အည > ဗျာကရဏ ဂန္ထ-သင်္ဂဟော > သုဗောဓာလင်္ကာရပါဌ > ၄။ အတ္ထာလင်္ကာရာဝဗောဓ-စတုတ္ထပရိစ္ဆေဒ

MMR Vol 0

Misc. Paragraph

၄။ အတ္ထာလင်္ကာရာဝဗောဓ-စတုတ္ထပရိစ္ဆေဒ

ဝင်္ကဝုတ္တိ အတ္ထာလင်္ကာရ

၄။ အတ္ထာလင်္ကာရာဝဗောဓ-စတုတ္ထပရိစ္ဆေဒ

အတ္ထာလင်္ကာရသဟိတာ၊ သဂုဏာ ဗန္ဓပဒ္ဓတိ၊

အစ္စန္တကန္တာ ကန္တာ [ယတော အစ္စန္တကန္တာ (က။)] ဝ ဝုစ္စန္တေ တေ တတော’ဓုနာ။

သဘာဝ၊ ဝင်္ကဝုတ္တီနံ၊ ဘေဒါ ဒွိဓာ အလံကြိယာ၊

ပဌမာ တတ္ထ ဝတ္ထူနံ၊ နာနာဝတ္ထာ’ဝိဘာဝိနီ။

လီလာ ဝိကန္တိ သုဘဂေါ၊ ဒိသာ ထိရ ဝိလောကနော၊

ဗောဓိသတ္တင်္ကုရော ဘာသံ၊ ဝိရောစိ ဝါစ မာသဘိံ။

ဝုတ္တိ ဝတ္ထုသဘာဝဿ၊ ယာ’ညထာ သာ’ပရာ ဘဝေ၊

တဿာ’နန္တဝိကပ္ပတ္တာ၊ ဟောတိ ဗီဇော’ပဒဿနံ။

တတ္ထာ’တိသယ၊ ဥပမာ၊ ရူပကာ၊ ဝုတ္တိ၊ ဒီပကံ၊၊

အက္ခေပေါ၊ တ္ထန္တရနျာသော၊ ဗျတိရေကော၊ ဝိဘာဝနာ။

ဟေတု ¶ ၊ က္ကမော၊ ပိယတရံ၊ သမာသ၊ ပရိကပ္ပနာ၊

သမာဟိတံ၊ ပရိယာယ၊ ဝုတ္တိ၊ ဗျာဇောပဝဏ္ဏနံ။

ဝိသေသ၊ ရုဠှာဟင်္ကာရာ၊ သိလေသော၊ တုလျယောဂိတာ၊

နိဒဿနံ၊ မဟန္တတ္တံ၊ ဝဉ္စနာ၊ ပ္ပကတတ္ထုတိ၊။

ဧကာဝလိ၊ အညမညံ၊ သဟဝုတ္တိ၊ ဝိရောဓိတာ၊

ပရိဝုတ္တိ၊ ဗ္ဘမော၊ ဘာဝေါ၊ မိဿ၊ မာသီ၊ ရသီ၊ ဣတိ။

ဧတေ ဘေဒါ သမုဒ္ဒိဋ္ဌာ၊ ဘာဝေါ ဇီဝိတ မုစ္စတေ၊

ဝင်္ကဝုတ္တီသု ပေါသေသိ၊ သိလေသော တု သိရိံ ပရံ။

ပကာသကာ ဝိသေသဿ၊ သိယာ’တိသယဝုတ္တိ ယာ၊

လောကာ’တိက္ကန္တဝိသယာ၊ လောကိယာ၊တိ စ သာ ဒွိဓာ။

ပဋိပါဒီယတေ တွ’ဇ္ဇ၊ လောကာတိက္ကန္တဂေါစရာ။

ပိဝန္တိ ဒေဟကန္တီ ယေ၊ နေတ္တဉ္ဇလိပုဋေန တေ၊

နာ’လံ ဟန္တုံ ဇိနေ’သံ တွံ၊ တဏှံ တဏှာဟရောပိ ကိံ?

