📜

၂။ အဘိသမယသံယုတ္တံ

၁။ နခသိခါသုတ္တဝဏ္ဏနာ

၇၄။ အဘိသမယသံယုတ္တဿ ပဌမေ နခသိခါယန္တိ မံသဋ္ဌာနေန ဝိမုတ္တေ နခဂ္ဂေ။ နခသိခါ စ နာမ လောကိယာနံ မဟတီပိ ဟောတိ၊ သတ္ထု ပန ရတ္တုပ္ပလပတ္တကောဋိ ဝိယ သုခုမာ။ ကထံ ပနေတ္ထ ပံသု ပတိဋ္ဌိတောတိ? အဓိဋ္ဌာနဗလေန။ ဘဂဝတာ ဟိ အတ္ထံ ဉာပေတုကာမေန အဓိဋ္ဌာနဗလေန တတ္ထ ပတိဋ္ဌာပိတော။ သတိမံ ကလန္တိ မဟာပထဝိယာ ပံသုံ သတကောဋ္ဌာသေ ကတွာ တတော ဧကကောဋ္ဌာသံ။ ပရတောပိ ဧသေဝ နယော။ အဘိသမေတာဝိနောတိ ပညာယ အရိယသစ္စာနိ အဘိသမေတွာ ဌိတဿ။ ပုရိမံ ဒုက္ခက္ခန္ဓံ ပရိက္ခီဏံ ပရိယာဒိဏ္ဏံ ဥပနိဓာယာတိ ဧတဒေဝ ဗဟုတရံ ဒုက္ခံ၊ ယဒိဒံ ပရိက္ခီဏန္တိ ဧဝံ ပဌမံ ဝုတ္တံ ဒုက္ခက္ခန္ဓံ ဥပနိဓာယ၊ ဉာဏေန တံ တဿ သန္တိကေ ဌပေတွာ ဥပပရိက္ခိယမာနေတိ အတ္ထော။ ကတမံ ပနေတ္ထ ပုရိမဒုက္ခံ နာမ? ယံ ပရိက္ခီဏံ။ ကတမံ ပန ပရိက္ခီဏံ? ယံ ပဌမမဂ္ဂဿ အဘာဝိတတ္တာ ဥပ္ပဇ္ဇေယျ။ ကတမံ ပန ဥပနိဓာယ? ယံ သတ္တသု အတ္တဘာဝေသု အပါယေ အဋ္ဌမဉ္စ ပဋိသန္ဓိံ အာဒိံ ကတွာ ယတ္ထ ကတ္ထစိ ဥပ္ပဇ္ဇေယျ၊ သဗ္ဗံ တံ ပရိက္ခီဏန္တိ ဝေဒိတဗ္ဗံ။ သတ္တက္ခတ္တုန္တိ သတ္တ ဝါရေ၊ သတ္တသု အတ္တဘာဝေသူတိ အတ္ထော။ ပရမတာတိ ဣဒမဿ ပရံ ပမာဏန္တိ ဒဿေတိ။ မဟတ္ထိယောတိ မဟတော အတ္ထဿ နိပ္ဖာဒကော။ ပဌမံ။

၂။ ပေါက္ခရဏီသုတ္တဝဏ္ဏနာ

၇၅။ ဒုတိယေ ပေါက္ခရဏီတိ ဝါပီ။ ဥဗ္ဗေဓေနာတိ ဂမ္ဘီရတာယ။ သမတိတ္တိကာတိ မုခဝဋ္ဋိသမာ။ ကာကပေယျာတိ သက္ကာ ဟောတိ တီရေ ဌိတေန ကာကေန ပကတိယာပိ မုခတုဏ္ဍိကံ ဩတာရေတွာ ပါတုံ။ ဒုတိယံ။

၃။ သံဘေဇ္ဇဥဒကသုတ္တာဒိဝဏ္ဏနာ

၇၆-၇၇။ တတိယေ ယတ္ထိမာတိ ယသ္မိံ သမ္ဘိဇ္ဇဋ္ဌာနေ ဣမာ။ သံသန္ဒန္တီတိ သမာဂန္တွာ သန္ဒန္တိ။ သမေန္တီတိ သမာဂစ္ဆန္တိ။ ဒွေ ဝါ တိ ဝါတိ ဒွေ ဝါ တီဏိ ဝါ။ ဥဒကဖုသိတာနီတိ ဥဒကဗိန္ဒူနိ။ သံဘေဇ္ဇဥဒကန္တိ အညာဟိ နဒီဟိ သဒ္ဓိံ သမ္ဘိန္နဋ္ဌာနေ ဥဒကံ။ စတုတ္ထံ ဥတ္တာနတ္ထမေဝ။ တတိယစတုတ္ထာနိ။

၅။ ပထဝီသုတ္တာဒိဝဏ္ဏနာ

၇၈-၈၄။ ပဉ္စမေ မဟာပထဝိယာတိ စက္ကဝါဠဗ္ဘန္တရာယ မဟာပထဝိယာ ဥဒ္ဓရိတွာ။ ကောလဋ္ဌိမတ္တိယောတိ ပဒရဋ္ဌိပမာဏာ။ ဂုဠိကာတိ မတ္တိကဂုဠိကာ။ ဥပနိက္ခိပေယျာတိ ဧကသ္မိံ ဌာနေ ဌပေယျ။ ဆဋ္ဌာဒီသု ဝုတ္တနယေနေဝ အတ္ထော ဝေဒိတဗ္ဗော။ ပရိယောသာနေ ပန အညတိတ္ထိယသမဏဗြာဟ္မဏပရိဗ္ဗာဇကာနံ အဓိဂမောတိ ဗာဟိရကာနံ သဗ္ဗောပိ ဂုဏာဓိဂမော ပဌမမဂ္ဂေန အဓိဂတဂုဏာနံ သတဘာဂမ္ပိ သဟဿဘာဂမ္ပိ သတသဟဿဘာဂမ္ပိ န ဥပဂစ္ဆတီတိ။ ပဉ္စမာဒီနိ။

အဘိသမယသံယုတ္တဝဏ္ဏနာ နိဋ္ဌိတာ။