📜

စူဠဝဂ္ဂပါဠိ

၁။ ကမ္ဗက္ခန္ဓက

ပုစ္ဆာ – ဘဏ္ဍနာဒိကာရကဿ အာဝုသော ဘိက္ခုနော တဇ္ဇနီယကမ္မံ ကာတုံ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – သာဝတ္ထိယံ ဘန္တေ ပဏ္ဍုကလောဟိတကေ ဘိက္ခူ အာရဗ္ဘ အနုညာတံ၊ ပဏ္ဍုကလောဟိတကာ ဘန္တေ ဘိက္ခူ အတ္တနာ ဘဏ္ဍနကာရကာ ကလဟကာရကာ ဝိဝါဒကာရကာ ဘဿကာရကာ သင်္ဃေ အဓိကရဏကာရကာ၊ ယေပိ စညေ ဘိက္ခူ ဘဏ္ဍနကာရကာ ကလဟကာရကာ ဝိဝါဒကာရကာ ဘဿကာရကာ သင်္ဃေ အဓိကရဏကာရကာ တေ ဥပသင်္ကမိတွာ ဧဝမာဟံသု ‘‘မာ ခေါ တုမှေ အာယသ္မန္တော ဧသော အဇေသိ၊ ဗလဝါဗလဝံ ပဋိမန္တေထ၊ တုမှေ တေန ပဏ္ဍိတတရာ စ ဗျတ္တတရာ စ ဗဟုဿုတတရာ စ အလမတ္တတရာ စ၊ မာ စဿ ဘာယိတ္ထ၊ မယမ္ပိ တုမှာကံ ပက္ခာ ဘဝိဿာမာ’’တိ၊ တေန အနုပ္ပန္နာနိ စေဝ ဘဏ္ဍနာနိ ဥပ္ပဇ္ဇန္တိ၊ ဥပ္ပန္နာနိ စ ဘဏ္ဍနာနိ ဘိယျောဘာဝါယ ဝေပုလ္လာယ သံဝတ္တန္တိ။ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – တဇ္ဇနီယကမ္မကတဿ အာဝုသော ဘိက္ခုနော ကတိသု ဝတ္တေသု သမ္မာ ဝတ္တန္တဿ တံ ကမ္မံ ပဋိပ္ပဿမ္ဘေတုံ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – အဋ္ဌာရသသု ဘန္တေ ဝတ္တေသု သမ္မာ ဝတ္တန္တဿ တဇ္ဇနီယကမ္မကတဿ ဘိက္ခုနော တံ ကမ္မံ ပဋိပ္ပဿမ္ဘေတုံ ဘဂဝတာ သာဝတ္ထိယံ အနုညာတံ၊ တေယေဝ ပဏ္ဍုကလောဟိတကာ ဘိက္ခူ သင်္ဃေန တဇ္ဇနီယကမ္မကတာ သမ္မာ ဝတ္တိတွာ သင်္ဃံ ဥပသင်္ကမိတွာ ယာစိံသု၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – ဗာလဿ အာဝုသော အဗျတ္တဿ အာပတ္တိဗဟုလဿ အနပဒါနဿ ဂိဟိသံသဋ္ဌဿ အနနုလောမိကေဟိ ဂိဟိသံသဂ္ဂေဟိ နိယဿကမ္မံ ကာတုံ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ အာယသ္မန္တံ သေယျသကံ အာရဗ္ဘ ပညတ္တံ၊ အာယသ္မာ ဘန္တေ သေယျသကော ဗာလော အဟောသိ အဗျတ္တော အာပတ္တိဗဟုလော အနပဒါနော ဂိဟိသံသဋ္ဌော ဝိဟာသိ အနနုလောမိကေဟိ ဂိဟိသံသဂ္ဂေဟိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – နိယဿကမ္မကတဿ အာဝုသော ဘိက္ခုနော ကတိသု ဝတ္တေသု သမ္မာ ဝတ္တန္တဿ တံ ကမ္မံ ပဋိပ္ပဿမ္ဘေတုံ ဘဂဝတာ အနုညာတံ။

ဝိဿဇ္ဇနာ – အဋ္ဌာရသသု ဘန္တေ ဝတ္တေသု သမ္မာ ဝတ္တန္တဿ နိယဿ ကမ္မကတဿ ဘိက္ခုနော တံ ကမ္မံ ပဋိပ္ပဿမ္ဘေတုံ ဘဂဝတာ အနုညာတံ၊ န ဥပသမ္ပာဒေတဗ္ဗံ၊ န နိဿယော ဒါတဗ္ဗော၊ န သာမဏေရော ဥပဋ္ဌာပေတဗ္ဗော၊ န ဘိက္ခုနောဝါဒကသမ္မုတိ သာဒိတဗ္ဗာ၊ သမ္မတေနပိ ဘိက္ခုနိယော န ဩဝဒိတဗ္ဗာ၊ ဧဝမာဒီသု ဘန္တေ အဋ္ဌာရသသု ဝတ္တေသု သမ္မာ ဝတ္တန္တဿ နိယဿကမ္မကတဿ ဘိက္ခုနော တံ ကမ္မံ ပဋိပ္ပဿမ္ဘေတုံ ဘဂဝတာ အနုညာတံ။

ပုစ္ဆာ – ကုလဒူသကဿ အာဝုသော ပါပသမာစာရဿ ဘိက္ခုနော ပဗ္ဗာဇနီယကမ္မံ ကာတုံ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – သာဝတ္ထိယံ ဘန္တေ အဿဇိပုနဗ္ဗသုကေ ဘိက္ခူ အာရဗ္ဘ အနုညာတံ၊ အဿဇိပုနဗ္ဗသုကာ ဘန္တေ ဘိက္ခူ ကီဋာဂိရိသ္မိံ ကုလဒူသကာ အဟေသုံ ပါပသမာစာရာ၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – ပဋိသာရဏီယကမ္မံ အာဝုသော ပုစ္ဆာမိ၊ သဒ္ဓံ အာဝုသော ပသန္နံ ဂဟပတိံ ဒါယကံ ကာရကံ သင်္ဃုပဋ္ဌာကံ ဟီနေန ခုံသေန္တဿ ဘိက္ခုနော ပဋိသာရဏီယကမ္မံ ကာတုံ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – သာဝတ္ထိယံ ဘန္တေ အာယသ္မန္တံ သုဓမ္မံ အာရဗ္ဘ အနုညာတံ၊ ဘဂဝတိ ဘန္တေ သာဝတ္ထိယံ ဝိဟရတိ အာယသ္မာ သုဓမ္မော မစ္ဆိကာသဏ္ဍေ စိတ္တံ ဂဟပတိံ သဒ္ဓံ ပသန္နံ ဒါယကံ ကာရကံ သင်္ဃုပဋ္ဌာကံ ဟီနေန ခုံသေသိ ဟီနေန ဝမ္ဘေသိ၊ တသ္မိံ ဘန္တေ ဝတ္ထုသ္မိံ အနုညာတံ။

တေနဟိ ဘိက္ခဝေ သင်္ဃော သုဓမ္မဿ ဘိက္ခုနော ပဋိသာရဏီယကမ္မံ ကရောတု ‘‘စိတ္တော တေ ဂဟပတိ ခမာပေတဗ္ဗော’’တိ –

ပုစ္ဆာ – ပဋိသာရဏီယကမ္မကတဿ အာဝုသော ဘိက္ခုနော အနုဒူတံ ဒါတုဉ္စ တေန အနုဒူတေန သဒ္ဓိံ ဂန္တွာ ယထာခုံသိတံ ဂဟပတိံ ခမာပေတုံ စ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – သာဝတ္ထိယံ ဘန္တေ အာယသ္မန္တံယေဝ သုဓမ္မံ အာရဗ္ဘ အနုညာတံ၊ အာယသ္မာ ဘန္တေ သုဓမ္မော မစ္ဆိကာသဏ္ဍံ ဂန္တွာ မင်္ကုဘူတော နာသက္ခိ စိတ္တံ ဂဟပတိံ ခမာပေတုံ၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – ပဋိသာရဏီယကမ္မကတဿ အာဝုသော ဘိက္ခုနော ကတိသု ဝတ္တေသု သမ္မာ ဝတ္တန္တဿ တံ ကမ္မံ ပဋိပ္ပဿမ္ဘေတုံ ဘဂဝတာ အနုညာတံ။

ဝိဿဇ္ဇနာ – အဋ္ဌာရသသု ဘန္တေ ဝတ္တေသု သမ္မာ ဝတ္တန္တဿ ပဋိသာရဏီယ ကမ္မကတဿ ဘိက္ခုနော တံ ကမ္မံ ပဋိပ္ပဿမ္ဘေတုံ ဘဂဝတာ အနုညာတံ။

ပုစ္ဆာ – အာပတ္တိံ အာဝုသော အာပဇ္ဇိတွာ တံ အာပတ္တိံ ပဿိတုံ ဝါ ပဋိကာတုံ ဝါ န ဣစ္ဆန္တဿ ဘိက္ခုနော အာပတ္တိယာ အဒဿနေ ဝါ အပ္ပဋိကမ္မေ ဝါ ဥက္ခေပနီယကမ္မံ ကာတုံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ကောသမ္ဗိယံ ဘန္တေ အာယသ္မန္တံ ဆန္နတ္ထေရံ အာရဗ္ဘ ပညတ္တံ၊ အာယသ္မာ ဘန္တေ ဆန္နော အာပတ္တိံ အာပဇ္ဇိတွာ န ဣစ္ဆိ တံ အာပတ္တိံ ပဿိတုံ ဝါ ပဋိကာတုံ ဝါ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – အာပတ္တိယာ အာဝုသော အဒဿနေန ဝါ အပ္ပဋိကမ္မေ ဝါ ဥက္ခေပနီယ ကမ္မကတေန ဘိက္ခုနာ ကတိသု ဝတ္တေသု သမ္မာ ဝတ္တိတဗ္ဗံ။

ဝိဿဇ္ဇနာ – တေစတ္တာလီသာယ ဘန္တေ ဝတ္တေသု သမ္မာ ဝတ္တိတဗ္ဗံ။

ပုစ္ဆာ – ဥက္ခေပနီယကမ္မကတဿ အာဝုသော ဘိက္ခုနော သမ္မာ ဝတ္တန္တဿ တံ ကမ္မံ ပဋိပ္ပဿမ္ဘေတုံ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – ကောသမ္ဗိယံ ဘန္တေ အာယသ္မန္တံယေဝ ဆန္နံ အာရဗ္ဘ အနုညာတံ၊ အာယသ္မာ ဘန္တေ ဆန္နော သင်္ဃေန အာပတ္တိယာ အဒဿနေ ဝါ အပ္ပဋိကမ္မေ ဝါ ဥက္ခေပနီယကမ္မကတော သမ္မာ ဝတ္တေသိ လောမံပါတေသိ နေတ္ထာရံ ဝတ္တေသိ သင်္ဃံ ဥပသင်္ကမိတွာ တဿ ကမ္မဿ ပဋိပ္ပဿဒ္ဓိယာ ယာစိ၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – ပါပိကံ အာဝုသော ဒိဋ္ဌိံ ဂဟေတွာ တံ ဒိဋ္ဌိံ န ပဋိနိဿဇ္ဇန္တဿ ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မံ ကာတုံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ အရိဋ္ဌံ ဘိက္ခုံ ဂဒ္ဓဗာဓိပုဗ္ဗံ အာရဗ္ဘ ပညတ္တံ၊ ဘဂဝတိ ဘန္တေ သာဝတ္ထိယံ ဝိဟရတိ အရိဋ္ဌဿ နာမ ဘိက္ခုနော ဂဒ္ဓဗာဓိပုဗ္ဗဿ ဧဝရူပံ ပါပကံ ဒိဋ္ဌိဂတံ ဥပ္ပန္နံ အဟောသိ ‘‘တထာဟံ ဘဂဝတာ ဓမ္မံ ဒေသိတံ အာဇာနာမိ၊ ယထာယေမေ အန္တရာယိကာ ဓမ္မာ ဝုတ္တာ ဘဂဝတာ၊ တေ ပဋိသေဝတော နာလံ အန္တရာယာယာ’’တိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ပါပိကာယ အာဝုသော ဒိဋ္ဌိယာ အပ္ပဋိနိဿဂ္ဂေ ဥက္ခေပနီယကမ္မကတေန ဘိက္ခုနာ ကတိသု ဝတ္တေသု သမ္မာ ဝတ္တိတဗ္ဗံ။

