📜
မဟာသေနဝဂ္ဂေါ
၃၁။ မဟာသေနရညော ဝတ္ထုမှိ အယမာနုပုဗ္ဗီကထာ
ဘဂဝတိ ¶ ပရိနိဗ္ဗုတေ ပါဋလိပုတ္တနဂရေ မဟာသေနော နာမ ရာဇာ ရဇ္ဇံ ကာရေသိ ဓမ္မိကော ဓမ္မရာဇာ။ သော ပန ပိတုပိတာမဟာဒီနံ ဓနရာသိံ ဩလောကေတွာ ဣမေ ဣမံ သာပတေယျံ ပဟာယ မစ္စုနော မုခမုပဂတာ။ အဟော သံသာရိကာနံ အညာဏတာ။ ဓနံ ဌပေတွာ အတ္တနော ဝိနာသဉ္စ အတ္တာနံ ဌပေတွာ ဓနဝိနာသဉ္စ န ဇာနန္တီတိ သမ္ပတ္တိယာ အဓိဂမဉ္စ ဝိနာသံ စာတိ သဗ္ဗံ စိန္တေတွာ ဓမ္မဉ္စ သုတွာ ပဋိလဒ္ဓသဒ္ဓါ ဒိဝသေ ဒိဝသေ ဒသသဟဿာနံ ဘိက္ခူနံ မဓုရေန အန္နပါနေန သန္တပ္ပေန္တော အနေကာနိ ပုညာနိ ဥပစိနန္တော ဧကဒိဝသံ ရဟော ပဋိသလ္လိနော ဧဝံ စိန္တေသိ။ ဧဝံ ရာဇနိယောဂေန ဇနဿ ပီဠနံ ကတွာ ဒိန္နဒါနတော သဟတ္ထေန ကမ္မံ ကတွာ လဒ္ဓေန ဒိန္နဒါနံ မဟပ္ဖလံ မဟာနိသံသံ ဘဝိဿတိ၊ ဧဝံ မယာ ကာတဗ္ဗန္တိ သော သုဟဒါ မစ္စဿ ရဇ္ဇံ နီယျာတေတွာ အတ္တနော ကဏိဋ္ဌိကံ အာဒါယ ကိဉ္စိ အဇာနာပေတွာ အညတရဝေသေန နဂရာ နိက္ခမ္မ ဥတ္တရမဓုရံ နာမ နဂရံ အဂမာသိ၊ တတ္ထ မဟာဝိဘဝေါ ဧကော သေဋ္ဌိ ပဋိဝသတိ၊ တေ သေဋ္ဌိနော သမီပ မုပဂမ္မ ဌိတာ။ တေန ကိမတ္ထာယာဂတာတိ ဝုတ္တေ ရာဇာ တဝ ဂေဟေ ဘတိယာ ကမ္မံ ကရိဿာမီတိ ဝတွာ တေနာနုညာတော တီဏိ ဝဿာနိ ကမ္မ မကာသိ၊ တတော ဧကဒိဝသံ သေဋ္ဌိ တေ ဒိသွာ ပက္ကောသိတွာ အတီဝ တုမှေ သုခုမာလတရာ။ တထာပိ ဣမသ္မိံ ဂေဟေ ကမ္မကရဏေန စိရံ ဝသိတ္ထ၊ ဧတ္တကံ ကာလံ ကိသ္မိဉ္စိ ကမ္မေပိ ကုသီတတ္တံ န ပညာယတိ။ ပဂေဝ အနာစာရမ္ပိ၊ ယာဂုဘတ္တံ ဌပေတွာ အညံ ဥပကာရမ္ပိ မမ သန္တိကာ နတ္ထိ၊ ကေနတ္ထေန ကမ္မံ ကရောထာတိ ပုစ္ဆိ။ ရာဇာ တဿ ဝစနံ သုတွာ ဣမသ္မိံ ဇနပဒေ သာလိနော မနာပဘာဝေါ ဗဟုသော သူယတိ။ တသ္မာ သာလီနမတ္ထာယ ဣဓာ ဂတမှာတိ အာဟ၊ တံ သုတွာ တေသံ တုဋ္ဌော သေဋ္ဌိ သာလီနံ သကဋသဟဿံ အဒါသိ၊ ရာဇာ သာလိံလဘိတွာ သေဋ္ဌိနော ¶ ဧဝမာဟ၊ ဘော ဣမံ အမှာကံ နဂရံ ပါပေထာတိ၊ တံ သုတွာ သေဋ္ဌိ သာဓူတိ ဝတွာ သာလိပရိပုဏ္ဏသကဋသဟဿံ ရညော နဂရံ ပါပေသိ၊ ရာဇာ နဂရံ ဂန္တွာ သေဋ္ဌိဿ နာနာဝဏ္ဏဝတ္ထဟိရညသုဝဏ္ဏာဒီဟိ သကဋေ ပူရေတွာ ပဋိပေသေတွာ မေတ္တိံ ထိရံ ကတွာ အာဘတဝီဟယော ရာဇဂေဟေ သန္နိစယမကာသိ၊ အထ ရာဇာ ကတိပါဟစ္စယေန မုသလံ ပဂ္ဂယှ သဟတ္ထေနေဝ ဝီဟိံ ကောဋ္ဋေတိ၊ ကောဋ္ဋိတကောဋ္ဋိတံ ကဏိဋ္ဌိကာ ပပ္ဖောဋေတိ။ ဧဝံ ဥဘောပိ တဏ္ဍုလာနံ မဟန္တံ ရာသိံ ကတွာ ဒါရူဒကာဒယော အာဟရိတွာ အမ္ဗိလဘတ္တံ ပစိတွာ ရာဇဂေဟေ ပဉ္စသတအာသနာနိ ပညာပေတွာ ကာလံ ဥဂ္ဃောသေသုံ၊ အာဂစ္ဆန္တု အယျာ အနုကမ္ပံ ဥပါဒါယ မမ ဂေဟေ ဘုဉ္ဇန္တူတိ။ တံ သုတွာ ပဉ္စသတာ ဘိက္ခူ အာကာသေန အာဂမိံသု၊ ရာဇာ တေ ယာဝဒတ္ထံ ပရိဝိသိ၊ တတော တေသံ အန္တရေ ပိယံဂုဒီပဝါသီ ဧကော မဟာသိဝတ္ထေရော နာမ ဘတ္တံ ဂဟေတွာ ဧတေ မံ ပဿန္တူတိ အဓိဋ္ဌဟိတွာ အာကာသေန ပိယံဂုဒီပံ ဂန္တွာ ဘတ္တံ ပဉ္စသတာနံ ဘိက္ခူနံ ဒတွာ ပရိဘုဉ္စိ။ တံ တဿာနုဘာဝေန သဗ္ဗေသံ ယာဝဒတ္ထံ အဟောသိ။ ဧဝံ အပ္ပကေနာပိ ဒေယျဓမ္မေန သပ္ပုရိသာ ဒါယကာနံ မနံ ပသာဒေတွာ ပတိဋ္ဌံ ကရောန္တီတိ။ ဝုတ္တဉှိ။
အပ္ပကေနပိ မေဓာဝီ၊ ဒါယကာနံ မနံ ပတိ၊
သဒ္ဓံ ဝဍ္ဎေန္တိ စန္ဒောဝ၊ ရံသိနာ ခီရသာဂရံ။
အဋ္ဌာနေ န နိယောဇေန္တာ၊ ကရောန္တာ နေဝ သန္နိဓိံ၊
ပရိဘောဂ မကတွာန၊ နေဝ နာသေန္တိ ပစ္စယံ။
န ပါပေန္တာစ ထေယျဿ၊ န ကရောန္တာ တထေဝိဏံ၊
ဝိဘဇန္တိ သုသီလေသု၊ သယံ ဘုတွာန သီလဝါတိ။
အထ ရာဇာ ကဏိဋ္ဌိကာယ သဒ္ဓိံ ထတ္ထေဝ ဌိတော ပိယံဂုဒီပေ ပရိဘုဉ္ဇန္တေ ပဉ္စသတဘိက္ခူ ဒိသွာ ဟဋ္ဌော ဥဒဂ္ဂေါ အဟောသိ။ အထ ¶ တေ အပရဘာဂေ အတ္တနာ ကတံ ဒါနဝရံ အနုဿရန္တာ န စိရေနေဝ ဥဘောပိ သောတာပန္နာ အဟေသုံတိ။
န ဂဏေန္တာတ္တနော ဒုက္ခံ၊ ဝိဟာယ မဟတိံ သိရိံ၊
အာယတိံဘဝမိစ္ဆန္တာ၊ သုဇနေဝံ သုဘေ ရတာ။
အာယာသေန ကတံ ပုညံ၊ မဟန္တဖလဒါယကံ၊
ဣတိ မန္တွာန မေဓာဝီ၊ သဟတ္ထေနေဝ တံ ကရေတိ။
မဟာသေနရညော ဝတ္ထုံ ပထမံ။
၃၂။ သုဝဏ္ဏတိလကာယ ဝတ္ထုမှိ အယမာနုပုဗ္ဗီကထာ
လင်္ကာဒီပေ ကိရ အနုရာဓပုရနဂရေ ဧကော မာတုဂါမော [ဧကာမာတုဂါမာတိဝါ ဧကာမာတုဂါမောတိဝါ ကတ္ထစိ] သဒ္ဓါသမ္ပန္နာ နိစ္စံ အဘယုတ္တရစေတိယေ ပုပ္ဖပူဇံ ကရောတိ၊ အထေကဒိဝသံ သာ အတ္တနော ဓီတုယာ သဒ္ဓိံ တသ္မိံ စေတိယေ ပုပ္ဖပူဇနတ္ထာယ [ပုပ္ဖပူဇတ္ထာယ ဣတိကတ္ထစိ] ဂန္တွာ ပုပ္ဖာသနသာလာယ ဥဒကံ အပဿန္တီ ဓီတု ဟတ္ထေ ပုပ္ဖစင်္ဂေါဋကံ ဌပေတွာ ဃဋ မာဒါယ ပေါက္ခရဏိံ အဂမာသိ၊ တတော သာ ဒါရိကာ မာတရိ အနာဂတာယယေဝ [အနာဂတေယေဝ ဣတိသဗ္ဗတ္ထ] အဓောတာသနေ ပုပ္ဖမုဋ္ဌိံဂဟေတွာ မဏ္ဍလံ ကတွာ ပူဇေတွာ ဧဝံ ပတ္ထနမကာသိ။ တထာ ဟိ။
မဟာဝီရဿ ဓီရဿ၊ သယမ္ဘုဿ မဟေသိနော၊
တိလောကဂ္ဂဿ နာထဿ၊ ဘဂဝန္တဿ သတ္ထုနော။
ယ မဟံ ပူဇယိံ ပုပ္ဖံ၊ တဿ ကမ္မဿ ဝါဟသာ၊
ရူပီနံ ပဝရာ ဟေဿံ၊ အာရောဟပရိဏာဟဝါ။
မံ ¶ ဒိသွာ ပုရိသာ သဗ္ဗေ၊ မုစ္ဆန္တု ကာမမုစ္ဆိတာ၊
နိစ္ဆရန္တု သရီရာ မေ၊ ရံသိမာလီဝ ရံသိယော။
ဟဒယင်္ဂမာ ကဏ္ဏသုခါ၊ မဉ္ဇုဘာဏီ သုဘာ မမ၊
ကိန္နရာနံ ယထာ ဝါဏီ၊ ဧဝမေဝ ပဝတ္တတူတိ။
အထဿာ မာတာ အာဂမ္မ အဓောတာသနေ ပူဇိတာနိ ပုပ္ဖာနိ ဒိသွာ ကသ္မာ စဏ္ဍာလီ အဓောတာသနေ ဘဂဝတော ပုပ္ဖာနိ ပူဇေသိ၊ အယုတ္တံ တယာ ကတန္တိ အာဟ၊ တံ သုတွာ သာ မာတုယာ ကုဇ္ဈိတွာ တွံ စဏ္ဍာလီတိ အက္ကောသိ၊ သာ ဧတ္တကံ ပုညာပုညံ ကတွာ အပရဘာဂေ တတော စုတာ ဇမ္ဗုဒီပေ ဥတ္တရမဓုရာယံ ဧကဿ စဏ္ဍာလဂန္ဓဗ္ဗဗြာဟ္မဏဿ ဓီတာ ဟုတွာ နိဗ္ဗတ္တိ၊ ဥတ္တမရူပဓရာ အဟောသိ၊ တဿာ သရီရတော မေဃမုခတော ဝိဇ္ဇုလ္လတာဝိယ ရံသိယော နိစ္ဆရန္တိ။ သမန္တာ စတုဟတ္ထဋ္ဌာနေ သရီရပ္ပဘာယ အန္ဓကာရေ ဝိဓမတိ။ မုခတော ဥပ္ပလဂန္ဓော ဝါယတိ၊ ကာယတော စန္ဒနဂန္ဓော၊ တဿာ ဒွိန္နံ ထနာန မန္တရေ သုဝဏ္ဏဝဏ္ဏံ ဧကံ တိလကံ အဟောသိ၊ တေန ဗာလသုရိယဿ ဝိယ ပဘာ နိစ္ဆရတိ။ ဒိဋ္ဌဒိဋ္ဌာ ယေဘုယျေန ဥမ္မတ္တာ ဝိယ ကာမမဒေန ဝိသညိနော ဟောန္တိ၊ အဟော ကုသလာကုသလာနံ အာနုဘာဝေါ။ တထာ ဟိ။
ယေန သာ ကောဓသာမာတု၊ စဏ္ဍာလီ ဣတိ ဘာသိတာ၊
တေန သာ အာသိ စဏ္ဍာလီ၊ ဇေဂုစ္ဆာ ဟီနဇာတိကာ။
သလ္လက္ခေတွာန သမ္ဗုဒ္ဓ၊ ဂုဏံ ပူဇေသိ ယံ တဒါ၊
တေန ပုညာနုဘာဝေန၊ သာ ဘိရူပီ မနောရမာ။
ယေန ယေန ပကာရေန၊ ပုညပါပါနိ ယော ကရေ၊
တဿ တဿာနုရူပေန၊ မောရောဝ လဘတေ ဖလံ။
ပါပေန စ တိရစ္ဆာနေ၊ ဇာယန္တိ ကုသလေန တေ၊
ဝဏ္ဏပေါက္ခရတာ ဟောတိ၊ မောရာနံ ကမ္မ မီဒိသန္တိ။
တတော ¶ တဿာ မာတာပိတရော သုဝဏ္ဏတိလကာတိ နာမ မကံသု။ တသ္မိံကိရ နဂရေ မနုဿာ တဿာ ရုပဒဿနေနစ သဝဏေနစ သမ္ပတ္တာပိ စဏ္ဍာလဓီတာ အယန္တိ ပရိဘဝဘယေန အာဝါဟံ န ကရောန္တိ။ အထ တသ္မိံ နဂရေ ဇေဋ္ဌစဏ္ဍာလဗြာဟ္မဏဿ ပုတ္တော ဧတမတ္ထာယ တဿာ မာတာပိတုန္နံ သန္တိကံ ဝတ္ထာဘရဏဂန္ဓမာလာဒယော ပေသေသိ သုဝဏ္ဏတိလကံ အမှာကံ ဒဒန္တူတိ၊ တေ တံ ပဝတ္တိံ တဿာ အာရောစေသုံ။ သာဿ ဇိဂုစ္ဆန္တီ ပရိဟာသ မကာသိ။ တတော ဗြာဟ္မဏဿ ပုတ္တော လဇ္ဇိတော ရညော သန္တိကံ ဂန္တွာ ဝီဏံ မုဉ္စေတွာ ဂါယမာနော ဧဝမာဟ။
လလနာ နနာနီ စလလောစနာနီ၊
တရုဏာ ရုဏာနီ စလိတာဓရာဏီ၊
မနုဇော ဟိ ယော နေတ္တပိယံ ကရောတိ၊
သ တု နီစဇာတိံ အပိ နော ဇဟာတိ။
ကိမိဒန္တိ ရညာ ပုဋ္ဌော အာဟ။
သမေတိ ကိံ ဒေဝ ဆမာယ မတ္တိကာ၊
ကဒါစိ စာမီကရဇာတိကာယ၊
သိဂါလဓေနု အပိ နီစဇာတိကာ၊
သမေတိ ကိံသီဟဝရေန ဒေဝါတိ။
ဧဝဉ္စ ပန ဝတွာ ဒေဝ ဣမသ္မိံနဂရေ သုဝဏ္ဏတိလကာ နာမေကာ စဏ္ဍာလဓီတာ အတ္ထိ၊ သာ သမာနဇာတိကေဟိ ပေသိတပဏ္ဏာကာရံ န ဂဏှာတိ၊ ကုလဝန္တေယေဝ ပတ္ထေတိ၊ ကဒါ နာမ ကာကီ သုဝဏ္ဏဟံသေန သမာဂစ္ဆတိ ဒေဝါတိ။ ရာဇာ တံ သုတွာ တဿာ ပိတရံ ပက္ကောသာပေတွာ တမတ္ထံ ဝတွာ သစ္စံ ဘဏေတိ ပုစ္ဆိ၊ သောပိ သစ္စံ ဒေဝ၊ သာ ဇာတိသမ္ပန္နမေဝ ကာမေတီတိ အာဟ။ ရာဇာ ဧဝံ သတိ ဘဏေ ပဉ္စမဓုရနဂရေ ဥဒ္ဒါဠဗြာဟ္မဏော နာမ အတ္ထိ၊ သော ဇာတိသမ္ပန္နော မာတိတောစ ပိတိတောစ အနုပက္ကုဋ္ဌော ¶ ၊ ဇေဂုစ္ဆာ ပဋိက္ကူလာ ဧတာတိ မာတုဂါမေန သဒ္ဓိံ န သံဝသတိ။ အတ္တနော ဂေဟတော ရာဇဂေဟံ ဂစ္ဆန္တောစ အာဂစ္ဆန္တော စ သောဠသခီရောဒကဃဋေဟိ မဂ္ဂေ သိဉ္စာပေသိ။ မာတုဂါမေ ဒိသွာ ကာလကဏ္ဏီ မယာ ဒိဋ္ဌာတိ ခီရောဒကေန မုခံ ဓောဝတိ။ တဝ ဓီတာ သက္ကောန္တီ တေန သဒ္ဓိံ သံဝသတု၊ ဧတမတ္ထံ တဝ ဓီတရံ ကထေဟီတိ အာဟ၊ သောပိ တံ သုတွာ ဂေဟံ ဂန္တွာ ဓီတရံ ပက္ကောသိတွာ ရညာ ဝုတ္တနိယာမေနေဝ တဿာ ကထေသိ။ တာယ တံ သုတွာ သက္ကောန္တီ အဟံ ဥဒ္ဒါဠဗြာဟ္မဏေန သဒ္ဓိံ ဝသိဿာမိ၊ မာ တုမှေ စိန္တေထ၊ ပပဉ္စမ္ပိ မာ ကရောထ၊ ပါတောဝ ဂမိဿာမီတိ ဝုတ္တေ ပိတာ ပနဿာ သာဓူတိ သဟဿဂ္ဃနကစိတ္တကမ္ဗလကဉ္စုကေန ဓီတု သရီရံ ပါရုပါပေတွာ ဝီဏာဒိတုရိယဘဏ္ဍာနိ ဂါဟာပေတွာ ဓီတုယာ သဒ္ဓိံ အဒ္ဓါနမဂ္ဂံ ပဋိပဇ္ဇိ။ ဂစ္ဆန္တော အန္တရာမဂ္ဂေ အညတရသ္မိံ နဂရေ ရညော ဂန္ဓဗ္ဗံ ကရောန္တော ဓီတရံ ပိဋ္ဌိပဿေ နိသီဒါပေတွာ ဂန္ဓဗ္ဗမကာသိ။ အထဿ ပိဋ္ဌိပဿနိသိန္နာ သုဝဏ္ဏတိလကာ နယနကောဋိယာ ဒိဋ္ဌိံ ပါပေန္တီ သရသေန တံ ဩလောကေတွာ ပါရုတကဉ္စုကံ ကိဉ္စိ အပနေတွာ သရီရပ္ပဘံ ပညာပေသိ၊ ရာဇာ ပနဿာ သရီရပ္ပဘံစ ရူပသမ္ပဒံစ ဒိသွာ ကာမာတုရော ဝိဂတသညော သမ္မူဠှော ဟုတွာ မုဟုတ္တေန ပဋိလဒ္ဓဿာသော တဿာ သဿာမိကာဿာမိကဘာဝံ ပုစ္ဆိတွာ စဏ္ဍာလဓီတာတိ သုတွာ ပရိဘဝဘယေန တံ အာနေတု မသက္ကောန္တော ဧဝရူပံ ဝဏ္ဏပေါက္ခရသမ္ပန္နံ ဣတ္ထိရတနံ အလဘန္တဿ မေ ကော အတ္ထော ဇီဝိတေနာတိ သောစန္တော ပရိဒေဝန္တော ကာမမုစ္ဆိတော ကတ္တဗ္ဗာ ကတ္တဗ္ဗံ အဇာနန္တော အသိံ ဂဟေတွာ အတ္တနော သီသံ သယမေဝ ဆိန္ဒိတွာ ကာလ မကာသိ။ ဧဝမေဝ အန္တရာမဂ္ဂေ ပဉ္စရာဇာနော တဿာ ရူပသမ္ပတ္တိမဒမတ္တာ အသိနာ ဆိန္နသီသာ ဇီဝိတက္ခယံ ပါပုဏိံသု။ တထာ ဟိ သတ္တာ ဟိရညသုဝဏ္ဏဒါသိဒါသ ပုတ္တဒါရာဒီသု [ပုတ္တဒါရာဒီဟိ ဣတိသဗ္ဗတ္ထ] ပိယံ နိဿာယ ကာမေန မုစ္ဆိတာ အနယဗျသနံ ပါပုဏန္တီတိ။ ဝုတ္တဉှေတံ ဘဂဝတာ။
ပိယတော ¶ ဇာယတေ သောကော၊
ပိယတော ဇာယတေ ဘယံ၊
ပိယတော ဝိပ္ပမုတ္တဿ၊
နတ္ထိ သောကော ကုတော ဘယံ။
ပေမတော ဇာယတေ သောကော၊
ပေမတော ဇာယတေ ဘယံ၊
ပေမတော ဝိပ္ပမုတ္တဿ၊
နတ္ထိ သောကော ကုတော ဘယံ။
ရတိယာ ဇာယတေ သောကော၊
ရတိယာ ဇာယတေ ဘယံ၊
ရတိယာ ဝိပ္ပမုတ္တဿ၊
နတ္ထိ သောကော ကုတော ဘယံ။
ကာမတော ဇာယတေ သောကော၊
ကာမတော ဇာယတေ ဘယံ၊
ကာမတော ဝိပ္ပမုတ္တဿ၊
နတ္ထိ သောကော ကုတော ဘယံ။
တဏှာယ ဇာယတေ သောကော၊
တဏှာယ ဇာယတေ ဘယံ၊
တဏှာယ ဝိပ္ပမုတ္တဿ၊
နတ္ထိ သောကော ကုတော ဘယံ။
