အည > သင်္ဂါယန-ပုစ္ဆ ဝိဿဇ္ဇနာ > ဝိနယပိဋက (ပု-ဝိ)

ဝိဿဇ္ဇနာ – မဟာဝဂ္ဂေ ဘန္တေ ဒသခန္ဓကာ ပရိယာပန္နာ၊ သေယျထိဒံ၊ မဟာခန္ဓကော ဥပေါသထက္ခန္ဓကော ဝဿူပနာယိကက္ခန္ဓကော ပဝါရဏာက္ခန္ဓကော စမ္မက္ခန္ဓကော ဘေသဇ္ဇက္ခန္ဓကော ကထိနက္ခန္ဓကော စီဝရက္ခန္ဓကော စမ္ပေယျက္ခန္ဓကော ကောသမ္ဗကက္ခန္ဓကောတိ။

ပုစ္ဆာ – မဟာခန္ဓကေ အာဝုသော ဗဟူ ကထာယော၊ ကတမာ တာသံ အာဒိကထာ။

ဝိဿဇ္ဇနာ – မဟာခန္ဓကေ ဘန္တေ ဗောဓိကထာ အာဒိ။

ပုစ္ဆာ – တသ္မာတိဟ ¶ အာဝုသော တတော ပဋ္ဌာယ တံ ပုစ္ဆိဿာမိ၊ ဘဂဝါ အာဝုသော ပဌမာဘိသမ္ဗုဒ္ဓကာလေ ကတ္ထ ကီဝစီရံ ကေနာကာရေန ဝိဟာသိ။

ဝိဿဇ္ဇနာ – ဘဂဝါ ဘန္တေ ပဌမာဘိသမ္ဗုဒ္ဓါ ဗောဓိရုက္ခမူလေ သတ္တာဟံ ဧကပလ္လင်္ကေန ဝိဟာသိ ဝိမုတ္တိသုခံ ပဋိသံဝေဒီ။

ပုစ္ဆာ – တဒါ အာဝုသော ဘဂဝါ ကီဒိသံ ဓမ္မံ မနသိကတွာ ကီဒိသံ ဥဒါနံ ဥဒါနေသိ။

ဝိဿဇ္ဇနာ – တဒါ ဘန္တေ ဘဂဝါ ရတ္တိယာ ပဌမံ ယာမံ ရတ္တိယာ မဇ္ဈိမံ ယာမံ ရတ္တိယာ ပစ္ဆိမံ ယာမံ ပဋိစ္စသမုပ္ပာဒံ အနုလောမံ ပဋိလောမံ မနသိကတွာ တီဏိ ဥဒါနာနိ ဥဒါနေသိ။

ပုစ္ဆာ – တဿ ¶ အာဝုသော သတ္တာဟဿ အစ္စယေန ဘဂဝါ ကတ္ထ ဝိဟာသိ။

ဝိဿဇ္ဇနာ – တဿ ဘန္တေ သတ္တာဟဿ အစ္စယေန ဘဂဝါ အဇပါလ နိဂြောဓမူလေ ဝိဟာသိ၊ သတ္တာဟံ ဧကပလ္လင်္ကေန ဝိဟာသိ ဝိမုတ္တိသုခံ ပဋိသံဝေဒီ။

ပုစ္ဆာ – တဿပိ အာဝုသော သတ္တာဟဿ အစ္စယေန ဘဂဝါ ကတ္ထ ဝိဟာသိ။

ဝိဿဇ္ဇနာ – တဿ ¶ ဘန္တေ သတ္တာဟဿ အစ္စယေန ဘဂဝါ မုစလိန္ဒမူလေ သတ္တာဟံ ဧကပလ္လင်္ကေန နိသီဒိ။

ပုစ္ဆာ – တဿပိ အာဝုသော သတ္တာဟဿ အစ္စယေန ဘဂဝါ ကတ္ထ ဝိဟာသိ။

ဝိဿဇ္ဇနာ – တဿပိ ဘန္တေ သတ္တာဟဿ အစ္စယေန ဘဂဝါ ရာဇာယတနမူလေ သတ္တာဟံ ဧကပလ္လင်္ကေန နိသီဒိ ဝိမုတ္တိသုခံ ပဋိသံဝေဒီ။

ပုစ္ဆာ – တဿပိ ¶ အာဝုသော သတ္တာဟဿ အစ္စယေန ဘဂဝါ ကတ္ထ ဝိဟာသိ။

ဝိဿဇ္ဇနာ – တဿ ဘန္တေ သတ္တာဟဿ အစ္စယေန ဘဂဝါ ပုနဒေဝ အဇပါလနိဂြောဓမူလေ ဝိဟာသိ။

ပုစ္ဆာ – တသ္မိံ ပန အာဝုသော အဇပါလနိဂြောဓေ ဝိဟရန္တဿ ဘဂဝတော ကထံ စေတသော ပရိဝိတက္ကော ဥဒပါဒိ။

ဝိဿဇ္ဇနာ – တသ္မိံ ပန ဘန္တေ အဇပါလနိဂြောဓေ ဝိဟရန္တဿ ဘဂဝတော ရဟောဂတဿ ပဋိသလ္လီနဿ ဓမ္မဂမ္ဘီရတာပဋိသံယုတ္တော စေတသော ပရိဝိတက္ကော ဥဒပါဒိ။

အဓိဂတော ခေါ မျာယံ ဓမ္မော ဂမ္ဘီရော ဒုဒ္ဒသော အရနုဗောဓော သန္တော ပဏီတော အတက္ကာဝစရာ နိပုဏော ပဏ္ဍိတဝေဒနီယော။

အာလယရာမာခေါ ¶ ပနာယံ ပဇာ အာလယရတာ အာလယသမ္မုဒိတာ၊

ပုစ္ဆာ – ကထံ အာဝုသော တဒါ ဓမ္မဒေသနာယ ဗြဟ္မယာစနာ စ ဘဂဝတော ပဋိညာစ အဟောသိ။

ဝိဿဇ္ဇနာ – ဒေသေတု ဘန္တေ ဘဂဝါ ဓမ္မံ၊ ဒေသေတု သုဂတော ဓမ္မံ၊ သန္တိ သတ္တာ အပ္ပရဇက္ခဇာတိကာ အဿဝနတာ ဓမ္မဿ ပရိဟာယန္တိ၊ ဘဝိဿန္တိ ဓမ္မဿ အညာတာရောတိ ဣတိ ဘန္တေ ဗြဟ္မုနော ဓမ္မဒေသနာယ ယာစနာ အဟောသိ၊

ယေ သောတဝန္တော ပမုဉ္စန္တု သဒ္ဓံ၊

ဓမ္မံ ပဏီတံ မနုဇေသု ဗြဟ္မေ’’တိ။

ဧဝံ ခေါ ဘန္တေ ဘဂဝတော ဓမ္မဒေသနာယ ပဋိညာ စ အဟောသိ။

ယေ သောတဝန္တော ပမုဉ္စန္တု သဒ္ဓံ။

ပုစ္ဆာ – ဧဝံ ¶ ခေါ အာဝုသော ဘဂဝါ ဓမ္မဒေသနာယ ပဋိညံ ကတွာ ပဌမံ ဓမ္မံ ဒေသေန္တော ကတ္ထ ကီဒိသံ ဓမ္မံ ကဿ ဒေသေသိ။

ဝိဿဇ္ဇနာ – ဗာရာဏသိယံ ဘန္တေ ဣသိပတနေ မိဂဒါယေ ပဉ္စဝဂ္ဂိယ ဘိက္ခုပမုခါနံ ဗြဟ္မဂဏာနံ ဓမ္မစက္ကပဝတ္တနသုတ္တံ ဒေသေသိ။

ပုစ္ဆာ – တသ္မိံ ¶ ခေါ ပန အာဝုသော ဓမ္မစက္ကပဝတ္တနသုတ္တေ ဒေသိယမာနေ မနုဿလောကေ ကဿ ဓမ္မာဘိသမယော အဟောသိ။

ဝိဿဇ္ဇနာ – အာယသ္မတော ဘန္တေ ကောဏ္ဍညဿ ဓမ္မာဘိသမယော အဟောသိ။

ပုစ္ဆာ – ကထံ နု ခေါ အာဝုသော ဣမသ္မိံ ဗုဒ္ဓသာသနေ ပဌမံ ပဗ္ဗဇ္ဇာ စ ဥပသမ္ပဒါ စ အဟောသိ။

ဝိဿဇ္ဇနာ – ဣမသ္မိံ ဘန္တေ ဗုဒ္ဓသာသနေ ပဌမံ ဧဟိဘိက္ခုပသမ္ပဒါ အဟောသိ။

လဘေယျာဟံ ¶ ဘန္တေ ဘဂဝတော သန္တိကေ ပဗ္ဗဇံ၊ လဘေယျံ ဥပသမ္ပဒံ။

ဧဟိ ဘိက္ခု သွာခါတော ဓမ္မော၊ စရ ဗြဟ္မစရိယံ သမ္မာ ဒုက္ခဿ အန္တကိရိယာယ။

ပုစ္ဆာ – ဣတရေသံ ပန အာဝုသော စတုန္နံ ပဉ္စဝဂ္ဂိယာနံ ကဒါ ဓမ္မာဘိသမယော အဟောသိ။

ဝိဿဇ္ဇနာ – ပါဋိပဒေ ဘန္တေ ဒိဝသေ အာယသ္မတော ဝပ္ပဿ၊ ဒုတိယေ ဘန္တေ ဒိဝသေ အာယသ္မတော ဘဒ္ဒိယဿ၊ တတိယေ ဘန္တေ ဒိဝသေ အာယသ္မတော မဟာနာမဿ၊ စတုတ္ထေ ဘန္တေ ဒိဝသေ အာယသ္မတော အဿဇိဿ ဓမ္မာဘိသမယော အဟောသိ။

