📜

၉။ အာဋာနာဋိယသုတ္တဝဏ္ဏနာ

ပဌမဘာဏဝါရဝဏ္ဏနာ

၂၇၅။ ဧဝံမေ သုတန္တိ အာဋာနာဋိယသုတ္တံ။ တတြာယမပုဗ္ဗပဒဝဏ္ဏနာ – စတုဒ္ဒိသံ ရက္ခံ ဌပေတွာတိ အသုရသေနာယ နိဝါရဏတ္ထံ သက္ကဿ ဒေဝါနမိန္ဒဿ စတူသု ဒိသာသု အာရက္ခံ ဌပေတွာ။ ဂုမ္ဗံ ဌပေတွာတိ ဗလဂုမ္ဗံ ဌပေတွာ။ ဩဝရဏံ ဌပေတွာတိ စတူသု ဒိသာသု အာရက္ခကေ ဌပေတွာ။ ဧဝံ သက္ကဿ ဒေဝါနမိန္ဒဿ အာရက္ခံ သုသံဝိဟိတံ ကတွာ အာဋာနာဋနဂရေ နိသိန္နာ သတ္တ ဗုဒ္ဓေ အာရဗ္ဘ ဣမံ ပရိတ္တံ ဗန္ဓိတွာ ‘‘ယေ သတ္ထု ဓမ္မအာဏံ အမှာကဉ္စ ရာဇအာဏံ န သုဏန္တိ၊ တေသံ ဣဒဉ္စိဒဉ္စ ကရိဿာမာ’’တိ သာဝနံ ကတွာ အတ္တနောပိ စတူသု ဒိသာသု မဟတိယာ စ ယက္ခသေနာယာတိအာဒီဟိ စတူဟိ သေနာဟိ အာရက္ခံ သံဝိဒဟိတွာ အဘိက္ကန္တာယ ရတ္တိယာ…ပေ… ဧကမန္တံ နိသီဒိံသု။

အဘိက္ကန္တာယ ရတ္တိယာတိ ဧတ္ထ အဘိက္ကန္တသဒ္ဒေါ ခယသုန္ဒရာဘိရူပအဗ္ဘနုမောဒနာဒီသု ဒိဿတိ။ တတ္ထ ‘‘အဘိက္ကန္တာ၊ ဘန္တေ ရတ္တိ၊ နိက္ခန္တော ပဌမော ယာမော၊ စိရနိသိန္နော ဘိက္ခုသင်္ဃော ဥဒ္ဒိသတု၊ ဘန္တေ၊ ဘဂဝါ ဘိက္ခူနံ ပါတိမောက္ခ’’န္တိ (အ။ နိ။ ၈။၂၀) ဧဝမာဒီသု ခယေ ဒိဿတိ။ ‘‘အယံ ဣမေသံ စတုန္နံ ပုဂ္ဂလာနံ အဘိက္ကန္တတရော ပဏီတတရော စာ’’တိ (အ။ နိ။ ၄။၁၀၀) ဧဝမာဒီသု သုန္ဒရေ။

‘‘ကော မေ ဝန္ဒတိ ပါဒါနိ၊ ဣဒ္ဓိယာ ယသသာ ဇလံ၊

အဘိက္ကန္တေန ဝဏ္ဏေန၊ သဗ္ဗာ ဩဘာသယံ ဒိသာ’’တိ။ (ဝိ။ ဝ။ ၈၅၇)၊

ဧဝမာဒီသု အဘိရူပေ။ ‘‘အဘိက္ကန္တံ၊ ဘော ဂေါတမာတိ (ပါရာ။ ၁၅) ဧဝမာဒီသု အဗ္ဘနုမောဒနေ ။ ဣဓ ပန ခယေ။ တေန အဘိက္ကန္တာယ ရတ္တိယာ၊ ပရိက္ခီဏာယ ရတ္တိယာတိ ဝုတ္တံ ဟောတိ။

အဘိက္ကန္တဝဏ္ဏာတိ ဣဓ အဘိက္ကန္တသဒ္ဒေါ အဘိရူပေ။ ဝဏ္ဏသဒ္ဒေါ ပန ဆဝိထုတိကုလဝဂ္ဂကာရဏသဏ္ဌာနပမာဏရူပါယတနာဒီသု ဒိဿတိ။ တတ္ထ ‘‘သုဝဏ္ဏဝဏ္ဏောသိ ဘဂဝါ’’တိ (မ။ နိ။ ၂။၃၉၉) ဧဝမာဒီသု ဆဝိယံ။ ‘‘ကဒါ သညူဠှာ ပန တေ၊ ဂဟပတိ၊ ဣမေ သမဏဿ ဂေါတမဿ ဝဏ္ဏာ’’တိ (မ။ နိ။ ၂။၇၇) ဧဝမာဒီသု ထုတိယံ။ ‘‘စတ္တာရောမေ ၊ ဘော ဂေါတမ၊ ဝဏ္ဏာ’’တိ (ဒီ။ နိ။ ၁။၂၆၆) ဧဝမာဒီသု ကုလဝဂ္ဂေ။ ‘‘အထ ကေန နု ဝဏ္ဏေန ဂန္ဓထေနောတိ ဝုစ္စတီ’’တိအာဒီသု (သံ။ နိ။ ၁။၂၃၄) ကာရဏေ။ ‘‘မဟန္တံ ဟတ္ထိရာဇဝဏ္ဏံ အဘိနိမ္မိနိတွာ’’တိ (သံ။ နိ။ ၁။၁၃၈) ဧဝမာဒီသု သဏ္ဌာနေ။ ‘‘တယော ပတ္တဿ ဝဏ္ဏာ’’တိ (ပါရာ။ ၆၀၂) ဧဝမာဒီသု ပမာဏေ။ ‘‘ဝဏ္ဏော ဂန္ဓော ရသော ဩဇာ’’တိ ဧဝမာဒီသု ရူပါယတနေ။ သော ဣဓ ဆဝိယံ ဒဋ္ဌဗ္ဗော။ တေန ‘‘အဘိက္ကန္တဝဏ္ဏာ အဘိရူပစ္ဆဝီ’’တိ ဝုတ္တံ ဟောတိ။

