📜

၄။ သမာသကဏ္ဍ

အထ နာမမေဝ အညမညသမ္ဗန္ဓီနံ သမာသောတိ နာမနိဿိတတ္တာ၊ သယဉ္စ နာမိကတ္တာ နာမာနန္တရံ သမာသော ဝုစ္စတေ။

သော စ သညာဝသေန ဆဗ္ဗိဓော အဗျယီဘာဝေါ ကမ္မဓာရယော ဒိဂု တပ္ပုရိသော ဗဟုဗ္ဗီဟိ ဒွန္ဒော စာတိ။

အဗျယီဘာဝသမာသ

တတြ ပဌမံ အဗျယီဘာဝသမာသော ဝုစ္စတေ၊

သော စ နိစ္စသမာသောတိ အဿပဒဝိဂ္ဂဟော။

‘‘ဥပနဂရံ’’ဣတီဓ – ဥပသဒ္ဒတော ပဌမေကဝစနံ သိ၊ တဿ ဥပသဂ္ဂပရတ္တာ ‘‘သဗ္ဗာသမာဝုသောပသဂ္ဂနိပါတာဒီဟိ စာ’’တိ လောပေါ၊ နဂရသဒ္ဒတော ဆဋ္ဌေကဝစနံ သ၊ နဂရဿ သမီပန္တိ အညပဒေန ဝိဂ္ဂဟေ –

‘‘နာမာနံ သမာသော ယုတ္တတ္ထော’’တိ သမာသဝိဓာနေ သဗ္ဗတ္ထ ဝတ္တတေ။

၃၃၀။ ဥပသဂ္ဂနိပါတပုဗ္ဗကော အဗျယီဘာဝေါ။

ဥပသဂ္ဂပုဗ္ဗကော၊ နိပါတပုဗ္ဗကော စ နာမိကော ယုတ္တတ္ထော တေဟေဝ အတ္တပုဗ္ဗကေဟိ ဥပသဂ္ဂနိပါတေဟိ သဟ နိစ္စံ သမသီယတေ၊ သော စ သမာသော အဗျယီဘာဝသညော ဟောတိ။ ဣဓ အဗျယီဘာဝါဒိသညာဝိဓာယကသုတ္တာနေဝ ဝါ သညာဝိဓာနမုခေန သမာသဝိဓာယကာနီတိ ဒဋ္ဌဗ္ဗာနိ။

တတ္ထ အဗျယမိတိ ဥပသဂ္ဂနိပါတာနံ သညာ၊ လိင်္ဂဝစနဘေဒေပိ ဗျယရဟိတတ္တာ၊ အဗျယာနံ အတ္ထံ ဝိဘာဝယတီတိ အဗျယီဘာဝေါ အဗျယတ္ထပုဗ္ဗင်္ဂမတ္တာ၊ အနဗျယံ အဗျယံ ဘဝတီတိ ဝါ ¶ အဗျယီဘာဝေါ။ ပုဗ္ဗပဒတ္ထပ္ပဓာနော ဟိ အဗျယီဘာဝေါ၊ ဧတ္ထ စ ‘‘ဥပသဂ္ဂနိပါတပုဗ္ဗကော’’တိ ဝုတ္တတ္တာ ဥပသဂ္ဂနိပါတာနမေဝ ပုဗ္ဗနိပါတော။

၃၃၁။ နာမာနံ သမာသော ယုတ္တတ္ထော။

တေသံ နာမာနံ ပယုဇ္ဇမာနပဒတ္ထာနံ ယော ယုတ္တတ္ထော၊ သော သမာသသညော ဟောတိ၊ တဒညံ ဝါကျမိတိ ရုဠှံ။

နာမာနိ သျာဒိဝိဘတျန္တာနိ၊ သမဿတေတိ သမာသော၊ သင်္ခိပိယတီတိ အတ္ထော။

ဝုတ္တဉှိ

‘‘သမာသော ပဒသင်္ခေပေါ၊ ပဒပ္ပစ္စယသံဟိတံ၊

တဒ္ဓိတံ နာမ ဟောတေဝံ၊ ဝိညေယျံ တေသမန္တရ’’န္တိ။

ဒုဝိဓဉ္စဿ သမသနံ သဒ္ဒသမသနမတ္ထသမသနဉ္စ၊ တဒုဘယမ္ပိ လုတ္တသမာသေ ပရိပုဏ္ဏမေဝ လဗ္ဘတိ။ အလုတ္တသမာသေ ပန အတ္ထသမသနမေဝ ဝိဘတ္တိလောပါဘာဝတော၊ တတ္ထာပိ ဝါ ဧကပဒတ္တူပဂမနတော ဒုဝိဓမ္ပိ လဗ္ဘတေဝ။ ဒွေ ဟိ သမာသဿ ပယောဇနာနိ ဧကပဒတ္တမေကဝိဘတ္တိတ္တဉ္စာတိ။

ယုတ္တော အတ္ထော ယုတ္တတ္တော၊ အထ ဝါ ယုတ္တော သင်္ဂတော၊ သမ္ဗန္ဓော ဝါ အတ္ထော ယဿ သောယံ ယုတ္တတ္ထော၊ ဧတေန သင်္ဂတတ္ထေန ယုတ္တတ္ထဝစနေန ဘိန္နတ္ထာနံ ဧကတ္ထီဘာဝေါ သမာသလက္ခဏန္တိ ဝုတ္တံ ဟောတိ။ ဧတ္ထ စ ‘‘နာမာန’’န္တိ ဝစနေန ‘‘ဒေဝဒတ္တော ပစတီ’’တိအာဒီသု အာချာတေန သမာသော န ဟောတီတိ ဒဿေတိ။ သမ္ဗန္ဓတ္ထေန ပန ယုတ္တတ္ထဂ္ဂဟဏေန ‘‘ဘဋော ရညော ပုတ္တော ဒေဝဒတ္တဿာ’’တိအာဒီသု အညမညာနပေက္ခေသု၊ ‘‘ဒေဝဒတ္တဿ ကဏှာ ဒန္တာ’’တိအာဒီသု စ အညသာပေက္ခေသု ¶ အယုတ္တတ္ထတာယ သမာသော န ဟောတီတိ ဒီပေတိ။

‘‘အတ္ထဝသာ ဝိဘတ္တိဝိပရိဏာမော’’တိ ဝိပရိဏာမေန ‘‘ယုတ္တတ္ထာန’’န္တိ ဝတ္တတေ။

၃၃၂။ တေသံ ဝိဘတ္တိယော လောပါ စ။

ဣဓ ပဒန္တရေန ဝါ တဒ္ဓိတပ္ပစ္စယေဟိ ဝါ အာယာဒိပ္ပစ္စယေဟိ ဝါ ဧကတ္ထီဘူတာ ယုတ္တတ္ထာ နာမ၊ တေန ‘‘တေသံ ယုတ္တတ္ထာနံ သမာသာနံ၊ တဒ္ဓိတာယာဒိပ္ပစ္စယန္တာနဉ္စ ဝိဘတ္တိယော လောပနီယာ ဟောန္တီ’’တိ အတ္ထော။ သမာသဂ္ဂဟဏာဓိကာရေ ပန သတိ တေသံဂဟဏေန ဝါ တဒ္ဓိတာယာဒိပ္ပစ္စယန္တ ဝိဘတ္တိလောပေါ။ စဂ္ဂဟဏံ ‘‘ပဘင်္ကရော’’တိအာဒီသု လောပနိဝတ္တနတ္ထံ။

ဝိပရိဏာမေန ‘‘လုတ္တာသု၊ ဝိဘတ္တီသူ’’တိ ဝတ္တတေ၊ ယုတ္တတ္ထဂ္ဂဟဏဉ္စ။

၃၃၃။ ပကတိ စဿ သရန္တဿ။

လုတ္တာသု ဝိဘတ္တီသု သရန္တဿ အဿ ယုတ္တတ္ထဘူတဿ တိဝိဓဿပိ လိင်္ဂဿ ပကတိဘာဝေါ ဟောတိ။ စသဒ္ဒေန ကိံသမုဒယ ဣဒပ္ပစ္စယတာဒီသု နိဂ္ဂဟီတန္တဿပိ။ နိမိတ္တာဘာဝေ နေမိတ္တကာဘာဝဿ ဣဓ အနိစ္ဆိတတ္တာ အယမတိဒေသော။

သကတ္ထဝိရဟေနိဓ သမာသဿ စ လိင်္ဂဘာဝါဘာဝါ ဝိဘတ္တုပ္ပတ္တိယမသမ္ပတ္တာယံ နာမဗျပဒေသာတိဒေသမာဟ။

၃၃၄။ တဒ္ဓိတသမာသကိတကာ နာမံဝါ’တဝေတုနာဒီသု စ။

တဒ္ဓိတန္တာ ¶ ၊ ကိတန္တာ၊ သမာသာ စ နာမမိဝ ဒဋ္ဌဗ္ဗာ တဝေတုန တွာန တွာဒိပ္ပစ္စယန္တေ ဝဇ္ဇေတွာ။ စဂ္ဂဟဏံ ကိစ္စပ္ပစ္စယအာဤဣနီဣတ္ထိပ္ပစ္စယန္တာဒိဿပိ နာမဗျပဒေသတ္ထံ။ ဣဓ သမာသဂ္ဂဟဏံ အတ္ထဝတံ သမုဒါယာနံ နာမဗျပဒေသော သမာသဿေဝါတိ နိယမတ္ထန္တိ အပရေ။

‘‘အဗျယီဘာဝေါ’’တိ ဝတ္တတေ။

၃၃၅။ သော နပုံသကလိင်္ဂေါ။

သော အဗျယီဘာဝသမာသော နပုံသကလိင်္ဂေါဝ ဒဋ္ဌဗ္ဗောတိ နပုံသကလိင်္ဂတ္တံ။ ဧတ္ထ ဟိ သတိပိ လိင်္ဂါတိဒေသေ ‘‘အဓိပည’’န္တိအာဒီသု ‘‘အဓိဉာဏံ’’န္တိအာဒိ ရူပပ္ပသင်္ဂေါ န ဟောတိ သဒ္ဒန္တရတ္တာ၊ ‘‘တိပည’’န္တိအာဒီသု ဝိယာတိ ဒဋ္ဌဗ္ဗံ၊ န စာယံ အတိဒေသော၊ သုတ္တေ အတိဒေသလိင်္ဂဿ ဣဝသဒ္ဒဿ အဒဿနတော။ ပုရေ ဝိယ သျာဒျုပ္ပတ္တိ။

‘‘ကွစီ’’တိ ဝတ္တတေ။

၃၃၆။ အံ ဝိဘတ္တီနမကာရန္တာ အဗျယီဘာဝါ။

တသ္မာ အကာရန္တာ အဗျယီဘာဝါ ပရာသံ ဝိဘတ္တီနံ ကွစိ အံ ဟောတိ၊ သေသံ နေယျံ။

တံ ဥပနဂရံ၊ နဂရဿ သမီပံ တိဋ္ဌတီတိ အတ္ထော။ တာနိ ဥပနဂရံ၊ အာလပနေပေဝံ၊ တံ ဥပနဂရံ ပဿ၊ တာနိ ဥပနဂရံ။

န ပဉ္စမျာယမမ္ဘာဝေါ၊ ကွစီတိ အဓိကာရတော၊

တတိယာသတ္တမီဆဋ္ဌီ-နန္တု ဟောတိ ဝိကပ္ပတော။

တေန ဥပနဂရံ ကတံ၊ ဥပနဂရေန ဝါ၊ တေဟိ ဥပနဂရံ၊ ဥပနဂရေဟိ ဝါ၊ တဿ ဥပနဂရံ ဒေဟိ၊ တေသံ ဥပနဂရံ၊ ဥပနဂရာ အာနယ၊ ဥပနဂရမှာ ဥပနဂရသ္မာ၊ ဥပနဂရေဟိ၊ ဥပနဂရံ သန္တကံ၊ ဥပနဂရဿ ဝါ၊ တေသံ ဥပနဂရံ၊ ဥပနဂရာနံ ဝါ ¶ ၊ ဥပနဂရံ နိဓေဟိ၊ ဥပနဂရမှိ ဥပနဂရသ္မိံ၊ ဥပနဂရံ ဥပနဂရေသု ဝါ။ ဧဝံ ဥပကုမ္ဘံ။

အဘာဝေ – ဒရထာနံ အဘာဝေါ နိဒ္ဒရထံ၊ နိမ္မသကံ။

ပစ္ဆာအတ္ထေ – ရထဿ ပစ္ဆာ အနုရထံ၊ အနုဝါတံ။

ယောဂ္ဂတာယံ – ယထာသရူပံ၊ အနုရူပံ၊ ရူပယောဂ္ဂန္တိ အတ္ထော။

ဝိစ္ဆာယံ – အတ္တာနမတ္တာနံ ပတိ ပစ္စတ္တံ၊ အဒ္ဓမာသံ အဒ္ဓမာသံ အနု အနွဒ္ဓမာသံ။

အနုပုဗ္ဗိယံ – ဇေဋ္ဌာနံ အနုပုဗ္ဗော အနုဇေဋ္ဌံ။

ပဋိလောမေ – သောတဿ ပဋိလောမံ ပဋိသောတံ၊ ပဋိပထံ၊ ပတိဝါတံ၊ အတ္တာနံ အဓိကိစ္စ ပဝတ္တာ အဇ္ဈတ္တံ။

ပရိယာဒါဘိဝိဓီသု အာပါဏကောဋိယာ အာပါဏကောဋိကံ၊ ‘‘ကွစိ သမာသန္တဂတာနမကာရန္တော’’တိ ကပ္ပစ္စယော၊ အာကုမာရေဟိ ယသော ကစ္စာယနဿ အာကုမာရံ။

သမိဒ္ဓိယံ – ဘိက္ခာယ သမိဒ္ဓီတိ အတ္ထေ သမာသေဝ နပုံသကလိင်္ဂတ္တေ စ ကတေ –

‘‘သမာသဿ၊ အန္တော’’တိ စ ဝတ္တတေ။

၃၃၇။ သရော ရဿော နပုံသကေ။

နပုံသကေ ဝတ္တမာနဿ သမာသဿ အန္တော သရော ရဿော ဟောတိ။ ဧတ္ထ စ အဗျယီဘာဝဂ္ဂဟဏံ နာနုဝတ္တေတဗ္ဗံ၊ တေန ဒိဂုဒွန္ဒဗဟုဗ္ဗီဟီသုပိ နပုံသကေ ဝတ္တမာနဿ သမာသန္တဿရဿ ရဿတ္တံ သိဒ္ဓံ ဟောတိ။ ‘‘အံ ဝိဘတ္တီန’’မိစ္စာဒိနာ အမာဒေသော၊ သုဘိက္ခံ။ ဂင်္ဂါယ သမီပေ ဝတ္တတီတိ ဥပဂင်္ဂံ၊ မဏိကာယ သမီပံ ဥပမဏိကံ။

ဣတ္ထီသု ¶ အမိကိစ္စာတိ အတ္ထေ သမာသနပုံသကရဿတ္တာဒီသု ကတေသု –

‘‘အဗျယီဘာဝါ၊ ဝိဘတ္တီန’’န္တိ စ ဝတ္တတေ။

၃၃၈။ အညသ္မာ လောပေါ စ။

အကာရန္တတော အညသ္မာ အဗျယီဘာဝသမာသာ ပရာသံ ဝိဘတ္တီနံ လောပေါ စ ဟောတိ။ အဓိတ္တိ၊ ဣတ္ထီသု အဓိကိစ္စ ကထာ ပဝတ္တတီတိ အတ္ထော။ အဓိတ္ထိ ပဿ၊ အဓိတ္ထိ ကတံ ဣစ္စာဒိ၊ ဧဝံ အဓိကုမာရိ၊ ဝဓုယာ သမီပံ ဥပဝဓု၊ ဂုန္နံ သမီပံ ဥပဂု၊ ဩကာရဿ ရဿတ္တံ ဥကာရော။ ဧဝံ ဥပသဂ္ဂပုဗ္ဗကော။