ပုစ္ဆာ – သဗ္ဗေသမ္ပိ ¶ အာဝုသော တေသံ ပဉ္စဝဂ္ဂိယာနံ ဘိက္ခူနံ ကဒါ အရဟတ္တပတ္တိ ဟောတိ။

ဝိဿဇ္ဇနာ – သဗ္ဗေသမ္ပိ ဘန္တေ တေသံ ပဉ္စဝဂ္ဂိယာနံ ဘိက္ခူနံ ပက္ခဿ ပဉ္စမိယံ အနတ္တလက္ခဏသုတ္တေ ဒေသိယမာနေ အရဟတ္တပတ္တိ ဟောတိ။

ပုစ္ဆာ – ကဒါ အာဝုသော ဘဂဝတာ ဘိက္ခူ တတ္ထ တတ္ထ စာရိကံ စရိတွာ ဓမ္မဒေသနတ္ထာယ ပေသိတာ။

ဝိဿဇ္ဇနာ – ယသပ္ပမုခါနံ ဘန္တေ စတုပညာသ သဟာယကာနံ ပဗ္ဗဇိတကာလေ ဘဂဝတာ ဘိက္ခူ တတ္ထ တတ္ထ စာရိကံ စရိတွာ ဓမ္မဒေသနတ္ထာယ ပေသိတာ။

ပုစ္ဆာ – ကဒါ ¶ အာဝုသော ဘဂဝတာ တီဟိ သရဏဂမနေဟိ ပဗ္ဗဇ္ဇူပ သမ္ပဒါ အနုညာတော အဟောသိ။

ဝိဿဇ္ဇနာ – ယသပ္ပမုခါနံ ဘန္တေ စတုပညာသာယ ဂိဟိ သဟာယကာနံ ပဗ္ဗဇိတွာ တတ္ထ တတ္ထ စာရိကံ စရိတွာ ဓမ္မဒေသနတ္ထာယ ပေသိတကာလေ ဘဂဝတာ တီဟိ သရဏဂမနေဟိ ပဗ္ဗဇ္ဇာ စ ဥပသမ္ပဒါ စ အနုညာတာ။

အနုဇာနာမိ ¶ ဘိက္ခဝေ တုမှေဝ ဒါနိ တာသု တာသု ဒိသာသု တေသု တေသု ဇနပဒေသု ပဗ္ဗာဇေထ ဥပသမ္ပာဒေထ။

ပုစ္ဆာ – ဘဂဝတာ အာဝုသော ဘိက္ခူနံ အာရာမော ပဋိဂ္ဂဏှိတုံ ကတ္ထ ကိသ္မိံ ဝတ္ထုသ္မိံ အနုညာတော။

ဝိဿဇ္ဇနာ – ဘဂဝတာ ဘန္တေ ဘိက္ခူနံ အာရာမံ ပဋိဂ္ဂဏှိတုံ ရာဇဂဟေ အနုညာတော၊ ရာဇာ ဘန္တေ မာဂဓော သေနိယော ဗိမ္ဗိသာရော ဗုဒ္ဓပ္ပမုခဿ ဘိက္ခုသင်္ဃဿ ဝေဠုဝနံ ဥယျာနံ အဒါသိ၊ တသ္မိံ ဘန္တေ ဝတ္ထုသ္မိံ အနုညာတော။

ဧတာဟံ ¶ ဘန္တေ ဝေဠုဝနံ ဥယျာနံ ဗုဒ္ဓပ္ပမုခဿ ဘိက္ခုသင်္ဃဿ ဒမ္မိ –

ပုစ္ဆာ – ကထဉ္စ ¶ အာဝုသော ဒွိန္နံ အဂ္ဂသာဝကာနံ ပဗ္ဗဇ္ဇူပသမ္ပဒါ အဟောသိ။

ဝိဿဇ္ဇနာ – ဒွိန္နံ ဘန္တေ အဂ္ဂသာဝကာနံ ဧဟိ ဘိက္ခုပသမ္ပဒါ အဟောသိ။

ဝိပ္ပသန္နာနိ ¶ ခေါ တေ အာဝုသော ဣန္ဒြိယာနိ။

ကံသိ တွံ အာဝုသော ဥဒ္ဒိဿ ပဗ္ဗဇိတော။

အတ္ထာဝုသော မဟာသမဏော သကျပုတ္တော သကျကုလာ ပဗ္ဗဇိတော။

ကိံ ဝါဒီ ပနာယသ္မတော သတ္ထာ ကိမက္ခာယီ။

ယေ ¶ ဓမ္မာ ဟေတုပ္ပဘဝါ၊ တေသံ ဟေတုံ တထာဂတော၊

အာဟ တေသဉ္စ ယော နိရောဓော၊ ဧဝံ ဝါဒီ မဟာသမဏော။

ဧတေ ဘိက္ခဝေ ဒွေ သဟာယကာ အာဂစ္ဆန္တိ ကောလိတော ဥပတိဿော စ ဧတံ မေ သာဝကယုဂံ ဘဝိဿတိ အဂ္ဂံ ဘဒ္ဒယုဂံ။

လဘေယျာမ ¶ မယံ ဘန္တေ ဘဂဝတော သန္တိကေ ပဗ္ဗဇ္ဇံ လဘေယျာမ ဥပသမ္ပဒံ။

ဧထ ဘိက္ခဝေါ သွာခါတော ဓမ္မော၊ စရထ ဗြဟ္မစရိယံ သမ္မာ ဒုက္ခဿ အန္တကိရိယာယ။

ပုစ္ဆာ – ဥပဇ္ဈာယော အာဝုသော ဂဏှိတုံ ဘဂဝတာ ကတ္ထ အနုညာတော၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတော။

ဝိဿဇ္ဇနာ – ရာဇဂဟေ ဘန္တေ သမ္ဗဟုလေ ဘိက္ခူ အာရဗ္ဘ အနုညာတော၊ သမ္ဗဟုလာ ဘန္တေ ဘိက္ခူ အနုပဇ္ဈာယကာ အနာစရိယကာ အနောဝဒိယမာနာ အနနုသာသိယမာနာ ဒုန္နိဝတ္ထာ ဒုပ္ပာရုတာ အနောကပ္ပသမ္ပန္နာ ပိဏ္ဍာယ စရိံသု၊ တသ္မိံ ဘန္တေ ဝတ္ထုသ္မိံ အနုညာတော။

ပုစ္ဆာ – ဥပဇ္ဈာယမှိ အာဝုသော န သမ္မာဝတ္တန္တဿ ဒုက္ကဋံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ¶ ဘန္တေ သမ္ဗဟုလေ သဒ္ဓိဝိဟာရိကေ အာရဗ္ဘ ပညတ္တံ၊ သမ္ဗဟုလာ ဘန္တေ သဒ္ဓိဝိဟာရိကာ ဥပဇ္ဈာယမှိ န သမ္မာဝတ္တိံသု၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ကဒါ အာဝုသော ဘဂဝတာ တီဟိ သရဏဂမနေဟိ ဥပသမ္ပဒံ ပဋိက္ခိပိတွာ ဉာတိစတုတ္ထေန ကမ္မေန ဥပသမ္ပဒါ အနုညာတာ။

ဝိဿဇ္ဇနာ – ရာဓဗြာဟ္မဏဿ ဘန္တေ ပဗ္ဗဇိတကာလေ ဘဂဝတာ တီဟိ သရဏဂမနေဟိ ဥပသမ္ပဒံ ပဋိက္ခိပိတွာ ဉာတ္တိစတုတ္ထေန ကမ္မေန ဥပသမ္ပဒါ အနုညာတာ။

ကောနု ¶ ခေါ ဘိက္ခဝေ တဿ ဗြာဟ္မဏဿ အဓိကာရံ သရတိ။

အဟံ ခေါ ဘန္တေ တဿ ဗြာဟ္မဏဿ အဓိကာရံ သရာမိ။

သာဓု သာဓု သာရိပုတ္တ၊ ကတညုနော ဟိ သာရိပုတ္တ သပ္ပုရိသာ ကတဝေဒိနော။

ကထာဟံ ဘန္တေ တံ ဗြာဟ္မဏံ ဥပသမ္ပာဒေမိ။

ယာသာ ¶ ဘိက္ခဝေ မယာ တီဟိ သရဏဂမနေဟိ ဥပသမ္ပဒါအနုညာတာ၊ တံ အဇ္ဇတဂ္ဂေ ပဋိက္ခိပါမိ။

အနုဇာနာမိ ဘိက္ခဝေ ဉာတ္တိစတုတ္ထေန ကမ္မေန ဥပသမ္ပာဒေတုံ။

ပုစ္ဆာ – အယာစိတကံ အာဝုသော ဥပသမ္ပဒါပေက္ခံ ဥပသမ္ပာဒေန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ အညတရံ ဘိက္ခုံ အာရဗ္ဘ ပညတ္တံ၊ အညတရော ဘန္တေ ဘိက္ခု ဥပသမ္ပန္နသမနန္တရံ အနာစာရံ အစရိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – စတုန္နံ ¶ အာဝုသော နိဿယာနံ အာစိက္ခဏာ ဘဂဝတာ ကတ္ထ အနုညာတာ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတာ။

