📜

သင်္ဃာဒိသေသ သိက္ခာပုစ္ဆာ

၁။ သုက္ကဝိဿဋ္ဌိသင်္ဃာဒိသေသ သိက္ခာပုစ္ဆာ

ပုစ္ဆာ – ယံ ¶ တေန အာဝုသော ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန ဥပက္ကမိတွာ အသုစိံ မောစေန္တဿ သင်္ဃာဒိသေသော ကတ္ထ ပညတ္တော။

ဝိဿဇ္ဇနာ – သာဝတ္ထိယံ ဘန္တေ ပညတ္တော။

ပုစ္ဆာ – ကံ အာဝုသော အာရဗ္ဘ ပညတ္တော။

ဝိဿဇ္ဇနာ – အာယသ္မန္တံ ဘန္တေ သေယျသကံ အာရဗ္ဘ ပညတ္တော။

ပုစ္ဆာ – ကိသ္မိံ အာဝုသော ဝတ္ထုသ္မိံ ပညတ္တော။

ဝိဿဇ္ဇနာ – အာယသ္မာ ဘန္တေ သေယျသကော ဟတ္ထေန ဥပက္ကမိတွာ အသုစိံ မောစေသိ၊ တသ္မိံ ဘန္တေ ဝတ္ထုသ္မိံ ပညတ္တော။

ပုစ္ဆာ – အတ္ထိ ¶ အာဝုသော တတ္ထ ပညတ္တိ အနုပညတ္တိ အနုပ္ပန္နပညတ္တိ။

ဝိဿဇ္ဇနာ – ဧကာ ဘန္တေ ပညတ္တိ၊ ဧကာ အနုပညတ္တိ၊ အနုပ္ပန္နပညတ္တိ တသ္မိံ နတ္ထိ။

ပုစ္ဆာ – ကတမာ အာဝုသော တတ္ထ မူလပညတ္တိ။

ဝိဿဇ္ဇနာ – သဉ္စေတနိကာ သုက္ကဝိဿဋ္ဌိ သင်္ဃာဒိသေသောတိ အယံ ဘန္တေ တတ္ထ မူလပညတ္တိ။

ပုစ္ဆာ – ကတမာ ပနာဝုသော တတ္ထ အနုပညတ္တိ။

ဝိဿဇ္ဇနာ – အညတြ သုပိနန္တာတိ အယံ ဘန္တေ တတ္ထ အနုပညတ္တိ။

ပုစ္ဆာ – ကတမာ ¶ ပနာဝုသော တတ္ထ ပရိပုဏ္ဏပညတ္တိ။

ဝိဿဇ္ဇနာ – သဉ္စေတနိကာ သုက္ကဝိဿဋ္ဌိ အညတြသုပိနန္တာ သင်္ဃာဒိသောတိ အယံ ဘန္တေ တတ္ထ ပရိပုဏ္ဏပညတ္တိ။

ပုစ္ဆာ – သာဓာရဏ ပညတ္တိနုခေါ အာဝုသော အသာဓာရဏ ပညတ္တိနုခေါ။

ဝိဿဇ္ဇနာ – အသာဓာရဏပညတ္တိ ဘန္တေ။

ပုစ္ဆာ – တတ္ထ အာဝုသော ဥပက္ကမိတွာ အသုစိံ မောစေန္တော ကတိ အာပတ္တိယော အာပဇ္ဇတိ။

ဝိဿဇ္ဇနာ – ဥပက္ကမိတွာ ဘန္တေ အသုစိံ မောစေန္တော တိဿော အာပတ္တိယော အာပဇ္ဇတိ၊ စေတေတိ ဥပက္ကမတိ မုစ္စတိ အာပတ္တိ

