📜
နမော တဿ ဘဂဝတော အရဟတော သမ္မာသမ္ဗုဒ္ဓဿ
ဝိနယပိဋက
သံဂါယနဿ ပုစ္ဆာ ဝိဿဇ္ဇနာ
ဩကာသ ဒါနကထာ
သုဏာတု ¶ မေ ဘန္တေ သင်္ဃော၊ မဟတီ အယံ ပရိသာ၊ ဧဝရူပါယ ပရိသာယ န သုကရာ သဗ္ဗသော ကထံ သာဝေတုံ၊ တသ္မာ အာယသ္မတော စ ဇဝနတ္ထေရဿ ပခုက္ကူနဂရဝါသိနော အာယသ္မတော စ ဝိစိတ္တသာရာဘိဝံသဿ တိပိဋကဓရ ဓမ္မဘဏ္ဍာဂါရိကဿ ဝိနယပုစ္ဆနဘာရဉ္စ ဝိနယဝိဿဇ္ဇန ဘာရဉ္စ အာဝဟိတုံ ဩကာသံ ဒမ္မိ၊ ကရောထ တုမှေ အာဝုသော ဆဋ္ဌသံဂီတိပုဗ္ဗင်္ဂမာနိ ဝိနယပုစ္ဆန ဝိနယဝိဿဇ္ဇန ကိစ္စာနိ ယထာဓမ္မံ ယထာဝိနယံ။
အဂ္ဂမဟာပဏ္ဍိတ ¶ ဘဒန္တဇဝန မဟာထေရေန
ဌပိတာ
ပုစ္ဆက သမ္မုတိ ဉာတ္တိ
သုဏာတု မေ ဘန္တေ သင်္ဃော၊ ယဒိ သင်္ဃဿ ပတ္တကလ္လံ၊ အဟံ အာယသ္မန္တံ ဝိစိတ္တသာရာဘိဝံသံ တိပိဋကဓရ ဓမ္မဘဏ္ဍာဂါရိကံ ဝိနယံ ပုစ္ဆေယျံ။
တိပိဋကဓရ ဓမ္မဘဏ္ဍာဂါရိက
ဘဒန္တဝိစိတ္တသာရာဘိဝံသေန
ဌပိတာ ဝိဿဇ္ဇက သမ္မုတိ ဉာတ္တိ
သုဏာတု မေ ဘန္တေ သင်္ဃော၊ ယဒိ သင်္ဃဿ ပတ္တကလ္လံ၊ အဟံ အာယသ္မတာ ဇဝနတ္ထေရေန သင်္ဃနာယက မဟာထေရဿ ပဋိနိဓိဘူတေန ဝိနယံ ပုဋ္ဌော ဝိဿဇ္ဇေယျံ။
ပဌမ ပါရာဇိက သိက္ခာပုစ္ဆာ
ပုစ္ဆာ – ယံ ¶ တေန အာဝုသော ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန ပဌမံ ပါရာဇိကံ ကတ္ထ ပညတ္တံ။
ဝိဿဇ္ဇနာ – ဝေသာလိယံ ဘန္တေ ပညတ္တံ။
ပုစ္ဆာ – ကံ အာဝုသော အာရဗ္ဘ ပညတ္တံ။
ဝိဿဇ္ဇနာ – သုဒိန္နံ ဘန္တေ ကလန္ဒပုတ္တံ အာရဗ္ဘ ပညတ္တံ။
ပုစ္ဆာ – ကိသ္မိံ အာဝုသော ဝတ္ထုသ္မိံ ပညတ္တံ။
ဝိဿဇ္ဇနာ – သုဒိန္ဒော ဘန္တေ ကလန္ဒပုတ္တော ပုရာဏဒုတိယိကာယ မေထုနံ ဓမ္မံ ပဋိသေဝိ၊ တသ္မိံ ဘန္တေ ဝတ္ထုသ္မိံ ပညတ္တံ။
ပုစ္ဆာ – အတ္ထိ အာဝုသော တတ္ထ ပညတ္တိ အနုပညတ္တိ အနုပ္ပန္နပညတ္တိ။
ဝိဿဇ္ဇနာ – ဧကာ ဘန္တေ ပညတ္တိ ဒွေ အနုပညတ္တိယော၊ အနုပ္ပန္နပညတ္တိ တသ္မိံ နတ္ထိ။
ပုစ္ဆာ – သဗ္ဗတ္ထပညတ္တိနုခေါ ¶ အာဝုသော ပဒေသပညတ္တိနုခေါ။
ဝိဿဇ္ဇနာ – သဗ္ဗတ္ထပညတ္တိ ဘန္တေ။
ပုစ္ဆာ – သာဓာရဏပညတ္တိနုခေါ အာဝုသော အသာဓာရဏပညတ္တိနုခေါ။
ဝိဿဇ္ဇနာ – သာဓာရဏပညတ္တိ ဘန္တေ။
ပုစ္ဆာ – ဧကတောပညတ္တိနုခေါ အာဝုသော ဥဘတောပညတ္တိနုခေါ။
ဝိဿဇ္ဇနာ – ဥဘတောပညတ္တိ ဘန္တေ။
ပုစ္ဆာ – ပဉ္စန္နံ အာဝုသော ပါတိမောက္ခုဒ္ဒေသာနံ ကတ္ထောဂဓံ ကတ္ထ ပရိယာပန္နံ။
ဝိဿဇ္ဇနာ – နိဒါနောဂဓံ ¶ ဘန္တေ နိဒါနပရိယာပန္နံ။
ပုစ္ဆာ – ကတမေန အာဝုသော ဥဒ္ဒေသေန ဥဒ္ဒေသံ အာဂစ္ဆတိ။
ဝိဿဇ္ဇနာ – ဒုတိယေန ဘန္တေ ဥဒ္ဒေသေန ဥဒ္ဒေသံ အာဂစ္ဆတိ။
ပုစ္ဆာ – စတုန္နံ အာဝုသော ဝိပတ္တီနံ ကတမာ ဝိပတ္တိ။
ဝိဿဇ္ဇနာ – သီလဝိပတ္တိ ဘန္တေ။
ပုစ္ဆာ – ကာ အာဝုသော ဝိပတ္တိ။
ဝိဿဇ္ဇနာ – အသံဝရော ဘန္တေ ဝိပတ္တိ။
ပုစ္ဆာ – ကာ အာဝုသော သမ္ပတ္တိ။
ဝိဿဇ္ဇနာ – သံဝရော ဘန္တေ သမ္မတ္တိ။
ပုစ္ဆာ – ကာ ¶ အာဝုသော ပဋိပတ္တိ။
ဝိဿဇ္ဇနာ – န ဧဝရူပံ ကရိဿာမီတိ ယာဝဇီဝံ အာပါဏကောဋိကံ သမာဒါယ သိက္ခတိ သိက္ခာပဒေသု၊ အယံ ဘန္တေ ပဋိပတ္တိ။
ပုစ္ဆာ – ကတိ အာဝုသော အတ္ထဝသေ ပဋိစ္စ ဘဂဝတာ ပဌမံ ပါရာဇိကံ ပညတ္တံ။
ဝိဿဇ္ဇနာ – ဒသ ဘန္တေ အတ္ထဝသေ ပဋိစ္စ ဘဂဝတာ ပဌမံ ပါရာဇိကံ ပညတ္တံ၊ ၁ - သင်္ဃသုဋ္ဌုတာယ၊ ၂ - သင်္ဃဖာသုတာယ၊ ၃ - ဒုမ္မင်္ကူနံ ပုဂ္ဂလာနံ နိဂ္ဂဟာယ၊ ၄ - ပေသလာနံ ဘိက္ခူနံ ဖာသုဝိဟာရာယ၊ ၅ - ဒိဋ္ဌဓမ္မိကာနံ အာသဝါနံ သံဝရာယ၊ ၆ - သမ္ပရာယိကာနံ အာသဝါနံ ပဋိဃာတာယ၊ ၇ - အပ္ပသန္နာနံ ပသာဒါယ၊ ၈ - ပသန္နာနံ ဘိယျောဘာဝါယ၊ ၉ - သဒ္ဓမ္မဋ္ဌိတိယာ၊ ၁၀ - ဝိနယာနုဂ္ဂဟာယ။