နိပါတပုဗ္ဗကော ယထာ – ဝုဍ္ဎာနံ ပဋိပါဋိ၊ ယေ ယေ ဝုဍ္ဎာ ဝါ ယထာဝုဍ္ဎံ၊ ပဒတ္ထာနတိက္ကမေ – ယထာက္ကမံ၊ ယထာသတ္တိ၊ ယထာဗလံ ကရောတိ၊ ဗလမနတိက္ကမိတွာ ကရောတီတိ အတ္ထော။ ဇီဝဿ ယတ္တကော ပရိစ္ဆေဒေါ ယာဝဇီဝံ၊ ယာဝတာယုကံ၊ ကပ္ပစ္စယော။ ယတ္တကေန အတ္ထော ယာဝဒတ္ထံ၊ ပဗ္ဗတဿ ပရဘာဂေါ တိရောပဗ္ဗတံ၊ တိရောပါကာရံ၊ တိရောကုဋ္ဋံ၊ ပါသာဒဿ အန္တော အန္တောပါသာဒံ၊ အန္တောနဂရံ၊ အန္တောဝဿံ၊ နဂရဿ ဗဟိ ဗဟိနဂရံ၊ ပါသာဒဿ ဥပရိ ဥပရိပါသာဒံ၊ ဥပရိမဉ္စံ၊ မဉ္စဿ ဟေဋ္ဌာ ဟေဋ္ဌာမဉ္စံ၊ ဟေဋ္ဌာပါသာဒံ၊ ဘတ္တဿ ပုရေ ပုရေဘတ္တံ၊ ဧဝံ ပစ္ဆာဘတ္တံ။

သာကလ္လတ္ထေ – သဟ မက္ခိကာယ သမက္ခိကံ ဘုဉ္ဇတိ၊ န ကိဉ္စိ ပရိဝဇ္ဇေတီတိ အတ္ထော။ ‘‘တေသု ဝုဒ္ဓီ’’တိအာဒိနာ သဟသဒ္ဒဿ သာဒေသော။ ဂင်္ဂါယ ဩရံ ဩရဂင်္ဂမိစ္စာဒိ။

အဗျယီဘာဝသမာသော နိဋ္ဌိတော။

ကမ္မဓာရယသမာသ

အထ ¶ ကမ္မဓာရယသမာသော ဝုစ္စတေ။

သော စ နဝဝိဓော ဝိသေသနပုဗ္ဗပဒေါ ဝိသေသနုတ္တရပဒေါ ဝိသေသနောဘယပဒေါ ဥပမာနုတ္တရပဒေါ သမ္ဘာဝနာပုဗ္ဗပဒေါ အဝဓာရဏပုဗ္ဗပဒေါ နနိပါတပုဗ္ဗပဒေါ ကုပုဗ္ဗပဒေါ ပါဒိပုဗ္ဗပဒေါ စာတိ။

တတ္ထ ဝိသေသနပုဗ္ဗပဒေါ တာဝ – ‘‘မဟန္တ ပုရိသ’’ဣတီဓ ဥဘယတ္ထ ပဌမေကဝစနံ သိ၊ တုလျာဓိကရဏဘာဝပ္ပသိဒ္ဓတ္ထံ စသဒ္ဒ တသဒ္ဒပ္ပယောဂေါ၊ မဟန္တော စ သော ပုရိသော စာတိ ဝိဂ္ဂဟေ –

ဣတော ပရံ ‘‘ဝိဘာသာ ရုက္ခတိဏ’’ဣစ္စာဒိတော ‘‘ဝိဘာသာ’’တိ သမာသဝိဓာနေ သဗ္ဗတ္ထ ဝတ္တတေ။

၃၃၉။ ဒွိပဒေ တုလျာဓိကရဏေ ကမ္မဓာရယော။

ဒွေ ပဒါနိ နာမိကာနိ တုလျာဓိကရဏာနိ အညမညေန သဟ ဝိဘာသာ သမသျန္တေ၊ တသ္မိံ ဒွိပဒေ တုလျာဓိကရဏေ သတိ သော သမာသော ကမ္မဓာရယသညော စ ဟောတိ။

ဒွေ ပဒါနိ ဒွိပဒံ၊ တုလျံ သမာနံ အဓိကရဏံ အတ္ထော ယဿ ပဒဒွယဿ တံ တုလျာဓိကရဏံ၊ တသ္မိံ ဒွိပဒေ တုလျာဓိကရဏေ။ ဘိန္နပ္ပဝတ္တိနိမိတ္တာနံ ဒွိန္နံ ပဒါနံ ဝိသေသနဝိသေသိတဗ္ဗဘာဝေန ဧကသ္မိံ အတ္ထေ ပဝတ္တိ တုလျာဓိကရဏတာ။ ကမ္မမိဝ ဒွယံ ဓာရယတီတိ ကမ္မဓာရယော။ ယထာ ဟိ ကမ္မံ ကြိယဉ္စ ပယောဇနဉ္စ ဒွယံ ဓာရယတိ၊ ကမ္မေ သတိ ကြိယာယ၊ ပယောဇနဿ စ သမ္ဘဝတော၊ တထာ အယံ သမာသော ဧကဿ အတ္ထဿ ဒွေ နာမာနိ ဓာရယတိ၊ တသ္မိံ သမာသေ သတိ ဧကတ္ထဇောတကဿ နာမဒွယဿ သမ္ဘဝတော။

ပုရေ ¶ ဝိယ သမာသသညာဝိဘတ္တိလောပပကတိဘာဝါ၊ သမာသေနေဝ တုလျာဓိကရဏဘာဝဿ ဝုတ္တတ္တာ ‘‘ဝုတ္တတ္ထာနမပ္ပယောဂေါ’’တိ စသဒ္ဒ တသဒ္ဒါနမပ္ပယောဂေါ။

၃၄၀။ မဟတံ မဟာ တုလျာဓိကရဏေ ပဒေ။

မဟန္တ သဒ္ဒဿ မဟာ ဟောတိ တုလျာဓိကရဏေ ဥတ္တရပဒေ ပရေ။ မဟတန္တိ ဗဟုဝစနဂ္ဂဟဏေန ကွစိ မဟအာဒေသော စ၊ ဧတ္ထ စ ဝိသေသနဿ ပုဗ္ဗနိပါတော ဝိသေသနဘူတဿ ပုဗ္ဗပဒဿ မဟာဒေသဝိဓာနတောဝ ဝိညာယတိ။

‘‘ကမ္မဓာရယော၊ ဒိဂူ’’တိ စ ဝတ္တတေ။

၃၄၁။ ဥဘေ တပ္ပုရိသာ။

ဥဘေ ကမ္မဓာရယဒိဂုသမာသာ တပ္ပုရိသသညာ ဟောန္တိ။

တဿ ပုရိသော တပ္ပုရိသော၊ တပ္ပုရိသသဒိသတ္တာ အယမ္ပိ သမာသော အနွတ္ထသညာယ တပ္ပုရိသောတိ ဝုတ္တော။ ယထာ ဟိ တပ္ပုရိသသဒ္ဒေါ ဂုဏမတိဝတ္တော၊ တထာ အယံ သမာသောပိ။ ဥတ္တရပဒတ္ထပ္ပဓာနော ဟိ တပ္ပုရိသောတိ။ တတော နာမဗျပဒေသော သျာဒျုပ္ပတ္တိ။ အယံ ပန တပ္ပုရိသော အဘိဓေယျဝစနော၊ ပရလိင်္ဂေါ စ။

မဟာပုရိသော၊ မဟာပုရိသာ ဣစ္စာဒိ ပုရိသသဒ္ဒသမံ၊ ဧဝံ မဟာဝီရော၊ မဟာမုနိ၊ မဟန္တဉ္စ တံ ဗလဉ္စာတိ မဟာဗလံ၊ မဟဗ္ဘယံ၊ မဟအာဒေသော။ သန္တော စ သော ပုရိသော စာတိ သပ္ပုရိသော၊ ‘‘သန္တသဒ္ဒဿ သော ဘေ ဗော စန္တေ’’တိ ဧတ္ထ စသဒ္ဒေန သန္တသဒ္ဒဿ သမာသေ အဘကာရေပိ သာဒေသော၊ တထာ ပုဗ္ဗပုရိသော၊ ပရပုရိသော၊ ပဌမပုရိသော၊ မဇ္ဈိမပုရိသော၊ ဥတ္တမပုရိသော၊ ဒန္တပုရိသော၊ ပရမပုရိသော၊ ဝီရပုရိသော၊ သေတဟတ္ထီ၊ ကဏှသပ္ပော၊ နီလုပ္ပလံ၊ လောဟိတစန္ဒနံ။

ကွစိ ¶ ဝိဘာသာဓိကာရတော န ဘဝတိ၊ ယထာ – ပုဏ္ဏော မန္တာနိပုတ္တော၊ စိတ္တော ဂဟပတိ၊ သက္ကော ဒေဝရာဇာတိ။

ပုမာ စ သော ကောကိလော စာတိ အတ္ထေ သမာသေ ကတေ –

‘‘လောပ’’န္တိ ဝတ္တတေ။

၃၄၂။ ပုမဿ လိင်္ဂါဒီသု သမာသေသု။

ပုမဣစ္စေတဿ အန္တော အကာရော လောပမာပဇ္ဇတေ လိင်္ဂါဒီသု ပရပဒေသု သမာသေသု၊ ‘‘အံမော နိဂ္ဂဟီတံ ဈလပေဟီ’’တိ မကာရဿ နိဂ္ဂဟီတံ။ ပုင်္ကောကိလော။ ဧဝံ ပုန္နာဂေါ။

ခတ္တိယာ စ သာ ကညာ စာတိ ဝိဂ္ဂယှ သမာသေ ကတေ –

‘‘တုလျာဓိကရဏေ၊ ပဒေ၊ ဣတ္ထိယံ ဘာသိတပုမိတ္ထီ ပုမာဝ စေ’’တိ စ ဝတ္တတေ။

၃၄၃။ ကမ္မဓာရယသညေ စ။

ကမ္မဓာရယသညေ စ သမာသေ ဣတ္ထိယံ ဝတ္တမာနေ တုလျာဓိကရဏေ ဥတ္တရပဒေ ပရေ ပုဗ္ဗဘူတော ဣတ္ထိဝါစကော သဒ္ဒေါ ပုဗ္ဗေ ဘာသိတပုမာ စေ၊ သော ပုမာ ဣဝ ဒဋ္ဌဗ္ဗောတိ ပုဗ္ဗပဒေ ဣတ္ထိပ္ပစ္စယဿ နိဝတ္တိ ဟောတိ။

ခတ္တိယကညာ၊ ခတ္တိယကညာယော ဣစ္စာဒိ။ ဧဝံ ရတ္တလတာ၊ ဒုတိယဘိက္ခာ၊ ဗြာဟ္မဏီ စ သာ ဒါရိကာ စာတိ ဗြာဟ္မဏဒါရိကာ၊ နာဂမာဏဝိကာ။

ပုဗ္ဗပဒဿေဝါယံ ပုမ္ဘာဝါတိဒေသော၊ တေန ‘‘ခတ္တိယကုမာရီ ကုမာရသမဏီ တရုဏဗြာဟ္မဏီ’’တိအာဒီသု ဥတ္တရပဒေသု ဣတ္ထိပ္ပစ္စယဿ န နိဝတ္တိ ဟောတိ။

ဣတ္ထိယမိစ္စေဝ ¶ ကိံ? ကုမာရီရတနံ၊ သမဏီပဒုမံ။

ဘာသိတပုမာတိ ကိံ? ဂင်္ဂါနဒီ၊ တဏှာနဒီ၊ ပထဝီဓာတု။ ‘‘နန္ဒာပေါက္ခရဏီ၊ နန္ဒာဒေဝီ’’တိအာဒီသု ပန သညာသဒ္ဒတ္တာ န ဟောတိ။

တထာ ပုရတ္ထိမော စ သော ကာယော စာတိ ပုရတ္ထိမကာယော၊ ဧတ္ထ စ ကာယေကဒေသော ကာယသဒ္ဒေါ။ ဧဝံ ပစ္ဆိမကာယော၊ ဟေဋ္ဌိမကာယော၊ ဥပရိမကာယော၊ သဗ္ဗကာယော၊ ပုရာဏဝိဟာရော၊ နဝါဝါသော၊ ကတရနိကာယော၊ ကတမနိကာယော၊ ဟေတုပ္ပစ္စယော၊ အဗဟုလံ ဗဟုလံ ကတန္တိ ဗဟုလီကတံ၊ ဇီဝိတပ္ပဓာနံ နဝကံ ဇီဝိတနဝကံ ဣစ္စာဒိ။

ဝိသေသနုတ္တရပဒေ ဇိနဝစနာနုပရောဓတော ထေရာစရိယပဏ္ဍိတာဒိ ဝိသေသနံ ပရဉ္စ ဘဝတိ။ ယထာ – သာရိပုတ္တော စ သော ထေရော စာတိ သာရိပုတ္တတ္ထေရော။ ဧဝံ မဟာမောဂ္ဂလ္လာနတ္ထေရော၊ မဟာကဿပတ္ထေရော၊ ဗုဒ္ဓဃောသာစရိယော၊ ဓမ္မပါလာစရိယော၊ အာစရိယဂုတ္တိလောတိ ဝါ၊ မဟောသဓော စ သော ပဏ္ဍိတော စာတိ မဟောသဓပဏ္ဍိတော။ ဧဝံ ဝိဓုရပဏ္ဍိတော၊ ဝတ္ထုဝိသေသော။

ဝိသေသနောဘယပဒေါ ယထာ – သီတဉ္စ တံ ဥဏှဉ္စာတိ သီတုဏှံ၊ သိနိဒ္ဓါ စ သော ဥဏှော စာတိ သိနိဒ္ဓုဏှော၊ မာသော။ ခဉ္ဇော စ သော ခုဇ္ဇော စာတိ ခဉ္ဇခုဇ္ဇော။ ဧဝံ အန္ဓဗဓိရော၊ ကတာကတံ၊ ဆိဒ္ဒါဝဆိဒ္ဒံ၊ ဥစ္စာဝစံ၊ ဆိန္နဘိန္နံ၊ သိတ္တသမ္မဋ္ဌံ၊ ဂတပစ္စာဂတံ။

ဥပမာနုတ္တရပဒေ အဘိဓာနာနုရောဓတော ဥပမာနဘူတံ ဝိသေသနံ ပရံ ဘဝတိ။ ယထာ – သီဟော ဝိယ သီဟော၊ မုနိ စ သော သီဟော စာတိ မုနိသီဟော။ ဧဝံ မုနိဝသဘော၊ မုနိပုင်္ဂဝေါ၊ ဗုဒ္ဓနာဂေါ၊ ဗုဒ္ဓါဒိစ္စော၊ ရံသိ ဝိယ ရံသိ၊ သဒ္ဓမ္မော စ ¶ သော ရံသိ စာတိ သဒ္ဓမ္မရံသိ။ ဧဝံ ဝိနယသာဂရော၊ ပုဏ္ဍရီကမိဝ ပုဏ္ဍရီကော၊ သမဏော စ သော ပုဏ္ဍရီကော စာတိ သမဏပုဏ္ဍရီကော၊ သမဏပဒုမော။ စန္ဒော ဝိယ စန္ဒော၊ မုခဉ္စ တံ စန္ဒော စာတိ မုခစန္ဒော။ ဧဝံ မုခပဒုမံ ဣစ္စာဒိ။

သမ္ဘာဝနာပုဗ္ဗပဒေါ ယထာ – ဓမ္မော ဣတိ ဗုဒ္ဓိ ဓမ္မဗုဒ္ဓိ။ ဧဝံ ဓမ္မသညာ၊ ဓမ္မသင်္ခါတော၊ ဓမ္မသမ္မတော၊ ပါဏသညိတာ၊ အသုဘသညာ၊ အနိစ္စသညာ၊ အနတ္တသညာ၊ ဓာတုသညာ၊ ဓီတုသညာ၊ အတ္တသညာ၊ အတ္ထိသညာ၊ အတ္တဒိဋ္ဌိ ဣစ္စာဒိ။

အဝဓာရဏပုဗ္ဗပဒေါ ယထာ – ဂုဏော ဧဝ ဓနံ ဂုဏဓနံ။ ဧဝံ သဒ္ဓါဓနံ၊ သီလဓနံ၊ ပညာဓနံ၊ စက္ခု ဧဝ ဣန္ဒြိယံ စက္ခုန္ဒြိယံ။ ဧဝံ စက္ခာယတနံ၊ စက္ခုဓာတု၊ စက္ခုဒွါရံ၊ ရူပါရမ္မဏမိစ္စာဒိ။

နနိပါတပုဗ္ဗပဒေါ ယထာ – န ဗြာဟ္မဏောတိ အတ္ထေ ကမ္မဓာရယသမာသေ၊ ဝိဘတ္တိလောပါဒိမှိ စ ကတေ –

‘‘ဥဘေ တပ္ပုရိသာ’’တိ တပ္ပုရိသသညာ။

၃၄၄။ အတ္တံ နဿ တပ္ပုရိသေ။

နဿ နိပါတပဒဿ တပ္ပုရိသေ ဥတ္တရပဒေ ပရေ သဗ္ဗဿေဝ အတ္တံ ဟောတိ။ တပ္ပုရိသေကဒေသတ္တာ တပ္ပုရိသော၊ အဗြာဟ္မဏော။

န နိသေဓော သတော ယုတ္တော၊

ဒေသာဒိနိယမံ ဝိနာ၊

အသတော စာဖလော တသ္မာ၊

ကထမဗြာဟ္မဏောတိ စေ?