သင်္ဃာဒိသေသဿ ¶ ၊ စေတေတိ ဥပက္ကမတိ န မုစ္စတိ အာပတ္တိ ထုလ္လစ္စယဿ၊ ပယောဂေ ဒုက္ကဋံ။

ပုစ္ဆာ – ကေသံ အာဝုသော အနာပတ္တိ။

ဝိဿဇ္ဇနာ – ဆန္နံ ဘန္တေ အနာပတ္တိ သုပိနန္တေန မောစေန္တဿ န မောစနာဓိပ္ပာယဿ ဥမ္မတ္တကဿ ခိတ္တစိတ္တဿ ဝေဒနာဋ္ဋဿ အာဒိကမ္မိကဿ ဣမေသံ ခေါ ဘန္တေ ဆန္နံ အနာပတ္တိ။

ပုစ္ဆာ – ပဉ္စန္နံ ¶ အာဝုသော ပါတိမောက္ခုဒ္ဒေသာနံ ကတမေန ဥဒ္ဒေသေန ဥဒ္ဒေသံ အာဂစ္ဆတိ။

ဝိဿဇ္ဇနာ – ပဉ္စန္နံ ဘန္တေ ပါတိမောက္ခုဒ္ဒေသာနံ တတိယေန ဥဒ္ဒေသေန ဥဒ္ဒေသံ အာဂစ္ဆတိ။

ပုစ္ဆာ – စတုန္နံ အာဝုသော ဝိပတ္တီနံ ကတမာ ဝိပတ္တိ။

ဝိဿဇ္ဇနာ – စတုန္နံ ဘန္တေ ဝိပတ္တီနံ သီလဝိပတ္တိ။

ပုစ္ဆာ – ကာ အာဝုသော ဝိပတ္တိ။

ဝိဿဇ္ဇနာ – အသံဝရော ဘန္တေ ဝိပတ္တိ။

ပုစ္ဆာ – ကာ ¶ အာဝုသော သမ္ပတ္တိ။

ဝိဿဇ္ဇနာ – သံဝရော ဘန္တေ သမ္ပတ္တိ။

ပုစ္ဆာ – ကာ အာဝုသော ပဋိပတ္တိ။

ဝိဿဇ္ဇနာ – န ဧဝ ရူပံ ကရိဿာမီတိ ယာဝဇီဝံ အာပါဏကောဋိကံ သမာဒါယ သိက္ခတိ သိက္ခာပဒေသု အယံ ဘန္တေ ပဋိပတ္တိ။

ပုစ္ဆာ – ကတိ အာဝုသော အတ္ထဝသေ ပဋိစ္စ ဘဂဝတာ ဥပက္ကမိတွာ အသုစိံ မောစေန္တဿ သင်္ဃာဒိသေသော ပညတ္တော။

ဝိဿဇ္ဇနာ – ဒသ ¶ ဘန္တေ အတ္ထဝသေ ပဋိစ္စ ဘဂဝတာ ဥပက္ကမိတွာ အသုစိံ မောစေန္တဿ သင်္ဃာဒိသေသော ပညတ္တော သင်္ဃသုဋ္ဌုတာယ…ပေ… ဝိနယာနုဂ္ဂဟာယ။

ပုစ္ဆာ – ကတ္ထ အာဝုသော ဌိတံ။

ဝိဿဇ္ဇနာ – သိက္ခာကာမေသု ဘန္တေ ဌိတံ။

ပုစ္ဆာ – ကေ အာဝုသော ဓာရေန္တိ။

ဝိဿဇ္ဇနာ – ယေသံ ဘန္တေ ဝတ္တတိ တေ ဓာရေန္တိ။

ပုစ္ဆာ – ကဿ ¶ အာဝုသော ဝစနံ။

ဝိဿဇ္ဇနာ – ဘဂဝတော ဘန္တေ ဝစနံ အရဟတော သမ္မာသမ္ဗုဒ္ဓဿ။

ပုစ္ဆာ – ကေနာဝုသော အာဘတံ။

ဝိဿဇ္ဇနာ – ပရမ္ပရာယ ဘန္တေ အာဘတံ။

ပုစ္ဆာ – အတ္ထိ နုခေါ အာဝုသော တတ္ထ သနိဒါနေ သပဒဘာဇနီယေ သဝိနီတဝတ္ထုကေ ဥပနေတဗ္ဗံ ဝါ အပနေတဗ္ဗံ ဝါ အက္ခရပဒပစ္စာဘဋ္ဌံ ဝါ ဝိရဒ္ဓပဒဗျဉ္ဇနံ ဝါ။

