📜

၃။ သမာသကဏ္ဍ

သမာသလက္ခဏာဒိ

၂၀၂။ နာမာနံ သမာသော ယုတ္တတ္ထောတျဓိကာရော။ သမာသောတိ ဘိန္နတ္ထာနံ ပဒါန မေကတ္ထတာ။ ယုတ္တတ္ထောတိ အညမညသမ္ဗန္ဓတ္ထော။

ဝိဘာသာတျဓိကာတဗ္ဗံ ဝါကျတ္ထံ။

ကမ္မဓာရယသမာသ

၂၀၃။ ‘‘မဟန္တော စ သော ဝီရော စာ’’တိ ဝါကျေ –

ဒွိပဒေ တုလျာဓိကရဏေ ကမ္မဓာရယော။

ဘိန္နပ္ပဝတ္တိနိမိတ္တာ သဒ္ဒါ ဧကသ္မိံ ဝတ္ထုနိ ပဝတ္တာ တုလျာဓိကရဏာ၊ ဝိသေသနဝိသေသဿဘူတာ သမာနာဓိကရဏာ ဒွေ ပဒါ ယဒါ သမသျန္တေ၊ တဒါ သော သမာသော ကမ္မဓာရယော

နာမ ၊ ဣဓ ဝါ သမာသသုတ္တာနိ သညာဒွါရေန သမာသဝိဓာယကာနိ။

အဂ္ဂဟိတဝိသေသနာ ဗုဒ္ဓိ ဝိသေဿမှိ န ဥပ္ပဇ္ဇတီတိ ဝိသေသနံ ပုဗ္ဗံ ဟောတိ၊ သမာသေနေဝ တုလျာဓိကရဏတ္တဿ ဝုတ္တတ္တာ တပ္ပကာသနတ္ထံ ပယုတ္တာ သမာသတော အတိရိတ္တာ စ သော ဣစ္စေတေ ‘‘ဝုတ္တဋ္ဌာနမပ္ပယောဂေါ’’တိ ဉာယာ နပ္ပယုဇ္ဇန္တေ။ ဧဝမညတြ။

တေသံ ဝိဘတ္တိယော လောပါ စ။

တေသံ ယုတ္တတ္ထာနံ သမာသာနံ ပုဗ္ဗုတ္တရပဒါနံ ဝိဘတ္တီ လုပျန္တေ၊ စကာရေန ကွစိ န။

တတော မဟန္တ ဝီရ ဣတိ စ ရူပပ္ပသင်္ဂေ –

ပကတိ စဿ သရန္တဿ။

ဝိဘတ္တီသု လုတ္တာသု သရန္တဿ ပုဗ္ဗဘူတဿ၊ ပရဘူတဿ စ အဿ သမာသပဒဿ ပကတိ ဟောတီတီဟ လုတ္တာကာရာ ပုနာနီယန္တေ။

တတော မဟန္တ ဝီရဣတိ ဌိတေ –

‘‘မဟတံ မဟာ တုလျာဓိကရဏေ ပဒေ’’တိ မဟန္တဿ မဟာ။

တဒ္ဓိတ သမာသ ကိတကာ နာမံဝါတဝေတုနာဒီသု စ။

တဒ္ဓိတာဒယော နာမံ ဣဝ ဒဋ္ဌဗ္ဗာ တဝေပ္ပဘုတိပစ္စယေ ဝဇ္ဇေတွာ။

တတော ဝတ္တိစ္ဆာယ သျာဒိ။ မဟာဝီရော၊ မဟာဝီရာဣစ္စာဒိ။

၂၀၄။ ကမ္မဓာရယော ဒွန္ဒော စ၊ တပ္ပုရိသော စ လာဘိနော။

တယော ပရပဒေ လိင်္ဂံ၊ ဗဟုဗ္ဗီဟိ ပဒန္တရေ။

၂၀၅။ ရတ္တာ စ သာ ပဋီ စာတိ ရတ္တပဋီ၊ မဟန္တီ စ သာ သဒ္ဓါ စာတိ မဟာသဒ္ဓါ။ ဧတ္ထ ‘‘ကမ္မဓာရယသညေ စေ’’တိ ပုဗ္ဗပဒေ ပုမေဝ ကတေ အာဤပစ္စယာနံ နိဝုတ္တိ။