ပုစ္ဆာ – ကေ ¶ အာဝုသော သိက္ခန္တိ။
ဝိဿဇ္ဇနာ – သေက္ခာစ ဘန္တေ ပုထုဇ္ဇနကလျာဏကာစ သိက္ခန္တိ။
ပုစ္ဆာ – ကေ အာဝုသော သိက္ခိတသိက္ခာ။
ဝိဿဇ္ဇနာ – အရဟန္တော ဘန္တေ သိက္ခိတသိက္ခာ။
ပုစ္ဆာ – ကတ္ထ အာဝုသော ဌိတံ။
ဝိဿဇ္ဇနာ – သိက္ခာကာမေသု ဘန္တေ ဌိတံ။
ပုစ္ဆာ – ကေ အာဝုသော ဓာရေန္တိ။
ဝိဿဇ္ဇနာ – ယေသံ ဘန္တေ ဝတ္တတိ တေ ဓာရေန္တိ။
ပုစ္ဆာ – ကဿ ¶ အာဝုသော ဝစနံ။
ဝိဿဇ္ဇနာ – ဘဂဝတော ဘန္တေ ဝစနံ အရဟတော သမ္မာသမ္ဗုဒ္ဓဿ။
ပုစ္ဆာ – ကေနာဝုသော အာဘတံ။
ဝိဿဇ္ဇနာ – ပရမ္ပရာယ ဘန္တေ အာဘတံ။
သံဂါယနတ္ထာယ သင်္ဃဿ ဉာပနံ
သုဏာတု မေ ဘန္တေ သင်္ဃော အဟံ ဘန္တေ အာယသ္မန္တံ ဝိစိတ္ထသာရာဘိဝံသံ တိပိဋကဓရ ဓမ္မဘဏ္ဍာဂါရိကံ ပဌမဿ ပါရာဇိကဿ နိဒါနမ္ပိ ပုစ္ဆိံ၊ ပုဂ္ဂလမ္ပိ ပုစ္ဆိံ၊ ဝတ္ထုမ္ပိ ပုစ္ဆိံ၊ ပညတ္တိ အနုပညတ္တိအာဒီနိပိ ပုစ္ဆိံ၊ ပုဋ္ဌော ပုဋ္ဌောစ သော အာယသ္မာဝိစိတ္တသာရာဘိဝံသော ဝိဿဇ္ဇေသိ၊ ဣတိဟိဒံ ဘန္တေ ပဌမံ ပါရာဇိက သိက္ခာပဒံ နိမ္မလံ သုပရိသုဒ္ဓံ တဿေဝ ဘဂဝတော ဝစနံ အရဟတော သမ္မာသမ္ဗုဒ္ဓဿ၊ တသ္မာ ယထာပုရေ မဟာကဿပါဒယော မဟာထေရဝရာ ပေါရာဏသံဂီတိကာရာ ဗြဟ္မစရိယ သင်္ခါတဿ ဗုဒ္ဓသာသနဿ စိရဋ္ဌိတိယာ ဗဟုဇနဟိတာယ ဗဟုဇနသုခါယ လောကာနုကမ္ပာယ အတ္ထာယ ဟိတာယ သုခါယ ဒေဝမနုဿာနံ ဓမ္မဝိနယံ သင်္ဂါယိံသုစေဝ အနုသင်္ဂါယိံသုစ၊ ဧဝမေဝ မယမ္ပိ ဒါနိ သဗ္ဗေဝ ဆဋ္ဌသံဂီတိမဟာဓမ္မသဘာပရိယာပန္နာ ဣဒံ ပဌမ ပါရာဇိက သိက္ခာပဒံ ဧကတောသဇ္ဈာယနဝသေန သံဂါယေယျာမ။
ရေဝတာဘိ ပဏ္ဍိတဓဇ သာသနဝံသ မဟာဓမ္မရာဇဂုရုနော
အဘိဓဇမဟာရဋ္ဌဂုရုနောစ သင်္ဃနာယက မဟာထေရဿ
ဩကာသ ဒါနကထာ
သုဏာတု ¶ မေ ဘန္တေ သင်္ဃော၊ မဟတီ အယံ ပရိသာ၊ ဧဝရူပါယ ပရိသာယ န သုကရာ သဗ္ဗသော ကထံ သာဝေတုံ၊ တသ္မာ အာယသ္မတောစ သောဘနဿ သာသနရိ သာရာမာဓိဝါသိနော အာယသ္မတောစ ဝိစိတ္တသာရာဘိဝံသဿ တိပိဋကဓရ ဓမ္မဘဏ္ဍာဂါရိကဿ ဝိနယပုစ္ဆနဘာရဉ္စ ဝိနယဝိဿဇ္ဇနဘာရဉ္စ အာဝဟိတုံ ဩကာသံ ဒမ္မိ၊ ကရောထ တုမှေ အာဝုသော ဆဋ္ဌသံဂီတိပုဗ္ဗင်္ဂမာနိ ဝိနယပုစ္ဆန ဝိနယဝိဿဇ္ဇန ကိစ္စာနိ ယထာဓမ္မံ ယထာဝိနယံ။
အဂ္ဂမဟာပဏ္ဍိတ ဘဒန္တ သောဘနတ္ထေရေန
ဌပိတာ ပုစ္ဆက သမ္မုတိ ဉာတ္တိ
သုဏာတု မေ ဘန္တေ သင်္ဃော၊ ယဒိ သင်္ဃဿ ပတ္တကလ္လံ၊ အဟံ အာယသ္မန္တံ ဝိစိတ္တသာရာဘိဝံသံ တိပိဋကဓရ ဓမ္မဘဏ္ဍာဂါရိကံ ဝိနယံ ပုစ္ဆေယျံ။
တိပိဋကဓရ ဓမ္မဘဏ္ဍာဂါရိက
ဘဒန္တဝိစိတ္တသာရာဘိဝံသေန
ဌပိတာ ဝိဿဇ္ဇက သမ္မုတိ ဉာတ္တိ
သုဏာတု ¶ မေ ဘန္တေ သင်္ဃော၊ ယဒိသင်္ဃဿ ပတ္တကလ္လံ၊ အဟံ အာယသ္မတာ သောဘနတ္ထေရေန သင်္ဃနာယက မဟာထေရဿ ပဋိနိဓိဘူတေန ဝိနယံ ပုဋ္ဌော ဝိဿဇ္ဇေယျံ။
ဒုတိယ ပါရာဇိက သိက္ခာပုစ္ဆာ
ပုစ္ဆာ – ယံ ¶ တေန အာဝုသော ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန ဒုတိယံ ပါရာဇိကံ ကတ္ထ ပညတ္တံ။
ဝိဿဇ္ဇနာ – ရာဇဂဟေ ဘန္တေ ပညတ္တံ။
ပုစ္ဆာ – ကံ အာဝုသော အာရဗ္ဘ ပညတ္တံ။
ဝိဿဇ္ဇနာ – ဓနိယံ ဘန္တေ ကုမ္ဘကာရပုတ္တံ အာရဗ္ဘ ပညတ္တံ။
ပုစ္ဆာ – ကိသ္မိံ အာဝုသော ဝတ္ထုသ္မိံ ပညတ္တံ။
ဝိဿဇ္ဇနာ – ဓနိယော ဘန္တေ ကုမ္ဘကာရပုတ္တော ရညော ဒါရူနိ အဒိန္နံ အာဒိယိ၊ တသ္မိံ ဝတ္ထုသ္မိံ ပညတ္တံ။
