📜

၆။ အာချာတကဏ္ဍ

ဘူဝါဒိဂဏ

ဝိဘတ္တိဝိဓာန

အထ အာချာတဝိဘတ္တိယော ကြိယာဝါစီဟိ ဓာတူဟိ ပရာ ဝုစ္စန္တေ။

တတ္ထ ကြိယံ အာစိက္ခတီတိ အာချာတံ၊ ကြိယာပဒံ။ ဝုတ္တဉှိ ‘‘ကာလကာရကပုရိသပရိဒီပကံ ကြိယာလက္ခဏမာချာတိက’’န္တိ။ တတ္ထ ကာလောတိ အတီတာဒယော၊ ကာရကမိတိ ကမ္မကတ္တုဘာဝါ၊ ပုရိသာတိ ပဌမမဇ္ဈိမုတ္တမာ၊ ကြိယာတိ ဂမနပစနာဒိကော ဓာတွတ္ထော၊ ကြိယာလက္ခဏံ သညာဏံ ဧတဿာတိ ကြိယာလက္ခဏံ၊ အတိလိင်္ဂဉ္စ။

ဝုတ္တမ္ပိ စေတံ –

‘‘ယံ တိကာလံ တိပုရိသံ၊ ကြိယာဝါစိ တိကာရကံ၊

အတိလိင်္ဂံ ဒွိဝစနံ၊ တဒါချာတန္တိ ဝုစ္စတီ’’တိ။

ကာလာဒိဝသေန ဓာတွတ္ထံ ဝိဘဇန္တီတိ ဝိဘတ္တိယော၊ တျာဒယော၊ တာ ပန ဝတ္တမာနာ ပဉ္စမီ သတ္တမီ ပရောက္ခာဟိယျတ္တနီ အဇ္ဇတနီ ဘဝိဿန္တီ ကာလာတိပတ္တိ စာတိ အဋ္ဌဝိဓာ ဘဝန္တိ။

ကြိယံ ဓာရေန္တီတိ ဓာတဝေါ၊ ဘူဝါဒယော၊ ခါဒိဓာတုပ္ပစ္စယန္တာ စ၊ တေ ပန အတ္ထဝသာ ဒွိဓာ ဘဝန္တိ သကမ္မကာ၊ အကမ္မကာ စာတိ။ တတြ သကမ္မကာ ယေ ဓာတဝေါကမ္မာပေက္ခံ ကြိယံ ဝဒန္တိ၊ ယထာ – ကဋံ ကရောတိ၊ ဂါမံ ဂစ္ဆတိ၊ ဩဒနံ ပစတီတိအာဒယော၊ အကမ္မကာ ယေ ကမ္မနိရပေက္ခံ ကြိယံ ဝဒန္တိ၊ ယထာ – အစ္ဆတိ၊ သေတိ၊ တိဋ္ဌတီတိအာဒယော။

တေ ပန သတ္တဝိဓာ ဘဝန္တိ ဝိကရဏပ္ပစ္စယဘေဒေန၊ ကထံ? အဝိကရဏာ ဘူဝါဒယော။ နိဂ္ဂဟီတပုဗ္ဗကအဝိကရဏာ ရုဓာဒယော၊ ယဝိကရဏာ ဒိဝါဒယော၊ ဏုဏာ ဥဏာဝိကရဏာ သွာဒယော၊ နာပ္ပဏှာဝိကရဏာ ကိယာဒယော၊ ဩယိရဝိကရဏာ တနာဒယော၊ သကတ္ထေ ဏေ ဏယန္တာ စုရာဒယောတိ။

တတ္ထ ပဌမံ အဝိကရဏေသု ဘူဝါဒီသု ဓာတူသု ပဌမဘူတာ အကမ္မကာ ဘူဣစ္စေတသ္မာ ဓာတုတော တျာဒယော ပရာ ယောဇီယန္တေ။

ဘူသတ္တာယံ၊ ‘‘ဘူ’’ဣစ္စယံ ဓာတု သတ္တာယမတ္ထေ ဝတ္တတေ၊ ကြိယာသာမညဘူတေ ဘဝနေ ဝတ္တတေတိ အတ္ထော။

‘‘ဘူ’’ဣတိ ဌိတေ –

၄၂၄။ ဘူဝါဒယော ဓာတဝေါ။

ဘူဣစ္စေဝမာဒယော ယေ ကြိယာဝါစိနော သဒ္ဒဂဏာ၊ တေ ဓာတုသညာ ဟောန္တိ။ ဘူ အာဒိ ယေသံ တေ ဘူဝါဒယော၊ အထ ဝါ ဘူဝါ အာဒီ ပကာရာ ယေသံ တေ ဘူဝါဒယော။

ဘူဝါဒီသု ဝကာရောယံ၊ ဉေယျော အာဂမသန္ဓိဇော၊

ဘူဝါပ္ပကာရာ ဝါ ဓာတူ၊ သကမ္မာကမ္မကတ္ထတော။

‘‘ကွစိ ဓာတူ’’တိအာဒိတော ‘‘ကွစီ’’တိ ဝတ္တတေ။

၄၂၅။ ဓာတုဿန္တော လောပေါနေကဿရဿ။

အနေကဿရဿ ဓာတုဿ အန္တော ကွစိ လောပေါ ဟောတိ။

ကွစိဂ္ဂဟဏံ ‘‘မဟီယတိ သမထော’’တိအာဒီသု နိဝတ္တနတ္ထံ၊ ဣတိ အနေကဿရတ္တာဘာဝါ ဣဓ ဓာတွန္တလောပေါ န ဟောတိ။

တတော ဓာတွာဓိကာရဝိဟိတာနေကပ္ပစ္စယပ္ပသင်္ဂေ ‘‘ဝတ္တိစ္ဆာနုပုဗ္ဗိကာ သဒ္ဒပ္ပဋိပတ္တီ’’တိ ကတွာ ဝတ္တမာနဝစနိစ္ဆာယံ –

၄၂၆။ ဝတ္တမာနာ တိအန္တိ၊ သိထ၊ မိမ၊ တေအန္တေ၊ သေဝှေ၊ ဧမှေ။

တျာဒယော ဒွါဒသ ဝတ္တမာနာသညာ ဟောန္တီတိ တျာဒီနံ ဝတ္တမာနတ္ထဝိသယတ္တာ ဝတ္တမာနာသညာ။

၄၂၇။ ကာလေ။

အယမဓိကာရော။

ဣတော ပရံ တျာဒိဝိဘတ္တိဝိဓာနေ သဗ္ဗတ္ထ ဝတ္တတေ။

၄၂၈။ ဝတ္တမာနာ ပစ္စုပ္ပန္နေ။

ပစ္စုပ္ပန္နေ ကာလေ ဂမျမာနေ ဝတ္တမာနာဝိဘတ္တိ ဟောတိ၊ ကာလောတိ စေတ္ထ ကြိယာ၊ ကရဏံ ကာရော၊ ရကာရဿ လကာရော၊ ကာလော။

တသ္မာ –

ကြိယာယ ဂမျမာနာယ၊ ဝိဘတ္တီနံ ဝိဓာနတော၊

ဓာတူဟေဝ ဘဝန္တီတိ၊ သိဒ္ဓံ တျာဒိဝိဘတ္တိယော။

ဣဓ ပန ကာလဿ အတီတာနာဂတပစ္စုပ္ပန္နာဏတ္တိပရိကပ္ပကာလာဘိပတ္တိဝသေန ဆဓာ ဘိန္နတ္တာ ‘‘ပစ္စုပ္ပန္နေ’’တိ ဝိသေသေတိ။ တံ တံ ကာရဏံ ပဋိစ္စ ဥပ္ပန္နော ပစ္စုပ္ပန္နော၊ ပဋိလဒ္ဓသဘာဝေါ၊ န တာဝ အတီတောတိ အတ္ထော။

ပစ္စုပ္ပန္နသမီပေပိ၊ တဗ္ဗောဟာရူပစာရတော၊

ဝတ္တမာနာ အတီတေပိ၊ တံကာလဝစနိစ္ဆယာတိ။

တသ္မိံ ပစ္စုပ္ပန္နေ ဝတ္တမာနာဝိဘတ္တိံ ကတွာ၊ တဿာ ဌာနာနိယမေ ‘‘ဓာတုလိင်္ဂေဟိ ပရာ ပစ္စယာ’’တိ ပရိဘာသတော ဓာတုတော ပရံ ဝတ္တမာနပ္ပစ္စယေ ကတွာ၊ တေသမနိယမပ္ပသင်္ဂေသတိ ‘‘ဝတ္တိစ္ဆာနုပုဗ္ဗိကာ သဒ္ဒပ္ပဋိပတ္တီ’’တိ ပရဿပဒဝစနိစ္ဆာယံ –

၄၂၉။ အထ ပုဗ္ဗာနိ ဝိဘတ္တီနံ ဆ ပရဿပဒါနိ။

အထ တဒ္ဓိတာနန္တရံ ဝုစ္စမာနာနံ သဗ္ဗာသံ ဝတ္တမာနာဒီနံ အဋ္ဌဝိဓာနံ ဝိဘတ္တီနံ ယာနိ ယာနိ ပုဗ္ဗကာနိ ဆ ပဒါနိ၊ တာနိ တာနိ အတ္ထတော အဋ္ဌစတ္တာလီသမတ္တာနိ ပရဿပဒသညာနိ ဟောန္တီတိအာဒိမှိ ဆန္နံ ပရဿပဒသညာ၊ ပရဿတ္ထာနိ ပဒါနိ ပရဿပဒါနိ၊ တဗ္ဗာဟုလ္လတော တဗ္ဗောဟာရော။

‘‘ဓာတူဟိ ဏေ ဏယ’’ဣစ္စာဒိတော ‘‘ဓာတူဟီ’’တိ ဝတ္တမာနေ –

၄၃၀။ ကတ္တရိ ပရဿပဒံ။

ကတ္တရိကာရကေ အဘိဓေယျေ သဗ္ဗဓာတူဟိ ပရဿပဒံ ဟောတီတိ ပရဿပဒံ ကတွာ၊ တဿာပျနိယမပ္ပသင်္ဂေ ဝတ္တိစ္ဆာဝသာ –

ဝိပရိဏာမေန ‘‘ပရဿပဒါနံ၊ အတ္တနောပဒါန’’န္တိ စ ဝတ္တတေ။

၄၃၁။ ဒွေ ဒွေ ပဌမမဇ္ဈိမုတ္တမပုရိသာ။

တာသံ ဝိဘတ္တီနံ ပရဿပဒါန’မတ္တနောပဒါနဉ္စ ဒွေ ဒွေ ဝစနာနိ ယထာက္ကမံ ပဌမမဇ္ဈိမုတ္တမပုရိသသညာနိ ဟောန္တိ။ တံ ယထာ? တိ အန္တိဣတိ ပဌမပုရိသာ၊ သိ ထဣတိ မဇ္ဈိမပုရိသာ၊ မိ မဣတိ ဥတ္တမပုရိသာ။ အတ္တနောပဒေသုပိ တေ အန္တေဣတိ ပဌမပုရိသာ၊ သေ ဝှေဣတိ မဇ္ဈိမပုရိသာ၊ ဧ မှေဣတိ ဥတ္တမပုရိသာ။ ဧဝံ သေသာသု သတ္တသု ဝိဘတ္တီသုပိ ယောဇေတဗ္ဗန္တိ ။ ဧဝံ အဋ္ဌဝိဘတ္တိဝသေန ဆန္နဝုတိဝိဓေ အာချာတပဒေ ဒွတ္တိံသ ဒွတ္တိံသ ပဌမမဇ္ဈိမဥတ္တမပုရိသာ ဟောန္တီတိ ဝတ္တမာနပရဿပဒါဒိမှိ ဒွိန္နံ ပဌမပုရိသသညာ။

၄၃၂။ နာမမှိ ပယုဇ္ဇမာနေပိတုလျာဓိကရဏေ ပဌမော။

တုမှာမှသဒ္ဒဝဇ္ဇိတေ တုလျာဓိကရဏဘူတေ သာဓကဝါစကေ နာမမှိ ပယုဇ္ဇမာနေပိ အပ္ပယုဇ္ဇမာနေပိ ဓာတူဟိ ပဌမပုရိသော ဟောတီတိ ပဌမပုရိသံ ကတွာ၊ တဿာပျနိယမပ္ပသင်္ဂေ ကြိယာသာဓကဿ ကတ္တုနော ဧကတ္တေ ဝတ္တုမိစ္ဆိတေ ‘‘ဧကမှိ ဝတ္တဗ္ဗေ ဧကဝစန’’န္တိ ဝတ္တမာနပရဿပဒပဌမပုရိသေကဝစနံ တိ။

‘‘ပရော၊ ပစ္စယော၊ ဓာတူ’’တိ စ အဓိကာရော၊ ‘‘ယထာ ကတ္တရိ စာ’’တိ ဣတော ‘‘ကတ္တရီ’’တိ ဝိကရဏပ္ပစ္စယဝိဓာနေ သဗ္ဗတ္ထ ဝတ္တတေ။

၄၃၃။ ဘူဝါဒိတော အ။

ဘူဣစ္စေဝမာဒိတော ဓာတုဂဏတော ပရော အပစ္စယော ဟောတိ ကတ္တရိ ဝိဟိတေသု ဝိဘတ္တိပ္ပစ္စယေသု ပရေသု။ သဗ္ဗဓာတုကမှိယေဝါယမိဿတေ။

‘‘အသံယောဂန္တဿ၊ ဝုဒ္ဓီ’’တိ စ ဝတ္တတေ။

၄၃၄။ အညေသု စ။

ကာရိတတော အညေသု ပစ္စယေသု အသံယောဂန္တာနံ ဓာတူနံ ဝုဒ္ဓိ ဟောတိ။ စဂ္ဂဟဏေန ဏုပ္ပစ္စယဿာပိ ဝုဒ္ဓိ ဟောတိ။ ဧတ္ထ စ ‘‘ဃဋာဒီနံ ဝါ’’တိ ဣတော ဝါသဒ္ဒေါ အနုဝတ္တေတဗ္ဗော၊ သော စ ဝဝတ္ထိတဝိဘာသတ္ထော။ တေန –

ဣဝဏ္ဏုဝဏ္ဏန္တာနဉ္စ၊ လဟူပန္တာန ဓာတုနံ၊

ဣဝဏ္ဏုဝဏ္ဏာနမေဝ၊ ဝုဒ္ဓိ ဟောတိ ပရဿ န။

ယုဝဏ္ဏာနမ္ပိ ယ ဏု ဏာ-နာနိဋ္ဌာဒီသု ဝုဒ္ဓိ န၊

တုဒါဒိဿာဝိကရဏေ၊ န ဆေတွာဒီသု ဝါ သိယာ။

တဿာပျနိယမပ္ပသင်္ဂေ – ‘‘အယုဝဏ္ဏာနဉ္စာယော ဝုဒ္ဓီ’’တိ ပရိဘာသတော ဦကာရဿောကာရော ဝုဒ္ဓိ။

ဝိပရိဏာမေန ‘‘ဓာတူန’’န္တိ ဝတ္တတေ။

၄၃၅။ ဩ အဝ သရေ။

ဩကာရဿ ဓာတွန္တဿ သရေ ပရေ အဝါဒေသော ဟောတိ။ ‘‘သရလောပေါ မာဒေသ’’ဣစ္စာဒိနာ သရလောပါဒိမှိ ကတေ ‘‘နယေ ပရံ ယုတ္တေ’’တိ ပရနယနံ ကာတဗ္ဗံ။

သော ပုရိသော သာဓု ဘဝတိ၊ သာ ကညာ သာဓု ဘဝတိ၊ တံ စိတ္တံ သာဓု ဘဝတိ။

ဧတ္ထ ဟိ –

ကတ္တုနောဘိဟိတတ္တာဝ၊ အာချာတေန န ကတ္တရိ၊

တတိယာ ပဌမာ ဟောတိ၊ လိင်္ဂတ္ထံ ပနပေက္ခိယ။

သတိပိ ကြိယာယေကတ္တေ ကတ္တူနံ ဗဟုတ္တာ ‘‘ဗဟုမှိ ဝတ္တဗ္ဗေ ဗဟုဝစန’’န္တိ ဝတ္တမာနပရဿပဒပဌမပုရိသဗဟုဝစနံ အန္တိ၊ ပုရေ ဝိယ အပ္ပစ္စယဝုဒ္ဓိအဝါဒေသာ၊ သရလောပါဒိ။ တေ ပုရိသာ ဘဝန္တိ၊ အပ္ပယုဇ္ဇမာနေပိ ဘဝတိ၊ ဘဝန္တိ။

‘‘ပယုဇ္ဇမာနေပိ၊ တုလျာဓိကရဏေ’’တိ စ ဝတ္တတေ။

၄၃၆။ တုမှေ မဇ္ဈိမော။

တုလျာဓိကရဏဘူတေ တုမှသဒ္ဒေ ပယုဇ္ဇမာနေပိ အပ္ပယုဇ္ဇမာနေပိ ဓာတူဟိ မဇ္ဈိမပုရိသော ဟောတီတိ ဝတ္တမာနပရဿပဒမဇ္ဈိမပုရိသေကဝစနံသိ၊ သေသံ ပုရိမသမံ။ တွံ ဘဝသိ၊ တုမှေ ဘဝထ၊ အပ္ပယုဇ္ဇမာနေပိ ဘဝသိ၊ ဘဝထ။

တုလျာဓိကရဏေတိ ကိမတ္ထံ? တယာ ပစ္စတေ ဩဒနော။

တသ္မိံယေဝါဓိကာရေ –

၄၃၇။ အမှေ ဥတ္တမော။

တုလျာဓိကရဏဘူတေ အမှသဒ္ဒေ ပယုဇ္ဇမာနေပိ အပ္ပယုဇ္ဇမာနေပိ ဓာတူဟိ ဥတ္တမပုရိသော ဟောတီတိ ဝတ္တမာနပရဿပဒဥတ္တမပုရိသေကဝစနံ မိ၊ အပ္ပစ္စယဝုဒ္ဓိအဝါဒေသာ။

၄၃၈။ အကာရော ဒီဃံ ဟိမိမေသု။

အကာရော ဒီဃမာပဇ္ဇတေ ဟိမိမဣစ္စေတာသု ဝိဘတ္တီသု။ အဟံ ဘဝါမိ၊ မယံ ဘဝါမ။ ဘဝါမိ၊ ဘဝါမ။

‘‘ဝိဘတ္တီနံ၊ ဆာ’’တိ စ ဝတ္တတေ။

၄၃၉။ ပရာဏျတ္တနောပဒါနိ။

သဗ္ဗာသံ ဝတ္တမာနာနံ အဋ္ဌဝိဓာနံ ဝိဘတ္တီနံ ယာနိ ယာနိ ပရာနိ ဆ ပဒါနိ၊ တာနိ တာနိ အတ္တနောပဒသညာနိ ဟောန္တီတိ တေအာဒီနံ အတ္တနောပဒသညာ။

‘‘ဓာတူဟိ၊ အတ္တနောပဒါနီ’’တိ စ ဝတ္တတေ။

၄၄၀။ ကတ္တရိ စ။

ကတ္တရိ စ ကာရကေ အဘိဓေယျေ ဓာတူဟိ အတ္တနောပဒါနိ ဟောန္တိ။ စဂ္ဂဟဏံ ကတ္ထစိ နိဝတ္တနတ္ထံ၊ သေသံ ပရဿပဒေ ဝုတ္တနယေနေဝ ဝေဒိတဗ္ဗံ။ ဘဝတေ၊ ဘဝန္တေ၊ ဘဝသေ၊ ဘဝဝှေ၊ ဘဝေ၊ ဘဝါမှေ။

ပစ ပါကေ၊ ဓာတုသညာယံ ဓာတွန္တလောပေါ၊ ဝုတ္တနယေနေဝ တျာဒျုပ္ပတ္တိ၊ ဣဝဏ္ဏုဝဏ္ဏာနမဘာဝါ ဝုဒ္ဓိအဘာဝေါဝေတ္ထ ဝိသေသော။ သော ဒေဝဒတ္တော ဩဒနံ ပစတိ၊ ပစန္တိ၊ ပစသိ ၊ ပစထ၊ ပစာမိ၊ ပစာမ၊ သော ဩဒနံ ပစတေ၊ တေ ပစန္တေ၊ တွံ ပစသေ၊ တုမှေ ပစဝှေ၊ အဟံ ပစေ၊ မယံ ပစာမှေ။

ပဌမပုရိသာဒီနမေကဇ္ဈပ္ပဝတ္တိပ္ပသင်္ဂေ ပရိဘာသမာဟ –

၄၄၁။ သဗ္ဗေသမေကာဘိဓာနေ ပရော ပုရိသော။

သဗ္ဗေသံ ပဌမမဇ္ဈိမာနံ၊ ပဌမုတ္တမာနံ၊ မဇ္ဈိမုတ္တမာနံ တိဏ္ဏံ ဝါ ပုရိသာနံ ဧကတောဘိဓာနေ ကာတဗ္ဗေ ပရော ပုရိသော ယောဇေတဗ္ဗော။ ဧကကာလာနမေဝါဘိဓာနေ စာယံ။ သော စ ပစတိ၊ တွဉ္စ ပစသီတိ ပရိယာယပ္ပသင်္ဂေ တုမှေ ပစထာတိ ဘဝတိ။ ဧဝံ သော စ ပစတိ၊ အဟဉ္စ ပစာမီတိ မယံ ပစာမ၊ တထာ တွဉ္စ ပစသိ၊ အဟဉ္စ ပစာမိ၊ မယံ ပစာမ၊ သော စ ပစတိ၊ တွဉ္စ ပစသိ၊ အဟဉ္စ ပစာမိ၊ မယံ ပစာမ။ ဧဝံ သဗ္ဗတ္ထ ယောဇေတဗ္ဗံ။

ဧကာဘိဓာနေတိ ကိမတ္ထံ? ‘‘သော စ ပစတိ၊ တွဉ္စ ပစိဿသိ၊ အဟံ ပစိံ’’ ဧတ္ထ ဘိန္နကာလတ္တာ ‘‘မယံ ပစိမှာ’’တိ န ဘဝတိ။

ဂမု သပ္ပ ဂတိမှိ၊ ပုရေ ဝိယ ဓာတုသညာယံ ဓာတွန္တလောပေါ။

ကတ္တရိ တျာဒျုပ္ပတ္တိ။

၄၄၂။ ဂမိဿန္တော စ္ဆော ဝါ သဗ္ဗာသု။

ဂမုဣစ္စေတဿ ဓာတုဿန္တော မကာရော စ္ဆော ဟောတိ ဝါ သဗ္ဗာသု ဝိဘတ္တီသု၊ သဗ္ဗဂ္ဂဟဏေန မာနန္တ ယ ကာရိတပ္ပစ္စယေသု စ။ ဝဝတ္ထိတဝိဘာသတ္ထောယံ ဝါသဒ္ဒေါ။ တေနာယံ –

ဝိဓိံ နိစ္စဉ္စ ဝါသဒ္ဒေါ၊ မာန’န္တေသု တု ကတ္တရိ၊

ဒီပေတာနိစ္စမညတ္ထ၊ ပရောက္ခာယမသန္တကံ။

အပ္ပစ္စယပရနယနာနိ ၊ သော ပုရိသော ဂါမံ ဂစ္ဆတိ၊ တေ ဂစ္ဆန္တိ၊ ‘‘ကွစိ ဓာတူ’’တိအာဒိနာ ဂရုပုဗ္ဗရဿတော ပရဿ ပဌမပုရိသဗဟုဝစနဿ ရေ ဝါ ဟောတိ၊ ဂစ္ဆရေ။ တွံ ဂစ္ဆသိ၊ တုမှေ ဂစ္ဆထ။ အဟံ ဂစ္ဆာမိ၊ မယံ ဂစ္ဆာမ။

စ္ဆာဒေသာဘာဝေ ‘‘လောပဉ္စေတ္တမကာရော’’တိ အပ္ပစ္စယဿ ဧကာရော။ ဂမေတိ၊ ဂမေန္တိ၊ သရလောပေါ။ ဂမေသိ၊ ဂမေထ။ ဂမေမိ၊ ဂမေမ။

အတ္တနောပဒေပိ သော ဂါမံ ဂစ္ဆတေ၊ ဂစ္ဆန္တေ၊ ဂစ္ဆရေ။ ဂစ္ဆသေ၊ ဂစ္ဆဝှေ။ ဂစ္ဆေ၊ ဂစ္ဆာမှေ။

‘‘ကုတော နု တွံ အာဂစ္ဆသိ၊ ရာဇဂဟတော အာဂစ္ဆာမီ’’တိအာဒီသု ပန ပစ္စုပ္ပန္နသမီပေ ဝတ္တမာနဝစနံ။

‘‘ဝါ’’တိ ဝတ္တတေ။

၄၄၃။ ဂမိဿ ဃမ္မံ။

ဂမုဣစ္စေတဿ ဓာတုဿ သဗ္ဗဿ ဃမ္မာဒေသော ဟောတိ ဝါ။ ဃမ္မတိ၊ ဃမ္မန္တိ ဣစ္စာဒိ။

ဘာဝကမ္မေသု ပန –

၄၄၄။ အတ္တနောပဒါနိ ဘာဝေ စ ကမ္မနိ။

ဘာဝေ စ ကမ္မနိ စ ကာရကေ အဘိဓေယျေ အတ္တနောပဒါနိ ဟောန္တိ၊ စသဒ္ဒေန ကမ္မကတ္တရိပိ။ ဘဝနံ ဘာဝေါ၊ သော စ ကာရကန္တရေန အသံသဋ္ဌော ကေဝလော ဘဝနလဝနာဒိကော ဓာတွတ္ထော။ ကရီယတီတိ ကမ္မံ။ အကမ္မကာပိ ဓာတဝေါ သောပသဂ္ဂါ သကမ္မကာပိ ဘဝန္တိ၊ တသ္မာ ကမ္မနိ အနုပုဗ္ဗာ ဘူဓာတုတော ဝတ္တမာနတ္တနောပဒပဌမပုရိသေကဝစနံ တေ။

‘‘ဓာတူဟိ ဏေ ဏယ’’ဣစ္စာဒိတော ‘‘ဓာတူဟီ’’တိ ဝတ္တမာနေ –

၄၄၅။ ဘာဝကမ္မေသု ယော။

သဗ္ဗဓာတူဟိ ပရော ဘာဝကမ္မေသု ယပ္ပစ္စယော ဟောတိ။ အတ္တနောပဒဝိသယေဝါယမိဿတေ၊ ‘‘အညေသု စာ’’တိ သုတ္တေ အနုဝတ္တိတဝါဂ္ဂဟဏေန ယပ္ပစ္စယေ ဝုဒ္ဓိ န ဘဝတိ၊ အနုဘူယတေ သုခံ ဒေဝဒတ္တေန။

အာချာတေန အဝုတ္တတ္တာ၊ တတိယာ ဟောတိ ကတ္တရိ၊

ကမ္မဿာဘိဟိတတ္တာ န၊ ဒုတိယာ ပဌမာဝိဓ။

အနုဘူယန္တေ သမ္ပတ္တိယော တယာ။ အနုဘူယသေ တွံ ဒေဝဒတ္တေန၊ အနုဘူယဝှေ တုမှေ။ အဟံ အနုဘူယေ တယာ၊ မယံ အနုဘူယာမှေ။

‘‘ကွစိ ဓာတု’’ဣစ္စာဒိတော ‘‘ကွစီ’’တိ ဝတ္တမာနေ –

၄၄၆။ အတ္တနောပဒါနိ ပရဿပဒတ္တံ။

အတ္တနောပဒါနိ ကွစိ ပရဿပဒတ္တမာပဇ္ဇန္တေ၊ အကတ္တရိယေဝေတံ။ ယကာရဿ ဒွိတ္တံ၊ အနုဘူယျတိ မယာ သုခံ၊ အနုဘူယျတေ ဝါ၊ အနုဘူယျန္တိ။ အနုဘူယျသိ၊ အနုဘူယျထ။ အနုဘူယျာမိ၊ အနုဘူယျာမ။ ဒွိတ္တာဘာဝေ – အနုဘူယတိ၊ အနုဘူယန္တိ။

ကွစီတိ ကိံ? အနုဘူယတေ။

ဘာဝေ အဒဗ္ဗဝုတ္တိနော ဘာဝဿေကတ္တာ ဧကဝစနမေဝ၊ တဉ္စ ပဌမပုရိသဿေဝ၊ ဘူယတေ ဒေဝဒတ္တေန၊ ဒေဝဒတ္တေန သမ္ပတိ ဘဝနန္တိ အတ္ထော။

ပစဓာတုတော ကမ္မနိ အတ္တနောပဒေ ယပ္ပစ္စယေ စ ကတေ –

ဝိပရိဏာမေန ‘‘ယဿာ’’တိ ဝတ္တမာနေ –

၄၄၇။ တဿ စဝဂ္ဂယကာရဝကာရတ္တံ သဓာတွန္တဿ။

တဿ ဘာဝကမ္မဝိသယဿ ယပ္ပစ္စယဿ စဝဂ္ဂယကာရဝကာရတ္တံ ဟောတိ ဓာတွန္တေန သဟ ယထာသမ္ဘဝံ။ ဧတ္ထ စ ‘‘ဣဝဏ္ဏာဂမော ဝါ’’တိ ဣတော သီဟဂတိယာ ဝါသဒ္ဒေါ အနုဝတ္တေတဗ္ဗော၊ သော စ ဝဝတ္ထိတဝိဘာသတ္ထော။ တေန –