ဝိဿဇ္ဇနာ – ရာဇဂဟေ ဘန္တေ အညတရံ ဘိက္ခုံ အာရဗ္ဘ အနုညာတာ၊ အညတရော ဘန္တေ ဘိက္ခု ဥဒရဿ ကာရဏာ ပဗ္ဗဇိ၊ တသ္မိံ ဘန္တေ ဝတ္ထုသ္မိံ အနုညာတာ။

ဧဟိ ¶ ဒါနိ အာဝုသော ပိဏ္ဍာယ စရိဿာမ။

ကထဉှိ နာမ ဘိက္ခု ဧဝံ သွာက္ခာတေ ဓမ္မဝိနယေ ဥဒရဿ ကာရဏာ ပဗ္ဗဇိဿတိ။

ပုစ္ဆာ – ဦနဒသဝဿေန ¶ အာဝုသော ဥပသမ္ပာဒေန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ အာယသ္မန္တံ ဥပသေနံ ဝင်္ဂန္တပုတ္တံ အာရဗ္ဘ ပညတ္တံ၊ အာယသ္မာ ဘန္တေ ဥပသေနော ဝင်္ဂန္တပုတ္တော ဧကဝဿော သဒ္ဓိဝိဟာရိကံ ဥပသမ္ပာဒေသိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ဗာလေန ¶ အာဝုသော အဗျတ္တေန ဥပသမ္ပာဒေန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ ‘‘ဒသဝဿမှာ ဒသဝဿမှာ’’တိ ဗာလာ အဗျတ္တာ ဥပသမ္ပာဒေသုံ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – အာစရိယော ¶ အာဝုသော ဂဏှိတုံ ဘဂဝတာ ကတ္ထ အနုညာတော၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတော။

ဝိဿဇ္ဇနာ – ရာဇဂဟေ ဘန္တေ သမ္ဗဟုလေ ဘိက္ခူ အာရဗ္ဘ အနုညာတော၊ သမ္ဗဟုလာ ဘန္တေ ဘိက္ခူ ဥပဇ္ဈာယေသု ပက္ကန္တေသုပိ ဝိဗ္ဘန္တေသုပိ ကာလင်္ကတေသုပိ ပက္ခသင်္ကန္တေသုပိ အနာစရိယကာ အနောဝဒိယမာနာ အနနုသာသိယမာနာ ဒုန္နိဝတ္ထာ ဒုပ္ပာရုတာ အနာကပ္ပသမ္ပန္နာ ပိဏ္ဍာယ စရိံသု၊ တသ္မိံ ဘန္တေ ဝတ္ထုသ္မိံ အနုညာတော။

ပုစ္ဆာ – ပဉ္စဟိ ¶ အာဝုသော အာဗာဓေဟိ ဖုဋ္ဌံ ပဗ္ဗာဇေန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ ပဉ္စဟိ အာဗာဓေဟိ ဖုဋ္ဌံ ပဗ္ဗာဇေသုံ၊ တသ္မိံ ဘန္တေ ဝတ္ထုသ္မိံ ပညတ္တံ။

သာဓု ¶ ဘန္တေ အယျာ ပဉ္စဟိ အာဗာဓေဟိ ဖုဋ္ဌံ န ပဗ္ဗာဇေယျုံ…

ပုစ္ဆာ – ရာဇဘဋံ အာဝုသော ပဗ္ဗာဇေန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ ရာဇဘဋေ ပဗ္ဗာဇေသုံ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ဓဇဗန္ဓံ ¶ အာဝုသော စောရံ ပဗ္ဗာဇေန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေယေဝ ဘန္တေ အင်္ဂုလိမာလံ စောရံ အာရဗ္ဘ ပညတ္တံ၊ အင်္ဂုလိမာလော ဘန္တေ စောရော ဘိက္ခူသု ပဗ္ဗဇိတော ဟောတိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ကာရဘေဒကံ အာဝုသော စောရံ ပဗ္ဗာဇေန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေယေဝ ¶ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ ကာရဘေဒကစောရံ ပဗ္ဗာဇေသုံ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ဣဏာယိကံ အာဝုသော ပဗ္ဗာဇေန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေယေဝ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ ဣဏာယိကံ ပဗ္ဗာဇေသုံ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ဒါသံ ¶ အာဝုသော ပဗ္ဗဇေန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေယေဝ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ ဒါသံ ပဗ္ဗာဇေသုံ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ဘဏ္ဍုကမ္မာယ အာဝုသော အပလောကနံ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – ရာဇဂဟေယေဝ ဘန္တေ အညတရံ ကမ္မာရဘဏ္ဍုပုတ္တံ အာရဗ္ဘ အနုညာတံ အညတရော ဘန္တေ ကမ္မာရဘဏ္ဍုပုတ္တော မာတာပိတူဟိ သဒ္ဓိံ ဘဏ္ဍိတွာ ဘိက္ခူသု ပဗ္ဗဇိတော ဟောတိ၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – ဦနဝီသတိဝဿဿ ¶ အာဝုသော ပုဂ္ဂလဿ ဥပသမ္ပဒါ ဘဂဝတာ ကတ္ထ ပဋိက္ခိတ္တာ၊ ကံ အာရဗ္ဘ ကိသ္မိံ ဝတ္ထုသ္မိံ ပဋိက္ခိတ္တာ။

ဝိဿဇ္ဇနာ – ရာဇဂဟေ ¶ ဘန္တေ သမ္ဗဟုလေ ဘိက္ခူ အာရဗ္ဘ ပဋိက္ခိတ္တာ၊ သမ္ဗဟုလာ ဘန္တေ ဘိက္ခူ ဦနဝီသတိဝဿံ ပုဂ္ဂလံ ဥပသမ္ပာဒေသုံ၊ တသ္မိံ ဘန္တေ ဝတ္ထုသ္မိံ ပဋိက္ခိတ္တာ။

န ¶ ဘိက္ခဝေ ဇာနံ ဦနဝီသတိဝဿော ပုဂ္ဂလော ဥပသမ္ပာဒေတဗ္ဗော၊ ယောဥပသမ္ပာဒေယျ၊ ယထာဓမ္မော ကာရေတဗ္ဗော။

ပုစ္ဆာ – မာတာပိတူဟိ ¶ အာဝုသော အနနုညာတံ ပုတ္တံ ပဗ္ဗာဇေန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သက္ကေသု ဘန္တေ ပညတ္တံ၊ ရာဇာ ဘန္တေ သုဒ္ဓါဒနော ဘဂဝန္တံ ဥပသင်္ကမိတွာ ဝရံ ယာစိ၊ သာဓု ဘန္တေ အယျာအနနုညာတံ မာတာပိတူဟိ ပုတ္တံ ပဗ္ဗာဇေယျုန္တိ၊ တသ္မိံ ဘန္တေ ဝတ္ထုသ္မိံ ပညတ္တံ။

န ¶ ဘိက္ခဝေ အနနုညာတော မာတာပိတူဟိ ပုတ္တော ပဗ္ဗာဇေတဗ္ဗော၊ ယော ပဗ္ဗာဇေယျ၊ အာပတ္တိဒုက္ကဋဿ။

ပုစ္ဆာ – ထေယျသံဝါသကဿ အာဝုသော ဥပသမ္ပဒါ ဘဂဝတာ ကတ္ထ ပဋိက္ခိတ္တာ၊ ကံ အာရဗ္ဘ ကိသ္မိံ ဝတ္ထုသ္မိံ ပဋိက္ခိတ္တာ။

ဝိဿဇ္ဇနာ – သာဝတ္ထိယံ ဘန္တေ အညတရံ ပုရာဏကုလပုတ္တံ အာရဗ္ဘ ပဋိက္ခိတ္တာ၊ အညတရော ဘန္တေ ပုရာဏကုလပုတ္တော ခီဏ ကောလညော သာမံ ပတ္တစီဝရံ ပဋိယာဒေတွာ ကေသမဿုံ ဩဟာရေတွာ ¶ ကာသာယာနိ ဝတ္ထာနိ အစ္ဆာဒေတွာ အာရာမံ ဂန္တွာ ဘိက္ခူဟိ သဒ္ဓိံ သံဝသိ၊ ဘန္တေ ဝတ္ထုသ္မိံ ပဋိက္ခိတ္တာ။

ပုစ္ဆာ – တိရစ္ဆာနဂတဿ ¶ အာဝုသော ဥပသမ္ပဒါ ဘဂဝတာ ကတ္ထ ပဋိက္ခိတ္တာ၊ ကံ အာရဗ္ဘ ကိသ္မိံ ဝတ္ထုသ္မိံ ပဋိက္ခိတ္တာ။

ဝိဿဇ္ဇနာ – သာဝတ္ထိယံ ဘန္တေ အညတရံ နာဂံ အာရဗ္ဘ ပဋိက္ခိတ္တာ၊ အညတရော ဘန္တေ နာဂေါ မာဏဝကဝဏ္ဏေန ဘိက္ခူ ဥပသင်္ကမိတွာ ပဗ္ဗဇ္ဇံ ယာစိ၊ တံ ဘိက္ခူ ပဗ္ဗာဇေသုံ ဥပသမ္ပာဒေသုံ၊ တသ္မိံ ဘန္တေ ဝတ္ထုသ္မိံ ပဋိက္ခိတ္တာ။

ပုစ္ဆာ – မာတုဃာတကဿ ¶ စ အာဝုသော ပိတုဃာတကဿ စ ဥပသမ္ပဒါ ဘဂဝတာ ကတ္ထ ပဋိက္ခိတ္တာ၊ ကံ အာရဗ္ဘ ကိသ္မိံ ဝတ္ထုသ္မိံ ပဋိက္ခိတ္တာ။

