အည > ဗျာကရဏ ဂန္ထ-သင်္ဂဟော > သုဗောဓာလင်္ကာရပါဌ

MMR Vol 0

Misc. Paragraph

၃။ ဂုဏာဝဗောဓ-တတိယပရိစ္ဆေဒ

အနုသန္ဓိ

သမ္ဘဝန္တိ ¶ ဂုဏာ ယသ္မာ၊ ဒေါသာနေ’ဝ’မတိက္ကမေ၊

ဒဿေဿံ တေ တတော ဒါနိ၊ သဒ္ဒေ သမ္ဘူသယန္တိ ယေ။

ပသာဒေါ’ဇော၊ မဓုရတာ၊ သမတာ၊ သုခုမာလတာ၊

သိလေသော’ဒရတာ၊ ကန္တိ၊ အတ္ထဗျတ္တိ၊ သမာဓယော။

ဂုဏေဟေ’တေဟိ သမ္ပန္နော၊ ဗန္ဓော ကဝိမနောဟရော၊

သမ္ပာဒိယတိ ကတ္တူနံ၊ ကိတ္တိ မစ္စန္တနိမ္မလံ။

အဒူရာဟိတသမ္ဗန္ဓ၊ သုဘဂါ ယာ ပဒါ’ဝလိ၊

သုပသိဒ္ဓါ’ဘိဓေယျာ’ယံ၊ ပသာဒံ ဇနယေ ယထာ။

အလင်္ကရောန္တာ ဝဒနံ၊ မုနိနော’ဓရရံသိယော၊

သောဘန္တေ’ရုဏရံသီ’ဝ၊ သမ္ပတန္တာ’မ္ဗုဇော’ဒရေ။

ဩဇော သမာသဗာဟုလျ၊ မေသော ဂဇ္ဇဿ ဇီဝိတံ၊

မုနိန္ဒ မန္ဒ သဉ္ဇာတ၊ ဟာသ စန္ဒန လိမ္ပိတာ၊

ပလ္လဝါ ဓဝလာ တဿေ၊ ဝေကော နာ’ဓရပလ္လဝေါ။

ပဒါ’ဘိဓေယျဝိသယံ၊ သမာသ ဗျာသ သမ္ဘဝံ၊

ယံ ပါရိဏတျံ ဟောတီ’ဟ၊ သောပိ ဩဇော’ဝ တံ ယထာ။

ဇောတယိတွာန သဒ္ဓမ္မံ၊ သန္တာရေတွာ သဒေဝကေ၊

ဇလိတွာ အဂ္ဂိခန္ဓော’ဝ၊ နိဗ္ဗုတော သော သသာဝကော။

မတ္ထကဋ္ဌီ မတဿာ’ပိ၊ ရဇောဘာဝံ ဝဇန္တု မေ၊

ယတော ပုညေန တေ သေန္တု၊ ဇိန ပါဒ’မ္ဗုဇဒွယေ။

ဣစ္စတြ ¶ နိစ္စပ္ပဏတိ၊ ဂေဓော သာဓု ပဒိဿတိ၊

ဇာယတေ’ယံ ဂုဏော တိက္ခ၊ ပညာနမဘိယောဂတော။

မဓုရတ္တံ ပဒါသတ္တိ၊ ရ’နုပ္ပာသဝသာ ဒွိဓာ၊

သိယာ သမသုတိ ပုဗ္ဗာ၊ ဝဏ္ဏာ’ဝုတ္တိ ပရော ယထာ။

ယဒါ ဧသော’ဘိသမ္ဗောဓိံ၊ သမ္ပတ္တော မုနိပုင်္ဂဝေါ၊

တဒါ ပဘုတိ ဓမ္မဿ၊ လောကေ ဇာတော မဟု’ဿဝေါ။

မုနိန္ဒမန္ဒဟာသာ တေ၊ ကုန္ဒ သန္ဒောဟဝိဗ္ဘမာ၊

ဒိသန္တ မနုဓာဝန္တိ၊ ဟသန္တာ စန္ဒကန္တိယော။

သဗ္ဗကောမလဝဏ္ဏေဟိ၊ နာ’နုပ္ပာသော ပသံသိယော၊

ယထာ’ယံ မာလတီမာလာ၊ လိန လောလာ’လိမာလိနီ။

မုဒူဟိ ဝါ ကေဝလေဟိ၊ ကေဝလေဟိ ဖုဋေဟိ ဝါ၊