၂၀၆။ နီလဉ္စ တံ ဥပ္ပလဉ္စာတိ နီလုပ္ပလံ၊ သတ္ထီဝ သတ္ထိ၊ သတ္ထိ စ သာ သာမာ စာတိ သတ္ထိသာမာ။ မုခမေဝ စန္ဒော မုခစန္ဒော။

ဝိသေသနဝိသေဿာနံ ယထေစ္ဆတ္တာ ကွစိ ဝိသေသနံ ပရံ ဟောတိ၊ ခတ္တိယဘူတောဣစ္စာဒိ၊ ဣစ္ဆာ စ ယထာတန္တိ။

ဥဘေ တပ္ပုရိသ သမာသ

၂၀၇။ နသဒ္ဒါ သိ၊ တဿ လောပေါ။ န သုရော အသုရော။

ဧတ္ထ ကမ္မဓာရယေ ကတေ – ‘‘ဥဘေ တပ္ပုရိသာ’’တိ တပ္ပုရိသသညာ။ ‘‘အတ္တန္နဿ တပ္ပုရိသေ’’တိ နဿ အ။ န အဿော အနဿော။ ဧတ္ထ ‘‘သရေ အန’’တိ နဿ အန။

၂၀၈။ ‘‘နာမာနံ သမာသော’’တိ သုတ္တေ ဒွိဓာကတေ အယုတ္တတ္ထာနမ္ပိ ကွစိ သမာသော။ န ပုန ဂေယျာ အပုနဂေယျာ ဂါထေတျာဒိ။ ဧတ္ထ ဂေယျေန သမ္ဗန္ဓော န-သဒ္ဒေါ အယုတ္တတ္ထေနာပိ ပုနေန ယောဂဝိဘာဂဗလာ သမသျတေ။

ဒိဂုသမာသ

၂၀၉။ တယော လောကာ သမာဟဋာ တိလောကံ။

ဧတ္ထ ‘‘သင်္ချာပုဗ္ဗော ဒိဂူ’’တိ ကမ္မဓာရယဿ ဒိဂုသညာ။ ‘ဒိဂုဿေကတ္တံ’’တိ ဧကတ္တံ၊ နပုံသကတ္တဉ္စ။

သုဒ္ဓတပ္ပုရိသသမာသ

၂၁၀။ တပ္ပုရိသာ တွေဝ။

အမာဒယော ပရပဒေဟိ။

ဒုတိယန္တာဒယော ပရပဒေဟိ နာမေဟိ ယဒါ သမသျန္တေ၊ တဒါ သော သမာသော တပ္ပုရိသော နာမ။

ဂါမံ ဂတော ဂါမဂတော။

‘‘ပဿ ဝါသိဋ္ဌ ဂါမံ၊ ဂတော တိဿော သာဝတ္ထိံ’’တျ တြာယုတ္တတ္ထတာယ န သမာသော။ တထာ ညတြ ဉေယျံ။

၂၁၁။ ရညာ ဟတော ရာဇဟတော။

ကိစ္စန္တေဟိ ဘီယော အဓိကတ္ထဝစနေ။

တဗ္ဗ၊ အနီယ၊ ဏျ၊ တေယျ၊ ရိစ္စပ္ပစ္စယာ ကိစ္စာ။ ထုတိနိန္ဒတ္ထမဇ္ဈာရောပိတတ္ထံ ဝစနံ အဓိကတ္ထဝစနံ။ သောဏလေယျော ကူပေါဣစ္စာဒိ။ သောဏေဟိ ယထာ လိယှတေ၊ တထာ ပုဏ္ဏတ္တာ ထုတိ။ တေဟိ ဥစ္ဆိဋ္ဌတ္တာ နိန္ဒာ စ။

ဒဓိနာ ဥပသိတ္တံ ဘောဇနံ ဒဓိဘောဇနံ၊ သမာသပဒေနေဝ ဥပသိတ္တကြိယာယ ကထနာ နတ္ထေတ္ထာယုတ္တတ္ထတာ။ ဥပသိတ္တသဒ္ဒါပ္ပယောဂေါ ပုဗ္ဗေဝ။