ဝိဿဇ္ဇနာ – တေစတ္တာလီသာယ ဘန္တေ ဝတ္တေသု သမ္မာ ဝတ္တိတဗ္ဗံ။

ပုစ္ဆာ – ကမ္မက္ခန္ဓကံ ပုစ္ဆိဿံ၊ သနိဒါနိ သနိဒ္ဒေသံ။ သမုက္ကဋ္ဌပဒါနံ အာဝုသော ကတိ အာပတ္တိယော။

ဝိဿဇ္ဇနာ – ကမ္မက္ခန္ဓကံ ဝိဿဇ္ဇိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ ဘန္တေ ဧကာ အာပတ္တိ။

၂။ ပါရိဝါသိကက္ခန္ဓက

ပုစ္ဆာ – ပါရိဝါသိကဿ အာဝုသော ပကတတ္တာနံ ဘိက္ခူနံ အဘိဝါဒနာဒီနိ သာဒိယန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ ပါရိဝါသိကေ ဘိက္ခူ အာရဗ္ဘ ပညတ္တံ၊ ပါရိဝါသိကာ ဘန္တေ ဘိက္ခူ သာဒိယိံသု ပကတတ္တာနံ ဘိက္ခူနံ အဘိဝါဒနာဒီနိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ပါရိဝါသိကေန အာဝုသော ဘိက္ခုနာ ကတိသု ဝတ္တေသု သမ္မာ ဝတ္တိတဗ္ဗံ။

ဝိဿဇ္ဇနာ – ပါရိဝါသိကေန ဘန္တေ ဘိက္ခုနာ စတုနဝုတိယာ ဝတ္တေသု သမ္မာ ဝတ္တိတဗ္ဗံ။

ပုစ္ဆာ – ပါရိဝါသိကံ ပုစ္ဆိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ အာဝုသော ကတိ အာပတ္တိယော။

ဝိဿဇ္ဇနာ – ပါရိဝါသိကံ ဝိဿဇ္ဇိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ ဘန္တေ ဧကာ အာပတ္တိ။

၃။ သမုစ္စယက္ခန္ဓက

ပုစ္ဆာ – သမုစ္စယံ ပုစ္ဆိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ အာဝုသော ကတိ အာပတ္တိယော။

ဝိဿဇ္ဇနာ – သမုစ္စယံ ဝိဿဇ္ဇိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ ဘန္တေ ဧကာ အာပတ္တိ။

၄။ သမထက္ခန္ဓက

ပုစ္ဆာ – အသမ္မုခီဘူတာနံ အာဝုသော ဘိက္ခူနံ တဇ္ဇနီယံ ဝါ နိယဿံ ဝါ ပဗ္ဗာဇနီယံ ဝါ ပဋိသာရဏီယံ ဝါ ဥက္ခေပနီယံ ဝါ ကမ္မံ ကရောန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ အသမ္မုခီဘူတာနံ ဘိက္ခူနံ ကမ္မံ အကံသု တဇ္ဇနီယမ္ပိ နိယဿမ္ပိ ပဗ္ဗာဇနီယမ္ပိ ပဋိသာရဏီယမ္ပိ ဥက္ခေပနီယမ္ပိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – သတိဝေပုလ္လပတ္တဿ အာဝုသော ဘိက္ခုနော သတိဝိနယံ ဒါနံ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – ရာဇဂဟေ ဘန္တေ မေတ္တိယဘူမဇကေ ဘိက္ခူ အာရဗ္ဘ အနုညာတံ မေတ္တိယဘူမဇကာ ဘန္တေ ဘိက္ခူ အာယသ္မန္တံ ဒဗ္ဗံ မလ္လပုတ္တံ အမူလိကာယ သီလဝိပတ္တိယာ အနုဒ္ဓံသေသုံ၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – ကတိပနာဝုသော ဧတ္ထ ဓမ္မိကာနိ သတိဝိနယဒါနာနိ။

ဝိဿဇ္ဇနာ – ပဉ္စိမာနိ ဘန္တေ ဓမ္မိကာနိ သတိဝိနယဿ ဒါနာနိ၊ သုဒ္ဓါ ဟောတိ ဘိက္ခု အနာပတ္တိကော၊ အနုဝဒန္တိ စ နံ၊ ယာစတိ စ၊ တဿ သင်္ဃော သတိဝိနယံ ဒေတိ ဓမ္မေန သမဂ္ဂေန၊ ဣမာနိ ခေါ ဘန္တေ ပဉ္စ ဓမ္မိကာနိ သတိ ဝိနယဿ ဒါနာနိ။

ပုစ္ဆာ – အမူဠှဿ အာဝုသော ဘိက္ခုနော အမူဠှဝိနယံ ဒါတုံ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – ရာဇဂဟေ ဘန္တေ သမ္ဗဟုလေ ဘိက္ခူ အာရဗ္ဘ အနုညာတံ၊ သမ္ဗဟုလာ ဘန္တေ ဘိက္ခူ ဂဂ္ဂံ ဘိက္ခုံ ဥမ္မတ္တကေန စိတ္တဝိပရိယာသကတေန အဇ္ဈာစိဏ္ဏေန အာပတ္တိယာ စောဒေသုံ ‘‘သရတာ ယသ္မာ ဧဝရူပိံ အာပတ္တိံ အာပဇ္ဇိတာ’’တိ၊ သော ဧဝံ ဝဒေတိ ‘‘အဟံ ခေါ အာဝုသော ဥမ္မတ္တကော အဟောသိ စိတ္တဝိပရိယာသကတော၊ တေန မေ ဥမ္မတ္တကေန စိတ္တဝိပရိယာသကတေန ဗဟုံ အဿာမဏကံ အဇ္ဈာစိဏ္ဏံ ဘာသိတပရိက္ကန္တံ၊ နာဟံ တံ သရာမိ၊ မူဠှေန မေ ဧတံ ကတ’’န္တိ။ ဧဝမ္ပိ နံ ဝုစ္စမာနာ စောဒေန္တေဝ ‘‘သရတာ ယသ္မာ ဧဝရူပိံ အာပတ္တိံ အာပဇ္ဇိတာ’’တိ၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – ကတိ အာဝုသော အဓမ္မိကာနိ အမူဠှဝိနယဿ ဒါနာနိ၊ ဝိဘဇိတွာ ကထေဟိ။

ဝိဿဇ္ဇနာ – တီဏိ ဘန္တေ အဓမ္မိကာနိ အမူဠှဝိနယဿ ဒါနာနိ၊ ဣဓ ဘန္တေ ဘိက္ခု အာပတ္တိံ အာပန္နော ဟောတိ၊ တမေနံ စောဒေတိ သင်္ဃော ဝါ သမ္ဗဟုလာ ဝါ ဧကပုဂ္ဂလော ဝါ ‘‘သရတာယသ္မာ ဧဝရူပိံ အာပတ္တိံ အာပဇ္ဇိတာ’’တိ၊ သော သရမာနောဝ ဧဝံ ဝဒေတိ ‘‘န ခေါ အဟံ အာဝုသော သရာမိ ဧဝရူပိံ အာပတ္တိံ အာပဇ္ဇိတာ’’တိ။ အညော သရမာနောဝ ဧဝံ ဝဒေတိ ‘‘သရာမိ ခေါ အဟံ အာဝုသော ယထာ သုပိနန္တေနာ’’တိ။ အညော အနုမ္မတ္တကောဝ ဥမ္မတ္တကာလယံ ကရောတိ ‘‘အဟမ္ပိ ခေါ ဧဝံ ကရောမိ၊ တုမှေပိ ဧဝံ ကရောထ၊ မယှမ္ပိ ဧတံ ကပ္ပတိ၊ တုမှာကမ္ပေတံ ကပ္ပတီ’’တိ။ ဧသံ သင်္ဃော အမူဠှဝိနယံ ဒေတိ၊ အဓမ္မိကံ ဘန္တေ အမူဠှဝိနယဿ ဒါနံ။ ဣမာနိ ခေါ ဘန္တေ တီဏိ အဓမ္မိကာနိ အမူဠှဝိနယဿ ဒါနာနိ။

ပုစ္ဆာ – ကတိ အာဝုသော ဓမ္မိကာနိ အမူဠှဝိနယဿ ဒါနာနိ၊ ဝိဘဇိတွာ ကထေဟိ။

ဝိဿဇ္ဇနာ – တီဏိ ဘန္တေ ဓမ္မိကာနိ အမူဠှဝိနယဿ ဒါနာနိ၊ ဣဓ ဘန္တေ ဘိက္ခု ဥမ္မတ္တကော ဟောတိ စိတ္တဝိပရိယာသကတော တေန ဥမ္မတ္တကေန စိတ္တဝိပရိယာသကတေန ဗဟုံ အဿာမဏကံ အဇ္ဈာစိဏ္ဏံ ဟောတိ ဘာသိတပရိက္ကန္တံ၊ တမေနံ စောဒေတိ သင်္ဃော ဝါ သမ္ဗဟုလာ ဝါ ဧကပုဂ္ဂလော ဝါ ‘‘သရတာယသ္မာ ဧဝရူပိံ အာပတ္တိံ အာပဇ္ဇိတာ’’တိ၊ သော အဿရမာနောဝ ဧဝံ ဝဒေတိ ‘‘န ခေါ အဟံ အာဝုသော သရာမိ ဧဝရူပိံ အာပတ္တိံ အာပဇ္ဇိတာ’’တိ။ အညောပိ အဿရမာနောဝ ဧဝံ ဝဒေတိ ‘‘သရာမိ ခေါ အဟံ အာဝုသော ယထာ သုပိနန္တေနာ’’တိ။ အညောပိ ဥမ္မတ္တကောဝ ဥမ္မတ္တကာလယံ ကရောတိ ‘‘အဟမ္ပိ ဧဝံ ကရောမိ၊ တုမှေပိ ဧဝံ ကရောထ၊ မယှမ္ပိ ဧတံ ကပ္ပတိ၊ တုမှာကမ္ပေတံ ကပ္ပတီ’’တိ။ ဧသံ ဘန္တေ တိဏ္ဏံ ဘိက္ခူနံ သင်္ဃော အမူဠှဝိနယံ ဒေတိ၊ ဓမ္မိကံ ဘန္တေ အမူဠှဝိနယဿ ဒါနံ။ ဣမာနိ ခေါ ဘန္တေ တီဏိ ဓမ္မိကာနိ အမူဠှဝိနယဿ ဒါနာနိ။