မိဿေဟိ ဝါ တိဓာ ဟောတိ၊ ဝဏ္ဏေဟိ သမတာ ယထာ။

ကောကိလာ’လာပသံဝါဒီ၊ မုနိန္ဒာ’လာပဝိဗ္ဘမော၊

ဟဒယင်္ဂမတံ ယာတိ၊ သတံ ဒေတိ စ နိဗ္ဗုတိံ။

သမ္ဘာဝနီယသမ္ဘာဝံ၊ ဘဂဝန္တံ ဘဝန္တဂုံ၊

ဘဝန္တသာဓနာ’ကင်္ခီ၊ ကော န သမ္ဘာဝယေ ဝိဘုံ။

လဒ္ဓစန္ဒနသံသဂ္ဂ၊ သုဂန္ဓိ မလယာ’နိလော၊

မန္ဒ မာယာတိ ဘီတော’ဝ၊ မုနိန္ဒမုခမာရုတာ။

အနိဋ္ဌုရ’က္ခရ’ပ္ပာယာ၊ သဗ္ဗကောမလ နိဿဋာ၊

ကိစ္ဆမုစ္စာရဏာ’ပေတ၊ ဗျဉ္ဇနာ သုခုမာလတာ။

ပဿန္တာ ရူပဝိဘဝံ၊ သုဏန္တာ မဓုရံ ဂိရံ၊

စရန္တိ သာဓူ[သာဓု (သီ-ဆန္ဓာနုရက္ခဏတ္ထံ)]သမ္ဗုဒ္ဓ၊ ကာလေ ကေဠိပရမ္မုခါ။

အလင်္ကာရဝိဟီနာ’ပိ၊ သတံ သမ္မုခတေ’ဒိသီ၊

အာရောဟတိ ဝိသေသေန၊ ရမဏီယာ တ’ဒုဇ္ဇလာ။

ရောမဉ္စ ¶ ပိဉ္ဆ ရစနာ၊ သာဓု ဝါဒါဟိတဒ္ဓနီ၊

လဠန္တိ’မေ မုနိမေဃု၊ မ္မဒါ သာဓု သိခါဝလာ။

သုခုမာလတ္တ မတ္ထေ’ဝ၊ ပဒတ္ထဝိသယမ္ပိ စ၊

ယထာ မတာဒိသဒ္ဒေသု၊ ကိတ္တိသေသာဒိကိတ္တနံ။

သိလိဋ္ဌ ပဒ သံသဂ္ဂ၊ ရမဏီယ ဂုဏာ’လယော၊

သဗန္ဓဂါရဝေါ သော’ယံ၊ သိလေသော နာမ တံ ယထာ။

ဗာလိ’န္ဒုဝိဗ္ဘမ’စ္ဆေဒိ၊ နခရာ’ဝလိ ကန္တိဘိ၊

သာ မုနိန္ဒပဒ’မ္ဘောဇ၊ ကန္တိ ဝေါ ဝလိတာ’ဝတံ။

ဥက္ကံသဝန္တော ယောကောစိ၊ ဂုဏော ယဒိ ပတီယတေ၊

ဥဒါရော’ယံ ဘဝေ တေန၊ သနာထာ ဗန္ဓပဒ္ဓတိ။

ပါဒမ္ဘောဇ ရဇော လိတ္တ၊ ဂတ္တာ ယေ တဝ ဂေါတမ၊

အဟော! တေ ဇန္တဝေါ ယန္တိ၊ သဗ္ဗထာ နိရဇတ္တနံ။

ဧဝံ ဇိနာ’နုဘာဝဿ၊ သမုက္ကံသော’တြ ဒိဿတိ၊

ပညဝါ ဝိဓိနာ’နေန၊ စိန္တယေ ပရ မီဒိသံ။

ဥဒါရော သောပိ ဝိညေယျော၊ ယံ ပသတ္ထ ဝိသေသနံ၊

ယထာ ကီဠာသရော လီလာ၊ ဟာသော ဟေမင်္ဂဒါ’ဒယော။

လောကိယ’တ္ထာ’န’တိက္ကန္တာ၊ ကန္တာ သဗ္ဗဇနာနပိ၊

ကန္တိ နာမာ’တိဝုတ္တဿ၊ ဝုတ္တာ သာ ပရိဟာရတော။

သာ’ယံ တဒုဘယာ နေယျ၊ ပရိဟာရေ ပဒဿိတာ၊

ယထာ မရီစိစ္စာဒိ စ၊ မနောနုရဉ္ဇနောစ္စာဒိ။

သဘာဝါ’မလတာ ဓီရ၊ မုဓာ ပါဒနခေသု တေ၊