သံဂါယနတ္ထာယ သင်္ဃဿ ဉာပနံ

သုဏာတု ¶ မေ ဘန္တေ သင်္ဃော အာယသ္မန္တံ ဝိစိတ္တသာရာဘိဝံသံ တိပိဋကဓရ ဓမ္မဘဏ္ဍာဂါရိကံ ပဌမဿ သင်္ဃာဒိသေသ သိက္ခာပဒဿ နိဒါနမ္ပိ ပုစ္ဆိံ၊ ပုဂ္ဂလမ္ပိ ပုစ္ဆိံ၊ ဝတ္ထုမ္ပိ ပုစ္ဆိံ၊ ပညတ္တိမ္ပိ ပုစ္ဆိံ၊ အနုပညတ္တိမ္ပိ ပုစ္ဆိ၊ အာပတ္တိမ္ပိ ပုစ္ဆိံ၊ အနာပတ္တိမ္ပိ ပုစ္ဆိံ၊ အညာနိပိ ဧဝရူပါနိ အနေကာနိ ပုစ္ဆိတဗ္ဗဋ္ဌာနာနိ ပုစ္ဆိံ၊ ပုဋ္ဌော ပုဋ္ဌော စ သော အာယသ္မာ ဝိစိတ္တသာရာဘိဝံသော ဝိဿဇ္ဇေသိ၊ ဣတိဟိဒံ ဘန္တေ ပဌမ သင်္ဃာဒိသေသ သိက္ခာပဒံ သပရိဝါရံ နိမ္မလံ သုပရိသုဒ္ဓံ တဿေဝ ဘဂဝတော ဝစနံ အရဟတော သမ္မာသမ္ဗုဒ္ဓဿ။ တသ္မာ ယထာပုရေ မဟာကဿပါဒယော မဟာထေရဝရာ ပေါရာဏသံဂီတိကာရာ ဗြဟ္မစရိယဿ စိရဋ္ဌိတိယာ ဗဟုဇနဟိတာယ ဗဟုဇနသုခါယ လောကာနုကမ္ပာယ အတ္ထာယ ဟိတာယ သုခါယ ဒေဝမနုဿာနံ ¶ ဓမ္မဝိနယံ သံဂါယိံသုစေဝ အနုသံဂါယိံသုစ၊ ဧဝမေဝ မယမ္ပိ သဗ္ဗေဝ ဆဋ္ဌသံဂီတိမဟာဓမ္မသဘာ ပရိယာပန္နာ ဣဒံ ပဌမံ သင်္ဃာဒိသေသ သိက္ခာပဒံ နိဒါနတော ပဋ္ဌာယ ဧကစ္စာနံ ဝစသာ သဇ္ဈာယဝသေန ဧကစ္စာနံ မနသာ မနသိကရဏဝသေနစ ဧကတော ဂဏသဇ္ဈာယံ ကတွာ သံဂါယေယျာမ။

ပုစ္ဆာ – ယံ ¶ တေန အာဝုသော ဘဂဝတာ…ပေ… သမ္မာသမ္ဗုဒ္ဓေန မာတုကာမေန သဒ္ဓိံ ကာယသံသဂ္ဂံ သမာပဇ္ဇန္တဿ စ၊ မာတုဂါမံ ဒုဋ္ဌုလ္လာဟိ ဝါစာဟိ ဩဘာသန္တဿ စ၊ မာတုဂါမဿ သန္တိကေ အတ္တကာမ ပါရိစရိယာယ ဝဏ္ဏံ ဘာသန္တဿ စ၊ သဉ္စရိတ္တံ သမာပဇ္ဇန္တဿ စ သင်္ဃာဒိသေသော ကတ္ထ ပညတ္တော။

