📜
နန္ဒိယရာဇဝဂ္ဂေါ
၁၁။ နန္ဒိယရာဇဿ ဝတ္ထုမှိ အယမာနုပုဗ္ဗီကထာ
ဣတော ¶ ကိရ ကပ္ပသတသဟဿမတ္ထကေ ပဒုမုတ္တရော နာမ သတ္ထာ လောကေ ဥဒပါဒိ သဒေဝကံ လောကံ သံသာရကန္တာရာ ဥတ္တာရေန္တော။ တသ္မိံ ကိရ သမယေ ဧကော ကုဋုမ္ဗိကော သတ္ထု ဓမ္မဒေသနံ သုတွာ ပသန္နမာနသော ဗုဒ္ဓပမုခံ ဘိက္ခုသင်္ဃံ နိမန္တေတွာ မဟာဒါနံ သဇ္ဇေတွာ အတ္တနော ဘဝနံ ဒေဝဘဝနမိဝ အလင်္ကရိတွာ ဗုဒ္ဓါရဟံ မဟာသနံ ပညာပေတွာ ဂန္တွာ ဘဂဝန္တံ ယာစိ ကာလောယံ ဘန္တေ ဘဂဝတော ဘတ္တဂ္ဂဿ ဥပသင်္ကမနာယာတိ။ အထ ဘဂဝါ ဘိက္ခုသင်္ဃပရိဝုတော မဟတာ ဗုဒ္ဓါနုဘာဝေန ဂန္တွာ နိသီဒိ ပညတ္တဝရဗုဒ္ဓါသနေ၊ တတော ကုဋုမ္ဗိကော ဟဋ္ဌော ဥဒဂ္ဂေါ သပရိသော ဘဂဝန္တံ ပရိဝိသတိ အနေကေဟိ မဓုရန္နပါနာဒီဟိ။ တဒါ တဿ ဘဂဝတော သာသနေ ဓုတင်္ဂဓရာနံ အဂ္ဂေါ ဝသဘတ္ထေရောနာမ မဟာသာဝကော သပဒါနဝတ္တေန ပိဏ္ဍာယ စရမာနော တဿ ကုဋုမ္ဗိကဿ ဂေဟဒွါရေ အဋ္ဌာသိ၊ အထ သော ထေရံ ဒိသွာ ဘန္တေ သတ္ထာ အန္တောဂေဟေ နိသိန္နော၊ တုမှေပိ ပဝိသထာတိ ယာစိ၊ ထေရော အပဝိသိတွာဝ အဂမာသိ၊ ကုဋုမ္ဗိကော ဘဂဝန္တံ ဥပသင်္ကမိတွာ တမတ္တံ ဝတွာ ကိံ ဘန္တေ သဒေဝကေ လောကေ ဘဂဝတာပိ ဥတ္တရိတရော ဂုဏေန သံဝိဇ္ဇတီတိ အာဟ။ အထဿ သတ္ထာ ပုတ္တောပမံ ဒဿေတွာ ထေရဿ ဂုဏေ ဝဏ္ဏေန္တော ဧဝမာဟ။
ပါလေန္တိ နိမ္မလံ ကတွာ၊ ပါတိမောက္ခာဒိသံဝရံ၊
သမာဒိန္နဓုတင်္ဂါစ၊ အပ္ပိစ္ဆာ မုနိသူနဝေါ။
နိစ္စ မန္တကယုဒ္ဓမှိ၊ နဒ္ဓါ ယောဓာဝ ဒပ္ပိတာ၊
ပုညာနံ ဝတ္ထုဘူတာ တေ၊ ဒေဝမာနုသကာ ဒိနံ။
ဓာရေမဟံ ဝဏ္ဏဝန္တံ၊ သီဝေယျမ္ပိစ စီဝရံ၊
ဗုဒ္ဓပုတ္တာ မဟာနာဂါ န ဓာရေန္တိ တထာဝိဓံ။
ဓာရေန္တိ ¶ တေ ပံသုကူလံ၊ သင်္ဃာဋေတွာ ပိလောတိကေ၊
ဝဏစ္ဆာဒနစောလံဝ၊ ဣစ္ဆာလောဘ ဝိဝဇ္ဇိတာ။
သာဒိယာမိ သဒါ ဟမ္ဘော၊ ဥပါသကနိမန္တနံ၊
နေဝ သာဒေန္တိ သမ္ဗုဒ္ဓ၊ ပုတ္တော ပါသကယာစနံ။
သပဒါနေန ယံ လဒ္ဓံ၊ လူခံဝါပိ ပဏီတကံ၊
တေန တုဿန္တိ မေ ပုတ္တာ၊ ရသဂေဓဝိဝဇ္ဇိတာ။
နိပဇ္ဇာမိ အဟံ သာဓု၊ သန္ထတေ သယနေ သုဘေ၊
န တေ သေယျံ ပကပ္ပေန္တိ၊ သံသာရဘယဘီရုကာ။
ဌာနာ သနဂမနေန၊ ကပ္ပေန္တိ ဣရိယာပထံ၊
နေကဘူမိသမာကိဏ္ဏ၊ ပါသာဒေသု ဝသာမဟံ။
ဗုဒ္ဓပုတ္တာ တထာစ္ဆန္နံ၊ န ကဒါ ပဝိသန္တိ တေ၊
ရုက္ခမူလေ သုသာနသ္မိံ၊ အဗ္ဘောကာသေ ရမန္တိ တေ။
ဘာဝေတွာ ဘဝနာသာယ၊ ဟေတုံ ဘာဝနမုတ္တမံ၊
အဟံ ဂါမေ ဝသိဿာမိ၊ ပါပေန္တော ဇနတံ သိဝံ။
ရမန္တိ မမ ပုတ္တာ တေ၊ ပန္တသေနာသနေ ကကာ၊
တေသံ မဟတ္တရော သန္တော၊ ထေရောယံ ဝသဘော မဟာ၊
ဓုတပါပေါ ဓုတင်္ဂဂ္ဂေါ၊ ဉာတောယံ မမ သာသနေတိ။
ဧဝံ ဘဂဝါ ဟတ္ထံ ဥက္ခိပိတွာ စန္ဒမဏ္ဍလေ ပဟရန္တော ဝိယ ထေရဿ ဂုဏေ ပကာသေသိ၊ တတော သော တဿ ဂုဏကထံ သုတွာ သယမ္ပိတံ ဌာနန္တရံ ကာမယမာနော ယန္နူနာဟံ အနာဂတေ အညတရဿ သမ္မာသမ္ဗုဒ္ဓဿ သာသနေ ဓုတင်္ဂဓရာနံ အဂ္ဂေါ ဘဝိဿာမီတိ တံ ဌာနန္တရံ ပတ္ထေန္တော ဘဂဝတော ပါဒမူလေ နိပဇ္ဇိ၊ သတ္ထာ တံ ကာရဏံ ဥပပရိက္ခိတွာ ဣတော ကပ္ပသတသဟဿမတ္ထကေ ဂေါတမော နာမ သတ္ထာ ဥပ္ပဇ္ဇိဿတိ။ တွံ တဒါ ဓုတင်္ဂဓရာနံ အဂ္ဂေါ ဟုတွာ ကဿ ပေါတိ ပညာယိဿတီတိ ဗျာကရဏ ¶ မဒါသိ။ တတော ပဋ္ဌာယ သော သောမနဿော ပုညကမ္မံ ကတွာ တတော စုတော ဒေဝမနုဿေသု ဒေဝိဿရိယံ အနုဘဝန္တော ဝိပဿီသမ္မာသမ္ဗုဒ္ဓကာလေ ဧကသာဋကော နာမ ဗြာဟ္မဏော ဟုတွာ မဟာဒါနံ အဒါသိ။ တတော စုတော ကဿပသမ္မာသမ္ဗုဒ္ဓေ ပရိနိဗ္ဗုတေ ဗာရာဏသီနဂရေ ဗာရာဏသီသေဋ္ဌိ ဟုတွာ နိဗ္ဗတ္တော ဒါနာဒီနိ ပုညာနိ ကတွာ တတော စဝိတွာ သံသာရေ သံသရန္တော ဒသဝဿသဟဿာ ယုကေသု မနုဿေသု ဗာရာဏသိယံ ဧကော ကုဋုမ္ဗိကော ဟုတွာ နိဗ္ဗတ္တိ။ သော ပနာယံ ကုဋုမ္ဗိကော အရညေ ဇင်္ဃာဝိဟာရံ အနုဝိစရန္တော ပစ္စန္တိမေ ဇနပဒေ အရညာယတနေ အညတရံ ပစ္စေကဗုဒ္ဓံ အဒ္ဒသ။ သော စ ပစ္စေကဗုဒ္ဓါ တတ္ထ စီဝရကမ္မံ ကရောန္တော အနုဝါတေ အပ္ပဟောန္တေ သံဟရိတွာ ဌပေတုံ အာရဒ္ဓါ။ ကုဋုမ္ဗိကော တံ ဒိသွာ ဘန္တေ ကိံ ကရောထာတိ ပုစ္ဆိ။ သော ပစ္စေကဗုဒ္ဓါ အပ္ပိစ္ဆတာယ တေန ပုဋ္ဌော န ကိဉ္စိ ဝုတ္တော ဟောတိ။ သော စီဝရဒုဿံ နပ္ပဟောတီတိ ဉတွာ အတ္တနော ဥတ္တရသာဋကံ ပစ္စေကဗုဒ္ဓဿ ပါဒမူလေ ဌပေတွာ အဂမာသိ။ ပစ္စေကဗုဒ္ဓါ တံ ဂဟေတွာ အနုဝါတကံ အာရောပေန္တော စီဝရံ ကတွာ ပါရုပိ။ ကုဋုမ္ဗိကော ဇီဝိတပရိယောသာနေ ကာလံ ကတွာ တာဝတိံသဘဝနေ နိဗ္ဗတ္တိတွာ တတ္ထ ယာဝတာယုကံ ဒိဗ္ဗသမ္ပတ္တိံ အနုဘဝိတွာ တတော စဝိတွာ ဗာရာဏသိတော တိယောဇနမတ္တကေ ဌာနေ အညတရသ္မိံ နဂရေ နိဗ္ဗတ္တိ၊ တဿ မာတာပိတရော နန္ဒိယောတိ [နန္ဒီတိနာမံ ဣတိသဗ္ဗတ္ထ] နာမံ အကံသု၊ တဿ သတ္တ ဘာတရော အဟေသုံ၊ သေသာ ဆ ဘာတရော နာနာကမ္မန္တေသု ဗျာဝဋာ မာတာပိတုန္နံ ပေါသေန္တိ။ နန္ဒိယော ပန အကမ္မသီလော ဂေဟေယေဝ ဝသတိ။ တသ္မာ တဿ သေသာ ကုဇ္ဈန္တိ။ မာတာပိတရောပိ နန္ဒိယံ အာမန္တေတွာ ဩဝဒန္တိ။ သော တုဏှီ ဟောတေဝ။ အထာပရသ္မိံ သမယေ ဂါမေ နက္ခတ္တံ သင်္ဃုဋ္ဌံ၊ တဒါ သော မာတရံ အာဟ။ အမ္မ သာဋကံ ဒေဟိ၊ နက္ခတ္တံ ကီဠိဿာမီတိ၊ သာ ဓောတ- ဝတ္ထံ ¶ နီဟရိတွာ အဒါသိ၊ အမ္မ ထူလံ ဣဒန္တိ၊ သာ အညံ နီဟရိတွာ အဒါသိ၊ တမ္ပိ ပဋိက္ခိပိ။ အထ နံ မာတာ အာဟ။ တာတ ယာဒိသေ မယံ ဂေဟေ ဇာတာ၊ နတ္ထိ ဣတော သုခုမတရဿ ပဋိလာဘာယ ပုညန္တိ၊ လဘနဋ္ဌာနံ ဂမိဿာမိ အမ္မာတိ။ ပုတ္တ အဟံ အဇ္ဇေဝ တဝ ဗာရာဏသီနဂရေ ရဇ္ဇပဋိလာဘံ ဣစ္ဆာမီတိ အာဟ။ သော သာဓု အမ္မာတိ မာတရံ ဝန္ဒိတွာ ပဒက္ခိဏံ ကတွာ ပက္ကာမိ။ မာတုယာ ပနဿ ဧဝံ အဟောသိ။ ကဟံ သော ဂမိဿတိ၊ ပုဗ္ဗေဝိယ ဣဓဝါ ဧတ္ထဝါ ဂေဟေ နိသီဒိတွာ အာဂစ္ဆတီတိ၊ သော ပန ပုညနိယာမေန စောဒိယမာနော ဂါမတော နိက္ခမိတွာ ဗာရာဏသိံ ဂန္တွာ သေနဂုတ္တဿ ဂေဟေ ပဋိဝသတိ၊ အထေကဒိဝသံ သော တဿ ကမ္မကာရေဟိ သဒ္ဓိံ သလ္လပန္တော နိသီဒိတွာ ပစလာယန္တော သုပိနံ အဒ္ဒသ။ မုခေန အန္တံ နိက္ခမိတွာ သကလဇမ္ဗုဒီပေ ပတ္ထရိတွာ အန္တောကုစ္ဆိမေဝ ပါဝိသိ။ ပဗုဒ္ဓါ သော ဘီတော မဟာသဒ္ဒမကာသိ။ အထ နံ မဟာသေနဂုတ္တော ပုစ္ဆိ။ နန္ဒိယော သုပိနံ အဒ္ဒသန္တိ အာဟ။ အထ တေန ကီဒိသန္တိ ပုဋ္ဌော ကထေသိ၊ တတော သေနဂုတ္တော တံ အတ္တနော ကုလူပဂံ ပရိဗ္ဗာဇိကံ ပုစ္ဆိ ကော တဿ ဝိပါကောတိ။ ပရိဗ္ဗာဇိကာ ယဒိ ဘော ဣတ္ထီ ပဿတိ။ သတ္တဒိဝသဗ္ဘန္တရေယေဝ အဘိသေကံ လဘတိ၊ ယဒိ ပုရိသော ပဿတိ၊ တထေဝ ရာဇာ ဟောတီတိ ကထေသိ။ သေနဂုတ္တော တဿာ တံ ကထံ သုတွာ ဣမံ မမ ဉာတိံ ကရောမီတိ အတ္တနော သတ္တ ဓီတရေ ပက္ကောသိတွာ ပဋိပါဋိယာ ပုစ္ဆိ။ နန္ဒိယဿ သန္တိကေ ဝသထာတိ၊ သေသာ သဗ္ဗာ န ဣစ္ဆိံသု၊ န မယံ ဇာနာမ ဧတံ အဓုနာဂတံ ကုလဝန္တံ ဝါ ဒုက္ကုလဝန္တံဝါတိ။ အထ ကဏိဋ္ဌိကံ ပုစ္ဆိ။ သာ ယဿ မံ မာတာပိတရော ဒဿန္တိ။ တေသံ ဝစနံ န ဘိန္ဒိဿာမီတိ သမ္ပဋိစ္ဆိ၊ အထ သေနဂုတ္တော နန္ဒိယံ ပက္ကောသိတွာ အတ္တနော ဓီတရံ ဒတွာ တဿ မဟာသမ္ပတ္တိ မဒါသိ။ တတော သတ္တမေ ဒိဝသေ နန္ဒိယော တတ္ထ တတ္ထ အာဟိဏ္ဍန္တော ရညော မင်္ဂလုယျာနံ ပဿိဿာမီတိ ဂန္တွာ ဓင်္ဂလသိလာပဋ္ဋေသသီသံ ပါရုပိတွာ နိပဇ္ဇိ၊ သော စ ဗာရာဏသီရညော ကာလင်္ကတဿ သတ္တမော ¶ ဒိဝသော ဟောတိ။ အမစ္စာစ ပုရောဟိတောစ ရညော သရီရကိစ္စံ ကာရေတွာ ရာဇင်္ဂဏေ နိသီဒိတွာ မန္တယိံသု။ ရညော ဧကာဝ ဓီတာ အတ္ထိ၊ ပုတ္တော ပနဿ နတ္ထိ။ အရာဇိကံ ရဇ္ဇံ န တိဋ္ဌတိ။ ဖုဿရထံ ဝိဿဇ္ဇေဿာမာတိ။ တေ ကုမုဒပတ္တဝဏ္ဏေ စတ္တာရော သိန္ဓဝေ ယောဇေတွာ သေတစ္ဆတ္တပမုခံပဉ္စဝိဓရာဇကကုဓဘဏ္ဍံ ရထသ္မိံယေဝ ဌပေတွာ ရထံ ဝိဿဇ္ဇေတွာ ပစ္ဆတော တုရိယာနိ ပဂ္ဂဏှာပေသုံ။ ရထော ပါစီဒွါရေန နိက္ခမိတွာ ဥယျာနာဘိမုခေါ အဟောသိ။ ပရိစယေန ဥယျာနာဘိမုခေါ ဂစ္ဆတိ။ နိဝတ္တေမာတိ ကေစိ အာဟံသု။ ပုရောဟိတော မာ နိဝါရယိတ္ထာတိ အာဟ။ ရထော ကုမာရကံ ပဒက္ခိဏံ ကတွာ အာရောဟဏသဇ္ဇော ဟုတွာ အဋ္ဌာသိ။ ပုရောဟိတော ပါရုပဏကဏ္ဏံ အပနေတွာ ပါဒတလာနိ ဩလောကေန္တော တိဋ္ဌတု အယံ ဒီပေါ။ ဒွိသဟဿဒီပ ပရိဝါရေသု စတူသု မဟာဒီပေသု ဧကရဇ္ဇံ ကာတုံ သမတ္ထောတိဝတွာ တဿ ဓိတိံ ဥပဓာရေတုံ တိက္ခတ္တုံ တုရိယာနိ ပဂ္ဂဏှာပေသိ။ အထ ကုမာရော မုခံ ဝိဝရိတွာ ဩလောကေတွာ ကေန ကာရဏေန အာဂတတ္ထာတိ အာဟ၊ ဒေဝ တုမှာကံ ရဇ္ဇံ ပါပုဏာတီတိ၊ ရာဇာ ကဟန္တိ၊ ဒေဝတ္တံ ဂတော သာမီတိ၊ ကတိ ဒိဝသာ အတိက္ကန္တာတိ၊ အဇ္ဇ သတ္တမော ဒိဝသောတိ။ ပုတ္တော ဝါ ဓီတာ ဝါ နတ္ထီတိ၊ ဓီတာ အတ္ထိ ဒေဝ။ ပုတ္တော န ဝိဇ္ဇတီတိ၊ တေနဟိ ကရိဿာမိ ရဇ္ဇန္တိ၊ တေ တာဝဒေဝ အဘိသေကမဏ္ဍပံ ကာရေတွာ ရာဇဓီတရံ သဗ္ဗာလင်္ကာရေဟိ အလင်္ကာရိတွာ ဥယျာနံ နေတွာ ကုမာရဿ အဘိသေကံ အကံသု၊ အထဿ ကတာဘိသေကဿ သတသဟဿဂ္ဃနကံ ဝတ္ထံ အာနေသုံ၊ သော ကိမိဒံ တာတာတိ အာဟ၊ နိဝါသနဝတ္ထံ ဒေဝါတိ၊ နနု တာတာ ထူလံတိ၊ မနုဿာနံ ပရိဘောဂဝတ္ထေသု ဣတော သုခုမတရံ နတ္ထိ ဒေဝါတိ၊ တုမှာကံ ရာဇာ ဧဝရူပံ နိဝါသေသီတိ၊ အာမ ဒေဝါတိ။ န မညေ ပုညဝါ တုမှာကံ ရာဇာတိ ဝတွာ ဟန္ဒ သုဝဏ္ဏဘိင်္ကာရံ အာဟရထ၊ လဘိဿာမ ဝတ္ထန္တိ၊ တေ သုဝဏ္ဏဘိင်္ကာရံ အာဟရိံသု၊ သော ဥဋ္ဌာယ ဟတ္ထေ ဓောဝိတွာ မုခံ ဝိက္ခာလေတွာ ဟတ္ထေန ဥဒကံ အာဒါယ ပုရတ္ထိမဒိသာယ အဗ္ဘုက္ကိရိ၊ ¶ တာဝဒေဝ ဃနပထဝိံ ဘိန္ဒိတွာ သောဠသကပ္ပရုက္ခာ ဥဋ္ဌဟိံသု၊ ပုန ဥဒကံ ဟတ္ထေန ဂဟေတွာ ဒက္ခိဏံ ပစ္ဆိမံ ဥတ္တရန္တိ ဧဝံ စတဿောပိ ဒိသာ အဗ္ဘုက္ကိရိ၊ သဗ္ဗဒိသာသု သောဠသ သောဠသ ဟုတွာ စတုသဋ္ဌိကပ္ပရုက္ခာ ဥဋ္ဌဟိံသု၊ သော ဧကံ ဒိဗ္ဗဒုဿံ နိဝါသေတွာ ဧကံ ပါရုပိတွာ နန္ဒိယရညော ဝိဇိတေ သုတ္တကန္တိကာ ဣတ္ထိယော မာ သုတ္တံ ကန္တန္တူတိ ဘေရိံ စရာပေထာတိ ဝတွာ ဆတ္တံ ဥဿာပေတွာ အလင်္ကတပဋိယတ္တော ဟတ္ထိက္ခန္ဓဝရဂတော နဂရံ ပဝိသိတွာ ပါသာဒမဘိရုယှ မဟာသမ္ပတ္တိံ အနုဘဝိ။ အဟော တဒါ ပစ္စေကဗုဒ္ဓဿ ဒိန္နာနုဝါတကဿ ဝိပါကော။ တေနာဟု ပေါရာဏာ။
ယထာ သာသပမတ္တမှာ၊ ဗီဇာ နိဂြောဓပါဒပေါ၊
ဇာယတေ သတသာခဍ္ဎော၊ မဟာနီလမ္ဗုဒေါပမော။
တထေဝ ပုညကမ္မမှာ၊ အဏုမှာ ဝိပုလံ ဖလံ၊
ဟောတီတိ အပ္ပပုညန္တိ၊ နာဝမညေယျ ပဏ္ဍိတောတိ။
ဧဝံ ဂစ္ဆန္တေ ကာလေ ဧကဒိဝသံ ဒေဝီ ရညော သမ္ပတ္တိံ ဒိသွာ အဟော တပဿီတိ ကာရုညာကာရံ ဒဿေသိ။ ကိမိဒံ ဒေဝီတိ စ ပုဋ္ဌာ အတိမဟတီ တေ ဒေဝ သမ္ပတ္တိ။ အတီတမဒ္ဓါနံ ကလျာဏံ ကတတ္တာ။ ဣဒါနိ အနာဂတဿတ္ထာယ ကုသလံ ကရောထာတိ အာဟ။ ကဿ ဒဿာမ။ သီလဝန္တာ နတ္ထီတိ။ အသုညော ဒေဝ ဇမ္ဗုဒီပေါ အရဟန္တေဟိ၊ တုမှေ ဒါနံ သဇ္ဇေထ၊ အဟံ အရဟန္တေ လစ္ဆာမီတိ အာဟ။ ပုနဒိဝသေ ရာဇာ မဟာရဟံ ဒါနံ သဇ္ဇာပေသိ။ ဒေဝီ သစေ ဣမိဿာ ဒိသာယ အရဟန္တော အတ္ထိ၊ ဣဓာ ဂန္တွာ အမှာကံ ဘိက္ခံ ဂဏှန္တူတိ ဥတ္တရဟိမဝန္တာဘိမုခီ ပုပ္ဖာနိ ဥဒ္ဓံ ခိပိတွာ ဥရေန နိပဇ္ဇိ။ အထ တာနိ ပုပ္ဖာနိ အာကာသတော ဂန္တွာ ဟိမဝန္တပဒေသေ ဝသန္တာနံ ပဒုမဝတိယာ ပုတ္တာနံ ပဉ္စသတာနံပစ္စေကဗုဒ္ဓါနံ ဇေဋ္ဌကမဟာပဒုမပစ္စေကဗုဒ္ဓဿ ပါဒမူလေ ပတိံသု။ တထာဟိ။
အဟော ¶ ပဿထ ဘော ဒါနိ၊ ဝိမှယံ ပုညကမ္မုနော၊
အစေတနာပိ ပုပ္ဖာနိ၊ ဒူတကိစ္စေသု ဗျာဝဋာ။
ကတ္တုကာမေန လောကသ္မိံ၊ သကလံ အတ္တနော ဝသံ၊
သဗ္ဗတ္ထာမေန ကတ္တဗ္ဗံ၊ ပုညံ ပညဝတာ သဒါတိ။
တတော မဟာပဒုမပစ္စေကဗုဒ္ဓါ တံ ဉတွာ သေသဘာတရေ အာမန္တေသိ။ မာရိသာ နန္ဒိယရာဇာ တုမှေ နိမန္တေသိ။ အဓိဝါသေထ တဿ နိမန္တနန္တိ။ တေ အဓိဝါသေတွာ တာဝဒေဝ အာကာသေနာ ဂန္တွာ ဥတ္တရဒွါရေ ဩတရိံသု။ မနုဿာ ပဉ္စသတာ ဒေဝ ပစ္စေကဗုဒ္ဓါ အာဂတာတိ ရညော အာရောစေသုံ၊ ရာဇာ သဒ္ဓိံ ဒေဝိယာ ဂန္တွာ ဝန္ဒိတွာ ပတ္တေ ဂဟေတွာ ပစ္စေကဗုဒ္ဓေ ပါသာဒံ အာရောပေတွာ တတ္ထ တေသံ ဒါနံ ဒတွာ ဘတ္တကိစ္စာဝသာနေ ရာဇာ သင်္ဃတ္ထေရဿ ဒေဝီ သင်္ဃနဝကဿ စ ပါဒမူလေ နိပဇ္ဇိတွာ အယျာ ပစ္စယေဟိ န ကိလမိဿန္တု၊ မယံ ပုညေန န ဟာယိဿာမ၊ အမှာကံ ဣဓ ဝါသာယ ပဋိညံ ဒေထာတိ ပဋိညံ ကာရေတွာ ဥယျာနေ နိဝါသဋ္ဌာနာဒယော ကာရေတွာ ယာဝဇီဝံ ပစ္စကဗုဒ္ဓေ ဥပဋ္ဌဟိတွာ တေသု ပရိနိဗ္ဗုတေသု သာဓုကီဠနံ ကာရေတွာ စန္ဒနာ ဂရုအာဒီဟိ သရီရကိစ္စံ ကာရေတွာ ဓာတုယော ဂဟေတွာ စေတိယံ ပတိဋ္ဌာပေတွာ ဧဝရူပါနမ္ပိ မဟာနုဘာဝါနံ မဟေသီနံ မရဏံ ဘဝိဿတိ၊ ကိမင်္ဂံ ပန မာဒိသာနန္တိ သံဝေဂဇာတော ဇေဋ္ဌပုတ္တံ ရဇ္ဇေ ပတိဋ္ဌာပေတွာ သယံ ပဗ္ဗဇံ ပဗ္ဗဇိ၊ ဒေဝီပိ ရညေ ပဗ္ဗဇိတေ အဟံ ကိံကရိဿာမီတိ ပဗ္ဗဇိတွာ ဒွေပိ ဥယျာနေ ဝသန္တာ ဈာနာဘိညံ နိဗ္ဗတ္တေတွာ ဈာနသုခေန ဝီတိနာမေန္တာ အာယုပရိယောသာနေ ဗြဟ္မလောကေ နိဗ္ဗတ္တိံသု။ တေ အမှာကံ ဘဂဝတော ကာလေ ဗြာဟ္မဏကုလေ နိဗ္ဗတ္တိတွာ ဗုဒ္ဓသာသနေ ပဗ္ဗဇိံသု၊ တဒါ နန္ဒိယရာဇာ ဓုတင်္ဂဓရာနံ အဂ္ဂေါ မဟာကဿပတ္ထေရောနာမ ဟုတွာ စန္ဒော ဝိယ သုရိယော ဝိယစ လောကေ ပါကဋော ဟုတွာ ဘဂဝတိ ပရိ- နိဗ္ဗုတေ ¶ ဗုဒ္ဓသာသနံ အတိဝိယ သောဘေတိ။ ဘရိယာပိဿ ဘဒ္ဒကာပိဠာနီ နာမ အဟောသီတိ။
ဒတွာ ပုရေကော ဝိပိနေ စရန္တော၊
ပစ္စေကဗုဒ္ဓဿနုဝါတမတ္တံ၊
