📜

၉။ သုပဏ္ဏသံယုတ္တဝဏ္ဏနာ

၃၉၂-၄၃၇။ ပတ္တာနန္တိ ဥဘောသု ပက္ခေသု ပတ္တာနံ။ ဝဏ္ဏဝန္တတာယာတိ အတိသယေန ဝိစိတ္တဝဏ္ဏတာယ။ အတိသယတ္ထော ဟိ အယံ ဝန္တ-သဒ္ဒေါ။ ပုရိမနယေနာတိ နာဂသံယုတ္တေ ပဌမသုတ္တေ ဝုတ္တနယေန။ ဥဒ္ဓရန္တီတိ သမုဒ္ဒတော ဥဒ္ဓရန္တိ၊ ပထဝန္တရပဗ္ဗတန္တရတော ပန တေသံ ဥဒ္ဓရဏံ ဒုက္ကရမေဝ။ ပဏီတတရေတိ ဗလေန ပဏီတတရေ၊ ဗလဝန္တေတိ အတ္ထော။ အနုဒ္ဓရဏီယနာဂါတိ အာနုဘာဝမဟန္တတာယ စ ဝသနဋ္ဌာနဝိဒုဂ္ဂတာယ စ ဥဒ္ဓရိတုံ အသက္ကုဏေယျာ နာဂါ။ တေ ‘‘သတ္တဝိဓာ’’တိ ဝတွာ သရူပတော ဝသနဋ္ဌာနတော စ ဒဿေန္တော ‘‘ကမ္ဗလဿတရာ’’တိအာဒိမာဟ။ တတ္ထ ကမ္ဗလဿတရာ ဓတရဋ္ဌာတိ ဣမေ ဇာတိဝသေန ဝုတ္တာ။ သတ္တသီဒန္တရဝါသိနောတိ သတ္တဝိဓသီဒသမုဒ္ဒဝါသိနော။ ပထဝိဋ္ဌကာတိ ပထဝန္တရဝါသိနော၊ တထာ ပဗ္ဗတဋ္ဌကာ။ တေ စ ဝိမာနဝါသိနော။ တေ နာဂေ ကောစိ သုပဏ္ဏော ဥဒ္ဓရိတုံ န သက္ကောတီတိ သမ္ဗန္ဓော။ သေသန္တိ ‘‘ကာယေန ဒွယကာရိနော’’တိအာဒီသု ယံ ဝတ္တဗ္ဗံ၊ တံ သဗ္ဗံ နာဂသံယုတ္တေ ဝုတ္တနယမေဝ၊ တတ္ထ စ ဝုတ္တနယေနေဝ အတ္ထော ဝေဒိတဗ္ဗောတိ အဓိပ္ပာယော။

သုပဏ္ဏသံယုတ္တဝဏ္ဏနာ နိဋ္ဌိတာ။