📜
ယက္ခဝဉ္စိတဝဂ္ဂေါ
၂၁။ ယက္ခဝဉ္စိတ ဝတ္ထုမှိ အယမာနုပုဗ္ဗီကထာ
ဘဂဝတိ ¶ ပရိနိဗ္ဗုတမှိ ကောသလရညော ကိရ ဇနပဒေ တုဏ္ဍဂါမောနာမ အဟောသိ။ တတ္ထေကော ဗုဒ္ဓဒါသော နာမ မနုဿော ‘‘ယာဝဇီဝံ ဗုဒ္ဓံ သရဏံ ဂစ္ဆာမိ။ ဗုဒ္ဓါ မေ သရဏံ တာဏံ လေဏံ ပရာယဏန္တိ’’ ဧဝံ ဇီဝိတပရိယန္တံ ဗုဒ္ဓံ သရဏံ ဂတော ပဋိဝသတိ၊ တသ္မိံ သမယေ ဧကော ဇနပဒဝါသိကော တတ္ထ တတ္ထ အာဟိဏ္ဍန္တော တံ တုဏ္ဍဂါမံ ပတွာ တဿေဝ ဃရေ နိဝါသံ ကပ္ပေသိ၊ တဿ ပန ဇာနပဒိကဿ သရီရေ ဧကော ယက္ခော အာဝိသိတွာ ပီဠေတိ၊ တဒါ တဿ ဂါမဿ ပဝိသနကာလေ ယက္ခော ဗုဒ္ဓဒါသော ပါသကဿ ဂုဏတေဇေန တဿ ဂေဟံ ပဝိသိတုံ အသက္ကောန္တော တံ မုဉ္စိတွာ ဗဟိဂါမေ သတ္တာဟံ အဋ္ဌာသိ တဿာဂမနံ ဩလောကေန္တော။ တတော သော ဇာနပဒိကော သတ္တဒိဝသံ တတ္ထ ဝသိတွာ သတ္တမေ ဒိဝသေ သကရဋ္ဌံ ဂန္တုကာမော ဂါမာ နိက္ခမိ။ အထ တံ တထာ နိက္ခန္တံ ဒိသွာ ယက္ခော အဂ္ဂဟေသိ၊ အထ သော တံ ဧတ္တကံ ကာလံ ကုဟိံဂတောသီတိ ပုစ္ဆိ။ ယက္ခော ဘော တဝတ္ထာယ ဧတ္ထ ဝသန္တဿ မေ သတ္တာဟံ အတိက္ကန္တန္တိ။ တတော သော ကော တေ မယာ အတ္ထော၊ ကိံ တေ ဒမ္မီတိ၊ အထ ယက္ခေန ဘော အဟံ ခုဒါယ ပီဠိတော ဘတ္တေန မေ အတ္ထောတိ ဝုတ္တော သော ဧဝံ သတိ ကသ္မာ မံ အန္တောဂေဟေ ဝသန္တံ န ဂဏှီတိ အာဟ။ ယက္ခေန ဘော တသ္မိံ ဃရေ ဗုဒ္ဓံ သရဏံ ဂတော ဧကော ဥပသကော အတ္ထိ၊ တဿ သီလတေဇေန ဂေဟံ ပဝိသိတုမသက္ကောန္တော အဋ္ဌာသိန္တိ ဝုတ္တော ဇာနပဒိကော သရဏံ နာမ ကိန္တိ အဇာနန္တော ကိန္တိ ဝတွာ သော သရဏံ အဂ္ဂဟေသီတိ ယက္ခံ ပုစ္ဆိ။ ယက္ခော ‘‘ဗုဒ္ဓံ သရဏံ ဂစ္ဆာမီ’’တိ ဝတွာ သရဏံ အဂ္ဂဟေသီတိ အာဟ။ တံ သုတွာ ဇာနပဒိကော ဣဒါနိ ဣမံ ဝဉ္စေဿာမီတိ စိန္တေတွာ တေနဟိ ယက္ခ အဟမ္ပိ ဗုဒ္ဓံ သရဏံ ဂစ္ဆာမီတိ အာဟ။ ဧဝံ ဝုတ္တမတ္တေယေဝ ယက္ခော မဟာသဒ္ဒံ ကရောန္တော ဘ ယေ န ဘမန္တော ¶ ပလာယိ၊ ဧဝံ သမ္မာသမ္ဗုဒ္ဓဿ သရဏံ ဣဓလောကေ ဘယော ပဒ္ဒဝ နိဝါရဏတ္ထံ ဟောတိ၊ ပရလောကေ သဂ္ဂမောက္ခာဝဟံ။ တထာဟိ။
ဗုဒ္ဓါတိ ဝစနံ ဧတံ၊ အမနုဿာနံ ဘယာဝဟံ၊
ဗုဒ္ဓဘတ္တိကဇန္တူနံ၊ သဗ္ဗဒါ မုဒမာဝဟံ။
သဗ္ဗောပဒ္ဒဝနာသာယ၊ ပစ္စက္ခဒိဗ္ဗမောသဓံ၊
ဒိဗ္ဗမန္တံ မဟာတေဇံ၊ မဟာယန္တံ မဟဗ္ဘုတံ။
တသ္မာ သော ဒါရုဏော ယက္ခော၊
ဒိသွာ တံ သရဏေ ဌိထံ၊
ဥဗ္ဗိဂ္ဂေါ စ ဘယပ္ပတ္တော၊
လောမဟဋ္ဌော စ ဆမ္ဘီတော။
ဘမန္တော ဓာဝိတံ ဒိသွာ၊ တိမိရောဝ သုရိယုဂ္ဂတေ၊
သိမ္ဗလိတူလဘဋ္ဌံဝ၊ စဏ္ဍဝါတေန ခဏ္ဍိတံ။
ယံ ဒုက္ခံ ရာဇစောရာရိ၊ ယက္ခပေတာ ဒိသမ္ဘဝံ၊
နိစ္ဆန္တေန မနုဿေန၊ ဂန္တဗ္ဗံ သရဏတ္တယံတိ။
တတော ဇာနပဒိကော သရဏာဂမနေ မဟာဂုဏံ မဟာနိသံသံ ဩလောကေတွာ ဗုဒ္ဓေ သဂါရဝေါ သပ္ပေမော ‘‘ဇီဝိတပရိယန္တံ ဗုဒ္ဓံ သရဏံ ဂစ္ဆာမီ’’တိ သရဏံ ဂန္တွာ တေနေဝ သရဏာဂမနာနုဘာဝေန ဇီဝိတပရိယောသာနေ သုတ္တပ္ပဗုဒ္ဓါဝိယ ဒေဝလောကေ နိဗ္ဗတ္တီတိ။
ဒိသွာန ဧဝံ သရဏံ ဂတံ တံ၊
အပေန္တိ ယက္ခာပိ မဟဗ္ဘယေန၊
ပါလေထ သီလံ သရဏဉ္စ တသ္မာ၊
ဇဟာထ ဒုရိတံ သုဂတိံ ဘဇဝှောတိ။
ယက္ခဝဉ္စိတဝတ္ထုံ ပထမံ။
၂၂။ မိစ္ဆဒိဋ္ဌိကဿ ဝတ္ထုမှိ အယမာနုပုဗ္ဗီကထာ
ဘဂဝတိ ¶ ဓရမာနေ ရာဇဂဟနဂရေ ကိရ ဧကော ဗြဟ္မဘတ္တိကော မိစ္ဆာဒိဋ္ဌိကော ပဋိဝသတိ၊ တတ္ထေဝ သမ္မာဒိဋ္ဌိကောပိ။ တေသံ ဥဘိန္နမ္ပိ ဒွေ ပုတ္တာ အဟေသုံ။ တေ ဧကတော ကီဠန္တာ ဝဍ္ဎန္တိ။ အထာပရဘာဂေ ဂုဠကီဠံကီဠန္တာနံ သမ္မာဒိဋ္ဌိကဿ ပုတ္တော ‘‘နမော ဗုဒ္ဓယာ’’တိ ဝတွာ ဂုဠှံ ခိပန္တော ဒိဝသေ ဒိဝသေ ဇိနာတိ။ မိစ္ဆာဒိဋ္ဌိကဿ ပုတ္တော ‘‘နမော ဗြဟ္မုနော’’တိ ဝတွာ ခိပန္တော ပရာဇေတိ၊ တတော မိစ္ဆာဒိဋ္ဌိကဿ ပုတ္တော နိစ္စံ ဇိနန္တံ သမ္မာဒိဋ္ဌိကံ ကုမာရံ ဒိသွာ သမ္မ တွံ နိစ္စမေဝ ဇိနာသိ၊ ကိံ ဝတွာ ဂုဠံ ခိပသီတိ ပုစ္ဆိ။ သောဟံ သမ္မ ‘‘နမော ဗုဒ္ဓါယာ’’တိ ဝတွာ ခိပါမီတိ အာဟ။ သောပိ တတော ပဋ္ဌာယ ‘‘နမော ဗုဒ္ဓါယာ’’တိ ဝတွာ ခိပတိ၊ အထ တေ ယေဘုယျေန ဒူတေ သမသမာဝ ဟောန္တိ။ အပရဘာဂေ မိစ္ဆာဒိဋ္ဌိကဿ ပုတ္တော ပိတရာ သဒ္ဓိံ ဒါရူနမတ္ထာယ ဝနံ ဂန္တွာ သကဋေန ဒါရုံ ဂဟေတွာ အာဂစ္ဆန္တော နဂရဒွါရသမီပေ သကဋံ ဝိဿဇ္ဇေတွာ တိဏေ ခါဒနတ္ထာယ ဂေါဏေ ဝိဿဇ္ဇေသိ၊ ဂေါဏာ တိဏံ ခါဒန္တော အညေဟိ ဂေါရူပေဟိ သဒ္ဓိံ အန္တောနဂရံ ပဝိသိံသု။ အထဿ ပိတာ ဂေါဏေ ပရိယေသန္တော သကဋံ ဩလောကေဟီတိ ပုတ္တံ နိဝတ္တေတွာ နဂရံ ပဝိဋ္ဌော အဟောသိ၊ အထ သာယဏှေ ဇာတေ မနုဿာ နဂရဒွါရံ ပိဒဟိံသု၊ တတော ကုမာရော ဗဟိနဂရေ ဒါရုသကဋဿ ဟေဋ္ဌာ သယန္တော နိဒ္ဒူပဂတော အဟောသိ။ အထ တဿာ ရတ္တိယာ သမ္မာဒိဋ္ဌိကော စ မိစ္ဆာဒိဋ္ဌိကော စာတိ ဒွေ ယက္ခာ ဂေါစရံ ပရိယေသမာနာ သကဋဿ ဟေဋ္ဌာ နိပန္နံ ကုမာရံ အဒ္ဒသံသု၊ တေသု မိစ္ဆာဒိဋ္ဌိကော ဣမံ ခါဒါမီတိ အာဟ။ အထာပရော မာ ဧဝ မကာသိ၊ ‘‘နမော ဗုဒ္ဓါယာ’’တိ ဝါစကော ဧသောတိ၊ ခါဒါမေဝေတန္တိ ဝတွာ ဣတရေန ယာဝတတိယံ ဝါရိယမာနောပိ ဂန္တွာ တဿ ပါဒေ ဂဟေတွာ အာကဍ္ဎိ။ တသ္မိံ ခဏေ ဒါရကော ပုဗ္ဗပရိစယေန ‘‘နမော ဗုဒ္ဓါယာ’’တိ အာဟ တံ သုတွာ ယက္ခော ဘယပ္ပတ္တော လောမဟဋ္ဌော ¶ ဟတ္ထံ ဝိဿဇ္ဇေတွာ ပဋိက္ကမ္မ အဋ္ဌာသိ။ အဟော အစ္ဆရိယံ ဗုဒ္ဓါနုဘာဝံ အဗ္ဘုတံ၊ ဧဝံ အတ္တံ အနီယျာတေတွာ ပရိစယေန ‘‘နမော ဗုဒ္ဓါယာ’’တိ ဝုတ္တဿပိ ဘယံ ဆမ္ဘိတတ္တံ ဥပဒ္ဒဝံ ဝါ န ဟောတိ။ ပဂေဝ အတ္တံ နီယျာတေတွာ ယာဝဇီဝံ ဗုဒ္ဓံ သရဏံ ဂတဿာတိ။ ဝုတ္တဉှိ။
ယထာပိ သိခိနော နာဒံ၊ ဘုဇင်္ဂါနံ ဘယာဝဟံ၊
ဧဝံ ဗုဒ္ဓါတိ ဝစနံ၊ အမနုဿာနံ ဘယာဝဟံ။
ယထာ မန္တဿ ဇပ္ပေန၊ ဝိလယံ ယာတိ ကိဗ္ဗိသံ၊
ဧဝံ ဗုဒ္ဓါတိ ဝစနေန၊ အပယန္တိ [ပဟာယန္တိ ဣတိသဗ္ဗတ္ထ] ပိသာစကာ။
အဂ္ဂိံ ဒိသွာ ယထာ သိတ္ထံ၊ ဒူရတောဝ ဝိလီယတိ၊
ဒိသွာနေဝံ သရဏဂတံ၊ ပေတာ ပေန္တိဝ [ပေတာပေန္တာဝ ဣတိကတ္ထစိ] ဒူရတော။
ပဝရံ ဗုဒ္ဓဣစ္စေတ၊ မက္ခရဒွယမဗ္ဘုတံ၊
သဗ္ဗော ပဒ္ဒဝနာသာယ၊ ထိရပါကာရ မုဂ္ဂတံ။
သတ္တရတနပါသာဒံ၊ တမေဝ ဝဇိရံ ဂုဟံ၊
တမေဝ နာဝံ ဒီပံ တံ၊ တမေဝ ကဝစံ သုဘံ။
တမေဝ သိရသိ ဘာသန္တံ၊ ကိရီဋံ ရတနာမယံ၊
လလာဋေ တိလကံ ရမ္မံ၊ ကပ္ပူရံ နယနဒွယေ။
တာဍင်္ကံ ကဏ္ဏယုဂလေ၊ သောဏ္ဏမာလာ ဂလေ သုဘာ၊
ဧကာဝဠိ တာရဟာရ၊ ဘာရာ ဇတ္တုသု လင်္ကတာ။
အင်္ဂဒံ ဗာဟုမူလဿ၊ ကရဂ္ဂေ ဝလယံ တထာ၊
အင်္ဂုလိသွင်္ဂုလိယဉ္စ၊ ခဂ္ဂံ မင်္ဂလသမ္မတံ။
သောဏ္ဏာ တပတ္တ မုဏှီသံ၊ သဗာဏံဝ သရာသနံ၊
တမေဝ သဗ္ဗာလင်္ကာရံ၊ တမေဝ ဒုရိတာပဟံ။
တသ္မာ ¶ ဟိ ပဏ္ဍိတော ပေါသော၊
လောကလောစနသတ္ထုနော၊
သရဏံ တဿ ဂန္တေဝ၊
ဂုဏနာမံ ဧဟိပဿိကံ။
နမောတိ ဝစနံ ပုဗ္ဗံ၊ ဗုဒ္ဓါယေတိ ဂိရံ တဒါ၊
သုပန္တေန ကုမာရေန၊ မိစ္ဆာဒိဋ္ဌိကသူနုနာ။
သုတွာ ဝုတ္တံ ပိသာ စာပိ၊ မနုဿကုဏပေ ရတာ၊
န ဟိံသန္တိ အဟော ဗုဒ္ဓ၊ ဂုဏသာရမဟန္တတာတိ။
အထ သမ္မာဒိဋ္ဌိကယက္ခော မိစ္ဆာဒိဋ္ဌိကဿ ယက္ခဿ ဧဝမာဟ၊ အယုတ္တံ ဘော တယာ ကတံ။ ဗုဒ္ဓဂုဏေ ပဟာရော ဒိန္နော၊ ဒဏ္ဍကမ္မံ တယာ ကာတဗ္ဗံတိ၊ တေန ကိံမယာ သမ္မ ကာတဗ္ဗန္တိ ဝုတ္တေ ဗုဘုက္ခိတဿ အာဟာရံ ဒေဟီတိ အာဟ။ တတော သော သာဓူတိ ဝတွာ ယာဝါဟံ အာဂစ္ဆာမိ၊ တွံ တာဝေတ္ထ ဝစ္ဆာဟီတိ ဝတွာ ဗိမ္ဗိသာရရညော ကဉ္စနတဋ္ဋကေ ဝဍ္ဎိတံ ရသဘောဇနံ အာဟရိတွာ ကုမာရဿ ပိတုဝဏ္ဏေန ဒါရကံ ဘောဇေတွာ ပုန ကုမာရေန ဝုတ္တဗုဒ္ဓဝစနဉ္စ အတ္တနာ ကတဝါယာမံ စာတိ သဗ္ဗံ တဋ္ဋကေ လိခိတွာ ဣဒံ ရညောယေဝ ပညာယတူတိ အဓိဋ္ဌာယ အဂမံသု၊ အထ ပဘာတာယ ရတ္တိယာ ရညော ဘောဇနကာလေ ရာဇပုရိသာ တတ္ထ တဋ္ဋကံ အဒိသွာ နဂရံ ဥပပရိက္ခန္တာ သကဋေ ဒါရကဉ္စ တဋ္ဋကဉ္စ ဒိသွာ တဋ္ဋကေန သဒ္ဓိံ တံ ဂဟေတွာ ရညော ဒဿေသုံ။ ရာဇာ တဋ္ဋကေ အက္ခရာဒီနိ ဒိသွာ ဝါစေတွာ တဿ ဂုဏေ ပသန္နော မဟန္တေန ယသေန သဒ္ဓိံ သေဋ္ဌိဋ္ဌာနမဒါသိ။
ဇိနဿ နာမံ သုပိနေန ပေဝံ၊
န ဟောတိ ဘီတိံ လပနေန ယသ္မာ၊
တသ္မာ မုနိန္ဒံ သတတံ သရာထ၊
ဂုဏေ သရန္တာ သရဏဉ္စ ယာထာတိ။
မိစ္ဆာဒိဋ္ဌိကဿ ဝတ္ထုံ ဒုတိယံ။
၂၃။ ပါဒပီဌိကာယ ဝတ္ထုမှိ အယမာနုပုဗ္ဗီကထာ
ဇမ္ဗုဒီပေ ¶ မဟာဗောဓိတော ကိရ ဒက္ခိဏပဿေ ဧတံ ပစ္စန္တနဂရံ အဟောသိ။ တတ္ထ သဒ္ဓါသမ္ပန္နော ရတနတ္တယမာမကော ဧကော ဥပါသကော ပဋိဝသတိ။ တဒါ ဧကော ခီဏာသဝေါ ဘဂဝတာ ပရိဘုတ္တံ ပါဒပီဌံ ထဝိကာယ ပက္ခိပိတွာ ဂတဂတဋ္ဌာနေ ပူဇေန္တော အနုက္ကမေန တံ နဂရံ သမ္ပာပုဏိတွာ သုနိဝတ္ထော သုပါရုတော ပတ္တံ ဂဟေတွာ အန္တရဝီထိံ ပဋိပဇ္ဇိ ယုဂမတ္တဒသော ပဗ္ဗဇ္ဇာလီလာယ ဇနံ ပရိတောသေန္တော။ အထ သော ဥပါသကော တထာ ဂစ္ဆန္တံ ထေရံ ဒိသွာ ပသန္နမာနသော ဥပဂန္တွာ ပဉ္စပတိဋ္ဌိတေန ဝန္ဒိတွာ ပတ္တံ ဂဟေတွာ ဘောဇေတွာ နိဗဒ္ဓံ မမ ဂေဟံ အာဂမနမိစ္ဆာမိ၊ မမာနုကမ္ပာယ ဧတ္ထေဝ ဝသထ သာမီတိ ယာစိတွာ နဂရာသန္နေ ရမဏီယေ ဝနသဏ္ဍေ နဒီကူလေ ပဏ္ဏသာလံ ကတွာ ထေရဿ တံ နီယျာတေတွာ စတုပစ္စယေဟိ ပဋိဇဂ္ဂန္တော မာနေန္တော ပူဇေန္တော ဝသတိ။ ထေရောပိ တတ္ထ ဖာသုကဋ္ဌာနေ ဘဂဝတာ ပရိဘုတ္တပါဒပီဌဓာတုံ နိဓာယ ဝါလုကာဟိ ထူပံ ကတွာ နိစ္စံ ဂန္ဓဓူပဒီပပုပ္ဖပူဇာဒီဟိ ပူဇယမာနော ဝါသံ ကပ္ပေတိ။ တသ္မိံ သမယေ တဿော ပါသကဿ အနန္တရဂေဟဝါသိကော ဧကော ဣဿရဘတ္တိကော အတ္တနော ဒေဝတံ နိဗဒ္ဓံ နမဿတိ။ တံ ဒိသွာဿ ဥပါသကော ဗုဒ္ဓဂုဏေ ဝတွာ အခေတ္တေ သမ္မ မာ ဝိရိယံ ကရောဟိ။ ပဇဟေတံ ဒိဋ္ဌိံတိ အာဟ။ တတော သော ကေရာဋိကော ဣဿရဘတ္တိကော ကော တေ သတ္ထု ဂုဏာနုဘာဝေါ၊ အမှာကံ ဣဿရဿ ဂုဏောဝ မဟန္တောတိ ဝတွာ တဿ အဂုဏံ ဂုဏန္တိ ကထေန္တော အာဟ။
တိပုရံ သော ဝိနာသေသိ၊ လလာဋနယနဂ္ဂိနာ၊
အသုရေစ ဝိနာသေသိ၊ တိသူလေန မဟိဿရော။
ဇဋာကလာပမာဝတ္တံ၊ နစ္စတီ ဒိနသန္ဓိယံ၊
ဝါဒေတိ ဘေရိဝီဏာဒိံ၊ ဂီတံစာပိ သ ဂါယတိ။
ဘရိယာယော ¶ တဿ တိဿော၊ ဇဋာယေကံ သမုဗ္ဗဟေ၊
ဧကမေကေန ပဿေန၊ ပဿမာနော စရေကကံ။
ဟတ္ထိစမ္မမ္ဗရဓရော၊ တေနေဝ ဝါရိတာ တပေါ၊
အသာဒိသေဟိ ပုတ္တေဟိ၊ ရူပေန စ သုပါကဋော။
ရတိယာ စ မဓုပါနေ စ၊ ဗျာဝဋော သဗ္ဗဒါ စ သော၊
မနုဿဋ္ဌိဓရော သီသ၊ ကပါလေနေသ ဘုဉ္ဇကိ။
န ဇာတော န ဘယံ တဿ၊ မရဏံ နတ္ထိ သဿတော၊
ဤဒိသော မေ မဟာဒေဝေါ၊ နတ္ထညဿီဒိသော ဂုဏောတိ။
တံ သုတွာ ဥပါသကော သမ္မ တုယှံ ဣဿရဿ ဧတေ ဂုဏာ နာမ တာဝ ဟောန္တု။ အဂုဏာ နာမ ကိတ္တကာ ဟောန္တီတိ ဝတွာ ဘဂဝတော သကလဂုဏေ သံဟရိတွာ ကထေန္တော အာဟ။
လောကေ သဗ္ဗသဝန္တီနံ၊ အာဓာရော သာဂရော ယထာ၊
သဗ္ဗေသံ ဂုဏရာသီနံ၊ အာဓာရောဝ တထာဂတော။
စရာစရာနံ သဗ္ဗေသံ၊ အာဓာရာဝ ဓရာ အယံ၊
တထာ ဂုဏာနံ သဗ္ဗေသံ၊ အာဓာရောဝ တထာဂတော။
ဧဝံ သန္တော ဝိယတ္တောစ [ဝိယန္တော ဣတိကတ္ထစိ]၊ ဧဝံ သော ကရုဏာပရော၊
ဧဝ မိဒ္ဓိဝိဓာ တဿ၊ ဧဝမေဝံ ဂုဏာ ဣတိ။
ဗုဒ္ဓါပိ သက္ကောတိ န ယဿ ဝဏ္ဏေ၊
ကပ္ပမ္ပိ ဝတွာ ခယတံ ဂမေတုံ၊
ပဂေဝ စ ဗြဟ္မသုရာ သုရေဟိ၊
ဝတ္တုံ န ဟာနန္တဂုဏဿ ဝဏ္ဏန္တိ။
ဧဝံ ဝဒန္တာ ပန တေ ဥဘောပိ အမှာကံ ဒေဝေါ ဥတ္တမော အမှာကံ ဒေဝေါ ဥတ္တမောတိ ကလဟံ ဝဍ္ဎေတွာ ရညော သန္တိကမဂမံသု၊ ရာဇာ ¶ တေသံ ကထံ သုတွာ တေနဟိ တုမှာကံ ဒေဝတာနံ မဟန္တဘာဝံ ဣဒ္ဓိပါဋိဟာရိယေန ဇာနိဿာမ။ ဒဿေထ တေဟိ နော ဣဒ္ဓိံတိ နဂရေ ဘေရိံ စရာပေသိ။ ဣတော ကိရ သတ္တာဟစ္စယေန ဣမေသံ ဒွိန္နံ သတ္ထာရာနံ ပါဋိဟာရိယာနိ ဘဝိဿန္တိ။ သဗ္ဗေ သန္နိပတန္တူတိ တံ သုတွာ နာနာဒိသာသု ဗဟူ မနုဿာ သမာဂမိံသု၊ အထ မိစ္ဆာဒိဋ္ဌိကာ အဇ္ဇ အမှာကံ ဒေဝဿ အာနုဘာဝံ ပဿာမာတိ မဟန္တံ ပူဇံ ကရောန္တော တတ္ထ သာရံ နာဒ္ဒသံသု၊ သမ္မာဒိဋ္ဌိကာပိ အဇ္ဇ အမှာကံ ဘဂဝတော အာနုဘာဝံ ပဿိဿာမာတိ ဝါဠုကာထူပံ ဂန္တွာ ဂန္ဓမာလာဒီဟိ ပူဇေတွာ ပဒက္ခိဏံ ကတွာ အဉ္ဇလိမ္ပဂ္ဂယှ အဋ္ဌံသု။ အထ ရာဇာပိ ဗလဝါဟနပရိဝုတော ဧကမန္တေ အဋ္ဌာသိ။ နာနာသမယဝါဒိနောပိ အဇ္ဇ တေသံ ပါဋိဟာရိယံ ပဿိဿာမာတိ မဉ္စာတိမဉ္စံ ကတွာ အဋ္ဌံသု။ တေသံ သမာဂမေ သမ္မာဒိဋ္ဌိကာ ဝါဠုကာထူပ မဘိမုခံ ကတွာ အဉ္ဇလိမ္ပဂ္ဂယှ သာမိ အမှာကံ ဘဂဝါ သဗ္ဗဗုဒ္ဓကိစ္စာနိ နိဋ္ဌာပေတွာ အနုပါဒိသေသာယ နိဗ္ဗာဏဓာတုယာ ပရိနိဗ္ဗာယိ။ သာရိပုတ္တမဟာမောဂ္ဂလ္လာနာဒယော အသီတိမဟာသာဝကာပိ ပရိနိဗ္ဗာယိံသု၊ နတ္ထေတ္ထ အမှာကံ အညံ ပဋိသရဏန္တိ ဝတွာ သစ္စကိရိယံ ကရောန္တာ အာဟံသု။
အာပါဏကောဋိံ ဗုဒ္ဓဿ၊ သရဏံ နော ဂတာ ယဒိ၊
တေန သစ္စေန ယံ ဓာတု၊ ဒဿေတု ပါဋိဟာရိယံ။
အာပါဏကောဋိံ ဓမ္မဿ၊ သရဏံ နော ဂတာ ယဒိ၊
တေန သစ္စေန ယံ ဓာတု၊ ဒဿေတု ပါဋိဟာရိယံ။
အာပါဏကောဋိံ သင်္ဃဿ၊ သရဏံ နော ဂတာ ယဒိ၊
တေန သစ္စေန ယံ ဓာတု၊ ဒဿေတု ပါဋိဟာရိယံ။
ရာမကာလေ မုနိန္ဒဿ၊ ပါဒုကာ စာသိ အဗ္ဘုတာ၊
တေန သစ္စေန ယံ ဓာတု၊ ဒဿေတု ပါဋိဟာရိယံ။
ဆဒ္ဒန္တကာလေ ¶ မုနိနော၊ ဒါဌာ ဆရံသိရဉ္ဇိတာ၊
တေန သစ္စေနယံ ဓာတု၊ နိစ္ဆာရေတု ဆ ရံသိယော။
ဇာတမတ္တော တဒါ ဗုဒ္ဓါ၊ ဌိတော ပင်္ကဇမုဒ္ဓနိ၊
နိစ္ဆာရေသာသဘိံဝါစံ၊ အဂ္ဂေါ သေဋ္ဌောတိအာဒိနာ၊
တေန သစ္စေနယံ ဓာတု၊ ဒဿေတု ပါဋိဟာရိယံ။
နိမိတ္တေ စတုရော ဒိသွာ၊ နိက္ခန္တော အဘိနိက္ခမံ၊
တေန သစ္စေန ယံ ဓာတု၊ ဒဿေတု ပါဋိဟာရိယံ။
မာရသေနံ ပလာပေတွာ၊ နိသိန္နော ဗုဇ္ဈိ ဗောဓိယံ၊
တေန သစ္စေန ယံ ဓာတု ဒဿေတု ပါဋိဟာရိယံ။
ဓမ္မစက္ကံ ပဝတ္တေသိ၊ ဇိနော သိပတနေ တဒါ၊
တေန သစ္စေန ယံ ဓာတု၊ ဒဿေတု ပါဋိဟာရိယံ။
နန္ဒောပနန္ဒဘောဂိန္ဒံ၊ နာဂံ နာလာဂိရိဝှယံ၊
အာဠဝကာ ဒယော ယက္ခေ၊ ဗြဟ္မာနော စ ဗကာ ဒယော။
သစ္စကာဒိနိဂဏ္ဌေစ၊ ကူဋဒန္တာ ဒယော ဒွိဇေ၊
ဒမေသိ တေန သစ္စေန၊ ဒဿေတု ပါဋိဟာရိယံတိ။
ဧဝဉ္စ ပန ဝတွာ ဥပါသကာ အမှာကံ အနုကမ္မံ ပဋိစ္စ မဟာဇနဿ မိစ္ဆာဒိဋ္ဌိဘေဒနတ္တံ ပါဋိဟာရိယံ ဒဿေထ သာမီတိ အာရာဓေသုံ။ အထ ဗုဒ္ဓါနုဘာဝဉ္စ ထေရာနုဘာဝဉ္စ ဥပါသကာနံ သစ္စကိရိယာနုဘာဝဉ္စ ပဋိစ္စ ဝါဠုကာထူပံ ဒွိဓာ ဘိန္ဒိတွာ ပါဒပီဌဓာတု အာကာသ မဗ္ဘုဂ္ဂန္တွာ ဆဗ္ဗဏ္ဏရံသိယော ဝိဿဇ္ဇေန္တီ ဝိလာသမာနာ အဋ္ဌာသိ။ အထ မဟာဇနာ စေလုက္ခေပသဟဿာနိ ပဝတ္တေန္တာ သာဓုကီဠှံ ကီဠန္တာ မဟာနာဒံ ပဝတ္တေန္တာ မဟန္တံ ပူဇမကံသု။ မိစ္ဆာဒိဋ္ဌိကာပိ ဣမံ အစ္ဆရိယံ ဒိသွာ ဝိမှိတမာနသာ မိစ္ဆာဒိဋ္ဌိံ ဘိန္ဒိတွာ ရတနတ္တယပရာယဏာ သရဏ မဂမံသူတိ။
ဖုဋ္ဌောပိ ¶ ပါဒေန ဇိနဿ ဧဝံ၊
ကလိင်္ဂရော ပါ သိ မဟာနုဘာဝေါ၊
လောကေကနာထဿ အနာသဝဿ၊
မဟာနုဘာဝေါ ဟိ အစိန္တနီယောတိ။
ပါဒပီဌိကာယ ဝတ္ထုံ တတိယံ။
၂၄။ ဥတ္တရသာမဏေရဿ ဝတ္ထုမှိ အယမာနုပုဗ္ဗီကထာ
သော ကိရ ပုရိမဗုဒ္ဓေသု [ပုရိမဗုဒ္ဓေ ဣတိသဗ္ဗတ္ထ] ကတာဓိကာရော တတ္ထ တတ္ထ ဘဝေ ဝိဝဋ္ဋူပနိဿယံ ပုညံ ဥပစိနန္တော သုမေဓဿ ဘဂဝတော ကာလေ ဝိဇ္ဇာဓရော ဟုတွာ ဟိမဝတိ ပဋိဝသတိ။ တဒါ သုမေဓော နာမ သမ္မာသမ္ဗုဒ္ဓါ ဝိဝေက မနုဗြူဟန္တော ဟိမဝန္တံ ဂန္တွာ ရမဏီယေ ပဒေသေ ပလ္လင်္ကံ အာဘုဇိတွာ နိသီဒိ။ တဒါ ဝိဇ္ဇာဓရော အာကာသေန ဂစ္ဆန္တော ဆဗ္ဗဏ္ဏရံသီဟိ ဝိရာဇမာနံ ဘဂဝန္တံ ဒိသွာ တီဟိ ကဏိကာရပုပ္ဖေဟိ ပူဇေသိ၊ ပုပ္ဖာနိ ဗုဒ္ဓါနုဘာဝေန သတ္ထု ဥပရိ ဆတ္တာကာရေန အဋ္ဌံသု၊ သော တေန ဘီယျောသော မတ္တာယ ပသန္နစိတ္တော ဟုတွာ အပရဘာဂေ ကာလံကတွာ တာဝတိံသဘဝနေ နိဗ္ဗတ္တိတွာ ဥဠာရံ ဒိဗ္ဗသမ္ပတ္တိမနုဘဝန္တော ယာဝတာယုကံ တတ္ထ ဌတွာ တတော စုတော ဒေဝမနုဿေသု သံသရန္တော ဣမသ္မိံ ဗုဒ္ဓုပ္ပာဒေ ရာဇဂဟနဂရေ ဗြာဟ္မဏမဟာသာလဿ ပုတ္တော ဟုတွာ နိဗ္ဗတ္တိ။ ဥတ္တရောတိဿ နာမံ အဟောသိ။ သော ဥတ္တမရူပဓရော ဝိညုတံ ပတ္တော ဗြာဟ္မဏဝိဇ္ဇာသု နိပ္ဖတ္တိံ ပတွာ ဇာတိယာ ရူပေန ဝိဇ္ဇာယ သီလာစာရေန စ လောကဿ မဟနီယော ဇာတော၊ တဿ တံ ပညာသမ္ပတ္တိံဒိသွာ ဝဿကာရော မဂဓမဟာမတ္တော အတ္တနော ဓီတရံ ဒါတုကာမော ဟုတွာ အတ္တနော အဓိပ္ပာယံ ပဝေဒေသိ။ သော နိဿရဏဇ္ဈာသယတာယ တံ ပဋိက္ခိပိတွာ ကာလေနကာလံ ဓမ္မသေနာပတိံ ပယိရုပါသန္တော တဿ ¶ သန္တိကေ ဓမ္မံ သုတွာ ပဋိလဒ္ဓသဒ္ဓါ ပဗ္ဗဇိတွာ ဝတ္တသမ္ပန္နော ဟုတွာ ထေရံ ဥပဋ္ဌဟတိ။ တေန စ သမယေန ထေရဿ အညတရော