ကတွာ သရဋ္ဌံ ကုရုဒီပသောဘံ၊
မဟာနုဘာဝေါ ဝသုဓာ ဓိပေါသိ။
တုမှေစ ဘောန္တော ခလု သီလဝန္တေ၊
ဒဒါထ ဒါနာနိ အနပ္ပကာနိ၊
တံ ဝေါ ပတိဋ္ဌာစ ဘဝန္တရသ္မိံ၊
စိန္တာမဏိံ ကပ္ပတရုံဝ သာရန္တိ။
နန္ဒိယရာဇဿ ဝတ္ထုံ ပထမံ။
၁၂။ အညတရမနုဿဿ ဝတ္ထုမှိ အယမာနုပုဗ္ဗီကထာ
အမှာကံ ဘဂဝတိ ပရိနိဗ္ဗုတေ ပါဋလိပုတ္တသမီပေ အညတရသ္မိံ ဂါမေ အညတရော ဒုဂ္ဂတမနုဿော ဝသတိ၊ သော ပနေကဒိဝသံ အညတရံ ဂါမံ ဂစ္ဆန္တော ဒွေ သာဋကေ နိဝါသေတွာ မဟန္တံ အဋဝိံပါပုဏိ၊ တဒေဝံ ဂစ္ဆန္တံ ဒိသွာ ဧတဿ ဝတ္ထံ ဂဏှိဿာမီတိ ဧကော စောရော အနုဗန္ဓိ၊ သော ဒူရတောဝ အာဂစ္ဆန္တံ စောရံ ဒိသွာ စိန္တေသိ၊ အဟမေတသ္မာ ပလာယိတုံ ဝါ တေန သဒ္ဓိံယုဇ္ဈိတုံ ဝါ န သက္ကောမိ၊ အယမာဂန္တွာ အဝဿံ အနိစ္ဆန္တဿာပိ မေ ဝတ္ထံ ဂဏှိဿတိ။ မယာပိဿ နိရတ္ထကေန ဟရိတုံ န သက္ကာ၊ ဒါနဝသေနဿ ဒဿာမီတိ သန္နိဋ္ဌာန မကာသိ၊ အထ စောရော အာဂန္တွာ ဝတ္ထကံ ပရာမသိ၊ အထ သော ပုရိသော စိတ္တံ ပသာဒေတွာ ဣမံ မမ ဝတ္ထဒါနံ ဘဝဘောဂသုခတ္ထာယ ပစ္စယော ဟောတူတိ ဝတ္ထံ ဒတွာ ဒုစ္ဆာဒိတတ္တာ မဟာမဂ္ဂံ ပဟာယ အညေန ဇင်္ဃာမဂ္ဂေန ဂစ္ဆန္တော အာသိဝိသေန ဒဋ္ဌော ကာလံ ကတွာ ဟိမဝန္တပ္ပဒေသေ ¶ ဒွါဒသယောဇနိကေ ကနကဝိမာနေ နေကစ္ဆရာသဟဿပရိဝုတော နိဗ္ဗတ္တိ။ ဝိမာနံ ပနဿ ပရိဝါရေတွာ တိယောဇနိကေ ဌာနေ ကပ္ပရုက္ခာ နိဗ္ဗတ္တိံသု၊ သော မဟန္တံ ဒိဗ္ဗသမ္ပတ္တိံ ဒိသွာ သောမနဿံ ပဝေဒေန္တော အာဟ။
ပရိဏာမိတမတ္တေန၊ ဒါနဿ သကသန္တကံ၊
ဒဒါတိ ဝိပုလံ ဘောဂံ၊ ဒိဗ္ဗမိဿရိယံ ဝရံ။
ဒွါဒသယောဇနုဗ္ဗေဓံ၊ ဒုဒ္ဒိက္ခံ စက္ခုမူသနံ၊
ကူဋာ ဂါရဝရုပေတံ၊ သဗ္ဗသောဝဏ္ဏယံ သုဘံ။
မမ ပုညေန နိဗ္ဗတ္တံ၊ နေကရာဂဒ္ဓဇာကုလံ၊
တထေဝ ပရိသုဒ္ဓေဟိ၊ ဝိတာနေဟိ စ လင်္ကတံ။
ပါသာဒပရိယန္တမှိ၊ ဒိဗ္ဗဝတ္ထာနိ လမ္ဗရေ၊
ဝါတေရိတာ တေ သောဘန္တိ၊ အဝှေန္တာဝ သုဓာသိနော။
ပါသာဒဿ သမန္တာ မေ၊ ဘူမိဘာဂေ တိယောဇနေ၊
ဣစ္ဆိတိစ္ဆိတဒါတာရော၊ ဇာတာသုံ သုရပါဒပါ။
တတ္ထ နစ္စေဟိ ဂီတေဟိ၊ ဝါဒေဟိ တုရိယေဟိ စ၊
နေ ကစ္ဆရာသဟဿေဟိ၊ မောဒါမိ ဘဝနေ မမ။
န သမ္မာ ဒိန္နဝတ္ထဿ၊ အက္ခေတ္တေ ဖလမီ ဒိသံ၊
ခေတ္တေ သမ္မာ ဒဒန္တဿ၊ ကော ဖလံ ဝဏ္ဏယိဿတီတိ။
ဧဝံ ဝိဓမ္ပိ ကုသလံ မနုဇော ကရိတွာ၊
ပပ္ပောတိ ဒိဗ္ဗဝိဘဝံ မုနိဝဏ္ဏနီယံ၊
မန္တွာန ဘော ဒဒထ ဒါနဝရံ သုသီလေ၊
သဒ္ဓါယ သုဒ္ဓမနသာဿ ဝိသေသဘာဂီတိ။
အညတရမနုဿဿ ဝတ္ထုံ ဒုတိယံ။
၁၃။ ဝိသမလောမကုမာရဿ ဝတ္ထုမှိ အယမာနုပုဗ္ဗီကထာ
အတီတေ ¶ ကိရ ဣမသ္မိံ ဇမ္ဗုဒီပေ ကဿပေါ နာမ သမ္မာသမ္ဗုဒ္ဓါ ပါရမိယော ပူရေတွာ သဗ္ဗညုတံ ပတ္တော လောကဿ ဒုက္ခာပနုဒေါ သုခါဝဟော ပဋိဝသတိ လောကံ နိဗ္ဗာဏမဟာနဂရဝရေ ပရိပူရေန္တော။ တသ္မိံ သမယေ အညတရော ပုရိသော သတ္ထု ဓမ္မဒေသနံ သုတွာ ပသန္နော ဘိက္ခုသင်္ဃဿ ဒါနံ ဒေန္တော သီလံ ရက္ခန္တော ဥပေါသထကမ္မံ ကရောန္တော နာနာဝိဓာနိ ပုညကမ္မာနိ ကတွာ သုတ္တပ္ပဗုဒ္ဓါဝိယ ဂန္တွာ ဒေဝလောကေ နိဗ္ဗတ္တိ သဗ္ဗရတနမယေ ဒိဗ္ဗဝိဓာနေ ဒေဝစ္ဆရာသဟဿပရိဝုတော။ တတ္ထ ယာဝတာယုကံ ဌတွာ တတော စုတော အမှာကံ ဘဂဝတိ ပရိနိဗ္ဗုတေ ဇမ္ဗုဒီပေ ပါဋလိပုတ္တနဂရေ အာဏာစက္ကဝတ္တိဓမ္မာသောကမဟာနရိန္ဒဿ အဂ္ဂမဟေသိယာ ကုစ္ဆိမှိ နိဗ္ဗတ္တိ။ တဿ နာမံ ကရောန္တော သီသေ လောမံ ဝိသမံ ဟုတွာ ဇာတတ္ထာ ဝိသမလောမကုမာရောတိ သဉ္ဇာနိံသု။ သော ကမေန ဝိညုတံ ပတ္တော ဗလသမ္ပန္နော အဟောသိ။ မဟာထာမော အဘိရူပေါစ အဟောသိ။ ဒဿနီယော ပါသာဒိကော ယသပရိဝါရသမ္ပန္နော ပဋိဝသတိ။ တတော အပရေန သမယေန ဓမ္မာသောကမဟာနရိန္ဒော စတုရာသီတိသဟဿရာဇပရိဝုတော အနန္တဗလဝါဟနော ကီ ဠာ ပ ရော ဟိမဝန္တံ ဂန္တွာ ယထာဘိရန္တံ ကီဠိတွာ အာဂစ္ဆန္တော စန္ဒဘာဂံ နာမ ဂင်္ဂံ သမ္ပာပုဏိ။ သာ ပန ယောဇနဝိတ္ထတာ တိဂါဝုတဂမ္ဘီရာ အဟောသိ။ တဒါ သာ အဓုနာဂတေဟိ ဩဃေဟိ မဟာဖေဏသမာကုလာ ဗဟူမိယော ဥဘောကူလေ ဥတ္တရန္တီ မဟာဝေဂါ [မဟာဝေဂါဂစ္ဆန္တီ ဣတိသဗ္ဗတ္ထ] ဂစ္ဆန္တိ။ တဒါ ရာဇာ ဂင်္ဂံ ဒိသွာ ကော နာမေတ္ထ ပုရိသော ဧဝံဝိဓံ မဟာဂင်္ဂံ တရိတုံ သမတ္ထော ဘဝိဿတီတိ အာဟ။ တံ သုတွာ ဝိသမလောမ ကုမာရော အာဂန္တွာ ဝန္ဒိတွာ အဟံ ဒေဝ ဂင်္ဂံ တရိတွာ ဂန္တုဉ္စ အာဂန္တုဉ္စ သက္ကောမီတိ အာဟ။ ရာဇာ သာဓူတိ သမ္ပဋိစ္ဆိ။ အထ ကုမာရော ဂါဠှံ နိဝါသေတွာ မကရဒန္တိယာ ¶ ကေသေ ဗန္ဓိတွာ ဂင်္ဂါကူလေ ဌိတော အဋ္ဌာရသဟတ္ထံ အဗ္ဘုဂ္ဂန္တွာ ဥသဘမတ္တဋ္ဌာနေ ပတိတွာ တရိတု မာရဘိ။ တတော စဏ္ဍသောတံ ဆိန္ဒိတွာ တရန္တော ဂမနာ ဂမနကာလေ ဂဏှနတ္ထာယ အာဂတေ စဏ္ဍသုံသုမာရေ ပါဏိနာ ပဟရိတွာ စုဏ္ဏဝိစုဏ္ဏံ ကရောန္တော ဝီသသတံ မာရေတွာ ဥတ္တာရေတွာ တလမုဂ္ဂမ္မ ရာဇာနံ ဝန္ဒိတွာ အဋ္ဌာသိ။ ရာဇာ တံ ကာရဏံ ဒိသွာ ဘယပ္ပတ္တော ဧသော ခေါ မံ မာရေတွာ ရဇ္ဇမ္ပိ ဂဟိတုံ သမတ္ထော။ ဧတံ မာရေတုံ ဝဋ္ဋတီတိ စိန္တေတွာ နဂရံ သမ္ပတ္တော ကုမာရံ ပက္ကောသာပေတွာ အမစ္စေ အာဟ။ ဣမံ ဘဏေ ဗန္ဓနာဂါရေ ကရောထာတိ။ တေ တထာ ကရိံသု၊ အထဿ ဗန္ဓနာဂါရေ ဝသန္တဿ စတ္တာရော မာသာ အတိက္ကန္တာ။ တတော ရာဇာ စတုမာသစ္စယေန ဒီဃတော သဋ္ဌိဟတ္ထပ္ပမာဏေ သဋ္ဌိဝေဠုကလာပေ အာဟရာပေတွာ ဂဏ္ဌိယော သောဓာပေတွာ အန္တော အယောသာရံ ပူရေတွာ ရာဇင်္ဂဏေ ဌပါပေတွာ ဝိသမလောမကုမာရံ ဗန္ဓနာဂါရတော အာဟာရာပေတွာ [အာဏာပေတွာ ဣတိသဗ္ဗတ္ထ] အမစ္စေ ဧဝမာဟ။ ဘဏေ သွာယံ ကုမာရော ဣမိနာ ခဂ္ဂေန ဣမေ ဝေဠုကလာပေ စတုရင်္ဂုလံ ကတွာ ဆိန္ဒတု။ နော စေ ဆိန္ဒိတုံ သက္ကောတိ။ တံ မာရေထာတိ အာဟ၊ တံ သုတွာ ကုမာရော အဟံ ဗန္ဓနာဂါရေ စိ ရ ဝု တ္ထော ဇိဃစ္ဆာပီဠိတော အာဟာရေန ကိလမိံ၊ ယန္နူနာဟံ အာဟာရံ ဘုဉ္စိတွာ ဆိန္ဒေယျန္တိ။ တေ နတ္ထိ ဒါနိ တုယှံ အာဟာရန္တိ အာဟံသု။ တေနဟိ ပေါက္ခရဏိယာ ပါနီယံ ပိဝိဿာမီတိ အာဟ။ တေ သာဓူတိ ပေါက္ခရဏိံ နေသုံ။ ကုမာရော ပေါက္ခရဏိံ ဩတရိတွာ နဟာယိတွာ နိမုဂ္ဂေါ ယာဝဒတ္ထံ ကလလံ ဘုဉ္စိတွာ ပါနီယံ ပိဝိတွာ ဥဋ္ဌာယ အသိပတ္တံ ဂဟေတွာ မဟာဇနာနံ [မဟာဇနာနံပဿန္တမေဝ ဣတိသဗ္ဗတ္ထ] ပဿန္တာနမေဝ အဋ္ဌာသီတိဟတ္ထဋ္ဌာနံ အာကာသံ ဥလ္လင်္ဃိတွာ သဗ္ဗဝေဠုကလာပေ စတုရင်္ဂုလမတ္တေန ခဏ္ဍာခဏ္ဍံ ကုရုမာနော ဩတရိတွာ မူလေ ထူလအယသလာကံ ပတွာ ကိဏီတိ သဒ္ဒံ သုတွာ အသိပတ္တံ ဝိဿဇ္ဇေတွာ ရောဒမာနော အဋ္ဌာသိ။ တတော ရာဇပုရိသေဟိ ကိမတ္တံ ရောဒသီတိ ဝုတ္တေ ¶ ဧတ္တကာနံ ပုရိသာနမန္တရေ မယှံ ဧကောပိ သုဟဒေါ နတ္တိ။ သစေ ဘဝေယျ၊ ဣမေသံ ဝေဠုကလာပါနမန္တရေ အယော သာရံ အတ္ထိဘာဝံ ကထေယျ၊ အဟံ ပန ဇာနမာနော ဣမေ ဝေဠု ကလာပေ အင်္ဂုလင်္ဂုလေသု ဆိန္ဒေယျန္တိ အာဟ။ တတော ရာဇာ ကုမာရေန ကတကမ္မံ ဩလောကေတွာ ပသန္နော ဥပရာဇဋ္ဌာနံ ဗဟုဉ္စ ဝိဘဝံ ဒါပေသိ၊ ဧဝမဿ ဗလသမ္ပတ္တိလာဘော နာမ န ဇာတိဂေါတ္တကုလပဒေသာဒီနံ ဗလံ။ န ပါဏာတိပါတာဒိဒုစ္စရိတာနံ ဗလံ။ ကဿေတံ ဗလန္တိ။ ကဿပသမ္မာသမ္ဗုဒ္ဓကာလေ ဘိက္ခုသင်္ဃဿ ဒိန္နဒါနာဒိသုစရိတကမ္မဝိပါကံ။ တေန ဝုတ္တံ။