၂၁၂။ ကရဏေ တု-အသိနာ ကလဟော အသိကလဟော။

၂၁၃။ ဗုဒ္ဓဿ ဒေယျံ ဗုဒ္ဓဒ္ဒေယျံ၊ ပရဿပဒံ၊ ဧတ္ထ ဝိဘတျလောပေါ။ ဧဝံ အတ္တနောပဒမိစ္စာဒိ။

၂၁၄။ စောရသ္မာ ဘယံ စောရဘယံ။ ဧဝံ ဗဒ္ဓနမုတ္တောစ္စာဒိ။

၂၁၅။ ရညော ပုတ္တော ရာဇပုတ္တော။

‘‘ဗြာဟ္မဏဿ ကဏှာ ဒန္တာ’’ ဣစ္စတြ ဒန္တာပေက္ခာ ဆဋ္ဌီတိ ကဏှေန သမ္ဗန္ဓာဘာဝါ န သမာသော။ ယဒါ တု ကဏှာ စ တေ ဒန္တာ စေတိ ကမ္မဓာရယော၊ တဒါ ဆဋ္ဌီ ကဏှဒန္တာပေက္ခာတိ ဗြာဟ္မဏကဏှဒန္တာတိ သမာသော ဟောတေဝ။

၂၁၆။ ‘‘ရညော မာဂဓဿ ဓန’’ န္တျတြ ရညောတိ ဆဋ္ဌီ ဓန မပေက္ခတေ၊ န မာဂဓံ။ ရာဇာ ဧဝ မာဂဓသဒ္ဒေန ဝုစ္စတေတိ ဘေဒါဘာဝါ သမ္ဗန္ဓာဘာဝေါတိ တုလျာဓိကရဏေန မာဂဓေန သဟ ရာဇာ န သမသျတေ။ ဒွိဋ္ဌော ဟိ သမ္ဗန္ဓော။

ရညော အဿော ပုရိသော စေ’’ တျ တြ ရညော အဿော၊ ရညော ပုရိသော တိ စ ပစ္စေကံ သမ္ဗန္ဓတော သာပေက္ခတာ အတ္ထီတိ န သမာသော။ ‘‘အဿော စ ပုရိသော စာ’’တိ ဒွန္ဒေ ကတေ တု ရာဇဿပုရိသာတိ ဟောတေဝ၊ အညာနပေက္ခတ္တာ။

‘‘ရညော ဂရုပုတ္တော’’ ဣစ္စတြ ရာဇာပေက္ခိနောပိ ဂရုနော

ပုတ္တေန သဟ သမာသော၊ ဂမကတ္တာ။ ဂမကတ္တမ္ပိ သမာသဿ နိဗန္ဓနံ။ တတ္ထ ဂရုနော ပုတ္တောတိ ဝိဂ္ဂဟော၊ ဧဝမညတြ။

၂၁၇။ ရူပေ သညာ ရူပသညာ။

ကွစိ နိန္ဒာယံ - ကူပေ မဏ္ဍူကော ဝိယ ကူပမဏ္ဍူကော။ ဧဝံ နဂရကာကော ဣစ္စာဒိ။ အတြောပမာယ နိန္ဒာ ဂမျတေ။

အန္တေဝါသိကော တျာဒေါ ဝိဘတ္တျလောပေါ။

ဗဟုဗ္ဗီဟိသမာသ

၂၁၈။ အညပဒတ္ထေသု ဗဟုဗ္ဗီဟိ။

အပ္ပဌမန္တာန မညေသံ ပဒါနံ အတ္ထေသု ဒွေ ဝါ ဗဟူနိ ဝါ နာမာနိ ယဒါ သမသျန္တေ၊ တဒါ သော သမာသော ဗဟုဗ္ဗီဟိ နာမ။

အာဂတာ သမဏာ ယံ သာ အာဂတသမဏော၊ ဝိဟာရော။

၂၁၉။ ဇိတာနိ ဣန္ဒြိယာနိ ယေန သော ဇိတိန္ဒြိယော၊ ဘဂဝါ။ အာဟိတော အဂ္ဂိ ယေန သော အာဟိတဂ္ဂိ။ အဂျာဟိတော ဝါတျာဒေါ ယထေစ္ဆံ ဝိသေသနဿ ပရတာ။