ပုစ္ဆာ – အပ္ပဋိညာယ အာဝုသော ဘိက္ခူနံ တဇ္ဇနီယာဒီနိ ကမ္မာနိ ကရောန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ အပ္ပဋိညာယ ဘိက္ခူနံ ကမ္မာနိ အကံသု တဇ္ဇနီယာဒီနိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ကထံ အာဝုသော အဓမ္မိကံ ဟောတိ ပဋိညာတကရဏံ။

ဝိဿဇ္ဇနာ – အညထာ ဘန္တေ အာပတ္တိံ အာပဇ္ဇန္တဿ အညထာ ပဋိဇာနန္တဿ ယထာ သော ပဋိဇာနာတိ၊ တထာ သင်္ဃော ကာရေတိ၊ ဧဝံ ခေါ ဘန္တေ အဓမ္မိကံ ဟောတိ ပဋိညာတကရဏံ။

ပုစ္ဆာ – ကထံ အာဝုသော ဓမ္မိကံ ဟောတိ ပဋိညာတကရဏံ။

ဝိဿဇ္ဇနာ – ယံ ဘန္တေ အာပတ္တိံ အာပဇ္ဇန္တဿ တမေဝ ပဋိဇာနန္တဿ တေနေဝ သင်္ဃော ကာရေတိ၊ ဧဝံ ခေါ ဘန္တေ ဓမ္မိကံ ပဋိညာတကရဏံ။

ပုစ္ဆာ – ယေဘုယျသိကာယ အာဝုသော အဓိကရဏံ ဝူပသမေတုံ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – ရာဇဂဟေ ဘန္တေ သမ္ဗဟုလေ ဘိက္ခူ အာရဗ္ဘ အနုညာတံ၊ သမ္ဗဟုလာ ဘန္တေ ဘိက္ခူ ဘဏ္ဍနဇာတာ ကလဟဇာတာ ဝိဝါဒါပန္နာ အညမညံ မုခသတ္တီဟိ ဝိတုဒန္တာ ဝိဟရိံသု၊ န သက္ကောန္တိ တံ အဓိကရဏံ ဝူပသမေတုံ၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – ကထံ အာဝုသော အဓိကရဏံ ယေဘုယျသိကာယ ဝူပသမေတဗ္ဗံ။

ဝိဿဇ္ဇနာ – ပဉ္စဟိ ဘန္တေ အင်္ဂေဟိ သမန္နာဂတော ဘိက္ခု သလာကဂ္ဂါဟာပကော သမ္မန္နိတဗ္ဗော၊ တေန ဘန္တေ သလာကဂ္ဂါဟာပကေန သလာကာ ဂါဟာတဗ္ဗာ ယထာ ဗဟုတရာ ဘိက္ခူ ဓမ္မဝါဒိနော ဝဒန္တိ တထာ တံ အဓိကရဏံ ဝူပသမေတဗ္ဗံ၊ ဧဝံ ခေါ ဘန္တေ ယေဘုယျသိကာယ အဓိကရဏံ ဝူပသမေတဗ္ဗံ။

ပုစ္ဆာ – ကတိ အာဝုသော အဓမ္မိကာ သလာကဂ္ဂါဟာ။

ဝိဿဇ္ဇနာ – ဒသ ဘန္တေ အဓမ္မိကာ သလာကဂ္ဂါဟာ၊ ဩရမတ္တကဉ္စ အဓိကရဏံ ဟောတိ၊ န စ ဂတိဂတံ ဟောတိ၊ န စ သရိတသာရိတံ ဟောတိ၊ ဇာနာတိ ‘အဓမ္မဝါဒီ ဗဟုတရာ’တိ၊ အပ္ပေဝ နာမ အဓမ္မဝါဒီ ဗဟုတရာ အဿူတိ၊ ဇာနာတိ ‘သင်္ဃော ဘိဇ္ဇိဿတီ’တိ၊ အပ္ပေဝ နာမ သင်္ဃော ဘိဇ္ဇေယျာတိ၊ အဓမ္မေန ဂဏှန္တိ၊ ဝဂ္ဂါ ဂဏှန္တိ၊ န စ ယထာဒိဋ္ဌိယာ ဂဏှန္တိ၊ ဣမေ ခေါ ဘန္တေ ဒသ အဓမ္မိကာ ကလာကဂ္ဂါဟာ။

ပုစ္ဆာ – ကတိ အာဝုသော ဓမ္မိကာ သလာကဂ္ဂါဟာ။

ဝိဿဇ္ဇနာ – ဒသ ဘန္တေ ဓမ္မိကာ သလာကဂ္ဂါဟာ ဝုတ္တဝိပရိယာယေန။

ပုစ္ဆာ – ပါပုဿန္နဿ အာဝုသော ဘိက္ခုဿ တဿ ပါပိယသိကာ ကမ္မံ ကာတုံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ ဥပဝါဠံ ဘိက္ခုံ အာရဗ္ဘ ပညတ္တံ၊ ဥပဝါဠော ဘန္တေ ဘိက္ခု သင်္ဃမဇ္ဈေ အာပတ္တိယာ အနုယုဉ္ဇိယမာနော အဝဇာနိတွာ ပဋိဇာနာတိ၊ ပဋိဇာနိတွာ အဝဇာနာတိ၊ အညေနညံ ပဋိစရတိ၊ သမ္ပဇာနမုသာ ဘာသတိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ကတိ အာဝုသော ဓမ္မိကာနိ တဿပါပိယသိကာ ကမ္မဿ ကရဏာနိ။

ဝိဿဇ္ဇနာ – ပဉ္စိမာနိ ဘန္တေ ဓမ္မိကာနိ တဿပါပိယသိကာ ကမ္မဿ ကရဏာနိ။ အသုစိ စ ဟောတိ၊ အလဇ္ဇီ စ၊ သာနုဝါဒေါ စ၊ တဿ သင်္ဃော တဿပါပိယသိကာ ကမ္မံ ကရောတိ ဓမ္မေန သမဂ္ဂေန၊ ဣမာနိ ခေါ ဘန္တေ ပဉ္စ ဓမ္မိကာနိ တဿ ပါပိယသိကာ ကမ္မဿ ကရဏာနိ။

ပုစ္ဆာ – တဿ ပါပိယသိကာကမ္မကတေန အာဝုသော ဘိက္ခုနာ ကတိသု ဝတ္တေသု သမ္မာ ဝတ္တိတဗ္ဗံ။

ဝိဿဇ္ဇနာ – တဿ ပါပိယသိကာကမ္မကတေန ဘန္တေ ဘိက္ခုနာ အဋ္ဌာရသသု ဝတ္တေသု သမ္မာ ဝတ္တိတဗ္ဗံ။ န ဥပသမ္ပာဒေတဗ္ဗံ၊ န နိဿယော ဒါတဗ္ဗော၊ န သာမဏေရော ဥပဋ္ဌာပေတဗ္ဗော၊ ဧဝမာဒီသု ဘန္တေ အဋ္ဌာရသသု ဝတ္တေသု သမ္မာ ဝတ္တိတဗ္ဗံ။

ပုစ္ဆာ – ကတိ အာဝုသော အဓိကရဏာနိ သမထေဟိ ဝူပသမေတဗ္ဗာနိ။

ဝိဿဇ္ဇနာ – စတ္တာရိမာနိ ဘန္တေ အဓိကရဏာနိ သမထေဟိ ဝူပသမေတဗ္ဗာနိ၊ ဝိဝါဒါဓိကရဏံ အနုဝါဒါဓိကရဏံ အာပတ္တာဓိကရဏံ ကိစ္စာဓိကရဏံ၊ ဣမာနိ ဘန္တေ စတ္တာရိ အဓိကရဏာနိ သမထေဟိ ဝူပသမေတဗ္ဗာနိ။

ပုစ္ဆာ – ကိံ အာဝုသော ဝိဝါဒါဓိကရဏဿ မူလံ။

ဝိဿဇ္ဇနာ – ဆ ဘန္တေ ဝိဝါဒမူလာနိ ဝိဝါဒါဓိကရဏဿ မူလံ၊ တီဏိပိ အကုသလမူလာနိ ဝိဝါဒါဓိကရဏဿ မူလံ၊ တီဏိပိ ကုသလမူလာနိ ဝိဝါဒါဓိကရဏဿ မူလံ၊ ဣဒံ ဘန္တေ ဝိဝါဒါဓိကရဏဿ မူလံ။

ပုစ္ဆာ – ကိံ ပနာဝုသော အနုဝါဒါဓိကရဏဿ မူလံ။

ဝိဿဇ္ဇနာ – ဆ ဘန္တေ အနုဝါဒမူလာနိ အနုဝါဒါဓိကရဏဿ မူလံ၊ တီဏိပိ အကုသလမူလာနိ အနုဝါဒါဓိကရဏဿ မူလံ၊ တီဏိပိ ကုသလမူလာနိ အနုဝါဒါဓိကရဏဿ မူလံ၊ ကာယောပိ အနုဝါဒါဓိကရဏဿ မူလံ၊ ဝါစာပိ အနုဝါဒါဓိကရဏဿ မူလံ၊ ဣဒံ ခေါ ဘန္တေ အနုဝါဒါဓိကရဏဿ မူလံ။

ပုစ္ဆာ – ကိံ ပနာဝုသော အာပတ္တာဓိကရဏဿ မူလံ။

ဝိဿဇ္ဇနာ – ဆ ဘန္တေ အာပတ္တိသမုဋ္ဌာနာ အာပတ္တာဓိကရဏဿ မူလံ၊ အတ္တိ ဘန္တေ အာပတ္တိ ကာယတော သမုဋ္ဌာတိ န ဝါစတော န စိတ္တတော၊ အတ္ထိ ဘန္တေ အာပတ္တိ ဝါစတော သမုဋ္ဌာတိ န ကာယတော န စိတ္တတော၊ အတ္ထိ ဘန္တေ အာပတ္တိ ကာယတော စ ဝါစတော စ သမုဋ္ဌာတိ န စိတ္တတော၊ အတ္ထိ ဘန္တေ အာပတ္တိ ကာယတော စ စိတ္တတော စ သမုဋ္ဌာတိ န ဝါစတော၊ အတ္ထိ ဘန္တေ အာပတ္တိ ဝါစတော စ စိတ္တတော စ သမုဋ္ဌာတိ န ကာယတော၊ အတ္ထိ ဘန္တေ အာပတ္တိ ကာယတော စ ဝါစတော စ စိတ္တတော စ သမုဋ္ဌာတိ၊ ဣမာနိ ဘန္တေ ဆ အာပတ္တိ သမုဋ္ဌာနာနိ အာပတ္တာဓိကရဏဿ မူလံ။

ပုစ္ဆာ – ကိံ ပနာဝုသော ကိစ္စာဓိကရဏဿ မူလံ။

ဝိဿဇ္ဇနာ – ကိစ္စာဓိကရဏဿ ဘန္တေ ဧကံ မူလံ သင်္ဃော။

ပုစ္ဆာ – သမထံ အာဝုသော ပုစ္ဆိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ အာဝုသော ကတိ အာပတ္တိယော။

ဝိဿဇ္ဇနာ – သမထံ ဘန္တေ ဝိဿဇ္ဇိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ ဘန္တေ ဒွေ အာပတ္တိယော။