ဝိဿဇ္ဇနာ – သာဝတ္ထိယံယေဝ ¶ ဘန္တေ အညတရံ မာဏဝကံ အာရဗ္ဘ ပဋိက္ခိတ္တာ၊ အညတရော စ ဘန္တေ မာဏဝကော အညတရော စ မာဏဝကော မာတရံ ဇီဝိတာ ဝေါရောပေသိ ပိတရံ ဇီဝိတာ ဝေါရောပေသိ၊ တသ္မိံ ဘန္တေ ဝတ္ထုသ္မိံ ပဋိက္ခိတ္တာ။

မာတုဃာတကော ¶ ဘိက္ခဝေ အနုပသမ္ပန္နော နဥပသမ္ပာဒေတဗ္ဗော၊ ဥပသမ္ပန္နော နာသေတဗ္ဗော၊ ပိတုဃာတကော ဘိက္ခဝေ အနုပသမ္ပန္နော နဥပသမ္ပာဒေတဗ္ဗော၊ ဥပသမ္ပန္နော နာသေတဗ္ဗော။

ပုစ္ဆာ – အပတ္တစီဝရကံ ဝါ အာဝုသော ယာစိတပတ္တစီဝရကံ ဝါ ဥပသမ္ပာဒေန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ အပတ္တစီဝရကံ ဥပသမ္ပာဒေသုံ၊ ယာစိတကေန ပတ္တစီဝရေန ဥပသမ္ပာဒေသုံ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ဥပသမ္ပဒံ ¶ ပုစ္ဆိဿံ၊ သနိဒါနံ သဥဒ္ဒေသံ။ သမုက္ကဋ္ဌပဒါနံ အာဝုသော ကတိ အာပတ္တိယော။

ဝိဿဇ္ဇနာ – ဥပသမ္ပဒံ ဝိဿဇ္ဇိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ ဘန္တေ ဒွေ အာပတ္တိယော။

ပုစ္ဆာ – စာတုဒ္ဒသေ ¶ စ အာဝုသော ပန္နရသေ စ ပက္ခဿ စ အဋ္ဌမိယာ သန္နိပတိတွာ ဓမ္မံ ဘာသိတုံ ဘဂဝတာ ကတ္ထ အနုညာတံ၊ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – ရာဇဂဟေ ဘန္တေ သမ္ဗဟုလေ ဘိက္ခူ အာရဗ္ဘ အနုညာတာ၊ သမ္ဗဟုလာ ဘန္တေ ဘိက္ခူ စာတုဒ္ဒေသ ပန္နရသေ အဋ္ဌမိယာ စ ပက္ခဿ သန္နိပတိတွာ တုဏှီ နိသီဒိံသု၊ တသ္မိံ ဘန္တေ ဝတ္ထုသ္မိံ အနုညာတာ။

အနုဇာနာမိ ¶ ဘိက္ခဝေ စာတုဒ္ဒသေ ပန္နရသေ အဋ္ဌမိယာ စ ပက္ခဿ သန္နိပတိတုံ။

နနု နာမ သန္နိပတိတေဟိ ဓမ္မော ဘာသိတဗ္ဗော။

ပုစ္ဆာ – ကဒါ အာဝုသော ဘိက္ခူနံ ပါတိမောက္ခုဒ္ဒေသော ဘဂဝတာ အနုညာတော။

ဝိဿဇ္ဇနာ – ယဒါ ဘန္တေ ဘဂဝတော ရဟောဂတဿ ပဋိသလ္လီနဿ ဧဝံ စေတသော ပရိဝိတက္ကော ဥဒပါဒိ ‘‘ယံနူနာဟံ ယာနိ မယာ ဘိက္ခူနံ ပညတ္တာနိ သိက္ခာပဒါနိ၊ တာနိ နေသံ ပါတိမောက္ခုဒ္ဒေသံ အနုဇာနေယျံ၊ သော နေသံ ဘဝိဿတိ ဥပေါသထကမ္မ’’န္တိ ¶ တဒါ ဘန္တေ ဘဂဝတာ ဘိက္ခူနံ ပါတိမောက္ခုဒ္ဒေသော အနုညာတော။

ပုစ္ဆာ – သီမံ အာဝုသော သမ္မနိတုံ ဘဂဝတာ ကတ္ထ အနုညာတံ၊ ကိသ္မိဉ္စ ဝတ္ထုသ္မိံ အနုညာတံ။

ဝိဿဇ္ဇနာ – ရာဇဂဟေ ဘန္တေ အနုညာတံ၊ ရာဇဂဟေ ဘန္တေ ဘဂဝတိ ဝိဟရတိ ဘိက္ခူနံ ဧတဒဟောသိ ‘‘ဘဂဝတာ ပညတ္တံ ဧတ္တာဝတာ သာမဂ္ဂီ၊ ယာဝတာ ဧကာဝါသောတိ ကိတ္တာဝတာနုခေါ ဧကာဝါသော ဟောတီ’’တိ၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – ကတိ ¶ အာဝုသော ဥပေါသထာ ဒိဝသဝသေန စ ကာရကပုဂ္ဂလဝသေန စ ကာတဗ္ဗာကာရဝသေန စ။

ဝိဿဇ္ဇနာ – ဒိဝသဝသေန ဘန္တေ တယော ဥပေါသထာ၊ ပုဂ္ဂလဝသေန စ ဘန္တေ တယော ဥပေါသထာ၊ ကာတဗ္ဗာကာရဝသေန စ ဘန္တေ တယော ဥပေါသထာ။

ပုစ္ဆာ – ကတိ ¶ အာဝုသော ဥပေါသထကမ္မာနိ တေသု စ ကီဒိသံ ဥပေါသထကမ္မံ ဘဂဝတာ အနုညာတံ၊ ကီဒိသံ အနနုညာတံ။

ဝိဿဇ္ဇနာ – စတ္တာရိမာနိ ဘန္တေ ဥပေါသထကမ္မာနိ၊ အဓမ္မေန ဝဂ္ဂံ ဥပေါသထကမ္မံ၊ အဓမ္မေန သမဂ္ဂံ ဥပေါသထကမ္မံ၊ ဓမ္မေန ဝဂ္ဂံ ဥပေါသထကမ္မံ၊ ဓမ္မေန သမဂ္ဂံ ဥပေါသထကမ္မံ။ တတြ ဘန္တေ ယဒိဒံ အဓမ္မေန ဝဂ္ဂံ ဥပေါသထကမ္မံ၊ အဓမ္မေန သမဂ္ဂံ ဥပေါသထကမ္မံ ဓမ္မေန ဝဂ္ဂံ ဥပေါသထကမ္မံ၊ ဧဝရူပံ ဘန္တေ ဥပေါသထကမ္မံ အနနုညာတံ၊ တတြ ဘန္တေ ယဒိဒံ ဓမ္မေန သမဂ္ဂံ ဥပေါသထကမ္မံ၊ ဧဝရူပံ ဘန္တေ ဥပေါသထကမ္မံ အနုညာတံ။

ပုစ္ဆာ – ဥပေါသထံ ¶ ပုစ္ဆိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ အာဝုသော ကတိ အာပတ္တိယော။

ဝိဿဇ္ဇနာ – ဥပေါသထံ ဝိဿဇ္ဇိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ ဘန္တေ တိဿော အာပတ္တိယော။

ပုစ္ဆာ – ဝဿူပနာယိကံ အာဝုသော ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ သမ္ဗဟုလာ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ ဟေမန္တမ္ပိ ဂိမှမ္ပိ ဝဿမ္ပိ စာရိကံ စရိံသု၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ကတိပနာဝုသော ဝဿူပနာယိကာ ဘဂဝတာ အနုညာတာ။

ဝိဿဇ္ဇနာ – ဒွေမာ ဘန္တေ ဝဿူပနာယိကာ ဘဂဝတာ အနုညာတာ ပုရိမိကာ ပစ္ဆိမိကာ၊ အပရဇ္ဇုဂတာယ ဘန္တေ အာသဠှိယာ ပုရိမိကာ ဥပဂန္တဗ္ဗာ၊ မာသဂတာယ ဘန္တေ အာသဠှိယာ ပစ္ဆိမိကာ ဥပဂန္တဗ္ဗာ၊ ဣမာ ခေါ ဘန္တေ ဒွေ ဝဿူပနာယိကာ ဘဂဝတာ အနုညာတာ။

ပုစ္ဆာ – ဝဿံ ¶ အာဝုသော ဥပဂန္တွာ ပုရိမံ ဝါ တေမာသံ ပစ္ဆိမံ ဝါ တေမာသံ အဝသိတွာ စာရိကံ ပက္ကမန္တဿ ဒုက္ကဋံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ ဝဿံ ဥပဂန္တွာ အန္တရာ ဝဿံ စာရိကံ ပက္ကမိံသု၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – သတ္တာဟ ကရဏီယေန အာဝုသော ပဟိတေ ဂန္တုံ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ အနုညာတံ၊ သမ္ဗဟုလာ ဘန္တေ ဘိက္ခူ ဥဒေနေန ဥပါသကေန ပဟိတေ န ဂစ္ဆိံသု၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – သတ္တာဟကရဏီယေန ¶ အာဝုသော သတ္တန္နံ အပဟိတေပိ ဂန္တုံ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – သာဝတ္ထိယံ ဘန္တေ အညတရဿ ဘိက္ခုနော မာတုဂိလာန ဝတ္ထုသ္မိံ အနုညာတံ။