ဝိဿဇ္ဇနာ – သာဝတ္ထိယံ ဘန္တေ ပညတ္တော။

ပုစ္ဆာ – ကံ ¶ အာဝုသော အာရဗ္ဘ ပညတ္တော။

ဝိဿဇ္ဇနာ – အာယသ္မန္တံ ဘန္တေ ဥဒါယိတ္ထေရံ အာရဗ္ဘ ပညတ္တော။

ပုစ္ဆာ – ကိသ္မိံ အာဝုသော ဝတ္ထုသ္မိံ ပညတ္တော။

ဝိဿဇ္ဇနာ – အာယသ္မာ ဘန္တေ ဥဒါယိတ္ထေရော မာတုဂါမေန သဒ္ဓိံ ကာယသံသဂ္ဂံ သမာပဇ္ဇိ၊ အာယသ္မာယေဝ ဘန္တေ ဥဒါယိတ္ထေရော မာတုဂါမံ ဒုဋ္ဌုလ္လာဟိ ဝါစာဟိ ဩဘာသိ၊ အာယသ္မာယေဝ ဘန္တေ ဥဒါယိတ္ထေရော မာတုဂါမဿ သန္တိကေ အတ္တကာမ ပါရိစရိယာယ ဝဏ္ဏံ အဘာသိ၊ အာယသ္မာယေဝ ဘန္တေ ဥဒါယိတ္ထေရော သဉ္စရိတ္တံ သမာပဇ္ဇိံ၊ တသ္မိံ ဘန္တေ ဝတ္ထုသ္မိံ ပညတ္တော။

၆။ ကုဋိကာရ သင်္ဃာဒိသေသ သိက္ခာပုစ္ဆာ

ပုစ္ဆာ – ယံ ¶ တေန အာဝုသော…ပေ… သမ္မာသမ္ဗုဒ္ဓေန သညာစိကာယ ကုဋိံ ကာရာပေန္တဿ သင်္ဃာဒိသေသော ကတ္ထ ပညတ္တော။

ဝိဿဇ္ဇနာ – အာဠဝိယံ ဘန္တေ ပညတ္ထော။

ပုစ္ဆာ – ကံ အာဝုသော အာရဗ္ဘ ပညတ္တော။

ဝိဿဇ္ဇနာ – အာဠဝိကေ ဘန္တေ ဘိက္ခူ အာရဗ္ဘ ပညတ္တော။

ပုစ္ဆာ – ကိသ္မိံ ¶ အာဝုသော ဝတ္ထုသ္မိံ ပညတ္တော။

ဝိဿဇ္ဇနာ – အာဠဝိကာ ဘန္တေ ဘိက္ခူ သညာစိကာယော ကုဋိယော ကာရာပေသုံ၊ တသ္မိံ ဘန္တေ ဝတ္ထုသ္မိံ ပညတ္တော။

၇။ ဝိဟာရကာရ သင်္ဃာဒိသေသ သိက္ခာပုစ္ဆာ

ပုစ္ဆာ – ယံ တေန အာဝုသော…ပေ… သမ္မာသမ္ဗုဒ္ဓေန မဟလ္လကံ ဝိဟာရံ ကာရာပေန္တဿ သင်္ဃာဒိသေသော ကတ္ထ ပညတ္တော။

ဝိဿဇ္ဇနာ – ကောသမ္ဗိယံ ဘန္တေ။

ပုစ္ဆာ – ကံ ¶ အာဝုသော အာရဗ္ဘ ပညတ္တော။

ဝိဿဇ္ဇနာ – အာယသ္မန္တံ ဘန္တေ ဆန္နတ္ထေရံ အာရဗ္ဘ ပညတ္တော။

ပုစ္ဆာ – ကိသ္မိံ အာဝုသော ဝတ္ထုသ္မိံ ပညတ္တော။

ဝိဿဇ္ဇနာ – အာယသ္မာ ဘန္တေ ဆန္နော ဝိဟာရဝတ္ထုံ သောဓေန္တော အညတရံ စေတိယရုက္ခံ ဆေဒါပေသိ ဂါမပူဇိတံ နိဂမပူဇိတံ နဂရ ပူဇိတံ ဇနပဒပူဇိတံ ရဋ္ဌပူဇိတံ၊ တသ္မိံ ဘန္တေ ဝတ္ထုသ္မိံ ပညတ္တော။

