောပါဒိ၊ ပုရိသေန ကတံ။

သု၊ ဟိဣစ္စေတေသု ဝိဘတ္တိရူပေသု ပရေသု လိင်္ဂဿ သမ္ဗန္ဓီ အကာရော ဧတ္တမာပဇ္ဇတေ။

၈၁။ သ္မာဟိသ္မိံနံ မှာဘိမှိ ဝါ။

သဗ္ဗတော လိင်္ဂမှာ သ္မာ ဟိ သ္မိံဣစ္စေတေသံ ယထာက္ကမံ မှာ၊ ဘိ၊ မှိဣစ္စေတေ အာဒေသာ ဟောန္တိ ဝါ၊ ပုရိသေဟိ၊ ပုရိသေဘိ ကတံ။

ယေန ဝါ ကယိရတေ၊ ယေန ဝါ ပဿတိ၊ ယေန ဝါ သုဏာတိ၊ တံ ကာရကံ ကရဏသညံ ဟောတိ။

ကရဏကာရကေ တတိယာဝိဘတ္တိ ဟောတိ၊ သေသံ ကတ္တုသမံ၊ အာဝိဋ္ဌေန ပုရိသေန သော ပုညံ ကရောတိ၊ ပုရိသေဟိ၊ ပုရိသေဘိ။

၈၄။ ယဿ ¶ ဒါတုကာမော ရောစတေ ဓာရယတေ ဝါ တံ သမ္ပဒါနံ။

ယဿ ဝါ ဒါတုကာမော၊ ယဿ ဝါ ရောစတေ၊ ယဿ ဝါ ဓာရယတေ၊ တံ ကာရကံ သမ္ပဒါနသညံ ဟောတိ။

သမ္ပဒါနကာရကေ စတုတ္ထီဝိဘတ္တိ ဟောတီတိ စတုတ္ထိယာ ဧကဝစနံ သ။

သဗ္ဗတော လိင်္ဂမှာ သကာရာဂမော ဟောတိ သေ ဝိဘတ္တိမှိ ပရေ။ ပုရိသဿ ဓနံ ဒဒါတိ။

ဗဟုဝစနမှိ ‘‘ဒီဃ’’န္တိ ဝတ္တတေ။

သု နံ ဟိဣစ္စေတေသု ပရေသု လိင်္ဂဿ အန္တဘူတာ သဗ္ဗေ ရဿသရာ ဒီဃမာပဇ္ဇန္တေ၊ စဂ္ဂဟဏမိကာရုကာရာနံ ကွစိ နိဝတ္တနတ္ထံ။ ပုရိသာနံ။

၈၈။ ယသ္မာ ဒပေတိ ဘယမာဒတ္တေ ဝါ တဒပါဒါနံ။

ယသ္မာ ဝါ အဝဓိဘူတာ အပေတိ၊ ယသ္မာ ဝါ ဘယံ၊ ယသ္မာ ဝါ အာဒတ္တေ၊ တံ ကာရကံ အပါဒါနသညံ ဟောတိ။

အပါဒါနကာရကေ ပဉ္စမီဝိဘတ္တိ ဟောတီတိ ပဉ္စမိယာ ဧကဝစနံ သ္မာ။

‘‘အတော၊ သဗ္ဗေသံ၊ အာ ဧ’’တိ စ ဝတ္တတေ။

အကာရန္တတော လိင်္ဂမှာ သဗ္ဗေသံ သ္မာ သ္မိံဣစ္စေတေသံ ယထာက္ကမံ အာကာရေကာရာဒေသာ ဟောန္တိ ဝါ၊ အညတ္ထ မှာဒေသော။ ပုရိသာ အပေတိ၊ ပုရိသမှာ၊ ပုရိသသ္မာ။

ဗဟုဝစနေ သဗ္ဗတ္ထ တတိယာသမံ၊ ဟိဿ ဘိအာဒေသော ဟောတိ။ ပုရိသေဟိ၊ ပုရိသေဘိ အပေတိ။

ယဿ ဝါ ပရိဂ္ဂဟော၊ တံ သာမိသညံ ဟောတိ။

သာမိသ္မိံ ဆဋ္ဌီဝိဘတ္တိ ဟောတိ။ ဌပေတွာ အာယာဒေသံ သဗ္ဗတ္ထ စတုတ္ထီဆဋ္ဌီနံ သမာနံ ရူပံ။ ပုရိသဿ ဧတံ ဓနံ၊ ပုရိသာနံ။

ယော ကတ္တုကမ္မာနံ ကြိယာယ အာဓာရော၊ တံ ကာရကံ ဩကာသသညံ ဟောတိ။

ဩကာသကာရကေ သတ္တမီဝိဘတ္တိ ဟောတီတိ သတ္တမိယာ ဧကဝစနံ သ္မိံ၊ တဿ ‘‘သ္မာသ္မိံနံ ဝါ’’တိ ဧကာရော၊ မှိအာဒေသော စ၊ ပုရိသေ ပတိဋ္ဌိတံ၊ ပုရိသမှိ၊ ပုရိသသ္မိံ။

ဗဟုဝစနေ ‘‘သုဟိသွကာရော ဧ’’တိ ဧကာရော၊ ပုရိသေသု။

ပုရိသော၊ ပုရိသာ၊ ဘော ပုရိသ ဘော ပုရိသာ ဝါ၊ ဘဝန္တော ပုရိသာ၊ ပုရိသံ၊ ပုရိသေ၊ ပုရိသေန၊ ပုရိသေဟိ ပုရိသေဘိ၊ ပုရိသဿ၊ ပုရိသာနံ၊ ပုရိသာ ပုရိသသ္မာ ပုရိသမှာ၊ ပုရိသေဟိ ပုရိသေဘိ၊ ပုရိသဿ၊ ပုရိသာနံ၊ ပုရိသေ ပုရိသသ္မိံ ပုရိသမှိ၊ ပုရိသေသု။

တထာ သုဂတော၊ သုဂတာ၊ ဘော သုဂတ ဘော သုဂတာ ဝါ၊ ဘဝန္တော သုဂတာ၊ သုဂတံ၊ သုဂတေ၊ သုဂတေန၊ သုဂတေဟိ သုဂတေဘိ၊ သုဂတဿ၊ သုဂတာနံ၊ သုဂတာ သုဂတသ္မာ သုဂတမှာ၊ သုဂတေဟိ သုဂတေဘိ၊ သုဂတဿ၊ သုဂတာနံ၊ သုဂတေ သုဂတသ္မိံ သုဂတမှိ၊ သုဂတေသု။

ဧဝံ သုရာ’သုရ နရော’ရဂ နာဂ ယက္ခာ၊

ဂန္ဓဗ္ဗ ကိန္နရ မနုဿ ပိသာစ ပေတာ၊

မာတင်္ဂ ဇင်္ဂမ တုရင်္ဂ ဝရာဟ သီဟာ၊

ဗျဂ္ဃ’စ္ဆ ကစ္ဆပ တရစ္ဆ မိဂ’ဿ သောဏာ။

အာလောက လောက နိလယာ’နိလ စာဂ ယောဂါ၊ ဝါယာမ ဂါမ

သင်္ဃော’ဃ ဃောသ ပဋိဃာ’သဝ ကောဓ လောဘာ၊

သာရမ္ဘ ထမ္ဘ မဒ မာန ပမာဒ မက္ခာ။

ပုန္နာဂ ¶ ပူဂ ပနသာ’သန စမ္ပက’မ္ဗာ၊

ဟိန္တာလ တာလ ဗကုလ’ဇ္ဇုန ကိံသုကာ စ၊

မန္ဒာရ ကုန္ဒ ပုစိမန္ဒ ကရဉ္ဇ ရုက္ခာ၊

ဉေယျာ မယူရ သကုနဏ္ဍဇ ကောဉ္စ ဟံသာ –

မနောဂဏာဒိဿ တု နာသသ္မာသ္မိံသု ဝိသေသော။ အညတ္ထ ပုရိသသမံ။

မနော၊ မနာ၊ ဟေ မန ဟေ မနာ ဝါ၊ ဘဝန္တော မနာ၊ မနံ၊ မနေ။

၉၅။ မနောဂဏာဒိတော သ္မိံနာနမိအာ။

မနောပဘုတိ ဂဏော မနောဂဏော၊ မနောဂဏာဒိတော သ္မိံ၊ နာဣစ္စေတေသံ ယထာက္ကမံ ဣကာရာကာရာဒေသာ ဟောန္တိ ဝါ။ အာဒိဂ္ဂဟဏေန ဗိလပဒါဒိတောပိ။

ဧတေဟေဝ မနောဂဏာဒီဟိ သရေ ပရေ သာဂမော ဟောတိ ဝါ။ မနသာ၊ မနေန။

ဝဝတ္ထိတဝိဘာသတ္ထောယံ ဝါသဒ္ဒေါ၊ တေန ‘‘မနော မနာ မနံ မနေ မနအာယတန’’န္တိအာဒီသု န ဟောတိ။ ‘‘မာနသိကံ၊ စေတသိက’’န္တိအာဒီသု နိစ္စံ။ မနေဟိ၊ မနေဘိ။

‘‘မနောဂဏာဒိတော၊ ဝါ’’တိ စ ဝတ္တတေ။

မနောဂဏာဒိတော ပရဿ သဿ ဝိဘတ္တိဿ ဩကာရော ဟောတိ ဝါ။ သာဂမော။

မနသော မနဿ၊ မနာနံ၊ မနာ မနသ္မာ မနမှာ၊ မနေဟိ မနေဘိ၊ မနသော မနဿ၊ မနာနံ၊ မနသိ မနေ မနသ္မိံ မနမှိ၊ မနေသု။

ဂုဏဝန္တုသဒ္ဒဿ ဘေဒေါ။ ဂုဏဝန္တု သိ ဣတီဓ –

‘‘သဝိဘတ္တိဿ၊ န္တုဿာ’’တိ စ အဓိကာရော။

သဗ္ဗဿေဝ န္တုပစ္စယဿ သဝိဘတ္တိဿ အာအာဒေသော ဟောတိ သိမှိ ဝိဘတ္တိမှိ။ ဂုဏဝါ။

‘‘ယောမှိ၊ ပဌမေ’’သီဟဂတိယာ ‘‘ဝါ’’တိ စ ဝတ္တတေ။

သဗ္ဗဿေဝ န္တုပစ္စယဿ သဝိဘတ္တိဿ န္တောအာဒေသော ဟောတိ ဝါ ယောမှိ ပဌမေ၊ ဂုဏဝန္တော တိဋ္ဌန္တိ။

‘‘သုနံဟိသု၊ အတ္တ’’န္တိ စ ဝတ္တတေ။

န္တုပစ္စယဿ အန္တော ဥကာရော အတ္တမာပဇ္ဇတေ သုနံဟိ ယောဣစ္စေတေသု၊ စဂ္ဂဟဏေန အညေသု အံ နာ သ္မာသ္မိံသု စ။ ဂုဏဝန္တာ၊ ဆဋ္ဌိယာ သိဒ္ဓေပိ အန္တာဒေသေ ပုန အန္တဂ္ဂဟဏကရဏတော ယောနံ ဣကာရော စ ကွစိ။ ဂုဏဝန္တိ။

သဗ္ဗဿေဝ န္တုပစ္စယဿ သဝိဘတ္တိဿ အံ အဝဏ္ဏဣစ္စေတေ အာဒေသာ ဟောန္တိ ဂေ ပရေ။

ဘော ဂုဏဝံ ဘော ဂုဏဝ ဘော ဂုဏဝါ၊ ဘဝန္တော ဂုဏဝန္တော ဂုဏဝန္တာ၊ ဂုဏဝန္တံ၊ ဂုဏဝန္တေ။

သဗ္ဗဿေဝ န္တုပစ္စယဿ သဝိဘတ္တိဿ တောတိ တာအာဒေသာ ဟောန္တိ ဝါ သသ္မိံနာဣစ္စေတေသု ယထာသင်္ချံ။ ဂုဏဝတာ ဂုဏဝန္တေန၊ ဂုဏဝန္တေဟိ ဂုဏဝန္တေဘိ။

သဗ္ဗဿေဝ န္တုပစ္စယဿ သဝိဘတ္တိဿ န္တဿဣစ္စယမာဒေသော ဟောတိ ဝါ သေ ဝိဘတ္တိမှိ။ ဂုဏဝန္တဿ ဂုဏဝတော။

သဗ္ဗဿေဝ န္တုပစ္စယဿ သဝိဘတ္တိဿ တံအာဒေသော ဟောတိ ဝါ နံမှိ ဝိဘတ္တိမှိ။ ဂုဏဝတံ ဂုဏဝန္တာနံ။

‘‘အမှ ¶ တုမှ န္တု’’ဣစ္စာဒိနာ သ္မာဝစနဿ နာဗျပဒေသော။

ဂုဏဝတာ ဂုဏဝန္တာ ဂုဏဝန္တသ္မာ ဂုဏဝန္တမှာ၊ ဂုဏဝန္တေဟိ ဂုဏဝန္တေဘိ၊ ဂုဏဝန္တဿ ဂုဏဝတော၊ ဂုဏဝတံ ဂုဏဝန္တာနံ၊ ဂုဏဝတိ ဂုဏဝန္တေ ဂုဏဝန္တသ္မိံ ဂုဏဝန္တမှီ၊ ဂုဏဝန္တေသု။

ဧဝံ ဂဏဝါ ကုလဝါ ဗလဝါ ယသဝါ ဓနဝါ သုတဝါ ဘဂဝါ ဟိမဝါ ဖလဝါ သီလဝါ ပညဝါ ဣစ္စာဒယော။

‘‘အတ္တံ၊ န္တုဿ’န္တော’’တိ စ ဝတ္တမာနေ –

န္တုပစ္စယဿ အန္တော အတ္တံ ဟောတိ ဝါ သိမှိ ဝိဘတ္တိမှိ။ ဟိမဝန္တော၊ ဟိမဝါ၊ သေသံ သမံ။

ပုန ဝါဂ္ဂဟဏကရဏံ ဟိမဝန္တုသဒ္ဒတော အညတြ အတ္တနိသေဓနတ္ထံ၊ ဝဝတ္ထိတဝိဘာသတ္ထောယံ ဝါသဒ္ဒေါ။ တေန ဂုဏဝန္တာဒီသု နာတိပ္ပသင်္ဂေါ။

ဧဝံ သတိမာ ဓိတိမာ ဂတိမာ မတိမာ မုတိမာ မုတ္တိမာ ဇုတိမာ သိရိမာ ဟိရိမာ ထုတိမာ ရတိမာ ယတိမာ သုစိမာ ကလိမာ ဗလိမာ ကသိမာ ရုစိမာ ဗုဒ္ဓိမာ စက္ခုမာ ဗန္ဓုမာ ဟေတုမာ သေတုမာ ကေတုမာ ရာဟုမာ ဘာဏုမာ ခါဏုမာ ဝိဇ္ဇုမာ ဣစ္စာဒယော။

တတ္ထ သတိမန္တု ဗန္ဓုမန္တုသဒ္ဒါနံ အံသေသု ရူပဘေဒေါ။ ‘‘အတ္တံ၊ န္တုဿာ’’တိ စ ဝတ္တတေ။

သဗ္ဗဿေဝ န္တုပစ္စယဿ အတ္တံ ဟောတိ ဝါ အံသဣစ္စေတေသု။ ဣဓာပိ ဝါသဒ္ဒဿ ဝဝတ္ထိတဝိဘာသတ္တာ နာတိပ္ပသင်္ဂေါ ¶ ။ သတိမံ သတိမန္တံ၊ ဗန္ဓုမံ ဗန္ဓုမန္တံ၊ သတိမဿ သတိမတော သတိမန္တဿ၊ ဗန္ဓုမဿ ဗန္ဓုမတော ဗန္ဓုမန္တဿ၊ သေသံ သမံ။

ဂစ္ဆန္တသဒ္ဒဿ ဘေဒေါ၊ ဂစ္ဆန္တ သိ၊

၁၀၇။ သိမှိ ဂစ္ဆန္တာဒီနံ န္တသဒ္ဒေါ အံ။

ဂစ္ဆန္တိစ္စေဝမာဒီနံ အန္တပ္ပစ္စယန္တာနံ န္တသဒ္ဒေါ အံရူပံ အာပဇ္ဇတေ ဝါ သိမှိ ဝိဘတ္တိမှိ။ သရလောပသိလောပါ၊ သော ဂစ္ဆံ၊ ဂစ္ဆန္တော ဝါ ဂဏှာတိ။

‘‘ဂစ္ဆန္တာဒီနံ၊ န္တသဒ္ဒေါ’’တိ စ ဝတ္တမာနေ –

ဂစ္ဆန္တာဒီနံ န္တသဒ္ဒေါ န္တုပစ္စယောဝ ဒဋ္ဌဗ္ဗော သေသေသု ဝိဘတ္တိပ္ပစ္စယေသု၊ အသ္မိမှိ ကာရိယာတိဒေသောယံ။ သေသံ ဂုဏဝန္တုသမံ။

တေ ဂစ္ဆန္တော ဂစ္ဆန္တာ၊ ဘော ဂစ္ဆံ ဘော ဂစ္ဆ ဘော ဂစ္ဆာ၊ ဘဝန္တော ဂစ္ဆန္တော ဂစ္ဆန္တာ၊ [ဂစ္ဆံ] ဂစ္ဆန္တံ၊ ဂစ္ဆန္တေ၊ ဂစ္ဆတာ ဂစ္ဆန္တေန၊ ဂစ္ဆန္တေဟိ ဂစ္ဆန္တေဘိ၊ ဂစ္ဆတော ဂစ္ဆန္တဿ၊ ဂစ္ဆတံ ဂစ္ဆန္တာနံ၊ ဂစ္ဆတာ ဂစ္ဆန္တသ္မာ ဂစ္ဆန္တမှာ၊ ဂစ္ဆန္တေဟိ ဂစ္ဆန္တေဘိ၊ ဂစ္ဆတော ဂစ္ဆန္တဿ၊ ဂစ္ဆတံ ဂစ္ဆန္တာနံ၊ ဂစ္ဆတိ ဂစ္ဆန္တေ ဂစ္ဆန္တသ္မိံ ဂစ္ဆန္တမှီ၊ ဂစ္ဆန္တေသု။