အနုဇာနာမိ ¶ ဘိက္ခဝေ သတ္တန္နံ သတ္တာဟကရဏီယေန အပဟိတေပိ ဂန္တုံ၊ ပဂေဝ ပဟိတေ။

ပုစ္ဆာ – ကိသ္မိံစိ အာဝုသော အန္တရာယေ သတိ အန္တောဝဿံ ပက္ကမိတုံ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ အနုညာတံ၊ သမ္ဗဟုလာ ဘန္တေ ဘိက္ခူ ကောသလေသု ဇနပဒေသု ဝဿံ ဥပဂစ္ဆိံသု၊ တေ ဝဿူပဂတာ ဝါဠေဟိ ဥဗ္ဗာဠှာ အဟေသုံ၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – ရုက္ခ ¶ သုသိရေ ဝါ အာဝုသော ရုက္ခဝိဋဘိယာ ဝါ အဇ္ဈောကာသေ ဝါ ဝဿံ ဥပဂစ္ဆန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ ရုက္ခသုသိရေပိ ရုက္ခဝိဋဘိယာပိ အဇ္ဈောကာသေပိ ဝဿံ ဥပဂစ္ဆိံသု၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – အသေနာသနိကေန ¶ အာဝုသော ဝဿံ ဥပဂစ္ဆန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – တသ္မိံယေဝ ဘန္တေ သာဝတ္ထိယံ သမ္ဗဟုလေ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ အသေနာသနိကာ ဝဿံ ဥပဂစ္ဆိံသု၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ဆဝကုဋိကာယ ဝါ အာဝုသော ဆတ္တေ ဝါ စာဋိယာ ဝါ ဝဿံ ဥပဂစ္ဆန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံယေဝ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ ဆဝကုဋိကာယပိ ဆတ္တေပိ စာဋိယာပိ ဝဿံ ဥပဂစ္ဆိံသု၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ပဋိဿဝံ ¶ အာဝုသော ဝိသံ ဝါဒေန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ အာယသ္မန္တံ ဥပနန္ဒံ သကျပုတ္တံ အာရဗ္ဘ ပညတ္တံ၊ အာယသ္မာ ဘန္တေ ဥပနန္ဒော သကျပုတ္တော ရညော ပသေနဒိဿ ကောသလဿ ဝဿံ ဝါသံ ပဋိဿုဏိတွာ ဝိသံဝါဒေသိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ဝဿူပနာယိကံ ¶ ပုစ္ဆိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ အာဝုသော ကတိ အာပတ္တိယော။

ဝိဿဇ္ဇနာ – ဝဿူပနာယိကံ ဝိဿဇ္ဇိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ ဘန္တေ ဧကာ အာပတ္တိ။

ပုစ္ဆာ – ဝဿံ ¶ ဝုဋ္ဌာနံ အာဝုသော ဘိက္ခူနံ တီဟိ ဌာနေဟိ ပဝါရိတုံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ အနုညာတံ၊ သမ္ဗဟုလာ ဘန္တေ ဘိက္ခူ သန္ဒိဋ္ဌာ သမ္ဘတ္တာ အန္တောဝဿံ နေဝ အာလပိံသု န သလ္လပိံသု၊ တသ္မိံ ဘန္တေ ဝတ္ထုသ္မိံ အနုညာတံ။

အနုဇာနာမိ ¶ ဘိက္ခဝေ ဝဿံ ဝုဋ္ဌာနံ ဘိက္ခူနံ တီဟိ ဌာနေဟိ ပဝါရေတုံ၊ ဒိဋ္ဌေဝ ဝါ သုတေန ဝါ ပရိသင်္ကာယ ဝါ။

ပုစ္ဆာ – ကတိ အာဝုသော ပဝါရဏာ ဒိဝသဝသေန စ ပုဂ္ဂလဝသေန စ ကာတဗ္ဗာကာရဝသေန စ။

ဝိဿဇ္ဇနာ – ဒိဝသဝသေန ဘန္တေ တိဿော ပဝါရဏာ၊ တထာ ပုဂ္ဂလဝသေန ကာတဗ္ဗာကာရဝသေနစ။

ပုစ္ဆာ – ကတီနံ ¶ အာဝုသော သင်္ဃေ ပဝါရေတုံ ဘဂဝတာ အနုညာတံ၊ ကတီနံ ပနာဝုသော အညမညံ ပဝါရေတုံ ဘဂဝတာ အနုညာတံ။

ဝိဿဇ္ဇနာ – ပဉ္စန္နံ ဘန္တေ ဘိက္ခူနံ သင်္ဃေ ပဝါရေတုံ ဘဂဝတာ အနုညာတံ၊ စတုန္နံ ဝါ ဘန္တေ တိဏ္ဏံ ဝါ ဒွိန္နံ ဝါ အညမညံ ပဝါရေတုံ အနုညာတံ။

ပုစ္ဆာ – ဧကေန ပနာဝုသော ဝဿံဝုဋ္ဌေန ဘိက္ခုနာ ကထံ ပဋိပဇ္ဇိတဗ္ဗန္တိ ဘဂဝတာ အနုညာတံ။

ဝိဿဇ္ဇနာ – ဧကေန ပန ဘန္တေ ဘိက္ခုနာ ‘‘အဇ္ဇ မေ ပဝါရဏာ’’တိ အဓိဋ္ဌာတဗ္ဗန္တိ ဘဂဝတာ အနုညာတံ။

ပုစ္ဆာ – ပဝါရဏံ ¶ ပုစ္ဆိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ အာဝုသော ကတိ အာပတ္တိယော။

ဝိဿဇ္ဇနာ – ပဝါရဏံ ဝိဿဇ္ဇိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ ဘန္တေ တိဿော အာပတ္တိယော။

ပုစ္ဆာ – ဥပါဟနံ ¶ အာဝုသော ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – ရာဇဂဟေ ဘန္တေ အာယသ္မန္တံ သောဏံ အာရဗ္ဘ အနုညာတံ၊ အာယသ္မတော ဘန္တေ သောဏဿ အစ္စာရဒ္ဓဝီရိယဿ စင်္ကမတော ပါဒါ ဘိဇ္ဇိံသု၊ စင်္ကမော လောဟိတေန ဖုဋော အဟောသိ၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – သဗ္ဗနီလိကာ ¶ ဝါ အာဝုသော သဗ္ဗပီတိကာ ဝါ သဗ္ဗလောဟိတိကာ ဝါ သဗ္ဗမဉ္ဇိဋ္ဌိကာ ဝါ သဗ္ဗကဏှာ ဝါ သဗ္ဗမဟာရင်္ဂရတ္တာ ဝါ သဗ္ဗမဟာနာမရတ္တာ ¶ ဝါ ဥပါဟနာယော ဓာရေန္တဿ ဒုက္ကဋံ ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ သဗ္ဗနီလိကာယော ဥပါဟနာယော ဓာရေသုံ၊ သဗ္ဗပီတိကာယော သဗ္ဗလောဟိတိကာယော သဗ္ဗမဉ္ဇိဋ္ဌိကာယော သဗ္ဗကဏှာယော သဗ္ဗမဟာရင်္ဂရတ္တာ သဗ္ဗမဟာနာမရတ္တာယောပိ ဥပါဟနာယော ဓာရေသုံ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ခလ္လကဗန္ဓာ ¶ ဝါ အာဝုသော ပုဋဗန္ဓာ ဝါ ပါလိဂုဏ္ဌိမာ ဝါ တူလပုဏ္ဏိကာ ဝါ တိတ္တိရပတ္တိကာ ဝါ မေဏ္ဍဝိသာဏဝဒ္ဓိကာ ဝါ အဇဝိသာဏဝဒ္ဓိကာ ဝါ ဝိစ္ဆိကာဠိကာ ဝါ မောရပိဉ္ဆ ပရိသိဗ္ဗိကာ ဝါ စိတြာ ဝါ ဥပါဟနာယော ဓာရေန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ ခလ္လကဗန္ဓာ ဥပါဟနာယောပိ ဓာရေသုံ၊ ပုဋဗန္ဓာ ဥပါဟနာယောပိ ဓာရေသုံ၊ ပါလိဂုဏ္ဌိမာ ဥပါဟနာယောပိ ဓာရေသုံ၊ တူလပုဏ္ဏိကာ ဥပါဟနာယောပိ ဓာရေသုံ၊ တိတ္တိရပတ္တိကာ ဥပါဟနာယောပိ ဓာရေသုံ၊ မေဏ္ဍဝိသာဏဝဒ္ဓိကာ ဥပါဟနာယောပိ ဓာရေသုံ၊ အဇဝိသာဏဝဒ္ဓိကာ ဥပါဟနာယောပိ ဓာရေသုံ၊ ဝိစ္ဆိကာဠိကာ ဥပါဟနာယောပိ ဓာရေသုံ၊ မောရပိဉ္ဆ ပရိသိဗ္ဗိတာ ဥပါဟနာယော ဓာရေသုံ၊ စိတြာ ဥပါဟနာယောပိ ဓာရေသုံ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ကဋ္ဌပါဒုကာယော ¶ အာဝုသော ဓာရေန္တဿ ဒုက္ကဋံ ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ ဆဗ္ဗဂ္ဂီယေဝ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ ရတ္တိယာ ပစ္စူသသမယံ ပစ္စုဋ္ဌာယ ကဋ္ဌပါဒုကာယော အဘိရုဟိတွာ အဇ္ဈောကာသေ စင်္ကမန္တိ ဥစ္စာသဒ္ဒါ မဟာသဒ္ဒါ ခဋခဋသဒ္ဒါ အနေကဝိဟိတံ တိရစ္ဆာနကထံ ကထေန္တာ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ယာနေန ¶ အာဝုသော ယာယန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ ယာနေန ယာယိံသု၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ဂိလာနဿ ¶ အာဝုသော ယာနံ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – သာဝတ္ထိယံ ဘန္တေ အညတရံ ဂိလာနံ ဘိက္ခုံ အာရဗ္ဘ အနုညာတံ၊ အညတရော ဘန္တေ ဘိက္ခု ကောသလေသု ဇနပဒေ သာဝတ္ထိံ ဂစ္ဆန္တော ဘဂဝန္တံ ဒဿနာယ အန္တရာမဂ္ဂေ ဂိလာနော ကုက္ကုစ္စာယန္တော ယာနံ နာဘိရုဟိ၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – ဥစ္စာသယနမဟာသယနာနိ ¶ အာဝုသော ဓာရေန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ ဥစ္စာသယနမဟာသယနာနိ ဓာရေသုံ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ဂေါစမ္မာနိ အာဝုသော ဓာရေန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ အညတရံ ပါပဘိက္ခုံ အာရဗ္ဘ ပညတ္တံ၊ အညတရော ဘန္တေ ဘိက္ခု ပါဏာတိပါတေ သမာဒပေသိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ပစ္စန္တိမေသု ¶ အာဝုသော ဇနပဒေသု ဝိနယဓရပဉ္စမေန ဂဏေန ဥပသမ္ပဒါ စ ဂုဏင်္ဂုဏူပဟနဉ္စ ဓုဝနဟာနဉ္စ စမ္မာနိ အတ္ထရဏာနိ စ နိဿီမဂတာနံ စီဝရဒါနဉ္စာတိ ဣမာနိ ပဉ္စ ဘဂဝတာ ကတ္ထ အနုညာတာနိ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတာနိ။

