📜

၆။ မောဂ္ဂလ္လာနသံယုတ္တံ

၁-၈။ ပဌမဇ္ဈာနပဉှသုတ္တာဒိဝဏ္ဏနာ

၃၃၂-၃၃၉။ ကာမသဟဂတေသု သညာမနသိကာရေသု ဥပဋ္ဌဟန္တေသု ဗျာပါဒါဒိသဟဂတာပိ သညာမနသိကာရာ ယထာပစ္စယံ ဥပဋ္ဌဟန္တိယေဝါတိ ဝုတ္တံ ‘‘ကာမသဟဂတာတိ ပဉ္စနီဝရဏသဟဂတာ’’တိ။ နီဝရဏာနဉှေတ္ထ နိဒဿနမတ္တမေတံ၊ ယဒိဒံ ကာမဂ္ဂဟဏံ။ ပဟီနာဝသေသာ စေတ္ထ နီဝရဏာ ဝေဒိတဗ္ဗာ၊ တသ္မာ ပဉ္စဂ္ဂဟဏံ န ကတ္တဗ္ဗံ။ တဿာတိ မဟာမောဂ္ဂလ္လာနတ္ထေရဿ သန္တတော ဥပဋ္ဌဟိံသု အစိဏ္ဏဝသိတာယ။ တေနာဟ ‘‘ဟာနဘာဂိယံ နာမ အဟောသီ’’တိ။ အာရမ္မဏ…ပေ… သဟဂတန္တိ ဝုတ္တံ ဣတရေသံ အဘာဝတော။

ပဌမဇ္ဈာနပဉှသုတ္တာဒိဝဏ္ဏနာ နိဋ္ဌိတာ။

၉။ အနိမိတ္တပဉှသုတ္တဝဏ္ဏနာ

၃၄၀။ ဝိပဿနာသမာဓိံယေဝ၊ န ဖလသမာဓိံ။ ဆေဇ္ဇကိစ္စံ န နိပ္ဖဇ္ဇတိ အဝိစ္ဆေဒဝသေန အပ္ပဝတ္တနတော။ နိကန္တီတိ ဝိပဿနံ အဿာဒေန္တီ ပဝတ္တတဏှာ။ သာဓေတုံ နာသက္ခိ ဥပက္ကိလိဋ္ဌတ္တာ။ နိမိတ္တာနုသာရီတိ နိစ္စသုခအတ္တနိမိတ္တာနံ အပူရဏတော ရာဂဒေါသမောဟနိမိတ္တာနိပေတ္ထ နိမိတ္တာနေဝ။ ဝုဋ္ဌာန…ပေ… သမာဓိန္တိ ဧတေန ယာဝ မဂ္ဂေါ နာဓိဂတော၊ တာဝ ဝုဋ္ဌာနဂါမိနိဝိပဿနမနုယုဉ္ဇန္တောပိ ယထာရဟံ အနိမိတ္တံ အပ္ပဏိဟိတံ သုညတံ စေတောသမာဓိံ အနုယုတ္တော ဝိဟရတီတိ ဝတ္တဗ္ဗတံ အရဟတီတိ ဒဿေတိ။ ဝိပဿနာသမ္ပယုတ္တန္တိ ဝိပဿနာသင်္ခါတဉာဏသမ္ပယုတ္တံ။ စေတောသမာဓိန္တိ စိတ္တသီသေန ဝိပဿနာသမာဓိမာဟ။ ဥပရိမဂ္ဂဖလသမာဓိန္တိ ပဌမမဂ္ဂသမာဓိဿ ပဂေဝ အဓိဂတတ္တာ။

အနိမိတ္တပဉှသုတ္တဝဏ္ဏနာ နိဋ္ဌိတာ။

၁၀-၁၁။ သက္ကသုတ္တာဒိဝဏ္ဏနာ

၃၄၁-၃၄၂။ အဝေစ္စပ္ပသာဒေနာတိ ဝတ္ထုတ္တယံ ယာထာဝတော ဉတွာ ဥပ္ပန္နပသာဒေန၊ မဂ္ဂေနာဂတပသာဒေနာတိ အတ္ထော။ သော ပန ကေနစိ အသံဟာရိယော အသမ္ပဝေဓီတိ အာဟ ‘‘အစလပ္ပသာဒေနာ’’တိ။ အဘိဘဝန္တိ အတ္တနော ပုညာနုဘာဝေန။

သက္ကသုတ္တာဒိဝဏ္ဏနာ နိဋ္ဌိတာ။

မောဂ္ဂလ္လာနသံယုတ္တဝဏ္ဏနာ နိဋ္ဌိတာ။