စဝဂ္ဂေါ စ တ ဝဂ္ဂါနံ၊ ဓာတွန္တာနံ ယဝတ္တနံ၊

ရဝါနဉ္စ သယပ္ပစ္စ-ယာနံ ဟောတိ ယထာက္ကမန္တိ။

ဓာတွန္တဿ စဝဂ္ဂါဒိတ္တာ စကာရေ ကတေ ‘‘ပရဒွေဘာဝေါ ဌာနေ’’တိ စကာရဿ ဒွိတ္တံ။ ပစ္စတေ ဩဒနော ဒေဝဒတ္တေန၊ ‘‘ကွစိ ဓာတူ’’တိအာဒိနာ ဂရုပုဗ္ဗရဿတော ပရဿ ပဌမပုရိသဗဟုဝစနဿ ကွစိ ရေ ဟောတိ။ ပစ္စရေ၊ ပစ္စန္တေ။ ပစ္စသေ၊ ပစ္စဝှေ။ ပစ္စေ၊ ပစ္စာမှေ။

ပရဿပဒါဒေသေ ပစ္စတိ၊ ပစ္စန္တိ။ ပစ္စသိ၊ ပစ္စထ။ ပစ္စာမိ၊ ပစ္စာမ။ တထာ ကမ္မကတ္တရိ ပစ္စတေ ဩဒနော သယမေဝ၊ ပစ္စန္တေ။ ပစ္စတိ၊ ပစ္စန္တိ ဝါ ဣစ္စာဒိ။

ဂမိတော ကမ္မနိ အတ္တနောပဒေ၊ ယပ္ပစ္စယေ စ ကတေ –

‘‘ဓာတူဟိ၊ တသ္မိံ၊ ယေ’’တိ စ ဝတ္တတေ။

၄၄၈။ ဣဝဏ္ဏာဂမော ဝါ။

သဗ္ဗေဟိ ဓာတူဟိ တသ္မိံ ဘာဝကမ္မဝိသယေ ယပ္ပစ္စယေ ပရေ ဣဝဏ္ဏာဂမော ဟောတိ ဝါတိ ဤကာရာဂမော။ ဝဝတ္ထိတဝိဘာသတ္ထောယံ ဝါသဒ္ဒေါ။ စ္ဆာဒေသော၊ ဂစ္ဆီယတေ ဂါမော ဒေဝဒတ္တေန ၊ ဂစ္ဆီယန္တေ။ ဂစ္ဆီယသေ၊ ဂစ္ဆီယဝှေ။ ဂစ္ဆီယေ၊ ဂစ္ဆီယာမှေ။

စ္ဆာဒေသာဘာဝေ –

‘‘ဓာတူဟိ၊ ယော၊ ဝါ’’တိ စ ဝတ္တတေ။

၄၄၉။ ပုဗ္ဗရူပဉ္စ။

ဟေဋ္ဌာနုတ္တေဟိ ပရဿေဝေဒံ၊ တေန ကဋပဝဂ္ဂယကာရလသန္တေဟေဝ ဓာတူဟိ ပရော ယပ္ပစ္စယော ပုဗ္ဗရူပမာပဇ္ဇတေ ဝါတိ မကာရာ ပရဿ ယကာရဿ မကာရော။ ဂမ္မတေ၊ ဂမီယတေ၊ ဂမ္မန္တေ၊ ဂမီယန္တေ။ ဂမ္မသေ၊ ဂမီယသေ၊ ဂမ္မဝှေ၊ ဂမီယဝှေ။ ဂမ္မေ၊ ဂမီယေ၊ ဂမ္မာမှေ၊ ဂမီယာမှေ။

ပရဿပဒတ္တေ – ဂစ္ဆီယျတိ၊ ဂစ္ဆီယျန္တိ။ ဂစ္ဆီယတိ၊ ဂစ္ဆီယန္တိ ဝါ။ ဂမ္မတိ၊ ဂမ္မန္တိ။ ဂမီယတိ၊ ဂမီယန္တိ။ ဣကာရာဂမေ ဂမိယျတိ၊ ဂမိယျန္တိ။ တထာ ဃမ္မီယတိ၊ ဃမ္မီယန္တိ ဣစ္စာဒိ။

ဝတ္တမာနာဝိဘတ္တိ။

၄၅၀။ ပဉ္စမီ တု အန္တု၊ ဟိ ထ၊ မိ မ၊ တံ အန္တံ၊ ဿုဝှော၊ ဧ အာမသေ။

တွာဒယော ဒွါဒသ ပဉ္စမီသညာ ဟောန္တိ။

၄၅၁။ အာဏတျာသိဋ္ဌေနုတ္တကာလေ ပဉ္စမီ။

အာဏတျတ္ထေ စ အာသီသတ္ထေ အနုတ္တကာလေ ပဉ္စမီဝိဘတ္တိ ဟောတိ။

သတိပိ ကာလာဓိကာရေ ပုန ကာလဂ္ဂဟဏေန ဝိဓိနိမန္တနာဇ္ဈေသနာနုမတိပတ္ထနာပတ္တကာလာဒီသု စ ပဉ္စမီ။ အာဏာပနမာဏတ္တိ၊ အာသီသနမာသိဋ္ဌော၊ သော စ ဣဋ္ဌဿ အသမ္ပတ္တဿ အတ္ထဿ ပတ္ထနံ၊ တသ္မိံ အာဏတျာသိဋ္ဌေ။ အနု သမီပေ ဥတ္တကာလော အနုတ္တကာလော၊ ပစ္စုပ္ပန္နကာလောတိ အတ္ထော၊ န ဥတ္တကာလောတိ ဝါ အနုတ္တကာလော၊ တသ္မိံ အနုတ္တကာလေ၊ ကာလမနာမသိတွာ ဟောတီတိ အတ္ထော။

တတ္ထ အာသီသနတ္ထေ ဘူဓာတုတော ပဉ္စမီပရဿပဒပဌမပုရိသေကဝစနံ တု၊ အပ္ပစ္စယဝုဒ္ဓိအဝါဒေသာ။ သော သုခီ ဘဝတု၊ တေ သုခိတာ ဘဝန္တု။

ဝိပရိဏာမေန ‘‘အကာရတော’’တိ ဝတ္တတေ။

၄၅၂။ ဟိလောပံ ဝါ။

အကာရတော ပရော ဟိဝိဘတ္တိ လောပမာပဇ္ဇတေ ဝါ။ တွံ သုခီ ဘဝ၊ ဘဝါဟိ ဝါ၊ ဟိမှိ ဒီဃော။ တုမှေ သုခိတာ ဘဝထ။ အဟံ သုခီ ဘဝါမိ၊ မယံ သုခိနော ဘဝါမ။

အတ္တနောပဒေ သော သုခီ ဘဝတံ၊ တေ သုခိတာ ဘဝန္တံ။ တွံ သုခီ ဘဝဿု၊ တုမှေ သုခိတာ ဘဝဝှော။ အဟံ သုခီ ဘဝေ၊ မယံ သုခိတာ ဘဝါမသေ။

ကမ္မနိ အနုဘူယတံ တယာ၊ အနုဘူယန္တံ။ အနုဘူယဿု၊ အနုဘူယဝှော။ အနုဘူယေ၊ အနုဘူယာမသေ။ ပရဿပဒတ္တေ အနုဘူယျတု၊ အနုဘူယျန္တု။ အနုဘူယတု၊ အနုဘူယန္တု ဝါ၊ အနုဘူယျာဟိ ဣစ္စာဒိ။ ဘာဝေ ဘူယတံ။

အာဏတ္တိယံ ကတ္တရိ ဒေဝဒတ္တော ဒါနိ ဩဒနံ ပစတု၊ ပစန္တု။ ပစ၊ ပစာဟိ၊ ပစထ။ ပစာမိ၊ ပစာမ။ ပစတံ၊ ပစန္တံ။ ပစဿု၊ ပစဝှော။ ပစေ၊ ပစာမသေ။

ကမ္မနိ ယပ္ပစ္စယစဝဂ္ဂါဒိ၊ ပစ္စတံ ဩဒနော ဒေဝဒတ္တေန၊ ပစ္စန္တံ။ ပစ္စဿု၊ ပစ္စဝှော။ ပစ္စေ၊ ပစ္စာမသေ။ ပရဿပဒတ္တေ ပစ္စတု၊ ပစ္စန္တု။ ပစ္စ၊ ပစ္စာဟိ၊ ပစ္စထ။ ပစ္စာမိ၊ ပစ္စာမ။

တထာ သော ဂါမံ ဂစ္ဆတု၊ ဂစ္ဆန္တု။ ဂစ္ဆ၊ ဂစ္ဆာဟိ၊ ဂစ္ဆထ။ ဂစ္ဆာမိ၊ ဂစ္ဆာမ။ ဂမေတု၊ ဂမေန္တု။ ဂမ၊ ဂမာဟိ၊ ဂမေထ။ ဂမေမိ၊ ဂမေမ။ ဂစ္ဆတံ၊ ဂစ္ဆန္တံ။ ဂစ္ဆဿု၊ ဂစ္ဆဝှော။ ဂစ္ဆေ၊ ဂစ္ဆာမသေ။ ဃမ္မာဒေသေ ဃမ္မတု၊ ဃမ္မန္တု ဣစ္စာဒိ။

ကမ္မနိ ဂစ္ဆီယတံ၊ ဂစ္ဆီယတု၊ ဂမီယတံ၊ ဂမီယတု၊ ဂမ္မတံ၊ ဂမ္မတု ဣစ္စာဒိ။

ဝိဓိမှိ ဣဓ ပဗ္ဗတော ဟောတု၊ အယံ ပါသာဒေါ သုဝဏ္ဏမယော ဟောတူတိအာဒိ။

နိမန္တနေ အဓိဝါသေတု မေ ဘန္တေ ဘဂဝါ ဘောဇနံ၊ ဣဓ နိသီဒတု ဘဝံ။

အဇ္ဈေသနေ ဒေသေတု ဘန္တေ ဘဂဝါ ဓမ္မံ။

အနုမတိယံ ပုစ္ဆတု ဘဝံ ပဉှံ၊ ပဝိသတု ဘဝံ၊ ဧတ္ထ နိသီဒတု။

ပတ္ထနာ ယာစနာ၊ ဒဒါဟိ မေ ဂါမဝရာနိ ပဉ္စ၊ ဧကံ မေ နယနံ ဒေဟိ။

ပတ္တကာလေ သမ္ပတ္တော တေ ကာလော ကဋကရဏေ၊ ကဋံ ကရောတု ဘဝံ ဣစ္စာဒိ။

ပဉ္စမီဝိဘတ္တိ။

၄၅၃။ သတ္တမီ ဧယျ ဧယျုံ၊ ဧယျာသိ ဧယျာထ၊ ဧယျာမိဧယျာမ၊ ဧထ ဧရံ၊ ဧထော ဧယျာဝှော၊ ဧယျံဧယျာမှေ။

ဧယျာဒယော ဒွါဒသ သတ္တမီသညာ ဟောန္တိ။

‘‘အနုတ္တကာလေ’’တိ ဝတ္တတေ။

၄၅၄။ အနုမတိပရိကပ္ပတ္ထေသုသတ္တမီ။

အနုမတျတ္ထေ စ ပရိကပ္ပတ္ထေ စ အနုတ္တကာလေ သတ္တမီဝိဘတ္တိ ဟောတိ။

အတ္ထဂ္ဂဟဏေန ဝိဓိနိမန္တနာဒီသု စ သတ္တမီ။ ကတ္တုမိစ္ဆတော ပရဿ အနုဇာနနံ အနုမတိ၊ ပရိကပ္ပနံ ပရိကပ္ပော၊ ‘‘ယဒိ နာမ ဘဝေယျာ’’တိ သလ္လက္ခဏံ နိရူပနံ၊ ဟေတုကြိယာယ သမ္ဘဝေ ဖလကြိယာယ သမ္ဘဝပရိကပ္ပော စ။

တတ္ထ ပရိကပ္ပေ သတ္တမီပရဿပဒပဌမပုရိသေကဝစနံ ဧယျ၊ အပ္ပစ္စယဝုဒ္ဓါဒိ ပုရိမသမံ၊ ‘‘ကွစိ ဓာတု ဝိဘတ္တီ’’တိအာဒိနာ ဧယျ ဧယျာသိ ဧယျာမိ ဧယျံဣစ္စေတေသံ ဝိကပ္ပေန ဧကာရာဒေသော။ သော ဒါနိ ကိံ နု ခေါ ဘဝေ၊ ယဒိ သော ပဌမဝယေ ပဗ္ဗဇေယျ၊ အရဟာ ဘဝေယျ၊ သစေ သင်္ခါရာ နိစ္စာ ဘဝေယျုံ၊ န နိရုဇ္ဈေယျုံ။ ယဒိ တွံ ဘဝေယျာသိ၊ တုမှေ ဘဝေယျာထ။ ကထမဟံ ဒေဝေါ ဘဝေယျာမိ၊ ကိံ နု ခေါ မယံ ဘဝေယျာမ။ တထာ ဘဝေထ၊ ဘဝေရံ။ ဘဝေထော၊ ဘဝေယျာဝှော။

ပတ္ထနေ တု အဟံ သုခီ ဘဝေ၊ ဗုဒ္ဓါ ဘဝေယျံ၊ ဘဝေယျာမှေ။

ကမ္မနိ သုခံ တယာ အနုဘူယေထ၊ အနုဘူယေရံ။ အနုဘူယေထော၊ အနုဘူယေယျာဝှော။ အနုဘူယေ၊ အနုဘူယေယျံ၊ အနုဘူယေယျာမှေ။ ပရဿပဒတ္တေ အနုဘူယေယျ၊ အနုဘူယေယျုံ။ အနုဘူယေယျာသိ ဣစ္စာဒိ။ ဘာဝေ ဘူယေထ။

ဝိဓိမှိ သော ဩဒနံ ပစေ၊ ပစေယျ၊ ပစေယျုံ။ တွံ ပစေ၊ ပစေယျာသိ၊ တုမှေ ပစေယျာထ။ အဟံ ပစေ၊ ပစေယျာမိ၊ မယံ ပစေယျာမ။ ပစေထ၊ ပစေရံ။ ပစေထော၊ ပစေယျာဝှော။ ပစေ၊ ပစေယျံ၊ ပစေယျာမှေ။

ကမ္မနိ ပစ္စေထ၊ ပစ္စေရံ။ ပစ္စေထော၊ ပစ္စေယျာဝှော။ ပစ္စေ၊ ပစ္စေယျံ၊ ပစ္စေယျာမှေ။ ပရဿပဒတ္တေ ပစ္စေ၊ ပစ္စေယျ၊ ပစ္စေယျုံ။ ပစ္စေယျာသိ ဣစ္စာဒိ။

အနုမတိယံ သော ဂါမံ ဂစ္ဆေ၊ ဂစ္ဆေယျ၊ ‘‘ကွစိ ဓာတူ’’တိအာဒိနာ ဧယျုဿ ဥံ ဝါ၊ ဂစ္ဆုံ၊ ဂစ္ဆေယျုံ။ တွံ ဂစ္ဆေ၊ ဂစ္ဆေယျာသိ၊ ဂစ္ဆေယျာထ။ ဂစ္ဆေ၊ ဂစ္ဆေယျာမိ၊ ဂစ္ဆေယျာမ။ ဂမေ၊ ဂမေယျ၊ ဂမုံ၊ ဂမေယျုံ။ ဂမေ၊ ဂမေယျာသိ၊ ဂမေယျာထ။ ဂမေ၊ ဂမေယျာမိ၊ ဂမေယျာမ။ ဂစ္ဆေထ၊ ဂစ္ဆေရံ။ ဂစ္ဆေထော၊ ဂစ္ဆေယျာဝှော။ ဂစ္ဆေ၊ ဂစ္ဆေယျံ၊ ဂစ္ဆေယျာမှေ။ ဂမေထ၊ ဂမေရံ ဣစ္စာဒိ။

ကမ္မနိ ဂစ္ဆီယေထ၊ ဂမီယေထ၊ ဂစ္ဆီယေရံ၊ ဂမီယေရံ ဣစ္စာဒိ။ ပရဿပဒတ္တေ ဂစ္ဆီယေယျ၊ ဂမီယေယျ၊ ဂမ္မေယျ၊ ဂမ္မေယျုံ ဣစ္စာဒိ။ တထာ ဃမ္မေ၊ ဃမ္မေယျ၊ ဃမ္မေယျုံ ဣစ္စာဒိ။

သတ္တမီဝိဘတ္တိ။

ပစ္စုပ္ပန္နာဏတ္တိပရိကပ္ပကာလိကဝိဘတ္တိနယော။

၄၅၅။ ဟိယျတ္တနီ အာဦ၊ ဩတ္ထ၊ အံမှာ၊ တ္ထတ္ထုံ၊ သေဝှံ၊ ဣံမှသေ။

အာအာဒယော ဒွါဒသ ဟိယျတ္တနီသညာ ဟောန္တိ။

‘‘အပ္ပစ္စက္ခေ၊ အတီတေ’’တိ စ ဝတ္တတေ။

၄၅၆။ ဟိယျောပဘုတိ ပစ္စက္ခေ ဟိယျတ္တနီ။

ဟိယျောပဘုတိ အတီတေ ကာလေ ပစ္စက္ခေ ဝါ အပ္ပစ္စက္ခေ ဝါ ဟိယျတ္တနီဝိဘတ္တိ ဟောတီတိ ဟိယျတ္တနီပရဿပဒပဌမပုရိသေကဝစနံ အာ။

‘‘ကွစိ ဓာတု’’ဣစ္စာဒိတော ‘‘ကွစိ၊ ဓာတူန’’န္တိ စ ဝတ္တတေ။

၄၅၇။ အကာရာဂမောဟိယျတ္တနီ အဇ္ဇတနီကာလာတိပတ္တီသု။

ကွစိ ဓာတူနမာဒိမှိ အကာရာဂမော ဟောတိ ဟိယျတ္တနီအဇ္ဇတနီကာလာတိပတ္တိဣစ္စေတာသု တီသု ဝိဘတ္တီသု။ ကထမယမကာရာဂမော ဓာတွာဒိမှီတိ စေ?

သတိဿရေပိ ဓာတွန္တေ၊ ပုနကာရာဂမဿိဓ၊

နိရတ္ထတ္တာ ပယောဂါနု ရောဓာ ဓာတွာဒိတော အယံ။

အပ္ပစ္စယဝုဒ္ဓိအဝါဒေသသရလောပါဒိ ဝုတ္တနယမေဝ။

အဘဝါ၊ အဘဝူ။ အဘဝေါ၊ ‘‘ကွစိ ဓာတူ’’တိအာဒိနာ ဩကာရဿ အအာဒေသော ဝါ၊ အဘဝ၊ အဘဝတ္ထ။ အဘဝံ၊ အဘဝမှာ။ အဘဝတ္ထ၊ အဘဝတ္ထုံ။ အဘဝသေ၊ အဘဝဝှံ။ အဘဝိံ၊ အဘဝမှသေ။

ကမ္မနိ ယပ္ပစ္စယော၊ တယာ သုခမနွဘူယတ္ထ၊ အကာရာဂမာဘာဝေ အနုဘူယတ္ထ၊ ‘‘ကွစိ ဓာတူ’’တိအာဒိနာ တ္ထဿ ထာဒေသော၊ အနွဘူယထ၊ အနုဘူယထ၊ အနွဘူယတ္ထုံ၊ အနုဘူယတ္ထုံ။ အနွဘူယသေ၊ အနုဘူယသေ၊ အနွဘူယဝှံ၊ အနုဘူယဝှံ။ အနွဘူယိံ၊ အနုဘူယိံ၊ အနွဘူယမှသေ၊ အနုဘူယမှသေ။ ပရဿပဒတ္တေ အနွဘူယာ၊ အနုဘူယာ ဣစ္စာဒိ။ ဘာဝေ အနွဘူယတ္ထ။

တထာ သော ဩဒနံ အပစာ၊ ပစာ၊ အပစူ၊ ပစူ။ အပစော၊ ပစော၊ အပစတ္ထ၊ ပစတ္ထ။ အပစံ၊ ပစံ၊ အပစမှာ၊ ပစမှာ။ အပစတ္ထ၊ ပစတ္ထ၊ အပစတ္ထု၊ ပစတ္ထုံ။ အပစသေ၊ ပစသေ၊ အပစဝှံ၊ ပစဝှံ။ အပစိံ၊ ပစိံ၊ အပစမှသေ၊ ပစမှသေ။

ကမ္မနိ အပစ္စထ၊ အပစ္စတ္ထ၊ အပစ္စတ္ထုံ။ အပစ္စသေ၊ အပစ္စဝှံ။ အပစ္စိံ၊ အပစ္စမှသေ။ အပစ္စာ၊ အပစ္စူ ဣစ္စာဒိ။

တထာ အဂစ္ဆာ၊ အဂစ္ဆူ။ အဂစ္ဆော၊ အဂစ္ဆ၊ အဂစ္ဆတ္ထ။ အဂစ္ဆံ၊ အဂစ္ဆမှာ။ အဂစ္ဆတ္ထ၊ အဂစ္ဆတ္ထုံ။ အဂစ္ဆသေ၊ အဂစ္ဆဝှံ။ အဂစ္ဆိံ၊ အဂစ္ဆမှသေ။ အဂမာ၊ အဂမူ။ အဂမော၊ အဂမ၊ အဂမတ္ထ။ အဂမံ၊ အဂမမှာ။ အဂမတ္ထ၊ အဂမတ္ထုံ။ အဂမသေ၊ အဂမဝှံ။ အဂမိံ၊ အဂမမှသေ။

ကမ္မနိ အဂစ္ဆီယတ္ထ၊ ဂစ္ဆီယတ္ထ၊ အဂမီယတ္ထ၊ ဂမီယတ္ထ၊ အဂစ္ဆီယတ္ထုံ၊ ဂစ္ဆီယတ္ထုံ၊ အဂမီယတ္ထုံ၊ ဂမီယတ္ထုံ ဣစ္စာဒိ။ တထာ အဃမ္မာ၊ အဃမ္မူ ဣစ္စာဒိ။

ဟိယျတ္တနီဝိဘတ္တိ။

၄၅၈။ ဟိယျတ္တနီ သတ္တမီ ပဉ္စမီ ဝတ္တမာနာ သဗ္ဗဓာတုကံ။

ဟိယျတ္တနာဒယော စတဿော ဝိဘတ္တိယော သဗ္ဗဓာတုကသညာ ဟောန္တီတိ ဟိယျတ္တနာဒီနံ သဗ္ဗဓာတုကသညတ္တာ ‘‘ဣကာရာဂမော အသဗ္ဗဓာတုကမှီ’’တိ ဝုတ္တော ဣကာရာဂမော န ဘဝတိ။

သဗ္ဗဓာတုကံ။

၄၅၉။ ပရောက္ခာ အ ဥ၊ ဧ တ္ထ၊ အံ မှ၊ တ္ထ ရေ၊ ထော ဝှော၊ ဣံမှေ။

အအာဒယော ဒွါဒသ ပရောက္ခာသညာ ဟောန္တိ။ အက္ခာနံ ဣန္ဒြိယာနံ ပရံ ပရောက္ခာ၊ တဒ္ဒီပကတ္တာ အယံ ဝိဘတ္တိ ပရောက္ခာတိ ဝုစ္စတိ။

၄၆၀။ အပစ္စက္ခေပရောက္ခာတီတေ။

အပစ္စက္ခေ ဝတ္တုနော ဣန္ဒြိယာဝိသယဘူတေ အတီတေ ကာလေ ပရောက္ခာဝိဘတ္တိ ဟောတိ။ အတိက္ကမ္မ ဣတောတိ အတီတော၊ ဟုတွာ အတိက္ကန္တောတိ အတ္ထော။

ဟေဋ္ဌာ ဝုတ္တနယေန ပရောက္ခာပရဿပဒပဌမပုရိသေကဝစနံ အ။ ‘‘ဘူ အ’’ဣတီဓ –

ဝိပရိဏာမေန ‘‘ဓာတူန’’န္တိ ဝတ္တတေ။

၄၆၁။ ကွစာဒိဝဏ္ဏာနမေကဿရာနံ ဒွေဘာဝေါ။

ဓာတူနမာဒိဘူတာနံ ဝဏ္ဏာနမေကဿရာနံ ကွစိ ဒွေဘာဝေါ ဟောတိ။ ဝဝတ္ထိတဝိဘာသတ္ထောယံ ကွစိသဒ္ဒေါ၊ တေန –

ခ ဆ သေသု ပရောက္ခာယံ၊ ဒွေဘာဝေါ သဗ္ဗဓာတုနံ၊

အပ္ပစ္စယေ ဇုဟောတျာဒိ-ဿပိ ကိစ္စာဒိကေ ကွစိ။

‘‘ဘူ ဘူ အ’’ဣတီဓ –

၄၆၂။ ပုဗ္ဗောဗ္ဘာသော။

ဒွေဘူတဿ ဓာတုဿ ယော ပုဗ္ဗော အဝယဝေါ၊ သော အဗ္ဘာသသညော ဟောတီတိ အဗ္ဘာသသညာ။

အဗ္ဘာသဂ္ဂဟဏမနုဝတ္တတေ။

၄၆၃။ အန္တဿိဝဏ္ဏာကာရော ဝါ။

အဗ္ဘာသဿ အန္တဿ ဣဝဏ္ဏော ဟောတိ ဝါ၊ အကာရော စ။ ဝဝတ္ထိတဝိဘာသတ္ထောယံ ဝါသဒ္ဒေါ။ တေန –

ခ ဆ သေသု အဝဏ္ဏဿ၊

ဣကာရော သဂုပုဿ ဤ၊

ဝါဿ ဘူဿ ပရောက္ခာယံ၊

အကာရော နာပရဿိမေတိ။

ဦကာရဿ အကာရော။

၄၆၄။ ဒုတိယစတုတ္ထာနံ ပဌမတတိယာ။

အဗ္ဘာသဂတာနံ ဒုတိယစတုတ္ထာနံ ဝဂ္ဂဗျဉ္ဇနာနံ ယထာက္ကမံ ပဌမတတိယာ ဟောန္တီတိ ဘကာရဿ ဗကာရော။

၄၆၅။ ဗြူဘူနမာဟဘူဝါ ပရောက္ခာယံ။

ဗြူဘူဣစ္စေတေသံ ဓာတူနံ အာဟဘူဝဣစ္စေတေ အာဒေသာ ဟောန္တိ ပရောက္ခာဝိဘတ္တိယန္တိ ဘူသဒ္ဒဿ ဘူဝအာဒေသော၊ ‘‘သရလောပေါ မာဒေသပ္ပစ္စယာဒိမှီ’’တိအာဒိနာ သရလောပါဒိ၊ သော ကိရ ရာဇာ ဗဘူဝ၊ တေ ကိရ ဗဘူဝု။ တွံ ကိရ ဗဘူဝေ။

‘‘ဓာတူဟီ’’တိ ဝတ္တတေ၊ သီဟဂတိယာ ကွစိဂ္ဂဟဏဉ္စ။

၄၆၆။ ဣကာရာဂမော အသဗ္ဗဓာတုကမှိ။

သဗ္ဗသ္မိံ အသဗ္ဗဓာတုကမှိ ပရေ ကွစိ ဓာတူဟိ ပရော ဣကာရာဂမော ဟောတိ။

အသဗ္ဗဓာတုကေ ဗျဉ္ဇ-နာဒိမှေ ဝါယမာဂမော၊

ကွစာဓိကာရတော ဗျဉ္ဇ-နာဒေါပိ ကွစိ နော သိယာ။

ဧတ္ထ စ ‘‘န သဗ္ဗဓာတုကံ အသဗ္ဗဓာတုက’’မိတိ ကတွာ ‘‘ဟိယျတ္တနီ သတ္တမီ ပဉ္စမီ ဝတ္တမာနာ သဗ္ဗဓာတုက’’န္တိ ဟိယျတ္တနီအာဒီနံ သဗ္ဗဓာတုကသညာယ ဝုတ္တတ္တာ တဒညာ စတဿော ဝိဘတ္တိယော အသဗ္ဗဓာတုကန္တိ ဝုစ္စတိ။

တုမှေ ကိရ ဗဘူဝိတ္ထ။ အဟံ ကိရ ဗဘူဝံ၊ မယံ ကိရ ဗဘူဝိမှ။ အတ္တနောပဒေ သော ဗဘူဝိတ္ထ၊ ဗဘူဝိရေ။ ဗဘူဝိတ္ထော၊ ဗဘူဝိဝှော။ ဗဘူဝိံ၊ ဗဘူဝိမှေ။

ကမ္မနိ အတ္တနောပဒေ ဤကာရာဂမယပ္ပစ္စယိကာရာဂမာ၊ အနုဗဘူဝီယိတ္ထ၊ ယပ္ပစ္စယဿ အသဗ္ဗဓာတုကမှိ ‘‘ကွစိ ဓာတူ’’တိအာဒိနာ လောပေ ကတေ ဣဝဏ္ဏာဂမော န ဘဝတိ၊ တယာ ကိရ အနုဗဘူဝိတ္ထ၊ အနုဗဘူဝိရေ ဣစ္စာဒိ။ ဘာဝေ ဗဘူဝီယိတ္ထ၊ ဗဘူဝိတ္ထ ဝါ။

တထာ ပပစ၊ ပပစူ။ ပပစေ၊ ပပစိတ္ထ။ ပပစံ၊ ပပစိမှ။ ပပစိတ္ထ၊ ပပစိရေ။ ပပစိတ္ထော၊ ပပစိဝှော။ ပပစိံ၊ ပပစိမှေ။