တတော သော အနုက္ကမေန ပဉ္စမဓုရနဂရံ ဂန္တွာ အတ္တနော အာဂတဘာဝံ ရညာ ကထာပေတွာ တေန အနုညာတော ဂန္တွာ ရာဇာနံ အဒ္ဒသ။ တဒါ ဥဒ္ဒါဠဗြာဟ္မဏော ရညော အဝိဒူရေ ကမ္ဗလဘဒ္ဒပီဌေ နိသိန္နော ဟောတိ၊ ဂန္ဓဗ္ဗဗြာဟ္မဏောပိ ဓီတုယာ သဒ္ဓိံ ဂန္ဓဗ္ဗံ ကုရုမာနော နိသီဒိ။ တသ္မိံခဏေ ပိတု ပိဋ္ဌိပဿေ နိသိန္နာ သုဝဏ္ဏတိလကာ ဥဒ္ဒါဠဗြာဟ္မဏော ကတမောတိ ပုစ္ဆိတွာ ဧတသ္မိံ ဘဒ္ဒပီဌေ နိသိန္နောံ ဧသောတိ သုတွာ နိလာမလလောစနေဟိ တံ ဩလောကန္တိ ဒသနရံသိနာ သမ္ဘိန္နသုရတ္တာဓရေန မန္ဒဟသိတံ ¶ ကရောန္တီ တံ ဩလောကေတွာ ပါရုတကဉ္စုကံ အပနေတွာ သရီရပ္ပဘံ ဝိဿဇ္ဇေသိ။ တံ ဒိသွာ ဗြာဟ္မဏော ဥမ္မတ္တော သောကေန ပရိဒဍ္ဎဂတ္တော ဥဏှဝါတေန ပူရိတမုခနာသော အဿုနာ ကိလိန္နနေတ္တော ဝိသညီ အဟောသိ။ တတော သော မုဟုတ္တေန လဒ္ဓဿာသော ရောဂီဝိယ ရညော သကာသာ အပသရန္တော အတ္တနော ဂေဟံ ဂန္တွာ သုဟဒေ ပက္ကောသိတွာ တေသံ ဧဝမာဟ။ ဘဝန္တေတ္ထ။
ယော အာပဒေ သမုပ္ပန္နေ၊
ဥပတိဋ္ဌတိ သန္တိကေ၊
သုခဒုက္ခေ သမော ဟောတိ၊
သော မိတ္တော သောစ ဉာတကော။
ယော ဂုဏံ ဘာသတေ ယဿ၊ အဂုဏဉ္စ နိဂူဟတိ၊
ပဋိသေဓေတျ [ပဋိသေဓေတိကတ္တဗ္ဗာ ဣတိသဗ္ဗတ္ထ] ကတ္တဗ္ဗာ၊ သော မိတ္တော သောစ ဉာတကော။
သုဝဏ္ဏတိလကာနာမ၊ လလနာ ကာမလာလယာ၊
နီလက္ခိစဏ္ဍကဏ္ဍေဟိ၊ ဝိခဏ္ဍေသိ မနော မမ။
တဿာ မုခမ္ဗုဇေ သတ္တာ၊ မမ နေတ္တမဓုဗ္ဗတာ၊
အပ္ပမ္ပိန သရန္တာမံ၊ တတ္ထေဝါ ဘိရမန္တိ တေ။
သဟေဝ တေဟိ မေ စိတ္တံ၊ ဂတံ ဥလ္လံဃိယုဒ္ဓတော၊
လဇ္ဇာဂမ္ဘီရပရိခံ၊ ဓိတိပါကာရမုဂ္ဂတံ။
သမ္မုယှာမိ ပမုယှာမိ၊ သဗ္ဗာ မုယှန္တိ မေ ဒိသာ၊
တဿ မေ သရဏံ ဟောထ၊ ကရောထ မမ သင်္ဂဟန္တိ။
တံ သုတွာ တေ ဧဝမာဟံသု။
ယံ တွမာစရိယ ပတ္ထေသိ၊ စဏ္ဍာလီ သာ အသင်္ဂမာ၊
ကိန္နု မီဠှေန သံယောဂေါ၊ စန္ဒနဿ ကဒါ သိယာ။
အဂမ္မဂမနာ ¶ ယာတိ၊ နရာနံ ဒူရတော သိရီ၊
ကိတ္တိစာယု ဗလံ ဗုဒ္ဓိ၊ အယသံစ သ ဂစ္ဆတီတိ။
အထ တေသံ ဗြဟ္မဏော အာဟ။
န ပရိစ္စဇတိ လောကောယံ၊ အမေဇ္ဈေ မဏိမုတ္တမံ၊
ထီရတနံ ယုဝါဏီ စ၊ ဒုက္ကုလာ အပိ ဂါဟိယာတိ။
ဧဝဉ္စ ပန ဝတွာ တဿာ သဿာမိကာဿာမိကဘာဝံ ဉတွာ အာနေထာတိ အာဟ၊ တေ တထာ အကံသု။ တတော ဗြာဟ္မဏော တာယ ဂေဟံ အာဂတကာလတော ပဋ္ဌာယ စတ္တာရော မာသေ ရညော ဥပဋ္ဌာနံ နေဝ အဂမာသိ။ တဿ ပန ဗြဟ္မဏဿ သန္တိကေ ပဉ္စသတရာဇကုမာရာ နာနာဝိဓာနိ သိပ္ပာနိ ဥဂ္ဂဏှန္တိ။ တေ တံ ကာရဏံ ဉတွာ သုဝဏ္ဏတိလကာယ ဝိဇ္ဇမာနာယ အမှာကံ သိပ္ပုဂ္ဂဟဏဿ အန္တရာယော ဘဝိဿတိ၊ ယေန ကေနစိ ဥပါယေန ဧတံ မာရေတုံ ဝဋ္ဋတီတိ၊ စိန္တေတွာ တေ ဟတ္ထာ စရိယံ ပက္ကောသိတွာ လဉ္ဇံ ဒတွာ ဧဝမာဟံသု၊ ဟတ္ထိံ သုရာယ မတ္တံ ကတွာ သုဝဏ္ဏတိလကံ မာရေဟီတိ။ တတော တေ သဗ္ဗေ ရာဇင်္ဂဏေ သန္နိပတိတွာ ဒူတံ ပါဟေသုံ၊ အာစရိယံ ဒဋ္ဌုကာမမှာတိ။ တတော ဗြာဟ္မဏေန အာဂန္တွာ နိသိန္နေန ပဋိသန္ထာရံ ကတွာ အာစရိယ အာစရိယာနိံ ပဿိတုကာမမှာတိ အာဟံသု။ အထ သော သုဝဏ္ဏတိလကံ ဂဟေတွာ အာဂစ္ဆထာတိ မနုဿေ ပေသေသိ။ တေ တထာ ကရိံသု၊ အထ တဿာ ဝီထိမဇ္ဈံ သမ္ပတ္တကာလေ ဟတ္ထိံ ဝိဿဇ္ဇာပေသုံ။ သော သောဏ္ဍာယ ဘူမိယံ ပဟရန္တော [ပဟရန္တောဥပဓာဝိတွာ ဣတိကတ္ထစိ] ဂစ္ဆန္တော ဥပဓာဝိတွာ သောဏ္ဍေန တံ ဥက္ခိပိတွာ ကုမ္ဘေ နိသီဒါပေသိ။ တတော ရာဇာနော တထာ တံ မာရာပေတု မသက္ကောန္တာ ပုန ဒိဝသေ မနုဿေ ပယောဇေတွာ ရတ္တိယံ မာရာပေသုံ။ ဗြာဟ္မဏောပိ ဧဝရူပံ ဣတ္ထိံ အလသိတွာ ဇီဝနတော မတမေဝ [မတံမေသေယျော ဣတိကတ္ထစိ] သေယျောတိ သောစန္တော ပရိဒေဝန္တော ရာဇင်္ဂဏေ ဒါရုစိတကံ ကာရာပေတွာ အဂ္ဂိံပဝိသိတွာ ¶ မတောတိ။ ဧဝံ မာတုဂါမဝသင်္ဂတာ မဟန္တံ အနယဗျသနဉ္စ မရဏဉ္စ ပါပုဏန္တီတိ။ ဝုတ္တဉှေတံ ဘဂဝတာ။
မာယာဝေသာ [မာယာစေသာ ဣတိကတ္ထစိ] မရီစီဝ၊
သောကော ရောဂေါ စုပဒ္ဒဝေါ၊
ခရာဝ ဗန္ဓနာ စေသာ၊
မစ္စုပါသော ဂုဟာသယော၊
တာသု ယော ဝိဿသေ ပေါသော၊
သော နရေသု နရာဓမောတိ။
အယောနိသော သာ ပုရိမာယ ဇာတိယာ၊
ပုညံ ကရိတွာ အလဘီဒိသံ ဂတိံ၊
ဓီသမ္ပယုတ္တံ [ဓိတိသမ္ပယုတ္တံ ဣတိကတ္ထစိ] ကုသလံ ကရောန္တာ၊
နိဗ္ဗာဏမေဝါဘိမုခံ ကရောထာတိ။
သုဝဏ္ဏတိလကာယ ဝတ္ထုံ ဒုတိယံ။
၃၃။ ကပဏာယ ဝတ္ထုမှိ အယမာနုပုဗ္ဗီကထာ
ဘဂဝတိ ပရိနိဗ္ဗုတေ ဇမ္ဗုဒီပေ တတ္ထ တတ္ထ ဘိက္ခုဘိက္ခုဏိယော စ ဥပါသကဥပါသိကာယော စ ဇယမဟာဗောဓိံ ဝန္ဒိဿာမီတိ ယေဘုယျေန ဂန္တွာ ဝန္ဒန္တိ။ အထာ ပရဘာဂေ ဗဟူ ဘိက္ခူ သင်္ဂမ္မ မဟာဗောဓိံ ဝန္ဒနတ္ထာယ ဂစ္ဆန္တာ အညတရသ္မိံ ဂါမကေ ဘိက္ခာယ စရိတွာ အာသနသာလံ ဂန္တွာ ကတဘတ္တကိစ္စာ ထောကံ ဝိဿမိံသု၊ တဒါ တတ္ထ ဧကာ ကပဏာ ဒုဂ္ဂတိတ္ထီ တထာ နိသိန္နဘိက္ခူ ဒိသွာ ဥပသင်္ကမိတွာ ပဉ္စပတိဋ္ဌိတေန ဝန္ဒိတွာ ဧကမန္တေ ဌိတာ အယျာ ကုဟိံ ဂစ္ဆန္တီတိ ပုစ္ဆိ။ ဘိက္ခူ တံ သုတွာ ဇယမဟာဗောဓိဿ အာနုဘာဝဉ္စ တံ ဝန္ဒနတ္ထာယ အတ္တာနံ ဂမနဉ္စ ကထေန္တာ ဧဝမာဟံသု။
ယတ္ထာသီနော ¶ ဇိနော ဇေသိ၊ သသေနံ မကရဒ္ဓဇံ၊
ဟန္တွာ ကိလေသသေနဉ္စ၊ ဗုဒ္ဓါ အာသိ နိရုတ္တရော။
ယံ ပူဇေသိ မဟာဝီရော၊ ဌိတော ပဒ မကောပယံ၊
သတ္တရတ္တိန္ဒိဝံ နေတ္တ၊ နီလနီရဇရံသိနာ။
သုရာသုရနရာဒီနံ၊ နေတ္တာလိ ပါဠိပါတနာ၊
မေစကာကာရပတ္တေဟိ၊ သိခဏ္ဍီဝိယ ဘာတိ ယော။
သုရပါဒပေါဝ သတ္တာနံ၊ ယံ တိဋ္ဌတိ မဟီတလေ၊
ဣဟ လောကေ ပရတ္တေ စ၊ ဒဒန္တော ဣစ္ဆိတိစ္ဆိတံ။
ယဿ ပုရာဏပဏ္ဏမ္ပိ၊ ပတိတံ ယော နရော ဣဓ၊
ပူဇေတိ တဿ သော ဒေတိ၊ ဘဝဘောဂံ မဟီရုဟော။
ဂန္ဓမာလေဟိ သလိလေဟိ၊ ယမုပါသတိ သဒါ နရော၊
အဇ္ဈတ္တဉ္စ ဗဟိဒ္ဓါ စ၊ ဒုရိတံ သော နိဟညတိ။
ယော ဒေတိ ဣဟလောကတ္ထံ၊
ယော ဒေတိ ပါရလောကိကံ၊
သမ္ပဒံ ဇယဗောဓိံတံ၊
ဘောတိ ဂစ္ဆာမ ဝန္ဒိတုံ။
တံ သုတွာ ဥဒဂ္ဂါ သောမနဿဇာတာ ဘိက္ခူနံ ဧဝမာဟ။ အဟံ ဘန္တေ ပရကုလေ ဘတိယာ ကမ္မံ ကရောန္တီ ဒုက္ခေန ကသိရေန ဇီဝိကံ ကပ္ပေမိ။ သွာတနာယ မေ တဏ္ဍုလနာလိပိ [ဘဏ္ဍုလနာမ္ပ ဣတိသဗ္ဗတ္ထ] နတ္ထိ၊ ပဂေဝ အညံ ဓနံ၊ ဣမံ ဝိနာ အညံ သာဋကမ္ပိ နတ္ထိ၊ ကသ္မာ ပုဗ္ဗေ အကတပုညတ္တာ၊ တသ္မာ ဣမံ ဘန္တေ သာဋကံ မမာနုဂ္ဂဟာယ ဗောဓိမှိ ဓဇံ ဗန္ဓထာတိ ယာစိတွာ သာဋကံ ဓောဝိတွာ တေသံ အဒါသိ။ ဘိက္ခူပိ တဿာနုဂ္ဂဟာယ တံ ဂဟေတွာ အဂမံသု။ သာ သာဋကံ ဒတွာ ပီတိပါမောဇ္ဇမာနသာ ဂေဟံ ဂန္တွာ တဒဟေဝ ရတ္တိယာ မဇ္ဈိမယာမေ သတ္ထကဝါတေန ဥပဟတာ ကာလံ ကတွာ တေသံ ¶ ဘိက္ခူနံ ဂမနမဂ္ဂေ ဧကသ္မိံ ရမဏီယေ ဝနသဏ္ဍေ ဘုမ္မဒေဝတာ ဟုတွာ နိဗ္ဗတ္တီ၊ အထဿာ ပုညာနုဘာဝေန တိယောဇနိကေ ဌာနေ ဒိဗ္ဗကပ္ပရုက္ခာ ပါတုရဟံသု၊ တတ္တ တတ္တ နာနာဝိရာဂဓဇပတာကာ ဩလမ္ဗန္တိ။ ဒေဝပုတ္တာ စ ဒေဝဓီတရော စ သဗ္ဗာဘရဏဝိဘူသိတာ တထေဝ ဓဇပတာကာဒယော ဂဟေတွာ ကီဠန္တိ။ နစ္စဂီတာဒိနေကာနိ အစ္ဆရိယာနိ ပယောဇေန္တိ။ အထ ဒုတိယဒိဝသေ တေပိ ဘိက္ခူ ဗောဓိမဏ္ဍလံ ဂစ္ဆန္တာ သာယဏှေ တံ ဌာနံ ပတွာ အဇ္ဇ ဣမသ္မိံ ဝနသဏ္ဍေ ဝသိတွာ ဂမိဿာမာတိ တတ္ထ ဝါသံ ဥပဂမိံသု၊ တတော တေ ရတ္တိဘာဂေ နာနာဝဏ္ဏဓဇေ စ ဒေဝတာဟိ ပယောဇိယမာနာ ဂီတဝါဒိတာဒယော စ တိယောဇနဋ္ဌာနေ ကပ္ပရုက္ခာနိ စ ဣဒံ သဗ္ဗံ ဒေဝိဿရိယံ တဿာနုဘာဝေန နိဗ္ဗတ္တဘာဝံ ဒိသွာ ဝိမှိတမာနသာ ဒေဝဓီတရံ အာမန္တေတွာ တွံ ကေန ကမ္မေန ဣဓ နိဗ္ဗတ္တာတိ ပုစ္ဆိံသု။ သာ ဘိက္ခူ ဝန္ဒိတွာ အဉ္ဇလိံ ပဂ္ဂယှ ဌိတာ ဘန္တေ မံ န သဉ္ဇာနိတ္ထာတိ အာဟ။ ဘိက္ခူဟိ န မယံ သဉ္ဇာနာမ ဘဂိနီတိ ဝုတ္တေ သာ အတ္တနော သဘာဝံ ကထေန္တီ ဧဝမာဟ။
ဟီယျော အာသနသာလာယ၊ နိသီဒိတ္ထ သမာဂတာ၊
တုမှကံ သန္တိကံ ဂမ္မ၊ ယာ ဝရာကီဘိဝါဒယိ။
ယာ ဗောဓိံ ပူဇနတ္ထာယ၊ ဝတ္ထကံ ပဋိပါဒယိ၊
သာဟံ ဟီယျော စုတာ အာသိံ၊ ရတ္တိယံ ဗျာဓိပီဠိတာ။
နာနာသမ္ပတ္တိသံယုတ္တာ၊ နာနာဘူသနဘူသိတာ၊
ဝိမာနေ ရတနာ ကိဏ္ဏေ၊ ဇာတာဟံ ဧတ္ထ ကာနနေ။
ဟီယျော ပဿိတ္ထ မေ ဂတ္တံ၊ ရဇောဇလ္လေဟိ သံကုလံ၊
အဇ္ဇ ပဿထ မေ ဂတ္တံ၊ ဝဏ္ဏဝန္တံ ပဘဿရံ။
ဟီယျော ပဿိတ္ထ မေ ဘန္တေ၊ နိဝတ္ထံ မလိနမ္ဗရံ၊
အဇ္ဇ ပဿထ မေ ဘန္တေ၊ ဒိဗ္ဗမမ္ဗရမုတ္တမံ။
ဝိကိဏ္ဏဖလိတဂ္ဂေဟိ ¶ ၊ ကေသေဟိ ဝိရလာ ကုလံ၊
ဦကာဂူထပဋိက္ကူလံ၊ ဟီယျော အာသိသိရံ မမ။
အဇ္ဇ တံ ပရိဝတ္တိတွာ၊ မမ ပုညာနုဘာဝတော၊
သုနီလမုဒုဓမ္မိလ္လံ၊ ကုသုမာ ဘရဏဘူသိတံ။
ပုရာ မေ သကသီသေန၊ ဝဟိတံ ဒါရူ ဒကာဒိကံ၊
ပုညေနာဟံ အဇ္ဇ မာလာ၊ ဘာရံ သီသေ သမုဗ္ဗဟေ။
ဓဇတ္ထာယ မယာ ဟီယျော၊ ပဒိန္နံ ထူလသာဋကံ၊
အဇ္ဇ နိဗ္ဗတ္တိ မေ ဘောန္တော၊ မဟန္တံ ဒိဗ္ဗသမ္ပဒံ။
ဇာနမာနေန ကတ္တဗ္ဗံ၊ ဒါနာဒီသု မဟပ္ဖလံ၊
ဒေဝလောကေ မနုဿေသု၊ သုခဒံ ဒါန မုတ္တမန္တိ။
တံ သုတွာ သဗ္ဗေ ဘိက္ခူ အစ္ဆရိယဗ္ဘုတစိတ္တာ အဟေသုံ။ သာ ဒေဝတာ တဿာ ရတ္တိယာ အစ္စယေန ဘိက္ခူ နိမန္တေတွာ ဒိဗ္ဗေဟိ ခဇ္ဇဘောဇ္ဇေဟိ သဟတ္ထာ သန္တပ္ပေတွာ တေဟိ သဒ္ဓိံ အာဂစ္ဆန္တီ အန္တရာမဂ္ဂေ ဒါနံ ဒဒမာနာ မဟာဗောဓိံ ဂန္တွာ သဗ္ဗေဟိ ဓဇပတာကာ ဒီဟိ စ နာနာဝိဓဝဏ္ဏဂန္ဓသမ္ပန္နပုပ္ဖေဟိ စ ဒီပဓူပေဟိ စ ဗောဓိံ ပူဇေတွာ ဘိက္ခူနံ စီဝရတ္ထာယ ဒိဗ္ဗဝတ္ထာနိ ဒတွာ အာဂမ္မ တသ္မိံယေဝ ဝနသဏ္ဍေ ဝသန္တီ နာနာဝိဓာနိ ပုညာနိ ကတွာ တာဝတိံသဘဝနေ နိဗ္ဗတ္တိ။ ဘိက္ခူပိ တံ အစ္ဆရိယံ တတ္ထ တတ္ထ ပကာသေန္တာ ဗဟူဇနေ ပုညကမ္မေ နိယောဇေသုံတိ။
ဧဝံ ဝိဓာပိ ကပဏာ ဇိနသာသနမှိ၊
ကတွာ ပသာဒ မထ ထူလကုစေလကေန၊
ပူဇေတွ ဒိဗ္ဗဝိဘဝံ အလဘီတိ ဉတွာ၊
ပူဇာပရာ ဘဝထ ဝတ္ထုသု တီသု သမ္မာတိ။
ကပဏာယ ဝတ္ထုံ တတိယံ။
၃၄။ ဣန္ဒဂုတ္တတ္ထေရဿ ဝတ္ထုမှိ အယမာနုပုဗ္ဗီကထာ
အမှာကံ ဘဂဝတော ပရိနိဗ္ဗာဏတော ဩရဘာဂေ ဇမ္ဗုဒီပေ ကိရ ပါဋလိပုတ္တံ နာမ နဂရံ အဟောသိ။ တတ္ထ ဓမ္မာသောကော နာမ မဟိဒ္ဓိကော မဟာနုဘာဝေါ အာဏာစက္ကဝတ္တိ ရာဇာ ရဇ္ဇံ ကာရေတိ။ ဥဒ္ဓံ အာကာသတော ဟေဋ္ဌာ ပထဝိယာ ယောဇနပ္ပမာဏေ သကလဇမ္ဗူဒီပေ တဿ အာဏာ ပဝတ္တတိ၊ တဒါ သကလဇမ္ဗုဒီပဝါသိနော စ စတုရာသီတိ နဂရသဟဿေ ရာဇာနော စ အတ္တနော အတ္တနော ဗလဝါဟနေ ဂဟေတွာ အာဂမ္မ ဓမ္မာသောကမဟာရညော ဥပဋ္ဌာနံ ကရောန္တိ။ တသ္မိံ သမယေ ဒေဝပုတ္တနဂရေ ဒေဝပုတ္တော နာမ မဟာရာဇာ အတ္တနော ဗလဝါဟနံ ဂဟေတွာ ရညော ဥပဋ္ဌာနံ အဂမာသိ။ ဓမ္မာသောကော ဒေဝပုတ္တမဟာရာဇာနံ ဒိသွာ မဓုရပဋိသန္ထာရံ ကတွာ တုမှာကံ ရဋ္ဌေ ဗဟုဿုတာ အာဂတာဂမာ မဟာဂုဏဝန္တာ အယျာ အတ္ထီတိ ပုစ္ဆိ။ တံ သုတွာ ဒေဝပုတ္တရာဇာ အတ္ထိ ဒေဝ တသ္မိံ နဂရေ သီဟကုမ္ဘကံ နာမ မဟာဝိဟာရံ။ တတ္ထ အနေကသဟဿဘိက္ခူ ဝိဟရန္တိ သီလဝန္တာ အပ္ပိစ္ဆာ သန္တုဋ္ဌာ ဝိဝေကကာမိနော။ တေသု သာဋ္ဌကထာတိပိဋကဓရော ဣန္ဒဂုတ္တတ္ထေရော နာမ တေသံ ပါမောက္ခော အဟောသိ။ သော အနေကပရိယာယေန သနရာမရာနံ ဘိက္ခူနံ ဓမ္မံဝဏ္ဏေတိ။ ဂုဏဝါ အတ္တနော ဂုဏံ နိဿာယ လောကေ ပါကဋောတိ။ တံ သုတွာ ရာဇာ တုဋ္ဌမာနသော ထေရံ ပဿိတုကာမော ဟုတွာ သမ္မ တွမေဝ ဂန္တွာ ထေရံ ယာစိတွာ ဣဓာ နေဟီတိ အာဟ။ တံ သုတွာ ဒေဝပုတ္တရာဇာ အတ္တနော ဟတ္ထဿဗလဝါဟနာ ဒိမဟာ သေနင်္ဂပရိဝုတော ဣန္ဒဂုတ္တတ္ထေရဿ သန္တိကံ ဂန္တွာ ဝန္ဒိတွာ အယျ အယျံ ဓမ္မာသောကမဟာရာဇာ ဒဋ္ဌုကာမောတိ အာဟ။ ထေရေန သာဓူတိ သမ္ပဋိစ္ဆိတေ ရာဇာ ထေရေန သမ္ပဋိစ္ဆိတဘာဝံ ဓမ္မာသောကမဟာရာဇိနော ပေသေသိ။ တတော ဓမ္မာသောကမဟာရာဇာ သောမနဿပ္ပတ္တော အတ္တနော အာဏာပဝတ္တိတဋ္ဌာနေ ရာဇူနံ သာသနံ ပေသေသိ။ သဗ္ဗေဝ ထေရာဂမနမဂ္ဂံ ¶ အလင်္ကရောန္တူတိ။ အထ တေ ရာဇာနော တုဋ္ဌပဟဋ္ဌာ အတ္တနော အတ္တနော နဂရေ ဘေရိံ စရာပေတွာ ဒေဝပုတ္တနဂရတော ယာဝ ပါဋလိပုတ္တနဂရံ ဧတ္ထန္တရေ ပဉ္စပဏ္ဏာသယောဇနိကံ မဂ္ဂံ ဝိသမံ သမံ ကရောန္တော ဒေဝတာနံ ဒိဗ္ဗဝီထိမိဝ အလင်္ကရိတွာ ဓမ္မာသောကမဟာနရိန္ဒဿ ဧဝံ သာသနံ ပေသေသုံ။ ဘဝန္တေတ္ထ။