ဧဝံ မဟံ စရံ တိဋ္ဌံ၊ ဒဒံ ဘုဉ္ဇံ သုဏံ ပစံ၊

ဇယံ ဇီရံ စဝံ မီယံ၊ သရံ ကုဗ္ဗံ ဇပံ ဝဇံ –

ဘဝန္တသဒ္ဒဿ ¶ ဂ ယော နာ သဝစနေသု ဝိသေသော။ သော ဘဝံ။

၁၀၉။ ဩဘာဝေါ ကွစိ ယောသု ဝကာရဿ။

ဘဝန္တဣစ္စေတဿ ဝကာရဿ ဩဘာဝေါ ဟောတိ ကွစိ ယောဣစ္စေတေသု။ တေ ဘောန္တော ဘဝန္တော ဘဝန္တာ။

သဗ္ဗဿေဝ ဘဝန္တသဒ္ဒဿ ဘော ဟောတိ ဂေ ပရေ။ တုသဒ္ဒေန ဘန္တေ၊ ဘောန္တာဒိ စ၊ ဂလောပေါ၊ ဘော ဘန္တေ ဘောန္တ ဘောန္တာ၊ ဘောန္တော ဘဝန္တော ဘဝန္တာ၊ ဘဝန္တံ၊ ဘောန္တေ ဘဝန္တေ။

နာသေသု ‘‘ဩဘာဝေါ ကွစီ’’တိ ယောဂဝိဘာဂေန ဩဘာဝေါ။

ဘောတာ ဘဝတာ ဘဝန္တေန၊ ဘောတော ဘဝတော ဘဝန္တဿ ဣစ္စာဒိ။

သဗ္ဗဿေဝ ဘဒန္တသဒ္ဒဿ ဘဒ္ဒန္တ ဘန္တေဣစ္စေတေ အာဒေသာ ဟောန္တိ ကွစိ ဂေ ပရေ ယောသု စ။ ဘော ဘဒ္ဒန္တ ဘန္တေ၊ ဘဒန္တ ဘဒန္တာ ဝါ ဣစ္စာဒိ ပုရိသသဒ္ဒသမံ။

၁၁၂။ သန္တသဒ္ဒဿ သော ဘေ ဗော စန္တေ။

သဗ္ဗဿေဝ သန္တသဒ္ဒဿ သသဒ္ဒါဒေသော ဟောတိ ဘကာရေ ပရေ၊ အန္တေ စ ဗကာရာဂမော ဟောတိ။

စသဒ္ဒဂ္ဂဟဏေန ¶ အဘကာရေပိ သမာသေ ကွစိ သကာရာဒေသော။ သဗ္ဘိ။

ဘေတိ ကိံ? သန္တေဟိ၊ သေသံ ဂစ္ဆန္တသဒ္ဒသမံ။

အတ္ထိ ရာဇ ဗြဟ္မ အတ္တ သခသဒ္ဒါဒီနံ ဘေဒေါ၊ တထေဝ သျာဒျုပ္ပတ္တိ၊ ‘‘ရာဇ သိ’’ဣတိ ဌိတေ –

‘‘ဗြဟ္မတ္တသခရာဇာဒိတော’’တိ အဓိကာရော။

ဗြဟ္မ အတ္တ သခ ရာဇဣစ္စေဝမာဒိတော သိဝစနဿ အာကာရော ဟောတိ။ အာဒိသဒ္ဒေန အာတုမာဒိသဒ္ဒတော စ။ သရလောပါဒိ။ ရာဇာ တိဋ္ဌတိ။

ဗြဟ္မတ္တသခရာဇာဒိတော ယောနံ အာနောအာဒေသော ဟောတိ။ ရာဇာနော တိဋ္ဌန္တိ၊ ဘော ရာဇ ဘော ရာဇာ၊ ဘဝန္တော ရာဇာနော။

၁၁၅။ ဗြဟ္မတ္တသခရာဇာဒိတော အမာနံ။

ဗြဟ္မာဒီဟိ ပရဿ အံဝစနဿ အာနံ ဟောတိ ဝါ။ ရာဇာနံ ပဿ ရာဇံ ဝါ၊ ရာဇာနော။

‘‘သဝိဘတ္တိဿ၊ ရာဇဿာ’’တိ စ ဝတ္တတေ။

သဗ္ဗဿေဝ ရာဇသဒ္ဒဿ သဝိဘတ္တိဿ ရညာအာဒေသော ဟောတိ ဝါ နာမှိ ဝိဘတ္တိမှိ။ ရညာ ကတံ ရာဇေန ဝါ။

၁၁၇။ ရာဇဿ ¶ ရာဇု သုနံဟိသု စ။

သဗ္ဗဿ ရာဇသဒ္ဒဿ ရာဇုအာဒေသော ဟောတိ သု နံ ဟိဣစ္စေတေသု ဝစနေသု။ စသဒ္ဒေါ ဝိကပ္ပနတ္ထော၊ ‘‘သုနံဟိသု စာ’’တိ ဒီဃော၊ ရာဇူဟိ ရာဇူဘိ၊ ရာဇေဟိ ရာဇေဘိ ဝါ။

သဗ္ဗဿေဝ ရာဇသဒ္ဒဿ သဝိဘတ္တိဿ ရညော ရာဇိနောဣစ္စေတေ အာဒေသာ ဟောန္တိ သေ ဝိဘတ္တိမှိ။ ရညော၊ ရာဇိနော ဒေတိ။

သဗ္ဗဿေဝ ရာဇသဒ္ဒဿ သဝိဘတ္တိဿ ရညံအာဒေသော ဟောတိ ဝါ နံမှိ ဝိဘတ္တိမှိ။ ရညံ ရာဇူနံ ရာဇာနံ။

၁၂၀။ အမှတုမှန္တုရာဇဗြဟ္မတ္တသခသတ္ထုပိတာဒီဟိ သ္မာ နာဝ။

အမှတုမှန္တုရာဇဗြဟ္မတ္တသခသတ္ထုပိတုဣစ္စေဝမာဒီဟိ သ္မာဝစနံ နာဝ ဒဋ္ဌဗ္ဗန္တိ သ္မာဝစနဿ နာဘာဝါတိဒေသော။ အတိဒေသော ပန ဆဗ္ဗိဓော။

‘‘ဗျပဒေသော နိမိတ္တဉ္စ၊ တံရူပံ တံသဘာဝတာ၊

သုတ္တဉ္စေဝ တထာ ကာရိ-ယာတိဒေသောတိ ဆဗ္ဗိဓော’’တိ။

တတြာယံ ¶ ဗြဟ္မတ္တသခါဒီသု ပါဌသာမတ္ထိယတော ရူပါတိဒေသော။ သေသံ တတိယာသမံ။

ရညာ အပေတိ၊ ရာဇူဟိ ရာဇူဘိ၊ ရာဇေဟိ ရာဇေဘိ၊ ရညော၊ ရာဇိနော သန္တကံ၊ ရညံ ရာဇူနံ ရာဇာနံ။

သဗ္ဗဿေဝ ရာဇသဒ္ဒဿ သဝိဘတ္တိဿ ရညေရာဇိနိဣစ္စေတေ အာဒေသာ ဟောန္တိ သ္မိံမှိ ဝိဘတ္တိမှိ။ ရညေ၊ ရာဇိနိ ပတိဋ္ဌိတံ၊ ရာဇူသု ရာဇေသု။

ဗြဟ္မသဒ္ဒဿ စ ဂ နာ သ သ္မိံသု ဝိသေသော။ ဗြဟ္မာ၊ ဗြဟ္မာနော။

ဗြဟ္မသဒ္ဒတော ဂဿ စ ဧကာရော ဟောတိ၊ စဂ္ဂဟဏံ ဧဂ္ဂဟဏာနုကဍ္ဎနတ္ထံ၊ ဘော ဗြဟ္မေ၊ ဘဝန္တော ဗြဟ္မာနော၊ ဗြဟ္မာနံ ဗြဟ္မံ၊ ဗြဟ္မာနော။

ဝိပရိဏာမေန ‘‘ဗြဟ္မဿ၊ အန္တော’’တိ စ ဝတ္တတေ။

ဗြဟ္မသဒ္ဒဿ အန္တော ဥတ္တမာပဇ္ဇတေ သ နာဣစ္စေတေသု ဝစနေသု။ ဥတ္တမိတိ ဘာဝနိဒ္ဒေသော ကတ္ထစိ အဘာဝဒဿနတ္ထော။ ဗြဟ္မုနာ၊ ဗြဟ္မေဟိ ဗြဟ္မေဘိ။

သသ္မိံ ဥတ္တေ ကတေ ‘‘ဣဝဏ္ဏုဝဏ္ဏာ ဈလာ’’တိ လသညာယံ –

ဈလသညေဟိ ဣဝဏ္ဏုဝဏ္ဏေဟိ ပရဿ သဣစ္စေတဿ ဝစနဿ နောဣစ္စာဒေသော ဟောတိ ဝါ။ ဗြဟ္မုနော ဗြဟ္မဿ၊ ဗြဟ္မာနံ ဗြဟ္မူနံ ဝါ၊ ဥတ္တမိတိ ယောဂဝိဘာဂေန အညတ္ထာပိ ဥတ္တံ။

ပဉ္စမိယံ နာဘာဝါတိဒေသော။ ဗြဟ္မုနာ၊ ဗြဟ္မေဟိ ဗြဟ္မေဘိ၊ ဗြဟ္မုနော ဗြဟ္မဿ၊ ဗြဟ္မာနံ ဗြဟ္မူနံ ဝါ။

ဗြဟ္မသဒ္ဒတော သ္မိံဝစနဿ နိ ဟောတိ။ တုသဒ္ဒေန ကမ္မစမ္မမုဒ္ဓါဒိတော စ ကွစိ။ ဗြဟ္မနိ၊ ဗြဟ္မေသု။

အတ္တသဒ္ဒဿ တတိယာဒီသွေဝ ဝိသေသော။

အတ္တာ၊ အတ္တာနော၊ ဘော အတ္တ ဘော အတ္တာ၊ ဘဝန္တော အတ္တာနော၊ အတ္တာနံ အတ္တံ၊ အတ္တာနော။

နာမှိ ‘‘အကမ္မန္တဿ စာ’’တိ ဧတ္ထ စသဒ္ဒေန အတ္တန္တဿ အတ္တံ ဝါ။ အတ္တနာ အတ္တေန ဝါ။

၁၂၆။ အတ္တန္တော ဟိသ္မိမနတ္တံ။

အတ္တသဒ္ဒဿ အန္တော အနတ္တမာပဇ္ဇတေ ဟိသ္မိံ ပရေ။ အတ္တနေဟိ အတ္တနေဘိ။

‘‘တတော၊ အတ္တတော’’တိ စ ဝတ္တတေ။

တတော အတ္တသဒ္ဒတော သဿ ဝိဘတ္တိဿ နော ဟောတိ။ အတ္တနော၊ အတ္တာနံ။

တတော အတ္တသဒ္ဒတော သ္မာဝစနဿ နာ ဟောတိ။ အတ္တနာ အပေတိ။

နာဘာဝါတိဒေသေနေဝ သိဒ္ဓေပိ ဥတ္တရသုတ္တေန ဧကယောဂမကတွာ ဘိန္နယောဂကရဏံ အတ္ထန္တရဝိညာပနတ္ထံ၊ တေန အတ္တန္တတကာရဿ ရကာရော ဇကာရေ ကွစိ။ အတြဇော အတ္တဇော ဝါ။ အတ္တနေဟိ အတ္တနေဘိ၊ အတ္တနော၊ အတ္တာနံ။

တတော အတ္တသဒ္ဒတော သ္မိံဝစနဿ နိ ဟောတိ။ အတ္တနိ၊ အတ္တေသု။

သခသဒ္ဒတော ယောနံ အာယော နောအာဒေသာ စ ဟောန္တိ။ သခါယော။

သခသဒ္ဒန္တဿ ဣကာရာဒေသော ဟောတိ နောနာနံသဣစ္စေတေသု ပရေသု။ သခိနော တိဋ္ဌန္တိ။

သခတော ဂဿ အကာရ အာကာရ ဣကာရ ဤကာရဧကာရာဒေသာ ဟောန္တိ။ ဝါသဒ္ဒေန အညသ္မာပိ ကွစိ ဧကာရော။ ယထာ – ဘဒ္ဒန္တေ ဣသေ ဣတိ။

အ စ အာ စ ဣ စ ဤ စ ဧ စာတိပိ ဧ၊ ပုဗ္ဗဿရာနံ ကမေန လောပေါ။

ဘော သခ ဘော သခါ ဘော သခိ ဘော သခီ ဘော သခေ၊ ဘဝန္တော သခါနော သခါယော သခိနော။

‘‘သခန္တဿ၊ အာရော စာ’’တိ စ ဝတ္တတေ။

သခန္တဿ အာရော ဘောတိ ဝါ သုနံ အံဣစ္စေတေသု ပရေသု။ သခါရံ သခါနံ သခံ၊ သခါနော သခါယော သခိနော၊ သခိနာ။

သခန္တဿ အာရော ဟောတိ ဝါ ဟိမှိ ဝိဘတ္တိမှိ။ သခါရေဟိ သခါရေဘိ၊ သခေဟိ သခေဘိ။

ဣကာရာဒေသေ ‘‘ဈလတော သဿ နော ဝါ’’တိ နော။ သခိနော သခိဿ၊ သခါရာနံ သခီနံ။

သ္မာဝစနဿ နာဘာဝေါ။ သခိနာ၊ သခါရေဟိ သခါရေဘိ သခေဟိ သခေဘိ၊ သခိနော သခိဿ၊ သခါရာနံ သခီနံ။

သခတော သ္မိံဝစနဿ ဧကာရော ဟောတိ။ နိစ္စတ္ထောယမာရမ္ဘော။ သခေ၊ သခါရေသု သခေသု။

အာတုမသဒ္ဒဿ ပဌမာဒုတိယာသု အတ္တသဒ္ဒဿေဝ ရူပနယော။ အာတုမာ၊ အာတုမာနော၊ ဘော အာတုမ ဘော အာတုမာ၊ ဘဝန္တော အာတုမာနော၊ အာတုမာနံ အာတုမံ၊ အာတုမာနော၊ အာတုမေန ဣစ္စာဒိ ပုရိသသမံ။

ပုမသဒ္ဒဿ သဝိဘတ္တိဿ အာကာရာဒေသော ဟောတိ သိမှိ ဝိဘတ္တိမှိ။ အန္တဂ္ဂဟဏေန မဃဝယုဝါဒီနမန္တဿ စ။ ပုမာ။

ပုမန္တဿ သဝိဘတ္တိဿ အာနောအာဒေသော ဟောတိ ယောသု ဝိဘတ္တီသု။ ပုမာနော။

ပုမန္တဿ သဝိဘတ္တိဿ အံ ဟောတိ အာလပနေကဝစနေ ပရေ။ ဟေ ပုမံ၊ ဟေ ပုမာနော၊ ပုမံ၊ ပုမာနော။

ပုမန္တဿ အာဥအာဒေသာ ဟောန္တိ ဝါ နာမှိ ဝိဘတ္တိမှိ။ စသဒ္ဒေန ပုမကမ္မထာမန္တဿ စု’ကာရော ဝါ သသ္မာသု။ ပုမာနာ ပုမုနာ ပုမေန ဝါ။

ပုမန္တဿ ဟိဝိဘတ္တိမှီ စ အာနေအာဒေသော ဟောတိ။ ဝိဘတ္တိဂ္ဂဟဏံ သဝိဘတ္တိဂ္ဂဟဏနိဝတ္တနတ္ထံ။ ပုမာနေဟိ ပုမာနေဘိ။

စသဒ္ဒေန ယုဝမဃဝါဒီနမန္တဿ ဝါ အာနာဒေသော ဟောတိ သဗ္ဗဝိဘတ္တီသု။ ‘‘ဥ နာမှိ စာ’’တိ ဧတ္ထ စသဒ္ဒေန ပုမန္တဿုကာရော ဝါ သသ္မာသု ဝိဘတ္တီသု။ ‘‘ဈလတော သဿ နော ဝါ’’တိ နော။ ပုမုနော ပုမဿ၊ ပုမာနံ။

ဈလဣစ္စေတေဟိ သ္မာဝစနဿ နာ ဟောတိ။ စဂ္ဂဟဏံ ကွစိ နိဝတ္တနတ္ထံ။ ပုမာနာ ပုမုနာ ပုမာ ပုမသ္မာ ပုမမှာ၊ ပုမာနေဟိ ပုမာနေဘိ ပုမေဟိ ပုမေဘိ၊ ပုမုနော ပုမဿ၊ ပုမာနံ။

ပုမန္တဿ သဝိဘတ္တိဿ အာနေအာဒေသော ဟောတိ ဝါ သ္မိံမှိ ဝိဘတ္တိမှိ။ ပုမာနေ ပုမေ ပုမသ္မိံ ပုမမှိ။

ပုမန္တဿ သုဣစ္စေတသ္မိံ ပရေ အာအာဒေသော ဟောတိ ဝါ။ ပုမာသု ပုမေသု။

‘‘ပုမန္တဿာ သိမှီ’’တိ ဧတ္ထ အန္တဂ္ဂဟဏေန အာကာရော၊ ‘‘ဟိဝိဘတ္တိမှိ စာ’’တိ သုတ္တေ စသဒ္ဒေန အာနာဒေသော စ။

ယုဝါ ယုဝါနော၊ ယုဝါနာ ယုဝါ၊ ဟေ ယုဝ ဟေ ယုဝါ ဟေ ယုဝါန ဟေ ယုဝါနာ၊ ဘဝန္တော ယုဝါနာ၊ ယုဝါနံ ယုဝံ၊ ယုဝါနေ ယုဝေ။

‘‘အကမ္မန္တဿ စာ’’တိ ဧတ္ထ စသဒ္ဒေန ယုဝမဃဝါဒီနမန္တဿ အာ ဟောတိ ဝါ နာသုဣစ္စေတေသူတိ အာတ္တံ။

ယုဝါနာ ယုဝေန ယုဝါနေန ဝါ၊ ယုဝါနေဟိ ယုဝါနေဘိ ယုဝေဟိ ယုဝေဘိ၊ ယုဝါနဿ ယုဝဿ၊ ယုဝါနာနံ ယုဝါနံ၊ ယုဝါနာ ယုဝါနသ္မာ ယုဝါနမှာ၊ ယုဝါနေဟိ ယုဝါနေဘိ ယုဝေဟိ ယုဝေဘိ၊ ယုဝါနဿ ယုဝဿ၊ ယုဝါနာနံ ယုဝါနံ၊ ယုဝါနေ ယုဝါနသ္မိံ ယုဝါနမှိ ယုဝေ ယုဝမှိ ယုဝသ္မိံ၊ ယုဝါနေသု ယုဝါသု ယုဝေသု။