၂၂၀။ ကရဏေ တု-ဆိန္နော ရုက္ခော ယေန သော ဆိန္နရုက္ခော၊ ဖရသု။

၂၂၁။ ဒိန္နော သုင်္ကော ယဿ သော ဒိန္နသုင်္ကော၊ ရာဇာ။

၂၂၂။ နိဂ္ဂတာ ဇနာ ယသ္မာ သော နိဂ္ဂတဇနော၊ ဂါမော။

၂၂၃။ ဒသ ဗလာနိ ယဿ သော ဒသဗလော၊ ဘဂဝါ။ နတ္ထိ သမော ယဿ သော အသမော။ ဧတ္ထ ‘‘အတ္တန္နဿာ’’တိ ယောဂဝိဘာဂေန နဿ အ။

ပဟူတာ ဇိဝှာ ယဿ သော ပဟူတဇိဝှော၊ မဟန္တီ ပညာ ယဿ သော မဟာပညော။ ဒွီသု ‘‘ဣတ္ထိယမ္ဘာသိတပုမိတ္ထီပုမာဝ စေ’’တိ ပုမ္ဘာဝါတိဒေသာ ပုဗ္ဗုတ္တရပဒေသု အာဤပ္ပစ္စယာနမဘာဝေါ။

၂၂၄။ ‘‘ကွစိ သမာသန္တဂတာနမကာရန္တော’’တိ အန္တဿ အတ္တံ။ ကာရဂ္ဂဟဏေန အာ ဣ စ။ ဣတ္ထိယမိဝဏ္ဏန္တာ၊ တွန္တေဟိ စ ကပ္ပစ္စယောပိ။ ယထာ - ဝိသာလံ အက္ခိ ယဿ သော ဝိသာလက္ခော၊ ပစ္စက္ခဓမ္မာ၊ သိလောပေါ။ သောဘနော ဂန္ဓော ယဿ သော သုဂန္ဓိ။ ဗဟုကန္တိကော၊ ဗဟုနဒိကော၊ သမုဒ္ဒေါ။ ဧတ္ထ ယဒါဒိနာ ရဿော။ ဗဟုကတ္တုကော။ မတ္တာ ဗဟဝေါ မာတင်္ဂါ ယသ္မိံ တံ မတ္တဗဟုမာတင်္ဂံ၊ ဝနံ။

တုလျာဓိကရဏော။

၂၂၅။ သုဝဏ္ဏဿ ဝိယ ဝဏ္ဏော ယဿ သော သုဝဏ္ဏဝဏ္ဏော။ ဝဇိရံ ပါဏိမှိ ယဿ သော ဝဇိရပါဏိ။ ဥရသိ လောမာနိ ယဿ သော ဥရသိလောမော။ ဧတ္ထ ဝိဘတျလောပေါ။

‘‘အတ္ထေသူ’’တိ ဗဟုတ္တဂ္ဂဟဏေန ကွစိ ပဌမန္တာနမ္ပိ။ သဟ ဟေတုနာ ယော ဝတ္တတေ သော သဟေတုကော၊ ‘‘ယဒါ’’ ဒိနာ သဟဿ သော။

၂၂၆။ သတ္တ ဝါ အဋ္ဌ ဝါ သတ္တဋ္ဌ၊ မာသာ၊ ဧတ္ထညပဒတ္ထော ဝါ သဒ္ဒဿတ္ထော။ ဒက္ခိဏဿာ စ ပုဗ္ဗဿာ စ ဒိသာယ ယံ အန္တရာလံ၊ သာ ဒက္ခိဏပုဗ္ဗာ၊ ဒိသာ။

ဘိန္နာဓိကရဏော။

အပ္ပဌမန္တာနန္တိ ကိံ၊ ဒေသိတော ဗုဒ္ဓေန ယော ဓမ္မော။

ဒွန္ဒသမာသ

၂၂၇။ နာမာနံ သမုစ္စယော ဒွန္ဒော။

သမုစ္စယော ၊ တိ ပိဏ္ဍီကရဏံ ဧကဝိဘတ္တိကာနံ နာမာနံ ယော သမုစ္စယော၊ သော ဒွန္ဒော နာမ၊ ဣဒံ သုတ္တံ ဗဟုဝစနဝိသယံ။