ပုစ္ဆာ – အတ္ထိ ¶ အာဝုသော တတ္ထ ပညတ္တိ အနုပညတ္တိ အနုပ္ပန္နပညတ္တိ။
ဝိဿဇ္ဇနာ – ဧကာ ဘန္တေ ပညတ္တိ ဧကာ အနုပညတ္တိ အနုပ္ပန္နပညတ္တိ တသ္မိံ နတ္ထိ။
ပုစ္ဆာ – ကာ အာဝုသော တတ္ထ မူလပညတ္တိ။
ဝိဿဇ္ဇနာ – ယော ပန ဘိက္ခု အဒိန္နံ ထေယျသင်္ခါတံ အာဒိယေယျ၊ ယထာရူပေ အဒိန္နာဒါနေ ရာဇာနော စောရံ ဂဟေတွာ ဟနေယျုံဝါ ဗန္ဓေယျုံဝါ ပဗ္ဗာဇေယျုံဝါ စောရောသိ ဗာလောသိ မုဠှောသိ ထေနောသီတိ တထာရူပံ ဘိက္ခု အဒိန္နံ အာဒိယမာနော အယမ္ပိ ပါရာဇိကော ဟောတိ အသံဝါသောတိ အယံ ဘန္တေ တတ္ထ မူလပညတ္တိ။
ပုစ္ဆာ – ကာ ¶ အာဝုသော တတ္ထ အနုပညတ္တိ။
ဝိဿဇ္ဇနာ – ဂါမာဝါ အရညာဝါတိ အယံ ဘန္တေ တတ္ထ အနုပညတ္တိ။
ပုစ္ဆာ – ကာ အာဝုသော တတ္ထ ပရိပုဏ္ဏပညတ္တိ။
ဝိဿဇ္ဇနာ – ယော ပန ဘိက္ခု ဂါမာဝါ အရညာဝါ အဒိန္နံ ထေယျသင်္ခါတံ အာဒိယေယျ၊ ကထာရူပေ အဒိန္နာဒါနေ ရာဇာနော စောရံ ဂဟေတွာ ဟနေယျုံဝါ ဗန္ဓေယျုံဝါ ပဗ္ဗာဇေယျုံဝါ စောရောသိ ဗာလောသိ မူဠှောသိ ထေနောသီတိ တထာရူပံ ဘိက္ခု အဒိန္နံ အာဒိယမာနော အယမ္ပိ ပါရာဇိကော ဟောတိ အသံဝါသောတိ အယံ ဘန္တေ တတ္ထ ပရိပုဏ္ဏပညတ္တိ။
ပုစ္ဆာ – သဗ္ဗတ္ထပညတ္တိ ¶ နုခေါ အာဝုသော ပဒေသပညတ္တိနုခေါ။
ဝိဿဇ္ဇနာ – သဗ္ဗတ္ထပညတ္တိ ဘန္တေ။
ပုစ္ဆာ – သာဓာရဏပညတ္တိနုခေါ အာဝုသော အသာဓာရဏပညတ္တိ နုခေါ။
ဝိဿဇ္ဇနာ – သာဓာရဏပညတ္တိ ဘန္တေ။
ပုစ္ဆာ – ဧကတောပညတ္တိနုခေါ အာဝုသော ဥဘတောပညတ္တိနုခေါ။
ဝိဿဇ္ဇနာ – ဥဘတောပညတ္တိ ဘန္တေ။
ပုစ္ဆာ – တသ္မိံ ¶ အာဝုသော ဒုတိယ ပါရာဇိကေ အဒိန္နံ အာဒိယန္တော ကတိ အာပတ္တိယော အာပဇ္ဇတိ ဝိဘဇိတွာ ဝိဿဇ္ဇေဟိ။
ဝိဿဇ္ဇနာ – အဒိန္နံ ဘန္တေ အာဒိယန္တော တိဿော အာပတ္တိယော အာပဇ္ဇတိ၊ ပဉ္စ မာသကံဝါ အတိရေက ပဉ္စ မာသကံဝါ အဂ္ဃနကံ အဒိန္နံ ထေယျသင်္ခါတံ အာဒိယတိ အာပတ္တိ ပါရာဇိကဿ၊ ဦနပဉ္စမာသကံဝါ အတိရေကမာသကံဝါ အဒိန္နံ ထေယျသင်္ခါတံ အာဒိယတိ အာပတ္တိ ထုလ္လစ္စယဿ၊ မာသကံဝါ ဦနမာသကဝါ အဂ္ဃနကံ အဒိန္နံ ထေယျသင်္ခါတံ အာဒိယတိ အာပတ္တိ ဒုက္ကဋဿ၊ အဒိန္နံ ဘန္တေ အာဒိယန္တော ဣမာ တိဿော အာပတ္တိယော အာပဇ္ဇတိ။
ပုစ္ဆာ – ကေသံ ¶ အာဝုသော အနာပတ္တိ။
ဝိဿဇ္ဇနာ – ဒသန္နံ ဘန္တေ ပုဂ္ဂလာနံ အနာပတ္တိ၊ သကသညိဿ၊ ဝိဿာသဂ္ဂါဟေန ဂဏှန္တဿ၊ တာဝကာလိကံ ဂဏှန္တဿ၊ ပေတပရိဂ္ဂဟံ ဂဏှန္တဿ၊ တိရစ္ဆာနဂတပရိဂ္ဂဟံ ဂဏှန္တဿ၊ ပံသုကူလသညိဿ၊ ဥမ္မတ္တကဿ၊ ခိတ္တစိတ္တဿ၊ ဝေဒနာဋ္ဋဿ၊ အာဒိကမ္မိကဿာတိ။
ပုစ္ဆာ – ပဉ္စန္နံ အာဝုသော ပါတိမောက္ခုဒ္ဒေသာနံ ကတ္ထောဂဓံ ကတ္ထပရိယာပန္နံ။
ဝိဿဇ္ဇနာ – နိဒါနောဂဓံ ဘန္တေ နိဒါနပရိယာပန္နံ။
ပုစ္ဆာ – ကတမေန ¶ အာဝုသော ဥဒ္ဒေသေန ဥဒ္ဒေသံ အာဂစ္ဆတိ။
ဝိဿဇ္ဇနာ – ဒုတိယေန ဘန္တေ ဥဒ္ဒေသေန ဥဒ္ဒေသံ အာဂစ္ဆတိ။
ပုစ္ဆာ – စတုန္နံ အာဝုသော ဝိပတ္တီနံ ကတမာ ဝိပတ္တိ။
ဝိဿဇ္ဇနာ – သီလဝိပတ္တိ ဘန္တေ။
ပုစ္ဆာ – သတ္တန္နံ အာဝုသော အာပတ္တိက္ခန္ဓာနံ ကတမော အာပတ္တိက္ခန္ဓော။
ဝိဿဇ္ဇနာ – ပါရာဇိကာပတ္တိက္ခန္ဓော ဘန္တေ။
ပုစ္ဆာ – ဆန္နံ အာဝုသော အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌာတိ။
ဝိဿဇ္ဇနာ – တီဟိ ဘန္တေ သမုဋ္ဌာနေဟိ သမုဋ္ဌာတိ၊ သိယာ ကာယတောစ စိတ္တတောစ သမုဋ္ဌာတိ၊ န ဝါစာတော၊ သိယာ ဝါစာတောစ