ကေဝလကပ္ပန္တိ ဧတ္ထ ကေဝလသဒ္ဒေါ အနဝသေသယေဘုယျအဗျာမိဿာနတိရေကဒဠှတ္ထဝိသံယောဂါဒိအနေကတ္ထော။ တထာ ဟိဿ ‘‘ကေဝလပရိပုဏ္ဏံ ပရိသုဒ္ဓံ ဗြဟ္မစရိယ’’န္တိ (ပါရာ။ ၁) ဧဝမာဒီသု အနဝသေသတာ အတ္ထော။ ‘‘ကေဝလကပ္ပာ စ အင်္ဂမာဂဓာ ပဟူတံ ခါဒနီယံ ဘောဇနီယံ အာဒါယ အဘိက္ကမိတုကာမာ ဟောန္တီ’’တိ (မဟာဝ။ ၄၃) ဧဝမာဒီသု ယေဘုယျတာ။ ‘‘ကေဝလဿ ဒုက္ခက္ခန္ဓဿ သမုဒယော ဟောတီ’’တိ (မဟာဝ။ ၁) ဧဝမာဒီသု အဗျာမိဿတာ။ ‘‘ကေဝလံ သဒ္ဓါမတ္တကံ နူန အယမာယသ္မာ’’တိ (အ။ နိ။ ၆။၅၅) ဧဝမာဒီသု အနတိရေကတာ။ ‘‘အာယသ္မတော၊ ဘန္တေ၊ အနုရုဒ္ဓဿ ဗာဟိကော နာမ သဒ္ဓိဝိဟာရိကော ကေဝလကပ္ပံ သင်္ဃဘေဒါယ ဌိတော’’တိ (အ။ နိ။ ၄။၂၄၃) ဧဝမာဒီသု ဒဠှတ္ထတာ။ ‘‘ကေဝလီ ဝုသိတဝါ ဥတ္တမပုရိသောတိ ဝုစ္စတီ’’တိ (အ။ နိ။ ၁၀။၁၂) ဧဝမာဒီသု ဝိသံယောဂေါ။ ဣဓ ပနဿ အနဝသေသတ္ထော အဓိပ္ပေတော။

ကပ္ပသဒ္ဒေါ ပနာယံ အဘိသဒ္ဒဟနဝေါဟာရကာလပညတ္တိဆေဒနဝိကပ္ပလေသသမန္တဘာဝါဒိအနေကတ္ထော။ တထာ ဟိဿ ‘‘ဩကပ္ပနိယမေတံ ဘောတော ဂေါတမဿ။ ယထာ တံ အရဟတော သမ္မာသမ္ဗုဒ္ဓဿာ’’တိ (မ။ နိ။ ၁။၃၈၇) ဧဝမာဒီသု အဘိသဒ္ဒဟနမတ္ထော။ ‘‘အနုဇာနာမိ၊ ဘိက္ခဝေ၊ ပဉ္စဟိ သမဏကပ္ပေဟိ ဖလံ ပရိဘုဉ္ဇိတု’’န္တိ (စူဠဝ။ ၂၅၀) ဧဝမာဒီသု ဝေါဟာရော။ ‘‘ယေန သုဒံ နိစ္စကပ္ပံ ဝိဟရာမီ’’တိ (မ။ နိ။ ၁။၃၈၇) ဧဝမာဒီသု ကာလော။ ‘‘ဣစ္စာယသ္မာ ကပ္ပော’’တိ (သု။ နိ။ ၁၀၉၈) ဧဝမာဒီသု ပညတ္တိ။ ‘‘အလင်္ကတော ကပ္ပိတကေသမဿူ’’တိ (ဝိ။ ဝ။ ၁၀၉၄) ဧဝမာဒီသု ဆေဒနံ။ ‘‘ကပ္ပတိ ဒွင်္ဂုလကပ္ပော’’တိ (စူဠဝ။ ၄၄၆) ဧဝမာဒီသု ဝိကပ္ပော၊ အတ္ထိ ကပ္ပော နိပဇ္ဇိတု’’န္တိ (အ။ နိ။ ၈။၈၀) ဧဝမာဒီသု လေသော။ ‘‘ကေဝလကပ္ပံ ဝေဠုဝနံ ဩဘာသေတွာ’’တိ (သံ။ နိ။ ၁။၉၄) ဧဝမာဒီသု သမန္တဘာဝေါ။ ဣဓ ပန သမန္တဘာဝေါ အတ္ထော အဓိပ္ပေတော။ တသ္မာ ‘‘ကေဝလကပ္ပံ ဂိဇ္ဈကူဋ’’န္တိ ဧတ္ထ အနဝသေသံ သမန္တတော ဂိဇ္ဈကူဋန္တိ ဧဝမတ္ထော ဒဋ္ဌဗ္ဗော။

ဩဘာသေတွာတိ ဝတ္ထမာလာလင်္ကာရသရီရသမုဋ္ဌိတာယ အာဘာယ ဖရိတွာ၊ စန္ဒိမာ ဝိယ သူရိယော ဝိယ စ ဧကောဘာသံ ဧကပဇ္ဇောတံ ကရိတွာတိ အတ္ထော။ ဧကမန္တံ နိသီဒိံသူတိ ဒေဝတာနံ ဒသဗလဿ သန္တိကေ နိသိန္နဋ္ဌာနံ နာမ န ဗဟု၊ ဣမသ္မိံ ပန သုတ္တေ ပရိတ္တဂါရဝဝသေန နိသီဒိံသု။

၂၇၆။ ဝေဿဝဏောတိ ကိဉ္စာပိ စတ္တာရော မဟာရာဇာနော အာဂတာ၊ ဝေဿဝဏော ပန ဒသဗလဿ ဝိဿာသိကော ကထာပဝတ္တနေ ဗျတ္တော သုသိက္ခိတော၊ တသ္မာ ဝေဿဝဏော မဟာရာဇာ ဘဂဝန္တံ ဧတဒဝေါစ။ ဥဠာရာတိ မဟေသက္ခာနုဘာဝသမ္ပန္နာ။ ပါဏာတိပါတာ ဝေရမဏိယာတိ ပါဏာတိပါတေ ဒိဋ္ဌဓမ္မိကသမ္ပရာယိကံ အာဒီနဝံ ဒဿေတွာ တတော ဝေရမဏိယာ ဓမ္မံ ဒေသေတိ။ သေသေသုပိ ဧသေဝ နယော။ တတ္ထ သန္တိ ဥဠာရာ ယက္ခာ နိဝါသိနောတိ တေသု သေနာသနေသု သန္တိ ဥဠာရာ ယက္ခာ နိဗဒ္ဓဝါသိနော။ အာဋာနာဋိယန္တိ အာဋာနာဋနဂရေ ဗဒ္ဓတ္တာ ဧဝံနာမံ။ ကိံ ပန ဘဂဝတော အပစ္စက္ခဓမ္မော နာမ အတ္ထီတိ၊ နတ္ထိ။ အထ ကသ္မာ ဝေဿဝဏော ‘‘ဥဂ္ဂဏှာတု၊ ဘန္တေ၊ ဘဂဝါ’’တိအာဒိမာဟ? ဩကာသကရဏတ္ထံ။ သော ဟိ ဘဂဝန္တံ ဣမံ ပရိတ္တံ သာဝေတုံ ဩကာသံ ကာရေန္တော ဧဝမာဟ။ သတ္ထု ကထိတေ ဣမံ ပရိတ္တံ ဂရု ဘဝိဿတီတိပိ အာဟ။ ဖာသုဝိဟာရာယာတိ ဂမနဋ္ဌာနာဒီသု စတူသု ဣရိယာပထေသု သုခဝိဟာရာယ။