အာဗာဓော ဥပ္ပန္နော ဟောတိ၊ တဿ ဘေသဇ္ဇတ္ထာယ ဥတ္တရသာမဏေရော ပါတောဝ ပတ္တစီဝရ မာဒါယ ဝိဟာရတော နိက္ခမ္မ အန္တရာမဂ္ဂေ တဠာကဿ တီရေ ပတ္တံ ဌပေတွာ ဥဒကသမီပံ ဂန္တွာ မုခံ ဓောဝတိ၊ တဒါ အညတရော ဥမ္မဂ္ဂစောရော ကတကမ္မော အာရက္ခပုရိသေဟိ အနုဗဒ္ဓါ အဂ္ဂဒွါရေနေဝ နဂရတော နိက္ခမိတွာ ပလာယန္တော အတ္တနာ ဂဟိတံ ရတနဘဏ္ဍိကံ သာမဏေရဿ ပတ္တေ ပက္ခိပိတွာ ပလာယိ။ သော သာမဏေရောပိ ပတ္တသမီပံ [သတ္တုသမီပံ ဣတိပိ ကတ္ထစိ] ဥပဂတော ဟောတိ၊ စောရံ အနုဗန္ဓန္တာ ရာဇပုရိသာ သာမဏေရဿ ပတ္တေ ဘဏ္ဍိကံ ဒိသွာ အယံ စောရော၊ ဣမိနာ စောရိယံ ကတန္တိ သာမဏေရံ ပစ္ဆာဗာဟံ ဗန္ဓိတွာ ဝဿကာရဿ ဗြာဟ္မဏဿ ဒဿေသုံ။ ဝဿကာရော စ တဒါ ရညော ဝိနိစ္ဆယေ နိယုတ္တော ဟုတွာ ဆေဇ္ဇဘေဇ္ဇံ အနုသာသတိ။ သော ဧသော ပုဗ္ဗေ မမ ဝစနံ နာဒိယိ။ သုဒ္ဓပါသဏ္ဍိယေသု ပဗ္ဗဇီတိ စ ဗဒ္ဓါဃာတတ္တာ တံ ကမ္မံ အသောဓေတွာဝ ဇီဝန္တမေဝေတံ သူလေ ဥတ္တာသေထာတိ အာဏာ ပေသိ၊ ရာဇပုရိသာ တံ နိမ္ဗသူလေ ဥတ္တာသေသုံ။ သာမဏေရော သူလဂ္ဂေ နိသိန္နော ဥပဇ္ဈာယဿ မေ ကော ဘေသဇ္ဇံ အာဟရိဿတီတိ သာရိပုတ္တတ္ထေရံ သရိ။ တတော ထေရော တံ ပဝတ္တိံ ဉတွာ သမ္မာသမ္ဗုဒ္ဓဿ ကထေသိ၊ ဘဂဝါပိ မဟာသာဝကပရိဝုတော တဿ ဉာဏပရိပါကံ ဩလောကေတွာ တံ ဌာနမဂမာသိ။ တတော ဘဂဝတော နိက္ခန္တဘာဝါ သကလနဂရေ ကောလာဟလံ အဟောသိ၊ မဟာဇနကာယော သန္နိပတိ။ အထ ဘဂဝါ ဝိပ္ဖုရန္တဟတ္ထတလေ နခမဏိမယူခသမ္ဘိန္နပီတာဘာသတာယ ပဂ္ဃရန္တဇာတိဟိင်္ဂုလကသုဝဏ္ဏရသဓာရာဝိယ ဇာလာဝဂုဏ္ဌိတမုဒုတလုနင်္ဂုလံ ဟတ္ထံ ဥတ္တရဿ သီသေ ဌပေတွာ ဥတ္တရ ဣဒံ တေ ပုဗ္ဗေ ကတပါပကမ္မဿ ဖလံ ဥပ္ပန္နံ၊ တတ္ထ တယာ ပစ္စဝေက္ခဏဗလေန အဓိဝါသနာ ကာတဗ္ဗာတိ အာဟ။ တေနေဝ အာဟ။
အတီတေ ¶ ကိရ ဧကသ္မိံ၊ ဂါမေ တွ မသိ ဒါရကော၊
ဒါရေကေဟိ သမာဂမ္မ၊ ကီဠန္တော ကေဠိမဏ္ဍလေ။
ဂဟေတွာ သုခုမံ သူကံ၊ တဒါ တွံ နိမ္ဗဇလ္လိယာ၊
ဥတ္တာသေသိ တတ္ထ သူလေ၊ ဇီဝမာနကမက္ခိကံ။
အပရမ္ပိ တေ ပါပကမ္မံ၊ ပဝက္ခာမိ သုဏောဟိ မေ၊
ဩဝဒန္တိံ ဟိတေန တွံ၊ အတီတေ သကမာတရံ။
ဇီဝသူလေ နိသီဒါတိ၊ ကောပေနာဘိသပီ တုဝံ၊
ဣမေဟိ ဒွီဟိ ပါပေဟိ၊ သရံ သံသာရသာဂရေ။
ပဉ္စဇာတိသတေ အစ္ဆိ၊ ဇီဝသူလမှိ နိမ္ဗဇေ၊
အယံ တေ စရိမာ ဇာတိ၊ ဧတ္ထာပိစ ဝိပစ္စိ သောတိ။
ဧဝမာဒိနာ နယေန တဿ အဇ္ဈာသယာနုရူပေန ဓမ္မံ ဒေသေသိ၊ ဥတ္တရော အမတာဘိသေကသဒိသေန သတ္ထုနော ဟတ္ထသမ္ဖဿသဉ္ဇာတပသာဒသောမနဿတာယ ဥဠာရံ ပီတိပါမောဇ္ဇံ ပဋိလဘိတွာ ယထာပရိစိတံ ဝိပဿနာမဂ္ဂံ သမာရူဠှော ဉာဏဿ ပရိပါကံ ဂတတ္တာ သတ္ထု ဒေသနာဝိလာသေန မဂ္ဂပဋိပါဋိယာ သဗ္ဗကိလေသေ ခေပေတွာ ဆဠဘိညော အဟောသိ။ ဓမ္မံ သုတွာ တတ္ထ သမာဂတာနံ ဒေဝမနုဿာနံ စတုရာသီတိပါဏသဟဿာနံ ဓမ္မာဘိသမယော အဟောသီတိ ဝဒန္တိ။ ဥတ္တရော ပန ဆဠဘိညော ဟုတွာ သူလတော ဥဋ္ဌဟိတွာ အာကာသေ ဌတွာ ပါဋိဟာရိယံ ဒဿေသိ။ မဟာဇနာ အစ္ဆရိယဗ္ဘုတစိတ္တာ ဇာတာ အဟေသုံ။ တာဝဒေဝဿ ဝဏောရုန္ဓိ၊ သော ဘိက္ခူဟိ အာဝုသော တာဒိသံ ဒုက္ခံ အနုဘဝန္တော ကထံ တွံ ဝိပဿနံ အနုယုဉ္ဇိတုံ သက္ခီတိ ပုဋ္ဌော ပဂေဝ မေ အာဝုသော သံသာရေ အာဒီနဝေါ သင်္ခါရာနဉ္စ သဘာဝေါ သုဒိဋ္ဌော။ တသ္မာဟံ တာဒိသံ ဒုက္ခံ အနုဘဝန္တောပိ အသက္ခိံ ဝိပဿနံ ဝဍ္ဎေတွာ ဝိသေသံ အဓိဂန္တုံတိ အာဟ။ အထာပရဘာဂေ သော ဘိက္ခုသင်္ဃမဇ္ဈေ အတ္တနော ပုဗ္ဗစရိတာ ပဒါနံ ပကာသေန္တော ဣမာ ဂါထာ အဘာသိ။
သုမေဓော ¶ နာမ သမ္ဗုဒ္ဓါ၊ ဒွတ္တိံသဝရလက္ခဏော၊
ဝိဝေကကာမော သမ္ဗုဒ္ဓါ၊ ဟိမဝန္တ မုပါဂမိ။
အဇ္ဈောဂဟေတွာ ဟိမဝန္တံ၊ အဂ္ဂေါ ကာရုဏိကော မုနိ၊
ပလ္လင်္ကံ အာဘုဇိတွာန၊ နိသီဒိ ပုရိသုတ္တမော။
ဝိဇ္ဇာဓရော တဒါ အာသိံ၊ အန္တလိက္ခစရော အဟံ၊
တိသူလံ သုကတံ ဂယှ၊ ဂစ္ဆာမိ အမ္ဗရေ တဒါ။
ပဗ္ဗတဂ္ဂေ ယထာ အဂ္ဂိ၊ ပုဏ္ဏမာသေဝ စန္ဒိမာ၊
ဝနံ ဩဘာသတေ ဗုဒ္ဓါ၊ သာလရာဇာဝ ဖုလ္လိတော။
ဝနဂ္ဂါ နိက္ခမိတွာန၊ ဗုဒ္ဓရံသီ ဝိဓာဝရေ၊
နလဂ္ဂိဝဏ္ဏသင်္ကာသာ၊ ဒိသွာ စိတ္တံ ပသာဒယိံ။
ဝိစိနံ အဒ္ဒသံ ပုပ္ဖံ၊ ကဏိကာရံ ဒေဝဂန္ဓိကံ၊
တီဏိ ပုပ္ဖာနိ အာဒါယ၊ ဗုဒ္ဓသေဋ္ဌံ အပူဇယိံ။
ဗုဒ္ဓဿ အာနုဘာဝေန၊ တီဏိ ပုပ္ဖာနိ မေ တဒါ၊
ဥဒ္ဓဝဏ္ဋာ အဓောပတ္တာ၊ ဆာယံ ကုဗ္ဗန္တိ သတ္ထုနော။
တေန ကမ္မေန သုကတေန၊ စေတနာပဏိဓီဟိစ၊
ဇဟိတွာ မာနုသံ ဒေဟံ၊ တာဝတိံသမဂဉ္ဆဟံ။
တတ္ထ မေ သုကတံ ဗျမှံ၊ ကဏိကာရီတိ ဉာယတိ၊
သဋ္ဌိယောဇန မုဗ္ဗေဓံ၊ တိံသယောဇနဝိတ္ထတံ။
သဟဿခဏ္ဍံ သတဘေဏ္ဍု၊ ဓဇာလု ဟရိတာမယံ၊
သတသဟဿာနိ ဗျူဟာနိ၊ ဗျမှေ ပါတုရဟံသု မေ။
သောဏ္ဏမယာ မဏိမယာ၊ လောဟိတင်္ကမယာ ပိစ၊
ဖလိကာ ပိစ ပလ္လင်္ကာ၊ ယဒိစ္ဆက ယဒိစ္ဆကာ။
မဟာရဟဉ္စ သယနံ၊ တူလိကံ ဝိကတီယကံ၊
ဥဒ္ဒလောမိကဧကန္တံ၊ ဗိမ္ဗောဟနသမာယုတံ။
ဘဝနာ ¶ နိက္ခမိတွာန၊ စရန္တော ဒေဝစာရိကံ၊
ယဒါ ဣစ္ဆာမိ ဂမနံ၊ ဒေဝသံဃပုရက္ခတော။
ပုပ္ဖဿ ဟေဋ္ဌာ တိဋ္ဌာမိ၊ ဥပရိစ္ဆဒနံ မမ၊
သမန္တာ ယောဇနသတံ၊ ကဏိကာရေဟိ ဆာဒိတံ။
သဋ္ဌိတုရိယသဟဿာနိ၊ သာယံ ပါတံ ဥပဋ္ဌဟုံ၊
ပရိဝါရေန္တိ မံ နိစ္စံ၊ ရတ္တိန္ဒိဝမတန္ဒိတာ။
တတ္ထ နစ္စေဟိ ဂီတေဟိ၊ တာလေဟိ ဝါဒိတေဟိ စ၊
ရမာမိ ခိဍ္ဍာရတိယာ၊ မောဒါမိ ကာမကာမဟံ။
တတ္ထ ဘုတွာ စ ပိတွာ စ၊ မောဒါမိ တိဒသေ တဒါ၊
နာရီဂဏေဟိ သဟိတော၊ မောဒါမိ ဗျမှမုတ္တမေ။
သတာနံ ပဉ္စက္ခတ္တုဉ္စ၊ ဒေဝရဇ္ဇ မကာရယိံ၊
သတာနံ တီဏိက္ခတ္တုံစ၊ စက္ကဝတ္တီ အဟောသဟံ၊
ပဒေသရဇ္ဇံ ဝိပုလံ၊ ဂဏနာတော အသံခိယံ။
ဘဝါဘဝေ သံသရန္တော၊ မဟာဘောဂံ လဘာမဟံ၊
ဘောဂေ မေ ဦနတာ နတ္ထိ၊ ဗုဒ္ဓပူဇာယိ ဒံ ဖလံ။
ဒွေ မေ ဘဝေ သံသရာမိ၊ ဒေဝတ္တေ အထ မာနုသေ၊
အညံ ဂတိံ န ဇာနာမိ၊ ဗုဒ္ဓပူဇာယိဒံ ဖလံ။
ဒွေ မေ ကုလေ ပဇာနာမိ၊ ခတ္တိယေ စာပိ ဗြာဟ္မဏေ၊
နီစေ ကုလေ န ဇာနာမိ၊ ဗုဒ္ဓပူဇာယိဒံ ဖလံ။
ဟတ္ထိယာနံ အဿယာနံ၊ သိဝိကံ သန္ဒမာနိကံ၊
လဘာမိ သဗ္ဗမေဝေ တံ၊ ဗုဒ္ဓပူဇာယိဒံ ဖလံ။
ဒါသီဂဏံ ဒါသဂဏံ၊ နာရိယော စ အလင်္ကတာ၊
လဘာမိ သဗ္ဗ မေဝေ တံ၊ ဗုဒ္ဓပူဇာယိဒံ ဖလံ။
ကောသေယျကမ္ဗလိယာနိ၊ ခေါမကပ္ပာသိကာနိစ၊
လဘာမိ သဗ္ဗမေဝေတံ၊ ဗုဒ္ဓပူဇာယိဒံ ဖလံ။
နဝဝတ္ထံ ¶ နဝဖလံ၊ နဝဂ္ဂရသဘောဇနံ၊
လဘာမိ သဗ္ဗမေဝေတံ၊ ဗုဒ္ဓပူဇာယိဒံ ဖလံ။
ဣမံ ခါဒ ဣမံ ဘုဉ္ဇ၊ ဣမမှိ သယနေ သယ၊
လဘာမိ သဗ္ဗမေဝေတံ၊ ဗုဒ္ဓပူဇာယိဒံ ဖလံ။
သဗ္ဗတ္ထ ပူဇိတော ဟောမိ၊ ယသော အစ္စုဂ္ဂတော မမ၊
မဟေသက္ခော ဃဒါ ဟောမိ၊ အဘေဇ္ဇပရိသော သဒါ၊
ဉာတီနံ ဥတ္တမော ဟောမိ၊ ဗုဒ္ဓပူဇာယိဒံ ဖလံ။
သီတံ ဥဏှံ န ဇာနာမိ၊ ပရိဠာဟော န ဝိဇ္ဇတိ၊
အထော စေတသိကံ ဒုက္ခံ၊ ဟဒယေ မေ န ဝိဇ္ဇတိ။
သုဝဏ္ဏဝဏ္ဏော ဟုတွာန၊ သံသရာမိ ဘဝါဘဝေ၊
ဝေဝဏ္ဏိယံ န ဇာနာမိ၊ ဗုဒ္ဓပူဇာယိဒံ ဖလံ။
ဒေဝလောကာ စဝိတွာန၊ သုက္ကမူလေန စောဒိတော၊
သာဝတ္ထိယံ ပုရေ ဇာတော၊ မဟာသာလေ သုအဍ္ဎကေ။
ပဉ္စကာမဂုဏေ ဟိတွာ၊ ပဗ္ဗဇိံအနဂါရိယံ၊
ဇာတိယာ သတ္တဝဿောဟံ၊ အရဟတ္တမပါပုဏိံ။
ဥပသမ္ပာဒယီ ဗုဒ္ဓါ၊ ဂုဏမညာယ စက္ခုမာ၊
တရုဏောဝ ပူဇနီယော ဟံ၊ ဗုဒ္ဓပူဇာယိဒံ ဖလံ။
ဒိဗ္ဗစက္ခုံ ဝိသုဒ္ဓံ မေ၊ သမာဓိကုသလော အဟံ၊
အဘိညာပါရမိပ္ပတ္တော၊ ဗုဒ္ဓပူဇာယိဒံ ဖလံ။
ပဋိသမ္ဘိဒါ အနုပ္ပတ္တော၊ ဣဒ္ဓိပါဒေသု ကောဝိဒေါ၊
သဒ္ဓမ္မေ ပါရမိပ္ပတ္တော၊ ဗုဒ္ဓပူဇာယိဒံ ဖလံ။
တိံသကပ္ပသဟဿမှိ၊ ယံ ဗုဒ္ဓမဘိပူဇယိံ၊
ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ။
ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ၊
နာဂေါဝ ဗန္ဓနံ ဆေတွာ၊ ဝိဟရာမိ အနာသဝေါ။
သွာဂတံ ¶ ဝတ မေ အာသိ၊ ဗုဒ္ဓသေဋ္ဌဿ သန္တိကံ၊
တိဿော ဝိဇ္ဇာ အနုပ္ပတ္တော၊ ကတံ ဗုဒ္ဓဿ သာသနံ။
ပဋိသမ္ဘိဒါ စတဿော စ၊ ဝိမေက္ခာ ပိစ အဋ္ဌိမေ၊
ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံတိ၊
တံ သုတွာ ဗဟူ ကုသလကမ္မပရာယဏာ အဟေသုံ။
သဟေတုကာ ပစ္ဆိမိကာပိ သတ္တာ၊
ပါပံ န သက္ကောန္တိ ဇဟာတုမေဝံ၊