နိသေဓတ္ထာနုဝါဒေန၊ ပဋိသေဓဝိဓိ ကွစိ၊

ပရဿ မိစ္ဆာဉာဏတ္တာ-ချာပနာယောပပဇ္ဇတေ။

ဒုဝိဓော စဿတ္ထော ပသဇ္ဇပ္ပဋိသေဓပရိယုဒါသဝသေန။

တတ္ထ ¶ ယော ‘‘အသူရိယပဿာ ရာဇဒါရာ’’တိအာဒီသု ဝိယ ဥတ္တရပဒတ္ထဿ သဗ္ဗထာ အဘာဝံ ဒီပေတိ၊ သော ပသဇ္ဇပ္ပဋိသေဓဝါစီ နာမ။ ယော ပန ‘‘အဗြာဟ္မဏ အမနုဿာ’’တိအာဒီသု ဝိယ ဥတ္တရပဒတ္ထံ ပရိယုဒါသိတွာ တံသဒိသေ ဝတ္ထုမှိ ကာရိယံ ပဋိပါဒယတိ၊ သော ပရိယုဒါသဝါစီ နာမ။

ဝုတ္တဉ္စ

‘‘ပသဇ္ဇပ္ပဋိသေဓဿ၊ လက္ခဏံ ဝတ္ထုနတ္ထိတာ၊

ဝတ္ထုတော အညတြ ဝုတ္တိ၊ ပရိယုဒါသလက္ခဏ’’န္တိ။

နနွေဝံ သန္တေပိ ‘‘အဗြာဟ္မဏော’’တိအာဒီသု ကထမုတ္တရပဒတ္ထပ္ပဓာနတာ သိယာတိ?

ဝုစ္စတေ – ဗြာဟ္မဏာဒိသဒ္ဒါနံ ဗြာဟ္မဏာဒိအတ္ထဿေဝ တံသဒိသာဒိအတ္ထဿာပိ ဝါစကတ္တာ၊ ဗြာဟ္မဏာဒိသဒ္ဒါ ဟိ ကေဝလာဗြာဟ္မဏာဒိအတ္ထေသွေဝ ပါကဋာ၊ ဘူသဒ္ဒေါ ဝိယသတ္တာယံ၊ ယဒါ တေ ပန အညေန သဒိသာဒိဝါစကေန နဣတိ နိပါတေန ယုဇ္ဇန္တိ၊ တဒါ တံသဒိသတဒညတဗ္ဗိရုဒ္ဓတဒဘာဝေသုပိ ဝတ္တန္တိ၊ ဘူသဒ္ဒေါ ဝိယ အနွဘိယာဒိယောဂေ အနုဘဝနအဘိဘဝနာဒီသု၊ တသ္မာ ဥတ္တရပဒတ္ထဇောတကောယေဝေတ္ထ နဣတိ နိပါတောတိ န ဒေါသော၊ တေန အဗြာဟ္မဏောတိ ဗြာဟ္မဏသဒိသောတိ ဝုတ္တံ ဟောတိ။ ဧဝံ အမနုဿော၊ အဿမဏော။

အညတ္ထေ – န ဗျာကတာ အဗျာကတာ၊ အသံကိလိဋ္ဌာ၊ အပရိယာပန္နာ။

ဝိရုဒ္ဓတ္ထေ – န ကုသလာ အကုသလာ၊ ကုသလပဋိပက္ခာတိ အတ္ထော။ ဧဝံ အလောဘော၊ အမိတ္တော။

ပသဇ္ဇပ္ပဋိသေဓေ – န ကတွာ အကတွာ၊ အကာတုန ပုညံ အကရောန္တော။

‘‘နဿ၊ တပ္ပုရိသေ’’တိ စ ဝတ္တတေ။

၃၄၅။ သရေ ¶ အန။

နဣစ္စေတဿ ပဒဿ တပ္ပုရိသေ ဥတ္တရပဒေ အန ဟောတိ သရေ ပရေ။

န အဿော အနဿော၊ န အရိယော အနရိယော။ ဧဝံ အနိဿရော၊ အနိဋ္ဌော၊ အနုပဝါဒေါ၊ န အာဒါယ အနာဒါယ၊ အနောလောကေတွာ ဣစ္စာဒိ။

ကုပုဗ္ဗပဒေါ ယထာ – ကုစ္ဆိတမန္နန္တိ နိစ္စသမာသတ္တာ အညပဒေန ဝိဂ္ဂဟော၊ ကမ္မဓာရယသမာသေ ကတေ –

‘‘တပ္ပုရိသေ၊ သရေ’’တိ စ ဝတ္တတေ။

၃၄၆။ ကဒဒ ကုဿ။

ကုဣစ္စေတဿ နိပါတဿ တပ္ပုရိသေ ဥတ္တရပဒေ ကဒ ဟောတိ သရေ ပရေ။ ကဒန္နံ။ ဧဝံ ကဒသနံ။

သရေတိ ကိံ? ကုဒါရာ၊ ကုပုတ္တာ၊ ကုဒါသာ၊ ကုဒိဋ္ဌိ။

‘‘ကုဿာ’’တိ ဝတ္တတေ။

၃၄၇။ ကာပ္ပတ္ထေသု စ။

ကုဣစ္စေတဿ အပ္ပတ္ထေ ဝတ္တမာနဿ ကာ ဟောတိ တပ္ပုရိသေ ဥတ္တရပဒေ ပရေ။ ဗဟုဝစနုစ္စာရဏတော ကုစ္ဆိတတ္ထေ စ ကွစိ တပ္ပုရိသေ။ အပ္ပကံ လဝဏံ ကာလဝဏံ။ ဧဝံ ကာပုပ္ဖံ၊ ကုစ္ဆိတော ပုရိသော ကာပုရိသော၊ ကုပုရိသော ဝါ။

ပါဒိပုဗ္ဗပဒေါ စ နိစ္စသမာသောဝ၊ ပဓာနံ ဝစနံ ပါဝစနံ၊ ဘုသံ ဝဒ္ဓံ ပဝဒ္ဓံ၊ သရီရံ၊ သမံ၊ သမ္မာ ဝါ အာဓာနံ သမာဓာနံ၊ ဝိဝိဓာ မတိ ဝိမတိ၊ ဝိဝိဓော ကပ္ပော ဝိကပ္ပော၊ ဝိသိဋ္ဌော ဝါ ကပ္ပော ¶ ဝိကပ္ပော၊ အဓိကော ဒေဝေါ အတိဒေဝေါ။ ဧဝံ အဓိဒေဝေါ၊ အဓိသီလံ၊ သုန္ဒရော ဂန္ဓော သုဂန္ဓော၊ ကုစ္ဆိတော ဂန္ဓော ဒုဂ္ဂန္ဓော၊ သောဘနံ ကတံ သုကတံ၊ အသောဘနံ ကတံ ဒုက္ကဋံ ဣစ္စာဒိ။

ယေ ဣဓ အဝိဟိတလက္ခဏာ နာမနိပါတောပသဂ္ဂါ၊ တေသံ ‘‘နာမာနံ သမာသော’’တိ ယောဂဝိဘာဂေန သမာသော ဒဋ္ဌဗ္ဗော။ ယထာ – အပုနဂေယျာ ဂါထာ၊ အစန္ဒမုလ္လောကိကာနိ မုခါနိ၊ အဿဒ္ဓဘောဇီ၊ အလဝဏဘောဇီတိအာဒီသု အယုတ္တတ္ထတ္တာ နာညေန သမာသော။

တထာ ဒိဋ္ဌော ပုဗ္ဗန္တိ ဒိဋ္ဌပုဗ္ဗော တထာဂတံ။ ဧဝံ သုတပုဗ္ဗော ဓမ္မံ၊ ဂတပုဗ္ဗော မဂ္ဂံ၊ ကမ္မနိ ဒိဋ္ဌာ ပုဗ္ဗန္တိ ဒိဋ္ဌပုဗ္ဗာ ဒေဝါ တေန။ ဧဝံ သုတပုဗ္ဗာ ဓမ္မာ၊ ဂတပုဗ္ဗာ ဒိသာ၊ ပဟာရော၊ ပရာဘဝေါ၊ ဝိဟာရော၊ အာဟာရော၊ ဥပဟာရော ဣစ္စာဒိ။

ကမ္မဓာရယသမာသော။

ဒိဂုသမာသ

အထ ဒိဂုသမာသော ဝုစ္စတေ။

တယော လောကာ သမာဟဋာ စိတ္တေန သမ္ပိဏ္ဍိတာ၊ တိဏ္ဏံ လောကာနံ သမာဟာရောတိ ဝါ အတ္ထေ –

‘‘နာမာနံ သမာသော ယုတ္တတ္ထော’’တိ ဝတ္တမာနေ ‘‘ဒွိပဒေ’’တိအာဒိနာ ကမ္မဓာရယသမာသော၊ တတော သမာသသညာယံ၊ ဝိဘတ္တိလောပေ၊ ပကတိဘာဝေ စ ကတေ –

‘‘ကမ္မဓာရယော’’တိ ဝတ္တတေ။

၃၄၈။ သင်္ချာပုဗ္ဗော ¶ ဒိဂု။

သင်္ချာပုဗ္ဗော ကမ္မဓာရယသမာသော ဒိဂုသညော ဟောတိ။

ဒွေ ဂါဝေါ ဒိဂု၊ ဒိဂုသဒိသတ္တာ အယမ္ပိ သမာသော ဒိဂူတိ ဝုတ္တော။ အထ ဝါ သင်္ချာပုဗ္ဗတ္တနပုံသကေကတ္တသင်္ခါတေဟိ ဒွီဟိ လက္ခဏေဟိ ဂတော အဝဂတောတိ ဒိဂူတိ ဝုစ္စတိ၊ ဒွီဟိ ဝါ လက္ခဏေဟိ ဂစ္ဆတိ ပဝတ္တတီတိ ဒိဂု။ ဧတ္ထ စ ‘‘သင်္ချာပုဗ္ဗော’’တိ ဝုတ္တတ္တာ သင်္ချာသဒ္ဒဿေဝ ပုဗ္ဗနိပါတော၊ ‘‘ဥဘေ တပ္ပုရိသာ’’တိ တပ္ပုရိသသညာ။

‘‘နပုံသကလိင်္ဂေါ’’တိ ဝတ္တတေ။

၃၄၉။ ဒိဂုဿေကတ္တံ။

ဒိဂုဿ သမာသဿ ဧကတ္တံ ဟောတိ၊ နပုံသကလိင်္ဂတ္တဉ္စ။

သမာဟာရဒိဂုဿေတံ ဂဟဏံ၊ တတ္ထ သဗ္ဗတ္ထေကဝစနမေဝ ဟောတိ၊ အညတြ ပန ဗဟုဝစနမ္ပိ၊ နာမဗျပဒေသသျာဒျုပ္ပတ္တိ အမာဒေသာဒိ။

တိလောကံ၊ ဟေ တိလောက၊ တိလောကံ၊ တိလောကေန၊ တိလောကဿ၊ တိလောကာ တိလောကသ္မာ တိလောကမှာ၊ တိလောကဿ၊ တိလောကေ တိလောကမှိ တိလောကသ္မိံ။

ဧဝံ တယော ဒဏ္ဍာ တိဒဏ္ဍံ၊ တီဏိ မလာနိ သမာဟဋာနိ၊ တိဏ္ဏံ မလာနံ သမာဟာရောတိ ဝါ တိမလံ၊ တိလက္ခဏံ၊ စတုဿစ္စံ၊ စတဿော ဒိသာ စတုဒ္ဒိသံ၊ ‘‘သရော ရဿော နပုံသကေ’’တိ ရဿတ္တံ၊ ပဉ္စသိက္ခာပဒံ၊ သဠာယတနံ၊ သတ္တာဟံ၊ အဋ္ဌသီလံ၊ နဝလောကုတ္တရံ၊ ဒသသီလံ၊ သတယောဇနံ။

တထာ – ဒွေ ရတ္တိယော ဒွိရတ္တံ၊ တိဿော ရတ္တိယော တိရတ္တံ၊ ဒွေ အင်္ဂုလိယော ဒွင်္ဂုလံ၊ သတ္တ ဂေါဒါဝရိယော၊ တာသံ သမာဟာရောတိ ဝါ သတ္တဂေါဒါဝရံ။

ဧတ္ထ စ ရတ္တိ အင်္ဂုလိ ဂေါဒါဝရီနမန္တဿ –

၃၅၀။ ကွစိ သမာသန္တဂတာနမကာရန္တော။

ရာဇာဒိဂဏဿေတံ ဂဟဏံ၊ တေန သမာသန္တဂတာနံ ရာဇာဒီနံ နာမာနံ အန္တော ကွစိ အကာရော ဟောတီတိ အတ္ထော။ ကာရဂ္ဂဟဏေန ဗဟုဗ္ဗီဟာဒိမှိ သမာသန္တေ ကွစိ ကပ္ပစ္စယော ဟောတိ၊ သုရဘိ သု ဒု ပူတီဟိ ဂန္ဓန္တဿိကာရော စ။