ဣန္ဒဂုတ္တမဟာထေရ၊ သာမိနော ဂမနာယ နော၊
မဂ္ဂံ အလင်္ကရောန္တူတိ၊ မဟာရာဇေန ပေသိတံ။
တတော တေ အပနေတွာန၊ ပါသာဏကဏ္ဋကာဒိကံ၊
ဝိသမံ သမံ ကရိတွာန၊ သမ္မဇ္ဇိတွာန သာဓုကံ။
ဓောတမုတ္တာ သမာဘာသာ၊ ဩကိရိတွာန ဝါလုကာ၊
ဥဿာပိတာ တတ္ထ တတ္ထ၊ ဒုဿတောရဏပန္တိယော။
ကလဓောတဟေမရမ္ဘာဒိ၊ နာနာတောရဏပန္တိယော၊
တထာ ပုပ္ဖမယာ နေက၊ တောရဏူပရိတောရဏာ။
တေသု တေသုစ ဌာနေသု၊ သင်္ခတာ ကုသုမဂ္ဃိကာ၊
တထေဝ ဂန္ဓတေလေဟိ၊ ဒီပိတာ ဒီပပန္တိယော။
ပဒုမုပ္ပလသန္နီရ၊ ပုပ္ဖပလ္လဝ လင်္ကတာ၊
ဌပိတာ ဃဋမာလာယော၊ ပုဏ္ဏာ သောဂန္ဓဝါရိဟိ။
နိလပီတာ ဒိသမ္ဘိန္န၊ ပတာကာဟိ ဓဇေဟိ စ၊
မဂ္ဂဿ ဥဘတော ပဿေ၊ ဝနမာသိ သမာကုလံ။
ကေတဝေါ ဥဂ္ဂတာ တတ္ထ၊ မန္ဒမန္ဒသမီရဏာ၊
အဝှယန္တာဝ သောဘန္တိ၊ ဗြဟ္မောရဂသုရာဒယော။
နာဂစမ္ပပုန္နာဂ၊ ကေတကီဝကုလာဒိဟိ၊
ပဒုမုပ္ပလာ ဒိဇလဇေဟိ၊ မာလတီ ကုသုမာ ဒိဟိ။
မာလာဒါမေဟိ ¶ နေကေဟိ၊ မဂ္ဂမာသိ ဝိစိတ္တကံ၊
ပတ္ထရိတွာ ပါဒပဋေ၊ သိတ္တသမ္မတ္တဘူမိယံ။
လာဇာဒိပဉ္စပုပ္ဖာနိ၊ ဝိကိရိံသု မနောရမံ၊
အလင်္ကရိတွာ ဟတ္တဿာ၊ ကုသုမာ ဘရဏာဒိဟိ။
မဂ္ဂါလင်္ကရဏတ္ထာယ၊ ဌပိတာသုံ တတော တတော၊
တေသု တေသု စ ဌာနေသု၊ ဘေရိမဏ္ဍလမဇ္ဈဂါ။
နစ္စန္တိ စာတုရာ နာရီ၊ ရသဘာဝနိရန္တရာ၊
ကံသဝံသာဒိပဂ္ဂယှ၊ ဝဇ္ဇေန္တာနေကတန္တိယော။
ဂါယန္တိ မဓုရံ ဂီတံ၊ ဂါယန္တေတ္ထ လယာနွိတံ၊
မဂ္ဂေါသော သာဓုဝါဒေဟိ၊ ဘေရိတန္တိနဒေဟိစ။
ကရီနံ ကောဉ္စနာဒေဟိ၊ ဟယာနံ ဟေသိတေဟိ စ၊
နေကဝိဋင်္ကသင်္ဃေဟိ၊ သော ကရီဟိ သမာကုလော။
မဂ္ဂဿ ဥဘတော ပဿေ၊ ဒေဝကညူပမာ သုဘာ၊
မာလာကလာပေ ပဂ္ဂယှ၊ တိဋ္ဌန္တိ တုဋ္ဌမာနသာ။
တထာ ပုဏ္ဏဃဋေ ဂယှ၊ ပဒုမုပ္ပလသံကုလေ၊
အဋ္ဌမင်္ဂလမုဂ္ဂယှ၊ တိဋ္ဌန္တိ ပမဒါ တဟိံ။
သီတလူဒကသမ္ပန္န၊ ပပါဟိ သမလင်္ကတာ၊
သိနာနတ္ထံ ခတာ အာသုံ၊ ပေါက္ခရညော တဟိံတဟိံ။
တဟိံတဟိံကတာ အာသုံ၊ ဒါနသာလာ မနောရမာ၊
နိစိတာသုမနေကာနိ၊ ဒါနောပကရဏာ တဟိံ။
ဧဝံ နေကဝိဓာ ပူဇာ၊ အမှေဟိ ပဋိပါဒိတာ၊
ဌပေတွာန မဟာဂင်္ဂံ၊ တံ ဇာနာတု မဟီပတီတိ။
တံ သုတွာ အသောကမဟာရာဇာ ဂင်္ဂံ အလင်္ကရောထာတိ သောဠသယက္ခေ ပေသေသိ၊ တေ သပရိဝါရာ တတ္ထ ဂန္တွာ အတ္တနော ¶ အာနုဘာဝေန ဂင်္ဂါယ အန္တော တိဂါဝုတဋ္ဌာနေ ဥဒုက္ခလပါသာဏေ ဌပေသုံ။ ဌပေတွာ ထမ္ဘေ ဥဿာပေတွာ တုလာသံဃာဋေ ဒတွာ ဟိမဝန္တတော ရတ္တစန္ဒနသာရေ အာဟရိတွာ ပဒရေ သန္ထရိတွာ အနေကေဟိ ပူဇာဝိဓာနေဟိ အလင်္ကရိတွာ ရညော ဧဝံ သာသနံ ပေသေသုံ။ ဘဝန္တေတ္ထ။
ယမတ္ထာယ မယံ သဗ္ဗေ၊ မဟာရာဇေန ပေသိတာ၊
အမှေဟိ ဒါနိ တံ သဗ္ဗံ၊ ကတမေဝ သုဏောထ တံ။
ဂါဝုတတ္တယဂမ္ဘီရံ၊ ဂင်္ဂံ ယောဇနဝိတ္ထတံ၊
ထမ္ဘေ ပတိဋ္ဌပေတွာန၊ အနဂ္ဃံ ရတ္တစန္ဒနံ။
ဟိမဝန္တတော ဟရိတွာန၊ သေတုံ တတ္ထ သုမာပိတံ၊
တောရဏာ စ ဥဘော ပဿေ၊ ရတနေဟိ သုနိမ္မိတာ။
ပုဏ္ဏကုမ္ဘဒ္ဓဇာ စေဝ၊ ပဒီပါဝလိယော တထာ၊
ဥဘော ပဿေသု ရတနာနိ၊ မာပေတွာလမ္ဗနာနိစ။
သုဝဏ္ဏမဏိမုတ္တာဒိ၊ ဒါမေဟိ သမလင်္ကတာ၊
ဝါလုကတ္ထာယ ဩကိဏ္ဏာ၊ ဓောတမုတ္တာ ပဘဿရာ။
တေသု တေသု စ ဌာနေသု၊ ဌပိတာသုံ မဟာမဏီ၊
နာနာရာဂဝိတာနေဟိ၊ သောဘိတာ သေတုနော ပရိ။
ဩလမ္ဗိတာသုံ တတ္ထေဝ၊ ဒိဗ္ဗာဒိကုသုမာဒယော၊
နိဋ္ဌိတံ ဣဓ ကာတဗ္ဗ၊ ယုတ္တံ ပူဇာဝိဓိံတု နော၊
ဒေဝေါတံ ပဋိဇာနာတု၊ ဣတိ ဝတွာန ပေသယုံတိ။
တမ္ပိ သုတွာ အသောကော မဟာရာဇာ တုမှေဝ ထေရံ ဣဓာနေထာတိ တေသံယေဝ သာသနံ ပဋိပေသေသိ၊ တေ သာဓူတိ ဣန္ဒဂုတ္တတ္ထေရဿ သန္တိကံ ဂန္တွာ ဝန္ဒိတွာ ဘန္တေ ပါဋလိပုတ္တနဂရဿ ဂမနာယ ကာလောတိ အာဟံသု၊ တတော ထေရော သဋ္ဌိသဟဿမတ္တေဟိ ¶ ဘိက္ခုသင်္ဃေဟိ ပရိဝုတော ပဉ္စပဏ္ဏာသယောဇနမဂ္ဂံ ပဋိပဇ္ဇိ။ အထာပရံ ဒေဝပုတ္တနဂရဝါသိနော အနေကဝိဓမာလာဂန္ဓဝါသစုဏ္ဏဒ္ဓဇပတာကာဒီဟိ အနေကေဟိ တာလာဝစရေဟိ နစ္စဂီတဝါဒိတေဟိ ပူဇေတွာ အဂမံသု။ အထ ထေရော မဟန္တေန ပူဇာဝိဓာနေန ဇမ္ဗုဒီပဝါသီဟိ ပူဇိယမာနော အနုက္ကမေန စန္ဒဘာဂါယ ဂင်္ဂါယ သေတုံ ပတွာ တတ္ထ မဟန္တံ ပူဇာဝိဓာနံ ဩလောကေန္တော ဧဝံ စိန္တေသိ၊ ဧဝံ ဥဠာရံ ပူဇာဝိဓာနံ ဣဒါနိ ဇမ္ဗုဒီပေ နာညဿ ဟောတိ၊ မယှမေဝေတံ ကတံ။ အဟမေဝေတ္တ ဥတ္တမော အပ္ပဋိမောတိ ဧဝံ သေယျဿ သေယျောဟမသ္မီတိ မာနံ ဥပ္ပာဒေတွာ အဋ္ဌာသိ။ တသ္မိံ ခဏေ ဧကော ခီဏာသဝတ္ထေရော တံ မာနေနုပတ္ထဒ္ဓစေတသာ ဌိတံ ဒိဗ္ဗစက္ခုနာ ဒိသွာ ဥပသင်္ကမိတွာ ဝန္ဒိတွာ ထေရဿ ဩဝဒန္တော ဧဝမာဟ။ တသ္မာ။
မာ မာနဿ ဝသီ ဟောထ၊ မာနော ဘန္တေ ဝသံဂတံ [မာနံဘန္တေဝသီကတံ ဣတိသဗ္ဗတ္ထ]၊
အနတ္ထဒေါ သဒါ ဟောတိ၊ ပါတေတွာန ဘဝါ ဝဋေ။
မာနော ပလာလိတော သတ္တော၊ တဏှာပဋိဃသင်္ဂတော၊
မက္ကဋောရဂသောဏာဒိ၊ ဟုတွာ ဇာယတိ ဇာတိသု။
မာ မာနံ သာမိ ပူရေဟိ၊ အတ္တာနံ ပရိသောဓယ၊
အပရိသုဒ္ဓါ သယော ဘိက္ခု၊ ဒါယကံ န ပရိတောသတိ။
ဒဒန္တာနံ သရန္တာနံ၊ ပူဇေန္တာနံ သစေ တုဝံ၊
မဟပ္ဖလံ မဟာဘူတိံ၊ ကာမတ္ထ ဟောထ နိဗ္ဗဏာတိ [နိမ္မနာ ဣတိကတ္တစိ]။
တံ သုတွာ ထေရော သံသာရေ နိဗ္ဗိန္ဒော တတ္ထေဝ ဌိတော တိလက္ခဏံ ပဋ္ဌပေတွာ ကရဇကာယံ သမ္မသန္တော သဟပဋိ သမ္ဘိဒါဟိ အရဟတ္တံ ပတွာဝ နိက္ခမိ။ တတော ဓမ္မာသောကမဟာရာဇာ ဗလဝါဟနပရိဝုတော မဟန္တေန ပူဇာဝိဓာနေန ပဋိမဂ္ဂံ အာဂမ္မ ဝန္ဒိတွာ ¶ တတော ဒိဂုဏံ ပူဇာသက္ကာရံ ကုရုမာနော မဟာဘိက္ခုသင်္ဃေန သဒ္ဓိံ ထေရံ အတ္တနော နဂရံ နေတွာ တဿ ဓမ္မကထံ သုတွာ ပသန္နမာနသော ပဉ္စသီလေ ပတိဋ္ဌာယ မဟန္တံ ဝိဟာရံ ကာရေတွာ ထေရေန သဟာဂတာနံ သဋ္ဌိသဟဿာနံ ဘိက္ခူနံ စတုပစ္စယေဟိ ဥပဋ္ဌာန မကာသိ၊ အထ ထေရော သာဋ္ဌကထံ ပိဋကတ္တယံ ပကာသေန္တော တသ္မိံ စိရံ ဝသိတွာ တတ္ထေဝ ပရိနိဗ္ဗာယိ။ တတော ရာဇာ သပရိသော တဿ သရီရနိက္ခေပံ ကာရေတွာ ဓာတုယော ဂဟေတွာ မဟန္တံ စေတိယံ ကာရာပေသီတိ။
ပုရာတနာနံ ဘုဝိ ပုညကမ္မိနံ၊
ဂုဏာနုဘာဝေန မဟေန္တိ ဧဝံ၊
သဒေဝကာ နံ မနသီကရောန္တာ၊
ပုညံ ကရောထာ ယတနေ သဒါ ဒရာတိ။
ဣန္ဒဂုတ္တတ္ထေရဿ ဝတ္ထုံ စတုတ္ထံ။
၃၅။ သာခမာလပူဇိကာယ ဝတ္ထုမှိ အယမာနုပုဗ္ဗီကထာ
အမှာကံ ဘဂဝါ ဒသပါရမိယော ပူရေတွာ အနုက္ကမေန တုသိတဘဝနေ နိဗ္ဗတ္တော ဒေဝေဟိ အာရာဓိတော သက္ကရာဇကုလေ ပဋိသန္ဓိံ ဂဟေတွာ မာတုကုစ္ဆိတော နိက္ခန္တော အနုက္ကမေန ပရမာဘိသမ္ဗောဓိံ ပတွာ တတော ပဋ္ဌာယ ပဉ္စစတ္တာလီသသံဝစ္ဆရာနိ ဌတွာ စတုရာသီတိဓမ္မက္ခန္ဓသဟဿာနိ ဒေသေတွာ ဂဏနပထမတီတေ သတ္တေ ဘဝကန္တာရတော သန္တာရေတွာ သဗ္ဗဗုဒ္ဓကိစ္စာနိ နိဋ္ဌာပေတွာ ကုသိနာရာယံ ဥပဝတ္တနေ မလ္လာနံ သာလဝနေ ယမကသာလာန မန္တရေ ဥတ္တရသီသကံ ပညတ္တေ မဉ္စကေ ဝေသာခပုဏ္ဏဒိဝသေ ဒက္ခိဏေန ပဿေန သတော သမ္ပဇာနော အနုဋ္ဌာနသေယျာယ နိပန္နော ပစ္ဆိမယာမေ ဘိက္ခူ ဩဝဒိတွာ ဗလဝပစ္စူ-သ ¶ သမယေ မဟာပထဝိံကမ္ပေန္တော အနုပါဒိသေသာယ နိဗ္ဗာဏဓာတုယာ ပရိနိဗ္ဗာယိ၊ နိဗ္ဗုတေ ပန ဘဂဝတိ လောကနာထေ အာနန္ဒတ္ထေရော မလ္လရာဇူနံ ဧတံ ပဝတ္တိံ အာရောစေသိ။ တတော ကောသိနာရကာ စ ဒေဝဗြဟ္မာဒယော စ သန္နိပတိတွာ နစ္စဂီတဝါဒိတေဟိ မာလာဂန္ဓာဒီဟိ စ သက္ကရောန္တာ ဂရုကရောန္တာ မာနေန္တာ ပူဇေန္တာ စေလဝိတာနာဒယော ကရောန္တာ ဘဂဝတော သရီရံ နဂရမဇ္ဈေ ယတ္ထ မကုဋဗန္ဓနံ နာမ မလ္လာနံ စေတိယံ၊ တတ္ထ နေတွာ စက္ကဝတ္တိဿ သရီရံ ဝိယ အဟတေန ဝတ္ထေန ဝေဌေတွာ တတော ဝိဟတေန ကပ္ပာသေန ဝေဌေတွာတိ ဧဝံ ပဉ္စဒုဿယုဂသတေဟိ ဝေဌေတွာ အာယသာယ တေလဒေါဏိယာ ပက္ခိပိတွာ အညိဿာယ အာယသာယ ဒေါဏိယာ ပဋိကုဇ္ဇိတွာ သဗ္ဗဂန္ဓာနံ စိတကံ ကရိတွာ ဘဂဝတော သရီရံ စိတကံ အာရောပေသုံ။ အထ မဟာကဿပတ္ထေရေန ဘဂဝတော ပါဒေ သိရသာ ဝန္ဒိတေ ဒေဝတာနုဘာဝေန စိတကော သမန္တာ ဧကပ္ပဟာရေနေဝ ပဇ္ဇလိ။ ဘဂဝတော ပန သရီရေ ဒဍ္ဎေ သုမနမကုဠသဒိသာ ဓာတုယော အဝသိဿိံသု။ တသ္မိံ ကိရ သမယေ ကောသလရညော ဇနပဒေ အညတရာ ဂါမဝါသိကာ ဣတ္ထီ ဘဂဝတိ ပရိနိဗ္ဗုတေ သာဓုကီဠှံ အာဂစ္ဆမာနာ အန္တရာမဂ္ဂေ အတ္တနော သရီရေ ဥပ္ပန္နဝါတရောဂေန ဥပဒ္ဒုတာ သာဓုကီဠှံ သမ္ပာပုဏိတုံ အသက္ကောန္တီ သတ္ထု အာဠာဟနံ ဂန္တွာ ဘဂဝတော ဓာတုသရီရေ တီဏိ သာခပုပ္ဖာနိ ပူဇေတွာ ပသန္နမာနသာ ပဉ္စပတိဋ္ဌိတေန ဝန္ဒိတွာ ဂတာ တာယ ဧဝ ရတ္တိယာ မဇ္ဈိမယာမေ ကာလံ ကတွာ တာဝတိံသဘဝနေ တိံသယောဇနိကေ ကနကဝိမာနေ နိဗ္ဗတ္တိ။ တဿာ ပုဗ္ဗကမ္မပကာသနတ္ထံ စက္ကမတ္တာနိ သာခပုပ္ဖာနိ တတ္တ တတ္ထ ဩလမ္ဗန္တိ။ တေဟေဝ သဗ္ဗံ ဝိမာနံ ဧကောဘာသီ [ဧကောဘာသိ တတော ဣတိသဗ္ဗတ္ထ] အဟောသိ။ တတော သုဂန္ဓကရဏ္ဍကံ ဝိယ စ အဟောသိ၊ သာ ပန အတ္တနော သောဘဂ္ဂပ္ပတ္တံ အတ္တဘာဝဉ္စ ဝိမာနသမ္ပဒဉ္စ ပရိဝါရသမ္ပတ္တိယော စ ဒိသွာ ဝိမှိတမာနသာ ပုဗ္ဗေ ကတေန [ပုဗ္ဗေကိဿမေ။ ပုဗ္ဗေကတေနမေ ဣတိစကတ္ထစိ] ¶ ကေန မေ ပုညကမ္မေနာ ယံ လဒ္ဓါတိ ဩလောကန္တီ ဘဂဝတော ဓာတုသရီရသ္မိံ ပူဇိတာနိ တီဏိ သာခပုပ္ဖာနိ ဒိသွာ ပသန္နမာနသာ မဟာစက္ကပ္ပမာဏံ သာခမာလံ ဟတ္ထေန ဓာရေန္တီ ဓာတုပူဇနတ္ထာယ အဂမာသိ။ တဒါ တတ္ထ သန္နိပတိတာ မနုဿာ တဿာ ရူပသမ္ပဒဉ္စ ဟတ္တေ မဟန္တံ သာခမာလဉ္စ ဒိသွာ ဝိမှိတမာနသာ အမ္မ တွံ ကတ္ထ ဝါသိကာ။ ကတ္ထ ပနိမံ ပုပ္ဖံ ပဋိလဒ္ဓန္တိ ပုစ္ဆိံသု၊ တံ သုတွာ ဒေဝဓီတာ အတ္တနာ ဘဂဝတော ဓာတုသရီရဿ ပူဇိတသာခမာလတ္တယာနုဘာဝေန ပဋိလဒ္ဓသမ္ပတ္တိယော စ ဒိဗ္ဗဝိမာနဉ္စ ပုဗ္ဗေ မတကလေဝရံ စာတိ သဗ္ဗံ တေသံ ဒဿေတွာ ဓမ္မဒေသနာဝသာနေ အာဟ။
သမာဂတာ ဘဝန္တာ ဘော၊ ပဿန္တု မမ သမ္ပဒံ၊
ကတမပ္ပေန ကာရေန၊ သမ္မာသမ္ဗုဒ္ဓဓာတုယာ။
သာခမာလာနိ တီဏေဝ၊ ဟီယျောဟံ မုနိဓာတုယာ၊
ပူဇယိတွာန သန္တုဋ္ဌာ၊ နိဝတ္တာ တာယ ရတ္တိယာ။
မရန္တီ ခရဝါတေန၊ တမဟံ သုစရိတံ သရိံ၊
တေနာဟံ ပုညကမ္မေန၊ တာဝတိံသူပဂါအဟုံ။
တတ္ထ မေ အာသိ ပါသာဒေါ၊ တိံသယောဇနမုဂ္ဂတော၊
ကူဋာဂါရဝရာကိဏ္ဏော၊ သာခမာလာတိ [သာဓမာလော ဣတိပိကတ္ထစိ]၊ ဝိဿုတော။
ယထာ သဗ္ဗသုဂန္ဓေဟိ၊ ကရဏ္ဍံ ပရိဘာဝိတံ၊