စိတ္တတောစ ¶ သမုဋ္ဌာတိ၊ န ကာယတော၊ သိယာ ကာယတောစ ဝါစာတောစ စိတ္တတောစ သမုဋ္ဌာတိ။
ပုစ္ဆာ – စတုန္နံ အာဝုသော အဓိကရဏာနံ ကတမံ အဓိကရဏံ။
ဝိဿဇ္ဇနာ – အာပတ္တာဓိကရဏံ ဘန္တေ။
ပုစ္ဆာ – သတ္တန္နံ အာဝုသော သမထာနံ ကတိဟိ သမထေဟိ သမ္မတိ။
ဝိဿဇ္ဇနာ – ဒွိဟိ ဘန္တေ သမထေဟိ သမ္မတိ သမ္မုခါဝိနယေနစ ပဋိညာတ ကရဏေနစ။
ပုစ္ဆာ – ကော ¶ အာဝုသော တတ္ထ ဝိနယော၊ ကော တတ္ထ အဘိဝိနယော။
ဝိဿဇ္ဇနာ – ပညတ္တိ ဘန္တေ ဝိနယော ဝိဘတ္တိ အဘိဝိနယော။
ပုစ္ဆာ – ကိံအာဝုသော တတ္ထ ပါတိမောက္ခံ ကိံ တတ္ထ အဓိပါတိမောက္ခံ။
ဝိဿဇ္ဇနာ – ပညတ္တိ ဘန္တေ ပါတိမောက္ခံ၊ ဝိဘတ္တိ အဓိပါတိမောက္ခံ။
ပုစ္ဆာ – ကာ အာဝုသော ဝိပတ္တိ။
ဝိဿဇ္ဇနာ – အသံဝရော ဘန္တေ ဝိပတ္တိ။
ပုစ္ဆာ – ကာ ¶ အာဝုသော သမ္ပတ္တိ။
ဝိဿဇ္ဇနာ – သံဝရော ဘန္တေ သမ္ပတ္တိ။
ပုစ္ဆာ – ကာ အာဝုသော ပဋိပတ္တိ။
ဝိဿဇ္ဇနာ – န ဧဝရူပံ ကရိဿာမီတိ ယာဝဇီဝံ အာပါဏကောဋိကံ သမာဒါယ သိက္ခတိ သိက္ခာပဒေသု အယံ ဘန္တေ တတ္ထ ပဋိပတ္တိ။
ပုစ္ဆာ – ကတိ အာဝုသော အတ္ထဝသေ ပဋိစ္စ ဘဂဝတာ ဒုတိယံ ပါရာဇိကံ ပညတ္တံ။
ဝိဿဇ္ဇနာ – ဒသ ဘန္တေ အတ္ထဝသေ ပဋိစ္စ ဘဂဝတာ ဒုတိယံ ပါရာဇိကံ ပညတ္တံ။ သင်္ဃသုဋ္ဌုတာယ သင်္ဃဖာသုတာယ ဒုမ္မင်္ကူနံ ပုဂ္ဂလာနံ နိဂ္ဂဟာယ ပေသလာနံ ဘိက္ခူနံ ဖာသုဝိဟာရာယ ဒိဋ္ဌဓမ္မိကာနံ အာသဝါနံ သံဝရာယ သမ္ပရာယိကာနံ အာသဝါနံ ပဋိဃာတာယ အပ္ပသန္နာနံ ပသာဒါယ ပသန္နာနံ ဘိယျောဘာဝါယ သဒ္ဓမ္မဋ္ဌိတိယာ ဝိနယာနုဂ္ဂဟာယ။
ပုစ္ဆာ – ကော ¶ အာဝုသော သိက္ခန္တိ။
ဝိဿဇ္ဇနာ – သေက္ခာစ ဘန္တေ ပုထုဇ္ဇနကလျာဏကာစ သိက္ခန္တိ။
ပုစ္ဆာ – ကေ အာဝုသော သိက္ခိတသိက္ခာ။
ဝိဿဇ္ဇနာ – အရဟန္တော ဘန္တေ သိက္ခိတသိက္ခာ။
ပုစ္ဆာ – ကတ္ထ ¶ အာဝုသော ဌိတံ။
ဝိဿဇ္ဇနာ – သိက္ခာကာမေသု ဘန္တေ ဌိတံ။
ပုစ္ဆာ – ကေ အာဝုသော ဓာရေန္တိ။
ဝိဿဇ္ဇနာ – ယေသံ ဘန္တေ ဝတ္တတိ တေ ဓာရေန္တိ။
ပုစ္ဆာ – ကဿ အာဝုသော ဝစနံ။
ဝိဿဇ္ဇနာ – ဘဂဝတာ ဘန္တေ ဝစနံ အရဟတော သမ္မာသမ္မုဒ္ဓဿ။
ပုစ္ဆာ – ကေနာဝုသော ¶ အာဘတံ။
ဝိဿဇ္ဇနာ – ပရမ္ပရာယ ဘန္တေ အာဘတံ။
ပုစ္ဆာ – အတ္ထိ နု ခေါ အာဝုသော တတ္ထ ဥပနေတဗ္ဗံ ဝါ အပနေတဗ္ဗံ ဝါ အက္ခရပဒပစ္စာဘဋ္ဌံ ဝါ ဝိရဒ္ဓပဒဗျဉ္ဇနံ ဝါ။
ဝိဿဇ္ဇနာ – နတ္ထိ ဘန္တေ။
‘‘သံဂါယနတ္ထာယ သင်္ဃဿ ဉာပနံ’’
သုဏာတု ¶ မေ ဘန္တေ သင်္ဃော အဟံ ဘန္တေ အာယသ္မန္တံ ဝိစိတ္တသာရာဘိဝံသ တိပိဋကဓရဓမ္မဘဏ္ဍာဂါရိကံ ဒုတိယဿ ပါရာဇိကဿ နိဒါနမ္ပိ ပုစ္ဆိံ၊ ပုဂ္ဂလမ္ပိ ပုစ္ဆိံ၊ ဝတ္ထုမ္ပိ ပုစ္ဆိံ၊ ပညတ္တိမ္ပိ ပုစ္ဆိံ၊ အနုပညတ္တိမ္ပိ ပုစ္ဆိံ၊ အာပတ္တိမ္ပိ ပုစ္ဆိံ၊ အနာပတ္တိမ္ပိ ပုစ္ဆိံ၊ အညာနိပိ ဤဒိသာနိ ပုစ္ဆိတဗ္ဗဋ္ဌာနာနိ အနေကာနိ ပုစ္ဆိံ၊ ပုဋ္ဌော ပုဋ္ဌောစ သော အာယသ္မာ ဝိစိတ္တသာရာဘိဝံသော ဝိဿဇ္ဇေသိ။ ဣတိ ဟိဒံ ဘန္တေ ဣဒံ ဒုတိယံ ပါရာဇိက သိက္ခာပဒံ နိမ္မလံ၊ သုပရိသုဒ္ဓံ၊ တဿေဝ ဘဂဝတော ဝစနံ အရဟတော သမ္မာသမ္ဗုဒ္ဓဿ၊ တသ္မာ ယထာ ပုရေ မဟာကဿ ပါဒယော မဟာထေရဝရာ ပေါရာဏသံဂီတိကာရာ ဗြဟ္မစရိယသင်္ခါတဿ ဗုဒ္ဓသာသနဿ စိရဋ္ဌိတိယာ၊ ဗဟုဇနဟိတာယ၊ ဗဟုဇနသုခါယ လောကာနုကမ္ပာယ အတ္ထာယ၊ ဟိတာယ၊ သုခါယ၊ ဒေဝမနုဿာနံ ဓမ္မဝိနယံ သင်္ဂါယိံသုစေဝ အနုသင်္ဂါယိံသုစ၊ ဧဝမေဝ မယမ္ပိ ဒါနိ သဗ္ဗေဝ ဆဋ္ဌသံဂီတိမဟာဓမ္မသဘာပရိယာပန္နာ ဣဒံ ဒုတိယ ပါရာဇိက သိက္ခာပဒံ ဧကတော ဂဏသဇ္ဈာယံ ကတွာ သမဂ္ဂါ သမ္မောဒမာနာ ဟုတွာ သင်္ဂါယေယျာမ။