၈-၉။ ဒုဋ္ဌဒေါသ သင်္ဃာဒိသေသ သိက္ခာပုစ္ဆာ

ပုစ္ဆာ – ယံ တေန အာဝုသော ဘဂဝတာ…ပေ… သမ္မာသမ္ဗုဒ္ဓေန ဘိက္ခုံ အမူလကေန ပါရာဇိကေန ဓမ္မေန အနုဒ္ဓံသေန္တဿ စ၊ ဘိက္ခုံ အညဘာဂိယဿ အဓိကရဏဿ ကိဉ္စိဒေသံ လေသမတ္တံ ဥပါဒါယ ပါရာဇိကေန ဓမ္မေန အနုဒ္ဓံသေန္တဿ စ သင်္ဃာဒိသေသော ကတ္ထ ပညတ္တော။

ဝိဿဇ္ဇနာ – ရာဇဂဟေ ¶ ဘန္တေ ပညတ္တော။

ပုစ္ဆာ – ကံ အာဝုသော အာရဗ္ဘ ကိသ္မိံ ဝတ္ထုသ္မိံ ပညတ္တော။

ဝိဿဇ္ဇနာ – မေတ္တိယဘူမဇကာ ဘန္တေ ဘိက္ခူ အာရဗ္ဘ ပညတ္တော၊ မေတ္တိယဘူမဇကာ ဘန္တေ ဘိက္ခူ အာယသ္မန္တံ ဒဗ္ဗံ မလ္လပုတ္တံ အမူလကေန ပါရာဇိကေန ဓမ္မေန အနုဒ္ဓံသေသုံ၊ တေယေဝ ဘန္တေ မေတ္တိယဘူမဇကာ ဘိက္ခူ အာယသ္မန္တံ ဒဗ္ဗံ မလ္လပုတ္တံ အညဘာဂိယဿ အဓိကရဏဿ ကိဉ္စိဒေသံ လေသမတ္တံ ဥပါဒါယ ပါရာဇိကေန ဓမ္မေန အနုဒ္ဓံသေသုံ၊ တသ္မိံ ဘန္တေ ဝတ္ထုသ္မိံ၊ ပညတ္တော။

၁၀။ သင်္ဃဘေဒက သင်္ဃာဒိသေသ သိက္ခာပုစ္ဆာ

ပုစ္ဆာ – ယံ ¶ တေန အာဝုသော ဘဂဝတာ…ပေ… သမ္မာသမ္ဗုဒ္ဓေန သင်္ဃဘေဒကဿ ဘိက္ခုနော ယာဝတတိယံ သမနုဘာသနာယ အပ္ပဋိနိဿဇ္ဇန္တဿ သင်္ဃာဒိသေသော ကတ္ထ ပညတ္တော။

ဝိဿဇ္ဇနာ – ရာဇဂဟေ ဘန္တေ ပညတ္တော။

ပုစ္ဆာ – ကံ ¶ အာဝုသော အာရဗ္ဘ ကိသ္မိံ ဝတ္ထုသ္မိံ ပညတ္ထော။

ဝိဿဇ္ဇနာ – ဒေဝဒတ္တံ ဘန္တေ အာရဗ္ဘ ပညတ္တော။

ဒေဝဒတ္တော ဘန္တေ သမဂ္ဂဿ သင်္ဃဿ ဘေဒါယ ပရက္ကမိ၊ တသ္မိံ ဘန္တေ ဝတ္ထုသ္မိံ ပညတ္တော။

၁၁။ ဘေဒါနုဝတ္တက သိက္ခာပုစ္ဆာ

ပုစ္ဆာ – ယံ ¶ တေန အာဝုသော ဘဂဝတာ…ပေ… သမ္မာသမ္ဗုဒ္ဓေန ဘေဒါနုဝတ္တကာနံ ဘိက္ခူနံ ယာဝတတိယံ သမနုဘာသနာယ အပ္ပဋိနိဿဇ္ဇန္တာနံ သင်္ဃာဒိသေသော ကတ္ထ ပညတ္တော။