အထ ဝါ အ စ ကော စ အကာ၊ ရကာရော ပဒသန္ဓိကရော၊ တေန ကွစိ သမာသန္တဂတာနမန္တော ဟုတွာ အ က ဣစ္စေတေ ပစ္စယာ ဟောန္တီတိ အတ္ထော။ တေန ပဉ္စ ဂါဝေါ သမာဟဋာတိ အတ္ထေ သမာသာဒိံ ကတွာ သမာသန္တေ အပ္ပစ္စယေ၊ ‘‘ဩ သရေ စာ’’တိ အဝါဒေသေ စ ကတေ ‘‘ပဉ္စဂဝ’’န္တိအာဒိ စ သိဇ္ဈတိ။ ‘‘ဒွိရတ္တ’’န္တိအာဒီသု ပန အပ္ပစ္စယေ ကတေ ပုဗ္ဗသရဿ ‘‘သရလောပေါ’’တိအာဒိနာ လောပေါ။

အသမာဟာရဒိဂု ယထာ – ဧကော စ သော ပုဂ္ဂလော စာတိ ဧကပုဂ္ဂလော။ ဧဝံ ဧကဓမ္မော၊ ဧကပုတ္တော၊ တယော ဘဝါ တိဘဝါ၊ စတဿော ဒိသာ စတုဒ္ဒိသာ၊ ဒသသဟဿစက္ကဝါဠာနိ ဣစ္စာဒိ။

ဒိဂုသမာသော။

တပ္ပုရိသသမာသ

အထ တပ္ပုရိသသမာသော ဝုစ္စတေ။

သော ပန ဒုတိယာဒီသု ဆသု ဝိဘတ္တီသု ဘာဝတော ဆဗ္ဗိဓော။ တတ္ထ ဒုတိယာတပ္ပုရိသော ဂတနိဿိတာတီတာတိက္ကန္တပ္ပတ္တာပန္နာဒီဟိ ဘဝတိ။

သရဏံ ဂတောတိ ဝိဂ္ဂဟေ –

‘‘တပ္ပုရိသော’’တိ ဝတ္တတေ။

၃၅၁။ အမာဒယော ¶ ပရပဒေဘိ။

အမာဒိဝိဘတျန္တာနိ ယုတ္တတ္ထာနိ ပုဗ္ဗပဒါနိ နာမေဟိ ပရပဒေဘိ သဟ ဝိဘာသာ သမသျန္တေ၊ သော သမာသော တပ္ပုရိသသညော ဟောတိ။ အယဉ္စ တပ္ပုရိသော အဘိဓေယျဝစနလိင်္ဂေါ။

ဂတာဒိသဒ္ဒါ ကိတန္တတ္တာ တိလိင်္ဂါ၊ ဝိဘတ္တိလောပါဒိ သဗ္ဗံ ပုဗ္ဗသမံ။ သော သရဏဂတော၊ တေ သရဏဂတာ။ သာ သရဏဂတာ၊ တာ သရဏဂတာယော။ တံ ကုလံ သရဏဂတံ၊ တာနိ ကုလာနိ သရဏဂတာနိ ဣစ္စာဒိ။

ဧဝံ အရညဂတော၊ ဘူမိဂတော၊ ဓမ္မံ နိဿိတော ဓမ္မနိဿိတော၊ အတ္ထနိဿိတော၊ ဘဝံ အတီတော ဘဝါတီတော၊ ကာလာတီတော၊ ပမာဏံ အတိက္ကန္တံ ပမာဏာတိက္ကန္တံ။ လောကာတိက္ကန္တံ၊ သုခံ ပတ္တော သုခပ္ပတ္တော၊ ဒုက္ခပ္ပတ္တော၊ သောတံ အာပန္နော သောတာပန္နော၊ နိရောဓသမာပန္နော၊ ရထံ အာရုဠှော ရထာရုဠှော၊ သဗ္ဗရတ္တိံ သောဘနော သဗ္ဗရတ္တိသောဘနော၊ မုဟုတ္တသုခံ။

ဥပပဒသမာသေ ပန ဝုတ္တိယေဝ တဿ နိစ္စတ္တာ။ ယထာ – ကမ္မံ ကရောတီတိ ကမ္မကာရော၊ ကုမ္ဘကာရော၊ အတ္ထံ ကာမေတီတိ အတ္ထကာမော၊ ဓမ္မကာမော၊ ဓမ္မံ ဓာရေတီတိ ဓမ္မဓရော၊ ဝိနယဓရော၊ သစ္စံ ဝဒိတုံ သီလမဿာတိ သစ္စဝါဒီ ဣစ္စာဒိ။

တဝန္တုမာနန္တာဒိကိတန္တေဟိ ဝါကျမေဝ ဝဝတ္ထိတဝိဘာသာဓိကာရတော။ ယထာ – ဩဒနံ ဘုတ္တဝါ၊ ဓမ္မံ သုဏမာနော၊ ဓမ္မံ သုဏန္တော၊ ကဋံ ကရာနော၊ အနဘိဓာနတော ဝါ၊ အဘိဓာနလက္ခဏာ ဟိ တဒ္ဓိတသမာသကိတကာတိ။

ဒုတိယာတပ္ပုရိသော။

တတိယာ ¶ ကိတက ပုဗ္ဗ သဒိသ သမူနတ္ထ ကလဟ နိပုဏ မိဿသခိလာဒီဟိ။

ဗုဒ္ဓေန ဘာသိတော ဗုဒ္ဓဘာသိတော၊ ဓမ္မော။ ဧဝံ ဇိနဒေသိတော၊ သတ္ထာရာ ဝဏ္ဏိတော သတ္ထုဝဏ္ဏိတော၊ ဝိညူဟိ ဂရဟိတော ဝိညုဂရဟိတော၊ ဝိညုပ္ပသတ္ထော၊ ဣဿရကတံ၊ သယံကတံ၊ သုကေဟိ အာဟဋံ သုကာဟတံ၊ ရညာ ဟတော ရာဇဟတော၊ ရောဂပီဠိတော၊ အဂ္ဂိဒဍ္ဎော၊ သပ္ပဒဋ္ဌော၊ သလ္လေန ဝိဒ္ဓါ သလ္လဝိဒ္ဓါ၊ ဣစ္ဆာယ အပကတော ဣစ္ဆာပကတော၊ သီလေန သမ္ပန္နော သီလသမ္ပန္နော။ ဧဝံ သုခသဟဂတံ၊ ဉာဏသမ္ပယုတ္တံ၊ မိတ္တသံသဂ္ဂေါ၊ ပိယဝိပ္ပယောဂေါ၊ ဇာတိတ္ထဒ္ဓါ၊ ဂုဏဟီနော၊ ဂုဏဝုဍ္ဎော၊ စတုဝဂ္ဂကရဏီယံ၊ စတုဝဂ္ဂါဒိကတ္တဗ္ဗံ၊ ကာကေဟိ ပေယျာ ကာကပေယျာ၊ နဒီ။

ကွစိ ဝုတ္တိယေဝ၊ ဥရေန ဂစ္ဆတီတိ ဥရဂေါ၊ ပါဒေန ပိဝတီတိ ပါဒပေါ။ ကွစိ ဝါကျမေဝ၊ ပရသုနာ ဆိန္နဝါ၊ ကာကေဟိ ပါတဗ္ဗာ၊ ဒဿနေန ပဟာတဗ္ဗာ။

ပုဗ္ဗာဒိယောဂေ – မာသေန ပုဗ္ဗော မာသပုဗ္ဗော။ ဧဝံ မာတုသဒိသော၊ ပိတုသမော၊ ဧကူနဝီသတိ၊ သီလဝိကလော၊ အသိကလဟော၊ ဝါစာနိပုဏော၊ ယာဝကာလိကသံမိဿံ၊ ဝါစာသခိလော၊ သတ္ထာရာ သဒိသော သတ္ထုကပ္ပော၊ ပုညေန အတ္ထိကော ပုညတ္ထိကော၊ ဂုဏာဓိကော၊ ဂုဠေန သံသဋ္ဌော ဩဒနော ဂုဠောဒနော၊ ခီရောဒနော၊ အဿေန ယုတ္တော ရထော အဿရထော၊ မဂ္ဂစိတ္တံ၊ ဇမ္ဗုယာ ပညာတော လက္ခိတော ဒီပေါ ဇမ္ဗုဒီပေါ၊ ဧကေန အဓိကာ ဒသ ဧကာဒသ၊ ဇာတိယာ အန္ဓော ဇစ္စန္ဓော၊ ပကတိယာ မေဓာဝီ ပကတိမေဓာဝီ ဣစ္စာဒိ။

တတိယာတပ္ပုရိသော။

စတုတ္ထီ ¶ တဒတ္ထအတ္ထဟိတဒေယျာဒီဟိ။

တဒတ္ထေ – ကထိနဿ ဒုဿံ ကထိနဒုဿံ၊ ကထိနစီဝရတ္ထာယာတိ အတ္ထော။ ဧဝံ စီဝရဒုဿံ၊ စီဝရမူလျံ၊ ယာဂုယာ အတ္ထာယ တဏ္ဍုလာ ယာဂုတဏ္ဍုလာ၊ ဘတ္တတဏ္ဍုလာ၊ သင်္ဃဿတ္ထာယ ဘတ္တံ သင်္ဃဘတ္တံ၊ အာဂန္တုကာနမတ္ထာယ ဘတ္တံ အာဂန္တုကဘတ္တံ။ ဧဝံ ဂမိကဘတ္တံ၊ ပါသာဒါယ ဒဗ္ဗံ ပါသာဒဒဗ္ဗံ။

အတ္ထေ ဘိက္ခုသင်္ဃဿတ္ထာယ ဝိဟာရော ဘိက္ခုသင်္ဃတ္ထော ဝိဟာရော၊ ဘိက္ခုသင်္ဃတ္ထာ ယာဂု၊ ဘိက္ခုသင်္ဃတ္ထံ စီဝရံ။ ယဿတ္ထာယ ယဒတ္ထော၊ ယဒတ္ထာ၊ ယဒတ္ထံ။ ဧဝံ တဒတ္ထော၊ တဒတ္ထာ။ တဒတ္ထံ။ ဧတဒတ္ထော ဝါယာမော၊ ဧတဒတ္ထာ ကထာ၊ ဧတဒတ္ထံ သောတာဝဓာနံ။ ကိမတ္ထံ၊ အတ္တတ္ထံ၊ ပရတ္ထံ၊ ဝိနယော သံဝရတ္ထာယ၊ သုခံ သမာဓတ္ထာယ၊ နိဗ္ဗိဒါ ဝိရာဂတ္ထာယ၊ ဝိရာဂေါ ဝိမုတ္တတ္ထာယ။ တထာ လောကဿ ဟိတော လောကဟိတော၊ ဗုဒ္ဓဿ ဒေယျံ ဗုဒ္ဓဒေယျံ၊ ပုပ္ဖံ။ သင်္ဃဒေယျံ၊ စီဝရံ။ ဣဓ န ဘဝတိ၊ သင်္ဃဿ ဒါတဗ္ဗံ၊ သင်္ဃဿ ဒါတုံ ဣစ္စာဒိ။

စတုတ္ထီတပ္ပုရိသော။

ပဉ္စမီ အပဂမန ဘယ ဝိရတိ မောစနတ္ထာဒီဟိ။

မေထုနသ္မာ အပေတော မေထုနာပေတော။ ဧဝံ ပလာပါပဂတော၊ နဂရနိဂ္ဂတော၊ ပိဏ္ဍပါတပဋိက္ကန္တော။ ဂါမတော နိက္ခန္တံ ဂါမနိက္ခန္တံ၊ ရုက္ခဂ္ဂါ ပတိတော ရုက္ခဂ္ဂပတိတော၊ သာသနစုတော၊ အာပတ္တိဝုဋ္ဌာနံ၊ ဓရဏိတလုဂ္ဂတော၊ သဗ္ဗဘဝေဟိ နိဿဋော သဗ္ဗဘဝနိဿဋော။

ဘယတ္ထာဒိယောဂေ ယထာ – ရာဇတော ဘယံ ရာဇဘယံ၊ စောရေဟိ ဘယံ စောရဘယံ၊ အမနုဿေဟိ ဘယံ အမနုဿဘယံ၊ အဂ္ဂိတော ဘယံ အဂ္ဂိဘယံ။ ပါပတော ဘီတော ပါပဘီတော ¶ ၊ ပါပဘီရုကော၊ အကတ္တဗ္ဗတော ဝိရတိ အကတ္တဗ္ဗဝိရတိ။ ဧဝံ ကာယဒုစ္စရိတဝိရတိ၊ ဝစီဒုစ္စရိတဝိရတိ၊ ဗန္ဓနာ မုတ္တော ဗန္ဓနမုတ္တော၊ ဝနမုတ္တော၊ ဗန္ဓနမောက္ခော၊ ကမ္မတော သမုဋ္ဌိတံ ကမ္မသမုဋ္ဌိတံ၊ ဥက္ကဋ္ဌုက္ကဋ္ဌံ၊ ဩမကောမကံ။

ကွစိ ဝုတ္တိယေဝ၊ ကမ္မတော ဇာတံ ကမ္မဇံ။ ဧဝံ စိတ္တဇံ၊ ဥတုဇံ၊ အာဟာရဇံ။ ဣဓ န ဘဝတိ၊ ပါသာဒါ ပတိတော။

ပဉ္စမီတပ္ပုရိသော။

ဆဋ္ဌီ ရညော ပုတ္တော ရာဇပုတ္တော။ ဧဝံ ရာဇပုရိသော၊ အာစရိယပူဇကော၊ ဗုဒ္ဓသာဝကော၊ ဗုဒ္ဓရူပံ၊ ဇိနဝစနံ၊ သမုဒ္ဒဃောသော၊ ဓညာနံ ရာသိ ဓညရာသိ၊ ပုပ္ဖဂန္ဓော၊ ဖလရသော၊ ကာယဿ လဟုတာ ကာယလဟုတာ၊ မရဏဿတိ၊ ရုက္ခမူလံ၊ အယဿ ပတ္တော အယောပတ္တော၊ ဧဝံ သုဝဏ္ဏကဋာဟံ၊ ပါနီယထာလကံ၊ သပ္ပိကုမ္ဘော။

‘‘ဒေဝါနံ ရာဇာ’’တိ အတ္ထေ သမာသာဒိမှိ ကတေ ‘‘ကွစိ သမာသန္တဂတာနမကာရန္တော’’တိ အကာရော၊ တတော ‘‘သျာ စာ’’တိ အာတ္တံ န ဘဝတိ။ ဒေဝရာဇော၊ ဒေဝရာဇာ၊ ဒေဝရာဇံ၊ ဒေဝရာဇေ ဣစ္စာဒိ ပုရိသသဒ္ဒသမံ။ အတ္တာဘာဝေ သော ဒေဝရာဇာ၊ တေ ဒေဝရာဇာနော ဣစ္စာဒိ ရာဇသဒ္ဒသမံ။ တထာ ဒေဝါနံ သခါ ဒေဝသခေါ၊ ဒေဝသခါ၊ သော ဒေဝသခါ၊ တေ ဒေဝသခါနော ဣစ္စာဒိ။

ပုမဿ လိင်္ဂံ ပုလ္လိင်္ဂံ။ ဧဝံ ပုမ္ဘာဝေါ၊ ပုမန္တလောပါဒိ။

ဟတ္ထိပဒံ၊ ဣတ္ထိရူပံ၊ ဘိက္ခုနိသင်္ဃော၊ ဇမ္ဗုသာခါ၊ ဧတ္ထ စ ‘‘ကွစာဒိမဇ္ဈုတ္တရာန’’န္တိအာဒိနာ မဇ္ဈေ ဤကာရူကာရာနံ ရဿတ္တံ။

ဝိဘာသာဓိကာရတော ¶ ကွစိ ဝါကျမေဝ၊ သဟသာ ကမ္မဿ ကတ္တာရော၊ ဘိန္နာနံ သန္ဓာတာ၊ ကပ္ပဿ တတိယော ဘာဂေါ၊ ယာ စ ပက္ခဿ အဋ္ဌမီ၊ မနုဿာနံ ခတ္တိယော သူရတမော။