တတိယ ပါရာဇိက သိက္ခာပုစ္ဆာ
ပုစ္ဆာ – ယံ ¶ တေန အာဝုသော ဘဂဝတာ (ပ) သမ္မာသမ္ဗုဒ္ဓေန တတိယံ ပါရာဇိကံ ကတ္ထ ပညတ္တံ။
ဝိဿဇ္ဇနာ – ဝေသာလိယံ ဘန္တေ ပညတ္တံ။
ပုစ္ဆာ – ကံ အာဝုသော အာရဗ္ဘ ပညတ္တံ။
ဝိဿဇ္ဇနာ – သမ္ဗဟုလေ ဘန္တေ ဘိက္ခူ အာရဗ္ဘ ပညတ္တံ။
ပုစ္ဆာ – ကိသ္မိံ အာဝုသော ဝတ္ထုသ္မိံ ပညတ္တံ။
ဝိဿဇ္ဇနာ – သမ္ဗဟုလာ ဘန္တေ ဘိက္ခု အညမညံ ဇီဝိတာ ဝေါရောပေသုံ၊ တသ္မိံ ဘန္တေ ဝတ္ထုသ္မိံ ပညတ္တံ။
ပုစ္ဆာ – အတ္ထိ ¶ နုခေါ အာဝုသော တတ္ထ ပညတ္တိ အနုပညတ္တိ အနုပ္ပန္နပညတ္တိ။
ဝိဿဇ္ဇနာ – ဧကာ ဘန္တေ ပညတ္တိ၊ ဧကာ အနုပညတ္တိ၊ အနုပ္ပန္နပညတ္တိ တသ္မိံ နတ္ထိ။
ပုစ္ဆာ – ကာ အာဝုသော တတ္ထ မူလပညတ္တိ။
ဝိဿဇ္ဇနာ – ယောပန ဘိက္ခု သဉ္စိစ္စ မနုဿဝိဂ္ဂဟံ ဇီဝိတာ ဝေါရောပေယျ၊ သတ္ထဟာရကံဝါဿ ပရိယေသေယျ အယမ္ပိ ပါရာဇိကော ဟောတိ အသံဝါသောတိ အယံ ဘန္တေ တတ္ထ မူလပညတ္တိ။
ပုစ္ဆာ – ကာ အာဝုသော တတ္ထ အနုပညတ္တိ။
ဝိဿဇ္ဇနာ – မရဏဝဏ္ဏံ ဝါ သံဝဏ္ဏေယျ မရဏာယ ဝါ သမာဒပေယျ အမ္ဘောပုရိသ ကိံ တုယှိမိနာ ပါပကေန ဒုဇ္ဇီဝိတေန မတန္တေ ဇီဝိတာ
သေယျာတိ ¶ ဣတိ စိတ္တမနော စိတ္တသင်္ကပ္ပော အနေကပရိယာယေန မရဏဝဏ္ဏံ ဝါ သံဝဏ္ဏေယျ မရဏာယ ဝါ သမာဒပေယျာတိ အယံ ဘန္တေ တတ္ထ အနုပညတ္တိ။
ပုစ္ဆာ – ကာ အာဝုသော တတ္ထ ပရိပုဏ္ဏပညတ္တိ။
ဝိဿဇ္ဇနာ – ယော ပန ဘိက္ခု သဉ္စိစ္စ မနုဿဝိဂ္ဂဟံ ဇီဝိတာ ဝေါရောပေယျ၊ သတ္ထဟာရကံဝါဿ ပရိယေသေယျ၊ မရဏဝဏ္ဏံ ဝါ သံဝဏ္ဏေယျ၊ မရဏာယ ဝါ သမာဒပေယျ၊ အမ္ဘော ပုရိသ ကိံ တုယှိမိနာ ပါပကေန ဒုဇ္ဇီဝိတေန မတန္တေ ဇီဝိတာ သေယျောတိ ဣတိ စိတ္တမနော စိတ္တသင်္ကပ္ပော အနေကပရိယာယေန မရဏဝဏ္ဏံဝါ သံဝဏ္ဏေယျ၊ မရဏာယ ဝါ သမာဒပေယျ၊ အယမ္ပိ ပါရာဇိကော ဟောတိ အသံဝါသောတိ အယံ ဘန္တေ တတ္ထ ပရိပုဏ္ဏပညတ္တိ။
ပုစ္ဆာ – သဗ္ဗတ္ထပညတ္တိ ¶ နုခေါ အာဝုသောပဒေသပညတ္တိ နုခေါ။
ဝိဿဇ္ဇနာ – သဗ္ဗတ္ထပညတ္တိ ဘန္တေ။
ပုစ္ဆာ – သာဓာရဏပညတ္တိနုခေါ အာဝုသော အသာဓာရဏပညတ္တိ နုခေါ။
ဝိဿဇ္ဇနာ – သာဓာရဏပညတ္တိ ဘန္တေ။
ပုစ္ဆာ – ဧကတောပညတ္တိ ¶ နုခေါ အာဝုသော ဥဘတောပညတ္တိ နုခေါ။
ဝိဿဇ္ဇနာ – ဥဘတောပညတ္တိ ဘန္တေ။
ပုစ္ဆာ – တသ္မိံ အာဝုသော တတိယ ပါရာဇိကေ သဉ္စိစ္စ မနုဿဝိဂ္ဂဟံ ဇီဝိတာ ဝေါရောပေန္တော ကတိ အာပတ္တိယော အာပဇ္ဇတိ။
ဝိဿဇ္ဇနာ – သဉ္စိဿ ဘန္တေ မနုဿဝိဂ္ဂဟံ ဇီဝိတာ ဝေါရောပေန္တော တိဿော အာပတ္တိယော အာပဇ္ဇတိ၊ မနုဿံ ဩဒိဿ ပပါတံ ခဏတိ ပပတိတွာ မရိဿတီတိ အာပတ္တိ ဒုက္ကဋဿ၊ ပပတိတေ ဒုက္ခာ ဝေဒနာ ဥပ္ပဇ္ဇတိ အာပတ္တိ ထုလ္လစ္စယဿ၊ မရတိ အာပတ္တိ ပါရာဇိကဿ၊ သဉ္စိစ္စ ဘန္တေ မနုဿဝိဂ္ဂဟံ ဇီဝိတာ ဝေါရောပေန္တော ဣမာ တိဿော အာပတ္တိယော အာပဇ္ဇတိ။
ပုစ္ဆာ – ကေသံ ¶ အာဝုသော အနာပတ္တိ။
ဝိဿဇ္ဇနာ – သတ္တန္နံ ဘန္တေ ပုဂ္ဂလာနံ အနာပတ္တိ၊ အသဉ္စိစ္စ မာရေန္တဿ၊ အဇာနန္တဿ၊ န မရဏာဓိပ္ပာယဿ၊ ဥမ္မတ္တကဿ၊ ခိတ္တစိတ္တဿ၊ ဝေဒနာဋ္ဋဿ၊ အာဒိကမ္မိကဿ။
ပုစ္ဆာ – ပဉ္စန္နံ အာဝုသော ပါတိမောက္ခုဒ္ဒေသာနံ ကတ္ထောဂဓံ ကတ္ထ ပရိယာပန္နံ။
ဝိဿဇ္ဇနာ – နိဒါနောဂဓံ ဘန္တေ နိဒါနပရိယာပန္နံ။
ပုစ္ဆာ – ကတမေန ¶ အာဝုသော ဥဒ္ဒေသေန ဥဒ္ဒေသံ အာဂစ္ဆတိ။
ဝိဿဇ္ဇနာ – ဒုတိယေန ဘန္တေ ဥဒ္ဒေသေန ဥဒ္ဒေသံ အာဂစ္ဆတိ။