ဧဝံ မဃဝါ မဃဝါနော၊ မဃဝါနာ ဣစ္စာဒိ ယုဝသဒ္ဒသမံ။

အာကာရန္တော ပုလ္လိင်္ဂေါ သာသဒ္ဒေါ။

၁၄၄။ အဃော ¶ ရဿမေကဝစနယောသွပိ စ။

ဃသညကအာကာရဝဇ္ဇိတော လိင်္ဂဿန္တော သရော ရဿမာပဇ္ဇတေ ဧကဝစနေသု ယောသု စ ပရေသူတိ ရဿတ္တံ။ အပိဂ္ဂဟဏံ သိမှိ နိဝတ္တနတ္ထံ။ သေသံ နေယျံ။

သာ တိဋ္ဌန္တိ၊ ဟေ သ ဟေ သာ၊ ဟေ သာ၊ သံ၊ သေ၊ သေန၊ သာဟိ သာဘိ၊ သဿ သာယ၊ သာနံ၊ သာ သသ္မာ သမှာ၊ သာဟိ သာဘိ၊ သဿ၊ သာနံ၊ သေ သသ္မိံ သမှိ၊ သာသု။

ဧဝံ ပစ္စက္ခဓမ္မာ ဂါဏ္ဍီဝဓနွာပဘုတယော။

ဣကာရန္တော ပုလ္လိင်္ဂေါ အဂ္ဂိသဒ္ဒေါ။ သျာဒျုပ္ပတ္တိ၊ အဂ္ဂိ သိ၊

‘‘အန္တော၊ သိမှိ၊ ဝါ’’တိ စ ဝတ္တတေ။

အဂ္ဂိဿ အန္တော ဣနိ ဟောတိ ဝါ သိမှိ ဝိဘတ္တိမှိ။ ‘‘သေသတော လောပံ ဂသိပီ’’တိ သိလောပေါ။ အဂ္ဂိနိ အဂ္ဂိ။

ဗဟုဝစနေ ‘‘ဣဝဏ္ဏုဝဏ္ဏာ ဈလာ’’တိ ဈလသညာယံ –

ဃပသညေဟိ ဣတ္ထိဝါစကေဟိ အာကာရိဝဏ္ဏုဝဏ္ဏေဟိ၊ ဈလသညေဟိ စ ပရေသံ ယောဝစနာနံ လောပေါ ဟောတိ ဝါ။ ဝဝတ္ထိတဝိဘာသာယံ။

၁၄၇။ ယောသု ¶ ကတနိကာရလောပေသု ဒီဃံ။

လိင်္ဂဿန္တဘူတာ သဗ္ဗေ ရဿသရာ ယောသု ကတနိကာရလောပေသု ဒီဃမာပဇ္ဇန္တေ။ ကတာ နိကာရလောပါ ယေသံ တေ ကတနိကာရလောပါ။ အဂ္ဂီ။

‘‘ပဉ္စာဒီနမတ္တ’’န္တိ ဣတော ‘‘အတ္တ’’မိတိ ဝတ္တတေ။

ယောသု ပရေသု အကတရဿော ဈော အတ္တမာပဇ္ဇတေ။ အဂ္ဂယော။

အာလပနေပေဝံ။ ဟေ အဂ္ဂိ၊ ဟေ အဂ္ဂီ ဟေ အဂ္ဂယော။

ဒုတိယေကဝစနေ ပုဗ္ဗဿရလောပေ သမ္ပတ္တေ –

၁၄၉။ အံ မော နိဂ္ဂဟီတံ ဈလပေဟိ။

ဈလပဣစ္စေတေဟိ ပရဿ အံဝစနဿ၊ မကာရဿ စ နိဂ္ဂဟီတံ အာဒေသော ဟောတိ။ အဂ္ဂိံ။

အဂ္ဂီ အဂ္ဂယော၊ အဂ္ဂိနာ၊ အဂ္ဂီဟိ အဂ္ဂီဘိ၊ ‘‘သုနံဟိသု စာ’’တိ ဧတ္ထ စဂ္ဂဟဏေန ကတ္ထစိ ဒီဃာဘာဝေါ။ အဂ္ဂိဟိ အဂ္ဂိဘိ။

‘‘ဈလတော သဿ နော ဝါ’’တိ နော။ အဂ္ဂိနော အဂ္ဂိဿ၊ အဂ္ဂီနံ။

‘‘သ္မာ နာ’’တိ ဝတ္တမာနေ ‘‘ဈလတော စာ’’တိ ဝိကပ္ပေန နာ။ အဂ္ဂိနာ အဂ္ဂိသ္မာ အဂ္ဂိမှာ၊ အဂ္ဂီဟိ အဂ္ဂီဘိ အဂ္ဂိဟိ အဂ္ဂိဘိ၊ အဂ္ဂိနော အဂ္ဂိဿ၊ အဂ္ဂီနံ အဂ္ဂိနံ၊ အဂ္ဂိမှိ အဂ္ဂိသ္မိံ၊ အဂ္ဂီသု အဂ္ဂိသု။

ဇောတိ ပါဏိ ဂဏ္ဌိ မုဋ္ဌိ၊ ကုစ္ဆိ ဝတ္ထိ သာလိ ဝီဟိ၊

ဗျာဓိ ဩဓိ ဗောဓိ သန္ဓိ၊ ရာသိ ကေသိ သာတိ ဒီပိ။

ဣသိ ¶ မုနိ မဏိ ဓနိ ယတိ ဂိရိ ရဝိ ကဝိ၊

ကပိ အသိ မသိ နိဓိ ဝိဓိ အဟိ ကိမိ ပတိ၊

ဟရိ အရိ တိမိ ကလိ ဗလိ ဇလဓိ ဂဟပတိ၊

ဥရုဓိတိ ဝရမတိ နိရုပဓိ အဓိပတိ။

အဉ္ဇလိ သာရထိ အတိထိ သမာဓိ ဥဒဓိပ္ပဘုတယော။

ဤကာရန္တော ပုလ္လိင်္ဂေါ ဒဏ္ဍီသဒ္ဒေါ။

‘‘အဃော ရဿမေကဝစနယောသွပိ စာ’’တိ ရဿတ္တေ သမ္ပတ္တေ ဧတ္ထေဝါပိဂ္ဂဟဏေန သိသ္မိံ တဒဘာဝေ သိဒ္ဓေ နိယမတ္ထမာဟ။

သိသ္မိံ နပုံသကဝဇ္ဇိတာနိ လိင်္ဂါနိ န ရဿမာပဇ္ဇန္တေတိ ရဿတ္တာဘာဝေါ၊ သိလောပေါ။ ဒဏ္ဍီ တိဋ္ဌတိ။

အနပုံသကာနီတိ ကိံ? သုခကာရိ ဒါနံ။

ဝိသဒါဝိသဒါကာရ-ဝေါဟာရောဘယမုတ္တကာ၊

ပုမာဒိဇာနနေ ဟေတု-ဘာဝတော လိင်္ဂမီရိတာ။

ဣတရတြ ‘‘အဃော ရဿ’’မိစ္စာဒိနာ ရဿတ္တေ ကတေ –

သဗ္ဗေသံ ယောနံ သာလပနာနံ ဈတော ကတရဿာ ပရေသံ နောဣစ္စာဒေသော ဟောတိ။ ဒဏ္ဍိနော တိဋ္ဌန္တိ။

ဈလပဣစ္စေတေ ရဿမာပဇ္ဇန္တေ ဂေ ပရေ။ ဘော ဒဏ္ဍိ။

‘‘အဃော ရဿ’’န္တိအာဒိနာဝ သိဒ္ဓေပိ ရဿတ္တေ ပုနာရမ္ဘော နိယမတ္ထော၊ တေန ‘‘ဘော ဂေါ’’တိအာဒီသု န ဘဝတိ။ ဒဏ္ဍီ ဒဏ္ဍိနော။

ဒုတိယာယံ ရဿတ္တေ ကတေ ‘‘အ’’မိတိ ဝတ္တတေ၊ ‘‘ဃပတော သ္မိံ ယံ ဝါ’’တိ ဣတော မဏ္ဍူကဂတိယာ ‘‘ဝါ’’တိ ဝတ္တတေ။

ဈတော ကတရဿာ ပရဿ အံဝစနဿ နံ ဟောတိ ဝါ။ ဒဏ္ဍိနံ ဒဏ္ဍိံ၊ ဒဏ္ဍီ ဒဏ္ဍိနော၊ ဒဏ္ဍိနာ၊ ဒဏ္ဍီဟိ ဒဏ္ဍီဘိ၊ ဒဏ္ဍိနော ဒဏ္ဍိဿ၊ ဒဏ္ဍီနံ။

‘‘ဈလတော စာ’’တိ နာ။ ဒဏ္ဍိနာ ဒဏ္ဍိသ္မာ ဒဏ္ဍိမှာ၊ ဒဏ္ဍီဟိ ဒဏ္ဍီဘိ၊ ဒဏ္ဍိနော ဒဏ္ဍိဿ၊ ဒဏ္ဍီနံ။

‘‘ဈတော၊ ကတရဿာ’’တိ စ ဝတ္တတေ၊ ပုရေ ဝိယ ‘‘ဝါ’’တိ စ။

ဈတော ကတရဿာ ပရဿ သ္မိံဝစနဿ နိဣစ္စာဒေသော ဟောတိ ဝါ။ ဒဏ္ဍိနိ ဒဏ္ဍိသ္မိံ ဒဏ္ဍိမှိ၊ ဒဏ္ဍီသု။

ဓမ္မီ သင်္ဃီ ဉာဏီ ဟတ္ထီ၊ စက္ကီ ပက္ခီ ဒါဌီ ရဋ္ဌီ၊

ဆတ္တီ မာလီ ဝမ္မီ ယောဂီ၊ ဘာဂီ ဘောဂီ ကာမီ သာမီ။

ဓဇီ ဂဏီ သသီ ကုဋ္ဌီ၊ ဇဋီ ယာနီ သုခီ သိခီ၊

ဒန္တီ မန္တီ ကရီ စာဂီ၊ ကုသလီ မုသလီ ဗလီ။

ပါပကာရီ သတ္တုဃာတီ၊ မာလျကာရီ ဒီဃဇီဝီ၊

ဓမ္မစာရီ သီဃယာယီ၊ သီဟနာဒီ ဘူမိသာယီ –

ဂါမဏီသဒ္ဒဿ တု သတ္တမိယံ ဘေဒေါ။

ဂါမဏီ၊ ဂါမဏီ ဂါမဏိနော၊ ဘော ဂါမဏိ၊ ဘောန္တော ဂါမဏီ ဘောန္တော ဂါမဏိနော၊ ဂါမဏိနံ ဂါမဏိံ၊ ဂါမဏီ ဂါမဏိနော။

သေသံ ဒဏ္ဍီသမံ။ နိအာဒေသာဘာဝေါဝ ဝိသေသော။ ဧဝံ သေနာနီ သုဓီပ္ပဘုတယော။

ဥကာရန္တော ပုလ္လိင်္ဂေါ ဘိက္ခုသဒ္ဒေါ။

တထေဝ ဘိက္ခုသဒ္ဒတော သိ၊ သိလောပေါ။ သော ဘိက္ခု။

ဗဟုဝစနေ ‘‘ဃပတော စ ယောနံ လောပေါ’’တိ ယောလောပေါ၊ ‘‘ယောသု ကတ’’ဣစ္စာဒိနာ ဒီဃော။ တေ ဘိက္ခူ။

လောပါဘာဝေ ‘‘ဝါ၊ ယောန’’န္တိ စ ဝတ္တတေ။

လသညတော ပရေသံ ယောဝစနာနံ ဝေါကာရာဒေသော ဟောတိ ဝါ။ ကာရဂ္ဂဟဏေန ယောနံ နော စ ဟောတိ။ စသဒ္ဒဂ္ဂဟဏံ ကတ္ထစိ နိဝတ္တနတ္ထံ။ အထ ဝါ စဂ္ဂဟဏံ နောဂ္ဂဟဏာနုဝတ္တနတ္ထံ၊ တေန ဇန္တုသဗ္ဗညူအာဒိတော ယောနံ နော စ ဟောတိ။ ဝါသဒ္ဒေါ ဝဝတ္ထိတဝိဘာသတ္ထော။ တေန –

ဘိက္ခုပ္ပဘုတိတော နိစ္စံ၊ ဝေါ ယောနံ ဟေတုအာဒိတော၊

ဝိဘာသာ န စ ဝေါ နော စ၊ အမုပ္ပဘုတိတော ဘဝေ။

‘‘အတ္တံ၊ အကတရဿော’’တိ စ ဝတ္တတေ။

ဝေ ဝေါဣစ္စေတေသု စ ပရေသု အကတရဿော လော အတ္တမာပဇ္ဇတေ။ ဘိက္ခဝေါ၊ ဘော ဘိက္ခု၊ ဘဝန္တော ဘိက္ခူ။

၁၅၇။ အကတရဿာ လတော ယွာလပနဿ ဝေဝေါ။

အကတရဿာ လတော ပရဿ အာလပနေ ဝိဟိတဿ ယောဣစ္စေတဿ ဝေ ဝေါအာဒေသာ ဟောန္တိ။ အတ္တံ။ ဘဝန္တော ဘိက္ခဝေ ဘိက္ခဝေါ။ ‘‘အံ မော နိဂ္ဂဟီတံ ဈလပေဟီ’’တိ နိဂ္ဂဟီတံ။

ဘိက္ခုံ၊ ဘိက္ခူ ဘိက္ခဝေါ၊ ဘိက္ခုနာ၊ ဘိက္ခူဟိ ဘိက္ခူဘိ ဘိက္ခုဟိ ဘိက္ခုဘိ၊ ဘိက္ခုနော ဘိက္ခုဿ၊ ဘိက္ခူနံ ¶ ဘိက္ခုနံ၊ ဘိက္ခုနာ ဘိက္ခုသ္မာ ဘိက္ခုမှာ၊ ဘိက္ခူဟိ ဘိက္ခူဘိ ဘိက္ခုဟိ ဘိက္ခုဘိ၊ ဘိက္ခုနော ဘိက္ခုဿ၊ ဘိက္ခူနံ ဘိက္ခုနံ၊ ဘိက္ခုမှိ ဘိက္ခုသ္မိံ၊ ဘိက္ခူသု ဘိက္ခုသု။

ဧဝံ သေတု ကေတု ရာဟု ဘာနု ပင်္ဂု ဥစ္ဆု ဝေဠု မစ္စု သိန္ဓု ဗန္ဓု နေရု မေရု သတ္တု ကာရု ဟေတု ဇန္တု ရုရု ပဋု ဣစ္စာဒယော။

ဟေတုဇန္တုသဒ္ဒါနံ ပဌမာဒုတိယာသု ဝိသေသော။

ဟေတု၊ ဟေတူ ဟေတဝေါ ဟေတုယော၊ ဘော ဟေတု၊ ဘောန္တော ဟေတူ ဟေတဝေ ဟေတဝေါ၊ ဟေတုံ၊ ဟေတူ ဟေတဝေါ ဟေတုယော။ သေသံ ဘိက္ခုသမံ။

ဇန္တု၊ ဇန္တူ ဇန္တဝေါ။ ကာရဂ္ဂဟဏေန ယောနံ နော စ ဟောတိ။ ဇန္တုနော ဇန္တုယော၊ ဘော ဇန္တု၊ ဇန္တူ ဇန္တဝေ ဇန္တဝေါ၊ ဇန္တုံ၊ ဇန္တူ ဇန္တဝေါ ဇန္တုနော ဇန္တုယော ဣစ္စာဒိ။

သတ္ထုသဒ္ဒဿ ဘေဒေါ။ ‘‘သတ္ထု သိ’’ဣတီဓ –

၁၅၈။ သတ္ထုပိတာဒီနမာ သိသ္မိံ သိလောပေါ စ။

သတ္ထု ပိတု မာတု ဘာတု ဓီတု ကတ္တုဣစ္စေဝမာဒီနမန္တော အာတ္တမာပဇ္ဇတေ သိသ္မိံ၊ သိလောပေါ စ ဟောတိ။ သတ္ထာ။

‘‘သတ္ထု ပိတာဒီန’’န္တိ အဓိကာရော။

သတ္ထု ပိတာဒီနမန္တော သိဝစနတော အညေသု ဝစနေသု အာရတ္တမာပဇ္ဇတေ။ အာရတ္တမိတိဘာဝနိဒ္ဒေသေန ကတ္ထစိ အနိယမံ ဒဿေတိ။

တတော အာရာဒေသတော သဗ္ဗေသံ ယောနံ ဩကာရာဒေသော ဟောတိ။

တုဂ္ဂဟဏေန အညေဟိပိ စတုဥဘနဒီဂဝါဒီဟိ ယောနမောကာရော ဟောတိ၊ သရလောပါဒိ။ သတ္ထာရော။

အာလပနေ ‘‘အကာရပိတာဒျန္တာနမာ’’တိ အာတ္တံ။ ‘‘ဂေ ရဿ’’န္တိ အဓိကိစ္စ ‘‘အာကာရော ဝါ’’တိ ဝိကပ္ပေန ရဿတ္တံ၊ ဝလောပေါ။ ဘော သတ္ထ ဘော သတ္ထာ၊ ဘဝန္တော သတ္ထာရော၊ သတ္ထာရံ၊ သတ္ထာရေ သတ္ထာရော။

တတော အာရာဒေသတော နာဝစနဿ အာကာရာဒေသော ဟောတိ။ သတ္ထာရာ၊ သတ္ထုနာတိ အာရတ္တမိတိဘာဝနိဒ္ဒေသေန သိဒ္ဓံ။ သတ္ထာရေဟိ သတ္ထာရေဘိ။

‘‘ဝါ နံမှီ’’တိ ဣတော ‘‘ဝါ’’တိ ဝတ္တတေ။

သတ္ထု ပိတုဣစ္စေဝမာဒီနမန္တဿ ဥတ္တံ ဟောတိ ဝါ သသ္မိံ၊ သလောပေါ စ ဟောတိ။ အာရာဒေသာပဝါဒေါယံ။ သတ္ထု၊ အညတ္ထ ဘာဝနိဒ္ဒေသေနာရာဘာဝေါ။ သတ္ထုဿ သတ္ထုနော။

သတ္ထု ပိတုအာဒီနမန္တော အာရတ္တမာပဇ္ဇတေ ဝါ နံမှိ ဝိဘတ္တိမှိ။ သတ္ထာရာနံ။

အာရာဘာဝေ ‘‘ဝါ နံမှီ’’တိ ဝတ္တတေ။

သတ္ထုသဒ္ဒန္တဿ၊ ပိတာဒီနမန္တဿ စ အတ္တံ ဟောတိ ဝါ နံမှိ ဝိဘတ္တိမှိ၊ ပုန သတ္ထုဂ္ဂဟဏံ သတ္ထုနော နိစ္စဝိဓာနတ္ထံ။ သတ္ထာနံ။