၂၇၇။ စက္ခုမန္တဿာတိ န ဝိပဿီယေဝ စက္ခုမာ၊ သတ္တပိ ဗုဒ္ဓါ စက္ခုမန္တော၊ တသ္မာ ဧကေကဿ ဗုဒ္ဓဿ ဧတာနိ သတ္တ သတ္တ နာမာနိ ဟောန္တိ။ သဗ္ဗေပိ ဗုဒ္ဓါ စက္ခုမန္တော၊ သဗ္ဗေ သဗ္ဗဘူတာနုကမ္ပိနော၊ သဗ္ဗေ နှာတကိလေသတ္တာ နှာတကာ။ သဗ္ဗေ မာရသေနာပမဒ္ဒိနော၊ သဗ္ဗေ ဝုသိတဝန္တော၊ သဗ္ဗေ ဝိမုတ္တာ၊ သဗ္ဗေ အင်္ဂတော ရသ္မီနံ နိက္ခန္တတ္တာ အင်္ဂီရသာ။ န ကေဝလဉ္စ ဗုဒ္ဓါနံ ဧတာနေဝ သတ္တ နာမာနိ အသင်္ချေယျာနိ နာမာနိ သဂုဏေန မဟေသိနောတိ ဝုတ္တံ။

ဝေဿဝဏော ပန အတ္တနော ပါကဋနာမဝသေန ဧဝမာဟ။ တေ ဇနာတိ ဣဓ ခီဏာသဝါ ဇနာတိ အဓိပ္ပေတာ။ အပိသုဏာထာတိ ဒေသနာသီသမတ္တမေတံ၊ အမုသာ အပိသုဏာ အဖရုသာ မန္တဘာဏိနောတိ အတ္ထော ။ မဟတ္တာတိ မဟန္တဘာဝံ ပတ္တာ။ ‘‘မဟန္တာ’’တိပိ ပါဌော၊ မဟန္တာတိ အတ္ထော။ ဝီတသာရဒါတိ နိဿာရဒါ ဝိဂတလောမဟံသာ။

ဟိတန္တိ မေတ္တာဖရဏေန ဟိတံ။ ယံ နမဿန္တီတိ ဧတ္ထ ယန္တိ နိပါတမတ္တံ။ မဟတ္တန္တိ မဟန္တံ။ အယမေဝ ဝါ ပါဌော၊ ဣဒံ ဝုတ္တံ ဟောတိ ‘‘ယေ စာပိ လောကေ ကိလေသနိဗ္ဗာနေန နိဗ္ဗုတာ ယထာဘူတံ ဝိပဿိသုံ၊ ဝိဇ္ဇာဒိဂုဏသမ္ပန္နဉ္စ ဟိတံ ဒေဝမနုဿာနံ ဂေါတမံ နမဿန္တိ၊ တေ ဇနာ အပိသုဏာ၊ တေသမ္ပိ နမတ္ထူ’’တိ။ အဋ္ဌကထာယံ ပန တေ ဇနာ အပိသုဏာတိ တေ ဗုဒ္ဓါ အပိသုဏာတိ ဧဝံ ပဌမဂါထာယ ဗုဒ္ဓါနံယေဝ ဝဏ္ဏော ကထိတော၊ တသ္မာ ပဌမဂါထာ သတ္တန္နံ ဗုဒ္ဓါနံ ဝသေန ဝုတ္တာ။ ဒုတိယဂါထာယ ‘‘ဂေါတမ’’န္တိ ဒေသနာမုခမတ္တမေတံ။ အယမ္ပိ ဟိ သတ္တန္နံယေဝ ဝသေန ဝုတ္တာတိ ဝေဒိတဗ္ဗာ။ အယဉှေတ္ထ အတ္ထော – လောကေ ပဏ္ဍိတာ ဒေဝမနုဿာ ယံ နမဿန္တိ ဂေါတမံ၊ တဿ စ တတော ပုရိမာနဉ္စ ဗုဒ္ဓါနံ နမတ္ထူတိ။

၂၇၈။ ယတော ဥဂ္ဂစ္ဆတီတိ ယတော ဌာနတော ဥဒေတိ။ အာဒိစ္စောတိ အဒိတိယာ ပုတ္တော၊ ဝေဝစနမတ္တံ ဝါ ဧတံ သူရိယသဒ္ဒဿ။ မဟန္တံ မဏ္ဍလံ အဿာတိ မဏ္ဍလီမဟာ။ ယဿ စုဂ္ဂစ္ဆမာနဿာတိ ယမှိ ဥဂ္ဂစ္ဆမာနေ။ သံဝရီပိ နိရုဇ္ဈတီတိ ရတ္တိ အန္တရဓာယတိ။ ယဿ စုဂ္ဂတေတိ ယသ္မိံ ဥဂ္ဂတေ။

ရဟဒေါတိ ဥဒကရဟဒေါ။ တတ္ထာတိ ယတော ဥဂ္ဂစ္ဆတိ သူရိယော၊ တသ္မိံ ဌာနေ။ သမုဒ္ဒေါတိ ယော သော ရဟဒေါတိ ဝုတ္တော၊ သော န အညော၊ အထ ခေါ သမုဒ္ဒေါ။ သရိတောဒကောတိ ဝိသဋောဒကော၊ သရိတာ နာနပ္ပကာရာ နဒိယော အဿ ဥဒကေ ပဝိဋ္ဌာတိ ဝါ သရိတောဒကော။ ဧဝံ တံ တတ္ထ ဇာနန္တီတိ တံ ရဟဒံ တတ္ထ ဧဝံ ဇာနန္တိ ။ ကိန္တိ ဇာနန္တိ? သမုဒ္ဒေါ သရိတောဒကောတိ ဧဝံ ဇာနန္တိ။