ပုစ္ဆာ – စတုန္နံ အာဝုသော ဝိပတ္တီနံ ကတမာ ဝိပတ္တိ။
ဝိဿဇ္ဇနာ – သီလဝိပတ္တိ ဘန္တေ။
ပုစ္ဆာ – သတ္တန္နံ အာဝုသော အာပတ္တိက္ခန္ဓာနံ ကတမော အာပတ္တိက္ခန္ဓော။
ဝိဿဇ္ဇနာ – ပါရာဇိကာပတ္တိက္ခန္ဓော ဘန္တေ။
ပုစ္ဆာ – ဆန္နံ အာဝုသော အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌာတိ။
ဝိဿဇ္ဇနာ – ဆန္နံ ဘန္တေ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ၊ သိယာ ကာယတောစ စိတ္တတောစ သမုဋ္ဌာတိ၊ န ဝါစတော ¶ ၊ သိယာ ဝါစတောစ စိတ္တတောစ သမုဋ္ဌာတိ၊ န ကာယတော၊ သိယာ ကာယတောစ ဝါစတောစ စိတ္တတောစ သမုဋ္ဌာတိ။
ပုစ္ဆာ – စတုန္နံ အာဝုသော အဓိကရဏာနံ ကတမံ အဓိကရဏံ။
ဝိဿဇ္ဇနာ – အာပတ္တာဓိကရဏံ ဘန္တေ။
ပုစ္ဆာ – သတ္တန္နံ ¶ အာဝုသော သမထာနံ ကတိဟိ သမထေဟိ သမ္မတိ။
ဝိဿဇ္ဇနာ – သတ္တာနံ ဘန္တေ သမထာနံ ဒွီဟိ သမထေဟိ သမ္မတိ၊ သမ္မုခါ ဝိနယေနစ ပဋိညာတကရဏေနစ။
ပုစ္ဆာ – ကော တတ္ထ အာဝုသော ဝိနယော ကော တတ္ထ အဘိဝိနယော။
ဝိဿဇ္ဇနာ – ပညတ္တိ ဘန္တေ ဝိနယော ဝိဘတ္တိ အဘိဝိနယော။
ပုစ္ဆာ – ကိံ အာဝုသော တတ္ထ ပါတိမောက္ခံ ကိံ အဓိပါတိမောက္ခံ။
ဝိဿဇ္ဇနာ – ပညတ္တိ ဘန္တေ ပါတိမောက္ခံ ဝိဘတ္တိ အဓိပါတိမောက္ခံ။
ပုစ္ဆာ – ကာ ¶ အာဝုသော ဝိပတ္တိ။
ဝိဿဇ္ဇနာ – အသံဝရော ဘန္တေ ဝိပတ္တိ။
ပုစ္ဆာ – ကာ အာဝုသော သမ္ပတ္တိ။
ဝိဿဇ္ဇနာ – သံဝရော ဘန္တေ သမ္ပတ္တိ။
ပုစ္ဆာ – ကာ အာဝုသော တတ္ထ ပဋိပတ္တိ။
ဝိဿဇ္ဇနာ – န ဧဝရူပံ ကရိဿာမီတိ ယာဝဇီဝံ အာပါဏကောဋိကံ သမာဒါယ သိက္ခတိ သိက္ခာပဒေသု အယံ ဘန္တေ တတ္ထ ပဋိပတ္တိ။
ပုစ္ဆာ – ကတိ ¶ အာဝုသော အတ္ထဝသေ ပဋိစ္စ ဘဂဝတာ တတိယံ ပါရာဇိကံ ပညတ္တံ။
ဝိဿဇ္ဇနာ – ဒသ ဘန္တေ အတ္ထဝသေ ပဋိစ္စ ဘဂဝတာ တတိယံ ပါရာဇိကံ ပညတ္တံ သင်္ဃသုဋ္ဌုတာယ သင်္ဃဖာသုတာယ (ပ) ဝိနယာနုဂ္ဂဟာယ။
ပုစ္ဆာ – ကေ ¶ အာဝုသော သိက္ခန္တိ။
ဝိဿဇ္ဇနာ – သေက္ခာစ ဘန္တေ ပုထုဇ္ဇနကလျာဏကာစ သိက္ခန္တိ။
ပုစ္ဆာ – ကေ အာဝုသော သိက္ခိတသိက္ခာ။
ဝိဿဇ္ဇနာ – အရဟန္တော ဘန္တေ သိက္ခိတသိက္ခာ။
ပုစ္ဆာ – ကတ္ထ အာဝုသော ဌိတံ။
ဝိဿဇ္ဇနာ – သိက္ခာကာမေသု ဘန္တေ ဌိတံ။
ပုစ္ဆာ – ကေ အာဝုသော ဓာရေန္တိ။
ဝိဿဇ္ဇနာ – ယေသံ ဘန္တေ ဝတ္တတိ တေ ဓာရေန္တိ။
ပုစ္ဆာ – ကဿ ¶ အာဝုသော ဝစနံ။
ဝိဿဇ္ဇနာ – ဘဂဝတော ဘန္တေ ဝစနံ အရဟတော သမ္မာသမ္ဗုဒ္ဓဿ။
ပုစ္ဆာ – ကေနာဝုသော အာဘတံ။
ဝိဿဇ္ဇနာ – ပရမ္ပရာယ ဘန္တေ အာဘတံ။
ပုစ္ဆာ – အတ္ထိနုခေါ အာဝုသော တတ္ထ ကိဉ္စိ ဥပနေတဗ္ဗံ ဝါ အပနေတဗ္ဗံ ဝါ အက္ခရပဒပစ္စာဘဋ္ဌံ ဝါ ဝိရဒ္ဓပဒဗျဉ္ဇနံ ဝါ။
ဝိဿဇ္ဇနာ – နတ္ထိ ဘန္တေ။
သံဂါယနတ္ထာယ သင်္ဃဿ ဉာပနံ
သုဏာတု ¶ မေ ဘန္တေ သင်္ဃော၊ အဟံ ဘန္တေ အာယသ္မန္တံ ဝိစိတ္တသာရာဘိဝံသံ တိပိဋကဓရ ဓမ္မဘဏ္ဍာဂါရိကံ တတိယဿ ပါရာဇိကဿ နိဒါနမ္ပိ ပုစ္ဆိံ၊ ပုဂ္ဂလမ္ပိ ပုစ္ဆိံ၊ ဝတ္ထုမ္ပိ ပုစ္ဆိံ၊ ပညတ္တိမ္ပိ ပုစ္ဆိံ၊ အနုပညတ္တိမ္ပိ ပုစ္ဆိံ၊ အာပတ္တိမ္ပိ ပုစ္ဆိံ၊ အနာပတ္တိမ္ပိ ပုစ္ဆိံ၊ အညာနိပိ ဧဝရူပါနိ ပုစ္ဆိတဗ္ဗဋ္ဌာနာနိ အနေကာနိ ပုစ္ဆိံ၊ ပုဋ္ဌော ပုဋ္ဌောစ သော အာယသ္မာ ဝိစိတ္တသာရာဘိဝံသော ဝိဿဇ္ဇေသိ၊ ဣတိဟိဒံ ဘန္တေ တတိယပါရာဇိကသိက္ခာပဒံ နိမ္မလံ သုပရိသုဒ္ဓံ တဿေဝ ဘဂဝတော ဝစနံ အရဟတော သမ္မာသမ္မုဒ္ဓဿ၊ တသ္မာ ယထာ ပုရေ မဟာကဿပါဒယော မဟာထေရဝရာ ပေါရာဏသံဂီတိကာရာ ဗြဟ္မစရိယသင်္ခါတဿ ဗုဒ္ဓသာသနဿ စိရဋ္ဌိတိယာ ဗဟုဇနဟိတာယ ဗဟုဇနသုခါယ လောကာနုကမ္ပာယ အတ္ထာယ ဟိတာယ သုခါယ ဒေဝမနုဿာနံ ဓမ္မဝိနယံ သင်္ဂါယိံသုစေဝ အနုသင်္ဂါယိံသုစ၊ ဧဝမေဝ မယမ္ပိ ဒါနိ သဗ္ဗေဝ ဆဋ္ဌသံဂီတိမဟာဓမ္မသဘာပရိယာပန္နာ ဣဒံ တတိယပါရာဇိကသိက္ခာပဒံ ဧကတော ဂဏသဇ္ဈာယံ ကတွာ သမဂ္ဂါ သမ္မောဒမာနာ ဟုတွာ သံဂါယေယျာမ။