ယုတ္တတ္ထော ဣစ္စေဝ? ‘‘ဘဋော ရညော ပုရိသော ဒေဝဒတ္တဿာ’’တိ ဧတ္ထ ‘‘ဘဋသမ္ဗန္ဓေ ဆဋ္ဌီ’’တိ အညမညာနပေက္ခတာယ အယုတ္တတ္ထဘာဝတော သမာသော န ဘဝတိ၊ ‘‘ကောသလဿ ရညော ပုတ္တော’’တိအာဒီသု ပန သာပေက္ခတာယ အသမတ္ထတ္တာ န ဘဝတိ၊ သမ္ဗန္ဓီသဒ္ဒါနံ ပန နိစ္စံ သာပေက္ခတ္တေပိ ဂမကတ္တာ သမာသော၊ ယထာ – ဒေဝဒတ္တဿ ဂုရုကုလံ၊ ဘဂဝတော သာဝကသင်္ဃောတိအာဒိ။

ဆဋ္ဌီတပ္ပုရိသော။

သတ္တမီ ရူပေ သညာ ရူပသညာ၊ ဧဝံ ရူပသဉ္စေတနာ၊ သံသာရဒုက္ခံ၊ စက္ခုမှိ သန္နိဿိတံ ဝိညာဏံ စက္ခုဝိညာဏံ၊ ဓမ္မေ ရတော ဓမ္မရတော၊ ဓမ္မာဘိရတိ၊ ဓမ္မရုစိ၊ ဓမ္မဂါရဝေါ၊ ဓမ္မေသု နိရုတ္တိ ဓမ္မနိရုတ္တိ၊ ဒါနာဓိမုတ္တိ၊ ဘဝန္တရကတံ၊ ဒဿနေ အဿာဒေါ ဒဿနဿာဒေါ၊ အရညေ ဝါသော အရညဝါသော၊ ဝိကာလေ ဘောဇနံ ဝိကာလဘောဇနံ၊ ကာလေ ဝဿံ ကာလဝဿံ၊ ဝနေ ပုပ္ဖံ ဝနပုပ္ဖံ။ ဧဝံ ဝနမဟိသော၊ ဂါမသူကရော၊ သမုဒ္ဒမစ္ဆော၊ အာဝါဋကစ္ဆပေါ၊ အာဝါဋမဏ္ဍူကော၊ ကူပမဏ္ဍူကော၊ တိတ္ထနာဝါ၊ ဣတ္ထီသု ဓုတ္တော ဣတ္ထိဓုတ္တော ဆာယာယ သုက္ခော ဆာယာသုက္ခော၊ အင်္ဂါရပက္ကံ၊ စာရကဗဒ္ဓါ။

ဣဓ ဝုတ္တိယေဝ၊ ယထာ – ဝနေ စရတီတိ ဝနစရော၊ ကုစ္ဆိမှိ သယတီတိ ကုစ္ဆိသယော၊ ထလေ တိဋ္ဌတီတိ ထလဋ္ဌော။ ဧဝံ ဇလဋ္ဌော၊ ပဗ္ဗတဋ္ဌော၊ မဂ္ဂဋ္ဌော၊ ပင်္ကေ ဇာတံ ပင်္ကဇံ၊ သိရေ ရုဟတီတိ သိရောရုဟံ ဣစ္စာဒိ။

ဣဓ ¶ န ဘဝတိ၊ ဘောဇနေ မတ္တညုတာ၊ ဣန္ဒြိယေသု ဂုတ္တဒွါရတာ၊ အာသနေ နိသိန္နော၊ အာသနေ နိသီဒိတဗ္ဗံ။

သတ္တမီတပ္ပုရိသော။

‘‘တဒနုပရောဓေနာ’’တိ ဝုတ္တတ္တာ ယထာဘိဓာနံ တပ္ပုရိသေ ကွစိ အစ္စန္တာဒီသု အမာဒိဝိဘတျန္တံ ပုဗ္ဗပဒံ ပရံ သမ္ဘဝတိ။

ယထာ – အန္တံ အတိက္ကန္တံ အစ္စန္တံ၊ အစ္စန္တာနိ၊ ဝေလံ အတိက္ကန္တော အတိဝေလော၊ ရဿတ္တံ။ ဧဝံ မာလံ အတီတော အတိမာလော၊ ပတ္တဇီဝိကော၊ အာပန္နဇီဝိကော၊ အက္ခံ ပတိဂတံ နိဿိတန္တိ ပစ္စက္ခံ ဒဿနံ၊ ပစ္စက္ခော အတ္တဘာဝေါ၊ ပစ္စက္ခာ ဗုဒ္ဓိ၊ အတ္ထံ အနုဂတံ အနွတ္ထံ၊ ကောကိလာယ အဝကုဋ္ဌံ အဝကောကိလံ ဝနံ၊ ပရိစ္စတ္တန္တိ အတ္ထော။ အဝမယူရံ၊ အဇ္ဈယနာယ ပရိဂိလာနော ပရိယဇ္ဈယနော၊ ကမ္မဿ အလံ သမတ္ထောတိ အလံကမ္မော၊ ဝစနာယ အလန္တိ အလံဝစနော၊ ဝါနတော နိက္ခန္တံ နိဗ္ဗာနံ၊ ကိလေသေဟိ နိက္ခန္တော နိက္ကိလေသော၊ နိရင်္ဂဏော၊ ကောသမ္ဗိယာ နိက္ခန္တော နိက္ကောသမ္ဗီ၊ ဝနတော နိယျာတော နိဗ္ဗနော၊ အာစရိယတော ပရော ပါစရိယော။ ဧဝံ ပယျကော၊ ပရဟိယျော၊ ဂင်္ဂါယ ဥပရိ ဥပရိဂင်္ဂံ။ ဧဝံ ဟေဋ္ဌာနဒီ၊ အန္တောသမာပတ္တိ၊ ဟံသာနံ ရာဇာ ရာဇဟံသော၊ ဟံသရာဇာ ဝါ၊ မာသဿ အဒ္ဓံ အဒ္ဓမာသံ၊ မာသဒ္ဓံ ဝါ၊ အာမလကဿ အဒ္ဓံ အဒ္ဓါမလကံ၊ အာမလကဒ္ဓံ ဝါ၊ ကဟာပဏဿ အဍ္ဎံ အဍ္ဎကဟာပဏံ၊ အဍ္ဎမာသကံ၊ ရတ္တိယာ အဍ္ဎံ အဍ္ဎရတ္တံ၊ ရတ္တိယာ ပုဗ္ဗံ ပုဗ္ဗရတ္တံ၊ ရတ္တိယာ ပစ္ဆာ ပစ္ဆာရတ္တံ။ ဧတ္ထ စ ‘‘ကွစိ သမာသန္တဂတာနမကာရန္တော’’တိ ရတ္တိသဒ္ဒန္တဿ အတ္တံ၊ အဟဿ ပုဗ္ဗံ ပုဗ္ဗနှံ။ ဧဝံ သာယနှံ၊ ‘‘တေသု ဝုဒ္ဓီ’’တိအာဒိနာ အဟဿ အနှာဒေသော။

အမာဒိပရတပ္ပုရိသော။

ကွစိ ¶ တပ္ပုရိသေ ‘‘ပဘင်္ကရာ’’ဒီသု ဝိဘတ္တိလောပေါ န ဘဝတိ။

ယထာ – ပဘံ ကရောတီတိ အတ္ထေ ‘‘အမာဒယော ပရပဒေဘီ’’တိ သမာသော၊ ‘‘နာမာနံ သမာသော ယုတ္တတ္ထော’’တိ သမာသသညာ၊ တတော ‘‘တေသံ ဝိဘတ္တိယော လောပါ စာ’’တိ ဝိဘတ္တိလောပေ သမ္ပတ္တေ တတ္ထေဝ စဂ္ဂဟဏေန ပုဗ္ဗပဒေ ဝိဘတ္တိလောပါဘာဝေါ။ သေသံ သမံ။ ပဘင်္ကရော၊ အမတံ ဒဒါတီတိ အမတန္ဒဒေါ၊ ရဏံ ဇဟာတီတိ ရဏဉ္ဇဟော၊ ဇုတိံ ဓာရေတီတိ ဇုတိန္ဓရော၊ တထာ သဟသာကတံ၊ ပရဿပဒံ။ အတ္တနောပဒံ၊ ဘယတော ဥပဋ္ဌာနံ ဘယတူပဋ္ဌာနံ၊ ပရတောဃောသော၊ ဂဝံပတိတ္ထေရော၊ မနသိကာရော၊ ပုဗ္ဗေနိဝါသော၊ ပုဗ္ဗေနိဝါသာနုဿတိ၊ မဇ္ဈေကလျာဏံ၊ အန္တေဝါသီ၊ အန္တေဝါသိကော၊ ဇနေသုတော၊ ဥရသိလောမော၊ ကဏ္ဌေကာဠော၊ သရသိဇမိစ္စာဒိ။

အလောပတပ္ပုရိသော။

တပ္ပုရိသသမာသော နိဋ္ဌိတော။

ဗဟုဗ္ဗီဟိသမာသ

အထ ဗဟုဗ္ဗီဟိသမာသော ဝုစ္စတေ။

သော စ နဝဝိဓော ဒွိပဒေါ တုလျာဓိကရဏော၊ ဒွိပဒေါ ဘိန္နာဓိကရဏော၊ တိပဒေါ နနိပါတပုဗ္ဗပဒေါ၊ သဟပုဗ္ဗပဒေါ ဥပမာနပုဗ္ဗပဒေါ သင်္ချောဘယပဒေါ ဒိသန္တရာဠတ္ထော ဗျတိဟာရလက္ခဏော စာတိ။

တတ္ထ ဒွိပဒေါ တုလျာဓိကရဏော ဗဟုဗ္ဗီဟိ ကမ္မာဒီသု ဆသု ဝိဘတျတ္ထေသု ဘဝတိ။

တတ္ထ ¶ ဒုတိယတ္ထေ တာဝ – ‘‘အာဂတာ သမဏာ ဣမံ သင်္ဃာရာမ’’န္တိ ဝိဂ္ဂဟေ –

၃၅၂။ အညပဒတ္ထေသု ဗဟုဗ္ဗီဟိ။

သမသျမာနပဒတော အညေသံ ပဌမဒုတိယာဒိဝိဘတျန္တာနံ ပဒါနမတ္ထေသု ယုတ္တတ္ထာနိ နာမာနိ ဝိဘာသာ သမသျန္တေ၊ သော သမာသော ဗဟုဗ္ဗီဟိသညော စ ဟောတိ။

ဗဟဝေါ ဝီဟယော ယဿ သော ဗဟုဗ္ဗီဟိ၊ ဗဟုဗ္ဗီဟိသဒိသတ္တာ အယမ္ပိသမာသော အနွတ္ထသညာဝသေန ဗဟုဗ္ဗီဟီတိ ဝုတ္တော၊ အညပဒတ္ထပ္ပဓာနော ဟိ ဗဟုဗ္ဗီဟိ။

ဒုဝိဓော စာယံ ဗဟုဗ္ဗီဟိ တဂ္ဂုဏသံဝိညာဏာတဂ္ဂုဏသံဝိညာဏဝသေန၊ တေသု ယတ္ထ ဝိသေသနဘူတော အတ္ထော အညပဒတ္ထဂ္ဂဟဏေန ဂယှတိ၊ သော တဂ္ဂုဏသံဝိညာဏော၊ ယထာ – လမ္ဗကဏ္ဏမာနယာတိ။

ယတ္ထ ပန န ဂယှတိ၊ သော အတဂ္ဂုဏသံဝိညာဏော၊ ယထာ – ဗဟုဓနမာနယာတိ။

ဣဓ ဗဟုဗ္ဗီဟိသဒ္ဒေ ဝိယ ဝိသေသနဿ ပုဗ္ဗနိပါတော၊ သေသံ ပုဗ္ဗသမံ။

အာဂတသမဏော သင်္ဃာရာမော။ ဧတ္ထ စ အာဂတသဒ္ဒေါ၊ သမဏသဒ္ဒေါ စ အတ္တနော အတ္ထေ အဋ္ဌတွာ ဒုတိယာဝိဘတျတ္ထဘူတေ သင်္ဃာရာမသင်္ခါတေ အညပဒတ္ထေ ဝတ္တန္တိ၊ တဒတ္ထဇောတနတ္ထမေဝ တဒနန္တရံ ‘‘သင်္ဃာရာမော’’တိ ပဒန္တရံ ပယုဇ္ဇတိ၊ တတော သမာသေနေဝ ကမ္မတ္ထဿ အဘိဟိတတ္တာ ပုန ဒုတိယာ န ဟောတိ။ ဣဒံသဒ္ဒဿ စ အပ္ပယောဂေါ၊ ဧဝံ သဗ္ဗတ္ထ။ ဗဟုဗ္ဗီဟိ စာယံ အဘိဓေယျလိင်္ဂဝစနော။

တထာ အာဂတသမဏာ သာဝတ္ထိ၊ အာဂတသမဏံ ဇေတဝနံ၊ ပဋိပန္နာ အဒ္ဓိကာ ယံ ပထံ သောယံ ပဋိပန္နဒ္ဓိကော ပထော ¶ ၊ အဘိရုဠှာ ဝါဏိဇာ ယံ နာဝံ သာ အဘိရုဠှဝါဏိဇာ နာဝါ။ ဧဝံ ကမ္မတ္ထေ ဗဟုဗ္ဗီဟိ။

တတိယတ္ထေ ဗဟုဗ္ဗီဟိ ယထာ – ဇိတာနိ ဣန္ဒြိယာနိ ယေန သမဏေန သောယံ ဇိတိန္ဒြိယော သမဏော။ ဧဝံ ဒိဋ္ဌဓမ္မော၊ ပတ္တဓမ္မော၊ ကတကိစ္စော၊ ဇိတာ မာရာ အနေနာတိ ဇိတမာရော ဘဂဝါ၊ ပဋိဝိဒ္ဓသဗ္ဗဓမ္မော။

စတုတ္ထိယတ္ထေ ဗဟုဗ္ဗီဟိ ယထာ – ဒိန္နော သုင်္ကော ယဿ ရညော သောယံ ဒိန္နသုင်္ကော ရာဇာ၊ ဥပနီတံ ဘောဇနံ အဿ သမဏဿာတိ ဥပနီတဘောဇနော သမဏော၊ ဥပဟဋော ဗလိ အဿာတိ ဥပဟဋဗလိ ယက္ခော။

ပဉ္စမိယတ္ထေ ဗဟုဗ္ဗီဟိ ယထာ – နိဂ္ဂတာ ဇနာ အသ္မာ ဂါမာ သောယံ နိဂ္ဂတဇနော ဂါမော၊ နိဂ္ဂတော အယော အသ္မာတိ နိရယော၊ နိဂ္ဂတာ ကိလေသာ ဧတသ္မာတိ နိက္ကိလေသော၊ အပေတံ ဝိညာဏံ အသ္မာတိ အပေတဝိညာဏော မတကာယော၊ အပဂတံ ဘယဘေရဝံ အသ္မာတိ အပဂတဘယဘေရဝေါ အရဟာ။