‘‘အမှတုမှန္တုရာဇဗြဟ္မတ္တသခသတ္ထုပိတာဒီဟိ သ္မာ နာဝါ’’တိ သ္မာဝစနဿနာဘာဝေါ။ သတ္ထာရာ၊ သတ္ထာရေဟိ သတ္ထာရေဘိ၊ သတ္ထု သတ္ထုနော သတ္ထုဿ၊ သတ္ထာရာနံ သတ္ထာနံ။

တတော အာရာဒေသတော သ္မိံဝစနဿ ဣကာရာဒေသော ဟောတိ။ ပုန တတောဂ္ဂဟဏေန အညသ္မာပိ သ္မိံဝစနဿ ဣကာရော။ ယထာ – ဘုဝိ၊ ဒိဝိ။

အာရာဒေသော ရဿမာပဇ္ဇတေ ဣကာရေ ပရေ၊ သတ္ထရိ၊ သတ္ထာရေသု။

ဧဝံ ကတ္တာ၊ ကတ္တာရော၊ ဘော ကတ္တ ဘော ကတ္တာ၊ ဘဝန္တော ကတ္တာရော၊ ကတ္တာရံ၊ ကတ္တာရေ ကတ္တာရော၊ ကတ္တာရာ၊ ကတ္တာရေဟိ ကတ္တာရေဘိ။ ‘‘ဥ သသ္မိံ သလောပေါ စာ’’တိ ဥတ္တံ၊ သလောပေါ စ။ ကတ္တု ကတ္တုနော ကတ္တုဿ၊ ကတ္တာရာနံ ကတ္တာနံ ကတ္တူနံ ကတ္တုနံ၊ ကတ္တာရာ၊ ကတ္တာရေဟိ ကတ္တာရေဘိ၊ ကတ္တု ကတ္တုနော ကတ္တုဿ၊ ကတ္တာရာနံ ကတ္တာနံ ကတ္တူနံ ကတ္တုနံ၊ ကတ္တရိ၊ ကတ္တာရေသု၊ အာရာဘာဝေ ကတ္တူသု ကတ္တုသု။

ဘတ္တု ဝတ္တု နေတု သောတု၊ ဉာတု ဇေတု ဆေတ္တု ဘေတ္တု။ ဒါတု ဓာတု နတ္တု ဗောဒ္ဓု၊ ဝိညာပေတု အာဒယောပိ။

‘‘ဥ သသ္မိံ သလောပေါ စာ’’တိ ဝတ္တတေ။

သကမန္ဓာတုဣစ္စေဝမာဒီနမန္တော စ ဥတ္တမာပဇ္ဇတေ သသ္မိံ၊ သလောပေါ စ၊ နိစ္စံ ပုနဗ္ဗိဓာနာ။ သကမန္ဓာတု ဝိယ အဿ ရာဇိနော ဝိဘဝေါ၊ သေသံ သမံ။ ဧဝံ မဟာမန္ဓာတုပ္ပဘုတယော။

ပိတုသဒ္ဒဿ ဘေဒေါ။ သိမှိ အာတ္တံ၊ သိလောပေါ၊ ပိတာ။

ယောမှိ ‘‘အာရော၊ ရဿ’’န္တိ စ ဝတ္တတေ။

ပိတာဒီနမာရာဒေသော ရဿမာပဇ္ဇတေ အသိမှိ ဝိဘတ္တိမှိ။ သိသ္မိံ အာရာဒေသာဘာဝေပိ အသိမှီတိ အဓိကဝစနမတ္ထန္တရဝိညာပနတ္ထံ၊ တေန တောအာဒိမှိ ပိတာဒီနမိကာရော စ။ ယထာ – ပိတိတော၊ မာတိတော၊ ဘာတိတော၊ ဓီတိတော၊ ပိတိပက္ခော၊ မာတိပက္ခောတိ။

ပိတရော၊ သေသံ ကတ္တုသမံ။ ဘော ပိတ ဘော ပိတာ၊ ဘဝန္တော ပိတရော၊ ပိတရံ၊ ပိတရေ ပိတရော၊ ပိတရာ ပိတုနာ၊ ပိတရေဟိ ပိတရေဘိ။ ဘာဝနိဒ္ဒေသေန အာရာဒေသာဘာဝေ ပိတူဟိ ပိတူဘိ ပိတုဟိ ပိတုဘိ၊ ပိတု ပိတုနော ပိတုဿ၊ ပိတရာနံ ပိတာနံ ပိတူနံ၊ ဒီဃာဘာဝေ ပိတုနံ ဝါ၊ ပိတရာ၊ ပိတရေဟိ ပိတရေဘိ ပိတူဟိ ပိတူဘိ ပိတုဟိ ပိတုဘိ၊ ပိတု ပိတုနော ပိတုဿ၊ ပိတရာနံ ပိတာနံ ပိတူနံ ပိတုနံ၊ ပိတရိ၊ ပိတရေသု ပိတူသု ပိတုသု။

ဦကာရန္တော ပုလ္လိင်္ဂေါ အဘိဘူသဒ္ဒေါ။

တထေဝ သျာဒျုပ္ပတ္တိ၊ သိလောပေါ။ သော အဘိဘူ၊ ယောလောပေ ကတေ တေ အဘိဘူ။

‘‘အဃော ရဿ’’န္တိအာဒိနာ ရဿတ္တံ၊ ဝေါကာရော။ ကတရဿတ္တာ အတ္တာဘာဝေါ။ အဘိဘုဝေါ၊ ဘော အဘိဘု၊ ဘဝန္တော အဘိဘူ အဘိဘုဝေါ။

ကတရဿတ္တာ ဝေအာဒေသော န ဟောတိ။ သေသံ ဘိက္ခုသဒ္ဒသမံ၊ ရဿတ္တမေဝ ဝိသေသော။ အဘိဘုံ၊ အဘိဘူ အဘိဘုဝေါ ¶ ၊ အဘိဘုနာ၊ အဘိဘူဟိ အဘိဘူဘိ၊ အဘိဘုနော အဘိဘုဿ၊ အဘိဘူနံ ဣစ္စာဒိ။

ဧဝံ သယမ္ဘူ၊ ဝေဿဘူ၊ ပရာဘိဘူ၊ သဟဘူအာဒယော။ သဟဘူသဒ္ဒဿ ယောနံ နောအာဒေသောဝ ဝိသေသော။ သဟဘူ၊ သဟဘူ သဟဘုဝေါ သဟဘုနော ဣစ္စာဒိ။

တထာ သဗ္ဗညူသဒ္ဒဿ ယောသွေဝ ဝိသေသော။ သော သဗ္ဗညူ တေ သဗ္ဗညူ၊ ယောလောပါဘာဝေ ရဿတ္တံ၊ ‘‘လတော ဝေါကာရော စာ’’တိ ဧတ္ထ ကာရဂ္ဂဟဏေန ယောနံ နောအာဒေသော။ ဝါဓိကာရဿ ဝဝတ္ထိတဝိဘာသတ္တာ န စ ဝေါကာရော။ သဗ္ဗညုနော၊ ဘော သဗ္ဗညု၊ ဘောန္တော သဗ္ဗညူ သဗ္ဗညုနော၊ သဗ္ဗညုံ၊ သဗ္ဗညူ သဗ္ဗညုနော ဣစ္စာဒိ။

ဧဝံ မဂ္ဂညူ ဓမ္မညူ အတ္ထညူ ကာလညူ ရတ္တညူ မတ္တညူ ကတညူ တထညူ ဝိညူ ဝိဒူ ဝေဒဂူ ပါရဂူ ဣစ္စာဒယော။

ဩကာရန္တော ပုလ္လိင်္ဂေါ ဂေါသဒ္ဒေါ။

တတော သျာဒျုပ္ပတ္တိ၊ သိလောပေါ၊ ဂေါ ဂစ္ဆတိ။

‘‘ဂါဝ သေ’’တိ ဣတော ‘‘ဂေါ’’တိ အဓိကာရော၊ ‘‘အာဝါ’’တိ စ ဝတ္တတေ။

ဂေါဣစ္စေတဿ ဩကာရဿ အာဝါဒေသော ဟောတိ ယောသု။ စသဒ္ဒေန နာ သ္မာ သ္မိံသုဣစ္စေတေသု စ။ ‘‘တတော ယောနမော တူ’’တိ ဧတ္ထ တုဂ္ဂဟဏေန ယောနမောကာရော၊ သရလောပါဒိ။ ဂါဝေါ တိဋ္ဌန္တိ။

ဂေါဣစ္စေတဿ ဩကာရဿ အာဝ အဝဣစ္စေတေ အာဒေသာ ဟောန္တိ အံမှိ ဝိဘတ္တိမှိ။ သေဒ္ဒေန ယော နာ သ သ္မာသ္မိံသုဣစ္စေတေသု စ အဝါဒေသော ဟောတိ။ ဂဝေါ ဂစ္ဆန္တိ၊ ဟေ ဂေါ၊ ဟေ ဂါဝေါ ဟေ ဂဝေါ။

ဒုတိယာယံ ‘‘အံမှီ’’တိ ဝတ္တတေ။

အာဝဣစ္စေတဿ ဂါဝါဒေသဿ အန္တသရဿ ဥကာရာဒေသော ဟောတိ ဝါ အံမှိ ဝိဘတ္တိမှိ။ အာဝဿ အ အာဝ၊ တဿ အာဝသဒ္ဒန္တဿ။ ‘‘အံမော’’တိအာဒိနာ နိဂ္ဂဟီတံ။ ဂါဝုံ ဂါဝံ ဂဝံ၊ ဂါဝေါ ဂဝေါ။

သု ဟိ နာဣစ္စေတေသု သဗ္ဗဿ ဂေါသဒ္ဒဿ ဂေါဏာဒေသော ဟောတိ ဝါ။ စသဒ္ဒေန သေသေသု စ။ ဂေါဏော၊ ဂေါဏာ၊ ဟေ ဂေါဏ ဟေ ဂေါဏာ၊ ဂေါဏံ၊ ဂေါဏေ၊ ဂေါဏေန၊ ဂေါဏေဟိ ဂေါဏေဘိ၊ ဂေါဏဿ။

သဗ္ဗဿ ဂေါသဒ္ဒဿ ဂေါဏာဒေသော ဟောတိ ဝါ နံမှိ ဝိဘတ္တိမှိ။ ဂေါဏာနံ၊ ဂေါဏာ ဂေါဏသ္မာ ဂေါဏမှာ၊ ဂေါဏေဟိ ဂေါဏေဘိ၊ ဂေါဏဿ၊ ဂေါဏာနံ၊ ဂေါဏေ ဂေါဏသ္မိံ ဂေါဏမှိ၊ ဂေါဏေသု။

ဂေါဏာဒေသာဘာဝေ ဂါဝေန ဂဝေန၊ ဂေါဟိ ဂေါဘိ။

‘‘ဂေါ အာဝ သေ’’ဣတိ တိပဒမိဒံ။ ဂေါဿ ဩ ဂေါ၊ ဂေါသဒ္ဒေါကာရဿ အာဝါဒေသော ဟောတိ သေ ဝိဘတ္တိမှိ။ ဂါဝဿ ဂဝဿ။

နံမှိ ‘‘ဂေါ၊ အဝါ’’တိ စ ဝတ္တတေ။

၁၇၅။ တတော နမံ ပတိမှာလုတ္တေ စ သမာသေ။

တတော ဂေါသဒ္ဒတော ပရဿ နံဝစနဿ အံအာဒေသော ဟောတိ၊ ဂေါသဒ္ဒေါကာရဿ အဝါဒေသော စ ပတိမှိ ပရေ အလုတ္တေ စ သမာသေ။ စသဒ္ဒေန အသမာသေပိ အံ အဝါဒေသာ။ ဂဝံပတိဿ ထေရဿ၊ ဂဝံ။

‘‘သုဟိနာသု စာ’’တိ ဧတ္ထ စသဒ္ဒေန နံမှိ ဂုအာဒေသော။ ‘‘နော စ ဒွါဒိတော နံမှီ’’တိ သုတ္တေ စသဒ္ဒေန နကာရာဂမော စ။ ဂုန္နံဂေါနံ ဝါ။

ဂါဝါ ဂါဝမှာ ဂါဝသ္မာ ဂဝါ ဂဝမှာ ဂဝသ္မာ၊ ဂေါဟိ ဂေါဘိ၊ ဂါဝဿ ဂဝဿ၊ ဂဝံ ဂုန္နံ ဂေါနံ၊ ဂါဝေ ဂါဝမှိ ဂါဝသ္မိံ ဂဝေ ဂဝမှိ ဂဝသ္မိံ၊ ဂါဝေသု ဂဝေသု ဂေါသု။

ပုရိသော ဂုဏဝါ ရာဇာ၊ သာ’ဂ္ဂိ ဒဏ္ဍီ စ ဘိက္ခု စ၊

သတ္ထာ’ဘိဘူ စ သဗ္ဗညူ၊ ဂေါတိ ပုလ္လိင်္ဂသင်္ဂဟော။

အသ္မာ ¶ နသ္မာ တသ္မာ နမှာ တမှာ၊ နေဟိ နေဘိ တေဟိ တေဘိ၊ အဿ နဿ တဿ၊ နေသံ တေသံ နေသာနံ တေသာနံ၊ အသ္မိံ နသ္မိံ တသ္မိံ နမှိ တမှိ၊ နေသု တေသု။

ဣတ္ထိယံ ‘‘တာ သိ’’ ဣတီဓ သာဒေသသိလောပါ။ သာ ကညာ၊ နတ္တံ။ နာ တာ နာယော တာယော၊ နံ တံ၊ နာ တာ နာယော တာယော၊ နာယ တာယ၊ နာဟိ တာဟိ နာဘိ တာဘိ။

‘‘ဧတိမာသမီ’’တိ ဣတော ဧတိမာဂ္ဂဟဏဉ္စ ‘‘တဿာ ဝါ’’တိ ဣတော တဂ္ဂဟဏဉ္စ ပဉ္စမိယန္တဝသေန ဝတ္တတေ ‘‘ဝါ’’တိ စ။

တတော တာ ဧတာ ဣမာတော ပရဿ သဿ ဝိဘတ္တိဿ ဿာယာဒေသော ဟောတိ ဝါ။

‘‘သံသာသွေကဝစနေသု စ၊ ဣ’’ဣတိ စ ဝတ္တတေ။

တာဣစ္စေတဿ ဣတ္ထိယံ ဝတ္တမာနဿ အန္တဿ ဣကာရော ဟောတိ ဝါ သံ သာသွေကဝစနေသု ဝိဘတ္တာဒေသေသု။ တိဿာယ တဿာယ အဿာယ နဿာယ အဿာ နဿာ တိဿာ တဿာ နာယ တာယ၊ နာသံ တာသံ။

ပဉ္စမီဆဋ္ဌီသု တတိယာစတုတ္ထီသမံ။ သတ္တမိယံ အဿံ နဿံ တိဿံ တဿံ နာယံ တာယံ၊ နာသု တာသု။

နပုံသကေ သိမှိသာဒေသာဘာဝါ နတ္တံ။ နံ တံ၊ နာနိ တာနိ၊ နံ တံ၊ နာနိ တာနိ၊ နေန တေန ဣစ္စာဒိ ပုလ္လိင်္ဂသမံ။

ဧတ သိ၊ ‘‘ဧတတေသံ တော’’တိ သကာရာဒေသော။ ဧသော ပုရိသော၊ ဧတေ၊ ဧတံ၊ ဧတေ ဣစ္စာဒိ သဗ္ဗသဒ္ဒသမံ။

ဣတ္ထိယံ ¶ ဧတာ သိ၊ သာဒေသော။ ဧသာ ကညာ၊ ဧတာ ဧတာယော၊ ဧတံ၊ ဧတာ ဧတာယော၊ ဧတာယ၊ ဧတာဟိ ဧတာဘိ။

သ သ္မိံသု ပန ‘‘သံသာသွေကဝစနေသု စာ’’တိ ဝတ္တတေ။

အန္တာပေက္ခာယံ ဆဋ္ဌီ၊ ဧတာ ဣမာဣစ္စေတေသမန္တော သရော ဣကာရော ဟောတိ သံသာသွေကဝစနေသု ဝိဘတ္တာဒေသေသု။ သာဒေသဂတိကတ္တာ ဿာယာဒေသေပိ။ စသဒ္ဒါဓိကာရတော အညေကာသဒ္ဒါဒီနမန္တဿ စ။

ဧတိဿာယ ဧတိဿာ ဧတာယ၊ ဧတာသံ ဧတာသာနံ၊ ဧတာယ၊ ဧတာဟိ ဧတာဘိ၊ ဧတိဿာယ ဧတိဿာ ဧတာယ၊ ဧတာသံ ဧတာသာနံ၊ ဧတိဿံ ဧတာယံ၊ ဧတာသု။

စသဒ္ဒတော အညိဿာ အညာယ၊ အညိဿံ အညာယံ။ ဧကိဿာ ဧကာယ၊ ဧကိဿံ ဧကာယံ။ ဣတရိဿာ ဣတရာယ၊ ဣတရိဿံ ဣတရာယံ ဣစ္စာဒိ။

နပုံသကေ ဧတံ၊ ဧတာနိ၊ ဧတံ၊ ဧတာနိ၊ သေသံ ဉေယျံ။

ဣမသဒ္ဒဿ သဗ္ဗဿေဝ အနပုံသကဿ အယံအာဒေသော ဟောတိ သိမှိ ဝိဘတ္တိမှိ၊ သိလောပေါ။ အယံ ပုရိသော၊ ဣမေ၊ ဣမံ၊ ဣမေ။

ဣမသဒ္ဒဿ သဗ္ဗဿေဝ အန ဣမိအာဒေသာ ဟောန္တိ နာမှိ ဝိဘတ္တိမှိ။ အနိတ္ထိလိင်္ဂဿေဝေတံ ဂဟဏံ။ အနေန ဣမိနာ။

သဗ္ဗဿ ဣမသဒ္ဒဿ ဧကာရော ဟောတိ ဝါ သု နံ ဟိဣစ္စေတေသု ဝစနေသု။

အာပ္ပစ္စယန္တာနိဒ္ဒေသာ၊ သဗ္ဗတ္ထာတိ အဝုတ္တတော၊

အနိတ္ထိလိင်္ဂဿေဝေတ္ထ၊ ဂဟဏဉှိ ဣမဿိတိ။

‘‘သဗ္ဗဿ၊ ဝါ၊ သဗ္ဗတ္ထ၊ သသ္မာသ္မိံသံသာသွတ္တ’’န္တိ စ ဝတ္တတေ။

ဣမသဒ္ဒဿ စ သဗ္ဗဿေဝ အတ္တံ ဟောတိ ဝါ သ သ္မာ သ္မိံသံ သာဣစ္စေတေသု ဝစနေသု သဗ္ဗတ္ထ လိင်္ဂေသု။