စတုတ္ထ ပါရာဇိက သိက္ခာပုစ္ဆာ
ပုစ္ဆာ – ယံ ¶ တေန အာဝုသော ဘဂဝတာ ဇာနတာ ပဿတာ…ပေ… သမ္မာသမ္ဗုဒ္ဓေန စတုတ္ထံ ပါရာဇိကံ ကတ္ထ ပညတ္တံ။
ဝိဿဇ္ဇနာ – ဝေသာလိယံ ဘန္တေ။
ပုစ္ဆာ – ကံ အာဝုသော အာရဗ္ဘ ပညတ္တံ။
ဝိဿဇ္ဇနာ – ဝဂ္ဂုမုဒါတီရိယေ ဘန္တေ ဘိက္ခူ အာရဗ္ဘ ပညတ္တံ။
ပုစ္ဆာ – ကိသ္မိံ အာဝုသော ဝတ္ထုသ္မိံ ပညတ္တံ။
ဝိဿဇ္ဇနာ – ဝဂ္ဂုမုဒါတီရိယာ ဘန္တေ ဘိက္ခူ ဂိဟီနံ အညမညဿ ဥတ္တရိမနုဿဓမ္မဿ ဝဏ္ဏံ ဘာသိံသု၊ တသ္မိံ ဘန္တေ ဝတ္ထုသ္မိံ ပညတ္တံ။
ပုစ္ဆာ – အတ္ထိ ¶ အာဝုသော တတ္ထ ပညတ္တိ အနုပညတ္တိ အနုပ္ပန္နပညတ္တိ။
ဝိဿဇ္ဇနာ – ဧကာ ဘန္တေ ပညတ္တိ ဧကာ အနုပညတ္တိ အနုပ္ပန္နပညတ္တိ တသ္မိံ နတ္ထိ။
ပုစ္ဆာ – ကတမာ အာဝုသော တတ္ထ မူလပညတ္တိ။
ဝိဿဇ္ဇနာ – ယော ပန ဘိက္ခု အနဘိဇာနံ ဥတ္တရိမနုဿဓမ္မံ ဥတ္တရိမနုဿဓမ္မံ အတ္တုပနာယိကံ အလမရိယဉာဏဒဿနံ သမုဒါစရေယျ၊ ဣတိဇာနာမိ ဣတိပဿာမီတိ၊ တတော အပရေန သမယေန သမနုဂ္ဂါဟီယ မာနောဝါ အသမနုဂ္ဂါဟီယ မာနောဝါ အာပန္နော ဝိသုဒ္ဓါပေက္ခော ဧဝံ ဝဒေယျ အဇာနမေဝံ အာဝုသော အဝစံ ဇာနာမိ အပဿံ ပဿာမိ တုစ္ဆံ မုသာဝိလပိန္တိ အယမ္ပိ ပါရာဇိကော ဟောတိ အသံဝါသောတိ အယံ ဘန္တေ တတ္ထ မူလပညတ္တိ။
ပုစ္ဆာ – ကတမာ ¶ အာဝုသော တတ္ထ အနုပညတ္တိ။
ဝိဿဇ္ဇနာ – အညတြ အဓိမာနာတိ အယံ ဘန္တေ တတ္ထ အနုပညတ္တိ။
ဟောန္တိ ယေ တေ အာနန္ဒ ဘိက္ခူ အဒိဋ္ဌေ ဒိဋ္ဌသညိနော အပတ္တေ ပတ္တသညိနော အနဓိဂတေ အဓိဂတသညိနော အသစ္ဆိကတေ သစ္ဆိကတသညနော အဓိမာနေန အညံ ဗျာကရောန္တိ၊ တဉ္စ ခေါ ဧတံ အဗ္ဗောဟာရိကံ။
ပုစ္ဆာ – ကတမာ ¶ အာဝုသော တတ္ထ ပရိပုဏ္ဏပညတ္တိ။
ဝိဿဇ္ဇနာ – ယောပန ဘိက္ခု အနဘိဇာနံ ဥတ္တရိမနုဿဓမ္မံ အတ္တုပနာယိကံ အလမရိယဉာဏဒဿနံ သမုဒါစရေယျ၊ ဣတိ ဇာနာမိ ဣတိ ပဿာမီတိ၊ တတော အပရေန သမယေန သမနုဂ္ဂါဟီယမာနောဝါ အသမနုဂ္ဂါဟီယမာနောဝါ အာပန္နော ဝိသုဒ္ဓါပေက္ခော ဧဝံ ဝဒေယျ အဇာနမေဝံ အာဝုသော အဝစံဇာနာမိ အပဿံ ပဿာမိ တုစ္ဆံ မုသာ ဝိလပိန္တိ၊ အညတြ အဓိမာနာ အယမ္ပိ ပါရာဇိကော ဟောတိ အသံဝါသောတိ အယံ ဘန္တေ တတ္ထ ပရိပုဏ္ဏ ပညတ္တိ။
ပုစ္ဆာ – သဗ္ဗတ္ထပညတ္တိ ¶ နုခေါ အာဝုသော ပဒေသပညတ္တိ နုခေါ။
ဝိဿဇ္ဇနာ – သဗ္ဗတ္ထပညတ္တိ ဘန္တေ။
ပုစ္ဆာ – သာဓာရဏပညတ္တိ နုခေါ အာဝုသော အသာဓာရဏပညတ္တိနုခေါ။
ဝိဿဇ္ဇနာ – သာဓာရဏပညတ္တိ ဘန္တေ။
ပုစ္ဆာ – ဧကတောပညတ္တိ နုခေါ အာဝုသော ဥဘတော ပညတ္တိ နုခေါ။
ဝိဿဇ္ဇနာ – ဥဘတောပညတ္တိ ဘန္တေ။
ပုစ္ဆာ – တသ္မိံ ¶ အာဝုသော စတုတ္ထ ပါရာဇိကေ အသန္တံ အဘူတံ ဥတ္တရိမနုဿဓမ္မံ ဥလ္လပန္တော ကတိ အာပတ္တိယော အာပဇ္ဇတိ၊ ဝိဘဇိတွာ ဝိဿဇ္ဇေဟိ။
ဝိဿဇ္ဇနာ – တသ္မိံ ဘန္တေ စတုတ္ထပါရာဇိကေ အသန္တံ အဘူတံ ဥတ္တရိမနုဿဓမ္မံ ဥလ္လပန္တော တိဿော အာပတ္တိယော အာပဇ္ဇတိ၊ အသန္တံ အဘူတံ ဥတ္တရိမနုဿဓမ္မံ ဥလ္လပတိ အာပတ္တိပါရာဇိကဿ၊ ယော တေ ဝိဟာရေ ဝသတိ သော ဘိက္ခု အရဟာတိ ဘဏတိ ပဋိဝိဇာနန္တဿ အာပတ္တိ ထုလ္လစ္စယဿ၊ အပ္ပဋိဝိဇာနန္တဿ အာပတ္တိ ဒုက္ကဋဿ၊ ဥတ္တရိမနုဿဓမ္မံ ဘန္တေ ဥလ္လပန္တော ဣမာ တိဿော အာပတ္တိယော အာပဇ္ဇတိ။