ကဿပဿ မုနိန္ဒဿ၊ ကာလေ အညတရော နရော၊
သမ္ဗုဒ္ဓမုပသံကမ္မ၊ သုတွာ ဓမ္မံ သုဒေသိတံ။
ပဋိလဒ္ဓသဒ္ဓါ ဟုတွာ၊ သီလဝန္တာန ဘိက္ခုနံ၊
မဓုရန္နပါနေ ပစုရေ၊ အဒါသိ သုမနော တဒါ။
အဒါသိ စီဝရေ ပတ္တေ၊ တထေဝ ကာယဗန္ဓနေ၊
အဒါ ခီရသလာကဉ္စ၊ ဗဟူ ကတ္တရယဋ္ဌိယော။
အဒါ သုပဿယံ ဒါနံ၊ မဉ္စပီဌာဒိကံ တထာ၊
ပါဝါရ ကမ္ဗလာဒီနိ၊ အဒါ သီတနိဝါရဏေ။
အဒါ ဘေသဇ္ဇဒါနာနိ၊ အာရောဂျတ္ထာယ ဘိက္ခုနံ၊
ဧဝံ နာနာဝိဓံ ပုညံ၊ ကတွာန တိဒိဝံ ဂတော။
တတ္ထ ဒိဗ္ဗဝိမာနမှိ၊ ဥပ္ပန္နော သော မဟိဒ္ဓိကော၊
ဒေဝစ္ဆရာပရိဝုတော၊ ဒေဝသေနာပုရက္ခတော။
ဒိဗ္ဗေဟိ နစ္စဂီတေဟိ၊ ဒိဗ္ဗဝါဒိတတန္တိဟိ၊
မောဒမာနော အနေကေဟိ၊ ဒိဗ္ဗသမ္ပတ္တိယာ သဟ။
ယာဝတာယုံ တဟိံ ဌတွာ၊ ဇမ္ဗုဒီပေ မနောရမေ၊
ပုရေ ပါဋလိပုတ္တမှိ၊ ဓမ္မာသောကဿ ရာဇိနော။
ပုတ္တော ¶ ဟုတွာန နိဗ္ဗတ္တိ၊ မဟာထာမော မဟာဗလော၊
မဟာယသော မဟာဘောဂေါ၊ အာသိ ဗုဒ္ဓါဒိမာမကော။
ကာတဗ္ဗံ ကုသလံ တသ္မာ၊ ဘဝသမ္ပတ္တိ မိစ္ဆတာ၊
ပါလေတဗ္ဗ မထော သီလံ၊ ဘာဝေတဗ္ဗဉ္စ ဘာဝနန္တိ။
တတော ကုမာရော ဥပရာဇဋ္ဌာနံ လဘိတွာ သမ္ပတ္တိံအနုဘဝမာနော မောဂ္ဂလိပုတ္တတိဿတ္ထေရမာဒိံ ကတွာ မဟာဘိက္ခုသင်္ဃဿ စီဝရပိဏ္ဍပါတသေနာသနဂိလာနပစ္စယဒါနာ ဒိဝသေန သက္ကာရံ ကတွာ သီလံ ရက္ခိတွာ ဥပေါသထကမ္မံ ကတွာ အာယုပရိယောသာနေ ယထာကမ္မံ ဂတောတိ။
ဧဝံဝိဓံ သုစရိတံ သုမနော ကရိတွာ၊
ဘာဂိဿ နေကဝိဘဝဿ ဘဝါဘဝေသု၊
တုမှေပိ ဘော သုစရိတံ ဝိဘဝါနုရူပံ၊
ကတွာန နိဗ္ဗုတိပဒံ ကရဂံ ကရောထာတိ။
ဝိသမလောမကုမာရဿ ဝတ္ထုံ တတိယံ။
၁၄။ ကဉ္စနဒေဝိယာ ဝတ္ထုမှိ အယမာနုပုဗ္ဗီကထာ
ဇမ္ဗုဒီပေ ကိရ ဒေဝပုတ္တနဂရံ နာမ ဒဿနီယံ ဧကံ နဂရံ အဟောသိ။ တသ္မိံ သမယေ မနုဿာ ယေဘုယျေန ပတ္တမဟံ နာမ ပူဇံ ကရောန္တိ၊ ဘဂဝတာ ပရိဘုတ္တပတ္တံ ဂဟေတွာ ကတာနေကပူဇာဝိဓာနာ ဥဿဝံ ကရောန္တိ။ တံ ပတ္တမဟန္တိ ဝုစ္စတိ။ တသ္မိံ သမယေ ဒေဝပုတ္တနဂရေ ရာဇာ သဗ္ဗရတနမယံ ရထံ သဗ္ဗာလင်္ကာရေဟိ အလင်္ကာရာပေတွာ ကုမုဒပတ္တဝဏ္ဏေ စတ္တာရော သိန္ဓဝေ ယောဇေတွာ သုသိက္ခိတသိပ္ပာစရိယေဟိ သတ္တရတနပရိနိဋ္ဌိတေ အသီတိဟတ္ထဝေဠဂ္ဂေ သတ္ထုနာ ပရိဘုတ္တံ သေလမယပတ္တံ မုတ္တာဇာလာဒီဟိ အလင်္ကရိတွာ ဝေဠဂ္ဂံ အာရောပေတွာ ဝေဠုံ ¶ ရထေ ဌပါပေတွာ နဂရံ ဒေဝနဂရံ ဝိယ အလင်္ကရိတွာ ဓဇပတာကာဒယော ဥဿာပေတွာ တောရဏဂ္ဃ ကပန္တိယောစ ပုဏ္ဏဃဋဒီပမာလာဒယောစ ပတိဋ္ဌာပေတွာ အနေကေဟိ ပူဇာဝိဓာနေဟိ နဂရံ ပဒက္ခိဏံ ကာရေတွာ နဂရမဇ္ဈေ သုသဇ္ဇိတရတနမဏ္ဍပေ ပတ္တဓာတုံ ဌပေတွာ သတ္တမေ ဒိဝသေ မဟာဓမ္မသဝဏံ ကာရာပေသိ။ တဒါ တသ္မိံ ဇနပဒေ ဗဟူ မနုဿာစ ဒေဝတာစ ယက္ခရက္ခသနာဂသုပဏ္ဏာဒယောစ မနုဿဝေသေန ယေဘုယျေန တံ သမာဂမံ ဩတရန္တိ၊ ဧဝမစ္ဆရိယံ တံ ပူဇာဝိဓာနံ အဟောသိ။
တဒါ ဧကော နာဂရာဇာ ဥတ္တမရူပဓရံ အဂတပုဗ္ဗပုရိသံ ဧကံ ကုမာရိကံ ဓမ္မပရိသန္တရေ နိသိန္နံ ဒိသွာ တဿာ ပဋိဗဒ္ဓစိတ္တော အနေကာကာရေဟိ တံ ယာ စိ တွာ တဿာ အလဒ္ဓမာနော ကုဇ္ဈိတွာ နာသာဝါတံ ဝိဿဇ္ဇေသိ ဣမံ မာရေဿာမီတိ။ တံ တဿာ သဒ္ဓါဗလေန ကိဉ္စိ ဥပဒ္ဒဝံ ကာတုံ သမတ္ထော နာဟောသိ။ အထဿာ နာဂေါ ပါဒတော ပဋ္ဌာယ ယာဝသကလသရီရံ ဘောဂေန ဝေဌေတွာ သီသေ ဖဏံ ကတွာ ဘာယာပေန္တော အဋ္ဌာသိ။ အနညဝိဟိတာယ တာယ ဓမ္မသဝဏဗလေန အဏုမတ္တမ္ပိ ဒုက္ခံ နာဟောသိ။ ပဘာတာယ ရတ္တိယာ တံ ဒိသွာ မနုဿာ ကိမေတန္တိ ကာရဏံ ပုစ္ဆိံသု၊ သာပိ တေသံ ကထေတွာ ဧဝံ သစ္စကိရိယမကာသိ။ တထာဟိ။
ဗြဟ္မစာရီ အဟောသာဟံ၊ သဉ္ဇာတာ ဣဓ မာနုသေ၊
တေန သစ္စေန မံ နာဂေါ၊ ခိပ္ပမေဝ ပမုဉ္စတု။
ကာမာတုရဿ နာဂဿ၊ နောကာသမကရိံယတော၊
တေန သစ္စေန မံ နာဂေါ၊ ခိပ္ပမေဝ မုဉ္စတု။
ဝိသဝါတေန ခိတ္တဿ၊ ကုပိတဿောရဂဿဟံ၊
အကုဒ္ဓါ တေန သစ္စေန၊ သော မံ ခိပ္ပံ ပမုဉ္စတု။
သဒ္ဓမ္မံ သုဏမာနာဟံ၊ ဂရုဂါရဝဘတ္တိယာ၊
အဿောသိံ တေန သစ္စေန၊ ခိပ္ပံ နာဂေါ ပမုဉ္စတု။
အက္ခရံဝါ ¶ ပဒံဝါပိ၊ အဝိနာသေတွာဝ အာဒိတော၊
အဿောသိံ တေန သစ္စေန၊ ခိပ္ပံ နာဂေါ ပမုဉ္စတူတိ။
သစ္စကိရိယာဝသာနေ နာဂရာဇာ တဿာ အတီဝ ပသန္နော ဘောဂံ ဝိနိဝေဌေတွာ ဖဏသတံ မာပေတွာ တံ ဖဏဂဗ္ဘေ နိသီဒါပေတွာ ဗဟူဟိ နာဂမာနဝကေဟိ သဒ္ဓိံ ဥဒကပူဇံ နာမ ပူဇ မကာသိ၊ တံ ဒိသွာ ဗဟူ နဂရဝါသိနော အစ္ဆရိယဗ္ဘုတဇာတာ အဋ္ဌာရသကောဋိဓနေန ပူဇ မကံသု။ တထာဟိ။
နတ္ထိ သဒ္ဓါသမော လောကေ၊ သုဟဒေါ သဗ္ဗကာမဒေါ၊
ပဿထဿာ ဗလံ သဒ္ဓါ၊ ပူဇေန္တေဝံ နရော ရဂါ။
ဣဓ လောကေဝ သာလတ္ထ၊ ဘဝဘောဂ မနပ္ပကံ၊
တသ္မာ သဒ္ဓေန ကာတဗ္ဗံ၊ ရတနတ္တယဂါရဝန္တိ။
အထေဝံ သာ ပဋိလဒ္ဓမဟာဝိဘဝါ ယာဝဇီဝံ ကောမာရိယ ဗြဟ္မစာရိဏီ ဟုတွာ အာယုပရိယောသာနေ ကာလံ ကတွာ တသ္မိံယေဝ နဂရေ ရညော အဂ္ဂမဟေသိယာ ကုစ္ဆိမှိ ပဋိသန္ဓိံ ဂဏှိတွာ ဒသမာသစ္စယေန မာတုကုစ္ဆိတော နိက္ခမိ။ နိက္ခန္တဒိဝသေ ပနဿာ သကလဒေဝပုတ္တနဂရေ ရတနဝဿံ ဝဿိ။ တေနဿာ ကဉ္ဇနဒေဝီတိ နာမံ ကရိံသု။ သမန္တပါသာဒိကာ အဟောသိ။ အဘိရူပါ ဒေဝစ္ဆရပဋိဘာဂါ။ မုခတော ဥပ္ပလဂန္ဓော ဝါယတိ။ သရီရတော စန္ဒနဂန္ဓော ဝါယတိ။ သကလသရီရတော ဗာလသုရိယော ဝိယ ရံသိယော နိစ္ဆာရေန္တီ စတုရတနဂဗ္ဘေ ပဒီပကိစ္စံ နာမ နတ္ထိ။ သဗ္ဗော ဂဗ္ဘော သရီရာ လောကေန ဧကော ဘာသော ဟောတိ၊ တဿာ ရူပသမ္ပတ္တိ သကလဇမ္ဗုဒီပေ ပါကဋာ အဟောသိ။ တတော သကလဇမ္ဗုဒီပဝါသီ ရာဇာနော တဿာ အတ္ထာယ ပိတုရညော ပဏ္ဏာကာရာနိ ပဟိဏိံသု။ သာ ပန ပဉ္စကာမေ အနနုလိတ္တာ ပိတရံ အနုဇာနာပေတွာ ဘိက္ခုနူ ပဿယံ ဂန္တွာ ပဗ္ဗဇိတွာ ဝိပဿနံ ဝဍ္ဎေတွာ သဟ ပဋိသမ္ဘိဒါဟိ အရဟတ္တံ ပါပုဏီတိ။
သုတွာန ¶ သာဒရဝသေန ကုမာရိကေဝံ၊
ဓမ္မဉှိ သီလမမလံ ပရိပါလယန္တီ၊
လဒ္ဓါန နေကဝိဘဝံ ဝိဘဝံ ပယာတာ၊
မာ ဘော ပမဇ္ဇထ သဒါ ကုသလပ္ပယောဂေတိ။
ကဉ္စနဒေဝိယာ ဝတ္ထုံ စတုတ္ထံ။
၁၅။ ဗျဂ္ဃဿ ဝတ္ထုမှိ အယမာနုပုဗ္ဗီကထာ