ကမ္မနိ ပပစ္စိတ္ထ၊ ပပစ္စိရေ ဣစ္စာဒိ။ တထာ အပစ္စ၊ အပစ္စူ ဣစ္စာဒိ။

ဂမိမှိ ‘‘ကွစာဒိဝဏ္ဏာန’’န္တိအာဒိနာ ဒွေဘာဝေါ၊ ‘‘ပုဗ္ဗောဗ္ဘာသော’’တိ အဗ္ဘာသသညာ။

‘‘အဗ္ဘာသေ’’တိ ဝတ္တတေ။

၄၆၇။ ကဝဂ္ဂဿ စဝဂ္ဂေါ။

အဗ္ဘာသေ ဝတ္တမာနဿ ကဝဂ္ဂဿ စဝဂ္ဂေါ ဟောတီတိ ဝကာရဿ ဇကာရော၊ ‘‘ကွစိ ဓာတူ’’တိအာဒိနာ အနဗ္ဘာသဿ ပဌမပုရိသေကဝစနမှိ ဒီဃော။ သော ဂါမံ ဇဂါမ ကိရ၊ ဇဂမ ဝါ၊ ဇဂမု။ ဇဂမေ၊ ဇဂမိတ္ထ။ ဇဂမံ၊ ဇဂမိမှ။ ဇဂမိတ္ထ၊ ဇဂမိရေ။ ဇဂမိတ္ထော၊ ဇဂမိဝှော။ ဇဂမိံ၊ ဇဂမိမှေ။

ကမ္မနိ ဇဂမီယိတ္ထ၊ ဇဂမိတ္ထ ဝါ ဣစ္စာဒိ။

ပရောက္ခာဝိဘတ္တိ။

၄၆၈။ အဇ္ဇတနီ ဤ ဥံ၊ ဩ တ္ထ၊ ဣံ မှာ၊ အာ ဦ၊ သေ ဝှံ၊ အမှေ။

ဤအာဒယော ဒွါဒသ အဇ္ဇတနီသညာ ဟောန္တိ။ အဇ္ဇ ဘဝေါ အဇ္ဇတနော၊ တဒ္ဒီပကတ္တာ အယံ ဝိဘတ္တိ အဇ္ဇတနီတိ ဝုစ္စတိ။

‘‘အပစ္စက္ခေ၊ အတီတေ၊ ပစ္စက္ခေ’’တိ စ ဝတ္တတေ။

၄၆၉။ သမီပေဇ္ဇတနီ။

သမီပေ သမီပတော ပဋ္ဌာယ အဇ္ဇပ္ပဘုတိ အတီတေ ကာလေ ပစ္စက္ခေ စ အပစ္စက္ခေ စ အဇ္ဇတနီဝိဘတ္တိ ဟောတီတိ အဇ္ဇတနီပရဿပဒပဌမပုရိသေကဝစနံ ဤ။

ပုရေ ဝိယ အကာရာဂမော၊ ဝုဒ္ဓါဒိ စ၊ ‘‘ကွစိ ဓာတုဝိဘတ္တီ’’တိအာဒိနာ ဤမှာဒိဝိဘတ္တီနံ ကွစိ ရဿတ္တံ၊ ဩအာအဝစနာနံ ဣတ္ထအမာဒေသာ စ၊ သရလောပါဒိ၊ သော အဘဝိ၊ အဘဝီ ဝါ၊ အကာရာဂမာဘာဝေ ဘဝိ။

မဏ္ဍူကဂတိယာ ‘‘ဝါ’’တိ ဝတ္တတေ။

၄၇၀။ သဗ္ဗတော ဥံ ဣံ သု။

သဗ္ဗေဟိ ဓာတူဟိ ဥံဝိဘတ္တိဿ ဣံသွာဒေသော ဟောတိ ဝါ။

တေ အဘဝိံသု၊ ဘဝိံသု ဝါ၊ အဘဝုံ၊ ဘဝုံ ဝါ။ တွံ အဘဝိ၊ ဘဝိ ဝါ၊ အဘဝေါ၊ ဘဝေါ ဝါ၊ တုမှေ အဘဝိတ္ထ၊ ဘဝိတ္ထ ဝါ၊ ဣကာရာဂမော။ အဟံ အဘဝိံ၊ ဘဝိံ ဝါ၊ မယံ အဘဝိမှ၊ ဘဝိမှ ဝါ၊ အဘဝိမှာ၊ ဘဝိမှာ ဝါ။ သော အဘဝိတ္ထ၊ ဘဝိတ္ထ ဝါ၊ အဘဝါ၊ ဘဝါ ဝါ၊ အဘဝူ၊ ဘဝူ ဝါ။ အဘဝိသေ၊ ဘဝိသေ ဝါ၊ အဘဝိဝှံ၊ ဘဝိဝှံ ဝါ။ အဘဝံ ၊ ဘဝံ ဝါ၊ အဘဝ၊ ဘဝ ဝါ၊ အဘဝိမှေ၊ ဘဝိမှေ ဝါ။

ကမ္မနိ ယပ္ပစ္စယလောပေ ဝုဒ္ဓိအဝါဒေသာဒိ၊ သုခံ တယာ အနုဘဝိတ္ထ၊ အနွဘူယိတ္ထ၊ အနုဘူယိတ္ထ ဝါ ဣစ္စာဒိ။ ပရဿပဒတ္တေ တယာ အနွဘူယိ၊ အနုဘူယိ၊ အနွဘူယီ၊ အနုဘူယီ ဝါ၊ အနွဘူယိံသု၊ အနုဘူယိံသု၊ အနွဘူယုံ၊ အနုဘူယုံ။ တွံ အနွဘူယိ၊ အနုဘူယိ၊ တုမှေ အနွဘူယိတ္ထ၊ အနုဘူယိတ္ထ။ အဟံ အနွဘူယိံ၊ အနုဘူယိံ၊ မယံ အနွဘူယိမှ၊ အနုဘူယိမှ၊ အနွဘူယိမှာ၊ အနုဘူယိမှာ ဝါ။ ဘာဝေ အဘဝိတ္ထ၊ အဘူယိတ္ထ တယာ။

သော အပစိ၊ ပစိ၊ အပစီ၊ ပစီ ဝါ၊ တေ အပစိံသု၊ ပစိံသု၊ အပစုံ၊ ပစုံ။ တွံ အပစိ၊ ပစိ၊ အပစော၊ ပစော ဝါ၊ တုမှေ အပစိတ္ထ၊ ပစိတ္ထ။ အဟံ အပစိံ၊ ပစိံ၊ မယံ အပစိမှ၊ ပစိမှ၊ အပစိမှာ၊ ပစိမှာ ဝါ။ သော အပစိတ္ထ၊ ပစိတ္ထ၊ အပစာ၊ ပစာ ဝါ၊ အပစူ၊ ပစူ။ အပစိသေ၊ အပစိဝှံ။ အပစံ၊ ပစံ၊ အပစ၊ ပစ ဝါ၊ အပစိမှေ၊ ပစိမှေ။

ကမ္မနိ အပစ္စိတ္ထ၊ ပစ္စိတ္ထ ဣစ္စာဒိ။ ပရဿပဒတ္တေ အပစ္စိ၊ ပစ္စိ၊ အပစ္စီ၊ ပစ္စီ ဝါ၊ အပစ္စိံသု၊ ပစ္စိံသု၊ အပစ္စုံ၊ ပစ္စုံ။ အပစ္စိ၊ ပစ္စိ၊ အပစ္စော၊ ပစ္စော ဝါ၊ အပစ္စိတ္ထ၊ ပစ္စိတ္ထ။ အပစ္စိံ၊ ပစ္စိံ၊ အပစ္စိမှ၊ ပစ္စိမှ၊ အပစ္စိမှာ၊ ပစ္စိမှာ ဝါ။

သော ဂါမံ အဂစ္ဆီ၊ ဂစ္ဆီ၊ အဂစ္ဆိ၊ ဂစ္ဆိ ဝါ၊ တေ အဂစ္ဆိံသု၊ ဂစ္ဆိံသု၊ အဂစ္ဆုံ၊ ဂစ္ဆုံ။ တွံ အဂစ္ဆိ၊ ဂစ္ဆိ၊ အဂစ္ဆော၊ ဂစ္ဆော ဝါ၊ တုမှေ အဂစ္ဆိတ္ထ၊ ဂစ္ဆိတ္ထ။ အဟံ အဂစ္ဆိံ၊ ဂစ္ဆိံ၊ မယံ အဂစ္ဆိမှ၊ ဂစ္ဆိမှ၊ အဂစ္ဆိမှာ၊ ဂစ္ဆိမှာ ဝါ။

‘‘ကွစိ ဓာတူ’’တိအာဒိနာ အဇ္ဇတနိမှိ ဂမိဿ စ္ဆဿ ကွစိ ဉ္ဆာဒေသော၊ အဂဉ္ဆိ၊ ဂဉ္ဆိ၊ အဂဉ္ဆီ၊ ဂဉ္ဆီ ဝါ၊ တေ အဂဉ္ဆိံသု ၊ ဂဉ္ဆိံသု၊ အဂဉ္ဆုံ၊ ဂဉ္ဆုံ။ တွံ အဂဉ္ဆိ၊ ဂဉ္ဆိ၊ အဂဉ္ဆော၊ ဂဉ္ဆော ဝါ၊ တုမှေ အဂဉ္ဆိတ္ထ၊ ဂဉ္ဆိတ္ထ။ အဟံ အဂဉ္ဆိံ၊ ဂဉ္ဆိံ၊ မယံ အဂဉ္ဆိမှ၊ ဂဉ္ဆိမှ၊ အဂဉ္ဆိမှာ၊ ဂဉ္ဆိမှာ ဝါ။

စ္ဆာဒေသာဘာဝေ သော အဂမိ၊ ဂမိ၊ အဂမီ၊ ဂမီ ဝါ၊ ‘‘ကရဿ ကာသတ္တမဇ္ဇတနိမှီ’’တိ ဧတ္ထ ဘာဝနိဒ္ဒေသေန၊ ‘‘သတ္တမဇ္ဇတနိမှီ’’တိ ယောဂဝိဘာဂေန ဝါ သာဂမေ ‘‘ကွစိ ဓာတူ’’တိအာဒိနာ ဗျဉ္ဇနတော အာကာရာဂမော၊ အဂမာသိ၊ ဥံဝစနဿ ကွစိ အံသွာဒေသော၊ ဥစာဂမော တ္ထမှေသု ကွစိ၊ အဂမိံသု၊ ဂမိံသု၊ အဂမံသု၊ ဂမံသု၊ အဂမုံ၊ ဂမုံ၊ တွံ အဂမိ၊ ဂမိ၊ အဂမော၊ ဂမော ဝါ၊ အဂမိတ္ထ၊ ဂမိတ္ထ၊ အဂမုတ္ထ၊ ဂမုတ္ထ။ အဟံ အဂမိံ၊ ဂမိံ၊ အဂမိမှ၊ ဂမိမှ၊ အဂမုမှ၊ ဂမုမှ၊ အဂမိမှာ၊ ဂမိမှာ ဝါ။

‘‘ကွစိ ဓာတူ’’တိအာဒိနာ ဂမိဿ အဇ္ဇတနိမှိ ဂါဒေသော စ၊ သော အဇ္ဈဂါ၊ ပရလောပေါ၊ တေ အဇ္ဈဂုံ။ တွံ အဇ္ဈဂေါ၊ တုမှေ အဇ္ဈဂုတ္ထ။ အဟံ အဇ္ဈဂိံ၊ မယံ အဇ္ဈဂုမှ။

အတ္တနောပဒေ သော အဂစ္ဆိတ္ထ၊ ဂစ္ဆိတ္ထ၊ အဂဉ္ဆိတ္ထ၊ ဂဉ္ဆိတ္ထ ဣစ္စာဒိ။ စ္ဆာဒေသာဘာဝေ သော အဂမိတ္ထ၊ ဂမိတ္ထ၊ အဂမာ၊ ဂမာ၊ တေ အဂမူ၊ ဂမူ၊ အဇ္ဈဂူ၊ အဂူ။ တွံ အဂမိသေ၊ ဂမိသေ၊ အဂမိဝှံ၊ ဂမိဝှံ။ အဟံ အဂမံ၊ ဂမံ၊ အဂမ၊ ဂမ၊ အဇ္ဈဂံ ဝါ၊ အဂမိမှေ၊ ဂမိမှေ။

ကမ္မေ ဂါမော အဂစ္ဆီယိတ္ထ တေန၊ ဂစ္ဆီယိတ္ထ၊ အဂဉ္ဆိယိတ္ထ၊ ဂဉ္ဆိယိတ္ထ၊ အဂမီယိတ္ထ၊ ဂမီယိတ္ထ၊ အဂမိတ္ထ၊ ဂမိတ္ထ ဣစ္စာဒိ။ ပရဿပဒတ္တေ အဂစ္ဆီယိ၊ ဂစ္ဆီယိ ဝါ၊ အဂမီယိ၊ ဂမီယိ ဝါ၊ အဂစ္ဆီယုံ၊ အဂမီယုံ ဝါ။ တထာ အဃမ္မီယိ၊ အဃမ္မီယိံသု ဣစ္စာဒိ။

‘‘ဟိယျတ္တနီ၊ အဇ္ဇတနီ’’တိ စ ဝတ္တတေ။

၄၇၁။ မာယောဂေ သဗ္ဗကာလေ စ။

ယဒါမာယောဂေါ၊ တဒါ ဟိယျတ္တနဇ္ဇတနီဝိဘတ္တိယော သဗ္ဗကာလေပိ ဟောန္တိ၊ စသဒ္ဒေန ပဉ္စမီ စ။ မာ ဘဝတိ၊ မာ ဘဝါ၊ မာ ဘဝိဿတီတိ ဝါ အတ္ထေ ဟိယျတ္တနဇ္ဇတနီပဉ္စမီ ဝိဘတ္တိယော၊ သေသံ နေယျံ၊ သော မာ ဘဝါ၊ မာ ဘဝီ၊ မာ တေ ဘဝန္တွန္တရာယာ။ မာ ပစာ၊ မာ ပစီ၊ မာ ပစတု။ မာ ဂစ္ဆာ၊ မာ ဂစ္ဆီ၊ မာ ဂစ္ဆတု။ မာ ကဉ္စိ ပါပမာဂမာ၊ မာ အဂမိ၊ မာ ဂမာ၊ မာ ဂမီ၊ မာ ဂမေတု။ တွံ မာ ဂစ္ဆော၊ မာ ဂစ္ဆိ၊ မာ ဂစ္ဆာဟိ ဣစ္စာဒိ။

အတီတကာလိကဝိဘတ္တိ။

၄၇၂။ ဘဝိဿန္တီ ဿတိ ဿန္တိ၊ ဿသိ ဿထ၊ ဿာမိဿာမ၊ ဿတေ ဿန္တေ၊ ဿသေ ဿဝှေ၊ ဿံဿာမှေ။

ဿတျာဒီနံ ဒွါဒသန္နံ ဝစနာနံ ဘဝိဿန္တီသညာ ဟောတိ။ ဘဝိဿတီတိ ဘဝိဿန္တော၊ တံကာလဒီပကတ္တာ အယံ ဝိဘတ္တိ ဘဝိဿန္တီတိ ဝုစ္စတိ။

၄၇၃။ အနာဂတေ ဘဝိဿန္တီ။

အနာဂတေ ကာလေ ဘဝိဿန္တီဝိဘတ္တိ ဟောတိ။

အတီတေပိ ဘဝိဿန္တီ၊ တံကာလဝစနိစ္ဆယာ၊

‘‘အနေကဇာတိသံသာရံ၊ သန္ဓာဝိဿ’’န္တိအာဒိသု။

န အာဂတော အနာဂတော၊ ပစ္စယသာမဂ္ဂိယံ သတိ အာယတိံ ဥပ္ပဇ္ဇနာရဟောတိ အတ္ထော၊ ဣကာရာဂမော၊ ဝုဒ္ဓိအဝါဒေသာ၊ သရလောပါဒိ စ။

ဘဝိဿတိ၊ ဘဝိဿန္တိ။ ဘဝိဿသိ၊ ဘဝိဿထ။ ဘဝိဿာမိ၊ ဘဝိဿာမ။ ဘဝိဿတေ၊ ဘဝိဿန္တေ။ ဘဝိဿသေ၊ ဘဝိဿဝှေ။ ဘဝိဿံ၊ ဘဝိဿာမှေ။

ကမ္မေ ယပ္ပစ္စယလောပေါ၊ သုခံ တယာ အနုဘဝိဿတေ၊ အနုဘဝိဿန္တေ။ အနုဘဝိဿသေ၊ အနုဘဝိဿဝှေ။ အနုဘဝိဿံ၊ အနုဘဝိဿာမှေ။ ပရဿပဒတ္တေ အနုဘဝိဿတိ ဒေဝဒတ္တေန၊ အနုဘဝိဿန္တိ ဣစ္စာဒိ။ ဘာဝေ ဘဝိဿတေ တေန၊ ယပ္ပစ္စယလောပါဘာဝေ အနုဘူယိဿတေ၊ အနုဘူယိဿန္တေ ဣစ္စာဒိ။ ဘာဝေ ဘူယိဿတေ။

တထာ ပစိဿတိ၊ ပစိဿန္တိ။ ပစိဿသိ၊ ပစိဿထ။ ပစိဿာမိ၊ ပစိဿာမ။ ပစိဿတေ၊ ပစိဿန္တေ။ ပစိဿသေ၊ ပစိဿဝှေ။ ပစိဿံ၊ ပစိဿာမှေ။

ကမ္မေ ပစ္စိဿတေ ဩဒနော ဒေဝဒတ္တေန၊ ပစ္စိဿန္တေ ဣစ္စာဒိ။ ပရဿပဒတ္တေ ပစ္စိဿတိ၊ ပစ္စိဿန္တိ။ ပစ္စိဿသိ၊ ပစ္စိဿထ။ ပစ္စိဿာမိ၊ ပစ္စိဿာမ။

ဂစ္ဆိဿတိ၊ ဂစ္ဆိဿန္တိ။ ဂစ္ဆိဿသိ၊ ဂစ္ဆိဿထ။ ဂစ္ဆိဿာမိ၊ ဂစ္ဆိဿာမ။ ဂစ္ဆိဿတေ၊ ဂစ္ဆိဿန္တေ။ ဂစ္ဆိဿသေ၊ ဂစ္ဆိဿဝှေ။ ဂစ္ဆိဿံ၊ ဂစ္ဆိဿာမှေ။ သော သဂ္ဂံ ဂမိဿတိ၊ ဂမိဿန္တိ။ ဂမိဿသိ၊ ဂမိဿထ။ ဂမိဿာမိ၊ ဂမိဿာမ ဣစ္စာဒိ။

ကမ္မေ ဂစ္ဆီယိဿတေ၊ ဂစ္ဆီယိဿန္တေ။ ဂစ္ဆီယိဿတိ၊ ဂစ္ဆီယိဿန္တိ ဝါ၊ ဂမီယိဿတေ၊ ဂမီယိဿန္တေ။ ဂမီယိဿတိ၊ ဂမီယိဿန္တိ ဝါ ဣစ္စာဒိ။ ယပ္ပစ္စယလောပေ ဂမိဿတေ ၊ ဂမိဿန္တေ။ ဂမိဿတိ၊ ဂမိဿန္တိ ဝါ။ တထာ ဃမ္မိဿတိ၊ ဃမ္မိဿန္တိ ဣစ္စာဒိ။

ဘဝိဿန္တီဝိဘတ္တိ။

၄၈၄။ ကာလာတိပတ္တိ ဿာ ဿံသု၊ ဿေ ဿထ၊ ဿံဿာမှာ၊ ဿထ ဿိသု၊ ဿသေ ဿဝှေ၊ ဿိံဿာမှသေ။

ဿာဒီနံ ဒွါဒသန္နံ ကာလာတိပတ္တိသညာ ဟောတိ။ ကာလဿ အတိပတနံ ကာလာတိပတ္တိ၊ သာ ပန ဝိရုဒ္ဓပစ္စယူပနိပါတတော၊ ကာရဏဝေကလ္လတော ဝါ ကြိယာယ အနဘိနိဗ္ဗတ္တိ၊ တဒ္ဒီပကတ္တာ အယံ ဝိဘတ္တိ ကာလာတိပတ္တီတိ ဝုစ္စတိ။

၄၇၅။ ကြိယာတိပန္နေတီတေ ကာလာတိပတ္တိ။

ကြိယာတိပန္နမတ္တေ အတီတေ ကာလေ ကာလာတိပတ္တိဝိဘတ္တိ ဟောတိ။ ကြိယာယ အတိပတနံ ကြိယာတိပန္နံ၊ တံ ပန သာဓကသတ္တိဝိရဟေန ကြိယာယ အစ္စန္တာနုပ္ပတ္တိ။ ဧတ္ထ စ ကိဉ္စာပိ န ကြိယာ အတီတသဒ္ဒေန ဝေါဟရိတဗ္ဗာ၊ တထာပိ တက္ကိရိယုပ္ပတ္တိပ္ပဋိဗန္ဓကရကြိယာယ ကာလဘေဒေန အတီတဝေါဟာရော လဗ္ဘတေဝါတိ ဒဋ္ဌဗ္ဗံ။

ကာလာတိပတ္တိပရဿပဒပဌမပုရိသေကဝစနံ ဿာ၊ အကာရိကာရာဂမာ၊ ဝုဒ္ဓိအဝါဒေသာ စ၊ ‘‘ကွစိ ဓာတူ’’တိအာဒိနာ ဿာ ဿာမှာဝိဘတ္တီနံ ကွစိ ရဿတ္တံ၊ ဿေဝစနဿ စ အတ္တံ။

သော စေ ပဌမဝယေ ပဗ္ဗဇ္ဇံ အလဘိဿ၊ အရဟာ အဘဝိဿ၊ ဘဝိဿ၊ အဘဝိဿာ၊ ဘဝိဿာဝါ၊ တေ စေ တံ အလဘိဿံသု၊ အရဟန္တော အဘဝိဿံသု၊ ဘဝိဿံသု။ ဧဝံ တွံ အဘဝိဿ၊ ဘဝိဿ၊ အဘဝိဿေ ဝါ၊ တုမှေ အဘဝိဿထ၊ ဘဝိဿထ။ အဟံ အဘဝိဿံ၊ ဘဝိဿံ၊ မယံ အဘဝိဿမှ၊ ဘဝိဿမှ၊ အဘဝိဿာမှာ၊ ဘဝိဿာမှာ ဝါ။ သော အဘဝိဿထ၊ အဘဝိဿိသု။ အဘဝိဿသေ၊ အဘဝိဿဝှေ။ အဘဝိဿိံ၊ အဘဝိဿာမှသေ။

ကမ္မေ အနွဘဝိဿထ၊ အနွဘဝိဿိသု။ အနွဘူယိဿထ ဝါ ဣစ္စာဒိ။ ပရဿပဒတ္တေ အနွဘဝိဿ၊ အနွဘဝိဿံသု။ အနွဘူယိဿ ဝါ ဣစ္စာဒိ။ ဘာဝေ အဘဝိဿထ ဒေဝဒတ္တေန၊ အဘူယိဿထ။

တထာ သော စေ တံ ဓနံ အလဘိဿ၊ ဩဒနံ အပစိဿ၊ ပစိဿ၊ အပစိဿာ၊ ပစိဿာ ဝါ၊ အပစိဿံသု၊ ပစိဿံသု။ အပစိဿ၊ ပစိဿ၊ အပစိဿေ၊ ပစိဿေ ဝါ၊ အပစိဿထ၊ ပစိဿထ။ အပစိဿံ၊ ပစိဿံ၊ အပစိဿမှ၊ ပစိဿမှ၊ အပစိဿာမှာ၊ ပစိဿာမှာ ဝါ။ အပစိဿထ၊ ပစိဿထ၊ အပစိဿိသု၊ ပစိဿိသု။ အပစိဿသေ၊ ပစိဿသေ၊ အပစိဿဝှေ၊ ပစိဿဝှေ။ အပစိဿိံ၊ ပစိဿိံ၊ အပစိဿာမှသေ၊ ပစိဿာမှသေ။

ကမ္မေ အပစိဿထ ဩဒနော ဒေဝဒတ္တေန၊ အပစိဿိသု။ ယပ္ပစ္စယလောပါဘာဝေ အပစီယိဿထ ဣစ္စာဒိ။ ပရဿပဒတ္တေ အပစ္စိဿ တေန၊ ပစ္စိဿ၊ အပစ္စိဿာ၊ ပစ္စိဿာ ဝါ၊ အပစ္စိဿံသု၊ ပစ္စိဿံသု ဣစ္စာဒိ။

သော အဂစ္ဆိဿ၊ ဂစ္ဆိဿ၊ အဂစ္ဆိဿာ၊ ဂစ္ဆိဿာဝါ၊ အဂစ္ဆိဿံသု၊ ဂစ္ဆိဿံသု။ တွံ အဂစ္ဆိဿ၊ ဂစ္ဆိဿ၊ အဂစ္ဆိဿေ၊ ဂစ္ဆိဿေ ဝါ၊ အဂစ္ဆိဿထ၊ ဂစ္ဆိဿထ။ အဂစ္ဆိဿံ၊ ဂစ္ဆိဿံ၊ အဂစ္ဆိဿမှ၊ ဂစ္ဆိဿမှ၊ အဂစ္ဆိဿာမှာ၊ ဂစ္ဆိဿာမှာ ဝါ။ အဂမိဿ၊ ဂမိဿ၊ အဂမိဿာ၊ ဂမိဿာ ဝါ၊ အဂမိဿံသု၊ ဂမိဿံသု။ အဂမိဿ၊ ဂမိဿ၊ အဂမိဿေ ဝါ၊ အဂမိဿထ၊ ဂမိဿထ။ အဂမိဿံ ၊ ဂမိဿံ၊ အဂမိဿမှ၊ ဂမိဿမှ၊ အဂမိဿာမှာ၊ ဂမိဿာမှာ ဝါ။ အဂစ္ဆိဿထ၊ ဂစ္ဆိဿထ ဝါ ဣစ္စာဒိ။

ကမ္မေ အဂစ္ဆီယိဿထ၊ အဂမီယိဿထ၊ အဂစ္ဆီယိဿ၊ အဂမီယိဿဣစ္စာဒိ။ တထာ အဃမ္မိဿာ၊ အဃမ္မိဿံသု ဣစ္စာဒိ။

ကာလာတိပတ္တိဝိဘတ္တိ။

ပဉ္စမီ သတ္တမီ ဝတ္တ-မာနာ သမ္ပတိနာဂတေ၊

ဘဝိဿန္တီ ပရောက္ခာဒီ၊ စတဿောတီတကာလိကာ။

ဆကာလိကဝိဘတ္တိဝိဓာနံ။

ဝိကရဏဝိဓာန

ဣသု ဣစ္ဆာကန္တီသု၊ ပုရေ ဝိယ ဓာတွန္တလောပေါ၊ တျာဒျုပ္ပတ္တိ၊ အပ္ပစ္စယော စ။

‘‘ဓာတူန’’န္တိ ဝတ္တမာနေ –

၄၇၆။ ဣသုယမူနမန္တော စ္ဆော ဝါ။

ဣသုယမုဣစ္စေတေသံ ဓာတူနံ အန္တော စ္ဆော ဟောတိ ဝါ။ ဝဝတ္ထိတဝိဘာသတ္ထောယံ ဝါသဒ္ဒေါ၊ ‘‘အန္တော စ္ဆော ဝါ’’တိ ယောဂဝိဘာဂေန အာသဿပိ။ သော သဂ္ဂံ ဣစ္ဆတိ၊ ဣစ္ဆန္တိ။ ဣစ္ဆသိ၊ ဣစ္ဆထ။ ဣစ္ဆာမိ၊ ဣစ္ဆာမ။ စ္ဆာဒေသာဘာဝေ အသံယောဂန္တတ္တာ ‘‘အညေသု စာ’’တိ ဝုဒ္ဓိ၊ ဧသတိ၊ ဧသန္တိ ဣစ္စာဒိ။

ကမ္မေ အတ္တနောပဒဿ ယေဘုယျေန ပရဿပဒတ္တမေဝ ပယောဇီယတိ၊ တေန စေတ္ထ အတ္တနောပဒေ ရူပါနိ သင်္ခိပိဿာမ။ သော ဣစ္ဆီယတိ၊ ဧသီယတိ၊ ဣဿတေ၊ ဣဿတိ၊ ယကာရဿ ပုဗ္ဗရူပတ္တံ။ တထာ ဣစ္ဆတု၊ ဧသတု။ ဣစ္ဆေယျ၊ ဧသေယျ။ ပရောက္ခာဟိယျတ္တနီသု ပန ရူပါနိ သဗ္ဗတ္ထ ပယောဂမနုဂမ္မ ပယောဇေတဗ္ဗာနိ၊ ဣစ္ဆိ၊ ဧသိ။ ဣစ္ဆိဿတိ၊ ဧသိဿတိ။ ဣစ္ဆိဿာ၊ ဧသိဿာ ဣစ္ဆာဒိ။

ယမု ဥပရမေ၊ နိပုဗ္ဗော၊ စ္ဆာဒေသော စ။ နိယစ္ဆတိ၊ နိယစ္ဆန္တိ။ နိယမတိ၊ နိယမန္တိ။ သံပုဗ္ဗော ‘‘သယေ စာ’’တိ ဉတ္တံ၊ ဒွိတ္တဉ္စ။ သညမတိ၊ သညမန္တိ။

ကမ္မေ နိယစ္ဆီယတိ၊ နိယမီယတိ၊ နိယမ္မတိ၊ သညမီယတိ ဝါ။ တထာ နိယစ္ဆတု၊ သညမတု။ နိယစ္ဆေယျ၊ သညမေယျ။ နိယစ္ဆီ၊ သညမီ။ နိယစ္ဆိဿတိ၊ သညမိဿတိ။ နိယစ္ဆိဿ၊ သညမိဿ ဣစ္စာဒိ။

အာသ ဥပဝေသနေ၊ ယောဂဝိဘာဂေန စ္ဆာဒေသော၊ ရဿတ္တံ။ အစ္ဆတိ၊ အစ္ဆန္တိ။ အစ္ဆသိ၊ အစ္ဆထ။ အစ္ဆာမိ၊ အစ္ဆာမ။ အညတြ ဥပပုဗ္ဗော ဥပါသတိ၊ ဥပါသန္တိ။ အစ္ဆီယတိ၊ ဥပါသီယတိ။ အစ္ဆတု၊ ဥပါသတု။ အစ္ဆေယျ၊ ဥပါသေယျ။ အစ္ဆီ၊ ဥပါသီ။ အစ္ဆိဿတိ၊ ဥပါသိဿတိ။ အစ္ဆိဿ၊ ဥပါသိဿ ဣစ္စာဒိ။