ပုစ္ဆာ – ကေသံ ¶ အာဝုသော အနာပတ္တိ။
ဝိဿဇ္ဇနာ – ဆန္နံ ဘန္တေ ပုဂ္ဂလာနံ အနာပတ္တိ အဓိမာနေန ဘဏန္တဿ အနုလ္လပနာဓိပ္ပာယဿ ဥမ္မတ္တကဿ ခိတ္တစိတ္တဿ ဝေဒနာဋ္ဋဿ အာဒိကမ္မိကဿ။
ပုစ္ဆာ – ပဉ္စန္နံ ¶ အာဝုသော ပါတိမောက္ခုဒ္ဒေသာနံ ကတ္ထောဂဓံ ကတ္ထ ပရိယာပန္နံ။
ဝိဿဇ္ဇနာ – နိဒါနောဂဓံ ဘန္တေ နိဒါနပရိယာပန္နံ။
ပုစ္ဆာ – ကတမေန အာဝုသော ဥဒ္ဒေသေန ဥဒ္ဒေသံ အာဂစ္ဆတိ။
ဝိဿဇ္ဇနာ – ဒုတိယေန ဘန္တေ ဥဒ္ဒေသေန ဥဒ္ဒေသံ အာဂစ္ဆတိ။
ပုစ္ဆာ – စတုန္နံ အာဝုသော ဝိပတ္တီနံ ကတမာ ဝိပတ္တိ။
ဝိဿဇ္ဇနာ – သီလဝိပတ္တိ ဘန္တေ။
ပုစ္ဆာ – သတ္တန္နံ ¶ အာဝုသော အာပတ္တိက္ခန္ဓာနံ ကတမော အာပတ္တိက္ခန္ဓော။
ဝိဿဇ္ဇနာ – ပါရာဇိကာပတ္တိက္ခန္ဓော ဘန္တေ။
ပုစ္ဆာ – ဆန္နံ အာဝုသော အာပတ္တိသမုဋ္ဌာနာနံ ကတိဟိ သမုဋ္ဌာနေဟိ သမုဋ္ဌာတိ။
ဝိဿဇ္ဇနာ – ဆန္နံ ဘန္တေ အာပတ္တိသမုဋ္ဌာနာနံ တီဟိ သမုဋ္ဌာနေဟိ သမုဋ္ဌာတိ၊ သိယာ ကာယတောစ စိတ္တတောစ သမုဋ္ဌာတိ၊ န ဝါစတော၊ သိယာ ဝါစတောစ စိတ္တတောစ သမုဋ္ဌာတိ၊ န ကာယတော၊ သိယာ ကာယတောစ ဝါစတောစ စိတ္တတောစ သမုဋ္ဌာတိ။
ပုစ္ဆာ – စတုန္နံ ¶ အာဝုသော အဓိကရဏာနံ ကတမံ အဓိကရဏံ။
ဝိဿဇ္ဇနာ – အာပတ္တာဓိကရဏံ ဘန္တေ။
ပုစ္ဆာ – သတ္တန္နံ အာဝုသော သမထာနံ ကတိဟိ သမထေဟိ သမ္မတိ။
ဝိဿဇ္ဇနာ – သတ္တန္နံ ဘန္တေ သမထာနံ ဒွီဟိ သမထေဟိ သမ္မတိ၊ သမ္မုခါဝိနယေနစ ပဋိညာတကရဏေနစ။
ပုစ္ဆာ – ကော တတ္ထ အာဝုသော ဝိနယော၊ ကော တတ္ထ အဘိဝိနယော။
ဝိဿဇ္ဇနာ – ပညတ္တိ ဘန္တေ ဝိနယော၊ ဝိဘတ္တိ အဘိဝိနယော။
ပုစ္ဆာ – ကိံ ¶ အာဝုသော တတ္ထ ပါတိမောက္ခံ၊ ကိံ အဓိပါတိမောက္ခံ။
ဝိဿဇ္ဇနာ – ပညတ္တိ ဘန္တေ ပါတိမောက္ခံ၊ ဝိဘတ္တိ အဓိပါတိမောက္ခံ။
ပုစ္ဆာ – ကာ အာဝုသော ဝိပတ္တိ။
ဝိဿဇ္ဇနာ – အသံဝရော ဘန္တေ ဝိပတ္တိ။
ပုစ္ဆာ – ကာ အာဝုသော သမ္ပတ္တိ။
ဝိဿဇ္ဇနာ – သံဝရော ဘန္တေ သမ္ပတ္တိ။
ပုစ္ဆာ – ကာ ¶ အာဝုသော တတ္ထ ပဋိပတ္တိ။
ဝိဿဇ္ဇနာ – န ဧဝရူပံ ကရိဿာမီတိ ယာဝဇီဝံ အာပါဏကောဋိကံ သမာဒါယ သိက္ခတိ သိက္ခာပဒေသု အယံ ဘန္တေ တတ္ထ ပဋိပတ္တိ။
ပုစ္ဆာ – ကတိ အာဝုသော အတ္ထဝသေ ပဋိစ္စ ဘဂဝတာ စတုတ္ထံ ပါရာဇိကံ ပညတ္တံ။
ဝိဿဇ္ဇနာ – ဒသ ဘန္တေ အတ္ထဝသေ ပဋိစ္စ ဘဂဝတာ စတုတ္ထံ ပါရာဇိကံ ပညတ္တံ၊ သင်္ဃသုဋ္ဌုတာယ သင်္ဃဖာသုတာယ…ပေ… ဝိနယာနုဂ္ဂဟာယ။
ပုစ္ဆာ – ကေ ¶ အာဝုသော သိက္ခန္တိ။
ဝိဿဇ္ဇနာ – သေက္ခာစ ဘန္တေ ပုထုဇ္ဇနကလျာဏကာစ သိက္ခန္တိ။
ပုစ္ဆာ – ကေ အာဝုသော သိက္ခိတသိက္ခာ။
ဝိဿဇ္ဇနာ – အရဟန္တော ဘန္တေ သိက္ခိတသိက္ခာ။
ပုစ္ဆာ – ကတ္ထ အာဝုသော ဌိတံ။
ဝိဿဇ္ဇနာ – သိက္ခာကာမေသု ဘန္တေ ဌိတံ။
ပုစ္ဆာ – ကေ အာဝုသော ဓာရေန္တိ။
ဝိဿဇ္ဇနာ – ယေသံ ဘန္တေ ဝတ္တတိ တေ ဓာရေန္တိ။
ပုစ္ဆာ – ကဿ ¶ အာဝုသော ဝစနံ။
ဝိဿဇ္ဇနာ – ဘဂဝတော ဘန္တေ ဝစနံ အရဟတော သမ္မာသမ္ဗုဒ္ဓဿ။
ပုစ္ဆာ – ကေနာဝုသော အာဘတံ။
ဝိဿဇ္ဇနာ – ပရမ္ပရာယ ဘန္တေ အာဘတံ။
ပုစ္ဆာ – အတ္ထိ နုခေါ အာဝုသော တတ္ထ ကိဉ္စိ ဥပနေတဗ္ဗံ ဝါ အပနေတဗ္ဗံ ဝါ အက္ခရပဒပစ္စာဘဋ္ဌံ ဝါ ဝိရဒ္ဓပဒဗျဉ္ဇနံ ဝါ။
ဝိဿဇ္ဇနာ – နတ္ထိ ဘန္တေ။