ဇမ္ဗုဒီပေ စူလရဋ္ဌာ သန္နေ ဗာရာဏသီနဂရေ ဧကံ ပံသုပဗ္ဗတံ ဝိနိဝိဇ္ဈိတွာ မဟာမဂ္ဂေါ ဟောတိ၊ တတ္ထ ဝေမဇ္ဈေ ဧကော ဗျဂ္ဃော အတ္တနော အန္ဓပိတရံ ပဗ္ဗတဂုဟာယံ ကတွာ ပေါသေန္တော ဝသတိ။ တဿေဝ ပဗ္ဗတဿ ဝနဒွါရေ တုဏ္ဍိလော နာမ ဧကော သုဝပေါတကော ရုက္ခသ္မိံ ဝသတိ။ တေ ဥဘောပိ အညမညံ ပိယသဟာယာ အဟေသုံ၊ တသ္မိံ သမယေ ပစ္စန္တဂါမဝါသီ ဧကော မနုဿော အတ္တနော မာတုဂါမေန သဒ္ဓိံ ကလဟံ ကတွာ ဗာရာဏသိံ ဂစ္ဆန္တော တံ ဝနဒွါရံ သမ္ပာပုဏိ။ အထ သုဝပေါတကော ပရိဟီနတ္တဘာဝံ ဒုက္ခိတံ တံ ဒိသွာ ကမ္ပမာနဟဒယော တံ ပက္ကောသိတွာ ဘော ကုဟိံ ဂစ္ဆသီတိ အာဟ၊ တေန ပရခဏ္ဍံ ဂစ္ဆာမီတိ ဝုတ္တေ တုဏ္ဍိလော ဘော ဣမသ္မိံ ဝနခဏ္ဍမဇ္ဈေ ဧကော ဗျဂ္ဃော ဝသတိ။ ကက္ခလော ဖရုသော သမ္ပတ္တသမ္ပတ္တေ မာရေတွာ ခါဒတိ။ မာ တွံ တေန ဂစ္ဆာတိ အာဟ။ သွာယံ ဒုဗ္ဘဂေါ မနုဿော ဟိတကာမဿ တဿ ဝစနံ အနာဒိယိတွာ ဂစ္ဆာမေဝါတိ အာဟ။ တုဏ္ဍိလော တေနဟိ သမ္မ ယဒိ အနိဝတ္တမာနော ဂစ္ဆသိ။ ဧသော ဗျဂ္ဃော မမ သဟာယော။ မေ ဝစနံ တဝ သန္တိကာ သုတွာ န ဂဏှာတီတိ။ တဿ တံ အနာဒိယန္တော သော သုဝရာဇေ ပဒုဋ္ဌစိတ္တော မုဂ္ဂရေန ပဟရိတွာ မာရေတွာ အရဏိံ အဂ္ဂိံ ကတွာ မံသံ ခါဒိ။ အသပ္ပုရိသသံသဂ္ဂေါ နာမေ သ ဣဓ လောကပရလောကေသု ဒုက္ခာဝဟောယေဝ။ တထာဟိ။
မယာ ¶ ကတံ မယှမိဒံ၊ ဣတိ ဝေဿာနရံ နရော၊
သမာလိင်္ဂတိ သပ္ပေမော၊ ဒဟတေဝဿ ဝိဂ္ဂဟံ။
မဓုခီရာဒိဒါနေန၊ ပေမသာ ပရိပါလိတော၊
သောရဂေါ ကုပိတောဝဿ၊ ဍသတေဝဿ ဝိဂ္ဂဟံ။
ဧဝံ နိဟီနဇစ္စေန၊ ပါပေန အကတညုနာ၊
နရာ ဓမေန ဒီနေန၊ ကတောပိ ခဏသင်္ဂမော။
အသာဓုကော အယံတေဝံ၊ ဇာနမာနေန ဇန္တုနာ၊
မုဟုတ္တမ္ပိ န ကာတဗ္ဗော၊ သင်္ဂမော သော အနတ္ထဒေါတိ။
တတော သော အသပ္ပုရိသော မံသံ ခါဒိတွာ ဂစ္ဆန္တော ဝနခဏ္ဍမဇ္ဈံ သမ္ပာပုဏိ။ အထ ဗျဂ္ဃော တံ ဒိသွာ မဟာနာဒံ ကရောန္တော ဂဟဏတ္ထာယ ဥဋ္ဌာသိ။ သော ဗျဂ္ဃံ ဒိသွာ ဘယပ္ပတ္တော တုဏ္ဍိလဿ ဝစနံ သရိတွာ အဟံ ဘော တဝ သဟာယတုဏ္ဍိလဿ သန္တိကာ အာဂတောမှီတိ အာဟ၊ တံ သုတွာ ဗျဂ္ဃော အတ္တမနော ဧဟိ သမ္မာတိ တံ ပက္ကောသိတွာ အတ္တနော ဝသနဋ္ဌာနံ နေတွာ ခါဒိတဗ္ဗာဟာရေန တံ သန္တပ္ပေတွာ ပိတုသန္တိကေ နိသီဒါပေတွာ ပုန ဝနခဏ္ဍ မဂမာသိ။ အထဿ ပိတာ ပုတ္တဿ ဂတကာလေ တေန သဒ္ဓိံ သလ္လပန္တော တဿ ဝစနာနုသာရေန တုဏ္ဍိလံ မာရေတွာ ခါဒိတဘာဝံ အညာသိ။ တတော သော ပုတ္တဿ အာဂတကာလေ တဝ သဟာယော တေန မာရိတောတိ အာဟ။ တံ သုတွာ ဗျဂ္ဃော အနတ္တမနော ဝေဂေန တဿ ဝသနဋ္ဌာနံ ဂန္တွာ သမ္မ တုဏ္ဍိလာတိ သဒ္ဒံ ကတွာ အပဿန္တော လုဉ္စိတပတ္တံစဿ ဒိသွာ နိဿံသယံ တေန မာရိတော မေ သဟာယောတိ သောစန္တော ပရိဒေဝန္တော အာဂဉ္ဆိ။ အထ သော အသပ္ပုရိသော တသ္မိံ တတ္ထ ဂတေ တဿ ပိတရံ ပါသာဏေန ပဟရိတွာ မာရေတွာ ဗျဂ္ဃံစ ဒါနိ မာရေဿာမီတိ ဗျဂ္ဃာဂမနမဂ္ဂံ ဩလောကေန္တော နိလီနော အဋ္ဌာသိ။ တသ္မိံ ခဏေ ဗျဂ္ဃောပိ အာဂဉ္ဆိ။ သော တဿာ ဂတကာလေ တဿ တေဇေန ဘီတော ဂန္တွာ ¶ ဇီဝိတံ မေ သာမိ ဒေဟီတိ ပါဒမူလေ ဥရေန နိပဇ္ဇိ၊ ဗျဂ္ဃော ပန တေန ကတကမ္မံ ဒိသွာ တသ္မိံ စိတ္တံ နိဗ္ဗာပေတွာ မမ သဟာယဿ သာသနမာဒါယာဂတဿ ဒုဗ္ဘိတုံ န ယုတ္တန္တိ စိန္တေန္တော တံ သမဿာသေတွာ ဂစ္ဆ သမ္မာတိ သုခံ ပေသေသိ။ ဧဝဉှိ သပ္ပုရိသသမာဂမော နာမ ဣဓ လောကပရလောကေသု သုခါဝဟောယေဝ၊ ဝုတ္တံဟိ။
သဗ္ဘိရေဝ သမာသေထ၊ သဗ္ဘိ ကုဗ္ဗေထ သန္ထဝံ၊
သဗ္ဗတ္ထ သန္ထဝေါ တေန၊ သေယျော ဟောတိ န ပါပိယော။
သုခါဝဟော ဒုက္ခနုဒေါ၊ သဒါ သဗ္ဘိ သမာဂမော၊
တသ္မာ သပ္ပုရိသေဟေဝ၊ သင်္ဂမော ဟောတု ဇန္တုနံ။
တတော သော ဗျဂ္ဃော တေန မေတ္တစိတ္တာနုဘာဝေန ကာလံ ကတွာ သဂ္ဂေ နိဗ္ဗတ္တောတိ။
ဧဝံဝိဓောပိ ဖရုသော ပရမံသဘောဇီ၊
ဗျဂ္ဃော ဒယာယုပဂတော သုဂတိံ သုမေဓော၊
တသ္မာ ကရောထ ကရုဏံ သတတံ ဇနာနံ၊
တံ ဝေါ ဒဒါတိ ဝိဘဝဉ္စ ဘဝေသု ဘောဂန္တိ။
ဗျဂ္ဃဿ ဝတ္ထုံ ပဉ္စမံ။
၁၆။ ဖလကခဏ္ဍဒိန္နဿ ဝတ္ထုမှိ အယမာနုပုဗ္ဗီကထာ
သာဝတ္ထိယံ ကိရေကော မနုဿော ဥတ္တရာပထံ ဂစ္ဆာမီတိ အဒ္ဓါနမဂ္ဂပဋိပန္နော ဂိမှာနမာသေ မဇ္ဈဏှေ ဗဟလာတပေန ကိလန္တော ဟုတွာ ရုက္ခစ္ဆာယံ ပဝိသိတွာ တမ္ဗုလံ ခါဒန္တော ဖလကေ နိသီဒိ။ အထ ဥတ္တရာပထေနာဂစ္ဆာန္တော ဧကော တထေဝ အာတပေန ကိလန္တော အာဂန္တွာ ပုရိမဿ သန္တိကေ နိသီဒိတွာ ဘော ပါနီယံ အတ္ထီတိ ပုစ္ဆိ။ ဣတရော ပါနီယံ နတ္ထီတိ အာဟ။ အထဿ ¶ သော မယှမ္ပိ ဘော တမ္ဗုလံ ဒေဟိ ပိပါသိတောမှိတိ ဝတွာပိ န လဘိ။ စတုကဟာပဏေန ဧကံ တမ္ဗုလပဏ္ဏံ ကိဏိတွာ လဒ္ဓါ တတ္ထေဝ နိသီဒိတွာ ခါဒိတွာ ပိပါသံ ဝိနောဒေတွာ တေန ဥပကာရေန တဿ သိနေဟံ ကတွာ အတ္တနော ဂမနဋ္ဌာန မဂမာသိ၊ အထာ ပရဘာဂေ သော ပဋ္ဋနံ ဂန္တွာ နာဝါယ ဝဏိဇ္ဇတ္ထာယ ဂစ္ဆန္တော သမုဒ္ဒမဇ္ဈံ ပါပုဏိ။ တတော သတ္တမေ ဒိဝသေ နာဝါ ဘိဇ္ဇိ။ မနုဿာ မစ္ဆကစ္ဆပါနံ ဘက္ခာ ဇာတာ။ သော ဧဝ ပုရိသော အရောဂေါ ဟုတွာ ဧကံ ဖလကခဏ္ဍံ ဥရေ ကတွာ သမုဒ္ဒံ တရတိ။ အထေ တရောပိ တထေဝ နာဝါယ ဘိန္နာယ သေသော ဟုတွာ သမုဒ္ဒံ တရန္တော ပုရိမေန သမာဂမိ။ အထ တေ သတ္တဒိဝသံ သမုဒ္ဒေ တရန္တာ အညမညံ သဉ္ဇာနိံသု။ တေသု ကဟာပဏေ ဒတွာ တမ္ဗုလံ ဂဟိတော ဧကံ ဖလကခဏ္ဍံ ဥရေ ကတွာ တရတိ။ ဣတရဿေတံ နတ္ထိ။ အထ သော ကဟာပဏေ ဂဟေတွာ ဒိန္နတမ္ဗုလမတ္တဿော ပကာရံ သရိတွာ အတ္တနော ဖလကခဏ္ဍံ တဿ အဒါသိ။ သော တသ္မိံ သယိတွာ တရန္တော တံ ပဟာယ အဂမာသိ၊ အပရော အနာဓာရကေန တရန္တော ဩဿဋ္ဌဝိရိယော ဥဒကေ ဩသီဒိတုမာရတိ။ တသ္မိံ ခဏေ သမုဒ္ဒေ အဓိဝတ္ထာ မဏိမေခလာ နာမ ဒေဝဓီတာ ဩသီဒန္တံ တံ ဒိသွာ သပ္ပုရိသောတိ တဿ ဂုဏာနုဿရန္တီ ဝေဂေနာ ဂန္တွာ တံ အတ္တနော အာနုဘာဝေန သမုဒ္ဒတီရံ ပါပေသိ။ ဣတရံပိ သာ ဧတဿေဝ ဂုဏာနုဘာဝေန တီရံ ပါပေသိ။ အထ ဖလကေနောတိဏ္ဏပုရိသော တံ ဒိသွာ ဝိမှိတော ကထံ ပုရတော အဟောသိ သမ္မာတိ ပုစ္ဆိ။ သော န ဇာနာမိ။ အပိစ ခေါ သုခေနေဝ တီရံ ပတ္တောသ္မီတိ အာဟ။ အထ ဒေဝဓီတာ ဒိဿမာနကသရီရေနေဝ အတ္တနာ အာနီတဘာဝံ အာရောစေန္တီ အာဟ။
ယော မာတရံ ပိတရံဝါ၊ ဓမ္မေန ဣဓ ပေါသတိ၊
ရက္ခန္တိ တံ သဒါ ဒေဝါ၊ သမုဒ္ဒေ ဝါ ထလေပိ ဝါ။
ယော စေ ဗုဒ္ဓဉ္စ ဓမ္မဉ္စ၊ သံဃဉ္စ သရဏံ ဂတော၊
ရက္ခန္တိ တံ သဒါ ဒေဝါ၊ သမုဒ္ဒေ ဝါ ထလေပိ ဝါ။
ပဉ္စဝိဓံ ¶ အဋ္ဌဝိဓံ၊ ပါတိမောက္ခဉ္စ သံဝရံ၊
ပါလေတိ ယော တံ ပါလေန္တိ၊ ဒေဝါ သဗ္ဗတ္ထ သဗ္ဗဒါ။
ကာယေန ဝါစာ မနသာ၊ သုစရိတ္တံ စရတီ ဓ ယော၊