ဣတောတိ သိနေရုတော ဝါ တေသံ နိသိန္နဋ္ဌာနတော ဝါ။ ဇနောတိ အယံ မဟာဇနော။ ဧကနာမာတိ ဣန္ဒနာမေန ဧကနာမာ။ သဗ္ဗေသံ ကိရ တေသံ သက္ကဿ ဒေဝရညော နာမမေဝ နာမမကံသု။ အသီတိ ဒသ ဧကော စာတိ ဧကနဝုတိဇနာ။ ဣန္ဒနာမာတိ ဣန္ဒောတိ ဧဝံနာမာ။ ဗုဒ္ဓံ အာဒိစ္စဗန္ဓုနန္တိ ကိလေသနိဒ္ဒါပဂမနေနာပိ ဗုဒ္ဓံ။ အာဒိစ္စေန သမာနဂေါတ္တတာယပိ အာဒိစ္စဗန္ဓုနံ။ ကုသလေန သမေက္ခသီတိ အနဝဇ္ဇေန နိပုဏေန ဝါ သဗ္ဗညုတညာဏေန မဟာဇနံ ဩလောကေသိ။ အမနုဿာပိ တံ ဝန္ဒန္တီတိ အမနုဿာပိ တံ ‘‘သဗ္ဗညုတညာဏေန မဟာဇနံ ဩလောကေသီ’’တိ ဝတွာ ဝန္ဒန္တိ။ သုတံ နေတံ အဘိဏှသောတိ ဧတံ အမှေဟိ အဘိက္ခဏံ သုတံ။ ဇိနံ ဝန္ဒထ ဂေါတမံ၊ ဇိနံ ဝန္ဒာမ ဂေါတမန္တိ အမှေဟိ ပုဋ္ဌာ ဇိနံ ဝန္ဒာမ ဂေါတမန္တိ ဝဒန္တိ။

၂၇၉။ ယေနပေတာ ပဝုစ္စန္တီတိ ပေတာ နာမ ကာလင်္ကတာ၊ တေ ယေန ဒိသာဘာဂေန နီဟရိယန္တူတိ ဝုစ္စန္တိ။ ပိသုဏာ ပိဋ္ဌိမံသိကာတိ ပိသုဏာဝါစာ စေဝ ပိဋ္ဌိမံသံ ခါဒန္တာ ဝိယ ပရမ္မုခါ ဂရဟကာ စ။ ဧတေ စ ယေန နီဟရိယန္တူတိ ဝုစ္စန္တိ၊ သဗ္ဗေပိ ဟေတေ ဒက္ခိဏဒွါရေန နီဟရိတွာ ဒက္ခိဏတော နဂရဿ ဍယှန္တု ဝါ ဆိဇ္ဇန္တု ဝါ ဟညန္တု ဝါတိ ဧဝံ ဝုစ္စန္တိ။ ဣတော သာ ဒက္ခိဏာ ဒိသာတိ ယေန ဒိသာဘာဂေန တေ ပေတာ စ ပိသုဏာဒိကာ စ နီဟရိယန္တူတိ ဝုစ္စန္တိ၊ ဣတော သာ ဒက္ခိဏာ ဒိသာ။ ဣတောတိ သိနေရုတော ဝါ တေသံ နိသိန္နဋ္ဌာနတော ဝါ။ ကုမ္ဘဏ္ဍာနန္တိ တေ ကိရ ဒေဝါ မဟောဒရာ ဟောန္တိ၊ ရဟဿင်္ဂမ္ပိ စ နေသံ ကုမ္ဘော ဝိယ မဟန္တံ ဟောတိ။ တသ္မာ ကုမ္ဘဏ္ဍာတိ ဝုစ္စန္တိ။

၂၈၀။ ယတ္ထ စောဂ္ဂစ္ဆတိ သူရိယောတိ ယသ္မိံ ဒိသာဘာဂေ သူရိယော အတ္ထံ ဂစ္ဆတိ။

၂၈၁။ ယေနာတိ ယေန ဒိသာဘာဂေန။ မဟာနေရူတိ မဟာသိနေရု ပဗ္ဗတရာဇာ။ သုဒဿနောတိ သောဝဏ္ဏမယတ္တာ သုန္ဒရဒဿနော။ သိနေရုဿ ဟိ ပါစီနပဿံ ရဇတမယံ၊ ဒက္ခိဏပဿံ မဏိမယံ ၊ ပစ္ဆိမပဿံ ဖလိကမယံ၊ ဥတ္တရပဿံ သောဝဏ္ဏမယံ၊ တံ မနုညဒဿနံ ဟောတိ။ တသ္မာ ယေန ဒိသာဘာဂေန သိနေရု သုဒဿနောတိ အယမေတ္ထတ္ထော။ မနုဿာ တတ္ထ ဇာယန္တီတိ တတ္ထ ဥတ္တရကုရုမှိ မနုဿာ ဇာယန္တိ။ အမမာတိ ဝတ္ထာဘရဏပါနဘောဇနာဒီသုပိ မမတ္တဝိရဟိတာ။ အပရိဂ္ဂဟာတိ ဣတ္ထိပရိဂ္ဂဟေန အပရိဂ္ဂဟာ။ တေသံ ကိရ ‘‘အယံ မယှံ ဘရိယာ’’တိ မမတ္တံ န ဟောတိ၊ မာတရံ ဝါ ဘဂိနိံ ဝါ ဒိသွာ ဆန္ဒရာဂေါ နုပ္ပဇ္ဇတိ။

နပိ နီယန္တိ နင်္ဂလာတိ နင်္ဂလာနိပိ တတ္ထ ‘‘ကသိကမ္မံ ကရိဿာမာ’’တိ န ခေတ္တံ နီယန္တိ။ အကဋ္ဌပါကိမန္တိ အကဋ္ဌေ ဘူမိဘာဂေ အရညေ သယမေဝ ဇာတံ။ တဏ္ဍုလပ္ဖလန္တိ တဏ္ဍုလာဝ တဿ ဖလံ ဟောတိ။

တုဏ္ဍိကီရေ ပစိတွာနာတိ ဥက္ခလိယံ အာကိရိတွာ နိဒ္ဓုမင်္ဂါရေန အဂ္ဂိနာ ပစိတွာ။ တတ္ထ ကိရ ဇောတိကပါသာဏာ နာမ ဟောန္တိ။ အထ ခေါ တေ တယော ပါသာဏေ ဌပေတွာ တံ ဥက္ခလိံ အာရောပေန္တိ။ ပါသာဏေဟိ တေဇော သမုဋ္ဌဟိတွာ တံ ပစတိ။ တတော ဘုဉ္ဇန္တိ ဘောဇနန္တိ တတော ဥက္ခလိတော ဘောဇနမေဝ ဘုဉ္ဇန္တိ၊ အညော သူပေါ ဝါ ဗျဉ္ဇနံ ဝါ န ဟောတိ၊ ဘုဉ္ဇန္တာနံ စိတ္တာနုကူလောယေဝဿ ရသော ဟောတိ။ တေ တံ ဌာနံ သမ္ပတ္တာနံ ဒေန္တိယေဝ၊ မစ္ဆရိယစိတ္တံ နာမ န ဟောတိ။ ဗုဒ္ဓပစ္စေကဗုဒ္ဓါဒယောပိ မဟိဒ္ဓိကာ တတ္ထ ဂန္တွာ ပိဏ္ဍပါတံ ဂဏှန္တိ။