လဘ လာဘေ၊ လဘတိ၊ လဘန္တိ။ လဘသိ၊ လဘထ။ လဘာမိ၊ လဘာမ။ လဘတေ၊ လဘန္တေ။ လဘသေ၊ လဘဝှေ။ လဘေ၊ လဘာမှေ။

ကမ္မေ ယကာရဿ ပုဗ္ဗရူပတ္တေ ကတေ ‘‘ကွစိ ဓာတူ’’တိအာဒိနာ ပုရိမဘကာရဿ ဗကာရော၊ လဗ္ဘတေ၊ လဗ္ဘန္တေ။ လဗ္ဘတိ၊ လဗ္ဘန္တိ။ လဗ္ဘတံ၊ လဗ္ဘတု။ လဗ္ဘေ၊ လဗ္ဘေယျ။

အဇ္ဇတနိမှိ ‘‘ဝါ၊ အန္တလောပေါ’’တိ စ ဝတ္တမာနေ –

၄၇၇။ လဘသ္မာ ဤ ဣံနံ တ္ထတ္ထံ။

လဘဣစ္စေတသ္မာ ဓာတုတော ပရေသံ ဤဣံနံ ဝိဘတ္တီနံ တ္ထ တ္ထံဣစ္စေတေ အာဒေသာ ဟောန္တိ ဝါ၊ ဓာတွန္တဿ လောပေါ စ။ အလတ္ထ၊ အလဘိ၊ လဘိ၊ အလဘိံသု၊ လဘိံသု။ အလဘော၊ လဘော၊ အလဘိ၊ လဘိ၊ အလဘိတ္ထ၊ လဘိတ္ထ။ အလတ္ထံ၊ အလဘိံ၊ လဘိံ၊ အလဘိမှ၊ လဘိမှ ဣစ္စာဒိ။

ဘဝိဿန္တိမှိ ‘‘ကရဿ သပ္ပစ္စယဿ ကာဟော’’တိ ဧတ္ထ သပ္ပစ္စယဂ္ဂဟဏေန ဝစ မုစ ဘုဇာဒိတော ဿဿခါဒေသော၊ ဝသ ဆိဒ လဘာဒိတော ဆာဒေသော စ ဝါ ဟောတီတိ ဿဿ ဆာဒေသော၊ ‘‘ဗျဉ္ဇနန္တဿ စော ဆပ္ပစ္စယေသု စာ’’တိ ဓာတွန္တဿ စကာရော၊ လစ္ဆတိ၊ လစ္ဆန္တိ။ လစ္ဆသိ၊ လစ္ဆထ။ လစ္ဆာမိ၊ လစ္ဆာမ။ ဆာဒေသာဘာဝေ လဘိဿတိ၊ လဘိဿန္တိ။ လဘိဿသိ၊ လဘိဿထ။ လဘိဿာမိ၊ လဘိဿာမ ဣစ္စာဒိ။ အလဘိဿ၊ အလဘိဿံသု ဣစ္စာဒိ။

ဝစ ဝိယတ္တိယံ ဝါစာယံ၊ ဝစတိ၊ ဝစန္တိ။ ဝစသိ၊ ဝစထ။ ဝစာမိ၊ ဝစာမ။

ကမ္မေ အတ္တနောပဒေ၊ ယပ္ပစ္စယေ စ ကတေ –

၄၇၈။ ဝစ ဝသ ဝဟာဒီနမုကာရော ဝဿ ယေ။

ဝစ ဝသ ဝဟဣစ္စေဝမာဒီနံ ဓာတူနံ ဝကာရဿ ဥကာရော ဟောတိ ယပ္ပစ္စယေ ပရေ၊ အာဒိသဒ္ဒေန ဝဍ္ဎဿ စ။ ‘‘ဝဿ အ ဝ’’ဣတိ သမာသေန ဒုတိယဉ္စေတ္ထ ဝဂ္ဂဟဏံ ဣစ္ဆိတဗ္ဗံ၊ တေန အကာရဿပိ ဥကာရော ဟောတိ၊ ပုရိမပက္ခေ ပရလောပေါ။ ‘‘တဿ စဝဂ္ဂ’’ဣစ္စာဒိနာ သဓာတွန္တဿ ယကာရဿ စကာရော၊ ဒွိတ္တံ။ ဥစ္စတေ၊ ဥစ္စန္တေ။ ဝုစ္စတေ၊ ဝုစ္စန္တေ။ ဝုစ္စတိ၊ ဝုစ္စန္တိ ဝါ ဣစ္စာဒိ။ တထာ ဝစတု၊ ဝုစ္စတု။ ဝစေယျ၊ ဝုစ္စေယျ။ အဝစာ၊ အဝစ္စာ၊ အဝစူ၊ အဝစ္စူ။ အဝစ၊ အဝစော၊ အဝစုတ္ထ။ အဝစ၊ အဝစံ၊ အဝစမှာ။ အဝစုတ္ထ ဣစ္စာဒိ။

၄၇၉။ ဝစဿဇ္ဇတနိမှိမကာရော ဩ။

ဝစဣစ္စေတဿ ဓာတုဿ အကာရော ဩတ္တမာပဇ္ဇတေ အဇ္ဇတနိမှိ ဝိဘတ္တိမှိ။ အဝေါစိ၊ အဝေါစုံ။ အဝေါစော၊ အဝေါစုတ္ထ။ အဝေါစိံ၊ အဝေါစုမှ၊ ဥကာရာဂမော။ အဝေါစ၊ ရဿတ္တံ၊ အဝေါစု ဣစ္စာဒိ။ အဝုစ္စိတ္ထ။

ဘဝိဿန္တိမှိ သပ္ပစ္စယဂ္ဂဟဏေန ဿဿ ခါဒေသော၊ ‘‘ဗျဉ္ဇနန္တဿာ’’တိ ဝတ္တမာနေ ‘‘ကော ခေ စာ’’တိ ဓာတွန္တဿ ကာဒေသော၊ ဝက္ခတိ၊ ဝက္ခန္တိ။ ဝက္ခသိ၊ ဝက္ခထ။ ဝက္ခာမိ၊ ဝက္ခာမ ဣစ္စာဒိ။

ဝသ နိဝါသေ၊ ဝသတိ၊ ဝသန္တိ။

ကမ္မေ ဥတ္တံ၊ ပုဗ္ဗရူပတ္တဉ္စ ဝုဿတိ၊ ဝုဿန္တိ ဣစ္စာဒိ။ ဝသတု။ ဝသေယျ။ အဝသိ၊ ဝသိ။

ဘဝိဿန္တိယံ ဿဿ ဆာဒေသော၊ ဓာတွန္တဿ စကာရော စ၊ ဝစ္ဆတိ၊ ဝစ္ဆန္တိ။ ဝစ္ဆသိ၊ ဝစ္ဆထ။ ဝစ္ဆာမိ၊ ဝစ္ဆာမ။ ဝသိဿတိ၊ ဝသိဿန္တိ။ အဝသိဿ၊ အဝသိဿံသု။

တထာ ရုဒ အဿုဝိမောစနေ၊ ရောဒတိ၊ ရုစ္ဆတိ။ ရောဒိဿတိ ဣစ္စာဒိ။

ကုသ အက္ကောသေ၊ အာပုဗ္ဗော ဒွိတ္တရဿတ္တာနိ၊ အပ္ပစ္စယဝုဒ္ဓိယော စ။ အက္ကောသတိ။ အက္ကောသတု။ အက္ကောသေယျ။

‘‘အန္တလောပေါ’’တိ ဝတ္တတေ၊ မဏ္ဍူကဂတိယာ ‘‘ဝါ’’တိ စ။

၄၈၀။ ကုသသ္မာ ဒီ စ္ဆိ။

ကုသ ဣစ္စေတသ္မာ ဓာတုတော ဤဝိဘတ္တိဿ စ္ဆိအာဒေသော ဟောတိ၊ ဓာတွန္တဿ လောပေါ စ။ အက္ကောစ္ဆိ မံ၊ အက္ကောသိ ဝါ။ အက္ကောသိဿတိ။ အက္ကောသိဿ ဣစ္စာဒိ။

ဝဟ ပါပုဏနေ၊ ဝဟတိ၊ ဝဟန္တိ။

ကမ္မေ အတ္တနောပဒေ၊ ယပ္ပစ္စယေ စ ကတေ –

‘‘ယေ’’တိ ဝတ္တတေ။

၄၈၁။ ဟ ဝိပရိယယော လော ဝါ။

ဟကာရဿ ဝိပရိယယော ဟောတိ ယပ္ပစ္စယေ ပရေ၊ ယပ္ပစ္စယဿ စ လကာရော ဟောတိ ဝါ။ ဝဝတ္ထိတဝိဘာသတ္ထောယံ ဝါသဒ္ဒေါ၊ တေန ‘‘ဂယှတီ’’တိအာဒီသု လတ္တံ န ဟောတိ၊ နိမိတ္တဘူတဿ ယကာရဿေဝေတံ လတ္တံ၊ ‘‘ဝစဝသ’’ဣစ္စာဒိနာ ဥတ္တံ။ ဝုယှတိ၊ ဝုလှတိ၊ ဝုယှန္တိ။ ဝဟတု၊ ဝုယှတု။ ဝဟေယျ၊ ဝုယှေယျ။ အဝဟီ၊ အဝုယှိတ္ထ၊ အဝဟိတ္ထ။ အဝဟိဿတိ၊ ဝုယှိဿတိ။ အဝဟိဿ၊ အဝုယှိဿ ဣစ္စာဒိ။

ဇရ ဝယောဟာနိမှိ။

၄၈၂။ ဇရမရာနံ ဇီရဇီယျမီယျာ ဝါ။

ဇရမရ ဣစ္စေတေသံ ဓာတူနံ ဇီရဇီယျမီယျာဒေသာ ဟောန္တိ ဝါ၊ သရလောပါဒိ။ ဇီရတိ၊ ဇီရန္တိ။ ဇီယျတိ၊ ဇီယျန္တိ။ ‘‘ကွစာ’’ဒိသုတ္တေန ဧကယကာရဿ ကွစိ လောပေါ ဟောတိ။ ဇီယတိ၊ ဇီယန္တိ။

ကမ္မေ ဇီရီယတိ၊ ဇီရီယန္တိ။ ဇီယိယျတိ၊ ဇီယိယျန္တိ။ ဇီရတု၊ ဇီယျတု။ ဇီရေယျ၊ ဇီယျေယျ။ အဇီရီ၊ ဇီရီ၊ ဇီယျီ။ ဇီရိဿတိ၊ ဇီယျိဿတိ။ အဇီရိဿ၊ အဇီယျိဿ။

မရ ပါဏစာဂေ၊ မီယျာဒေသော၊ မီယျတိ၊ မီယျန္တိ။ မီယတိ၊ မီယန္တိ ဝါ။ မရတိ၊ မရန္တိ ဣစ္စာဒိ။

ဒိသ ပေက္ခဏေ။

၄၈၃။ ဒိသဿပဿ ဒိဿ ဒက္ခာ ဝါ။

ဒိသဣစ္စေတဿ ဓာတုဿ ပဿ ဒိဿ ဒက္ခဣစ္စေတေ အာဒေသာ ဟောန္တိ ဝါ။ ဝဝတ္ထိတဝိဘာသတ္ထောယံ ဝါသဒ္ဒေါ၊ တေန ဒိဿာဒေသော ကမ္မနိ သဗ္ဗဓာတုကေ ဧဝ။ ပဿတိ၊ ပဿန္တိ။ ဒက္ခတိ၊ ဒက္ခန္တိ။

ကမ္မနိ ယကာရလောပေါ၊ ဒိဿတေ၊ ဒိဿန္တေ။ ဒိဿတိ၊ ဒိဿန္တိ။ ဝိပဿီယတိ၊ ဒက္ခီယတိ။ ပဿတု၊ ဒက္ခတု၊ ဒိဿတု။ ပဿေယျ၊ ဒက္ခေယျ၊ ဒိဿေယျ။

ဟိယျတ္တနိယံ ‘‘ကွစိ ဓာတူ’’တိအာဒိနာ ဓာတုဣကာရဿ အတ္တံ၊ အဒ္ဒသာ၊ အဒ္ဒသ။ ကမ္မနိ အဒိဿ။

တထာ အပဿိ၊ ပဿိ၊ အပဿိံသု၊ ပဿိံသု။ အပဿိ၊ ပဿိ၊ အပဿိတ္ထ၊ ပဿိတ္ထ။ အပဿိံ၊ ပဿိံ၊ အပဿိမှ၊ ပဿိမှ။ အဒ္ဒသိ၊ ဒသိ၊ အဒ္ဒသံသု၊ ဒသံသု။ ကမ္မနိ အဒိဿံသု။ အဒ္ဒက္ခိ၊ အဒ္ဒက္ခိံသု။

ပဿိဿတိ၊ ပဿိဿန္တိ။ ‘‘ဘဝိဿန္တိမှိ ဿဿ စာ’’တိ ယောဂဝိဘာဂေန ဿဿ လောပေါ၊ ဣကာရာဂမော စ၊ ဒက္ခိတိ၊ ဒက္ခိန္တိ။ လောပါဘာဝေ ဒက္ခိဿတိ၊ ဒက္ခိဿန္တိ။ အပဿိဿ၊ အဒက္ခိဿ ဣစ္စာဒိ။

သဒ ဝိသရဏဂတျာဝသာနေသု။

‘‘သဗ္ဗတ္ထာ’’တိ ဝတ္တတေ၊ မဏ္ဍူကဂတိယာ ‘‘ကွစီ’’တိ စ။

၄၈၄။ သဒဿ သီဒတ္တံ။

သဒဣစ္စေတဿ ဓာတုဿ သီဒါဒေသော ဟောတိ သဗ္ဗတ္ထ ဝိဘတ္တိပ္ပစ္စယေသု ကွစိ။ သေသံ နေယျံ။ နိသီဒတိ၊ နိသီဒန္တိ။ ဘာဝေ နိသဇ္ဇတေ၊ ဣဓ ကွစာဓိကာရေန သီဒါ-ဒေသော န ဘဝတိ။ နိသီဒတု။ နိသီဒေ။ နိသီဒိ။ နိသီဒိဿတိ။ နိသီဒိဿ ဣစ္စာဒိ။

ယဇ ဒေဝပူဇာသင်္ဂတိကရဏဒါနေသု။ ယဇတိ၊ ယဇန္တိ။

ကမ္မနိ ‘‘ယမှီ’’တိ ဝတ္တတေ။

၄၈၅။ ယဇဿာဒိဿိ။

ယဇဣစ္စေတဿ ဓာတုဿ အာဒိဿ ယကာရဿ ဣကာရာဒေသော ဟောတိ ယပ္ပစ္စယေ ပရေ၊ သရလောပေါ။ ဣဇ္ဇတေ မယာ ဗုဒ္ဓါ။ တထာ ယဇတု၊ ဣဇ္ဇတံ။ ယဇေ၊ ဣဇ္ဇေထ။ ယဇိ၊ ဣဇ္ဇိတ္ထ။ ယဇိဿတိ၊ ဣဇ္ဇိဿတေ။ ယဇိဿ၊ ဣဇ္ဇိဿထ ဣစ္စာဒိ။

ဝဒ ဝိယတ္တိယံ ဝါစာယံ၊ တျာဒျုပ္ပတ္တိ၊ အပ္ပစ္စယော စ။

‘‘ဝါ’’တိ ဝတ္တတေ။

၄၈၆။ ဝဒဿ ဝဇ္ဇံ။

ဝဒဣစ္စေတဿ ဓာတုဿ သဗ္ဗဿ ဝဇ္ဇာဒေသော ဟောတိ ဝါ သဗ္ဗာသု ဝိဘတ္တီသု။ ဝိဘတျာဓိကာရတ္တာ စေတ္ထ သဗ္ဗာသူတိ အတ္ထတော သိဒ္ဓံ။

‘‘ဝါ’’တိ ဝတ္တတေ။

၄၈၇။ လောပဉ္စေတ္တမကာရော။

ဘူဝါဒိတော ပရော အပ္ပစ္စယော ဧတ္တမာပဇ္ဇတေ၊ လောပဉ္စ ဝါ။ ဝိကရဏကာရိယဝိဓိပ္ပကရဏတော စေတ္ထ အကာရောတိ အပ္ပစ္စယော ဂယှတိ။

ဘူဝါဒိတော ဇုဟောတျာဒိ-တော စ အပ္ပစ္စယော ပရော၊

လောပမာပဇ္ဇတေ နာညော၊ ဝဝတ္ထိတဝိဘာသတောတိ။

အပ္ပစ္စယဿ ဧကာရော၊ သရလောပါဒိ၊ ဝဇ္ဇေတိ၊ ဝဒေတိ၊ ဝဒတိ၊ အန္တိမှိ –

၄၈၈။ ကွစိဓာတုဝိဘတ္တိပ္ပစ္စယာနံ ဒီဃဝိပရီတာဒေသလောပါဂမာ စ။

ဣဓ ဓာတွာဓိကာရေ အာချာတေ၊ ကိတကေ စ အဝိဟိတလက္ခဏေသု ပယောဂေသု ကွစိ ဓာတူနံ၊ တျာဒိဝိဘတ္တီနံ၊ ဓာတုဝိဟိတပ္ပစ္စယာနဉ္စ ဒီဃတဗ္ဗိပရီတအာဒေသလောပါဂမဣစ္စေတာနိ ကာရိယာနိ ဇိနဝစနာနုရူပတော ဘဝန္တိ။ တတ္ထ –

နာမှိ ရဿော ကိယာဒီနံ၊ သံယောဂေ စညဓာတုနံ၊

အာယူနံ ဝါ ဝိဘတ္တီနံ၊ မှာ၊ ဿာန္တဿ စ ရဿတာ။

ဂမိတော စ္ဆဿ ဉ္ဆော ဝါဿ၊ ဂမိဿဇ္ဇတနိမှိ ဂါ၊

ဥစာဂမော ဝါ တ္ထမှေသု၊ ဓာတူနံ ယမှိ ဒီဃတာ။

ဧယျေယျာသေယျာမေတ္တဉ္စ၊ ဝါ ဿေဿေတ္တဉ္စ ပါပုဏေ၊

ဩကာရာ အတ္တမိတ္တဉ္စ၊ အာတ္ထာ ပပ္ပောန္တိ ဝါ တ္ထထေ။

တထာ ဗြူတောတိ အန္တီနံ၊ အဥ ဝါဟ စ ဓာတုယာ၊

ပရောက္ခာယ ဝိဘတ္တိမှိ၊ အနဗ္ဘာသဿ ဒီဃတာ။

သံယောဂန္တော အကာရေတ္ထ၊ ဝိဘတ္တိပ္ပစ္စယာဒိ တု၊

လောပ မာပဇ္ဇတေ နိစ္စ-မေကာရောကာရတော ပရောတိ။

ဧကာရတော ပရဿ အန္တိအကာရဿ လောပေါ၊ ဝဇ္ဇေန္တိ၊ ဝဒေန္တိ၊ ဝဒန္တိ။ ဝဇ္ဇေသိ၊ ဝဒေသိ၊ ဝဒသိ၊ ဝဇ္ဇေထ၊ ဝဒေထ၊ ဝဒထ။ ဝဇ္ဇေမိ၊ ဝဇ္ဇာမိ၊ ဝဒေမိ၊ ဝဒါမိ၊ ဝဇ္ဇေမ၊ ဝဒေမ၊ ဝဇ္ဇာမ၊ ဝဒါမ။

ကမ္မနိ ဝဇ္ဇီယတိ၊ ဝဇ္ဇီယန္တိ။ ဝဇ္ဇတိ၊ ဝဇ္ဇန္တိ။ ဝဒီယတိ ဝါ။ ဝဇ္ဇေတု၊ ဝဒေတု၊ ဝဒတု။ ဝဇ္ဇေ၊ ဝဇ္ဇေယျ၊ ဝဒေ၊ ဝဒေယျ၊ ဝဇ္ဇေယျုံ၊ ဝဒေယျုံ။ ဝဇ္ဇေယျာသိ၊ ဝဇ္ဇေသိ၊ ဝဒေယျာသိ။ အဝဒိ၊ ဝဒိ၊ ဝဒိံသု။ ဝဒိဿတိ၊ ဝဒိဿန္တိ။ အဝဒိဿ ဣစ္စာဒိ။

ကမု ပဒဝိက္ခေပေ၊ အပ္ပစ္စယေ ကတေ ‘‘ကွစာဒိဝဏ္ဏာနမေကဿရာနံ ဒွေဘာဝေါ’’တိ ဒွိတ္တံ၊ ကဝဂ္ဂဿ စဝဂ္ဂေါ။

အဗ္ဘာသဂ္ဂဟဏမန္တဂ္ဂဟဏံ၊ ဝါဂ္ဂဟဏဉ္စ ဝတ္တတေ။

၄၈၉။ နိဂ္ဂဟီတဉ္စ။

အဗ္ဘာသန္တေ နိဂ္ဂဟီတဉ္စာဂမော ဟောတိ ဝါ။ ဝဝတ္ထိတဝိဘာသတ္ထောယံ ဝါသဒ္ဒေါ၊ တေန ကမာဒီနမေဝေတံ။ စင်္ကမတိ၊ စင်္ကမန္တိ ဣစ္စာဒိ။ ကမတိ၊ ကမန္တိ ဣစ္စာဒိ။

စလ ကမ္ပနေ၊ စဉ္စလတိ၊ စလတိ။

စလ ဒလနေ၊ ဒဒ္ဒလ္လတိ။

ဈေစိန္တာယံ၊ အပ္ပစ္စယေ ‘‘ဩ၊ သရေ၊ ဧ’’တိ စ အဓိကိစ္စ ‘‘တေ အာဝါယာ’’တိ ယောဂဝိဘာဂေန အကာရိတေပိ ဧကာရဿ အာယာဒေသော၊ ဈာယတိ၊ ဈာယန္တိ ဣစ္စာဒိ၊ ဝိသေသဝိဓာနံ။

အဝုဒ္ဓိကဘူဝါဒိနယော။

တုဒ ဗျထနေ၊ တျာဒျုပ္ပတ္တိ အပ္ပစ္စယော၊ ‘‘အညေသု စာ’’တိ ဧတ္ထာနုဝတ္တိတ ဝါဂ္ဂဟဏေန တုဒါဒီနံ ဝုဒ္ဓိအဘာဝေါဝ ဝိသေသော၊ တုဒတိ၊ တုဒန္တိ။ တုဒသိ၊ တုဒထ။ တုဒါမိ၊ တုဒါမ။

ကမ္မေ ‘‘တဿ စဝဂ္ဂ’’ဣစ္စာဒိနာ သဒကာရဿ ယပ္ပစ္စယဿ ဇကာရော ဒွိတ္တံ၊ တုဇ္ဇတေ၊ တုဇ္ဇန္တေ။ တုဇ္ဇတိ၊ တုဇ္ဇန္တိ၊ တုဇ္ဇရေ ဝါ။ တထာ တုဒတု၊ တုဒန္တု။ တုဒေ၊ တုဒေယျ၊ တုဒေယျုံ။ အတုဒိ၊ တုဒိံသု။ အတုဒိ၊ အတုဒိတ္ထ။ အတုဒိံ၊ အတုဒိမှ။ အတုဇ္ဇိတ္ထ၊ အတုဇ္ဇိ။ တုဒိဿတိ။ အတုဒိဿ ဣစ္စာဒိ။

ဝိသ ပဝေသနေ ပပုဗ္ဗော၊ သော ဂါမံ ပဝိသတိ၊ ပဝိသန္တိ။ ပဝိသသိ၊ ပဝိသထ။ ပဝိသာမိ၊ ပဝိသာမ။

ကမ္မေ ပဝိသိယျတေ၊ ပဝိသိယျန္တေ။ ပဝိသိယျတိ၊ ပဝိသိယျန္တိ။ ပဝိဿတေ ဝါ။ တထာ ပဝိသတု၊ ပဝိသန္တု။ ပဝိသေယျ။ ပါဝိသိ၊ ပဝိသိ၊ ပါဝေက္ခိ ပထဝိံ၊ ‘‘ကွစိ ဓာတူ’’တိအာဒိနာ အဇ္ဇတနိမှိ ဝိသဿ ဝေက္ခာဒေသော စ။ ပါဝိသိံသု၊ ပဝိသိံသု။

ကမ္မေ ပါဝိသီယိတ္ထ၊ ပဝိသီယိတ္ထ၊ ပါဝိသီယိ၊ ပဝိသီယိ။ ပဝိသိဿတိ၊ ပဝိသိဿန္တိ။ ပဝိသီယိဿတေ၊ ပဝိသိဿတေ။ ပါဝိသိဿ။ ပါဝိသီယိဿ ဣစ္စာဒိ။

နုဒ ခေပေ၊ နုဒတိ၊ နုဒန္တိ။

ဒိသ အတိသဇ္ဇနေ၊ ဥဒ္ဒိသတိ၊ ဥဒ္ဒိသန္တိ။

လိခ လေခနေ၊ လိခတိ၊ လိခန္တိ။

ဖုသ သမ္ဖဿေ၊ ဖုသတိ၊ ဖုသန္တိ ဣစ္စာဒိ။

တုဒါဒိနယော။

ဟူ၊ ဘူ သတ္တာယံ၊ တျာဒျုပ္ပတ္တိ ‘‘ဘူဝါဒိတော အ’’ဣတိ အပ္ပစ္စယော၊ ‘‘ဝါ’’တိ အဓိကိစ္စ ‘‘လောပဉ္စေတ္တမကာရော’’တိ ဘူဝါဒိတော ပရဿ အပ္ပစ္စယဿ လောပေါ၊ ‘‘အညေသု စာ’’တိ ဝုဒ္ဓိ။ သော ဟောတိ၊ တေ ဟောန္တိ၊ ‘‘ကွစိ ဓာတူ’’တိအာဒိနာ ပရသရဿ လောပေါ။ ဟောသိ၊ ဟောထ။ ဟောမိ၊ ဟောမ။ ဘာဝေ ဟူယတေ။

တထာ ဟောတု၊ ဟောန္တု။ ဟောဟိ၊ အနကာရပရတ္တာ ဟိလောပေါ န ဘဝတိ၊ ဟောထ။ ဟောမိ၊ ဟောမ။ ဘာဝေ ဟူယတံ။

သတ္တမိယံ သရလောပါဒိ၊ ဟေယျ၊ ဟေယျုံ။ ဟေယျာသိ၊ ဟေယျာထ။ ဟေယျာမိ၊ ဟေယျာမ။ ဟေယျံ ဝါ။ ဘာဝေ ဟူယေထ။

ဟိယျတ္တနိယံအပ္ပစ္စယလောပေ ‘‘ကွစိ ဓာတူ’’တိအာဒိနာ ဟူဓာတုဿ ဦကာရဿ ဥဝါဒေသော။ အဟုဝါ၊ အဟုဝု၊ အဟုဝူ။ အဟုဝ၊ အဟုဝေါ၊ အဟုဝတ္ထ။ အဟုဝံ၊ အဟုဝမှ။ အဟုဝတ္ထ၊ အဟုဝတ္ထုံ။ အဟုဝသေ၊ အဟုဝဝှံ။ အဟုဝိံ၊ အဟုဝမှသေ။ ဘာဝေ အဟူယတ္ထ။

အဇ္ဇတနိမှိ ‘‘ကွစိ ဓာတူ’’တိအာဒိနာ ဟူတော ဤဝိဘတ္တိဿ လောပေါ ရဿတ္တံ၊ သော အဟု၊ လောပါဘာဝေ ‘‘ကရဿ ကာသတ္တမဇ္ဇတနိမှီ’’တိ ဧတ္ထ ‘‘သတ္တမဇ္ဇတနိမှီ’’တိ ယောဂဝိဘာဂေန သာဂမော၊ ဝုဒ္ဓိ၊ အဟောသိ၊ အဟေသုံ၊ ‘‘ကွစိ ဓာတူ’’တိအာဒိနာ ဩကာရဿေကာရော။ အဟဝုံ ဝါ။ အဟောသိ၊ အဟောသိတ္ထ။ အဟောသိံ၊ အဟုံ၊ ပရသရဿ လောပေါ၊ ရဿတ္တဉ္စ၊ အဟောသိမှ၊ အဟုမှ၊ ရဿတ္တံ။ ဘာဝေ အဟူယိတ္ထ။

‘‘ဟိ လောပံ ဝါ’’တိ ဣတော ‘‘လောပေါ၊ ဝါ’’တိ စ ဝတ္တတေ။

၄၉၀။ ဟောတိဿရေ’ဟောဟေ ဘဝိဿန္တိမှိ ဿဿ စ။

ဟူဣစ္စေတဿ ဓာတုဿ သရော ဧဟ ဩဟ ဧတ္တမာပဇ္ဇတေ ဘဝိဿန္တိမှိ ဝိဘတ္တိမှိ၊ ဿဿ စ လောပေါ ဟောတိ ဝါ။ ဣကာရာဂမော၊ သရလောပါဒိ။

ဟေဟိတိ၊ ဟေဟိန္တိ။ ဟေဟိသိ၊ ဟေဟိထ။ ဟေဟာမိ၊ ဟေဟာမ။ လောပါဘာဝေ – ဟေဟိဿတိ၊ ဟေဟိဿန္တိ။ ဟေဟိဿသိ၊ ဟေဟိဿထ။ ဟေဟိဿာမိ၊ ဟေဟိဿာမ။ ဩဟာဒေသေ – ဟောဟိတိ၊ ဟောဟိန္တိ။ ဟောဟိသိ၊ ဟောဟိထ။ ဟောဟာမိ၊ ဟောဟာမ။ တထာ ဟောဟိဿတိ၊ ဟောဟိဿန္တိ။ ဟောဟိဿသိ၊ ဟောဟိဿထ။ ဟောဟိဿာမိ၊ ဟောဟိဿာမ။ ဧကာရာဒေသေ – ဟေတိ၊ ဟေန္တိ။ ဟေသိ၊ ဟေထ။ ဟေမိ ၊ ဟေမ။ ဟေဿတိ၊ ဟေဿန္တိ။ ဟေဿသိ၊ ဟေဿထ။ ဟေဿာမိ၊ ဟေဿာမ။ ဘာဝေ ဟူယိဿတေ။