ပါလေန္တိ တံ သဒါ ဒေဝါ၊ သမုဒ္ဒေ ဝါ ထလေပိ ဝါ။
ယော သပ္ပုရိသဓမ္မေသု၊ ဌိတော ဓ ကတဝေဒိကော၊
ပါလေန္တိ တံ သဒါ ဒေဝါ၊ သမုဒ္ဒေ ဝါ ထလေပိ ဝါ။
တတော သော အာဟ။
နေဝ ဒါနံ အဒါသာဟံ၊ န သီလံ ပရိပါလယိံ၊
ကေန မေ ပုညကမ္မေန၊ မမံ ရက္ခန္တိ ဒေဝတာ၊
ပုစ္ဆာမိ သံသယံ တုယှံ၊ တံ မေ အက္ခာဟိ ဒေဝတေတိ။
ဒေဝတာ အာဟ။
အဂါဓာ ပါရဂေ ဘီမေ၊ သာဂရေ ဒုရိတာ ကရေ၊
ဘိန္နနာဝေါ တရန္တော တွံ၊ ဟဒယေ ကတွာ ကလိင်္ဂရံ။
ဌတွာ သပ္ပုရိသေ ဓမ္မေ၊ အတ္တာန မနဝေက္ခိယ၊
ခဏသန္ထဝဿ ပုရိသဿ၊ အဒါသိ ဖလကံ သကံ။
တံ တုယှံ မိတ္တဓမ္မဉ္စ၊ ဒါနဉ္စ ဖလကဿ တေ၊
ပတိဋ္ဌာသိ သမုဒ္ဒသ္မိံ၊ ဧဝံ ဇာနာဟိ မာရိသာတိ။
ဧဝဉ္စ ဝတွာ သာ တေ ဒိဗ္ဗာဟာရေန သန္တပ္ပေတွာ ဒိဗ္ဗဝတ္ထာလင်္ကာရေဟိ အလင်္ကရိတွာ အတ္တနော အာနုဘာဝေန သာဝတ္ထိနဂရေယေဝ တေ ပတိဋ္ဌာပေသိ။ တတော ပဋ္ဌာယ တမေဝ အာရမ္မဏံ ကတွာ တေ ဒါနံ ဒဒန္တာ သီလံ ရက္ခန္တာ ဥပေါသထကမ္မံ ကရောန္တာ အာယုပရိယောသာနေ သဂ္ဂပရာယဏာ အဟေသုံ။
ဧဝံ ပရိတ္တကုသလေနပိ သာဂရသ္မိံ၊
သတ္တာ လဘန္တိ သရဏံ ခလု ဒေဝတာဟိ၊
တုမှေပိ သပ္ပုရိသတံ န ဝိနာသယန္တာ၊
မာ ဘော ပမဇ္ဇထ သဒါ ကုသလပ္ပယောဂေတိ။
ဖလကခဏ္ဍဒိန္နဿ ဝတ္ထုံ ဆဋ္ဌမံ။
၁၇။ စောရသဟာယဿ ဝတ္ထုမှိ အယမာနုပုဗ္ဗီကထာ
အမှာကံ ¶ ဘဂဝတိ ပရိနိဗ္ဗုတေ ဇမ္ဗုဒီပေ ဒေဝဒဟနဂရေ ဧကော မနုဿော ဒုက္ခိတော တတ္ထ တတ္ထ ဝိစရန္တော ပစ္စန္တေ အညတရံ ဂါမံ ဂန္တွာ တတ္ထ ဧကသ္မိံ ကုလဂေဟေ နိဝါသံ ကပ္ပေသိ။ တတ္ထ မနုဿာ တဿ ယာဂုဘတ္တံ ဒတွာ ပေါသေသုံ၊ တတော သော တတ္ထ မနုဿေဟိ မိတ္တသန္ထဝံ ကတွာ ကတိပါဟံ တတ္ထ ဝသိတွာ အညဋ္ဌာနံ ဂန္တွာ အပရဘာဂေ စောရကမ္မံ ကရောန္တော ဇီဝိကံ ကပ္ပေတိ။ အထေကဒိဝသံ စောရေန္တံ တံ ရာဇပုရိသာ ဂဟေတွာ ရညော ဒဿေသုံ။ ရာဇာ တံ ဗန္ဓနာဂါရေ ကရောထာတိ အာဏာပေသိ၊ တေ တံ ဗန္ဓနာဂါရံ နေတွာ သင်္ခလိကာဟိ ဗန္ဓိတွာ အာရက္ခကာနံ ပဋိပါဒေတွာ အဂမံသု၊ ဗန္ဓနာဂါရေ ဝသန္တဿ တဿ ဒွါဒသသံဝစ္ဆရာနိ အတိက္ကန္တာနိ။ တတော အပရဘာဂေ တဿ ပုဗ္ဗသဟာယော ပစ္စန္တဂါမဝါသီ မနုဿော ကေနစိ ကမ္မေန ဒေဝဒဟ မာဂတော တတ္ထ တတ္ထ အာဟိဏ္ဍန္တော ဗန္ဓနာဂါရေ ဗဒ္ဓံ တံ အဒ္ဒသ။ ဒိသွာ တဿ ဟဒယံ ကမ္ပိ၊ သော ရောဒိတွာ ပရိဒေဝိတွာ ကိံ တေ မယာ ကတ္တဗ္ဗံ သမ္မာတိ ပုစ္ဆိ။ တတော တေန သမ္မ ဗန္ဓနာဂါရေ ဝသန္တဿ မေ ဣဒါနိ ဒွါဒသသံဝစ္ဆရာနိ အတိက္ကန္တာနိ၊ ဧတ္တကံ ကာလံ ဒုဗ္ဘောဇနာဒိနာ မဟာဒုက္ခံ အနုဘောမိ။ ယာဝါဟံ အာဟာရံ ပရိယေသိတွာ ဘုဉ္ဇိတွာ အာဂမိဿာမိ။ တာဝ မံ ဣတော မုဉ္စနုပါယံ ဇာနာဟီတိ ဝုတ္တေ သော သပ္ပုရိသော။
ရူပေန ကိန္တု ဂုဏသီလဝိဝဇ္ဇိတေန၊
မိစ္ဆာလယဿ ကိတဝဿ ဓိယာ ကိမတ္ထံ၊
ဒါနာ ဒိစာဂဝိဂတေန ဓနေန ကိံ ဝါ၊
မိတ္တေန ကိံ ဗျသနကာလပရမ္မုခေနာတိ။
ဧဝဉ္စ ပန ဝတွာ သာဓု သမ္မ ကရောမိ တေ ဝစနန္တိ အာရက္ခကာနံ သန္တိကံ ဂန္တွာ ဘောန္တော ယာဝေသော ဘတ္တံ ဘုဉ္ဇိတွာ အာဂစ္ဆတိ။ တာဝါဟံ တဿ ပါဋိဘောဂေါ ဘဝိဿာမိ။ ဝိဿဇ္ဇေထ ¶ နန္တိ အာဟ၊ တေဟိ န သက္ကာ ဘော ဧတံ ဝိဿဇ္ဇေတုံ၊ အပိ စ ခေါ ယာဝါယံ အာဂစ္ဆတိ။ တာဝ တွံ အယသင်္ခလိကာယ ဗဒ္ဓါ နိသီဒိဿသိ၊ ဧဝံ တံ ဝိဿဇ္ဇေဿာမ၊ နော စေ န သက္ကာတိ အာဟံသု၊ သော ဧဝမ္ပိ ဟောတု သမ္မာတိ ဝတွာ တဿ ပါဒတော သင်္ခလိကံ မုဉ္စိတွာ အတ္တနော ပါဒေ ကတွာ ဗန္ဓနာဂါရံ ပဝိသိတွာ ဣတရံ မုဉ္စာပေသိ။ သောပိ အသပ္ပုရိသော ဗန္ဓနာ မုတ္တော န ပုန တံ ဌာန မဂမာသိ၊ အဟော အကတညုနော ပကတိံ ဉာတုံ ဘာရိယံ။ ယထာဟ။
ဝါရိပူရေ ယထာ သောဗ္ဘေ၊ နေဝန္တော ဝိသမံ သမံ၊
ပညာယတေဝံသာဓုဿ၊ ဘာဝံ မနသိ သမ္ဘဝံ။
ဘာသန္တိ မုခတော ဧကံ၊ စိန္တေန္တိ မနသာ ပရံ၊
ကာယေနေကံ ကရောန္တေဝံ၊ ပကတာယမသာဓုနံ။
တေသံ ယော ဘာဝမညာသိ၊ သောဝ ပဏ္ဍိတဇာတိကော၊
ဗဟုဿုတောပိ သောယေဝ၊ ပရစိတ္တဝိဒူပိ သော။
အထဿ ဗန္ဓနာဂါရေ ဝသန္တဿ ဒွါဒသသံဝစ္ဆရာနိ အတိက္ကန္တာနိ။ ဧတ္တကံ ကာလံ ဇိဃစ္ဆာပီဠိတေန တေန အာဟာရတ္တာယ ပရော န ယာစိတပုဗ္ဗော၊ အနုစ္ဆိဋ္ဌာဟာရံ လဘနဒိဝသတော အလဘနဒိဝသာယေဝ ဗဟုတရာ ဟောန္တိ၊ အထ ဒွါဒသသံဝစ္ဆရာတိက္ကမေ ရညော ပုတ္တော နိဗ္ဗတ္တိ။ တဒါ ရာဇာ အတ္တနော ဝိဇိတေ သဗ္ဗဗန္ဓနာဂါရာနိ ဝိဝရာပေသိ။ အန္တမသော မိဂပက္ခိနောပိ ဗန္ဓနာ မုဉ္စာပေသိ။ ဒွါရေ ဝိဝဋမတ္တေယေဝ ဗန္ဓနာဂါရေ မနုဿာ ဣစ္ဆိတိစ္ဆိတဋ္ဌာနံ အဂမံသု။ သော ပနေကောဝ တေဟိ သဒ္ဓိံ အဂန္တွာ ဩဟီယိ။ အာရက္ခကေဟိ တွံ ဘော ကသ္မာ န ဂစ္ဆသီတိ ဝုတ္တေ အဟံ ဘော ပညာတဘာဝေန ဣဒါနိ န ဂမိဿာမိ။ အတီဝ ပရိဟီနဂတ္တောသ္မိ။ အန္ဓကာရေ ဂမိဿာမီတိ ဝတွာ အန္ဓကာရေ အာဂတေ နိက္ခမ္မ အန္တောနဂရေ ဝိဿာသိကာနံ အဘာဝေန ကုတော အာဟာရံ လဘိဿာမီတိ စိန္တေန္တော နိက္ခမ္မ ရတ္တန္ဓကာရေ အာမကသုသာန ¶ မဂမာသိ။ ဧတ္ထာဟာရံ လဘိဿာမီတိ။ တတ္ထ သော အဓုနာ နိက္ခိတ္တမတမနုဿံ ဒိသွာ မနုဿဋ္ဌိနာ မံသံ ဆိန္ဒိတွာ သီသကပါလေ ပက္ခိပိတွာ တီဟိ မနုဿသီသေဟိ ကတဥဒ္ဓနေ ဌပေတွာ စိတကတော ဩမုက္ကအလာတေဟိ အဂ္ဂိံ ကတွာ သုသာနံ နိဗ္ဗာပနတ္ထာယာ ဘတဥဒကေန မနုဿဋ္ဌိနာ အာလောလေန္တော မံသံ ပစိတွာ ဩတာရေတွာ သာခါဘင်္ဂေန ဟိရိကောပီဏံ ပဋိစ္ဆာဒေတွာ နိဝတ္ထပိလောကိကံ ဝါတာဝရဏံ ကတွာနိသီဒိ။ တသ္မိံ ခဏေ တတ္ထ ပိပ္ပလီရုက္ခေ အဓိဝတ္ထာ ဒေဝတာ တဿ တံ ကိရိယံ ဒိသွာ ပုစ္ဆိဿာမိ တာဝ နန္တိ တံ ဥပသင်္ကမိတွာ ဧဝမာဟ။ ဘော တွံ ဃနတရတိမိရာကုလေ မဟာရတ္တိယံ တတ္ထ တတ္ထ ဝိကိဏ္ဏနရဋ္ဌိသမာကိဏ္ဏေ သောဏသိဂါလာဒိကုဏပါဒကာကုလေ မနုဿမံသဘက္ခယက္ခရက္ခသာကုလေ တတ္ထ တတ္ထ ပဇ္ဇလန္တာနေကစိတကဘယာနကေ သုသာနေ မနုဿမံသံ ပစိတွာ ကိံကရောသီတိ ပုစ္ဆန္တီ အာဟ။
ရတ္တန္ဓကာရေ ကုဏပါဒကေဟိ၊
သမာကုလေ သီဝထိကာယ မဇ္ဈေ၊
မနုဿမံသံ ပစသီ ဓ သီသေ၊
ဝဒေဟိ ကိံ တေန ပယောဇနံ တေတိ။
အထ သော အာဟ။
န ယာဂဟေတု န စ ဒါနဟေတု၊
သုသာနမဇ္ဈမှိ ပစာမိ မံသံ၊
ခုဒါသမံ နတ္ထိ နရဿ အညံ၊
ခုဒါဝိနာသာယ ပစာမိမမ္ဘောတိ။
တတော ဒေဝတာ တံ တထာ ဟောတု၊ ဣမိနာ ပိလောတိကေန ဝါတာဝရဏံ ကရောသိ။ ကိမတ္ထမေတန္တိ ပုစ္ဆန္တီ။
နိဝတ္ထသာခေါ ¶ ဟိရိသံဝရာယ၊
ပိလောတိကံ တတ္ထ ပသာရယန္တော၊
ကရောသိ ဝါတာဝရဏဉ္စ သမ္မ၊
ကိမတ္ထမေတံ ဝဒ ပုစ္ဆိတော မေတိ။
သော တဿာ စိက္ခန္တော အာဟ။
သုဘာ သုဘာမိဿိတသီတဝါတော၊
သယံ အစိတ္တောဝ အစိတ္တဘာဝါ၊
ဒေဟံ ဖုသိတွာန အသာဓုကဿ၊