ဂါဝိံဧကခုရံ ကတွာတိ ဂါဝိံ ဂဟေတွာ ဧကခုရံ ဝါဟနမေဝ ကတွာ။ တံ အဘိရုယှ ဝေဿဝဏဿ ပရိစာရကာ ယက္ခာ။ အနုယန္တိ ဒိသောဒိသန္တိ တာယ တာယ ဒိသာယ စရန္တိ။ ပသုံ ဧကခုရံ ကတွာတိ ဌပေတွာ ဂါဝိံ အဝသေသစတုပ္ပဒဇာတိကံ ပသုံ ဧကခုရံ ဝါဟနမေဝ ကတွာ ဒိသောဒိသံ အနုယန္တိ။

ဣတ္ထိံ ဝါ ဝါဟနံ ကတွာတိ ယေဘုယျေန ဂဗ္ဘိနိံ မာတုဂါမံ ဝါဟနံ ကရိတွာ။ တဿာ ပိဋ္ဌိယာ နိသီဒိတွာ စရန္တိ။ တဿာ ကိရ ပိဋ္ဌိ ဩနမိတုံ သဟတိ။ ဣတရာ ပန ဣတ္ထိယော ယာနေ ယောဇေန္တိ။ ပုရိသံ ဝါဟနံ ကတွာတိ ပုရိသေ ဂဟေတွာ ယာနေ ယောဇေန္တိ။ ဂဏှန္တာ စ သမ္မာဒိဋ္ဌိကေ ဂဟေတုံ န သက္ကောန္တိ။ ယေဘုယျေန ပစ္စန္တိမမိလက္ခုဝါသိကေ ဂဏှန္တိ။ အညတရော ကိရေတ္ထ ဇာနပဒေါ ဧကဿ ထေရဿ သမီပေ နိသီဒိတွာ နိဒ္ဒါယတိ၊ ထေရော ‘‘ဥပါသက အတိဝိယ နိဒ္ဒါယသီ’’တိ ပုစ္ဆိ။ ‘‘အဇ္ဇ၊ ဘန္တေ၊ သဗ္ဗရတ္တိံ ဝေဿဝဏဒါသေဟိ ကိလမိတောမှီ’’တိ အာဟ။

ကုမာရိံ ဝါဟနံ ကတွာတိ ကုမာရိယော ဂဟေတွာ ဧကခုရံ ဝါဟနံ ကတွာ ရထေ ယောဇေန္တိ။ ကုမာရဝါဟနေပိ ဧသေဝ နယော။ ပစာရာ တဿ ရာဇိနောတိ တဿ ရညော ပရိစာရိကာ။ ဟတ္ထိယာနံ အဿယာနန္တိ န ကေဝလံ ဂေါယာနာဒီနိယေဝ၊ ဟတ္ထိအဿယာနာဒီနိပိ အဘိရုဟိတွာ ဝိစရန္တိ။ ဒိဗ္ဗံ ယာနန္တိ အညမ္ပိ နေသံ ဗဟုဝိဓံ ဒိဗ္ဗယာနံ ဥပဋ္ဌိတမေဝ ဟောတိ၊ ဧတာနိ တာဝ နေသံ ဥပကပ္ပနယာနာနိ။ တေ ပန ပါသာဒေ ဝရသယနမှိ နိပန္နာပိ ပီဌသိဝိကာဒီသု စ နိသိန္နာပိ ဝိစရန္တိ။ တေန ဝုတ္တံ ‘‘ပါသာဒါ သိဝိကာ စေဝါ’’တိ။ မဟာရာဇဿ ယသဿိနောတိ ဧဝံ အာနုဘာဝသမ္ပန္နဿ ယသဿိနော မဟာရာဇဿ ဧတာနိ ယာနာနိ နိဗ္ဗတ္တန္တိ။

တဿစ နဂရာ အဟု အန္တလိက္ခေ သုမာပိတာတိ တဿ ရညော အာကာသေ သုဋ္ဌု မာပိတာ ဧတေ အာဋာနာဋာဒိကာ နဂရာ အဟေသုံ၊ နဂရာနိ ဘဝိံသူတိ အတ္ထော။ ဧကဉှိဿ နဂရံ အာဋာနာဋာ နာမ အာသိ၊ ဧကံ ကုသိနာဋာ နာမ၊ ဧကံ ပရကုသိနာဋာ နာမ၊ ဧကံ နာဋသူရိယာ နာမ၊ ဧကံ ပရကုသိဋနာဋာ နာမ။

ဥတ္တရေန ကသိဝန္တောတိ တသ္မိံ ဌတွာ ဥဇုံ ဥတ္တရဒိသာယ ကသိဝန္တော နာမ အညံ နဂရံ။ ဇနောဃမပရေန စာတိ ဧတဿ အပရဘာဂေ ဇနောဃံ နာမ အညံ နဂရံ။ နဝနဝတိယောတိ အညမ္ပိ နဝနဝတိယော နာမ ဧကံ နဂရံ။ အပရံ အမ္ဗရအမ္ဗရဝတိယော နာမ။ အာဠကမန္ဒာတိ အပရမ္ပိ အာဠကမန္ဒာ နာမ ရာဇဓာနီ။

တသ္မာကုဝေရော မဟာရာဇာတိ အယံ ကိရ အနုပ္ပန္နေ ဗုဒ္ဓေ ကုဝေရော နာမ ဗြာဟ္မဏော ဟုတွာ ဥစ္ဆုဝပ္ပံ ကာရေတွာ သတ္တ ယန္တာနိ ယောဇေသိ။ ဧကိဿာယ ယန္တသာလာယ ဥဋ္ဌိတံ အာယံ အာဂတာဂတဿ မဟာဇနဿ ဒတွာ ပုညံ အကာသိ။ အဝသေသသာလာဟိ တတ္ထေဝ ဗဟုတရော အာယော ဥဋ္ဌာသိ၊ သော တေန ပသီဒိတွာ အဝသေသသာလာသုပိ ဥပ္ပဇ္ဇနကံ ဂဟေတွာ ဝီသတိ ဝဿသဟဿာနိ ဒါနံ အဒါသိ။ သော ကာလံ ကတွာ စာတုမဟာရာဇိကေသု ကုဝေရော နာမ ဒေဝပုတ္တော ဇာတော။ အပရဘာဂေ ဝိသာဏာယ ရာဇဓာနိယာ ရဇ္ဇံ ကာရေသိ။ တတော ပဋ္ဌာယ ဝေဿဝဏောတိ ဝုစ္စတိ။