၅။ ခုဒ္ဒကဝတ္ထုက္ခန္ဓက

ပုစ္ဆာ – နဟာယန္တေန အာဝုသော ဘိက္ခုနာ ရုက္ခေ ဝါ ထမ္ဘေ ဝါ ကုဋ္ဋေ ဝါ ကာယံ ဥဂ္ဃံသေန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ နဟာယမာနာ ရုက္ခေပိ ထမ္ဘေပိ ကုဋ္ဋေပိ ကာယံ ဥဂ္ဃံသေသုံ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ဂန္ဓဗ္ဗဟတ္ထကေန ဝါ အာဝုသော ကုရုဝိန္ဒကသုတ္တိယာ ဝါ မလ္လကေန ဝါ နဟာယန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ ဆဗ္ဗဂ္ဂိယေဝ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ ဂန္ဓဗ္ဗဟတ္ထကေနပိ ကုရုဝိန္ဒကသုတ္တိယာပိ မလ္လကေနပိ နဟာယိံသု၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ပါဏိနာ အာဝုသော ပရိကမ္မံ ကာတုံ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – ရာဇဂဟေ ဘန္တေ သမ္ဗဟုလေ ဘိက္ခူ အာရဗ္ဘ အနုညာတံ၊ သမ္ဗဟုလာ ဘန္တေ ဘိက္ခူ ပိဋ္ဌိပရိကမ္မံ ကာတုံ ကုက္ကုစ္စာယိံသု၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – ဝလ္လိကံ ဝါ အာဝုသော ပါမင်္ဂံ ဝါ ကဏ္ဌသုတ္တကံ ဝါ ကဋိသုတ္တကံ ဝါ ဩဝဋ္ဋိကံ ဝါ ကာယုရံ ဝါ ဟတ္ထာဘရဏံ ဝါ အင်္ဂုလိမုဒ္ဒိကံ ဝါ ဓာရေန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ ဝလ္လိကာဒီနိ ဓာရေသုံ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ဒီဃေ အာဝုသော ကေသေ ဓာရေန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ ဒီဃေ ကေသေ ဓာရေသုံ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ကောစ္ဆေနဝါ အာဝုသော ဖဏကေနဝါ ဟတ္ထဖဏကေနဝါ ကေသေ ဩသဏ္ဌေန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ ဆဗ္ဗဂ္ဂိယေဝ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ ကောစ္ဆာဒီဟိ ကေသေ ဩသဏ္ဌေသုံ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – အာဒါသေ ဝါ အာဝုသော ဥဒကပတ္တေ ဝါ မုခနိမိတ္တံ ဩလောကေန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ ဆဗ္ဗဂ္ဂိယေဝ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ အာဒါသေပိ ဥဒကပတ္တေပိ မုခနိမိတ္တံ ဩလောကေသုံ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – အာဗာဓပစ္စယာ ပနာဝုသော အာဒါသေ ဝါ ဥဒကပတ္တေ ဝါ မုခနိမိတ္တံ ဩလောကေတုံ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – ရာဇဂဟေ ဘန္တေ အညတရံ ဘိက္ခုံ အာရဗ္ဘ အနုညာတံ၊ ဘဂဝတိ ဘန္တေ ရာဇဂဟေ ဝိဟရတိ အညတရဿ ဘိက္ခုနော မုခေ ဝဏော အဟောသိ၊ သော ဘိက္ခူ ဧတဒဝေါစ ‘‘ကီဒိသော မေ အာဝုသော ဝဏော’’တိ၊ ဘိက္ခူ ဧဝမာဟံသု ‘‘ဧဒိသော တေ အာဝုသော ဝဏော’’တိ၊ သော န သဒ္ဒဟတိ၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – မုခါလေပနာဒီနိ အာဝုသော ကရောန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ မုခါလေပနာဒီနိ အကံသု၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – နစ္စံ ဝါ အာဝုသော ဂီတံ ဝါ ဝါဒိတံ ဝါ ဒဿနာယ ဂစ္ဆန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ နစ္စမ္ပိ ဂီတမ္ပိ ဝါဒိတမ္ပိ ဒဿနာယ ဂစ္ဆိံသု၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ကထံ အာဝုသော နစ္စာဒီနိ ပဿန္တဿ အာပတ္တိ ဟောတိ၊ ကထံ ပန အနာပတ္တိ။

ဝိဿဇ္ဇနာ – နစ္စံ ဝါ ဘန္တေ ဂီတံ ဝါ ဝါဒိတံ ဝါ ဒဿနာယ ဂစ္ဆတိ အာပတ္တိ ဒုက္ကဋဿ၊ ယတ္ထ ဌိတော ပဿတိ ဝါ သုဏာတိ ဝါ အာပတ္တိ ဒုက္ကဋဿ ၊ ဒဿနူပစာရံ ဝိဇဟိတွာ ပုနပ္ပုနံ ပဿတိ အာပတ္တိ ဒုက္ကဋဿ၊ အာရာမေ ဌိတဿ ပဿတော အနာပတ္တိ၊ ဝိဟာရတော ပန ဝိဟာရံ ပဿိဿာမီတိ ဂစ္ဆတော အာပတ္တိယေဝ၊ ယတ္ထ ဌိတော ပဿတိ ဝါ သုဏာတိ ဝါ အာပတ္တိ ဒုက္ကဋဿ၊ အာသနသာလာယ နိသိန္နော ပဿတိ အနာပတ္တိ၊ ပဿိဿာမီတိ ဝုဋ္ဌဟိတွာ ဂစ္ဆတိ အာပတ္တိ ဒုက္ကဋဿ၊ ယတ္ထ ဌိတော ပဿတိ ဝါ သုဏာတိ ဝါ အာပတ္တိ ဒုက္ကဋဿ၊ ပတိပထံ ဂစ္ဆန္တော ပဿတိ အနာပတ္တိ၊ ဂီဝံ ပရိဝတ္တေတွာ ပဿတော ပန အာပတ္တိ ဘန္တေ။

ပုစ္ဆာ – အာယတကေန အာဝုသော ဂီတဿရေန ဓမ္မံ ဂါယန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ အာယတကေန ဂီတဿရေန ဓမ္မံ ဂါယိံသု၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ဒါရုပတ္တံ အာဝုသော ဓာရေန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ အာယသ္မန္တံ ပိဏ္ဍောလဘာရဒွါဇံ အာရဗ္ဘ ပညတ္တံ၊ အာယသ္မာ ဘန္တေ ပိဏ္ဍောလဘာရဒွါဇော ဆဝဿ ဒါရုပတ္တဿ ကာရဏာ ဂိဟီနံ ဥတ္တရိမနုဿဓမ္မံ ဣဒ္ဓိပါဋိဟာရိယံ ဒဿေတိ၊ တသ္မိံ ဘန္တေ ဝတ္ထုသ္မိံ ပညတ္တံ။

န စ ဘိက္ခဝေ ဒါရုပတ္တော ဓာရေတဗ္ဗော၊ ယော ဓာရေယျ အာပတ္တိ ဒုက္ကဋဿ –

ပုစ္ဆာ – ဘဂဝတာ အာဝုသော ဥစ္စာဝစေ ပတ္တေ ပဋိက္ခိပိတွာ အယော ပတ္တော ဘူမိပတ္တောတိ ဣမေယေဝ ဒွေ ပတ္တာ ကတ္ထ အနုညာတာ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတာ။

ဝိဿဇ္ဇနာ – ရာဇဂဟေ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ အနုညာတာ၊ ဆဗ္ဗဂ္ဂိယာ ဘန္တေ ဘိက္ခူ ဥစ္စာဝစေ ပတ္တေ ဓာရေသုံ သောဝဏ္ဏမယာ ရူပိယမယာ၊ တသ္မိံ ဘန္တေ ဝတ္ထုသ္မိံ အနုညာတာ။

ပုစ္ဆာ – သောဒကံ အာဝုသော ပတ္တံ ပဋိသာမေန္တဿ စ ဩတာပေန္တဿစ ဥဏှေ ပတ္တံ နိဒဟန္တဿ စ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ သောဒကံ ပတ္တံ ပဋိသာမေသုံ၊ ဩတာပေသုံ၊ ဥဏှေ ပတ္တံ နိဒဟိံသု၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ဆဝသီသပတ္တံ အာဝုသော ဓာရေန္တဿ စ သဗ္ဗပံသုကူလိကဿ စ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ အညတရံ ဘိက္ခုံ အာရဗ္ဘ ပညတ္တံ၊ အညတရော ဘန္တေ ဘိက္ခု သဗ္ဗပံသုကူလိကော အဟောသိ၊ သော ဆဝသီသဿ ပတ္တံ ဓာရေသိ၊ အညတရာ ဣတ္ထီ ပဿိတွာ ဘီတာ ဝိဿရမကာသိ ‘‘အဘုံ မေ ပိသာစော ဝတာယ’’န္တိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – စလကာနိ ဝါ အာဝုသော အဋ္ဌိကာနိ ဝါ ဥစ္ဆိဋ္ဌောဒကံ ဝါ ပတ္တေန နီဟရန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ စလကာနိပိ အဋ္ဌိကာနိပိ ဥစ္ဆိဋ္ဌော ဒကမ္ပိ ပတ္တေန နီဟရိံသု၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ဥပါဟနတ္ထဝိကာ အာဝုသော ဘဂဝတာ ကတ္ထ အနုညာတာ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတာ။

ဝိဿဇ္ဇနာ – အန္တရာ စ ဘန္တေ ရာဇဂဟံ အန္တရာ စ ဝေသာလိံ အညတရံ ဘိက္ခုံ အာရဗ္ဘ အနုညာတာ၊ အညတရော ဘန္တေ ဘိက္ခု ဥပါဟနာယော ကာယဗန္ဓနေန ဗန္ဓိတွာ ဂါမံ ပိဏ္ဍာယ ပါဝိသိ၊ အညတရော ဥပါသကော တံ ဘိက္ခုံ အဘိဝါဒေန္တော ဥပါဟနာယော သီသေန ဃဋ္ဋေတိ၊ သော ဘိက္ခု မင်္ကု အဟောသိ၊ တသ္မိံ ဘန္တေ ဝတ္ထုသ္မိံ အနုညာတာ။

ပုစ္ဆာ – အဒ္ဓါနမဂ္ဂပ္ပဋိပန္နေန အာဝုသော ပရိဿာဝနံ ယာစိယမာနေန န ဒဒန္တဿ စ အပ္ပဋိဿာဝနကေန အဒ္ဓါနံ ပဋိပဇ္ဇန္တဿ စ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – အန္တရာ စ ဘန္တေ ရာဇဂဟံ အန္တရာ စ ဝေသာလိံ အညတရံ ဘိက္ခုံ အာရဗ္ဘ ပညတ္တံ၊ အညတရော ဘန္တေ ဘိက္ခု ပရိဿာဝနံ ယာစိယမာနော န အဒါသိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ပုပ္ဖာဘိကိဏ္ဏေ အာဝုသော သယနေ သယန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ဝေသာလိယံ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ ပုပ္ဖာဘိကိဏ္ဏေသု သယနေသု သယိံသု၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ဧကဘာဇနေ ဝါ အာဝုသော ဘုဉ္ဇန္တာနံ ဧကထာလကေ ဝါ ပိဝန္တာနံ ဧကတ္ထရဏပါဝုရဏာနံ ဝါ တုဝဋ္ဋာနံ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ဝေသာလိယံ ဘန္တေ ဆဗ္ဗဂ္ဂိယေဝ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ ဧကဘာဇနေပိ ဘုဉ္ဇိံသု၊ ဧကထာလကေပိ ပိဝိံသု၊ ဧကမဉ္စကေပိ တုဝဋ္ဋေသုံ၊ ဧကတ္ထရဏာပိ တုဝဋ္ဋေသုံ၊ ဧကပါဝုရဏာပိ တုဝဋ္ဋေသုံ၊ ဧကတ္ထရဏပါဝုရဏာပိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – စာမရိဗီဇနိံ အာဝုသော ပဋိက္ခိပိတွာ တိဿော ဗီဇနိယော ဘဂဝတာ ကတ္ထ အနုညာတာ၊ ကိသ္မိဉ္စ ဝတ္ထုသ္မိံ အနုညာတာ။