အကတညုနော မိတ္တပဓံသကဿ။
သမာဝဟန္တော ယဒိ မေ သရီရေ၊
ဖုသာတိ [ဖုသာတိသာသင်္ဂတိမဇ္ဇဒါနိ ဣတိကတ္တစိ] တံ ဝါယု မမာ ဝိသိတွာ၊
ဒုက္ခံ ဒဒါတီတိ ဝိသံဝ တံ ဘော၊
ပရိဝဇ္ဇိတုံ ဗဒ္ဓမိမံ ကုစေလန္တိ။
ဒေဝတာ အာဟ။
ကိ မကာသိ ဘော သော ကတနာသကော တေ၊
ဓနဉ္စ ဓညံ တဝ နာသယီ စ၊
မာတာ ပိတာ ဗန္ဓဝေါ ခေတ္တ ဝတ္ထူ၊
ဝိနာသိတာ တေန ဝဒေဟိ ကိံ တေတိ။
တတော သော အာဟ။
ယံ ရာဇတော ဟောတိ ဘယံ မဟန္တံ၊
သဗ္ဗဿ ဟရဏာဒိဝဓာဒိကဉ္စ၊
အကတညုနာ သပ္ပုရိသေန ဟောတိ၊
အာရာဝ သော ဘော ပရိဝဇ္ဇနီယော။
ယမတ္ထိ ¶ စောရာရိဘယဉှိ လောကေ၊
အထော ဒကေနာပိ စ ပါဝကေန၊
အကတညုနာ တံ သကလမ္ပိ ဟောတိ၊
အာရာဝ သော ဘော ပရိဝဇ္ဇနီယော။
ပါဏာတိပါတမ္ပိ အဒိန္နဒါနံ၊
ပရဿ ဒါရူပဂမံ မုသာ စ၊
မဇ္ဇဿ ပါနံ ကလဟဉ္စ ပေသုနံ၊
သမ္ဖံ ဂိရံ ဓုတ္တဇနေဟိ [အက္ခဓုတ္တာဒိယောဂံ ဣတိကတ္ထစိ] ယောဂံ။
သဗ္ဗံ အနတ္ထံ အသိဝံ အနိဋ္ဌံ၊
အပါယိကံ [အပါယိကံ ဣတိကတ္ထစိ] ဒုက္ခမနန္တ မညံ၊
အကတညုနာ သပ္ပုရိသေန ဟောတိ၊
အာရာဝ သော ဘော ပရိဝဇ္ဇနီယောတိ။
ဝတွာ အတ္တနာ အသပ္ပုရိသသံသဂ္ဂေနာနုဘူတံ သဗ္ဗံ ဒုက္ခံ ကထေသိ၊ တတော ဒေဝတာ အဟမ္ပိ ဘော သတ္ထုနော မင်္ဂလသုတ္တဒေသနာဒိဝသေ ဣမသ္မိံယေဝ ရုက္ခေ နိသိန္နော။
အသေဝနာ စ ဗာလာနံ၊ ပဏ္ဍိတာနဉ္စ သေဝနာ၊
ပူဇာ စ ပူဇနီယျာနံ၊ ဧတံ မင်္ဂလ မုတ္တမန္တိ။
ဂါထာယ ဗာလဿ ဒေါသေ အဿောသိံတိ ဝတွာ တဿ ပသန္နော တံ အတ္တနော ဝိမာနံ နေတွာ နဟာပေတွာ ဒိဗ္ဗဝတ္ထာလင်္ကာရေဟိ အလင်္ကရိတွာ ဒိဗ္ဗန္နပါနံ ဒတွာ မဟန္တံ သက္ကာရသမ္မာနံ ကတွာ အတ္တနော အာနုဘာဝေန တသ္မိံ နဂရေ ရဇ္ဇေ အဘိသိဉ္စာပေသိ။ သော တတ္ထ ရဇ္ဇံ ကရောန္တော ဒါနာဒီနိ ပုညာနိ ကတွာ အာယုပရိယောသာနေ ယထာကမ္မံ ဂတောတိ။
ဧဝံ ¶ အသာဓုဇနသင်္ဂမသန္နိဝါသံ၊
သဉ္စဇ္ဇ သာဓုသုစိသဇ္ဇနသင်္ဂမေန၊
ဒါနာဒိ နေကကုသလံ ပရိပူရယန္တာ၊
သဂ္ဂါ ပဝဂ္ဂဝိဘဝံ အဘိသမ္ဘုနာထာတိ။
စောရသဟာယဿ ဝတ္ထုံ သတ္တမံ။
၁၈။ မရုတ္တဗြာဟ္မဏဿ ဝတ္ထုမှိ အယမာနုပုဗ္ဗီကထာ
ဇမ္ဗုဒီပေ စန္ဒဘာဂါ နာမ ဂင်္ဂါတီရေ ဟောမဂါမံ နာမ အတ္ထိ။ တသ္မိံ ဧကော မရုတ္တော နာမ ဗြာဟ္မဏော ပဋိဝသတိ။ တဒါ သော ဝေါဟာရတ္ထာယ တက္ကသီလံ ဂန္တွာ ဂေဟံ အာဂစ္ဆန္တော အန္တရာမဂ္ဂေ ဧကာယ သာလာယ ကုဋ္ဌရောဂါ တုရံ သုနခံ ဒိသွာ တသ္မိံ ကာရုညေန နီလဝလ္လိတက္ကမ္ဗိလေန မဒ္ဒိတွာ ပါယေသိ။ သုနခေါ ဝူပသန္တရောဂေါ ပါကတိကော ဟုတွာ ဗြာဟ္မဏေန အတ္တနော ကတူပကာရံ သလ္လက္ခေန္တော တေနေဝ သဒ္ဓိံ အဂမာသိ။ အပရဘာဂေ ဗြာဟ္မဏဿ ဘရိယာ ဂဗ္ဘံ ပဋိလဘိ၊ ပရိပုဏ္ဏဂဗ္ဘာယ တာယ ဝိဇာယနကာလေ ဒါရကော တိရိယမ္ပတိတွာ အန္တောဂဗ္ဘေယေဝ မတော။ တဒါ တံ သတ္ထေန ခဏ္ဍာခဏ္ဍိကံ ဆိန္ဒိတွာ နီဟရိံသု၊ အထ ဗြာဟ္မဏော တံ ဒိသွာ နိဗ္ဗိန္ဒဟဒယော ဃရာဝါသံ ပဟာယ ဣသိပဗ္ဗဇ္ဇံ ပဗ္ဗဇိတွာ အရညေ ဝိဟရတိ။ အထဿ ဘရိယာ အညေန သဒ္ဓိံ သံဝသန္တီ အယံ မံ ပဟာယ ပဗ္ဗဇိတောတိ ဗြာဟ္မဏေ ပဒုဋ္ဌစိတ္တာ ဘော ဗြာဟ္မဏံ မာရေဟီတိ သာမိကေန သဒ္ဓိံ မန္တေသိ။ တေသံ မန္တနံ သုနခေါ သုတွာ ဗြာဟ္မဏေနေဝ သဒ္ဓိံ စရတိ။ အထေကဒိဝသံ တဿာ သာမိကော တာ ပ သံ မာရေဿာမီတိ ဓနု ကလာပံ ဂဟေတွာ နိက္ခမိ၊ တဒါ တာပသော ဖလာဖလတ္ထာယ အရညံ ဂတော။ သု န ခေါ အဿမေယေဝ ဩ ဟီ ယိ။ ပုရိသော တာပသဿာဂမနမဂ္ဂံ ဩလောကေန္တော ဂစ္ဆန္တရေ ¶ နိလီနော အစ္ဆိ။ သုနခေါ တဿ ပမာဒံ ဩလောကေတွာ ဓနုနော ဂုဏံ ခါဒိတွာ ဆိန္ဒိ။ သော ပုန ဂုဏံ ပါကတိကံ ကတွာ အာရောပေသိ။ ဧဝံ သော အာရောပိတံ အာရောပိတံ ခါဒတေဝ၊ အထ သော ပါပပုရိသော တာပသဿာဂမနံ ဉတွာ တံ မာရေဿာမီတိ ဓနုနာ သဒ္ဓိံ အဂမာသိ။ အထဿ သုနခေါ ပါဒေ ဍသိတွာ ပါတေတွာ တဿ မုခံ ခါဒိတွာ ဒုဗ္ဗလံ ကတွာ ဘုင်္ကာရမကာသိ၊ ဧဝဉှိ သပ္ပုရိသာ အတ္တနော ဥပကာရကာနံ ပစ္စုပကာရံ ကရောန္တိ။ ဝုတ္တဉှိ။
ဥပကာရံ ကရောန္တော သော၊ သုနခေါ ကတဝေဒိကော၊
သတ္တူပဃာတကံ ကတွာ၊ ဣသိနော ဒါသိ ဇီဝိတံ။
တိရစ္ဆာနာပိ ဇာနန္တိ၊ ဂုဏမတ္တနိ ကတံ သဒါ၊
ဣတိ ဥတွာန မေဓာဝီ၊ ကတညူ ဟောန္တု ပါဏိနောတိ။
တတော တာပသော သုနခဿ သဒ္ဒေနာ ဂန္တွာ တဿ တံ ဝိပ္ပကာရံ ဒိသွာ ကာရုညေန ပဋိဇိဂ္ဂိတွာ ဝူပသန္တဝဏံ ဗလပ္ပတ္တံ ပေါသေတွာ တတ္ထေဝ ဝသန္တော ဈာနာဘိညံ နိဗ္ဗတ္တေတွာ အာယုပရိယောသာနေ ဗြာဟ္မလောကပရာယဏော အဟောသီတိ။
သုတွာန သာဓု သုနခေန ကတူပကာရံ၊
မေတ္တိံဒိသဿ ပကတံ ဣသိနာ စ သုတွာ၊
သမ္မာ ကရောထ ကရုဏဉ္စ ပရူပကာရံ၊
တံ သဗ္ဗဒါ ဘဝတိ ဝေါ ဘဝဘောဂဟေတူတိ။
မရုတ္တဗြာဟ္မဏဿ ဝတ္ထုံ အဋ္ဌမံ။
၁၉။ ပါနီယဒိန္နဿ ဝတ္ထုမှိ အယမာနုပုဗ္ဗီကထာ
ဇမ္ဗုဒီပေ ¶ အညတရသ္မိံ ဇနပဒေ ကိရေ ကော မနုဿော ရဋ္ဌတော ရဋ္ဌံ ဇနပဒတော ဇနပဒံ ဝိစရန္တော အနုက္ကမေန စန္ဒဘာဂါနဒီတီရံ ပတွာ နာဝံ အဘိရုဟိတွာ ပရတီရံ ဂစ္ဆတိ။ အထာပရာ ဂဗ္ဘိနိတ္ထီ တာယ ဧဝ နာဝါယ ဂစ္ဆတိ၊ အထ နာဝါ ဂင်္ဂါမဇ္ဈပ္ပတ္တကာလေ တဿာ ကမ္မဇဝါတာ စလိံသု။ တတော သာ ဝိဇာယိတုမသက္ကောန္တီ ကိလန္တာ ပါနီယံ မေ ဒေထ၊ ပိပါသိတာမှိတိ မနုဿေ ယာစိ။ တေ တဿာ ဝစနံ အသုဏန္တာ ဝိယ ပါနီယံ နာဒံသု၊ အထ သော ဇာနပဒိကော တဿာ ကရုဏာယန္တော [ကရုဏာယပါနီယံ၊ ကရုဏာယန္တောပါနီယံ၊ ကရုဏာယတောယံ ဣတိစကတ္ထစိ] တောယံ ဂဟေတွာ မုခေ အာသိဉ္စိ၊ တသ္မိံ ခဏေ သာ လဒ္ဓဿာသာ သုခေန ဒါရကံ ဝိဇာယိ၊ အထ တေ တီရံ ပတွာ ကတိပယဒိဝသေန အတ္တနော အတ္တနော ဌာနံ ပါပုဏိံသု။ အထာပရဘာဂေ သော ဇာနပဒိကော အညတရကိစ္စံ ပဋိစ္စ တဿာ ဣတ္ထိယာ ဝသနနဂရံ ပတွာ တတ္ထ တတ္ထ အာဟိဏ္ဍန္တော နိဝါသနဋ္ဌာနံ အလဘိတွာ နဂရဒွါရေ သာလံ ဂန္တွာ တတ္ထ နိပဇ္ဇိ။ တသ္မိံယေဝ ဒိဝသေ စောရာ နဂရံ ပဝိသိတွာ ရာဇဂေဟေ သန္ဓိံ ဆိန္ဒိတွာ ဓနသာရံ ဂဟေတွာ ဂစ္ဆန္တာ ရာဇပုရိသေဟိ အနုဗန္ဓာ ဂန္တွာ တာယေဝ သာလာယ ဆဍ္ဍေတွာ ပလာယိံသု။ အထ ရာဇပုရိသာ အာဂန္တွာ စောရေ အပဿန္တာ တံ ဇာနပဒိကံ ဒိသွာ အယံ စောရောတိ ဂဟေတွာ ပစ္ဆာဗာဟံ ဂါဠှံ ဗန္ဓိတွာ ပုန ဒိဝသေ ရညော ဒဿေသုံ။ ရညာ ကသ္မာ ဘဏေ စောရကမ္မ မကာသီတိ ပုစ္ဆိတော နာဟံ ဒေဝ စောရော၊ အာဂန္တုကောမှီတိ ဝုတ္တေ ရာဇာ စောရေ ပရိယေသိတွာ အလဘန္တော အယမေဝ စောရော၊ ဣမံ မာရေထာတိ အာဏာပေသိ။ ရာဇပုရိသေဟိ တံ ဂါဠှံ ဗန္ဓိတွာ အာဃာတနံ နီတေ သာ ဣတ္ထီ တံ တထာ နီယမာနံ ဒိသွာ သဉ္ဇာနိတွာ ကမ္ပမာနဟဒယာ မုဟုတ္တေန ရညော သန္တိကံ ဂန္တွာ ဝန္ဒိတွာ ဒေဝ ဧသော ¶ န စောရော အာဂန္တုကော မုဉ္စထေတံ ဒေဝါတိ အာဟ။ ရာဇာ တဿာ ကထံ အသဒ္ဒဟန္တော ယဇ္ဇေတံ မောစေတု မိစ္ဆသိ။ တဿဂ္ဃနကံ ဓနံ ဒတွာ မုဉ္စာပေဟီတိ၊ သာ သာမိ မမ ဂေဟေ ဓနံ နတ္ထိ။ အပိစ မမ သတ္တပုတ္တေဟိ သဒ္ဓိံ မံ ဒါသိံ ကရောဟိ၊ ဧတံ မုဉ္စ ဒေဝါတိ အာဟ၊ အထ ရာဇာ တွံ ဧတံ အဓုနာဂတောတိ ဝဒသိ။ ဧတံ နိဿာယ ပုတ္တေဟိ သဒ္ဓိံ အတ္တာနံ ဒါသတ္တံ သာဝေသိ။ ကိမေသော တေ ဉာတိ ဝါ၊ ဥဒါဟု ဥပကာရကောတိ ပုစ္ဆန္တော အာဟ။