ဥပမာနော’ပမေယျာနံ၊ သဓမ္မတ္တံ သိယော’ပမာ၊

သဒ္ဒ၊ တ္ထဂမ္မာ၊ ဝါကျတ္ထ၊ ဝိသယာ၊တိ စ သာ ဘိဓာ။

သမာသ၊ ပစ္စယေ၊ ဝါ’ဒီ၊ သဒ္ဒါ တေသံ ဝသာ တိဓာ၊

သဒ္ဒဂမ္မာ သမာသေန၊ မုနိန္ဒော စန္ဒိမာ’နနော။

အာယာဒီ ပစ္စယာ တေဟိ၊ ဝဒနံ ပင်္ကဇာယတေ၊

မုနိန္ဒနယန ဒွန္ဒံ၊ နီလုပ္ပလဒလီယတိ။

ဣဝါဒီ ဣဝ၊ ဝါ၊ တုလျ၊ သမာန၊ နိဘ၊ သန္နိဘာ၊

ယထာ၊ သင်္ကာသ၊ တုလိတ၊ ပ္ပကာသ၊ ပတိရူပကာ။

သရီ၊ သရိက္ခ၊ သံဝါဒီ၊ ဝိရောဓိ၊ သဒိသာ၊ ဝိယ၊

ပဋိပက္ခ၊ ပစ္စနီကာ၊ သပက္ခော၊ ပမိတော၊ ပမာ။

ပဋိဗိမ္ဗ၊ ပဋိစ္ဆန္န၊ သရူပ၊ သမ၊ သမိတာ၊

သဝဏ္ဏာ၊ ဘာ၊ ပဋိနိဓိ၊ သဓမ္မာ၊ ဒိ သလက္ခဏာ။

ဇယတျ ¶ ၊ က္ကောသတိ၊ ဟသတိ၊ ပတိဂဇ္ဇတိ၊ ဒူဘတိ၊

ဥသူယတျ၊ ဝဇာနာတိ၊ နိန္ဒတိ၊ ဿတိ၊ ရုန္ဓတိ။

တဿ စောရေတိ သောဘဂ္ဂံ၊ တဿ ကန္တိံ ဝိလုမ္ပတိ၊

တေန သဒ္ဓိံ ဝိဝဒတိ၊ တုလျံ တေနာ’ဓိရောဟတိ။

ကစ္ဆံ ဝိဂါဟတေ၊ တဿ၊ တ မနွေတျ၊ နုဗန္ဓတိ၊

တံသီလံ၊ တံနိသေဓေတိ၊ တဿ စာ’နုကရောတိ၊ မေ။

ဥပမာနော’ပမေယျာနံ၊ သဓမ္မတ္တံ ဝိဘာဝိဘိ၊

ဣမေဟိ ဥပမာဘေဒါ၊ ကေစိ နိယျန္တိ သမ္ပတိ။

ဝိကာသိပဒုမံ’ဝါ’တိ၊ သုန္ဒရံ သုဂတာ’နနံ၊

ဣတိ ဓမ္မောပမာ နာမ၊ တုလျဓမ္မနိဒဿနာ။

ဓမ္မဟီနာ ‘‘မုခ’မ္ဘောဇ၊ သဒိသံ မုနိနော’’ဣတိ၊

ဝိပရီတော’ပမာ ‘‘တုလျ၊ မာနနေန’မ္ဗုဇံ တဝ’’။

တဝါ’နန’မိဝ’မ္ဘောဇံ၊ အမ္ဘောဇ’မိဝ တေ မုခံ၊

အညမညောပမာ သာ’ယံ၊ အညမညောပမာနတော။

‘‘ယဒိ ကိဉ္စိ ဘဝေ’မ္ဘောဇံ၊ လောစန’ဗ္ဘမုဝိဗ္ဘမံ၊

ဓာရေတုံ မုခသောဘံ တံ၊ တဝေ’’တိ အဗ္ဘုတောပမာ။

‘‘သုဂန္ဓိ သောဘာ သမ္ဗန္ဓီ၊ သိသိရံ’သု ဝိရောဓိ စ၊

မုခံ တဝ’မ္ဗုဇံဝေ’တိ’’၊ သာ သိလေသောပမာ မတာ။

သရူပသဒ္ဒဝါစ္စတ္တာ၊ သာ သန္တာနောပမာ ယထာ၊

ဗာလာ’ဝု’ယျာနမာလာ’ယံ၊ သာ’လကာ’နနသောဘိနီ။

ခယီ စန္ဒော၊ ဗဟုရဇံ၊ ပဒုမံ၊ တေဟိ တေ မုခံ၊

သမာနမ္ပိ သမုက္ကံသိ၊ တျ’ယံ နိန္ဒောပမာ မတာ။

အသမတ္ထော မုခေနိ’န္ဒု၊ ဇိန! တေ ပဋိဂဇ္ဇိတုံ၊

ဇဠော ကလင်္ကီ’တိ အယံ၊ ပဋိသေဓောပမာ သိယာ။

‘‘ကစ္ဆံ စန္ဒာရဝိန္ဒာနံ၊ အတိက္ကမ္မ မုခံ တဝ၊

အတ္တနာ’ဝ သမံ ဇာတ’’၊ မိတျ’သာဓာရဏောပမာ။

‘‘သဗ္ဗ’မ္ဘောဇ’ပ္ပဘာသာရော၊ ရာသိဘူတော’ဝ ကတ္ထစိ၊

တဝါ’နနံ ဝိဘာတီ’’တိ၊ ဟောတာ’ဘူတောပမာ အယံ။

ပတီယတေ’တ္ထဂမ္မာ တု၊ သဒ္ဒသာမတ္ထိယာ ကွစိ၊

သမာသ၊ ပ္ပစ္စယေ၊ ဝါဒိ၊ သဒ္ဒယောဂံ ဝိနာ အပိ။

ဘိင်္ဂါနေ’မာနိ ¶ စက္ခူနိ၊ နာ’မ္ဗုဇံ မုခ’မေဝိ’ဒံ၊

သုဗျတ္တသဒိသတ္တေန၊ သာ သရူပေါပမာ မတာ။

‘‘မယေ’ဝ မုခသောဘာ’ဿေ၊ တျလ’မိန္ဒု! ဝိကတ္ထနာ၊

ယတော’မ္ဗုဇေပိ သာ’တ္ထီတိ’’၊ ပရိကပ္ပောပမာ အယံ။

‘‘ကိံ ဝါ’မ္ဗုဇ’န္တောဘန္တာလိ၊ ကိံ လောလနယနံ မုခံ၊