ဆဋ္ဌိယတ္ထေ ဗဟုဗ္ဗီဟိ ယထာ – ဆိန္နာ ဟတ္ထာ ယဿ ပုရိသဿ သောယံ ဆိန္နဟတ္ထော ပုရိသော။ ဧဝံ ပရိပုဏ္ဏသင်္ကပ္ပော၊ ခီဏာသဝေါ၊ ဝီတော ရာဂေါ အဿာတိ ဝီတရာဂေါ၊ ဒွေ ပဒါနိ အဿာတိ ဒွိပဒေါ၊ ဒွိဟတ္ထော ပဋော၊ တေဝိဇ္ဇော၊ စတုပ္ပဒေါ၊ ပဉ္စ စက္ခူနိ အဿာတိ ပဉ္စစက္ခု ဘဂဝါ၊ ဆဠဘိညော၊ ရဿတ္တံ၊ နဝင်္ဂံ သတ္ထုသာသနံ၊ ဒသဗလော၊ အနန္တဉာဏော၊ တီဏိ ဒသ ပရိမာဏမေတေသန္တိ တိဒသာ ဒေဝါ၊ သမာသန္တဿ အတ္တံ၊ ဣဓ ပရိမာဏသဒ္ဒဿ သန္နိဓာနတော ¶ ဒသသဒ္ဒေါ သင်္ချာနေ ဝတ္တတေ၊ အယံ ပစ္စယော ဧတေသန္တိ ဣဒပ္ပစ္စယာ၊ ကော ပဘဝေါ အဿာတိ ကိံပဘဝေါ အယံ ကာယော၊ ဝိဂတံ မလမဿာတိ ဝိမလော၊ သုန္ဒရော ဂန္ဓော အဿာတိ သုဂန္ဓံ စန္ဒနံ။ ဧဝံ သုသီလော၊ သုမုခေါ၊ ကုစ္ဆိတော ဂန္ဓော အဿာတိ ဒုဂ္ဂန္ဓံ ကုဏပံ၊ ဒုဋ္ဌု မနော အဿာတိ ဒုမ္မနော။ ဧဝံ ဒုဿီလော၊ ဒုမ္မုခေါ၊ တပေါ ဧဝ ဓနံ အဿာတိ တပေါဓနော၊ ခန္တိသင်္ခါတံ ဗလံ အဿာတိ ခန္တိဗလော၊ ဣန္ဒောတိ နာမံ ဧတဿာတိ ဣန္ဒနာမော။

ဆန္ဒဇာတာဒီသု ဝိသေသနဝိသေသိတဗ္ဗာနံ ယထိစ္ဆိတတ္တာ ဥဘယံ ပုဗ္ဗံ နိပတတိ၊ ယထာ – ဆန္ဒော ဇာတော အဿာတိ ဆန္ဒဇာတော၊ ဇာတော ဆန္ဒော အဿာတိပိ ဇာတဆန္ဒော။ ဧဝံ သဉ္ဇာတပီတိသောမနဿော၊ ပီတိသောမနဿသဉ္ဇာတော၊ မာသဇာတော၊ ဇာတမာသော၊ ဆိန္နဟတ္ထော၊ ဟတ္ထစ္ဆိန္နော။

‘‘ဒီဃာ ဇင်္ဃာယဿာ’’တိ ဝိဂ္ဂယှ သမာသာဒိမှိ ကတေ –

‘‘တုလျာဓိကရဏေ၊ ပဒေ’’တိ စ ဝတ္တတေ။

၃၅၃။ ဣတ္ထိယံ ဘာသိတပုမိတ္ထီ ပုမာဝ စေ။

ဣတ္ထိယံ ဝတ္တမာနေ တုလျာဓိကရဏေ ပဒေ ပရေ ပုဗ္ဗေ ဘာသိတပုမာ ဣတ္ထိဝါစကော သဒ္ဒေါ အတ္ထိ စေ၊ သော ပုမာ ဣဝ ဒဋ္ဌဗ္ဗောတိ ပုဗ္ဗပဒေ ဣတ္ထိပ္ပစ္စယာဘာဝေါ၊ ဗဟုဗ္ဗီဟိဝိသယောယံ၊ ဥပရိ ‘‘ကမ္မဓာရယသညေ စာ’’တိ ဝက္ခမာနတ္တာ။

၃၅၄။ ကွစာဒိမဇ္ဈုတ္တရာနံ ဒီဃရဿာပစ္စယေသု စ။

ကွစိ တဒ္ဓိတသမာသနာမောပသဂ္ဂါဒီသု ပဒေသု အာဒိမဇ္ဈုတ္တရဘူတာနံ သရာနံ ဇိနဝစနာနုပရောဓေန ဒီဃရဿာ ဟောန္တိ ပစ္စယေသု၊ အပစ္စယေသု ပရေသု၊ အပရဘူတေသု စ။

တတ္ထ ¶

ဒီဃတ္တံ ပါကဋာနူပ- ဃာတာဒေါ မဓုဝါဒိသု၊

ရဿတ္တံ အဇ္ဇဝေ ဣတ္ထိ- ရူပါဒေါ စ က၊ တာဒိသူတိ။

ဗဟုဗ္ဗီဟိသမာသေ သတိ ပုလ္လိင်္ဂေ ဥတ္တရပဒန္တဿ ရဿတ္တံ။ ဒီဃဇင်္ဃော ပုရိသော၊ တထာ ပဟူတာ ဇိဝှာ အဿာတိ ပဟူတဇိဝှော ဘဂဝါ။ မဟတီ ပညာ အဿာတိ မဟာပညော။ ‘‘မဟတံ မဟာ တုလျာဓိကရဏေ ပဒေ’’တိ မဟာဒေသော။

ဣတ္ထိယမိတိ ကိံ? ခမာဓနော။ ဘာသိတပုမာတိ ကိံ? သဒ္ဓါဓုရော၊ သဒ္ဓါပကတိကော၊ ပညာပကတိကော၊ ပညာဝိသုဒ္ဓိကော၊ ဧတ္ထ စ ‘‘ကွစိ သမာသန္တဂတာနမကာရန္တော’’တိ ကပ္ပစ္စယော။ တုလျာဓိကရဏေ ဣစ္စေဝ? သမဏိဘတ္တိကော၊ ကုမာရိဘတ္တိကော၊ ကုမာရိဘတ္တိ။

ပုဗ္ဗပဒဿေဝါယံ ပုမ္ဘာဝါတိဒေသော၊ တေန ဣဓ န ဘဝတိ။ ဗဟုဒါသိကော ပုရိသော။ ဗဟုကုမာရိကံ ကုလံ။

‘‘ဂါဏ္ဌိဝေါ ဓနု အဿာ’’တိ ဝိဂ္ဂယှ သမာသာဒိမှိ ကတေ –

၃၅၅။ ဓနုမှာ စ။

တိပဒမိဒံ။ ကွစိသမာသန္တဂတာ ဓနုသဒ္ဒါ အာပစ္စယော ဟောတိ၊ စသဒ္ဒေန ဓမ္မာဒိတော စ၊ ‘‘ဝမောဒုဒန္တာန’’န္တိ ဝကာရော၊ ဂါဏ္ဌိဝဓနွာ။ ဧဝံ ပစ္စက္ခဓမ္မာ။

ကွစီတိ ကိံ? သဟဿထာမဓနု၊ ပစ္စက္ခဓမ္မော၊ ဝိဒိတဓမ္မော။

နာနာဒုမပတိတပုပ္ဖဝါသိတသာနု ဣစ္စတြ – နာနပ္ပကာရာ ဒုမာ နာနာဒုမာ၊ နာနာဒုမေဟိ ပတိတာနိ နာနာဒုမပတိတာနိ၊ နာနာဒုမပတိတာနိ စ တာနိ ပုပ္ဖာနိ စာတိ နာနာဒုမပတိတပုပ္ဖာနိ၊ တေဟိ ဝါသိတာ နာနာဒုမပတိတပုပ္ဖဝါသိတာ၊ နာနာဒုမပတိတပုပ္ဖဝါသိတာ သာနူ ယဿ ပဗ္ဗတဿ သောယံ နာနာဒုမပတိတပုပ္ဖဝါသိတသာနု ¶ ပဗ္ဗတော။ အယံ ပန ကမ္မဓာရယတပ္ပုရိသဂဗ္ဘော တုလျာဓိကရဏဗဟုဗ္ဗီဟိ။

တထာ ဗျာလမ္ဗော အမ္ဗုဓရော ဗျာလမ္ဗမ္ဗုဓရော၊ တဿ ဗိန္ဒူနိ ဗျာလမ္ဗမ္ဗုဓရဗိန္ဒူနိ၊ တေဟိ စုမ္ဗိတော ဗျာလမ္ဗမ္ဗုဓရဗိန္ဒုစုမ္ဗိတော၊ တာဒိသော ကူဋော ယဿ သောယံ ဗျာလမ္ဗမ္ဗုဓရဗိန္ဒုစုမ္ဗိတကူဋော ဣစ္စာဒိ။

သတ္တမိယတ္ထေ ဗဟုဗ္ဗီဟိ ယထာ – သမ္ပန္နာနိ သဿာနိ ယသ္မိံ ဇနပဒေ သောယံ သမ္ပန္နသဿော ဇနပဒေါ၊ သုလဘော ပိဏ္ဍော ဣမသ္မိန္တိ သုလဘပိဏ္ဍော ဒေသော။ အာကိဏ္ဏာ မနုဿာ ယဿံ ရာဇဓာနိယံ သာ အာကိဏ္ဏမနုဿာ ရာဇဓာနီ၊ ဗဟဝေါ တာပသာ ဧတသ္မိန္တိ ဗဟုတာပသော အဿမော၊ ဥပစိတံ မံသလောဟိတံ အသ္မိန္တိ ဥပစိတမံသလောဟိတံ သရီရံ၊ ဗဟဝေါ သာမိနော အသ္မိန္တိ ဗဟုဿာမိကံ နဂရံ။

‘‘ဗဟူ နဒိယော အသ္မိ’’န္တိ အတ္ထေ သမာသာဒိမှိ ကတေ –

သမာသန္တဂ္ဂဟဏံ၊ ကပ္ပစ္စယော စ ဝတ္တတေ။

၃၅၆။ နဒိမှာ စ။

သမာသန္တဂတာ နဒိမှာ ကပ္ပစ္စယော ဟောတိ၊ စသဒ္ဒေန တုအန္တာ စ။ နိစ္စတ္ထံ ဝစနံ။ နဒီတိ စေတ္ထ ဣတ္ထိဝါစကာနံ ဤကာရူကာရာနံ ပရသမညာ၊ တတော ‘‘ကွစာဒိမဇ္ဈုတ္တရာန’’န္တိအာဒိနာ နဒိသညဿ ကပ္ပစ္စယေ ရဿတ္တံ၊ ဗဟုနဒိကော ဇနပဒေါ။ ဧဝံ ဗဟုဇမ္ဗုကံ ဝနံ။ ဗဟုနာရိကောတိ ဆဋ္ဌီဗဟုဗ္ဗီဟိနာ သိဒ္ဓံ။ ဗဟဝေါ ကတ္တာရော အသ္မိံ၊ အဿာတိ ဝါ ဗဟုကတ္တုကော ဒေသော။ ဧဝံ ဗဟုဘတ္တုကော။

ဘိန္နာဓိကရဏော ယထာ – ဧကရတ္တိံ ဝါသော အဿာတိ ဧကရတ္တိဝါသော၊ သမာနေန ဇနေန သဒ္ဓိံ ဝါသော အဿာတိ သမာနဝါသော ¶ ပုရိသော။ ဥဘတော ဗျဉ္ဇနမဿ အတ္ထီတိ ဥဘဘောဗျဉ္ဇနကော၊ ဆတ္တံ ပါဏိမှိ အဿာတိ ဆတ္တပါဏိ ပုရိသော။ ဧဝံ ဒဏ္ဍပါဏိ၊ သတ္ထပါဏိ၊ ဝဇိရပါဏိ၊ ခဂ္ဂဟတ္ထော၊ သတ္ထဟတ္ထော၊ ဒါနေ အဇ္ဈာသယော အဿာတိ ဒါနဇ္ဈာသယော၊ ဒါနာဓိမုတ္တိကော၊ ဗုဒ္ဓဘတ္တိကော၊ သဒ္ဓမ္မဂါရဝေါ ဣစ္စာဒိ။

တိပဒေါ ယထာ – ပရက္ကမေနာဓိဂတာ သမ္ပဒါ ယေဟိ တေ ဘဝန္တိ ပရက္ကမာဓိဂတသမ္ပဒါ မဟာပုရိသာ။ ဧဝံ ဓမ္မာဓိဂတဘောဂါ၊ ဩဏီတော ပတ္တတော ပါဏိ ယေန သောယံ ဩဏီတပတ္တပါဏိ၊ သီဟဿ ပုဗ္ဗဒ္ဓံ ဝိယ ကာယော အဿာတိ သီဟပုဗ္ဗဒ္ဓကာယော၊ မတ္တာ ဗဟဝေါ မာတင်္ဂါ အသ္မိန္တိ မတ္တဗဟုမာတင်္ဂံ ဝနံ ဣစ္စာဒိ။

နနိပါတပုဗ္ဗပဒေါ ယထာ – နတ္ထိ ဧတဿ သမောတိ အသမော ဘဂဝါ။ ဣဓ ‘‘အတ္တံ နဿ တပ္ပုရိသေ’’တိ သုတ္တေ ‘‘အတ္တံ နဿာ’’တိ ယောဂဝိဘာဂေန နဿ အတ္တံ။ ဧဝံ အပ္ပဋိပုဂ္ဂလော၊ အပုတ္တကော၊ အဟေတုကော၊ ‘‘ကွစိ သမာသန္တ’’ဣစ္စာဒိနာ ကပ္ပစ္စယော၊ နတ္ထိ သံဝါသော ဧတေသန္တိ အသံဝါသာ၊ န ဝိဇ္ဇတေ ဝုဋ္ဌိ ဧတ္ထာတိ အဝုဋ္ဌိကော ဇနပဒေါ၊ အဘိက္ခုကော ဝိဟာရော၊ နတ္ထိ ဧတဿ ဥတ္တရောတိ အနုတ္တရော၊ ‘‘သရေ အန’’တိ အန၊ တပ္ပုရိသဂ္ဂဟဏမုပလက္ခဏံ၊ အထဝါ ‘‘တေသု ဝုဒ္ဓီ’’တိအာဒိနာ နဿ အန။ ဧဝံ နတ္ထိ အန္တော အဿာတိ အနန္တံ၊ န ဝိဇ္ဇန္တိ အာသဝါ ဧတေသန္တိ အနာသဝါ ဣစ္စာဒိ။

ပဌမာယတ္ထေ သဟပုဗ္ဗပဒေါ ယထာ – သဟ ဟေတုနာ ယော ဝတ္တတေတိ သဟေတုကော၊ သဟေတု ဝါ၊ ‘‘တေသု ဝုဒ္ဓီ’’တိအာဒိနာ ¶ သဟသဒ္ဒဿ သာဒေသော၊ ‘‘ကွစိ သမာသန္တ’’ဣစ္စာဒိနာ ကပ္ပစ္စယော စ၊ သဟ ပီတိယာ ဣမေ ဝတ္တန္တီတိ သပ္ပီတိကာ။ ဧဝံ သဟ ပစ္စယေဟိ ဝတ္တန္တီတိ သပ္ပစ္စယာ၊ သကိလေသော၊ သဥပါဒါနော၊ သပရိဝါရော၊ သဟ မူလေန ဥဒ္ဓတော သမူလုဒ္ဓတော ရုက္ခော။