ပစ္စေသန္တော ပကာသေန္တီတိ ပဋိဧသန္တော ဝိသုံ ဝိသုံ အတ္ထေ ဥပပရိက္ခမာနာ အနုသာသမာနာ အညေ ဒွါဒသ ယက္ခရဋ္ဌိကာ ပကာသေန္တိ။ တေ ကိရ ယက္ခရဋ္ဌိကာ သာသနံ ဂဟေတွာ ဒွါဒသန္နံ ယက္ခဒေါဝါရိကာနံ နိဝေဒေန္တိ။ ယက္ခဒေါဝါရိကာ တံ သာသနံ မဟာရာဇဿ နိဝေဒေန္တိ။ ဣဒါနိ တေသံ ယက္ခရဋ္ဌိကာနံ နာမံ ဒဿေန္တော တတောလာတိအာဒိမာဟ။ တေသု ကိရ ဧကော တတောလာ နာမ၊ ဧကော တတ္တလာ နာမ၊ ဧကော တတောတလာ နာမ၊ ဧကော ဩဇသိ နာမ၊ ဧကော တေဇသိ နာမ၊ ဧကော တတောဇသီ နာမ။ သူရော ရာဇာတိ ဧကော သူရော နာမ၊ ဧကော ရာဇာ နာမ၊ ဧကော သူရောရာဇာ နာမ၊ အရိဋ္ဌော နေမီတိ ဧကော အရိဋ္ဌော နာမ၊ ဧကော နေမိ နာမ၊ ဧကော အရိဋ္ဌနေမိ နာမ။

ရဟဒေါပိတတ္ထ ဓရဏီ နာမာတိ တတ္ထ ပနေကော နာမေန ဓရဏီ နာမ ဥဒကရဟဒေါ အတ္ထိ၊ ပဏ္ဏာသယောဇနာ မဟာပေါက္ခရဏီ အတ္ထီတိ ဝုတ္တံ ဟောတိ။ ယတော မေဃာ ပဝဿန္တီတိ ယတော ပေါက္ခရဏိတော ဥဒကံ ဂဟေတွာ မေဃာ ပဝဿန္တိ။ ဝဿာ ယတော ပတာယန္တီတိ ယတော ဝုဋ္ဌိယော အဝတ္ထရမာနာ နိဂစ္ဆန္တိ။ မေဃေသု ကိရ ဥဋ္ဌိတေသု တတော ပေါက္ခရဏိတော ပုရာဏဥဒကံ ဘဿတိ။ ဥပရိ မေဃော ဥဋ္ဌဟိတွာ တံ ပေါက္ခရဏိံ နဝေါဒကေန ပူရေတိ။ ပုရာဏောဒကံ ဟေဋ္ဌိမံ ဟုတွာ နိက္ခမတိ။ ပရိပုဏ္ဏာယ ပေါက္ခရဏိယာ ဝလာဟကာ ဝိဂစ္ဆန္တိ။ သဘာပီတိ သဘာ။ တဿာ ကိရ ပေါက္ခရဏိယာ တီရေ သာလဝတိယာ နာမ လတာယ ပရိက္ခိတ္တော ဒွါဒသယောဇနိကော ရတနမဏ္ဍပေါ အတ္ထိ၊ တံ သန္ဓာယေတံ ဝုတ္တံ။

ပယိရုပါသန္တီတိ နိသီဒန္တိ။ တတ္ထ နိစ္စဖလာ ရုက္ခာတိ တသ္မိံ ဌာနေ တံ မဏ္ဍပံ ပရိဝါရေတွာ သဒါ ဖလိတာ အမ္ဗဇမ္ဗုအာဒယော ရုက္ခာ နိစ္စပုပ္ဖိတာ စ စမ္ပကမာလာဒယောတိ ဒဿေတိ။ နာနာဒိဇဂဏာယုတာတိ ဝိဝိဓပက္ခိသင်္ဃသမာကုလာ။ မယူရကောဉ္စာဘိရုဒါတိ မယူရေဟိ ကောဉ္စသကုဏေဟိ စ အဘိရုဒါ ဥပဂီတာ။

ဇီဝဉ္ဇီဝကသဒ္ဒေတ္ထာတိ ‘‘ဇီဝ ဇီဝါ’’တိ ဧဝံ ဝိရဝန္တာနံ ဇီဝဉ္ဇီဝကသကုဏာနမ္ပိ ဧတ္ထ သဒ္ဒေါ အတ္ထိ။ ဩဋ္ဌဝစိတ္တကာတိ ‘‘ဥဋ္ဌေဟိ၊ စိတ္တ၊ ဥဋ္ဌေဟိ စိတ္တာ’’တိ ဧဝံ ဝဿမာနာ ဥဋ္ဌဝစိတ္တကသကုဏာပိ တတ္ထ ဝိစရန္တိ။ ကုက္ကုဋကာတိ ဝနကုက္ကုဋကာ။ ကုဠီရကာတိ သုဝဏ္ဏကက္ကဋကာ။ ဝနေတိ ပဒုမဝနေ။ ပေါက္ခရသာတကာတိ ပေါက္ခရသာတကာ နာမ သကုဏာ။

သုကသာဠိကသဒ္ဒေတ္ထာတိ သုကာနဉ္စ သာဠိကာနဉ္စ သဒ္ဒေါ ဧတ္ထ။ ဒဏ္ဍမာဏဝကာနိ စာတိ မနုဿမုခသကုဏာ။ တေ ကိရ ဒွီဟိ ဟတ္ထေဟိ သုဝဏ္ဏဒဏ္ဍံ ဂဟေတွာ ဧကံ ပေါက္ခရပတ္တံ အက္ကမိတွာ အနန္တရေ ပေါက္ခရပတ္တေ သုဝဏ္ဏဒဏ္ဍံ နိက္ခိပန္တာ ဝိစရန္တိ။ သောဘတိ သဗ္ဗကာလံ သာတိ သာ ပေါက္ခရဏီ သဗ္ဗကာလံ သောဘတိ။ ကုဝေရနဠိနီတိ ကုဝေရဿ နဠိနီ ပဒုမသရဘူတာ၊ သာ ဓရဏီ နာမ ပေါက္ခရဏီ သဒါ နိရန္တရံ သောဘတိ။