ဝိဿဇ္ဇနာ – သာဝတ္ထိယံ ဘန္တေ အာယသ္မန္တံ သောဏံ ကုဋိကဏ္ဏံ အာရဗ္ဘ အနုညာတာ၊ အာယသ္မာ ဘန္တေ သောဏော ကုဋိကဏ္ဏော ဧတာနိ ပဉ္စဝတ္ထူနိ အာယသ္မတော မဟာကစ္စာနဿ ဝစနေန ဘဂဝန္တံ ယာစိ၊ တသ္မိံ ဘန္တေ ဝတ္ထုသ္မိံ အနုညာတာ။

ပုစ္ဆာ – စမ္မသညုတ္တံ ¶ ပုစ္ဆိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ အာဝုသော ကတိ အာပတ္တိယော။

ဝိဿဇ္ဇနာ – စမ္မသညုတ္တံ ဝိဿဇ္ဇိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ ဘန္တေ တိဿော အာပတ္တိယော။

ပုစ္ဆာ – ပဉ္စ ¶ အာဝုသော ဘေသဇ္ဇာနိ ပဋိဂ္ဂဟေတွာ ကာလေပိ ဝိကာလေပိ ပရိဘုဉ္ဇိတုံ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ အနုညာတံ၊ သမ္ဗဟုလာနံ ဘန္တေ ဘိက္ခူနံ သာရဒိကေန အာဗာဓေန ပုဋ္ဌာနံ ယာဂုပိ န သမ္မာ ပရိဏာမံ ဂစ္ဆိ၊ ဘတ္တမ္ပိ ဘုတ္တံ န သမ္မာ ပရိဏာမံ ဂစ္ဆိ၊ တေ တေန ကိသာ အဟေသုံ လူခါ ဒုဗ္ဗဏ္ဏာ ဥပ္ပဏ္ဍုပ္ပဏ္ဍုကဇာတာ ဓမနိသန္ထတဂတ္တာ၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – မူလာဒိဘေသဇ္ဇာနိ ¶ အာဝုသော ဘဂဝတာ ကတ္ထ အနုညာတာနိ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတာနိ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဂိလာနေ ဘိက္ခူ အာရဗ္ဘ အနုညာတာနိ၊ သမ္ဗဟုလာနံ ဂိလာနာနံ ဘိက္ခူနံ မူလေဟိ ဘေသဇ္ဇေဟိ အတ္ထော အဟောသိ၊ တသ္မိံ ဘန္တေ ဝတ္ထုသ္မိံ အနုညာတာနိ။

ပုစ္ဆာ – အန္တောဝုဋ္ဌံဝါ အာဝုသော အန္တောပက္ကံ ဝါ သာမံပက္ကံ ဝါ ပရိဘုဉ္ဇန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ အာယသ္မန္တံ အာနန္ဒံ အာရဗ္ဘ ပညတ္တံ၊ အာယသ္မာ ဘန္တေ အာနန္ဒော သာမံ တိလမ္ပိ တဏ္ဍုလမ္ပိ မုဂ္ဂမ္ပိ ဝိညာပေတွာ အန္တော ဝါသေတွာ အန္တော သာမံ ပစိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – မနုဿမံသံ ¶ အာဝုသော ပရိဘုဉ္ဇန္တဿ ထုလ္လစ္စယဉ္စ အပ္ပဋိဝေက္ခိတွာ မံသံ ပရိဘုဉ္ဇန္တဿ ဒုက္ကဋဉ္စ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ဗာရာဏသိယံ ဘန္တေ အညတရံ ဘိက္ခုံ အာရဗ္ဘ ပညတ္တံ၊ အညတရော ဘန္တေ ဘိက္ခု အပ္ပဋိဝေက္ခိတွာ မနုဿမံသံ ဘုဉ္ဇိ၊ တသ္မိံ ဘန္တေ ဝတ္ထုသ္မိံ ပညတ္တံ။

န ¶ ဘိက္ခဝေ မနုဿမံသံ ပရိဘုဉ္ဇိတဗ္ဗံ၊ ယော ပရိဘုဉ္ဇေယျ၊ အာပတ္တိ ထုလ္လစ္စယဿ၊ န စ ဘိက္ခဝေ အပ္ပဋိဝေက္ခိတွာ မံသံ ပရိဘုဉ္ဇိတဗ္ဗံ၊ ယော ပရိဘုဉ္ဇေယျ အာပတ္တိ ဒုက္ကဋဿ။

ပုစ္ဆာ – ဟတ္ထိမံသံ ဝါ အာဝုသော အဿမံသံ ဝါ ပရိဘုဉ္ဇန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ဗာရာဏသိယံ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ ဟတ္ထိမံသမ္ပိ အဿမံသမ္ပိ ပရိဘုဉ္ဇိံသု၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – သုနက္ခမံသံ ¶ ဝါ အာဝုသော အဟိမံသံ ဝါ ဘုဉ္ဇန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ဗာရာဏသိယံ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ သုနက္ခမံသမ္ပိ အဟိမံသမ္ပိ ပရိဘုဉ္ဇိံသု၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – သီဟမံသံ ¶ ဝါ အာဝုသော ဗျဂ္ဃမံသံ ဝါ ဒီပိမံသံ ဝါ အစ္ဆမံသံ ဝါ တရစ္ဆမံသံ ဝါ ဘုဉ္ဇန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ဗာရာဏသိယံယေဝ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ သီဟမံသမ္ပိ ဗျဂ္ဃမံသမ္ပိ ဒီပိမံသမ္ပိ အစ္ဆမံသမ္ပိ တရစ္ဆမံသမ္ပိ ပရိဘုဉ္ဇိံသု၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ဂိလာနဿ ¶ အာဝုသော ဂုဠံ ဝါ အဂိလာနဿ ဂုဠောဒကံ ဝါ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – ရာဇဂဟေ ဘန္တေ သမ္ဗဟုလေ ဘိက္ခူ အာရဗ္ဘ အနုညာတံ၊ သမ္ဗဟုလာ ဘန္တေ ဘိက္ခူ ဂိလာနဿေဝ ဘဂဝတာ ဂုဠော အနုညာတော နော အဂိလာနဿာတိ ကုက္ကုစ္စာယန္တာ ဂုဠံ န ဘုဉ္ဇိံသု၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – ဇာနံ ¶ အာဝုသော ဥဒ္ဒိဿ ကတံ မံသံ ပရိဘုဉ္ဇန္တဿ ဒုက္ကဋံ ပညပေတွာ တိကောဋိပရိသုဒ္ဓံ မံသံ ဘဂဝတာ ကတ္ထ အနုညာတံ။

ဝိဿဇ္ဇနာ – ဝေသာလိယံ ဘန္တေ သီဟဿ သေဋာပတိနော ဝတ္ထုသ္မိံ အနုညာတံ။

ပုစ္ဆာ – ပါထေယျံ ¶ အာဝုသော ပရိယေသိတုဉ္စ ကပ္ပိယကာရကာနံ ဟတ္ထေ ဥပနိက္ခိတ္တဟိရညတော နိဗ္ဗတ္တံ ကပ္ပိယပစ္စယံ သာဒိတုဉ္စ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – အန္တရာ ¶ စ ဘန္တေ ဘဒ္ဒိယံ အန္တရာ စ အင်္ဂုတ္တရာပံ မေဏ္ဍကံ ဂဟပတိံ အာရဗ္ဘ အနုညာတံ၊ မေဏ္ဍကော ဘန္တေ ဂဟပတိ ဘဂဝန္တံ ယာစိ ‘‘သန္တိ ဘန္တေ မဂ္ဂါ ကန္တာရာ အပ္ပောဒကာ အပ္ပဘက္ခာ န သုကရာ အပါထေယျေန ဂန္တုံ၊ သာဓု ဘန္တေ ဘဂဝါ ဘိက္ခူနံ ပါထေယျံ အနုဇာနာတူ’’တိ၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – အဋ္ဌ ¶ အာဝုသော ပါနာနိ ဘဂဝတာ ကတ္ထ အနုညာတာနိ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတာနိ။