ကာလာတိပတ္တိယံ အဟဝိဿ၊ အဟဝိဿံသု။ အဟုယိဿထ ဣစ္စာဒိ။

ဟူ၊ ဘူ သတ္တာယံ၊ ဘူ ဣတီဓ အနုပုဗ္ဗော၊ တျာဒျုပ္ပတ္တိ အပ္ပစ္စယဿ လောပဝုဒ္ဓိယော၊ အနုဘောတိ၊ အနုဘောန္တိ။ အနုဘောသိ၊ အနုဘောထ။ အနုဘောမိ၊ အနုဘောမ။

ကမ္မေ အနုဘူယတိ၊ အနုဘူယန္တိ။ တထာ အနုဘောတု၊ အနုဘောန္တု။ အနုဘောဟိ၊ အနုဘောထ။ အနုဘောမိ၊ အနုဘောမ။ အနုဘူယတု၊ အနုဘူယန္တု။ အနုဘဝေ၊ အနုဘဝေယျ။ အနုဘူယေယျ။ အနုဘောသိ၊ အနုဘဝိ။ အနုဘောဿတိ၊ အနုဘောဿန္တိ။ အနုဘောဿသိ၊ အနုဘောဿထ။ အနုဘောဿာမိ၊ အနုဘောဿာမ။ အနုဘဝိဿတိ ဝါ။ အနုဘောဿ၊ အနုဘဝိဿ ဝါ ဣစ္စာဒိ။

သီ သယေ အပ္ပစ္စယလောပေါ၊ ဝုဒ္ဓိ စ၊ သေတိ၊ သေန္တိ။ သေသိ၊ သေထ။ သေမိ၊ သေမ။ သေတေ၊ သေန္တေ ဣစ္စာဒိ။

အပ္ပစ္စယလောပါဘာဝေ –

‘‘သရေ’’တိ ဝတ္တတေ၊ ဓာတုဂ္ဂဟဏဉ္စ။

၄၉၁။ ဧ အယ။

ဧကာရဿ ဓာတွန္တဿ သရေ ပရေ အယာဒေသော ဟောတိ၊ သရလောပါဒိ။ သယတိ၊ သယန္တိ။ သယသိ၊ သယထ။ သယာမိ၊ သယာမ။

ကမ္မေအတိပုဗ္ဗော၊ ‘‘ကွစိ ဓာတွာ’’ဒိနာ ယမှိ ရဿသရဿ ဓာတွန္တဿ ဒီဃော၊ အတိသီယတေ၊ အတိသီယန္တေ။ အတိသီယတိ၊ အတိသီယန္တိ။ ဘာဝေ သီယတေ။

တထာ သေတု၊ သေန္တု။ သေဟိ၊ သေထ။ သေမိ၊ သေမ။ သယတု၊ သယန္တု။ သယ၊ သယာဟိ၊ သယထ။ သယာမိ၊ သယာမ။ သယတံ၊ သယန္တံ။ သယဿု၊ သယဝှော။ သယေ၊ သယာမသေ။ အတိသီယတံ၊ အတိသီယန္တံ။ အတိသီယတု၊ အတိသီယန္တု။ ဘာဝေ သီယတံ။

သယေ၊ သယေယျ၊ သယေယျုံ။ အတိသီယေယျ။ ဘာဝေ သီယေထ။

အသယိ၊ သယိ၊ အသယိံသု၊ သယိံသု၊ အသယုံ။ သာဂမေ အတိသေသိ၊ အတိသေသုံ။ ကမ္မေ အစ္စသီယိတ္ထ၊ အစ္စသီယိ၊ အတိသီယိ။ ဘာဝေ သီယိတ္ထ။

သယိဿတိ၊ သယိဿန္တိ။ ဣကာရာဂမာဘာဝေ သေဿတိ၊ သေဿန္တိ။ ကမ္မေ အတိသီယိဿထ၊ အတိသီယိဿတိ။ ဘာဝေ သီယိဿတေ။

အသယိဿာ၊ အသယိဿံသု။ ကမ္မေ အစ္စသီယိဿထ ဣစ္စာဒိ။

နီ ပါပုဏနေ၊ ဒွိကမ္မကောယံ၊ အဇံ ဂါမံ နေတိ၊ နေန္တိ။ နေသိ၊ နေထ။ နေမိ၊ နေမ။ လောပါဘာဝေ နယတိ၊ နယန္တိ ဣစ္စာဒိ။ ကမ္မေ နီယတေ ဂါမံ အဇော ဒေဝဒတ္တေန၊ နီယရေ၊ နီယန္တေ။ နီယတိ၊ နီယန္တိ။

တထာ နေတု၊ နယတု။ နီယတံ၊ နီယန္တံ။ နယေ၊ နယေယျ။ နီယေထ၊ နီယေယျ။ အနယိ၊ နယိ၊ အနယိံသု၊ နယိံသု။ ဝိနေသိ၊ ဝိနေသုံ။ အနီယိတ္ထ၊ နီယိတ္ထ။ နယိဿတိ ၊ နေဿတိ။ နယိဿတေ၊ နီယိဿတေ၊ နီယိဿတိ။ အနယိဿ၊ အနီယိဿ ဣစ္စာဒိ။

ဌာ ဂတိနိဝတ္တိမှိ၊ ‘‘ဝါ’’တိ ဝတ္တတေ။

၄၉၂။ ဌာ တိဋ္ဌော။

ဌာဣစ္စေတဿ ဓာတုဿ တိဋ္ဌာဒေသော ဟောတိ ဝါ။ ဝဝတ္ထိတဝိဘာသတ္ထောယံ ဝါသဒ္ဒေါ၊ အပ္ပစ္စယလောပေါ။ တိဋ္ဌတိ၊ တိဋ္ဌန္တိ။ ဌာတိ၊ ဌန္တိ။ လောပါဘာဝေ ‘‘ကွစိ ဓာတူ’’တိအာဒိနာ ဌာတော ဟကာရာဂမော စ ရဿတ္တံ၊ သံပုဗ္ဗော သဏ္ဌဟတိ၊ သဏ္ဌဟန္တိ။ ဧတ္တေ အဓိဋ္ဌေတိ၊ အဓိဋ္ဌေန္တိ။

ကမ္မေ –

၄၉၃။ ယမှိ ဒါဓာ မာ ဌာ ဟာ ပါ မဟ မထာဒီနမီ။

ဘာဝကမ္မဝိသယေ ယမှိ ပစ္စယေ ပရေ ဒါ ဓာ မာ ဌာ ဟာပါ မဟ မထ ဣစ္စေဝမာဒီနံ ဓာတူနံ အန္တော ဤကာရမာပဇ္ဇတေ၊ နိစ္စတ္ထောယမာရမ္ဘော။ ဥပဋ္ဌီယတိ၊ ဥပဋ္ဌီယန္တိ။ ဟကာရာဂမေ ရဿတ္တံ၊ ဤကာရာဂမော စ၊ ပတိဋ္ဌဟီယတိ၊ ပတိဋ္ဌဟီယန္တိ။ ဘာဝေ ဌီယတေ။

တထာ တိဋ္ဌတု၊ တိဋ္ဌန္တု။ ဌာတု၊ ဌန္တု။ သဏ္ဌဟတု၊ သဏ္ဌဟန္တု။ တိဋ္ဌေ၊ တိဋ္ဌေယျ။ သဏ္ဌေ၊ သဏ္ဌေယျ၊ သဏ္ဌေယျုံ။ သဏ္ဌဟေ၊ သဏ္ဌဟေယျုံ။ အဋ္ဌာသိ၊ အဋ္ဌံသု။ သဏ္ဌဟိ၊ သဏ္ဌဟိံသု။ ပကိဋ္ဌိဿတိ၊ ပတိဋ္ဌိဿန္တိ။ ဌဿတိ၊ ဌဿန္တိ။ ပတိဋ္ဌဟိဿတိ၊ ပတိဋ္ဌဟိဿန္တိ။ ပတိဋ္ဌိဿ၊ ပတိဋ္ဌိဿံသု။ ပတိဋ္ဌဟိဿ၊ ပတိဋ္ဌဟိဿံသု ဣစ္စာဒိ။

ပါ ပါနေ၊ ‘‘ဝါ’’တိ ဝတ္တတေ။

၄၉၄။ ပါပိဗော။

ပါဣစ္စေတဿ ဓာတုဿ ပိဗာဒေသော ဟောတိ ဝါ။ ဝဝတ္ထိတဝိဘာသတ္ထောယံ ဝါသဒ္ဒေါ။

ပိဗတိ။ ပိဗတု။ ပိဗေယျ။ ‘‘ကွစိ ဓာတွာ’’ဒိနာ ဗကာရဿ ဝကာရော၊ ပိဝတိ၊ ပိဝန္တိ။ ပါတိ၊ ပါန္တိ၊ ပန္တိ ဝါ။ ပီယတေ၊ ပီယန္တေ။ ပီယတိ၊ ပီယန္တိ။ ပိဝတု။ ပိဝေယျ။ အပါယိ၊ ပိဝိ။ ပိဝိဿတိ။ အပိဝိဿ ဣစ္စာဒိ။

အသ ဘုဝိ၊ ဝိဘတ္တုပ္ပတ္တိ၊ အပ္ပစ္စယလောပေါ၊ အသ ဣတီဓ –

‘‘အသသ္မာ၊ အန္တလောပေါ’’တိ စ ဝတ္တတေ။

၄၉၅။ တိဿ တ္ထိတ္တံ။

အသဣစ္စေတသ္မာ ဓာတုမှာ ပရဿ တိဿ ဝိဘတ္တိဿ တ္ထိတ္တံ ဟောတိ၊ ဓာတွန္တဿ လောပေါ စ။ အတ္ထိ။

‘‘ဝါ’’တိ ဝတ္တတေ။

၄၉၆။ သဗ္ဗတ္ထာသဿာဒိ လောပေါ စ။

သဗ္ဗတ္ထ ဝိဘတ္တိပ္ပစ္စယေသု စ အသဣစ္စေတာယ ဓာတုယာ အာဒိဿ လောပေါ ဟောတိ ဝါ၊ ဝဝတ္ထိတဝိဘာသတ္ထောယံ ဝါသဒ္ဒေါ။ သန္တိ။

‘‘အသသ္မာ၊ အန္တလောပေါ’’တိ စ အဓိကာရော။

၄၉၇။ သိမှိ စ။

အသဓာတုဿ အန္တလောပေါ ဟောတိ သိမှိ ဝိဘတ္တိမှိ စ။ တွံ အသိ။

၄၉၈။ ထဿတ္ထတ္တံ။

အသဣစ္စေတာယ ဓာတုယာ ပရဿ ထဿ ဝိဘတ္တိဿ တ္ထတ္တံ ဟောတိ၊ ဓာတွန္တဿ လောပေါ စ။ တုမှေ အတ္ထ။

‘‘ဝါ’’တိ ဝတ္တတေ။

၄၉၉။ အသသ္မာ မိမာနံ မှိမှာန္တလောပေါ စ။

အသဣစ္စေတာယ ဓာတုယာ ပရာသံ မိ မဣစ္စေတာသံ ဝိဘတ္တီနံ မှိမှဣစ္စေတေ အာဒေသာ ဟောန္တိ ဝါ၊ ဓာတွန္တဿ လောပေါ စ။ အမှိ၊ အမှ။ အသ္မိ၊ အသ္မ။

၅၀၀။ တုဿ တ္ထုတ္တံ။

အသဣစ္စေတာယ ဓာတုယာ ပရဿ တုဿ ဝိဘတ္တိဿ တ္ထုတ္တံ ဟောတိ၊ ဓာတွန္တဿ လောပေါ စ။ အတ္ထု။ အသဿာဒိလောပေါ စ၊ သန္တု။ အာဟိ၊ အတ္ထ။ အသ္မိ၊ အသ္မ။

သတ္တမိယံ အသဿာဒိလောပေါ၊ ‘‘ကွစိ ဓာတူ’’တိအာဒိနာ အသတော ဧယျဧယျုံ ဝိဘတ္တီနံ ဣယာဣယုဉ္စ ဟောန္တိ။ သိယာ၊ သိယုံ။

လောပါဘာဝေ ‘‘ကွစိ ဓာတွာ’’ဒိနာ အသတော ဧယျာဒီနံ သဓာတွန္တာနံ ဿ ဿု ဿ ဿထ ဿံ ဿာမအာဒေသာ ဟောန္တိ။

ဧဝမဿ ဝစနီယော၊ အဿု။ အဿ၊ အဿထ။ အဿံ၊ အဿာမ။

အဇ္ဇတနိယံ အကာရာဂမော၊ ဒီဃော စ၊ အာသိ၊ အာသိံသု၊ အာသုံ။ အာသိ၊ အာသိတ္ထ။ အာသိံ၊ အာသိမှ။

‘‘ဝါ ၊ အသဿာ’’တိ စ ဝတ္တတေ။

၅၀၁။ အသဗ္ဗဓာတုကေ ဘူ။

အသဿေဝ ဓာတုဿ ဘူအာဒေသော ဟောတိ ဝါ အသဗ္ဗဓာတုကေ။ ဘဝိဿတိ၊ ဘဝိဿန္တိ။ အဘဝိဿ၊ အဘဝိဿံသု။

ဝါတိ ကိမတ္ထံ? အာသုံ။

ဗြူ ဝိယတ္တိယံ ဝါစာယံ၊ တျာဒျုပ္ပတ္တိ၊ အပ္ပစ္စယလောပေါ စ။

‘‘ကွစီ’’တိ ဝတ္တတေ။

၅၀၂။ ဗြူတော ဤ တိမှိ။

ဗြူဣစ္စေတာယ ဓာတုယာ ပရော ဤကာရာဂမော ဟောတိ တိမှိ ဝိဘတ္တိမှိ ကွစိ၊ ဝုဒ္ဓိအဝါဒေသာ၊ သရလောပါဒိ။ ဗြဝီတိ၊ ဗြူတိ၊ ‘‘အညေသု စာ’’တိ သုတ္တာနုဝတ္တိတဝါဂ္ဂဟဏေန ဗြူဓာတုဿ ဗျဉ္ဇနေ ဝုဒ္ဓိ န ဟောတိ၊ ဗဟုဝစနေ ‘‘ဈလာနမိယုဝါ သရေ ဝါ’’တိ ဦကာရဿ သရေ ဥဝါဒေသော၊ ဗြုဝန္တိ။ ‘‘ကွစိ ဓာတွာ’’ဒိနာ ဗြူတော တိအန္တီနံ ဝါ အ ဥ အာဒေသာ ဗြူဿ အာဟာဒေသော စ။

အာဟ၊ အာဟု။ ဗြူသိ၊ ဗြူထ။ ဗြူမိ၊ ဗြူမ။ ဗြူတေ၊ ဗြုဝန္တေ။ ဗြူသေ၊ ဗြုဝဝှေ။ ဗြုဝေ၊ ဗြူမှေ။ ဗြူတု၊ ဗြုဝန္တု။ ဗြူဟိ၊ ဗြူထ။ ဗြူမိ၊ ဗြူမ။ ဗြူတံ၊ ဗြုဝန္တံ။ ဗြုဝေ၊ ဗြုဝေယျ၊ ဗြုဝေယျုံ။ ဗြုဝေယျာသိ၊ ဗြုဝေယျာထ။ ဗြုဝေယျာမိ၊ ဗြုဝေယျာမ။ ဗြုဝေထ၊ ဗြုဝေရံ။ အဗြုဝါ၊ အဗြုဝူ။

ပရောက္ခာယံ ‘‘ဗြူဘူနမာဟဘူဝါ ပရောက္ခာယ’’န္တိ ဗြူဓာတုဿ အာဟအာဒေသော၊ သရလောပါဒိ၊ သုပိနေ ကိရ မာဟ၊ တေနာဟု ပေါရာဏာ၊ အာဟံသု ဝါ ဣစ္စာဒိ။

အဇ္ဇတနိယံ အဗြဝိ၊ အဗြုဝိ၊ အဗြဝုံ။ ဗြဝိဿတိ။ အဗြဝိဿ ဣစ္စာဒိ။

ဟန ဟိံသာဂတီသု၊ တိမှိ ကွစိ အပ္ပစ္စယလောပေါ၊ ဟန္တိ၊ ဟနတိ၊ ဟနန္တိ။ ဟနသိ၊ ဟနထ။ ဟနာမိ၊ ဟနာမ။

ကမ္မေ ‘‘တဿ စဝဂ္ဂ’’ဣစ္စာဒိနာ ဉတ္တံ၊ ဒွိတ္တဉ္စ၊ ဟညတေ၊ ဟညန္တေ၊ ဟညရေ။ ဟညတိ၊ ဟညန္တိ။ ဟနတု၊ ဟနန္တု။ ဟနေယျ။

‘‘ဟနဿာ’’တိ ဝတ္တတေ။

၅၀၃။ ဝဓော ဝါ သဗ္ဗတ္ထ။

ဟနဣစ္စေတဿ ဓာတုဿ ဝဓာဒေသော ဟောတိ ဝါ သဗ္ဗတ္ထ ဝိဘတ္တိပ္ပစ္စယေသု၊ ဝဝတ္ထိတဝိဘာသတ္ထောယံ ဝါသဒ္ဒေါ။ ဝဓေတိ။ ဝဓီယတိ။ ဝဓေတု။ ဝဓီယတု။ ဝဓေယျ။ အဝဓိ၊ အဝဓိံသု။ အဟနိ၊ အဟနိံသု။ ဝဓိဿတိ၊ ဟနိဿတိ။ ခါဒေသေ ပဋိဟင်္ခါမိ၊ ပဋိဟနိဿာမိ။ အဝဓိဿ၊ အဟနိဿ ဣစ္စာဒိ။

ဟူဝါဒိနယော။

ဟု ဒါနာဒနဟဗျပ္ပဒါနေသု၊ တျာဒျုပ္ပတ္တိ၊ အပ္ပစ္စယော စ၊ ‘‘ကွစာဒိဝဏ္ဏာနမေကဿရာနံ ဒွေဘာဝေါ’’တိ ဒွိတ္တံ၊ ‘‘ပုဗ္ဗောဗ္ဘာသော’’တိ အဗ္ဘာသသညာ။

‘‘အဗ္ဘာသေ’’တိ ဝတ္တတေ။

၅၀၄။ ဟဿဇော။

ဟကာရဿ အဗ္ဘာသေ ဝတ္တမာနဿ ဇော ဟောတိ။ ‘‘လောပဉ္စေတ္တ မကာရော’’တိ အပ္ပစ္စယလောပေါ၊ ဝုဒ္ဓိ။ ဇုဟောတိ။

လောပါဘာဝေ ‘‘ဈလာနံ၊ သရေ’’တိ စ ဝတ္တမာနေ –

၅၀၅။ ယဝကာရာ စ။

ဈလသညာနံ ဣဝဏ္ဏုဝဏ္ဏာနံ ယကာရဝကာရာဒေသာ ဟောန္တိ သရေ ပရေတိ အပဒန္တဿ ဥကာရဿ ဝကာရော။

ဇုဟွတိ၊ ဇုဟောတိ၊ ဇုဟွန္တိ၊ ဇုဟောန္တိ။ ဇုဟွသိ၊ ဇုဟောသိ၊ ဇုဟွထ၊ ဇုဟောထ။ ဇုဟွာမိ၊ ဇုဟောမိ၊ ဇုဟွာမ၊ ဇုဟောမ။

ကမ္မေ ‘‘ကွစိ ဓာတူ’’တိအာဒိနာ ဒီဃော၊ ဟူယတေ၊ ဟူယန္တေ။ ဟူယတိ၊ ဟူယန္တိ။

တထာ ဇုဟောတု၊ ဇုဟောန္တု၊ ဇုဟွန္တု ဝါ။ ဇုဟေ၊ ဇုဟေယျ၊ ဇုဟေယျုံ။ အဇုဟဝိ၊ အဇုဟဝုံ။ အဇုဟောသိ၊ အဇုဟောသုံ။ အဟူယိတ္ထ အဂ္ဂိ။ ဇုဟိဿတိ၊ ဇုဟိဿန္တိ။ ဇုဟောဿတိ၊ ဇုဟောဿန္တိ ဝါ။ အဇုဟိဿ၊ အဇုဟိဿံသု ဣစ္စာဒိ။

ဟာ စာဂေ၊ ပုရေ ဝိယ ဒွေဘာဝဇာဒေသ အပ္ပစ္စယလောပါ။

‘‘အဗ္ဘာသေ’’တိ ဝတ္တတေ။

၅၀၆။ ရဿော။

အဗ္ဘာသေ ဝတ္တမာနဿ သရဿ ရဿော ဟောတိ။

ဇဟာတိ၊ ဇဟန္တိ။ ဇဟာသိ၊ ဇဟာထ။ ဇဟာမိ၊ ဇဟာမ။

ကမ္မေ ‘‘ယမှိ ဒါဓာမာဌာဟာပါမဟမထာဒီနမီ’’တိ ဓာတွန္တဿ ဤကာရော။ ဟီယတေ၊ ဟီယန္တေ၊ ဟီယရေ။ ဟီယတိ၊ ဟီယန္တိ။

တထာ ဇဟာတု၊ ဇဟန္တု။ ဇဟေ၊ ဇဟေယျ၊ ဇဟေယျုံ။ ဟီယေထ၊ ဟီယေယျ။ အဇဟာသိ၊ အဇဟိံသု၊ အဇဟာသုံ။ ပဇဟိ၊ ပဇဟိံသု၊ ပဇဟံသု၊ ပဇဟုံ။ ကမ္မေ ပဇဟီယိတ္ထ၊ ပဇဟီယိ။ ပဇဟိဿတိ၊ ပဇဟိဿန္တိ။ ဟီယိဿတိ၊ ဟီယိဿန္တိ။ ပဇဟိဿ၊ ပဇဟိဿံသု ဣစ္စာဒိ။

ဒါ ဒါနေ၊ တျာဒျုပ္ပတ္တိ၊ ဒွေဘာဝရဿတ္တာနိ၊ အပ္ပစ္စယဿ လောပေါ၊ ဒဒါတိ၊ ဒဒန္တိ။ ဒဒါသိ၊ ဒဒါထ။ ဒဒါမိ၊ ဒဒါမ။

ဒွိတ္တာဘာဝေ မဏ္ဍူကဂတိယာ ‘‘ဝါ’’တိ ဝတ္တတေ။

၅၀၇။ ဒါဓာတုဿ ဒဇ္ဇံ။

ဒါဣစ္စေတဿ ဓာတုဿ သဗ္ဗဿ ဒဇ္ဇာဒေသော ဟောတိ ဝါ၊ ဝဝတ္ထိတဝိဘာသတ္ထောယံ ဝါသဒ္ဒေါ၊ အပ္ပစ္စယလောပေါ။ ဒဇ္ဇတိ၊ ဒဇ္ဇန္တိ။ ဒဇ္ဇသိ၊ ဒဇ္ဇထ။ ဒဇ္ဇာမိ၊ ဒဇ္ဇာမ။ ဒဇ္ဇာဒေသာဘာဝေ ‘‘လောပဉ္စေတ္တမကာရော’’တိ အပ္ပစ္စယဿ ဧကာရော၊ ဒါနံ ဒေတိ၊ ဒေန္တိ။ ဒေသိ၊ ဒေထ။

‘‘ဝါ’’တိ ဝတ္တတေ။

၅၀၈။ ဒါဒန္တဿံ မိမေသု။

ဒါဣစ္စေတဿ ဓာတုဿ အန္တဿ အံ ဟောတိ ဝါ မိမဣစ္စေတေသု ပရေသု၊ နိဂ္ဂဟီတဿ ဝဂ္ဂန္တတ္တံ။ ဒမ္မိ၊ ဒမ္မ။ ဒေမိ၊ ဒေမ။

ကမ္မေ ‘‘ယမှိ ဒါဓာ’’ဣစ္စာဒိနာ ဤကာရော၊ ဒီယတေ၊ ဒီယန္တေ။ ဒီယတိ၊ ဒီယန္တိ။ ဒီယျတေ၊ ဒီယျန္တေ။ ဒီယျတိ၊ ဒီယျန္တိ ဝါ ဣစ္စာဒိ။

ဒဒါတု ၊ ဒဒန္တု။ ဒဒါဟိ၊ ဒဒါထ။ ဒဒါမိ၊ ဒဒါမ။ ဒဒတံ၊ ဒဒန္တံ။ ဒဒဿု၊ ဒဒဝှော။ ဒဒေ၊ ဒဒါမသေ။ ဒဇ္ဇတု၊ ဒဇ္ဇန္တု ဣစ္စာဒိ။ ဒေတု၊ ဒေန္တု။ ဒေဟိ၊ ဒေထ။ ဒေမိ၊ ဒေမ။ ကမ္မေ ဒီယတံ၊ ဒီယန္တံ။ ဒီယတု၊ ဒီယန္တု။

သတ္တမိယံ ဒဒေ၊ ဒဒေယျ၊ ဒဒေယျုံ။ ဒဒေယျာသိ၊ ဒဒေယျာထ။ ဒဒေယျာမိ၊ ဒဒေယျာမ။ ဒဒေထ၊ ဒဒေရံ။ ဒဒေထော၊ ဒဒေယျာဝှော။ ဒဒေယျံ၊ ဒဒေယျာမှေ။ ဒဇ္ဇေ၊ ဒဇ္ဇေယျ။

‘‘ကွစိ ဓာတူ’’တိအာဒိနာ ဧယျဿာတ္တဉ္စ၊ ဒဇ္ဇာ၊ ဒဇ္ဇုံ၊ ဒဇ္ဇေယျုံ။ ဒဇ္ဇေယျာသိ၊ ဒဇ္ဇေယျာထ။ ဒဇ္ဇံ၊ ဧယျာမိဿ အမာဒေသော စ၊ ဒဇ္ဇေယျာမိ၊ ဒဇ္ဇေယျာမ။ ဒွိတ္တာဘာဝေ ဒေယျ၊ ဒေယျုံ။ ဒေယျာသိ၊ ဒေယျာထ။ ဒီယေထ၊ ဒီယေယျ။

ဟိယျတ္တနိယံ အဒဒါ၊ အဒဒူ။ အဒဒေါ၊ အဒဒတ္ထ။ အဒဒံ၊ အဒဒမှ။ အဒဒတ္ထ၊ အဒဒမှသေ။ ကမ္မေ အဒီယိတ္ထ။

အဇ္ဇတနိမှိ အဒဒိ၊ အဒဒိံသု၊ အဒဒုံ။ အဒဇ္ဇိ၊ အဒဇ္ဇိံသု။ အဒါသိ၊ အဒံသု။ အဒါသိ၊ အဒေါ၊ အဒိတ္ထ။ အဒါသိံ၊ အဒါသိမှ၊ အဒမှ။ အဒါဒါနံ ပုရိန္ဒဒေါ။ ကမ္မေ အဒီယိတ္ထ၊ အဒီယျိ။

ဘဝိဿန္တိယံ ဣကာရာဂမော၊ သရလောပါဒိ၊ ဒဒိဿတိ၊ ဒဒိဿန္တိ။ ဒဇ္ဇိဿတိ၊ ဒဇ္ဇိဿန္တိ။ ရဿတ္တံ၊ ဒဿတိ၊ ဒဿန္တိ။ ဒဿသိ၊ ဒဿထ။ ဒဿာမိ၊ ဒဿာမ။ ဒဿတေ။ ဒီယိဿတေ၊ ဒီယိဿတိ။

ကာလာတိပတ္တိယံ အဒဒိဿ၊ အဒဇ္ဇိဿ၊ အဒဇ္ဇိဿာ၊ အဒဿ၊ အဒဿာ၊ အဒဿံသု။ အဒီယိဿထ၊ အဒီယိဿ ဣစ္စာဒိ။

ဓာ ဓာရဏေ၊ ပုရေ ဝိယ ဝိဘတ္တုပ္ပတ္တိ၊ ဒွိတ္တရဿတ္တာနိ၊ အပ္ပစ္စယလောပေါ စ၊ ‘‘ဒုတိယစတုတ္ထာနံ ပဌမတတိယာ’’တိ ဓကာရဿ ဒကာရော၊ ဒဓာတိ၊ ဒဓန္တိ။ အပိပုဗ္ဗော တဿ ‘‘တေသု ဝုဒ္ဓီ’’တိအာဒိနာ အကာရလောပေါ၊ ‘‘ကွစိ ဓာတူ’’တိအာဒိနာ ဓကာရဿ ဟကာရော၊ ရဿတ္တဉ္စ၊ ဒွါရံ ပိဒဟတိ၊ ပိဒဟန္တိ။ ဒွေဘာဝါဘာဝေ နိဓိံ နိဓေတိ၊ နိဓေန္တိ။

ကမ္မေ ဓီယတေ၊ ဓီယတိ၊ ပိဓီယတေ၊ ပိဓီယတိ။

တထာ ဒဓာတု၊ ပိဒဟတု၊ နိဓေတု၊ နိဓေန္တု။ ဒဓေ၊ ဒဓေယျ၊ ပိဒဟေ၊ ပိဒဟေယျ၊ နိဓေ၊ နိဓေယျ။ ဒဓာသိ၊ ပိဒဟိ။ ဓဿတိ၊ ပိဒဟိဿတိ၊ ပရိဒဟေဿတိ။ အဓဿ၊ ပိဒဟိဿ ဣစ္စာဒိ။

ဇုဟောတျာဒိနယော။

အဝုဒ္ဓိကာ တုဒါဒီ စ၊ ဟူဝါဒိ စ တထာပရော၊

ဇုဟောတျာဒိ စတုဒ္ဓေဝံ၊ ဉေယျာ ဘူဝါဒယော ဣဓ။

ဘူဝါဒိဂဏော။

ရုဓာဒိဂဏ

ရုဓ အာဝရဏေ၊ ပုရေ ဝိယ ဓာတုသညာဒိမှိ ကတေ ဝိဘတ္တုပ္ပတ္တိ။

‘‘အ’’ဣတိ ဝတ္တတေ။

၅၀၉။ ရုဓာဒိတော နိဂ္ဂဟီတပုဗ္ဗဉ္စ။

စတုပ္ပဒမိဒံ။ ရုဓဣစ္စေဝမာဒိတော ဓာတုဂဏတော အပ္ပစ္စယော ဟောတိ ကတ္တရိ ဝိဘတ္တိပ္ပစ္စယေသု၊ နိဂ္ဂဟီတဉ္စ တတော ပုဗ္ဗံ ဟုတွာ အာဂမော ဟောတိ၊ တဉ္စ နိဂ္ဂဟီတံ ပကတိယာ သရာနုဂတတ္တာ ဓာတုဿရတော ပရံ ဟောတိ။ စသဒ္ဒေန ဣဤဧဩပစ္စယာ စ၊ နိဂ္ဂဟီတဿ ဝဂ္ဂန္တတ္တံ။ ဣဓ သံယောဂန္တတ္တာ န ဝုဒ္ဓိ ဟောတိ၊ တဒါဂမဿ တဂ္ဂဟဏေန ဂဟဏတော။

သော မဂ္ဂံ ရုန္ဓတိ၊ ရုန္ဓန္တိ။ ရုန္ဓသိ၊ ရုန္ဓထ။ ရုန္ဓာမိ၊ ရုန္ဓာမ။ ရုန္ဓတေ၊ ရုန္ဓန္တေ ဣစ္စာဒိ၊ ဣကာရာဒိပ္ပစ္စယေသု ပန ရုန္ဓိတိ၊ ရုန္ဓီတိ၊ ရုန္ဓေတိ၊ ရုန္ဓောတီတိပိ ဟောတိ။

ကမ္မေ နိပုဗ္ဗော ယပ္ပစ္စယဿ ‘‘တဿ စဝဂ္ဂ’’ဣစ္စာဒိနာ သဓာတွန္တဿ ဈကာရေ ကတေ ‘‘ဝဂ္ဂေ ဃောသာ’’တိအာဒိနာ ဒွိတ္တံ၊ မဂ္ဂေါ နိရုဇ္ဈတေ တေန၊ နိရုဇ္ဈန္တေ။ ပရဿပဒတ္တေ နိရုဇ္ဈတိ၊ နိရုဇ္ဈန္တိ။ နိရုဇ္ဈသိ၊ နိရုဇ္ဈထ။ နိရုဇ္ဈာမိ၊ နိရုဇ္ဈာမ။

ရုန္ဓတု၊ ရုန္ဓန္တု။ ရုန္ဓာဟိ၊ ရုန္ဓထ။ ရုန္ဓာမိ၊ ရုန္ဓာမ။ ရုန္ဓတံ၊ ရုန္ဓန္တံ။ ရုန္ဓဿု၊ ရုန္ဓဝှော။ ရုန္ဓေ၊ ရုန္ဓာမသေ။ နိရုဇ္ဈတံ၊ နိရုဇ္ဈန္တံ။ နိရုဇ္ဈတု၊ နိရုဇ္ဈန္တု။ ရုန္ဓေ၊ ရုန္ဓေယျ၊ ရုန္ဓေယျုံ။ ရုန္ဓေထ၊ ရုန္ဓေရံ။ နိရုဇ္ဈေထ၊ နိရုဇ္ဈေယျ ဣစ္စာဒိ။ ရုန္ဓိ၊ ရုန္ဓိံသု။ အရုန္ဓိ၊ နိရုဇ္ဈိတ္ထ။ နိရုဇ္ဈိ၊ နိရုဇ္ဈိံသု။ ရုန္ဓိဿတိ၊ ရုန္ဓိဿန္တိ။ နိရုဇ္ဈိဿတေ၊ နိရုဇ္ဈိဿန္တေ။ နိရုဇ္ဈိဿတိ၊ နိရုဇ္ဈိဿန္တိ။ အရုန္ဓိဿ၊ အရုန္ဓိဿံသု။ နိရုဇ္ဈိဿထ၊ နိရုဇ္ဈိဿ ဣစ္စာဒိ။

ဆိဒိ ဒွိဓာကရဏေ၊ ဆိန္ဒတိ၊ ဆိန္ဒန္တိ။ ကမ္မေ ဆိဇ္ဇတေ၊ ဆိဇ္ဇန္တေ။ ဆိဇ္ဇတိ၊ ဆိဇ္ဇန္တိ။ တထာ ဆိန္ဒတု၊ ဆိန္ဒန္တု။ ဆိဇ္ဇတု၊ ဆိဇ္ဇန္တု။ ဆိန္ဒေ၊ ဆိန္ဒေယျ။ ဆိဇ္ဇေယျ။ အဆိန္ဒိ၊ ဆိန္ဒိ၊ ဆိန္ဒိံသု။ အဆိဇ္ဇိတ္ထ၊ ဆိဇ္ဇိ။ ဆိန္ဒိဿတိ၊ ဆိန္ဒိဿန္တိ။ ဿဿ ဆာဒေသေ – ဆေစ္ဆတိ၊ ဆေစ္ဆန္တိ။ ဆေစ္ဆိတိ ဝါ။ ကမ္မေ ဆိဇ္ဇိဿတေ၊ ဆိဇ္ဇိဿန္တေ။ ဆိဇ္ဇိဿတိ၊ ဆိဇ္ဇိဿန္တိ။ အဆိန္ဒိဿ။ အဆိဇ္ဇိဿ ဣစ္စာဒိ။

ဘိဒိ ဝိဒါရဏေ၊ ဘိန္ဒတိ၊ ဘိန္ဒန္တိ ဣစ္စာဒိ။

ယုဇ ယောဂေ၊ ယုဉ္ဇတိ၊ ယုဉ္ဇန္တိ။ ယုဇ္ဇတေ၊ ယုဇ္ဇန္တေ။ ယုဇ္ဇတိ၊ ယုဇ္ဇန္တိ။ ယုဉ္ဇတု။ ယုဇ္ဇတံ။ ယုဉ္ဇေ။ ယုဇ္ဇေထ။ အယုဉ္ဇိ၊ အယုဉ္ဇိံသု။ အယုဇ္ဇိတ္ထ၊ အယုဇ္ဇိ။ ယုဉ္ဇိဿတိ၊ ယုဉ္ဇိဿန္တိ။ ယုဇ္ဇိဿတေ၊ ယုဇ္ဇိဿန္တေ။ ယုဇ္ဇိဿတိ၊ ယုဇ္ဇိဿန္တိ။ အယုဉ္ဇိဿ။ အယုဇ္ဇိဿထ၊ အယုဇ္ဇိဿ ဣစ္စာဒိ။

ဘုဇ ပါလနဗျဝဟရဏေသု၊ ဘုဉ္ဇတိ၊ ဘုဉ္ဇန္တိ ဣစ္စာဒိ။

ဘဝိဿန္တိယံ ‘‘ကရဿ သပ္ပစ္စယဿ ကာဟော’’တိ သုတ္တေ သပ္ပစ္စယဂ္ဂဟဏေန ဘုဇတော ဿဿ ခါဒေသော၊ ‘‘ကော ခေ စာ’’တိ ဓာတွန္တဿ ကကာရော၊ ဝုဒ္ဓိ၊ ဘောက္ခတိ၊ ဘောက္ခန္တိ။ ဘောက္ခသိ၊ ဘောက္ခထ။ ဘောက္ခာမိ၊ ဘောက္ခာမ။ ခါဒေသာဘာဝေ ဘုဉ္ဇိဿတိ၊ ဘုဉ္ဇိဿန္တိ ဣစ္စာဒိ။

မုစ မောစနေ၊ မုဉ္စတိ၊ မုဉ္စန္တိ။ မုစ္စတေ၊ မုစ္စန္တေ။ မုဉ္စတု၊ မုဉ္စန္တု။ မုစ္စတံ၊ မုစ္စန္တံ။ မုဉ္စေ၊ မုဉ္စေယျ၊ မုဉ္စေယျုံ။ မုစ္စေထ၊ မုစ္စေရံ။ အမုဉ္စိ၊ အမုဉ္စိံသု။ အမုစ္စိတ္ထ။ မောက္ခတိ၊ မောက္ခန္တိ။ မုဉ္စိဿတိ၊ မုဉ္စိဿန္တိ။ မုစ္စိဿတေ၊ မုစ္စိဿန္တေ။ အမုဉ္စိဿ၊ အမုစ္စိဿထ ဣစ္စာဒိ။

ရုဓာဒိဂဏော။

ဒိဝါဒိဂဏ

ဒိဝု ကီဠာဝိဇိဂီသာဗျဝဟာရဇုတိထုတိကန္တိဂတီသု။ ပုရေ ဝိယ ဓာတွန္တလောပဝိဘတ္တုပ္ပတ္တိယော။

၅၁၀။ ဒိဝါဒိတောယော။

ဒိဝါဒိတော ဓာတုဂဏတော ယပ္ပစ္စယော ဟောတိ ကတ္တရိ ဝိဟိတေသု ဝိဘတ္တိပ္ပစ္စယေသု။

‘‘ယဂ္ဂဟဏံ၊ စဝဂ္ဂ ယကာရ ဝကာရတ္တံ သဓာတွန္တဿ၊ ပုဗ္ဗရူပ’’န္တိ စ ဝတ္တတေ။

၅၁၁။ တထာ ကတ္တရိ စ။

ယထာ ဘာဝကမ္မေသု ယပ္ပစ္စယဿာဒေသော ဟောတိ၊ တထာ ကတ္တရိပိ ယပ္ပစ္စယဿ သဓာတွန္တဿ စဝဂ္ဂ ယကာရဝကာရာဒေသော၊ ပုဗ္ဗရူပဉ္စ ကာတဗ္ဗာနီတိ ဓာတွန္တဿ ဝကာရတ္တာ သဟ တေန ယကာရဿ ဝကာရေ ကတေ ဒွိဘာဝေါ၊ ‘‘ဒေါ ဓဿ စာ’’တိ ဧတ္ထ စဂ္ဂဟဏေန ‘‘ဗော ဝဿာ’’တိ ဝုတ္တတ္တာ ဝကာရဒွယဿ ဗကာရဒွယံ၊ ဒိဗ္ဗတိ၊ ဒိဗ္ဗန္တိ။ ဒိဗ္ဗသိ၊ ဒိဗ္ဗထ။ ဒိဗ္ဗာမိ၊ ဒိဗ္ဗာမ။

ကမ္မေ ဒိဗ္ဗတေ၊ ဒိဗ္ဗန္တေ။ ဒိဗ္ဗတိ၊ ဒိဗ္ဗန္တိ။ ဒိဗ္ဗတု။ ဒိဗ္ဗတံ။ ဒိဗ္ဗေ။ ဒိဗ္ဗေထ။ အဒိဗ္ဗိ။ အဒိဗ္ဗိတ္ထ။ ဒိဗ္ဗိဿတိ။ ဒိဗ္ဗိဿတေ။ အဒိဗ္ဗိဿ ဣစ္စာဒိ။

သိဝု တန္တသန္တာနေ၊ သိဗ္ဗတိ၊ သိဗ္ဗန္တိ။ သိဗ္ဗတု။ သိဗ္ဗေယျ။ အသိဗ္ဗိ၊ သိဗ္ဗိ။ သိဗ္ဗိဿတိ။ အသိဗ္ဗိဿ ဣစ္စာဒိ။

ပဒ ဂတိမှိ၊ ဥပုဗ္ဗော ဒွိတ္တံ၊ ‘‘တထာ ကတ္တရိ စာ’’တိ သဓာတွန္တဿ ယကာရဿ ဇကာရော၊ ဒွိတ္တဉ္စ။

ဥပ္ပဇ္ဇတိ၊ ဥပ္ပဇ္ဇန္တိ။ ဥပ္ပဇ္ဇတေ၊ ဥပ္ပဇ္ဇန္တေ၊ ဥပ္ပဇ္ဇရေ။

ကမ္မေ ပဋိပဇ္ဇတေ၊ ပဋိပဇ္ဇန္တေ။ ပဋိပဇ္ဇတိ၊ ပဋိပဇ္ဇန္တိ။ ဘာဝေ ဥပ္ပဇ္ဇတေ တယာ။

တထာ ဥပ္ပဇ္ဇတု။ ဥပ္ပဇ္ဇေယျ။ ဥဒပဇ္ဇာ။ ဥဒပဇ္ဇထ။ ဥဒပါဒိ၊ ဥပ္ပဇ္ဇီ။ ဥပ္ပဇ္ဇိတ္ထ။ ဥပ္ပဇ္ဇိဿတိ။ ဥပ္ပဇ္ဇိဿ၊ ဥပ္ပဇ္ဇိဿာ ဣစ္စာဒိ။

ဗုဓ အဝဂမနေ၊ ယပ္ပစ္စယပရတ္တာ န ဝုဒ္ဓိ၊ ဈကာရာဒေသောဝ ဝိသေသော၊ ဓမ္မံ ဗုဇ္ဈတိ၊ ဗုဇ္ဈန္တိ။ ဗုဇ္ဈတေ၊ ဗုဇ္ဈန္တေ၊ ဗုဇ္ဈရေ ဝါ။

ကမ္မေ ဗုဇ္ဈတေ မယာ ဓမ္မော၊ ဗုဇ္ဈန္တေ။ ဗုဇ္ဈတိ၊ ဗုဇ္ဈန္တိ။ ဗုဇ္ဈတု။ ဗုဇ္ဈေယျ။ အဗုဇ္ဈိ။ အဗုဇ္ဈိတ္ထ။ ဗုဇ္ဈိဿတိ။ အဗုဇ္ဈိဿ။

ယုဓ သမ္ပဟာရေ၊ ယုဇ္ဈတိ၊ ယုဇ္ဈန္တိ။

ကုဓ ကောပေ၊ ကုဇ္ဈတိ၊ ကုဇ္ဈန္တိ။

ဝိဓ တာဠနေ၊ ဝိဇ္ဈတိ၊ ဝိဇ္ဈန္တိ ဣစ္စာဒိ။

နဟ ဗန္ဓနေ၊ ‘‘ဟ ဝိပရိယယော’’တိ ယောဂဝိဘာဂေန ဝိပရိယယော။ သန္နယှတိ၊ သန္နယှန္တိ ဣစ္စာဒိ။

မန ဉာဏေ၊ ဉာဒေသောဝ ဝိသေသော၊ မညတိ၊ မညန္တိ ဣစ္စာဒိ။

ဒါ အာဒါနေ၊ သံအာပုဗ္ဗော ‘‘ကွစိ ဓာတူ’’တိအာဒိနာ ယမှိ ဓာတွန္တဿ ဣကာရော၊ သီလံ သမာဒိယတိ၊ သမာဒိယန္တိ ဣစ္စာဒိ။

တုသ ပီတိမှိ၊ ယပ္ပစ္စယဿ ပုဗ္ဗရူပတ္တံ၊ တုဿတိ၊ တုဿန္တိ ဣစ္စာဒိ။

တထာ သမု ဥပသမေ၊ သမ္မတိ၊ သမ္မန္တိ။

ကုပ ကောပေ၊ ကုပ္ပတိ၊ ကုပ္ပန္တိ။

ဇနဇနနေ၊ ‘‘ဇနာဒီနမာ တိမှိ စာ’’တိ ဧတ္ထ ‘‘ဇနာဒီနမာ’’တိ ယောဂဝိဘာဂေန ယမှိ ဓာတွန္တဿ အာကာရော။ ဇာယတိ၊ ဇာယန္တိ။ ဇာယတေ၊ ဇာယန္တေ။

ကမ္မေ ဇနီယတိ၊ ဇနီယန္တိ။ ဇာယတု။ ဇာယေယျ။ အဇာယိ၊ အဇနိ။ ဇာယိဿတိ၊ ဇနိဿတိ။ အဇာယိဿ၊ အဇနိဿ ဣစ္စာဒိ။

ဒိဝါဒိဂဏော။

သွာဒိဂဏ

သု သဝဏေ၊ ပုရေ ဝိယ ဝိဘတ္တုပ္ပတ္တိ။

၅၁၂။ သွာဒိတော ဏုဏာဥဏာ စ။

သုဣစ္စေဝမာဒိတော ဓာတုဂဏတော ဏု ဏာဥဏာဣစ္စေတေ ပစ္စယာ ဟောန္တိ ကတ္တရိ ဝိဟိတေသု ဝိဘတ္တိပ္ပစ္စယေသု။ ‘‘အညေသု စာ’’တိ ဧတ္ထ စဂ္ဂဟဏေန ဏုပ္ပစ္စယဿ ဝုဒ္ဓိ။ တတ္ထေဝါနုဝတ္တိတဝါဂ္ဂဟဏေန သွာဒီနံ ဏုဏာဒီသု န ဝုဒ္ဓိ။

ဓမ္မံ သုဏောတိ၊ သရလောပါဒိ၊ သုဏန္တိ။ သုဏောသိ၊ သုဏောထ။ သုဏောမိ၊ သုဏောမ။ ဏာပစ္စယေ သုဏာတိ၊ သုဏန္တိ။ သုဏာသိ၊ ‘‘ကွစိ ဓာတူ’’တိအာဒိနာ ရဿတ္တံ၊ သုဏသိ၊ သုဏာထ၊ သုဏထ။ သုဏာမိ၊ သုဏာမ။

ကမ္မေ ယပ္ပစ္စယေ ‘‘ကွစိ ဓာတူ’’တိအာဒိနာ ဒီဃော၊ သူယတေ၊ သူယန္တေ။ သူယတိ၊ သူယန္တိ။ ဒွိတ္တေ ရဿတ္တံ၊ သုယျတိ၊ သုယျန္တိ။ သူယျတိ၊ သူယျန္တိ ဝါ။

သုဏောတု၊ သုဏန္တု။ သုဏောဟိ၊ သုဏောထ။ သုဏောမိ၊ သုဏောမ။ သုဏာတု၊ သုဏန္တု။ သုဏ၊ သုဏာဟိ၊ သုဏာထ။ သုဏာမိ၊ သုဏာမ။ သုဏတံ၊ သုဏန္တံ ။ သုဏဿု၊ သုဏဝှော။ သုဏေ၊ သုဏာမသေ။ ကမ္မေ သူယတံ၊ သူယန္တံ။ သူယတု၊ သူယန္တု။

သုဏေ၊ သုဏေယျ၊ သုဏေယျုံ။ သုဏေယျာသိ၊ သုဏေယျာထ။ သုဏေယျာမိ၊ သုဏေယျာမ။ သုဏေထ၊ သုဏေရံ။ သုဏေထော၊ သုဏေယျာဝှော။ သုဏေယျံ၊ သုဏေယျာမှေ။ သူယေထ၊ သူယေယျ။

အသုဏိ၊ သုဏိ၊ အသုဏိံသု၊ သုဏိံသု။ အသုဏိ၊ အသုဏိတ္ထ။ အသုဏိံ၊ သုဏိံ၊ အသုဏိမှ၊ သုဏိမှ။ အသုဏိတ္ထ၊ သုဏိတ္ထ။ ဏာပစ္စယလောပေါ၊ ဝုဒ္ဓိ၊ သဿ ဒွိဘာဝေါ၊ သာဂမော၊ အဿောသိ၊ အဿောသိံသု၊ ပစ္စဿောသုံ။ အဿောသိ၊ အဿောသိတ္ထ။ အဿောသိံ၊ အဿောသိမှ၊ အဿောသိမှာ ဝါ၊ အဿောသိတ္ထ။ အသူယိတ္ထ၊ အဿူယိ။

သရလောပါဒိ၊ သုဏိဿတိ၊ သုဏိဿန္တိ။ သုဏိဿသိ၊ သုဏိဿထ။ သုဏိဿာမိ၊ သုဏိဿာမ။ သုဏိဿတေ၊ သုဏိဿန္တေ။ သုဏိဿသေ၊ သုဏိဿဝှေ။ သုဏိဿံ၊ သုဏိဿာမှေ။ ဏာပစ္စယလောပေါ၊ ဝုဒ္ဓိ၊ သောဿတိ၊ သောဿန္တိ။ သောဿသိ၊ သောဿထ။ သောဿာမိ၊ သောဿာမ။ သောဿတေ။ သူယိဿတေ၊ သူယိဿတိ။ အသုဏိဿ။ အသူယိဿ ဣစ္စာဒိ။

ဟိ ဂတိမှိ၊ ပပုဗ္ဗော ဏာပစ္စယော၊ ပဟိဏာတိ၊ ပဟိဏတိ ဝါ၊ ပဟိဏန္တိ။ ပဟိဏာတု၊ ပဟိဏန္တု။ ပဟိဏေယျ။ ပဟိဏိ၊ ဒူတံ ပါဟေသိ။ ပဟိဏိဿတိ။ ပဟိဏိဿ ဣစ္စာဒိ။

ဝု သံဝရဏေ၊ အာဝုဏာတိ၊ အာဝုဏန္တိ ဣစ္စာဒိ။

မိ ပက္ခေပေ၊ ‘‘ကွစိ ဓာတူ’’တိအာဒိနာ ဏဿ နတ္တံ၊ မိနောတိ၊ မိနန္တိ ဣစ္စာဒိ။

အပ ပါပုဏနေ၊ ပပုဗ္ဗော သရလောပေ ‘‘ဒီဃ’’န္တိ ဒီဃော၊ ဥဏာပစ္စယော၊ သမ္ပတ္တိံ ပါပုဏာတိ၊ ပါပုဏန္တိ။ ပါပုဏာသိ၊ ပါပုဏာထ။ ပါပုဏာမိ၊ ပါပုဏာမ။

ကမ္မေ ပါပီယတိ၊ ပါပီယန္တိ။ တထာ ပါပုဏာတု။ ပါပီယတု။ ပါပုဏေ၊ ပါပုဏေယျ။ ပါပီယေယျ။ ပါပုဏိ၊ ပါပုဏိံသု။ ပါပီယိ။ ပါပုဏိဿတိ။ ပါပီယိဿတိ။ ပါပုဏိဿ။ ပါပီယိဿ ဣစ္စာဒိ။

သက သတ္တိမှိ၊ ဒွိဘာဝေါ၊ သက္ကုဏာတိ၊ သက္ကုဏန္တိ။ ဘာဝေ ‘‘ပုဗ္ဗရူပဉ္စာ’’တိ ပုဗ္ဗရူပတ္တံ၊ သက္ကတေ တယာ၊ သက္ကတိ ဝါ၊ သက္ကုဏာတု။ သက္ကုဏေယျ။ ‘‘ကွစိ ဓာတူ’’တိအာဒိနာ သကန္တဿ ခါဒေသော အဇ္ဇတနာဒိမှိ၊ အသက္ခိ၊ သက္ခိ၊ အသက္ခိံသု၊ သက္ခိံသု။ သက္ခိဿတိ၊ သက္ခိဿန္တိ။ အသက္ခိဿ၊ အသက္ခိဿံသု ဣစ္စာဒိ။

သွာဒိဂဏော။

ကိယာဒိဂဏ

ကီ ဒဗ္ဗဝိနိမယေ၊ ဝိပုဗ္ဗော ဒွိတ္တံ၊ ပုရေ ဝိယ ဝိဘတ္တုပ္ပတ္တိ။

၅၁၃။ ကိယာဒိတော နာ။

ကီဣစ္စေဝ မာဒိတော ဓာတုဂဏတော နာပစ္စယော ဟောတိ ကတ္တရိ။ နာပရတ္တာ န ဝုဒ္ဓိ၊ ‘‘ကွစိ ဓာတူ’’တိအာဒိနာ ကိယာဒီနံ နာမှိ ရဿတ္တံ၊ ကီတော နာပစ္စယနကာရဿ ဏတ္တဉ္စ။

ဘဏ္ဍံ ဝိက္ကိဏာတိ၊ ဝိက္ကိဏန္တိ။ ဝိက္ကီယတိ၊ ဝိက္ကီယန္တိ။ ဝိက္ကိဏာတု၊ ဝိက္ကိဏန္တု။ ဝိက္ကီယတု၊ ဝိက္ကီယန္တု။ ဝိက္ကိဏေ၊ ဝိက္ကိဏေယျ ။ ဝိက္ကီယေယျ၊ ဝိက္ကီယေယျုံ။ အဝိက္ကိဏိ၊ ဝိက္ကိဏိ။ ဝိက္ကီယိတ္ထ၊ ဝိက္ကီယိ။ ဝိက္ကိဏိဿတိ၊ ဝိက္ကိဏိဿန္တိ။ ဝိက္ကီယိဿတိ၊ ဝိက္ကီယိဿန္တိ။ အဝိက္ကိဏိဿ၊ အဝိက္ကိဏိဿံသု။ ဝိက္ကီယိဿ၊ ဝိက္ကီယိဿံသု ဣစ္စာဒိ။

ဇိ ဇယေ၊ ကိလေသေ ဇိနာတိ၊ ဇိနန္တိ။ ဇီယတိ၊ ဇီယန္တိ။ ဧဝံ ဇိနာတု။ ဇီယတု။ ဇိနေယျ။ ဇီယေယျ။ အဇိနိ၊ ဇိနိ၊ အဇိနိံသု၊ ဇိနိံသု။ အဇေသိ၊ အဇေသုံ။ အဇိနိတ္ထ။ အဇီယိတ္ထ၊ အဇီယိ။ ဇိနိဿတိ၊ ဇိနိဿန္တိ။ ဝိဇေဿတိ၊ ဝိဇေဿန္တိ။ ဇီယိဿတိ၊ ဇီယိဿန္တိ။ အဇိနိဿ။ အဇီယိဿ ဣစ္စာဒိ။

တထာ စိ စယေ၊ စိနာတိ၊ စိနန္တိ ဣစ္စာဒိ။

ဉာ အဝဗောဓနေ နာပစ္စယော။

‘‘ဝါ’’တိ ဝတ္တတေ။

၅၁၄။ ဉာဿ ဇာ ဇံ နာ။

ဉာဣစ္စေတဿ ဓာတုဿ ဇာ ဇံ နာဣစ္စေတေ အာဒေသာ ဟောန္တိ ဝါ။

ဇာဒေသော နာမှိ ဇံ ဉာမှိ၊ နာဘာဝေါ တိမှိ ဧဝိဓ၊

ဝဝတ္ထိတဝိဘာသတ္ထ-ဝါသဒ္ဒဿာနုဝတ္တနာ၊

ဓမ္မံ ဝိဇာနာတိ၊ ဝိနာယတိ ဝါ၊ ဝိဇာနန္တိ။

ကမ္မေ ဝိညာယတိ၊ ဝိညာယန္တိ။ ဣဝဏ္ဏာဂမေ ပုဗ္ဗလောပေါ၊ ‘‘ကွစိ ဓာတူ’’တိအာဒိနာ ဧကာရော၊ ဒွိတ္တဉ္စ၊ ဉေယျတိ၊ ဉေယျန္တိ။ ဝိဇာနာတု၊ ဝိဇာနန္တု၊ ရဿတ္တံ။ ဝိဇာန၊ ဝိဇာနာဟိ၊ ဝိဇာနာထ။ ဝိဇာနာမိ၊ ဝိဇာနာမ။ ဝိဇာနတံ၊ ဝိဇာနန္တံ။ ဝိဇာနဿု။ ဝိညာယတု၊ ဝိညာယန္တု။

၅၁၅။ ဧယျဿဉာတော ဣယာ ဉာ ဝါ။

ဧယျဿ ဝိဘတ္တိဿ ဉာဣစ္စေတာယ ဓာတုယာ ပရဿ ဣယာ ဉာဣစ္စေတေ အာဒေသာ ဟောန္တိ ဝါ၊ သရလောပါဒိ။ ဝိဇာနိယာ။

ဉာဒေသေ ဉာဿ ဇံအာဒေသော။

‘‘ဉာတော၊ ဝါ’’တိ စ ဝတ္တတေ။

၅၁၆။ နာဿ လောပေါ ယကာရတ္တံ။

ဉာဣစ္စေတာယ ဓာတုယာ ပရဿ နာပစ္စယဿ လောပေါ ဟောတိ ဝါ၊ ယကာရတ္တဉ္စ၊ ဝဝတ္ထိတဝိဘာသတ္ထောယံ ဝါသဒ္ဒေါ။ တေန –

ဉာမှိ နိစ္စဉ္စ နာလောပေါ၊

ဝိဘာသာဇ္ဇတနာဒိသု၊

အညတ္ထ န စ ဟောတာယံ၊

နာတော တိမှိ ယကာရတာ။

နိဂ္ဂဟီတဿ ဝဂ္ဂန္တတ္တံ၊ ဝိဇညာ၊ ဝိဇာနေယျ၊ ဝိဇာနေယျုံ။ ဝိဇာနေယျာသိ၊ ဝိဇာနေယျာထ။ ဝိဇာနေယျာမိ၊ ဝိဇာနေယျာမ၊ ဝိဇာနေမု ဝါ။ ဝိဇာနေထ။ ဝိညာယေယျ၊ ဝိညာယေယျုံ။