စန္ဒော စ သူရိယော စ စန္ဒသူရိယာ။ တိဋ္ဌန္တိ တျာဒိ-

ကြိယာသမ္ဗန္ဓသာမညတော အတ္ထေတ္ထာပေကတ္ထတာ၊ ဧဝံ နရနာရိယော၊ အက္ခရပဒါနိ။

၂၂၈။ တထာ ဒွန္ဒေ ပါဏိ တုရိယ ယောဂ္ဂ သေနင်္ဂ ခုဒ္ဒဇန္တုက ဝိဝိဓ ဝိရုဒ္ဓ ဝိသဘာဂတ္ထာဒီနဉ္စ။

ဝိဝိဓေနာကာရေန ဝိရုဒ္ဓါ ဝိဝိဓဝိရုဒ္ဓါ၊ သဘာဂါ သဒိသာ၊ ဝိဝိဓာ စ တေ သဘာဂါ စေတိ ဝိသဘာဂါ။ ယထာ ဒိဂုသမာသေ၊ တထာ ဒွန္ဒေ ပါဏျင်္ဂတ္ထာဒီနံ ဧကတ္တံ၊ နပုံသကတ္တဉ္စ ဟောတိ။

စက္ခုသောတံ၊ ဂီတဝါဒိတံ၊ ယုဂနင်္ဂလံ၊ ဟတ္ထဿံ၊ အသိစမ္မံ၊ ဍံသမကသံ၊ ကောကာလူကံ။

နာမရူပံ ၊ နာမံ နမနလက္ခဏံ၊ ရူပံ ရုပ္ပနလက္ခဏံ။ ဧဝမေတေ ဓမ္မာ လက္ခဏတော ဝိဝိဓာ၊ ပရမတ္ထတော သဘာဂါ စ။

အာဒိသဒ္ဒေနာညတ္ထာပိ ။ ယထာ - ဘိန္နလိင်္ဂါနံ - ဣတ္ထိပုမံ။ ယဒါဒိနာ ရဿော၊ ဒါသိဒါသံ၊ ပတ္တစီဝရံ။ ဂင်္ဂါသောဏံ။

သင်္ချာပရိမာဏာနံ - တိကစတုက္ကံ။

သိပ္ပီနံ - ဝေဏရထကာရံ။

လုဒ္ဒကာနံ - သာကုန္တိက မာဂဝိကံ။

အပ္ပာဏိဇာတီနံ - အာရသတ္ထိ။

ဧကဇ္ဈာယနဗြာဟ္မဏာနံ - ကဌကာလာပံ ဣစ္စာဒိ။

၂၂၉။ ဝိဘာသာ ရုက္ခ တိဏ ပသု ဓန ဓည ဇနပဒါဒီနဉ္စ။

ဒွန္ဒေ ရုက္ခာဒီနံ ဧကတ္တံ နပုံသကတ္တဉ္စ ဝါ ဟောတိ။

ဓဝခဒိရံ၊ ဓဝခဒိရာ၊ မုဉ္ဇပဗ္ဗဇံ၊ မုဉ္ဇပဗ္ဗဇာ၊ အဇေဠကံ၊ အဇေဠကာ၊ ဟိရညသုဝဏ္ဏံ၊ ဟိရညသုဝဏ္ဏာနိ၊ သာလိယဝံ၊ သာလိယဝါ။

ကာသိကောသလံ ကာသိကောသလာ။

အာဒိသဒ္ဒေန အညေသုပိ ဝါ။ ယထာ – နိစ္စဝိရောဓီနမဒ္ဒဗ္ဗာနံ - ကုသလာကုသလံ၊ ကုသလာကုသလာနိ။

သကုဏီနံ - ဗကဗလာကံ၊ ဗကဗလာကာ။

ဗျဉ္ဇနာနံ - ဒဓိဃတံ၊ ဒဓိဃတာနိ။

ဒိသာနံ - ပုဗ္ဗာပရံ၊ ပုဗ္ဗာပရာ ဣစ္စာဒိ။

အဗျယီဘာဝသမာသ

၂၃၀။ အဓိသဒ္ဒါ သ္မိံ၊ တဿ လောပေါ။ အဓိသဒ္ဒေန တုလျာဓိကရဏတ္တာ ဣတ္ထိသဒ္ဒါပိသ္မိံ။ နိစ္စသမာသတ္တာ အာဓာရဘူတာယမိတ္ထိယန္တိ ပဒန္တရေန ဝိဂ္ဂဟော။ အဓိ ဣတ္ထိယန္တိ ဌိတေ –