တထာ ဒိဗ္ဗသုဂန္ဓေဟိ၊ ဂန္ဓိတံ ဘဝနံ မမ။
စက္ကမတ္တာ သာခပုပ္ဖာ၊ တတ္ထ တတ္ထူပလမ္ဗရေ [တတဝတ္ထုပလဗ္ဗရေ ဣတိပိကတ္ထစိ]၊
ဒိဗ္ဗဂန္ဓာ ပဝါယန္တိ၊ မဓုဗ္ဗဘနိသေဝိတာ။
ဘဿန္တိ ဧကပုပ္ဖသ္မာ၊ တုမ္ဗမတ္တာ ဟိ ရေဏဝေါ၊
တေဟိ ပိဉ္ဇရိတာ ဒေဝါ၊ ကီဠန္တိ စ လလန္တိစ။
ပီဠန္ဓိတွာန ¶ မာလာဓယာ၊ သုဒိဗ္ဗာ ဘရဏာနိစ၊
သဟစ္ဆရာ ဒေဝပုတ္တာ၊ နစ္စဂီတာဒိဗျာဝဋာ။
ပဿထေမံ ဘုဇင်္ဂါ ဘော၊ သတ္တာ မောဟေန ပါရုတာ၊
ဟီယျော မတံ ပဝိဒ္ဓံ မေ၊ ပူတိဘူတံ ကလေဝရံ။
ပုဠဝေဟိ သမာကိဏ္ဏံ၊ မက္ခိကာဂဏကီဠိတံ၊
ကာကသောဏာဒိသတ္တာန၊ မာဟာရံ ကုဏပါလယံ။
ပတ္ထေန္တိ ပုရိသာ ပုဗ္ဗေ၊ အနေကောပါယနေန တံ၊
ဒဋ္ဌုမ္ပိဒါနိ နိစ္ဆန္တိ၊ တဏှာယညာဏတာ အဟော။
လောကပဇ္ဇောတကဿာဟံ၊ ဝိမလဿ ယသဿိနော၊
ဓာတုံ ဟီယျော မဟိံ သမ္မာ၊ အဇ္ဇ သဂ္ဂေ ပတိဋ္ဌိတာ။
ဟိတွာနေ တာဒိသံ ကာယံ၊ လဒ္ဓံဒါနိ မမေဒိသံ၊
ဒိဗ္ဗတ္တဘာဝံ သောဘာဟိ၊ ဘာသမာန မုဒိက္ခထ။
ဘာသမာနာယ မေ ဝါစံ၊ သုဏောထေတ္ထ သမာဂတာ၊
နတ္ထေဝါကတပုညဿ၊ အဏုမတ္တံ ဘဝေ သုခံ။
ဗိန္ဒုမတ္တမ္ပိ ယော ပုည၊ ဗီဇံ ရောပေတိ သာသနေ၊
န ဟာ နတ္ထဖလံ [နဟပနန္တဖလံ ဣတိပိကတ္ထစိ] ဟောတိ၊ ယာဝ နိဗ္ဗာဏပတ္တိယာတိ။
ဧဝံ သာ ဒေဝတာ အတ္တနာ ပဋိလဒ္ဓဒိဗ္ဗဝိဘဝံ ဒဿေတွာ ဇနကာယံ ဩဝဒိတွာ ဒိဗ္ဗသာခပုပ္ဖေဟိ ဇိနဓာတုံ ပူဇေတွာ မနုဿာနံ ပဿန္တာနံယေဝ သဒ္ဓိံ ဝိမာနေန ဒေဝလောကမေဝ အဂမာသိ။ တံ ဒိသွာ မဟာဇနော ဒါနာဒီနိ ပုညာနိ ကတွာ ဒေဝလောကံ ပူရေသီတိ။
ဧဝဉှိ ¶ သာ ပုပ္ဖမတ္တေန ဓာတုံ၊
ပူဇေတွ ဒေဝေသု အလတ္ထ ဘူတိံ၊
တုမှေပိ ဘောန္တော တိဒိဝေသု သာတံ၊
ကာမတ္ထ စေ ကတ္ထ ပုညာနိ သာဓုံတိ။
သာခမာလပူဇိကာယ ဝတ္ထုံ ပဉ္စမံ။
၃၆။ မောရိယဗြဟ္မဏဿ ဝတ္ထုမှိ အယမာနုပုဗ္ဗီကထာ
အမှာကံ ဘဂဝတိ ပရိနိဗ္ဗုတေ မဂဓရဋ္ဌေ မစလံ နာမ မဟာဂါမံ အဟောသိ။ တတ္ထ မောရိယောနာမ ဗြာဟ္မဏော ပဋိဝသတိ သဒ္ဓါ ပသန္နော၊ တဿ သေနာနာမေ ကာ ဘရိယာ အတ္ထိ။ သာပိ သဒ္ဓါ ပသန္နာ ရတနတ္တယေသု။ တေ ဥဘောပိ သမဂ္ဂါ သမ္မောဒမာနာ ဘိက္ခုသင်္ဃံ နိမန္တေတွာ နိစ္စံ ဒါနံ ပဝတ္တေန္တာ စီဝရာဒိစတုပစ္စယေဟိ ဥပဋ္ဌဟန္တာ သီလံ ရက္ခန္တာ ဥပေါသထကမ္မံ ကရောန္တာ ဒိဝသံ ဝီတိနာမေန္တိ။ အထဿ ဂေဟေ ဝိဘဝံ ယေဘုယျေန ဒါနာဒီသု ပရိက္ခယမဂမာသိ။ တတော ဗြာဟ္မဏီ သာမိ နော ဂေဟေ ဓနံ ပရိက္ခီဏံ။ ကထံ ဒါနံ ပဝတ္တေယျာမာတိ ဗြာဟ္မဏဿ အာရောစေသိ၊ တတော ဗြာဟ္မဏော မာ ဘဒ္ဒေ စိန္တေသိ။ ယေနကေနစိ ဥပါယေန ဒါနံ ပတိဋ္ဌပေဿာမာတိ ဝတွာ တသ္မိံယေဝ အတ္တနော သဥဿာဟတံ ပကာသောန္တော အာဟ။
ဇာနမာနော ဟိ လောကသ္မိံ၊ ဒါနဿေဒံ ဖလံ ဣတိ၊
န ဒဇ္ဇာ ကော သုသီလေသု၊ အပ္ပမ္ပိ ဒိဝသမ္ပတိ။
သဂ္ဂလောကနိဒါနာနိ၊ ဒါနာနိ မတိမာ ဣဓ၊
ကောဟိနာမ နရော လောကေ၊ န ဒဒေယျ ဟိတေ ရတောတိ။
ဧဝဉ္စ ပန ဝတွာ ဘဒ္ဒေ ဝနံ ပဝိသိတွာ အနေကဝိဓာနိ ပဏ္ဏာနိ စ ဖလာနိ စ ပစ္ဆိပူရံ အာဟရိတွာ ဝိက္ကိဏိတွာပိ ဒါနံ န ဥပစ္ဆိန္ဒိဿာမာတိ ¶ ဝတွာ တတော ပဋ္ဌာယ ဝနံ ဂန္တွာ ပဏ္ဏာနိ စ ဖလာနိ စ အာဟရိတွာ ဝိက္ကိဏိတွာ ဒါနံ ဒေန္တော ပဋိဝသတိ။ အထေကဒိဝသံ ဗြာဟ္မဏော ဝနံ ပဝိဋ္ဌော ပဏ္ဏေဟိ စ ဖလေဟိ စ ပစ္ဆိံ ပူရေတွာ သီသေနာ ဒါယ ဂေဟံ အာဂစ္ဆန္တော ပုပ္ဖဖလပလ္လဝေဟိ ဝိနတံ နေကတရုဂဏနိစိတံ သမ္မတ္တာနေကစာတကစတုပ္ပဒနိသေဝိတံ ဝိပ္ပကိဏ္ဏာနန္တပုပ္ဖပတ္တကိဉ္ဇက္ခစ္ဆန္နဝါဠုကာတလံ သန္ဒမာနသီတလာ မလဇလပ္ပဝါဟံ အကဒ္ဒမာနိန္နသုပတိတ္တေဟိ သုန္ဒရံ ကန္ဒရံ ဒိသွာ ပစ္ဆိံ တီရေ ဌပေတွာ ဩတိဏ္ဏော နဟာယတိ၊ တသ္မိံ ခဏေ တတ္ထ ဧကသ္မိံ ရုက္ခေ အဓိဝတ္ထော ဒေဝပုတ္တော တံ တတ္ထ နဟာယန္တံ ဒိသွာ ကိန္နု ခေါ ဧသ ကလျာဏဇ္ဈာသယော ဝါ ဥဒါဟု ပါပဇ္ဈာသယော သတ္တောတိ ဒိဗ္ဗစက္ခုနာ ဥပဓာရန္တော အစ္ဆရိယပုရိသော ဧသော ဒုဂ္ဂတောပိ ဟုတွာ အတ္တနော ဒါနပ္ပဝေဏိယာ ဥပစ္ဆိဇ္ဇနဘယေန ဝနံ ဂန္တွာ ပဏ္ဏာနိ စ ဖလာနိ စ အာဟရိတွာ ဒုက္ခေန ကသိရေန ဇီဝိကံ ကပ္ပေန္တော ဒါနဓမ္မံ န ဥပစ္ဆိန္ဒတီတိ စိန္တေတွာ တဿ ဂုဏာဒယော ပဋိစ္စ ပစ္ဆိယံ ဌပိတပဏ္ဏာနိ စ ဖလာနိ စ သဗ္ဗာနိ သုဝဏ္ဏာနိ ဟောန္တူတိ အဓိဋ္ဌာသိ။ အထဿာနုဘာဝေန သဗ္ဗံ သုဝဏ္ဏံ အဟောဘိ၊ အထ သော သုဝဏ္ဏပုဏ္ဏပစ္ဆိယံ ဥပရိ သုဝဏ္ဏရာသိမတ္ထကေ သဗ္ဗကာမဒဒံ မဟန္တံ မဏိရတနံ ဌပေတွာ အန္တရဟိတော ပဋိက္ကမ္မ အဋ္ဌာသိ၊ တတော ဗြာဟ္မဏော နဟာတွာ ဥတ္တိဏ္ဏော ပစ္ဆိယံ သမ္ပုဏ္ဏသုဝဏ္ဏဝဏ္ဏရံသိနာ သမ္ဘိန္နဝိဇ္ဇောတမာနမဏိရတနံ ဒိသွာ ကိမေတံတိ အာသင်္ကိတပရိသင်္ကိတော ပစ္ဆိသမီပံ ဂန္တွာ ဟတ္ထံ ပသာရေတုံ အဝိသဟန္တော အဋ္ဌာသိ။ တံ ဒိသွာ ဒေဝပုတ္တော ဒိဿမာနသရီရေန ဌတွာ မာ တွံ ဘာယိ ဗြာဟ္မဏ။ မယာ ဧတာနိ နိမ္မိတာနိ၊ ဂဟေတွာ ဂစ္ဆာဟီတိ အာဟ၊ အထ ဗြာဟ္မဏော ဒေဝပုတ္တဿ ကထံ သုတွာ အယံ ဒေဝပုတ္တော ဣမံ မယာ နိမ္မိတံ၊ ဂဟေတွာ ဂစ္ဆာတိ ဝဒတိ။ ကိန္နု ခေါ သော အတ္တနော အာနုဘာဝေန ဒေတိ၊ ဥဒါဟု မယာ ကတပုညေနာတိ ပုစ္ဆိဿာမိ တံတိ ပဉ္ဇလိကောဝ ဒေဝပုတ္တံ ပုစ္ဆန္တော အာဟ။
ပုစ္ဆာမိ ¶ ပဉ္ဇလီ ဒါနိ၊ ဒေဝပုတ္တ မဟိဒ္ဓိက၊
ဒဒါသိ မေ သုဝဏ္ဏဉ္စ၊ ကာမဒံ မဏိမုတ္တမံ။
နာပိ ကော နော တုဝံ ဉာတိ၊
န မိတ္တော နောပကာရကော၊
ကိံ တွံ အတ္ထဝသံ ဒိသွာ၊
မမ ဒဇ္ဇာသိမံ ဓနံ။
ကေန တပေန သီလေန၊ ကေနာစာရဂုဏေန စ၊
ယေန ဒဇ္ဇာသိ မေ ဒေဝ၊ ကိံ မေ သုစရိတံ စိတံ။
ကိန္နု ပုရာတနံ ကမ္မံ၊ ကေန ကမ္မေန ဒဿသိ၊
အထဝါ တဝိဒ္ဓိယာ ဒေသိ၊ တံ မေ အက္ခာဟိ ပုစ္ဆိတောတိ။
တတော ဒေဝပုတ္တော န ခေါ ပနာဟံ ဗြာဟ္မဏ ဒေဝေါတိ ပရေသံ ကိဉ္စိ ဒါတုံ သက္ကောမိ၊ တယာ ပုဗ္ဗေ ကတသုစရိတာနုဘာဝေန နိဗ္ဗတ္တတီတိ ဝတွာ ဒိဗ္ဗစက္ခုနာ တဿ ပုဗ္ဗကမ္မံ ဒိသွာ တဿ ပကာသေန္တော အာဟ။
ကဿပေ လောကပဇ္ဇောတေ၊ သမ္ဗုဒ္ဓေ ပရိနိဗ္ဗုတေ၊
သဗ္ဗတ္ထ ပတ္ထဋံ အာသိ၊ တဿ ဗုဒ္ဓဿ သာသနံ။
တဒါ ပစ္စန္တိမေ ဂါမေ၊ တွမာသိ ကုလဒါရကော၊
သဒ္ဓါ အာသိ ပသန္နော စ၊ ဒါယကော ကုသလေ ရတော။
တဒါ ပဗ္ဗဇိတော ဧကော၊ ဂစ္ဆန္တော အန္တရာပထေ၊
စောရေဟိ အနုဗဒ္ဓါသိ၊ အစ္ဆိန္နပတ္တစီဝရော။
သာခါဘင်္ဂံ နိဝါသေတွာ၊ ပါရုပိတွာ တထေဝ တံ၊
အန္တောဂါမံ ပဝိဋ္ဌောသိ၊ ဧသမာနော ပိလောတိကေ။
တတော တွံ စရမာနံ တံ၊ ဒိသွာ ကမ္ပိတမာနသော၊
ဝတ္ထယုဂံ အဒါသိ တွံ၊ သဒ္ဒဟံ ဒါနတော ဖလံ။
ပတ္ထောဒနေန ¶ တံ ဘိက္ခုံ၊ ပရိဝိသိတွာ ယထာဗလံ၊
ပေသေသိ အဘိဝါဒေတွာ၊ သဒ္ဓါယ သုဒ္ဓမာနသော။
ဣမံ တွံ အကရီ ပုညံ၊ တုယှေတံ စရိတံ ဣမံ၊
တဿ တေ ပုညကမ္မဿ၊ အမုချဖလ မီဒိသံတိ။
ဧဝဉ္စ ပန ဝတွာ ဣဒံ တေ ဗြာဟ္မဏ ဓနံ ရာဇာဒီဟိ မယာ အနာဟရဏီယံ ကတံ၊ တွံ အပရိသင်္ကန္တော ဂဟေတွာ ယထာဓိပ္ပာယံ ကရောဟိ၊ ဣမံ ခေါ ပန မဏိရတနံ ဣစ္ဆိတိစ္ဆိတံ ပသဝတိ၊ တေနာပိ အာနုဘာဝေန တဝ ဒါနံ အနုပစ္ဆိန္ဒန္တော ပုတ္တဒါရာဒယော ပေါသေဟီတိ အနုသာသိ၊ တံ သုတွာ ဗြာဟ္မဏော တေန ဝုတ္တနိယာမေနေဝ ဘိက္ခုသင်္ဃဿ မဟာဒါနံ ဒဒန္တော သီလံ ရက္ခန္တော စိရံ ဝသိတွာ အပရဘာဂေ တတော စုတော ဒေဝလောကေ နိဗ္ဗတ္တီတိ။
ဧဝံ နိဟီနာပီ ဓနေန သန္တော၊
ဒါနနွယံ နေဝ ပရိစ္စဇန္တိ၊
တသ္မာ ဟိ ဘောန္တော သတိ ဒေယျဓမ္မေ၊
မာ ကတ္ထ ဒါနေသု ပမာဒဘာဝံတိ။
မောရိယဗြာဟ္မဏဿ ဝတ္ထုံ ဆဋ္ဌမံ။
၃၇။ ပုတ္တဝတ္ထုမှိ အယမာနုပုဗ္ဗီကထာ
ဧကသ္မိံ ကိရ သမယေ လင်္ကာဒီပဝါသိနော သဋ္ဌိမတ္တာ ဘိက္ခူ ဇယမဟာဗောဓိံ ဝန္ဒိတုကာမာ ဧကတော မန္တေတွာ မဟာတိတ္ထေန နာဝံ အာရုယှ ဇမ္ဗုဒီပံ ပတွာ တာမလိတ္တိပဋ္ဌေနေ [တမလိတ္တပဋ္ဋနေ ဣတိကတ္ထစိ] ဩတရိတွာ အနုက္ကမေန ပါဋလိပုတ္တနဂရံ ပါပုဏိံသု။ အထ တသ္မိံ ¶ နဂရေ ပိဏ္ဍာယ စရန္တေ တေ ဘိက္ခူ ဧကော ဒုဂ္ဂတမနုဿော ဒိသွာ စိရေန [စိရေနာဟံဒိဋ္ဌာ ဣတိသဗ္ဗတ္ထ] မယာ ဒိဋ္ဌာ ဗုဒ္ဓပုတ္တာတိ သောမနဿော ဘရိယံ ပက္ကောသိတွာ ဘဒ္ဒေ ဣမေသံ အယျာနံ ဒါနံ ဒါတုကာမောမှိ၊ ပုဗ္ဗေ နော အကတပုညတ္တာ ဣဒါနိ ဒုဂ္ဂတာ ဇာတာ၊ ဣမေသု ပုညက္ခေတ္တေသု ဗီဇံ နော စေ ရောပေဿာမ၊ ပုနပိ ဧဝမေဝ ဘဝိဿာမာတိ ဝတွာ ကိံ မေ ဂေဟေ ဒေယျဓမ္မံ အတ္ထီတိ ပုစ္ဆိ။ သာ တံ သုတွာ ဃရေ နော သာမိ အယျာနံ ကိဉ္စိ ဒါတဗ္ဗံ န ပဿာမိ။ အပိ စ မမ ပုတ္တံ မာရေတွာ ဒါနံ ဒါတုံ သက္ကာတိ။ သော တဿာ ကထံ သုတွာ ဘဒ္ဒေ ပုတ္တံ မာရေတွာ ကိံ ဒါနံ ဒေမာတိ အာဟ။ တာယ တံ သုတွာ သာမိ ကိံ န ဇာနာသိ၊ ပုတ္တေ နော မတေ သန္ဒိဋ္ဌသမ္ဘတ္တာ ဉာတိမိတ္တသုဟဇ္ဇာ စ အမှာကံ သန္တိကံ အာဂစ္ဆာန္တာ ကိဉ္စိ ပဏ္ဏာကာရံ ဂဟေတွာ အာဂစ္ဆန္တိ။ မယံ တေန ပဏ္ဏာကာရေန ဒါနံ ဒဿာမာတိ ဝုတ္တေ ဥပါသကော သာဓု တထာ ကရောဟီတိ မာတုယာ ဧဝ ဘာရမကာသိ၊ သာ ပုတ္တံ မာရေတုံ အဝိသဟန္တီ အာဟ။ တထာ ဟိ။
ကိစ္ဆာ လဒ္ဓံ ပိယံ ပုတ္တံ၊ အမ္မမ္မာတိ ပိယံ ဝဒံ၊
သုနီလနေတ္တံ သုဘမုံ၊ ကော ပက္ကမိတုမိစ္ဆတိ။
မာတရာ မာရိယန္တောပိ၊ မာတရမေဝ ရောဒတိ၊
မာရေတုံ တံ န သက္ကောမိ၊ ဟဒယံ မေ ပဝေဓတီတိ။
ဧဝဉ္စ ပန ဝတွာ အဟံ သာမိ န သက္ကောမိ ပုတ္တံ မာရေတုံ။ တွံ မာရေဟီတိ ပုတ္တံ ပိတုသန္တိကံ ပေသေသိ။ အထ သောပိ တံ မာရေတု မသက္ကောန္တော ဧဝမာဟ။ ဝုတ္တဉှိ။
တာယန္တိ ပိတုနော ဒုက္ခံ၊ ပုတ္တာ ပုတ္တာတိ ကိတ္တိတာ၊
ပိတု ဒုက္ခံ သုခံ ပုတ္တာ၊ ဒါယာဒါ ဟောန္တိ သဗ္ဗဒါ။
တသ္မာ ¶ မေ သဒိသံ ပုတ္တံ၊ ပိလ္လကံ မဉ္ဇုဘာသနံ၊
န သက္ကောမိ အဟံ ဘဒ္ဒေ၊ ဇီဝိတာ တံ ဝိယောဇိတုံ။
အယသဉ္စ အကိတ္တိဉ္စ၊ ပပ္ပောတိ ပုတ္တဃာတကော၊
ပါဏာတိပါတကမ္မမ္ပိ၊ ကာမံ သော ဖုသတေ နရောတိ။
ဧဝဉ္စ ပန ဝတွာ သော တွမေဝ တဝ ပုတ္တံ မာရေဟီတိ ပေသေသိ၊ ဧဝံ တေန ဝုတ္တေ ပုတ္ထဿ မာရပါဏူပါယံ ပရိယေသန္တာ ဧဝမာဟံသု၊ အမှေ ပနိမံ မာရေတုံ န သက္ကောမိ၊ အမှာကံ ပစ္ဆာဂေဟေ မဟန္တော ဝမ္မိကော အတ္ထိ၊ တသ္မိံ ဧကော နာဂရာဇာ ပဋိဝသတိ။ ကုမာရံ တတ္ထ ပေသေဿာမ၊ သော တံ ဍသိတွာ မာရေဿတီတိ။ ဣစ္စေတေ ဧသော ခေါ ဥပါယော ဧဝါတိ စိန္တေတွာ ကုမာရံ ပက္ကောသိတွာ အဉ္စနာ ဝလိဝလယာဒီဟိ မဏ္ဍေတွာ တဿ ဟတ္ထေ ဂေဏ္ဍုံ [တေဏ္ဍုံ ဣတိသဗ္ဗတ္ထ] ဌပေတွာ တာတ ပစ္ဆာဂေဟေ ဝမ္မိကသမီပံ ဂန္တွာ ကီဠာတိ ပေသေသုံ။ တတော ဒါရကော ဂန္တွာ ဂေဏ္ဍုကေန ကီဠန္တော ဝမ္မိကဗိလေ ဂေဏ္ဍုကံ ပါတေသိ။ အထ သော ဂေဏ္ဍုကံ ဂဏှိဿာမီတိ ဝမ္မိကသုသိရေ ဟတ္ထံ ပဝေသေသိ။ တတော သပ္ပော ကုဇ္ဈိတွာ သုသူတိသဒ္ဒံ ကရောန္တော မဟန္တံ ဖဏံ ကတွာ ဗိလတော သီသံ ဥက္ခိပိတွာ ဩလောကေန္တော အဋ္ဌာသိ ကုမာရဿ ဟတ္ထတော ပရိဂလိတပါသံဝိယ။ အထဿ ကုမာရော ကိဉ္စိ အဇာနန္တော သပ္ပဿ ဂီဝံ ဒဠှံ ဂဏှိ။ အထဿ မာတာပိတုန္နံ သဒ္ဓါဗလေန နာဂရာဇာ ကုမာရဿ ကရတလေ အဋ္ဌံသံ ဣစ္ဆာဒါယကံ ကဏ္ဌမဏိရတနံ ပါတေသိ။ ကုမာရဿ မာတာပိတရော ဒွါရံ နိဿာယ ဌိတာ တဿ ကိရိယံ ဩလောကေန္တော တံ မဏိရတနံ ဒိသွာ သီဃံ ဂန္တွာ ပုတ္တံ ဥက္ခိပိတွာ ဟတ္ထတော မဏိရတနံ ဂဏှိံသု။ တတော တေ တံ မဏိရတနံ ပရိသုဒ္ဓါသနေ ဌပေတွာ ဥပစာရံ ကတွာ အမှာကံ ဣဒဉ္စိဒဉ္စ ဒေထာတိ အဗ္ဘုက္ကိရိံသု။ အထ တေ မဏိရတနာနုဘာဝေန ဂေဟဒွါရေ မဟန္တံ မဏ္ဍပံ ကာရေတွာ ဝိတာနာဒိနာ မဏ္ဍပံ ¶ အလင်္ကရိတွာ ဘိက္ခူနံ အာသနာနိ ပညာပေတွာ တေ သဋ္ဌိမတ္တေ ဘိက္ခူ နိသီဒါပေတွာ မဟာဒါနံ အဒံသု။ တတော နဂရဝါသိနော မဏိရတနာနုဘာဝံ သုတွာ သန္နိပတိံသု။ အထ တေ တေသံ မဇ္ဈေ အတ္တနော သဒ္ဓါဗလေန မဏိရတနဿ လာဘံ ပကာသေတွာ ဣမဉှိ ဒါနတ္ထာယေဝ ပရိစ္စဇ္ဇာမာတိ ဧကသ္မိံ ဌာနေ ပတိဋ္ဌာပေတွာ တေနာနုဘာဝေန ယာဝဇီဝံ ဒါနံ ဒဒန္တာ သီလံ ရက္ခန္တာ အာယုပရိယောသာနေ ဒေဝလောကေ နိဗ္ဗတ္တိံသူတိ။
