📜
၆။ ဆပ္ပစ္စယဝိဘာဂ-ဆဋ္ဌပရိစ္ဆေဒ
ပတ္ထာရနယ
ပတ္ထာရေ ¶ သဗ္ဗဂေ ပါဒေ၊ ပုဗ္ဗဂါ’ဓော လ္ပ’ရေ သမာ၊
ပုဗ္ဗေ ဂရု တေ စ မိမေ၊ ကတ္တဗ္ဗာ ယာဝ သဗ္ဗလာ။
နဋ္ဌနယ
နဋ္ဌဿ ယော ဘဝေယျ’င်္ကော၊ တသ္မိံ လော’ဒ္ဓိကတေ သမေ၊
ဝိသမေ တွေ’ကသဟိတေ၊ ဘဝေယျ’ဒ္ဓိကတေ ဂရု။
ဥဒ္ဒိဋ္ဌနယ
ဧကာ’ဒိနုက္ကမေန’င်္ကေ၊ ပုဗ္ဗာဓော ဒွိဂုဏေ လိခေ၊
မိဿကေဟိ လဟုဋ္ဌေဟိ၊ သေ’ကေဟု’ဒ္ဒိဋ္ဌကံ ဘဝေ။
သဗ္ဗဂလကြိယနယ
ဝုတ္တ’က္ခရ သမာ သင်္ချာ၊ လိက္ချ သေကော’ပရူ’ပရိ၊
ဧကေကဟီန မေကာဒိ၊ နု’ဋ္ဌာနေ သဗ္ဗဂါဒိကံ။
ဝုတ္တသင်္ချာနယ
ဂရုကြိယာ’င်္က သန္ဒောဟေ၊ ဘဝေ သင်္ချာ ဝိမိဿိတေ၊
ဥဒ္ဒိဋ္ဌ’င်္က သမာဟာရော၊ သေ’ကော ဝေ’မံ သမာ’နယေ။
ဝုတ္တအဒ္ဓါနယ
သင်္ချေဝ ဒွိဂုဏေ’ကူနာ၊ ဝိတ္ထာရာ’ယာမသမ္ဘဝါ၊
ဝုတ္တဿ’ဒ္ဓ’န္တရာနဉ္စ၊ ဂရုလာနဉ္စ အင်္ဂုလံ။
ဣတိ ဝုတ္တောဒယေ ဆန္ဒသိ ဆပ္ပစ္စယဝိဘာဂေါ နာမ
ဆဋ္ဌော ပရိစ္ဆေဒေါ။
နိဂမန
သေလ’န္တရာ’ယတန ¶ ဝါသိက သီလ’တ္ထေရ၊
ပါဒေါ ဂရု ဂ္ဂုဏဂရု ဇ္ဇယတံ မမေ’သော၊
ယဿ ပ္ပဘာဝ’မဝလမ္ဗ မယေ’ဒိသောပိ၊
သမ္ပာဒိတော’ဘိမတ သိဒ္ဓိကရော ပရတ္ထော။
ပရတ္ထ သမ္ပာဒနတော၊ ပုညေနာ’ဓိဂတေန’ဟံ၊
ပရတ္ထ သမ္ပာဒနကော၊ ဘဝေယျံ ဇာတိ ဇာတိယံ။
အဝလောကိတ မတ္တေန၊ ယထာ ဆပ္ပစ္စယာ မယာ၊
သာဓိတာ သာဓယန္တေ’ဝ၊ မိစ္ဆိတတ္ထမ္ပိ ပါဏိနောတိ။
ဣတိ သင်္ဃရက္ခိတမဟာသာမိတ္ထေရေန ဝိရစိတံ
ဝုတ္တောဒယပ္ပကရဏံ ပရိနိဋ္ဌိတံ။