အဿ ဣမဿ၊ ဧသံ ဧသာနံ ဣမေသံ ဣမေသာနံ၊ အသ္မာ ဣမသ္မာ ဣမမှာ၊ ဧဟိ ဧဘိ ဣမေဟိ ဣမေဘိ၊ အဿ ဣမဿ၊ ဧသံ ဧသာနံ ဣမေသံ ဣမေသာနံ၊ အသ္မိံ ဣမသ္မိံ ဣမမှိ၊ ဧသု ဣမေသု။

ဣတ္ထိယံ ဣမာ သိ၊ အယမာဒေသသိလောပါ။

အယံ ကညာ၊ ဣမာ ဣမာယော၊ ဣမံ၊ ဣမာ ဣမာယော၊ ဣမာယ၊ ဣမာဟိ ဣမာဘိ။ စတုတ္ထိယံ အတ္တံ၊ ဣကာရ- ဿာယာဒေသာ ¶ စ၊ အဿာယ ဣမိဿာယ အဿာ ဣမိဿာ ဣမာယ၊ ဣမာသံ ဣမာသာနံ။ သတ္တမိယံ အဿံ ဣမိဿံ ဣမိဿာ ဝါ၊ ‘‘တေသု ဝုဒ္ဓိလောပါ’’ဒိနာ သ္မိံဝစနဿ ဝါ သာဒေသော။ ဣမာယံ၊ ဣမာသု။ သေသံ ဉေယျံ။

နပုံသကေ ဣမ သိ၊ ‘‘သဝိဘတ္တိဿ၊ ဝါ’’တိ စ ဝတ္တတေ။

နပုံသကေ ဝတ္တမာနဿ သဗ္ဗဿေဝ ဣမသဒ္ဒဿ သဝိဘတ္တိဿ ဣဒံ ဟောတိ ဝါ အံ သိသု ပရေသု။

ဣဒံ စိတ္တံ ဝိရောစတိ၊ ဣမံ၊ ဣမာနိ၊ ဣဒံ ပုပ္ဖံ ပဿသိ၊ ဣမံ၊ ဣမာနိ၊ အနေန ဣမိနာ၊ ဧဟိ ဧဘိ ဣမေဟိ ဣမေဘိ ဣစ္စာဒိ ပုလ္လိင်္ဂေ ဝိယ ဉေယျံ။

‘‘ဝါ၊ အနပုံသကဿ၊ သိမှီ’’တိ စ ဝတ္တတေ။

အနပုံသကဿ အမုသဒ္ဒဿ မကာရော သကာရမာပဇ္ဇတေ ဝါ သိမှိ ပရေ။ အသု ရာဇာ။

‘‘သဗ္ဗနာမတော၊ ဝါ’’တိ စ ဝတ္တတေ။

သဗ္ဗတော သဗ္ဗနာမတော ပရော ကဣစ္စယမာဂမော ဟောတိ ဝါ။ ပုန သဗ္ဗတောဂ္ဂဟဏေန ဟီနာဒိတောပိ ကော။ ‘‘အမုဿ မော သ’’န္တိ ဝိနာဓိကာရေန ယောဂေန ကကာရေပိ သာဒေသော။

အသုကော ¶ ၊ အသုကာ၊ အသုကံ။ သာဒေသာဘာဝေ အမုကော၊ အမုကာ၊ အမုကံ ဣစ္စာဒိ။

ဗဟုဝစနေ ‘‘လတော ဝေါကာရော စာ’’တိ သုတ္တေ အနုဝတ္တမာနဝါဂ္ဂဟဏေန ဝေါကာရော န ဟောတိ၊ နိစ္စံ ယောလောပေါ၊ ဒီဃော စ။

အမူ ပုရိသာ၊ အမုံ၊ အမူ၊ အမုနာ၊ အမူဟိ အမူဘိ အမုဟိ အမုဘိ၊ အမုဿ။ ‘‘အမုဿာဒု’’န္တိ ဝိနာဓိကာရေန ယောဂေန အဒုံအာဒေသော၊ အဒုဿ၊ အမူသံ အမူသာနံ အမုသံ အမုသာနံ၊ အမုသ္မာ အမုမှာ၊ အမူဟိ အမူဘိ အမုဟိ အမုဘိ၊ အမုဿ အဒုဿ၊ အမူသံ အမူသာနံ အမုသံ အမုသာနံ၊ အမုသ္မိံ အမုမှိ၊ အမူသု အမုသု။

အသု ကညာ အသုကာ အမုကာ ဝါ၊ အမူ အမုယော၊ အမုံ၊ အမူ အမုယော၊ အမုယာ၊ အမူဟိ အမူဘိ၊ အမုဿာ အမုယာ၊ အမူသံ အမူသာနံ၊ အမုယာ၊ အမူဟိ အမူဘိ၊ အမုဿာ အမုယာ၊ အမူသံ အမူသာနံ၊ အမုဿံ အမုယံ အမုယာ၊ အမူသု။

နပုံသကေ အမုသိ။ ‘‘သဝိဘတ္တိဿ’’၊ ဣမဿိဒမိစ္စာဒိတော ‘‘အံသိသု နပုံသကေ’’တိ စ ဝတ္တတေ။

နပုံသကေ ဝတ္တမာနဿ သဗ္ဗဿေဝ အမုသဒ္ဒဿ သဝိဘတ္တိဿ အဒုံ ဟောတိ အံသိသု ပရေသု။ အဒုံ ပုပ္ဖံ၊ အမူ အမူနိ၊ အဒုံ၊ အမူ အမူနိ၊ အမုနာ ဣစ္စာဒိ ပုလ္လိင်္ဂသမံ။

ကိံသဒ္ဒဿ ဘေဒေါ။ ‘‘ကိံ သိ’’ ဣတီဓ –

‘‘ကိဿ ¶ က ဝေ စာ’’တိ ဣတော ‘‘ကိဿ၊ က’’ဣတိ စ ဝတ္တတေ။

ကိမိစ္စေတဿ ကသဒ္ဒေါ အာဒေသော ဟောတိ ဝပ္ပစ္စယတော သေသေသု ဝိဘတ္တိဘေဒေသု။ ဧတ္ထ စ ‘‘ကိဿ က ဝေ စာ’’တိ သုတ္တေ စသဒ္ဒေန ဝပ္ပစ္စယာဝသိဋ္ဌ ထမာဒိပ္ပစ္စယာနံ ဂဟိတတ္တာ သေသဂ္ဂဟဏေန ဝိဘတ္တိယောဝ ဂယှန္တေ။ စဂ္ဂဟဏံ ကတ္ထစိ နိဝတ္တနတ္ထံ၊ တေန ‘‘ကိဿ၊ ကိသ္မိ’’န္တိအာဒိ စ သိဇ္ဈတိ။ ‘‘သော’’တိ သိဿ ဩ၊ သရလောပါဒိ။

ကော ဧသော၊ ကေ၊ ကံ၊ ကေ၊ ကေန၊ ကေဟိ ကေဘိ၊ ကဿ ကိဿ၊ နိဂ္ဂဟီတလောပါဒိ၊ ကေသံ ကေသာနံ၊ ကသ္မာ ကမှာ၊ ကေဟိ ကေဘိ၊ ကဿ ကိဿ၊ ကေသံ ကေသာနံ၊ ကသ္မိံ ကိသ္မိံ ကမှိ ကိမှိ၊ ကေသု။

ဣတ္ထိယံ ‘‘ကိံ သိ’’ဣတီဓ ‘‘သေသေသု စာ’’တိ ဝိဘတ္တိယံ ပရာယံ ကာဒေသေ ကတေ ‘‘ဣတ္ထိယမတော အာပ္ပစ္စယော’’တိ မဇ္ဈေ အာပ္ပစ္စယော၊ သိလောပေါ။

ကာ ဧသာ ကညာ၊ ကာ ကာယော၊ ကံ၊ ကာ ကာယော ဣစ္စာဒိ သဗ္ဗာသဒ္ဒသမံ။

နပုံသကေ ကိံ သိ၊ လောပဝိဓိဿ ဗလဝတရတ္တာ ပဌမံ သိလောပေ ကတေ ပုန ဝိဘတ္တိပရတ္တာဘာဝါ၊ ‘‘တဒနုပရောဓေနာ’’တိ ပရိဘာသတော ဝါ ကာဒေသာဘာဝေါ။ ကိံ ဧတံ၊ ကာနိ။

ဒုတိယေကဝစနေ ‘‘ကွစိ လောပ’’န္တိ နိဂ္ဂဟီတလောပေ ကတေ ‘‘အံမော နိဂ္ဂဟီတံ ဈလပေဟီ’’တိ နိဂ္ဂဟီတံ။ ကိံ၊ ကာနိ ဣစ္စာဒိ ပုလ္လိင်္ဂသမံ။

ဧကသဒ္ဒေါ ¶ သင်္ချာတုလျာသဟာယညဝစနော။ ယဒါ သင်္ချာဝစနော၊ တဒါ သဗ္ဗတ္ထေကဝစနန္တောဝ၊ အညတ္ထ ဗဟုဝစနန္တောပိ။ ဧကော၊ ဧကာ၊ ဧကံ ဣစ္စာဒိ သဗ္ဗတ္ထ သဗ္ဗသဒ္ဒသမံ။ သံသာသွေဝ ဝိသေသော။

ဥဘသဒ္ဒေါ ဒွိသဒ္ဒပရိယာယော၊ သဒါ ဗဟုဝစနန္တောဝ။

‘‘ဥဘ ယော’’ ဣတီဓ ‘‘တတော ယောနမော တူ’’တိ ဧတ္ထ တုဂ္ဂဟဏေန ကွစိ ယောနမောကာရော။ ဥဘော ပုရိသာဥဘေ ဝါ၊ ဥဘော ပုရိသေ ဥဘေ။ သု ဟိသု ‘‘တေသု ဝုဒ္ဓီ’’တိအာဒိနာ ကွစိ ဧကာရဿောကာရော။ ဥဘောဟိ ဥဘောဘိ ဥဘေဟိ ဥဘေဘိ။

ဥဘဣစ္စေဝမာဒိတော နံဝစနဿ ဣန္နံ ဟောတိ။

ဥဘိန္နံ၊ ဥဘောဟိ ဥဘောဘိ ဥဘေဟိ ဥဘေဘိ၊ ဥဘိန္နံ၊ ဥဘောသု ဥဘေသု။

ဒွိအာဒယော သင်္ချာသင်္ချေယျဝစနာ၊ ဗဟူနံ ဝါစိတတ္တာ သဒါ ဗဟုဝစနန္တာဝ။

‘‘ဒွိ ယော’’ဣတီဓ ‘‘သဝိဘတ္တိဿ၊ ဣတ္ထိပုမနပုံသကသင်္ချ’’န္တိ စ အဓိကာရော။

ဒွိဣစ္စေတဿ သင်္ချာသဒ္ဒဿ ဣတ္ထိပုမနပုံသကေ ဝတ္တမာနဿ သဝိဘတ္တိဿ ဒွေဣစ္စာဒေသော ဟောတိ ယောသု ပရေသု။ စသဒ္ဒေန ဒုဝေ စ၊ ကွစိ ဒုဝိ စ နံမှိ။ ဗဟုဝစနုစ္စာရဏံ ဒွိသဒ္ဒတော ¶ ဗဟုဝစနမေဝ ဟောတီတိ ဉာပနတ္ထံ။ ဒွေ ဓမ္မာ၊ ဒွေ ဣတ္ထိယော၊ ဒွေ ရူပါနိ၊ ဒုဝေ ဝါ၊ ဧဝံ ဒုတိယာယမ္ပိ၊ ဒွီဟိ ဒွီဘိ။

ဒွိဣစ္စေဝမာဒိတော သင်္ချာတော နကာရာဂမော ဟောတိ နံမှိ ဝိဘတ္တိမှိ။ စသဒ္ဒဂ္ဂဟဏေန ဣတ္ထိယံ တိ စ တုသဒ္ဒတော ဿဉ္စာဂမော နံမှိ ဝိဘတ္တိမှိ။ ဒွိန္နံ ဒုဝိန္နံ ဝါ၊ ဒွီဟိ ဒွီဘိ၊ ဒွိန္နံ ဒုဝိန္နံ၊ ဒွီသု။

တိသဒ္ဒဿ ဘေဒေါ။ ‘‘တိ ယော’’ဣတီဓ

၂၃၀။ တိ စတုန္နံ တိဿော စတဿော တယောစတ္တာရောတီဏိ စတ္တာရိ။

တိ စတုန္နံ သင်္ချာနံ ဣတ္ထိပုမနပုံသကေ ဝတ္တမာနာနံ သဝိဘတ္တီနံ ယထာက္ကမံ တိဿော စတဿော တယော စတ္တာရောတီဏိ စတ္တာရိဣစ္စေတေ အာဒေသာ ဟောန္တိ ယောသု ပရေသု။ တယော ပုရိသာ၊ တယော ပုရိသေ ပဿ၊ တီဟိ တီဘိ။

၂၃၁။ ဣဏ္ဏမိဏ္ဏန္နံ တီဟိ သင်္ချာဟိ။

တိဣစ္စေတသ္မာ သင်္ချာသဒ္ဒါ ပရဿ နံဝစနဿ ဣဏ္ဏံ ဣဏ္ဏန္နံဣစ္စေတေ အာဒေသာ ဟောန္တိ၊ သရလောပါဒိ။ တိဏ္ဏံ တိဏ္ဏန္နံ၊ တီဟိ တီဘိ၊ တိဏ္ဏံ တိဏ္ဏန္နံ၊ တီသု။

ဣတ္ထိယံ ¶ တိဿော ဣတ္ထိယော၊ တိဿော၊ တီဟိ တီဘိ၊ နံမှိ ဿဉ္စာဂမော၊ တိဿန္နံ၊ ဿံဗျဝဓာနတော ဣဏ္ဏာဘာဝေါ၊ သေသံ သမံ။

နပုံသကေ တီဏိ၊ တီဏိ။ သေသံ ပုလ္လိင်္ဂသမံ။

တထာ စတုသဒ္ဒဿပိ ယောသု ‘‘တိစတုန္န’’န္တိအာဒိနာ ယထာဝုတ္တာဒေသော၊ ‘‘တတော ယောနမော တူ’’တိ ဧတ္ထ တုသဒ္ဒေန ကွစိ ဩကာရော စ။ စတ္တာရော စတုရော ဝါ၊ စတ္တာရော စတုရော၊ စတူဟိ စတူဘိ စတုဗ္ဘိ၊ စတုန္နံ၊ နကာရာဂမော။ စတူဟိ စတူဘိ စတုဗ္ဘိ၊ စတုန္နံ၊ စတူသု။

ဣတ္ထိယံ စတဿော၊ စတဿော၊ နံမှိ ဿဉ္စာဂမော၊ ‘‘တေသု ဝုဒ္ဓီ’’တိအာဒိနာ စတုရုကာရဿ အကာရော။ စတဿန္နံ။ သေသံ သမံ။

နပုံသကေ စတ္တာရိ၊ စတ္တာရိ။ သေသံ ပုလ္လိင်္ဂသမံ။

နီလာဒိဂုဏနာမဉ္စ၊ ဗဟုဗ္ဗီဟိ စ တဒ္ဓိတံ၊

သာမညဝုတျတီတာဒိ-ကိတန္တံ ဝါစ္စလိင်္ဂိကံ။

အထာလိင်္ဂေသု ¶ နာမေသု တုမှမှသဒ္ဒါ ဝုစ္စန္တေ။

တေသံ ပနာလိင်္ဂတ္တာ တီသု လိင်္ဂေသု သမာနရူပံ။ ‘‘တုမှမှ’’ဣတိ ဌိတေ သျာဒျုပ္ပတ္တိ။

‘‘သဝိဘတ္တီနံ၊ တုမှမှာက’’န္တိ အဓိကာရော။

သဗ္ဗေသံ တုမှအမှသဒ္ဒါနံ သဝိဘတ္တီနံ ယထာက္ကမံ တွံအဟံဣစ္စေတေ အာဒေသာ ဟောန္တိ သိမှိ ဝိဘတ္တိမှိ။ စသဒ္ဒေန တုမှဿ တုဝဉ္စ ဟောတိ။ တွံ ပုမာ၊ တွံ ဣတ္ထီ၊ တွံ နပုံသကံ၊ တုဝံ သတ္ထာ ဝါ။ အဟံ ပုမာ၊ အဟံ ဣတ္ထီ၊ အဟံ နပုံသကံ။

ဗဟုဝစနေ ‘‘သဗ္ဗနာမကာရတေ ပဌမော’’တိ ဧကာရော။ တုမှေ တိဋ္ဌထ၊ ဘိယျော အမှေ မဟေမသေ။

သဗ္ဗဿ အမှသဒ္ဒဿ သဝိဘတ္တိဿ မယံအာဒေသော ဟောတိ ယောမှိ ပဌမေ။ မယံ ဂစ္ဆာမ။

ဧတ္ထ စ ဧကသ္မိမ္ပိ ဂါရဝဗဟုမာနေန ဗဟုတ္တသမာရောပါ ဗဟုဝစနံ ဟောတိ။

သဗ္ဗေသံ တုမှ အမှသဒ္ဒါနံ သဝိဘတ္တီနံ တဝံ မမံဣစ္စေတေ အာဒေသာ ဟောန္တိ နဝါ ယထာက္ကမံ အံမှိ ဝိဘတ္တိမှိ။ တဝံ၊ မမံ ပဿ။

သဗ္ဗေသံ တုမှ အမှသဒ္ဒါနံ သဝိဘတ္တီနံ တံ မံဣစ္စေတေ အာဒေသာ ဟောန္တိ ယထာက္ကမံ အံမှိ ဝိဘတ္တိမှိ။ တံ၊ မံ။

သဗ္ဗဿ တုမှသဒ္ဒဿ သဝိဘတ္တိဿ တုဝံတွံဣစ္စေတေ အာဒေသာ ဟောန္တိ အံမှိ ဝိဘတ္တိမှိ။ တုဝံ တွံ။

ဗဟုဝစနေ ‘‘တုမှမှေဟိ၊ အာက’’န္တိ စ ဝတ္တတေ။

တုမှမှေဟိ ပရော အပ္ပဌမော ယော အာကံ ဟောတိ ဝါ။ တုမှာကံ ပဿာမိ၊ တုမှေ ပဿာမိ၊ အမှာကံ ပဿသိ၊ အမှေ ပဿသိ။