ဥပမာနပုဗ္ဗပဒေါ ပဌမာယတ္ထေ တာဝ – ဥပမာနောပမေယျဘာဝပ္ပသိဒ္ဓတ္ထံ ဣဝသဒ္ဒပ္ပယောဂေါ၊ ကာယဗျာမာနံ သမပ္ပမာဏတာယ နိဂြောဓော ဣဝ ပရိမဏ္ဍလော ယော ရာဇကုမာရော သောယံနိဂြောဓပရိမဏ္ဍလော ရာဇကုမာရော။ ‘‘ဝုတ္တတ္ထာနမပ္ပယောဂေါ’’တိ ဣဝသဒ္ဒဿ အပ္ပယောဂေါ၊ သင်္ခေါ ဝိယ ပဏ္ဍရော အယန္တိ သင်္ခပဏ္ဍရော၊ ကာကော ဝိယ သူရော အယန္တိ ကာကသူရော၊ စက္ခု ဣဝ ဘူတော အယံ ပရမတ္ထဒဿနတောတိ စက္ခုဘူတော ဘဂဝါ။ ဧဝံ အတ္ထဘူတော။ ဓမ္မဘူတော၊ ဗြဟ္မဘူတော၊ အန္ဓော ဝိယ ဘူတော အယန္တိ အန္ဓဘူတော ဗာလော။ မုဉ္ဇပဗ္ဗဇမိဝ ဘူတာ အယန္တိ မုဉ္ဇပဗ္ဗဇဘူတာ ကုဒိဋ္ဌိ။ တန္တာကုလကမိဝ ဇာတာ အယန္တိ တန္တာကုလကဇာတာ။

ဆဋ္ဌိယတ္ထေ – သုဝဏ္ဏဝဏ္ဏော ဝိယ ဝဏ္ဏော ယဿ သောယံ သုဝဏ္ဏဝဏ္ဏော ဘဂဝါ။ ဥတ္တရပဒလောပေါ၊ နာဂဿ ဝိယ အဿ ဂတီတိ နာဂဂတိ။ ဧဝံ သီဟဂတိ၊ နာဂဝိက္ကမော၊ သီဟဝိက္ကမော၊ သီဟဟနု၊ ဧဏိဿ ဝိယ အဿ ဇင်္ဃာတိ ဧဏိဇင်္ဃော၊ သီဟဿ ပုဗ္ဗဒ္ဓံ ဝိယ အဿ ကာယောတိ သီဟပုဗ္ဗဒ္ဓကာယော၊ ဗြဟ္မုနော ဝိယ အဋ္ဌင်္ဂသမန္နာဂတော သရော အဿာတိ ဗြဟ္မဿရော။

ဝါသဒ္ဒတ္ထေ ¶ သင်္ချောဘယပဒေါ ယထာ – ဒွေ ဝါ တယော ဝါ ပတ္တာ ဒွတ္တိပတ္တာ၊ ‘‘ဒွေကဋ္ဌာနမာကာရော ဝါ’’တိ ဒွိသဒ္ဒန္တဿ အာတ္တံ၊ ရဿတ္တံ၊ ဒွီဟံ ဝါ တီဟံ ဝါ ဒွီဟတီဟံ၊ ဆ ဝါ ပဉ္စ ဝါ ဝါစာ ဆပ္ပဉ္စဝါစာ။ ဧဝံ သတ္တဋ္ဌမာသာ၊ ဧကယောဇနဒွိယောဇနာနိ။

ဒိသန္တရာဠတ္ထော ယထာ – ပုဗ္ဗဿာ စ ဒက္ခိဏဿာ စ ဒိသာယ ယဒန္တရာဠံ သာယံ ပုဗ္ဗဒက္ခိဏာ ဝိဒိသာ။ ဧတ္ထ တုလျာဓိကရဏပဒပရတ္တာဘာဝါ န ပုမ္ဘာဝါတိဒေသော၊ ‘‘ကွစာဒိမဇ္ဈုတ္တရာန’’န္တိအာဒိနာ ဒိသန္တရာဠတ္ထေ ပုဗ္ဗပဒဿ ရဿတ္တံ။ ဧဝံ ပုဗ္ဗုတ္တရာ၊ အပရဒက္ခိဏာ၊ ပစ္ဆိမုတ္တရာ။ ယဒါ ပန ဒက္ခိဏာ စ သာ ပုဗ္ဗာ စာတိ ကမ္မဓာရယသမာသော ဟောတိ၊ တဒါ ပုမ္ဘာဝါတိဒေသော ဥတ္တရပဒတ္ထပ္ပဓာနတ္တာ၊ သဗ္ဗနာမိကဝိဓာနမ္ပိ နိစ္စံ ဘဝတိယေဝ၊ ယထာ – ဒက္ခိဏပုဗ္ဗဿာ၊ ဒက္ခိဏပုဗ္ဗဿမိတိ။

ဗျတိဟာရလက္ခဏော ယထာ – ကေသေသု စ ကေသေသု စ ဂဟေတွာ ဣဒံ ယုဒ္ဓံ ပဝတ္တတီတိ ကေသာကေသိ၊ ဒဏ္ဍေဟိ စ ဒဏ္ဍေဟိ စ ပဟရိတွာ ဣဒံ ယုဒ္ဓံ ပဝတ္တတီတိ ဒဏ္ဍာဒဏ္ဍိ၊ ‘‘ကွစာဒိမဇ္ဈုတ္တရာန’’န္တိအာဒိနာ မဇ္ဈေဒီဃော၊ ‘‘တေသု ဝုဒ္ဓီ’’တိအာဒိနာ အန္တဿိကာရော။

ပဌမာဝိဘတျတ္ထဗဟုဗ္ဗီဟိ။

ဗဟုဗ္ဗီဟိသမာသော နိဋ္ဌိတော။

ဒွန္ဒသမာသ

အထ ဒွန္ဒသမာသော ဝုစ္စတေ။

သော စ ဒုဝိဓော ဣတရီတရယောဂ သမာဟာရတ္ထဘေဒေန။

တတ္ထ ¶ ဣတရီတရယောဂေ တာဝ – ‘‘သာရိပုတ္တမောဂ္ဂလ္လာန’’ဣတီဓ ဥဘယတ္ထာပိ ပဌမေကဝစနံ၊ သမုစ္စယဇောတနတ္ထံ စသဒ္ဒပ္ပယောဂေါ စ။

‘‘သာရိပုတ္တော စ မောဂ္ဂလ္လာနော စာ’’တိ ဝိဂ္ဂဟေ –

၃၅၇။ နာမာနံ သမုစ္စယော ဒွန္ဒော။

နာနာနာမာနမေဝ ဧကဝိဘတ္တိကာနံ ယုတ္တတ္ထာနံ ယော သမုစ္စယော၊ သော ဝိဘာသာ သမာသော ဘဝတိ၊ ဒွန္ဒသညော စ။

ဧတ္ထ စ သမုစ္စယော နာမ သမ္ပိဏ္ဍနံ၊ သော ပန အတ္ထဝသေန ကေဝလသမုစ္စယော အနွာစယော ဣတရီတရယောဂေါ သမာဟာရော စာတိ စတုဗ္ဗိဓော။

တတ္ထ ကေဝလသမုစ္စယေ၊ အနွာစယေ စ သမာသော န ဘဝတိ၊ ကြိယာသာပေက္ခတာယ နာမာနံ အညမညံ အယုတ္တတ္ထဘာဝတော၊ ယထာ – စီဝရံ ပိဏ္ဍပါတဉ္စ ပစ္စယံ သယနာသနံ အဒါသိ၊ ဒါနဉ္စ ဒေဟိ၊ သီလဉ္စ ရက္ခာဟိ။ ဣတရီတရယောဂေ၊ သမာဟာရေ စ သမာသော ဘဝတိ၊ တတ္ထ နာမာနံ အညမညံ ယုတ္တတ္ထဘာဝတော။

ဒွေ ဒွေ ပဒါနိ ဒွန္ဒာ၊ ဒွန္ဒဋ္ဌာ ဝါ ဒွန္ဒာ၊ ဒွန္ဒသဒိသတ္တာ အယံ သမာသောပိ အနွတ္ထသညာယ ဒွန္ဒောတိ ဝုစ္စတိ၊ ဥဘယပဒတ္ထပ္ပဓာနော ဟိ ဒွန္ဒော။

နနု စ ဥဘယပဒတ္ထပ္ပဓာနတ္တေ သတိ ဒွန္ဒေ ကထမေကတ္ထီဘာဝေါ သိယာတိ? ဝုစ္စတေ – သဒိသာဒိအတ္ထေပိ သဒ္ဒပ္ပဝတ္တိသမ္ဘဝေနဒွိန္နံ ပဒါနံ ဧကက္ခဏေယေဝ အတ္ထဒွယဒီပကတ္တာ န ဝိရောဓော၊ တဉ္စ ဒွန္ဒဝိသယမေဝ၊ တေသမတ္ထဒွယဒီပကတ္တာ။ ယထာ ဟိ ဘူသဒ္ဒေါ အနုဘဝအဘိဘဝါဒိကေ အတ္ထေ အနွဘိအာဒိဥပသဂ္ဂသဟိတောဝ ဒီပေတိ၊ န ကေဝလော၊ ဧဝံ ‘‘ဂဝဿက’’န္တိအာဒီသု ¶ ဂဝါဒီနံ အဿာဒိသဒ္ဒန္တရသဟိတာနမေဝ အတ္ထဒွယဒီပနံ၊ န ကေဝလာနန္တိ တဉ္စ ဒွန္ဒဝိသယမေဝ၊ န သဗ္ဗတ္ထာတိ ဒဋ္ဌဗ္ဗံ။ အထ ဝါ ဒွိန္နမ္ပိ ယထာဝုတ္တသမုစ္စယဒီပကတ္တာ အတ္ထိ ဒွန္ဒေပေကတ္ထိတာတိ န ကောစိ ဝိရောဓော၊ တတော သမာသသညာဝိဘတ္တိလောပါဒိ ဝုတ္တနယမေဝ၊ သမာသေနေဝ စတ္ထဿ ဝုတ္တတ္တာ ‘‘ဝုတ္တတ္ထာနမပ္ပယောဂေါ’’တိ စသဒ္ဒဿ အပ္ပယောဂေါ။

ဣဓ ဒွန္ဒေ အစ္စိတတရံ ပုဗ္ဗံ နိပတတိ၊ ပရဿေဝ လိင်္ဂဉ္စ။ ဣတရီတရယောဂဿ အဝယဝပ္ပဓာနတ္တာ သဗ္ဗတ္ထ ဗဟုဝစနမေဝ။

သာရိပုတ္တမောဂ္ဂလ္လာနာ၊ သာရိပုတ္တမောဂ္ဂလ္လာနေ၊ သာရိပုတ္တမောဂ္ဂလ္လာနေဟိ ဣစ္စာဒိ၊ သမဏော စ ဗြာဟ္မဏော စ သမဏဗြာဟ္မဏာ။ ဧဝံ ဗြာဟ္မဏဂဟပတိကာ၊ ခတ္တိယဗြာဟ္မဏာ၊ ဒေဝမနုဿာ၊ စန္ဒိမသူရိယာ၊ မာတာ စ ပိတာ စ မာတာပိတရော၊ ‘‘တေသု ဝုဒ္ဓီ’’တိအာဒိနာ ဒွန္ဒေ မာတုအာဒိပုဗ္ဗပဒုကာရဿ အာကာရော။ ဧဝံ ပိတာပုတ္တာ။

‘‘ဇာယာ စ ပတိ စာတိ ဇာယာပတိ’’ဣတီဓ –

‘‘ကွစီ’’တိ ဝတ္တတေ။

၃၅၈။ ဇာယာယ တုဒံ ဇာနိ ပတိမှိ။

ဇာယာသဒ္ဒဿ တုဒံ ဇာနိဣစ္စေတေ အာဒေသာ ဟောန္တိ ပတိသဒ္ဒေ ပရေ ကွစိ။ တုဒံပတိ၊ ဇာနိပတိ၊ ဇယမ္ပတိကာ။ ဧတ္ထ နိဂ္ဂဟီတာဂမော၊ ‘‘ကွစာ’’ဒိနာ ရဿတ္တဉ္စ။

ကွစိ အပ္ပသရံ ပုဗ္ဗံ နိပတတိ၊ ယထာ – စန္ဒော စ သူရိယော စ စန္ဒသူရိယာ၊ နိဂမာ စ ဇနပဒါ စ နိဂမဇနပဒါ၊ သုရာ စ အသုရာ ¶ စ ဂရုဠာ စ မနုဇာ စ ဘုဇဂါ စ ဂန္ဓဗ္ဗာ စ သုရာသုရဂရုဠမနုဇဘုဇဂဂန္ဓဗ္ဗာ။

ကွစိ ဣဝဏ္ဏုဝဏ္ဏန္တာနံ ပုဗ္ဗနိပါတော၊ ယထာ – အဂ္ဂိ စ ဓူမော စ အဂ္ဂိဓူမာ။ ဧဝံ ဂတိဗုဒ္ဓိဘုဇပဌဟရကရသယာ၊ ဓာတဝေါ စ လိင်္ဂါနိ စ ဓာတုလိင်္ဂါနိ။

ကွစိ သရာဒိအကာရန္တာနံ ပုဗ္ဗနိပါတော၊ ယထာ – အတ္ထော စ ဓမ္မော စ အတ္ထဓမ္မာ။ ဧဝံ အတ္ထသဒ္ဒါ၊ သဒ္ဒတ္ထာ ဝါ။

သမာဟာရေ ပန – ‘‘စက္ခု စ သောတဉ္စာ’’တိ အတ္ထေ ‘‘နာမာနံ သမုစ္စယော ဒွန္ဒော’’တိ ဒွန္ဒသမာသံ ကတွာ ဝိဘတ္တိလောပါဒိမှိ ကတေ –

‘‘နပုံသကလိင်္ဂံ၊ ဧကတ္တဉ္စာ’’တိ ဝတ္တတေ။

၃၅၉။ တထာ ဒွန္ဒေ ပါဏိ တူရိယ ယောဂ္ဂ သေနင်္ဂ ခုဒ္ဒဇန္တုက ဝိဝိဓ ဝိရုဒ္ဓ ဝိသဘာဂတ္ထာဒီနဉ္စ။

ယထာ ဒိဂုသမာသေ၊ တထာ သမာဟာရဒွန္ဒသမာသေပိ ပါဏိ တူရိယ ယောဂ္ဂ သေနင်္ဂတ္ထာနံ၊ ခုဒ္ဒဇန္တုကဝိဝိဓ ဝိရုဒ္ဓဝိသဘာဂတ္ထဣစ္စေဝမာဒီနဉ္စ ဧကတ္တံ ဟောတိ၊ နပုံသကလိင်္ဂတ္တဉ္စ။

ပါဏိနော စ တူရိယာနိ စ ယောဂ္ဂါနိ စ သေနာ စာတိ ပါဏိတူရိယ ယောဂ္ဂသေနာ၊ တာသမင်္ဂါနိ ပါဏိတူရိယယောဂ္ဂသေနင်္ဂါနိ၊ ဒွန္ဒတော ပရတ္တာ အင်္ဂသဒ္ဒေါ ပစ္စေကမဘိသမ္ဗဇ္ဈတေ။ ခုဒ္ဒါ စ တေ ဇန္တုကာ စေတိ ခုဒ္ဒဇန္တုကာ၊ ဝိဝိဓေနာကာရေန ဝိရုဒ္ဓါ ဝိဝိဓဝိရုဒ္ဓါ၊ နိစ္စဝိရောဓိနော။ သမာနော ဘာဂေါ ယေသံ တေ သဘာဂါ၊ ‘‘တေသု ဝုဒ္ဓီ’’တိအာဒိနာ သမာနဿ သအာဒေသော၊ ဝိဝိဓာ စ တေ လက္ခဏတော သဘာဂါ စ ကိစ္စတောတိ ဝိသဘာဂါ။ ပါဏိတူရိယယောဂ္ဂသေနင်္ဂါနိ စ ခုဒ္ဒဇန္တုကာ စ ဝိဝိဓဝိရုဒ္ဓါ စ ဝိသဘာဂါ စာတိ ဒွန္ဒော၊ ဣဓ ဗဟုတ္တာ ပုဗ္ဗနိပါတဿ အနိယမော၊ တေ အတ္ထာ ယေသံ ¶ တေ ပါဏိတူရိယယောဂ္ဂသေနင်္ဂခုဒ္ဒဇန္တုကဝိဝိဓဝိရုဒ္ဓဝိသဘာဂတ္ထာ၊ တေ အာဒယော ယေသံ တေ တဒါဒယော။