ဝိဿဇ္ဇနာ – ရာဇဂဟေ ဘန္တေ ပညတ္တော။

ပုစ္ဆာ – ကံ အာဝုသော အာရဗ္ဘ ကိသ္မိံ ဝတ္ထုသ္မိံ ပညတ္တော။

ဝိဿဇ္ဇနာ – သမ္ဗဟုလေ ဘန္တေ ဘိက္ခူ အာရဗ္ဘ ပညတ္တော၊ သမ္ဗဟုလာ ဘန္တေ ဘိက္ခူ ဒေဝဒတ္တဿ သင်္ဃာဘေဒါယ ပရက္ကမန္တဿ အနုဝတ္တကာ အဟေသုံ ဝဂ္ဂဝါဒကာ၊ တသ္မိံ ဘန္တေ ဝတ္ထုသ္မိံ ပညတ္တော။

၁၂။ ဒုဗ္ဗစ၊ သင်္ဃာဒိသေသ သိက္ခာပုစ္ဆာ

ပုစ္ဆာ – ယံ ¶ တေန အာဝုသော ဘဂဝတာ…ပေ… သမ္မာသမ္ဗုဒ္ဓေန ဒုဗ္ဗစဿ ဘိက္ခုနော ယာဝတတိယံ သမနုဘာသနာယ အပ္ပဋိနိဿဇ္ဇန္တဿ သင်္ဃာဒိသေသော ကတ္ထ ပညတ္တော။

ဝိဿဇ္ဇနာ – ကောသမ္ဗိယံ ဘန္တေ ပညတ္တော။

ပုစ္ဆာ – ကံ ¶ အာဝုသော အာရဗ္ဘ ကိသ္မိံ ဝတ္ထုသ္မိံ ပညတ္တော။

ဝိဿဇ္ဇနာ – အာယသ္မန္တံ ဘန္တေ ဆန္နံ အာရဗ္ဘ ပညတ္တော၊ အာယသ္မာ ဘန္တေ ဆန္နော ဘိက္ခူဟိ သဟဓမ္မိကံ ဝုစ္စမာနော အတ္တာနံ အဝစနီယံ အကာသိ၊ တသ္မိံ ဘန္တေ ဝတ္ထုသ္မိံ ပညတ္တော။

၁၃။ ကုလဒူသက သင်္ဃာဒိသေသ သိက္ခာပုစ္ဆာ

ပုစ္ဆာ – ယံ ¶ တေန အာဝုသော ဘဂဝတာ…ပေ… သမ္မာသမ္ဗုဒ္ဓေန ကုလဒူသကဿ ဘိက္ခုနော ယာဝတတိယံ သမနုဘာသနာယ အပ္ပဋိနိဿဇ္ဇန္တဿ သင်္ဃာဒိသေသော ကတ္ထ ပညတ္တော။

ဝိဿဇ္ဇနာ – သာဝတ္ထိယံ ¶ ဘန္တေ ပညတ္တော။

ပုစ္ဆာ – ကံ အာရဗ္ဘ အာဝုသော ကိသ္မိံ ဝတ္ထုသ္မိံ ပညတ္တော။

ဝိဿဇ္ဇနာ – အဿဇိ ပုနဗ္ဗသုကေ ဘန္တေ ဘိက္ခူ အာရဗ္ဘ ပညတ္တော၊ အဿဇိပုနဗ္ဗသုကာ ဘန္တေ ဘိက္ခူ သင်္ဃေန ပဗ္ဗာဇနီယကမ္မကတာ ဆန္ဒဂါမိတာ ဒေါသဂါမိတာ မောဟဂါမိတာ ဘယဂါမိတာ ပါပေသုံ၊ တသ္မိံ ဘန္တေ ဝတ္ထုသ္မိံ ပညတ္တော။