မမ ဒေါလာယတေ စိတ္တ’’၊ မိစ္စ’ယံ သံသယောပမာ။

ကိဉ္စိ ဝတ္ထုံ ပဒဿေတွာ၊ သဓမ္မဿာ’ဘိဓာနတော၊

သာမျပ္ပတီတိသဗ္ဘာဝါ၊ ပတိဝတ္ထုပမာ ယထာ။

ဇနေသု ဇာယမာနေသု၊ နေ’ကောပိ ဇိနသာဒိသော၊

ဒုတိယော နနု နတ္ထေ’ဝ၊ ပါရိဇာတဿ ပါဒပေါ။

ဝါကျတ္ထေနေ’ဝ ဝါကျတ္ထော၊ ယဒိ ကောစူ’ပမီယတေ၊

ဣဝယုတ္တာ၊ ဝိယုတ္တတ္တာ၊ သာ ဝါကျတ္ထောပမာ ဒွိဓာ။

ဇိနော သံက္လေသတတ္တာနံ၊ အာဝိဘူတော ဇနာန’ယံ၊

ဃမ္မသန္တာပတတ္တာနံ၊ ဃမ္မကာလေ’မ္ဗုဒေါ ဝိယ။

မုနိန္ဒာနန မာဘာတိ၊ ဝိလာသေကမနောဟရံ၊

ဥဒ္ဓံ သမုဂ္ဂတဿာ’ပိ၊ ကိံ တေ စန္ဒ ဝိဇမ္ဘနာ။

သမုဗ္ဗေဇေတိ ဓီမန္တံ၊ ဘိန္နလိင်္ဂါဒိကံ တု ယံ၊

ဥပမာဒူသနာယာ’လ၊ မေတံ ကတ္ထစိ တံ ယထာ။

ဟံသီ’ဝါ’ယံ သသီ ဘိန္န၊ လိင်္ဂါ၊ ကာသံ သရာနိ’ဝ၊

ဝိဇာတိ ဝစနာ၊ ဟီနာ၊ သာ’ဝ ဘတ္တော ဘဋော’ဓိပေ။

‘‘ခဇ္ဇောတော ဘာဏုမာလီ’ဝ၊ ဝိဘာတိ’’တျဓိကောပမာ၊

အဖုဋ္ဌတ္ထာ ‘‘ဗလမ္ဗောဓိ၊ သာဂရော ဝိယ သံခုဘိ။’’

‘‘စန္ဒေ ကလင်္ကော ဘိင်္ဂေါ’ဝေ’၊ တျု’ပမာပေက္ခိနီ အယံ၊

ခဏ္ဍိတာ ကေရဝါ’ကာရော၊ သကလင်္ကော နိသာကရော။

ဣစ္စေဝမာဒိရူပေသု၊ ဘဝန္တိ ဝိဂတာ’ဒရာ၊

ကရောန္တိ စာ’ဒရံ ဓီရာ၊ ပယောဂေ ကွစိ ဒေ’ဝ တု။

ဣတ္ထီယံ’ဝါ’ဇနော ယာတိ၊ ဝဒတျေ’သာ ပုမာ ဝိယ၊

ပိယော ပါဏာ ဣဝါ’ယံ မေ၊ ဝိဇ္ဇာ ဓန’မိဝ’စ္စိတာ။

ဘဝံ ¶ ဝိယ မဟီပါလ၊ ဒေဝရာဇာ ဝိရောစတေ၊

အလ’မံသုမတော ကစ္ဆံ၊ တေဇသာ ရောဟိတုံ အယံ။

ဥပမာနော’ပမေယျာနံ၊ အဘေဒဿ နိရူပနာ၊

ဥပမာ’ဝ တိရောဘူတ၊ ဘေဒါ ရူပက မုစ္စတေ။

အသေသ ဝတ္ထု ဝိသယံ၊ ဧကဒေသ ဝိဝုတ္တိ[ဝိဝတ္တိ (ဋီကာ)]၊ စ၊

တံ ဒွိဓာ ပုန ပစ္စေကံ၊ သမာသာဒိဝသာ တိဓာ။

အင်္ဂုလိဒလ သံသောဘိံ၊ နခဒီဓိတိ ကေသရံ၊

သိရသာ န ပိလန္ဓန္တိ၊ ကေ မုနိန္ဒ ပဒ’မ္ဗုဇံ။

ရတနာနိ ဂုဏာ ဘူရီ၊ ကရုဏာ သီတလံ ဇလံ၊

ဂမ္ဘီရတ္တ မဂါဓတ္တံ၊ ပစ္စက္ခော’ယံ ဇိနော’မ္ဗုဓိ။

စန္ဒိကာ မန္ဒဟာသာ တေ၊ မုနိန္ဒ! ဝဒနိ’န္ဒုနော၊

ပဗောဓယတျ’ယံ သာဓု၊ မနော ကုမုဒ ကာနနံ။

အသေသဝတ္ထုဝိသယေ၊ ပဘေဒေါ ရူပကေ အယံ၊

ဧကဒေသဝိဝုတ္တိမှိ၊ ဘေဒေါ ဒါနိ ပဝုစ္စတိ။

ဝိလာသ ဟာသ ကုသုမံ၊ ရုစိရာ’ဓရ ပလ္လဝံ၊

သုခံ ကေ ဝါ န ဝိန္ဒန္တိ၊ ပဿန္တာ မုနိနော မုခံ။

ပါဒဒွန္ဒံ မုနိန္ဒဿ၊ ဒဒါတု ဝိဇယံ တဝ၊

နခရံသီ ပရံ ကန္တာ၊ ယဿ ပါပဇယဒ္ဓဇာ။

သုနိမ္မလကပေါလဿ၊ မုနိန္ဒ ဝဒနိ’န္ဒုနော၊

သာဓု’ပ္ပဗုဒ္ဓ ဟဒယံ၊ ဇာတံ ကေရဝ ကာနနံ။

ရူပကာနိ ¶ ဗဟူနျေ’ဝ [ဋီကာယံ ဥဒ္ဓဋံ ယုတ္တရူပကံ သိတပုပ္ဖုဇလံ လောလ၊ နေတ္တဘိင်္ဂ တဝါ’နနံ၊ ကဿ နာမ မနော ဓီရ၊ နာကဍ္ဎတိ မနောဟရံ၊]၊ ယုတ္တာ၊ ယုတ္တာဒိဘေဒတော၊

