📜

၉။ အသင်္ခတသံယုတ္တံ

၁။ ပဌမဝဂ္ဂေါ

၁-၁၁။ ကာယဂတာသတိသုတ္တာဒိဝဏ္ဏနာ

၃၆၆-၃၇၆။ အသင်္ခတန္တိ န သင်္ခတံ ဟေတုပစ္စယေတိ။ တေနာဟ ‘‘အကတ’’န္တိ။ ဟိတံ ဧသန္တေနာတိ မေတ္တာယန္တေန။ အနုကမ္ပမာနေနာတိ ကရုဏာယန္တေန။ ဥပါဒါယာတိ အာဒိယိတွာတိ အယမတ္ထောတိအာဟ ‘‘စိတ္တေန ပရိဂ္ဂဟေတွာ’’တိ။ အဝိပရီတဓမ္မဒေသနာတိ အဝိပရီတဓမ္မဿ ဒေသနာ၊ ပဋိပတ္တိမ္ပိ သာဝကာ ဝိယ ဂရုကော ဘဂဝါ။ ဒါယဇ္ဇံ အတ္တနော အဓိဋ္ဌိတံ နိယျာတေတိ။

ဘိက္ခာသမ္ပတ္တိကာလာဒီနံ သတ္တန္နံ သပ္ပာယာနံ သမ္ပတ္တိယာ လဗ္ဘနကာလေ။ ဝိပတ္တိကာလေ ပန ဧတ္ထ ဝုတ္တဝိပရိယာယေန အတ္ထော ဝေဒိတဗ္ဗော။ ဘာရိယန္တိ ဒုက္ခဗဟုလတာယ ဒါရုဏံ။ အမှာကံ သန္တိကာ လဒ္ဓဗ္ဗာ။ တုမှာကံ အနုသာသနီတိ တုမှာကံ ဒါတဗ္ဗာ အနုသာသနီ။

ကာယဂတာသတိသုတ္တာဒိဝဏ္ဏနာ နိဋ္ဌိတာ။

၂။ ဒုတိယဝဂ္ဂေါ

၂၃-၃၃။ အသင်္ခတသုတ္တာဒိဝဏ္ဏနာ

၃၇၇-၄၀၉။ တတ္ထ စ နတ္ထိ ဧတ္ထ တဏှာသင်္ခါတံ နတံ၊ နတ္ထိ ဧတသ္မိံ ဝါ အဓိဂတေ ပုဂ္ဂလဘာဝေါတိ အနတံ။ အနာသဝန္တိ ဧတ္ထာပိ ဧသေဝ နယော။ သစ္စဓမ္မတာယ သစ္စံ။ ဝဋ္ဋဒုက္ခတော ပါရမေတီတိ ပါရံ။ သဏှဋ္ဌေနာတိ သုခုမဋ္ဌေန နိပုဏံ။ တတော ဧဝ ဒုဒ္ဒသတာယ။ အဇဇ္ဇရံ နိစ္စသဘာဝတ္တာ။ နတ္ထိ ဧတဿ နိဒဿနန္တိ ဝါ အနိဒဿနံ။ ဧတသ္မိံ အဓိဂတေ နတ္ထိ သံသာရေ။ ပပဉ္စန္တိ ဝါ နိပ္ပပဉ္စံ။

ဧတသ္မိံ အဓိဂတေ ပုဂ္ဂလဿ မရဏံ နတ္ထီတိ ဝါ အမတံ။ အတပ္ပကဋ္ဌေန ဝါ ပဏီတံ။ သုခဟေတုတာယ ဝါ သိဝံ။ တဏှာ ခီယန္တိ ဧတ္ထာတိ တဏှက္ခယံ။

အညဿ တာဒိသဿ အဘာဝတော ဝိမှာပနီယတာယ အဘူတမေဝါတိ။ ကုတောစိ ပစ္စယတော အနိဗ္ဗတ္တမေဝ ဟုတွာ ဘူတံ ဝိဇ္ဇမာနံ။ တေနာဟ ‘‘အဇာတံ ဟုတွာ အတ္ထီ’’တိ။ နတ္ထိ ဧတ္ထ ဒုက္ခန္တိ နိဒ္ဒုက္ခံ၊ တဿ ဘာဝေါ နိဒ္ဒုက္ခတ္တံ။ တသ္မာ အနီတိကံ ဤတိရဟိတံ။ ဝါနံ ဝုစ္စတိ တဏှာ၊ တဒဘာဝေန နိဗ္ဗာနံ။ ဗျာဗဇ္ဈံ ဝုစ္စတိ ဒုက္ခံ၊ တဒဘာဝေန အဗျာဗဇ္ဈံ။ ပရမတ္ထတော သစ္စတော သုဒ္ဓိဘာဝေန။ ကာမာ ဧဝ ပုထုဇ္ဇနေဟိ အလ္လီယိတဗ္ဗတော အာလယာ။ ဧသ နယော သေသေသုပိ။ ပတိဋ္ဌဋ္ဌေနာတိ ပတိဋ္ဌာဘာဝေန ဝဋ္ဋဒုက္ခတော မုစ္စိတုကာမာနံ ဒီပသဒိသံ ဩဃေဟိ အနဇ္ဈောတ္ထရဏီယတ္တာ။ အလ္လီယိတဗ္ဗယုတ္တဋ္ဌေနာတိ အလ္လီယိတုံ အရဟဘာဝတော။ တာယနဋ္ဌေနာတိ သပရတာယနဋ္ဌေန။ ဘယသရဏဋ္ဌေနာတိ ဘယဿ ဟိံသနဋ္ဌေန။ သေဋ္ဌံ ဥတ္တမံ။ ဂတီတိ ဂန္ဓဗ္ဗဋ္ဌာနံ။

အသင်္ခတသုတ္တာဒိဝဏ္ဏနာ နိဋ္ဌိတာ။

အသင်္ခတသံယုတ္တဝဏ္ဏနာ နိဋ္ဌိတာ။