အနိယတ သိက္ခာပုစ္ဆာ

ပုစ္ဆာ – ယံ ¶ တေန အာဝုသော ဘဂဝတာ…ပေ… သမ္မာသမ္ဗုဒ္ဓေန ပဌမော စ အနိယတော ဒုတိယော စ အနိယတော ကတ္ထ ပညတ္တော။

ဝိဿဇ္ဇနာ – သာဝတ္ထိယံ ဘန္တေ ပညတ္တော။

ပုစ္ဆာ – ကံ အာဝုသော အာရဗ္ဘ ကိသ္မိံ ဝတ္ထုသ္မိံ ပညတ္တော။

ဝိဿဇ္ဇနာ – အာယသ္မန္တံ ဘန္တေ ဥဒါယိံ အာရဗ္ဘ ပညတ္တော၊ အာယသ္မာ ဘန္တေ ဥဒါယီ မာတုဂါမေန သဒ္ဓိံ ဧကောဧကာယ ရဟော ပဋိစ္ဆန္နေ အာသနေ အလံကမ္မနိယေ နိသဇ္ဇံ ကပ္ပေသိ၊ တသ္မိဉ္စ ဝတ္ထုသ္မိံ၊ အာယသ္မာယေဝ ဘန္တေ ဥဒါယီ မာတုဂါမေန သဒ္ဓိံ ရဟော နိသဇ္ဇံ အကာသိ၊ တသ္မိဉ္စ ဘန္တေ ဝတ္ထုသ္မိံ ပညတ္တော။

ပုစ္ဆာ – ကဿ ¶ အာဝုသော ဝစနံ။

ဝိဿဇ္ဇနာ – ဘဂဝတော ဘန္တေ ဝစနံ အရဟတော သမ္မာသမ္ဗုဒ္ဓဿ။

ပုစ္ဆာ – ကေနာဝုသော အာဘတံ။

ဝိဿဇ္ဇနာ – ပရမ္ပရာယ ဘန္တေ အာဘတံ။

ပုစ္ဆာ – အတ္ထိ နုခေါ အာဝုသော ဧတ္ထ ကောစိပိ ဝိရဒ္ဓဒေါသော။

ဝိဿဇ္ဇနာ – နတ္ထိ ဘန္တေ။

သံဂါယနတ္ထာယ သင်္ဃဿဉာပနံ

သုဏာတု ¶ မေ ဘန္တေ သင်္ဃော၊ အဟံ ဘန္တေ အာယသ္မန္တံ ဝိစိတ္တသာရာဘိဝံသံ တိပိဋကဓရ ဓမ္မဘဏ္ဍာဂါရိကံ ပဌမ ဒုဋ္ဌဒေါသ သိက္ခာပဒတော ပဋ္ဌာယ ပုစ္ဆိတဗ္ဗာနိ အနေကာနိ ဌာနာနိ ပုစ္ဆိံ၊ သော စ အာယသ္မာ ပုဋ္ဌော ပုဋ္ဌော ဝိဿဇ္ဇေတိ၊ ဣတိဟိဒံ ဘန္တေ သဗ္ဗံ သိက္ခာပဒံ နိမ္မလံ သုပရိသုဒ္ဓံ တဿေဝ ဘဂဝတော ဝစနံ အရဟတော သမ္မာသမ္ဗုဒ္ဓဿ၊ တသ္မာ ယထာပုရေ မဟာကဿပါဒယော မဟာထေရဝရာ ပေါရာဏသံဂီတိကာရာ ဗြဟ္မစရိယဿ စိရဋ္ဌိတိယာ ဗဟုဇနဟိတာယ ဗဟုဇနသုခါယ လောကာနုကမ္ပာယ အတ္ထာယ ဟိတာယ သုခါယ ဒေဝမနုဿာနံ သံဂါယိံသုစေဝ အနုသံဂါယိံသုစ၊ ဧဝမေဝ မယမ္ပိ ဒါနိ သဗ္ဗေဝ ဆဋ္ဌသံဂီတိ မဟာဓမ္မသဘာပရိယာပန္နာ ဣမာနိ သိက္ခာပဒါနိ ဧကတော ဂဏသဇ္ဈာယံ ကတွာ သံဂါယေယျာမ။