ဝိသုံ န တာနိ ဝုတ္တာနိ၊ ဧတ္ထေ’ဝ’န္တောဂဓာနိ’တိ။

‘‘စန္ဒိမာ’ကာသပဒုမ’’၊ မိစ္စေတံ ခဏ္ဍရူပကံ၊

ဒုဋ္ဌ၊ ‘‘မမ္ဗောရုဟဝနံ၊ နေတ္တာနိ’စ္စာ’’ဒိ သုန္ဒရံ။

ပရိယန္တော ဝိကပ္ပာနံ၊ ရူပကဿော’ပမာယ စ၊

နတ္ထိ ယံ တေန ဝိညေယျံ၊ အဝုတ္တ မနုမာနတော။

ပုနပ္ပုန မုစ္စာရဏံ [ပုနပ္ပုနုစ္စာရဏံ ယံ (သီ။ က။)]၊ ယမတ္ထဿ၊ ပဒဿ စ၊

ဥဘယေသဉ္စ ဝိညေယျာ၊ သာ’ယ’မာဝုတ္တိ နာမတော။

မနော ဟရတိ သဗ္ဗေသံ၊ အာဒဒါတိ ဒိသာ ဒသ၊

ဂဏှာတိ နိမ္မလတ္တဉ္စ၊ ယသောရာသိ ဇိနဿ’ယံ။

ဝိဘာသေန္တိ ဒိသာ သဗ္ဗာ၊ မုနိနော ဒေဟကန္တိယော၊

ဝိဘာ သေန္တိ စ သဗ္ဗာပိ၊ စန္ဒာဒီနံ ဟတာ ဝိယ။

ဇိတွာ ဝိဟရတိ က္လေသ၊ ရိပုံ လောကေ ဇိနော အယံ၊

ဝိဟရတျ’ရိဝဂ္ဂေါ’ယံ၊ ရာသိဘူတော’ဝ ဒုဇ္ဇနေ။

ဧကတ္ထ ဝတ္တမာနမ္ပိ၊ သဗ္ဗဝါကျော’ပကာရကံ၊

ဒီပကံ နာမ တံ စာဒိ၊ မဇ္ဈ၊ န္တဝိသယံ တိဓာ။

အကာသိ ဗုဒ္ဓါ ဝေနေယျ၊ ဗန္ဓူန မမိတော’ဒယံ၊

သဗ္ဗပါပေဟိ စ သမံ၊ နေကတိတ္ထိယမဒ္ဒနံ။

ဒဿနံ မုနိနော သာဓု၊ ဇနာနံ ဇာယတေ’မတံ၊

တဒ’ညေသံ တု ဇန္တူနံ၊ ဝိသံ နိစ္စော’ပတာပနံ။

အစ္စန္တ ¶ ကန္တ လာဝဏျ၊ စန္ဒာ’တပ မနောဟရော၊

ဇိနာ’နနိ’န္ဒု ဣန္ဒု စ၊ ကဿ နာ’နန္ဒကော ဘဝေ။

ဟောတာ’ဝိပ္ပဋိသာရာယ၊ သီလံ၊ ပါမောဇ္ဇဟေတု သော၊

တံ ပီတိဟေတု၊ သာ စာ’ယံ၊ ပဿဒ္ဓျာ’ဒိ ပသိဒ္ဓိယာ။

ဣစ္စာ’ဒိဒီပကတ္တေပိ၊ ပုဗ္ဗံ ပုဗ္ဗ မပေက္ခိနီ၊

ဝါကျမာလာ ပဝတ္တာတိ၊ တံ မာလာဒီပကံ မတံ။

အနေနေ’ဝ’ပ္ပကာရေန၊ သေသာန မပိ ဒီပကေ၊

ဝိကပ္ပာနံ ဝိဓာတဗ္ဗာ၊ နုဂတိ သုဒ္ဓဗုဒ္ဓိဘိ။

ဝိသေသ ဝစနိ’စ္ဆာယံ၊ နိသေဓဝစနံ တု ယံ၊

အက္ခေပေါ နာမ သောယဉ္စ၊ တိဓာ ကာလပ္ပဘေဒတော။

ဧကာကီ’ နေကသေနံ တံ၊ မာရံ သ ဝိဇယီ ဇိနော၊

ကထံ တ မထဝါ တဿ၊ ပါရမီဗလ မီဒိသံ။

ကိံ စိတ္တေ’ဇာသမုဂ္ဃာတံ၊ အပတ္တော’သ္မီတိ ခိဇ္ဇသေ၊

ပဏာမော နနု သော ယေ’ဝ၊ သကိမ္ပိ သုဂတေ ဂတော။

သစ္စံ န တေ ဂမိဿန္တိ၊ သိဝံ သုဇနဂေါစရံ၊

မိစ္ဆာဒိဋ္ဌိ ပရိက္ကန္တ [ပရိကန္တ (က။)]၊ မာနသာ ယေ သုဒုဇ္ဇနာ။

ဉေယျော အတ္ထန္တရနျာသော၊ ယော၊ ညဝါကျတ္ထသာဓနော၊