ကိံတေ ဘောတိ အယံ ပေါသော၊ တုဝံ ပုစ္ဆာမိ သံသယံ၊
ဘာတာ ဝါ တေ ပိတာ ဟောတိ၊ ပတိ ဝါ ဒေဝရော တဝ။
ဉာတိ သာလောဟိတော ကိန္နု၊ ဥဒါဟု ဣဏဒါယကော၊
အထောပကာရကော ကိန္နု၊ ကသ္မာဿ ဒေသိ ဇီဝိတံတိ။
တတော သာ အာဟ။
ဧသော မေ ပုရိသော ဒေဝ၊ ကတပုဗ္ဗောပကာရကော၊
အတာဏမေကိကံ [အတ္တာနမေကိကံ ဣတိကတ္ထစိ] စေသော၊ ဒုက္ခိတံ မရဏေ ဌိတံ။
ဝိဇာယိတု မသက္ကောန္တိံ၊ ဂဗ္ဘိနိံ ဒုက္ခဝေဒိနိံ၊
တောယေန မံ ဥပဋ္ဌာသိ၊ တေနာဟံ သုခိတာ တဒါ။
ဘင်္ဂကလ္လောလမာလာယ၊ ဥတ္တရန္တံ မဟဏ္ဏဝံ၊
ပဟာယ ပါတုံ ကူပဿ၊ ယာတိ လောကော ပိပါသိတော။
တထေဝ ဝိဇ္ဇမာနေသု၊ ဇနေသု မနုဇာဓိပ၊
ဧကဿေဝ မနသ္မိံဟိ၊ ဂုဏံ တိဋ္ဌတိ သာဓုကံ။
ပဟတွာန မတံ ဟတ္ထိံ၊ မံသတ္ထီ ကေစိ ဇန္တုနော၊
အနုဗန္ဓန္တိ မံသတ္ထံ၊ သသံ ဓာဝန္တ မေကကံ။
တထေဝ ¶ ဝိဇ္ဇမာနေသု၊ ဇနေသု မနုဇာဓိပ၊
ဂုဏဝန္တ မနုဗန္ဓန္တိ၊ သပ္ပုရိသံ ကတဝေဒိကံ။
တသ္မာ သပ္ပုရိသေ ဓမ္မေ၊ ပတိဋ္ဌာသ္မိ နရာဓိပ၊
အနုဿရန္တိ ဧတေန၊ ကတပုဗ္ဗူ ပကာရကံ။
အဟဉ္စ မမ ပုတ္တာ စ၊ ဧတေနမှ သုခါပိတာ၊
ဇီဝိတမ္ပိ ပရိစ္စဇ္ဇ၊ မုစ္စနီယော အယံ မယာတိ။
တတော ရာဇာ ဒေါဝါရိကံ ပက္ကောသိတွာ တမ္ပိ ပုစ္ဆိတွာ အဓုနာဂတဘာဝံ ဉတွာ တဿာ သပ္ပုရိသဓမ္မေ သန္တုဋ္ဌော တေသံ ဥဘိန္နမ္ပိ မဟန္တံ ယသံ အနုပ္ပဒါသိ။ တေ လဒ္ဓယသာ တ တော ပဋ္ဌာယ ဒါနာဒီနိ ပုညကမ္မာနိ ကတွာ သဂ္ဂပရာယဏာ အဟေသုန္တိ။
ဓမ္မေ ပတိဋ္ဌိတမနာ အပိ မာတုဂါမာ၊
ဧဝံ လဘန္တိ ဝိဘဝဉ္စ ပသံသနဉ္စ၊
ဓမ္မဉ္စ သာဓုစရိတံ မနသီကရောန္တော၊
ဓမ္မေသု ဝတ္တထ သဒါ သုစိသဇ္ဇနာတိ။
ပါနီယဒိန္နဿ ဝတ္ထုံ နဝမံ။
၂၀။ သဟာယဿ ပရိစ္စတ္တဇီဝိတကဿ ဝတ္ထုမှိ အယမာနုပုဗ္ဗီကထာ
ဘဂဝတိ ပရိနိဗ္ဗုတေ သာဝတ္ထိယံ သောမဗြာဟ္မဏော သောမဒတ္တဗြာဟ္မဏောတိ ဒွေ ဗြာဟ္မဏာ ဝသန္တိ။ တတ္ထ သောမဒတ္တဗြာဟ္မဏေန သဒ္ဓိံ သောမဗြာဟ္မဏော ယေဘုယျေန ဒူတံ ကီဠတိ။ အထေကဒိဝသံ သောမဒတ္တော သောမဗြာဟ္မဏံ တေန ပရာဇေတွာ တဿ ဥတ္တရာသင်္ဂဉ္စ လဉ္ဆနမုဒ္ဒိကဉ္စ ဂဟေတွာ အတ္တနော ဂေဟံ ဂစ္ဆန္တော သောမဗြာဟ္မဏဿ ဧဟိ ဂေဟံ ဂစ္ဆာ- မာတိ ¶ အာဟ။ တတော သောမော နာဟံ သမ္မ ဧကသာဋကော ဟုတွာ အန္တရဝီထိံ ဩတရိတုံ သက္ကောမိ။ ဂမနတော ဧတ္ထေဝ မေ ဌာနံ ဝရတရန္တိ အာဟ၊ သောမဒတ္တေန ဧဝံ သတိ သမ္မ ဣမံ ဥတ္တရာသင်္ဂံ ဂဏှာတိ တဿ တံ ဒတွာ ဣဒါနိ သမ္မ ဧဟီတိ ဝုတ္တောပိ နာဂစ္ဆတိ။ ပုန တေန ဘော ကသ္မာ နာဂစ္ဆသီတိ ပုဋ္ဌော သမ္မ မမ ဟတ္ထေ မုဒ္ဒိကံ အပဿန္တာ မေ ပုတ္တဒါရာဒယော မယာ သဒ္ဓိံ ကလဟံ ကရောန္တီတိ အာဟ၊ အထ သော ဧဝံ သန္တေ ယဒါ တေ ပဟောတိ။ တဒါ မယှံ ဒေဟီတိ မုဒ္ဒိကမ္ပိ ဒတွာ တံ ဂဟေတွာ ဂေဟံ အဂမာသိ။ အထ တေ ဧတ္တကေန သဟာယာ အဟေသုံ။ အပရဘာဂေ သောမဒတ္တဗြာဟ္မဏံ အယံ ပရဒါရကမ္မံ အကာသီတိ မနုဿာ ဂဟေတွာ ရညော ဒဿေသုံ။ ရာဇာ တဿ ရူပသမ္ပတ္တိံ ဒိသွာ ရာဇာဏံ အကတွာ မာ ဘော ပုန ဧဝမကာသီတိ ဩဝဒိတွာ ဝိဿဇ္ဇေသိ။ ရာဇာ နံ ယာဝတတိယဝါရံ ဩဝဒန္တော ဝိဿဇ္ဇေတွာ စတုတ္ထေဝါရေ ဂစ္ဆထေတံ အာဃာတနံ နေတွာ မာရေထာတိ အာဏာပေသိ။ ဧဝံ ပါပကမ္မေ နိရတာ အနေကာကာရေန ဩဝဒန္တာပိ န သက္ကာ နိဝါရေတုံ။ တထာဟိ။
သောဏာ စေဝ သိဂါလာ စ၊ ဝါယသာ နီလမက္ခိကာ၊
ဣစ္စေတေ ကုဏပေ သတ္တာ၊ န သက္ကာ တေ နိသေဓိတုံ။
တထာ ပါဏာတိပါတေသု၊ ပရဒါရေ သုရာယ စ၊
မုသာဝါဒေသု ထေယျေသု၊ သတ္တသတ္တာ န ဝါရိယာတိ။
တတော ရာဇပုရိသာ တံ ဗန္ဓိတွာ ပက္ကမိံသု။ တဒါ သောမဗြာဟ္မဏော သောမဒတ္တံ တထာ နီယမာနံ ဒိသွာ ကမ္ပမာနဟဒယော ရာဇပုရိသာနံ သန္တိကံ ဂန္တွာ ဣမံ ဘော မုဟုတ္တံ မာ မာရေထ။ ယာဝ ရာဇာနံ ဇာနာပေဿာမီတိ ဝတွာ ရညော သန္တိကံ ဂန္တွာ ဝန္ဒိတွာ ဌိတော ဒေဝ မမ ဇီဝိတံ သောမဒတ္တဿ ဗြာဟ္မဏဿ ဒဿာမိ။ ဧတံ မုဉ္စထ။ ယဒိ မာရေတုကာမာ၊ မံ မာရေထာတိ အာဟ။ ရာဇာ တုဏှီ [တုဋ္ဌော ဣတိကတ္ထစိ] အဟောသိ၊ ရာဇပုရိသာ သောမဒတ္တံ မုဉ္စိတွာ ¶ သောမဗြာဟ္မဏံ အာဃာတနံ နေတွာ မာရေသုံ၊ အဟော ကတညုနော ကတဝေဒိတာ။
ဟောတိ စေတ္ထ။
ကကူပကာရ မတ္တာနံ၊ သရန္တာ ကေစိ မာနုသာ၊
ဇီဝိတံ ဒေန္တိ သောမောဝ၊ သောမဒတ္တဿ အတ္တနောတိ။
သော တေန ဇီဝိတဒါနေန ဒေဝလောကေ နိဗ္ဗတ္တိတွာ မဟန္တေ ကနကဝိမာနေ ဒေဝစ္ဆရာသဟဿပရိဝုတော ဒိဗ္ဗသမ္ပတ္တိမနုဘောန္တော ပဋိဝသတိ။ တဒါ သောမဒတ္တဗြာဟ္မဏော ဧသော မံ မရဏပ္ပတ္တံ မောစေသီတိ ဝတွာ တဿတ္ထာယ ဒါနံ ဒတွာ ပတ္တိံ အဒါသိ။ တာဝဒေဝဿ တတော ဗဟုတရံ ဒေဝိဿရိယံ အဟောသိ ဒေဝါနုဘာဝဉ္စ။ တတော သော သောမဒေဝေါ အတ္တနော ဒေဝိဿရိယံ ဩလောကေန္တော သဟာယဿ အတ္တနော ဇီဝိတဒါနံ အဒ္ဒသ။ ဒိသွာ အတ္တဘာဝံ ဝိဇဟိတွာ မာဏဝကဝဏ္ဏေန သောမဒတ္တဗြာဟ္မဏံ ဥပသင်္ကမိတွာ ပဋိသန္ထာရံ ကတွာ အတ္တာနံ ဒေဝလောကေ နိဗ္ဗတ္တဘာဝံ ပကာသေတွာ တံ ဂဟေတွာ အတ္တနော အာနုဘာဝေန ဒေဝလောကံ နေတွာ ယထာကာမံ သမ္ပတ္တိ မနုဘဝါတိ ဝတွာ သတ္တာဟံ ဒေဝဿရိယံ ဒတွာ သတ္တမေ ဒိဝသေ နေတွာ တဿ ဂေဟေယေဝ ပတိဋ္ဌာပေသိ။ တတ္ထ ဟိ ဒိဗ္ဗသမ္ပတ္တိ မနုဘူတဿ မနုဿသမ္ပတ္တိ ပဋိက္ကုလာ ဟောတိ။ တတော သော ဒိဗ္ဗသမ္ပတ္တိမနုဿရန္တော ကိသော ဒုဗ္ဗလော ဥပ္ပဏ္ဍုပ္ပဏ္ဍုကဇာတော အဟောသိ။ အထေကဒိဝသံ ဒေဝပုတ္တော တံ ဩလောကေန္တော တထာ ဒုက္ခပ္ပတ္တံ ဒိသွာ န သက္ကာ မနုဿေန ဒိဗ္ဗသမ္ပတ္တိမနုဘဝိတုန္တိ ဣစ္ဆိတိစ္ဆိတသမ္ပတ္တိဒါယကံ ဧကံ စိန္တာမဏိံ ဒတွာ တဿ ဘရိယမ္ပိ အတ္တနော အာနုဘာဝေန ရူပဝန္ထံ ယသဝန္တံ ဝဏ္ဏဝန္တံ အတိက္ကန္တမနုဿိတ္ထိဝဏ္ဏံ အကာသိ၊ အပရဘာဂေ တေ ဇယမ္ပတိကာ ပစ္စက္ခတော ဒိဋ္ဌဒိဗ္ဗသမ္ပတ္တိဝိဘဝါ ဒါနံ ဒတွာ သီလံ ရက္ခိတွာ သဟာယဒေဝပုတ္တဿ သန္တိကေယေဝ နိဗ္ဗတ္တိံသူတိ။
မန္ဒေန ¶ နန္ဒိတမနာ ဥပကာရကေန၊
ပါဏမ္ပိ ဒေန္တိ သုဇနာ ဣတိ စိန္တယိတွာ၊
မိတ္တဒ္ဒု မာ ဘဝထ ဘော ဥပကာရကဿ၊
ပါသံသိယာ ဘဝထ သာဓုဇနေဟိ နိစ္စံတိ။
သဟာယဿ ပရိစ္စတ္တဇီဝိတကဿ ဝတ္ထုံ ဒသမံ။
နန္ဒိယရာဇဝဂ္ဂေါ ဒုတိယော။