ဝိဿဇ္ဇနာ – အာပဏေ ဘန္တေ သမ္ဗဟုလေ ဘိက္ခူ အာရဗ္ဘ အနုညာတာနိ၊ သမ္ဗဟုလာ ဘန္တေ ဘိက္ခူ ကုက္ကုစ္စာယန္တာ ပါနာနိ န ပဋိဂ္ဂဏှိံသု၊ တသ္မိံ ဘန္တေ ဝတ္ထုသ္မိံ အနုညာတာနိ။

ပုစ္ဆာ – သဗ္ဗဉ္စ ¶ အာဝုသော ဍာကံ သဗ္ဗဉ္စ ပိဋ္ဌခါဒနီယံ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – ကုသိနာရာယံ ဘန္တေ သမ္ဗဟုလေ ဘိက္ခူ အာရဗ္ဘ အနုညာတံ၊ သမ္ဗဟုလာ ဘန္တေ ဘိက္ခူ ကုက္ကုစ္စာယန္တာ ဍာကဉ္စ ပိဋ္ဌခါဒနီယဉ္စ န ပဋိဂ္ဂဟေသုံ၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – အကပ္ပိယံ ¶ အာဝုသော သမာဒပေန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – အာတုမာယံ ဘန္တေ အညတရံ ဝုဍ္ဎပဗ္ဗဇိတံ အာရဗ္ဘ ပညတ္တံ၊ အညတရော ဘန္တေ ဝုဍ္ဎပဗ္ဗဇိတော အကပ္ပိယေ သမာဒပေတိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – သင်္ဃိကာနိ ¶ ဝါ အာဝုသော ပုဂ္ဂလိကာနိ ဝါ ဗီဇာနိ ပုဂ္ဂလိကာယ ဝါ သင်္ဃိကာယ ဝါ ဘူမိယာ ရောပိတာနိ ဘာဂံ ဒတွာ ပရိဘုဉ္ဇိတုံ ဘဂဝတာ ကတ္ထ အနုညာတံ၊ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – သာဝတ္ထိယံ ဘန္တေ အနုညာတံ၊ သာဝတ္ထိယံ ဘန္တေ ဘဂဝတိ ဝိဟရတိ သင်္ဃိကာနိပိ ဗီဇာနိ ပုဂ္ဂလိကာယ ဘူမိယာ ရောပိယိံသု၊ ပုဂ္ဂလိကာနိပိ ဗီဇာနိ သင်္ဃိကာယ ဘူမိယာ ရောပိယိံသု၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – ဝိနယမဟာပဒေသသင်္ခါတာနိ ¶ အာဝုသော စတ္တာရိ ကပ္ပိယာကပ္ပိယအနုလောမာနိ ဘဂဝတာ ကတ္ထ ပညတ္တာနိ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တာနိ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တာနိ၊ သမ္ဗဟုလာနံ ဘန္တေ ဘိက္ခူနံ ကိသ္မိဉ္စိ ကိသ္မိဉ္စိဌာနေ ကုက္ကုစ္စံ ဥပ္ပဇ္ဇိ၊ တသ္မိံ ဘန္တေ ဝတ္ထုသ္မိံ ပညတ္တာနိ။

ပုစ္ဆာ – ယာဝကာလိကာဒီဟိ ¶ သံသဋ္ဌာနံ အာဝုသော ယာမကာလိကာဒီနံ ပရိဘောဂကာလမရိယာဒံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တံ၊ သမ္ဗဟုလာနံ ဘန္တေ ဘိက္ခူနံ ဧတဒဟောသိ ‘‘ကပ္ပတိ နုခေါ ယာဝကာလိကေန ယာမကာလိကံ သတ္တာဟကာလိကံ ယာဝဇီဝိကံ၊ န နုခေါ ကပ္ပတိ။ ကပ္ပတိနုခေါ ယာမကာလိကေန သတ္တာဟကာလိကံ ယာဝဇီဝိကံ၊ န နုခေါ ကပ္ပတိ။ ကပ္ပတိ နုခေါ သတ္တာဟကာလိကေန ယာဝဇီဝိကံ၊ န နုခေါ ကပ္ပတီ’’တိ။ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ဘေသဇ္ဇကံ ¶ ပုစ္ဆိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ အာဝုသော ကတိ အာပတ္တိယော။

ဝိဿဇ္ဇနာ – ဘေသဇ္ဇကံ ဝိဿဇ္ဇိဿံ သနိဒါနံ သနိဒ္ဒေသံ။ သမုက္ကဋ္ဌပဒါနံ ဘန္တေ တိဿော အာပတ္တိယော။

ပုစ္ဆာ – ဝဿံဝုဋ္ဌာနံ ¶ အာဝုသော ဘိက္ခူနံ ကထိနံ အတ္ထရိတုံ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – သာဝတ္ထိယံ ဘန္တေ တိံသမတ္တေ ပါဝေယျကေ ဘိက္ခူ အာရဗ္ဘ အနုညာတံ၊ တိံသမတ္တာ ဘန္တေ ပါဝေယျကာ ဘိက္ခူ သာဝတ္ထိံ အာဂစ္ဆန္တာ ဘဂဝန္တံ ဒဿနာယ ဥပကဋ္ဌာယ ဝဿူပနာယိကာယ နာသက္ခိံသု သာဝတ္ထိယံ ဝဿူပနာယိကံ သမ္ဘာဝေတုံ၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – ကထိနကံ ¶ ပုစ္ဆိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ အာဝုသော ကတိ အာပတ္တိယော။

ဝိဿဇ္ဇနာ – ကထိနကံ ဝိဿဇ္ဇိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ ဘန္တေ န ကတမာ အာပတ္တိ။

ပုစ္ဆာ – ဂဟပတိစီဝရံ ¶ အာဝုသော သာဒိယိတုံ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – ရာဇဂဟေ ဘန္တေ ဇီဝကံ ကောမာရဘစ္စံ အာရဗ္ဘ အနုညာတံ၊ ဇီဝကော ဘန္တေ ကောမာရဘစ္စော ဘိက္ခူနံ ဂဟပတိစီဝရံ အနုဇာနိတုံ ဘဂဝန္တံ ယာစိ၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – ဆ ¶ အာဝုသော ရဇနာနိ ဘဂဝတာ ကတ္ထ အနုညာတာနိ၊ ကိသ္မိံ ဝတ္ထုသ္မိံ အနုညာတာနိ။

ဝိဿဇ္ဇနာ – ရာဇဂဟေ ဘန္တေ သမ္ဗဟုလေ ဘိက္ခူ အာရဗ္ဘ အနုညာတာနိ၊ သမ္ဗဟုလာ ဘန္တေ ဘိက္ခူ ဆကဏေနပိ ပဏ္ဍုမတ္တိကာယပိ စီဝရံ ရဇိံသု၊ စီဝရံ ဒုဗ္ဗဏ္ဏံ ဟောတိ၊ တသ္မိံ ဘန္တေ ဝတ္ထုသ္မိံ အနုညာတာနိ။

ပုစ္ဆာ – အစ္ဆိန္နကာနိ ¶ အာဝုသော စီဝရာနိ ဓာရေန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ အစ္ဆိန္နကာနိ စီဝရာနိ ဓာရေသုံ ဒန္တကသာဝါနိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ကဒါ အာဝုသော ဘဂဝါ အနုညာသိ ဆိန္နကံ သင်္ဃာဋိံ ဆိန္နကံ ဥတ္တရာသင်္ဂံ ဆိန္နကံ အန္တရဝါသကံ။

ဝိဿဇ္ဇနာ – ဒက္ခိဏာဂိရိတော ဘန္တေ ပစ္ဆာဂတကာလေ ဘဂဝါ အနုညာသိ ဆိန္နကံ သင်္ဃာဋိံ ဆိန္နကံ ဥတ္တရာသင်္ဂံ ဆိန္နကံ အန္တရဝါသကံ။

ပုစ္ဆာ – အဂ္ဂဠံ ¶ စ အာဝုသော တုန္နဉ္စ ဩဝဋ္ဋိကဉ္စ ကဏ္ဍုသကဉ္စ ဒဠှီကမ္မဉ္စ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – ဗာရာဏသိယံ ဘန္တေ အညတရံ ဘိက္ခုံ အာရဗ္ဘ အနုညာတံ၊ အညတရော ဘန္တေ ဘိက္ခု အဂ္ဂဠံ အစ္ဆုပေသိ၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – ဝဿိကသာဋိကာ ¶ စ အာဝုသော အာဂန္တုကဘတ္တဉ္စ ဂမိကဘတ္တဉ္စ ဂိလာနဘတ္တဉ္စ ဂိလာနုပဋ္ဌာကဘတ္တဉ္စ ဂိလာနဘေသဇ္ဇဉ္စ ဓုဝယာဂု စ ဘိက္ခုနိသင်္ဃဿ ဥဒကသာဋိကာစာတိ ဣမာ အဋ္ဌ ဘဂဝတာ ကတ္ထ အနုညာတာ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတာ။