သဗ္ဗဗျာပီ ဝိသေသဋ္ဌော၊ ဟိဝိသိဋ္ဌ’ဿ ဘေဒတော။

တေပိ လောကဟိတာ သတ္တာ၊ သူရိယော စန္ဒိမာ အပိ၊

အတ္ထံ ပဿ ဂမိဿန္တိ၊ နိယမော ကေန လင်္ဃျတေ။

သတ္ထာ ဒေဝမနုဿာနံ၊ ဝသီ သောပိ မုနိဿရော၊

ဂတော’ဝ နိဗ္ဗုတိံ သဗ္ဗေ၊ သင်္ခါရာ န ဟိ သဿတာ။

ဇိနော ¶ သံသာရကန္တာရာ၊ ဇနံ ပါပေတိ [ပါပေသိ (က။)] နိဗ္ဗုတိံ၊

နနု ယုတ္တာ ဂတိ သာ’ယံ၊ ဝေသာရဇ္ဇ သမင်္ဂိနံ။

သုရတ္တံ တေ’ဓရဖုဋံ၊ ဇိန! ရဉ္ဇေတိ မာနသံ၊

သယံ ရာဂပရီတာ ဟိ၊ ပရေ ရဉ္ဇေန္တိ သင်္ဂတေ။

ဝါစ္စေ ဂမ္မေ ထ ဝတ္ထူနံ၊ သဒိသတ္တေ ပဘေဒနံ၊

ဗျတိရေကော’ယ’မပျေ’ကော၊ ဘယဘေဒါ စတုဗ္ဗိဓော။

ဂမ္ဘီရတ္တ မဟတ္တာဒိ၊ ဂုဏာ ဇလဓိနာ ဇိန!၊

တုလျော တွ မသိ ဘေဒေါ တု၊ သရီရေနေ’ဒိသေန တေ။

မဟာသတ္တာ’တိဂမ္ဘီရာ၊ သာဂရော သုဂတောပိ စ၊

သာဂရော’ဉ္ဇနသင်္ကာသော၊ ဇိနော စာမီကရဇ္ဇုတိ။

န သန္တာပါပဟံ နေဝိ၊ စ္ဆိတဒံ မိဂလောစနံ၊

မုနိန္ဒ! နယနဒွန္ဒံ၊ တဝ တဂ္ဂုဏ ဘူသိတံ။

မုနိန္ဒာနန မမ္ဘောဇ၊ မေသံ နာနတ္တ မီဒိသံ၊

သုဝုတ္တာ’မတသန္ဒာယီ၊ ဝဒနံ နေ’ဒိသ’မ္ဗုဇံ။

ပသိဒ္ဓံ ကာရဏံ ယတ္ထ၊ နိဝတ္တေတွာ’ ဉာကာရဏံ၊

သာဘာဝိကတ္တ မထဝါ၊ ဝိဘာဗျံ သာ ဝိဘာဝနာ။

အနဉ္ဇိတာ’သိတံ နေတ္တံ၊ အဓရော ရဉ္ဇိတာ’ရုဏော၊

သမာနတာ ဘမု စာ’ယံ၊ ဇိနာ’နာဝဉ္စိတာ တဝ။

န ဟောတိ ခလု ဒုဇ္ဇနျ၊ မပိ ဒုဇ္ဇနသင်္ဂမေ၊

သဘာဝနိမ္မလတရေ၊ သာဓုဇန္တူန စေတသိ။

ဇနကော ¶ ၊ ဉာပကော စေတိ၊ ဒုဝိဓာ ဟေတဝေါ သိယုံ၊

ပဋိသင်္ခရဏံ တေသံ၊ အလင်္ကာရတာယော’ဒိတံ။

ဘာဝါ’ဘာဝ ကိစ္စဝသာ၊ စိတ္တဟေတုဝသာပိ စ၊

ဘေဒါ’နန္တာ ဣဒံ တေသံ၊ မုခမတ္တ နိဒဿနံ။

ပရမတ္ထပကာသေ’က၊ ရသာ သဗ္ဗမနောဟရာ၊

မုနိနော ဒေသနာ’ယံ မေ၊ ကာမံ တောသေတိ မာနသံ။

ဓီရေဟိ သဟ သံဝါသာ၊ သဒ္ဓမ္မဿာ’ဘိယောဂတော၊

နိဂ္ဂဟေနိ’န္ဒြိယာနဉ္စ၊ ဒုက္ခဿု’ပသမော သိယာ။

မုနိန္ဒ’စန္ဒ သံဝါဒိ၊ ကန္တဘာဝေါ’ပသောဘိနာ၊

မုခေနေ’ဝ သုဗောဓံ တေ၊ မနံ ပါပါ’ဘိနိဿဋံ။

သာဓုဟတ္ထာ’ရဝိန္ဒာနိ၊ သင်္ကောစယတိ တေ ကထံ၊

မုနိန္ဒ! စရဏဒွန္ဒ၊ ရာဂဗာလာ’တပေါ ဖုသံ?