၂၈၂။ ယဿ ကဿစီတိ ဣဒံ ဝေဿဝဏော အာဋာနာဋိယံ ရက္ခံ နိဋ္ဌပေတွာ တဿာ ပရိကမ္မံ ဒဿေန္တော အာဟ။ တတ္ထ သုဂ္ဂဟိတာတိ အတ္ထဉ္စ ဗျဉ္ဇနဉ္စ ပရိသောဓေတွာ သုဋ္ဌု ဥဂ္ဂဟိတာ။ သမတ္တာ ပရိယာပုတာတိ ပဒဗျဉ္ဇနာနိ အဟာပေတွာ ပရိပုဏ္ဏံ ဥဂ္ဂဟိတာ။ အတ္ထမ္ပိ ပါဠိမ္ပိ ဝိသံဝါဒေတွာ သဗ္ဗသော ဝါ ပန အပ္ပဂုဏံ ကတွာ ဘဏန္တဿ ဟိ ပရိတ္တံ တေဇဝန္တံ န ဟောတိ၊ သဗ္ဗသော ပဂုဏံ ကတွာ ဘဏန္တဿေဝ တေဇဝန္တံ ဟောတိ။ လာဘဟေတု ဥဂ္ဂဟေတွာ ဘဏန္တဿာပိ အတ္ထံ န သာဓေတိ၊ နိဿရဏပက္ခေ ဌတွာ မေတ္တံ ပုရေစာရိကံ ကတွာ ဘဏန္တဿေဝ အတ္ထာယ ဟောတီတိ ဒဿေတိ။ ယက္ခပစာရောတိ ယက္ခပရိစာရကော။

ဝတ္ထုံ ဝါတိ ဃရဝတ္ထုံ ဝါ။ ဝါသံ ဝါတိ တတ္ထ နိဗဒ္ဓဝါသံ ဝါ။ သမိတိန္တိ သမာဂမံ။ အနာဝယှန္တိ န အာဝါဟယုတ္တံ။ အဝိဝယှန္တိ န ဝိဝါဟယုတ္တံ။ တေန သဟ အာဝါဟဝိဝါဟံ န ကရေယျုန္တိ အတ္ထော။ အတ္တာဟိပိ ပရိပုဏ္ဏာဟီတိ ‘‘ကဠာရက္ခိ ကဠာရဒန္တာ’’တိ ဧဝံ ဧတေသံ အတ္တဘာဝံ ဥပနေတွာ ဝုတ္တာဟိ ပရိပုဏ္ဏဗျဉ္ဇနာဟိ ပရိဘာသာဟိ ပရိဘာသေယျုံ ယက္ခအက္ကောသေဟိ နာမ အက္ကောသေယျုန္တိ အတ္ထော။ ရိတ္တမ္ပိဿ ပတ္တန္တိ ဘိက္ခူနံ ပတ္တသဒိသမေဝ လောဟပတ္တံ ဟောတိ။ တံ သီသေ နိက္ကုဇ္ဇိတံ ယာဝ ဂလဝါဋကာ ဘဿတိ။ အထ နံ မဇ္ဈေ အယောခီလေန အာကောဋေန္တိ။

စဏ္ဍာတိ ကောဓနာ။ ရုဒ္ဓါတိ ဝိရုဒ္ဓါ။ ရဘသာတိ ကရဏုတ္တရိယာ။ နေဝ မဟာရာဇာနံ အာဒိယန္တီတိ ဝစနံ န ဂဏှန္တိ၊ အာဏံ န ကရောန္တိ။ မဟာရာဇာနံ ပုရိသကာနန္တိ အဋ္ဌဝီသတိယက္ခသေနာပတီနံ။ ပုရိသကာနန္တိ ယက္ခသေနာပတီနံ ယေ မနဿာ တေသံ။ အဝရုဒ္ဓါ နာမာတိ ပစ္စာမိတ္တာ ဝေရိနော။ ဥဇ္ဈာပေတဗ္ဗန္တိ ပရိတ္တံ ဝတွာ အမနုဿေ ပဋိက္ကမာပေတုံ အသက္ကောန္တေန ဧတေသံ ယက္ခာနံ ဥဇ္ဈာပေတဗ္ဗံ၊ ဧတေ ဇာနာပေတဗ္ဗာတိ အတ္ထော။

ပရိတ္တပရိကမ္မကထာ

ဣဓ ပန ဌတွာ ပရိတ္တဿ ပရိကမ္မံ ကထေတဗ္ဗံ။ ပဌမမေဝ ဟိ အာဋာနာဋိယသုတ္တံ န ဘဏိတဗ္ဗံ၊ မေတ္တသုတ္တံ ဓဇဂ္ဂသုတ္တံ ရတနသုတ္တန္တိ ဣမာနိ သတ္တာဟံ ဘဏိတဗ္ဗာနိ။ သစေ မုဉ္စတိ၊ သုန္ဒရံ။ နော စေ မုဉ္စတိ၊ အာဋာနာဋိယသုတ္တံ ဘဏိတဗ္ဗံ၊ တံ ဘဏန္တေန ဘိက္ခုနာ ပိဋ္ဌံ ဝါ မံသံ ဝါ န ခါဒိတဗ္ဗံ၊ သုသာနေ န ဝသိတဗ္ဗံ။ ကသ္မာ? အမနုဿာ ဩကာသံ လဘန္တိ။ ပရိတ္တကရဏဋ္ဌာနံ ဟရိတုပလိတ္တံ ကာရေတွာ တတ္ထ ပရိသုဒ္ဓံ အာသနံ ပညပေတွာ နိသီဒိတဗ္ဗံ။