သဗ္ဗေသံ တုမှ အမှသဒ္ဒါနံ သဝိဘတ္တီနံ တယာ မယာဣစ္စေတေ အာဒေသာ ဟောန္တိ ယထာက္ကမံ နာမှိ ဝိဘတ္တိမှိ။

၂၃၉။ တယာတယီနံ တကာရော တွတ္တံ ဝါ။

တယာ တယိဣစ္စေတေသံ တကာရော တွတ္တမာပဇ္ဇတေ ဝါ။ တွယာ တယာ၊ မယာ၊ တုမှေဟိ တုမှေဘိ၊ အမှေဟိ အမှေဘိ။

တုမှမှေဟိ သဿ ဝိဘတ္တိဿ အမာဒေသော ဟောတိ ဝါ။ တုမှံ၊ အမှံ ဒီယတေ။

သဗ္ဗေသံ တုမှ အမှသဒ္ဒါနံ သဝိဘတ္တီနံ ယထာက္ကမံ တဝမမဣစ္စေတေ အာဒေသာ ဟောန္တိ သေ ဝိဘတ္တိမှိ၊ ဝိကပ္ပေနာယံ ဝိဇ္ဈန္တရဿ ဝိဇ္ဇမာနတ္တာ။

သဗ္ဗေသံ တုမှ အမှသဒ္ဒါနံ သဝိဘတ္တီနံ ယထာက္ကမံ တုယှံမယှံဣစ္စေတေ အာဒေသာ စ ဟောန္တိ သေ ဝိဘတ္တိမှိ။ တဝ၊ မမ တုယှံ၊ မယှံ ဝါ ဒီယတေ။

သဗ္ဗဿေဝ အမှသဒ္ဒဿ သဝိဘတ္တိဿ မမံအာဒေသော ဟောတိ သေ ဝိဘတ္တိမှိ။ မမံ ဒီယတေ။

‘‘သဿ’’န္တိ ဣတော သီဟဂတိယာ ‘‘အ’’မိတိ ဝတ္တတေ။

တုမှမှေဟိ ပရဿ နံဝစနဿ အာကမိစ္စာဒေသော ဟောတိ၊ အဉ္စ။ ‘‘တေသု ဝုဒ္ဓီ’’တိအာဒိနာ အမှဿ ကွစိ အသ္မာဒေသော။ တုမှံ တုမှာကံ၊ အမှံ အမှာကံ အသ္မာကံ ဝါ။

ပဉ္စမိယံ ‘‘အမှတုမှန္တုရာဇ’’ဣစ္စာဒိနာ သ္မာဝစနဿ နာဘာဝါတိဒေသော။ တယာ၊ မယာ အပေတိ၊ တုမှေဟိ၊ အမှေဟိ တုမှေဘိ အမှေဘိ၊ တုမှံ အမှံ တဝ မမ၊ တုယှံ၊ မယှံ မမံ ပရိဂ္ဂဟော၊ တုမှံ တုမှာကံ၊ အမှံ အမှာကံ အသ္မာကံ ဓမ္မတာ။

သဗ္ဗေသံ တုမှ အမှသဒ္ဒါနံ သဝိဘတ္တီနံ တယိ မယိဣစ္စေတေ အာဒေသာ ဟောန္တိ ယထာက္ကမံ သ္မိံမှိ ဝိဘတ္တိမှိ။ တကာရဿ တွတ္တံ။ တွယိ တယိ မယိ၊ တုမှေသု အမှေသု။

တေသံ ဧဝ တုမှ အမှသဒ္ဒါနံ ပဒတော ပရေသံ ကွစိ အာဒေသန္တရဝိဓာနေ ရူပဘေဒေါ။

၂၄၆။ ပဒတော ဒုတိယာစတုတ္ထီဆဋ္ဌီသု ဝေါ နော။

သဗ္ဗေသံ တုမှ အမှသဒ္ဒါနံ သဝိဘတ္တီနံ ပဒသ္မာ ပရေသံ ဝေါ နောအာဒေသာ ဟောန္တိ ယထာက္ကမံ ဒုတိယာစတုတ္ထီဆဋ္ဌီသု ဗဟုဝစနေသု နဝါ။ ဧတ္ထ စ ‘‘ဧကဝစနေသူ’’တိ ဝက္ခမာနတ္တာ ‘‘ဗဟုဝစနေသူ’’တိ လဒ္ဓံ။ ပဟာယ ဝေါ ဂမိဿာမိ၊ မာ နော အဇ္ဇ ဝိကန္တိံသု၊ ဓမ္မံ ဝေါ ဘိက္ခဝေ ဒေသိဿာမိ၊ သံဝိဘဇေထ နော ရဇ္ဇေန၊ တုဋ္ဌောသ္မိ ဝေါ ပကတိယာ၊ သတ္ထာ နော ဘဂဝါ အနုပ္ပတ္တော။

နဝါတိ ကိံ? ဘယံ တုမှာက နော သိယာ၊ ဧသော အမှာကံ သတ္ထာ။

‘‘ပဒတော၊ စတုတ္ထီဆဋ္ဌီသူ’’တိ ဝတ္တတေ။

သဗ္ဗေသံ တုမှ အမှသဒ္ဒါနံ သဝိဘတ္တီနံ ပဒသ္မာ ပရေသံ တေ မေအာဒေသာ ဟောန္တိ ယထာက္ကမံ စတုတ္ထီဆဋ္ဌီသု ဧကဝစနေသု ¶ နဝါ။ ဒဒါမိ တေ ဂါမဝရာနိ ပဉ္စ၊ ဒဒါဟိ မေ ဂါမဝရံ၊ ဣဒံ တေ ရဋ္ဌံ၊ အယံ မေ ပုတ္တော။

နဝါတိ ကိံ? ဣဒံ စီဝရံ တုယှံ ဝိကပ္ပနတ္ထာယ ဒမ္မိ၊ သုဏာထ ဝစနံ မမ။

န သောစာမိ န ရောဒါမိ၊ တဝ သုတွာန မာဏဝ၊

တုယှဉ္စာပိ မဟာရာဇ၊ မယှဉ္စ ရဋ္ဌဝဍ္ဎန။

ဧဝမိဒံ ဒီဃမဒ္ဓါနံ သန္ဓာဝိတံ သံသရိတံ မမဉ္စေဝ တုမှာကဉ္စာတိ။

ပဒတောတိ ကိံ? တဝ ဉာတိ၊ မမ ဉာတိ။

သဗ္ဗေသံ တုမှ အမှသဒ္ဒါနံ သဝိဘတ္တီနံ ပဒသ္မာ ပရေသံ တေ မေအာဒေသာ န ဟောန္တိ အံမှိ ဝိဘတ္တိမှိ။ ပဿေယျ တံ ဝဿသတံ အာရောဂျံ။ သော မမဗြဝီတိ။

သဗ္ဗေသံ တုမှ အမှသဒ္ဒါနံ သဝိဘတ္တီနံ ပဒသ္မာ ပရေသံ တေ မေ အာဒေသာ ဟောန္တိ ဝါ ယထာက္ကမံ တတိယေကဝစနေ ပရေ ¶ ။ ကတံ တေ ပါပံ၊ ကတံ တယာ ပါပံ၊ ကတံ မေ ပုညံ၊ ကတံ မယာ ပုညံ။

သဗ္ဗေသံ တုမှ အမှသဒ္ဒါနံ သဝိဘတ္တီနံ ပဒသ္မာ ပရေသံ ဝေါ နောအာဒေသာ ဟောန္တိ ဝါ ယထာက္ကမံ တတိယာဗဟုဝစနေ ပရေ။ ကတံ ဝေါ ကမ္မံ၊ ကတံ နော ကမ္မံ။

ဗဟုဝစနနိဒ္ဒေသေန ကွစိ ယောမှိ ပဌမေ စ ဝေါ နော ဟောန္တိ။ ဂါမံ ဝေါ ဂစ္ဆေယျာထ၊ ဂါမံ နော ဂစ္ဆေယျာမ။

တထာ ပဉ္စာဒီနမဋ္ဌာရသန္တာနံ၊ ကတိသဒ္ဒဿ စာလိင်္ဂတ္တာ တိလိင်္ဂေပိ သမာနရူပံ၊ အလိင်္ဂတ္တာ ဧဝ ပဉ္စာဒိတော ဣတ္ထိပ္ပစ္စယာဘာဝေါ။

‘‘ယောသု ဒွိန္နံ ဒွေ စာ’’တိ ဣတော ‘‘ယောသူ’’တိ ဝတ္တတေ၊ ‘‘ဣတ္ထိပုမနပုံသကသင်္ချ’’န္တိ စ။

အန္တာပေက္ခာယံ ဆဋ္ဌီ၊ ပဉ္စာဒီနံ အဋ္ဌာရသန္တာနံ သင်္ချာနံ ဣတ္ထိပုမနပုံသကေ ဝတ္တမာနာနမန္တဿ သဝိဘတ္တိဿ အကာရော ဟောတိ ယောသု ပရေသု။ အာ ဧအာဒေသာပဝါဒေါယံ၊ ပဉ္စက္ခန္ဓာ၊ ပဉ္စ ဂတိယော၊ ပဉ္စ ဣန္ဒြိယာနိ။ ဧဝံ ဒုတိယာယဉ္စ။

ပဉ္စာဒီနမဋ္ဌာရသန္တာနံ သင်္ချာနမန္တော အတ္တမာပဇ္ဇတေ သု နံ ဟိဣစ္စေတေသု ပရေသု။ ဧတ္တဒီဃာပဝါဒေါယံ။ ပဉ္စဟိ ပဉ္စဘိ ¶ ၊ ပဉ္စန္နံ၊ ပဉ္စဟိ ပဉ္စဘိ၊ ပဉ္စန္နံ၊ ပဉ္စသု။ ဧဝံ ဆ သ တ္တ အဋ္ဌနဝ ဒသသဒ္ဒါ။

‘‘ဧကဉ္စ ဒသ စာ’’တိ အတ္ထေ ဒွန္ဒသမာသေ၊ ‘‘ဧကေန အဓိကာ ဒသာ’’တိ အတ္ထေ တပ္ပုရိသေ ဝါ ကတေ

ဒွိဧကအဋ္ဌဣစ္စေတေသမန္တော အာကာရော ဟောတိ ဝါ သင်္ချာနေ ဥတ္တရပဒေ ပရေ။ ဝဝတ္ထိတဝိဘာသာယံ။ ဧကာဒသ၊ ဒွါဒသ၊ အဋ္ဌာရသ။

သင်္ချာနေတိ ကိမတ္ထံ? ဧကဒန္တော၊ ဒွိဒန္တော၊ အဋ္ဌတ္ထမ္ဘော။

၂၅၄။ ဧကာဒိတော ဒဿ ရ သင်္ချာနေ။

ဧကာဒိတော သင်္ချာတော ပရဿ ဒသဿ အာဒိဿ ဒဿ ရကာရော ဟောတိ ဝါ သင်္ချာနေ။ သေသံ သမံ။ ဧကာရသ၊ ဧကာဒသ။

ဒွေ စ ဒသ စ၊ ဒွီဟိ ဝါ အဓိကာ ဒသာတိ ဒွိဒသ ဣတီဓ –

ဝီသတိ ဒသဣစ္စေတေသု ပရေသု ဒွိသဒ္ဒဿ ဗာ ဟောတိ ဝါ။ တုသဒ္ဒေန တိံသာယမ္ပိ။ ရကာရော၊ အာတ္တဉ္စ။ ဗာရသ၊ ဒွါဒသ။

တယော စ ဒသ စ၊ တီဟိ ဝါ အဓိကာ ဒသာတိ တေရသ။ ဧတ္ထ ‘‘တေသု ဝုဒ္ဓီ’’တိအာဒိနာ တိသဒ္ဒဿ တေအာဒေသော အာနဝုတိယာ။

စတ္တာရော ¶ စ ဒသ စ၊ စတူဟိ ဝါ အဓိကာ ဒသာတိ စတုဒ္ဒသ ဣစ္စတြ –

၂၅၆။ စတူပပဒဿ လောပေါ တုတ္တရပဒါဒိ စဿ စု စောပိ နဝါ။

ဂဏနေ ဒသဿာဒိမှိ ဌိတဿ စတုဣစ္စေတဿ ဥပပဒဿ တုသဒ္ဒေါ လောပေါ ဟောတိ၊ ဥတ္တရပဒါဒိမှိ ဌိတဿ စတူပပဒဿ စကာရဿ စု စောအာဒေသာ ဟောန္တိ နဝါ။ စုဒ္ဒသ၊ စောဒ္ဒသ၊ စတုဒ္ဒသ။

အပိဂ္ဂဟဏေန အနုပပဒဿာပိ ဂဏနေ ပဒါဒိစကာရဿ လောပေါ၊ စု စော ဟောန္တိ နဝါ။ ယထာ – တာလီသံ၊ စုတ္တာလီသံ၊ စောတ္တာလီသံ၊ စတ္တာလီသံ။

ပဉ္စ စ ဒသ စ၊ ပဉ္စဟိ ဝါ အဓိကာ ဒသာတိ အတ္ထေ ပဉ္စဒသ။ ‘‘တေသု ဝုဒ္ဓီ’’တိအာဒိနာ ပဉ္စသဒ္ဒဿ ဒသ ဝီသတီသု ကွစိ ပန္နပဏ္ဏအာဒေသာ။ ပန္နရသ၊ ပဏ္ဏရသ။

ဆ စ ဒသ စ၊ ဆဟိ ဝါ အဓိကာ ဒသာတိ အတ္ထေ ဆဒသ ဣတီဓ –

ဆဣစ္စေတဿ သင်္ချာသဒ္ဒဿ နိစ္စံ သော ဟောတိ ဒသေ ပရေ။

‘‘သင်္ချာနံ၊ ဝါ’’တိ စ ဝတ္တတေ။

သင်္ချာနံ ဒကာရရကာရာနံ လကာရာဒေသော ဟောတိ ဝါ။

လဠာနမဝိသေသော ¶ ။ ဝဝတ္ထိတဝိဘာသတ္ထောယံ ဝါသဒ္ဒေါ၊ တေန ‘‘သောဠသ’’ ဣတိ နိစ္စံ၊ ‘‘တေဠသ၊ တေရသ၊ စတ္တာလီသံ၊ စတ္တာရီသ’’မိတိ ဝိဘာသာ၊ ဒသ ပန္နရသာဒီသု န စ ဟောတိ။

သတ္တ စ ဒသ စ၊ သတ္တဟိ ဝါ အဓိကာ ဒသာတိ အတ္ထေ သတ္တရသ၊ သတ္တဒသ။

အဋ္ဌ စ ဒသ စ၊ အဋ္ဌဟိ ဝါ အဓိကာ ဒသာတိ အတ္ထေ အဋ္ဌဒသ ဣတီဓ အာတ္တေ ကတေ –

‘‘ဝါ၊ ဒဿ၊ ရ၊ သင်္ချာနေ’’တိ စ ဝတ္တတေ။

အဋ္ဌာဒိတော စ ဒသသဒ္ဒဿ ဒကာရဿ ရကာရော ဟောတိ ဝါ သင်္ချာနေ။ အဋ္ဌာရသ၊ အဋ္ဌာဒသ။

ကတိသဒ္ဒေါ ဗဟုဝစနန္တောဝ၊ ‘‘ကတိ ယော’’ ဣတီဓ

နိစ္စံ ယောလောပါဒိ၊ ရဿတ္တံ၊ ကတိ တိဋ္ဌန္တိ၊ ကတိ ပဿသိ၊ ကတိဟိ ကတိဘိ၊ ကတိနံ၊ ကတိဟိ ကတိဘိ၊ ကတိနံ၊ ကတိသု။

အထ ဝိဘတ္တိပ္ပစ္စယန္တာ ဝုစ္စန္တေ။

တေသံ ပနာလိင်္ဂတ္တာ၊ နိပါတတ္တာ စ တိလိင်္ဂေ၊ ဝစနဒွယေ စ သမာနံ ရူပံ။

ပုရိသသ္မာ၊ ပုရိသေဟိ ဝါတိ အတ္ထေ –

၂၆၀။ ကွစိ ¶ တော ပဉ္စမျတ္ထေ။

သဗ္ဗသ္မာ သုဒ္ဓနာမတော၊ သဗ္ဗနာမတော စ လိင်္ဂမှာ ကွစိ တောပစ္စယော ဟောတိ ပဉ္စမျတ္ထေ။

တောအာဒိ ယေသံ ဒါနိပရိယန္တာနံ ပစ္စယာနံ တေ ဟောန္တိ ပစ္စယာ တွာဒယော၊ တေ ပစ္စယာ ဝိဘတ္တိသညာ ဟောန္တိ။ တေန တဒန္တာနမ္ပိ ဝိဘတျန္တပဒတ္တံ သိဒ္ဓံ ဟောတိ။

ပုရိသတော၊ ဧဝံ ရာဇတော ဝါ၊ စောရတော ဝါ၊ အဂ္ဂိတော ဝါ၊ ဂဟပတိတော ဝါ၊ ဟတ္ထိတော၊ ဟေတုတော၊ သဗ္ဗညုတော၊ ကညတော၊ ယုတ္တိတော၊ ဣတ္ထိတော၊ ဘိက္ခုနိတော၊ ဧတ္ထ စ ‘‘ကွစာဒိမဇ္ဈုတ္တရာနံ ဒီဃရဿာပစ္စယေသု စာ’’တိ တောပစ္စယေ ရဿတ္တံ။ ယာဂုတော၊ ဇမ္ဗုတော၊ စိတ္တတော၊ အာယုတော ဣစ္စာဒိ။

သဗ္ဗနာမတော သဗ္ဗသ္မာ၊ သဗ္ဗေဟီတိ ဝါ အတ္ထေ သဗ္ဗတော၊ ဧဝံ ယတော၊ တတော၊ ကတရတော၊ ကတမတော၊ ဣတရတော၊ အညတော၊ ဧကတော၊ ဥဘယတော၊ ပုဗ္ဗတော၊ ပရတော၊ အပရတော၊ ဒက္ခိဏတော၊ ဥတ္တရတော၊ အမုတော။