သင်္ကောစယန္တိ ဇန္တူနံ၊ ပါဏိပင်္ကေရုဟာနိ’ဟ၊

မုနိန္ဒ! စရဏဒွန္ဒ၊ နခ စန္ဒာန’ မံသဝေါ။

ဥဒ္ဒိဋ္ဌာနံ ပဒတ္ထာနံ၊ အနုဒ္ဒေသော ယထာက္ကမံ၊

‘သင်္ချာန’မိတိ နိဒ္ဒိဋ္ဌံ၊ ယထာသင်္ချံ ကမောပိ စ။

အာလာပ ဟာသ လီဠာဟိ၊ မုနိန္ဒ! ဝိဇယာ တဝ၊

ကောကိလာ ကုမုဒါနိ စော၊ ပသေဝန္တေ ဝနံ ဇလံ။

သိယာ ပိယတရံ နာမ၊ အတ္ထရူပဿ ကဿစိ၊

ပိယဿာ’တိသယေနေ’တံ၊ ယံ ဟောတိ ပဋိပါဒနံ။

ပီတိယာ မေ သမုပ္ပန္နာ၊ သန္တ! သန္ဒဿနာ တဝ၊

ကာလေနာ’ယံ ဘဝေ ပီတိ၊ တဝေ’ဝ ပုန ဒဿနာ။

ဝဏ္ဏိတေနော’ပမာနေန၊ ဝုတျာ’ဓိပ္ပေတ ဝတ္ထုနော၊

သမာသဝုတ္တိ နာမာ’ယံ၊ အတ္ထ သင်္ခေပ ရူပတော။

သာ’ယံ ¶ ဝိသေသျမတ္တေန၊ ဘိန္နာ’ဘိန္နဝိသေသနာ၊

အတ္ထေ’ဝ အပရာ ပျ’တ္ထိ၊ ဘိန္နာ’ဘိန္နဝိသေသနာ။

ဝိသုဒ္ဓါ’မတသန္ဒာယီ၊ ပသတ္ထရတနာ’လယော၊

ဂမ္ဘီရော စာ’ယ’ မမ္ဗောဓိ၊ ပုညေနာ’ပါဒိတော မယာ။

ဣစ္ဆိတ’တ္ထပဒေါ သာရော၊ ဖလပုပ္ဖော’ပသောဘိတော၊

သစ္ဆာယော’ယ’မပုဗ္ဗောဝ ကပ္ပရုက္ခော သမုဋ္ဌိတော။

သာဂရတ္တေန သဒ္ဓမ္မော၊ ရုက္ခတ္တေနော’ဒိတော ဇိနော၊

သဗ္ဗေ သာဓာရဏာ ဓမ္မာ၊ ပုဗ္ဗတြာ’ညတြ တု’တ္တယံ။

ဝတ္ထုနော’ညပ္ပကာရေန၊ ဌိတာ ဝုတ္တိ တဒ’ညထာ၊

ပရိကပ္ပီယတေ ယတ္ထ၊ သာ ဟောတိ ပရိကပ္ပနာ။

ဥပမာ’ဗ္ဘန္တရတ္တေန၊ ကိရိယာဒိဝသေန စ၊

ကမေနော’ဒါဟရိဿာမိ၊ ဝိဝိဓာ ပရိကပ္ပနာ။

ဣစ္ဆာဘင်္ဂါ’တုရာ’သီနာ၊ တာ’တိနိစ္စလ မစ္ဆရာ၊

ဝသံ နေန္တိ’ဝ ဓီရံ တံ၊ တဒါ ယောဂါ’ဘိယောဂတော။

ဂဇံ မာရော သမာရုဠှော၊ ယုဒ္ဓါယ’စ္စန္တ’မုန္နတံ၊

မဂ္ဂ မနွေသတီ နူန၊ ဇိနဘီတော ပလာယိတုံ။

မုနိန္ဒ! ပါဒဒွန္ဒေ တေ၊ စာရု ရာဇိဝ သုန္ဒရေ၊

မညေ ပါပါ’ဘိ’သမ္မဒ္ဒ၊ ဇာတသောဏေန သောဏိမာ။

မညေ၊ သင်္ကေ၊ ဓုဝံ၊ နူန၊ မိဝ၊ မိစ္စေဝ မာဒိဟိ၊

သာ’ယံ ဗျဉ္ဇီယတေ ကွာ’ပိ၊ ကွာ’ပိ ဝါကျေန ဂမျတေ။

ဒယာ သဉ္ဇာတ သရသာ၊ ဒေဟာ နိက္ခန္တကန္တိယော၊

ပီဏေန္တာ ဇိန! တေ သာဓု၊ ဇနံ သရသတံ နယုံ။

အာရဗ္ဘန္တဿ ¶ ယံကိဉ္စိ၊ ကတ္တုံ ပုညဝသာ ပုန၊

သာဓန’န္တရလာဘော ယော၊ တံ ဝဒန္တိ သမာဟိတံ။

မာရာ’ရိဘင်္ဂါ’ဘိမုခ၊ မာနသော တဿ သတ္ထုနော၊

မဟာမဟီ မဟာရဝံ၊ ရဝီ’ယ’မုပကာရိကာ။

အဝတွာ’ဘိမတံ တဿ၊ သိဒ္ဓိယာ ဒဿန’ညထာ၊

ဝဒန္တိ တံ ‘ပရိယာယ၊ ဝုတ္တီ’တိ သုစိဗုဒ္ဓယော။

ဝိဝဋ’င်္ဂဏနိက္ခိတ္တံ၊ ဓန’မာရက္ခ ဝဇ္ဇိတံ၊

ဓနကာမ! ယထာကာမံ၊ တုဝံ ဂစ္ဆ ယဒိစ္ဆသိ။

ထုတိံ ကရောတိ နိန္ဒန္တော၊ ဝိယ တံ ဗျာဇဝဏ္ဏနံ၊

ဒေါသာ’ဘာသာ ဂုဏာ ဧဝ၊ ယန္တိ သန္နိဓိ မတြ ဟိ။

သဉ္စာလေတု မလံ တွံ’သိ၊ ဘုသံ ကုဝလယာ’ခိလံ၊

ဝိသေသံ တာဝတာ နာထ!၊ ဂုဏာနံ တေ ဝဒါမ ကိံ?

ဝိသေသိ’စ္ဆာယံ ဒဗ္ဗဿ၊ ကြိယာ၊ ဇာတိ၊ ဂုဏဿ စ၊

ဝေကလ္လဒဿနံ ယတြ၊ ဝိသေသော နာမ ယံ ဘဝေ။

န ရထာ၊ န စ မာတင်္ဂါ၊ န ဟယာ၊ န ပဒါတယော၊

ဇိတော မာရာရိ မုနိနာ၊ သမ္ဘာရာဝဇ္ဇနေန ဟိ။

န ဗဒ္ဓါ ဘူကုဋိ၊ နေဝ၊ ဖုရိတော ဒသနစ္ဆဒေါ၊

မာရာရိဘင်္ဂံ စာ’ကာသိ၊ မုနိ ဝီရော ဝရော သယံ။

န ဒိသာသု ဗျာတ္တာ [တတာ (က။)] ရံသိ၊

တထာပျ’န္ဓတမဟရံ၊ ပရံ သာဓုသုဘာသိတံ။

န ခရံ၊ န ဟိ ဝါ ထဒ္ဓံ၊ မုနိန္ဒ! ဝစနံ တဝ၊

တထာပိ ဂါဠှံ ခဏတိ၊ နိမ္မူလံ ဇနတာမဒံ။

ဒဿီယတေ’တိရိတ္တံ ¶ တု၊ သူရဝီရတ္တနံ ယဟိံ၊

ဝဒန္တိ ဝိညူဝစနံ၊ ရုဠှာဟင်္ကာရ မီဒိသံ။

ဒမေ နန္ဒောပနန္ဒဿ၊ ကိံ မေ ဗျာပါရဒဿနာ?