ဝိဿဇ္ဇနာ – သာဝတ္ထိယံ ဘန္တေ အနုညာတာ၊ သာဝတ္ထိယံ ဘန္တေ ဘဂဝတိ ဝိဟရတိ သင်္ဃဿ စာမရိဗီဇနီ ဥပ္ပန္နာ အဟောသိ၊ ဘဂဝတော ဧတမတ္ထံ အာရောစေသုံ၊ တသ္မိံ ဘန္တေ ဝတ္ထုသ္မိံ အနုညာတာ။

န ဘိက္ခဝေ စာမရိဗီဇနီ ဓာရေတဗ္ဗာ၊ ယော ဓာရေယျ၊ အာပတ္တိ ဒုက္ကဋဿ။ အနုဇာနာမိ ဘိက္ခဝေ တိဿော ဗီဇနိယော ဝါကမယံ ဥသီရမယံ မောရပိဉ္ဆာ မယံ။

ပုစ္ဆာ – ဒီဃေ အာဝုသော နခေ ဓာရေန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ အညတရံ ဘိက္ခုံ အာရဗ္ဘ ပညတ္တံ၊ အညတရော ဘန္တေ ဘိက္ခု ဒီဃေ နခေ ဓာရေသိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ကတ္တရိကာယ အာဝုသော ကေသေ ဆေဒါပေန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ ကတ္တရိကာယ ကေသေ ဆိန္ဒိံသု၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ဒီဃေ အာဝုသော နာသိကာလောမေ ဓာရေန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ ဒီဃာနိ နာသိကာလောမာနိ ဓာရေသုံ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ဥစ္စာဝစာ အာဝုသော ကဏ္ဏမလဟရဏိယော ပဋိက္ခိပိတွာ ဒသ ကဏ္ဏမလဟရဏိယော ဘဂဝတာ ကတ္ထ အနုညာတာ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတာ။

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ အနုညာတာ၊ ဆဗ္ဗဂ္ဂိယာ ဘန္တေ ဘိက္ခူ ဥစ္စာဝစာ ကဏ္ဏမလဟရဏိယော ဓာရေသုံ သောဝဏ္ဏမယံ ရူပိယမယံ၊ တသ္မိံ ဘန္တေ ဝတ္ထုသ္မိံ အနုညာတာ။

ပုစ္ဆာ – သင်္ဃာဋိပလ္လတ္ထိကာယ နိသီဒန္တဿ အာဝုသော ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ သင်္ဃာဋိပလ္လတ္ထိကာယ နိသီဒိံသု၊ သင်္ဃာဋိယာ ပတ္တာ လုဇ္ဇိံသု၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – အကာယဗန္ဓနေန အာဝုသော ဂါမံ ပဝိသန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ အညတရံ ဘိက္ခုံ အာရဗ္ဘ ပညတ္တံ၊ အညတရော ဘန္တေ ဘိက္ခု အကာယဗန္ဓနော ဂါမံ ပိဏ္ဍာယ ပါဝိသိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ဂိဟိနိဝတ္ထံ အာဝုသော နိဝါသေန္တဿ စ၊ ဂိဟိပါရုတံ ပါရုပန္တဿ စ၊ သံဝေလ္လိယံ နိဝါသေန္တဿ စ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ ဂိဟိနိဝတ္ထံ နိဝါသိံသု၊ ဂိဟိပါရုတမ္ပိ ပါရုပိံသု၊ သံဝေလ္လိယမ္ပိ နိဝါသိံသု၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ဥဘတော ကာဇံ အာဝုသော ဓာရေန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ ဥဘတော ကာဇံ ဓာရေသုံ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – လောကာယတံ အာဝုသော ပရိယာပုဏန္တဿ စ ဝါစေန္တဿ စ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ လောကာယတံ ပရိယာပုဏိံသုပိ ဝါစေသုမ္ပိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – တိရစ္ဆာနဝိဇ္ဇံ အာဝုသော ပရိယာပုဏန္တဿ စ ဝါစေန္တဿ စ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ တိရစ္ဆာနဝိဇ္ဇံ ပရိယာပုဏိံသုပိ ဝါစေသုမ္ပိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ခိပိတေ အာဝုသော ‘‘ဇီဝါ’’တိဝဒန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တံ၊ ဘဂဝါ ဘန္တေ မဟတိယာ ပရိသာယ ပရိဝုတော ဓမ္မံ ဒေသေန္တော ခိပိ၊ ဘိက္ခူ ‘‘ဇီဝတု ဘန္တေ ဘဂဝါ၊ ဇီဝတု သုဂတောတိ’’ ဥစ္စာသဒ္ဒံ မဟာသဒ္ဒံ အကံသု၊ တေန သဒ္ဒေန ဓမ္မကထာ အန္တရာ အဟောသိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – အာရာမေ အာဝုသော ပဿာဝဝစ္စာနံ တဟံ တဟံ ကရဏံ ပဋိက္ခိပိတွာ ဧကမန္တံ ကာတုံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ အာရာမေ တဟံ တဟံ ပဿာဝံ အကံသု၊ တဟံ တဟံ ဝစ္စံ အကံသု၊ အာရာမော ဒုဿိ၊ တသ္မိံ ဘန္တေ ဝတ္ထုသ္မိံ ပညတ္တံ။

ခုဒ္ဒကဝတ္ထုက္ခန္ဓက

ပုစ္ဆာ – ခုဒ္ဒကဝတ္ထုံ ပုစ္ဆိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ အာဝုသော ကတိ အာပတ္တိယော။

ဝိဿဇ္ဇနာ – ခုဒ္ဒကံ ဝိဿဇ္ဇိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ ဘန္တေ တိဿော အာပတ္တိယော။

၆။ သေနာသနက္ခန္ဓက

ပုစ္ဆာ – ပဉ္စ အာဝုသော လေဏာနိ ဘဂဝတာ ကတ္ထ အနုညာတာနိ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတာနိ။

ဝိဿဇ္ဇနာ – ရာဇဂဟေ ဘန္တေ သမ္ဗဟုလေ ဘိက္ခူ အာရဗ္ဘ အနုညာတာနိ၊ သမ္ဗဟုလာ ဘန္တေ ဘိက္ခူ ဘဂဝန္တံ ဥပသင်္ကမိတွာ ဧတဒဝေါစုံ ‘‘ရာဇဂဟကော ဘန္တေ သေဋ္ဌီ ဝိဟာရေ ကာရာပေတုကာမော၊ ကထံ နု ခေါ ဘန္တေ ပဋိပဇ္ဇိတဗ္ဗ’’န္တိ၊ တသ္မိံ ဘန္တေ ဝတ္ထုသ္မိံ အနုညာတာနိ။

ပုစ္ဆာ – ကထံ အာဝုသော ဝိဟာရာ ပဌမံ ဥပ္ပန္နာ၊ ကထဉ္စ တေ ပတိဋ္ဌာပိ တာ။

ဝိဿဇ္ဇနာ – ဧကာဟေနေဝ ဘန္တေ ရာဇဂဟကေန သေဋ္ဌိနာ ဆဋ္ဌိဝိဟာရာ ပတိဋ္ဌာပိတာ၊ တေ ဣဓ ဘန္တေ သဋ္ဌိဝိဟာရာ ဗုဒ္ဓပ္ပမုခဿ အာဂတာနာဂတဿ စာတုဒ္ဒိသဿ သင်္ဃဿ ပတိဋ္ဌာပိတာ။

ပုစ္ဆာ – ဝိဟာရေ အာဝုသော ပဋိဘာနကမ္မံ ပဋိက္ခိပိတွာ မာလာကမ္မာဒီနိ ဘဂဝတာ ကတ္ထ အနုညာတာနိ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတာနိ။

ဝိဿဇ္ဇနာ – ရာဇဂဟေ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ အနုညာတာနိ။ ဆဗ္ဗဂ္ဂိယာ ဘန္တေ ဘိက္ခူ ဝိဟာရေ ပဋိဘာနစိတ္တံ ကာရာပေသုံ ဣတ္ထိရူပကံ ပုရိသရူပကံ၊ တသ္မိံ ဘန္တေ ဝတ္ထုသ္မိံ အနုညာတာနိ။

ပုစ္ဆာ – ယထာဝုဍ္ဎံ အာဝုသော အဘိဝါဒနာဒီနိ စ အဂ္ဂါသနာဒီနိ စ အနုဇာနိတွာ သင်္ဃိကံ ယထာဝုဍ္ဎံ ပဋိဗာဟန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – အန္တရာ စ ဘန္တေ ဝေသာလိံ အန္တရာ စ သာဝတ္ထိံ ဆဗ္ဗဂ္ဂိယာနံ ဘိက္ခူနံ အန္တေဝါသိကေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာနံ ဘန္တေ ဘိက္ခူနံ အန္တေဝါသိကာ ဘိက္ခူ ဗုဒ္ဓပ္ပမုခဿ သင်္ဃဿ ပုရတော ပုရတော ဂန္တွာ ဝိဟာရေ ပဋိဂ္ဂဟေသုံ၊ သေယျာယော ပဋိဂ္ဂဟေသုံ ‘‘ဣဒံ အမှာကံ ဥပဇ္ဈာယာနံ ဘဝိဿတိ၊ ဣဒံ အမှာကံ အာစရိယာနံ ဘဝိဿတိ၊ ဣဒံ အမှာကံ ဘဝိဿတီ’’တိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ဧကေန အာဝုသော ဒွေ ပဋိဗာဟန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ အာယသ္မန္တံ ဥပနန္ဒံ သကျပုတ္တံ အာရဗ္ဘ ပညတ္တံ၊ အာယသ္မာ ဘန္တေ ဥပနန္ဒော သကျပုတ္တော ဧကော ဒွေ ပဋိဗာဟိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – နဝကေန အာဝုသော ဥဒ္ဒိသန္တေန သမကေ ဝါ အာသနေ နိသီဒိတုံ ဥစ္စတရေ ဝါ ဓမ္မဂါရဝေန၊ ထေရေန ပန ဘိက္ခုနာ ဥဒ္ဒိသာပေန္တေန သမကေ ဝါ အာသနေ နိသီဒိတုံ နီစတရေ ဝါ ဓမ္မဂါရဝေန ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ အနုညာတံ၊ သမ္ဗဟုလာ ဘန္တေ ဘိက္ခူ အာယသ္မတော ဥပါလိဿ သန္တိကေ ဝိနယံ ပရိယာပုဏိံသု၊ အာယသ္မာ ဘန္တေ ဥပါလိ ဌိတကောဝ ဥဒ္ဒိသတိ ထေရာနံ ဘိက္ခူနံ ဂါရဝေန၊ တတ္ထ ဘန္တေ ထေရာ စေဝ ဘိက္ခူ ကိလမိံသု အာယသ္မာ စ ဥပါလိ ကိလမိ၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – တိဝဿန္တရေန အာဝုသော သဟ နိသီဒိတုံ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ အနုညာတံ၊ သမ္ဗဟုလာနံ ဘန္တေ ဘိက္ခူနံ ဧတဒဟောသိ ‘‘ကိတ္တာဝတာနု ခေါ သမာနာသနိကော ဟောတီ’’တိ၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – မဉ္စေ စ အာဝုသော ပီဌေ စ ဒွိန္နံယေဝ နိသီဒိတုံ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ သမာနာသနိကေ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ သမာနာသနိကာ မဉ္စေ နိသီဒိတွာ မဉ္စံ ဘိန္ဒိံသု၊ ပီဌေ နိသီဒိတွာ ပီဌံ ဘိန္ဒိံသု၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – ဒီဃာသနေ ပနာဝုသော အသမာနာသနိကေဟိပိ နိသီဒိတုံ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ အနုညာတံ၊ သမ္ဗဟုလာ ဘန္တေ ဘိက္ခူ ဒီဃာသနေ အသမာနာသနိကေဟိ သဟ နိသီဒိတုံ ကုက္ကုစ္စာယိံသု၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – ပဉ္စ အာဝုသော အဝိဿဇ္ဇိယာနိ ဘဂဝတာ ကတ္ထ ပညတ္တာနိ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တာနိ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တာနိ၊ သမ္ဗဟုလာ ဘန္တေ ဘိက္ခူ သင်္ဃိကံ သေနာသနံ ဝိဿဇ္ဇေသုံ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ပဉ္စ အာဝုသော အဝေဘင်္ဂိယာနိ ဘဂဝတာ ကတ္ထ ပညတ္တာနိ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တာနိ။

ဝိဿဇ္ဇနာ – ကီဋာဂိရိသ္မိံ ဘန္တေ အဿဇိပုနဗ္ဗသုကေ ဘိက္ခူ အာရဗ္ဘ ပညတ္တာနိ၊ အဿဇိပုနဗ္ဗသုကာ ဘန္တေ ဘိက္ခူ သင်္ဃိကံ သေနာသနံ ဝိဘဇိံသု၊ တသ္မိံ ဘန္တေ ဝတ္ထုသ္မိံ ပညတ္တာနိ။

ပုစ္ဆာ – အညတြ ပရိဘောဂံ အာဝုသော အညတြ ပရိဘုဉ္ဇန္တဿ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – အာဠဝိယံ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ အညတရဿ ဥပါသကဿ ဝိဟာရပရိဘောဂံ သေနာသနံ အညတြ ပရိဘုဉ္ဇိံသု၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – အဓောတေဟိ စ အာဝုသော အလ္လေဟိ စ ပါဒေဟိ သေနာသနံ အက္ကမန္တဿ စ သဥပါဟနေန သေနာသနံ အက္ကမန္တဿ စ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – အာဠဝိယံ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ အဓောတေဟိ ပါဒေဟိ သေနာသနံ အက္ကမိံသု၊ အလ္လေဟိ စ ပါဒေဟိ သေနာသနံ အက္ကမိံသု၊ သဥပါဟနာပိ သေနာသနံ အက္ကမိံသု၊ သေနာသနံ ဒုဿိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ပရိကမ္မကတာယ အာဝုသော ဘူမိယာ နိဋ္ဌုဘန္တဿ စ ပရိကမ္မကတံ ဘိတ္တိံ အပဿယန္တဿ စ ဒုက္ကဋံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – အာဠဝိယံ ဘန္တေ သမ္ဗဟုလေဝ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဘိက္ခူ ပရိကမ္မကတာယ ဘူမိယာ နိဋ္ဌုဘိံသု၊ ပရိကမ္မကတံ ဘိတ္တိံ အပဿယိံသု၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – သေနာသနက္ခန္ဓကံ ပုစ္ဆိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ အာဝုသော ကတိ အာပတ္တိယော။

ဝိဿဇ္ဇနာ – သေနာသနက္ခန္ဓကံ ဝိဿဇ္ဇိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ ဘန္တေ တိဿော အာပတ္တိယော။

၇။ သင်္ဃတေဒကက္ခန္ဓက

ပုစ္ဆာ – ကထံ အာဝုသော ဆန္နံ သကျကုမာရာနံ သဟ ဥပါလိကပ္ပကေန ပဗ္ဗဇ္ဇာ အဟောသိ၊ ကထဉ္စ နေသံ ဝိသေသော ဥဒပါဒိ။

ဝိဿဇ္ဇနာ – ဘဂဝါ ဘန္တေ ဥပါလိံ ကပ္ပကံ ပဌမံ ပဗ္ဗာဇေသိ၊ ပစ္ဆာ တေ သကျကုမာရေ၊ အထ ဘန္တေ အာယသ္မာ ဘဒ္ဒိယော တေနေဝ အန္တရဝဿေန တိဿော ဝိဇ္ဇာ သစ္ဆာကာသိ၊ အာယသ္မာ အနုရုဒ္ဓါ ဒိဗ္ဗစက္ခုံ ဥပ္ပာဒေသိ၊ အာယသ္မာ အာနန္ဒော သောတာပတ္တိဖလံ သစ္ဆာကာသိ၊ ဒေဝဒတ္တော ပေါထုဇ္ဇနိကံ ဣဒ္ဓိံ အဘိနိပ္ဖာဒေသိ။ ဧဝံ ခေါ ဘန္တေ ဆန္နံ သကျကုမာရာနံ ဥပါလိကပ္ပကေန သဟ ပဗ္ဗဇ္ဇာ အဟောသိ၊ ဧဝဉ္စ ပန ဘန္တေ တေသံ ဝိသေသာဓိဂမော အဟောသိ။

ပကာသနီယ

ပုစ္ဆာ – ပကာသနီယကမ္မံ အာဝုသော ကာတုံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ ဒေဝဒတ္တံ အာရဗ္ဘ ပညတ္တံ၊ ဒေဝဒတ္တော ဘန္တေ ‘‘သရာဇိကာယ မံ ဘဂဝါ ပရိသာယ ခေဠာသကဝါဒေန အပသာဒေတိ၊ သာရိပုတ္တမောဂ္ဂလ္လာနေဝ ဥက္ကံသတီ’’တိ ကုပိတော အနတ္တမနော ဘဂဝတိ အာဃာတံ ဗန္ဓိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပကာသနီယ

ပုစ္ဆာ – ဒေဝဒတ္တဿ အာဝုသော ပကာသနီယကမ္မံ ကာရာပေတွာ ကထံ ဘဂဝါ ပကာသေတုံ အာဏာပေသိ။

ဝိဿဇ္ဇနာ – ဘဂဝါ ဘန္တေ ဒေဝဒတ္တဿ ပကာသနီယကမ္မံ ကာတုံ ပညပေတွာ အာယသ္မန္တံ သာရိပုတ္တံ အာမန္တေသိ ‘‘တေန ဟိ တွံ သာရိပုတ္တ ဒေဝဒတ္တံ ရာဇဂဟေ ပကာသေဟီ’’တိ၊ ဧဝံ ခေါ ဘန္တေ ဒေဝဒတ္တဿ ပကာသနီယကမ္မံ ကတွာ ဒေဝဒတ္တံ ရာဇဂဟေ ပကာသေတုံ ဘဂဝါ အာဏာပေသိ။

ဒေဝဒတ္တ

ပုစ္ဆာ – ကထံ အာဝုသော ဒေဝဒတ္တေန ဒုဋ္ဌစိတ္တေန ဝဓကစိတ္တေန တထာ ဂတဿ ရုဟိရံ ဥပ္ပာဒေတွာ ပဌမံ အာနန္တရိယံ ကမ္မံ ဥပစိတံ။

ဝိဿဇ္ဇနာ – ဘဂဝါ ဘန္တေ ဂိဇ္ဈကူဋဿ ပဗ္ဗတဿ ဆာယာယံ စင်္ကမိ၊ အထ ဘန္တေ ဒေဝဒတ္တော ဂိဇ္ဈကူဋံ ပဗ္ဗတံ အာရုဟိတွာ မဟတိံ သိလံ ပဝိဇ္ဈိ ‘‘ဣမာယ သမဏံ ဂေါတမံ ဇီဝိတာ ဝေါရောပေဿာမီ’’တိ၊ အထ ခေါ ဘန္တေ ဒွေ ပဗ္ဗတကူဋာနိ သမာဂန္တွာ တံ သိလံ သမ္ပဋိစ္ဆိံသု၊ တတော ပပတိကာ ဥပ္ပတိတွာ ဘဂဝတော ပါဒေ ရုဟိရံ ဥပ္ပာဒေသိ။ ဧဝံ ခေါ ဘန္တေ ဒေဝဒတ္တေန ဒုဋ္ဌေန ဝဓကစိတ္တေန တထာဂတဿ ရုဟိရံ ဥပ္ပာဒေတွာ ပဌမံ အာနန္တရိယကမ္မံ ဥပစိတံ။

ပုစ္ဆာ – ကုလေသု အာဝုသော တိကဘောဇနံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ ဒေဝဒတ္တံ အာရဗ္ဘ ပညတ္တံ၊ ဒေဝဒတ္တော ဘန္တေ ပရိဟီနလာဘသက္ကာရော သပရိသော ကုလေသု ဝိညာပေတွာ ဝိညာပေတွာ ဘုဉ္ဇိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – အလံ ဒေဝဒတ္တ၊ မာ တေ ရုစ္စိ သင်္ဃဘေဒေါ၊ ဂရုကော ခေါ ဒေဝဒတ္တ သင်္ဃဘေဒေါတိအာဒိကော အာဝုသော ဩဝါဒေါ ဘဂဝတာ ကတ္ထ ဒိန္နော၊ ကိသ္မိံ ဝတ္ထုသ္မိံ ဒိန္နော။

ဝိဿဇ္ဇနာ – ရာဇဂဟေ ဘန္တေ ဒေဝဒတ္တံ အာရဗ္ဘ ဒိန္နော၊ ဒေဝဒတ္တော ဘန္တေ သင်္ဃဘေဒါယ ပရက္ကမိ စက္ကဘေဒါယ၊ တသ္မိံ ဘန္တေ ဝတ္ထုသ္မိံ ဒိန္နော။

အလံ ဒေဝဒတ္တ၊ မာ တေ ရုစ္စိ သင်္ဃဘေဒေါ၊ ဂရုကော ခေါ ဒေဝဒတ္တ သင်္ဃဘေဒေါ –

ပုစ္ဆာ – ‘‘သုကရံ သာဓုနာ သာဓုံ၊ သာဓုံ ပါပေန ဒုက္ကရံ။ ပါပံ ပါပေန သုကရံ၊ ပါပမရိယေဟိ ဒုက္ကရ’’န္တိ- အာဝုသော ဣဒံ ဥဒါနံ ဘဂဝတာ ကတ္ထ ဥဒါနိတံ၊ ကံ အာရဗ္ဘ ကိသ္မိံ ဝတ္ထုသ္မိံ ဥဒါနိတံ။