ဝိဿဇ္ဇနာ – သာဝတ္ထိယံ ဘန္တေ ဝိသာခံ မိဂါရမာတရံ အာရဗ္ဘ အနုညာတာ၊ ဝိသာခါ ဘန္တေ မိဂါရမာတာ ဘဂဝန္တံ အဋ္ဌဝရာနိ ယာစိ၊ တသ္မိံ ဘန္တေ ဝတ္ထုသ္မိံ အနုညာတာ။

ပုစ္ဆာ – ဘဂဝတာ ¶ အာဝုသော မာတာပိတူနံ ဒါနံ အနုဇာနိတွာ သဒ္ဓါဒေယျံ ဝိနိပါတေန္တဿ ဒုက္ကဋံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ အညတရံ ဘိက္ခုံ အာရဗ္ဘ ပညတ္တံ၊ အညတရဿ ဘန္တေ ဘိက္ခုနော ဗဟုံ စီဝရံ ဥပ္ပန္နံ အဟောသိ၊ သော စ တံစီဝရံ မာတာပိတူနံ ဒါတုကာမော အဟောသိ၊ တသ္မိံ ဘန္တေ ဝတ္ထုသ္မိံ ပညတ္တံ။

မာတာပိတရောတိ ¶ ခေါ ဘိက္ခဝေ ဒဒမာနေ ကိံ ဝဒေယျာမ၊ အနုဇာနာမိ ဘိက္ခဝေ မာတာပိတူနံ ဒါတုံ၊ န စ ဘိက္ခဝေ သဒ္ဓါဒေယျံ ဝိနိပါတေတဗ္ဗံ၊ ယော ဝိနိပါတေယျ အာပတ္တိ ဒုက္ကဋဿ –

ပုစ္ဆာ – အညတြ ဝဿံ ဝုဋ္ဌေန အာဝုသော အညတြ စီဝရဘာဂံ သာဒိယန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ အာယသ္မန္တံ ဥပနန္ဒံ သကျပုတ္တံ အာရဗ္ဘ ပညတ္တံ၊ အာယသ္မာ ဘန္တေ ဥပနန္ဒော သကျပုတ္တော အညတြ ဝဿံ ဝုဋ္ဌော အညတြ စီဝရဘာဂံ သာဒိယိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – အနာထကံ ¶ အာဝုသော ဘိက္ခုံ ဂိလာနံ န ဥပဋ္ဌဟန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ အညတရံ ဘိက္ခုံ အာရဗ္ဘ ပညတ္တံ၊ ဘဂဝတိ ဘန္တေ သာဝတ္ထိယံ ဝိဟရတိ အညတရဿ ဘိက္ခုနော ကုစ္ဆိဝိကာရာဗာဓော အဟောသိ၊ သော သကေ မုတ္တကရီသေ ပလိပန္နော သယိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – နဂ္ဂိယံ ¶ အာဝုသော တိတ္ထိယသမာဒါနံ သမာဒိယန္တဿ ထုလ္လစ္စယံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ အညတရံ ဘိက္ခုံ အာရဗ္ဘ ပညတ္တံ၊ အညတရော ဘန္တေ ဘိက္ခု နဂ္ဂိယံ တိတ္ထိယသမာဒါနံ သမာဒိယိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – သဗ္ဗနီလကာနိ ¶ ဝါ အာဝုသော စီဝရာနိ သဗ္ဗပီတကာနိ ဝါ သဗ္ဗလောဟိတကာနိ ဝါ သဗ္ဗမဉ္ဇိဋ္ဌကာနိ ဝါ သဗ္ဗကဏှာနိဝါတိ ဧဝရူပါနိ စီဝရာနိ ဓာရေန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ¶ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ သဗ္ဗနီလကာဒီနိ စီဝရာနိ ဓာရေသုံ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ကဉ္စုကံ ¶ ဝါ အာဝုသော ဝေဌနံ ဝါ ဓာရေန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယေဝ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ ကဉ္စုကမ္ပိ ဓာရေသုံ ဝေဌနမ္ပိ ဓာရေသုံ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – စီဝရသညုတ္တံ ပုစ္ဆိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ အာဝုသော ကတိ အာပတ္တိယော။

ဝိဿဇ္ဇနာ – စီဝရသညုတ္တံ ဝိဿဇ္ဇိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ ဘန္တေ တိဿော အာပတ္တိယော။

ပုစ္ဆာ – သုဒ္ဓံ ¶ အာဝုသော ဘိက္ခုံ အနာပတ္တိကံ အဝတ္ထုသ္မိံ အကာရဏေ ဥက္ခိပန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – စမ္ပာယံ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တံ၊ ဘဂဝတိ ဘန္တေ စမ္ပာယံ ဝိဟရတိ သမ္ဗဟုလာ ဘိက္ခူ ကာသီသု ဝါသဘဂါမေ သုဒ္ဓံ ကဿပဂေါတ္တံ ဘိက္ခုံ အနာပတ္တိကံ အဝတ္ထုသ္မိံ အကာရဏေ ဥက္ခိပိံသု၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – စမ္ပေယျကံ ¶ ပုစ္ဆိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ အာဝုသော ကတိ အာပတ္တိယော။

ဝိဿဇ္ဇနာ – စမ္ပေယျကံ ဝိဿဇ္ဇိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ ဘန္တေ ဧကာ အာပတ္တိ။

ပုစ္ဆာ – ဘေဒဂရုကေဟိ ¶ ဘိက္ခဝေ ဘိက္ခူဟိ န သော ဘိက္ခု အာပတ္တိယာ အဒဿနေ ဥက္ခိပိတဗ္ဗောတိ စ၊ ဘေဒဂရုကေန ဘိက္ခဝေ ဘိက္ခုနာ ပရေသမ္ပိ သဒ္ဓါယ အာပတ္တိဒေသေတဗ္ဗာတိ စ အာဝုသော အယံ သာမဂ္ဂိရသဩဝါဒေါ ဘဂဝတာ ကတ္ထ ဒိန္နော၊ ကံ အာရဗ္ဘ ကိသ္မိံ ဝတ္ထုသ္မိံ ဒိန္နော။

ဝိဿဇ္ဇနာ – ကောသမ္ဗိယံ ဘန္တေ သမ္ဗဟုလေ ဘိက္ခူ အာရဗ္ဘ ဒိန္နော၊ ဘဂဝတိ ဘန္တေ ကောသမ္ဗိယံ ဝိဟရတိ အညတရော ဘိက္ခု အာပတ္တိံ အာပန္နော အဟောသိ၊ သော တဿာ အာပတ္တိယာ အာပတ္တိ ဒိဋ္ဌိ အဟောသိ၊ အညေ ဘိက္ခူ တဿာ အာပတ္တိယာ အနာပတ္တိ ဒိဋ္ဌိနော အဟေသုံ။ သော အပရေန သမယေန တဿာ အာပတ္တိယာ အနာပတ္တိဒိဋ္ဌိ အဟောသိ၊ အညေ ဘိက္ခူ တဿာ အာပတ္တိယာ အာပတ္တိဒိဋ္ဌိနော အဟေသုံ။ အထ ခေါ တေ ဘန္တေ ဘိက္ခူ သာမဂ္ဂိံ လဘိတွာ တံ ဘိက္ခုံ အာပတ္တိယာ အဒဿနေ ဥက္ခိပိံသု၊ တသ္မိံ ဘန္တေ ဝတ္ထုသ္မိံ ဒိန္နော။

ပုစ္ဆာ – သင်္ဃဘေဒဿ ¶ အာဝုသော မူလဘူတေ ဘိက္ခုမှိ ဥက္ခိတ္တကေ ဩသာရိတေ တဿ ဝတ္ထုဿ ဝူပသမာယ သင်္ဃသာမဂ္ဂိဉ္စ ကာတုံ သာမဂ္ဂီ ဥပေါသထဉ္စ ကာတုံ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – သာဝတ္ထိယံ ဘန္တေ တေယေဝ ဥက္ခိတ္တကာနုဝတ္တကေ ဘိက္ခူ အာရဗ္ဘ အနုညာတံ၊ တေ ဘန္တေ ဥက္ခိတ္တကာနုဝတ္တကာ ဘိက္ခူ တံ ဥက္ခိတ္တကံ ဘိက္ခုံ ဩသာရေတွာ ယေန ဥက္ခေပကာ ဘိက္ခူ တေနုပသင်္ကမိံသု ဥပသင်္ကမိတွာ တေ ဥက္ခေပကေ ဘိက္ခူ ဧကဒဝေါစုံ ‘‘ယသ္မိံ အာဝုသော ဝတ္ထုသ္မိံ အဟောသိ သင်္ဃဿ ¶ ဘဏ္ဍနံ ကလဟော ဝိဂ္ဂဟော ဝိဝါဒေါ သင်္ဃဘေဒေါ သင်္ဃရာဇိ သင်္ဃဝဝတ္ထာနံ သင်္ဃနာနာကရဏံ၊ သော ဧသော ဘိက္ခုံ အာပန္နော စ ဥက္ခိတ္တော စ ပဿိ စ ဩသာရိတော စ၊ ဟန္ဒ မယံ အာဝုသော တဿ ဝတ္ထုဿ ဝူပသမာယ သင်္ဃသာမဂ္ဂိံ ကရောမာ’’တိ၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – ကောသမ္ဗကံ ¶ ပုစ္ဆိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ အာဝုသော ကတိ အာပတ္တိယော။

ဝိဿဇ္ဇနာ – ကောသမ္ဗကံ ဝိဿဇ္ဇိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ ဘန္တေ ဧကာ အာပတ္တိ။