ပရိတ္တကာရကော ဘိက္ခု ဝိဟာရတော ဃရံ နေန္တေဟိ ဖလကာဝုဓေဟိ ပရိဝါရေတွာ နေတဗ္ဗော။ အဗ္ဘောကာသေ နိသီဒိတွာ န ဝတ္တဗ္ဗံ၊ ဒွါရဝါတပါနာနိ ပိဒဟိတွာ နိသိန္နေန အာဝုဓဟတ္ထေဟိ သံပရိဝါရိတေန မေတ္တစိတ္တံ ပုရေစာရိကံ ကတွာ ဝတ္တဗ္ဗံ။ ပဌမံ သိက္ခာပဒါနိ ဂါဟာပေတွာ သီလေ ပတိဋ္ဌိတဿ ပရိတ္တံ ကာတဗ္ဗံ။ ဧဝမ္ပိ မောစေတုံ အသက္ကောန္တေန ဝိဟာရံ အာနေတွာ စေတိယင်္ဂဏေ နိပဇ္ဇာပေတွာ အာသနပူဇံ ကာရေတွာ ဒီပေ ဇာလာပေတွာ စေတိယင်္ဂဏံ သမ္မဇ္ဇိတွာ မင်္ဂလကထာ ဝတ္တဗ္ဗာ။ သဗ္ဗသန္နိပါတော ဃောသေတဗ္ဗော။ ဝိဟာရဿ ဥပဝနေ ဇေဋ္ဌကရုက္ခော နာမ ဟောတိ၊ တတ္ထ ဘိက္ခုသင်္ဃော တုမှာကံ အာဂမနံ ပဋိမာနေတီတိ ပဟိဏိတဗ္ဗံ။ သဗ္ဗသန္နိပါတဋ္ဌာနေ အနာဂန္တုံ နာမ န လဗ္ဘတိ။ တတော အမနုဿဂဟိတကော ‘‘တွံ ကော နာမာ’’တိ ပုစ္ဆိတဗ္ဗော။ နာမေ ကထိတေ နာမေနေဝ အာလပိတဗ္ဗော။ ဣတ္ထန္နာမ တုယှံ မာလာဂန္ဓာဒီသု ပတ္တိ အာသနပူဇာယ ပတ္တိ ပိဏ္ဍပါတေ ပတ္တိ၊ ဘိက္ခုသင်္ဃေန တုယှံ ပဏ္ဏာကာရတ္ထာယ မဟာမင်္ဂလကထာ ဝုတ္တာ၊ ဘိက္ခုသင်္ဃေ ဂါရဝေန ဧတံ မုဉ္စာဟီတိ မောစေတဗ္ဗော။ သစေ န မုဉ္စတိ၊ ဒေဝတာနံ အာရောစေတဗ္ဗံ ‘‘တုမှေ ဇာနာထ၊ အယံ အမနုဿော အမှာကံ ဝစနံ န ကရောတိ၊ မယံ ဗုဒ္ဓအာဏံ ကရိဿာမာ’’တိ ပရိတ္တံ ကာတဗ္ဗံ။ ဧတံ တာဝ ဂိဟီနံ ပရိကမ္မံ။ သစေ ပန ဘိက္ခု အမနုဿေန ဂဟိတော ဟောတိ၊ အာသနာနိ ဓောဝိတွာ သဗ္ဗသန္နိပါတံ ဃောသာပေတွာ ဂန္ဓမာလာဒီသု ပတ္တိံ ဒတွာ ပရိတ္တံ ဘဏိတဗ္ဗံ။ ဣဒံ ဘိက္ခူနံ ပရိကမ္မံ။

ဝိက္ကန္ဒိတဗ္ဗန္တိ သဗ္ဗသန္နိပါတံ ဃောသာပေတွာ အဋ္ဌဝီသတိ ယက္ခသေနာပတယော ကန္ဒိတဗ္ဗာ။ ဝိရဝိတဗ္ဗန္တိ ‘‘အယံ ယက္ခော ဂဏှာတီ’’တိအာဒီနိ ဘဏန္တေန တေဟိ သဒ္ဓိံ ကထေတဗ္ဗံ။ တတ္ထ ဂဏှာတီတိ သရီရေ အဓိမုစ္စတိ။ အာဝိသတီတိ တဿေဝ ဝေဝစနံ။ အထ ဝါ လဂ္ဂတိ န အပေတီတိ ဝုတ္တံ ဟောတိ။ ဟေဌေတီတိ ဥပ္ပန္နံ ရောဂံ ဝဍ္ဎေန္တော ဗာဓတိ။ ဝိဟေဌေတီတိ တဿေဝ ဝေဝစနံ။ ဟိံသတီတိ အပ္ပမံသလောဟိတံ ကရောန္တော ဒုက္ခာပေတိ။ ဝိဟိံသတီတိ တဿေဝ ဝေဝစနံ။ န မုဉ္စတီတိ အပ္ပမာဒဂါဟော ဟုတွာ မုဉ္စိတုံ န ဣစ္ဆတိ၊ ဧဝံ ဧတေသံ ဝိရဝိတဗ္ဗံ။

၂၈၃။ ဣဒါနိ ယေသံ ဧဝံ ဝိရဝိတဗ္ဗံ၊ တေ ဒဿေတုံ ကတမေသံ ယက္ခာနန္တိအာဒိမာဟ။ တတ္ထ ဣန္ဒော သောမောတိအာဒီနိ တေသံ နာမာနိ။ တေသု ဝေဿာမိတ္တောတိ ဝေဿာမိတ္တပဗ္ဗတဝါသီ ဧကော ယက္ခော။ ယုဂန္ဓရောပိ ယုဂန္ဓရပဗ္ဗတဝါသီယေဝ။ ဟိရိ နေတ္တိ စ မန္ဒိယောတိ ဟိရိ စ နေတ္တိ စ မန္ဒိယော စ။ မဏိ မာဏိ ဝရော ဒီဃောတိ မဏိ စ မာဏိ စ ဝရော စ ဒီဃော စ။ အထော သေရီသကော သဟာတိ တေဟိ သဟ အညော သေရီသကော နာမ။ ‘‘ဣမေသံ ယက္ခာနံ…ပေ… ဥဇ္ဈာပေတဗ္ဗ’’န္တိ အယံ ယက္ခော ဣမံ ဟေဌေတိ ဝိဟေဌေတိ န မုဉ္စတီတိ ဧဝံ ဧတေသံ ယက္ခသေနာပတီနံ အာရောစေတဗ္ဗံ။ တတော တေ ဘိက္ခုသင်္ဃော အတ္တနော ဓမ္မအာဏံ ကရောတိ၊ မယမ္ပိ အမှာကံ ယက္ခရာဇအာဏံ ကရောမာတိ ဥဿုက္ကံ ကရိဿန္တိ။ ဧဝံ အမနုဿာနံ ဩကာသော န ဘဝိဿတိ၊ ဗုဒ္ဓသာဝကာနံ ဖာသုဝိဟာရော စ ဘဝိဿတီတိ ဒဿေန္တော ‘‘အယံ ခေါ သာ၊ မာရိသ၊ အာဋာနာဋိယာ ရက္ခာ’’တိအာဒိမာဟ။ တံ သဗ္ဗံ၊ တတော ပရဉ္စ ဥတ္တာနတ္ထမေဝါတိ။

သုမင်္ဂလဝိလာသိနိယာ ဒီဃနိကာယဋ္ဌကထာယ

အာဋာနာဋိယသုတ္တဝဏ္ဏနာ နိဋ္ဌိတာ။