အာဒိဂ္ဂဟဏေန အညောညလိင်္ဂဝိသေသိတ သင်္ချာပရိမာဏတ္ထ ပစနစဏ္ဍာလတ္ထ ဒိသတ္ထာဒီနဉ္စ ဒွန္ဒေ ဧကတ္တံ၊ နပုံသကလိင်္ဂတ္တဉ္စ၊ ဣတိ ပါဏျင်္ဂတ္ထဘာဝတော စက္ခုသောတသဒ္ဒါနံ ဣမိနာ ဧကတ္တံ၊ နပုံသကလိင်္ဂတ္တဉ္စ ကတွာ သမာသတ္တာ နာမဗျပဒေသေ ကတေ သျာဒျုပ္ပတ္တိ အမာဒေသာဒိ။

စက္ခုသောတံ၊ ဟေ စက္ခုသောတ၊ စက္ခုသောတံ၊ စက္ခုသောတေန။ ဧဝံ သဗ္ဗတ္ထေကဝစနမေဝ။ မုခဉ္စ နာသိကာ စ မုခနာသိကံ၊ ‘‘သရော ရဿော နပုံသကေ’’တိ အန္တဿ ရဿတ္တံ၊ ဟနု စ ဂီဝါ စ ဟနုဂီဝံ။ ဧဝံ ကဏ္ဏနာသံ၊ ပါဏိပါဒံ၊ ဆဝိမံသလောဟိတံ။ ဟတ္ထပါဒါ မံသလောဟိတာနီတိအာဒီနံ ပန ဣတရီတရယောဂေန သိဒ္ဓံ။ ဧဝံ ပါဏျင်္ဂတ္ထေ။

တူရိယင်္ဂတ္ထေ ဂီတဉ္စ ဝါဒိတဉ္စ ဂီတဝါဒိတံ၊ သမ္မဉ္စ တာဠဉ္စ သမ္မတာဠံ၊ သမ္မန္တိ ကံသတာဠံ။ တာဠန္တိ ဟတ္ထတာဠံ။ သင်္ခေ စ ပဏဝေါ စ ဍိဏ္ဍိမော စ၊ သင်္ခါ စ ပဏဝါ စ ဍံဏ္ဍိမာ စာတိ ဝါ သင်္ခပဏဝဍိဏ္ဍိမံ၊ ပဏဝါဒယော ဒွေပိ ဘေရိဝိသေသော။

ယောဂ္ဂင်္ဂတ္ထေ ယထာ – ဖာလော စ ပါစနဉ္စ ဖာလပါစနံ၊ ယုဂဉ္စ နင်္ဂလဉ္စ ယုဂနင်္ဂလံ။

သေနင်္ဂတ္ထေ ဟတ္ထိနော စ အဿာ စ ဟတ္ထိအဿံ၊ ရထာ စ ပတ္တိကာ စ ရထပတ္တိကံ၊ အသိ စ စမ္မဉ္စ အသိစမ္မံ၊ စမ္မန္တိ သရဝါရဏဖလကံ။ ဓနု စ ကလာပေါ စ ဓနုကလာပံ၊ ကလာပေါတိ တူဏီရံ။

ခုဒ္ဒဇန္တုကတ္ထေ ဍံသာ စ မကသာ စ ဍံသမကသံ။ ဧဝံ ကုန္ထကိပိလ္လိကံ၊ ကီဋပဋင်္ဂံ၊ ကီဋသရီသပံ။ တတ္ထ ကုန္ထာ သုခုမကိပိလ္လိကာ၊ ကီဋာ ကပါလပိဋ္ဌိကပါဏာ။

ဝိဝိဓဝိရုဒ္ဓတ္ထေ ¶ အဟိ စ နကုလော စ၊ အဟီ စ နကုလာ စာတိ ဝါ အဟိနကုလံ။ ဧဝံ ဗိဠာရမူသိကံ၊ အန္တဿ ရဿတ္တံ၊ ကာကောလူကံ၊ သပ္ပမဏ္ဍူကံ၊ ဂရုဠသပ္ပံ။

ဝိသဘာဂတ္ထေ သီလဉ္စ ပညာဏဉ္စ သီလပညာဏံ၊ သမထော စ ဝိပဿနာ စ သမထဝိပဿနံ။ ဧဝံ နာမရူပံ၊ ဟိရောတ္တပ္ပံ။ သတိသမ္ပဇညံ၊ လောဘမောဟံ၊ ဒေါသမောဟံ၊ အဟိရိကာနောတ္တပ္ပံ၊ ထိနမိဒ္ဓံ၊ ဥဒ္ဓစ္စကုက္ကုစ္စမိစ္စာဒိ။ ‘‘အံမော နိဂ္ဂဟီတံ ဈလပေဟီ’’တိ ဧတ္ထ ‘‘အံမော’’တိ နိဒ္ဒေသဒဿနတော ကတ္ထစိ နပုံသကလိင်္ဂတ္တံ န ဟောတီတိ ဒဋ္ဌဗ္ဗံ၊ တေန အာဓိပစ္စပရိဝါရော ဆန္ဒပါရိသုဒ္ဓိ ပဋိသန္ဓိပ္ပဝတ္တိယန္တိအာဒိ သိဇ္ဈတိ။

အညောညလိင်္ဂဝိသေသိတာနံ ဒွန္ဒေ ဒါသီ စ ဒါသော စ ဒါသိဒါသံ၊ ‘‘ကွစာဒီ’’တိအာဒိနာ မဇ္ဈေ ရဿတ္တံ။ ဧဝံ ဣတ္ထိပုမံ၊ ပတ္တစီဝရံ၊ သာခါပလာသမိစ္စာဒိ။

သင်္ချာပရိမာဏတ္ထာနံ ဒွန္ဒေ ဧကကဉ္စ ဒုကဉ္စ ဧကကဒုကံ၊ သင်္ချာဒွန္ဒေ အပ္ပသင်္ချာ ပုဗ္ဗံ နိပတတိ။ ဧဝံ ဒုကတိကံ၊ တိကစတုက္ကံ၊ စတုက္ကပဉ္စကံ၊ ဒီဃော စ မဇ္ဈိမော စ ဒီဃမဇ္ဈိမံ။

ပစနစဏ္ဍာလတ္ထာနံ ဒွန္ဒေ ဩရဗ္ဘိကာ စ သူကရိကာ စ ဩရဗ္ဘိကသူကရိကံ။ ဧဝံ သာကုဏိကမာဂဝိကံ၊ သပါကော စ စဏ္ဍာလော စ သပါကစဏ္ဍာလံ၊ ပုက္ကုသဆဝဍာဟကံ၊ ဝေနရထကာရံ။ တတ္ထ ဝေနာ တစ္ဆကာ၊ ရထကာရာ စမ္မကာရာ။

ဒိသတ္ထာနံ ဒွန္ဒေ ပုဗ္ဗာ စ အပရာ စာတိ အတ္ထေ ဒွန္ဒသမာသံ၊ ဝိဘတ္တိလောပဉ္စ ကတွာ ဣဓာဒိဂ္ဂဟဏေန ဧကတ္တေ၊ နပုံသကလိင်္ဂတ္တေ စ ကတေ ‘‘သရော ရဿော နပုံသကေ’’တိ ရဿတ္တံ၊ ပုဗ္ဗာပရံ ¶ ၊ ဟေ ပုဗ္ဗာပရ၊ ပုဗ္ဗာပရံ၊ ပုဗ္ဗာပရေန၊ ပုဗ္ဗာပရဿ ဣစ္စာဒိ။ ဧဝံ ပုရတ္ထိမပစ္ဆိမံ၊ ဒက္ခိဏုတ္တရံ၊ အဓရုတ္တရံ။

‘‘နပုံသကလိင်္ဂံ၊ ဧကတ္တံ၊ ဒွန္ဒေ’’တိ စ ဝတ္တတေ။

၃၆၀။ ဝိဘာသာ ရုက္ခ တိဏ ပသု ဓန ဓည ဇနပဒါဒီနဉ္စ။

ရုက္ခ တိဏ ပသု ဓန ဓည ဇနပဒါဒီနမေကတ္တံ၊ နပုံသကလိင်္ဂတ္တဉ္စ ဝိဘာသာ ဟောတိ ဒွန္ဒေ သမာသေ။ ဧကတ္တာဘာဝေ ဗဟုဝစနံ၊ ပရဿေဝ လိင်္ဂဉ္စ။

တတ္ထ ရုက္ခာနံ ဒွန္ဒေ အဿတ္ထာ စ ကပိတ္ထာ စာတိ အတ္ထေ သမာဟာရေ ဒွန္ဒသမာသာဒိမှိ ကတေ ဣမိနာ ဝိကပ္ပေနေကတ္တံ၊ နပုံသကလိင်္ဂတ္တဉ္စ။ အဿတ္ထကပိတ္ထံ၊ အဿတ္ထကပိတ္ထာ ဝါ။ ဧဝံ အမ္ဗပနသံ၊ အမ္ဗပနသာ ဝါ၊ ခဒိရပလာသံ၊ ခဒိရပလာသာ ဝါ၊ ဓဝဿကဏ္ဏကံ၊ ဓဝဿကဏ္ဏကာ ဝါ။

တိဏာနံ ဒွန္ဒေ ဥသီရာနိ စ ဗီရဏာနိ စ ဥသီရဗီရဏံ၊ ဥသီရဗီရဏာနိ ဝါ။ ဧဝံ မုဉ္ဇပဗ္ဗဇံ၊ မုဉ္ဇပဗ္ဗဇာ ဝါ၊ ကာသကုသံ၊ ကာသကုသာ ဝါ။

ပသူနံ ဒွန္ဒေ အဇာ စ ဧဠကာ စ အဇေဠကံ၊ အဇေဠကာ ဝါ၊ ဟတ္ထီ စ ဂါဝေါ စ အဿာ စ ဝဠဝါ စ ဟတ္ထိဂဝဿဝဠဝံ၊ ဟတ္ထိဂဝဿဝဠဝါ ဝါ၊ ‘‘ကွစာ’’တိအာဒိနာ ရဿတ္တံ၊ ‘‘ဩသရေ စာ’’တိ အဝါဒေသော စ၊ ဂေါမဟိံသံ၊ ဂေါမဟိံသာ ဝါ၊ ဧဏေယျဝရာဟံ၊ ဧဏေယျဝရာဟာ ဝါ၊ သီဟဗျဂ္ဃတရစ္ဆံ၊ သီဟဗျဂ္ဃတရစ္ဆာ ဝါ။

ဓနာနံ ဒွန္ဒေ ဟိရညဉ္စ သုဝဏ္ဏဉ္စ ဟိရညသုဝဏ္ဏံ၊ ဟိရညသုဝဏ္ဏာနိ ဝါ။ ဧဝံ ဇာတရူပရဇတံ၊ ဇာတရူပရဇတာနိ ဝါ၊ မဏိမုတ္တသင်္ခဝေဠုရိယံ၊ မဏိမုတ္တသင်္ခဝေဠုရိယာ ဝါ။

ဓညာနံ ¶ ဒွန္ဒေ သာလီ စ ယဝါ စ သာလိယဝံ၊ သာလိယဝါ ဝါ။ ဧဝံ တိလမုဂ္ဂမာသံ၊ တိလမုဂ္ဂမာသာ ဝါ။

ဇနပဒါနံ ဒွန္ဒေ ကာသီ စ ကောသလာ စ ကာသိကောသလံ၊ ကာသိကောသလာ ဝါ၊ ဝဇ္ဇီ စ မလ္လာ စ ဝဇ္ဇိမလ္လံ၊ ဝဇ္ဇိမလ္လာ ဝါ၊ အင်္ဂါ စ မဂဓာ စ အင်္ဂမဂဓံ၊ အင်္ဂမဂဓာ ဝါ။

အာဒိဂ္ဂဟဏေန အညောညပ္ပဋိပက္ခဓမ္မာနံ၊ သကုဏတ္ထာနဉ္စ ဒွန္ဒေ ဝိဘာသာ ဧကတ္တံ ဟောတိ၊ နပုံသကလိင်္ဂတ္တဉ္စ။ ကုသလဉ္စ အကုသလဉ္စ ကုသလာကုသလံ၊ ကုသလာကုသလာ ဝါ၊ ဧဝံ သာဝဇ္ဇာနဝဇ္ဇံ၊ သာဝဇ္ဇာနဝဇ္ဇာ ဝါ၊ ဟီနပ္ပဏီတံ၊ ဟီနပ္ပဏီတာ ဝါ၊ ကဏှသုက္ကံ၊ ကဏှသုက္ကာ ဝါ၊ သုခဒုက္ခံ၊ သုခဒုက္ခာနိ ဝါ၊ ပဋိဃာနုနယံ၊ ပဋိဃာနုနယာ ဝါ၊ ဆာယာတပံ၊ ဆာယာတပါ ဝါ၊ အာလောကန္ဓကာရံ၊ အာလောကန္ဓကာရာ ဝါ၊ ရတ္တိ စ ဒိဝါ စ ရတ္တိန္ဒိဝံ၊ ရတ္တိန္ဒိဝါ ဝါ၊ အဟဉ္စ ရတ္တိ စ အဟောရတ္တံ၊ အဟောရတ္တာ ဝါ၊ ‘‘ကွစိ သမာသန္တ’’ဣစ္စာဒိနာ အာကာရိကာရာနမတ္တံ။

သကုဏာနံ ဒွန္ဒေ ဟံသာ စ ဗကာ စ ဟံသဗကံ၊ ဟံသဗကာ ဝါ။ ဧဝံ ကာရဏ္ဍဝစက္ကဝါကံ၊ ကာရဏ္ဍဝစက္ကဝါကာ ဝါ၊ မယူရကောဉ္စံ၊ မယူရကောဉ္စာ ဝါ၊ သုကသာလိကံ၊ သုကသာလိကာ ဝါ။

သမာဟာရဒွန္ဒော။

ယေဘုယျေန စေတ္ထ –

အစ္စိတပ္ပသရံ ပုဗ္ဗံ၊ ဣဝဏ္ဏုဝဏ္ဏကံ ကွစိ၊

ဒွန္ဒေ သရာဒျကာရန္တံ၊ ဗဟူသွနိယမော ဘဝေ။

ဒွန္ဒသမာသော နိဋ္ဌိတော။

ပုဗ္ဗုတ္တရုဘယညတ္ထ-ပ္ပဓာနတ္တာ ¶ စတုဗ္ဗိဓော၊

သမာသောယံ ဒိဂု ကမ္မ-ဓာရယေဟိ စ ဆဗ္ဗိဓော။

ဒုဝိဓော အဗျယီဘာဝေါ၊ နဝဓာ ကမ္မဓာရယော၊

ဒိဂု ဒုဓာ တပ္ပုရိသော၊ အဋ္ဌဓာ နဝဓာ ဘဝေ၊

ဗဟုဗ္ဗီဟိ ဒွိဓာ ဒွန္ဒော၊ သမာသော စတုရဋ္ဌဓာတိ။

ဣတိ ပဒရူပသိဒ္ဓိယံ သမာသကဏ္ဍော

စတုတ္ထော။