📜

နမော တဿ ဘဂဝတော အရဟတော သမ္မာသမ္ဗုဒ္ဓဿ

သုတ္တန္တပိဋကေ

ဒီဃနိကာယေ

သီလက္ခန္ဓဝဂ္ဂသုတ္တ

သံဂါယနဿ ပုစ္ဆာ ဝိဿဇ္ဇနာ

ပုစ္ဆာ – ပဌမမဟာဓမ္မသံဂီတိကာလေ ¶ အာဝုသော ဓမ္မသံဂါဟကာ မဟာကဿပါဒယော မဟာထေရဝရာ ပဌမံ ဝိနယံ သံဂါယိတွာ တဒနန္တရံ ကံ နာမ ပါဝစနံ သံဂါယိံသု။

ဝိဿဇ္ဇနာ – ပဌမမဟာဓမ္မသံဂီတိယံ ဘန္တေ ဓမ္မသံဂါဟကာ မဟာကဿပါဒယော မဟာထေရဝရာ ပဌမံ ဝိနယံ သံဂါယိတွာ တဒနန္တရံ ဓမ္မံ သံဂါယိံသု။

ပုစ္ဆာ – ဓမ္မော ¶ နာမ အာဝုသော သုတ္တန္တာဘိဓမ္မဝသေန ဒုဝိဓော၊ တတ္ထ ကတရံ ဓမ္မံ ပဌမံ သံဂါယိံသု။

ဝိဿဇ္ဇနာ – ဒွီသု ဘန္တေ ဓမ္မေသု သုတ္တန္တာဘိဓမ္မပိဋကေသု ပဌမံ သုတ္တန္တံ ပိဋကံ ဓမ္မံ သံဂါယိံသု။

ပုစ္ဆာ – သုတ္တန္တပိဋကေ ¶ ပိ အာဝုသော ဒီဃမဇ္ဈိမသံယုတ္တအင်္ဂုတ္တရခုဒ္ဒကနိကာယဝသေန ပဉ္စ နိကာယာ၊ တေသု ပဌမံ ကတရံ နိကာယံ သံဂါယိံသု။

ဝိဿဇ္ဇနာ – ပဉ္စသု ဘန္တေ နိကာယေသု ပဌမံ ဒီဃနိကာယံ သံဂါယိံသု။

ပုစ္ဆာ – ဒီဃနိကာယေပိ အာဝုသော တယော ဝဂ္ဂါ စတုတ္တိံသာ စ သုတ္တာနိ၊ တေသု ကတရံ ဝဂ္ဂံ ကတရဉ္စ သုတ္တံ ပဌမံ သံဂါယိံသု။

ဝိဿဇ္ဇနာ – ဒီဃနိကာယေပိ ဘန္တေ တီသု ဝဂ္ဂေသု ပဌမံ သီလက္ခန္ဓဝဂ္ဂံ၊ စတုတ္တိံသတိယာ စ သုတ္တေသု ပဌမံ ဗြဟ္မဇာလသုတ္တံ သံဂါယိံသု။