ကိမိစ္စေတဿ ကု ဟောတိ တြတော ထဣစ္စေတေသု စ ပရေသု။ ကသ္မာ၊ ကေဟီတိ ဝါ ကုတော။

သဗ္ဗဿ ဧတသဒ္ဒဿ အကာရော ဟောတိ ဝါ တောထဣစ္စေတေသု။ ဧတသ္မာ၊ ဧတေဟီတိ ဝါ အတော။

သဗ္ဗဿ ဧတသဒ္ဒဿ ဧကာရော ဟောတိ ဝါ တောထဣစ္စေတေသု။ ဒွိတ္တံ၊ ဧတ္တော။

ဣမသဒ္ဒဿ သဗ္ဗဿေဝ ဣကာရော ဟောတိ ထံဒါနိဟတောဓဣစ္စေတေသု စ။ ဣမသ္မာတိ ဣတော။

‘‘ကွစိ တော’’တိ ယောဂဝိဘာဂေန အာဒိပ္ပဘုတီဟိ တော သတ္တမိယတ္ထေ။ အနိစ္စာဒီဟိ တတိယတ္ထေ စ။ ယထာ – အာဒိမှီဘိ အတ္ထေ အာဒိတော။ ဧဝံ မဇ္ဈတော၊ ဧကတော၊ ပုရတော၊ ပစ္ဆတော၊ ပဿတော၊ ပိဋ္ဌိတော၊ ပါဒတော၊ သီသတော၊ အဂ္ဂတော၊ မူလတော၊ ပရတော ဣစ္စာဒယော။

တတိယတ္ထေ အနိစ္စေနာတိ အနိစ္စတော၊ အနိစ္စတော သမ္မသတိ။ ဧဝံ ဒုက္ခတော၊ ရောဂတော၊ ဂဏ္ဍတော ဣစ္စာဒယော။

၂၆၆။ တြထ သတ္တမိယာ သဗ္ဗနာမေဟိ။

သဗ္ဗနာမေဟိ ပရာ တြ ထဣစ္စေတေ ပစ္စယာ ဟောန္တိ ကွစိ သတ္တမျတ္ထေ။ သဗ္ဗသ္မိံ၊ သဗ္ဗေသု စာတိ သဗ္ဗတြ သဗ္ဗတ္ထ။ ဧဝံ ¶ ယတြ ယတ္ထ၊ တတြ တတ္ထ၊ ဣတရတြ ဣတရတ္ထ၊ အညတြ အညတ္ထ၊ ဥဘယတြ ဥဘယတ္ထ၊ ပရတြ ပရတ္ထ၊ ကုတြ ကုတ္ထ၊ ‘‘တြတောထေသု စာ’’တိ ကုတ္တံ။ ‘‘ကိဿ က ဝေ စာ’’တိ သုတ္တေ စသဒ္ဒေန ကာဒေသော။ ကတ္ထ၊ အမုတြ အမုတ္ထ။

‘‘သဗ္ဗဿေတဿာကာရော’’တိ ဝတ္တတေ။

သဗ္ဗဿေဝ ဧတသဒ္ဒဿ အကာရော ဟောတိ နိစ္စံ တြေ ပရေ။ အတြ။ ‘‘သဗ္ဗဿေတဿာကာရော ဝါ’’တိ အတ္တံ၊ ‘‘ဧ တောထေသု စာ’’တိ ဧကာရော၊ အတ္ထ၊ ဧတ္ထ။

‘‘ကွစိ၊ အတ္ထေ၊ သတ္တမိယာ’’တိ စ အဓိကာရော၊ သဗ္ဗသ္မိန္တိ အတ္ထေ –

သဗ္ဗဣစ္စေတသ္မာ ဓိပ္ပစ္စယော ဟောတိ ကွစိ သတ္တမျတ္ထေ။ သဗ္ဗဓိ။

ကိမိစ္စေတသ္မာ ဝပ္ပစ္စယော ဟောတိ ကွစိ သတ္တမျတ္ထေ။

ကိမိစ္စေတဿ ကသဒ္ဒေါ အာဒေသော ဟောတိ ဝပ္ပစ္စယေပရေ။ စဂ္ဂဟဏေန ထဟမာဒိအဝပ္ပစ္စယေပိ။ ‘‘တေသု ဝုဒ္ဓီ’’တိအာဒိနာ ကကာရေ အကာရဿ လောပေါ စ ဝမှိ။ ကွ ဂတောသိ တွံ။

ကိမိစ္စေတသ္မာ ဟိံ ဟံ ဟိဉ္စနံဣစ္စေတေ ပစ္စယာ ဟောန္တိ ကွစိ သတ္တမျတ္ထေ။

ကိမိစ္စေတဿ ကု ဟောတိ ဟိံ ဟံ ဣစ္စေတေသု။ စဂ္ဂဟဏေန ဟိဉ္စနံဒါစနမိစ္စာဒီသုပိ။ ကိသ္မိန္တိ ကုဟိံ၊ ကုဟံ၊ ကုဟိဉ္စနံ၊ ကဟံ ကာဒေသော။

တဣစ္စေတသ္မာ စ သဗ္ဗနာမတော ဟိံဟံပစ္စယာ ဟောန္တိ ကွစိ သတ္တမျတ္ထေ။ တသ္မိန္တိ တဟိံ၊ တဟံ။

ဣမသဒ္ဒတော ဟဓပ္ပစ္စယာ ဟောန္တိ ကွစိ သတ္တမျတ္ထေ။ ‘‘ဣမဿိ ထ’’န္တိအာဒိနာ ဣကာရော။ ဣမသ္မိန္တိ ဣဟ၊ ဣဓ။

ယဣစ္စေတသ္မာ သဗ္ဗနာမတော ဟိံပစ္စယော ဟောတိ ကွစိ သတ္တမျတ္ထေ။ ယသ္မိန္တိ ယဟိံ။

၂၇၆။ ကိံသဗ္ဗညေကယကုဟိ ¶ ဒါ ဒါစနံ။

ကိံ သဗ္ဗအညဧကယဣစ္စေတေဟိ သဗ္ဗနာမေဟိ ဒါပစ္စယော ဟောတိ။ ကုဣစ္စေတသ္မာ ဒါစနဉ္စ ကာလေ ကွစိ သတ္တမျတ္ထေ။

‘‘ကိဿ က ဝေ စာ’’တိ သုတ္တေ စသဒ္ဒေန ကာဒေသော၊ ကဒါ။

သဗ္ဗဣစ္စေတဿ သဒ္ဒဿ သသဒ္ဒါဒေသော ဟောတိ ဝါ ဒါပစ္စယေ ပရေ။ သဗ္ဗသ္မိံ ကာလေတိ သဒါ၊ သဗ္ဗဒါ။

ဧဝံ အညဒါ၊ ဧကဒါ၊ ယဒါ၊ ကသ္မိံ ကာလေတိ ကုဒါစနံ၊ ‘‘ကု ဟိံဟံသု စာ’’တိ သုတ္တေ စသဒ္ဒေန ကုတ္တံ၊ ‘‘ကု’’ဣတိ နိပါတနေန ဝါ။

တဣစ္စေတသ္မာ သဗ္ဗနာမတော ဒါနိဒါပစ္စယာ ဟောန္တိ ကာလေ ကွစိ သတ္တမျတ္ထေ။ တသ္မိံ ကာလေတိ တဒါနိ၊ တဒါ။

ဣမသဒ္ဒတော ရဟိ ဓုနာ ဒါနိဣစ္စေတေ ပစ္စယာ ဟောန္တိ ကာလေ ကွစိ သတ္တမျတ္ထေ။

သဗ္ဗဿ ဣမသဒ္ဒဿ ဧတာဒေသော ဟောတိ ရဟိမှိ ပစ္စယေ ပရေ။ ဣမသ္မိံ ကာလေတိ ဧတရဟိ။

သဗ္ဗဿေဝ ဣမသဒ္ဒဿ အကာရော ဟောတိ ဓုနာပစ္စယေ ပရေ။ အဓုနာ၊ ဣမသဒ္ဒဿ ဣကာရော။ ဣမသ္မိံ ကာလေတိ ဣဒါနိ။

ဝိဘတ္တိပ္ပစ္စယဝိဓာနံ နိဋ္ဌိတံ။

အထာလိင်္ဂသင်္ချာဝိဘတ္တိဘေဒါ ဥပသဂ္ဂနိပါတာ ဝုစ္စန္တေ။

ပ ပရာ နိ နီ ဥ ဒု သံ ဝိ အဝ အနု ပရိ အဓိ အဘိ ပတိ သု အာ အတိ အပိ အပ ဥပ ဣတိ ပီသတိ ဥပသဂ္ဂါ။

တတ္ထ ပသဒ္ဒေါ ပကာရာ’ဒိကမ္မ ပဓာနိ’ဿရိယ’န္တောဘာဝဝိယောဂ တပ္ပရ ဘုသတ္ထ သမ္ဘဝတိတ္တိ အနာဝိလ ပတ္ထနာဒီသု။ ပဣတိ အယမုပသဂ္ဂေါ ဧတေသု ပကာရာဒီသု အတ္ထေသု ဝတ္တတိ၊ ယထာ – ပကာရေ ပညာ၊ အာဒိကမ္မေ ဝိပ္ပကတံ၊ ပဓာနေ ပဏီတံ၊ ပဓာနံ ပဓာနတ္တံ၊ ဣဿရိယေ ပဘူ အယံ ဒေသဿ၊ အန္တောဘာဝေ ပက္ခိတ္တံ၊ ဝိယောဂေ ပဝါသီ၊ တပ္ပရေ ပါစရိယော၊ ဘုသတ္ထေ ပဝုဒ္ဓကာယော၊ သမ္ဘဝေ ဟိမဝတာ ဂင်္ဂါ ပဘဝတိ၊ တိတ္တိယံ ပဟူတမန္နံ၊ အနာဝိလေ ပသန္နမုဒကံ၊ ပတ္ထနေ ပဏိဟိတံ။

ပရာဣတိ ¶ ပရိဟာနိ ပရာဇယ ဂတိဝိက္ကမာ’မသနာဒီသု။ ယထာ – ပရိဟာနိယံ ပရာဘဝေါ၊ ပရာဇယေ ပရာဇိတော၊ ဂတိယံ ပရာယနံ။ ဝိက္ကမေ ပရက္ကမတိ၊ အာမသနေ အင်္ဂဿ ပရာမသနံ။

နိဣတိ နိဿေသ နိဂ္ဂတ နီဟရဏ’န္တောပဝေသနာ’ဘာဝနိသေဓ နိက္ခန္တ ပါတုဘာဝါ’ဝဓာရဏ ဝိဘဇန ဥပမူ’ပဓာရဏာ’ဝသာနဆေကာဒီသု။ နိဿေသေ နိရုတ္တိ၊ နိရဝသေသံ ဒေတိ၊ နိဂ္ဂတေ နိက္ကိလေသော၊ နိယျာတိ၊ နီဟရဏေ နိဒ္ဓါရဏံ၊ အန္တောပဝေသနေ နိခါတော၊ အဘာဝေ နိမ္မက္ခိကံ၊ နိသေဓေ နိဝါရေတိ၊ နိက္ခန္တေ နိဗ္ဗာနော၊ နိဗ္ဗာနံ၊ ပါတုဘာဝေ နိမ္မိတံ၊ အဝဓာရဏေ နိစ္ဆယော၊ ဝိဘဇနေ နိဒ္ဒေသော၊ ဥပမာယံ နိဒဿနံ၊ ဥပဓာရဏေ နိသာမနံ၊ အဝသာနေ နိဋ္ဌိတံ၊ ဆေကေ နိပုဏော။

နီဣတိ နီဟရဏာ’ဝရဏာဒီသု။ နီဟရဏေ နီဟရတိ၊ အာဝရဏေ နီဝရဏံ။

ဥဣတိ ဥဂ္ဂတု’ဒ္ဓကမ္မ ပဓာန ဝိယောဂ သမ္ဘဝ အတ္ထလာဘသတ္တိ သရူပကထနာဒီသု။ ဥဂ္ဂတေ ဥဂ္ဂစ္ဆတိ၊ ဥဒ္ဓကမ္မေ အာသနာ ဥဋ္ဌိတော၊ ဥက္ခေပေါ၊ ပဓာနေ ဥတ္တမော၊ လောကုတ္တရော၊ ဝိယောဂေ ဥဗ္ဗာသိတော၊ သမ္ဘဝေ ဥဗ္ဘူတော၊ အတ္ထလာဘေ ဥပ္ပန္နံ ဉာဏံ၊ သတ္တိယံ ဥဿဟတိ ဂန္တုံ၊ သရူပကထနေ ဥဒ္ဒိသတိ သုတ္တံ။

ဒုဣတိ အသောဘနာ’ဘာဝကုစ္ဆိတာ’သမိဒ္ဓိ ကိစ္ဆ ဝိရူပတာဒီသု။ အသောဘနေ ဒုဂ္ဂန္ဓော၊ အဘာဝေ ဒုဗ္ဘိက္ခံ၊ ကုစ္ဆိတေ ဒုက္ကဋံ၊ အသမိဒ္ဓိယံ ဒုဿဿံ၊ ကိစ္ဆေ ဒုက္ကရံ၊ ဝိရူပတာယံ ဒုဗ္ဗဏ္ဏော၊ ဒုမ္မုခေါ။

သံဣတိ သမောဓာန သမ္မာသမ သမန္တဘာဝသင်္ဂတ သင်္ခေပဘုသတ္ထ သဟတ္ထ အပ္ပတ္ထ ပဘဝါ’ဘိမုခဘာဝ သင်္ဂဟ ပိဓာန ပုနပ္ပုနကရဏ သမိဒ္ဓါဒီသု။ သမောဓာနေ သန္ဓိ၊ သမ္မာသမေသု သမာဓိ ¶ ၊ သမ္ပယုတ္တော၊ သမန္တဘာဝေ သံကိဏ္ဏာ သမုလ္လပနာ၊ သင်္ဂတေ သင်္ဂမော၊ သင်္ခေပေ သမာသော၊ ဘုသတ္ထေ သာရတ္တော၊ သဟတ္ထေ သံဝါသော၊ အပ္ပတ္ထေ သမဂ္ဃော။ ပဘဝေ သမ္ဘဝေါ၊ အဘိမုခဘာဝေ သမ္မုခံ၊ သင်္ဂဟေ သင်္ဂဏှာတိ၊ ပိဓာနေ သံဝုတံ၊ ပုနပ္ပုနကရဏေ သန္ဓာဝတိ၊ သမိဒ္ဓိယံ သမ္ပန္နော။

ဝိဣတိ ဝိသေသ ဝိဝိဓ ဝိရုဒ္ဓ ဝိဂတ ဝိယောဂ ဝိရူပတာဒီသု။ ဝိသေသေ ဝိမုတ္တိ ဝိသိဋ္ဌော၊ ဝိဝိဓေ ဝိမတိ ဝိစိတြံ၊ ဝိရုဒ္ဓေ ဝိဝါဒေါ၊ ဝိဂတေ ဝိမလံ၊ ဝိယောဂေ ဝိပ္ပယုတ္တော၊ ဝိရူပတာယံ ဝိရူပေါ။

အဝဣတိ အဓောဘာဂ ဝိယောဂ ပရိဘဝ ဇာနန သုဒ္ဓိ နိစ္ဆယဒေသ ထေယျာဒီသု။ အဓောဘာဂေ အဝက္ခိတ္တစက္ခု၊ ဝိယောဂေ ဩမုက္ကဥပါဟနော အဝကောကိလံ ဝနံ၊ ပရိဘဝေ အဝဇာနနံ အဝမညတိ၊ ဇာနနေ အဝဂစ္ဆတိ၊ သုဒ္ဓိယံ ဝေါဒါနံ၊ နိစ္ဆယေ အဝဓာရဏံ၊ ဒေသေ အဝကာသော၊ ထေယျေ အဝဟာရော။

အနုဣတိ အနုဂတာ’နုပစ္ဆိန္န ပစ္ဆတ္ထ ဘုသတ္ထ သာဒိဿ ဟီနတတိယတ္ထ လက္ခဏိ’တ္ထမ္ဘူတက္ခာန ဘာဂ ဝိစ္ဆာဒီသု။ အနုဂတေ အနွေတိ၊ အနုပစ္ဆိန္နေ အနုသယော၊ ပစ္ဆာသဒ္ဒတ္ထေ အနုရထံ၊ ဘုသတ္ထေ အနုရတ္တော၊ သာဒိဿေ အနုရူပံ။ ဟီနေ အနုသာရိပုတ္တံ ပညဝန္တော၊ တတိယတ္ထေ နဒိမနွဝသိတာ သေနာ၊ လက္ခဏေ ရုက္ခံ အနု ဝိဇ္ဇောတတေ ဝိဇ္ဇု၊ ဣတ္ထမ္ဘူတက္ခာနေ သာဓု ဒေဝဒတ္တော မာတရံ အနု၊ ဘာဂေ ယဒေတ္ထ မံ အနုသိယာ တံ ဒီယတု၊ ဝိစ္ဆာယံ ရုက္ခံ ရုက္ခံ အနု ဝိဇ္ဇောတတေ စန္ဒော။

ပရိဣတိ သမန္တတောဘာဝ ပရိစ္ဆေဒ ဝဇ္ဇနာ’လိင်္ဂန နိဝါသနပူဇာဘောဇနာ’ဝဇာနန ဒေါသက္ခာန လက္ခဏာဒီသု။ သမန္တတောဘာဝေ ပရိဝုတော၊ ပရိစ္ဆေဒေ ပရိညေယျံ၊ ဝဇ္ဇနေ ပရိဟရတိ ¶ ၊ အာလိင်္ဂနေ ပရိဿဇတိ၊ နိဝါသနေ ဝတ္ထံ ပရိဓဿတိ၊ ပူဇာယံ ပါရိစရိယာ၊ ဘောဇနေ ဘိက္ခုံ ပရိဝိသတိ။ အဝဇာနနေ ပရိဘဝတိ၊ ဒေါသက္ခာနေ ပရိဘာသတိ၊ လက္ခဏာဒီသု ရုက္ခံ ပရိ ဝိဇ္ဇောတတေ ဝိဇ္ဇုဣစ္စာဒိ။

အဓိဣတိ အဓိကိ’ဿ’ရူပရိဘာဝါ’ဓိဘဝနဇ္ဈာယနာ’ဓိဋ္ဌာနနိစ္ဆယပါပုဏနာဒီသု။ အဓိကေ အဓိသီလံ၊ ဣဿရေ အဓိပတိ၊ အဓိ ဗြဟ္မဒတ္တေ ပဉ္စာလာ၊ ဥပရိဘာဝေ အဓိရောဟတိ၊ ပထဝိံ အဓိသေဿတိ၊ အဓိဘဝနေ အဓိဘဝတိ၊ အဇ္ဈာယနေ ဗျာကရဏမဓီတေ၊ အဓိဋ္ဌာနေ ဘူမိကမ္ပာဒိံ အဓိဋ္ဌာတိ၊ နိစ္ဆယေ အဓိမောက္ခော၊ ပါပုဏနေ ဘောဂက္ခန္ဓံ အဓိဂစ္ဆတိ။