ပုတ္တာ မေ ပါဒသမ္ဘတ္တာ၊ သဇ္ဇာ သန္တေ’ဝ တာဒိသေ။

သိလေသော ဝစနာ’နေကာ၊ ဘိဓေယျေ’ကပဒါယုတံ၊

အဘိန္နပဒဝါကျာဒိ၊ ဝသာ တေဓာ’ယ မီရိတော။

အန္ဓတမဟရော ဟာရီ၊ သမာရုဠှော မဟောဒယံ၊

ရာဇတေ ရံသိမာလီ’ယံ၊ ဘဂဝါ ဗောဓယံ ဇနေ။

သာရဒါ’မလကာ’ဘာသော၊ သမာနီတ ပရိက္ခယော၊

ကုမုဒါ’ကရသမ္ဗောဓော၊ ပီဏေတိ ဇနတံ သုဓီ။

သမာဟိတ’တ္တဝိနယော၊ အဟီန မဒ မဒ္ဒနော၊

သုဂတော ဝိသဒံ ပါတု၊ ပါဏိနံ သော ဝိနာယကော။

ဝိရုဒ္ဓါ၊ ဝိရုဒ္ဓါ၊ ဘိန္န၊ ကမ္မာ၊ နိယမဝါ၊ ပရော၊

နိယမ’က္ခေပဝစနော၊ အဝိရောဓိ၊ ဝိရောဓျ’ပိ။

ဩစိတျ သမ္ပောသကာဒိ၊ သိလေသော၊ ပဒဇာ’ဒိ [ပဒဇာတိ (က။)] ပိ၊

ဧသံ နိဒဿနေသွေ’ဝ၊ ရူပ မာဝိ ဘဝိဿတိ။

သဝသေ ဝတ္တယံ လောကံ၊ အခိလံ ကလ္လဝိဂ္ဂဟော၊

ပရာဘဝတိ မာရာရိ၊ ဓမ္မရာဇာ ဝိဇမ္ဘတေ။

သဘာဝမဓုရံ ပုည ဝိသေသော’ဒယ သမ္ဘဝံ၊

သုဏန္တိ ဝါစံ မုနိနော၊ ဇနာ ပဿန္တိ စာ’မတံ။

အန္ဓကာရာ’ပဟာရာယ ¶ ၊ သဘာဝ မဓုရာယ စ၊

မနော ပီဏေတိ ဇန္တူနံ၊ ဇိနော ဝါစာယ ဘာယ စ။

ကေသ’က္ခီနံ’ဝ ကဏှတ္တံ၊ ဘမူနံယေဝ ဝင်္ကတာ၊

ပါဏိပါဒါ’ဓရာနံ’ဝ၊ မုနိန္ဒဿာ’ဘိရတ္တတာ။

ပါဏိပါဒါ’ဓရေသွေ’ဝ၊ သာရာဂေါ တဝ ဒိဿတိ၊

ဒိဿတေ သော’ယ မထဝါ၊ နာထ! သာဓုဂုဏေသွ’ပိ။

သလက္ခဏော’တိသုဘဂေါ၊ တေဇဿီ နိယတော’ဒယော၊

သဒယော ပျ’ဒယော ပါပေ၊ စိတ္တာ’ယံ မုနိနော ဂတိ။

သံသာရဒုက္ခော’ပဟတာ၊ ဝနတာ ဇနတာ တွယိ၊

သုခ မိစ္ဆိတ မစ္စန္တံ၊ အမတန္ဒဒ! ဝိန္ဒတိ။

ဂုဏယုတ္တေဟိ ဝတ္ထူဟိ၊ သမံ ကတွာန ကဿစိ၊

သံကိတ္တနံ ဘဝတိ ယံ၊ သာ မတာ တုလျယောဂိတာ။

သမ္ပတ္တသမ္မဒေါ လောကော၊ သမ္ပတ္တာ’လောကသမ္ပဒေါ၊

ဥဘောဟိ ရံသိမာလီ စ၊ ဘဂဝါ စ တမောနုဒေါ။

အတ္ထန္တရံ သာဓယတာ၊ ကိဉ္စိ တံ သဒိသံ ဖလံ၊

ဒဿီယတေ အသန္တံ ဝါ၊ သန္တံ ဝါ တံ နိဒဿနံ။

ဥဒယာ ¶ သမဏိန္ဒဿ၊ ယန္တိ ပါပါ ပရာဘဝံ၊

ဓမ္မရာဇဝိရုဒ္ဓါနံ၊ သူစယန္တာ ဒုရ’န္တတံ။

သိရော နိက္ခိတ္တ စရဏော၊ စ္ဆရိယာန’မ္ဗုဇာန’ယံ၊

ပရမ’ဗ္ဘုတတံ လောကေ၊ ဝိညာပေတ’တ္တနော ဇိနော။

ဝိဘူတိယာ မဟန္တတ္တံ၊ အဓိပ္ပာယဿ ဝါ သိယာ၊

ပရမုက္ကံသတံ ယာတံ၊ တံ မဟန္တတ္တ မီရိတံ။

ကိရီဋ ရတန’စ္ဆာယာ၊ နုဝိဒ္ဓါ’တပ ဝါရဏော၊

ပုရာ ပရံ သိရိံ ဝိန္ဒိ၊ ဗောဓိသတ္တော’ ဘိနိက္ခမာ။

သတ္တော သမ္ဗောဓိယံ ဗောဓိ၊ သတ္တော သတ္တဟိတာယ သော၊

ဟိတွာ သ္နေဟရသာဗန္ဓ၊ မပိ ရာဟုလမာတရံ။

ဂေါပေတွာ ဝဏ္ဏနီယံ ယံ၊ ကိဉ္စိ ဒဿီယတေ ပရံ၊

အသမံ ဝါ သမံ တဿ၊ ယဒိ သာ ဝဉ္စနာ မတာ။

ပုရတော န သဟဿေသု၊ န ပဉ္စေသု စ တာဒိနော၊

မာရော ပရေသု တဿေ’သံ၊ သဟဿံ ဒသဝဍ္ဎိတံ။

ဝိဝါဒ မနုယုဉ္ဇန္တော၊ မုနိန္ဒဝဒနိ’န္ဒုနာ၊

သမ္ပုဏ္ဏော စန္ဒိမာ နာ’ယံ၊ ဆတ္တ မေတံ မနောဘုနော။

ပရာနုဝတ္တနာဒီဟိ၊ နိဗ္ဗိန္ဒေနိ’ဟ ယာ ကတာ၊

ထုတိ ရ’ပ္ပကတေ သာ’ယံ၊ သိယာ အပ္ပကတတ္ထုတိ။