ဝိဿဇ္ဇနာ – ရာဇဂဟေ ဘန္တေ ဒေဝဒတ္တံယေဝ အာရဗ္ဘ ဥဒါနိတံ၊ အာယသ္မာ ဘန္တေ အာနန္ဒော ပုဗ္ဗဏှသမယံ နိဝါသေတွာ ပတ္တစီဝရမာဒါယ ရာဇဂဟံ ပိဏ္ဍာယ ပါဝိသိ၊ အထ ခေါ ဘန္တေ ဒေဝဒတ္တော ယေနာယသ္မာ အာနန္ဒော တေနုပသင်္ကမိ၊ ဥပသင်္ကမိတွာ အာယသ္မန္တံ အာနန္ဒံ ဧတဒဝေါစ ‘‘အဇ္ဇတဂ္ဂေ ဒါနာဟံ အာဝုသော အာနန္ဒ အညတြေဝ ဘဂဝတာ အညတြေဝ ဘိက္ခုသင်္ဃာ ဥပေါသထံ ကရိဿာမိ သင်္ဃကမ္မံ ကရိဿာမီ’’တိ၊ တသ္မိံ ဘန္တေ ဝတ္ထုသ္မိံ ဥဒါနိတံ။

သုကရံ သာဓုနာ သာဓုံ၊ သာဓုံ ပါပေန ဒုက္ကရံ၊

ပါပံ ပါပေန သုကရံ၊ ပါပမရိယေဟိ ဒုက္ကရံ။

ပုစ္ဆာ – ဘေဒါနုဝတ္တကာနံ အာဝုသော ဘိက္ခူနံ ထုလ္လစ္စယံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – ရာဇဂဟေ ဘန္တေ သမ္ဗဟုလေ ဘိက္ခူ အာရဗ္ဘ ပညတ္တံ၊ အာယသ္မာ ဘန္တေ သာရိပုတ္တော ဘဂဝန္တံ ဥပသင်္ကမိတွာ ဧတဒဝေါစ ‘‘သာဓု ဘန္တေ ဘေဒါနုဝတ္တကာ ဘိက္ခူ ပုန ဥပသမ္ပဇ္ဇေယျု’’န္တိ၊ တသ္မိံ ဘန္တေ ဝတ္ထုသ္မိံ ပညတ္တံ။

‘‘သာဓု ဘန္တေ ဘေဒါနုဝတ္တကာ ဘိက္ခူ ပုန ဥပသမ္ပဇ္ဇေယျု’’န္တိ –

ပုစ္ဆာ – ကိတ္တာဝတာ နု ခေါ အာဝုသော သင်္ဃရာဇိ ဟောတိ နော စ သင်္ဃဘေဒေါ၊ ကိတ္တာဝတာ စ ပန သင်္ဃရာဇိ စေဝ ဟောတိ သင်္ဃဘေဒေါ စ။

ဝိဿဇ္ဇနာ – ဧကတော ဘန္တေ ဧကော ဟောတိ၊ ဧကတော ဒွေ စတုတ္ထော အနုဿာဝေတိ၊ သလာကံ ဂါဟေတိ ‘‘အယံ ဓမ္မော အယံ ဝိနယော ဣဒံ သတ္ထုသာသနံ ဣမံ ဂဏှထ ဣမံ ရောစေထာတိ’’၊ ဧတေနေဝ ဘန္တေ နယေန စတုန္နံ ဝါ ပဉ္စန္နံ ဝါ ဆန္နံ ဝါ သတ္တန္နံ ဝါ အဋ္ဌန္နံ ဝါ သင်္ဃရာဇိ ဟောတိ၊ နော စ သင်္ဃဘေဒေါ၊ ဧကတော ဘန္တေ စတ္တာရော ဟောန္တိ၊ ဧကတော စတ္တာရော၊ နဝမော အနုဿာဝေတိ၊ သလာကံ ဂါဟေတိ ‘‘အယံ ဓမ္မော အယံ ဝိနယော ဣဒံ သတ္ထုသာသနံ ဣမံ ဂဏှထ ဣမံ ရောစေထာ’’တိ၊ ဧဝံ ခေါ ဘန္တေ သင်္ဃရာဇိ စေဝ ဟောတိ သင်္ဃဘေဒေါ စ။ ဧဝံ ခေါ ဘန္တေ သင်္ဃရာဇိ ဟောတိ၊ နော စ သင်္ဃဘေဒေါ၊ ဧဝဉ္စ ပန ဘန္တေ သင်္ဃရာဇိ စေဝ ဟောတိ သင်္ဃဘေဒေါ စ။

ပုစ္ဆာ – ကိတ္တာဝတာ နု ခေါ အာဝုသော သင်္ဃော ဘိန္နော ဟောတိ။

ဝိဿဇ္ဇနာ – ဣဓ ဘန္တေ ဘိက္ခူ အဓမ္မာဒိံ ဓမ္မာဒီနီတိ ဒီပေန္တိ၊ တေ ဣမေဟိ အဋ္ဌာရသဟိ ဝတ္ထူဟိ အပကဿန္တိ၊ အဝပကဿန္တိ၊ အာဝေနိံ ဥပေါသထံ ကရောန္တိ၊ အာဝေနိံ ပဝါရဏံ ကရောန္တိ၊ အာဝေနိံ သင်္ဃကမ္မံ ကရောန္တိ၊ ဧဝံ ခေါ ဘန္တေ သင်္ဃော ဘိန္နော ဟောတိ။

ပုစ္ဆာ – ကိတ္တာဝတာ နု ခေါ အာဝုသော သင်္ဃော သမဂ္ဂေါ ဟောတိ။

ဝိဿဇ္ဇနာ – ဣဓ ဘန္တေ ဘိက္ခူ အဓမ္မံ အဓမ္မောတိ ဒီပေန္တိ၊ ဓမ္မံ ဓမ္မောတိ ဒီပေန္တိ၊ အဝိနယံ အဝိနယောတိ ဒီပေန္တိ…ပေ… ဒုဋ္ဌုလ္လံ အာပတ္တိံ ဒုဋ္ဌုလ္လာ အာပတ္တီတိ ဒီပေန္တိ၊ အဒုဋ္ဌုလ္လံ အာပတ္တိံ အဒုဋ္ဌုလ္လာ အာပတ္တီတိ ဒီပေန္တိ၊ တေ ဣမေဟိ အဋ္ဌာရသဟိ ဝတ္ထူဟိ န အပကဿန္တိ၊ န အဝပကဿန္တိ၊ န အာဝေနိံ ဥပေါသထံ ကရောန္တိ၊ န အာဝေနိံ ပဝါရဏံ ကရောန္တိ၊ န အာဝေနိံ သင်္ဃကမ္မံ ကရောန္တိ၊ ဧတ္တာဝတာ ခေါ ဘန္တေ သင်္ဃော သမဂ္ဂေါ ဟောတိ။

ပုစ္ဆာ – သမဂ္ဂံ အာဝုသော သင်္ဃံ ဘိန္ဒိတွာ ကိံ သော ပသဝတိ။

ဝိဿဇ္ဇနာ – သမဂ္ဂံ ခေါ ဘန္တေ သင်္ဃံ ဘိန္ဒိတွာ ကပ္ပဋ္ဌိတိကံ ကိဗ္ဗိသံ ပသဝတိ၊ ကပ္ပံ နိရယမှိ ပစ္စတိ။

ပုစ္ဆာ – ဘိန္နံ ခေါ အာဝုသော သင်္ဃံ သမဂ္ဂံ ကတွာ ကိံ သော ပသဝတိ။

ဝိဿဇ္ဇနာ – ဘိန္နံ ခေါ ဘန္တေ သင်္ဃံ သမဂ္ဂံ ကတွာ ဗြဟ္မံ ပုညံ ပသဝတိ၊ ကပ္ပံ သဂ္ဂမှိ မောဒတိ။

ပုစ္ဆာ – သင်္ဃဘေဒံ ပုစ္ဆိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ အာဝုသော ကတိ အာပတ္တိယော။

ဝိဿဇ္ဇနာ – သင်္ဃဘေဒံ ဝိဿဇ္ဇိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ ဘန္တေ ဒွေ အာပတ္တိယော။

၈။ ဝတ္တက္ခန္ဓက

ပုစ္ဆာ – အာဂန္တုကာနံ အာဝုသော ဘိက္ခူနံ ဝတ္တံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ အာဂန္တုကေ ဘိက္ခူ အာရဗ္ဘ ပညတ္တံ၊ အာဂန္တုကာ ဘန္တေ ဘိက္ခူ သဥပါဟနာပိ အာရာမံ ပဝိသိံသု၊ ဆတ္တပဂ္ဂဟိတာပိ အာရာမံ ပဝိသိံသု၊ ဩဂုဏ္ဌိတာပိ အာရာမံ ပဝိသိံသု၊ သီသေပိ စီဝရံ ကရိတွာ အာရာမံ ပဝိသိံသု၊ ပါနီယေနပိ ပါဒေ ဒေါဝိံသု၊ ဝုဍ္ဎတရေပိ အာဝါသိကေ ဘိက္ခူ နာဘိဝါဒေသုံ၊ နပိ သေနာသနံ ပုစ္ဆိံသု၊ တသ္မိံ ဘန္တေ ဝတ္ထုသ္မိံ ‘‘တေန ဟိ ဘိက္ခဝေ အာဂန္တုကာနံ ဘိက္ခူနံ ဝတ္တံ ပညပေဿာမိ၊ ယထာ အာဂန္တုကေဟိ ဘိက္ခူဟိ သမ္မာ ဝတ္တိတဗ္ဗံ၊ အာဂန္တုကေန ဘိက္ခဝေ ဘိက္ခုနာ ဣဒါနိ အာရာမံ ပဝိသိဿာမီတိ ဥပါဟနာ ဩမုဉ္စိတွာ နီစံ ကတွာ ပပ္ဖောဋေတွာ ဂဟေတွာ ဆတ္တံ အပနာမေတွာ သီသံ ဝိဝရိတွာ သီသေ စီဝရံ ခန္ဓေ ကတွာ သာဓုကံ အတရမာနေန အာရာမော ပဝိသိတဗ္ဗော’’ ဧဝမာဒိနာ ဘန္တေ အာဂန္တုကာနံ ဘိက္ခူနံ ဝတ္တံ ပညတ္တံ။

ပုစ္ဆာ – အာဝါသိကာနံ အာဝုသော ဘိက္ခူနံ ဝတ္တံ ဘဂဝတာ ကတ္ထ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ၊ ကထဉ္စ ပန ပညတ္တံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ အာဝါသိကေ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ အာဝါသိကာ ဘိက္ခူ အာဂန္တုကေ ဘိက္ခူ ဒိသွာ နေဝ အာသနံ ပညပေသုံ၊ န ပါဒေါဒကံ ပါဒပီဌံ ပါဒကထလိကံ ဥပနိက္ခိပိံသု၊ န ပစ္စုဂ္ဂန္တွာ ပတ္တစီဝရံ ပဋိဂ္ဂဟေသုံ၊ န သေနာသနံ ပညပေသုံ၊ တသ္မိံ ဘန္တေ ဝတ္ထုသ္မိံ ပညတ္တံ၊ တသ္မိံ ဘန္တေ ဝတ္ထုသ္မိံ –

‘‘အာဝါသိကေန ဘိက္ခဝေ ဘိက္ခုနာ အာဂန္တုကံ ဘိက္ခုံ ဝုဍ္ဎတရံ ဒိသွာ အာသနံ ပညပေတဗ္ဗံ၊ ပါဒေါဒကံ ပါဒပီဌံ ပါဒကထလိကံ ဥပနိက္ခိပိတဗ္ဗံ၊ ပစ္စုဂ္ဂန္တွာ ပတ္တစီဝရံ ပဋိဂ္ဂဟေတဗ္ဗံ ပါနီယေန ပုစ္ဆိတဗ္ဗော’’ ဧဝမာဒိနာ ဘန္တေ အာဝါသိကာနံ ဘိက္ခူနံ ဝတ္တံ ဘဂဝတာ ပညတ္တံ။