အဘိဣတိ အဘိမုခဘာဝ ဝိသိဋ္ဌာ’ဓိ ကု’ဒ္ဓကမ္မ ကုလ သာရုပ္ပဝန္ဒန လက္ခဏိ’တ္ထမ္ဘူတက္ခာန ဝိစ္ဆာဒီသု။ အဘိမုခဘာဝေ အဘိမုခေါ အဘိက္ကမတိ၊ ဝိသိဋ္ဌေ အဘိဓမ္မော၊ အဓိကေ အဘိဝဿတိ၊ ဥဒ္ဓကမ္မေ အဘိရုဟတိ၊ ကုလေ အဘိဇာတော၊ သာရုပ္ပေ အဘိရူပေါ၊ ဝန္ဒနေ အဘိဝါဒေတိ၊ လက္ခဏာဒီသု ပုရိမသမံ။

ပတိဣတိ ပတိဂတ ပဋိလောမပတိနိဓိ ပတိဒါန နိသေဓနိဝတ္တန သာဒိဿ ပတိကရဏာ’ဒါန ပတိဗောဓ ပဋိစ္စ လက္ခဏိ’တ္ထမ္ဘူတက္ခာန ဘာဂဝိစ္ဆာဒီသု။ ပတိဂတေ ပစ္စက္ခံ၊ ပဋိလောမေ ပတိသောတံ၊ ပတိနိဓိမှိ အာစရိယတော ပတိ သိဿော၊ ပတိဒါနေ တေလတ္ထိကဿ ဃတံ ပတိ ဒဒါတိ၊ နိသေဓေ ပဋိသေဓနံ၊ နိဝတ္တနေ ပဋိက္ကမတိ၊ သာဒိဿေ ပတိရူပကံ၊ ပတိကရဏေ ပတိကာရော၊ အာဒါနေ ပတိဂ္ဂဏှာတိ၊ ပတိဗောဓေ ပဋိဝေဓော၊ ပဋိစ္စေ ပစ္စယော၊ လက္ခဏာဒီသု ပုရိမသမံ။

သုဣတိ သောဘန သုဋ္ဌုသမ္မာ သမိဒ္ဓိ သုခတ္ထာဒီသု။ သောဘနေ သုဂန္ဓော၊ သုဋ္ဌုသမ္မာဒတ္ထေသု သုဋ္ဌု ဂတော သုဂတော၊ သမ္မာ ဂတောတိပိ သုဂတော၊ သမိဒ္ဓိယံ သုဘိက္ခံ၊ သုခတ္ထေ သုကရော။

အာဣတိ ¶ အဘိမုခဘာဝု’ဒ္ဓကမ္မ မရိယာဒါ’ဘိဝိဓိ ပတ္တိ’စ္ဆာပရိဿဇန အာဒိကမ္မဂ္ဂဟဏ နိဝါသ သမီပ’ဝှာနာဒီသု။ အဘိမုခဘာဝေ အာဂစ္ဆတိ၊ ဥဒ္ဓကမ္မေ အာရောဟတိ၊ မရိယာဒါယံ အာပဗ္ဗတာ ခေတ္တံ၊ အဘိဝိဓိမှိ အာကုမာရံ ယသော ကစ္စာယနဿ၊ ပတ္တိယံ အာပတ္တိမာပန္နော၊ ဣစ္ဆာယံ အာကင်္ခါ၊ ပရိဿဇနေ အာလိင်္ဂနံ၊ အာဒိကမ္မေ အာရမ္ဘော၊ ဂဟဏေ အာဒီယတိ အာလမ္ဗတိ၊ နိဝါသေ အာဝသထော၊ သမီပေ အာသန္နံ၊ အဝှာနေ အာမန္တေသိ။

အတိဣတိ အဘိက္ကမနာ’တိက္ကန္တာ’တိသယ ဘုသတ္ထာဒီသု။ အတိက္ကမနေ အတိရောစတိ အမှေဟိ၊ အတီတော၊ အတိက္ကန္တေ အစ္စန္တံ၊ အတိသယေ အတိကုသလော၊ ဘုသတ္ထေ အတိက္ကောဓော အတိဝုဒ္ဓိ။

အပိဣတိ သမ္ဘာဝနာ’ပေက္ခာ သမုစ္စယ ဂရဟ ပဉှာဒီသု။ သမ္ဘာဝနာယံ အပိ ဒိဗ္ဗေသု ကာမေသု၊ မေရုမ္ပိ ဝိနိဝိဇ္ဈိတွာ ဂစ္ဆေယျ၊ အပေက္ခာယံ အယမ္ပိ ဓမ္မော အနိယတော၊ သမုစ္စယေ ဣတိပိ အရဟံ၊ အန္တမ္ပိ အန္တဂုဏမ္ပိ အာဒါယ၊ ဂရဟေ အပိ အမှာကံ ပဏ္ဍိတက၊ ပဉှေ အပိ ဘန္တေ ဘိက္ခံ လဘိတ္ထ။

အပဣတိ အပဂတ ဂရဟ ဝဇ္ဇန ပူဇာ ပဒုဿနာဒီသု။ အပဂတေ အပမာနော အပေတော၊ ဂရဟေ အပဂဗ္ဘော၊ ဝဇ္ဇနေ အပသာလာယ အာယန္တိ ဝါဏိဇာ၊ ပူဇာယံ ဝုဒ္ဓါပစာယီ၊ ပဒုဿနေ အပရဇ္ဈတိ။

ဥပဣတိ ဥပဂမန သမီပူ’ပပတ္တိ သာဒိဿာ’ဓိကူ’ပရိဘာဝါ’နသန ဒေါသက္ခာန သညာ ပုဗ္ဗကမ္မ ပူဇာ ဂယှာကာရ ဘုသတ္ထာဒီသု။ ဥပဂမနေ နိသိန္နံ ဝါ ဥပနိသီဒေယျ၊ သမီပေ ဥပနဂရံ၊ ဥပပတ္တိယံ သဂ္ဂံ လောကံ ဥပပဇ္ဇတိ၊ အထ ဝါ ဥပပတ္တိ ယုတ္တိ၊ ယထာ ¶ – ဥပပတ္တိတော ဣက္ခတီတိ ဥပေက္ခာ၊ သာဒိဿေ ဥပမာနံ ဥပမာ၊ အဓိကေ ဥပ ခါရိယံ ဒေါဏော၊ ဥပရိဘာဝေ ဥပသမ္ပန္နော၊ အနသနေ ဥပဝါသော၊ ဒေါသက္ခာနေ ပရံ ဥပပဒတိ၊ သညာယံ ဥပဓာ ဥပသဂ္ဂေါ၊ ပုဗ္ဗကမ္မေ ဥပက္ကမော ဥပကာရော၊ ပူဇာယံ ဗုဒ္ဓုပဋ္ဌာကော၊ မာတုပဋ္ဌာနံ၊ ဂယှာကာရေ သောစေယျပစ္စုပဋ္ဌာနံ၊ ဘုသတ္ထေ ဥပါဒါနံ၊ ဥပါယာသော၊ ဥပနိဿယောတိ။ ဣတိ အနေကတ္ထာ ဟိ ဥပသဂ္ဂါ။

‘‘ဥပသဂ္ဂ နိပါတာ စ၊ ပစ္စယာ စ ဣမေ တယော၊

နေကေနေကတ္ထဝိသယာ၊ ဣတိ နေရုတ္တိကာဗြဝု’’န္တိ။

တတ္ထ ဥပသဂ္ဂါနံ နာမာချာတဝိသေသကတ္တာ လိင်္ဂသညာယံ အနိယမေန သျာဒိမှိ သမ္ပတ္တေ တေသံ သင်္ချာကမ္မာဒိဘေဒါဘာဝါ တေဟိ ပဌမေကဝစနမေဝ ဘဝတိ။

၂၈၂။ သဗ္ဗာသမာဝုသောပသဂ္ဂနိပါတာဒီဟိ စ။

အာဝုသောသဒ္ဒတော၊ ဥပသဂ္ဂနိပါတေဟိ စ သဗ္ဗာသံ ပရာသံ ဝိဘတ္တီနံ လောပေါ ဟောတိ။ အာဒိသဒ္ဒေန ကွစိ သုတ္တပဒါဒီဟိ စ။ ဧတ္ထ စ အာဝုသောတိမဿ ဝိသုံ ဂဟဏံ သသင်္ချတ္တဒီပနတ္ထန္တိ ဒဋ္ဌဗ္ဗံ။

ဥပေစ္စတ္ထံ သဇ္ဇန္တီတိ၊ ဥပသဂ္ဂါ ဟိ ပါဒယော၊

စာဒီ ပဒါဒိမဇ္ဈန္တေ၊ နိပါတာ နိပတန္တိတိ။

ပဟရဏံ ပဟာရော၊ ဧဝံ ပရာဘဝေါ၊ နိဝါသော၊ နီဟာရော၊ ဥဟာရော၊ ဒုဟာရော၊ သံဟာရော၊ ဝိဟာရော၊ အဝဟာရော၊ အနုဟာရော၊ ပရိဟာရော၊ အဓိဟာရော၊ အဘိဟာရော၊ ပတိဟာရော၊ သုဟာရော၊ အာဟာရော၊ အတိဟာရော၊ အပိဟာရော၊ အပဟာရော ¶ ၊ ဥပဟာရော။ ပဟရတိ၊ ပရာဘဝတိ၊ နိဝသတိ၊ နီဟရတိ၊ ဥဒ္ဓရတိ ဣစ္စာဒိ ယောဇေတဗ္ဗံ။

ဓာတွတ္ထံ ဗာဓတေ ကောစိ၊ ကောစိ တမနုဝတ္တတေ၊

တမေဝညော ဝိသေသေတိ၊ ဥပသဂ္ဂဂတီ တိဓာ။

သမုစ္စယဝိကပ္ပနပဋိသေဓပူရဏာဒိအတ္ထံ အသတွဝါစကံ နေပါတိကံ ပဒံ။

တတြ စဣတိ သမုစ္စယာ’နွာစယေ’တရီတရယောဂသမာဟာရာ’ဝဓာရဏာဒီသု။

ဝါဣတိ ဝိကပ္ပနူ’ပမာန သမုစ္စယ ဝဝတ္ထိတဝိဘာသာသု။

န နော မာ အ အလံ ဟလံ ဣစ္စေတေ ပဋိသေဓနတ္ထေ။

ပူရဏတ္ထံ ဒုဝိဓံ အတ္ထပူရဏံ ပဒပူရဏဉ္စ။

တတ္ထ အထ ခလု ဝတ ဝထ အထော အဿု ယဂ္ဃေ ဟိ စရဟိ နံ တံ ဝါ စ တုဝ ဝေါ ပန ဟဝေ ကီဝ ဟ တတော ယထာ သုဒံ ခေါ ဝေ ဟံ ဧနံ သေယျထိဒံ ဣစ္စေဝမာဒီနိ ပဒပူရဏာနိ။

တတ္ထ – အထဣတိ ပဉှာ’နန္တရိယာ’ဓိကာရာဒီသု စ။

ခလုဣတိ ပဋိသေဓာ’ဝဓာရဏ ပသိဒ္ဓီသု စ။

ဝတဣတိ ဧကံသ ခေဒါ’နုကမ္ပသင်္ကပ္ပေသု စ။

တုဣတိ ဝိသေသ ဟေတု နိဝတ္တနာဒီသု စ။

သေယျထိဒန္တိ တံ ကတမန္တိ အတ္ထေပိ။

အတ္ထပူရဏံ ဒုဝိဓံ ဝိဘတ္တိယုတ္တံ၊ အဝိဘတ္တိယုတ္တဉ္စ။

အတ္ထိ သက္ကာ လဗ္ဘာ ဣစ္စေတေ ပဌမာယံ။

အာဝုသော အမ္ဘော ဟမ္ဘော ရေ အရေ ဟရေ ဇေဣစ္စေတေ အာမန္တနေ။

ဒိဝါ ဘိယျော နမော ဣစ္စေတေ ပဌမာယံ၊ ဒုတိယာယဉ္စ။

သယံ သာမံ သံ သမ္မာ ကိန္တိ ဣစ္စေတေ တတိယတ္ထေ၊ သောတော ဓာပစ္စယန္တာ စ။ သုတ္တသော ပဒသော အနိစ္စတော ဒုက္ခတော ဧကဓာ ဒွိဓာ ဣစ္စာဒိ။

တဝေ တုံပစ္စယန္တာ စတုတ္ထိယာ၊ ကာတဝေ ဒါတဝေ ကာတုံ ကာရေတုံ ဒါတုံ ဒါပေတုံ ဣစ္စာဒိ။

သော တောပစ္စယန္တာ ပဉ္စမိယတ္ထေ၊ ဒီဃသော ဩရသော ရာဇတော ဝါ စောရတော ဝါ ဣစ္စာဒိ။

တော သတ္တမျတ္ထေပိ၊ တြထာဒိပစ္စယန္တာ စ။ ဧကတော ပုရတော ပစ္ဆတော ပဿတော ပိဋ္ဌိတော ပါဒတော သီသတော အဂ္ဂတော မူလတော ယတြ ယတ္ထ ယဟိံ တတြ တတ္ထ တဟိံ တဟံ ဣစ္စာဒိ။

သမန္တာ သာမန္တာ ပရိတော အဘိတော သမန္တတော ဧကဇ္ဈံ ဧကမန္တံ ဟေဋ္ဌာ ဥပရိ ဥဒ္ဓံ အဓော တိရိယံသမ္မုခါ ¶ ပရမ္မုခါ အာဝိ ရဟော တိရော ဥစ္စံ နီစံ အန္တော အန္တရာ အဇ္ဈတ္တံ ဗဟိဒ္ဓါ ဗာဟိရာ ဗာဟိရံ ဗဟိ ဩရံ ပါရံ အာရာ အာရကာ ပစ္ဆာ ပုရေ ဟုရံ ပေစ္စ ဣစ္စေတေ သတ္တမိယာ။

သမ္ပတိ အာယတိ အဇ္ဇ အပရဇ္ဇု ပရဇ္ဇ သုဝေ သွေ ပရသုဝေ ဟိယျော ပရေ သဇ္ဇု သာယံ ပါတော ကာလံ ကလ္လံ ဒိဝါ နတ္တံ နိစ္စံ သတတံ အဘိဏှံ အဘိက္ခဏံ မုဟုံ မုဟုတ္တံ ဘူတပုဗ္ဗံ ပုရာ ယဒါ တဒါ ကဒါ ဣစ္စာဒယော ကာလသတ္တမိယာ။ ဣတိ ဝိဘတ္တိယုတ္တာနိ။

အဝိဘတ္တိယုတ္တေသု စ အပ္ပေဝ အပ္ပေဝနာမ နု ဣစ္စေတေ သံသယတ္ထေ။

အဒ္ဓါ အညဒတ္ထု တဂ္ဃ ဇာတု ကာမံ သသက္ကံဣစ္စေတေ ဧကံသတ္ထေ။

ကစ္စိနု’ကိန္နုနနုကထံ ကိံသု ကိံဣစ္စေတေ ပုစ္ဆနတ္ထေ။

ဧဝံ ဣတိ ဣတ္ထံ ဣစ္စေတေ နိဒဿနေ။

ယာဝ တာဝ ယာဝတာ တာဝတာ ကိတ္တာဝတာ ဧတ္တာဝတာ ကီဝ ဣစ္စေတေ ပရိစ္ဆေဒနတ္ထေ။

ဧဝံ သာဟု လဟု ဩပါယိကံ ပတိရူပံ အာမ သာဓု ဣတိ သမ္ပဋိစ္ဆနတ္ထေ။

ယထာ တထာ ယထေဝ တထေဝ ဧဝံ ဧဝမေဝ ဧဝမေဝံ ဧဝမ္ပိ ယထာပိ သေယျထာပိ သေယျထာပိနာမ ဝိယ ဣဝ ယထရိဝ တထရိဝ ယထာနာမ တထာနာမ ယထာဟိ တထာဟိ ယထာစတထာစ ဣစ္စေတေ ပဋိဘာဂတ္ထေ။

ယထာဣတိ ¶ ယောဂ္ဂတာ ဝိစ္ဆာ ပဒတ္ထာနတိဝတ္တနိဒဿနေသု စ။

အဟောဣတိ ဂရဟ ပသံသန ပတ္ထနေသု စ။

နာမဣတိ ဂရဟ ပသံသန သညာ ပဉှေသု စ။

ဣင်္ဃ ဟန္ဒ ဣစ္စေတေ စောဒနတ္ထေ။

သာဓု သုဋ္ဌု ဧဝမေတန္တိ အနုမောဒနေ။

နူနဣတိ အနုမာနာ’နုဿရဏ ပရိဝိတက္ကနေသု။

ယသ္မာ တသ္မာ တထာဟိ တေန ဣစ္စေတေ ကာရဏစ္ဆေဒနတ္ထေ။

သဟ သဒ္ဓိံ သမံ အမာဣတိ သမကြိယာယံ။

ဓာ က္ခတ္တုံ သကိဉ္စ သင်္ချာဝိဘာဂေ။

ခိပ္ပံ အရံ လဟု အာသုံ တုဏ္ဏံ အစိရံ သီဃတ္ထေ။

တုန တွာန တွာပစ္စယန္တာ ဥဿုက္ကနတ္ထေ ဘဝန္တိ။

ယထာ – ပဿိတုန ပဿိယ ပဿိတွာန ပဿိတွာ ဒိသွာ ဒိသွာနဒဿေတွာ ဒါတုန ဒတွာန ဒတွာ ဥပါဒါယ ဒါပေတွာ ဝိညာပေတွာ ဝိစေယျ ဝိနေယျ နိဟစ္စ သမေစ္စ အပေစ္စ ဥပေစ္စ အာရဗ္ဘ အာဂမ္မ ဣစ္စာဒိ။

ဧဝံ နာမာချာတောပသဂ္ဂဝိနိမုတ္တံ ယဒဗျယလက္ခဏံ၊ တံ သဗ္ဗံ နိပါတပဒန္တိ ဝေဒိတဗ္ဗံ။

‘‘မုတ္တံ ပဒတ္တယာ ယသ္မာ၊ တသ္မာ နိပတတျန္တရာ၊

နေပါတိကန္တိ တံ ဝုတ္တံ၊ ယံ အဗျယ သလက္ခဏ’’န္တိ။

ပုလ္လိင်္ဂံ ဣတ္ထိလိင်္ဂဉ္စ၊ နပုံသကမထာပရံ၊

တိလိင်္ဂဉ္စ အလိင်္ဂဉ္စ၊ နာမိကံ ပဉ္စဓာ ဌိတံ။

ဣတိ ပဒရူပသိဒ္ဓိယံ နာမကဏ္ဍော ဒုတိယော။