သမဇာနိ၊ သဉ္ဇာနိ၊ သဉ္ဇာနိံသု။ နာလောပေ အညာသိ၊ အညာသုံ။ ဝိဇာနိတ္ထ။ ဝိညာယိတ္ထ။ ပညာယိ၊ ပညာယိံသု။ ဝိဇာနိဿတိ၊ ဝိဇာနိဿန္တိ။ ဉဿတိ၊ ဉဿန္တိ။ ဝိညာယိဿတေ၊ ဝိညာယိဿန္တေ။ ပညာယိဿတိ၊ ပညာယိဿန္တိ။ ‘‘ကွစိ ဓာတူ’’တိအာဒိနာ ဿဿ ဟိ စ၊ ပညာယိဟိတိ၊ ပညာယိဟိန္တိ။ အဇာနိဿ။ အဇာနိဿထ။ အညာယိဿထ၊ အညာယိဿ ဣစ္စာဒိ။

မာ မာနေ၊ ‘‘ကွစိ ဓာတူ’’တိအာဒိနာ မာန္တဿ ဣကာရော၊ မိနာတိ၊ မိနန္တိ။ ကမ္မေ မီယတိ၊ မီယန္တိ ဣစ္စာဒိ။

လူ ဆေဒနေ၊ နာမှိ ရဿတ္တံ၊ လုနာတိ၊ လုနန္တိ။ လူယတိ၊ လူယန္တိ ဣစ္စာဒိ။

ဓူ ကမ္ပနေ၊ ဓုနာတိ၊ ဓုနန္တိ။ ဓူယတိ၊ ဓူယန္တိ ဣစ္စာဒိ။

ဂဟ ဥပါဒါနေ၊ နာမှိ သမ္ပတ္တေ –

၅၁၇။ ဂဟာဒိတောပ္ပဏှာ။

ဂဟဣစ္စေဝမာဒိတော ဓာတုတော ပ္ပ ဏှာဣစ္စေတေ ပစ္စယာ ဟောန္တိ ကတ္တရိ။ အာဒိသဒ္ဒေါယံ ပကာရော။

‘‘ဂဟဿာ’’တိ ဝတ္တတေ။

၅၁၈။ ဟလောပေါ ဏှာမှိ။

ဂဟဣစ္စေတဿ ဓာတုဿ ဟကာရဿ လောပေါ ဟောတိ ဏှာမှိ ပစ္စယေ ပရေ။ သီလံ ဂဏှာတိ၊ ရဿတ္တေ ဂဏှတိ ဝါ၊ ဂဏှန္တိ။ ဂဏှာသိ၊ ဂဏှာထ။ ဂဏှာမိ၊ ဂဏှာမ။

ကမ္မေ ‘‘ယေ’’တိ ဝတ္တမာနေ ‘‘ဟဝိပရိယယော လော ဝါ’’တိ ဟကာရဿ ယကာရေန ဝိပရိယယော ဟောတိ။ ဂယှတိ၊ ဂယှန္တိ။

ဂဏှာတု၊ ဂဏှန္တု။ ဂဏှ၊ ဂဏှာဟိ၊ ဂဏှာထ။ ဂဏှာမိ၊ ဂဏှာမ။ ဂဏှတံ၊ ဂဏှန္တံ။ ဂယှတံ၊ ဂယှန္တံ။ ဂယှတု၊ ဂယှန္တု။ ဂဏှေ၊ ဂဏှေယျ၊ ဂဏှေယျုံ။ ဂယှေယျ၊ ဂယှေယျုံ။ အဂ္ဂဏှိ၊ ဂဏှိ၊ အဂ္ဂဏှိံသု၊ ဂဏှိံသု။

ယဒါ ‘‘ကွစိ ဓာတူ’’တိအာဒိနာ အသဗ္ဗဓာတုကေ ဝိကရဏပစ္စယဿ လောပေါ၊ ဣကာရာဂမဿ ဧကာရော စ၊ တဒါ သာဂမော။

အဂ္ဂဟေသိ၊ အဂ္ဂဟေသုံ။ အဂ္ဂဟိ၊ အဂ္ဂဟိံသု၊ အဂ္ဂဟုံ။ အဂ္ဂယှိတ္ထ၊ အဂ္ဂယှိ။ ဂဏှိဿတိ၊ ဂဏှိဿန္တိ။ ဂဟေဿတိ၊ ဂဟေဿန္တိ။ ဂဟီယိဿတေ၊ ဂဟီယိဿန္တေ။ ဂယှိဿတိ၊ ဂယှိဿန္တိ။ အဂ္ဂဏှိဿ၊ အဂ္ဂဟိဿ။ အဂ္ဂဏှိဿထ၊ အဂ္ဂဟိဿထ။ အဂ္ဂယှိဿထ၊ အဂ္ဂယှိဿ ဣစ္စာဒိ။

ပ္ပပ္ပစ္စယေ –

၅၁၉။ ဂဟဿ ဃေ ပ္ပေ။

ဂဟဣစ္စေတဿ ဓာတုဿ သဗ္ဗဿ ဃေအာဒေသော ဟောတိ ပ္ပပ္ပစ္စယေ ပရေ။ ဃေပ္ပတိ ဣစ္စာဒိ။

ကိယာဒိဂဏော။

တနာဒိဂဏ

တနု ဝိတ္ထာရေ၊ ပုရေ ဝိယ ဓာတွန္တလောပဝိဘတ္တုပ္ပတ္တိယော။

၅၂၀။ တနာဒိတော ဩယိရာ။

တနုဣစ္စေဝမာဒိတော ဓာတုဂဏတော ဩယိရဣစ္စေတေ ပစ္စယာ ဟောန္တိ ကတ္တရိ။ ကရတောဝါယံ ယိရပ္ပစ္စယော။

ဓမ္မံ တနောတိ၊ တနောန္တိ။ တနောသိ၊ တနောထ။ တနောမိ၊ တနောမ။

‘‘ဝါ’’တိ ဝတ္တတေ။

၅၂၁။ ဥတ္တမောကာရော။

တနာဒိတော ဩကာရပ္ပစ္စယော ဥတ္တမာပဇ္ဇတေ ဝါ။ ဝဝတ္ထိတဝိဘာသတ္ထောယံ ဝါသဒ္ဒေါ။ ဧတ္ထ စ ဝိကရဏကာရိယဝိဓိပ္ပကရဏတော ‘‘ဩကာရော’’တိ ဩဝိကရဏံ ဂယှတိ။ တနုတေ၊ ဗဟုဝစနေ ‘‘ယဝကာရာ စာ’’တိ ဝတ္တံ၊ တနွန္တေ။ တနုသေ၊ တနုဝှေ။ တနွေ၊ တနုမှေ။

ကမ္မေ ‘‘ကွစိ ဓာတူ’’တိအာဒိနာ တနုဓာတွန္တဿ ယမှိ အာကာရော၊ ပတာယတေ၊ ပတာယန္တေ။ ပတာယတိ၊ ပတာယန္တိ။ အာကာရာဘာဝေ ပတညတိ၊ ပတညန္တိ။ တနောတု၊ တနောန္တု။ တနေယျ၊ တနေယျုံ။ အတနိ၊ အတနိံသု။ အတာယိတ္ထ၊ ပတာယိ။ တနိဿတိ၊ တနိဿန္တိ။ ပတာယိဿတိ၊ ပတာယိဿန္တိ။ အတနိဿ။ ပတာယိဿ ဣစ္စာဒိ။

ကရ ကရဏေ၊ ပုညံ ကရောတိ။

ဗဟုဝစနေ ‘‘ဝါ’’တိ ဝတ္တမာနေ၊ ‘‘ဥတ္တမောကာရော’’တိ ဥတ္တေ ကတေ –

‘‘ဝါ၊ ဥတ္တ’’န္တိ စ ဝတ္တတေ။

၅၂၂။ ကရဿာကာရော စ။

ကရဣစ္စေတဿ ဓာတုဿ အကာရော ဥတ္တမာပဇ္ဇတေ ဝါ။ ဝဝတ္ထိတဝိဘာသတ္ထောယံ ဝါသဒ္ဒေါ၊ ‘‘ယဝကာရာ စာ’’တိ အပဒန္တဿ ပရဥကာရဿ ဝကာရော၊ ‘‘ကွစိ ဓာတူ’’တိအာဒိနာ ဓာတုရကာရဿ ဝကာရသ္မိံ လောပေါ၊ ဝကာရဿ ဒွိတ္တေ တဿ ‘‘ဗ္ဗော ဝွဿာ’’တိ ဗကာရဒွယံ၊ ကုဗ္ဗန္တိ၊ ကရောန္တိ။ ကရောသိ၊ ကရောထ။ ကရောမိ၊ ကရောမ။ တထာ ကုရုတေ၊ ကုဗ္ဗန္တေ။ ကုရုသေ၊ ကုရုဝှေ။ ကုဗ္ဗေ၊ ကုရုမှေ။ ယိရပ္ပစ္စယေ ရကာရလောပေါ၊ ကယိရတိ၊ ကယိရန္တိ ဣစ္စာဒိ။

ကမ္မေယပ္ပစ္စယေ ‘‘ဣဝဏ္ဏာဂမော ဝါ’’တိ ဤကာရာဂမော၊ ယကာရဿ ဒွိတ္တံ၊ ကရီယျတေ ကဋော တေန၊ ကရီယျတိ၊ ကရီယျန္တိ။ ကရီယတိ၊ ကရီယန္တိ ဝါ။ ဤကာရာဘာဝေ ‘‘တဿ စဝဂ္ဂ’’ဣစ္စာဒိနာ သဓာတွန္တဿ ယကာရတ္တံ၊ ဒွိတ္တဉ္စ။ ကယျတိ၊ ကယျန္တိ။ ဣကာရာဂမေ ‘‘ကွစိ ဓာတု’’ဣစ္စာဒိသုတ္တေ စဂ္ဂဟဏေန ရယာနံ ဝိပရိယယော၊ ကယိရတိ ကဋော တေန၊ ကယိရန္တိ ဣစ္စာဒိ။

တထာ ကုသလံ ကရောတု၊ ကုရုတု ဝါ၊ ကုဗ္ဗန္တု၊ ကရောန္တု။ ကရောဟိ၊ ကရောထ။ ကရောမိ၊ ကရောမ။ ကုရုတံ၊ ကုဗ္ဗန္တံ။ ကုရုဿု၊ ကုရဿု ဝါ၊ ကုရုဝှော။ ကုဗ္ဗေ၊ ကုဗ္ဗာမသေ။

ကမ္မေ ကရီယတု၊ ကရီယန္တု၊ ကယျတံ၊ ကယိရတံ၊ ကယိရတု။

သတ္တမိယံ ကရေ၊ ကရေယျ၊ ကရေယျုံ။ ကရေယျာသိ၊ ကရေယျာထ။ ကရေယျာမိ၊ ကရေယျာမ။ ဥတ္တေ ကုဗ္ဗေ၊ ကုဗ္ဗေယျ။

ယိရပ္ပစ္စယေ –

ယိရတော အာတ္တမေယျဿ၊ ဧထာဒိဿေယျုမာဒိသု၊

ဧယျသဒ္ဒဿ လောပေါ စ၊ ‘‘ကွစိ ဓာတူ’’တိအာဒိနာ။

သရလောပါဒိ၊ ကယိရာ၊ ကယိရုံ။ ကယိရာသိ၊ ကယိရာထ။ ကယိရာမိ၊ ကယိရာမ။ အတ္တနောပဒေ ကယိရာထ ဓီရော၊ ကုဗ္ဗေထ၊ ကရေထ ဝါ၊ ‘‘ကွစိ ဓာတူ’’တိအာဒိနာ ကုဿ ကြု စ၊ ကြုဗ္ဗေထ၊ ကြုဗ္ဗေရံ။ ကြုဗ္ဗေထော၊ ကြုဗ္ဗေယျာဝှော။ ကြုဗ္ဗေယျံ၊ ကြုဗ္ဗေယျာမှေ။ ကမ္မေ ကရီယေယျ၊ ကရီယေယျုံ။

ဟိယျတ္တနိယံ ‘‘ကရဿ ကာ’’တိ ယောဂဝိဘာဂေန ကာ ဟောတိ၊ သရလောပါဒိ။

အကာ၊ အကရာ၊ အကရူ။ အကရော၊ အကတ္ထ၊ အကရောတ္ထ။ အကံ၊ အကရံ၊ အကမှ၊ အကရမှ။ အကတ္ထ။ အကရိံ၊ အကရမှသေ။

‘‘ဝါ’’တိ ဝတ္တတေ။

၅၂၃။ ကရဿ ကာသတ္တမဇ္ဇတနိမှိ။

ကရ ဣစ္စေတဿ ဓာတုဿ သဗ္ဗဿေဝ ကာသတ္တံ ဟောတိ ဝါ အဇ္ဇတနိမှိ ဝိဘတ္တိမှိ ပရေ။ ‘‘ကာသတ္တ’’မိတိ ဘာဝနိဒ္ဒေသေန အညသ္မာပိ ဓာတုတော သာဂမော။ အထ ဝါ ယဒါ ကရဿ ကာ ဟောတိ၊ သတ္တဉ္စာဂမော အဇ္ဇတနိမှိ ဝါတိ အတ္ထော၊ တဒါ ‘‘သတ္တမဇ္ဇတနိမှီ’’တိ ယောဂဝိဘာဂေန အညသ္မာပိ ဓာတုတော သာဂမောပိ သိဇ္ဈတိ၊ ‘‘ယောဂဝိဘာဂတော ဣဋ္ဌပ္ပသိဒ္ဓီ’’တိ ယေဘုယျေန ဒီဃတောဝ ဟောတိ၊ ‘‘ကရဿ ကာ’’တိ ယောဂဝိဘာဂေန ကာဘာဝေါ စ ဟိယျတ္တနိယံ သိဒ္ဓါ ဟောတိ။

အကာသိ၊ အကာသုံ။ အကာသိ၊ အကာသိတ္ထ။ အကာသိံ၊ အကာသိမှ။ အကာသိတ္ထ။ ကာသတ္တာဘာဝေ အကရိ၊ ကရိ၊ အကရိံသု၊ ကရိံသု၊ အကံသု၊ အကရုံ။ အကရိ၊ အကရိတ္ထ။ အကရိံ၊ ကရိံ၊ အကရိမှ၊ ကရိမှ။ အကရိတ္ထ။ အကရီယိတ္ထ၊ အကရီယိ ဝါ။

‘‘ဝါ၊ လောပေါ၊ ဘဝိဿန္တိမှိ ဿဿ စာ’’တိ စ ဝတ္တတေ။

၅၂၄။ ကရဿ သပ္ပစ္စယဿ ကာဟော။

ကရဣစ္စေတဿ ဓာတုဿ သပ္ပစ္စယဿ ကာဟာဒေသော ဟောတိ ဝါ ဘဝိဿန္တိမှိ၊ ဿဿ စ လောပေါ ဟောတိ။ အဓိကဘူတသပ္ပစ္စယဂ္ဂဟဏေန ဝစမုစဘုဇာဒိတော ဿဿ ခါဒေသော၊ ဝသ ဆိဒိ လဘာဒိတော ဆာဒေသော စ ဟောတိ။

ကာဟတိ၊ ကာဟန္တိ။ ကာဟသိ၊ ကာဟထ။ ကာဟာမိ၊ ကာဟာမ။ ဣကာရာဂမေ ကာဟိတိ၊ ကာဟိန္တိ ဣစ္စာဒိ။ ကာဟာဘာဝေ ကရိဿတိ၊ ကရိဿန္တိ။ ကရိဿသိ၊ ကရိဿထ။ ကရိဿာမိ၊ ကရိဿာမ။ ကရိဿတေ၊ ကရိဿန္တေ။ ကရိဿသေ၊ ကရိဿဝှေ။ ကရိဿံ၊ ကရိဿာမှေ။ ကရီယိဿတိ၊ ကရီယိဿန္တိ။ အကရိဿ။ အကရီယိဿာ ဣစ္စာဒိ။

ယဒါ သံပုဗ္ဗော၊ တဒါ ‘‘ပုရသမုပပရီဟိ ကရောတိဿ ခ ခရာ ဝါ’’တိ ယောဂဝိဘာဂေန တျာဒိဝိဘတ္တီသုပိ သံပုဗ္ဗကရောတိဿ ခရာဒေသော။

အဘိသင်္ခရောတိ၊ အဘိသင်္ခရောန္တိ။ အဘိသင်္ခရီယတိ၊ အဘိသင်္ခရီယန္တိ။ အဘိသင်္ခရောတု။ အဘိသင်္ခရေယျ။ အဘိသင်္ခရိ၊ ခါဒေသေ အဘိသင်္ခါသိ ဝါ။ အဘိသင်္ခရိဿတိ။ အဘိသင်္ခရိဿ ဣစ္စာဒိ။

သက သတ္တိမှိ၊ ဩပစ္စယော၊ သက္ကောတိ၊ သက္ကောန္တိ။ သက္ကောသိ၊ သက္ကောထ။ သက္ကောမိ၊ သက္ကောမ ဣစ္စာဒိ။

အပ ပါပုဏနေ၊ ပပုဗ္ဗော၊ ပပ္ပောတိ၊ ပပ္ပောန္တိ။ ပပ္ပောသိ၊ ပပ္ပောထ။ ပပ္ပောမိ၊ ပပ္ပောမ။ ပပ္ပောတု၊ ပပ္ပောန္တု ဣစ္စာဒိ။

တနာဒိဂဏော။

စုရာဒိဂဏ

ဓုရ ထေယျေ၊ ပုရေ ဝိယ ဓာတွန္တလောပေါ၊ ဝိဘတ္တုပ္ပတ္တိ။

‘‘တထာ ကတ္တရိ စာ’’တိ ဣတော ‘‘ကတ္တရီ’’တိ စ သီဟဝိလောကနေန ဘာဝကမ္မဂ္ဂဟဏာနိ စ ဝတ္တန္တေ၊ မဏ္ဍူကဂတိယာ ကာရိတဂ္ဂဟဏဉ္စ။

၅၂၅။ စုရာဒိတော ဏေဏယာ။

စုရဣစ္စေဝမာဒိတော ဓာတုဂဏတော ဏေ ဏယဣစ္စေတေ ပစ္စယာ ဟောန္တိ ကတ္တရိ၊ ဘာဝေ စ ကမ္မနိ၊ ဝိဘတ္တိပ္ပစ္စယေသု။ ‘‘ကာရိတံ ဝိယ ဏာနုဗန္ဓော’’တိ ဏေ ဏယာနံ ကာရိတဗျပဒေသော။

၅၂၆။ ကာရိတာနံ ဏော လောပံ။

ကာရိတပ္ပစ္စယာနံ ဏကာရော လောပမာပဇ္ဇတေ။

၅၂၇။ အသံယောဂန္တဿ ဝုဒ္ဓိ ကာရိတေ။

အသံယောဂန္တဿ ဓာတုဿ ကာရိတေ ပရေ ဝုဒ္ဓိ ဟောတီတိ ဥကာရဿောကာရော ဝုဒ္ဓိ။

ဓနံ စောရေတိ၊ စောရေန္တိ။ စောရေသိ၊ စောရေထ။ စောရေမိ၊ စောရေမ။ ဏယပ္ပစ္စယေ – စောရယတိ၊ စောရယန္တိ။ စောရယသိ၊ စောရယထ။ စောရယာမိ၊ စောရယာမ။ စောရယတေ၊ စောရယန္တေ။ စောရယသေ၊ စောရယဝှေ။ စောရယေ၊ စောရယာမှေ။

ကမ္မေ ယပ္ပစ္စယေ ဤကာရာဂမော၊ သရလောပါဒိ စ၊ စောရီယတေ ဒေဝဒတ္တေန၊ စောရီယတိ၊ စောရီယန္တိ ဣစ္စာဒိ။

စောရေတု ၊ စောရေန္တု။ စောရေဟိ။ စောရယတု၊ စောရယန္တု။ စောရယ၊ စောရယာဟိ။

စောရေယျ၊ စောရေယျုံ။ စောရယေ၊ စောရယေယျုံ။ အစောရေသိ၊ စောရေသိ၊ အစောရေသုံ၊ စောရေသုံ။ အစောရယိ၊ စောရယိ၊ အစောရယိံသု၊ စောရယိံသု၊ အစောရယုံ၊ စောရယုံ။ အစောရေသိ၊ အစောရေသိတ္ထ။ တွံ အစောရယိ၊ အစောရယိတ္ထ။ အစောရေသိံ၊ အစောရေသိမှ။ အစောရယိံ၊ အစောရယိမှ။ အစောရယိတ္ထ။ အစောရီယိတ္ထ၊ အစောရီယိ။

စောရိဿတိ၊ စောရိဿန္တိ။ စောရယိဿတိ၊ စောရယိဿန္တိ။ စောရီယိဿတေ၊ စောရီယိဿန္တေ။ စောရီယိဿတိ၊ စောရီယိဿန္တိ။ အစောရိဿ၊ အစောရယိဿ။ အစောရီယိဿထ၊ အစောရီယိဿ ဣစ္စာဒိ။

တထာ စိန္တ စိန္တာယံ၊ သံယောဂန္တတ္တာ ဝုဒ္ဓိအဘာဝေါဝ ဝိသေသော။

စိန္တေတိ၊ စိန္တယတိ၊ စိန္တေန္တိ၊ စိန္တယန္တိ။ စိန္တေတု၊ စိန္တယတု။ စိန္တေယျ၊ စိန္တယေယျ။ အစိန္တေသိ၊ စိန္တေသိ၊ အစိန္တယိ၊ စိန္တယိ။ စိန္တေဿတိ၊ စိန္တယိဿတိ။ အစိန္တိဿ၊ အစိန္တယိဿ ဣစ္စာဒိ။

မန္တ ဂုတ္တဘာသနေ၊ မန္တေတိ၊ မန္တယတိ ဣစ္စာဒိ ပုရိမသမံ။

ပါလ ရက္ခဏေ၊ ဓမ္မံ ပါလေတိ၊ ပါလယတိ။ ပါလီယတိ။ ပါလေတု၊ ပါလယတု ဣစ္စာဒိ။

ဃဋ ဃဋနေ၊ ဃာဋေတိ၊ ဃာဋယတိ၊ ဃဋေတိ၊ ဃဋယတိ၊ ဃဋာဒိတ္တာ ဝိကပ္ပေန ဝုဒ္ဓိ။

ဝိဒ ဉာဏေ၊ ဝေဒေတိ၊ ဝေဒယတိ။

ဂဏ သင်္ချာနေ၊ ‘‘ဃဋာဒီနံ ဝါ’’တိ န ဝုဒ္ဓိ၊ ဂဏေတိ၊ ဂဏယတိ ဣစ္စာဒိ၊ သဗ္ဗတ္ထ သုဗောဓံ။

စုရာဒိဂဏော။

ဘူဝါဒီ စ ရုဓာဒီ စ၊ ဒိဝါဒီ သွာဒယော ဂဏာ၊

ကိယာဒီ စ တနာဒီ စ၊ စုရာဒီ စိဓ သတ္တဓာ။

ဝိကရဏဝိဓာနံ သမတ္တံ။

ဓာတုပ္ပစ္စယန္တနယ

အထ ဓာတုပ္ပစ္စယန္တာ ဝုစ္စန္တေ။

တတ္ထ ဓာတွတ္ထေ နိဒ္ဒိဋ္ဌာ ခါဒိကာရိတန္တာ ပစ္စယာ ဓာတုပ္ပစ္စယာ နာမ။

တိဇ နိသာန ဗန္ဓနခမာသု၊ ဓာတုသညာဒိ။

‘‘ဓာတုလိင်္ဂေဟိ ပရာ ပစ္စယာ’’တိ ဣတော ဓာတုဂ္ဂဟဏံ အနုဝတ္တတေ၊ ‘‘ပရာ၊ ပစ္စယာ’’တိ စ အဓိကာရော။

၅၂၈။ တိဇ ဂုပ ကိတ မာနေဟိ ခ ဆ သာ ဝါ။

တိဇ ဂုပ ကိတ မာန ဣစ္စေတေဟိ ဓာတူဟိ ခ ဆ သ ဣစ္စေတေ ပစ္စယာ ပရာ ဟောန္တိ ဝါ။

တိဇတော ခန္တိယံ ခေါဝ၊ နိန္ဒာယံ ဂုပတော တု ဆော၊

ကိတာ ဆော သောဝ မာနမှာ၊ ဝဝတ္ထိတဝိဘာသတော။

‘‘ကွစာဒိဝဏ္ဏာနမေကဿရာနံ ဒွေဘာဝေါ’’တိ ဓာတွာဒိဿ ဒွိဘာဝေါ။

‘‘ဗျဉ္ဇနန္တဿာ’’တိ ဝတ္တမာနေ –

၅၂၉။ ကော ခေ စ။

ဓာတွန္တဿ ဗျဉ္ဇနဿ ကကာရာဒေသော ဟောတိ ခပ္ပစ္စယေ ပရေ။

တိတိက္ခ ဣတိ ဌိတေ –

ဓာတုဝိဟိတာနံ တျာဒိဝိဘတ္တီနံ အဓာတုတော အပ္ပဝတ္တိယမာဟ။

၅၃၀။ ဓာတုပ္ပစ္စယေဟိ ဝိဘတ္တိယော။

ဓာတွတ္ထေ နိဒ္ဒိဋ္ဌေဟိ ခါဒိကာရိတန္တေဟိ ပစ္စယေဟိ တျာဒယော ဝိဘတ္တိယော ဟောန္တီတိ ပုရေ ဝိယ ဝတ္တမာနာဒယော ယောဇေတဗ္ဗာ။

အတိဝါကျံ တိတိက္ခတိ၊ တိတိက္ခန္တိ။ ကမ္မေ တိတိက္ခီယတိ။ တထာ တိတိက္ခတု၊ တိတိက္ခန္တု။ တိတိက္ခေယျ၊ တိတိက္ခေယျုံ။ အတိတိက္ခိ၊ အတိတိက္ခိံသု။ တိတိက္ခိဿတိ။ အတိတိက္ခိဿ ဣစ္စာဒိ။

ခပ္ပစ္စယာဘာဝေ အပ္ပစ္စယဿ ဧကာရော၊ တေဇေတိ၊ တေဇတိ ဝါ၊ တေဇန္တိ ဣစ္စာဒိ။

ဂုပ ဂေါပနေ၊ ဆပ္ပစ္စယေ ဒွိဘာဝေါ၊ ‘‘ပုဗ္ဗောဗ္ဘာသော’’တိ အဗ္ဘာသသညာ၊ ‘‘အဗ္ဘာသဿာ’’တိ ဝတ္တမာနေ ‘‘အန္တဿိဝဏ္ဏာကာရော ဝါ’’တိ အဗ္ဘာသန္တဿိကာရော၊ ‘‘ကဝဂ္ဂဿ စဝဂ္ဂေါ’’တိ အဗ္ဘာသဂကာရဿ ဇကာရော စ။

၅၃၁။ ဗျဉ္ဇနန္တဿ စော ဆပ္ပစ္စယေသု စ။

ဓာတွန္ထဿ ဗျဉ္ဇနဿ စကာရာဒေသော ဟောတိ ဆပ္ပစ္စယေသု ပရေသု။ တတော ဝိဘတ္တိယော၊ ကာယံ ဇိဂုစ္ဆတိ၊ ဇိဂုစ္ဆန္တိ။ သေသံ ပုရိမသမံ။ ဆာဘာဝေ ဂေါပေတိ၊ ဂေါပေန္တိ ဣစ္စာဒိ။

ကိတ ရောဂါပနယနေ၊ ဆပ္ပစ္စယော၊ ဒွိတ္တဉ္စ။

အဗ္ဘာသဂ္ဂဟဏမနုဝတ္တတေ ။

၅၃၂။ မာနကိတာနံ ဝတတ္တံ ဝါ။

အဗ္ဘာသဂတာနံ မာန ကိတဣစ္စေတေသံ ဓာတူနံ ဝကာရတကာရတ္တံ ဟောတိ ဝါ ယထာက္ကမန္တိ တကာရော၊ ဓာတွန္တဿ စကာရော၊ သေသံ သမံ။ ရောဂံ တိကိစ္ဆတိ၊ တိကိစ္ဆန္တိ ဣစ္စာဒိ။ တကာရာဘာဝေ ‘‘ကဝဂ္ဂဿ စဝဂ္ဂေါ’’တိ စကာရော၊ ဝိစိကိစ္ဆတိ၊ ဝိစိကိစ္ဆန္တိ ဣစ္စာဒိ။

မာန ဝီမံသပူဇာသု၊ သပ္ပစ္စယဒွိဘာဝဤကာရဝကာရာ။

၅၃၃။ တတော ပါမာနာနံ ဝါ မံ သေသု။

တတော အဗ္ဘာသတော ပရာသံ ပါမာနာနံ ဓာတူနံ ဝါမံဣစ္စေတေ အာဒေသာ ဟောန္တိ ယထာက္ကမံ သပ္ပစ္စယေ ပရေ။ သေသူတိ ဗဟုဝစနနိဒ္ဒေသော ပယောဂေပိ ဝစနဝိပလ္လာသဉာပနတ္ထံ။ အတ္ထံ ဝီမံသတိ၊ ဝီမံသန္တိ ဣစ္စာဒိ။

အညတ္ထ ‘‘လောပဉ္စေတ္တမကာရော’’တိ အပ္ပစ္စယဿေကာရော၊ မာနေတိ၊ မာနေန္တိ။

ဘုဇ ပါလနဗျဝဟရဏေသု၊ ဘောတ္တုမိစ္ဆတီတိ အတ္ထေ –

‘‘ခ ဆ သာ၊ ဝါ’’တိ စ ဝတ္တတေ။

၅၃၄။ ဘုဇ ဃသ ဟရ သု ပါဒီဟိ တုမိစ္ဆတ္ထေသု။

ဘုဇ ဃသ ဟရ သု ပါ ဣစ္စေဝမာဒီဟိ ဓာတူဟိ တုမိစ္ဆတ္ထေသု စ ခ ဆ သဣစ္စေတေ ပစ္စယာ ဟောန္တိ ဝါ။ တုမိစ္ဆာနံ၊ တုမန္တယုတ္တဣစ္ဆာယ ဝါ အတ္ထာ တုမိစ္ဆတ္ထာ၊ တေန တုမန္တရဟိတေသု ‘‘ဘောဇနမိစ္ဆတီ’’တိအာဒီသု န ဟောန္တိ၊ ‘‘ဝုတ္တတ္ထာနမပ္ပယောဂေါ’’တိ ဝါကျဿ အပ္ပယောဂေါ၊ ဓာတွာဒိဿ ဒွေဘာဝေ ကတေ ‘‘ဒုတိယစတုတ္ထာနံ ပဌမတတိယာ’’တိ အဗ္ဘာသဘကာရဿ ဗကာရော၊ ဓာတွန္တဿ ‘‘ကော ခေ စာ’’တိ ကကာရော၊ ဗုဘုက္ခတိ၊ ဗုဘုက္ခန္တိ ဣစ္စာဒိ။