ပုစ္ဆာ – ဂမိကာနံ အာဝုသော ဘိက္ခူနံ ဝတ္တံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ၊ ကထဉ္စပန ပညတ္တံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဂမိကေ ဘိက္ခူ အာရဗ္ဘ ပညတ္တံ၊ သမ္ဗဟုလာ ဘန္တေ ဂမိကာ ဘိက္ခူ ဒါရုဘဏ္ဍံ မတ္တိကာဘဏ္ဍံ အပ္ပဋိသာမေတွာ ဒွါရဝါတပါနံ ဝိဝရိတွာ သေနာသနံ အနာပုစ္ဆာ ပက္ကမိံသု၊ တသ္မိံ ဘန္တေ ဝတ္ထုသ္မိံ ‘‘ဂမိကေန ဘိက္ခဝေ ဘိက္ခုနာ ဒါရုဘဏ္ဍံ ပဋိသာမေတွာ ဒွါရဝါတပါနံ ထကေတွာ သေနာသနံ အာပုစ္ဆာ ပက္ကမိတဗ္ဗံ’’ ဧဝမာဒိနာ ဘန္တေ အာကာရေန ဘဂဝတာ ဂမိကာနံ ဘိက္ခူနံ ဝတ္တံ ပညတ္တံ။

ပုစ္ဆာ – ဘတ္တဂ္ဂေ အာဝုသော အနုမောဒိတုံ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ အနုညာတံ၊ သမ္ဗဟုလာ ဘန္တေ ဘိက္ခူ ဘတ္တဂ္ဂေ နာနုမောဒိံသု၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – ဘိက္ခူနံ အာဝုသော ဘတ္တဂ္ဂဝတ္တံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ ဒုန္နိဝတ္ထာ ဒုပ္ပာရုတာ အနာကပ္ပသမ္ပန္နာ ဘတ္တဂ္ဂံ ဂစ္ဆိံသု၊ တသ္မိံ ဘန္တေ ဝတ္ထုသ္မိံ ‘‘သစေ အာရာမေ ကာလော အာရောစိတော ဟောတိ၊ တိမဏ္ဍလံ ပဋိစ္ဆာဒေန္တေန ပရိမဏ္ဍလံ နိဝါသေတွာ ကာယဗန္ဓနံ ဗန္ဓိတွာ သဂုဏံ ကတွာ သင်္ဃာဋိယော ပါရုပိတွာ ဂဏ္ဌိကံ ပဋိမုဉ္စိတွာ ဓောဝိတွာ ပတ္တံ ဂဟေတွာ သာဓုကံ အတရမာနေန ဂါမော ပဝိသိတဗ္ဗော’’တိ ဧဝမာဒိနာ ဘန္တေ ဘတ္တဂ္ဂဝတ္တံ ပညတ္တံ။

ပုစ္ဆာ – ဘိက္ခူနံ အာဝုသော သေနာသနဝတ္တံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ၊ ကထဉ္စ တံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ ဆဗ္ဗဂ္ဂိယေ ဘိက္ခူ အာရဗ္ဘ ပညတ္တံ၊ ဆဗ္ဗဂ္ဂိယာ ဘန္တေ ဘိက္ခူ ဘိက္ခူသု အဇ္ဈောကာသေ စီဝရံ ကရောန္တေသု ပဋိဝါတေ အင်္ဂဏေ သေနာသနံ ပပ္ဖောဋေသုံ၊ တသ္မိံ ဘန္တေ ဝတ္ထုသ္မိံ ‘‘ယသ္မိံ ဝိဟာရေ ဝိဟရတိ၊ သစေ သော ဝိဟာရော ဥက္လာပေါ ဟောတိ၊ သစေ ဥဿဟတိ သောဓေတဗ္ဗော’’တိ ဧဝမာဒိနာ ဘန္တေ ဘိက္ခူနံ သေနာသနဝတ္တံ ဘဂဝတာ ပညတ္တံ။

ပုစ္ဆာ – သမာစာရံ ပုစ္ဆိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ အာဝုသော ကတိ အာပတ္တိယော။

ဝိဿဇ္ဇနာ – သမာစာရံ ဝိဿဇ္ဇိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ ဘန္တေ ဧကာ အာပတ္တိ။

၉။ ပါတိမောက္ခဋ္ဌပနက္ခန္ဓက

ပုစ္ဆာ – သာပတ္တိကေန အာဝုသော ပါတိမောက္ခံ သုဏန္တဿ ပါတိမောက္ခံ ဌပေတုံ ဘဂဝတာ ကတ္ထ ပညတ္တံ၊ ကံ အာရဗ္ဘ ကိသ္မိံ ဝတ္ထုသ္မိံ ပညတ္တံ။

ဝိဿဇ္ဇနာ – သာဝတ္ထိယံ ဘန္တေ အညတရံ ပုဂ္ဂလံ ဒုဿီလံ ပါပဓမ္မံ အာရဗ္ဘ ပညတ္တံ၊ အညတရော ဘန္တေ ပုဂ္ဂလော ဒုဿီလော ပါပဓမ္မော တဒဟုပေါသထေ သင်္ဃမဇ္ဈေ နိသိန္နော အဟောသိ၊ တသ္မိံ ဘန္တေ ဝတ္ထုသ္မိံ ပညတ္တံ။

ပုစ္ဆာ – ဌပနံ အာဝုသော ပုစ္ဆိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ အာဝုသော ကတိ အာပတ္တိယော။

ဝိဿဇ္ဇနာ – ဌပနံ ဝိဿဇ္ဇိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ ဘန္တေ ဧကာ အာပတ္တိ။

၁၀။ ဘိက္ခုနိက္ခန္ဓက

ပုစ္ဆာ – အဋ္ဌဟိ အာဝုသော ဂရုဓမ္မေဟိ ဥပသမ္ပဒါ ဘဂဝတာ ကတ္ထ အနုညာတာ၊ ကဿ အနုညာတာ၊ ကိသ္မိဉ္စ ဝတ္ထုသ္မိံ အနုညာတာ။

ဝိဿဇ္ဇနာ – ဝေသာလိယံ ဘန္တေ မဟာပဇာပတိယာ ဂေါတမိယာ အနုညာတာ၊ မဟာပဇာပတိ ဘန္တေ ဂေါတမီ သူနေဟိ ပါဒေဟိ ရဇောကိဏ္ဏေန ဂတ္တေန ဒုက္ခီ ဒုမ္မနာ အဿုမုခီ ရုဒမာနာ ဗဟိဒွါရကောဋ္ဌကေ အဋ္ဌာသိ၊ အထ ခေါ ဘန္တေ အာယသ္မာ အာနန္ဒော မဟာပဇာပတိံ ဂေါတမိံ တံ ကာရဏံ ပုစ္ဆိတွာ ဘဂဝန္တံ စတုက္ခတ္တုံ ယာစိ မာတုဂါမဿ တထာဂတပ္ပဝေဒိတေ ဓမ္မဝိနယေ အာဂါရသ္မာ အနာဂါရိယံ ပဗ္ဗဇ္ဇံ၊ တသ္မိံ ဘန္တေ ဝတ္ထုသ္မိံ အနုညာတာ။

ပုစ္ဆာ – ဘိက္ခူဟိ အာဝုသော ဘိက္ခုနိယော ဥပသမ္ပာဒေတုံ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – ဝေသာလိယံ ဘန္တေ မဟာပဇာပတိံ ဂေါတမိံ အာရဗ္ဘ အနုညာတံ၊ မဟာပဇာပတိ ဘန္တေ ဂေါတမီ ဘဂဝန္တံ ဧတဒဝေါစ ‘‘ကထာဟံ ဘန္တေ ဣမာသု သာကိယာနီသု ပဋိပဇ္ဇာမီ’’တိ၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – ဧကတော ဥပသမ္ပန္နာယ အာဝုသော ဘိက္ခုနိသင်္ဃေ ဝိသုဒ္ဓါယ ဘိက္ခုသင်္ဃေ ဥပသမ္ပာဒေတုံ ဘဂဝတာ ကတ္ထ အနုညာတံ၊ ကံ အာရဗ္ဘ ကိသ္မိံ ဝတ္ထုသ္မိံ အနုညာတံ။

ဝိဿဇ္ဇနာ – သာဝတ္ထိယံ ဘန္တေ သမ္ဗဟုလေ ဘိက္ခူ အာရဗ္ဘ အနုညာတံ၊ သမ္ဗဟုလာ ဘန္တေ ဘိက္ခူ ဘိက္ခုနီနံ အန္တရာယိကေ ဓမ္မေ ပုစ္ဆိံသု၊ ဥပသမ္ပဒါပေက္ခာယော ဝိတ္ထာယိံသု၊ မင်္ကူ အဟေသုံ၊ န သက္ခိံသု ဝိဿဇ္ဇေတုံ၊ တသ္မိံ ဘန္တေ ဝတ္ထုသ္မိံ အနုညာတံ။

ပုစ္ဆာ – ဘိက္ခုနိက္ခန္ဓကံ ပုစ္ဆိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ အာဝုသော ကတိ အာပတ္တိယော။

ဝိဿဇ္ဇနာ – ဘိက္ခုနိက္ခန္ဓကံ ဝိဿဇ္ဇိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ ဘန္တေ ဒွေ အာပတ္တိယော။

၁၁။ ပဉ္စသတိကက္ခန္ဓက

ပဌမ သံဂါယနာ

ပုစ္ဆာ – ပဉ္စသတိကံ ပုစ္ဆိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ အာဝုသော ကတိ အာပတ္တိယော။

ဝိဿဇ္ဇနာ – ပဉ္စသတိကံ ဝိဿဇ္ဇိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ ဘန္တေ န ကတမာ အာပတ္တိ။

၁၂။ သတ္တသတိကက္ခန္ဓက

ဒုတိယ သံဂါယနာ

ပုစ္ဆာ – သတ္တသတိကံ ပုစ္ဆိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ အာဝုသော ကတိ အာပတ္တိယော။

ဝိဿဇ္ဇနာ – သတ္တသတိကံ ဝိဿဇ္ဇိဿံ၊ သနိဒါနံ သနိဒ္ဒေသံ။ သမုက္ကဋ္ဌပဒါနံ ဘန္တေ န ကတမာ အာပတ္တိ။

ပုစ္ဆာ – ကဿ အာဝုသော ဝစနံ။

ဝိဿဇ္ဇနာ – ဘဂဝတော ဘန္တေ ဝစနံ အရဟတော သမ္မာသမ္ဗုဒ္ဓဿ။

ပုစ္ဆာ – ကေ အာဝုသော သိက္ခန္တိ။

ဝိဿဇ္ဇနာ – သေက္ခာ စ ဘန္တေ ပုထုဇ္ဇနကလျာဏကာ စ သိက္ခန္တိ။

ပုစ္ဆာ – ကေ အာဝုသော သိက္ခိတသိက္ခာ။

ဝိဿဇ္ဇနာ – အရဟန္တော ဘန္တေ သိက္ခိတသိက္ခာ။

ပုစ္ဆာ – ကတ္ထ အာဝုသော ဌိတံ။

ဝိဿဇ္ဇနာ – သိက္ခာကာမေသု ဘန္တေ ဌိတံ။

ပုစ္ဆာ – ကေနာဝုသော အာဘတံ။

ဝိဿဇ္ဇနာ – ပရမ္ပရာယ ဘန္တေ အာဘတံ။