သုခံ ဇီဝန္တိ ဟရိဏာ၊ ဝနေသွ’ပရသေဝိနော၊

အနာယာသော ပလာဘေဟိ၊ ဇလဒဗ္ဘင်္ကုရာဒိဘိ။

ဥတ္တရံ ဥတ္တရံ ယတ္ထ၊ ပုဗ္ဗပုဗ္ဗဝိသေသနံ၊

သိယာ ဧကာဝလိ သာ’ယံ၊ ဒွိဓာ ဝိဓိ၊ နိသေဓတော။

ပါဒါ ¶ နခါလိ ရုစိရာ၊ နခါလိ ရံသိ ဘာသုရာ၊

ရံသီတမောပဟာနေ’က၊ ရသာ သောဘန္တိ သတ္ထုနော။

နာ’လယော ယော သ ဇန္တူနံ၊ နာ’နန္တ ဗျသနာ ဝဟော။

ယဟိံ ဘူသိယ ဘူသတ္တံ၊ အညမညံ တု ဝတ္ထုနံ၊

ဝိနာ’ဝ သဒိသတ္တံ တံ၊ အညမညဝိဘူသနံ။

ဗျာမံ’သု မဏ္ဍလံ တေန၊ မုနိနာ လောကဗန္ဓုနာ၊

မဟန္တိံ ဝိန္ဒတီ ကန္တိံ၊ သောပိ တေနေဝ တာဒိသိံ။

ကထနံ သဟဘာဝဿ၊ ကြိယာယ စ၊ ဂုဏဿ စ၊

‘သဟဝုတ္တီ’တိ ဝိညေယျံ၊ တ’ဒုဒါဟရဏံ ယထာ။

ဇလန္တိ စန္ဒရံသီဟိ၊ သမံ သတ္ထု နခံ သဝေါ၊

ဝိဇမ္ဘတိ စ စန္ဒေန၊ သမံ တမ္မုခစန္ဒိမာ။

ဇိနော’ဒယေန မလီနံ၊ သဟ ဒုဇ္ဇန စေတသာ၊

ပါပံ ဒိသာ သုဝိမလာ၊ သဟ သဇ္ဇန စေတသာ။

ဝိရောဓီနံ ပဒ’တ္ထာနံ၊ ယတ္ထ သံသဂ္ဂဒဿနံ၊

သမုက္ကံသာ’ဘိဓာနတ္ထံ၊ မတာ သာ’ယံ ဝိရောဓိတာ။

ဂုဏာ သဘာဝ မဓုရာ၊ အပိ လောကေ’က ဗန္ဓုနော၊

သေဝိတာ ပါပ သေဝီနံ၊ သမ္ပဒူသေန္တိ မာနသံ။

ယဿ ကဿ စိ ဒါနေန၊ ယဿ ကဿ စိ ဝတ္ထုနော၊

ဝိသိဋ္ဌဿ ယ မာဒါနံ၊ ‘ပရိဝုတ္တီ’တိ သာ မတာ။

ပုရာ ပရေသံ ဒတွာန၊ မနုညံ နယနာဒိကံ၊

မုနိနာ သမနုပ္ပတ္တာ၊ ဒါနိ သဗ္ဗညုတာသိရီ[မုနိန္ဒ! သမနုပ္ပတ္တော၊ ဒါနိ သဗ္ဗညုတာသိရိံ (က။)]။

ကိဉ္စိ ¶ ဒိသွာန ဝိညာတာ၊ ပဋိပဇ္ဇတိ တံသမံ၊

သံသယာ’ပဂတံ ဝတ္ထုံ၊ ယတ္ထ သော’ယံ ဘမော မတော။

သမံ ဒိသာသု’ဇ္ဇလာသု၊ ဇိန ပါဒ နခံ’သုနာ၊

ပဿန္တာ အဘိနန္ဒန္တိ၊ စန္ဒာ’တပ မနာ ဇနာ။

ပဝုစ္စတေ ယံ နာမာဒိ၊ ကဝီနံ ဘာဝဗောဓနံ၊

ယေန ကေနစိ ဝဏ္ဏေန၊ ဘာဝေါ နာမာ’ယ မီရိတော။

နနု တေယေ’ဝ သန္တာနော၊ သာဂရာ န ကုလာစလာ၊

မနမ္ပိ မရိယာဒံ ယေ၊ သံဝဋ္ဋေပိ ဇဟန္တိ နော။

အင်္ဂင်္ဂိ ဘာဝါ သဒိသ၊ ဗလဘာဝါ စ ဗန္ဓနေ၊

သံသဂ္ဂေါ’လင်္ကတီနံ ယော၊ တံ ‘မိဿ’န္တိ ပဝုစ္စတိ။

ပသတ္ထာ မုနိနော ပါဒ၊ နခ ရံသိ မဟာနဒီ၊

အဟော! ဂါဠှံ နိမုဂ္ဂေပိ၊ သုခယတျေ’ဝ တေ ဇနေ။

ဝေသော သဘာဝ မဓုရော၊ ရူပံ နေတ္တ ရသာယနံ၊

မဓူ’ဝ မုနိနော ဝါစာ၊ န သမ္ပီဏေတိ ကံ ဇနံ။

အာသီ နာမ သိယာ’တ္ထဿ၊ ဣဋ္ဌဿာ’သီသနံ ယထာ၊

ရသ’ပ္ပတီတိ ဇနကံ၊ ဇာယတေ ယံ ဝိဘူသနံ၊

‘ရသဝန္တ’န္တိ တံ ဉေယျံ၊ ရသဝန္တ ဝိဓာနတော။

ရာဂါ’နတ’ဗ္ဘုတ သရောဇ မုခံ ဓရာယ၊

ပါဒါ တိလောကဂရုနော’ဓိက ဗန္ဓရာဂါ၊

အာဒါယ နိစ္စသရသေန ကရေန ဂါဠှံ၊

သဉ္စုမ္ဗယန္တိ သတတာ’ဟိတ သမ္ဘမေန။

ဣစ္စာ’နုဂမ္မ ¶ ပုရိမာစရိယာ’နုဘာဝံ၊

သင်္ခေပတော နိဂဒိတော’ယ မလင်္ကတီနံ၊

ဘေဒေါ’ပရူပရိ ကဝီဟိ ဝိကပ္ပိယာနံ၊

ကော နာမ ပဿိတု မလံ ခလု တာသ မန္တံ။

ဣတိ သင်္ဃရက္ခိတမဟာသာမိ ဝိရစိတေ သုဗောဓာလင်္ကာရေ