အနိစ္ဆမာနေဟိ ဇနေဟိ ဒုက္ခံ၊
အာရာဝ ပါပံ ပရိဝဇ္ဇနီယံတိ။
ဥတ္တရသာမဏေရဿ ဝတ္ထုံ စတုတ္ထံ။
၂၅။ ကဝီရပဋ္ဋန ဝတ္ထုမှိ အယမာနုပုဗ္ဗီကထာ
ဇမ္ဗုဒီပေ ကိရ စောဠရဋ္ဌေ ကာဝီရပဋ္ဋနံ နာမ အဟောသိ။ တတ္ထ မာဟိဿရိကာ ဗဟူ မိစ္ဆာဒိဋ္ဌိကာ ဝသန္တိ။ တတ္ထေကသ္မိံ ဒေဝါလယေ စိတ္တကမ္မံ ကရောန္တာ ဧကသ္မိံ ဖလကေ ဣဿရဿ ဩနမိတွာ ဝန္ဒနာကာရံ ဘဂဝတော ရူပံ အကံသု။ တသ္မိံ သမယေ တတ္ထ ဗဟူ ဥပါသကာ တံ ဒေဝကုလံ ဂန္တွာ တတ္ထ တတ္ထ စိတ္တကမ္မာနိ ဩလောကေန္တာ တသ္မိံ ဖလကေ တံ စိတ္တကမ္မံ အဒ္ဒသံသု။ ဒိသွာန တေ အဟော အမှေဟိ အပဿိတဗ္ဗံ ပဿိတံ။ သဒေဝကေ လောကေ သမာရကေ သဗြဟ္မကေ သဿမဏဗြာဟ္မဏိယာသဒေဝမနုဿာယ ပဇာယ စ အပရိမာဏေသု စက္ကဝါဠေသု ဘဂဝတော ဥတ္တရိတရံ ဌပေတွာ သမသမောပိ နတ္ထိ။ သကလေဟိ သတ္တနိကာယေဟိ ဝန္ဒနီယော ပူဇနီယော ဘဂဝါ။ အနနုရူပံ တဿ ဧတေဟိ ကတံတိ ရောဒန္တာ ပရိဒေဝန္တာ ရာဇဒွါရံ ဂန္တွာ ဥဂ္ဃောသေသုံ၊ တံ သုတွာ ရာဇာ တေ ပက္ကောသာပေတွာ ကသ္မာ တုမှေ ¶ ဥဂ္ဃောသေထာတိ ပုစ္ဆိ၊ တေ ဧဝ မာဟံသု။ ဒေဝ အမှာကံ ဘဂဝါ ဒေဝါတိဒေဝေါ သက္ကာတိသက္ကော ဗြဟ္မာတိဗြဟ္မာ မေရုဝ အစလော သာဂရော ဂမ္ဘီရော အာကာသောဝ အနန္တော ပထဝီဝ ပတ္ထဋောတိအာဒီဟိ ဘဂဝတော ဂုဏံ ဝဏ္ဏေသုံ။ တေန ဝုတ္တံ အပဒါနေ။
ဗတ္တိံသလက္ခဏဓရော၊ သုနက္ခတ္တောဝ စန္ဒိမာ၊
အနုဗျဉ္ဇနသမ္ပန္နော၊ သာလရာဇာဝ ဖုလ္လိတော။
ရံသိဇာလပရိက္ခိတ္တော၊ ဒိတ္တောဝ ကနကာစလော၊
ဗျာမပ္ပဘာပရိဝုတော၊ သတရံသိ ဒိဝါကရော။
သောဏ္ဏာ နနော ဇိနဝရော၊ သမဏီဝ သိလုစ္စယော၊
ကရုဏာပုဏ္ဏဟဒယော၊ ဝိဝဋ္ဋော ဝိယ သာဂရော။
လောကဝိဿုတကိတ္တီဝ၊ သိနေရုဝ နဂုတ္တမော၊
ယသသာ ဝိတတော ဓီရော၊ အာကာသသဒိသော မုနိ။
အသင်္ဂစိတ္တော သဗ္ဗတ္ထ၊ အနိလော ဝိယ နာယကော၊
ပတိဋ္ဌာ သဗ္ဗဘူတာနံ၊ မဟီဝ မုနိသုတ္တမော။
အနူပလိတ္တော လောကေန၊ တောယေန ပဒုမံ ယထာ၊
ကုဝါဒဂစ္ဆဒဟနော၊ အဂ္ဂိက္ခန္ဓောဝ သောဘတိ။
အဂဒေါ ဝိယ သဗ္ဗတ္ထ၊ ကိလေသဝိသနာသကော၊
ဂန္ဓမာဒနသေလောဝ၊ ဂုဏဂန္ဓဝိဘူသိတော။
ဂုဏာနံ အာကရော ဓီရော၊ ရတနာနံဝ သာဂရော၊
သိန္ဓူဝ ဝနရာဇီနံ၊ ကိလေသမလဟာရကော။
ဝိဇယီဝ မဟာယောဓော၊ မာရသေနပ္ပမဒ္ဒနော၊
စက္ကဝတ္တီဝ သော ရာဇာ၊ ဗောဇ္ဈင်္ဂရတနိဿရော။
မဟာဘိသက္ကသင်္ကာသော၊ ဒေါသဗျာဓိတိကိစ္ဆကော၊
သလ္လကတ္တော ယထာ ဝေဇ္ဇာ၊ ဒိဋ္ဌိဂဏ္ဍဝိဖာလကော။
သတ္ထာ ¶ နော ဘဂဝါ ဒေဝ၊ မဟာဗြဟ္မေဟိ ဝန္ဒိတော၊
ဒေဝိန္ဒသုရသိဒ္ဓေဟိ၊ ဝန္ဒနီယော သဒါ ဒရာ။
သဗ္ဗေသု စက္ကဝါဠေသု၊ ယေ အဂ္ဂါ ယေ စ ပူဇိတာ၊
တေသမဂ္ဂေါ မဟာရာဇ၊ ဘဂဝါ နော ပတာပဝါတိ။
အယုတ္တံ ဒေဝ ဒေဝကုလေဟိ ကတံတိ အာဟံသု။ တံ သုတွာ ရာဇာ ဘော သဗ္ဗေပိ မနုဿာ အတ္တနော အတ္တနော ဒေဝတာနံ မဟန္တဘာဝံ ကထေန္တိ။ တုမှာကံ ပန သတ္ထုနော မဟန္တဘာဝံ ကထံ အမှာကံ ဇာနာပေထာတိ၊ ဥပါသကာ န ဂရု တွံ မဟာရာဇ ဖလကံ အာဟရာပေတွာ သုဒ္ဓဝတ္ထေန ဝေဌေတွာ တံ အတ္တနော မုဒ္ဒိကာယ လဉ္ဆိတွာ သုရက္ခိတသုဂေါပိတေ ဧကသ္မိံ ဒေဝကုလေ ဌပေတွာ သတ္တာဟစ္စယေန အာဟရာပေတွာ တံ ဩလောကေထ၊ တဒါ နော သတ္ထုနော မဟန္တာနုဘာဝံ ဇာနာထာတိ အာဟံသု၊ အထ ရာဇာ တေသံ ဝုတ္တနိယာမေနေဝ ကာရာပေတွာ အန္တောဒေဝကုလေ ဌပေတွာ သဗ္ဗဒွါရာနိ ပိဒဟိတွာ လဉ္ဆေတွာ ရက္ခေယျာထာတိ နိယောဇေသိ။ တတော တေ ဥပါသကာ သဗ္ဗေ သန္နိပတိတွာ သတ္တာဟံ ဒါနံ ဒေန္တာ သီလံ ရက္ခန္တာ ဥပေါသထကမ္မံ ကရောန္တာ သဗ္ဗသတ္တေသု မေတ္တိံ ဘာဝေန္တာ သဗ္ဗသတ္တာနံ အတ္တနာ ကတပုညေသု ပတ္တိံ ဒေန္တာ တိဏ္ဏံ ရတနာနံ ပူဇံ ကရောန္တာ ဧဝံ ဥဂ္ဃောသေသုံ။ အမှာကံ ကတကုသလနိဿန္ဒေန လောကေ မဟိဒ္ဓိကာ မဟာနုဘာဝါ သဗ္ဗေ ဒေဝါ စ လောကံ ပါလေန္တာ စတ္တာရော မဟာရာဇာနော စ အမှာကံ သတ္ထုနော ဥပဋ္ဌာနာယ [ဥပဋ္ဌာယ ဣတိသဗ္ဗတ္ထ] ဌိတဘာဝံ ဒဿေန္တူတိ သစ္စကိရိယံ အကံသု။ အထ တေသံ ပုညာနုဘာဝေန တသ္မိံ ခဏေ သက္ကဿ ဒေဝရညော ပဏ္ဍုကမ္ဗလသိလာသနံ ဥဏှာကာရံ ဒဿေသိ။ တတော သော မနုဿလောကံ ဩလောကေန္တော မိစ္ဆာဒိဋ္ဌီဟိ ကတံ တံ ဝိပ္ပကာရံ ဒိသွာ သံဝိဂ္ဂေါ အာဂန္တွာ ဣဿရံ ဘဂဝတော ပါဒေ ဝန္ဒိတွာ သယိတာကာရံ ¶ ကတွာ တံ ပဝတ္တိံ ဥပါသကာနံ ကထေတွာ သကဋ္ဌာနမေဝ အဂမာသိ။ တတော သတ္တမေ ဒိဝသေပါတောဝ တေ သဗ္ဗေပိ ရညော သန္တိကံ ဂန္တွာ ဝန္ဒိတွာ ဧဝမာဟံသု။ ဒေဝ ဣဿရော အမှာကံ ဘဂဝတော ပါဒေ သိရသာ ဝန္ဒိတွာ နိပန္နောတိ။ အထ ရာဇာ တေသံ ကထံ သုတွာ နဂရေ ဘေရိံ စရာပေတွာ မဟာဇနေ သန္နိပါတေတွာ တေဟိ ပရိဝုတော ဒေဝကုလံ ဂန္တွာ လဉ္ဆံ ဘိန္ဒာပေတွာ ဒွါရံ ဝိဝရိတွာ ဖလကံ အာဟရာပေတွာ ဝေဌိတသာဋကေ မောစာပေသိ။ အထ ရာဇာ စ မဟာဇနော စ တံ မဟန္တံ ပါဋိဟာရိယံ ဒိသွာ မိစ္ဆာဒိဋ္ဌိံ ပဟာယ သဗ္ဗေ သတ္ထုနော သရဏ မဂမံသု။ အထ ရာဇာ တံ ဒေဝကုလံ ဘိန္ဒာပေတွာ မဟန္တံ ရမဏီယံ ဝိဟာရံ ကာရာပေတွာ ယာဝဇီဝံ ပုညကမ္မံ ကတွာ ဒေဝလောကေ နိဗ္ဗတ္တိ။
အနဗ္ဘုတံ သတ္ထု ဓရီယမာနေ၊
ကရောန္တိ ဒိသွာ ကုသလာနိ ဣဒ္ဓိံ၊
ယေ တံ မုနိန္ဒေ ပရိနိဗ္ဗုတမှိ၊
ကရောန္တိ ပုညာနိ မဟဗ္ဘူတံ ယေတိ။
ကာဝီရပဋ္ဋနဝတ္ထုံ ပဉ္စမံ။
၂၆။ စောရဃာတကဝတ္ထုမှိ အယမာနုပုဗ္ဗီကထာ
ဧကသ္မိံ ကိရ သမယေ အမှာကံ ဘဂဝါ သာဝတ္ထိယံ ဥပနိဿာယ ဇေတဝနေ ဝိဟရတိ ဓမ္မဒေသနာယ မဟာဇနဿ သဂ္ဂမောက္ခသမ္ပဒံ ဒဒမာနော။ တသ္မိံသမယေ ပဉ္စသတာ စောရာ အဋဝိတော နဂရံ အာဂန္တွာ ရတ္တိဘာဂေ စောရကမ္မံ ကတွာ တေန ပုတ္တဒါရေ ပေါသေန္တိ။ အထေကဒိဝသံ စောရာ စောရကမ္မတ္ထာယ နဂရံ ပဝိသန္တာ နဂရဒွါရေ ဧကံ ဒုက္ခိတံ ဇနပဒမနုဿံ ပဿိတွာ ဟမ္ဘော ¶ ကတ္ထ ဝသတီတိ ပုစ္ဆိံသု၊ သော အတ္တဇနာ ဇနပဒဝါသိဘာဝံ ပကာသေသိ။ အထဿ တေ ကသ္မာ ဘော ဣမိနာ ဒုက္ခဝါသေန ဝသိဿသိ၊ ဧဟိ အမှေဟိ သဒ္ဓိံ စောရကမ္မံ ကရောန္တော ဝတ္ထာလင်္ကာရသမ္ပန္နော ပုတ္တဒါရံ ပေါသေဟိ။ ဣမိနာ ကပဏဝါသေန န ဝသာတိ အာဟံသု။ သော ပနိမေ ယုတ္တံ ကထေန္တီတိ တေသံ ဝစနံ သမ္ပဋိစ္ဆိ။ အထ တေ ဧဝံ သတိ အမှေဟိ သဒ္ဓိံ အာဂစ္ဆာဟီတိ ဝတွာ နံ ဂဟေတွာ အန္တောနဂရံ ပဝိဋ္ဌာ တတ္ထ တတ္ထ ဝိလုမ္ပန္တာ စောရကမ္မံ အကံသု။ တဒါ ဇာနပဒိကော လဒ္ဓဝိဘဝေါ ဣမမေဝ ဝရတရန္တိ တေဟိ သဒ္ဓိံ စောရကမ္မံ ကရောန္တော ဇီဝိကံ ကပ္ပေသိ၊ အထေကဒိဝသံ ရာဇပုရိသာ ကတကမ္မေ တေ သဗ္ဗေဝ ဂဟေတွာ ပစ္ဆာဗာဟံ ဂါဠှံ ဗန္ဓိတွာ ကောသလရညော ဒဿေသုံ၊ ရာဇာ တေ ဒိသွာ ဧဝမာဟ၊ ဘဏေ တုမှာကံ အန္တရေ ယော ဧတေသံ မာရေတွာ ဇီဝိတက္ခယံ ပါပေဿတိ၊ တဿ ဇီဝိတဒါနံ ဒမ္မီတိ၊ တံ သုတွာ တေ စောရာ သဗ္ဗေ အညမညဉာတိသုဟဒသမ္ဗန္ဓဘာဝေန တံ န ဣစ္ဆိံသု။ သော ပန ဇနပဒဝါသီ မနုဿော အဟမေတေ သဗ္ဗေ မာရေဿာမီတိ ရညော ဝတွာ တေနာနုညာတော တေ သဗ္ဗေ မာရေသိ။ တံ ဒိသွာ တုဋ္ဌော ရာဇာ တဿ စောရဃာတကမ္မံ အဒါသိ။ သော စောရေ စ ဝဇ္ဈပ္ပတ္တေ စ မာရေန္တော ပဉ္စဝီသတိဝဿာနိ ဝသန္တော အပရဘာဂေ မဟလ္လကော အဟောသိ။ အထ သော မန္ဒဗလတ္တာ ကတိပယပဟာရေနာပိ စောရံ မာရေတုံ န သက္ကောတိ၊ ရာဇာ တံ ဉတွာ အညဿ စောရဃာတကမ္မံ အဒါသိ။ အထ သော စောရဃာတကမ္မာ [စောရဃာတကမ္မ ဣတိပိကတ္ထစိ] ပရိဟီနော အတ္တနော ဂေဟေ ဝသတိ။ တဒါ အညတရော မနုဿော မန္တံ ပရိဝတ္တေတွာ နာသာဝါတေန မနုဿမာရဏကမန္တံ ဇာနာတိ။ တထာဟိ ဟတ္ထပါဒကဏ္ဏနာသသီသာဒီသု ယံကိဉ္စိ ဆေဇ္ဇဘေဇ္ဇံ ကတ္တုကာမော မန္တံ ပရိဝတ္တေတွာ နာသာဝါတံ ဝိဿဇ္ဇေတိ။ တံ တံ ဌာနံ ဆိဇ္ဇတိ ဘိဇ္ဇတိ၊ ဧဝံ မဟာနုဘာဝေါ သော မန္တော၊ အထ သော တံ ပုရိသံ ဥပဋ္ဌဟိတွာ မန္တံ လဘိတွာ ရညော သာသနံ ပေသေသိ ¶ ။ အဟံ ဣတော ပုဗ္ဗေ မဟလ္လကတ္တာ စောရာနံ ဟတ္ထပါဒါဒယော ဒုက္ခေန ဆေဇ္ဇ ဘေဇ္ဇံ ကရောမိ၊ မာရေတဗ္ဗေပိ ဒုက္ခေန မာရေမိ။ ဣဒါနိ ပနာဟံ တထာ န ကရောမိ၊ မမ မန္တာနုဘာဝေန ဆေဇ္ဇဘေဇ္ဇကမ္မံ ကရိဿာမီတိ။ ရာဇာ တံ သာသနံ သုတွာ သာဓူတိ တံ ပက္ကောသာပေတွာ ဌာနန္တရံ တဿေဝ ပါကတိက မကာသိ။ သော တတော ပဋ္ဌာယ တံ ကမ္မံ ကရောန္တော ပုန ပဉ္စဝဿာနိ အတိက္ကာမေသိ။ သော မဟလ္လကော ခီဏာယုကော ဒုဗ္ဗလော မရဏမဉ္စပရာယဏော ဟုတွာ မရဏဝေဒနာဒုက္ခေန မဟန္တေန ဘယာနကေန သဒ္ဒေန ဝိဿရံ ဝိရဝန္တော နိမီလိတေန စက္ခုနာ ဘယာနကံ နရကဂ္ဂိဇာလာပဇ္ဇလန္တအယကူဋမုဂ္ဂရဓရေ နိရယပါလေ စ ပဿန္တော နိပန္နော ဟောတိ၊ တတော တဿ ပဋိဝိဿကဂေဟေ မနုဿာ တဿ ဘယာနကသဒ္ဒသဝဏေန ဂေဟံ ဆဋ္ဋေတွာ ပလာယိံသု။ တသ္မိံ ကိရ ဒိဝသေ မဟာသာရိပုတ္တတ္ထေရော ဒိဗ္ဗစက္ခုနာ လောကံ ဩလောကေန္တာ တံ စောရဃာတကံ တဒဟေဝ ကာလံကတွာ နိရယေ နိဗ္ဗတ္တမာနံ ဒိသွာ မယိ တတ္ထ ဂတေ ပနေသ မယိ ပသာဒေန သဂ္ဂေ နိဗ္ဗတ္တတီတိ ဉတွာ အဇ္ဇ မယာ တဿာနုဂ္ဂဟံ ကာတုံ ဝဋ္ဋတီတိ ပုဗ္ဗဏှသမယံ နိဝါသေတွာ တဿ ဃရဒွါရ မဂမာသိ။ အထ သော ထေရံ ဒိသွာ ကုဒ္ဓါ ကောပေန တဋတဋာယမာနဒေဟော အဇ္ဇ တံ ဝိဇ္ဈိတွာ ဖာလေတွာ မာရေဿာမီတိ နိပန္နောဝ မန္တံ ပရိဝတ္တေတွာ နာသာဝါတံ ဝိဿဇ္ဇေသိ၊ ထေရော တသ္မိံ ခဏေ နိရောဓသမာပန္နော နိရောဓာ ဝုဋ္ဌာယ သုရိယော ဝိယ ဝိရောစမာနော အဋ္ဌာသိ၊ အထ သော ထေရဿ တယော ဝါရေ တထေဝ ကတွာ ကိဉ္စိ ကာတုံ အသက္ကောန္တော အတိဝိယ ဝိမှိတစိတ္တော ထေရေ စိတ္တံ ပသာဒေတွာ အတ္တနော ပဋိယတ္တံ ပါယသံ ထေရဿ ဒါပေသိ၊ ထေရော မင်္ဂလံ ဝဍ္ဎေတွာ ဝိဟာရမေဝ အဂမာသိ၊ စောရဃာတကော ထေရဿ ဒိန္နဒါနံ အနုဿရန္တော တသ္မိံ ခဏေ ကာလံ ကတွာ သဂ္ဂေ နိဗ္ဗတ္တိ။ အဟော ဝီတရာဂါနံ ဗုဒ္ဓပုတ္တာနံ အာနုဘာဝေါ။ ဧဝံ နရကေ နိဗ္ဗတ္တမာနောပိဿ ဗလေန သဂ္ဂေ နိဗ္ဗတ္တောတိ။ တထာဟိ။
ဒါနံ ¶ တာဏံ မနုဿာနံ၊ ဒါနံ ဒုဂ္ဂတိဝါရဏံ၊
ဒါနံ သဂ္ဂဿ သောပါနံ၊ ဒါနံ သန္တိကရံ ပရံ။
ဣစ္ဆိတိစ္ဆိတဒါနေန၊ ဒါနံ စိန္တာမဏီ ဝိယ၊
ကပ္ပရုက္ခောဝ သတ္တာနံ၊ ဒါနံ ဘဒ္ဒဃဋောဝိယ။
သီလဝန္တဿ ဒါနေန၊ စက္ကဝတ္တိသိရိမ္ပိ စ၊
လဘန္တိ သက္ကသမ္ပတ္တိံ၊ တထာ လောကုတ္တရံ သုခံ။
ပါပကမ္မေသု နိရတော၊ ဌိတောယံ နရကာယနေ [နရကာဝနေ ဣတိပိကတ္ထစိ]၊
သာရိပုတ္တဿ ထေရဿ၊ ပိဏ္ဍပါတဿ ဝါဟသာ။
အပါယံ ပရိဝဇ္ဇေတွာ၊ နေကဒုက္ခသမာကုလံ၊
ဒေဝသင်္ဃပရိဗ္ဗူဠှော၊ ဂတော ဒေဝပုရံ ဝရံ။
တသ္မာ သုခေတ္တေ သဒ္ဓါယ၊ ဒေထ ဒါနာနိ ကာမဒံ၊
ဒါနံ ဒေန္တေဟိ သီလမ္ပိ၊ ပါလနီယံတိသုန္ဒရန္တိ [ပါလနံစာတိသုန္ဒရံ ဣတိပိကတ္ထစိ]။
အထ ဘိက္ခူ ဓမ္မသဘာယံ သန္နိပတိတွာ နိသိန္နာ ဘဂဝန္တံ ပုစ္ဆိံသု၊ ကိံဘန္တေ သော ပါပေါ စတူသု အပါယေသု ကတရသ္မိံ နိဗ္ဗတ္တောတိ။ အထ သတ္ထာ အဇ္ဇေသ ဘိက္ခဝေ သာရိပုတ္တဿ ဒိန္နဒါနာနုဘာဝေန ဒေဝလောကေ နိဗ္ဗတ္တော၊ တဿေဝ နိဿန္ဒေန အနာဂတေ ပစ္စေကဗုဒ္ဓါ ဘဝိဿတီတိ ဗျာကာသီတိ။
ဘော သာရိပုတ္တေ နိဟိတပ္ပဒါနံ၊
ခဏေန ပါပေတိ ဟိ သဂ္ဂမဂ္ဂံ၊
တသ္မာ သုခေတ္တေသု ဒဒါထ ဒါနံ၊
ကာမတ္ထ စေ သဂ္ဂမောက္ခံ ပရတ္ထ။
စောရဃာတကဝတ္ထုံ ဆဋ္ဌမံ။
၂၇။ သဒ္ဓါပါသကဿ ဝတ္ထုမှိ အယမာနုပုဗ္ဗီကထာ
အတီတေ ¶ ကိရ ကဿပဒသဗလဿ ကာလေ ဧကော ပုရိသော သဒ္ဓါ ရတနတ္တယေသု ပသန္နော ဥစ္ဆုယန္တကမ္မေန ဇီဝိကံ ကပ္ပေန္တော ပဋိဝသတိ။ အထ သော ဧကံ ဂိလာနဘိက္ခုံ ဒိသွာ တဿ ဥဠုင်္ကမတ္တံ သပ္ပိံ အဒါသိ၊ တထေဝေကဿ ဘိက္ခုဿ ဧကံ ဂုဠပိဏ္ဍံ အဒါသိ၊ အထာပရသ္မိံဒိဝသေ ဧကံ ဆာတဇ္ဈတ္တံ သုနခံ ဒိသွာ တဿ ဘတ္တပိဏ္ဍေန သင်္ဂဟ မကာသိ၊ အထေကဿ ဣဏဋ္ဌကဿ ဧကံ ကဟာပဏံ အဒါသိ၊ အထေကဒိဝသံ ဓမ္မံ သုဏမာနော ဓမ္မဒေသကဿ ဘိက္ခုဿ သာဋကံ ပူဇေသိ၊ သော ဧတ္တကံ ပုညကမ္မံ ကတွာ ဘဝေသု စရမာနောဟံ သမုဒ္ဒပဗ္ဗတာဒီသုပိ ယံ ယံ ဣစ္ဆာမိ။ တံ တံ သမိဇ္ဈတူတိ ပတ္ထနံ အကာသိ၊ သော အပရဘာဂေ ကာလံ ကတွာ တေဟေဝ ကုသလမူလေဟိ သုတ္တပ္ပဗုဒ္ဓါ ဝိယ ဒေဝလောကေ နိဗ္ဗတ္တိတွာ တတ္ထ မဟန္တံ ဒိဗ္ဗသမ္ပတ္တိံ အနုဘဝိတွာ တတော စုတော အမှာကံ ဘဂဝတော ကာလေ သာဝတ္ထိယံ မဟဒ္ဓနေ မဟာသာလကုလေ နိဗ္ဗတ္တိတွာ တတော သော ဝိညုတံ ပတ္တော ကာလေန ကာလံ ဓမ္မံ သုဏန္တော ဃရာဝါသေ အာဒီနဝံ ပဗ္ဗဇ္ဇာယ စ အာနိသံသံ သုတွာ ပဗ္ဗဇိတော န စိရေနေဝ အရဟတ္တံ ပါပုဏိ။ သော အပရဘာဂေ သတ္ထာရံ ဝန္ဒိတွာ ပဉ္စသတဘိက္ခုပရိဝါရော ဥဂ္ဂနဂရံ အဂမာသိ၊ တတ္ထ သေဋ္ဌိနော ဘရိယာ သဒ္ဓါ အဟောသိ ပသန္နာ။ သာ ထေရံ ပဉ္စဟိ ဘိက္ခုသတေဟိ သဒ္ဓိံ ဘိက္ခာယ စရန္တံ ဒိသွာ တုရိတတုရိတာ ဂန္တွာ ထေရဿ ပတ္တံ ဂဟေတွာ သဒ္ဓိံ ပဉ္စသတေဟိ ဘိက္ခူဟိ ဘောဇေတွာ ထေရံ တတ္ထ နိဗဒ္ဓဝါသတ္ထံ ယာစိတွာ ပဉ္စသတကူဋာဂါရာနိ ကာရာပေတွာ အလင်္ကရိတွာ ပဉ္စသတဘိက္ခူ တတ္ထ ဝါသေန္တီ နိဗဒ္ဓံ စတုပစ္စယေဟိ ဥပဋ္ဌာနမကာသိ။ တတော ထေရော တံ ပဉ္စသု သီလေသု ပတိဋ္ဌာပေတွာ တတ္ထ ယထာဘိရန္တံ ဝိဟရိတွာ အညတ္တ ဂန္တုကာမော အနုပုဗ္ဗေန ပဋ္ဋနဂါမံ အဂမာသိ၊ တတ္ထ ဝသိတွာ တတော နာဝံ အဘိရုယှ ပဉ္စသတဘိက္ခူဟိ ပရိဝုတော သမုဒ္ဒပိဋ္ဌေန ဂစ္ဆတိ၊ သမုဒ္ဒံ တရန္တဿ ¶ တဿ သာဂရမဇ္ဈေ ဥဒရဝါတော သမုဋ္ဌဟိတွာ ပီဠေတိ၊ တံ ဒိသွာ ဘိက္ခူ ဘန္တေ ဣဒံ ပုဗ္ဗေ ကေန ဝူပသမေဿတီတိ ပုစ္ဆိံသု၊ ထေရော ပုဗ္ဗေ မေ အာဝုသော ဥလုင်္ကမတ္တေ သပ္ပိပီတေ ရောဂေါ ဝူပသမ္မတီတိ အာဟ၊ ဘိက္ခူ ဘန္တေ သမုဒ္ဒပိဋ္ဌေ ကထံ သပ္ပိံ လဘိဿာမ၊ အဓိဝါသေထာတိ အာဟံသု၊ တံ သုတွာ ထေရေန [ထေရောနနောအာယသ္မန္တာ ဣတိသဗ္ဗတ္ထ] န နော အာယသ္မန္တာ သပ္ပိ ဒုလ္လဘာ၊ မမ ပတ္တံ ဂဟေတွာ သမုဒ္ဒေါဒကံ ဥဒ္ဓရိတွာ အာနေထာတိ ဝုတ္တေ ဘိက္ခူ တထာ အကံသု။ ဥဒ္ဓဋမတ္တမေဝ တံဥဒကံ ပရိဝတ္တေတွာ သပ္ပိ အဟောသိ၊ အထ ဘိက္ခူ တံ ဒိသွာ အစ္ဆရိယဗ္ဘုတစိတ္တာ ဇာတာ ထေရဿ သပ္ပိံ ဥပနာမေသုံ၊ ထေရေန သပ္ပိနော [သပ္ပိနာ ဣတိသဗ္ဗတ္ထ] ပီတမတ္တေ သော အာဗာဓော ဝူပသမိ၊ အထဿ ဘိက္ခူဟိ ကိ မေတံ ဘန္တေ အစ္ဆရိယံ၊ န နော ဣတော ပုဗ္ဗေ ဧဝရူပံ ဒိဋ္ဌပုဗ္ဗံတိ ဝုတ္တေ ထေရော တေနဟိ ကတပုညာနံ ပုညဝိပါကံ ပဿိဿထာတိ ဝတွာ သမုဒ္ဒံ ဩလောကေသိ ဣဒံ သပ္ပိ ဟောတူတိ။ အထဿ စက္ခုပထေ သမုဒ္ဒေ သဗ္ဗောဒကံ ပရိဝတ္တေတွာ သပ္ပိ အဟောသိ။ အထဿ ဘိက္ခူ အဗ္ဘုတစိတ္တာ အညမ္ပိ ဤဒိသံ ပုညံ အတ္ထိ ဘန္တေတိ ပုစ္ဆိံသု၊ တတော ထေရော တေနဟိ ပဿထာယသ္မန္တာ မမ ပုညန္တိ ဝတွာ သမန္တာ တတ္ထ တတ္ထ ဃနသေလပဗ္ဗတေ ဩလောကေသိ၊ သဗ္ဗာနိ တာနိ ဂုဠပိဏ္ဍာနိ အဟေသုံ၊ တတော စက္ခုပထေ သမန္တာ ဘတ္တဘာဇနာနိ ဒဿေသိ သဗျဉ္ဇနံ သောပကရဏံ။ တတော ဟိမဝန္တံ ဩလောကေသိ၊ သဗ္ဗံ တံ သုဝဏ္ဏမယံ အဟောသိ။ အထာဘိမုခဋ္ဌာနေ မဟန္တံ ဝနသဏ္ဍံ ဩလောကေသိ၊ သကလဝနသဏ္ဍံနာနာဝိရာဂဝတ္ထေဟိ သဉ္ဆန္နံ အဟောသိ၊ ဘိက္ခူ တံ တံ ပါဋိဟာရိယံ ဒိသွာ အတီဝ ဝိမှိတာ ဘန္တေ ကေန တေ ပုညကမ္မေန ဧတာဒိသာနိ ပါဋိဟာရိယာနိ ဘဝိဿန္တီတိ ပုစ္ဆိံသု၊ ထေရော ကဿပဒသဗလဿ ကာလေ အတ္တနာ ကတံ သဗ္ဗံ တံ ကုသလံ ပကာသေသိ။ တေနေတ္ထ။
ဣမသ္မိံ ¶ ဘဒ္ဒကေ ကပ္ပေ၊ ကဿပေါ နာမ နာယကော၊
သဗ္ဗလောကဟိတတ္ထာယ၊ လောကေ ဥပ္ပဇ္ဇိ စက္ခုမာ။
တဒါဟံ ဥစ္ဆုယန္တမှိ၊ နိယုတ္တော ဂုဠကာရကော၊
တေန ကမ္မေန ဇီဝါမိ၊ ပေါသေန္တော ပုတ္တဒါရကေ။
ကိလန္တိန္ဒြိယမဒ္ဒက္ခိံ၊ ဘိက္ခုံ ရောဂါတုရံ တဒါ၊
ဘိက္ခာစာရကဝတ္တေန၊ ဃတတ္ထံ [ဃတမတ္တမုပါဂတံ ဣတိသဗ္ဗတ္ထ] သမုပါဂတံ။
ဥလုင်္ကမတ္တံ သပ္ပိဿ၊ အဒဒံ တဿ ဘိက္ခုနော၊
သဒ္ဒဟန္တော ဒါနဖလံ၊ ဒယာယု ဒဂ္ဂမာနသော။
။ ၅
တေန ကမ္မေန သံသာရေ၊ သံသရန္တော ဘဝါဘဝေ၊
ယတ္ထိစ္ဆာမိ ဃတံ တတ္ထ၊ ဥပ္ပဇ္ဇတိ အနပ္ပကံ။
ဣစ္ဆာမဟံ သမုဒ္ဒသ္မိံ၊ ဖလမ္ပိ ဃတမတ္တနော၊
တံ တံ သဗ္ဗံ ဃတံ ဟောတိ၊ ဃတဒါနဿိဒံ ဖလံ။
သုဏာထ မယှံ အညမ္ပိ၊ ပုညကမ္မံ မနောရမံ၊
တဒါ ဒိသွာနဟံ ဘိက္ခုံ၊ ရောဂေန ပရိပီဠိတံ။
ဂုဠပိဏ္ဍံ ဂဟေတွာန၊ ပတ္တေ တဿ သမာကိရိံ၊
တေန သော သုခိတော အာသိ၊ ရောဂံ ဗျပဂတံ တဒါ။
တေန မေ ဂုဠဒါနေန၊ သံသရံ ဒေဝမာနုသေ၊
ယတ္ထတ္ထောသ္မိ ဂုဠေနာဟံ၊ တတ္ထ တံ သုလဘံ မမ။
သေလာစ ဝိပုလာ မယှံ၊ ဟောန္တိ စိတ္တာနုဝတ္တကာ၊
မဟန္တဂုဠပိဏ္ဍာဝ၊ ဂုဠဒါနေ ဣဒံ ဖလံ။
အထာပိ မေ ကတံ ပုညံ၊ သုဏာထ သာဓု ဘိက္ခဝေါ၊