ယတော တေ’ဝနတာ’နန္တ၊ မောဠိစ္ဆာယာ ဇဟန္တိ နော။

‘ဗန္ဓသာရော’တိ မညန္တိ၊ ယံ သမဂ္ဂါပိ ဝိညုနော၊

ဒဿနာ’ဝသရံ ပတ္တော၊ သမာဓိ နာမ’ယံ ဂုဏော။

အညဓမ္မော တတော’ညတ္ထ၊ လောကသီမာ’နုရောဓတော၊

သမ္မာ အာဓီယတေ’စ္စေ’သော၊ ‘သမာဓီ’တိ နိရုစ္စတိ။

အပါဏေ ¶ ပါဏီနံ ဓမ္မော၊ သမ္မာ အာဓီယတေ ကွစိ၊၊

နိရူပေ ရူပယုတ္တဿ၊ နိရသေ သရသဿ၊ စ။

အဒြဝေ ဒြဝယုတ္တဿ၊ အကတ္တရိပိ ကတ္တုတာ၊၊

ကဌိနဿာ’သရီရေ၊ပိ၊ ရူပံ တေသံ ကမာ သိယာ။

ဥဏ္ဏာ ပုဏ္ဏိ’န္ဒုနာ နာထ! ဒိဝါပိ သဟ သင်္ဂမာ၊

ဝိနိဒ္ဒါ သမ္ပမောဒန္တိ၊ မညေ ကုမုဒိနီ တဝ။

ဒယာရသေသု မုဇ္ဇန္တာ၊ ဇနာ’မတရသေသွိ’ဝ၊

သုခိတာ ဟတဒေါသာ တေ၊ နာထ! ပါဒ’မ္ဗုဇာ’နတာ။

မဓုရေပိ ဂုဏေ ဓီရ၊ န’ပ္ပသီဒန္တိ ယေ တဝ၊

ကီဒိသီ မနသောဝုတ္တိ၊ တေသံ ခါရဂုဏာန ဘော’။

သဗ္ဗတ္ထသိဒ္ဓ! စူဠက၊ ပုဋပေယျာ မဟာဂုဏာ၊

ဒိသာ သမန္တာ ဓာဝန္တိ၊ ကုန္ဒသောဘာ သ လက္ခဏာ။

မာရာ’ရိဗလဝိဿဋ္ဌာ၊ ကုဏ္ဌာ နာနာဝိဓာ’ယုဓာ၊

လဇ္ဇမာနာ’ညဝေသေန၊ ဇိန! ပါဒါ’နတာ တဝ။

သဒ္ဓမ္မရံသိနာ ဘာတိ၊ ဘိန္ဒ မန္ဒတမံ ပရံ။

ဝမနု’ဂ္ဂိရနာဒျေ’တံ၊ ဂုဏဝုတျ’ပရိစ္စုတံ၊

အတိသုန္ဒရ မညံ တု၊ ကာမံ ဝိန္ဒတိ ဂါမ္မတံ။

ကန္တီနံ ဝမနဗျာဇာ၊ မုနိပါဒနခါ’ဝလီ၊

စန္ဒကန္တီ ပိဝန္တီ’ဝ၊ နိပ္ပဘံ တံ ကရောန္တိယော။

အစိတ္တကတ္တုကံ ¶ ရုစျ [ရုစ္စ (သီ။)]၊ မိစ္စေဝံ ဂုဏကမ္မတံ၊

သစိတ္တကတ္တုကံ ပေ’တံ၊ ဂုဏကမ္မံ ယဒု’တ္တမံ။

ဥဂ္ဂိရန္တော’ဝ သသ္နေဟ၊ ရသံ ဇိနဝရော ဇနေ၊

ဘာသန္တော မဓုရံ ဓမ္မံ၊ ကံ န သပ္ပီဏယေ ဇနံ။

ယော သဒ္ဒသတ္ထကုသလော ကုသလော နိဃဏ္ဍု၊

ဆန္ဒောအလင်္ကတိသု နိစ္စကတာ’ဘိယောဂေါ၊

သော’ယံ ကဝိတ္တဝိကလောပိ ကဝီသု သင်္ချ၊

မောဂ္ဂယှ ဝိန္ဒတိ ဟိ ကိတ္တိ’ မမန္ဒရူပံ။

ဣတိ သင်္ဃရက္ခိတမဟာသာမိဝိရစိတေ သုဗောဓာလင်္ကာရေ