ဝါတိ ကိမတ္ထံ? ဘောတ္တုမိစ္ဆတိ၊ ဣစ္ဆတ္ထေသူတိ ကိမတ္ထံ? ဘောတ္တုံ ဂစ္ဆတိ။

ဃသ အဒနေ၊ ဃသိတုမိစ္ဆတီတိ အတ္ထေ ဆပ္ပစ္စယော၊ ဒွိတ္တံ၊ တတိယ စဝဂ္ဂ ဣကာရ စကာရာဒေသာ၊ ဇိဃစ္ဆတိ၊ ဇိဃစ္ဆန္တိ။

ဟရ ဟရဏေ၊ ဟရိတုမိစ္ဆတီတိ အတ္ထေ သပ္ပစ္စယော။

၅၃၅။ ဟရဿ ဂီ သေ။

ဟရဣစ္စေတဿ ဓာတုဿ သဗ္ဗဿ ဂီ ဟောတိ သေ ပစ္စယေ ပရေ။ ‘‘ဂီသေ’’တိ ယောဂဝိဘာဂေန ဇိဿပိ၊ ဌာနူပစာရေနာဒေသဿာပိ ဓာတုဝေါဟာရတ္တာ ဒွိတ္တံ၊ ဘိက္ခံ ဇိဂီသတိ၊ ဇိဂီသန္တိ။

သု သဝဏေ၊ သောတုမိစ္ဆတိ သုဿူသတိ၊ သုဿူသန္တိ၊ ‘‘ကွစိ ဓာတူ’’တိအာဒိနာ ဒီဃော။

ပါ ပါနေ၊ ပါတုမိစ္ဆတီတိ အတ္ထေ သပ္ပစ္စယဒွိတ္တရဿတ္တဣကာရာဒေသာ၊ ‘‘တတော ပါမာနာနံ ဝါမံ သေသူ’’တိ ဝါဒေသော၊ ပိဝါသတိ၊ ပိဝါသန္တိ ဣစ္စာဒိ။

ဇိ ဇယေ၊ ဝိဇေတုမိစ္ဆတိ ဝိဇိဂီသတိ ဣစ္စာဒိ။

သင်္ဃော ပဗ္ဗတမိဝ အတ္တာနမာစရတိ၊ ပဗ္ဗတော ဣဝ အာစရတီတိ ဝါ အတ္ထေ –

၅၃၆။ အာယ နာမတော ကတ္တုပမာနာဒါစာရေ။

အာစရဏကြိယာယ ကတ္တုနော ဥပမာနဘူတမှာ နာမတော အာယပ္ပစ္စယော ဟောတိ အာစာရတ္ထေ။ ဥပမီယတိ ဧတေနာတိ ဥပမာနံ၊ ကတ္တုနော ဥပမာနံ ကတ္တုပမာနံ၊ ‘‘ဝုတ္တတ္ထာနမပ္ပယောဂေါ’’တိ ဣဝသဒ္ဒနိဝတ္တိ၊ ဓာတုပ္ပစ္စယန္တတ္တာ ‘‘တေသံ ဝိဘတ္တိယော လောပါ စာ’’တိ သုတ္တေ တေသံဂဟဏေန ဝိဘတ္တိလောပေါ၊ ‘‘ပကတိ စဿ သရန္တဿာ’’တိ ပကတိဘာဝေါ၊ သရလောပါဒိ၊ ‘‘ဓာတုပ္ပစ္စယေဟိ ဝိဘတ္တိယော’’တိ ဝိဘတ္တုပ္ပတ္တိ၊ ပဗ္ဗတာယတိ သင်္ဃော၊ ဧဝံ သမုဒ္ဒမိဝ အတ္တာနမာစရတိ သမုဒ္ဒါယတိ၊ စိစ္စိဋမိဝ အတ္တာနမာစရတိ စိစ္စိဋာယတိ သဒ္ဒေါ။ ဧဝံ ဓူမာယတိ။

‘‘နာမတော၊ အာစာရေ’’တိ စ ဝတ္တတေ။

၅၃၇။ ဤယူပမာနာ စ။

ဥပမာနဘူတာ နာမတော ဤယပ္ပစ္စယော ဟောတိ အာစာရတ္ထေ။ ပုန ဥပမာနဂ္ဂဟဏံ ကတ္တုဂ္ဂဟဏနိဝတ္တနတ္ထံ၊ တေန ကမ္မတောပိ သိဇ္ဈတိ၊ သေသံ သမံ။ အဆတ္တံ ဆတ္တမိဝါစရတိ ဆတ္တီယတိ၊ အပုတ္တံ ပုတ္တမိဝါစရတိ ပုတ္တီယတိ သိဿမာစရိယော။

ဥပမာနာတိ ကိံ? ဓမ္မမာစရတိ၊ အာစာရေတိ ကိံ? အဆတ္တံ ဆတ္တမိဝ ရက္ခတိ။

‘‘ဤယော’’တိ ဝတ္တတေ။

၅၃၈။ နာမမှာတ္တိစ္ဆတ္ထေ။

နာမမှာ အတ္တနော ဣစ္ဆတ္ထေ ဤယပ္ပစ္စယော ဟောတိ။ အတ္တနော ပတ္တမိစ္ဆတိ ပတ္တီယတိ၊ ဧဝံ ဝတ္ထီယတိ၊ ပရိက္ခာရီယတိ၊ စီဝရီယတိ၊ ပဋီယတိ၊ ဓနီယတိ၊ ပုတ္တီယတိ။

အတ္တိစ္ဆတ္ထေတိ ကိမတ္ထံ? အညဿ ပတ္တမိစ္ဆတိ။

ဒဠှံ ကရောတိ ဝီရိယန္တိ အတ္ထေ –

ကာရိတဂ္ဂဟဏမနုဝတ္တတေ။

၅၃၉။ ဓာတုရူပေနာမသ္မာ ဏယောစ။

ဓာတုယာ ရူပေ နိပ္ဖာဒေတဗ္ဗေ၊ ‘‘တံ ကရောတိ၊ တေန အတိက္ကမတိ’’ဣစ္စာဒိကေ ပယုဇ္ဇိတဗ္ဗေ ဝါ သတိ နာမမှာ ဏယပ္ပစ္စယော ဟောတိ၊ ကာရိတသညာ စ။ ဏလောပေ၊ ဝိဘတ္တိလောပသရလောပါဒီသု ကတေသု ဝိဘတ္တုပ္ပတ္တိ၊ ဒဠှယတိ ဝီရိယံ၊ ဧဝံ ပမာဏယတိ၊ အမိဿယတိ၊ တထာ ဟတ္ထိနာ အတိက္ကမတိ အတိဟတ္ထယတိ၊ ဝီဏာယ ဥပဂါယတိ ဥပဝီဏယတိ၊ ဝိသုဒ္ဓါ ဟောတိ ရတ္တိ ဝိသုဒ္ဓယတိ၊ ကုသလံ ပုစ္ဆတိ ကုသလယတိ ဣစ္စာဒိ။

၅၄၀။ ဓာတူဟိ ဏေ ဏယ ဏာပေ ဏာပယာ ကာရိတာနိ ဟေတွတ္ထေ။

သဗ္ဗေဟိ ဓာတူဟိ ဟေတွတ္ထေ အဘိဓေယျေ ဏေ ဏယဏာပေ ဏာပယ ဣစ္စေတေ ပစ္စယာ ပရာ ဟောန္တိ၊ တေ ကာရိတသညာ စ ဟောန္တိ။ ဟေတုယေဝ အတ္ထော ဟေတွတ္ထော၊ သော စ ‘‘ယော ကာရေတိ သ ဟေတူ’’တိ လဒ္ဓဟေတုသညော သုဒ္ဓကတ္တုနော ပယောဇကော ဟေတုကတ္တာ၊ အတ္ထတော ပေသနဇ္ဈေသနာဒိကော ပယောဇကဗျာပါရော ဣဓ ဟေတု နာမ။

ဧတ္ထ စ –

ဏေ ဏယာဝ ဥဝဏ္ဏန္တာ၊ အာတော ဒွေ ပစ္ဆိမာ သိယုံ၊

သေသတော စတုရော ဒွေ ဝါ၊ ဝါသဒ္ဒဿာနုဝတ္တိတော။

အကမ္မာ ဓာတဝေါ ဟောန္တိ၊ ကာရိတေ တု သကမ္မကာ၊

သကမ္မကာ ဒွိကမ္မာဿု၊ ဒွိကမ္မာ တု တိကမ္မကာ။

တသ္မာ ကတ္တရိ ကမ္မေ စ၊ ကာရိတာချာတသမ္ဘဝေါ၊

န ဘာဝေ သုဒ္ဓကတ္တာ စ၊ ကာရိတေ ကမ္မသညိတော။

နိယာဒီနံ ပဓာနဉ္စ၊ အပ္ပဓာနံ ဒုဟာဒိနံ၊

ကာရိတေ သုဒ္ဓကတ္တာ စ၊ ကမ္မမာချာတဂေါစရန္တိ။

တတ္ထ ယော ကောစိ ဘဝတိ၊ တမညော ‘‘ဘဝါဟိ ဘဝါဟိ’’ ဣစ္စေဝံ ဗြဝီတိ၊ အထ ဝါ ဘဝန္တံ ဘဝိတုံ သမတ္ထံ ပယောဇယတိ၊ ဘဝိတုံ ပယောဇေတီတိ ဝါ အတ္ထေ ဣမိနာ ဏေဏယပ္ပစ္စယာ၊ ကာရိတသညာ စ၊ ‘‘ဝုတ္တတ္ထာနမပ္ပယောဂေါ’’တိ ဝါကျဿ အပ္ပယောဂေါ၊ ‘‘ကာရိတာနံ ဏော လောပ’’န္တိ ဏလောပေါ၊ ‘‘အသံယောဂန္တဿ ဝုဒ္ဓိ ကာရိတေ’’တိ ဦကာရဿောကာရော ဝုဒ္ဓိ။

‘‘ဩ၊ ဧ’’တိ စ ဝတ္တတေ၊ ဓာတုဂ္ဂဟဏဉ္စ။

၅၄၁။ တေ အာဝါယာ ကာရိတေ။

တေ ဓာတွန္တဘူတာ ဩကာရေကာရာ အာဝအာယာဒေသေ ပါပုဏန္တိ ကာရိတေ ပရေ။ ‘‘တေ အာဝါယာ’’တိ ယောဂဝိဘာဂေန ဈေအာဒီနံ အကာရိတေပိ ဟောန္တီတိ ဩကာရဿ အာဝါဒေသော၊ သရလောပါဒိ၊ ‘‘ဓာတုပ္ပစ္စယေဟိ ဝိဘတ္တိယော’’တိ တျာဒယော။

သော သမာဓိံ ဘာဝေတိ၊ ဘာဝယတိ၊ ဘာဝေန္တိ၊ ဘာဝယန္တိ။ ဘာဝေသိ၊ ဘာဝယသိ၊ ဘာဝေထ၊ ဘာဝယထ။ ဘာဝေမိ၊ ဘာဝယာမိ၊ ဘာဝေမ၊ ဘာဝယာမ။ ဘာဝယတေ၊ ဘာဝယန္တေ။

ကမ္မေ အတ္တနောပဒယပ္ပစ္စယဤကာရာဂမာ၊ သရလောပါဒိ စ၊ တေန ဘာဝီယတေ သမာဓိ၊ ဘာဝီယန္တေ။ ဘာဝီယတိ၊ ဘာဝီယန္တိ။

တထာ ဘာဝေတု၊ ဘာဝယတု၊ ဘာဝေန္တု၊ ဘာဝယန္တု။ ဘာဝေဟိ၊ ဘာဝယ၊ ဘာဝယာဟိ၊ ဘာဝေထ၊ ဘာဝယထ ။ ဘာဝေမိ၊ ဘာဝယာမိ၊ ဘာဝေမ၊ ဘာဝယာမ။ ဘာဝယတံ၊ ဘာဝယန္တံ။

ကမ္မေ ဘာဝီယတံ၊ ဘာဝီယတု၊ ဘာဝီယန္တု။

ဘာဝေယျ၊ ဘာဝယေ၊ ဘာဝယေယျ၊ ဘာဝေယျုံ၊ ဘာဝယေယျုံ။ ဘာဝေယျာသိ၊ ဘာဝယေယျာသိ၊ ဘာဝေယျာထ၊ ဘာဝယေယျာထ။ ဘာဝေယျာမိ၊ ဘာဝယေယျာမိ၊ ဘာဝေယျာမ၊ ဘာဝယေယျာမ။ ဘာဝေထ၊ ဘာဝယေထ၊ ဘာဝေရံ၊ ဘာဝယေရံ။

ကမ္မေ ဘာဝီယေယျ၊ ဘာဝီယေယျုံ။

အဇ္ဇတနိယံ ‘‘သတ္တမဇ္ဇတနိမှီ’’တိ ယောဂဝိဘာဂေန ကာရိတန္တာပိ ဒီဃတော သကာရာဂမော။

အဘာဝေသိ၊ ဘာဝေသိ၊ အဘာဝယိ၊ ဘာဝယိ၊ အဘာဝေသုံ၊ ဘာဝေသုံ၊ အဘာဝယိံသု၊ ဘာဝယိံသု၊ အဘာဝယုံ၊ ဘာဝယုံ။ အဘာဝေသိ၊ အဘာဝယသိ၊ အဘာဝိတ္ထ၊ အဘာဝယိတ္ထ။ အဘာဝေသိံ၊ ဘာဝေသိံ၊ အဘာဝယိံ၊ ဘာဝယိံ၊ အဘာဝိမှ၊ အဘာဝယိမှ။

ကမ္မေ အဘာဝီယိတ္ထ၊ အဘာဝီယိ။

ဘာဝေဿတိ၊ ဘာဝယိဿတိ၊ ဘာဝေဿန္တိ၊ ဘာဝယိဿန္တိ။ ဘာဝေဿသိ၊ ဘာဝယိဿသိ၊ ဘာဝိဿထ၊ ဘာဝယိဿထ။ ဘာဝေဿာမိ၊ ဘာဝယိဿာမိ၊ ဘာဝေဿာမ၊ ဘာဝယိဿာမ။

ကမ္မေ ဘာဝီယိဿတေ၊ ဘာဝီယိဿန္တေ။ ဘာဝီယိဿတိ၊ ဘာဝီယိဿန္တိ။

အဘာဝိဿ၊ အဘာဝယိဿ၊ အဘာဝိဿံသု၊ အဘာဝယိဿံသု။ ကမ္မေ အဘာဝီယိဿထ၊ အဘာဝီယိဿ ဣစ္စာဒိ။

တထာ ယော ကောစိ ပစတိ၊ တမညော ‘‘ပစာဟိ ပစာဟိ’’ ဣစ္စေဝံ ဗြဝီတိ၊ အထ ဝါ ပစန္တံ ပယောဇေတိ၊ ပစိတုံ ဝါ ပယောဇေတီတိ အတ္ထေ ဝုတ္တနယေန ဏေ ဏယာဒယော၊ အကာရဿာကာရော ဝုဒ္ဓိ၊ သေသံ နေယျံ။

သော ဒေဝဒတ္တံ ဩဒနံ ပါစေတိ၊ ပါစေန္တိ။ ပါစေသိ၊ ပါစေထ။ ပါစေမိ၊ ပါစေမ။ ပါစယတိ၊ ပါစယန္တိ။ ပါစယသိ၊ ပါစယထ။ ပါစယာမိ၊ ပါစယာမ။ ဏာပေဏာပယေသု ပန သော ပုရိသော တံ ပုရိသံ ဩဒနံ ပါစာပေတိ၊ ပါစာပေန္တိ။ ပါစာပယတိ၊ ပါစာပယန္တိ။

ကမ္မေ သော ဩဒနံ ပါစီယတိ တေန၊ ပါစယီယတိ၊ ပါစာပီယတိ၊ ပါစာပယီယတိ။

တထာ ပါစေတု၊ ပါစယတု၊ ပါစာပေတု၊ ပါစာပယတု။ ပါစီယတံ၊ ပါစီယတု၊ ပါစယီယတံ၊ ပါစယီယတု၊ ပါစာပီယတံ၊ ပါစာပီယတု၊ ပါစာပယီယတံ၊ ပါစာပယီယတု။ ပါစေယျ၊ ပါစယေယျ၊ ပါစာပေယျ၊ ပါစာပယေယျ။ ပါစီယေယျ၊ ပါစီယေယျုံ။ အပါစေသိ၊ အပါစယိ၊ အပါစာပေသိ၊ အပါစာပယိ။ ပါစေဿတိ၊ ပါစယိဿတိ၊ ပါစာပေဿတိ၊ ပါစာပယိဿတိ။ အပါစိဿ၊ အပါစယိဿ၊ အပါစာပိဿ၊ အပါစာပယိဿ ဣစ္စာဒိ။

ဂစ္ဆန္တံ၊ ဂန္တုံ ဝါ ပယောဇေတီတိ အတ္ထေ ဏေ ဏယာဒယော၊ ဝုဒ္ဓိယံ သမ္ပတ္တာယံ –

‘‘အသံယောဂန္တဿ ဝုဒ္ဓိ ကာရိတေ’’တိ ဝတ္တတေ။

၅၄၂။ ဃဋာဒီနံ ဝါ။

ဃဋာဒီနံ ဓာတူနံ အသံယောဂန္တာနံ ဝုဒ္ဓိ ဟောတိ ဝါ ကာရိတေတိ ဧတ္ထ ဝါဂ္ဂဟဏေန ဝုဒ္ဓိ န ဟောတိ၊ ဝဝတ္ထိတဝိဘာသတ္ထောယံ ဝါသဒ္ဒေါ။

သော တံ ပုရိသံ ဂါမံ ဂမေတိ၊ ဂမယတိ၊ ဂစ္ဆာပေတိ၊ ဂစ္ဆာပယတိ။ သော ဂါမံ ဂမီယတိ တေန၊ ဂမယီယတိ၊ ဂစ္ဆာပီယတိ၊ ဂစ္ဆာပယီယတိ ဣစ္စာဒိ။ သဗ္ဗတ္ထ ယောဇေတဗ္ဗံ။ ဧဝံ ဥပရိပိ။

ဃဋ ဤဟာယံ၊ ဃဋန္တံ ပယောဇယတိ၊ ဃဋေတိ၊ ဃဋာဒီနံ ဝါတိ န ဝုဒ္ဓိ၊ ဃဋယတိ၊ ဃဋာပေတိ၊ ဃဋာပယတိ။

‘‘ကာရိတေ’’တိ ဝတ္တတေ။

၅၄၃။ ဂုဟ ဒုသာနံ ဒီဃံ။

ဂုဟဒုသဣစ္စေတေသံ ဓာတူနံ သရော ဒီဃမာပဇ္ဇတေ ကာရိတေ ပရေ၊ ဝုဒ္ဓါပဝါဒေါယံ။

ဂုဟ သံဝရဏေ၊ ဂုဟိတုံ ပယောဇယတိ ဂူဟယတိ၊ ဂူဟယန္တိ။ ဒုသ အပ္ပီတိမှိ၊ ဒုဿန္တံ ပယောဇယတိ ဒူသယတိ၊ ဒူသယန္တိ ဣစ္စာဒိ။

တထာ ဣစ္ဆန္တံ ပယောဇယတိ ဣစ္ဆာပေတိ၊ ဣစ္ဆာပယတိ၊ ဧသေတိ၊ ဧသယတိ။ နိယစ္ဆန္တံ ပယောဇယတိ နိယာမေတိ၊ နိယာမယတိ။ အာသန္တံ ပယောဇယတိ အာသေတိ၊ အာသယတိ၊ အစ္ဆာပေတိ၊ အစ္ဆာပယတိ။ လဘန္တံ ပယောဇယတိ လာဘေတိ၊ လာဘယတိ။ ဝစန္တံ ပယောဇယတိ ဝါစေတိ၊ ဝါစယတိ၊ ဝါစာပေတိ၊ ဝါစာပယတိ။ ဧဝံ ဝါသေတိ၊ ဝါသယတိ၊ ဝါသာပေတိ၊ ဝါသာပယတိ။ ဝါဟေတိ၊ ဝါဟယတိ၊ ဝါဟာပေတိ၊ ဝါဟာပယတိ။ ဇီရေတိ၊ ဇီရယတိ၊ ဇီရာပေတိ၊ ဇီရာပယတိ။ မာရေတိ၊ မာရယတိ၊ မာရာပေတိ၊ မာရာပယတိ။ ဒဿေတိ၊ ဒဿယတိ ဣစ္စာဒိ။

တထာ တုဒန္တံ ပယောဇယတိ တောဒေတိ၊ တောဒယတိ၊ တောဒါပေတိ၊ တောဒါပယတိ။ ပဝိသန္တံ ပယောဇယတိ၊ ပဝိသိတုံ ဝါ ပဝေသေတိ၊ ပဝေသယတိ၊ ပဝေသာပေတိ ၊ ပဝေသာပယတိ။ ဥဒ္ဒိသန္တံ ပယောဇယတိ ဥဒ္ဒိသာပေတိ၊ ဥဒ္ဒိသာပယတိ။ ပဟောန္တံ ပယောဇယတိ ပဟာဝေတိ၊ ပဟာဝယတိ။ သယန္တံ ပယောဇယတိ သာယေတိ၊ သာယယတိ၊ သာယာပေတိ၊ သာယာပယတိ။ ဧတ္ထ ဧကာရဿ အာယာဒေသော၊ သယာပေတိ၊ သယာပယတိ၊ ‘‘ကွစိ ဓာတူ’’တိအာဒိနာ ဏာပေဏာပယေသု အာယာဒေသဿ ရဿတ္တံ။ နယန္တံ ပယောဇယတိ နယာပေတိ၊ နယာပယတိ။ ပတိဋ္ဌန္တံ ပယောဇယတိ ပတိဋ္ဌာပေတိ၊ ပတိဋ္ဌာပယတိ၊ ပတိဋ္ဌပေတိ ဝါ။

ဟနန္တံ ပယောဇယတီတိ အတ္ထေ ဏေဏယာဒယော။

‘‘ဏမှီ’’တိ ဝတ္တတေ။

၅၄၄။ ဟနဿ ဃာတော။

ဟနဣစ္စေတဿ ဓာတုဿ ဃာတာဒေသော ဟောတိ ဏကာရဝတိ ကာရိတပ္ပစ္စယေ ပရေ။ ဃာတေတိ၊ ဃာတယတိ၊ ဃာတာပေတိ၊ ဃာတာပယတိ၊ ‘‘ဝဓော ဝါ သဗ္ဗတ္ထာ’’တိ ဝဓာဒေသေ ဝဓေတိ၊ ဝဓာပေတိ။

ဇုဟောန္တံ ပယောဇယတိ ဇုဟာဝေတိ၊ ဇုဟာဝယတိ။ ဇဟန္တံ ပယောဇယတိ ဇဟာပေတိ၊ ဇဟာပယတိ၊ ဟာပေတိ၊ ဟာပယတိ။ ဒဒန္တံ ပယောဇယတိ ဒါပေတိ၊ ဒါပယတိ။ ပိဒဟန္တံ ပယောဇယတိ ပိဓာပေတိ၊ ပိဓာပယတိ၊ ပိဒဟာပေတိ၊ ပိဒဟာပယတိ။

ရုန္ဓန္တံ ပယောဇယတိ ရောဓေတိ၊ ရောဓယတိ၊ ရောဓာပေတိ၊ ရောဓာပယတိ။ ဆိန္ဒန္တံ ပယောဇယတိ ဆေဒေတိ၊ ဆေဒယတိ၊ ဆေဒါပေတိ၊ ဆေဒါပယတိ။ ယုဉ္ဇန္တံ ပယောဇယတိ ယောဇေတိ၊ ယောဇယတိ၊ ယောဇာပေတိ၊ ယောဇာပယတိ။ ဘုဉ္ဇန္တံ ပယောဇယတိ ဘောဇေတိ၊ ဘောဇယတိ၊ ဘောဇာပေတိ၊ ဘောဇာပယတိ။ မုဉ္စန္တံ ပယောဇယတိ မောစေတိ၊ မောစယတိ၊ မောစာပေတိ၊ မောစာပယတိ။

ဒိဗ္ဗန္တံ ပယောဇယတိ ဒေဝေတိ၊ ဒေဝယတိ။ ဥပ္ပဇ္ဇန္တံ ပယောဇယတိ ဥပ္ပာဒေတိ၊ ဥပ္ပာဒယတိ။ ဗုဇ္ဈန္တံ ပယောဇယတိ ဗောဓေတိ၊ ဗောဓယတိ။ ‘‘ဒါဓာန္တတော ယော ကွစီ’’တိ ယကာရာဂမော၊ ဗုဇ္ဈာပေတိ၊ ဗုဇ္ဈာပယတိ။ တုဿန္တံ ပယောဇယတိ တောသေတိ၊ တောသယတိ၊ တောသာပေတိ၊ တောသာပယတိ။ သမ္မန္တံ ပယောဇယတိ သမေတိ၊ သမယတိ၊ ဃဋာဒိတ္တာ န ဝုဒ္ဓိ။ ကုပ္ပန္တံ ပယောဇယတိ ကောပေတိ၊ ကောပယတိ။ ဇာယန္တံ ပယောဇယတိ ဇနေတိ၊ ဇနယတိ၊ ဃဋာဒိတ္တာ န ဝုဒ္ဓိ။

သုဏန္တံ ပယောဇယတိ ဓမ္မံ သာဝေတိ၊ သာဝယတိ။ ပါပုဏန္တံ ပယောဇယတိ ပါပေတိ၊ ပါပယတိ။

ဝိက္ကိဏန္တံ ပယောဇယတိ ဝိက္ကာယာပေတိ၊ ဝိက္ကာယာပယတိ။ ဇိနန္တံ ပယောဇယတိ ဇယာပေတိ၊ ဇယာပယတိ။ ဇာနန္တံ ပယောဇယတိ ဉာပေတိ၊ ဉာပယတိ။ ဂဏှန္တံ ပယောဇယတိ ဂါဟေတိ၊ ဂါဟယတိ၊ ဂါဟာပေတိ၊ ဂါဟာပယတိ၊ ဂဏှာပေတိ၊ ဂဏှာပယတိ။

ဝိတနန္တံ ပယောဇယတိ ဝိတာနေတိ၊ ဝိတာနယတိ။ ယော ကောစိ ကရောတိ၊ တမညော ‘‘ကရောဟိ ကရောဟိ’’ဣစ္စေဝံ ဗြဝီတိ၊ ကရောန္တံ ပယောဇယတိ၊ ကာတုံ ဝါ ကာရေတိ၊ ကာရယတိ၊ ကာရာပေတိ၊ ကာရာပယတိ ဣစ္စာဒိ။

စောရေန္တံ ပယောဇယတိ စောရာပေတိ၊ စောရာပယတိ။ စိန္တေန္တံ ပယောဇယတိ စိန္တာပေတိ၊ စိန္တာပယတိ ၊ ပူဇေန္တံ ပယောဇယတိ ပူဇာပေတိ၊ ပူဇာပယတိ ဣစ္စာဒိ။ သဗ္ဗတ္ထ သုဗောဓံ။

ဓာတုပ္ပစ္စယတော စာပိ၊ ကာရိတပ္ပစ္စယာ သိယုံ၊

သကာရိတေဟိ ယုဏွူနံ၊ ဒဿနဉ္စေတ္ထ ဉာပကံ။

တေန တိတိက္ခန္တံ ပယောဇယတိ တိတိက္ခေတိ၊ တိတိက္ခာပေတိ။ တိကိစ္ဆန္တံ ပယောဇယတိ တိကိစ္ဆေတိ၊ တိကိစ္ဆယတိ၊ တိကိစ္ဆာပေတိ၊ တိကိစ္ဆာပယတိ။ ဧဝံ ဗုဘုက္ခေတိ၊ ဗုဘုက္ခယတိ၊ ဗုဘုက္ခာပေတိ၊ ဗုဘုက္ခာပယတိ၊ ပဗ္ဗတာယန္တံ ပယောဇယတိ ပဗ္ဗတာယယတိ။ ပုတ္တီယယတိ ဣစ္စာဒိပိ သိဒ္ဓံ ဘဝတိ။

ဓာတုပ္ပစ္စယန္တနယော။

သာသနတ္ထံ သမုဒ္ဒိဋ္ဌံ၊ အာချာတံ သကဗုဒ္ဓိယာ၊

ဗာဟုသစ္စဗလေနီဒံ၊ စိန္တယန္တု ဝိစက္ခဏာ။

ဘဝတိ တိဋ္ဌတိ သေတိ၊ အဟောသိ ဧဝမာဒယော၊

အကမ္မကာတိ ဝိညေယျာ၊ ကမ္မလက္ခဏဝိညုနာ။

အကမ္မကာပိ ဟေတွတ္ထ-ပ္ပစ္စယန္တာ သကမ္မကာ၊

တံ ယထာ ဘိက္ခု ဘာဝေတိ၊ မဂ္ဂံ ရာဂါဒိဒူသကန္တိ။

ဣတိ ပဒရူပသိဒ္ဓိယံ အာချာတကဏ္ဍော

ဆဋ္ဌော။