ဆေတွာန ပေမံ အပိ အတြဇေသု၊
ဒဒန္တိ ဒါနံ ဣဓ မာနုသေဝံ၊
န ဒဒါတိ ကော နာမ နရော သမိဒ္ဓါ၊
ဒါနဉှိ ဒါနဿ ဖလံ သရန္တောတိ။
ပုတ္တဝတ္ထုံ သတ္တမံ။
၃၈။ တေဘာတိကမဓုဝါဏိဇကာနံ ဝတ္ထုမှိ အယမာနုပုဗ္ဗီကထာ
အတီတေ ကိရ ဗာရာဏသိယံ တေ ဘာတိကာ ဧကတော ဟုတွာ မဓုံ ဝိက္ကိဏန္တာ ပုတ္တဒါရေ ပေါသေန္တိ။ တတော တေသု ဧကော ပစ္စန္တံ ဂန္တွာ မလယဝါသီနံ [မလဝါသီနံ ဣတိပိကတ္ထစိ] ဟတ္ထတော မဓုံ ကိဏိတွာ [ဝက္ကိဏိတွာ ဣတိသဗ္ဗတ္ထ] ဂဏှာတိ၊ ဧကော ဂဟိတဂဟိတမဓုံ နဂရံ အာဟရတိ။ ဧကော တေန အာဟဋာဟဋမဓူနိ ဗာရာဏသိယံ နိသီဒိတွာ ဝိက္ကိဏာတိ။ တသ္မိံ သမယေ ဂန္ဓမာဒနပဗ္ဗတေ ဧကော ပစ္စေကဗုဒ္ဓါ ဝဏရောဂေနာ တုရော အဟောသိ။ အထညတရော ပစ္စေကဗုဒ္ဓါ တဿ မဓုနာ ဖာသု ဘဝိဿတီတိ ဉတွာ ဂန္ဓမာဒနပဗ္ဗတေယေဝ ဌိတော ¶ စီဝရံ ပါရုပိတွာ အာကာသေနာ ဂန္တွာ နဂရဒွါရေ ဩတရိတွာ ကတ္ထ မဓုံ လဘာမီတိ [လဗ္ဘတိ ဣတိသဗ္ဗတ္ထ] ဩလောကေန္တော အဋ္ဌာသီ၊ တဒါ တသ္မိံပရကုလေ ဘတိံ ကတွာ ဇီဝမာနာ ဧကာ စေဋိကာ ဃဋမာဒါယ ဥဒကတ္ထံ တိတ္ထံ ဂစ္ဆန္တီ မဂ္ဂါ ဩက္ကမ္မ ဃဋံ ဌပေတွာ ဝန္ဒိတွာ ဧကမန္တံ အဋ္ဌာသိ၊ တဒါ ပစ္စေကဗုဒ္ဓါ ဘဂိနီ ဧတ္ထ ဘိက္ခာယ စရန္တာနံ ကတရသ္မိံ ဌာနေ မဓု လဗ္ဘတီတိ ပုစ္ဆိ။ သာ တဿ ကထံ သုတွာ မဓုအာပဏဿ ပညာယနဋ္ဌာနေ ဌတွာ ဟတ္ထံ ပသာရေတွာ ဧသ ဘန္တေ မဓုအာပဏောတိ ဒဿေတွာ ယဇ္ဇာယံ ပစ္စေကဗုဒ္ဓါ အာပဏတော မဓုံ န လဘတိ။ မမ နိဝတ္ထဝတ္ထကံ ဒတွာပိ မဓုံ ဒဿာမီတိ စိန္တေတွာ ဩလောကေန္တီ တတ္ထေဝ အဋ္ဌာသိ၊ အထ ပစ္စေကဗုဒ္ဓါ အနုပုဗ္ဗေန ဝိစရန္တော [စရန္တော ဣတိပိကတ္ထစိ] မဓုအာပဏံ သမ္ပာပုဏိ၊ တတော ကုဋိမ္ဗိကော [ကုဋိမ္ဗ ကော ဣတိပိကတ္ထစိ] တံ ဒိသွာ ဟတ္ထတော ပတ္တံ ဂဟေတွာ အာဓာရကေ ဌပေတွာ မဓုဃဋံ အာဒါယ ပတ္တဿ ဥပနာမေန္တော သဟသာ နိက္ကုဇ္ဇိ။ တတော မဓု ပတ္တံ ပူရေတွာ ဥတ္တရန္တော ပုန ဘူမိယံ ပဂ္ဃရိ။ တံ ဒိသွာ သောမနဿော ဝါဏိဇော ဧဝံ ပတ္ထနမကာသိ။
ဝုတ္တဉှိ မဟာဝံသေ။
တတ္ထ ပတ္တဿ ဗုဒ္ဓဿ၊ ဝါဏိဇော သော ပသာဒဝါ၊
ဝိဿန္ဒယန္တော မုခတော၊ ပတ္တပူရံ မဓုံ အဒါ။
ပုဏ္ဏဉ္စ ဥပ္ပတီတဉ္စ၊ ပတိတဉ္စ မဟီတလေ၊
ဒိသွာ မဓုံ ပသန္နော သော၊ ဧဝံ ပဏိဒဟီ တဒါ။
ဇမ္ဗုဒီပေ ဧကရဇ္ဇံ၊ ဒါနေနာနေန ဟောတု မေ၊
အာကာသေ ယောဇနေ အာဏာ၊ ဘူမိယံ ယောဇနေပိတိ။
ဧဝဉ္စ ပန ဝတွာ ပတ္တံ အဒါသိ၊ ပစ္စေကဗုဒ္ဓါ ပတ္တံ ပဋိဂ္ဂဟေတွာ တတ္ထေဝ ဌိတော။
ဣစ္ဆိတံ ¶ ပတ္ထိတံ တုယှံ၊ ခိပ္ပမေဝ သမိဇ္ဈတု၊
ပူရေန္တု စိတ္ထသံကပ္ပာ၊ စန္ဒော ပဏ္ဏရသော ယထာ။
ဣစ္ဆိတံ ပတ္ထိတံ တုယှံ၊ သဗ္ဗမေဝ သမိဇ္ဈတု၊
ပူရေန္တု စိတ္တသံကပ္ပာ၊ မဏိဇောတိရသော ယထာတိ။
ဝတွာ မင်္ဂလံ ဝဍ္ဎေတွာ အဂမာသိ။ အထန္တရာမဂ္ဂေ ဌိတာ ဃဋစေဋိကာ ပစ္စေကဗုဒ္ဓါဘိမုခံ ဂန္တွာ မဓုံ လဘိတ္ထ ဘန္တေတိ ပုစ္ဆိ။ တေန လဒ္ဓံ ဘဂိနီတိ ဝုတ္တေ ကိံ ဝတွာ သော အဒါသီတိ ပုစ္ဆိ။ ပစ္စေကဗုဒ္ဓါ သဗ္ဗံ ကထေသိ။ သာ တံ သုတွာ ထောကံ ဘန္တေ ဣဓေဝ ဟောထ ဒါသိယာ အနုဂ္ဂဟတ္ထာယာတိ သီဃံ ဂေဟံ ဂန္တွာ နိဝတ္ထပိဠောတိကာ အတ္တနော သာဋကံ ဓောဝိတွာ အာဟရိတွာ စုမ္ဗဋကံ ကတွာ ပစ္စေကဗုဒ္ဓဿ အဒါသိ၊ ယဒါ သော ဘန္တေ မဓုဒါယကော သကလဇမ္ဗုဒီပေ ဧကရဇ္ဇံ ကာရေတိ။ တဒါဟံ တဿ အဂ္ဂမဟေသီ ဘဝေယျံတိ ဝတွာ ပတ္ထနံ ကရောန္တီဧဝမာဟ။
ယဒါ တေ မဓုဒေါ ဘန္တေ၊ ဘူဘုဇော ဟောတိ ဘူတလေ၊
တဿ ဟေဿံ တဒါ ဘန္တေ၊ ပိယာ အဂ္ဂမဟေသိကာ။
သုရူပါစ သုဝါဏီစ၊ သုယသာ သုဗ္ဗတာ သုဘာ၊
အဿံ တဿ ပိယာစာထ၊ မနာပါ ဣစ္ဆဒါ [ဣစ္ဆိဒါ ဣတိပိကတ္ထစိ] သဒါတိ။
တဿာပိ တဒါ ပစ္စေကဗုဒ္ဓါ တထေဝ ဟောတူတိ မင်္ဂလံ ဝတွာ အာကာသေန ဂန္ဓမာဒနမေဝ အဂမာသိ၊ အထာပရဘာဂေ တေ တယောပိ ဧကတော ဟုတွာ မဓုလောကနံ ကရောန္တာ တံ မဓုဃဋံ ကုဟိံတိ ပုစ္ဆိံသု၊ သော တေနတ္တနာ ကတကမ္မံ ဝတွာ သစေ တုမှေ တသ္မိံ ပတ္တိံ အနုမောဒေယျာထ၊ တံ သာဓု။ နော စေ။ မဓုအဂ္ဃနကံ မမ ဟတ္ထတော ဂဏှထာတိ ဝတွာ တေဟိ တတော န နော အတ္ထော [နနောဟတ္ထော ဣတိသဗ္ဗတ္ထ] မဓုနာ၊ ကီဒိသဿေတံ အဒါသီတိ ဝုတ္တေ တံ သုတွာ ဣတရော ပစ္စေကဗုဒ္ဓါ နာမေ တေ ဂန္ဓမာဒနေ ဝသန္တိ ကာသာဝံ ¶ ပါရုပိတွာ ကုလေ ကုလေ ဘိက္ခံ စရန္တိ၊ သန္တော ဧတေ သီလဝန္တာတိ ကထေသိ၊ အထ တေသု ဇေဋ္ဌော ဗြာဟ္မဏစဏ္ဍာလကာပိ ကာသာဝံ ပရိဒဟိတွာ စရန္တိ။ နူနာယံ စဏ္ဍာလကောတိ မညာမီတိ အာဟ၊ မဇ္ဈိမော ကုဇ္ဈိတွာ တဝ ပစ္စေကဗုဒ္ဓံ ပရသမုဒ္ဒေ ခိပါဟီတိ အဝေါစ၊ အထ တေသံ ကထံ သုတွာ မဓုဒါယကော မာ ဘော တုမှေ အရိယာနံ မဟေသက္ခာနံ မဟာနုဘာဝါနံ ပစ္စေကဗုဒ္ဓါနံ ဖရုသံ ကထေထ။ နိရယဒုက္ခာ န ဘာယထာတိအာဒိနာ အနေကာ ကာရေန နိဝါရေတွာ တေသံ ဂုဏံ ပကာသေသိ၊ တံ သုတွာ တေ ဥဘောပိ သာဓူတိ ပသန္နာစိတ္တာ အနုမောဒိံသု၊ အပရဘာဂေ တေ ကာလံ ကတွာ ဒေဝမနုဿေသု သံသရန္တာ တတ္ထ တတ္ထ မဟာသမ္ပတ္တိယော အနုဘဝိတွာ အမှာကံ သတ္ထု ပရိနိဗ္ဗာဏတော ဒွိန္နံ ဝဿသတာနံ အစ္စယေန အတ္တနော အတ္တနော သမ္ပတ္တဋ္ဌာနေ နိဗ္ဗတ္တိံသု။ တေန ဝုတ္တံ။
အသောကော မဓုဒေါ သန္ဓိ၊ မိတ္တာဒေဝီ တု စေဋိကာ၊
စဏ္ဍာလဝါဒီ နိဂြောဓော၊ တိဿော သော ပါရဝါဒိကောတိ။
တေသု စဏ္ဍာလဝါဒီ ဇေဋ္ဌဝါဏိဇော ဗိန္ဒုသာရရညော ဇေဋ္ဌပုတ္တဿ သုမနရာဇကုမာရဿ ပုတ္တော ဟုတွာ နိဗ္ဗတ္တိ။ တဿာယမာနုပုဗ္ဗီကထာ။ ဗိန္ဒုသာရရညော ကိရ ဒုဗ္ဗလကာလေယေဝ အသောကကုမာရော အတ္တနာ လဒ္ဓံ ဥဇ္ဇေနိယာ ရဇ္ဇံ ပဟာယ အာဂန္တွာ သဗ္ဗနဂရံ အတ္တနော ဟတ္ထဂတံ ကတွာ သုမနရာဇကုမာရံ အဂ္ဂဟေသိ။ တံ ဒိဝသမေဝ သုမနဿ ရာဇကုမာရဿ သုမနာ နာမ ဒေဝီ ပရိပုဏ္ဏဂဗ္ဘာ အဟောသိ။ သာ အညာတကဝေသေန နိက္ခမိတွာ အဝိဒူရေ အညတရံ စဏ္ဍာလဂါမံ သန္ဓာယ ဂစ္ဆန္တီ ဇေဋ္ဌကစဏ္ဍာလဿ ဂေဟတော အဝိဒူရေ နိဂြောဓော အတ္ထိ၊ တသ္မိံ ရုက္ခေ အဓိဝတ္ထာယ ဒေဝတာယ ဣတော ဧဟိ သုမနေတိ ဝဒန္တိယာ သဒ္ဒံ သုတွာ တဿာ သမီပံ ဂတာ၊ ဒေဝတာ အတ္တနော အာနုဘာဝေန ဧကံ သာလံ နိမ္မိဏိတွာ ဧတ္ထ ဝသာဟီတိ ပါဒါသိ။ သာ ¶ တံ သာလံ ပါဝိသိ၊ ဂတဒိဝသေယေဝ သာ ပုတ္တံ ဝိဇာယိ။ သာ တဿ နိဂြောဓဒေဝတာယ ပရိဂ္ဂဟိတတ္တာ နိဂြောဓောတွေဝ နာမံ အကာသိ။ ဇေဋ္ဌကစဏ္ဍာလော ဒိဋ္ဌဒိဝသတောပ္ပဘုတိ တံ အတ္တနော သာမိဓီတရံ ဝိယ မညမာနော နိဗဒ္ဓဝတ္တံ ပဋ္ဌပေသိ။ ရာဇဓီတာ တတ္ထ သတ္တဝဿာနိ ဝသိ၊ နိဂြောဓကုမာရောပိ သတ္တဝဿိကော ဇာတော၊ တဒါ မဟာဝရုဏတ္ထေရော နာမ ဧကော အရဟာ ဒါရကဿ ဟေတုသမ္ပဒံ ဒိသွာ ဝိဟရမာနော သတ္တဝဿိကော ဒါနိ ဒါရကော။ ကာလော နံ ပဗ္ဗာဇေတုံတိ စိန္တေတွာ ရာဇဓီတာယ အာရောစာပေတွာ နိဂြောဓကုမာရံ ပဗ္ဗာဇေသိ၊ ကုမာရော ခုရဂ္ဂေယေဝ အရဟတ္တံ ပါပုဏိ။ တေန ဝုတ္တံ မဟာဝံသေ။
တံ မဟာဝရုဏော ထေရော၊ တဒါ ဒိသွာ ကုမာရကံ၊
ဥပနိဿယသမ္ပန္နံ၊ အရဟာ ပုစ္ဆိ မာတရံ၊
ပဗ္ဗာဇေသိ ခုရဂ္ဂေ သော၊ အရဟတ္တမပါပုဏီတိ။
သော ကိရ ဧကဒိဝသံ ပါတောဝ သရီရံ ပဋိဇဂ္ဂိတွာ အာစရိယုပဇ္ဈာယဝတ္တံ ကတွာ ပတ္တစီဝရ မာဒါယ မာတုဥပါသိကာယ ဂေဟဒွါရံ ဂစ္ဆာမီတိ နိက္ခမိ။ မာတုနိဝါသဋ္ဌာနဉ္စဿ ဒက္ခိဏဒွါရေန နဂရံ ပဝိသိတွာ နဂရမဇ္ဈေန ဂန္တွာ ပါစီနဒွါရေန နိက္ခမိတွာ ဂန္တဗ္ဗံ ဟောတိ။ တေန စ သမယေန အသောကော ဓမ္မရာဇာ ပါစီနဒိသာဘိမုခေါ သီဟပဉ္ဇရေ စင်္ကမတိ။ တံ ခဏံယေဝ နိဂြောဓော ရာဇင်္ဂဏံ သမ္ပာပုဏိ သန္တိန္ဒြိယော သန္တမာနသော ယုဂမတ္တံ ပေက္ခမာနော၊ တေန ဝုတ္တံ ဧကဒိဝသံ သီဟပဉ္ဇရေ ဌိတော အဒ္ဒသ နိဂြောဓံ သာမဏေရံ ရာဇင်္ဂဏေန ဂစ္ဆန္တံ ဒန္တံ ဂုတ္တံ သန္တိန္ဒြိယံ ဣရိယာပထသမ္ပန္နန္တိ။ ဒိသွာ ပနဿ ဧတဒဟောသိ။ အယံ ဇနော သဗ္ဗောပိ ဝိက္ခိတ္တစိတ္တော ဘန္တမိဂပဋိဘာဂေါ။ အယံ ပန ဒဟရကော အဝိက္ခိတ္တော အတိဝိယဿ အာလောကိတဝိလောကိတံ သမ္မိဉ္ဇနပသာရဏဉ္စ သောဘတိ။ အဒ္ဓါ ဧတဿဗ္ဘန္တရေ လောကုတ္တရဓမ္မော ဘဝိဿတီတိ ရညော သဟ ¶ ဒဿနေနေဝ သာမဏေရေ စိတ္တံ ပသီဒိ၊ ပေမံ သဏ္ဌဟိ၊ ကသ္မာ။ ပုဗ္ဗေ ကိရ ပုညကရဏကာလေ ရညော ဇေဋ္ဌကဘာတာ ဝါဏိဇကောယံ။
ပုဗ္ဗေဝ [ပုဗ္ဗေန ဣတိကတ္ထစိ] သန္နိဝါသေန၊ ပစ္စုပ္ပန္နဟိတေန ဝါ၊
ဧဝံ တံ ဇာယတေ ပေမံ၊ ဥပ္ပလံဝ ယထောဒကေတိ။
အထ ရာဇာ သဉ္ဇာတပေမော သဗဟုမာနော သာမဏေရံ ပက္ကောသထာတိ အမစ္စေ ပေသေသိ၊ တေ အတိစိရာယန္တီတိ ပုန ဒွေ တယော ပေသေသိ တုရိတံ အာဂစ္ဆတူတိ။ သာမဏေရော အတ္တနော ပကတိယာ ဧဝ အဂမာသိ။ ရာဇာ ပတိရူပါသနံ ဉတွာ နိသီဒထာတိ အာဟ။ သော ဣတောစိတော စ ဝိလောကေတွာ နတ္ထိ ဒါနိ အညော ဘိက္ခူတိ သမုဿိတသေတစ္ဆတ္တံ ရာဇပလ္လင်္ကံ ဥပသင်္ကမိတွာ ပတ္တံ ဂဏှနတ္ထာယ ရညော အာကာရံ ဒဿေသိ။ ရာဇာ တံ ပလ္လင်္ကသမီပံ ဂစ္ဆန္တံ ဧဝ ဒိသွာ စိန္တေသိ အဇ္ဇေဝ ဒါနိ အယံ သာမဏေရော ဣမဿ ဂေဟဿ သာမိကော ဘဝိဿတီတိ၊ သာမဏေရော ရညော ဟတ္ထေ ပတ္တံ ဒတွာ ပလ္လင်္ကံ အဘိရုဟိတွာ နိသီဒိ။ ရာဇာ အတ္တနော အတ္ထာယ သမ္ပာဒိတံ သဗ္ဗံ ယာဂုခဇ္ဇကဘတ္တဝိကတိံ ဥပနာမေသိ။ သာမဏေရော အတ္တနော ယာပနမတ္တမေဝ သမ္ပဋိစ္ဆိ။ ဘတ္တကိစ္စာဝသာနေ ရာဇာ အာဟ သတ္ထာရာ တုမှာကံ ဒိန္နဩဝါဒံ ဇာနာထာတိ။ ဇာနာမိ မဟာရာဇ ဧကဒေသေနာတိ။ တာတ မယှမ္ပီ နံ ကထေဟီတိ။ သာဓု မဟာရာဇာတိ ရညော အနုရူပံ ဓမ္မပဧဒ အပ္ပမာဒဝဂ္ဂံ အနုမောဒနတ္ထာယ အဘာသိ။ ရာဇာ ပန အပ္ပမာဒေါ အမတပဒံ၊ ပမာဒေါ မစ္စုနော ပဒံတိ သုတွာဝ အညာတံ တာတ၊ ပရိယောသာပေဟီတိ အာဟ။ သာမဏေရော အနုမောဒနာ ဝသာနေ ဒွတ္တိံသဓုဝဘတ္တာနိ [ဒွိတ္တိံသဓုရဘတ္တာနိ ဣတိသဗ္ဗတ္ထ] လဘိတွာ ပုန ဒိဝသေ ဒွတ္တိံသဘိက္ခူ ဂဟေတွာ ရာဇန္တောပုရံ ပဝိသိတွာ ဘတ္တကိစ္စ မကာသိ။ ရာဇာ အညေပိ ဒွတ္တိံသဘိက္ခူ တုမှေဟိ သဒ္ဓိံသွေ ဘိက္ခံ ဂဏှန္တူတိ ဧတေနေဝ ဥပါယေန ဒိဝသေ ¶ ဒိဝသေ ဝဍ္ဎာပေန္တော သဋ္ဌိသဟဿာနံ ဗြာဟ္မဏပရိဗ္ဗာဇကာနံ ဘတ္တံ ဥပစ္ဆိန္ဒိတွာ အန္တောနိဝေသနေ သဋ္ဌိသဟဿာနံ ဘိက္ခူနံ နိစ္စဘတ္တံ ပဋ္ဌပေသိ နိဂြောဓတ္ထေရဂတေနေဝ ပသာဒေန။ နိဂြောဓတ္ထေရောပိ ရာဇာနံ သပရိသံ တီသု သရဏေသု ပဉ္စသု သီလေသု ပတိဋ္ဌာပေတွာ ဗုဒ္ဓသာသနေ ပေါထုဇ္ဇနိကေန ပသာဒေန အစလပ္ပသာဒံ ကတွာ ပတိဋ္ဌာပေသိ။ ရာဇာပိ အသောကာရာမံ နာမ မဟာဝိဟာရံ ကာရာပေတွာ သဋ္ဌိသဟဿာနံ ဘိက္ခူနံ နိစ္စဘတ္တံ ပဋ္ဌပေသိ။ သကလဇမ္ဗုဒီပေ စတုရာသီတိယာ နဂရသဟဿေသု စတုရာသီတိဝိဟာရသဟဿာနိ ကာရာပေသိ။ တေန ဝုတ္တံ။