ဆာတဇ္ဈတ္တံ ဖန္ဒမာနံ၊ ဒိသွာန သုနခံ တဒါ။
ဘတ္တပီဏ္ဍေန ¶ သင်္ဂဏှိံ၊ တမ္ပိ ဒါနံ ဖလာဝဟံ၊
တတော ပဋ္ဌာယ နာဟောသိ၊ အန္နပါနေန ဦနတာ။
သုလဘန္နပါနော သုခိတော၊ အဟောသိံဇာတိဇာတိယံ၊
အဇ္ဇာပိ ယဒိ ဣစ္ဆာမိ၊ ဘောဇနေန ပယောဇနံ။
စက္ခုပထေ သမန္တာ မေ၊ ဇာယန္တုက္ခလိယော ဗဟူ၊
အထာပရမ္ပိ ကုသလံ၊ အကာသိံတံ သဏာထ မေ။
ဣဏဋ္ဌကဿ ပေါသဿ၊ အဒါသေကံ ကဟာပဏံ၊
တေန မေ ပုညကမ္မေန၊ အနောမဘဝသမ္ပဒံ။
ပစုရံ ဇာတရူပဉ္စ၊ လဘာမိ ဇာတိဇာတိယံ၊
သစဇ္ဇ ဓနကာမောဟံ၊ ဃနသေလောပိ ပဗ္ဗတော၊
ဟောတိ ဟေမမယံ သဗ္ဗံ၊ ဣဏတော မောစနေ ဖလံ။
အညမ္ပိ မမ ပုညံ ဘော၊ သုဏာထ သုတိသောဘနံ၊
ကဿပဿ ဘဂဝတော၊ သာသနေကံ ဗဟုဿုတံ။
ဒေသေန္တံ မုနိနော ဓမ္မံ၊ သုတွာ ပီဏိတမာနသော၊
ပူဇေသိံသာဋကံ မယှံ၊ ဓမ္မဿ ဓမ္မသာမိနော။
တေနာဟံ ပုညကမ္မေန၊ သံသရံ ဒေဝမာနုသေ၊
လဘာမိ ပစုရံ ဝတ္ထံ၊ ယံ လောကသ္မိံ ဝရံ ပရံ။
ဣစ္ဆမာနော သစေ အဇ္ဇ [ဇာနမာနောပဟံအဇ္ဇ၊ ဇာနဓာနောစဟံအဇ္ဇ ဣတိကတ္ထစိ]၊ ဟိမဝန္တမ္ပိ ပဗ္ဗတံ၊
နာနာဝိရာဂဝတ္ထေဟိ၊ ဆာဒယိဿံ သမန္တတော။
သစေ ဣစ္ဆာမိ အဇ္ဇေဝ၊ ဝတ္ထေနစ္ဆာဒယာ မိတေ၊
ဇန္တဝေါ စတုဒီပသ္မိံ၊ ဝတ္ထဒါနဿိဒံ ဖလံ။
ဧတေသံ ပုညကမ္မာနံ၊ ဝါဟသာ ကာမဘူမိယံ၊
သမ္ပတ္တိ မနုဘုတွာန၊ သာဝတ္ထိပုရ မုတ္တမေ။
ဇာတော ကုလေ မဟာဘောဂေ၊
ဝုဒ္ဓိပ္ပတ္တော သုခေဓိတော၊
တဿ ဓမ္မံ သုဏိတွာန၊
ပဗ္ဗဇိတွာန သာသနေ။
လောကုတ္တရံ အဂ္ဂရသံ၊ ဘုဉ္စန္တော မုနိဝါဟသာ၊
ကိလေသေ ပဇဟိတွာန၊ အရဟတ္တမပါပုဏိံ။
ကုသလံ နာ ဝမန္တဗ္ဗံ၊ ခုဒ္ဒကန္တိ ကဒါစိပိ၊
အနန္တဖလဒံ ဟောတိ၊ နိဗ္ဗာဏမ္ပိ ဒဒါတိ တံ။
အထဿ ဓမ္မဒေသနံ သုတွာ ဘိက္ခူ စ မဟာဇနော စ ဒါနာဒိကုသလကမ္မံ ကတွာ ယေဘုယျေန သဂ္ဂပရာယဏာ အဟေသုံတိ။
မနောပသာဒေနပိ အပ္ပပုညံ၊
ဧဝံ မဟန္တံ ဘဝတီတိ ဉတွာ၊
မာ အပ္ပပုညန္တိ ပမဇ္ဇထမ္ဘော၊
သရာထ ဒေဝိံ ဣဓ လာဇဒါယိံ။
သဒ္ဓါပါသကဿ ဝတ္ထုံ သတ္တမံ။
၂၈။ ကပဏဿ ဝတ္ထုမှိ အယမာနုပုဗ္ဗီကထာ
အမှာကံ ဘဂဝတိ ပရိနိဗ္ဗုတေ ဗာရာဏသီနဂရဝါသီ ဧကော ဒုဂ္ဂတပုရိသော ပရဂေဟေ ဘတိံကတွာ ဇီဝိကံ ကပ္ပေတိ၊ တသ္မိံ သမယေ နဂရဝါသိနော ယေဘုယျေန တသ္မိံ တသ္မိံ ဌာနေ မဏ္ဍပါဒယော ကာရာပေတွာ မဟာဒါနံ ဒေန္တိ၊ တံ ဒိသွာ ဒုဂ္ဂတော ဧဝံ စိန္တေသိ၊ အဟံ ပုဗ္ဗေ အကတပုညတ္တာ ပရဂေဟေ ဘတိံ ကတွာ ကိစ္ဆေန ကသိရေန ဇီဝါမိ။ နိဝါသနပါရုပနမ္ပိ ဝါသဋ္ဌာနမတ္တမ္မိ ဒုက္ခတော လဘာမိ။ ဣဒါနိ ဗုဒ္ဓုပ္ပာဒေါ ဝတ္တတိ ဘိက္ခုသင်္ဃောပိ။
သဗ္ဗေ ¶ ဣမေ ဒါနံ ဒတွာ သဂ္ဂမဂ္ဂံ သောဓေန္တိ။ မယာပိ ဒါနံ ဒါတုံ ဝဋ္ဋတိ။ တမ္မေ ဒီဃရတ္တံ ဟိတာယ သုခါယ ဘဝိဿတိ။ အပိ စ မယှံ တဏ္ဍုလနာလိမတ္တမ္ပိ နတ္ထိ၊ အကတဝီရိယေန တံ မတ္ထကံ ပါပေတုံ န သက္ကာ၊ ဧတဒတ္ထာယာဟံ ဥယျောဂံ ကတွာ ဒါနံ ဒဿာမီတိ စိန္တေတွာ တတော ပဋ္ဌာယ ဘတိံ ပရိယေသမာနော ဂန္တွာ တတ္ထ တတ္ထ ဘတိံ ကတွာ လဒ္ဓနိဝါပေ စ ဘိက္ခာစရိယာယ လဒ္ဓတိလတဏ္ဍုလာဒယော စ ဧကတ္ထ သံဟရိတွာ မနုဿေ သမာဒါပေတွာ တသ္မိံ မဏ္ဍပံ ကာရာပေတွာ ဝနကုသမာဒီဟိ တံ အလင်္ကရိတွာ ဘိက္ခူ နိမန္တေတွာ မဏ္ဍပေ နိသီဒါပေတွာ သဗ္ဗေသံ ပါယသံ [ပါယာသံ ဣတိသဗ္ဗတ္ထ] ပဋိယာဒေတွာ ဘောဇေသိ။ အထ သော မရဏကာလေ အတ္တနာ ကတံ တံ ဒါနဝရံ အနုဿရိ။ သော တေန ကုသလကမ္မေန သုတ္တပ္ပဗုဒ္ဓါ ဝိယ ဒေဝလောကေ နိဗ္ဗတ္တိ။ တသ္မိံ တေန ကတပုညာနုရူပံ မဟန္တံ ကနကဝိမာနံ နိဗ္ဗတ္တိ။ သမန္တာ တိဂါဝုတဋ္ဌာနေ ဒေဝတာ နာနာ ဝိဓာနိ တုရိယာနိ ဂဟေတွာ ဥပဟာရံ ကရောန္တိ။ နိစ္စံ ဒေဝစ္ဆရာသဟဿာနိ [ဒေဝစ္ဆရာသဟဿံ ဣတိသဗ္ဗတ္ထ] တံ ပရိဝါရေတွာ တိဋ္ဌန္တိ။ ဧဝံ သော မဟန္တံ သမ္ပတ္တိံ အနုဘဝတိ။ အထေကဒိဝသံ သုဝဏ္ဏသေလဝိဟာရဝါသီ မဟာသင်္ဃရက္ခိတတ္ထေရော ပတ္တပဋိသမ္ဘိဒေါ ဒေဝစာရိကံ စရမာနော တံ ဒေဝပုတ္တံ အနုပမာယ ဒေဝသမ္ပတ္တိယာ ဝိရောစမာနံ ဒိသွာ ဥပသင်္ကမ္မ ဌိတော တေန ကတကမ္မံ ပုစ္ဆိ။ သောပိဿ ယထာဘူတံ ဗျာကာသိ၊ တေနတ္ထ။
သဗ္ဗသောဝဏ္ဏယော အာသိ၊ ပါသာဒေါ ရတနာမယော၊
သောဏ္ဏသိင်္ဂသတာကိဏ္ဏော၊ ဒုဒ္ဒိက္ခော စ ပဘဿရော။
ကူဋာဂါရ သတာကိဏ္ဏော၊ သောဏ္ဏမာလာသမာကုလော၊
မုတ္တာကလာပါလမ္ဗန္တိ၊ တတ္ထ တတ္ထ မနောရမာ။
နေကဂဗ္ဘသတာကိဏ္ဏော၊ သယနာသနမဏ္ဍိတော၊
ဝိဘတ္တော ဘဗ္ဗဘာဂေဟိ၊ ပုညဝဍ္ဎကိနာ ကတော။
နစ္စန္တိ ¶ ပမဒါ တတ္ထ၊ ဘေရိမဏ္ဍလမဇ္ဈဂါ၊
ဂါယန္တိ ကာစိ ကီဠန္တိ၊ ဝါဒေန္တိ ကာစိ တန္တိယော။
တတော တိဂါဝုတေ ဌာနေ၊ ပါသာဒဿ သမန္တတော၊
သဟစ္ဆရာ ဒေဝပုတ္တာ၊ ဂဟေတွာ အာတတာဒယော။
မောဒန္တိ ပရိဝါရေတွာ၊ နစ္စဂီတာဒိနာ သဒါ၊
ဥလ္လင်္ဃန္တိစ သေလေန္တိ၊ သိလာဃန္တိ သမန္တတော။
ဧဝံ မဟိဒ္ဓိကော ဒါနိ၊ တုဝံ ဝန္ဒောဝ ဘာသတိ၊
ပုစ္ဆာမိ တံ ဒေဝပုတ္တ၊ ကိံ ကမ္မမကရီ ပုရာ။
ဒေဝပုတ္တော အာဟ။
အဟောသိံ ဒုဂ္ဂတော ပုဗ္ဗေ၊ ဗာရာဏသီပုရုတ္တမေ၊
ဒါနံ ဒေန္တိ နရာ တတ္ထ၊ နိမန္တေတွာန ဘိက္ခဝေါ။
ဇီဝန္တော ဘတိယာ သောဟံ၊ ဒါနံ ဒေန္တေ မဟာဇနေ၊
တုဋ္ဌဟဋ္ဌေ ပမုဒိတေ၊ ဧဝံ စိန္တေသဟံ တဒါ။
သမ္ပန္နဝတ္ထာလင်္ကာရာ၊ ဒါနံ ဒေန္တိ ဣမေ ဇနာ၊
ပရတ္ထပိ ပဟဋ္ဌာဝ၊ သမ္ပတ္တိမနုဘောန္တိ တေ။
ဗုဒ္ဓုပ္ပာဒေါ အယံ ဒါနိ၊ ဓမ္မော လောကေ ပဝတ္တတိ၊
သုသီလာ ဒါနိ ဝတ္တန္တိ၊ ဒက္ခိဏေယျာ ဇိနောရသာ။
အနာဝဋ္ဌိတော [အဝဋ္ဌိတောစ၊ အန္ဓဋ္ဌိတောစ ဣတိပိကတ္တစိ] သံသာရော၊ အပါယာ ခလု ပူရိတာ၊
ကလျာဏဝိမုခါ သတ္တာ၊ ကာမံ ဂစ္ဆန္တိ ဒုဂ္ဂတိံ။
ဣဒါနိ ဒုက္ခိတော ဟုတွာ၊ ဇီဝါမိ ကသိရေနဟံ၊
ဒလိဒ္ဒေါ ကပဏော ဒီနော၊ အပ္ပဘောဂေါ အနာလယော။
ဣဒါနိ ဗီဇံ ရောပေမိ၊ သုခေတ္တေ သာဓုသမ္မတေ၊
အပ္ပေဝနာမ တေနာဟံ၊ ပရတ္ထ သုခိတော သိယာ။
ဣတိ စိန္တိယ ဘိက္ခိတွာ၊ ဘတိံ ကတွာန နေကဓာ၊
မဏ္ဍပံ တတ္ထ ကာရေတွာ၊ နိမန္တေတွာန ဘိက္ခဝေါ။
အာယာသေန ¶ အဒါသာဟံ၊ ပါယသံ အမတာယ သော၊
တေန ကမ္မဝိပါကေန၊ ဒေဝလောကေ မနောရမေ။
ဇာတောမှိ ဒိဗ္ဗကာမေဟိ၊ မောဒမာနော အနေကဓာ၊
ဒီဃာယုကော ဝဏ္ဏဝန္တော၊ တေဇဿီစ အဟောသဟန္တိ။
ဧဝံ ဒေဝပုတ္တော အတ္တနာ ကတပုညကမ္မံ ဝိတ္တာရေန ကထေသိ၊ ထေရောပိ မနုဿလောကံ အာဂန္တွာ မနုဿာနံ အတ္တနာ ပစ္စက္ခတော ဒိဋ္ဌဒိဗ္ဗသမ္ပတ္တိံ ပကာသေသိ။ တံ သုတွာ မဟာဇနော ကုသလကမ္မံ ကတွာ ယေဘုယျေန သဂ္ဂေ နိဗ္ဗတ္တောတိ။
အနာလယော ဒုဂ္ဂတဒီနကောပိ၊
ဒါနံ ဒဒန္တော ဓိဂတော ဝိသေသံ၊
သဂ္ဂါ ပဝဂ္ဂံ ယဒိ ပတ္ထယဝှော၊
ဟန္တွာန မစ္ဆေရမလံ ဒဒါထာတိ။
ကပဏဿ ဝတ္ထုံ အဋ္ဌမံ။
၂၉။ ဒေဝပုတ္တဿ ဝတ္ထုမှိ အယမာနုပုဗ္ဗီကထာ
ဣတော ပုဗ္ဗေ နာရဒဿ ကိရ သမ္မာသမ္ဗုဒ္ဓဿ ကာလေ အယံ ဒီပေါ အညတရေန နာမေန ပါကဋော အဟောသိ၊ သော ပနေကသ္မိံ ကာလေ ဒုဗ္ဘိက္ခော အဟောသိ ဒုဿဿော၊ မဟာဆာတကဘယံ သတ္တေ ပီဠေတိ။ တသ္မိံ သမယေ နာရဒဿ ဘဂဝတော ဧကော သာသနိကော သာဝကော အညတရသ္မိံ ဂါမေ ပိဏ္ဍာယ စရိတွာ ယထာ ဓောတပတ္တောဝ နိက္ခမိ။ အထညတရသ္မိံ ဂေဟေ မနုဿာ ဧကံ တဏ္ဍုလနာဠိံပေါဋလိကာယ ဗန္ဓိတွာ ဥဒကေ ပက္ခိပိတွာ ပစိတွာ ဥဒကံ ဂဟေတွာ ပိဝန္တော ဇီဝန္တိ၊ တဒါ ထေရံ ဒိသွာ ဝန္ဒိတွာ ပတ္တံ ဂဟေတွာ တေန တဏ္ဍုလေန ဘတ္တံ ပစိတွာ ပတ္တေ ပက္ခိပိတွာ ထေရဿ အဒံသု။ အထ ¶ တေသံ သဒ္ဓါဗလေန သာ ဥက္ခလိ ဘတ္တေန ပရိပုဏ္ဏာ အဟောသိ၊ တေ တံ အဗ္ဘုတံ ဒိသွာ အယျဿ ဒိန္နဒါနေ ဝိပါကော အဇ္ဇေဝ နော ဒိဋ္ဌောတိ သောမနဿဇာတာ မဟာဇနံ သန္နိပါတေတွာ တေ ဘတ္တံ ဘောဇေတွာ ပစ္ဆာ သယံ ဘုဉ္ဇိံသု။ ဘတ္တဿ ဂဟိတဂဟိတဋ္ဌာနံ ပူရတေဝ။ တတော ပဋ္ဌာယ တေ သမ္ပတ္တမဟာဇနဿ ဒါနံ ဒဒန္တာ အာယုပရိယောသာနေ ဒေဝလောကေ နိဗ္ဗတ္တိံသု၊ အထ သော ထေရော ဘတ္တံ အာဒါယ ဂန္တွာ အညတရသ္မိံ ရုက္ခမူလေ နိသီဒိတွာ ဘုဉ္ဇိတုမာရတိ။ တသ္မိံ ကိရ ရုက္ခေ နိဗ္ဗတ္တော ဧကော ဒေဝပုတ္တော အာဟာရေန ကိလန္တော ဘုဉ္ဇမာနံ ထေရံ ဒိသွာ အတ္တဘာဝံ ဝိဇဟိတွာ မဟလ္လကဝေသေန တဿ သမီပေ အဋ္ဌာသိ။ ထေရော အနာဝဇ္ဇိတွာဝ ဘုဉ္ဇတိ။ ဒေဝပုတ္တော စရိမာလောပံ ဌပေတွာ ဘုတ္တကာလေ ဥက္ကာသိတွာ အတ္တာနံ ဌိတဘာဝံ ဇာနာပေသိ။ ထေရော တံ ဒိသွာ ဝိပ္ပဋိသာရိ ဟုတွာ စရိမံ ဘတ္ထပိဏ္ဍံ တဿ ဟတ္ထေ ဌပေသိ၊ တတော သော ဘတ္တပိဏ္ဍံ ဂဟေတွာ ဌိတော စိန္တေသိ။ ဣတော ကိရ မယာ ပုဗ္ဗေ သမဏဗြာဟ္မဏာနံ ဝါ ကပဏဒ္ဓိကာနံ ဝါ အန္တမသော ကာကသုနခါ ဒီနမ္ပိ အာဟာရံ အဒိန္နပုဗ္ဗံ ဘဝိဿတိ၊ တေနဝါဟံ ဒေဝေါ ဟုတွာပိ ဘတ္တံ န လဘာမိ။ ဟန္ဒာဟံ ဣမံ ဘတ္တပိဏ္ဍံ ထေရဿေဝ ဒဿာမိ၊ တံ မေ ဘဝိဿတိ ဒီဃရတ္တံ ဟိတာယ သုခါယ စာတိ။ ဧဝဉ္စ ပန စိန္တေတွာ ဘတ္တပိဏ္ဍေ အာသံ ပဟာယ ထေရံ ဥပသင်္ကမ္မ သာမိ ဒါသဿ ဝေါ အလံ ဣဓ လောကေန သင်္ဂဟံ။ ပရလောကေန မေ သင်္ဂဟံ ကရောထာတိ ဝတွာ တဿ ပတ္တေ ဩကိရိ။ အထဿ ဘတ္ထပိဏ္ဍံ [ဘတ္ထပိဏ္ဍံ ဣတိသဗ္ဗတ္ထ] ပတ္တေ ပတိတမတ္တေယေဝ တိဂါဝုတဋ္ဌာနေ ဒိဗ္ဗမယာနိ ဘတ္တဘာဇနာနိပညာယိံသု။ ဒေဝပုတ္တော ထေရံ ပဉ္စပတိဋ္ဌိတေန ဝန္ဒိတွာ တတော ဒိဗ္ဗဘောဇနံ ဂဟေတွာ ပထမံ ဒါနံ ဒတွာ ပစ္ဆာ သယံ ဘုဉ္စိ။ တတော ဒေပုတ္တော ဒုတိယဒိဝသတော ပဋ္ဌာယ ထေရဿ စ သမ္ပတ္တမဟာဇနဿ စ မဟာဒါနံ ဒေန္တော အာယုပရိယောသာနေ ¶ ၀ ဒေဝလောကေ နိဗ္ဗတ္တိတွာ ဆသု ကာမသဂ္ဂေသု အပရာပရံ ဒိဗ္ဗသမ္ပတ္တိ မနုဘဝမာနော ပဒုမုတ္တရဿ ဘဂဝတော ကာလေ တတော စုတော ဗာရာဏသိယံ အနေကဝိဘဝဿ မိစ္ဆာဒိဋ္ဌိကဿ ကုဋုမ္ဗိကဿ ဂေဟေ နိဗ္ဗတ္တိ။ ဒေဝေါတိဿ နာမံ အကံသု။ အပရဘာဂေ ဝိညုတံ ပတ္တဿ တဿ မာတာပိတရော ကာလမကံသု။ သောဝဏ္ဏမဏိမုတ္တာဒိပူရိတကောဋ္ဌာဂါရာဒယော ဩလောကေတွာ မမ မာတာပိတရော မိစ္ဆာဒိဋ္ဌိကတ္တာ ဣတော ဒါနာဒိကိဉ္စိကမ္မံ အကရိတွာ ပရလောကံ ဂစ္ဆန္တာ ကာကဏိကမတ္တမ္ပိ အဂဟေတွာ ဂတာ၊ အဟံ ပန တံ ဂဟေတွာဝ ဂမိဿာမီတိ သန္နိဋ္ဌာနံ ကတွာ ဘေရိံ စရာပေတွာ ကပဏဒ္ဓိကဝနိဗ္ဗကေ သန္နိပါတေတွာ သတ္တာဟဗ္ဘန္တရေ သဗ္ဗံ သာပတေယျံ ဒါနမုခေန ဒတွာ အရညံ ပဝိသိတွာ ဣသိပ္ပဗ္ဗဇ္ဇံ ပဗ္ဗဇိတွာ ကသိဏပရိကမ္မံ ကတွာ ပဉ္စ ဘိညာ အဋ္ဌ သမာပတ္တိယော နိဗ္ဗတ္တေတွာ အာကာသစာရီ အဟောသိ။ အထ တသ္မိံသမယေ ပဒုမုတ္တရော နာမ ဘဂဝါ ဟံသဝတီနဂရေ ပဋိဝသန္တော ဒေဝဗြဟ္မာဒိပရိဝုတော စတုသစ္စပဋိသံယုတ္တံ ဓမ္မံ ဒေသေန္တော နိသိန္နော ဟောတိ၊ တဒါ သော တာပသော အာကာသေန ဂစ္ဆန္တော မဟာဇနသမာဂမဉ္စ ဘဂဝတော သရီရတော နိက္ခန္တဆဗ္ဗဏ္ဏရံသိယော စ ဒိသွာ ကိမေတံတိ ဝိမှိတော အာကာသာ ဩတရိတွာ မဟတိယာ ဗုဒ္ဓလီဠာယ နိသီဒိတွာ ဓမ္မံ ဒေသေန္တံ ဘဂဝန္တံ ဒိသွာ ပသန္နမာနသော ပရိသန္တရေ နိသိန္နော ဓမ္မံ သုတွာ ဘဂဝန္တံ ဝန္ဒိတွာ အတ္တနော အဿမမေဝ အဂမာသိ။ အထ သော တတ္ထ ယာဝတာယုကံ ဌတွာ အာယုပရိယောသာနေ တာဝတိံသဘဝနေ နိဗ္ဗတ္တော တိံသကပ္ပေ ဒိဗ္ဗသမ္ပတ္တိမနုဘဝန္တော ဆသု ကာမသဂ္ဂေသု အပရာပရိယဝသေန သံသရိ။ ဧကပညာသအတ္တဘာဝေ သက္ကော ဒေဝရာဇာ အဟောသိ၊ ဧကကဝီသတိအတ္တဘာဝေ စက္ကဝတ္တိ ဟုတွာ မနုဿသမ္ပတ္တိ မနုဘဝိတွာ ဣမသ္မိံဗုဒ္ဓုပ္ပာဒေ ဘဂဝတိ ပရိနိဗ္ဗုတေ သာဝတ္ထိယံ အညတရသ္မိံ ကုလဂေဟေ နိဗ္ဗတ္တိတွာ သတ္တဝဿိကော ဧကံ ဘိက္ခုံ ဓမ္မံ ဒေသေန္တံ အဒ္ဒသ။ ဒိသွာ တံ ဥပသင်္ကမိတွာ ဓမ္မံ သုတွာ အနိစ္စသညံ ¶ ပဋိလဘိတွာ တတ္ထ နိသိန္နောဝ အရဟတ္တံ ပါပုဏိ၊ တတော သော ပတ္တပဋိသမ္ဘိဒေါ အတ္တနာ ကတပုညကမ္မံ ဩလောကေန္တော တံ ပုဗ္ဗစရိယံ ဘိက္ခူနံ မဇ္ဈေ ပကာသေန္တော အာဟ။ တသ္မာ။
နာရဒေါ ကိရ သမ္ဗုဒ္ဓါ၊ ပုဗ္ဗေ အာသိ နရုတ္တမော၊
လောကံ ဒုက္ခာ ပမောစေန္တော၊ ဒဒန္တော အမတံ ပဒံ။
တသ္မိံ တု သမယေ တဿ၊ သာဝကော ဆိန္နဗန္ဓနော၊
ဘိက္ခိတွာ ဒီပကေ လဒ္ဓ၊ မာဟာရံ ပရိဘုဉ္ဇိတုံ။
ရုက္ခမူလ မုပါ ဂဉ္ဆိ၊ တတ္ထာသိံ ရုက္ခဒေဝတာ၊
ဗုဘုက္ခိတာ ဥဒိက္ခန္တီ၊ အဋ္ဌာသိံ တဿ သန္တိကေ။
အဒါသိ မေ ဘတ္တပိဏ္ဍံ၊ ကရုဏာပူရိတန္တရော၊
ဂဟေတွာန ဌိတော ပိဏ္ဍံ၊ သဟမာနော ခုဒံ တဒါ။
အဒိန္နတ္တာ မယာ ပုဗ္ဗေ၊ ကိဉ္စိ ဒါနံ သုပေသလေ၊
ဇိဃစ္ဆာပီဠိတော ဟောမိ၊ ဇာတောပိ ဒေဝယောနိယံ။
အဇ္ဇ ခေတ္တံ သုလဒ္ဓံမေ၊ ဒေယျဓမ္မောပိ ဝိဇ္ဇတိ၊
ဗီဇမေတ္ထ စ ရောပေမိ၊ ဘဝတော ပရိမုတ္တိယာ။
ဣတိ စိန္တိယ ဝန္ဒိတွာ၊ ဒါသဿ သာမိ ဝေါ အလံ၊
သင်္ဂဟံ ဣဓ လောကသ္မိံ၊ ကရောထ ပါရလောကိကံ။
ဣတိ ဝတွာ အဒါသာဟံ၊ ဘုဉ္စိ သောပိ ဒယာပရော၊
တေနာဟံ ပုညကမ္မေန၊ သုဓန္နမလဘိံ ခဏေ။
တတော စုတော ဆဒေဝေသု၊ ဝိန္ဒန္တော မဟတိံသိရိံ၊
စိရကာလံ ဝသိံ တတ္ထ၊ ဒေဝိဒ္ဓီဟိ သမင်္ဂိတာ။
သတသဟဿေ ဣတော ကပ္ပေ၊ ပဒုမုတ္တရနာမကော၊
ဥပ္ပဇ္ဇိ လောကနာယကော၊ ဓမ္မရာဇာ တထာဂတော။
မဟိဒ္ဓိကော ¶ တဒါ အာသိံ၊ တာပသော ကာနနေ ဝနေ၊
သမ္ပတ္တပဉ္စာ ဘိညာဏော၊ အာကာသေန စရာမဟံ။
တဒါ ကာသေန ဂစ္ဆန္တော၊ ရမ္မေ ဟံသဝတီပုရေ၊
ဗုဒ္ဓရံသိပရိက္ခိတ္တံ၊ ကေတုမာလာဝိလာသိတံ။
ဒေဝသင်္ဃပရိဗ္ဗူဠှံ၊ ဒေသေန္တံ အဒ္ဒသံ ဇိနံ၊
သော တံ ဒိသွာန နဘသာ၊ ဌိတောဟံ ပရိသန္တရေ။
ဓမ္မံ သုတွာ ဥဒဂ္ဂေါဟံ၊ ကာလံ ကတွာန သတ္ထုနော၊
တတော စုတော ပပန္နောသ္မိ၊ တာဝတိံသေ မနောရမေ။
တိံသကပ္ပသဟဿာနိ၊ စရန္တော ဒေဝမာနုသေ၊
ဒုဂ္ဂတိံ နာဘိဇာနာမိ၊ လဘာမိ ဝိပုလံ သုခံ။
ဧကပညာသတိက္ခတ္တုံ၊ ဒေဝရဇ္ဇမကာရယိံ၊
အထေကဝီသတိက္ခတ္တုံ၊ စက္ကဝတ္တီ အဟောသဟံ။
ပဒေသရဇ္ဇံ ကာသာဟံ၊ ဗဟုက္ခတ္တုံ တဟိံ တဟိံ၊
ဣမသ္မိံ ဘဒ္ဒကေ ကပ္ပေ၊ နိဗ္ဗုတေတု [နိဗ္ဗုတေသု ဣတိသဗ္ဗတ္ထ] တထာဂတေ။
စောဒိတော ပုညကမ္မေန၊ သာဝတ္ထိပုရမုတ္တမေ၊
ဥပ္ပဇ္ဇိတွာ ကုလေ သေဋ္ဌေ၊ ဇာတိယာ သတ္တဝဿိကော။
သုတွာ ဓမ္မံ ကထေန္တဿ၊ ဘိက္ခုဿညတရဿဟံ၊
ဘဝဿန္တံ ကရိတွာန၊ အရဟတ္တမပါပုဏိံ။
သုဒိန္နံ မေ တဒါ ဒါနံ၊ သုဿုတံ ဓမ္မမုတ္တမံ၊
ဒုက္ခဿန္တံ အကာသာဟံ၊ တဿ ကမ္မဿ ဝါဟသာတိ။
ဧဝဉ္စ ပန ဝတွာ ဗဟူ ဇနေ ကုသလကမ္မေ နိယောဇေသီတိ။
ဒါနေနပေဝံ ¶ စရိမာယ ပိဏ္ဍိယာ၊
သဝဏာယ ဓမ္မဿ မုဟုတ္တကေန၊
လဘန္တိ သတ္တာ တိဝိဓမ္ပိ သမ္ပဒံ၊
ဖလံ ဝဒေ ကော ဗဟုဒါယကဿ ဘော။
ဒေဝပုတ္တဿ ဝတ္ထုံ နဝမံ။
၃၀။ သီဝလိတ္ထေရဿ ဝတ္ထုမှိ အယမာနုပုဗ္ဗီကထာ
ဣတော ကိရ ကပ္ပသတသဟဿမတ္ထကေ ပဒုမုတ္တရော နာမ သတ္ထာ လောကေ ဥဒပါဒိ ဓမ္မဒေသနာယ သတ္တေ အမတမဟာနိဗ္ဗာဏံ ပါပေန္တော၊ တသ္မိံ သမယေ ဘဂဝါ ဟံသာဝတိယံ သရာဇိကာယ ပရိသာယ မဇ္ဈေ ဧကံ ဘိက္ခုံ လာဘီနံ အဂ္ဂဋ္ဌာနေ ဌပေသိ။ တဒါ ရာဇာ တံ ဒိသွာ တံ ဌာနံ ကာမယမာနော ဗုဒ္ဓပမုခဿ သင်္ဃဿ မဟာဒါနံ ဒတွာ ဘဂဝတော ပါဒမူလေ သိရသာ နိပဇ္ဇိ၊ တဒါဿ ဘဂဝါ အနာဂတေ ဂေါတမဿ ဘဂဝတော သာသနေ တံ ဌာနံ လဘိဿသီတိ ဝတွာ ဗျာကာသိ။ တံ သုတွာ မုဒိတော ရာဇာ ပုညာနိ ကတွာ ဒေဝလောကေ နိဗ္ဗတ္တိ။ တတော အပရဘာဂေ ဗာရာဏသိယံ သေဋ္ဌိပုတ္တော ဟုတွာ ပစ္စေကဗုဒ္ဓသဟဿံ စတုပစ္စယဒါနေန ယာဝဇီဝံ ပဋိဇဂ္ဂိတွာ ဒေဝလောကေ နိဗ္ဗတ္တော မဟန္တံ သမ္ပတ္တိ မနုဘဝိတွာ တတော စုတော ဝိပဿိဿ ဘဂဝတော ကာလေ ဗန္ဓုမတီနဂရေ အညတရသ္မိံ ကုလဂေဟေ နိဗ္ဗတ္တိ။ သော တသ္မိံ သမယေ သေနဂုတ္တဋ္ဌာနေ ဌတွာ ရညော ကမ္မံ ကရောတိ၊ တဒါ နဂရဝါသိနော ဥပါသကဂဏာ ဝိပဿီသမ္မာသမ္ဗုဒ္ဓံ ဥပသင်္ကမ္မ ဝန္ဒိတွာ ဘဂဝါ ဘန္တေ သသာဝကော အမှာကံ အနုဂ္ဂဟံ ကရောတူတိ သွာတနာယ နိမန္တေတွာ မဟာဒါနံ ဒတွာ သဗ္ဗေ ဧကစ္ဆန္ဒာ ဘဂဝန္တ မုဒ္ဒိဿ မဟာရဟံ မဟာပရိဝေဏံ ကာရာပေတွာ ပရိဝေဏမဟေ မဟာဒါနံ ဒဒန္တာ ဒါနဂ္ဂေ အသုကံ နာမ ¶ နတ္ထီတိ န ဝတ္တဗ္ဗန္တိ ဝတွာ ဒါနံ ပဋိယာဒေတွာ ဒါနဂ္ဂံ ဩလောကေန္တာ နဝဒဓိဉ္စ ပဋလမဓုဉ္စ အပဿန္တာ ပုရိသေ ပက္ကောသိတွာ သဟဿံ ဒတွာ ဒဓိမဓုံ ခိပ္ပံ ပရိယေသိတွာ အာနေထာတိ ပေသေသုံ၊ တေ သဟဿံ ဂဟေတွာ ဒဓိမဓုံ ဥပဓာရေတုံ တတ္ထ တတ္ထ ဝိစရန္တာ ဒွါရန္တရေ အဋ္ဌံသု၊ တဒါ အယံ သေနဂုတ္တော ရညော သဘတ္တံ ဒဓိမဓုံ အာဒါယ ဂစ္ဆန္တော မဟာဒွါရံ သမ္ပာပုဏိ၊ အထ တေ ဒဓိမဓုံ ဒိသွာ ဘော ကဟာပဏံ ဂဟေတွာ ဣမံ ဒေဟီတိ ယာစိံသု။ တေန [တေနဒဿာမိ ဣတိပိကတ္တစိ] န ဒဿာမီတိ ဝုတ္တေ ယာဝသဟဿံ ဝဍ္ဎေတွာ ယာစိံသု။ တတော သေနဂုတ္တော ဣမံ အပ္ပဂ္ဃံ သဟဿေန ယာစထ၊ ကိ မနေန ကရောထာတိ ပုစ္ဆိ၊ တေဟိ သမ္ဗုဒ္ဓတ္ထာယာတိ ဝုတ္တေ တေနဟိ အဟမေဝ ဒဿာမီတိ ဇီရမရိစာဒီဟိ သက္ခရမဓုဖာဏိတာဒယော ယောဇေတွာ ဒါနဂ္ဂံ ဥပနာမေသိ။ တံ သတ္ထု အာနုဘာဝေန ဗုဒ္ဓပမုခဿ အဋ္ဌသဋ္ဌိဘိက္ခုသတသဟဿဿ ပဟောဏကံ အဟောသိ။ တတော သော တေန ပုညကမ္မေန ဒေဝမနုဿလောကေသု သမ္ပတ္တိ မနုဘဝိတွာ အပရဘာဂေ အမှာကံ ဘဂဝတော ကာလေ ကောလိယနဂရေ မဟာလိလိစ္ဆဝိရညော ဥပနိဿာယ သုပ္ပိယာယ နာမ အဂ္ဂမဟေသိယာ ကုစ္ဆိသ္မိံ ပဋိသန္ဓိံ ဂဏှိ။ သော သတ္တမာသသတ္တသံဝစ္ဆရာနိ မာတုကုစ္ဆိယံ ဝသိတွာ သတ္တဒိဝသာနိ မူဠှဂဗ္ဘော ဒုက္ခမနုဘဝိ။ မာတုကုစ္ဆိတော နိက္ခမန္တဿ တဿ မာတာပိတရော သီဝလီတိ နာမ မကံသု။ ဧဝံ မဟာပုညဿ ဧတ္တကံ ကာလံ မာတုကုစ္ဆိမှိ ဒုက္ခာနုဘဝနံ အတ္တနာဝ ကတေန ပါပဗလေန အဟောသိ၊ သော ကိရ အတီတေ ရာဇာ ဟုတွာ အတ္တနော သပတ္တရညာ သဒ္ဓိံ သင်္ဂါမေန္တော မာတရာ သဒ္ဓိံ မန္တေသိ။ သာ နဂရံ ရုန္ဓိတွာ အမိတ္တေ ဂဏှိတုံ သက္ကာတိ ဥပါယ မဒါသိ၊ သောပိ တဿာ ဝစနေန နဂရံ ရုန္ဓိတွာ သတ္တမေ ဒိဝသေ အဂ္ဂဟေသိ၊ တေန ပါပကမ္မဗလေန မာတာပုတ္တာနံ ဧဝံ မဟန္တံ ဒုက္ခံ အဟောသီတိ။ တတော ¶ သာ ပုတ္တံ ဝိဇာယနကာလေ သတ္တမေ ဒိဝသေ ဘဂဝန္တံ အနုဿရိတွာ သုခေန ဘာရံ မုဉ္စိ။ တုဋ္ဌာ သာ သတ္တမေ ဒိဝသေ ဗုဒ္ဓပမုခဿ ဘိက္ခုသင်္ဃဿ မဟာဒါနံ အဒါသိ၊ အထဿာ ပုတ္တော သတ္တဝဿိကကာလေ ဂေဟာ နိက္ခမ္မ သတ္ထာရံ ဒိသွာ ပဗ္ဗဇ္ဇံ ယာစိ။ သတ္ထာ သာရိပုတ္တတ္ထေရဿ နိယောဇေသိ၊ တတော သာရိပုတ္တတ္ထေရေန ဥပဇ္ဈာယေန မောဂ္ဂလ္လာနမာစရိယံ ကတွာ ပဗ္ဗဇိ၊ အထ သော ခုရဂ္ဂေယေဝ အရဟတ္တံ ပတွာ ဗုဒ္ဓသာသနံ သောဘေသိ၊ သော ပုဗ္ဗေ ကတပုညာနုဘာဝေန မဟာပုညော အဟောသိ လာဘီနဉ္စ အဂ္ဂေါ။ အထေကသ္မိံ သမယေ ဘဂဝါ ရေဝတတ္ထေရံ ဒဿနာယ ခဒိရဝနဝိဟာရံ ဂစ္ဆန္တော တိံသဘိက္ခုသဟဿေဟိ သဒ္ဓိံ တိံသယောဇနိကံ ဆဋ္ဋိတကန္တာရံ သမ္ပာပုဏိ နိရူဒကံ အပ္ပဘက္ခံ။ ယေဘုယျေန ဒေဝတာ သီဝလိတ္ထေရေ ပသန္နာ။ တသ္မာ ဘဂဝါ သီဝလိတ္ထေရံ ပုရတော စာရိကံ ကတွာ ဒေဝတာဟိ ကာရာပိတေ ဝိဟာရေ ဝသန္တော ဒေဝတာဟိ သဇ္ဇိတဒါနံ ပရိဘုဉ္ဇန္တော ရေဝတတ္ထေရံ သံပါပုဏိတွာ ဂတကမ္မံ နိဋ္ဌာပေတွာ ဇေတဝနမာဂမ္မ လာဘီနံ အဂ္ဂဋ္ဌာနေ တံ ဌပေသီတိ။ တေန ဝုတ္တံ အပဒါနေ။
ပဒုမုတ္တရော နာမ ဇိနော၊ သဗ္ဗဓမ္မေသု စက္ခုမာ၊
ဣတော သတသဟဿမှိ၊ ကပ္ပေ ဥပ္ပဇ္ဇိ နာယကော။
သီလံ တဿ အသင်္ချေယျံ၊ သမာဓိ ဝဇိရူပမော [ဝဇိရူပမာ ဣတိကတ္ထစိ]၊
အသံခိယံ ဉာဏဝရံ၊ ဝိမုတ္တိ စ အနောပမာ။
မနုဇာမရနာဂါနံ၊ ဗြဟ္မာနဉ္စ သမာဂမေ၊
သမဏဗြာဟ္မဏာကိဏ္ဏေ၊ ဓမ္မံ ဒေသေတိ နာယကော။
သသာဝကံ မဟာလာဘိံ၊ ပုညဝန္တံ ဇုတိန္ဓရံ၊
ဌပေသိ ဧတဒဂ္ဂမှိ၊ ပရိသာသု ဝိသာရဒေါ။
တဒါဟံ ¶ ခတ္တိယော အာသိံ၊ ပုရေ ဟံသဝတီဝှယေ [ဟံသာဝတဝှယေ ဣတိသဗ္ဗတ္ထ]၊
သုတွာ ဇိနဿ တံ ဝါကျံ၊ သာဝကဿ ဂုဏံ ဗဟုံ။
နိမန္တယိတွာ သတ္တာဟံ၊ ဘောဇယိတွာ သသာဝကံ၊
မဟာဒါနံ ဒဒိတွာန၊ တံ ဌာနမဘိပတ္ထယိံ။
တဒါ မံ ဝိနတံ ပါဒေ၊ ဒိသွာန ပုရိသာသဘော၊
သော သရေန မဟာဝီရော၊ ဣမံ ဝစနမဗြဝီ။
တတော ဇိနဿ ဝစနံ၊ သောတုကာမာ မဟာဇနာ၊
ဒေဝဒါနဝဂန္ဓဗ္ဗာ၊ ဗြဟ္မာနောစ မဟိဒ္ဓိကာ။
သမဏဗြာဟ္မဏာ စာပိ၊ နမဿိသုံ ကတဉ္ဇလီ၊
နမော တေ ပုရိသာဇည၊ နမော တေ ပုရိသုတ္တမ။
ခတ္တိယေန မဟာဒါနံ၊ ဒိန္နံ သတ္တာဟကမ္ပိ [သတ္တာဟကံပိတော ဣတိပိကတ္ထစိ] နော၊
သောတုကာမာ ဖလံ တဿ၊ ဗျာကရောဟိ မဟာမုနေ။
တတော အဝေါစ ဘဂဝါ၊ သုဏောထ မမ ဘာသိတံ၊
အပ္ပမေယျမှိ ဗုဒ္ဓသ္မိံ၊ ဂုဏမှိ သုပ္ပတိဋ္ဌိတာ။
ဒက္ခိဏာ ဒါယကံ ပတွာ၊ အပ္ပမေယျဖလာဝဟာ၊
အပိ စေ သ မဟာဘောဂေါ၊ ဌာနံ ပတ္ထေတိ မုတ္တမံ။
လာဘီ ဝိပုလလာဘီနံ၊ ယထာ ဘိက္ခု သုဒဿနော၊
တထာဟံပိ ဘဝေယျန္တိ၊ လစ္ဆတေ တံ အနာဂတေ။
သတသဟဿိတော ကပ္ပေ၊ ဩက္ကာကကုလသမ္ဘဝေါ၊
ဂေါတမောနာမ နာမေန၊ သတ္ထာ လောကေ ဘဝိဿတိ။
တဿ ဓမ္မေသု ဒါယာဒေါ၊ ဩရသော ဓမ္မနိမ္မိတော၊
သီဝလိ နာမ နာမေန၊ ဟေဿတိ သတ္ထုသာဝကော။
တေန ¶ ကမ္မေန သုကတေန၊ စေတနာပဏိဓီဟိ စ၊
ဇဟိတွာ မာနုသံ ဒေဟံ၊ တာဝတိံသူပဂေါ အဟံ။
တတောပရသ္မိံသမယေ၊ ဗာရာဏသိပုရုတ္တမေ၊
သေဋ္ဌိပုတ္တော အဟံ အာသိံ၊ အဍ္ဎပ္ပတ္တော မဟာဓနော။
သဟဿမတ္တေ ပစ္စေက၊ နာယကေ စ နိမန္တိယ၊
မဓုရေနန္နပါနေန၊ သန္တပ္ပေသိံတဒါဒရော။
တတော စုတော ဆကာမဂ္ဂေ၊ အနုဘောသိံမဟာယသံ၊
ဒေဝစ္ဆရာပရိဝုတော၊ ပါသာဒေ ရတနာမယေ။
ဧဝံ အစိန္တိယာ ဗုဒ္ဓါ၊ ဗုဒ္ဓဓမ္မာ အစိန္တိယာ၊
အစိန္တိယေ ပသန္နာနံ၊ ဝိပါကောပိ အစိန္တိယော။
ဧကနဝုတိတော ကပ္ပေ၊ ဝိပဿီနာမ နာယကော၊
ဥပ္ပဇ္ဇိ စာရုနယနော၊ သဗ္ဗဓမ္မဝိပဿကော။
တဒါဟံ ဗန္ဓုမတိယာ၊ ကုလဿညတရဿ စ၊
ဒယိတော ပတ္ထိတော ပုတ္တော၊ အာသိံ ကမ္မန္တဗျာဝဋော။
တဒါ အညတရော ပူဂေါ၊ ဝိပဿိဿ မဟေသိနော၊
ပရိဝေဏံ အကာရေသိ၊ မဟန္တ မိတိ ဝိဿုတံ။
နိဋ္ဌိတေ စ မဟာဒါနံ၊ ဒဒံ ခဇ္ဇကသံယုတံ၊
နဝံ ဒဓိ မဓုဉ္စေဝ၊ ဝိစိနံ န စ မဒ္ဒသ။
တဒါဟံ တံ ဂဟေတွာန၊ နဝံ ဒဓိ မဓုမ္ပိစ၊
ကမ္မသာမိဃရံ ဂစ္ဆံ၊ တမေနံ [တမေသံ ဣတိသဗ္ဗတ္ထ] ဒါန မဒ္ဒသံ။
သဟဿမ္ပိ စ ဒတွာန၊ န လတိံသု စ တံ ဒွယံ၊
တတော ဧဝံ ဝိစိန္တေသိံ၊ နေတံ ဟေဿတိ ဩရကံ။
ယထာ ¶ ဣမေ ဇနာ သဗ္ဗေ၊ သက္ကရောန္တိ တထာဂတံ၊
အဟမ္ပိ ကာရံ ကဿာမိ၊ သသင်္ဃေ လောကနာယကေ။
တဒါဟမေဝံ စိန္တေတွာ၊ ဒဓိံမဓုဉ္စ ဧကတော၊
ယောဇေတွာ လောကနာထဿ၊ သသင်္ဃဿ အဒါသဟံ။
တေန ကမ္မေန သုကတေန၊ စေတနာပဏိဓီဟိ စ၊
ဇဟိတွာ မာနုသံ ဒေဟံ၊ တာဝတိံသ မဂဉ္ဆဟံ။
ပုနာဟံ ဗာရာဏသိယံ၊ ရာဇာ ဟုတွာ မဟာယသော၊
သတ္တုကဿ တဒါ ရုဒ္ဓါ၊ ဒွါရရောဓံ အကာရယိံ။
တတော သပတ္တိနော [သမ္ပတ္တိနော၊ သပတ္တာနော ဣတိစကတ္ထစိ] ရုဒ္ဓါ၊ ဧကာဟံ ရက္ခိတာ အဟုံ၊
တတော တဿ ဝိပါကေန၊ ပါပုဏိံ နိရယံ ဘုသံ။
ပစ္ဆိမေ စ ဘဝေ ဒါနိ၊ ဇာတောဟံ ကောလိယေ ပုရေ၊
သုပ္ပဝါသာ စ မေ မာတာ၊ မဟာလိ လိစ္ဆဝီ ပိတာ။
ခတ္တိယေ ပုညကမ္မေန၊ ဒွါရရောဓဿ ဝါဟသာ၊
သတ္တမာသေ သတ္တဝဿေ၊ ဝသိံကုစ္ဆိမှိ ဒုက္ခိတော။
သတ္တာဟံ ဒွါရမူဠှောဟံ၊ မဟာဒုက္ခသမပ္ပိတော၊
မာတာ မေ ဆန္ဒဒါနေန၊ ဧဝ မာသိ သုဒုက္ခိတာ။
သုဝတ္ထိတောဟံ နိက္ခန္တော၊ ဗုဒ္ဓေန အနုကမ္ပိတော၊
နိက္ခန္တဒိဝသေယေဝ၊ ပဗ္ဗဇိံ အနဂါရိယံ။
ဥပဇ္ဈာ သာရိပုတ္တော မေ၊ မောဂ္ဂလ္လာနော မဟိဒ္ဓိကော၊
ကေသေ ဩရောပယန္တော မေ၊ အနုသာသိ မဟာမတိ။
ကေသေသု ဆိဇ္ဇမာနေသု [ဆန္နမနေသု ဣတိပိကတ္ထစိ]၊ အရဟတ္တမပါပုဏီံ၊
ဒေဝေါ နာဂါ မနုဿာ စ၊ ပစ္စယာနု ပနေန္တိ မေ။
ပဒုမုတ္တရနာမဉ္စ၊ ဝိပဿိံစ ဝိနာယကံ၊
သံပူဇယိံ ပမုဒိတော၊ ပစ္စယေဟိ ဝိသေသတော။
တတော ¶ တေသံ ဝိပါကေန၊ ကမ္မာနံ ဝိပုလုတ္တမံ၊
လာဘံ လဘာမိ သဗ္ဗတ္ထ၊ ဝနေ ဂါမေ ဇလေ ထလေ။
ရေဝတံ ဒဿနတ္ထာယ၊ ယဒါ ယာတိ ဝိနာယကော၊
တိံသဘိက္ခုသဟဿေဟိ၊ သဟ လောကဂ္ဂနာယကော။
တဒါ ဒေဝေါ ပနီတေဟိ [ပဏီတေဟိ ဣတိသဗ္ဗတ္ထ]၊ မမတ္ထာယ မဟာမတိ၊
ပစ္စယေဟိ မဟာဝီရော၊ သသင်္ဃော လောကနာယကော။
ဥပဋ္ဌိတော မယာ ဗုဒ္ဓါ၊ ဂန္တွာ ရေဝတမဒ္ဒသ၊
တတော ဇေတဝနံ ဂန္တွာ၊ ဧတဒဂ္ဂေ ဌပေသိမံ။
လာဘီနံ သီဝလိ အဂ္ဂေါ၊ မမ သိဿေသု ဘိက္ခဝေါ၊
သဗ္ဗေလောကဟိတော သတ္ထာ၊ ကိတ္တယီ ပရိသာသုမံ။
ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ၊
နာဂေါဝ ဗန္ဓနံ ဆေတွာ၊ ဝိဟရာမိ အနာသဝေါ။
သွာဂတံ ဝတ မေ အာသိ၊ ဗုဒ္ဓသေဋ္ဌဿ သန္တိကံ၊
တိဿော ဝိဇ္ဇာ အနုပ္ပတ္တော၊ ကတံ ဗုဒ္ဓဿ သာသနံ။
ပဋိသမ္ဘိဒါ စတဿောပိ၊ ဝိမောက္ခာ ပိစ အဋ္ဌိမေ၊
ဆဠဘိညာ သစ္ဆိကတာ၊ ကတံ ဗုဒ္ဓဿ သာသနန္တိ။
ဣတ္ထံ သုဒံ အာယသ္မာ သီဝလိတ္ထေရော ဣမာ ဂါထာယော အဘာသိတ္ထာတိ။
သုတွာန ဧတံ စရိတံ မဟဗ္ဘုတံ၊
ပုညာနုဘာဝဉ္စ သိရိံ သိရီမတံ၊
ဟိတွာ ကုသီတံ ကုသလံ ကရောထ၊
ကာမာတ္ထ ကာမံ ဘဝဘောဂနိဗ္ဗုတိံ။
သီဝလိတ္ထေရဿ ဝတ္ထုံ ဒသမံ။
ယက္ခဝဉ္စိတဝဂ္ဂေါ တတိယော။