ဥပသဂ္ဂနိပါတပုဗ္ဗကော အဗျယီဘာဝေါ။

ဥပသဂ္ဂါဒိပုဗ္ဗကော သဒ္ဒေါ ဝိဘတျတ္ထာဒီသု သမာသော ဟောတိ၊ အဗျယီဘာဝသညော စ။

‘‘သော နပုံသကလိင်္ဂေါ’’တိ အဗျယီဘာဝေါ နပုံသကလိင်္ဂေါ၊ ယဒါဒိနာ ဧကဝစနော စ။

‘‘သရော ရဿော နပုံသကေ’’တိ ရဿော။

အညသ္မာ လောပေါ စ။

အနကာရန္တာ အဗျယီဘာဝါ ပရာ သဗ္ဗာ ဝိဘတ္တီ လုဇ္ဇရေ။ အဓိတ္ထိ၊ ဝိဘတ္တီနမတ္ထော အာဓာရာဒိ။

ဣဓာဓိသဒ္ဒေါ အာဓာရေဝတ္တတေ၊ အဓိတ္ထိဣစ္စေတံ ပဒံ ဣတ္ထိယ မိစ္စေတမတ္ထံ ဝဒတိ။

သမီပံ နဂရဿ ဥပနဂရံ။ ‘‘အံဝိဘတ္တီနမကာရန္တဗျယီဘာဝါ’’တိ ဝိဘတ္တီနံ ကွစိ အံ။

ကွစီတိ ကိံ။ ဥပနဂရေ။

အဘာဝေါ မက္ခိကာနံ နိမ္မက္ခိကံ ရဿော။ အနုပုဗ္ဗော ထေရာနံ အနုထေရံ၊ အနတိက္ကမ္မ သတ္တိံ ယထာသတ္တိ။

ယေ ယေ ဗုဍ္ဎာ ယထာဗုဍ္ဎံ၊ ဝိစ္ဆာယံ။

ယတ္တကော ပရိစ္ဆေဒေါ ဇီဝဿ ယာဝဇီဝံ၊ အဝဓာရဏေ။

အာ ပဗ္ဗတာ ခေတ္တံ အာပဗ္ဗတံ ခေတ္တံ၊ မရိယာဒါယံ၊ ဝဇ္ဇမာနာ သီမာ မရိယာဒါ၊ ပဗ္ဗတံ ဝိနာတျတ္ထော။

အာ ဇလန္တာ သီတံ အာဇလန္တံ သီတံ၊ အဘိဝိဓိမှိ၊ ဂယှမာနာ သီမာ အဘိဝိဓိ၊ ဇလန္တေန သဟေတျတ္ထော။

အာသဒ္ဒယောဂေ ‘‘ဓာတုနာမာ’’ဒိနာ အပါဒါနဝိဓာနေနေဝ ဝါကျမ္ပိ သိဒ္ဓံ။ တထာညတြ။

၂၃၁။ ‘‘ဥတ္တမော ဝီရော ပဝီရော’’ ဣစ္စာဒေါ ပန ပုဗ္ဗပဒတ္ထပ္ပဓာနတ္တာဘာဝါဗျယီဘာဝါဘာဝေါ ကမ္မဓာရယောဧဝ။ ဧဝံ ဝိသိဋ္ဌော ဓမ္မော အဘိဓမ္မော။ ကုစ္ဆိတံ အန္နံ ကဒန္နံ။ ဧတ္တ္ထ ‘‘ကဒ ကုဿာ’’တိ သရေ ကုဿ ကဒါဒေသော။

အပ္ပကံ လဝဏံ ကာလဝဏံ၊ ဧတ္ထ ‘‘ကာပ္ပတ္ထေသု စာ’’တိ ကုဿ ကာ၊ ဗဟုဝစနေနာညတြာပိ ကွစိ။ ကုစ္ဆိတော ပုရိသော ကာပုရိသော၊ ကုပုရိသော ဝါ၊ ဧဝမသုရာဒိ။

ပုဗ္ဗပရူဘယမညပဒတ္ထ - ပ္ပဓာနာဗျယီဘာဝ သမာသော၊

ကမ္မဓာရယက တပ္ပုရိသာ ဒွေ၊ ဒွေန္ဒော စ ဗဟုဗ္ဗီဟိ စ ဉေယျာ။

သမာသော။