စဏ္ဍာလဝါဒိဒေါသေန၊
ဇာတော စဏ္ဍာလဂါမကေ၊
ပတ္တာနုမောဒနာ ပါကာ၊
အာသေ သော [အသေသော ဣတိပိကတ္ထစိ] ဟိ အနာသဝေါတိ။
အယံ နိဂြောဓတ္ထေရဿ ကထာနယော။
မဓုဒါယကော ပန ဝါဏိဇော ဒေဝလောကတော စဝိတွာ ပုပ္ဖပုရေ ရာဇကုလေ ဥပ္ပဇ္ဇိတွာ ပိယဒါသော နာမ ကုမာရော ဟုတွာ ဆတ္တံ ဥဿာပေတွာ သကလဇမ္ဗုဒီပေ ဧကရဇ္ဇံ အကာသိ။ ကထံ။
ဗိန္ဒုသာရရာဇဿ ဧကသတပုတ္တာ အဟေသုံ။ တေ သဗ္ဗေ အသောကော အတ္တနာ သဒ္ဓိံ ဧကမာတိကံ တိဿကုမာရံ ဌပေတွာ ဃာတေသိ။ ဃာတေန္တော စတ္တာရိ ဝဿာနိ အနဘိသိတ္တောဝ ရဇ္ဇံ ကာရေတွာ စတုန္နံ ဝဿာနံ အစ္စယေန တထာဂတဿ ပရိနိဗ္ဗာဏတော ဒွိန္နံ ဝဿသတနံ ဥပရိ အဋ္ဌာရသမေ ဝဿေ သကလဇမ္ဗုဒီပေ ဧကရဇ္ဇာဘိသေကံ ပါပုဏိ။ အထ တံ သကလဇမ္ဗုဒီပေ စတုရာသီတိနဂရသဟဿေ ရာဇာနော အာဂန္တွာ ဥပဋ္ဌဟိဿန္တိ။ တိဏ္ဏံ ဥတူနံ အနုစ္ဆဝိကာ တယော ပါသာဒါ အဟေသုံ။ ဧကော မဟာသပ္ပိကော ¶ ၊ ဧကော မောရဂီဝေါ၊ ဧကော မင်္ဂလော နာမ၊ တေသု နေကနာဋကသဟဿပရိဝုတော ပဋိဝသတိ။ ယာဿ မဓုအာပဏံ ဒဿေသိ၊ သာ အသန္ဓိမိတ္တာ နာမ ဒေဝစ္ဆရပရိဘာဂါ ရာဇဓီတာ ဟုတွာ သဋ္ဌိသဟဿာနံ ဣတ္ထီနံ ဇေဋ္ဌိကာ ဓမ္မာသောကရညော အဂ္ဂမဟေသီ အဟောသိ။ အဘိသေကာနန္တရံ တဿ ဣမာ ရာဇိဒ္ဓိယော အာဂတာ၊ ပထဝိယာ စ ဟေဋ္ဌာ ယောဇနပ္ပမာဏေ အာဏာ ပဝတ္တတိ။ တထာ ဥပရိ အာကာသေ။ အနောတတ္တဒဟတော အဋ္ဌဟိ ကာဇေဟိ သောဠသပါနီယဃဋေ ဒိဝသေ ဒိဝသေ ဒေဝတာ အာဟရန္တိ။ ယတော သာသနေ ဥပ္ပန္နသဒ္ဓါ ဟုတွာ အဋ္ဌဃဋေ ဘိက္ခုသင်္ဃဿ အဒါသိ။ ဒွေ ဃဋေ သဋ္ဌိမတ္တာနံ တေပိဋကဘိက္ခူနံ ဒွေ ဃဋေ အဂ္ဂမဟေသိယာ အသန္ဓိမိတ္တာယ။ စတ္တာရော ဃဋေ အတ္တနာ ပရိဘုဉ္စိ ဒေဝတာ [ဒေဝတာဧဝံ ဣတိသဗ္ဗတ္ထ]၊ ဧဝ ဟိမဝန္တတော နာဂလတာဒန္တကဋ္ဌံ သိနိဒ္ဓံ မုဒုကံ ရသဝန္တံ ဒိဝသေ ဒိဝသေ အာဟရန္တိ၊ တေန ရညော စ မဟေသိယာ စ သောဠသန္နံ နာဋကသဟဿာနဉ္စ သဋ္ဌိမတ္တာနဉ္စ ဘိက္ခုသဟဿာနံ ဒေဝသိကံ ဒန္တပေါဏကိစ္စံ နိပ္ဖဇ္ဇတိ။ ဒေဝသိကမေဝဿ ဒေဝတာ အဂဒါမလကံ အဂဒဟရီဋကံ သုဝဏ္ဏဝဏ္ဏဉ္စ ဂန္ဓရသသမ္ပန္နံ အမ္ဗပက္ကံ အာဟရန္တိ။ ဆဒ္ဒန္တဒဟတော ပဉ္စဝဏ္ဏံ နိဝါသနပါရုပနံ ပီတကဝဏ္ဏံ ဟတ္ထပုဉ္ဆနကပဋံ [ဟတ္ထပုစ္ဆနကပဋ္ဋံ ဣတိသဗ္ဗတ္ထ] ဒိဗ္ဗဉ္စ ပါနံ အာဟရန္တိ။ ဒေဝသိကမေဝဿ အနုလေပနဂန္ဓံ ပါရုပနတ္ထာယ အသုတ္တမယိကံ သုမနပုပ္ဖပဋံ မဟာရဟဉ္ဇ အဉ္ဇနံ နာဂဘဝနတော နာဂရာဇာနော အာဟရန္တိ။ ဆဒ္ဒန္တဒဟတောယေဝ ဥဋ္ဌိတဿ သာလိနော နဝဝါဟသဟဿနိ ဒိဝသေ ဒိဝသေ သုဝါ အာဟရန္တိ။ တေ မူသိကာ နိတ္ထုသကာနိ ကရောန္တိ။ ဧကောပိ ခဏ္ဍတဏ္ဍုလော နာဟောသိ။ ရညော သဗ္ဗဋ္ဌာနေသု အယမေဝ တဏ္ဍုလော ပရိဘောဂံ ဂစ္ဆတိ။ မဓုမက္ခိကာ မဓုံ ကရောန္တိ။ ကမ္မာရသာလာသု အစ္ဆာ ကူဋံ ပဟရန္တိ။ ကရဝီကသကုဏာ အာဂန္တွာ မဓုရဿရံ ဝိကူဇေန္တာ ရညော ဗလိကမ္မံ ကရောန္တိ။ ဣမာဟိ ဣဒ္ဓီဟိ သမန္နာဂတော ရာဇာ ဧကဒိဝသံ သုဝဏ္ဏသင်္ခလိကဗန္ဓနံ ¶ ပေသေတွာ စတုန္နံ ဗုဒ္ဓါနံ အဓိဂတရူပဒဿနံ ကပ္ပာ ယုကံ မဟာကာလနာဂရာဇာနံ အာနယိတွာ သေတစ္ဆတ္တဿ ဟေဋ္ဌာ မဟာရဟေ ပလ္လင်္ကေ နိသီဒါပေတွာ အနေကသတ ဝဏ္ဏေဟိ ဇလဇထလဇပုပ္ဖေဟိ သုဝဏ္ဏပုပ္ဖေဟိ စ ပူဇံ ကတွာ သဗ္ဗာ လင်္ကာရပတိမဏ္ဍိတေဟိ သောဠသဟိ နာဋကသဟဿေဟိ သမန္တတော ပရိက္ခိပိတွာ အနန္တဉာဏဿ တာဝ မေ သဒ္ဓမ္မဝရစက္ကဝတ္တိနော သမ္မာသမ္ဗုဒ္ဓဿ [သမ္မာသမ္ဗုဒ္ဓရူပံ ဣတိသဗ္ဗတ္ထ] ရူပံ ဣမေသံ အက္ခီနံ အာပါထံ ကရောဟီတိ ဝတွာ တေန နိမ္မိတံ သကလသရီရေ ဝိပ္ပကိဏ္ဏပုညပ္ပဘာဝနိဗ္ဗတ္တာသီတိ အနုဗျဉ္ဇနပတိမဏ္ဍိတ ဒွတ္တိံသ မဟာပုရိသလက္ခဏ သဿိရီကတာယ ဝိကစကမလုပ္ပလပုဏ္ဍရီကပတိမဏ္ဍိတမိဝ သလိလတလံ တာရာဂဏရံသိဇာလဝိသရဝိပ္ဖုရိတသောဘာသမုဇ္ဇလမိဝ ဂဂနတလံ နီလပီတလောဟိတာ ဒိဘေဒံ ဝိစိတ္တဝဏ္ဏရံသိဝိနဒ္ဓဗျာမပ္ပဘာပရိက္ခေပဝိလာသိတာယ သဉ္စျာပ္ပဘာနုရာဂဣန္ဒဓနုဝိဇ္ဇုလ္လတာပရိက္ခိတ္တမိဝ ကဏကဂိရိသိခရံ နာနာဝိရာဂဝိမလကေတုမာလာသမုဇ္ဇလိတစာရုမတ္ထကသောဘနံ နယနရသာယနမိဝ စ ဗြဟ္မဒေဝမနုဇနာဂယက္ခဂဏာနံ ဗုဒ္ဓရူပံ ပဿန္တော သတ္တဒိဝသာနိ အက္ခိပူဇံ နာမ အကာသိ။ ရာဇာ ကိရ အဘိသေကံ ပါပုဏိတွာ တီဏိယေဝ သံဝစ္ဆရာနိ ဗာဟိရကပါသဏ္ဍံ ပရိဂဏှိ၊ စတုတ္ထေ သံဝစ္ဆရေ ဗုဒ္ဓသာသနေ ပသီဒိ၊ တဿ ပန ပိတာ ဗိန္ဒုသာရော ဗြာဟ္မဏဘတ္တော အဟောသိ။ သော ဗြာဟ္မဏာနဉ္စ ဗြာဟ္မဏဇာတိပါသဏ္ဍာနံ ပဏ္ဍရင်္ဂပရိဗ္ဗာဇကာနဉ္စ သဋ္ဌိသဟဿမတ္တာနံ နိစ္စဘတ္တံ ပဋ္ဌပေသိ။ အသောကောပိ ပိတရာ ပဝတ္တိတံ ဒါနံ အတ္တနော အန္တောပုရေ [အန္တေပုရေ ဣတိသဗ္ဗတ္ထ] တထေဝ ဒဒမာနော ဧကဒိဝသံ သီဟပဉ္ဇရေ ဌိတော တေ ဥပသမပရိဗာဟိရေန အာစာရေန ဘုဉ္ဇမာနေ အသံယတိန္ဒြိယေ အဝိနီတဣရိယာပထေ ဒိသွာ စိန္တေသိ၊ ဤဒိသံ ဒါနံ ဥပပရိက္ခိတွာ ယုတ္တဋ္ဌာနေ ဒါတုံ ဝဋ္ဋတီတိ။ ဧဝံ စိန္တေတွာ အမစ္စေ အာဟ၊ ဂစ္ဆထ ဘဏေ အတ္တနော အတ္တနော သာဓုသမ္မတေ သမဏဗြာဟ္မဏေ အန္တောပုရံ အဘိဟရထ ဒါနံ ဒဿာမီတိ၊ အမစ္စာ သာဓု ဒေဝါတိ ရညော ¶ ပဋိဿုတွာ တေ တေ ပဏ္ဍရင်္ဂပရိဗ္ဗာဇကာ ဇီဝက နိဂဏ္ဌာဒယော အာနေတွာ ဣမေ မဟာရာဇ အမှာကံ အရဟန္တောတိ အာဟံသု၊ အထ ရာဇာ အန္တောပုရေ ဥစ္စာဝစာနိ အာသနာနိ ပညာပေတွာ အာဂစ္ဆန္တူတိ ဝတွာ အာဂတာဂတေ အာဟ အတ္တနော အနုရူပေ အာသနေ နိသီဒထာတိ၊ ဧကစ္စေ ဘဒ္ဒပီဌကေသု ဧကစ္စေ ဖလကပီဌကေသု နိသီဒိံသု၊ တံ ဒိသွာ ရာဇာ နတ္ထိ ဧတေသံ အန္တော သာရောတိ ဉတွာ တေသံ အနုရူပံ ခါဒနီယဘောဇနီယံ ဒတွာ ဥယျောဇေသိ။ ဧဝံ ဂစ္ဆန္တေ ကာလေ ဧကဒိဝသံ သီဟပဉ္ဇရေ ဌိတော နိဂြောဓသာမဏေရံ ဒိသွာ တသ္မိံ ဂတေန ပသာဒေန ဗုဒ္ဓသာသနေ ပသန္နော သဋ္ဌိသဟဿမတ္တေ ပါသဏ္ဍိယေ အပနေတွာ သဋ္ဌိသဟဿမတ္တေ ဘိက္ခူ ဘောဇေန္တော ဗုဒ္ဓသာသနေ ပသီဒိတွာ အသောကာရာမံ ကာရေတွာ တတ္ထ တေ ဝသာပေန္တော ဧကဒိဝသံ အသောကာရာမေ သဋ္ဌိသဟဿဘိက္ခူနံ ဒါနံ ဒတွာ တေသံ မဇ္ဈေ နိသဇ္ဇ သင်္ဃံ စတူဟိ ပစ္စယေဟိ ပဝါရေတွာ ဣမံ ပဉှံ ပုစ္ဆိ၊ ဘန္တေ ဘဂဝတာ ဒေသိတဓမ္မော နာမ ကိတ္တကော ဟောတီတိ၊ မဟာရာဇ နဝ အင်္ဂါနိ၊ ခန္ဓတော စတုရာသီတိဓမ္မက္ခန္ဓသဟဿာနီတိ။ ရာဇာ ဓမ္မေ ပသီဒိတွာ ဧကေကံ ဓမ္မက္ခန္ဓံ ဧကေကဝိဟာရေန ပူဇေဿာမီတိ ဧကဒိဝသမေဝ ဆန္နဝုတိကောဋိခနံ ဝိဿဇ္ဇေတွာ အမစ္စေ အာဏာပေသိ၊ ဧကမေကသ္မိံ နဂရေ ဧကမေကံ ဝိဟာရံ ကာရေန္တာ စတုရာသီတိယာ နဂရသဟဿေသု စတုရာသီတိဝိဟာရသဟဿာနိ ကာရာပေထာတိ၊ သယဉ္စ အသောကာရာမေ အသောကမဟာဝိဟာရတ္ထာယ [သယံစအသောကဟောဝိဟာရတ္ထာယ ဣတိပိကတ္ထစိ] ကမ္မံ ပဋ္ဌပေသိ၊ သင်္ဃော ဣန္ဒဂုတ္တတ္ထေရံ နာမ မဟိဒ္ဓိကံ မဟာနုဘာဝံ ခီဏာသဝံ နဝကမ္မာဓိဋ္ဌာယကံ အဒါသိ၊ ထေရော ယံ ယံ န နိဋ္ဌာတိ၊ တံ တံ အတ္တနော အာနုဘာဝေန နိဋ္ဌာပေသိ၊ ဧဝံပိတီဟိ သံဝစ္ဆရေဟိ ဝိဟာရကမ္မံ နိဋ္ဌာပေသိ၊ ဧကဒိဝသမေဝ သဗ္ဗနဂရေဟိ ပဏ္ဏာနိ အာဂမိံသု၊ အမစ္စာ ရညော အာရောစေသုံ နိဋ္ဌိတာနိ ဒေဝ စတုရာသီတိမဟာဝိဟာရသဟဿာနီတိ။ အထ ရာဇာ ¶ ဘိက္ခုသင်္ဃံ ဥပသင်္ကမိတွာ ဘန္တေ မယာ စတုရာသီတိဝိဟာရသဟဿာနိ ကာရိတာနိ၊ ဓာတုယော ကုတော လစ္ဆာမီတိ ပုစ္ဆိ၊ မဟာရာဇ ဓာတုနိဓာနံ နာမ အတ္ထီတိ သုဏောမ၊ န ပန ပညာယတိ အသုကဋ္ဌာနေတိ။ ရာဇာ ရာဇဂဟေ စေတိယံ ဘိန္ဒာပေတွာ ဓာတုံ အပဿန္တော ပဋိပါကတိကံ ကာရာပေတွာ ဘိက္ခုဘိက္ခုဏိယော ဥပါသကဥပါသိကာယောတိ စတဿော ပရိသာ ဂဟေတွာ ဝေသာလိယံ ဂတော။ တတြာပိ အလဘိတွာ ကပိလဝတ္ထုံ ဂတော၊ တတြာပိ အလဘိတွာ ရာမဂါမံ ဂတော၊ ရာမဂါမေ နာဂါ စေတိယံ ဘိန္ဒိတုံ နာဒံသု။ စေတိယေ နိပတိတကုဒ္ဒါလော ခဏ္ဍာဝဏ္ဍံ ဟောတိ၊ ဧဝံ တတြာပိ အလဘိတွာ အလ္လကပ္ပံ ပါဝံ ကုသိနာရံတိ သဗ္ဗစေတိယာနိ ဘိန္ဒိတွာ ဓာတုံ အလဘိတွာ ပဋိပါကတိကာနိ ကတွာ ရာဇဂဟံ ဂန္တွာ စတဿော ပရိသာ သန္နိပါတာပေတွာ အတ္ထိ ကေနစိ သုတပုဗ္ဗံ အသုကဋ္ဌာနေ ဓာတုနိဓာနံတိ ပုစ္ဆိ။ တတ္ထေကော ဝီသံဝဿ သတိကော ထေရော အသုကဋ္ဌာနေ ဓာတုနိဓာနံတိ န ဇာနာမိ၊ မယှံ ပန ပိတာမဟတ္ထေရော မယိ သတ္တဝဿိကာလေ မာလာစင်္ဂေါဋကံ ဂါဟာပေတွာ ဧဟိ သာမဏေရ အသုကဂစ္ဆန္တရေ ပါသာဏထူပေါ အတ္ထိ။ တတ္ထ ဂစ္ဆာမာတိ ဂန္တွာ ပူဇေတွာ ဣမံ ဌာနံ ဥပဓာရေတုံ ဝဋ္ဋတိ သာမဏေရာတိ အာဟ။ အဟံ ဧတမေဝ ဇာနာမိ မဟာရာဇာတိ အာဟ။ ရာဇာ ဧတဒေဝ ဌာနံတိ ဝတွာ ဂစ္ဆေ ဟရာပေတွာ ပါသာဏထူပံ ပံသုံစ အပနေတွာ ဟေဋ္ဌာ သုဓာဘူမိံ အဒ္ဒသ၊ တတော သုဓာ စ ဣဋ္ဌကာယော စ ဟရာပေတွာ အနုပုဗ္ဗေန ပရိဝေဏံ ဩရုယှ သတ္တရတနဝါလိကံ အသိဟတ္ထာနိ စ ကဋ္ဌရူပကာနိ သမ္ပရိဝတ္တန္တာနိ အဒ္ဒသ၊ သော ယက္ခဒါသကေ ပက္ကောသာပေတွာ ဗလိကမ္မံ ကာရာပေတွာပိ နေဝ အန္တံ ပဿန္တော ဒေဝတာ နမဿမာနော အဟံ ဣမာ ဓာတုယော ဂဟေတွာ စတုရာသီတိဝိဟာရသဟဿေ နိဒဟိတွာ သက္ကာရံ ကရောမိ။ မာ မေ ဒေဝတာ အန္တရာယံ ကရောန္တူတိ အာဟ၊ သက္ကော ဒေဝရာဇာ စာရိကံ စရန္တော တံ ဒိသွာ ဝိဿကမ္မံ အာမန္တေတွာ တာတ အသောကဓမ္မရာဇာ ဓာတုယော ¶ နီဟရိဿာမီတိ ပရိဝေဏံ ဩတိဏ္ဏော။ ဂန္တွာ ကဋ္ဌရူပါနိ နီဟရာပေဟီတိ။ သော ပဉ္စစူလကဂါမဒါရကဝေသေန ဂန္တွာ ရညော ပုရတော ဓနုကဟတ္ထော ဌတွာ ဟာရေမိ မဟာရာဇာတိ အာဟ၊ ဟရ တာတာတိ သရံ ဂဟေတွာ သန္ဓိမှိယေဝ ဝိဇ္ဈိ၊ သဗ္ဗံ ဝိပ္ပကိရီယိတ္ထ၊ အထ ရာဇာ အာဝိဉ္ဇနေ [အဝိဉ္စိနေ ဣတိပိကတ္ထစိ] ဗန္ဓကုဉ္စိကမုဒ္ဒိကံ ဂဏှိ၊ မဏိက္ခန္ဓံ ပဿိတွာ အနာဂတေ ဒဠိဒ္ဒရာဇာနော ဣမံ မဏိံ ဂဟေတွာ ဓာတူနံ သက္ကာရံ ကရောန္တူတိ ပဏ္ဏေ အက္ခရာနိ ဒိသွာ ကုဇ္ဈိတွာ မာဒိသာနံ ပန ရာဇူနံ [ရာဇာနံ ဣတိသဗ္ဗတ္ထ] ဒဠိဒ္ဒရာဇာတိ ဝတ္တုံ အယုတ္တံတိ ပုနပ္ပုနံ ဃဋေတွာ ဒွါရံ ဝိဝရိတွာ အန္တောဂေဟံ ပဝိဋ္ဌော အဋ္ဌာရသဝဿာဓိကာနံ ဒွိန္နံ ဝဿသတာနံ ဥပရိ အာရောပိတဒီပါ တထေဝ ပဇ္ဇလန္တိ၊ နီလုပ္ပလပုပ္ဖာနိ တံခဏံယေဝ အာဟရိတွာ အာရောပိတာနိ ဝိယ ပုပ္ဖသန္ထာရော တံ ခဏံ သန္ထတော ဝိယ ဂန္ဓာ တံ မုဟုတ္တံ ပိံသိတွာ ဌပိတာ ဝိယ အဟေသုံ။ ရာဇာ သုဝဏ္ဏပဋ္ဋံ ဂဟေတွာ အနာဂတေ ပိယဒါသော နာမ ကုမာရော ဆတ္တံ ဥဿာပေတွာ အသောကော နာမ ဓမ္မရာဇာ ဘဝိဿတိ၊ သော ဣမာ ဓာတုယော ဝိတ္ထာရိတာ ကရိဿတီတိ ဝါစေတွာ ဒိဋ္ဌောဟံ အယျေန မဟာကဿပတ္ထေရေနာတိ ဝတွာ ဝါမဟတ္ထံ အာဘုဇိတွာ ဒက္ခိဏဟတ္ထေန အပ္ဖောဋေသိ။ သော တသ္မိံ ဌာနေ ပရိစရဏကဓာတုမတ္တမေဝ ဌပေတွာ သေသဓာတုယော သဗ္ဗာ ဂဟေတွာ ဓာတုဃရံ ပုဗ္ဗေ ပိဟိတနယေနေဝ ပိဒဟိတွာ သဗ္ဗာ ယထာ ပကတိယာယေဝ ကာရေတွာ ဥပရိပါသာဏစေတိယံ ပတိဋ္ဌာပေတွာ စတုရာသီတိယာ ဝိဟာရသဟဿေသု ဓာတုယော ပတိဋ္ဌာပေသိ။ အထေကဒိဝသံ ရာဇာ ဝိဟာရံ ဂန္တွာ ဘိက္ခုသံဃံ ဝန္ဒိတွာ ဧကမန္တေ နိသိန္နော ယဒိ ဘန္တေ ဆန္နဝုတိကောဋိဓနံ ဝိဿဇ္ဇေတွာ စတုရာသီတိဝိဟာရသဟဿာနိသစေတိယာနိ ကာရာပေတွာပိ အဟံ န ဒါယာဒေါ။ အညော ကော ဒါယာဒေါတိ၊ ပစ္စယဒါယကော နာမ တွံ မဟာရာဇ၊ ယော ပန အတ္တနော ပုတ္တဉ္စ ဓီတရဉ္စ ပဗ္ဗာဇေတိ၊ အယံ သာသနေ ဒါယာဒေါ နာမာတိ ဧဝံ ဝုတ္တေ ¶ အသောကော ရာဇာ သာသနေ ဒါယာဒဘာဝံ ပတ္ထယမာနော အဝိဒူရေ ဌိတံ မဟိန္ဒကုမာရံ ဒိသွာ သက္ခိဿသိ တာတ တွံ ပဗ္ဗဇိတုံတိ အာဟ။ ကုမာရော ပကတိယာ ပဗ္ဗဇိတုကာမော ရညော ဝစနံ သုတွာ အတိဝိယ ပါမောဇ္ဇဇာတော ပုဗ္ဗဇာမိ [ပဗ္ဗဇ္ဇာမိ ဣတိသဗ္ဗတ္ထ] ဒေဝ။ မံ ပဗ္ဗာဇေတွာ သာသနေ ဒါယာဒေါ ဟောထာတိ အာဟ။ တေန စ သမယေန ရာဇဓီတာ သံဃမိတ္တာပိ တသ္မိံ ဌာနေ ဌိတာ ဟောတိ။ တံ ဒိသွာ အာဟ တွမ္ပိ အမ္မ ပဗ္ဗဇိတုံ သက္ခိဿသီတိ၊ သာဓု တာတာတိ သမ္ပဋိစ္ဆိ။ ရာဇာ ပုတ္တာနံ မနံ လဘိတွာ ပဟဋ္ဌစိတ္တော ဘိက္ခုသံဃံ ဥပသင်္ကမိတွာ ဘန္တေ ဣမေ ဒါရကေ ပဗ္ဗာဇေတွာ မံ သာသနေ ဒါယာဒံ ကရောထာတိ။ သင်္ဃော ရညော ဝစနံ သမ္ပဋိစ္ဆိတွာ ကုမာရံ မောဂ္ဂလိပုတ္တတိဿတ္ထေရေန ဥပဇ္ဈာယေန မဟာဒေဝတ္ထေရေန အာစရိယေန ပဗ္ဗဇာပေသိ [ပဗ္ဗဇ္ဇာပေသိ ဣတိသဗ္ဗတ္ထ]။ မဇ္ဈန္တိကတ္ထေရေန အာစရိယေန ဥပသမ္ပာဒေသိ၊ သော ဥပသမ္ပဒါမာလကေယေဝ သဟ ပဋိသမ္ဘိဒါဟိ အရဟတ္တံ ပါပုဏိ။ သင်္ဃမိတ္တာယပိ ရာဇဓီတာယ အာစရိယာဏီ အာယုပါလတ္ထေရီ နာမ [အစာရိယာ အာယုပါလတ္ထေရီနာမ ဣတိသဗ္ဗတ္ထ]။ ဥပဇ္ဈာယာ ဓမ္မပါလတ္ထေရီ နာမ အဟောသိ။ ရာဇာ ပန အနေကာကာရေန ဗုဒ္ဓသာသနံ သောဘေတွာ မောဂ္ဂလိပုတ္တတိဿတ္ထေရဿ သဟာယေန [သဟယျေန။ သာဟာယျေန။ သာဟယျေန ဣတိပိကတ္ထစိ] သဋ္ဌိသဟဿမတ္တေ ဒုဿီလေ တိတ္ထိယေ ဗုဒ္ဓသာသနာ ဥပ္ပဗ္ဗာဇေတွာ တတိယဓမ္မသံဂီတိံ နိဋ္ဌာပေသိ။ တသ္မိံ ကိရ သမာဂမေ ဘိက္ခုဘိက္ခုဏိယော ကိတ္တကာတိ [ကိတ္တကာနီတိ ဣတိသဗ္ဗတ္ထ]၊ ဝုတ္တဉှိ။
တသ္မိံ သမာဂမေ အာသုံ၊ အသီတိဘိက္ခုကောဋိယော၊
အဟေသုံ သတသဟဿာနိ၊ တေသု ခီဏာသဝါ ယတီ။
နဝုတိသတသဟဿာနိ၊ အဟူ ဘိက္ခုဏိယော တဟိံ၊
ခီဏာသဝါ သိက္ခုဏိယော၊ သဟဿံ အာသု တာသု စာတိ။
ဧဝံ ¶ သော အသောကော ဓမ္မရာဇာ သကလဇမ္ဗုဒီပေ အဂ္ဂရာဇာ ဟုတွာ ဗုဒ္ဓသာသနံ သောဘေန္တော ဝိဟာသိ။ အယံ ပနေတ္ထ သင်္ခေပေါ၊ ဝိတ္ထာရော ပန မဟာဝံသေ ဝုတ္တောတိ။ ဝုတ္တဉှိ။
သမ္ပုဏ္ဏတ္တာ အယံ တိဿော၊ စေတနာယော မဓုပ္ပဒေါ၊
သဗ္ဗတ္ထ သဗ္ဗဒါ သဗ္ဗ၊ သမ္ပတ္တိမဘိသမ္ဘုဏီတိ။
မဇ္ဈိမော ပန ဝါဏိဇော အတ္တနော ပါရဝါဒိဒေါသေန ပရသမုဒ္ဒေ လင်္ကာယံ နိဗ္ဗတ္တိ။ တဿေဝံ ကထာပဋိပါဋိ ဝေဒိတဗ္ဗာ။ တမ္ဗပဏ္ဏိဒီပေ ကိရ မုဋသီဝေါ နာမ ရာဇာ သဋ္ဌိဝဿာနိ ရဇ္ဇံ ကာရေသိ၊ တဿ ပုညပညာဂုဏောပေတာ အညမညံ ဟိတေသိနော ဒသ ပုတ္တာ အဟေသုံ။ ဒွေ စ ဓီတရော။ သဗ္ဗေ တေ သမဂ္ဂါ သမ္မောဒမာနာ ဝသန္တိ။ အထာပရသ္မိံ သမယေ အမစ္စာ မုဋသီဝရညေ ကာလကတေ ဒေဝါနံပိယတိဿကုမာရံ အဘိသိဉ္စိံသု၊ အဘိသေကသမကာလမေဝဿ အနေကာနိ အစ္ဆရိယာနိ အဟေသုံ။ တာနိ ပကာသေန္တာ မဟာဝံသကထာစရိယာ အာဟံသု။
ဒေဝါနံပိယတိဿောတိ၊ ဝိဿုတော ဒုတိယော သုတော၊
တေသု [အဟောသိမုဋသီဝဿ၊ ဒသပုတ္တေသုပုညဝါ ဣတိကတ္ထစိ] ဘာတုသု သဗ္ဗေသု၊ ပုညပညာဓိကော အဟု။
ဒေဝါနံပိယတိဿော သော၊ ရာဇာသိ ပိတုအစ္စယေ၊
တဿာဘိသေကေန သမံ၊ ဗဟူနစ္ဆရိယာနဟူ။
လင်္ကာဒီပမှိ သကလေ၊ နိဓယော ရတနာနိစ၊
အန္တောဌိတာနိ ဥဂ္ဂန္တွာ၊ ပထဝီတလမာရုဟုံ။
လင်္ကာဒီပသမီပမှိ၊ ဘိန္နနာဝါ ဂတာနိ စ၊
တတြ ဇာတာနိ စ ထလံ၊ ရတနာနိ သမာရုဟုံ။
ဆာတပဗ္ဗတပါဒမှိ၊ တိဿော စ ဝေဠုယဋ္ဌိယော၊
ဇာတာ ရထပတောဒေန၊ သမာနာ ပရိမာဏတော။
တာသု ¶ ဧကာ လတာယဋ္ဌိ၊ ရဇတာဘာ တဟိံ လတာ၊
သုဝဏ္ဏဝဏ္ဏာ ရုစိရာ၊ ဒိဿန္တေတာ မနောရမာ။
ဧကာ ကုသုမယဋ္ဌီတု၊ ကုသုမာနိ တဟိံပန၊
နာနာနိ နာနာဝဏ္ဏာနိ၊ ဒိဿန္တေတိဖုဋာနိ စ။
ဧကာ သကုဏယဋ္ဌီ တု၊ တဟိံပက္ခိမိဂါ ဗဟူ၊
နာနာ စ နာနာဝဏ္ဏာ စ၊ သဇီဝါဝိယ ဒိဿရေ။
ဟယဂဇရထာ မလကျာ၊ ဝလယင်္ဂုလိဝေဌကာ စေဝ၊
ကကုဓဖလာ ပါကတိကာ၊ ဣစ္စေ တာ အဋ္ဌ ဇာတိယာ။
မုတ္တာ သမုဒ္ဒါ ဥဂ္ဂန္တွာ၊ တီရေ ဝဋ္ဋိဝိယဋ္ဌိတာ၊
ဒေဝါနံပိယတိဿဿ၊ သဗ္ဗံ ပုညဝိဇမ္ဘိတံ။
ဣန္ဒနီလံ ဝေဠုရိယံ၊ လောဟိတင်္ကမဏီ စိ မေ၊
ရတနာနိ ပနေ တာနိ၊ မုတ္တာ တာ တာစ ယဋ္ဌိယော၊
သတ္တာဟဗ္ဘန္တရေယေဝ၊ ရညော သန္တိကမာဟရုံတိ။
တေန စ သမယေန ဒေဝါနံပိယတိဿမဟာရာဇာ စ အသောကော ဓမ္မရာဇာ စ အဒ္ဒိဋ္ဌသဟာယာ ဟောန္တိ။ တသ္မာ သော ဧတာနိ ရတနာနိ စ အညာနိ ဗဟူနိ ဥပါယနာနိ မမ သဟာယဿ ဒေထာတိ ဓမ္မာသောကမဟာနရိန္ဒဿ ပဏ္ဏာကာရတ္ထာယ ပေသေသိ။ သောပိ တံ ဒိသွာ ပသီဒိတွာ ပဉ္စရာဇကကုဓဘဏ္ဍာနိ စ အညဉ္စ ဗဟုပဏ္ဏာကာရဉ္စ အဘိသေကတ္ထာယ ပေသေသိ။ မယှံ သဟာယံ အဘိသေကံ ကရောန္တူတိ။ န ကေဝလဉ္စေတံ အာမိသပဏ္ဏာကာရံ။ ဣမံ ကိရ ဓမ္မပဏ္ဏာကာရမ္ပိ ပေသေသိ။
အဟံ ဗုဒ္ဓံစ ဓမ္မံစ၊ သံဃံစ သရဏံ ဂတော၊
ဥပသကတ္တံ ဝေဒေသိံ၊ သကျပုတ္တဿ သာသနေ။
ဣမေသု တီသု ဝတ္ထူသု၊ ဥတ္တမေသု နရုတ္တမ၊
စိတ္တံ ပသာဒယိတွာန၊ သဒ္ဓါယ သရဏံ ဝဇာတိ။
အမစ္စာ ¶ ပုန လင်္ကမာဂမ္မ ရာဇာနံ အဘိသိဉ္စိံသု၊ တေန ခေါ ပန သမယေန မောဂ္ဂလိပုတ္တတိဿတ္ထေရော ကတ္ထ နုခေါ အနာဂတေ သာသနံ သုပ္ပတိဋ္ဌိတံ ဘဝေယျာတိ ဥပပရိက္ခန္တော ပစ္စန္တိမေ သုပ္ပတိဋ္ဌိတံ ဘဝိဿတီတိ ဉတွာ တေ တေ ထေရေ တတ္ထ တတ္ထ ပေသေတွာ မဟာမဟိန္ဒတ္ထေရံ ဂန္တွာ တမ္ဗပဏ္ဏိဒီပံ ပသာဒေဟီတိ နိယောဇေသိ၊ သက္ကော စ ဒေဝါနမိန္ဒော မဟာမဟိန္ဒတ္ထေရံ ဥပသံကမိတွာ ကာလကတော ဘန္တေ မုဋသီဝေါ ရာဇာ။ ဣဒါနိ ဒေဝါနံပိယတိဿမဟာရာဇာ ရဇ္ဇံ ကာရေတိ။ သမ္မာသမ္ဗုဒ္ဓေန စ တုမှေ ဗျာကတာ အနာဂတေ မဟိန္ဒော နာမ ဘိက္ခု တမ္ဗပဏ္ဏိဒီပံ ပသာဒေဿတီတိ။ တသ္မာ တိဟ ခေါ ဘန္တေ ကာလော ဒီပဝရံ ဂမနာယ၊ အဟမ္ပိ သဟာယော ဘဝိဿာမီတိ၊ ထေရော တဿ ဝစနံ သမ္ပဋိစ္ဆိတွာ အတ္တသတ္တမော စေတိယပဗ္ဗတဝိဟာရတော ဝေဟာသံ ဥပ္ပတိတွာ အနုရာဓပုရဿ ပုရတ္ထိမဒိသာယ မိဿကပဗ္ဗတေ ပတိဋ္ဌဟိ၊ ဣမံ ဧတရဟိ စေတိယပဗ္ဗတောတိပိ သဉ္ဇာနန္တိ။ တဒါ တမ္ဗပဏ္ဏိယံ ဥဿဝဒိဝသော ဟောတိ၊ ရာဇာ ဆဏံ ကရောထာတိ အမစ္စေ အာဏာပေတွာ စတ္တာဠီသသဟဿပုရိသေဟိ ပရိဝါရိတော နဂရမှာ နိက္ခမိတွာ မိဿကပဗ္ဗတံ ပါယာသိ မိဂဝံ ကီဠိတုကာမော။ အထ တသ္မိံ ပဗ္ဗတေ အဓိဝတ္ထာ ဧကာ ဒေဝတာ ရညော ထေရေ ဒဿေဿာမီတိ ရောဟိတမီဂဝဏ္ဏေန အဝိဒူရေ တိဏပဏ္ဏာနိ ခါဒမာနာ ဝိယ စရတိ၊ ရာဇာ အယုတ္တံ ဒါနိ ပမတ္တံ ဝိဇ္ဈိတုံတိ ဇိယံ ပေါဌေသိ၊ မိဂေါ အမ္ဗတ္ထလမဂ္ဂံ ဂဟေတွာ ပလာယိတုံ အာရဘိ၊ ရာဇာ တံ အနုဗန္ဓန္တော အမ္ဗတ္ထလမေဝ အဘိရုဟိ၊ မိဂေါပိ ထေရာနံ အဝိဒူရေ အန္တရဓာယိ၊ မဟိန္ဒတ္ထေရော ရာဇာနံ အဝိဒူရေ အာဂစ္ဆန္တ မံယေဝ ရာဇာ ပဿတု၊ မာ ဣတရေတိ အဓိဋ္ဌဟိတွာ တိဿ တိဿ ဣတော ဧဟီတိ အာဟ၊ ရာဇာ တံ သုတွာ စိန္တေသိ။ ဣမသ္မိံ တမ္ဗပဏ္ဏိဒီပေ ဇာတော မံ တိဿောတိ နာမံ ဂဟေတွာ အာလပိတုံ သမတ္ထော နာမ နတ္ထိ။ အယံ ပန ဆိန္နဘိန္နပဋဓရော ဘဏ္ဍုကာသာဝ ဝသနော မံ နာမေနာ လပတိ၊ ကော နုခေါ ယံ ဘဝိဿတိ မနုဿော အမနုဿော ဝါတိ။ ထေရော အာဟ။
သမဏာ ¶ မယံ မဟာရာဇ၊ ဓမ္မရာဇဿ သာဝကာ၊
တဝေဝ အနုကမ္ပာယ၊ ဇမ္ဗုဒီပါ ဣဓာဂတာတိ။
ရာဇာ ဓမ္မာသောကနရိန္ဒေန ပေသိတသာသနာနုသာရေန အနုဿရမာနော အယျာ နုခေါ အာဂတာတိ တာဝဒေဝ အာယုဓံ နိက္ခိပိတွာ ဧကမန္တံ နိသီဒိ သမ္မောဒနီယံ ကထံ ကထယမာနော သာရဏီယံ [သမ္မောဒနီယံ-ဣတိသဗ္ဗတ္ထ] ကထံ ကုရုမာနော။ တသ္မိံ တာနိပိ စတ္တာဠီသပုရိသသဟဿာနိ အာဂန္တွာ တံ ပရိဝါရေသုံ၊ တဒါ ထေရော ဣတရေပိ ဇနေ ဒဿေသိ၊ ရာဇာ ဒိသွာ ဣမေ ကဒါ အာဂတာတိ ပုစ္ဆိ၊ မယာ သဒ္ဓိံယေဝ မဟာရာဇာတိ။ ဣဒါနိ ပန ဇမ္ဗုဒီပေ အညေပိ ဧဝရူပါ သမဏာ သန္တီတိ။ မဟာရာဇ ဧတရဟိ ဇမ္ဗုဒီပေါ ကာသာဝပဇ္ဇောတော ဣသိဝါတပဋိဝါတော၊ တသ္မိံ။
တေဝိဇ္ဇာ ဣဒ္ဓိပ္ပတ္တာ စ၊ စေတောပရိညကောဝိဒါ၊
ခီဏာသဝါ အရဟန္တော၊ ဗဟူ ဗုဒ္ဓဿ သာဝကာတိ။
ရာဇာ တံ သုတွာ ပသန္နော အဟောသိ၊ အထ ထေရော ရုက္ခောပမာဒိနာ တဿ ပညာဝေယျတ္တိယံ ဉတွာ ဓမ္မံ ဒေသေသိ သနရာမရေဟိ သာဓုကာရံ ကာရယမာနော။ တေန ဝုတ္ထံ။
ပဏ္ဍိတောတိ ဝိဒိတွာန၊ စုလ္လဟတ္ထိပဒေါပမံ၊
သုတ္တန္တံ ဒေသယီ ထေရော၊ မဟီပဿ မဟာမတိ [မဟီမတီ ဣတိပိကတ္ထစိ]။
ဒေသနာပရိယောသာနေ သော သဒ္ဓိံ တေဟိ နရေဟိ စတ္တာဠီသသဟဿေဟိ သရဏေသု ပတိဋ္ဌဟီတိ။ အထဿ ရာဇာ သွေ ဘန္တေ မမ ဂေဟေ ဘိက္ခံ ဂဏှာထာတိ ယာစိတွာ ဂန္တွာ နဂရဉ္စ ရာဇဂေဟဉ္စ အလင်္ကရိတွာ ထေရေ နိသီဒါပေတွာ ပဏီတေနာဟာရေန ပရိဝိသိတွာ အနုဠာဒေဝိပ္ပမုခါဟိ ပဉ္စသတဣတ္ထီဟိ သဒ္ဓိံ ဧကမန္တံ နိသီဒိ။ အထ ထေရော ဓမ္မရတန ဝဿံ ဝဿာပေသိ။ တတော ¶ တာ ပဉ္စသတဣတ္ထိယော သောတာပတ္တိဖလံ ပါပုဏိံသု။ တတော ဟတ္ထိသာလာယံ သဟဿံ၊ နန္ဒနဝနေ သဟဿံတိ ဧဝံ ဒုတိယဒိဝသေ အဍ္ဎတေယျာနိ ပါဏသဟဿာနိ သောတာပတ္တိဖလေ ပတိဋ္ဌာပေသိ။ တတိယဒိဝသေ အဍ္ဎနဝပ္ပမာဏံ ပါဏသဟဿံတိ ဧဝံ အနေကသတာနံ အနေကသဟဿာနံ အနေကသတ သဟဿာနံ ဓမ္မာ မတံ ပါယေသိ။ ဝုတ္တဉှိ။
မဟာမဟိန္ဒသုရိယော၊ လင်္ကာဝေဟာသမဇ္ဈဂေါ၊
ဗောဓနေယျမ္ဗုဇေ ကာသိ၊ ဝိကာသံ ဓမ္မရံသိနာ။
မဟာမဟိန္ဒစန္ဒော သော၊ လင်္ကာဝေဟာသမဇ္ဈဂေါ၊
ဗောဓေသိ ဓမ္မရံသီဟိ၊ ဝေနေယျကုမုဒါကရေ။
မဟာမဟိန္ဒမေဃော သော၊ ဝဿံ ဓမ္မမ္ဗုဝုဋ္ဌိယာ၊
သာဓူနံ စိတ္တဗီဇေသု၊ ဇနေသိ ကုသလင်္ကုရေတိ။
အထ ရာဇာ သုမနသာမဏေရေန ဓမ္မာသောကဿ ဟတ္ထတော သမ္မာသမ္ဗုဒ္ဓပရိဘုတ္တပတ္တပူရဓာတုယော စ သက္ကဿ သန္တိကာ ဒက္ခိဏက္ခကဓာတုံစ အာဟရာပေတွာ [အာဟာရိတွာ-ဣတိသဗ္ဗတ္ထ] စေတိယပဗ္ဗတေ ထူပံ အာဒိံကတွာ သကလလင်္ကာဒီပေ ယောဇနေ ယောဇနေ ထူပါနိ ကာရေတွာ ဒက္ခိဏကဓာတုံ နိဒဟိတွာ ထူပါရာမထူပဉ္စ ပတိဋ္ဌာပေသိ။ အထ သင်္ဃမိတ္တာယ ထေရိယာ အာနီတံ ဇယမဟာဗောဓိနော ဒက္ခိဏမဟာသာခံ ပတိဋ္ဌာပေတွာ ပူဇံ ကာရေသိ။ သဗ္ဗော ပနေတ္ထ ကထာဝိတ္ထရော မဟာဝံသတော ဝေဒိတဗ္ဗော။
ပါရဝါဒိကဒေါသေန၊ ဇာတေဝံ ပရသာဂရေ၊
ပတ္တာနုမောဒနာ ဧဝံ၊ လင်္ကာယံ အာသိ ဣဿရော။
ပါပမ္ပိ ဧဝံ ဖလတီတိ မန္တွာ၊
ဉတွာန ပုညဿ ဖလံ ဣဒန္တိ၊
ဘော ယောနိသော ကုဗ္ဗထ ပုညကမ္မေ၊
ဂန္တွာန ယေ ယတ္ထ န သောစယန္တီတိ။
တေဘာတိကမဓုဝါဏိဇကာနံ ဝတ္ထုံ အဋ္ဌမံ။
၃၉။ ဗောဓိရာဇဓီတုယာ [ဗောဓိရာဇဓီတာယ ဣတိသဗ္ဗတ္ထ] ဝတ္ထုမှိ အယမာနုပုဗ္ဗီကထာ
ဘဂဝတိ ပရိနိဗ္ဗုတေ လင်္ကာယံ သာသနေ သုပ္ပတိဋ္ဌိတေ တတ္ထ ဟကုရေဠီတိ ဧကော ဂါမော အဟောသိ၊ တတ္ထေကာ ဒါရိကာ ဂါမာဒါရိကာဟိ သဒ္ဓိံ တတ္ထ တတ္ထ ကီဠန္တီ ဝိဟရတိ၊ တဒါ ဂါမသမီပေ မဟာသောဗ္ဘံ ဟောတိ။ တတ္ထေကော မရုတ္ထရုက္ခော သဗ္ဗဒါ ပါဠိဖုလ္လောဝ တိဋ္ဌတိ။ မနုဿာ ဗုဒ္ဓပူဇနတ္ထံ ပုပ္ဖာနိ ဝိစိဏန္တာ ဥဒကံ ဩဂဟေတွာ ရုက္ခမဘိရုယှ ပုပ္ဖာနိ ဩစိဏန္တိ၊ ကုမာရိကာ တေ ဒိသွာ မနုဿာ သုခေန ဂန္တွာ ပုပ္ဖာနိ ဩစိဏန္တူတိ ဧကံ သုက္ခပါလိဘဒ္ဒဒဏ္ဍကံ အာဟရိတွာ သေတုံ ကတွာ ဌပေသိ၊ တတော ပဋ္ဌာယ မနုဿာ တေနဂန္တွာ ပုပ္ဖာနိ ဩစိဏန္တိ။ အထ သာ တတော စုတာ တေနေဝ ကုသလကမ္မေန ဇမ္ဗုဒီပေ ပါဋလိပုတ္တနဂရေ သောမဒတ္တရညော ဓီတာ ဟုတွာ နိဗ္ဗတ္တိ၊ ဥတ္တမရူပဓရာ ဒေဝစ္ဆရပဋိဘာဂါ အဟောသိ။ မာတာပိတရော ပနဿာ ဗောဓိရာဇကုမာရိကာတိ ဝေါဟရိံသု။ ပုဗ္ဗေ ကတသေတုအာနုဘာဝေန တဿာ သုဝီရကော နာမေကော အာကာသဂါမီ သိန္ဓဝပေါတကော နိဗ္ဗတ္တိ။ ရာဇဓီတုယာ ပန ပိတာ ဗုဒ္ဓမာမကော ဓမ္မမာမကော သင်္ဃမာမကော ဟုတွာ မဟန္တံ ပုညံ ပသဝန္တော သိန္ဓဝပေါတကံ ဒိသွာ ပုညကရဏဿ မေ သဟာယော လဒ္ဓါတိ တုဋ္ဌမာနသော အဿံ အဘိရုဟိတွာ ဒိဝသဿ တိက္ခတ္တုံ ဂန္တွာ မဟာဗောဓိံ ¶ ဝန္ဒတိ။ ရာဇဓီတာ နံ ဒိသွာ ပိတုသန္တိကံ ဂန္တွာ အဘိဏှံ တာတ ကုဟိံ ဂစ္ဆသီတိ ပုစ္ဆိ။ ရာဇာ န ကိဉ္စိ ကထေသိ၊ အထ သာ ပုနပ္ပုနံ ပိတရံ နိဗန္ဓန္တီ ပုစ္ဆိ။ တတော ရာဇာ တဿာဝိ ကရောန္တော ဧဝမာဟ။
အမှာကံ ဘဂဝါ ပုဗ္ဗေ၊ ပူရေန္တော ဒသပါရမီ၊
အဒါသိ သီသရတ္တက္ခိ၊ မံသံ ဇီဝိတမေဝ စ။
ပုတ္တဒါရေ စ ရဇ္ဇေ စ၊ ပတွာ [ဒတွာ ဣတိပိကတ္ထစိ] ပါရမိမတ္ထကံ၊
အနပ္ပကပ္ပကောဋီနံ၊ ခေပေတွာ ကပိလဝုယေ။
သက္ကရာဇကုလေ ဇာတော၊ လောကေ အပ္ပဋိပုဂ္ဂလော၊
သမ္ပတ္တစက္ကဝတ္တိတ္တံ၊ ပဟန္တွာန နရာဓိပေါ။
ဒိသွာ နိမိတ္တေ စတုရော၊ နိက္ခမ္မ အဘိနိက္ခမံ၊
ဗောဓိမူလမုပါဂမ္မ၊ နိသိန္နော ဝဇိရာသနေ။
သဟဿဗာဟုံ မာပေတွာ၊ နာနာယုဓသမာကုလံ [နာနာဝုဓသမာကုလံ-ဣတိသဗ္ဗတ္ထ]၊
မဟာဘီတိကရံ ဝေသံ၊ ကာဠပဗ္ဗတသာဒိသံ။
မာပေတွာန သမာရုယှ၊ ဂိရိမေခလဝါရဏံ၊
မာရသေနံ သမာနေတွာ၊ အာဂတံ မကရဒ္ဓဇံ။
ပါရမိတာဗလေန တံ၊ မာရသေနံ ပလာပိယ၊
ယတ္ထာသီနော ကိလေသာရိ၊ သဟဿံ ဃာတယီ ဇိနော။
နယနံ သုဇလသေကေဟိ၊ သတ္တာဟံ ဇိနသေဝိတံ၊
ပူဇိတံ ဒေဝဗြဟ္မေဟိ၊ သိဒ္ဓါရဂနရာဒိဟိ၊
ဝန္ဒိတုံ ဇယဗောဓိံတံ၊ ဂစ္ဆာမိ သတတံ အဟံ။
ဥပါသတိ သဒါ ဂန္တွာ၊ ယော နရော ဗောဓိပါဒပံ၊
ဂန္ဓောဒဒီပဓူပါဒိ၊ နာနာပူဇာဟိ သာဓုကံ။
သ နရော နိရာမယော ဟောတိ၊ ပစ္စတ္တေ စ ပရတ္ထ စ၊
ပူဇိတော မာနိတော ဟောတိ၊ ဒီဃာယု ဗလဝါ သုခီ။
တဒတ္ထံ ပတ္ထယန္တေန၊ အတ္ထကာမေန ဇန္တုနာ၊
ဥပါသနီယံ သဒ္ဓါယ၊ နိစ္စံ တံ ဗောဓိပါဒပံတိ။
တံ သုတွာ ကုမာရိကာ ပီတိယာ ဖုဋသရီရာ ပိတရံ ဝန္ဒိတွာ အဟမ္ပိ တာတ ဂစ္ဆာမီတိ အာဟ။ ရာဇာ ပနဿာ ဥပဒ္ဒဝဘယေန ဂမနံ န ဣစ္ဆိ။ တတော သာ ယာဝတတိယံ ပိတရံ ယာစိတွာ ရညာ အနုညာတာ။ တတော ပဋ္ဌာယ ပိတရာ သဒ္ဓိံ သိန္ဓဝမာရုယှ ဗောဓိံ ဝန္ဒိတုံ သတတံ ဂစ္ဆတိ။ အထာပရဘာဂေ ရာဇာ မရဏမဉ္စေ နိပန္နော စိန္တေသိ။ ဓီတာ မေ နိရန္တရံ ဗောဓိဥပဋ္ဌာနံဂစ္ဆတိ၊ ဧတိဿာ အနာဂတေ ယံကိဉ္စိ ဘယံ ဥပ္ပဇ္ဇမာနံ တတော ဥပ္ပဇ္ဇတိ။ တတ္ထ မေ ကိံ ကာတဗ္ဗန္တိ။ တတော သိန္ဓဝံ ပက္ကောသာပေတွာ တဿ ကဏ္ဏမူလေ မန္တေန္တော ဧဝမာဟ၊ တာတ မမ ဓီတာ အဘိဏှံ တဝ သဟာယံ ကတွာ ဗောဓိံ ဝန္ဒိတုံ ဂစ္ဆတိ။ တတ္ထဿာ ယံကိဉ္စိ ဘယံ ဘဝေယျ။ တံ နပ္ပတိရူပံ။ တတ္ထ ဂမနာဂမနေ မမ ဓီတရံ ရက္ခေယျာသီတိ တဿ ဓီတရံ ပဋိပါဒေတွာ ကာလမကာသိ။ တတော ရာဇဓီတာ ပိတုသရီရကိစ္စံ ကာရေတွာ ဒိဝသဿ တိက္ခတ္တုံ အဿမဘိရုယှ ဗောဓိဥပဋ္ဌာနံ ဂစ္ဆတိ။ မနုဿာ ပနဿာ ရူပသမ္ပတ္တိံ ဒိသွာ ဝိမှိတမာနသာ ရာဇာရဟံ ဝတ နော ဣဒံ ပဏ္ဏာကာရံ ဒိဋ္ဌံ။ ဂန္တွာ ရညော အာစိက္ခိဿာမ။ အပ္ပေဝ နာမ ရာဇာ သော ကိဉ္စိ နော ဒဒေယျာတိ စိန္တေတွာ ရညော သန္တိကံ ဂန္တွာ ဝန္ဒိတွာ ဌိတာ ဧဝမာဟံသု။
ဗောဓိမဏ္ဍံ သမာဂမ္မ၊ အဘိဏှံ တုဋ္ဌမာနသာ၊
ဝန္ဒန္တီ ယာတိ ကညေကာ၊ ဝိဇ္ဇူဝ သိရိယာ ဇလံ။
နီလဓမ္ပိလ္လဘာရာ သာ၊ ဝိသာလာယတလောစနာ၊
သောဏ္ဏဒေါလာဘသဝဏာ၊ သာမာ သုဘပယောဓရာ။
သတရံသီဟိ သမ္မိဿ၊ သဉ္စျာမ္ဗုဒသမာဓရာ၊
တုင်္ဂနာသာ နီလဘမု၊ ဟာသဘာသာ မနောရမာ။
ဤဒိသံ ¶ နော မဟာရာဇာ [မဟာရာဇဒိဋ္ဌပုဗ္ဗ ဣတိပိကတ္ထစိ]၊ ဒိဋ္ဌပုဗ္ဗံ ကုဒါစနံ၊
ဧဟိ တဿာ သိရိံဒေဝ၊ ဗောဓိမဏ္ဍမှိ ဒက္ခသီတိ။
တံ သုတွာ ရာဇာ သဝဏသံသဂ္ဂေနေဝ တာယ ပဋိဗဒ္ဓစိတ္တော စတုရင်္ဂိနိံသေနံ ဂဟေတွာ ရာဇဓီတရံ ဗောဓိဝန္ဒနတ္ထာယ အာဂတကာလေ ဗဟိပါကာရေ သေနံ ပရိက္ခိပါပေတွာ ဂဏှထေတန္တိ မနုဿေ နိယောဇေသိ။ တတော သေနာပိ တံ ဂဟဏသဇ္ဇာ အဋ္ဌာသိ။ ရာဇဓီတာ တေ ဒိသွာ သီဃံ သိန္ဓဝံ ဥပသင်္ကမိတွာ တဿ ပိဋ္ဌိယံ နိသိန္နာ ပဏှိယာ သညံ အဒါသိ။ သော တံ ဂဟေတွာ ဝေဂေန အာကာသံ ပက္ခန္ဒိ။ သာ ပန ဒုန္နိသိန္နဘာဝေန အဿဿ ဝေဂံ သန္ဓာရေတုမသက္ကောန္တီ အဿပိဋ္ဌိတော ပရိဂလိ။ သိန္ဓဝေါ ရာဇဓီတရံ ပတမာနံ ဒိသွာ ရာဇောဝါဒံ သရမာနော ဝေဂေနာဂန္တွာ တဿာ ကေသေ ဍံသိတွာ ဥက္ခိပိတွာ ပတမာနာယ တဿာ ပိဋ္ဌိံဒတွာ နိသီဒါပေတွာ အာကာသေန တံ နေတွာ ပါဋလိပုတ္တနဂရေယေဝ ပတိဋ္ဌာပေသိ [ပါတလိပုတ္တနဂရေယေဝတံ ပဝိဌာပေသိဣတိပိကတ္ထစိ]။
တိရစ္ဆာနဂတာပေဝံ၊ သရန္တာ ဥပကာရကံ၊
န ဇဟန္တီတိ မန္တွာန၊ ကတညူ ဟောန္တု [ဟောန္တိပါဏိနော-ဣတိပိကတ္ထစိ] ပါဏိနောတိ။
တတော ပဋ္ဌာယ သာ ပုညကမ္မံ ကတွာ သဂ္ဂပရာယနာ အဟောသီတိ။
ယော ယံ ဒုမိန္ဒံယတိနန္ဒနေန၊
သမ္ပူဇိတံ ပူဇယတေ သ ပညော၊
သ ဘောဂဝါ ဟောတိ အနီတိကော စ၊
သဗ္ဗတ္ထ သော ဟောတိ ပသတ္ထရူပေါ။
ဗောဓိရာဇဓီတုယာ ဝတ္ထုံ နဝမံ။
၄၀။ ကုဏ္ဍလိယာ ဝတ္ထုမှိ အယမာနုပုဗ္ဗီကထာ
လင်္ကာဒီပေ ¶ ရောဟဏဇပဒေ မဟာဂါမော နာမ အဟောသိ၊ တတ္ထ တိဿဝိဟာရံ နာမ အနေကသတဘိက္ခူဟိ သမာကိဏ္ဏံ အနေကပရိဝေဏပတိမဏ္ဍိတံ ဝိဟာရံ အဟောသိ။ တတ္ထေကော တိဿော နာမ သာမဏေရော ပဋိဝသတိ။ သော ဧကသ္မိံသမယေ ဇနပဒစာရိကံ စရန္တော ပါသာဏဝါပိဂါမေ ဘိက္ခံ စရိတွာ ယာပနမတ္တံ ဘတ္တံ သပ္ပိနာ သဒ္ဓိံ လဘိတွာ နိက္ခမ္မ ဂါမဒွါရံ ပတွာ မဟာဂါမာဘိမုခေါ ဂစ္ဆန္တော မနုဿေ ဥဒကဖာသုကဋ္ဌာနံ ပုစ္ဆိ။ တေဟိ ဘန္တေ တုမှာကံ အဘိမုခေ အဝိဒူရဋ္ဌာနေ ကကုဗန္ဒကန္ဒရံ နာမ သန္ဒမာနသီတလောဒကံ ဓဝလဝါလုကာတလံ တတ္ထ တုမှေ ဂန္တွာ နဟာတွာ သီတလစ္ဆာယာယ ဝါလုကာတလေ နိသိန္နော ဘတ္တကိစ္စံ ကတွာ ဂစ္ဆထာတိ ဝုတ္တေ သာမဏေရော ¶ သာဓူတိ ဝတွာ တတ္ထ ဂန္တွာ ဖာသုကဋ္ဌာနေ နိသိန္နော ဘတ္တံ ဘုဉ္ဇိတုမာရဘိ။ တဒါ ဧကေန ဝနကမ္မိကေန သဒ္ဓိံအရညံ ဂတာ ဧကာ သုနခီ တသ္မိံ ကန္ဒရေ ဧကသ္မိံ ပဗ္ဘာရဋ္ဌာနေ ဒါရကေ ဝိဇာယိတွာ ဆာတဇ္ဈတ္တာ ပဝေဓမာနဂတ္တာ ဒါရကာနံ သမီပေနိပန္နာ သာမဏေရဿ ပတ္တေ အာဟာရဂန္ဓံ ဃာယိတွာ နိပန္နဋ္ဌာနတော ဝုဋ္ဌာယ ပဝေဓမာနာ တဿ သမီပံ အာဂမ္မ နင်္ဂုဋ္ဌံ စာလေန္တီ အဋ္ဌာသိ၊ သာမဏေရော တံ ဒိသွာ ကမ္ပိတမာနသော အတ္တနော ဘောဇနတ္ထာယ ဝဋ္ဋိတံ ပထမာလောပံ တဿာ ပုရတော ဌပေသိ၊ တတော သာ သောမနဿာ တံ ဘုဉ္ဇိ။ တံ ဒိသွာ တုဋ္ဌော ပုနပ္ပုနံ အာလောပံ ကရောန္တော တဿာ ဘတ္တံ ဒတွာ ပတ္တံ ဓောဝိတွာ ထဝိကာယ ပက္ခိပိတွာ အဂမာသိ။ တတော သာ သုနခီ သာမဏေရဂတေန ပသာဒေန တတော စုတာ ဇမ္ဗုဒီပေ ဒေဝပုတ္တနဂရေ ရာဇာနံ ပဋိစ္စ တဿ မဟေသိယာ ကုစ္ဆိမှိ ပဋိသန္ဓိံ ဂဏှိတွာ ဒသမာသစ္စယေန မာတုကုစ္ဆိတော နိက္ခမိ၊ အထဿာ သိခါမင်္ဂလဒိဝသေ သမ္ပတ္တေ မာတာပိတရော ပနဿာ ကုဏ္ဍလာဝဋ္ဋကေသတ္တာ ကုဏ္ဍလာတိ နာမ မကံသု။ သာ အနုက္ကမေန သောဠသဝဿုဒ္ဒေသိကာ အဟောသိ၊ တသ္မိံ ကိရ သမယေ တိဿော သာမဏေရော မဟာဗောဓိံ ဝန္ဒိဿာမီတိ နာဝံ အဘိရုယှ ဇမ္ဗုဒီပံ ဂန္တွာ အနုပုဗ္ဗေန ဒေဝပုတ္တနဂရံ ပတွာ သုနိဝတ္ထော သုပါရုတော ယုဂမတ္တဒသော ဘိက္ခာယ စရန္တော မဟာဝီထိံ သမ္ပာပုဏိ။ ရာဇဓီတာ သီဟပဉ္ဇရံ ဥဂ္ဃာဋေတွာ အန္တရဝီထိံ ဩလောကေန္တီ ဘိက္ခန္တံ သာမဏေရံ ဒိသွာ ပုဗ္ဗသိနေဟံ ပဋိလဘိ၊ တသ္မိံခဏေ တဿာ ဇာတိဿရဉာဏံ အဟောသိ။ သာ ကိရ ပုဗ္ဗေ ဘိက္ခုဏီ ဟုတွာ ပဏ္ဏသူစိယာ သဒ္ဓိံ ပေါတ္ထကဉ္စ ပဒီပိယတေလဉ္စ ဒတွာ ဇာတိဿရာ ဘဝေယျံတိ ပတ္ထနံ ဌပေသိ၊ တတော သာဇာတိံ အနုဿရန္တီ သာမဏေရေန အတ္တနော ကတူပကာရံ ဒိတွာ သောမနဿာ နံ ပက္ကောသာပေတွာ ရာဇဂေဟေ အာသနံ ပညာပေတွာ တတ္ထ နိသိန္နံ နာနဂ္ဂရသ ဘောဇနေန ပရိဝိသိတွာ ဩနီတပတ္တပါဏိံ သာမဏေရံ ဥပသင်္ကမိတွာ ဝန္ဒိတွာ ဧကမန္တံ နိသိန္နာ တေန သဒ္ဓိံ သလ္လပန္တီ ဧဝမာဟ။
န သဉ္ဇာနာသိ မံ ဓီရ၊ ပုဗ္ဗေဟံ တဝ ဒါသိကာ၊
တေနာဟံ သုခိတာ အာသိံ၊ တသ္မာ တွမသိ ဣဿရောတိ။
တံ သုတွာ သာမဏေရော အာဟ။
နတ္ထိ မေ တာဒိသီ ဒါသီ၊ န သဉ္ဇာနာမိ တံ အဟံ၊
ကာသိ တွံ ကဿ ဝါ ဓီတာ၊ တံ မေ အက္ခာဟိ ပုစ္ဆိတာတိ။
တတော သာ တံ သာရာပေန္တီ အာဟ။
သာရာပေမိ တုဝံ အဇ္ဇ၊ ယထာ ဇာနာသိမံ ဣသေ၊
ဗုဇ္ဈဿု ဗောဓိတော ဒါနိ၊ မယာ ဇာတိံသရန္တိယာ။
ပါသာဏဝါပိဂါမမှိ၊ တမ္ဗပဏ္ဏိမှိ ရောဟဏေ၊
ဘိက္ခိတွာန တုဝံ ဘန္တေ၊ ယဒါ ကကုဗန္ဒကန္ဒရေ။
နိသီဒိတွာန တွံ ဘတ္တံ၊ ဘုတ္တကာလံ သရိဿသိ၊
တဒါဟံ သုနခီ အာသိံ၊ ဝိဇာတာ လဒ္ဓဂေါစရာ။
ဒါရကေ ¶ ခါဒိတုံ မယှ၊ မာသန္နာ ခုဒပီဠိတာ၊
ပဝေဓမာနသဗ္ဗင်္ဂါ၊ အဋ္ဌာသိံ တဝ သန္တိကေ။
ဒိသွာ တံ မံ တဒါ ဘန္တေ၊ ဝေဓမာနံ ဗုဘုက္ခိတံ၊
ဆိန္နဘတ္တော တုဝံ ဟုတွာ၊ မမံ ဘတ္တေန တောသယီ။
တဒါဟံ မုဒုစိတ္တေန၊ စိတ္တံ တယိ ပသာဒယိံ၊
တေနာဟံ ပုညကမ္မေန၊ ဒုတိယေ အတ္တသမ္ဘဝေ။
ဣဓ ရာဇကုလေ ဇာတာ၊ သဗ္ဗကာမသမိဒ္ဓိနီ၊
စိတ္တပ္ပသာဒမတ္တေန၊ လောကနာထဿ သာသနေ။
တဒဟုပဗ္ဗဇိတဿာပိ၊ ဤဒိသာ ဟောန္တိ သမ္ပဒါ၊
ကီဒိသံ ဟောတိ သမ္ဗုဒ္ဓေ၊ ပသာဒေန ဖလံ အဟော။
အညာနိ ပန ကိစ္စာနိ၊ ပဟာယာတ္တဟိတေ ရတော၊
အတန္ဒိတော ဒိဝါရတ္တိံ၊ သရာတု ရတနတ္တယံတိ။
ဧဝံ သာမဏေရေန ကတူပကာရံ သာရာပေတွာ ဘန္တေ တဝ ဒါသိယာ အနုဂ္ဂဟံ ပဋိစ္စ ဣဓေဝ ဝသထာတိ နိမန္တိတွာ တေန သမ္ပဋိစ္ဆိတေ မဟန္တံ ဝိဟာရံ ကာရာပေတွာ သာမဏေရံ အာဒိံ ကတွာ အနေကဘိက္ခုသတေ နိမန္တေတွာ ဝိဟာရေ ဝသာပေတွာ သုလဘံ ကတွာ စတုပစ္စယေဟိ ဥပဋ္ဌာသိ။ သာမဏေရောပိ သုနခိယာ ဒိန္နဒါနံ အနုဿရိတွာ တုဋ္ဌော ဗုဒ္ဓါနုဿတိံ မနသိကရောန္တော န စိရေနဝ အရဟတ္တံ ပတွာ တသ္မိံယေဝ ဝိဟာရေ ဝသန္တော အာယုပရိယောသာနေ တတ္ထေဝ ပရိနိဗ္ဗာယီတိ။
တိယဒ္ဓေသု တိလောကသ္မိံ၊ နတ္ထိ ဝတ္ထုတ္တယံ ဝိနာ၊
သတ္တာန မည မိစ္ဆတ္ထ၊ ဒါယကံ သုရပါဒပံ။
ကုဏ္ဍလိယာ ဝတ္ထုံ ဒသမံ။
မဟာသေနဝဂ္ဂေါ စတုတ္ထော။
ဧတ္တာဝတာ ဇမ္ဗုဒီပုပ္ပတ္တိကထာ သမတ္တာ။